نظيف القطنه طلعت قصيرة التيله




للمرة التانيه على التوازى التوالى المحورى يتحرج القطن طويل التيله ويتحول بقدرة قادر لقصير التيله ويصبح اضحوكه فى المولد كما الارجوز الخايب
وحظه دوننا عن كل القطن انه يبقى زى قليل البخت اللى عضه الكلب فى المولد تقريبا انا بدات اشك انه فى الوزاره دى علشان يتلقى الاحراج من الداخل والخارج وانا علشان قلبى طيب وبنت حلال متصفيه من كل الدم اللى عندى علشان هما نشفوه منهم لله احب اقول استقيل بقى يا راجل ربنا يرحمك هتقصر اكتر من كده تروح فين القصه وما فيها وفى بورسعيد هجيب لكم الكلام خبط لزق وهعلق على رد القطنه

البظاظو «رئيس الوزراء»: «الفساد فى كل مكان.. وحاسس إن البلد مش بلدى»



وقف الطالب عبد الله أحمد بظاظو فى مواجهة الدكتور أحمد نظيف، رئيس مجلس الوزراء، وهتف قائلا: «أشعر بالفساد فى كل مكان وبقيت أتنفسه ومش حاسس بمقاومة من جانب الحكومة. كل يوم الصبح أحس بالغربة، وإن البلد مش بلدى. ليه المواطن يشعر أن كرامته بره أو جوه مش موجودة، وهل بكيت سيادتك عند غرق العبارة والجنود اللى بيموتوا على الحدود».

( يبكى تحت الليالى والخوف من فقد الكرسى يملى القلوب ، مش عارفه ليه حسيت ان الواد ده كان ماشى حلو وفجأه عواطف قفشت فيه من قفاه واتنحنح هو ده بيبكى ده بفلوسى يا كليبه وبعدين الميه مبتوصلش فى العالى كده بسهوله فاكيد مش هيبكى عيال ساذجه صحيح)

وفور انتهاء الطالب من كلمته دوت قاعة المسرح بالتصفيق لمدة تزيد على ٥ دقائق.

خمس دقايق طيب اجيب اوباما علشان يصقفوا اكتر ولا ايه طيب الواد قال كلمتين جامدين بجد هو الشعب ده مبيصقفش غير لحاجه واحد الرقاصه واعتقد اوباما شويه زيها لان هز قلوبنا كلنا تيررررررررارررررر مين بيحدف طماطم هنا يا عيال انا مقصدش حاجه وحشه )

كان هذا واحدا من سلسلة المواجهات الساخنة التى دارت بين طلاب الجامعات ورئيس الوزراء فى معسكر إعداد القادة فى بورسعيد مساء أمس الأول، وكانت معظم الأسئلة حول الفساد وبيع القطاع العام وتصدير الغاز لإسرائيل والعلاقة مع أمريكا وإيران وإثيوبيا والغلاء والبطالة.

وصل عدد الأسئلة إلى ١٩ بعدد الجامعات المشاركة.


واستهل رئيس الوزراء الردود باعترافه بأن الأسئلة كلها فى الصميم،

( اى والله والبعيد معندوش ميه بقى علشان يحس شويه وهو يعنى مكنش عارف الاسئله دى ولا كان غايب من مصر ساعه لما حصل ده ادى اخره اللى له واسطه فى مصر يغيب كل الحصص بتاعت الفساد براحته انا هطالب انهم يلغوا الاجازة فى حصص الفساد )

وقال: هى الحكومة المصرية تبقى مين؟

( تبقى ناس متعفنه من اول ريحه شرابها لغايه شعر راسهم يعععععععع )

اللى مالوش قريب فى الحكومة يرفع ايده؟

( انا ارفع ايدى ورجلى وودنى كمان بس انهى حكومه حكومه الوز وابن العز طبعا معنديش )

لو الحكومة فاسدة نبقى كلنا فاسدين..

( شفيق يا راجل انت مصدق بقك الكبير ده ايون احنا عندنا فساد لاننا اتعلمنا خلاص كله بيهبش فى التورته اذا كان موظف بيتنيل على عينه يسرق بتمرمطوا اللى خلفوه انما لو باشا كبير بقدره قادر او بعصاية الساحره الطيبه بتنقله بره مصر قبل الواحد ما بيغمض له عين )


0نحن نبذل جهودا غير عادية لمقاومة الفساد،

( ايوة بياخدوا كل حاجه فى جيوبهم علشان يضمنوا يا حلوين محدش ياخد هو بيحافظوا لكم على فلوسكم اما شعب نمرود صحيح حتى شوفوا نتيجه بذل المجهود بيعرقوا ويسيبوا الناس تخبط دماغها فى الحيطه ويسافروا يعمل مانيكير وباديكير)

وفسادنا من نوع مختلف،

( انت هتقولى ده احمر وبترتر الفساد بتاعكوا )

الفساد اللى عندنا والحمد لله منتشر فى حتت صغيرة.

( ايوه فى تهريب فلوس صفقات شراء اراضى وتصقيعها نهب الشعب فى ضرايب وبلاوى زرقه دى بسيطه خالص هو الشعب مياكلش ميه ولا يشرب محشى ويكتفى بالحشيش وهيخف ان شاء الله )


ووجه نظيف كلامه للطالب عبد الله بظاظو قائلاً: لا يا حبيبى مصر دى كبيرة قوى وإحنا ما بعناش بلدنا إحنا بنينا بلدنا

( ايوه مبعناش باماره القرى السياحيه اللى فى سيناء والاراضى اللى فى طابا مش مخلين جنس مصرى يعمل مشروع ولو عمل فعلا فعلا كأنهم بيرموا له عمل على الباب ارض توشكى مش اتباعت ولا مصنع دمياط اللى كان هيتعمل فطيس ولا الفنادق ولا القرى السياحيه اللى اصحابها اجانب مصر مش اتباعت خالص مصر استلفوها شويه وهيرجعوها ركزوا انتم بس )


، عايز ادعو زميلنا ده يزور القرية الذكية

( فعلا قريه ذكيه ووزير اسم الله عليه اغبى من ولا بلاش علشان مظلمش حاجات تانيه ملهاش ذنب )

علشان يعرف مصر، مصر العاشر من رمضان

( هئ هئ هئ ايون اللى مهجوره من السكان والمصانع طالع تربنتين اللى خلفوهو مصر مدينه بدر اللى بقالنا داخلين على تلات سنين مش عارفين نركب خط تليفون للمصنع قبل ما يشتغل حجزين بقالنا سنه

وآلاف الأفدنة التى تصدر البطاطس لأوروبا

( على ايدى بطاطس بزمتك مش عيب نبقى بلد القطن والقمح وتقولى بطاطس يا راجل يا فيرى )

، مصر زويل ونجيب محفوظ والبرادعى والسادات وجمال عبد الناصر وحسنى مبارك

( اخص ونسيت جمال مبارك والوزراه والحكومه وانا وانت ورقصنى يا جدع تيت تيت تي )

ونسى يقول مصر امراض وعشوائيات وسرقه ونهب ودمار فى اماكن كتير نسى يقول مصر مجاملات وحرايق واهمال وانحدار فى المستوى بين الناس من غلبهم

نسى يقول مصر اطفال بتتعالج فى كوليدور المستشفيات

نسى يقول مصر شباب بتغرق فى البحر وناس بتموت على رغيف العيش وناس بتموت من حسرتها على ولادها اللى بيرجعوا فى صناديق خشب

نسى يقول مصر الفراعنه بنوا الهرم واحنا حكومتنا قضت على الفراعنه وعلى احفادهم نسى يقول مصر بقت ملكيه خاصه وعزبه خاصه واتحولت لساحه معارك نسى يقول مصر راحت تجيب ورقه بوسطه ومجتش هى فين مصر دى منك لله

انا بجد مقهورة منه وموجوعه هما لسه مستهيفنا للدرجه دى ولا مناخيرهم اتقطعت مش عارفين يشموا الفساد انا تعبت منهم لدرجه قرفى من كل حاجه

يالا ربنا يستر فى اللى جاى ولو انى عارفه انه مش هيبقى اسوء من اللى احنا فيه

ملحوظه الخبر من المصرى اليوم اللهى يحرق دمهم انطح هنا

كان معكم لواء اركان حراب برتبه عميد اعالى الترع والبحار ابى هانم بتنجانى


حكمه الامبراطوه


كيس الجوافه اتحول اومليت افرحوا يا عيال .

51 اخبط وقول رايك:

بدراوى said...

اول تعليق
صح
؟!

مـحـمـد مـفـيـد said...

لنا الله

فتاه من الصعيد said...

أحنا ما بعناش بلدنا ..... أحنا أجرناها مفروشه ......ههههههههه

المهم أن القريه الغبيه دي اللي بيتفشخر بيها .... من ساعه ما اتعملت وبيانات الناس كلها غلط ........ علشان يطلعولك شهاده ميلاد كمبيوتر تلاقي ابوكي موش ابوكي ....... واخواتك بقيوا الجيران ....... والقلعه جنب البحر

والبطاطس بيرجعوهالنا من اوروبا علشان معفنه

وبعدين سعيد قوي بالبطاطس ....... وموش زعلان على القمح والذره والسبح وفوانيس رمضان اللي بنستوردها

بس بزمتك في رئيس وزاره الطف من كده ....... كوميدي بالدرجه الأولى
ده انا ضحكت ضحك

بدراوى said...

الخبر على مصراوى
بتفاصيل اكثر
http://www.masrawy.com/News/Egypt/Politics/2009/august/4/nazif.aspx
بس طبعاً خبر المصرى اليوم
فيه فن الخبر الصحفى

انما مصراوى ناقل عن وكالة انباء الشرق الأوسط
------------
شوفى الخبر ده كمان
ده قديم شوية
من حوالى شهر
http://www.almasry-alyoum.com/article2.aspx?ArticleID=218573

بدراوى said...

أبو اللى عملك رئيس وزرا
المشكلة مش حاسين بأى شىء
و لا حاسين ان الناس خلاص جابت اخرها خلاص
من كل حاجة

لأ و يطلع التيييت ابراهيم سليمان يقولك خدمت البلد لوجه الله

نفسى اشتم كدة
بس بلاش

كل شىء جميل كل شىء زى الفل

حسبى الله و نعم الوكيل

مصر جايبالكوا بطاطس شبسى يا ولاد الفقرية
!!!

nor said...

ممكن أبوسك........أووووووووووووووووووومه
و ده بقي مسموح لك تعضيه في منخيره
تحياتي لكي ايها الثائرة الجميلة

mUsLiM said...

يا بنتى حرام عليكى خلتينى أعيط من الضحك

سياسة ايه دى بقى اللى هنتناقش فيها

لما انا مش قادر امسك نفسى

بجد اقسم بالله انا بتسمتع بالقراءة ليكى ، انتى بتهلكينى من الضحك

بس مش معنى كده ان كلامك ليس ذو قيمة

لا أبدا

كلامك انا متفق معاه بالمره وانا سعيد جدا انى أقرأ هذا الكلام من فتاة مصريه

انا فرحان بيكى والله

ربنا يعزك ويكتر من أمثالك

بس ليا سؤال صغنون عندى قااااااااد كده

(شفتى ايدى وانا بكتب)

ههههههه

ايه هوا تربنتين اللى خلفوهم

ههههههههههههههه

ايه تربنتين دى يا بنتى

انتى مشكله والله

السلام عليكم

Appy said...

بدراوى
=========
ايون فعلا على باب المدونه انت قاعد طيب ابقى خبط






محمد مفيد
==========
وربنا خلق لينا عقل يا ابو العبدين المفروض الناس تستخدمه شويه

بدراوى said...

اه صحيح الراجل بيقول
الفساد اللى عندنا و الحمد لله منتشر فى حتت صغيرة

لأ لا مؤاخذة ده منتشر فى حتت حساسة

Appy said...

فتاه من الصعيد
============
لا الصراحه الفقرات الكوميديه من ابو الغيط ده دمه تقيل وشنبه رخم ومبحبوش
وبعدين هى اتاجرت قانون قديم مينفعش يفكوا العقد







بدراوى
=======
متشتمش قول تيت بس مسموح هنا اعصابك يا ابنى انت لسه صغير وحاضر هشوف اللينات بس لو طلعت وحشه هعضك من مناخيرك

Appy said...

نور
=========
اهو ده بقى الوحيد اللى انقرف يا اوختى








مسلم
======
تربنتين فى صحيح ابى والحياه الاكترونيه بدل كلمه عين او اهل طلع مثلا روح اهلنا عين اهلنا كده يعنى بس دى اوقى شويه
ربنا يكرمك يا رب ويبارك فيك منورنى دايما

Appy said...

بدراوى
=========
هو كان بيكلم انهى شباب وبيقولهم يفكروا اذا كان البعيد مبيفكرش

karim said...

وبعديين كلة كلالام ونسمع ردود وتسقيف وبعدين كلة بببخخ, احنا كدة نتكلم ويسيبونا ويعملوا اللى عايزينزا بردوا طول عمرنا كدة, انسواااااا

ست البيت said...

ايه الكلام دا يا آبي برضه احنا بعنا البلد
البلد هيه الصايعة وباعت نفسها
البلد دي خاطية البلد ما ينبكي عليها البلد خادة الباشمهندس
وبعدين أكل ايه وشرب ايه واخلاق ايه وشكل ايه وجسد ايه المهم الروح روح البلد اللي طلعوا روحنا فيها
وبعدين اتصوري انا مش عارفة القرية لذكية دي وظيفتها ايه
على كده الرالج دا بيشتم الريف كله ايون انعم لما يقول دي قرية ذكية يبقى الباقي ايه اغبياء صح...؟؟؟
وانا من هذا المنزنق احب اقول لكل شاب وكل فتاة لا تنحرف وصوتك العالي دليل على ضعف موكفك
وامشي جوه الحيط
تبقى لوليه في خيط
والواد اللي يجيلك منه وجع الدماغ .. بلغ عليه أمن دولة وقول تبع المحظورة
وبعين هو فين الفساد دا يا آبي؟!!!
دا انت عليكي حاجات غريبة
انتي مش عندك عربية بطوط ايوه بس عربية
وعندك بيت تسكني فيه وواكله وشاربة ونايمة وقايمة
عاوزة ايه تاني
بنت عينك فارغة صحيح
ايه يعني لما يكون في 70مليون تحت خط الفقر عاااااااادي
يا بنتي المهم الواجهه يعنيعاوزة رئيس الوزرا يمشيك مقطع عشان تستريحي واجهه دا ولا مش واجهه
وبعدين انتي ايه فهمك بخرفانك البمبي في التنمية
يا يا ماما يالا حنرش ميه هنا
ما عندناش تغيير
محدش قالكوا تعملوها على نفسكو وتحملوا البلد مسؤلية التغيير

THE illusionist said...

الله الله الله الله الله
ولا احلى ولا اجمل ولا اروع من كده وصف
عديتى الوصف والله
الراجل ده المفروض التسعتاشر جامعه تقوم تعضه
بيقولك فيها فساد فى اماكن مش كتيره
هههههههههههه
يمكن يقصد يعنى ان النيل والدلتا دى هى مش مصر
وفى صحرا كتير
هو وابن التيت بتاع الزراعه
مش ناويين يعملوا اى حاجه عشان يستصلحوها
فبيقولك مفيش فساد فى الصحراء الغربيه
والشرقيه
وعلى راى اللى قال
يا نظافتك يا مصر
يا جمالك يا مصر
مبارك يا مصر
ابيات مهداه للريس وابنه والساعى بتاعهم بتاع الرابسو

Nostor Azzuro said...

مصر باد العجب العجاب

ولسه يا ما فى الجراب يا جمال

GeHaD-----(male) said...

اي نعم ان الحيه مليانه بقرف وذل وحاجات وحشه كتير من اللي انتي قولتيها

بس برده الحياه جميله وبمبي والله يمكن بس الكام يوم دول انا فرحان حبتين بس برضه يعني انتي غمقتيها اوي يعني حسيت انها مطينه بطينه وعاوز ارجًع مش عارف ليه

قلم رصاص said...

حانت لحظة التغيير

صدقوني والله البلد هتتغير قريب جدا

احنا بلد طول عمرنا مقبرة للغزاة من ايام الفراعنه..بس مقبرة للاجنبي

مشكلتنا اننا هنبقى مقبرة للوطني ازاي

بس صدقوني في حراك هيتم في مصر قريب جدا

فدوااااااام الحال من المحاااااااااااااال


ولك الله يامصر

وطني لو شغلت بالخلد عنه ، نازعتني اليه في الخلد نفسي

دمتي في حفظ الله يا أبي

الشعب لابد له من حكومه تشكمه said...

لا استنى اضحك الله يخليكى:))هأهأهأ
بحب اتفرج جدااا على تصريحات رئيس الوزرا بضحك موووووووووووت.
فى مؤتمر الحزب الوطنى اللى فات سمعته بيقول:
اوعوا تفتكروا ان المستثمر الاجنبى بيأثر فينا لاااا هو اللى بيتأثر بينا ههههههههههه افتكرت الليمبى

Ahmed Talk said...

كما قيل من قبل

لنا الله

Me7'o said...

ههههههههههههههه

الله يحظك يا شيخ روح

ولا بدراوى
فطسنى على نفسى من الضحك

بقى بالذمة ده كلام يطلع من رئيس وزراء

البطاطس

فرحان بالبطاطس

هههههههههههههههههههههههه

باين عليه كان يا حبة عينى محروم من الشيبسى

شوكولاتة said...

تصدقي ياآبي أن ابن اللذينة أبو طويلة ده حصله كده السنة اللي فاتت في أسبوع شباب الجامعات برضو
الننوس نحس خلاص واخد على التهزيق
وفي نهاية البورنامج أحب أقوله نسألك الرحيلاااا
أبوس إيدك هوينا بقى
سلامين وحتة

خايف من الحقيقة said...

ازيك يا ابي
عامل اية يا جميل
يارب تكوني بخير

لسه زي ما انتي
هايلة
بس بصراحه
الخلفية تعبت عنيا

دمت بخير

مي said...

ازيا يا بت يا ابى وحشانىىىىىى امووه
بصراحة انتى عسل وال
له
وفسادنا من نوع مختلف،

( انت هتقولى ده احمر وبترتر الفساد بتاعكوا )
ههههههههههههههههههههههههه
صدقتى ماهو طويل واهبل
الراجل ده ياما بيستعبط يا اما بيستعبط
معندوش دم خلاص نحس من كتر الشتيمة
بصى يلاه شكلنا كده هتلمى خرفانك ونروح كلنا رحلة ل؟؟؟؟ ههههههههههههه
تحياتى ليكى يا قمر

Love-Guru said...

هما لسه مستهيفنا للدرجه دى ولا مناخيرهم اتقطعت مش عارفين يشموا الفساد؟
---------------------------------
ردا علي تساؤلك هم في الحقيقة مناخيرهم اتقطعت و ان عارف مين اللي هبرتها
!!!!!!!!

micheal said...

يعني المرة دي الحدوتة إختلفت نوعا ما عن موضوع بلال دياب بس يبقي المضمون واحد وهو أنا الشعب والحكومة كل منهما في وادي ومش شايف التاني وكل ما الوضع حيستمر كده محدش يضمن المستقبل حيبقي ازاي عشان كده كله حيقول يلا نفسي
بس حلوة موضوع مستلفين مصر شوية وحيرجعوها
:)
أنا اخر بلوة سمعتها موضوع حديقة الحيوان..يلا هي جت ع الحيوان
شفتي موضوع أن 79% من الشعب راضي عن الحكومة
هع هع هع
أعصابك بقي يا بنتي ..مش حنعرف نعالج فيكي بعد كده
:)
تحياتي

محمد فوزي said...

ههههههههههه
يبقى نطلع من الموضوع ده بإيه يا ولاد
أولاً ان الفساد في حتت صغيره يعني المسأله بسيطه البلد محتاجه بس حد يشفيها زي الجزار ما بيعمل مع اللحمه

وثانياً ان مصر هي زويل ومحفوظ
وبطاطس بتتصدر لأوروبا

وثالثا ان المسئول اللي بيغيب في حصص الفساد بينجح وبيبقى رئيس وزرا كمان

رابعا ان الفساد اللي عندنا مختلف والناس مش لاقياه بره ومش ملاحقين على الطلبات الخارجيه

وان جهود محاربة الفساد نوعين جهود عاديه من اللي بتلاته جنيه ونص ودي مش من مستوانا واحنا مبنتعاملش معاها وجهود غير عاديه درجه اولى فاخر تصدير ودي بنستخدمها حتى لو مبتجبش نتيجه عشان سينييه وبريستاجيوس

وإن الحكومه خاطيه بس من كان منكم بلا خطيئه فليرمها بحجر

يااااااه دي دروس كتير قوي طب والله انا استفدت

الكلام اللي بجد بقى انك عشان تحارب الفساد وتنجح لازم ميبقاش على راسك بطحه ومالكش مسكه
بس هو كده خلص الكلام

الجواز و سنينه said...

طيب نقول ايه
غير كاتكوا القرف مليتوا البلد

لا تـــشـــتــــاق said...

ياستى البلد تتباع تتأجر متفرقش مع الناس دى هما عايشين في ميغه ومش واخدين بالهم والله والله بيصعبوا عليا ده الواحد مننا مش عارف يشيل هم نفسه ومرعوب من الاخره
امال هما هيعملو ا ايه بس
ربنا يستر
موضوعك مش محتاج لاتعليق ولا اى حاجه انتى طرحتى الموضوع وبك علمانيه وتثقيف ومفهوميه اتكلمتى
تقبل مروري ياقمر

dr.lecter said...

انا بحسدكم علي انكم بتعرفوا تحافظوا علي اعصابكم علشان بتتفرجوا علي رجاله الحكومه والنظام وتسمعوا لهم وتتستحملوا تشوفوا طلعتهم البهيه

احمد نظيف انت واللي معاك وسيدك وابن سيدك ومرات سيدك

طز فيكم

أحــوال الهـوي said...

في الصميم

تعرفي ان الكداب بيفضل يكدب لغاية ما يصدق نفسه و يفتكر ان الناس اللي قدامه مغفلين


تسلم دماغك العاليه

تحياتي

همس الاحباب said...

فعلا المية مش بتطلع فى العالى
ولا حتى بمواتير الرفع
اصلها قاطعة دايما
يخرب بيت ده رئيس وزارء ودى حكومة

♥ Am fOpa'D ♥ said...

علمتونا ازاي نبني وانتوا الي بتهدوا

كتهم نيلة,,,,انا زهقت منهم

تيجي نحطهم في مركب والصومال تقرصنهم
:D

سنابل قمح said...

ما شاء الله ما شاء الله
سابق سنه وسابق طوله
هو فيه كدة ؟
جملة واحدة فيها الفساد عندنا والحمد لله كمان ؟
طيب منين منتشر ومنين حتت صغيرة
طيب هو يقصد انهى حتت بالظبط يعنى
طيب بس انا خايفة على الاجيال الجاية من الفسدة واللصوص مستقبلهم مش مضمون كدة

اما صحيح ولاد الحرام ماخلوش لولاد الحرام التانين حاجة يسرقوها


وانتى ازيك كدة

يا مراكبي said...

ههههههه

ناس فعلا فعلا ما عندهاش دم

يقتلوا القتيل ويمشوا في جنازته

أهو حوار من النوع ده المفروض الواحد ما يكملوش معاه

راجل وشه مكشوف صحيح

انسان وبس ! said...

واحد من احلى احلى احلى جمع بوست احلى البوسات يعنى
من احلى البوستات اللى قريتهالك بجد
خصوصا تعليقك اللى تستهلى عليه تسقيفه كبيره اكبر من بتاعت اوباما يلا ستى عشان مش تزعلى

لا بجد بوست روعه

انا بجد بحمد ربنا لان حاسس ان الناس كلها بقت فاهمه وواعيه حتى الناس البسيطه اللى بيجبوهم فى لقاءات فى الشارع فى الفضائيات

كلهم اة الغالبيه العظمى فاهمين وشايفين الوضع فى البلد على حقيقته
مبقوش زى الاول الاعلام بتاع الحكومه معميهم

فاضل بقى يتحركوا ويعملوا حاجه ويقولوا لأ
لا للتوريث اللى على الابواب
لا لحاجات كتير

يلا كل سنه وانتى طيبه

مهندس حر said...

البوست أكيد رائع مفيش كلام.. بس أنا زهقت من كتر ما بنضحك على غباءهم و ننسى لا مؤاخذة خيبتنا..

إذا كانوا همه باعوا البلد و قبضوا التمن فإحنا برضه بعناها فى مقابل راحة البال و السلامة .. بس الفرق إننا مش هنقبض التمن لأننا لا هنلاقى راحة البال و لا السلامة..

قصره .. أدينا بنتفرج لغاية ما الفيلم يخلص بس اللى متأكد منه إن الفيلم مش كوميدى و نهايته مش هتكون مضحكة..

محمد عتلم said...

صباح الخير يا آبى يا بتنجانى

Appy said...

كريم
=======
خلاص بطل تفكير انت






ست البيت
===========
انا لما قريت تعليقك حسيت انى عطيه الارهابيه هههههههههه

Appy said...

THE illusionist
============
بصراحهشكله النظافه مننا جزء فيها ومشكله الزراعه نفس القصه انا هبقى اكتب موضوع عن الفلاح والزارعه
نورت يا فندم







Nostor Azzuro
===============
انتم هتحملوا جيمى ليه من دلوقتى دايما مستعجلين اصبروا على الواد

Appy said...

جهاد
==========
لا دى بمبى وفيها بالونات والوانات ربنا يسعدك دايما ناس ناس هفأ خليك فرحان انت بس







قلم رصاص
========
اتمنى تتغير

Appy said...

لشعب لابد له من حكومه تشكمه
===================
اذا كنا اثرا فى الكله والحشيش مش هناثر فى المستثمر








Ahmed Talk
============
ونعمه بالله

Appy said...

ميخو
=======
ايون فى بلدهم بيقولوا كده انما عندنا فى بلدنا تبجى عيبه كبيرة اوى يا ولد






شوكولاته
============
من بلال انا عارفه فعلا الموضوع ده هو واخد توكيل كسفه تكسفه فى مصر عارفاه

Appy said...

خايف من الحقيقه
==============
اهلا منور يا فندم كل سنه وانت طيب انا بخير الحمد لله





مى
====
لا مش عاوزه اروح خلينى هنا روحوا انتم وابقى احكوا ليه يا بنتى سنى مش مساعدنى

Appy said...

Love-Guru
============

يا ظالمنى ههههههههههههه








ميشو
=======
كلامك النص الاول صح
النص الخاص بحديقه الحيوان غلط نو مش هيحصل المعارضه بس كان نفسها تبيع اكتر تقريبا سوقها وقف

Appy said...

محمد فوزى
=========
يا راجل انت طلعت كل الدروس دى من البوست دى عاوزه بوست لوحدياته خالص
وبعدين اسمها اللى على راسه بطحه يشيل ايده من عليها علشان اعملها له حفر
نورت يا دكتور









جواز وسنينه
=============
هى بصراحه البلد كلها بقت كده

Appy said...

لا تشتاق
=========
انا طرحته كده انا اعتقد انى طرحته ارضا بس
نورت يا فندم







dr.lecter
============
انا معنديش اعصاب بعتها فى سوق الجمعه فبقى عادى يعنى

Appy said...

احوال الهوى
==========
الكداب بيكدب لغايه لما ناخيره تكبر زى بونوكيو هههههههههههه
ربنا يكرمك يا استاذنا








همس الاحباب
==========
انت بتدعى عليه هبلغ عنك محابس الكهربا

Appy said...

♥ Am fOpa'D ♥
=============
طيب ينفع نقرقصهم الاول وبعدين نقرصنهم







سنابل قمح
=========
ايون حته صغننه فى طرف الرجل كده ركزى انتى بس

Appy said...

يا مراكبى
=========
لا وشه متغطى بشنبه فعامل له عدم توازن فى الكلامم







انسان وبس
========
كل دى حلويات على البوست ربنا يكرمك يا رب يا محمود كل سنه وانت طيب

Appy said...

مهندس حر
=========
وجعت قلبى انا عارفه الحقيقه دى بس بدارى وشى عنها








محمد عتلم
=========
صباح الفل يا فنان