حتى التاريخ يا ولاد أم عز

صباح الخير كتير
اولا قرار فيكونى رقم تلاتاشر بزليون قررت انا آبى هانم بتنجانى اعفاء المدعو أنا جعان من اجابات التاج وذلك نزولا وطلوعا عن رغبته ولان الله امر بالستر فى النهايه وكررت اكسب فيه ثوابات كتيره
ومنجلكوش فى تدبيسه

ندخل بقى على المهم بمناسبه الثورة اللى مصممين يقولوا عليها ثورة ومصممين يدرسوها فى المدارس وييزيفوا ويأيفوا حقائق تاريخيه
ويستغبونا لغايه اللحظه دى
ويقعدوا يقولوا ثورة وهى اساسا مش ثورة دى انقلاب عسكرى بحت وطبعا كلنا عارفين ايه الفرق ما بين الاتنين
يعنى بعد ما استولى الجيش على كل حاجه الشعب دخل وشارك وكلنا طبعا عارفين مين اللى قاموا بيها
واللى عمله سى عبد الناصر فى محمد نجيب
قووووووووم ايه روحى يا ايام وتعالى تانى بسرعه قبل ما تطلع روحى الاقى مصراوى افندى كعب الغزال
هو كمان له لازم يأخد من الحب جانب وله وجهه نظر فى تاليف التاريخ لابد ان تحترم ويعمل بها ورق تواليت سورى يعنى بس يدوده للساده المحترمين الموقرين بتوع الوزارة والخبرة كله اهو

واللى جايه اكتر حته غاظتنى وجابت ليه هسس فى مخيات الصغيرة وصداع للنحله والدبور

وتتميز ثورة يوليو بأن حباها الله بثلاث زعامات متتالية : جمال عبد الناصر وأنور السادات وحسنى مبارك : وجسد كل منهم مرحلة هامة عبرت عن أمال وهموم المواطن المصرى فالرئيس جمال عبد الناصر مفجر الثورة وقائدها وهى مرحلة اعطاء الأولوية المطلقة لاحداث التغييرات الاجتماعية وتأكيد استقرار القرار السياسى ، ثم أكمل الرئيس الراحل انور السادات المشوار ببناء جيش قوى فكان نصر اكتوبر 1973 وقاد معركة السلام ، اما المرحلة الثالثة فكانت بتولى الرئيس حسنى مبارك مسئولية الحكم .

واثبت الرئيس مبارك ان جيل اكتوبر هو استمرار لجيل يوليو فالرئيس حسنى مبارك يرى ان ثورة 23 يوليو جاءت تعبيرا عن ارادة شعبية عارمة تطالب بأن يكون هذا الحكم قائما على دعائم الديمقراطية والحرية والعدل وانها حققت على الخريطة الانسانية اكبر تحول عرفته مصر فى تاريخ الحكم .

واستكمل الرئيس مبارك مسيرة يوليو من خلال خمسة محاور هى ديمقراطية حقيقية تفتح كل الأبواب لاتفرق بين مؤيد ومعارض ولاتغير رأيا / والمحور الثانى سياسة اقتصادية محددة الاطار قامت على خطط التنمية الاقتصادية والاجتماعية والمحور الثالث بناء مجتمع قادر على تخطى العقبات والتغلب على التحديات من خلال تحقيق العدل الاجتماعى والانحياز لكل ماييسر الحياة ويؤمنها لمحددوى الدخل ، وأخيرا سياسة خارجية رشيدة تضع مصالح مصر قبل كل شىء وتمد جسور التعاون مع كافة الدول ، وبهذا اثبت الرئيس حسنى مبارك بأنه ابن بار لثورة يوليو استكمل مسيرتها .

ليييييييه بقى هو محمد نجيب دلوقتى قطعوه للوز ولا عملوا عليه ملوخيه
ما كلنا عارفين ناصر عمل ايه فيه لما قال لهم سيبوا الحكم بقى للشعب احنا عملنا اللى علينا كله
ما كلنا عارفين الفضايح اللى ريحتها طلعت والتاريخ ثبتهاواتحولت من ملكيه للعيله الملكه الى ملكيه للجيش

انا بابا فى الحرب من ايام الوكسه اللى حصلت لنا
وقعد يحكى ليه على تاريخ ناصر الا هو يعنى باسم العروبه وباسم الشعب اللى من غير جزمه بكعب
يبعت العساكر بتوع الجيش وفرق من الصاعقه ليه ايام ما القذافى طويل اللسان وضيق المخ ما مسك الحكم بدل السنوسى
ويبعتهم الجزائر واليمن ليه هو حد عبره
عموما يالا مش مهم اهو راح مكان ما راح
وبعدين حااااااااشر اسم الريس متقال ليييييه وانجازااااااااات ايه ده حد كان بينفذ اوامر هو مجرد واحد قاد حاجه مش هو اللى واضع الخطط
اتحشر فى النص ليه وبأماره ايه بقى حد يقولى وانجازات ايه اللى دلوقتى ولما يقول ان الثورة جت عن اراده شعب عارمه طيب مسبتوش الشعب يحكم ليه بقى ولا احنا منعرفش ونونو لسه ورابطين بافتتات على صدرنا
لو سمحتم كل واحد يقلع بفتته بقى واحكموا نفسكوا ومن امتى هو بيحافظ على اراده الشعب طيب والنبى والنبى يا حج بزمتك مش انت عارف ان اراده المأسوف على ايامه الشعب ده مش عاوزك طيب ما تحترم الاراده دى وسيبه اقولك روح هاواى هايله والهوا فيها بحرى وجامده اخر حاجه
هما ليه مصممين تصميم عجيب شنيع مريع انهم يزيفوا التاريخ احتمال نكون شعب مغيب ولا فاشل ولا غبى
بجد الشعب المصرى مش غبى ولا فاشل ولا مغيب
بس احنا شعب كسول وبيتحرك ببطء جدا
ونفسى اعرف ايه هو المحور التالت اللى هو عمله الريس متقال ده يكونش يقصدوا محور ميدان لبنان اه والله ما هو بيوصل اى حته باى مكان وبيودينى اكتوبر اروح كارفور اللى على الطريق والهايبر صح لقيت انجاز اهو
وبعدين يقولك محدودى الدخل هما فيننننننننن دول والله اللى ما هيطلع محدود الدخل اللى خباهم فى جيبه هسيب عليه خرفانى عيب كده احنا اخوات زى بعض طلعوهم الناس عفنت
ليه مصممين تقولوا محدود الدخل هما محدود الدخل بيتعمل لهم شقق بستين الف جنيه على اساس ايه يعنى مش عارفه ان تحديد الدخل بقى بستين الف جنيه
هو احنا لسه هنكابر ونقول محدود الدخل احنا عندنا محدود الفكر جايز محدودى العاطفه جايز محدودى النظره جايز انما دخل ان شاء الله اعدمه اللى يقول كده يا رب من الوزراء ولا حراميه البلد
دا فى مصر نزلوا تحت خط الصفررررر والفقر من بدرررررى
اللى يحزن فى ظل التهليلات الجامده قوى كيك اللى بيقولوها والانجازات والوكسات الهايله دى

فى المقابل وبالليل متأخر اى حد ينزل الحسين هتلقوا بعد الساعه 12 بالليل اولاد بتيجى بأقفاص عيش وتحطها والناس تجرى تتلم وتأخد العيش وتمشى ولما استغربت لانهم مش بيدفعوا فلوس وندهت للولد سألته قالى ان بعض من العرب بيجوا ويسألوا مثلا الولد معاك عيش بكام يقوله بميه جنيه
يقوم يدلوا الفلوس ويسيبوا العيش للغلابه تيجى تأخد وكذا مرة مش مرة واحده
بزمتكوا يا حكومه مش نظيفه ولا حتى محصله رشيده بتاعت بكار يا حكومه طنط ام عز
ده يرضى حد وتقولوا انجازات
سورى فى النهايه جتها وكسه اللى عاوزة خلف بالشكل ده
ويا مصريين يا محترمين حنوا على بعض شويه ايدين الناس اتمدت للعرب والله لهم حق يلعنوا اهلينا فى كل مكان ويتنكوا علينا

كان معكم قائد جناج يمين وشمال الطبيه آبى هانم بتنجانى