انا مش بحب الواجب

بصوا بقى انا جالى هدايا كتير من اللى من نوع المقالب وهى عبارة عن واجبات وتاجات وحاجات ومحتاجات وحبشتكانات وانا بجد بجد بجد بجد ومش هزار هزار هزار نسيت من كتر ركنتهم مين اللى بعتوهم ليه والله اسفه بجد بجد

وبعدين انا واحده بنتجانى اصلا اصلا فمحدش اعتقد هيزعل صح
انا هقول على اول حاجه انا فاكراها

وهو بيقول اذكر سته اسرار عن نفسك؟

بس مش عارفه بجد اذكر اسرار ايه انا حد معندوش اسرار خالص وحتى لو عندى ازاى اقولها يعنى بس حاضر ومنه لمارينا اللى اخترع البتاع ده

وكان فيه كمان تاج شد اللحاف واتغطى واللحاف ده قصدى التاج ده من زمان وبصراحه بمناسبه الحر انا نسيته بس هفتكر لكم شويه حاجات منه وخلاص


وانذار على قرن خروف اياكم اياكم تبعتوا ليه هدايا مقالب تانى
اللى هيعمل كده هكور البلوج بتاعته فى جنب واقول بنظفها انا بحنذركم اهو
نبتدى ببتاع الكوابيس واللحاف ده


أذكر خمس أحلام على الاقل ..تخص ماضيك ؟

1- كان نفسى ابقى ظابط شرطه (امنعوا الضوحك ) اه والله بجد وكانت كبرانه فى دماغى وبابتى كان مشجعنى وكان يقولى هتبقى ظابط غلس او وكيل نيابه ارخم خلق الله

بس انا الغرض مكنش كده خالص النيه الوحشه بقى بتاعتى انى علشان بحب اضرب الناس وادى مقلب حرايمه وكمان العب بوكس فى وشهم (شريره انا عارفه) يعنى ولا تحقيق عداله ولا افهم يعنى ايه



2- لو دلوقتى قدرت ادخلها بس علشان اقدر اعمل مساواة وعدل بين الناس مش اكتر واضرب ظباط الشوربه بالشوز هما زمايلى اه بس اللى هيغلط هعلقه من رتبه ونياشينه

3- كان نفسى اعيش فى مكان بعيد قوى معرفش فين بس يبقى بيت وجهته كلها زجاج ويبقى على البحر واربى خرفان فى الجونينه بتاعته اه والله ووزة وبطه وفرخه وكلب بسسس عشت فى المدينه وامرى لله فى الزحمه بس لو اتيحت ليه الفرصه اعملها


4- كان نفسى اعمل مشروع كبير اشغل ناس كتير وكل قرايبى كمان ومش يبقى متخصص فى حاجه واحده يبقى ملابس اكسسوار اكل كل حاجه والم العيال العواطليه واشغلهم غصب عنهم بس مع غلو الدنيا مش هعرف اعمل حاجه وشكلى هسيب العيال عاطلين ويصدوا فى الشوارع



5- كان نفسى يبقى عندى جاغور ههههه اه بجد دى عربيه بس الحمد لله على بطوط بتاعتى الجميله اللى مطلعه روحى


خمس احلام تخص مستقبلى؟


اولا هو فين المستقبل المنيل ده فى ظل الظروف المهببه دى بس عادى يعنى هحاول اغمض عينى واضغط على ضرسى واشد فى شعرى واجاوب

1- مصر تبطل تمشى بقفاها او اسيبها والله ومش هرجع لها تانى لو ولعت

2- الناس تبطل سلبيه وقله ذوق والنبى هتشل منهم واهم حاجه الكدب الناس بقت بتكدب بين كل كدبه وكدبه كدبه تانيه

3- اعيش فى بيت بعيد عن الدوشه والزحمه واعمل مشروع صغير

4- الاقى الانسان اللى جوايا وبفكر فيه اتجسد قدامى بقلبه وعنيه وحنيته وانه يفهمنى بقى وينسى العالم وميفتكرش حد غيرى(ملحوسه كل شئ قسمه ونصيب ومش عاوزة اسمع كلمه اصل بالقله على طول)

5- اروح احج او اعمل عمرة نفسى بجد فيها وبدعى ربنا من جوايا يحققها ليه


الحمد لله كده خلاصنا نصحى بقى ونقول على الاسرار طيب اقولكم حد يسلفنى سرين وانا اردهم له فى الافراح او فى مارينا حتى ههههه

1- مهمومه جدا بالناس وبمشاكل الدنيا على الرغم من هزارى طول الوقت وبحاول اضحك وانا مداريه جوايا حزن (يا دى النكد اللى انت فيه يا قلبى )

2- (بحب اه والله بحب اه والنعمه بحب اه وان شاء الله اطس فى كيبورد بتاعتى بحب بس مش لاقيه حبيبى (اللى يلاقيه يشاور ليه عليه وله خروف هديه
)ههههههه

3- لما بزعل من حد بيبقى نفسى اروح اقوله انا زعلانه ليه علشان ميظنش فيه حاجه وحشه بس كرامتى بنت الدزمه بتوجعنى قوى

4- طبقيه جدا ومقرفه بس فى المقابل بتعامل مع كل الناس بود وحب واحترام بس اول ما تنقح عليا علشان اللى قدامى غلط فى حاجه يوووا بتبقى ليله مهببه بلون فوحلقى ومش بعرف اعديها بقى

5- شايله اسرار الناس جوايا ومبقتش قدها انا مش جبل انا انسانه بجد وبحس رغم انى ببان قويه قوى بس انا ضعيفه ومحتاجه اقول كفايه بقى انا عاوزة اللى يشيل عنى


6-مبقاش فيه اسرار غير انى شخصيه موودى جدا يعنى على حسب حالتى النفسيه مش بحب ارتبط بمواعيد لانى بحافظ عليها جدا فمش بحب كده لان ممكن اجى على نفسى كتير علشان اروح اقابل ناس مش عاوزة اقابلها مش معنى كده انهم وحشين لا يعنى بمعنى ادلهم الميعاد فى وقت وانا مبسوطه وبعدها او تانى يوم ابقى مش عاوزة اروح ومن غير سبب او بسبب جنانى وكسلى وانى بميل شويه للهدوء اه والنبى انا بنحلى ودبابيرى وقللى وخرفانى هاديه ورومانسيه يالا ان شاء الله ما حد حوش


كده خلاص لكل اللى بعتوا ليه الهديتين دول بقولهم ميرسى ميرسى خالص كالص ومتزعلوش منى لانه اتحولنى او اتحدف فى وشى من ناس كتير فنسيت اكيد النبى ما تزعلوا يا رب يقع من على كنبه الانتريه اللى يزعل منى


فى النهايه عاوزة ادبس حد من نفسى هما اتنين بس فى البتوع دول اللى انا مجاوبه عليهم

1- أنا جعان
2- الطائر الحزين

ونبقى نشوف الشاطرة بقى يا حلوين يالا ههههههههههه
كان معكم آبى هانم واكله اللحاف