سيبوا الديل بقى وامسكوا فى الراس

تحديث تاني :- فيه صيغه عند محمود رئيس جمهوريه نفسي حد يعرف يزود او يترجم يروح ويعملها بلييييييييز


تحديث :- علشان نختصر اللى عنده نقطه ممكن يقولها او جمله حتى نكتبها يقول واحنا نجمع ايه رايكوا كده اسهل علشان يبقى كلام كتير ونبقى كلنا ساعدنا


انتباه كله يقف صف واحد

دلوقتى اخونا البعدا الاسرائليين اللى ربنا ياخدهم بيخططوا مع الحركة العسكرية الاسرائية ضد غزة نشاط اعلامى يهودى بكل صورة لتقديم اسرائيل فى صورة الضحية المضحيه المدافعه عن نفسها فى فكرة دلوقتى فى اول التنفيذ ليها وهى ببساطه تجميع ايميلات الهئيات والمنظمات الدولية سواء كانت رسمية او مستقلة ومخاطبتها بايميل مكتوب باللغات الانجليزيه والفرنسية ولغات تانيه لو امكن وارسال الميل ده من قبل اكبرعدد من مستخدمى الانترنت لتوضيح حقيقة الوضع فى غزة
حاليا الفكرة فى طور التجهيز مطلوب حد يكون قادر على شرح الوضع فى صورة مبسطه وبطريقه كويسه وواضحه بكل تفاصيلها عن اللى بيحصل فى غزه وبعد الانتهاء من الميل ده ترجمة الميل وحاليا بنجمع ايميلات الهئيات الدولية لو فى اى حد عنده القدرة على المساعده باى حاجه
وبدل ما هما نجحوا انهم يخلونا نسيب الراس ونمسك فى الديل يبقى جه الوقت اللى نقول لهم لا احنا صاحين وفايقين جدا علشان هما نجحوا فى انهم يخلونا نقول مصر هى السبب لا حزب الله لا حزب وداد قلبى يبقى لازم نقف ايد واحده ونضغط بطرق تانيه ونبطل بقى لو سمحتوا اللى بنعمله وشويه مصر وشويه زعبوط العفريت لان ده مخططهم اننا نتلهى فى بعض ونقعد نشجب وننتحر من على السجاد وانا السجاده عندى دابت بصراحه

اللى عاوز يشتغل فى الفكره عنده الكومنتات او ايميل محمود رئيس جمهوريه نفسى


m.fawey@gmail.com


حكمه الامبراطورة

تعيش الوزة العربيه وهى بتكاكى


64 اخبط وقول رايك:

رئيس جمهوريه نفسى said...

ربنا يجعلها فى ميزان حسناتك يا بتنجانى ان شاء الله

~*§¦§ Appy §¦§*~ said...

لا بقولك ايه مبكولش من الكلام ده انت تتحط هنا فى الكومنتات نتناقش مع الناس علشان ياخدوا الفكره بجد اه مش ناقصه اتحط لوحدي يالا روح هات كوبيتين شاى فى ليلتك دى لما نشوف اخرتها ونشوف اللى عاوزين يعملوا حاجه هيعملوا ولا هيناموا على جنب

رئيس جمهوريه نفسى said...

والله خايف يناموا على جنب وابتديت احس انى بحرث فى مياة البحر يا بتناجنى ربنا يستر

محمد فوزى said...

والله يا آبي من ساعة ما بدأت الأزمه وانا بفكر في الناحيه الإعلاميه دي بس انا كنت بفكر في وسيله نخاطب بيها الأفراد والمنظمات الأهليه لأن الهيئات الدوليه دي في النهايه بتتبع السياسه الدوليه وهي غنيه عن التعريف بالقضايا لأنها اصلا بتشارك فيها بعدم نزاهه وحياديه , المطلوب فعلا اننا نأثر في الشعوب ونوعيهم بأنهم مضللين وبكده المواقف هتتغير شيئا فشيئا لأن الحكومات دي بتحترم شعوبها , دي مجرد إضافه لفكره قيمه طبعا
تحياتي ليكي ولمحمود على التفكير الإيجابي

Founoon said...

انا ممكن اترجم لانجليزي وفرنساوي

بس كتابةاكيد في ناس احسن مني مليون مرة
ياريت لو في حاجة جاهزة عايزني اترجمها تبعتوهالي

رئيس جمهوريه نفسى said...

محمد فوزى
========
لو عندم اى اليه او طريقة نخاطب بيها الشعوب ممكن نعمل الاتنين مع بعض مش حنخسر حاجه وانا شاء الله اول ما نخلص الميل وترجمته حننشرة على البلوج عندنا ومعاه ايميلات المنظامات الهئيات الدوليه


Founoon
========
ان شاء الله اول ما نخلص الميل حنبعت ليكى النص علشان تقومى بالترجمة

shayma said...

يارب نقدر نعمل حاجه بجد

انا جاهزة اساعد وممكن اترجم لانجليزى وربنا يقدرنا ونعمل حاجه

وومن said...

طيب يا ستى محمود هايناقش بس متزعليش روحك

الموضوع ببساطة اننا محتاجين حد علي علم جيد بالقضية بحيث انه يضيغ رسالة متضمنة تاريخ القضية والحقاءق التاريخية ومذابح الإسرائيلية إلخ إلخ

طبعا مدعمة بالصور وهاتترجم لآكتر من لغة

تاني حاجة تجميع ايميلات الهيئات الدولية وهيئات حقوق الإنسان ولو حتي ايميلات البرلمنات اللي في الدول الأوربية واعضائها لمراسلتهم

دلوقتي اي حد ممكن يساعد يراسل محمود علي ميلة

اي خدمة يا آبي

وومن said...

اه نسيت اقولك كمان اننا هانستهدف الرأي العام الأجنبي يعني انا عن نفسي هابعت الميل لكل اصدقائي الأجانب علي الميل وكل حد بيتواصل مع ناس من الدول الأجنبية يحاول يعرفهم بالقضية

ماشي يا قمر

مسدس صغير said...

فكرة جميلة ننتظر التنفيذ اشكرك واشكر رئيس جموريتى ورئيس جمهورية نفسى...

محمد عتلم said...

انا هاشترك فى الموضوع ده انشاء الله بس عندى استفسار صغير والنبى يا ابى
انتى بتجيبى حكم الامبراطوره دى منيـيـيـيـن؟؟؟؟؟

بعبعه said...

اوك يا آبي انا اهو

قشري وانا معاكم

لا بس ما المش القشر انا على فكره

انا الى اقدر اعمله انى ممكن اكتب صيغة الاميل باللغه العربيه فقط

لكن طبعا لازم تحددوا النقط الى عايزين نتكلم فيها


واي حاجه تانيه عايزنها انا معاكم


حته بقى تهدئة نفوس

محمود هى البت دي بتتأمر كده ليه؟؟
شاي واتحط وكده يعنى ايه الحكايه انت شكلك سالف منها فلوس وما ردتهمش يا محمود
هههههههههههههههههههههه
اي خدمه يا آبي

~*§¦§ Appy §¦§*~ said...

محمود
-====
لا انا هوجه الدعوه لناس معينه ورينا يسهل عندي امل يشاركوني اللى عنده فكره او نقطه هيقولها دول ناس هايله
وكل اللى بيدخلو هنا كمان






محمد عتلم
===========
اطلع من دماغي وانا ابطل اقول حكم هههههههه والله ما عارفه يا محمد انت هتعمل زي بابا يقولى سريعه الرد والتهيس مش عارفه الراجل ده عرف الكلمه دي منين بس هو عارف انى عندي مقدره من السخريه عاليه شويه يمكن واخدهاها منه هو الراجل ده مش عاوز يقتنع انى شبه فى كل حاجه هو كده على فكره عنده سرعه بديهه وتاليف فى الحكم والردود ملهاش حل ومحدش عارف يغلبه حتى انا عااااااا

~*§¦§ Appy §¦§*~ said...

بعبه
=======
ربنا يخليكي وليعها يا حبيبتى وعنديش مشكله هطفيها لا تكلكي

نهر الحب said...

ابى فكرة حلوة
لو ان فى كتير جدا فى الخارج عارفين حقائق اليهود وعلى سبيل المثال لا الحصر الالمان عارفين كويس جدا كدب اليهود لكن الصمت لغة العظماء
فكرة ممتازة
واتمنى ان اشاركم
لكن انا اسلوبى زفت بس اوعدك هحاول اعمل خطاب ولو ما امكنيش هخد منك واحد وارسلة انا
اية رأيك ؟؟



اية رأيك نروح نزور الجرحى الفسطنيين فى المستشفيات ؟

funckydoctor said...

مممم
الموضوع ده عايز تفكير
بس ممكن ننشر عن طريق الفيس بووك

شمس النهار said...

الفكره حلوه جدا
ماتشوفوا عمرو بدر اسلوبه حلو في الكتابه ومقنع جدا
او اي حد من الكتاب اللي بيكتبو قصص حلوه
زي بلو ويف وكاتب مصري وبرنس فور ايفر

Zika said...

انا جاتلي 6 راسيل مستفزه من موقع اسمه
jursalim prayer مش فاكر ايه كده
ومواقع تانيه
بتتعاطف مع اسرائيل فعلا
فعلا فعلا
حاجه *******
انا للاسف مسحت الرسايل دي
متهيالي كانت ممكن تفيد في الحكايه دي
لو جاتلي تاني هابقي اخش ارمي ودن عليهم واشوفهم بيعملوا ايه
الغريب بقي
جابوا ايميلي منين ؟
عموما انا معاكي يا آبي
بس مش عراف اعمل ايه
شوفي انا مكمن اعمل ايه
وانا اعمله
سلام يا أبأب
:)

Mohamed Hamdy said...

والله فكره رائعه بجد
بس ارجع واقولك العرب اجدع ناس تتكلم واخر ناس تنفذ .. تعالى لمجموعه متظاهرين وقوليلهم طب تعالو اتبرعو بالدم لفلسطين يقولولك لاء احنا نزعق ونهلل وبس

عموما انا هشارك بالى اقدرل عليه .. انا ويب ديزاينر وصحفى .. لو عاوزه انتى او اى حد دعم فى اى مجال يساعد الناس دى كلمينى وانا تحت امرك

ودى شويه بانرات للدعم من تصميمى ممكن تنشريهم وتعمميهم

http://img255.imageshack.us/img255/1838/01ok4.jpg

http://img72.imageshack.us/img72/7718/02zb2.jpg

http://img72.imageshack.us/img72/8430/03qd9.jpg

http://img206.imageshack.us/img206/2124/04jn5.jpg

~*§¦§ Appy §¦§*~ said...

نهر الحب
==========
يا ريت يا نوسه تعملى اللى قولتيه فى الكومنت اللى انا منشرتوش يا ريت يبقى حلو لان ده هيعكس حاله شكرا شكرا بس خلى موضوع الزياره ده لما اخلص خاصه انه مدخلش مصر غير 50 فرد ومش عارفه فين لو عندك علم قولى المهم بجهز انا وميرا للتبرع بالدم اتقلى وهقولك





زيكس
========
يا ريت يا ريس واحنا على الاقل نبقى عارفين اتجاهه تفكيرهم فين ممكن

~*§¦§ Appy §¦§*~ said...

شمس
=======
اي حد بلغي اي حد يكتب هنا واحنا نجمع وانا كلمت ناس كتير على فكره





فانكي دكتور
===========
خلينا نركز فى اتجاه واحد الاول وناخدها خطوه خطوه يا دكتور

~*§¦§ Appy §¦§*~ said...

شيماء
===========
طيب يا حبيبى لو عندك اي حاجه تكتبيها عن اللى بيحصل حتى بالعربى اوك قوليها هنا ونجمع

~*§¦§ Appy §¦§*~ said...

وومن
========
انتى بتكتبى حلو يا ميرا عبري عن اللى بيحصل باسلوبك يا حبيبى واحنا هنجمع

~*§¦§ Appy §¦§*~ said...

بعبه
========
نسيت اه يا ريت تكتبى فى اي حاجه واكتبى هنا وبعدين نجمع يا قمر

Abu ShoSho said...
This comment has been removed by the author.
Abu ShoSho said...

أميرة الكوكب
أني عادباني فكرة الإعلام دين
موجعين ينفعو في جمع المعلومات عن الجضية
www.palestinehistory.com
www.plasds.org
أما دون فينفع بردك لتنويع العرض
www.omayya.com
ممكن كمان ترجعوا موضوع المجاطعة

شكرا ليكي و لشعب الكوكب

عاليا حليم said...

يعملوا الى يعملوه

العالم زهق من كدبهم و تمثيلهم البايخ خلاص

قلم رصاص said...

فكرة عملية الى حد كبير بدل كل كلامنا فعلا والله

لو فيه اي حاجة اقدر اعملها ياريت حد يعرفني ..أي حاجة

انا ممكن أشارك في كتبة الاميل لو أمكن

مشكورة جدا يابتنجاني هانم

ويارب ينصر غزة ان شاء الله

«۩AhMeD 3LaM۩» said...

مش كل حاجه اسرائيل بتكون هي الي مدبراها يا آبي
غباء العرب والاعلام العقيم وتهيج الجماهير من ابو قصه الي اسمه حسن نصر الله وبرودة اعصاب الحكام وبضن حركة الزعماء
هما السبب هما الي بيخلونا في حالة دفاع
ويخلينا ناكل في بعض

انا عندي برنامج ترجمه فيه كل اللغات حتي العبري بتاعت القرود

معرفش ممكن ينفع؟؟؟

ماما أمولة said...

فكرة رائعة يا ابي

وياريت يبقى للمدونين بانر خاص باسم الحملة

وياريت اقدر اساعد في اي حاجة

تقديري لكل صاحب رأي حر وفعال

Ahmed Shokeir said...

آبي

انا متفق مع الفكرة او اي فكرة تكون في دعم القضية
بس في الحقيقة ماعنديش دلوقتي فكرة لصيغة معينة عشان كده موافق مبدئيا على صيغة رئيس .. ولو عرفت اكتب صيغة او اشارك في الصيغة الموجودة هاحدثها معاكم

Che_wildwing said...

كل واحد يعمل اللى هو عايزه يا ابي
وعلى رأي المثل
كل واحد حر في رنته

kemet said...

السلام عليكم ورحمة الله وبركاته

الفكرة فوق من رائعة بس يارب تتنفذ
وللاسف مش ليا لا في فرنسي ولا انجليزي

بس متابعة وهاشارك معاكم وهاحاول اوصل الميلات النهائية لاكبر عدد من الناس علشان تبعته للمنظامات والححكومات الاخر ي

وجزاكم الله خير علي الفكرة والمجهود

تحياتي
الي اللقاء

Foxology said...

والله فكرة حلوة جدا وربنا يسهل وتبقى حاجة عدلة الواحد عملها ف حياته

لورنس العرب said...

جابوا في محطه اجنبيه وزير العمل الاسرائيلي وهو بينزل تحت الترابيزه نتيجه لوجود صاروخ فلسطيني يمر من جنبه في صورة توضح انهم المظلومين
انا حاولت اراسل جروب انجليزي بيبعت لي صور وميلات كل يوم عن الاحداث الجارية في العالم وارسلت له ما حدث في غزه لكنهم مع الاسف لم ينشروها
الموضوع كبير جدا يا آبي
انا لا اعدو لليأس
والفكره اكثر من ممتازه
ولكن اليهود في كل مكان ماسكين الاعلام والصحف ومسيطرين على محطات التليفزيون
يكفي ان دوله مثل تركيا فيها 7 آلاف يهودي فقط هم متحكمين في كل شيء
الفكره أكثر من ممتازه
لكن لا تنسي في ان هناك اسباب اخرى لتصديق اليهود غير موضوع الاعلام وسيطرتهم عليه
وهو ان صورة الاسلام في الاساس عند الناس دي مش تمام نتيجة لأنه بيحارب في كل مكان
بيحارب في هولندا وايطاليا وامريكا والمدافعين عن المرأه المظلومه من الشرق الاوسط بيقولوا ان الاسلام عمل كذا وكذا في المرأه
والعالم ليس به يهود فقط
ولكن به نصارى أيضا
واليهود والنصارى قريبين جدا من بعضهم بحكم ان الكتاب المقدس عند النصارى يتضمن العهد القديم- التوراه- بجانب العهدالجديد
يعني دين اليهود جزء لا يتجزأ من دين النصارى
ولهذا فتصديق المسلم أمر صعب بالنسبة لنصارى الغرب يا آبي

مجداوية said...

السلام عليكم

أى جهد فى أى مجال في هذا الوقت مطلوب لكن للآسف أنا مليش في الترجمة فأنا ثقافتي مدارس حكومية يعني أترجم من العربية الى العربية
وما أريد كتابته بها أكتبه في مدونتي لكن لو أرسلت لهم سأقول من أضاع القضية نحن العرب ومن سيعيدها نحن العرب
عندما نستعيد نخوتنا وهويتنا وهدفنا المشترك
وسأردد مقولة جمال عبد الناصر رغم اني لست ناصرية

ما أخذ بالقوة لا يسترد بغير القوة
أما استجداء الحق من غير أصحابه فلا

لذا كما ترين فأنا لا أصلح للمشاركة
لكن لا يمنع أنني مبهورة بايجابيتك

د. إيمان مكاوي ( أم البنين ) said...

فكره كويسه جدا يا آبي ...بس ياتى الناس دي فعلا مش عارفه إللي بيحصل
أنا عارفه إن الهدف إننا نعرفهم إننا إحنا إللي فاهمين ..بس بارضوا هم مش عايزيين حد يفهم غيرهم وخاصة إحنا
الموضوع عايز إننا نفهم حكامنا إحنا إننا فاهمين وزهقنا
على العموم أن وزعاريري الكارهيين لليهود تحت أمرك
على فكرة في تعليق عندي في آخر تدوينتين من واحد بيحب مصر قوي يمكن يهمك ...فاهماني ..
تحياتي

مجداوية said...

السلام عليكم

معلش يا آبي رجعت تاني

اسمحيلي أوجه الكلمة


للأخ الكريم محمد حمدي

وأرجو أن يتسع صدره لملاحظاتي


أخي الكريم الجهد المبذول في هذه الصور رائع والهدف منها أيضا رائع لكنهم أخي الكريم إخواننا وجيراننا وأخواتنا وأمهاتنا لماذا نفرق بينهم وبيننا الأخ الشقيق مكانته فى الاسلام أقل من أخوة الدين فأخوة الدين أعظم وهذه ليست حملة توعية أو تحذير لمصر لو مقومتيش بدورك حيحصلك زى دول

الأمر أكبر وأجل من أن الدور على مصر الأمر أننا كلنا( كل المسلمين) فى كل أنحاء الدنيا مهدور دمنا وكرامتنا

ويا ليت أيضا نستخدم اللغة العربية أو على الأقل اللغة العامية بعيدا عن المصطلحات التي لا يعرفها غير الشباب الكول

وجزاك الله خيرا على مجهودك وايجابيتك

~*§¦§ Appy §¦§*~ said...

«۩AhMeD 3LaM۩»
================
لا ام الخلول هى اللى بدبر يا احمد معلش هعتقلها حقك عليا







مجداويه
========
طيب هاتى رشاش وروحى اضربى يا امى احنا بنشارك باقل حاجه مفيش حرب ومحدش هيحارب ونبطل نقول قوه ومقواش اه لو بنمشى على الدين من يومنا كان ماشى انما الدنيا ماشيه بحسابات تانيه
فاهمه طبعا
اللى اقصده
يعنى احنا حاولنا نعمل حاجه بدل ما نبقى مجعجعتيه وقاعدين نولول وبس ويمكن يبقى فيه ضغط اوروبى بدل ما هما بيطلعوا زى السحالى يقولك احنا مظلومين
وبعدين اعتقد برضه انك شاركتى فى نصرة الرسول مقولتيش ليه نطلع بالبنادق
بصى يا مجداويه احنا نعمل اللى علينا ودى حدودنا بجد كل واحد بقى يحارب بطريقته انا ولا حسنى مبارك ولا الجيش هنحارب يبقى ايه الحل اقعد بقى اقول الجهاد واعمل زى باقى الدول الهايفه ويقولك مصر امنعوا الغاز ها وبعدين حل ايه فى المشكله اطردوا ام السفير ظز فينا مش مهم ليه لازم يبقى فيه ضغط ام ليفه طالعه تقولك احنا بنرد على حماس احنا بندافع وبتناشد المجتمع الدولى علشان ميضغطش عليها
يا حبيبتى هنحاربهم بنفس الدهاء والسلاح وبصراحه ده اللى فى ايدينا

الكلام ده لكل الناس مش لمجداويه بس واعذرونى اذا كنت فى ردودى عصبيه شويه

رئيس جمهوريه نفسى said...

مجداوية
السلام عليكم ورحمة اللة وبركاته
احنا مطلبناش من الكل يشارك فى الترجمه او بالكتابه ونظرا لانى عارف انى فى ناس تفوقنى فى الكتابه انا سبت الموضوع ليهم فى كتابه الايميل وناس تانى ترجمه الميل علشان يبقى صالح للارسال احنا مش بناقش فى الميل ده مين اللى باع ولا خان ولا مين اللى ضيع القدس ولا وصل غزة للمرحلة دى انا كل اللى عايز اوصلة للعالم انى الصورة المنقولة غلط تخيلى انى فى كلب اسرائيلى مصدر للعالم انى اسرائيل فى حالة دفاع شرعى عن النفس وهو حقوقة مهدره ما فيش شغل مفيش خروج ومفيش حيم الاخ زعلان علشان مش بيروح جيم وفى المقابل اهل غزة مش لاقين ياكلوا والعالم ليه اللى بيكلمة وبيخاطبه عموما علشان منسبقش الاحداث بس احنا بنجمع عناوين المنظمات الدولية مستقلة او حكوميه وصحف عالمية وحننشر الفكرة على مستوى المدونات والمنتديات والفيس بوك وبكل الصور الممكنه علشان نقول للعالم غزة بتتعرض لخطر ابادة جماعية ولو انتظرنا تحرك القوة يبقى حننتظر حتى قيام الساعه وتكون غزة بقيت تاريخ

~*§¦§ Appy §¦§*~ said...

استاذ/ احمد شقير
================
ميرسى لحضرتك بجد وان شاء الله تبقى خير







تشى
=======
طيب بس متقعدش قدام التليفزيون كتير وتتصل 0900 نورت يا حج

على عبدالله said...

والله العظيم انك
جدعة
يعنى راجل يعنى
اسف قصدى انك ؟؟

المهم
فكرة كويسة
وممكن كمان تحتسبى عند ربنا وتنوى نية الجهاد
والله وان شاء الله ربنا يكتبلك الاجر
زى المجاهدين فى الميدان بالضبط
اما احنا بقى ربنا يكتبهالنا
الشهادة يعنى

....
ايه بقى اللى يضحك فى كلامى مع ابو حميد صديقى ؟؟؟

انت عارفة انا كل ما ادخل مدونتك بقول ايه اللى جابنى هنا
وبنكسف والله (باخجل يعنى ،، قصدى باستحى )
كل ماشوف الصورة اللى انت حطاها دى
واحد زى حالاتى ارهابى (ملتحى يعنى ) ازاى يبص للحاجات دى ؟؟؟

بس والله باكتشف انك حاجة تانية خالص زى ما قلت اول الكلام
جدعة يعنى

جزاك الله كل خير
وادامك اختا فى الاسلام والعروبة والرجولة

مع خالص تحياتى
اخيك الاكبر
على عبدالله

~*§¦§ Appy §¦§*~ said...

على عبدالله
=============
ههههههههههههه اهلا بيك بص يا ارهابى قصدى يا على ههههههه اولا متتكسفش وانت داخل علشان انت ملتحى يا حج انا عارفه ناس كتير كده يعنى دى سنه عن الرسول عليه الصلاة والسلام يعنى مش حاجه تكسف وارهابى ايه بس ما العيال بتوع امريكا مربين دقنهم وفيجتار كان مربى دقنه عارفه بقى ولا اقعد افسر
اولا لما تتكسف او تستحى ابقى غمض عينك وادخلك بكليكك اليمين وان شاء الله خير
دى مش صورتى ومفيش على المدونه صورة ليه بتاعت القلب دى شبهى 90% بس
عموما مش موضعنا موضوع احمد بضحك على شرذمه اصلى انت عارف انا بكتب بتنجانى يعنى زى ما نبقى قاعدين على حرف البلكونه كده والكلام الكبير ده بصراحه بيخبط فى صواميل مخى بيوجعها اى والله يا خويا معلش بقى اصل ثقافتى بتنجانى زى ما انت شايف
وبحس ان الكلام اللى مش بفهمه بيضحكنى ويخلينى حسه ان ساعتى ماخره 30 سنه ما علينا متزعلش احمد اخويا هو كمان وواخد على اسلوبى
وبعدين ايه يا راجل مدونتك الطاهرة دى هو داخل جامع لازم نراعى شعور بعض برضه لكم دينكم وليه دينى صح ولا ايه يا ارهابى ههههههههههه
نورت ومتزعلش من كلامى والله انا كده بكره تتعود على نطح الخرفان والقلل ده

محمد فوزى said...

محمود رئيس جمهورية نفسي
------------------------
طبعا احنا محتاجين نفكر في طريقه او عدة طرق كمان
حاليا عندي فكره اننا ليه منستعينش باصدقائنا المدونين في اوروبا وامريكا يمدونا بعناوين المراسله البريديه او الميل او ارقام الفاكس لأماكن تجمعات للناس في الغرب زي النقابات مثلا أوالنوادي الإجتماعيه والرياضيه
او حتى ممكن نكون اكثر جرأه ونخاطب مذيعين مشهورين او برامج مشهوره زي اوبرا وينفري مثلا

~*§¦§ Appy §¦§*~ said...

على عبد الله
==============
على فكره انت مش اخويا الاكبر انا الاكبر سنا يا ريس نورت يا ارهابى وبعدين انت مودى وشك الناحيه التانيه ليه طيب شيل صورتك بقى علشان بستحى ابص عليها

رئيس جمهوريه نفسى said...

محمد فوزى
احنا حاليا بنجمع ايميلات هئيات دولية ومنظمات حقوق انسان وصحف ومجلات كبيرة فى اوروبا وامريكا وحنجهز كل ده وحنبتدى فى الارسال فى ااقرب وقت ان شاء الله خاصه مع تصريح اسرائيل انها ناوية تمد فترة العمليات لاسابيع قادمة ولو انتى عندك الية مخاطبه اى جهه يا ريت تقول لينا على عنوانيهم ونضمهم للقائمه اللى حنبعت ليهم

خمسة فضفضة said...

السلام عليكم ورحمة الله وبركاته

معاكو ان شاء الله

ويارب مجهودنا يجيب نتيجه كويسه

سلام

على عبدالله said...

فكرتينى بوحدة زمان كنت بتخانق معاها
فى منتدى
اصلها شيعية وانا ليا معاهم تاريخ ومعارك
المهم
كتبت كلمة "حزلوق
بحرف الزاى
وكانها ماصدقت
مسكت الكلمة واشتغلت عليا
وقامت الحرب
وعينك ما تشوف الا النور
""""
على فكرة انا قصدى صورة المدونة
مش الصورة اللى عليها قلب

اما مودى وشى الناحية التانية ليه
اعزك الله هاتشوفى ايه يعنى
ربنا يسترنا
اصلى بخاف من الفتنة بعيد عنك

اضحك الله سنك

وومن said...

آبي

كويس ان التفاعل عندك هايل بس شايفة الناس برضة بتكتفي بالتعليقات

يا جماعة محمود سايب ميله ومرحب باي حد يحب يتواصل معاه

وهانقول تاني حاليا اي حد عندة مواقع او ميلات او ممكن يعمل سيرش ويوصل لأي منظمة دولية أو جهه إعلامية دولية في أي مكان يبعتة اللي عندة فكرة يبعت لمحمود علي الميل علشان ننظم جهودنا

في النهاية لما نوصل لصيغة نهائية مترجمة ومراجعه ونجمع عدد كبير من الميلات هانبتدي نبعت

مجداوية said...

آبي
ورئيس جمهورية نفسي

يا ريت تقروا الجملة دي تاني


أى جهد فى أى مجال في هذا الوقت مطلوب لكن للآسف أنا مليش في الترجمة

يعني موافقة على ما تقومون به بس مش لازم أقول هايل وبرافو
وان كنت قلت ضمنيا هذا بكلمة
أنا مبهورة بايجابيتك يا آبي
يبقى تتعصبي عليا ليه
(((انت حتعملي زيهم تسيبي الراس وتمسكي فى الديل)))

ويا أخي الرئيس

أنا لم أقل انكم طلبتم من الجميع المشاركةلكن أنا بالفعل لو كنت أستطيع تقديم خدمة الترجمة مثلا لفعلت

بدل من الولوله على رأي آبي


وبعدين لما تلاقي الشعب المصري نفسه مقسوم على نفسه وشوية بيولولوا وشويه بيحضروا لاحتفلات رأس السنة حتعرف ان الأمر يبعث على الحزن فعلا

لكن لا غزة ولا فلسطين حتبقى تاريخ لأن وعد الله حق

واللي كتبته ده رأيي
وأسفه انه ضايقكم

وأسأل الله من كل قلبي أن تفعل ايجابيتكم وتحرككم هذا شيئا وتغير الصورة للعالم

وأكرر

رغم ان كلامي بالعربي

أى جهد فى أى مجال في هذا الوقت مطلوب

وحقكم عليا وحاسكت عشان آبي متتعصبش

حروف (دلو مرة ثانية وجرح ثاني سابقا) said...

ربنا يجازيكيخير انتي ومحمود يارب وميرسيعلي مرورك عندي يابي وصدقيني اناحبيتك جدا وياريت اكون اختك لواقدر اساعدك بحاجة قوليلي لانيمش عارفة اساعدكم ازاي

البت المشمشية حلوة بس شقية said...

انا ممكن اساعد بس لو فيه ترجمة عربى

enjy said...

اوك ........معاكوا جدا

جنّي said...

افكار طيبة..وكل يفعل ما يستطيع التبرع بالدم وايصاله لنقابة الاطباء او الهلال الاحمر .. والتبرع بالمال وهناك جهات ثقة كثيرة .. استغلوا خبرتكم في البؤجة والتبرع بالدم وبالتوازي مع ما تنون عمله في الحملة الاعلامية

ربنا معاكم ومع مجداوية ايضا .. فليفعل كل منا ما يستطيع .. المهم ان نعمل

وادعو لاخوانكم في غزة دائما ..
اللهم سدد رميهم

mostafa rayan said...

هي فكرة كويسة
ربنا يوفقكو

الفاتح الجعفري said...

سلام الله عليكم ورحمته وبركاته
ماشاء الله بارك الله فيكم
كان عندي اقتراح كنت برضه كتبته عند عاشقة الفردوس واعيده بنفس الصيغة

--
ان شاء الله متواجد معكم
ولكن نصيحتي
اهم حاجة استخدام الصور والافلام عن غزة والمجازر التي تحدث بها فالصورة تغني الف مرة عن الكلمات
ويتم وضع تحت الصورة او مع الفيلم كلمات قصيرة مختصرة
اعتقد سيكون لها اثر اكبر من الكلمات الطويله والشرح المفصل
اعتقد المسلمين الان والعرب من يحتجون الشرح المفصل للقضية بعد ان ضاعت من قلوبهم وعقولهم

--
بارك الله فيكم واحسن الله اليكم
وجزاكم كل خير

سمـــــــــــا said...

كل سنة وانتى طيبة يا بيبو وعام جديد سعيد عليكى يارب يكون كله حب وفرحة وتحققى فيه كل احلامك

قولى آآآآمييين

Sherif said...

.. يارب يخللى سنة 2009 جميلة عليكى
..احلى من 2008
..و2007
..و2006
..و2005
..و

أنت وراكى حاجة؟

أبو صلاح said...

فعلا من استراتيجيات اليهود وامريكا انهم يوقعونا في بعض عملا بسياسة فرّق تسد ..
والعرب ماشاء الله عندهم استعداد فطري للفرقة ..

لكن تفتكري حوار الرسائل ده هايعمل فرق ؟؟
هم المسئولين في الهيئات الدولية مابيشوفوش اخبار ؟؟ .. مابيتفرجوش على الجزيرة ؟؟ .. مابيدخلوش على الانترنت ؟؟
الارهاب واضح .. وواضح ان اسرائيل هي مصدره .. والعالم كله عارف ولكن البعض بيغالط لتحقيق مصالحه .

على العموم مش عايز ابقى مسبب للاحباط ... ولنأمل ان الرسايل دي تعمل فرق .

تحياتي

محمد عتلم said...

كل سنه وانتى طيبه يا ابى وهابى نيو يـيـيـيـيـيـيـيـيـيـيـيـر
ويارب تكون سنه نوعا ما سعيده وخفيفه ولطيفه ومريحه وظريفه ومش ابيحه

الدرويش المرووش said...

بتكاكى

هى دى الكلمه الجامعه المانعه الشامله الكامله اللى كنت بأدور عليها

بتكاكى

تسلم دماغك

nor said...

تعيش تعيش تعيش تعيش تعيش
مش لاقيه غير كده ..عجبكم و لا نغيروووووووووووووووووووة
تعيش الوزة يا رب

mahasen saber said...

ازيك يا جميله يا ام افكار حلوه
انا قلت عند محمود انى هعتمد على الصور لانى شايفاها خير دليل

بس هقول تانى يا رب الروح دى تفضل موجوده عندنا كده علطول مش نتحرك بعد ما يكون تلات تربعنا مات

بس فكره جميله يا رحاب ربنا يكرمك انتى ومحمود ويجعلها فى ميزان حسناتكوا

انا حزينه ومش مركزه بس يا رب نقدر نعمل حاجه

mahasen saber said...

ازيك يا جميله يا ام افكار حلوه
انا قلت عند محمود انى هعتمد على الصور لانى شايفاها خير دليل

بس هقول تانى يا رب الروح دى تفضل موجوده عندنا كده علطول مش نتحرك بعد ما يكون تلات تربعنا مات

بس فكره جميله يا رحاب ربنا يكرمك انتى ومحمود ويجعلها فى ميزان حسناتكوا

انا حزينه ومش مركزه بس يا رب نقدر نعمل حاجه