سحبوا الرخصه والمفتاح معايااا


اه والله انا مبسوطه اوى اصلها مش عربيتى امبارح وعلى فجاه لقيت ابن عمي الكبير بيكلمنى ودار الحوار

آبي:- هاى يا اونكل ازيك خير فيه ايه ربنا يستر ايه الاصداف والقواقع السعيده اللى بتسمعنى صوت زعرور ده ليه (اصله ميتصلش الا فى مصيبه )

اونكل:- هههههههههه زعرور يا ام خرفان انتى قوليلى يا ام لسان فالت فاضيه يوم الاربعاء تسافري معايا اسكندريه بعربيتى

ابي"-نيهاهاهاهاها بجد بعربيتك طيب اشوف بقى الشغل والاجازه و ايه نظامها علشان مضغوطه هتدفع كام بقى فى المشوار

اونكل:-يعنى ايه ادفع كام مش كفايه هخليكى تسوقى العربيه انتى ربنا يستر بس الحمد لله انا جددت التامين بتاعها وبالمره امنت على حياتى ساعه لما اخدت القرار ده انك اللى تسوقي وكتبت وصيتى خلاص الحمد لله

ابي :- ايه انت ليه كل ده ايه الرضا السامي العدل اللى انت عامله ده ليه ما انا قولت العيله دي ميجيش من وراها مشاوير وفسح لله وبعدين دا انا هسيب بطوط الكميله واسوق عربيتك اللى مش عارفه اولها من اخرها دي حتى واسعه اوي شوف لك ترزي يلمها بقى وبعدين اشمعنى انا يعنى (انا هموت من الازحه والفرح جوايا اونكل عربيته بى ام الفئه الخامسه وانا عربيتى اصلا ماروتى متجيش فرده كاوتش شمال فيها ولما بركنها فى الشارع محدش بيشوفها وبغطيها بجراب موبيل

اونكل :- اسمعى يا خرفان هانم انتى علشان اخلص من لسانك واياكي اسمع تعليقاتك الرخمه اللى يضايقوا اصل والله انتى حره شدي فرامل لسانك لمده خمس دقايق انا الرخصه بتاعتى اتسحبت منى وعارف هتقولى انت من امتى عملت رخصه اصلا ما انت بتسوق من غيرها اخر مره كنت فى دمياط ظابط وقفنى وشاف الرخص سحب رخصه العربيه وانا مكنش معايا رخصه خاصه والظابط كان قافل دماغه انه اصلا ياخد العربيه علشان مش معايا رخصه شخصيه وكمان مش رابط الحزام ومش عارف كذا مخالفه اتجمعوا بسرعه المهم سحبها منى

ابى :- والنبى ايه كل ده علشان اقول لكم امشووا عدل يحتار بتاع المرور فيكوا عيله متجيش الا بسحب الرخص صحيح انما قولى فين اونكل ..................( كل النقط دى اسماء ناس فى الدخليه بيجيبوا ليه الرخص على طول وبالتليفون والله بس شيلناها للرقابه هههههههه

وبعدين يعنى انت ماشى من غير رخصه عربيه ولا خاصه هههههههههه يا عينى عليكى يا ولدى

اونكل:- عارفه العميد ...... اللى فى المرور مش عارف يجيبها شخصيا لازم تبقى فى النيابه وهستلمها بعد شهر وهدفع الغرامه كمان فبطلى لماضه وتعالى سوقى العربي ولا اشوف سواق كارو احسن ويبقى الواحد كده مطمن على الاقل على عمره

ابى :- ههههههههه لا خلاص خلاص انا مؤدبه وهاجي معاك بس ها على شرط اوعي تتكلم طول ما انا سايقه ولا تقولى متربطيش الحزام ولا تقولى ادخلى عكسى ولا كل ده انا بحب امشى كانونى علشان يوم ما حد يكلمنى احط صوابعينى فى عنيه ودلوقتى ولا اونكل زعبوط العفريت ولا اونكل قرنبيط هينفعك علشان اصلا انتم ناس متجيش غير بسحب رخصها ههههههههه

اونكل تششششششش غورى بقى ى وردي عليا بكره علشان اجهز نمرة الاسعاف قبل ما نسافر

===================================================================
خلص الحوار وفعلا بجد قانون المرور الجديد مش فيه هزار وبيطبق بقوه عاوزه اقولكم ابن عمي ده وحده مرور متنقل لوحده بمعارفه والله فرحانه فيه ومتقولش عليا دمويه ولا شرانيه لان بجد بتغاظ اوي من الحاجات دي لان فيه ناس تانيه مش بتعرف تتصرف وحالها بيقف فبيصعب عليا الظلم
انما واضح ان الحكومه اخيرا هتعمل حاجه كويسه فى حياتها قبل ما انا اموت مش هما هههههههههههه على فكره اللوحات تحفه وشيك جدا وفعلا هتقلل المخالفات لان انتم عارفين ان العساكر والامناء بصمجيه يعنى ممكن ميعرفوش يقروا كل الارقام ههههههه او يالفوا
او لا قدر الله فى حادثه مبنلحقش ناخد الرقم لان العربيه صاحبها عاده مش بيقف انما دول تلات ارقام بس وتلات حروف لبتوع القاهرة وباقى المحافظات اربع حروف تقريبا فده هيكوون اسهل لان العربيات اللى ارقامها سهله قليله زي بطوط عربيتى كده
واهى خلاص هنعمل لهم رجيم فى شهر عشرة واغيرالارقام بتاعتها وهحاول اجيب اول تلات حروف باسمى يعنى مثلا تبقى آبى 112
عارفه ان فيه سواقين هيتظلموا بس بجد مش فرح فيهم قد ما هو بقول احنا شعب مش بيأدبه غير الفلوس لان ولا واحد من بتوع الميكروباظااااااات
بيمشى صح وفعلا مبلطجين الا القليل منهم فلو مشيوا صح محدش هيقدر عليهم ولا امناء ولا غيره هيبلطج
صحبتى المفروسه على طول قالت ليه ان لسه المحور زى ما هو وسواقين الميكروباص بيحملوا من على الكوبرى فى ميدان لبنان والظابوط واقف مش عارفه يمكن القانون موصلش ميدان لبنا ن بما انها بعيده ههههههههههههههه
القانون كله فى راى حلو اوى بما انى من الملتزمين فى السواقه ما عدا السرعه احم احم ههههههههه

والاشارات الجديده حلوة اوى بجد وشيك لان شوفتها بره مصر وعجبتنى وكمان مطبقه من زمان فى الاسماعيليه المسأله بس محتاجه تنظيم والتزام مننا
بس انيل واهبل واهطل حاجه بقى والوحيده الغلط واهو الحكومه لازم برضه تبوظ الطبق المهلبيه اللى عملته شنطه المسعافات الاوليه دى
انا عن نفسى هكتب على بطوط اوعى الاسعاف ههههههه على الشنطه علشان ميبقاش يسالونى عن شنطه الاسعاف تانى
انما المثلث فعلا كويس جدا وعلى فكره نسيوا موضوع الجاكت العاكس لان ممكن حد يغير كاوتش بالليل ولا حاجه وفى الضلمه وعربيه مش تشوفه وتقوم هوووووب مموتاه ودى حوادث كتير بتحصل فالجاكت ده بيعكس الضوء ولونه فسفورى كمان
بس انا اساسا لو بطوط عطلت هربطها فى عامود او شجره او احط جنبها طوبه واقول لهم ممنوع الازعاج هههههههههه
فى النهايه فكروا فى القانون صح ونفذه صح ومش عاوزة حد يطلع يقولى طيب والظباط هيتنفذ عليه هقوم خبطاه بقله فى دماغه هقوله عيب الظباط مرفوع عنهم القلم ههههههههههه

لا بجد مش لازم علشان هما او بعضهم مش هيطبق يبقى نمشى مع القطيع مش لازم علشان اكون انسان متحضر يبقى لازم الكل حوليه ابدأ بنفسك الاول واحترمها الاول

وفى النهايه بهدى اغنيه اركب الحنطور واتحنطر لابن عمى عند فيه علشان يبطل يبلطج هو واللى زيه ههههههههههههههه

سؤال البوست :- مين يعرف يخمن أرقام عربيتى هما 6 ارقام بس تلاته ازاى بقى فكروا يعنى اتنين مختلفين والاربعه الباقى متشابهين
اللى هيقول صح له خروف هديه هههههههههه

كان معكم استاذ لواء طيار فنار آبى هانم بتنجانى

115 اخبط وقول رايك:

محمد فوزي said...

صباح الخيرات
أولا : الحمد لله إن في حاجه ممكن تمشي صح في بلدنا ,
ثانيا : لو إنك تحبي تشوفي اللي ماشي غلط بيتعاقب ده دمويه أبقى انا تشاوشيسكو ههههههه
ثالثاً : فعلا الجاكت العاكس ده مهم وياريت يلزموا بيه بدل شنطة الإسعافات الأولانيه دي
رابعاً : على مهلك وانتي سايقه البي إم الله يخليكي انا عارف اللي مش متعود ممكن يعمل إيه ( وش بيطلع لسانه )
خامساً : محدش يسافر إسكندريه يوم الأربع أصلاً ههههههههه

تحياتي

محمد فوزي said...

إيه ده انا كنت أول تعليق ؟
ده الواحد لازم يحتفل بقى على كده

سنووايت said...

يا محاسن الصدف
لا بجد انا فعلا مش مصدقة
اولا انا تالت تعليق تقريبا لو محدش جه وعلق قبلي
ثانيا انا لسة منزلة حالا موضوع عن المرور
هههههههههههه

زي ما قلتي يا ابي القانون موجود المهم الناس بس تلتزم ياااااااااااارب

بطوط لو قرت البوست دا هتزعل اوي علي فكرة خللي بالك بقي
بالنسبة للارقام مش عارفة اخمن بصراحة بس هاموت واعرفهم
:)

محمد الكومي said...

عندنا في الاسكندرية هناك قدرة غريبة على التكيف مع اي قانون مرور

و عادي جدا الامور بتمشي

لدرجة ان كلمة اتسحبت رخصتي دي كلمة عيب اوي في اليكس

معلش ناس ناس بقى

بالنسبة لرقم عربيتك

ممكن يبقى 57357
على فكرة زي سنو وايت بالزبط في مسالة ان النظام اصله التزام مش قانون و جباية

blue-wave said...

ايه دا؟
الناس دى لحقوا علقوا امتى؟
دول بايتين من امبارح باين:))
عمونما يا ست ابى انا اول مرة اشوف حد بيشكر فى قانون الطماطم الجديد دا
مختلفه طول عمرك
ومبروك يا عم هاتشوق فئه خامسه واحنا محصلناش فئه صفر حتى
نق بقى
وبالنسبه لشنطة الإسعافات خليها عليا وهاعلمك تستخدى الحاجات اللى فيها ازاى كمان
يلا ان شاالله ما حد حوش
تقبلى تحياتى

لورنس العرب said...

على الرغم من فرحك بالالتزام بقانون المرور - لكن أقدر أقولك أن ده كان في أول أسبوع- كانت الشده 100%، حتى فيه ناس من أصحابي أخدوا مخالفات بالآلاف- لكن يوم بعد يوم العمليه بدأت تهدأ قليلا- طبعا مش زي الأول لأن الأول كانت العمليه بايظه خالص- لكن إلى حد ما الأمر لم يكن مثل اليوم الأول- وبشوف بعيني عربيات من نوع النقل الثقيل " مقطوره" بتسير صباحا بلا أي مشاكل وبدون أي اعتراضات- وبالنسبة لسحب الرخص فإحضارها دلوقت بيكون صعب لأن الرخصه بتتسحب وبتكون واخده مخالفه لازم تندفع
لكن أحب أؤكد لك ان العمليه دي أكيد ليها صرفه مع رجال المرور
يعني الأمور اللي احنا فاكرين انها خلاص بقت تمام وصعب على الناس انهم يفلتوا منها هايظهر لها حل عند ضعاف النفوس للفرار من القانون ودفع الغرامات وسحب الرخص
هي بس مسألة وقت يا آبي - وأكيد شياطين الانس هايجدوا الحل

mostafa rayan said...

حلو القانون بس يلرب يطبق على الجميع
تحياتي ليكي

لورنس العرب said...

ملحوظه: قانون المرور الجديد ممتاز والغرامات الكبيره فيها نوع من الردع عند المخالفين- ولكن يجب استغلال الغرامات دي في تصليح الطرق واصلاح الاشارات وعمل علامات في الطرق لإرشاد الناس بدل ما يسيبوا الطرق مبهدله كده
القانون الجديد حلو - لكن يظبطوا الشوارع عشان تبقى الدنيا أحلى
وياريت يحلوا المشكله المستعصيه الخاصه بتعريفة عداد التاكسي بدل ما الناس وسائقي التاكسيات بيمسكوا في بعض عمال على بطال- ولو اني اظن انا لمشكله دي كبيره وحلها صعب

عايش ولكن said...

والله القانون ده عاجبنى برغم ان فيه شوية سلبيات بس ايجابيته اكتر من سلبياته
بس قولى يارب يفضلوا مطبقينه صح من غير محسوبيات ولا وسطات

بس اقولك حاجه لو هتسافرى معاه خليه يسافر معاكى بعربيتك بطوط هههههههههه علشان يحس بالفرق ويحس انه فى نعيم

اه صحيح فى تدبيسه ليكى عندى معرفش حليتيه قبل كده ولا لا بس تعالى خديه

امل said...

السلام عليكم
ايه ده أول مرة اكون من الاوائل في التعليق بركات الخروف الهدية ان شاء الله هههههه من زمان وانا عايز اقترح عليكي عمل مسابقة ويكون جايزتها خروف بالنسبة للقانون مش عارفه كتير بيطلعوا قوانين وبتطبق لفترة وبعدين يرجعوا تاني بس خلينا متفاءلين رقم العربية بقه 110112
يارب اكسب
كل سنة وانتي طيبة

بنوتة said...

هههههههه اولا حبتدي بالأجابة هي

استاذ لواء طيار فنار آبى هانم بتنجانى ازاي بقى اقوللك
نمرة العربية حتبقى ابي هانم بتنجاني و على سحب رخص بتحصل كتير و بالزات للي زي ابن عمك لأ و مرة ماشية على البحر في المنتزة مفيش نملة لبسة حزام و بعدين دورت وشي بصيت لقيتهم كلهم لبسوا الحزام و بعدين حقولك على حاجة بقى في مخالفة على التكليم هههه التكلم في الموبايل اصناء هههه
اثناء السواقة فى الموجة ههه
الموضة ان الناس بتكلم في سماعات الموبايل و لو اجابتي طلعت صح تديني جوز خرفان و تدبحيبهم على حسابك
هههههههههه
كانت معكم بنوتة هانم الاسكندرانية الاسكندارية

ana ga3an said...

من الشمال لليمين
61
اكمل ولا كفاية كدة
:)

مواطن مصرى نايم said...

هههههههههههههههههه
بى ام دبليو فئة 5
الله يسهله يا ايبى
يعنى انتى قررتى تسوقى و الا لا
خدى بطوط فشنطه عربيه ابن عمك
ههههههههههههههه
بالنسبة لارقام بطوط
دى سهله جدااااااا
اى رقم اى حاجة عاوزاة قولى لى و انا اقوله على طول
اكيد طبعا رقم عربيك

07770777
اه دا بخط التليفون

لكن لو عربية ابن عمك عاوزة ارقامها

حتبى dsl 4 mb
و من لينك برضوا

بس فرق سرعات

تحياتى لايبى هانم الشوفير
و تحيه خاصة لبطوط و ارقمها

على فكره انا رقم موبايلى اسهل من ارقام بطوط بقى

و محدش يقدر يسحب رخصة الموبايل منى ابدا اه انا واصل خلى بالك
اعرف لوءات و عمداء بيشتغلوا فموبينيل
ههههههههههه
قال يسحبوا رخصة موبايلى قال
هههههههههههههههه

مواطن مصرى نايم said...

نقى رقم لعربيتك من دول

612222
613333
614444
615555
617777
618888
619999
610000

هو واحد فيهم انا متأكد

حسن حنفى said...

ههههههههههههههههه

ممكن القانون يمشي صح

بس مش اعتقد انه هيستمر كده لفتره

طويله

علي راي بتاع التاكسي اللي انا كنت

راكبه القانون معمول علشان

بدل ما هو يدفع 5 جنيه رشوه

يدفع 20

ست البيت said...

آبي بتنجاني
اني عندي بكرة في حرم ست البيت الاسكندراني
يبقى لازما وحتما تقوليلي نازلة فين ...وأوعي يا بنت يكون الفور سيزونز احسن يصادروا الخرفان منك
وقد اغذر من انذر
خلينا نشوفك ...عنواني 1عمارة وشوشني شارع وشوشني اللي كان على وشك يروح في الباي بااااااااااي
آبي صحيح متنسيش تدققي في أوانين المرور عندنا شوية
عشان كنتي زعلانة من البوست اللي كتبته ونظرة خاطفة كده على كوبري سيدي جابر المتحرك
حعمل عليه بوست بتنجاااااااااااان خاااااااااالص

tamer.sala7 said...

والله العظيم وحشتيني و وحشتني خفة دمك

بالنسبة لقانون المرور هو ليه حسنات بس سيئاته اكتر

بس في كل الاحوال انا بتغاظ من الناس اللي معاهم واسطة وبما انه حيقضي علي الواسطة يبقي يعيش قانون المرور

وومن said...

آبي

بجد الكلام دة بس ياتري لحد امتي

اكتر حاجة فرحتني أرقام العربيات كانت عاملة زي الكرنفال اشكال وألوان

تفتكري فعلا الحكومة عاوزة تعمل حاجة حلوة قبل مانموت ولا دي تموية علشان نموت من الفرحة

تروحي وتيجي بالسلامة يا قمر ان شاء الله
ده لو قررتي انك تروحي وخلي بالك من الكمين

رصيف نمره خمســــــه said...

القانون الجديد الحسنة الوحيدة اللى عملتها بلدنا فينا الفترة اللى فاتت دى

بجد بقيت احس بشوية نظام فى الشارع والاماكن الزحمة وكل واحد بيبقة خايف ياخدله مخالف مش زى زمان

ولا لسه يابوبو ده الفلوس اللى هياخدوها من المخالفات دى هتتصرف على الطرق وهنتظبط اخيرا

مصر هى امى ههههههه

انا نفسى تبقة دى بداية كويسة فى القرارت فى بلدنا الكويسة اوى

سلااااااام

ابن حـجـر الـعـسـقـلانـى said...

انا هموت من الازحه والفرح جوايا اونكل عربيته بى ام الفئه الخامسه وانا عربيتى اصلا ماروتى متجيش فرده كاوتش شمال فيها ولما بركنها فى الشارع محدش بيشوفها وبغطيها بجراب موبيل


الجملة دى خليتنى أموت من الضحك .. لقيت أمى و هى على بعد سبعة كيلومتر من مكانى بتقول لى : يابنى بتضحك على إيه

و يا ستى عقبال ما تجيبى عربية لامبورجينى .. متهيألى تمنها يعدى التلات آلاف جنيه مستريح

nody_1987 said...

قانون المرور ده
اتعمل علشان العساكر والظباط يكونوا نفسهم
انسى انهم يعملوا حاجه لخدمتنا
ده عشم ابليس فى الجنه

انا عمى كان راجع مع صاحبه من بلد جمبنا وصاحبه ده لسه جاى من باره
وممعاهوش رخصه قياده من مصر
ووقفوه فى حمله
30 جنيه حلت الموقف
عاااااا
اااااادى يعنى

Mercy Devil said...

طب ما أنا معاى بى ام كارو مالها يعنى ؟؟؟
وقريبا ان شاء الله رجلى هتخف وهيبقى معاى موتورجل زى زماااااااااااااان

336666
او
663333

صوح ولا لاع ؟

المنسى said...

ألو يابتنجانى
عاملة إيه
أنا أه ماليش فى السواقة
ولا عندى عربيا ولا بهتم بقوانين المروردى
بس فعلا حاسس إن القانون ده عمل حاجة فعلا وخصوصا إنه قدر ودى معجزة يخللى دار السلام رايقة أى نعم أستوجب منهم الأمر إنهم يجيبوا عساكر كتير وونشات عشان الزبالة والباعة الجائلين وينزلو البلدية وحاجات كتير
بس الحمد لله
أنا برضو من رأيك
رغم إن فى ناس هتتظلم
بس مستقبلا ده هيكون أفضل بإذن الله
وأهو مش متخالف معاكى خااااااالص
وفعلا نبدأ بنفسينا ونلتزم والقانون ده هيبقى طيبوب ولذيذ فعلا
وانا برضو لغاية دلوقتى شايف إنه ممتاز
تحياتى يابتنجانى

Sherif said...

الحقيقة ابتديت أحس بفرق .. يارب على طول

اما ياجميل موضوع رحلة اسكندرية .. وانا اعلم تماما ان ال بى أم اللى يموت تحتها فهو شهيد .. فلا يسعنى الا ان اقول

مصائب قوم عند قوم فوائد

Bon Voyage

وجهة نظري said...

قانون المرور إلي بيراعي التطورات الدوليه والتكنولوجيه الحديثه يستحق دراسه وإحترام من الجميع

الكلام إلي فات دا جميل أوي أوي إنما في 3 مشاكل

المشكله الأولي: إننا مينفعش نجيب عيل عنده 5 سنين وندخله إعداديه خبط لزق في مدرسه مافيهاش فصول ولا مدرسين، ونطلب منه ينجح بـ90% علشان نفرح بيه ولو منجحش حنمده علي رجله

بمعني مينفعش نجيب شعب عاش طول عمره في فوضي مروريه تامه غير مسبوقه دوليا، ومينفعش نجيب عساكر مرور وأمناء شرطه من ساعة ما إشتغلوا عمالين يرتشوا ومعلمينهم إن عربيات الميكروباص من غير رخص وتبع الظابط الفلاني وتبع مش عارف مين بيه .... مينفعش كل دا نعمله في شهر والا حتي في سنه .... دا إحنا لازم نجيب الـ 80 مليون واحد واحد نحميه ونغسله ونعقمه ونعلمه ألف باء وماء كمان الأول وبعدين نطلب منه يلتزم بالمرور ... ودي حكايه بتاخد سنين طوييييييييييله أوي

المشكله التانيه شوارعنا إلي هي بتاعت الدوله إلي فارضه القانون عشوائيه زيها زي السواقين، مفيهاش تصميم يساعد السواق إنه يلتزم ومافيهاش علامات مرور ومافيهاش خطوط علي الأرض وتلاقي إشارات المرور مش شغاله أصلا ومفيش أماكن إنتظار .... وغيره .... فبتعملي قانون بيعاقب الناس علي حاجه هما مش شايفينها بوضوح ومالهاش حلول موجوده ... وتعديل دا عايز أرقام فلوس خرافيه وعدد سنين لا حصر له

المشكله التالته إن الناس كلها مؤمنه بناء علي المشكلتين السابقتين إن القانون دا معمول علشان الدوله تلم فلوسهم وبس، فبدل ما الناس حيتعلموا يسوقوا زي مخاليق ربنا في الدول التانيه، حيعلموا نفسهم إزاي يتحايلوا علي القانون الجديد ويلفوا حواليه ويهربوا من لجان المرور إلي حتستمر فتره قصيره وبعدين تختفي وترجع "مصر" لعادتها القديمه .... ونلاقي اللجان في الشوارع كل ما الحكومه تتزنق وتحب تلم فلوس جديده ..... وأهو إسمنا عندنا قانون دولي للمرور علي أعلي مستوي، وسلميلي علي البتنجان

لو القانون دا هدفه الصالح العام بجد، لازم الحكومه المصريه تقدم إغراءات للمواطنين الأول علشان تحفزهم يلتزموا .... إغراءات مش بمعني يشغلوا رقاصات في المرور ههههه، إنما بمعني تلميع الشوارع وتفعيل نظام الجراجات سواء عامه أو خاصه، وتكثيف العلامات المروريه وتخطيط الشوارع تخطيط حديث، وحل المخالفات العشوائيه إلي محتله الرصيف ولحد نص الشارع، وإناره كافيه ....... حاجات زي كده ... يقوم المواطن يحس إن الحكومه عايزه تنضفه وتحميه (يلهوي .... حيحموني يابا) ... فيقوم يختشي علي دمه وواحده واحده يحس إن البلد دي ملكه ولازم يحافظ عليها ويلتزم بقوانيها

تحياتي

سومه...مجنونه فى بلد عاقل said...

بت يا ايبى انتى ليكى عرق منوفى يا بنت
بلاش شماته يا نهارك بمبى لون خرفانك هههههههههه
كل دا عشان مش عربيتك طيب بالزمه لا قدر الله لو بطوط عمل مخالفه الظابط حيستعيب ياخد الرخصه وهى تقريبا اكبر من العربيه احتمال يضرب العربيه على ايدها ويقولها كوخه كدا

Do not Press F1 said...

السلام عليكم
اولا انا فرحانة بجد ان فى قانون بيتم احترامه ولسه مش دخلت فيه اى كوسة يارب يفضل على طول كدا من غير اى كوسة ولا اى دسم فيه

بالنسبة لبطوط بتاعتك دى اخرتها لفة شاش وقطن مش شنطة اسعافات ولو حد كلمك قوليله دى لسه مش سننت.
اما بالنسبة للارقام
اممممم
الاربعة المتشابهين رقم 6 والاتنين المختلفين رقم 3و7
يارب يكون تخمينى صح
سلامووووز.

GeHaD-----(male) said...

اكيد ارقام العربيه
246

جنّي said...

بركاتك يا قانون المرور الجديد

بجد العيب مش في القانون .. العيب فينا اللي بنكسر اجدعها قانون ومش واخدين على النظام .. لكن شوية شوية الناس ها تتعلم وتلتزم زي ما حصل في مترو الانفاق .. بس بشرط الجماعة الللي مرفوع عنهم القلم ما يرفعوش الفيزيتة ..
اما اهيف ما في القانون شنطة الاسعافات وطبعا ها تلاقي الناس حاطة صبغة اللعلي بدل الميكروكروم

سلام

appy said...

محمد فوزى
==========
ايه الجنسيه الغريبه دى مش عارفاها دى تبع الفمبير هههههههه
وبعدين مين قال انى مش متعود على البى ام شوفت الجهل يا ابنى انا عربيتى اصلا هامر ومتنكره فى شكل ماروتى ههههههههههههههههه
رابعا مش الاربعاء النهارده الاربعاء الجاى وهسافر هههههههههههههه

نورت ومبروك عليك اول تعليق ابقى هات هديه بقى فى ايديك لاول تعليق ههههههه








سنووايت
**********
لا بطوط مش بتزعل منى خالص اصلى بقولها انا بضحك على الناس علشان مش يحسدوكى دى انا اقنعتها انها هامر بس متخفيه من الضرايب هههههههههههههه
وبعد الشر عنك فى اخر يوم هنزل رقمها فى التعليقات لما انزل البوست الجديد بس ركزى شويه هتعرفى نورتى يا قمر

appy said...

محمد الكومى
=========-=
ماشى يا عم ما انا كمان متسحبتش رخصتى غير مرة بس وسرعه والله مش اكتر وبعدين عندكوا بتتشطروا على الناس الغريبه هههههههه
وغلط بطوط مش فيها ولا رقم من اللى انت قولته خالص
نورت يا محمد









blue-wave
==========

عارف انا بحب القانون ده علشان التزام ما هو احنا مش لازم نعارض الحكومه لمجرد المعارضه يا جماعه يعنى انا شايفه انه كويس جدا مش وحش
وبعدين ايه هشوف دى ما هى متلقحه قدامى طول الوقت طيب والله بخاف اركبها اصلا كبيرة اوى
وتعلمنى ولا تتعلم فيه هههههههههه
نورت يا دكتور

appy said...

لورانس العرب
===============
لا موضوع المقطورة اساسا مدينهم تقريبا سنه يوفقوا فيه اوضاعهم القانون مش هيظهر اوى غير بعد فترة وصدقنى الشده موجود جدا
موضوع الرخصه صدقنى مفيش فيه فايده انا بقولك وحدة مرور متنقله يبقى هيوقعوا سيستم كامل لان كل حاجه مرتبطه بكمبيوتر واتكلموا عنهبالشرح فى التى فى واحد رائد من وحده مرور مدينه نصر
على فكرة الدائرى فى المعادى قبل الساعه 8 بالليل بتتسحب الرخصه خلاص

نورت يا لورانس وحبه تفاؤل يا راجل








mostafa rayan
=================
حظك بقى ان الظابط اللى فى عمارة الشغل النهارده لقيت عربيته معلقه ارقام الجديده ومش عليها اى علامات انه ظابط يعنى ابتدى فعلا يطبق

appy said...

لورانس العرب
===============
موضوع الشوارع اقولك على كارثه بعينى علشان تعرف اننا فعلا كتير بقينا مخربين عندى طريق فى القاهرة الجديدة منزل ومطلع بميل المهم بيسفلتوه وبعد كام يوم منعوا اساسا طلوع او نزول العربيات بتاعت الخلاطات الاسمنت من عليه لانها بتوقع الاسمنت الباقى منها عليه وبتبوظه او على الاقل المفروض العربيات دى تتغسل ووهى فى الموقع
العربيات بتطلع وتنزل وعادى جدا وبوظوا الطريق تانى بوقوع الاسمنت انت عارف تكلفه الرصف كام كتير جدا
موضوع الغرامات انت ممكن تدفع فورى الحد الادنى وهى خمسين جنيه على اى حاجه
الناس لازم تساعد وتلتزم صدقنى مش يرموا زبلاتهم على الطرق والحكومه تلم وراهم فى اماكن مخصصه لده كتير
نورت يا لورانس







عايش ولكن
===========
وتفتكر هيوافق وبعدين مين نعيم ده دا انا عربيتى كميله كالص هى ناقص لها مروحه سقف وتبقى فله ههههههههههههه

appy said...

اموله
=======
لا يا امل غلط ركزى شويه والنبى وهديكى تلات خرفان ورجل هههههههههههههه







بنوته
=======
دى يافطه يا حبيبتى مش ارقام العربيه ههههههههههههه
لا ركزى شويه وانتى هتعرفى وبعدين هو فعلا التزام يا حبيبتى مش اكتر

appy said...

ana ga3an
===========
هنهزر ما انت عارف انك خارج المسابقه
هههههههههه
عيب كده وبعدين هااااااااا اياك






مواطن مصرى نايم
===============
ههههههههههههه اه يا اسلام وتمشى من غير رخصه الموبيل يا لهوى ونتصل بيك يقولك هذا الرقم مسحوب منه الرخصه لعدم وجود مثلث عاكس هههههههههه
وتبقى فضيحه
غلط كل الارقام يا اسلام ركز شويه يا مصيبه
نورت الكوكب

appy said...

حسن حنفى
=========
صدقنى يا حسن الموضوع التزام وادب من الناس الناس هى اللى بتدفع وهى اللى بتاخد بس لا مفيش رشوى اطمن فيه كاميرات مراقبه فى كل مكان
نورت يا حسن








ست البيت
=========
الاسبوع الجاى يا ست الكل مش ده وبعدين فور مين لا خالص ده هو يوم وراجعه وخرفانى هتقفل لكم اسكندريه ويا حبيبى انا مش زعلانه منك خالص انا بس بحب نشوف المواضيع بعقل مش نهاجم الحكومه وبما انى ملتزمه مروريا احم احم هههههههه فبحب كده وحاضر هشتنى البوست وبعدين ماله البتنجان بقى هنغلط ليه
وبعدين ابقى قولى عنوانك بصوت واطى شويه علشان محدش يسمع ههههههههههههه

appy said...

تامر صلاح
==========
نورت بلوج سبوت واخواته وجيرانه قلقتنا عليك يا ابنى بجد حمد لله على سلامتك والحمد لله انك بخير






وومـــن
=========
يا ريت يا ميرا يفضل
ان شاء الله اروح بس الاسبوع الجاى يا رب ميغيرش رايه يا ميرا اصل هضايق ههههههههههههه
نورتى يا اجدى وومن فى الدنيا

الربان said...

تحياتي

لابد ان نحترم القانون...و لابد ان يطبق علي الجميع دون اي أستثناء .

أؤيد حضرتك بالنسبة لموضوع الجاكت...و اتمني ان موضوع حقيبة الاسعاف يعاد بحث
مكونات الحقيبة...لانها بحاجة فعلا لاعادة النظر....و اعتقد ان وزراة الصحة شكلت لجنه و الاستاذ صلاح منتصر الكاتب بالاهرام ممثل للمجتمع المدني بها.

ارقام سيارتك و حصريا علي شاشة كوكبك
هي 553455

تحياتي و تقديري

appy said...

رصيف نمرة خمسه
==============
يا ريت بس يا حبيبى الناس تلتزم بالموضوع وميقرفوناش شعب ميجيش الا بالفلوس
نورتى يا قمر ويا رب يسمع منك وتكون كويسه بينا






ابن حجر العسقلانى
=================
عسقول عندنا وبيضحك يا دى الهنا اللى احنا فيه
وبعدين اقولك كلمه فى سرك بطوط هامر بس متنكره هى فاهمه كده علشان الضرايب والنظافه والبنزين اوعى تقولها هههههههههه
لا اللامبرجينى يعنى اغلى شويه 4000 بس ههههههههه

appy said...

نودى
========
لا يا نودى صدقينى هنا اطبق وبعدين اصلا عالج غلط بغلط ما هو يا حبيبه قلبى لو احنا مشينا صح مش هنديهم فرصه ياخدوا حاجه بس احنا نلتزم نورتى يا قمر المنصورة






Mercy Devil
===========
غلط ركز يا عم علشان تكسب الخروف الهديه احنا داخلين على ايام مفترجه ههههههههههههه

appy said...

المنسى
=========
انا مش مصدقه نفسى سا راجل اول مرة ملاقيش اعتراض منك ههههههههههههه الحمد لله بكره كله يتساوى ومبروك على دار السلام
نورت الكوكب






Sherif
=-======
ههههههههههههه اشمعنى شهيد يعنى يا شريف طيب اللى يموت فيها هههههههههه
حرام عليك ربنا يستر بقى هى مش اول مرة اسوق بس دى اول مرة بينى وبينك سوقت 318 بس
نورت يا شريف

appy said...

وجهه نظرى
===========
معلش بقى يا معتز همسك فى خناقك المرة دى انت اخويا وعادى يعنى
شوارع مصر اتغيرت اوى احنا اللى مش بنحترم نفسينا يعنى لما طريق يقفل علشان فيه حادثه مش بنصبر لما تتلم فى جنب لا فى ثانيه نروح فى العكسى ونقفله هو كمان وبجد الاماكن واسعه تعالا انت بس وانا اوريك الدنيا ازاى مصر اتغيرت عن زمان كتي رانت اخر مرة كنت هنا امتى
غير كده لا احنا شعب عاوز يتربى وعلى فكره فيه كاميرات مراقبه يعنى ولا ظابط ولا عسكرى هياخد فلوس صدقنى وبعدين تصحيح للمعلومه الظباط اللى بياخدوا فلوس دول كانوا بيبقوا امناء وذاكروا وبقوا ظباط يعنى بتلاقيه كبير فى السن ولسه ملازم اول واو نقيب فبيبان بيعمل قرشين بس انمل مش ظباط اصليين يعنى
بص هى اخلاق يعنى واحنا شعب عاوز يتربى
طبعا انت عارف انى بتكلم بقلب جامد علشان انا ملتزمه مروريا ههههههههههههههههه
نورت ويا رب تنزل بقى علشان الففك السبعتاشر لفه فى الشوارع







سومه المجنونه
=============
هههههههههههههخخخخخخخ هيضربها على ايدها لا هيمدها والله يا سومه اتسحبت مرة واحده منى سرعه وكان مكسوف وهو بيسحب الرخص بس انا طمنته قولت له متخافش انا هجيبها الصبح فمش هتفضل من غير غطا كتير هههههههههههههه
نورتى يا سمسمه

أنا حر said...

فعلا القانون ليه نواحي ايجابية كتير جدا بس الشيء اللي مش حلو موضوع الغرامات الفورية وزيادتها في حالة عدم الدفع خلال 48 ساعة انا اول مرة اشوف فوائد على الغرامة كمان موضوع شنطة الاسعافات دي بيقولوا لازم الشنطة يكون فيها انبوبة اكسجين ..... طيب مش لما المستشفيات الاول يبقى فيها انبوبة الاكسجين يبقى نحط في العربية؟؟
انا في الاخر محبش اني اكلفكواحنا داخلين على رمضان كمان هيصعب عليا الخروف علشان كده مش هحاول اخمن رقم عربيتك ويبقى الخروف لسا ليه عمر
تحياتي

appy said...

Do not Press F1
====================
ههههههههههههه لفه شاش دى تغطيها يا بنتى صدقينى
لااااااا انا اصلا بحطها فى جراب واقولهم ده الموبيل بتاعى وانتم مش واخدين بالكم ههههههه
لا غلط يا قطه انتى خمنى صح نورتى يا قمر








GeHaD-----(male)
=================

ده رقم الحنفيه بتاعت الميه يا جهاد ههههههههههههه لا غلط انا بتكلم على القديم اللى عليها مش الجديد اللى مركبش نورت يا جهاد

appy said...

جنى
=====
اه انا مبسوطه اوى فيه بجد ويا رب نتعمل نحب نفسنا والبلد ونهدى بقى
نورت يا جنى






الربان
========
فعلا بتمنى انهم يظبطوها وانهم يضيفوا الجاكت وخاصه للنقل التقيل لانه اللى بيحصل فيه مأساه
ارقام عربيتى غلط الردار عندك نقلها غلط ههههههههههههههههههه هى الارقام المتشابهه 11 كمل انت بقى نورت الكوكب

appy said...

انا حر
========
لا مش فى خلال 48 ساعه 72 ساعه ومش زياده لا هو فى خلال التلات ايام بتدفع الحد الادنى اللى هما 50 جنيه فهمت لو رحت بعد التلات ايام بتدفع اكتر اللى هى الغرامه الحقيقيه فهمت الموضوع
لا مفيش موضوع انبوبه اكسجين ده غلط انا شركتى هتستوردها ومفيش انابيب حاجه الكلام ده زياده واشاعات بجد
ههههههه خمن وانا واثقه انك مش هتعرف هههههههههه
نورت الكوكب

محمد فوزي said...

هههههههههه
هامر ومتخفيه في هيئة ماروتي ؟

طب والنبي وطي صوتك لتسمعك وتصدق وتتنك عليكي ومترداش تدور تاني

وبعدين أهو الأربع الجاي ده بالذات هيئة الأرصاد الجويه بتقول إنه هيكون مطر في عز الحر ومحدش هيسافر
هههههههههه

قلب مصرى said...

قانون المرور بتاعنا ده سيتم تطبيقه بالشدة لمدة لن تتجاوز شهر أو شهرين على الأكثر ثم يبدأ بعض أفراد المرور فى تلقى الهدايا من السادة السائقين بديلا عن تحرير المخالفة ويبقى الكل استفاد كالتالى:
السائق: الهدية أفضل من أن تسجل عليه المخالفة.
بعض أفراد المرور: استفاد من الهدية واهو أولى من الحكومة.
الحكومة: ستنخفض من وجهة نظرها كمية المخالفات وكله بالأرقام وبذلك يصبح القانون الجديد مصدر تباهى للحكومة نظراً لنجاحه الساحق فى خفض عدد لمخالفات.

أما بخصوص أرقام بطوط فده سر فيكونى عالى ولا يجب الإفصاح عنه ببساطة لأن الأعداء من الكواكب الأخرى تترصد لبطوط ومش هانذيع رقمه خوف عليه.

appy said...

محمد فوزى
===========
انا اساسا اقنعتها بكد انها متخفيه من الضرايب والعقارات ولارسوم والحسد وهى ماشيه متنكه على الناس وحسه انهم اغبياء ومش عارفين يقدروها دا الغطاء بتاعها جيباه لها لونه ازرق علشان تفهم انه للحسد ههههههههه وكما شيفون علشان تحس بقيمتها
بالنسبه للمطر والزعابيب هأخد شمسيه ههههههههههه







قلب مصرى
===========
انت عارف مش مودينا فى داهيه غير احساسنا بالانهزاميه وعدم تصديق اى حاجه كويسه علشان كده احنا كمان بنبوظها
والله بص له بعين تانيه هيمشى ويبقى كويس
اما بطوط فانت مش عارف علشان كده بتتهرب وتقول سر انا هفصح عنه لانى كده او كده هغيره
نورت الكوكب

Abo 7anf said...

السلام عليكم
ازيك ياابى
القانون الجديد كزيس
حتى انا قلت اشترى العاكس والشنطه الاول
وبعد كدا ربنا يسهل فى العربيه
المهم اخبارك ايه

A7MeD F@hMy said...

هههههههههههههه
كل ما اجي اكتب حاجة اخاف من القلة بتاعتك دي
اوعي تضربي و انا مش واخد بالي
:D
بالنسبة للقانون الجديد هو ممكن يكون كويس اه بس كونه يبقي ف مصر يبقي يا رحمن يا رحيم
مفيش حاجة عدلة بتمشي ف البلد دي خااااااالص
مينفعش الوسايط ماتبقاش موجودة عندنا بس ممكن مستواها يعلي شوية
يعني الوسايط لازم تبقي جامدة
من دلوقتي
يا تبقي واسطتك عدلة يا ماتوجعش دماغنا يا عم الحاج
لو محتاجة واسطة انا ف الخدمة
ههههههههههههههههه

شهريار العشق said...
This comment has been removed by the author.
نونو said...

الله الله
على مرور بلدنا
عثل عثل عثل
ربنا يحمية
اوعى تسوقى بسرعة
برااااااااااااااااحة على اقل من مهلك
القانون موجود بس مين اللى ينفذ

قلب مصرى said...

آبى
رأى هذا لم يكن بدافع الإنهزامية ولكنه مجرد استقراء للمستقبل، أتمنى من كل قلبى أن يتم تطبيق القانون بشكل جيد وصحيح لكن الأهم أن يتم تطبيقه على الجميع.

بحبك يامصر said...

السلام عليكم ازيك يا اببى
الحقيقه موضوع مخالفة اى حد ماشى غلط سواء فى المرور او فى اى مكان كلنا نفسنا فيه على لاقل يكون فى امل فى الحياه لان الفساد فى بلدنا كتر واحنا قربنا نفقد الامل بجد انما لما يكون فى محاسبه للمخالف يتوجد عندنا الامل
تحياتى

mayada said...

ههههههه
احنا لسه موصلش عندنا القانون الجديد
لسه علي قديموه سواقين المكروباص هما اللي
بيظبطوا المرور والنعمه هههههههه
ومالها الماروتي
دي حتي عربيه سهله الهضم وومكن تطبق وتتحط في الجيب وجرايه كمان مش عندها شلل رعاش

seven said...

هو مفروض القانون الجديد ده حلو بس
فيه عيوب برده
يعنى شنظة الاسعافات ديه مثلا
فى عربيات اصلا صغير اد الشنطة نفسها
هههههههه
وكمان اصلا معظم الناس مبتعرفش تستخدم ادوات السعاف ديه
وحاجة تاينة موضوع ان الميكروبسات تفف فى نص الطريق ديه
هيه هتبقة كويسة عشان الطريق يمشى وكده
بس مشكلة للناس اللى بتركب مش هتعرف تنزل عند الحتة اللى عاوزاها
وعموما كل مرة بيعملو قانون جديد وبرده
الشوارع زحمة و الدنيا وقفة ومحدش
بيحترم الطريق
المشكلة مش فى القانون اد مالمشكلة فى سلوكيات الناس

funckydoctor said...

عندك حق
المهم هتركبى البى ام وهتنسى الكلام ده كله وهتمسى على 140 وابقى قولى فنكى قال :D
رقم العربية
120000
:P

في حب مصر said...

معقووووووووووووول الكلام ده؟؟؟؟؟؟؟؟؟
مفيش كوسة دلوقت في المرور؟؟؟؟؟؟؟؟؟ظ
ولا فساااااااااد؟؟؟
انا مش مصدقة اللي شايفة يا جدعاااااان!!
يارب يكون الكلام ده صح.. وكل القوانين تطبق من غير تمييز

وبما ان مجلس الشورى اتحرق.. مش بس قطر الصعيد بتاع الغلابة.. تبقى المساواة حلوة

هي بطوط ليها نمرة.. انا كنت فاكر انك بتحطي على اللوحة صور خرفان...ههههههه

تحياتي

ahmed_k said...

هي فعلا قيمة غرامة المخالفات مش كبيره في حالة تم دفعها فوريا ده بالنظر لما قد يترتب علي المخالفه من حوادث الخساره فيها أفدح
لكن السرعات القانونيه علي الطرق الصحراويه بتخللي اللي مش بيخالف
يخالف غصب عنه
أصله مش معقول أمشي 350كم علي سرعة 90كم في الساعه
بالشكل ده ممكن يحصل للواحد نقطه
كانت السرعه 100ولما وجدوا الناس ملتزمه خفضوها
كنوع من أنواع حتتقفش كتتقفش

ويجعله عامر

Mercy Devil said...

أركز اكتر من كده ايه ؟
ممكن تغششينى لو سمحت ؟ وأوعدك بحتة من الخروف

darkskies said...

224459
بس مش عايز خروف مش بحبه

بنت الاسلام said...

لا بقي العيب مش في الناس العيب في دمياط

انا كمان بابا اتسحبت منه العربية وكمان مش معاه رخص زي ابن عمك بالظبط

وخلصها من اسكندرية هو كمان

والحمد لله رجعت

ابي يكونش بابا ابن عمك وانا معرفش؟؟؟؟؟؟

تحياتي

فزلوكة said...

كل دا عشان هتسوقيلوا بى إم

أمال لو كانت فيات على أد حالها كنتى هتعملى فيه إيه
D:

أما ياستى القانون
بصى أنا حاسة إنو معمول عشان ياخدوا فلوس زيادة
بجد الغرامات إللى فيه كتيير أوى
دا غير إن الناس مش عارفاه
فجأة لابيكى ولاعليكى تلاقى عسكرى موقفك وعايز يدفعك 100 جنيه

يعنى المفروض بجد ينزلوا نشرة بالقوانين الجديدة

بطوط حبوب said...

آبى ربنا يخليكى خدى العربيه منه هديه

عشان اكيد بى ام مش هترضى- انتى - تسميها بطوط

وبكده حلينا الاشكال وكفى الله الؤمنين القتال

appy said...

ابو حنف
==========
اه اللهى يخليك ولو وقفت فى طابور عيش ولا حاجه ابقى ركب المثلث مش ناقصين مخالفات يا خويا ههههههههههه
نورت بمثلثك يا زملكاوى






A7MeD F@hMy
==============
عارف يا احمد علشان قناعتن اننا احنا معندناش استعداد للتغير والياس ده هو اللى مخلينا نبوظ اى حاجه ان شاء الله تبقى كويسه وبرضه هضربك بقله
نورت الكوكب

appy said...

نونو
========
احنا اللى هنفذ يا نونو محدش غيرنا بس لو نعقل
نورتى الكوكب






قلب مصرى
==========
صدقنى المستقبل حلو بايدينا احنا لو اتغيرنا للاحسن
ربنا يوفقك يا رب
نورت وسعيده بمتابعتك جدا

appy said...

بحبك يا مصر
==========
ايه يا كابتن انت قاعد تحب فى مصر وبتختفى ليه كده نورت تانى والقانون يتحقق بادينا احنا مش حد تانى







mayada
==========
انتى بتتريقى على الماروتى وتقولى تطبق ماشى يا مادى ان ما وريتك مبقاش انا يالا مخمصاكى عاااااااااا

appy said...

seven
=========
يبقى المشكله فينا احنا يعنى المفروض ننظم نفسنا بدل ما بقينا عايشين فى علبه تونه وريحتها هتبقى وحشه
نورت الكوكب






funckydoctor
===============
والله يا فانكى يا خويا انا ركبتها قبل كده مشيت 180 ههههههههههه ما انا قولت السرعه العيب الوحيد اللى فيه
والرقم غلط تيرررررررراررررر
نورت الكوكب

appy said...

فى حب مصر
==========
خروف لما ينطحك ليه هو انا عايشه عندكم احط خروف ههههههههههههههه

لها نمر امورة خالص والله بجد
وفعلا الكلام ده فى مصر وانا مبسوطه بيه
نورت الكوكب








ahmed_k
==============
عارف موضوع السرعه ده اللى مضايقنى فعلا مش عارفين ينظموها بجد
نورت يا احمد الكوكب وربنا يستر من القفش

appy said...

Mercy Devil
===============
اممممممممممممم هو بقى هيبقى للكل بس ركز
هى مجموعه 18
لو جمعت الست ارقام وفيهم رقم 1
متكرر فكر بقى







darkskies
===========
ايه يا عم الثقه غلط طبعا هههههههههههههههههه مجموع ارقام عربيتى لو جمعتهم 18
نورت الكوكب

appy said...

بنت الاسلام
=============
يا لهوى يا بطوط تصدقى هساله هههههههههه بس ابن عمى العربيه مش اتخدت انتوا ايه حكايه الظباط عندكوا بقى ان شاء الله النبى لاجى ببطوط وابهدلهم
نورت الكوكب يا بطوطه








فزلوكه
=========
بصى يا حبيبى اولا مفيش عسكرى بياخد غراماتالوحيد بس الظابط ثانيا الحد الادنى 50 جنيه فى خلال تلات ايام ولازم تاخدى ايصال فهمتى والقانون موجود على موقع وزارة الداخليه يا قمر
نورتى الكوكب كله

appy said...

بطوط حبوب
===============
تصدق بالله لو جبت جراند شروكى ان شاء الله او رولزرايس برضه هسميها بطوط بالعند فيك لغايه لما تغير انت اسمك ههههههههههه طيب هى عندها غطاء ازرق وشيفون كمان انت عندك ههههههههههههههه

هيثم الدهشان said...

ابى

ايه اخبارك واخبار الخرقان بتاعتك محدش ابن حلال سمهملك ولا حاجة (ههههههههههههههه)

ثانيا الكانون ده بتحصل فيه حبه مواقف زى الفل اول مرة التزم واحط الحزام وامشى بالرخصة كنت راكب عربية واحد صاحبى فى فرحه وواقف فى الشارع والاقيلك ايه زى الحلم كده عربية نوبيرا سودا من غير نمر اصلا والزجاج فاميه وجواه حته ملازم لسه متخرج شكله وفرحان بنفسه وبيتكلم فى النوبايل وماشى فى نص الطريق لا يمين ولا شمال قدام عساكر المرور وشايفينه عادى جدا ماهو ده تبع الفيل بتاع الشطرنج


ههههههههههههههههههههههههه

انا عارف انى مقصر قوى معاكى بس اعذرينى

تحياتى يا قمر

Mercy Devil said...

991111
or
111199

??????

عموما ده آخرى علشان ماليش فى الالغاز الحسابية بصراحة
وعلى فكرة انتى مبتعرفيش تغششى

دكتور بهــدوء said...

لحد دلوأتي
***********
بيتطبق كويس
يارب يستمرررررر
الارقام نقول
335133

حازم سويلم said...

قانون مرور ايه يا آبى هانم
ده ضحك عالدقون, والغربال الجديد ليه شدة, كل اللى اتغبر على راى عماد صاحبى ان التسعيرة زادت وبدل متدى امين الشربة حتة بعشرة هتبقى بعشرين, وربنا يجعل بيت المحسنيين عمار

اما موضوع شنطة الأسعافات ده فحاجة ليها العجب والله

عالعموم يا آبى اى حد يكلمك عالرخص طلعيله الكارت بتاعى, وقليل اما حبس العربية وحبسك انت كمان

حازم

حازم سويلم said...

على فكرة بالنسبة لموضوع تحمين رقم بطوط فانا اعتقد انه سهل, الشطارة الحقيقية فى معرفة رقم رخصتى انا والمكون من 7 ارقام, اولهم 9

اللى هيعرف الباقى هديله تجديد 10 سنين من عندى
ههههههههههههههه

سمر الشافعى said...

انا بقى شايفه البوست دا اول واحده بس كان مودى مقريف حبتين ومليش نفس اعلق

بس دلوقتى بقى بقيت كويسه وقلت الحق جايزه البرنامج

الاجابه .....

احم احم

نقول مثلا 236666
طيب 765555

طيب ممكن اختيارات ههههههههه

بوست عسوله كعادتك
كل سنه وانتى طيبه ياقمر

Hosam Yahia حسام يحى said...

خلاص كمان يومين ونص

هنتعود على القانون

ده جدااا

وهنندمج معاه حتى النخاع

:d

Cold air said...

السلام عليكم

ازيك يا آبي و مرسي علي تشريفك الكميل لعيد الميلاد و يا ر ب عقبال منفرح فيك قصدي بيكي ^_^

أما بقي موضوع المرور فأنا هموت و أعرف مين العبقري اللي عدله و مين العبقري اللي وافق عليه و مين العبقري اللي مخدش مخالفة لحد دلوقتي
ربنا معانا بقي و معلش هقفل معاك عشان في لجنة جاية عالطريق

^_^

مع تحياتي

alexandrany said...

بسم الله الرحمن الرحيم

الاجابة
مدغشقر

انا مستني الخروف

أحمد سلامــة said...

والنبي الحكومة دي تتصدق ؟؟ ولا بتعمل حاجة من غير نوايا خبيثة ؟؟
وبعدون دا المرور متشحور اخر شحورة والشوارع واقفة زي ما هي بالظبط بس الناس قاعده في عربياتها مش عارفة هتروح ولا هتطلع عالتخشيبة
في حاجة اسمها احبس مواطن عشان ارتكب مخالفة ؟؟
غريبة جدا يعني احنا معندناش التزام وكل حاجة بس التغريم المادي كافي جدا لكن اخد بني ادم من عربيته احبسه ؟؟؟؟!
غبية قوي بصراحة
وبعدين تكلفة شنط الاسعافات المهلبية دي تكفي حوالي 20 طيارة اسعاف هوائي
تخيلي ؟؟
شنطة اسعاف ايه ان شاء الله دي
وعموما سيبك من التعقيد احنا ملناش في النظام اوكي ، وهيمشونا بالقلم والمسطرة
اوكي
فين الغاية بقى ؟؟ الشارع لسه مقرف والاشارات مكركبة زي ماهي
متغيرش بجد غير نشاط الظباط في اخد المخالفات
---------------------

فين البنار بتاع العدد التاني يا ابي ؟؟
0-: اخدك مخالفة يعني

رحــــيـل said...

ابى انتى عارفه المشكله فى ايه ان اصلا فى رجال مرور مش بيطبقه القانون
وخمسه عشره جنيه
اليله كلها بتخلص من غير سحب رخص وغرامات

بس فعلا المفروض كل واحد يبدأ بنفسه

تحياتى لكى واحترامى

micheal said...

أتمني أن يكون قانون المرور بغرض إعادة الإنضباط للشارع المصري وليس سبوبة لجمع المزيد من الأموال لان لو سبوبة ممكن جدا قرشين للعسكري او امين الشرطة وكله يبقي في التمام والنتيجة مزيد من الفوضي
تحياتي يا إيبي

Zanooba (Zeinab sab9n) said...

ههههههههه يعني أول مرة أشوف حاجة بتمشي صح في البلد ده ده إنجاز لازمن نحتفل بيه :)و الجاكت العاكس ده حاجة جامدة أوي و عمار يا مصر...مدونتك جامدة موت تقبلي مروري

Copa Zaki said...

انا حكيت لوالدي علي قانون المرور الجديد قالي سيبك دول بقر مهما هيطلعوا في قواانين اي نعم هو عايز يحل مشكله بس هو غبي بيباوز حاجات تانيه انا عايز اقوليك ان بسبب القانون الجدديد ده مثلا الترخيص للاشخاص في حالات منه كتير موقوف بسببه دي حاجه تاني حاجه البوازان الي حاصل في البلد اما مثلا في ميدان التحرير يوقف عربيه علشان ياخد رخصها و يتعامل معاها ممكن يوقف الدنيا يبقي علشان ينجح حاجه بيضر حاجات تانيه انه عطل المرور و عطل مصالح الناس
بس يلا انا كانت الفكره دي كنت مقترحها زمان ايام البلوج بتاعي القديم ان يتم التعامل بعقوبه شديده جدا مع الناس هتلاقي الناس اتلمت بس برضه بنظام ميبوزش الدنيا
و علي فكره رقم عربيتيك سهل جدا
010 فوادافون اتكلم براحتك
اي خدع ملاكي مصر

دعاء مواجهات said...

ازيك ياقمر

وحشاانى يابنتى جاد جدا جدا

انا بصراحة الاول افتكرتها رخصتك

بس الحمد له
انها مش انتى

انا بصراحة مشوفتش عربيتك لو كنت شوفتها مرة واحدة كنت قولتلك طوالى
انا اصلى عندى هواية حفظ ارقام السيارات حاجة كدة ادمان

بعيد عنك

-------------

تعالى قولى رايك ف البوست الجديد

مكســـــــــــــر الدنيـــــــــا...

بنوتة said...

عرفت الاجابة يا آبي هي انتي كاتبة"هما6 "ارقام بس تلاتة




6 دي يعني ست واحدة ست
و ارقام العربية حتبقى آبي
يارب تكون صح عشان ادبسك في جوز الخرفان و دبحهم كمان
امينننننننننننننن

Z_Diva said...

eh da
y3ny fe amal felwatan elomm ya 7asanat ??!!!

ezyek 3amla eh ya bonayty :D

ابو اعصار said...

مفيش احسن من القانون بس لازم تكون ايد العدالة تقيلة
بالمناسبة واخد مخالفه امبارح عشان مكانش معاي (اثبات ملكيه) تفويض من صديقي صاحب السياره وما ارضيتش الكك لا انه لو دقق شوية كان شاف استماره العربيه منتهية
انا مش عارف النظام الجديد اللي في مصر لسه
لكن ارقام اللوحه اعتقد انه
441441
حوالين الرقم ده اهم حاجه انه مجموعه 18
شكرن على البوست المبتسم

مجرد خواطر said...

السلام عليكم
اولا انتى وحشتينى اكتر يا آبى
ثانيا انتى جميله اوى اوى
ثالثا اتمنى يكون فعلا فى مصر القوانين اللى مخليه بلد زى اللى انا فيها من ارقى البلدان العربية على الرغم من انها مجرد صحراء واهلها اصلا مجرد بدو

بنوته مصرية said...

ههههههههههههههههههههه

لسانك عاوز فرامل فعلا

الله يكون في عونه لو شاف البوست ده دانتي شردتيه خالص

فعلا اللوحات شكلها شيك اووي

اما بنسبة للسؤال

استني اول لحد البيت عندك اغيش الرقم واجي اقوله واخد الخروف الهدية

بس لو سمحتي يا ابي عاوزاه لونه فوشيا مش بمبي هههههههه

وش مطلع لسانه

وحشتني المداونه بجد بتاعتك

اشوفك علي خير

الدفاع said...

آبى
==
مرور سلام واطمئنان واثبات حضور
وتحياتى

عصفور المدينة said...

حاجة كدة أربع ستات
قولي صح
:D

زيزو الشقى said...

دى اول زيارة
وان شاء الله مش هتكون آخر زيارة
مدونتى تنور لو زورتيها
اتمنالك التوفيق والنجاح

تحياتى و كل احتراماتى

سلااااام

maha zein said...

عرفة
احساس تاني خالص وانا بقرا كلامك قبل ما اشوفك وبعد ما شفتك
دلوقتي مستمتعه اوي
ومتخيلاكي بتتكلمي امامي بالنغز العسولة بتاعتك اللى عجبتني اوي
شخصية عسولة بالطبيعة والفطرة
فرحانة بييكي
وبوست حلو معه اني لا ليا في قانون مرور ولا اي حاجة
مش بركز فى الحجات دي
بس انتي بجد عسولة يا ابييي
بس بقه
هه

appy said...

هيثم الدهشان
===============
يا قهلا وسهلا يا استاذ هيثم
النبى يا خويا طيب انت جاى على العسكور يعمل ايه طيب بس لا تكلك الوزير كال كله تمام ههههههههه نورت يا دهشان






Mercy Devil
==============
والله انت طالب فاااااشل 611 اولها بس خلاص لما اغيرها هبقى اقولك على الباقى
نورت الكوكب

appy said...

دكتور بهدوء
==============
اهلا غلط مع نخده الشرف هههههههههه ويا رب يتطبق
نورت يا دكتور






حازم سويلم
=============
صديقى الفيكونى نورت يا كابتن تانى
رخصه ايه اللى اخمنها مش هى دى برضه اللى مكتوب عليها يعامل معامله اطفال ههههههههههههههه

لا يا حازم فيه كاميرات مراقبه وفعلا فعلا بتنفذ اسال اصحاب البطوطات زى كده نورت وبلاش غيبه

appy said...

سمر الشافعى
==============
يا اهلا يا دكتورة وليه يا حبيبى بس مودك وحش ان شاء الله يطس فى موده اللى يزعلك
الرقم اوله 611 يا سمسمه جربى بقى
نورتى يا قمر






Hosam Yahia حسام يحى
======================
ما هى دى عادتنا يا حسام طبعا بس يا رب يستمر
نورت الكوكب

appy said...

Cold air
==========
يا اهلا اهلا
انا بس عندى اجابه ان انا العبقرى اللى هنفذه بس ههههههههههههه
نورت الكوكب وابقى علق المثلث






alexandrany
==============
خروف لما ينطحك يا رب ههههههههه انت هتستعبط لا دى ملاكى كفشستان

appy said...

احمد سلامه
===========
النبى احنا اللى خدنا على الاستهبال يا احمد يعنى المفروض نلتزم شويه
المهم بانر ايه هو انا حد قالى على حاجه اصلا اصلا
لا بجد انا زعلانه منكم كلكم
نورت يا مستر





رحيل
=======
صح يا حبيبتى كلامك
نورتى الكوكب كله

appy said...

micheal
==========
لااااااااا سبوبه انا اروح فيها الا كده
نورت الكوكب وادينا غيرنا العتبه







Zanooba (Zeinab sab9n)
=======================
اهلا بيكى بس الجاكت العاكس ده مش اطبق انا بقول يا ريت
نورتى وميرسى لذوقك اوى

appy said...

Copa Zaki
===========
احنا اللى فعلا عاوزين قانون رادع ويمكن نتأدب
لا عربيتى اتصالات اتكلم اكتر هههههههههههههه
نورت الكوكب







دعاء مواجهات
===========
اهلا بيكى يا دعاء لا متخافيش وبعدين اللى بيشوفوا عربيتى مش بيحفظوا رقمها ههههه

appy said...

بنوته
========
انتى كنتى ساقطه حساب ههههههههههههههه
نورتى يا قمر







Z_Diva
=========
وحشتينى يا ام زعبولا وكنت بنم عليكى مع حد صديقى امبارح بقوله البنت دىى كميله خالص
نورتى الكوكو

appy said...

ابو اعصار
=============
بس ايه رايك بقى بزمتك مش بيطبق
لا غلط ههههههههههههههه
611 كمل الباقى
نورت يا ابو اعصار






مجرد خواطر
=============

يا اهلا بالنور اللى بيجى هنا فى الدنيا
نورتى يا قمر ويا رب كل حاجه تبقى كويسه فى البلد دى

appy said...

بنوته مصريه
===============
انتى خدتى افراج امتى يا رودى يا بنتى مش كنا بنعالجك من الادمان بتاع النت يا دى النيله امشى يا بت من هنا النبى لو ملتها لكى هتنسيها دا انتى بتتعاطى النسيان
نورتى يا حبيبتى تانى





الدفاع
=========
اهلا اهلا اهلا
نورت الكوكب يا محامى الكوكب شوفى اى مخالفات كده

appy said...

زيزو الشقى
==========
اهلا بيك نورت الكوكب






مها زين
===========
ربنا يخليكى يا مها بجد مش عارفه اقولك ايه على رقتك يا حبيبتى والله اكسفتينى يا بنوته انتى اللى سكر خالص وانتى رايحه جايه وسطنا بجد يا ملك الهوب هوب

appy said...

استاذى عصفور المدينه
========================
اكدب يعنى هى فيها 6 واحده بس هههههههههههههه
نورتالكوكب

حبيبـــــــة القمـــــر said...

القانون الجديد لما يبقى بالمعقول يبقى حلو
لكن انا شفت في الفترةالاخيره حاجات اووووووووووفر
صحيح اننا شعب مبنحبش الالتزام لكن مش بالهبل دا
يعني لما تبقى الغرامه فوريه من 100لحد 300 عشان الحزام يبقى افترا بعد ماكانت حد اقصى 100 جنيه
طب الفلوس دي بتروح فين
بلاش سيبك من دا

لما يبقى سواق اجره والامين يغرمو 50جنيه عشان لابس جلبيه ولا عشان لابس شبشب طب دا تسميه ايه

فيه التزام مطلوب وفيه امور تانيه تنرفز وتجيب العصبي

المشكله ان دلوقتي بدل ما السواق بيرشي الامين بعشرين جنيه عشان مخالفه بخمسين
هيديله 50 عشان ميغرمش مخالفه ب 100

ياريت القانون فعلا يطبق صح عشان الناس تلتزم بجد وميبقاش القانون مجرد حجه لجمع الفلوس وبس

سمر الشافعى said...

ايه داااا هما الاربع ارقام كمان مش ورا بعض

انت بتحلم ياحلمىىىىىى

لاياختى معرفش اجيبه دا وبناقصها الجايزه احنا والحمد لله بنقبض كويس اوىىىى زى ماانتى عارفه ولا بيهمنا جوايز ولا اى حاجه من دى

بس سيبك انتى النيولوك جامد جامد يعنى

نفسى اعمل نيولوك لمدونتى بس مش بعرف عاااااااااا

واحد من البلد دى said...

السلام عليكم

كل عام و إنتى بخير يا آبى وبلغى تهنئتى لإسلام..

عموما موضوع النمر و الرخص و الكلام ده مش فى دماغى أساسا لأنى مريح نفسى ع الآخر و ماعنديش عربية..
آه و الله..
عارفة ليه..
لأنى كل شغلى سفر وأنا بابقى تعبان موووت و مابانمشى غير ساعات قليلة جدا..يبقى إيه اللى يحصل لو نمت و انا سايق..
يبقى آريح دماغى و اركب التويوتا أو السوبر جيت و أنتخ فى الكرسى لغاية ما اوصل..
أصلى فيه حاجات ماينفعشى الواحد يقول فيها(آخد بالى المرة دى علشان المرة الى فاتت حصل كذا وكذا)
يعنى مثلا ما ينفعشى واحد غريق يقول أنا مش حادخل جوه المرة دى علشان المرة الى فاتت غرقت..
ههههههههههههههه
لكن فيه سؤال مهم كنت عايز أسألهولك عن البوست..
فيه كلمة معينة مش فاهمها خالص و قلت دى يمكن من قاموس الشباب بتوع اليومين دول(على فرض إنى من العواجيز-بتوع اليومين دول برضه)..
الكلمة هى..(قانون).....

يعنى إيه....قانون دى..؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

سلامى ليكى ودعواتك ليا فى رمضان

appy said...

حبيبه القمر
===============
حبيبه قلبى لقد تناقشنا فى هذا وذاك احب اقولك بس منورانى هنا اوى وسعديه انى خرفانى سابتك تدخلة تنورينى يا حبيبه قلبى
والناس برضه لازم تلتزم بوسه كبيرة ليكى







سمر الشافعى
================
ههههههههههه
6118 وكفايه عليكى كده ههههههههههه نورتى يا سمورة عاوزة تغيرى اللوك يا حبيبتى عاوز شرح عندك ميلى فى بيكيا ادخلى ابعتى ليه عليه اونا اقولك ازاى يا قمر

appy said...

واحد من البلد دى
======================
اهلا بيك اولا انا مقولتش قانون
انا قولت كانون ههههههههه
القانون ده شئ فيه خرم فى المله يعنى مش بيتعمل بيه غير فى الدول اللى احنا مش عايشين فيها بس خلاص
وكل سنه وانت طيب

بنوتة said...

عايزة اعرف الجابة واء واء عااااا