عن بيكيا والخير نحدثكم




صباح الفل

بصوا بقى علشان انتم جبتوا ليه محباطات نفساويه بسبب مدونة
بيكيا للبيع
فيه هناك بوست اسمه (بؤجه الخير ) محدش يضحك انا بحنذر اهو قوس قزح الشريك المتضامن فى المدونة دى هى اللى سمته كده وانا اتحايل عليها يا بنتى خليه يبقى كيس او شنطه تقولى لا
قال وجايه تقولى تعرفى بؤجه يعنى ايه خلتنى قمت سألت زميلى فى الشغل يالا معلش ما هو من عاشر البتنجانى حصله اكتر من كده
بس استنوا فيه حاجات لسه علشان تفهموها عن المدونه اهمدوا واقعدوا هنا شويه وشوف الحاجات اللى جايه دى انا عاوزة اقول لكم بس الجون او الهدف باللغه العربيه المتفسحه من المدونة دى ايه يالا اكتبوا ورايا

1- اللى عنده حاجه عاوز يبعها قديمه او جديدة بيبعت ليه على الميل صورتها وسعرها وانا بنزلها هناك

2- اللى عنده حاجه عاوز يتبرع بيها لايتام برضه اى حاجه يبعت ليه واحنا بنجمع الحاجات دى ونوديها لناس محتاجه

3-فيه ناس باعت حاجات واتبرعت بتمنها واللى اشتروا كمان بجد اتبرعوا للايتام بالحاجات دى وهتلاقوا فى المدونة

4- انا بنسق بين البايع والشارى ويفتح الله (الا محدش عارف مين يفتح الله ده هههههههه)

5- فيه ناس واخده الموضوع هزار وانا مش بهنزر انا مكنشره وبتكلم بجد وجديات وحقيقى والقانون بتاع المدونة بما انى عضو كسلان فيها على اليمين او الشمال او هتلاقيه فيها وخلاص فى جنب دور عليه

6- فيه فى الجنب لوجو وفوق اهو الصورة اللى حطاها عن المدونة قوة واقتدار كله يأخده ويحطه عنده مع اللينك علشان اللى يدخل فى مدونته يضغط عليه يروح على بيكيا وده كرار فيكونى من الامبراطوره اللى هو انا واللى يقدر يصمم شكل تانى يبقى اوك ويبعته ليه على الميل ده مصطفى الاسكندرانى الجميل اللى عمله ليه ربنا يكرمه ويرجع بالسلامه

نيجى بقى للجد المدونه دى عملناها للخير يعنى ننقل العمل التدوينى لعمل اجتماعى كمان نساعد بيه الناس ومنبقاش ناس بتجعجع على الفاضى والمليان اللى عنده اى افكار تساعدنا فى الموضوع ده او لتطوير المدونة يقول بجد واحنا نتفق عليها يعنى مدونتنا دى لكل الناس بلا استثناء هناك فى الميل بتاعى اللى عاوز يستفسر عن حاجه ده ميل بس مش مازنجر علشان الناس مضفنيش عليه
وشدوا حيلكم لغايه لما يتقطع معانا بقى واحنا داخلين على رمضان والناس ما بتصدق تجمع اكبر عدد من الحسنات فيه وترمى السيئات فى البى سين

كل سنه وانتم طيبين ومستنيه حد يجيب ليه الفانوس بتاع رمضان بس مش الصينى انا عاوزة ابو شمعه ده انا بشجع مواريد بلدى ومنتجاتها ههههههههههههههههههههههه
اللينك اهو وفى الجنب كمان


ملحوسه :- بشكر انا آبى هانم امبراطورة الكوكب كل الناس اللى فعلا اثبتوا ليه قد ايه هما بيحبونى ودافعوا عنى فى غيابى وبقولها بعلو صوتى بجد ربنا يكرمك يا رب وبحبكم اوى
وغير كده للتوضيح انا مفيش بينى وبين اى حد حاجه وحشه ولما فى يوم من الايام بعدت عن شخصيه من المدونين كان بس علشان غلطها فى ناس كبيره انا بحترمها مش اكتر وانها بعتت ليه رساله مع احد الاشخاص انى مدخلش فى الموضوع فقررت احافظ على كرامتى وبس وابعد عنها انا ولا طالبت حد بحاجه ولا قولت حد يسيب حاجه علشان العقول المريضه واللى بتصطاد فى الميه العكرة انا فيه اماكن مش بدخولها لوجود الشخصيات دى فيها وبس وده اللى انا قولته وكان ده راى بعض المدونين برضه ....
طبعا هتموت وتعرفوا فيه ايه ههههههههههههههه الشخصيات التعبانه هتعرف لوحدها هههههههههههههههه

كان معكم ابى هانم خرفانى وبتنجانى

44 اخبط وقول رايك:

د/اجدع بنوته said...

صباح الفل ع عيونك

أأأبى هانم بتنجانى

سنيورة الكوكب وكل كوكب

ربنا يجازيكى خير يارب

انتى وخيخه وكل الناس اللى بتحاول تسيب بصمه

انا بسيب عن نفسى

بس ف نطاق محافظتى

النظيفه الجميله المتطوره

وباذن الله لو عندى اى حاجه تتباع

اذ فجأتن مثلا قررت ابيع

جراب الموبايل بتاع

اذ انه هى دى الحاجه الوحيده اللى امتلكها ف الحياه

هيبقى اول منفذ هو بيكيا طبعا

وانا متابعه ان شاء الله معاكم هناك

واى حاجه هلاقيها مناسبه لن اتردد

ف اقتنائها

وكل سنه وانتى وكل المدونين برمضان محتفلين

وزى كل سنه باذن الله صايمين

وتحيه عابره جامده فحت

لكل فيكونات الكوكب

ولكل خرفانك وللبطوط أأأبى

اما عن التصميم

وش بس افوق كده

وهعملك 15 واحد توزعيهم ع الجيران

يبقى اخواتك كنجات الفوتوشوب

والديزين موجودين

وتروحى موقع تصممى فيه

عيب .. لا بجد عيب

م

اللى مطبقه بقالها يومين

اجدع بنوته

Doba said...

ربنا يبارك فيكم ويتقب منكم
والله انا عندى 3 شنطات مستعدة للخروج والمفروض أوديهم رسالة اللى فى فيصل لو حد محتاجهم أسرع يبقى زى الفل

ربنا يباركلنا فى الدماغ البتنجانى
وياريت بجد محدش ياخد الموضوع بسخرية واحنا على مشارف شهر كريم

تحياتى
هبة

حنين القلب said...

صباح الخييييييييييييييير
آبى انا بقترح اننا نعمل زى جمعيه كده نلم فيها تبرعات ولو بسيطه كل شهر وتكون كل شهر لمكان زى مثلا مستشفى الاورام او ملجأ ايتام
والموضوع ده هينفع اوى خصوصا اننا هندخل على رمضان وده شهر الكل بيحب يعمل فيه خير
ولو على التبرعات وطريقه جمعها مننا
اللى فى كل مكان يلم من المدونين
يعنى اللى من اسكندريه يقول على يوم ويجمعها مننا
والقاهرة وبور سعيد وهكذا
ايه رايك؟؟؟
آبى والله انتى اسمى من انك تنوهى عن اى موضوع
كفايه يذكر اسمك علشان تذكر وراه كل المعانى النبيله والصفات الجميله
اشهد الله انى احبك فى الله
مووووووووووووووووء
سلام يا صوت الحق

سبهللة said...

جزاكى الله خيرا
وربنا يجعله فى ميزان حسناتك
ويجعله عامر
وهنيالك يا فاعل الخير الثواب
وهاخد الللوجو عندى واللينك كمان
وان شاء الله اول ما يتجمع عندى شوية حاجات للتبرع اكيد هاقولك
بس انا عايزة اقول للناس اللى هاتتبرع يحاولوا يتبرعوا بحاجات عليها القيمة مش لازم تكون اتهلكت واتقطعت وماتنفعش ببصلة
وتذكروا قول الله تبارك وتعالى
"لن تنالو البر حتى تنفقوا مما تحبون"
صدق الله العظيم

Abo 7anf said...

السلام عليكم
ازيك ياابى
اخبارك ايه
معلش على غيابى
والله امتحانات وشغلانه طويله يلا ربنا يستر
انا كنت بقرا المواضيع بس مكنتش بعلق لان الوقت دايما بيجرى ورايا
شكرا لسؤالك

حسن حنفى said...

يارب يكون في ميزان حسناتكم

Alkomi said...

هو انتم مهتمين بالملابس بس زي مابيتهيئلي ولا انا مش متابع كويس

عموما ممكن الكتب تدخل في الموضوع برضه او اي حاجة قديمة

لو تهيئاتي غلط
سوري على عدم المتابعة

Mercy Devil said...

آبى هانم
رغم انى مفهمتش حاجة من آخر فقرة انما واضح انوا كان فى مشكلة عموما براحتك ولو حد زعلك ابقى قوليلى وأنا مش هأعمل حاجة أو أضربيه بقلة فى دماغه
هههههههههههههه

واللينك وصل

سلام

محمد فاروق الشاذلى said...

سمو الإمبراطورة
تم وضع الصورة فى مدونة قلب مصرى وإشارة لفعل الخير بالدخول إليها.
تقبلى تحياتى

Unknown said...

آبي
طيب ماشاء الله فعلا
حاجه جميله جدا انا والله سعدت جدا بجد,,
ربنا يتقبل ويجعله في ميزان حسناتكم
قال رسول الله صلي الله عليه وسلم
اتقوا النار ولو بشق تمرة
فقدر المستطاع الواحد يحاول عسي الله ان يتقبل ويغفر ويرحم
---
ومنتظرين المزيد بأذن الله
ربنا يوفقكم
وجزاكم الله كل خير

الزواج.....روضة الحب said...

ربنا يبارك فيك يا ابي ويتقبل منكم يارب
يارب فعلا النشاط دة يكون مستمر علي طول مش ف رمضان وبس
وكل سنة وانتي طيبه

عصفور المدينة said...

كل سنة وانت طيبة يا بنتي
وأعانك الله وكبري دماغك

أنا كنت فاكر نفسي كتبت بدلكم كلكم

Anonymous said...

كل سنه وانت طيبه يابتنجاني
واحد فانوس بشمعه لبتنجاني من موقعه
الاصلي ههههه
بقولك بؤجه الخير دي فكره جميله واللي مش هيعرف يوصلك لكم
في ناس كتير بتعملها
ياجماعه الناس بتاعه المنصوره
في جمعيه رساله في شارع النخله قدام كليه
اداب ملكش حجه اهو بتعمل نفس الحكايه
اتنين عمرو خالد في كل شبر فيكي ياجمهوريه مصر العربيه بيعمل نفس الحكايه
ندخل الموقع الرسمي وهنلاقي مجموعات ومندوبين كمان
في في المنصوره الشبان المسلمين فين يامادي فين عند عوض الله
وربنا يعنيك ياابي انت وقوس قزح ويجعله في ميزان حسناتكم

nody said...

كل سنه وانتى طيبه ياسمو الامبراطوره
ويجعل كل خير بتعمليه فى ميزان حسناتك
وتكونى من الرابحين فى شهر رمضان

مصــــري said...

آبي هانم

طول عمرك سبّاقة بالخير
وربنا يزيد حسناتك ان شاء الله

ملحوظة
الخرفان سمنت شوية هو مفيش دايت ولا ايه؟

تحياتي
أسامة

Anonymous said...

آبى هانم


ما انا قلتك من الاول خليها رسمى

المهم اكيد الناس لو فهمت صح وخدت

الموضوع جد هيشتغل كويس

ربنا يسهل ورمضان السنه دى يعدى على خير

بس ايه لخبطة الكلام اللى فى الاخر دى

؟؟؟؟

سلام

alexandrany said...

يا باشا يا باشا
انا رافع صوابعيني اهوه يا باشا
اقول اقول بقي ما حدش رافع صوباعه غيري اهوه
حاولي تدوري يا رحاب من دلوقتي على الجمعيات الخيرية اللي بتنشط جامد في رمضان في القاهرة واسكندرية كمان
وتنزلي عنوانيهم للي يحب يشارك من المدونين في رمضان معاهم
في ناس كتير بتبقى عايزة تشارك ومش عارفه تشارك فين وتعمل ايه
ياللا فوكيرة اهي
ههههه
وربنا يتقبل ان شاء الله
وكل سنة وانتي طيبة وكل المدونين يا رب
ورمضان كريم

فزلوكة said...

ربنا يوفقكوا يارب
وربنا يجعلوا فى ميزان حسانتكوا يارب

وهشوف ممكن أشارك ولا لأ عشان بس فرق المسافات إللى بينا

الدفاع said...

جزاكم الله خيرا
تحياتى لاختنا المحترمه ودعواتى بالتوفيق

جهاد خالد said...

ربنا يكرمكم بجد ويجعل كل دا في ميزان حسناتكم

مواطن مصرى نايم said...

ايبى هى مين الناس اللى دافعت عنك فى غيابك
هه
هه
هه
ايبى
مين
هه
هه
مين يا ايبى
هه
هه
مين
هه
ايبى
مين
لا مش حقول هه

طب اقول انا عالناس التانية اللى مش كويسة
هه
هه
ايبى
هه
هه
اقول
هه
هه
اتكلم يا ايبى
هه
هه
و الا اقولك مش حقول اللى انا كنت حقوله
هه

ههههههههههههههههههه
(وش بيزاول ايبى اختى اللدود)

ربنا يا رب يقدرك على فعل الخير
و بعدين ما تسألينى انا يعنى ايه
بؤجه
كنت حقولك
لازم الفضايح مع الاجانب
بؤجه يعنى بؤجه
سهله خالص
شفتى بقى

اسلام صديق said...

فكرة جميلة جدا


جزاكم الله خيرا


معاكم باذن الله

only spot said...

صباح الفل يا اجمل ابى
عامله ايه وشو اخبارك ؟
الموضوع والفكره حلو ه اوى ويا رب بجد يقدركم على فعل الخير دايما يا ابى وكل واحد من مجاله يقدر ينشر فكره الخير الى بقت نادره بس موجوده
ثانيا بما انى مضمنش هعيش لحد رمضان ولا لا فكل سنه وانت بخير وصحه وسعاده وخرفانك حواليكى يا امبراطوره هههههههه
هو انا مدخلش عندك يا ابى الى لما تحدفى حد من الشخصيات المريضه بقله والفضول هيقتلنى واعرف فيه ايه بس سيبك ربنا يكفيكى شر الاشكال دى
يلى انا قلت اسلم عليكى وكل سنه وانت بخير دايما

بنوتة said...

بصي يا ابوبة يا حبيبتي لازم انتوا اللي اتنين تكونوا موافقين على الاسم بتاع الموضوع و بعدين كمان مفرود صاحب البوست هو اللي مفرود يختار الاسم خليكم روح رياضية قوية

Hosam Yahia حسام يحيى said...

ههههههههههه

اهلا بحضرتك وبيبيكا كتبتها غلط

:))

شهريار العشق said...

آبى الجميلة

لقد زرت مدوناتك جميعها وعرفتك من خلالها انسانة رائعة فى زمن ظالم لم يفهمك وعرفتك شخصا بشوشا اجتماعيا

لن أتكلم كثيرا الآن \
ولكننى فى أنتظار زيارتك لى

تحياتى

شهريار العشق

Anonymous said...

آبى العزيزة

أنا معكم فى هذا العمل الخير

أين ومتى؟

Anonymous said...

آبى العزيزة

أنا معكم فى هذا العمل الخير

أين ومتى؟

Empress appy said...

كل الناس الحلوه اللى ربنا يجزيها خير وعاوز تبقى معانا ودخلت هنا وهناك
بقولكم قبلها تبقى مستعدين يا ريت وقبلها بوقت كفايه هقول لكم
وربنا يجازينا ويجازيكم خير عنها يا رب




مواطن مصرى
=======
ماشى يا اسلام قول قزل وانا ادبحك وتبقى ضحيه العيد



كل الناس هرد عليكم واحد واحد بس بكره انا مش عارفه ارد دلوقتى عسر هضم فى النت هههههههههههههه

Empress appy said...

د/أجدع بنوته
=============

اهلا يا سمسم يا كميله انتى
ومستنيه الفوتوشوب وابداعته يا قمر ربنا معاكى







دوبا
========
لو حد هزر هجيبك تضريبه يا دبدوبه نورتى يا قمر

Empress appy said...

حنين القلب
==========
بصى يا سكر لم تبرعات دى ماديه هتدخلنا تحت طائله القانون واحنا مش قدها يا بنتى صعبه علينا لان لازم يكون فيه اشراف شئون اجتماعيه انا عموما فكرت فى جمعيه اهليه مشهرة ارتب واقول
لكى على طول ميرسى ليكى يا حنين وربنا ميحرمنيش منك ابدا يا اجدع اخت فى الدنيا








سبهلله
==========
ازيك يا قمر عموما احنا برضه فى البوست هناك قايلين كده يا رب يتقبل منا جميعا وشد حيلك يا قمر معانا

Empress appy said...

ابو حنف
=========
الحمد لله اننا اطمنا على معاليك نورت يا دكتور وربنا يوفقك





حسن حنفى
=========
ربنا يكرمك وميرسى ليك

Empress appy said...

محمد الكومى
=============
لو بتقصد فى حاله البيع اه كل حاجه داخله
لو تقصد فى التبرع برضه اه كل حاجه داخله
اتبرع انت وملكش دعوة هنتصرف احنا يا ريس
نورت يا كومى





Mercy Devil
=============
محدش يعرف يزعلنى عارف ليه لان لما بقول كلمه ببقى قدها ولما بخون حد ببقى عامله حسابى كويس بس هما بعيد عنك اغبياء معلش بقى الايام اللى بتبين مين الكويس ومين الوحش
وشيلينك للصغيرة هههههههههه

Empress appy said...

قلب مصرى
=============
ربنا يجازيك خير يا رب ويكرمك ميرسى ليك اوى






الفاتح الجعفرى
==============
لا بقولك ايه انت اول واحد هتشترك كوه واقتدار انا موافقه ان بتوع الاقاليم اللى زيك يشتركوا ههههههههه ربنا يكرمك يا جعفرى نورت

Empress appy said...

الزواج.....روضة الحب
==================
والله يا حبيبتى انا بقالى كذا شهر عامله فكرة المدونة بس محدش بيعبرها شدوا حيلكوا معايا بقى وهى تبقى طول السنه
نورتى وسعيده بيكى






عصفور المدينه
===============

اهلا يا استاذنا هنعمل ايه بس والله الحمد لله على كل شئ والغريب ان الناس دى فاكره نفسها ذكيه وتقول عندى دليل يالا ربنا يهدى عموما انا لما قلب بيحس ناحيه حد واسئلته بالغدر بيعمل حسابه برضه
ربنا يبارك فيك ويبعدهم عننا

Empress appy said...

mayada
========
انتى هتقطعى علينا ولا ايه يا مادى لا بصى ممكن حتى اللى فى اى مكان يبعتوا فى السوبر جيت وانا اروح استلمها او حتى فىاعلربيات البيجو من اى مكان لموقف القاهرة وانا هروح اجيبها بعربيتى يعنى مش مشكله
انما لو انتم كمدونين المنصورة تحبوا تعملوها عندكم اوك احنا هنودى عشوائيات كمان
نورتى ومتنسيش الفانوس






nody_1987
=========
يا قمر المنصورة ربنا يخليكى ليه يا رب وشدى حيلك معانا بقى

Empress appy said...

مصرى
=====
اممممممممم انت بتشتغل فى هاز التغذيه انت مكز ليه مع خرفانى صدقنى مش للدبح دول دول ديكور بس ههههههههههه نورت يا اسامه





المحارب المتيم
===========
ليه انت حاسس ان ممكن يحصل حاجه فى رمضان ههههههههه ربنا يستر
نورت يا عدنان

Empress appy said...

alexandrany
===========
بص يا سيدى انا عندى فوكيرة حلوة اى حد عاوز يبعت ممكن يبعت الحاجات فى السوبر جيت او حتى فى عربيه بيجو لموقف القاهره وهما خمسه جنيه بس للسواق ويتصل بيه وانا اروح اجيب الحاجات كلها بنفسى وبعدين نجمع كله ونوديه فى يوم واحد ايه رايك فى الفوكيره
نورت يا اسكندرانى





فزلوكه
=========
لو مش قادره تيجى ابعتى يا قمر فى السوبر جيت وبعدين هو انتى مش من القاهرة لو كده جمعى الحاجات وابعتى فى بيجو للموقف وانا هروح اجيبها اى خدمه يا قمر

Empress appy said...

مدونة الدفاع
=============
اهلا بالمحامى الكبير نورت يا استاذنا ربنا يبارك فيك يا رب ويكرمك






النجمه الصامده
=================
جهاد يا قمر تحياتى ليكى ولبابا وسلامى الكتير

Empress appy said...

مواطن مصرى نايم
===============
قول ما انا عارفه انك شرده قول ما هو انت اصلك اخر العنقود فى اخواتى بقى وبتتدلع قول وهيحولوا الهجوم عليك هههههههههههههه
حاتر معلش يا زمخشرى عصرك وغسيلك مكنتش اعرف ههههههههههه نورت يا اسلام





الافغانى
=========
ربنا يكرمك بس شد حيلك معانا نورت الكوكب

Empress appy said...

only spot
===========
لما اشوفك هقولك يا حبيبتى المره الجايه بس اقولك سيبك هما ميستهلوش حد يفكر فيهم
وان شاء الله تعيشى وتشتركى معانا مفيش تزويغ انا بقول اهو ولا هااااااا اضرب





بنوته
=========
يا قمر احنا متفقين فى كل حاجه الحمد لله بس انا لازم انكش فيها دى حبيبتى
وبختار كل حاجه مع بعض نورتى يا قمر

Empress appy said...

حسام يحيى
==========
اه على الناس الساقطه عربى روح ذاكر واكتبها 15 مره يا حسام هههههههههه نورت الكوكب





شهريار العشق
==============

ربنا يخليك اجلتم تواضعنا ومنور الكوكب كله

Empress appy said...

Sherif
=========
التفاصيل يا شريف فى مدونة بيكيا واول بأول هقول عليها عموما ابدأ جهز اللى انت عاوز تشارك بيه من دلوقتى واول ما يقرب الميعاد هقول عليه لو انت مسافر ممكن تبعت وانا اشيلهم عندى مع باقى الناس اللى مسافرين واعمل كله مع بعض
نورت وربنا يكرمك يا رب عليه

مطلق said...

انا انشاء الله جي بس عايز تاكيد للميعاد و المكان
بس للاسف مش حتبرع بهدوم لان فيرجينيا و ناظله الله يحرقهم ضمروا القديم و الجديد
بس انشاء الله حتبرع بفلوس

Share |