هو مين بيعاكس مين

تحديثثثث من غير نطح خرفان:- اقدم انا ابى هانم بتنجانى اعتذار رسمي متر فى متر الا ربع لكامى فوندامي حبيبه قلبي وخرفانى ونحلتى ودبوري عن بعدي عنها الفتره اللى فاتت واقولها بحبك اووووووي يا كاميليا يا احلي فوندامي وهنا كوكبك ضلمه من غيرك وهناك بيتك وانا ضيفه عليكى

والخبر التانى ليه بوست جديد على مدونه الرايق وفرنسا والضاحكون اللى هو احنا وانتم بس محدش يدخل هناك غير بالعمله الفيكونيه يجي ديزليون دراختم كده علشان تساوي جنيه مصري هههههههههههه اللينك اهو

طبعا محدش بيمشى فى الشارع مش بيتعاكس سواء بنت محجبه (حجاب على ما يفرج او حجاب كارينا حتى او حجاب علشان معندهاش وقت تروح الكوافير)
او حجاب محترم محتشم او منقبه او مش محجبه خالص(ومنهن القالعين والابسين ومحدش يتنح اه فيه النوعين)

المشكله بقى مش فى كل ده كل ما اتكلم مع حد واقوله عيب تعاكس فى الشارع مش كل البنات بتتبسط يعنى لما واحد يسخف عليها سواء راكبه عربيه او مواصلات او الاختراع الفاشل اللى اسمه

(c.t.a)
طبعا المعاكسات مش بتقف عند حدف الولد للبنت بكلمه وحده فى وشها لا ممكن توصل لكلام جارح جدا ومينفعش يتقال وطبعا عن مناطق فى جسمها

طبعا كل فرقع لوز هيطلع يقولى ما البنات السبب اقوله لا يا فرقع افندى اتهد مش البنت بس السبب لانى قولت حتى فيه منقبات يعنى مش باين منها حاجه خالص وبتتعاكس (وسبب ده بجد ان فيه البعض بيتخذ من النقاب ساتر ليه لاعمال مش كويسه) فهنا بالظبط زى الوحده اللى نازله مش لابسه هدوم وعاوزة الكل يعاكسها وخدت فى رجليها باقى البنات وبقت فكرة ان البنت لما تنزل شكلها شيك تبقى عاوزة تتعاكس برضه اللى بيستخدموا النقاب خدوا فى رجليهم اللى بيستخدموه كويس او لاقتناعهم انه بيحميهم او انه تدين
فالمشكله هنا مبقتش مين لابس ايه او مين لابس فين
المشكله الخطيرة الهايله المايله اللى عملها الشباب او اللى حاصله انها بقت اخلاق منعدمه او رايحه فى شجرة وعدى عليها قطر سكه حديد صناعه مصريه فاخرة
واياك اسمع حد يقولى كبت جنسى
كبت لما يكبتكوا هتضحكوا عليا انا والله بالقله دا الشباب مخلوش مصيبه الا لما عملوها اتنيلوا روحوا اتجوزا وبرضه هتخونوا وهتعاكسو

تانى مشكله والاكبر اللى والله عااااانيت منها امباح وكانوا موقفين وفعلا اتصطدمت لاول مرة فى حياتى ولسانى حسيت انه اتكعبل فى رجلى مع انه طويل جدا بس مقدرتش ارد
اول موقف:-
عند البيت بتاعى وبركن العربيه وولد صغير بتاع خمس سنين كده مش باين شبه عقله الصوباع بيلعب فى الشجر اللى لسه شارينه (اصل ادبست فى خمسين جنيه تمن الشجرة علشان خاطر بطوط متوقفش فى الحر وزرعنا تحت العمارة عاااااااا)
الولد ماسك فى الشجرة وبيهزها جامد لانها لسه رفيعه
فبراحه بقوله عيب يا حبيبى ميصحش كده ورد عليا الرد اللى عمرى ما توقعته ابدا وساعتها حسيت انى زى الفأر الواقع فى صلصه
وانتى مالك يا مزززززة(وش فاتح بقه ومدلدل لسانه ومحمر)

انا طبعا الصدمه سكتتنى شويه وقفلت العربيه وطلعت وجريت صدمتى على كتافى لقيته جاى ورايا فى السلم ويقولى قشطه يا مزززة
انا فعلا مقدرتش اتكلم خالص ومش عارفه ليه

ثانى موقف امبارح برضه نازله ولقيت بنات اطفال صغير فى سن ابتدائى بيلعبوا عند البيت وقعدوا يبصوا ليه كتير فقولت عيال بقى هتلاقيهم مستنين اطلع ويلعبوا فى العربيه علشان تشغل الانذار
وكانت المفاجعه طالعه وانا لسه فى مدخل العمارة الاقى البنات بتنادى عليا وتقولى يا مزززززززززززة
بجد والله كان هيغمن عليا

هو فيه ايه هو ايه اللى بيحصل فى الاخلاق والتربيه هى الاطفال دى فاهمه الكلام ده طيب جابوه منين طيب ليه بيقولوه
انا فكرة انى كنت طفله وعمرى ما اعرف يعنى ايه معاكسه
انا عاوزة الشباب والاهل يخلوا بالهم من حاجه مهمه جدا وكارثه
ان فيه بعض أباء بتقول لاولدها قولها يا مزة عاكس دى لاااااااااااااااااا استوب بجد الاطفال الكلام بيركز فى دماغهم والله وبيعملوه وانت بتعملوا كده بدافع الهزار وبتستظرف بس هتبقى مصيبه بعدين ويطلع اطفال مشوهه اخلاقيا
وفى كل المستويات شوفت ناس بتقول لاولادها كده
كمان والنبى الشباب اللى مش قادر يمسك لسانه يبقى بقى يجيب حد يقطعه ليه احسن يعنى مش هتموت بمرض ذبابه التسى تيسى لو مش عاكست البنت
والبنت مش معنى انك محدش بيقولك يا مززة مع انها كلمه مهينه ومقرفه جدا يبقى معناه انك وحشه
فامسكوا نفسكوا الاطفال بتتعلم
وغير كده اللى بشوفه بعياكس او بسمعه بيعاكس وبجد بالالفاظ الهبله كمان وتعليقات سخيفه يععععععععع سواء على لبس او شعر
بيبقى نفسى امدد ايدى فى زمامير رقابينه واجبها واعملها ممبار
اظبطوا نفسكوا شويه واعرفوا ان اخلاقكم وتصرفاتكم هتأثر على اللى حواليكم اطفال او غيرة

ملحوسه على جنب :- دى للفياكين الرجالى بس امشوا يا فيكونات حموا الخرفان على ما اجى لكم امشوا
نظرة الاعجاب المحترمه او الابتسامه المحترمه للبنت احسن ميت الف وخمشتاشر مرة من كلمه ماسخه ولا معاكسه هطله دى لو عجباك فعلا ومش بتقسم يا ريس
لما البنت تمشى ومتردش عليك متبقاش عامل زى اللبانه الرخيصه اللى بتلزق فى الشوز وتفضل ماشى وراها وتقول هترد عليا البنت طالما مش عاوزة تتكلم هتمشى انما متفتكرش تقل ولا مهلبيه يا عطيه


ملحوسه للفيكونات :- تعالوا وسيبوا الفياكين بقى يحطوا مانكير للخرفان ههههههههههههههه والنبى اللهى يسترك دنيا واخره انتى وهى بلاش البنات اللى فى دماغها انها لو مش اتعاكست يبقى وحشه وكخه والزمن فات عليها لا عادى يعنى ممكن انتى تعجبى حد ومتعجبيش حد تانى وبعدين اصلا اللى بتستنى كده معندهاش ثقه فى نفساويتها يبقى تتنيل وتقعد فى البيت وتنظف مرايتها لغايه لما يجلها الثقه فى نفسها

ملاحيس للاتنين بقى وسيبوا الخرفان على جنب:- انا زهقت وبعانى وهطق وهنفجر من اللى بيعاكسوا بالعربيات واللى بيتحرحشوا بالبنات واللى هيقع تحت ايدى هغزة يا عطيه بجد ربنا يكرمكوا ايديكوا فى ايد بعض (سيب يا واد انت وهى انتم ما صدقتوا هههههههههه) وامنعوا الكلام ده اقفوا ضده الفياكين خلو عندكم نخوه على غيركم مش كل بنت بتخرج شيك يبقى عاوزة تسمع كلمه حمضانه من واحد فيه بنات لا كتير

كان معكم استاذ لواء دكتور فنان شاعر بالاحباط معلم سوق الاخلاق آبى هانم بتنجانى