الحزن الحالم والطبال


نقول تانى الحزن المستوطن مش هيبطل والاخوان مش هيتهدوا طيب وبعدين فاضل ايه ..واخرتها ايه فى لعبه القط والفأر دى
شوفوا الخبر ده

اكتسحوا بتوع الحزن الوطن كالمعتاد وبرضه فى اخر لحظه انسحب واحد من الاخوان مسلسل كل مرة علشان معترض على التزوير كأنه من البدايه مش عارف
وكأنهم لابسين صواريخ فى رجليهم طبعا ضد تلاته من الاخ
وان

طيب فين المستقلين بقى يعنى هو لازم المسلسل ده مكتوب علينا نشوفه كل يوم ويبقى زى المسلسل الرخم بتاع نور اللى مش بشوفه ده اللى مش باين له نهايه

الاخوان قدام الحزن كأن مفيش فى مصر غير الفئه دى ودى بس مبقاش فيه مستقلين يعنى احنا يا يبعبر عنا الاخوان يا يبعبر عنا الحزن

طيب ليه وباقى الناس بعتوهم اعارة بره ولا كانوا فائض فى الدخل اتبرعنا بيه

علشان ابقى واضحه وبقولها للمرة الدزليون انا اختلافى مع الاخوان سياسى يا شباب يعنى بعترض على سياسات لهم وده حق انما هيطلع ليه ناس تقول الاخوان بياخدوا الدين عبايه لف ولا جلابيه بارتى علشان يضحكوا على الناس
هقول تانى وتالت ورابع

اولا انا مش ربنا هو اللى يحاسبهم اذا كانوا بيعملوا كه واكيد عمرة ما هينصرهم بده ابدا لانه مش هيرضى بكده

ثانيا انا واحده عندى نحله ودبور واقدر اعرف اذا كان اللى بيضحك عليا ولا لا اوبالروشنيه كده بيشتغلنى ولا لا والشعب المصرى كله بما فيهم الاميين وطبعا الحمد لله دول عندهم احساس بالصح اكتر من اللى عاملييييييييين نفسسسسسسسسسسهم مثقافين

ثالثا والاهم بقى الحكومه المتخلفه اللى ماشيه بقفاها هى اللى سامحه بالحاجات دى ولسبب بسيط عامله سيطرة وبلاوى زرقه على الناس وكل يوم كارثه والناس
جابت جاز بلاش بنزين 80 يبقى الناس غصب عنها هتجرى زى الطفل الصغير على الحناجر اللى بتتفح بالخلاص بالناس وتوعدهم بحاجات كتير

طيب كده حطينا ايدنا على المصيبه فين من الاول
يبقى متفقين اننا عندنا مشكله وكارثه ايه هى الفساد والحركات القرعه بتاعت الحكومه بنت التييييييييت وهى اللى مبوظه صواميل الدنيا
نقوم احنا بقى نسيب الاصل ونمسك فى الهوامش طيب انا واحده معترضه سياسيا عليهم او بمعنى اوضح كل المعارضه مش عجبنى لانهم مصلحجيه ومش بيفكروا غير فى نفسهم وبيرتبوا الامور مع بعض للى فى مصلحته

اشبها لكم زى صديقى ما شبهها ليه علشان تفهموا وجهه نظرى المنيله دى على الصبح
عندنا عربيه الموتور بتاعها عطلان وخرب خلاص نقوم نعمل ايه ندهنها يمكن تمشى ولا نغير الزجاج يمكن تمشى ولا نركب لها كاوتش يمكن تمشى هو ده اللى بتعمله الاحزان المعارضه كل واحد بيجمل من ناحيه وبرضه مش هتمشى لازم الموتور يتغير

وهو ده اللى حاصل الحكومه بتاعتنا زى الموتور اللى خرب وده اللى ظهر باقى الافتكاسات والهساهس تظهر جماعات اسلاميه على متطرفين على طوائف على معارضه كلها كدابه وكل واحد يقولك اغير حاجه فى العربيه

واحنا بقى كمان او بعضنا ساب كل ده والاساس ومسك فى الفرعيات ويقولك اصلى خايف الاخوان يمسكوا ولا كفايه ولا الغد ولا الاشتراكيه ولا البتنجانيه ولا البامياجيه

حلو كل الكلام ده متحاربش دول حارب البوب الكبير خد حقك منه وساعه لما تعدل الاصل كل الصور هتختفى ومش هيفضل
منهم حد ولا العفريته حتى

يجيى واحد لااااا اصل دول لو مسكوا الحكم هيحكموا على البنات متخرجش من البيت .ويا سلام ليه هما بالغباء ده يعنى وهيفرضوا عليها الحجاب

هقوله يا اخى مفيش اكراه فى الدين متقدرش تغصب على حد فى حاجه وساعتها لو اى فئه مسكت مش الاخوان وبس وحاولت تطبق منهجها اكيد هتلاقينى وتلاقيكوا مش هتتقبلوا وهتعملوا زى ما عملتوا مع اللى كان متنيل وقاعد على قلوبنا يبقى ليه بقى منشغلش مخنا ونوجهه طاقتنا كلها للمكان الصح وهى الكارثه اللى على قلوبنا بدل ما ماسكين عصيان مصاصات لبعض وعمالين نلسوع بعض باللبان زى المجانين وعموما انا خلاص بقى عندى يقين انه متربس فيها ومصدر العبيطه (احم احم مقصدش حاجه وهشه كالس) طول الوقت


بجد مشكلتنا طاقتنا مش عارفين نوجهها فين مشكلتنا حياتنا مش عارفين نبص على الصح فيها لو مش قادرين على الحمار نشد فى البردعه

الحزن الوتنى عامل غسيل مخ للشباب كنت بتناقش بالصدفه مع ولد من الحزن وكاتب على الماسنجر حزن وتنى وافتخر قعدت اضحك اقوله ليه يقولى ادانى شرعيه اتحرك من غير تهديد
قولت له ليه مش عارف ان قمل الدوله حطين قمل ما بينكم ودى حقيقه فعلا لانهم بيخافوا ان حد يغير فكر الاولاد دول وان حد يصحح فكرهم طول ما هما مبنجينهم مش هيحصل حاجه وطول ما هما بيفضلوا يقولوا الشباب الفرفور بيبنى مش بيهد ومش فاهمه خروف مين اخترع لهم الشعار ده (مع الاعتذار لخرفانى طبعا ) لانهم مبيعملوشوا بيه اصلا دول بيقعدوهم فى قاعه مكيفه ويسبوهم يتناقشوا مع بعض فى الباميا والملوخيه وطريقه عمل الكوسه الباشميل ودى من اساسيات الحزن
اول ما واحد يفوق من البنج يشدوه على العمليات على طول ويدوله الحقنه تانى
يقولى مصر دوله دينيه والحزن بيسعى لكده وساعتها قولت له طيب وموضع كتابه الاسم الولد بأمه وقانون تحريم الزواج من اكتر من واحده
سكت شويه وقالى اصل الماده التانيه فى الدستور وبس مكملش سخسخت على روحى من الضحك ومقدرتش
الا هو حد عارف ايه علاقه ده بالسؤال وايه خالتى الماده التانيه بتبص على مين من البلكونه
ليه بقولكم كده الحزن عمال يتوغل زى الصورصارات والنمل لما بيطلع علينا فى الصيف كده ويوعد الشباب بالكتير وكتييييييير بيروحوا ليه علشان الاحلام والناس دى بجد ربنا يكون فى عونها

اخيرا ركزوا فى الكلام كويس وافهموا وناقشونى من غير نطح ولا تحديف قلل علشان انتم عارفين اللى بيزغزغه عقله لكده بعمل فيه ايه قول رايك ورد عليا بس باحترامات افندم اصل اسلوب فرش الملايه اللى بيتبعه البعض مش هقبل بيه اه والله بجد يا اوختشى ويا اخويا يالا بقى جهزوا السكاكين علشان نشوف هندبح مين الاول

وفى النهايه ولا الرقاصه هتبطل رقص ولا الطبال هيبطل تطبيل الا اذا هدينا الكباريه على دماغتهم



نطحه خرفانى الطاير:- انا واحده برحب بكل الافكار يعنى اخوان على شووعويين على اشتراكين على رقاصات على زبالين اى مسمى مش بحبه فى حياتى ماشى وبفهم كل حد وبحاول اطلع مع اللى يتناسب مع فكرى وطريقتى وهى دى الحريه يا اللى بطلبوا بيها بس على الورق انما فى الحقيقه مجهزين صواريخ ارض جو وجواكم نار مش بتهدى وزى ما يكون فيه براغيت يععععععععع مسكت فيكم بطلوا تفتحوا حناجركم بحاجات مش قادرين تطبقوها



كان معكم استاذ رئيس قسم لواء طيار زنهار آبى هانم بتنجانى

134 اخبط وقول رايك:

ana ga3an said...

اصطباحة الاول
صلي علي اللي هايشفع فيكي كدة
وواحدة واحدة علي
فهمينا الاول اية اختلافك السياسي معاهم علشان نبقي علي نور
اعتراضك علي اية يعني بالظبط

ثانيا من وجهة نظري مصر مفيهاش احزاب
مصر فيها شلل
يعني شلة الوطني او شلة الغد و شلة كفاية
وشُلت يداي

في بلاد الفرنجة
الحزب سواء معارض او غيرة
بيساهم في تنمية المجتمع
وحل مشاكلة ومشاكل الشعب
اطفال كانو او كبار السن
يهتم بالتنمية و التعليم بجهود ذاتية

احنا عندنا بقي المعارضة حكومتنا الرشيدة النظيفة بتجري وراهم بالخرازانات السوداني في الشوارع
وفين يوجعك وفلق يالا منك لة عربية الاتاري جاية
وعدد من الاحزاب وعن معرفة شخصية
لا هم لها الا عقد لجان وشرب الشاي و القهوة و السجاير ببلاش
وسنتدوتش يجود بة اصحاب القلوب الرحيمة
وكل واحد يشوف حالة بعد كدة
حاجة كدة زي مائدة الرحمن

صاحبك اللي ضربلك مثل العربية ام موتور بايظ
شكلة دماغ بصحيح
وابقي تعالي صيفي عندنا

رئيس جمهوريه نفسى said...

يا بتنجانى انتى مش بتتهدى بالصلاه على النبى على اول الصبح يا بنتى بين الاخوان والحزظب الوطنى الشعب عامل زى حبه القمح فى الرحايا بيتطحن بس من غير ميتالم
موضوع الاحزاب بقاء يا ستى حكررها ليكى الف مليون مره واتهدى والنبى المنظومه السياسيه المصريه كلها دستورا وقانونا زى الزفت مش حتفرزى اصلاحيين ابدا لانى المنظومه السياسه قائمه على شله مصالح ليست اكثر او ااقل
موضوع المستقلين مش ممكن النظام المصرى يفرز مستقلين لانى ده عايز حكايات طويله اسبابا ونتائج
يا بتنجانى كبرى دماغك من الليله دى مالم يتغير الدستور المصرى مفيش حل
وبعدين دى مشكلتكم انتو اهل مصر انا مش مصرى انا صعـــــــــــــــــــــــــيدى

mayada said...

بصي ياابي عجبتني حكايه تغير الموتور دي يعني فعلا الموتور عندنا عاوز يتغير مينفعش حتي نعمل له عمره لازم يتشال كله كده ويترمي ويجي واحد جديد
اما بالنسبه للاخوان سواء اتفقنا معهاهم او اختلفنا هما لهم فكر
وفكر لابد ان يحترم علي الاقل لانه وصلهم للشعبيه دي
والله ياستي الناس دول كمان كلامهم علي عينك ياتاجر الكلام اللي مش عاجبنا
نقوم مدخلين صوابعنا في نن عنيهم من جوه ولا غير الموتور الاولاني يغير التاني وبعدين كمان الاخوان مش بالسذاجه دي مش حولوا يضايقوا الناس بل هيستدروا تايدهم لان كيان الاخوان قايم علي شعبيته ده بالاضافه لراس ماله يعني
اما بالنسبه لاخزان المعارضه
فكلها ياابي بتصب في جعبه الحزن الاكبر مفيش معارضه في البلد
اما بالنسبه للحزن ولجانه وخاصه لجنه الشباب فدي مكياج ياابي عشان الصوره تطلع حلوه بس للاسف مكياج رخيص وبيسيح وبيخلي الصوره زفت
وده بقي كلمه علي لسان حد من الحزب حد كبير العيال اللي في الحزب دول زي اليويو بسكويت وقت منحب ناكله بكوبايه شاي
يلا سلام

فارس بلا جواد said...

appy
صباح الخير
صلى على النبى
هههههههههههههههههه
تحياتى

لورنس العرب said...

تعرفي لو عملوا أحزاب للأهلي والزمالك- يمكن تيجي نتيجة ايجابيه عن الحزب الوطني والوفد والاخوان وغيرهم
الاخوان نازل الانتخابات وعارف انه هايتهزم - وايمن نور نزل من قبل أمام مبارك وكان عارف انه هايتغلب- لكن كلهم نازلين عشان لما يتغلبوا يقولوا فين الديمقراطيه
المشكله ان كله طماع
البلد دي محدش خايف عليها يا آبي

appy said...

ana ga3an
*********

اهلا اهلا بصديقى
عليه الصلاة والسلام يا صباحه خناقات
اقولك تعالى جنبى هنا
اعتراضى على تضارب الكلام اللى بيتقال عارفه ان لهم الكتير الكويس متمثل فى اى حاجه بس مش معروفه ليه بقى يا قلبى لانها قتصرة على مجتمعهم هما زى الحزن بالظبط هتقولى ندهم اجندا اقولك زى متقال بالظبط ومش بتتنفذ يعنى لو ظبطت معاه معنديش مشاكل ومعتقدش هتظبط با صديقى
وثانيا محترمه وجهه نظرك جدا وده صح
وبعدين المعارضه الاحزاب وبس مش بتكلم عننا احنا كشعب دول ناس عاوزة تتلمع وتتقمع زى الباميه بس عيبهم يا صديقى انهم باميه حمضانه عليها دبان مش اكتر ومش بتتباع
اما عن صديقى اللى قالى المثل ده ده احلى دماغ فى الدنيا ومفيش زيه هبقى اقولك عليه هههههههههه
هو انتم بتروحوا المصيف مايوهات شرعى ولا عرفى اصلها تفرق فى اللون ههههههههههههههههه
نورت يا صديقى العزيز
وكسبت جايزة او تعليق همسكك الحزب اللى هعمله من الوسط ههههههههههه








رئيس جمهوريه نفسى
================
لاااااااا كده كتير يعنى جعان وانت وراى بعض لاااااااا ماشى يا سيدى
بص يا دودو فى راى ان المستقلين موجودين والله وعندنا ادمغه حلوة بس الحكومه بتخوفها جدا بس انا عن نفسى لو قدرت اترشح اترشح وماله يعنى حتى نشوف العوالم وهما بيهزوا داخل المجلس يا دودو
وبعدين ايه انت مش مصرى انت صعيدى طيب بقولك ادفع كام واخد الجنسيه والله ما واجع قلبى غير البتوع وجهه قبلى دول هههههههههههههه نورت يا دودو الا اتصرفت فى الشهاده ولا تأخد الشبشب وانا الخسرانه هههههههههه

appy said...

مياده
=========
يا حبيبة قلبى معترضتش بس يتنفذ صح والله يا مياده عارفه لو الحزن حتى طبق جدوله صح هيبقى فله المشكله فى التنفيذ يا مادى والعقول كل مكان فيه الوحش والهباب والحلو وكل الناس عارفه كده
موضوع راس المال بتاع الاخوان بصى يا مادى معاكى وعارفه انهم بيعملوا الكتير جدا فى حياتهم بس المشكله انى ما زلت بقول انها محصورة فى مجتمعهم مش الناس العاديه
عموما انا مع اللى الاقيه بيراعى الدنيا كلها
الاحزان التانيه ربنا يأخدهم بجد بجد زهققققققققت منهم ومش عاوزة مصر تبقى محصورة فى مكان واحد
عجبنى تسبيه الميك اب ده يا مادى تسلمى بجد عليه
نورتى يا دماغ جامده





فارس بلا جواد
=============

صباح الفل عليه الصلاه والسلام
نورت يا فارس

رئيس جمهوريه نفسى said...

يا ابى يا بتنجانى
موضوع المستقلين وانى فى عقول زى الفل وكفاءت عاليه والله انا معاكى فيه بس زى ما انا قولت ليكى المنظومه فاسده كلها ولو متغيرتش مش حتظهر الكفاءت دى من الاصل لانى فى وسط الماتور البايظ مش ممكن نقول خرطوم الريبدتير شغال فهمتى
موضوع الصعيد لو عندك استعداد نتناقش فيه انا مستعد لو مش عندك استعداد ااجله لما اعمله بوست وننقل المعرلكه عندى
موضوع الشهاده بدور متنزلى اعلان فى بيكيا يا بتنجانى يمكن ربنا يفرجها بحد يدينى نوكيا3310 وياخد الشهاده

الطائر الحزين said...

عارفة يا آبى

احنا بنحب تريح الدماغ
يعنى لا نشغل مخنا فيما يقال لنا

الراجل ده بيقول كلام حلو يبقى حلو ولو مرة قال كلام وحش يبقى وحش ونقاطعه

انا لى مخ وعقل وافكر واخذ من كل زهرة ما تفوح به من روائح ذكية ولا التفت لما بها من اشواك لكننا لا نفعل ذلك لان هذا محتاج جهد منا واحنا مش واخدين الا على الطرمخة وان نساق مثل البعير فقط

(أنت بخير؟)

الطائر الحزين said...

نسيت أقول
كيف ينفع الجسد اذا قطعت منها الرأس؟
والله تنفع حكمة

!!!!!!!!!!

appy said...

لورانس العرب
**********
انا قولت انا بشجع الاسماعيلى ما تعمله حزب ده والنبى يا لورانس هههههههههه
ما كله هيتهزم عارف ليه لان مفيش ارضيه صلبه نور خلق اعداء والاخوان نفس القصه والكارثه فى العدو الاول بتاعنا وهى الحكومه اللى ماشيه على حل شعرها دى معنكش حلاق كويس يقص شعرها ويخلصنا ههههههههههه
نورت يا لورانس






رئيس جمهوريه نفسى
=================
استهدى بالله يا اسطى اركن على جنب الصعيد مشكله وانا عارفه ومقدرش اجادل فيها بعد ما درست الدنيا يا محمود اكتر وشوفت الواقع المرير العلقم يا خويا وبالمثل سيناء والعريش من البلاد الوهم وسيبنها اللهى يتسابوا فى المحيط الهندى ههههههههههه
نورت يا دودو اكتب عندك واناقشك فى لاقصر واحتله

appy said...

اخى الطائر الحزين
==================

اللهى ربنا يكرمك ويطعمك ما يحرمك ويوعدك بحوت كبير تأكل منه وتأكل كل اهل الله
هو ده اللى انا عاوزاه وعاوزة اوصله
بس انت عارف انى دبابه فى كلامى وعلى راى معتز بتاع وجهه نظرى فاتحه راديو
مش قادره ازود على اللى انت قولته بس جبت من الاخر

انا ولا حاجه كل يوم الاقى حد يقولك حريات وهما نازلين سلخ فى خلق الله لا والمصيبه واحد جاى يقولى انتى حاطه لينكات اخوان عندك قمت كملت له وقولت لا وسلف كمان انا بقبل باى افكار فى الدنيا طالما مش شواذ يبقى خلاص ولقيته متابع تعليقاتى تقولش عينوه فى امن الدوله ليا انا بس هبقى اقولك مين هو ههههههههههههههههه
فحبيت ابخ فى وشه
وقولت له اصلهم بيدفعوا ليه اعلانات شهريه هههههههههههههه اعمل ايه بس ويقول على نفسه ليبرالى
الا مش الكلمه دى وهشه يعنى ههههههههههههههه

الحكمه هايله بجد والله وتنفع والمفروض الناس دى كمان تقراها يمكن تفهم دى ناس عندها استعداد تتفاهم مع الملحدين ولا تتفاهمش مع المتدينين دا ايه يا خويا المصايب دى
يالا معلش صدعتك بس قولت ارد عليك براحتى اصلى عارفهانه بيقرأ ردودى على الناس ههههههههههههه معندكش وصفه كبوت العفريت اصرفه بيها من المدونه ههههه

محمد فوزي said...

صباح الخيرات
موضوعك ده فكرني لما كنت في أحد المدونات الشهيره بحاول أعرض وجهة نظري عن أهمية المشاركه في العمليه الإنتخابيه , ففوجئت بأحد المتابعين قام علق وقال إيه :
في ناس (يقصد اللي زيي انا يعني )[ فاكره إن الديمقراطيه هي صندوق الإنتخابات وبس , وده مش صحيح الأهم من ده هو تغيير فكر الناس بمعنى إنهم يتعودوا يقبلوا بوجود أفكار كتير هيشوفوها شاذه وغير مقبوله زي فكرة وجود مصريين بهائيين أو مثليين ( ده هو اللي بيقول ) ,
وبعدين كلنا عارفين لو اتعملت انتخابات حره ونزيهه في البلد دلوأت إن اللي هينجح فيها هما الإسلاميين , ودول أول حاجه هيعملوها لو مسكوا البلد إنهم هيحدوا من الحريات المدنيه , يعني مثلا هيمنعوا الخمور والمايوهات ... إلخ ]!!!!!!!!!!!!!!!

الحقيقه أن أول ما قال كده أنا خفت قوي على المايوهات بصراحه وحسيت إن فكرتي دي هتكون خطيره جدا ومدمره للبلد !!!!!!!!!!فرحت ساكت وطالع من المدونه من سكات

الحدوته دي , حد فهم منها حاجه ؟

متابع تعليقات أصدقائك على موضوعك الهايل بإهتمام ,

مواطن مصرى نايم said...

هههههههههههههههههههههه
انتى كده حطيتى ايدك على نوقطه الموضوع
احنا لازم نعمل وقفة و نطبع مفروشات

يا ايبى عموما الاخوان احسن بكتيير من حزب عز الوطنى

لانهم على الاقل بيخافوا
على مصلحتهم
و لعلمك مصلحتهم من مصلحتنا
انا عن نفسى مصلحتى ان واحد زى جمال مبارك ميبقاش ريس
و هما بيحاولوا يعملوا كده

بس نفسهم يمسكوا الحكم
و ده اسوء شئ فيهم
لانهم لو مسكوا
الشعب حيتسلق
و حيتاكل على بؤ واحد

و حنضيع

فى امريكا الكونجرس ملهش دعوة بالرئيس
فى فرنسا الرئيس بيدى للمجل بالجذمة و مش بياخد رأيه


فى اسرائيل الكنيسيت يقدر يحاكم الرئيس
و يقدر يحاكم اى حد و مفيش كوسه
عشان كده هما بيتقدموا و احنا بتخلف

مينفعش اسرائيل تكون احسن مننا

انتى فاضية و الا وراكى حاجة
اصلى لسه ممكن اكمل
ههههههههههههه
موضوع جامد يا ايبى
الله ينور ملعوبة
تحياتى
اسلام

appy said...

محمد فوزى
========
لاااااااااا لاااااااا كله الا المايوة اعيش ازاى انا من غيرة عيب كده
طيب بص بقى انا برحب بكل الافكرا الا الشواذ يعنى اصلى مش فاهمه دول اصلا تفكيرهم ايه يعنى ما علينا
وبعدين هما الناس جالها هرش كده من اسم مسلم امال لو مكناش كلنا مسلمين يعنى
بص انا واحد بيقولى انتى ليبراليه قولت له ان شاء الله اطفحها ولا اعرف كل اللى انا بحبه فى حياتى انى بنت مصريه ومسلمه ده المسمى اللى بحبه بس يا اهلا بالافكار التانيه اللى بتيجى اشوف منها ايه اللى بيناسبنى والباقى فى الباسكت بتاع الزباله
يا محمد الناس مبقتش عاوزة تركز وزى ما قولت لك بيسيبوا الحمار ويشدوا فى البردعه وانا زهقت
على فكرة على جنب الاسلام هو اللى بيؤدى للمدنيه ههههههههههه بس خليها موضوع تانى بقى
بس مش بنفس المنهج اللى بيطبقه المتشددين شوفت انت سحبتنى لحته تانيه ازاى يا ساتر
خليك قاعد هنا بقى خلى بالك من ضرب الناس بس متخافش انا مهدداهم ههههههههه
وخلى بالك من المايوة قال يمنعوا المايوه قال ههههههههههههههههههههههههههه
نورت يا دكتور






مواطن مصرى نايم
================
ايه يا اسلام انت عاوزنا نبقى زى الدول المتكدمه ولا ايه عيب عليك كده عيب اوعى تقول واه اسرائيل احسن مننا طبعا مش كفايه احنا بنتمسح فيهم ونبعت لهم برقيات اسكت يا اسلام اصلى مفأفاه يا خويا
كمل كمل براحتك قول وبعبع خلينا نحط كل حاجه فى موكنها الصوح يا اسلام اصلى اتخنقت من الناس الهبله بجد
نورت يا اسلام

رئـــــيسـة حزب الأحلام said...

فعلا احنا اتلخصنا فى حاجتين اما حزب وطنى اما أخوان وفعلا مابقاش اللى الاتنين دول اما دة يادة
والواحد الحمد لله لا دة ولا دة
وماتعرفيش ليه احنا نعمل حزب جديد ونسميه حزب المدونين
ايه رايك فى الكلام دة
هههههههههههههههههههههه
وربنا يستر علينا
تحياتى لكى وللخرفان

واحدة مفروسة said...

هههههههههههههه
انا جيت على كلمة رقاصات
هههههههههه
انا ماليش فى السوياسة
ولا اقولك ليا بس بستعبط
ههههههههههه
انتي ياختي بتحبي تصيفى على طول و على عرض
انا بقى احب اصيف لوحدي
هههههههههههههه
ده كلام نكتبيه؟
اخص عليكي با بؤبؤ
البلد محتاجه شعب جديد
ده احنا شعب يجيب الضغط و الشلل و السكر
ولما الشعب الجديد يجي تبقى تديني خبر علشام اروح اعمل حزب لوحدي
هههههههههههه
قال احزان قال
انتي بتجيبي الكلام المنيل ده منين؟؟؟
هههههههههه
انا ساعة الجد ماعرفكيش
ههههههههههههه

النجمة الصامدة said...

هههههههههههههههههه
والهل العظيم انتي بت زي العسل

عارفة انا لما باجي واقرالك بوست بيحصلي ايه
!!!

ببقى بالظبببببببط شكل التليفيزيون لما يعمل تششششششششششششش
ههههههههههههه

نفسي يابنت الحلال تفصلي بين الفقرات
ترتبي كلامك في نقاط منفصلة
اما انا اشوف العنوان
وابدا اقرا
والاقيني عمالة ادخل في شوارع وحارات
وادخل من هنا اخرج من هنا
على اني اعرف ارتب كلمتين في دماغي
مفييييش ابدا

فهو الحمد لله الحمد لله يعني
يارب افتكر حاجة واقدر ارد
----------

شوفي يا ستي
عن الاخوان والاحزان الاخرى
فانا معاكي اننا المفروض ما نقعدش نشغل بالنا دول لما يمسكوا هيعملوا ايه ودول لما هيمسكوا هيولعوا في مين وهيحبسوا مين والكلام دا
وانتي جبتي الملخص
لا اكراه في الدين
فالاهم دلوقتي اننا تحارب البوب الكبير على رايك
ههههههههههههه

ثانيا
شباب الحزن الوتني
والله والله صعبانين عليا
بحس انهم عارفة عاملين زي افلام الكرتون بتاعة توم اند جيري
الحلقة اللي هي كل واحد بيعمل انسان الي منه عشان يجري ورا التاني
ويبقوا ماشيين عل راسهم خوذات وعنيهم متنحة كدا
هههههههههههههههه

ثالثا
ثالثا ايه يا بت يا جهاد
ثالثا ايه
كان في ثالثا والله
:S
ماعلينا
الحمد لله اني في دماغ ارد اصلا بعد
المهلبية اليل عملتيهالي في دماغي دي


---------
بما اني هنا بقى
سعادتك ليكي تاج على مدونتي الجديدة
i'm a dentist
ياريت تستفضلي وتجاوبي عليه

سلااااام يا مسكرة

كوارث said...

اهلا وسهلا
ازيك يا آبي هانم
منورة
انا مكنتش فاهم لحد المثل بتاع طبق الكوشري
قصدي ماتور العربية
وانا اؤيدك وبشدة
كنت كاتب موضوع في مدونة ليا اسمها اللى اختشوا ماتوا خلاصته ان ده سياسية الحكومة اصلا
الحجكومة سابت الاخوان وسابت ضدهم العلمانية والليبرالية والبطيخيه والكلام الجامد ده
وبتعمل الخمسين كارثة مع بعض في وقت واحد عشان كل جماعه يروحوا لكارثتهم ويسيبوا الباب من غير حراس !

طارق الغنام said...

ماشاء الله عليكى
خفه الدم كلها بلاقيها عندك
تقبلى تحياتى
ودمتى متألقه

Vague said...

السلام عليكم

هبدأ مما انتهيتي
نعم...الحرية هي انك (تستمعي ) بكل صدر رحب لكل الفئات المختلفة

ولكن مش من حقهم انهم يفرضو راي عليكي...لكن ممكن تحترميهم..وممكن ماتحترميش رايه

انا مش فاهم انا بقول ايه اصلا

بالنسبة للاخوان... فاسأليني انا.. انا قريتلهم افكارهم واهدافهم ووسيلتهم كله حاجة زي الفل ما شاء الله
ولكن عند التنفيذ بيكون هناك معوقات(سواء من تدبير الحكومة او ظروف عادية) مش بتكون في صالحهم

وانا شايفهم الاقرب للاصلاح

ومتقلقيش (زي مانتي قلتي بالظبط) مش هيجبروا حد اكيد على لبس الحجاب..ومش هيمنعوا معجون الاسنان بحجة استعمال السواك..لانهم متفاهميين

maha zein said...

كلامك بيتقال كتير
مين يسمع
مين يتحرك
انا مش عرفة امتي الواحد ممكن يشعر بانه اقوى من حكومته
عرفة احنا لو عندنا ذى برة فى اننا احنا الي نختار كنا قدرنا نذل العالم دي
ولا حد يقدر يكسرنا
بس نقول ايه
بصي حسبنى
متتعبيش روحك
ولا لا لازم نتعب روحنا
بوست حلو بس قلب عليا المواجع والخيبة الي احنا فيها
تحياتي

دعاء مواجهات said...

يخرب عقل جماال عقلك يابنتى

الواحد بجد كان مفتقد مشاغباتك دى

بس بصراحة اكتشفتك اكتر

وعجبتينى اكتر

بس شكلك متأثرة بموجة الأفلام الأخيرة أوى

صح؟؟

_______________________

بالنسبة بقى للكلام العميق

المعمق بتاع البوست

فإسمحيلى أقولك

إلحقى يلا يابنتى شوفيلك مخبئ

إستخبى فية

هههههههههههههههههههههه

بنهزروو طبعا

بيس ياقمر

بحبك يامصر said...

بصى يا ابى انا كنت هقرأ وامشى وبعدين ارجع اعلق بعدين لانى مش متعود اعلق بدرى كده بس تعليق الاستاذ محمد فوزى شدنى وعجبنى ده طبعا بجانب ان البوست فى الجون انا هداف وبجيب اجوان برده يعنى ايه انننا نخاف احسن الخوان او اليبراليين يمسكوا الحكم طيب احنا لو قدرنا نعمل تغيير وحد تانى مسك الحكم يبقى هنقدر نغير الاخوان وغيرهم لو مش عجبونا على الاقل هيكونو لسه جداد معملوش الجيوش والحراسات الرهيبه دى لحماية الكراسى

بالنسبه للمفروسه هى بتقول احنا شعب نجيب الضغط والسكر
ممكن 2كيلو سكر لو سمحتى معنديش سكر والسكر غالى
ههههههههههههه هههههههههه
يبقى الخلاصه اننا نوجه جهدنا ضد الناس اللى مستعبدنا ونهبين ثروات البلد
مش نمسك فى بعض ونسيب الحزن الوتنى ينهب البلد
تحياتى

haneen said...

يا سلام عليك يا رئيس قسم اركان حرب آبى ، ايه الدماغ دى بس ... انتى بكل بساطه حللتى وجسدتى المأساه اللى بنعيشها وبحسك الواعى قدرتى توصلى لاصل اللعبه اللى بيلعبها الاحزاب والمعارضه والحكومه واحنا اللى فى النص للاسف زى عيسوى الكوبرى اللى بيضرب على قفاه من كل الاطراف وهو الضحيه ..بس تفتكرى ان فيه امل وان كل الناس هيفقسوا القصه كده زى انتى ما عملتى ولا هنفضل كده نايمين فى العسل على طول ولا هنتجرأ فى يوم اننا نعمل حاجه ..عجبتنى قوى تعبيرات البتنجان والباميه دى

خالص تحياتى وامتنانى

blue-wave said...

والله يا بنتى انا حاسس انها تمثيليه
والأخوان واخدين فيها دور
والحزن الوطنى المخرج والمؤلف
ربنا يلطف بينا يا ابى

إيما ( أم البنين) said...

آبي حبيبتي
مش عارفه أقولك إيه على ذوقك ..مبسوطه جدا إن فيه ناس بحبهم وبيحبوني في الله من غير سابق معرفه ..وإن شاء الله تكون معرفة خير..أنا مش عايزه ألخبط لكم الجدول ومش عارفه لسه ظروفي لما أرجع هيكون شكلها إيه ..خليكم زي ما إنتوا وإن شاء الله أكون معاكم المره إللي بعدها ما هو أنا مطوله معاكم السنه دي يمكن لبعد العيد ..أما إذا إتأجل الميعاد وكنت موجوده أكيد هتصل بيكم وأحضر لأني نفسي أتعرف عليكم ..وشكرا مره ثانيه على إهتمامك
تحياتي

وجهة نظري said...

هو في حد محترم لا مؤاخذه في الكلمه حيوافق يرشح نفسه مستقل والا حتي تبع أي حزب؟؟؟ دا يبقي طالب بهدله وقلة قيمه

وحتي لو "نزلت عدالة السماء علي ستاد باليرمو" ونجح المرشح المستقل، تفتكري حيكونله أي قيمه في أي مكان؟ والا برضه حيرفع إيده لما إبن العز يزغرله؟ أصله لو مرفعش إيده حيتمد علي رجله، يرضيكي راجل محترم مستقل يتمد علي رجله؟

مصر عامله زي القطر العجوز، كل واحد بيحاول ينط فيه، ولو ملحقش بينط علي ضهره... إلي راكب بحماره وإلي راكب بالمشنه وإلي ساحب بطه ووزه .... وكلمهم لما يتزنقوا بيعملوها علي حيطان القطر لحد ما ريحته بقت نيله. والقطر دا بيعدي علي القري والنجوع .... وبالنسبه لأهل القري والنجوع القطر دا مالوش قيمه... أهو ماشي، هو بتاعهم؟ ولا حتي بياخدوا منه حاجه .... مالهومش إنتماء ليه ولا لركابه

رأيي دايما إن صعب أوي الأقتراب من الحياة السياسيه في مصر دلوقتي .... مصر إتخطفت ولسه بدري علي ما ترجع.. ديتها كبيره أوي

إنما إلي ممكن عمله، إن شعب مصر المستقلين يفعلوا ما بينهم المباديء الديموقراطيه ويخافوا علي بعض ويحافظوا علي بعض ... كل واحد في مكانه، سواء في عمارته او في شارعه أو في حيه أو في شغله ... كل واحد يتقي ربنا علي قد ما يقدر... ممكن ساعتها لو الفكره بقت جوه كل واحد نقدر نخطف محرك القطر من الحكومه... وساعتها نوقف القطر وننضفه ونجدده ونصلحه

في رأيي هو دا الإختيار الوحيد للشعب المصري

محمد الكومي said...

انا شخصيا شهادتي مجروحة

اولا اسكندراني

ثانيا

مابحبش الاخوان

ثالثا اي راي هيتفهم على انه تشفي فيهم

appy said...

رئيسه حزب الاحلام
=====================
حط الشروط يا ريس واحنا معاك نورتى الكوكب ويا ريت الناس تفكر شويه





واحد مفروسه
=============
لا يا شيخه جيتى على ايه ليه شيتمى ريحه كباب ولا ايه فجيتى عليها طبعا انا عارفه انك بتستعبطى اقولك على سر فاكرة موضوع اختلال المجتمع والطبقات لو فكرت شويه هتلاقى الاتنين مرتبطين ببعض كتير بس فكر اهمدى بس والله وفكرى وهتشوفى
نورتى يا حبيبى

appy said...

النجمه الصامده
==============
حاضر يا جهاد طول ما انتى ماسكه ليه البتاع ده فى الصورة هقولك حاضر هههههههههه
وبعدين يا بنتى دى العبقريه انكم تشغلوا دماغكوا وتجيبوا ورقه وقلم واقترح عليكى اعملى يوم لمدونتى لوحدها ههههههههههه
بصى يا جهاد نيجى للجد فعلا مفيش اكراه فى الدين ومحدش هيقدر يفرض على اى حد حاجه الا اذا كان متخلف وعاوز يهد قبل ما يبنى يبقى لازم كل طرف يلتزم بالحاجات اللى عليه طالما عاوزين مصلحه الناس
ثانيا الاخوان او غيرهم معتقدش انهم بالغباء ده الا اذا كانوا عاوزين مصر تبقى زى السعوديه مظاهر اسلام وفى النهايه اخلاق رمال فى الصحراء وطبعا فاهمه
ربنا يا رب يقوينا على الغلط كله يا رب
نورتى وحاضر هروح اشوفه







كوارث
========
صح كده يا كارثه اللى انت قولته وبعدين ايه مش فاهمه بيلعبوا قط وفأر وحاجه بقت تقرف العين والقلب بسسسسس نورت يا كارثه الكوكب

appy said...

طارق الغنام
=============

اهلا بيك وميرسى لذوقك خالص نورت







Vague
=======
ايووووووون يا دبشه صح كده اقبل او مقبلش ودى الحريه والاحترام يا دبشه ولما اسمع من اكتر من مكان بص بقى عن نفسى حتى لو محترمتش رايه بقفل النقاش مش اوصله لغلط وطوله لسان فهمت
ثانيا انا معاك ان الاخوان عندهم اجندا ومش بتتطبق لاسباب اكتر كمان من اللى انت قولته كل مكان فيه صراعات وانقسامات وطالما جت المصلحه الشخصيه بين الافراد يبقى ضاعت الاجندا فى الرجلين
ولو فكروا يا دبشه يفرضوا حجاب ولا بتاع يبقى احنا هنتحول زى بلاد الجاز والخليج وجوا البلد كويسين وبراها لا ومعتقدش فيه حد بالغباء ده فهمتنى
نورت يا دبشه مع انك مكنتش دبشه المرة دى خالص بجد

appy said...

maha zein
===========

بصى يا مهاميهو يا حبيبتى موضوع نتحرك امتى مش هنتحرك واقولك ليه لاننا بقينا فى الاسوء ومفيش حاجه بتحصل عاوزين نهد الدنيا والحكومه بتهد علينا بتحاول بقدر الامكان تقرفنا وتلهينا فى حاجات كتير فعمرنا ما هنتحرك بس خلاص نورتى يا قمر





دعاء مواجهات
==========
ميرسى يا دودو ونورتى يا حبيبتى

darkskies said...

انا قريت الكلام كله بس للأسف مش عندى تعليق على الأقل دلوقتى لان الكلام كتييير جدا يتقال
بس كويس تفكيرك على ايه حال

appy said...

بحبك ي مصر
==========

بص يا سيدى اساسا انا ايه اللى يخلينى امسك واحد الحكم وهو مش قادر ولا مورينى حاجه كويسه يعنى لو اى حزب ولا طائفه من البدايه ورانى الكويس هيبقى خلاص حلو قوى اقف جنبه يبقى لو احنا شوفنا اى حد بيجعجع وخلاص مش هنديله صوتنا يبقى بارادتنا احنا المفروض وده الملخص
اما السكر فاشوفك امس لانى اشتريت اخر شواال عندها ههههههههههههههه





haneen
=========
اهلا اهلا يا قمر نورتى الكوكب وميرسى اولا على ذوقك
ثانيا والله يا حنين احنا فاهمين بس بنستعبط وبنطلع غلبنا فى بعض كمان
ودول بيعملوا تمثليه بايخه واحنا ماشيين وراها وبنتفرج واحنا عارفين انها تمثيليات متوزعه فيها ادوار بس صدقنا انها حقيقيه
نورى الكوكب يا قمر

appy said...

blue-wave
=========

لو فكرت شويه هتتيقن يا دكتور من ده فعلا لان بقت حاجات غريبه جدا بتحصل وانا عن نفسى بقيت احسها مهزله ملهاش لازمه
نورت يا دكتور





ايما ..ام البنين
================
يا حبيبتى انا الشرف ليا وللكل وجودك وربنا عالم انا بحترمك قد ايه وتنورينا يا ست الكل

رئيس جمهوريه نفسى said...

بصى يا ابى على موضوع الاخوان والحزب الوطنى افكرك بمشهد فى فيلم طيور الظلام بتاع عادل امام رغم انى مش من معجبيه بس بحب وحيد حامد
المشهد كان ما بين عادل امام ورياض الخولى فى طريق مقطوع خالى الا منهما الاتنين عادل امام بيقول لرياض الخولى دى قضيه بلد يا على والتانى بيقوله انا بعتبرها نزاع على ملكيه
وما بين الحزب الوطنى وبين الاخوان المسلمين الموضوع كله لا يتعدى قضيه نزاع على ملكيه بيت او احتته ارض بس الشعوب استعير كلمتك الخالده (فى شجره )

appy said...

وجهه نظرى
=========

اه يا معتز بقيت استنى رايك انت كمان والله معاك حق واذا كان يا معتز مدعى الثقافات بينهشوا فى بعض او اللى بيقال عليهم مستقلين يبقى ايه عارف نتيجه حوارات كتير قوى فعلا احنا فينا نسبه كبيرة عاوزة تتربى من جديد والله ومش عارفه ازاى الشعب بقى مقسوم جزء كويس وجزء كبير وحش
قوووم ايه الجزء الكويس لما شايف الوحش قدامه بقى يقولك امشى مع القطيع ما هو انا مش قادر اتحمل ابقى لوحدى وبقت حتى فى السلوكيات
امبارح ولد صغير بيلعب فى الشجرة وانا بركن تحت البيت والشجر ده لسه زرعينه احنا اللى فى العمارة من اسبوعين علشان العربيات بتاعتنا وتبقى ضله على حسابنا اقوله يا حبيبى عيب متلعبش فيها هتكسرها بكل بجاحه وانتى مالك يا مزة تخيل لما طفل والله مجبش الخمس سنين يقولى كده ارد اقول ايه انا
معتز الشعب راح فى شجرة من بدرى وخلى الحكومه والمصلحجيه يهصوا
نورت الكوكب ومتنساش الكلب علشان اخليه ياكل العيال دى ههههههههههه





محمد الكومى
=========
بالعكس يا محمد انا عاوزاك تتكلم عارف ليه لان انت اللى عندك الاحداث وطالما من غير الفاظ اللى انا عارفها يبقى هستنى رايك تانى بجد وعادى انت مش مطلوب منك انك تحبهم بس انقد بموضوعيه مش اكتر
ولا اى حد مفروض عليه يحب حد خالص
نورت ومستنياك تانى

appy said...

darkskies
===========
وانا مستنيه رايك وقول زى ما انت عاوز معنديش مشاكل خالص ويمكن رايك يفيدنى فى كتير واكيد انا واثقه من كده مستنياك






رئيس جمهوريه نفسى
====================
ايوووووووووون صح يا محمود ومش الاخوان بس المعارضه كلها بتقولك الشعب فى شجرة بقت مصالح شخصيه يا ريس
وبعدين الشجرة اللى بودى الناس فيها بقت كومبليت يا دودو اجيب شجر للناس منين ههههههههههههه نورت وصباحه فل يا ريس

رئيس جمهوريه نفسى said...

بتنجانى
كفايه كلنا كشعب ندخل فى الشجره الى انتو زرعينها تحت البيت حتى على الاقل نلاقى شويه مياه ساقعه ولا شاى واحنا فى الشجره يعنى
على فكره الواد الصغير الى كان عايز يكسر الشقه الى قالك يا مزه ده بيفهم
وش بيطلع لسانه :P

صيدلانيه طالعه نازله said...

اولا فى مصر مفيش مستقلين فيه ناس بتدخل الانتخابات و اول اما تنجح تجرى جرى على الحزن الوطنى و تقوله نحن معك
اما الاخوان المفتريين دى تبقى كارثه لو ورثونا قصدى لو حكمونا كده حنرجع 300 سنه ورا و مش حنبقى قدام تانى ابدا
بس للاسف هما نفسهم طويييييييييييييييل قوى و منظميين جدا و اهدافهم بيحققوها و لو بعد حين
و بالنسبه للعربيه البايظه عمرنا ما حنعرف نصلحها لان الموتور اللى عمره قرب يبقى 80 سنه اكيد فوت و من زماااااااااااااااان و لازم يترمى و ييجى غيره بس يارب مش يكون من نفس الماركه

سبهللة said...

حلوين كلمتين السوياسة بتوعك دول
بجد دماغك حلوة يا آبى
وبعدين يا حبيبتى كل الاحزاب دى منظر بس
عشان أوروبا والدول المتقدمة يقولوا علينا اننا زيهم
دة يوم ما فكر واحد من الاحزاب التانية غير الحزن الوتنى انه يرشح نفسه للرياسة
شوفى عملوا فيه
ومش هايسيبوه الا ما نقرا على روحه الفاتحة

ana ga3an said...

علي فكرة انا لا مع الاخوان ولا ضدهم
او غيرهم
انا مع الشعب
ايا كان مصلحتة مع مين
فالعمل السياسي في مصر لم يرقي حتي لدولة زنجبار
فنحن دولة تقوم علي الديكتاتورية المقنعة
يعني اللي عايز يهوهو ويعارض براحتة
ولو عايزن نتقلة ونعلقة من لغلوغة براحتنا
فكل واحد يعمل اللي عايزة
والمسحوق بينهم
المواطن العادي
الذي لا هم لة الا رغيف العيش والغموس وبرشامة الدوا ودرس العيال

اما عن المصايف احدثك انا بروح بنظام المسيار

Vague said...

انا مش دبشة؟؟!!

طيب

كلامك غلط على فكرة وانتي مش عارفة حاجة خالص (حلو كده) لان الاخوان داخليا بيتناوبوا الحكم والمسئولية
يعني نائب المرشد بيتغير دوما ويجي مكانه واحد تاني

فمافيش حاجة اسمها لما تيجي المصلحة الشخصية تفوق المصلحة العامة

يمكن بدافع عنهم (مع اختلافي معاهم في حاجات بسيطة جدا) لانهم الاقرب للصح وسط الهيصة الموجودة

ومتقوليش انا مش دبشة تاني

Migo Mishmish said...

الاخوان لا على طول الطريق يا ابي
اي مصيبة اسهل من الاخوان. خشي على اي موقوع او مدونة تبعهم واتفرجي على كم الغل اللي جواهم لاي حد.
لما بتقولي لا مش هايقدروا يفرضوا على حد حاجة هو مش عايزها. اما كبيرهم قال اللي هيعترض هاديله بالجذمة. ايه رايك بقه في الاسلوب الهايل ده. وبعدين يا ستي شوفتي لما حماس مسكت غزة ايه اللي حصل. سابوا اللي اسرائيل والقضيه الفلسطينية وكدة يعني وقعدوا يحاربوا في بعض شوية وبعدين لقوا جثث بنات بتترمى في الشوارع ويقولوا لك انهم سافرات ولا عاهرات ولا ماعرف ايه. طب يا حلو يا بتاع ربنا هو مش الواحد لما يلاقي واحد تاني ضال - ده باعتبار انهم ضالين يعني - مش يرشدة للطريق الصحيح يمكن ربنا يقبل توبته ولا نقتله علشان نقط السكة عليه خالص. ثم هما مين اصلاً علشان يقولوا ده صالح وده فاسد. وبعدين نظموا حملات جهاديه على مقاهي الانترنت وقالوا علشان الافلام الاباحيه . باحيه ايه وهبابيه ايه؟ هو بتوع الدين دول ما بيفكروش في حاجة تانيه غير الجنس. اي حد فاتح كمبيوتر يبقى بيدور على اباحيه وبعدين انت ماللك يا سيدي ما يدور على اباحيه ولا هبابية ما تخليك انت في اللي انت فيه. ابسط دليل على كلامي من كام يوم في برنامج من برامج شوبير بتوع الكورة دول وقف مصطفى الزيات المحامي بتاعهم - طبعاً انتي عارفاه- وكان بتكلم على انتخابات الزمالك وومسك بتاع سبع ميكروفونات وقال احنا جايين النهاردة نحارب الاصنام ونوقعها احنا جايين بأيادي طاهرة نظيفة - على اساس اي حد تاني جاي بايدة وسخة - ومش عارف ايه فكرني بقيلم واإسلاماه. ده كان عامل زي ما يكون داخل على غزوة الزمالك المباركة. ما تقول الادارة الموجودة حالياً فاشله في كذا واحنا برانامجنا فيه كذا وخطتنا في الاصلاح كذا مش اصنام. يا بنتي نحاج الاخوان من نجاح الشعار الناس بتروح تنتخب الاسلام اللي موجود في الشعار مش الاخوان
ربنا يستر فعلاً منهم
Love,
MishMish

أم أحمد المصرية said...

حبيبتي اللذيذة ابي
اولا الف مليون شكر علي سؤالك عني و ها انا قد عدت لا حرمني الله سؤالك
اما بقي الموضوع الكونفدينشال اللي انت كتباه فانا اؤيدك في اشياء و اختلف معك اختلاف الاصدقاء في اشياء و شايفة ان نقاط اختلافنا يمكن تأجيلها لصالح نقاط الاتفاق يعني نغير الموتور الاول و بعدين يبقي من حقنا نجرب حدج تاني و ساعتها فقط ممكن يظهر مين كويس و مين وحش و اللي ما يعجبسش الشعب يغيره لأن الجميع حتي الان بيتكلم بس لم تتح له الفرصة ليجرب
تفتكري حنعيش لغاية اليوم ده

appy said...

رئيس جمهوريه نفسى
=================
ماشى يا محمود هوريلك نورت






صيدلانيه طالعه نازله
====================

يبقى ايه الحل نشوف الاصلح لينا يا حبيبتى ونفهم بقى لعبه القط والفأر اللى قرفانا طول الوقت دى شوفتى ادى اتنى رجعتينى للفيران تانى على جنب الاخوان بتهمه مصلحتهم ههههههههههه نورتى الكوكب

appy said...

سبهلله
========

شوفتى المرة دى مطولتش اهو عليكم علشان تعرفى بس انا قررت انصاع لقرارتكم الا ايه هى انصاع دى ههههههههههههه نورتى يا حبيبى




ana ga3an
===========

الا بقولك انت ليه كاتب اسمك بالانجليش كده ههههههههه مكسوف يعنى ما كلنا جعانين
وبعدين مسيار ايه بس ده عيب علشان ده الوانه مش بتعجبنى خالص مش على الموضه

Hu-man said...

موضوع الإخوان ده ..صداع أساساً هايتني موضوع جدلي ..ونفضل نشتم في بعض وسايبين الحاجه الأساسية والأهم ...اللي هي إيه
إن البلد بتتسرق وإحنا قاعدين
سامعين ولاأزعق تاني
البلد بتتسرق وإحنا قاعدين ونايمين ..وعاملين بندور ..الإخوان لومسكوا الحكم ..وهايعملوا إيه
معلش يعني ..هو ده الحكومه اللي عايزه
طول ما الهسهسات عماله بتلعب كورة شراب وكهربا في دماغنا
فاكره كهربا!؟

appy said...

Vague
=========
وجوووووووون وجووووون ادم دبشه طلع مش فاهم يالا وادى لقب كمان يا دبشه افندى انا اقصد ان فيه ناس مش بيهمه الجماعه مقابل مصالحهم الشخصيه وساعات بيأخدوا الجماعه ساتر ليهم لمصايب تانيه واقولك هديلك واحد من بتوع الشرقيه ايميله وكلمهعلى انك واحده وابقى اتفرج على نوع من ضمن النوعيات يا دبشه مش بقول كلهم البعض فهمت مصالح شخصيه يا خيبه يعنى ايه
يالا اجرى بقى من هنا ههههههههههههه







Migo Mishmish
==============

يانى يانى انتى معبيه يا اوختى كده ليه بس
طيب ماشى كل اللى انتى قولتيه ده اولى بقى اننا نصلح الفساد الاصلى اللى عندنا وساعتها مش هندى فرصه لاى حد يحالو يفرض نفسه علينا
راجعى اول كلمه ليه بتاعت القط والفأر وهو مبقاش فى مصر غير الاتنين دول هتفهمى الكتير من اللى ااقصده انا يا قمر نورتى وبجد بتسعدنى مناقشتك جدااااااااااااا
وراجعى ردودى بقى وخليكى فى الكوكب النهارده اتعبى شويه علشان انا عارفه انك هتفهمينى






ام احمد المصريه
=============
حبيبة قلبى اهلا بيكى تانى الحمد لله انى اطمنت عليكى بجد
ثانيا يا حبيبى حتى لو اختلفنا فده مش مشكله الاختلاف فى الراى رحمه من ربنا بس الاهم اننا اتفقنا على النقطه الاساسيه دلوقتى اللى هى التغير المطلوب وان شاء الله يجى اليوم يا حبيبتى
نورتى الكوكب كله

المنسى said...

كلام جميل
كلام معقول
مقدرش أقول حاجة عنه
ياموضايعك يابتنجانى
بصى ياستى
إحنا مشكلتنا فى بلدنا الحبيب مش عدم الديمقراطية ولا تطبيق اليكتاتورية
مشكلتنا إننا مش عارفين اننا أحنا نفسنا مشكلتنا
يوم من نعرف ده هنبدأ نحل
فى حكمة مش فاكر من قالها
بيقولك
أكتشافك لجهلك دهخ لأول خطوة ليط فى طريق العلم
وإحنا فى بلدنا الجميل
معندناش أدنى نوع من أنواع السوياسة
الأخوان زى ما بتقولى مختلفين كلنا مش إنت بس معاهم
الأحزاب هسسسسسسسسسسس
حدث ولا حرج
كفاية دى مجرد حركة
أه ليه إنجازتها وأهدافها
بس مش هتقدر تعمل حاجة لإن هى والإخوان عمر ما هيكون ليهم حزب

ولو بقى هيبقى على شاكلة أحزابنا
أنا بدون ذكر أسماء حضرت إجتماع فى حزب قبل كده
والله بنفكر ونتناقش عند على ياهو بتع البلياردو أحلى وأوسع وأعمق
أحزاااااااب إيه إللى بتبقى عباره عن شقة مفيها حاجة سليم
إزاى بعدها يفكروا بشكل سليم

أنا شايف إن بلدنا الجميلة بفضل زعيمنا المبجل ماشية فى طريق غير الدين خااااااااااالص

والأخوان كمان مش بيطبقوا الدين فى كل حاجة
وحاجات كتير فى سياستهم غلط

تعالى منتكلمش فى المواضيع دى كلها
ونتكلم فى حاجة واحدة بس
طاقتنا دى إزاى نوجهها نحو المتربس ومصدر العبيطة ونحول نلخلخه من مكانه نعمل إيه ونبدأ منين وإزاى وإمتى جميل جدا إننا نفكر فى إزاى نتوجه
دى أحسن حاجة فى رسالتك
هفكر فى مقترحات ولو وصلت لحاجة هقولك
وياريت يكون الموضوع إيجابى فعلا ومن المناقشة هنا نوصل لحاجة
توجهنا بجد
وميبقاش كلام والسلام
تحياتى

Migo Mishmish said...

يا ابي انا فاهمة كلامك كويس وعارفة انك مش بتدافعي عنهم ولا بتضايقي منهم وخلاص من غير سبب
الفكرة بس ان مش معنى ان الدنيا بايظة اننا نقول دول هايروحوا لوحدهم لما الحال يتصلح. وده مش مظبوط بصي لاسرائيل معظم اللي فيها ومعظم اسرائيلين العالم ملحدين اصلاً لكن لان الديانه اليهوديه قايمه على العرق - النسب يعني - كلهم بينتموا لاسرائيل لانها بحسب التوراه ارض الميعاد. تلاقيه ملحد اصلاً ويقولك اسرائيل / فلسطين اياً كان اسمها بالنسبه لهم بتاعتنا.
في بني ادم محترم في القرن الواحد والعشرين يقف يقول اصنام. اصنام يا ابي ومش كفايه المصيبة ديه لا ده الناس استمخت قوي من الكلام ده وصقفوا. بيصقفوا على ايه؟ على خيبتهم. الاخوان رضينا او مرضيناش ليهم تأييد شعبي كبير وسط الجهله والدراويش ودول لابتوع ثقافه ولا تنوير ولا حرية ولا تقدم ولا نيله. دول بتوع الدنيا خربانه...يا عم خربانه
Love,
MishMish

WhItE HeArT said...

انا جاي اتخانق بأه

معلش كله يركن على جنب

انتي ياطنط آبي انزلي عايزك


انتي بتطلعي اشاعات عليا وتقولي اني نجحت ومارو كمان بيطلع اشاعات هتخلوني اعيط والله

انا نفسي انجح والله ادعولي مش تطلعوا اشاعات

وبعدين ايه الموضوع الطويل ده مقريتوش للآخر طبعا ده عايز له يوم بحاله ده انا لو قريته كله مش هقرى لحد تاني النهارده

بس اللي فهمته انها برضه تمثيلية الانتخابات

خلاص ياآبي الشعب بأه عارف كل حاجة بس ساكت سكوت هيقتلني

ساكت مش معناه انه مبيتكلمش لكن معناه انه مبيعملش واللي بيعمل بيتاخد سوري يعني على قفاه

تحياتي

حمادة زيدان said...

آبى هانم سيدة الخرفان الأولى

بصي يا ستي من يوم ما اتولدنا وأحنا لاقيين حزب واطي سوري وطني وقصادة أخوان مستهبلين سوري مسلمين والاتنين عاملين زي خرفانك كدة قعدين ينطحوا في بعض ... والشعب المصري بقي معرفش يبقي خروف وينطح معاهم واكتفى بدور المشاهد ... والله يا آبى لو قعدتي تنادي لسبع سنين جايين ولا حد هيسمعك صوتك هيبوظ عالفاضى

ملحوطة غير مرتبطة بالموضوع
أشتري سي دي لطيفة وانتى تعرفي بحبها ليه
سلاموز بقي

حبيبـــــــة القمـــــر said...

سلام عليكم
ازيك يا سكر
كالعاده موضوع جامد جدا وكلام في المليان
بس اقولك حاجه من غير زعل
مفيش منه فايده


رغم اننا كنا شعب مميز جدا
و قدرنا نحافظ على هويتنا ولغتنا وقت الاستعمار الطويل
دا غير ان عندنا خير اجناد الارض
وان بلدنا بلد امن وامان والكلام الكبير دا

بس فعلا مفيش فايده

يمكن مستنيين ازمة ومصيبه كبيرة اوووووى تحصل عشان يظهر فينا قائد بجد نمشي وراه ونسانده
لكن لحد ما المعجزة دي تتحقق هقولك مفيش فايده
هنفضل نتخبط و نتكلم ونعترض ونشجب و....
بدون نتيجه

اقولك نكته بمناسبة الكآبه والاحباط اللي قلته
انا انضميت للحزب الوطني وحلمت اني اكون من شباب الجيل بجد وفضلت عايشه في الوهم
لحد مابدأت اعمل اول حركه صح ونزلت من عالم الاحلام لأرض الواقع وبدأت انقل التسيب والاهمال الحاصل في احد المستشفيات
واكتشفت ان المسئول عن التسيب عضو مهم في الحزب
والنتيجه انه قاللي برافو انتي كده تمام ومن هنا يجي التغيير
وصدقت ......
واستنى ياحبيبتي التغير هنا يجي هنا يجي بس اكتشفت انه تاه في السكه
وسيبت الحزب و قعدت فترة ادور على ناس ممكن اصدقها لكن للاسف مفيش فايده

مواطن مصري said...

صبح صبح يا عم الحج النهاردة الصباحا الساعة ونصف الظهر

اولا انا لاعاوز اخون ولا عاوز وثني


و بعدين الانتخبات الان ملهاش لازمة

المفروض ان يتم تشكيل مجلس القضاة الحر يشرف على الرئاسة لمدة سنتين يشكلو دستور جديد

و بعد كدة
يعملو انتخبات على نظافة

دي مورتانيا عملت كدة

أفندينا said...

المشكلة مش في الحزب الوطني ولا في الإخوان ولكن فينا أحنا ... أحنا شعب مش عارفين إزاى نتحكم ... ربنا يكون في عون صاحب العزبة ... شعب يستاهل فعلاٌ الضرب بالجزمة ... ثم أنتي وأمثالك من مثيري القلاقل والفتن في بر المحروسه عايزين إيه يعني من الراجل الكبير ، هو يقطع هدومه المستوردة عليكم يعني ويسيب مشكلة الننوس إللي عايز يخلفه من بعده بعد طوووووول العمر ؟؟؟؟؟ ههههههههههه
كيلو الجبنة التركي ( الرومي) وصل أربعين جنيه ...!!!! يعني قرب من سعر كيلو اللحمة ....... ولسه ياما حتشوفي يا مصر ........... سلاااااااام يا آبي

appy said...

Hu-man
==========

صح كده هو ده اللى بقوله منسبش الحمار ونشد فى البردعه على الاقل نورت يا هيومن





المنسى
=======

يا لهوى انت ما صدقت وقعدت تكتب
صدقنى فيه حلول كتير بس المشكله ان المجتمع ده مقفول عليك وعليا قولى ازاى نجمع بعض ونقف ايد واحدة بصراحه دى خطوة ببحثها ونفسى فيها ويا ريت اقدر اعملها ومن النقطه الصغيره نقدر نعمل حاجات كبيره كتير دور وقولى نورت يا منسى

appy said...

Migo Mishmish
==============
ههههههههههههههه هو ده اللى مضايقك الله يخرب بيته اصنام ايه صحيح اللى بيقول عليها يمكن يا بنتى كان بيخطب ايام الجاهليه ولا شايف ابو لهب قدامه ههههههههههه
اه عارفه ان لهم شعبيه بس مع تضارب الاوضاع دلوقتى بتاعتهم اعتقد قلت ودول شويه مهللتيه وبس موضع ان الصورة تختفى لوحدها عارفها انها مش هتختفى مرة واحده بس على الاقل هتبدأ تتلاشى واحنا نقدر نحكم
سعيده بحوارك يا قمر ومنورانى دايما وابىق شوفى الموضوع اللى عندك وقولت لكى عليه






القلب الابيض
==============
وا انت نزل ايدك لو سمحت من غير ضرب والله ماروو اللى قالى طيب دى بشره خير يا رب تنجح يا رب
وابعدى اقعد هنا الموضوع مش طويل الموضوع بسيط بس افهمه نورت الكوكب

appy said...

حماده زيدان
==========
عارفه يا كاتب موقفك بس اللى بحترمه فيك مش شاغل نفسك بيهم وهو ده اللى بقول عليه يعنى لفتره على الاقل وحاتر يا زيدوس هسمع الاغانى عويناتى انا ليه بكرة وخيط الا انت نورت يا كاتب





حبيبه القمر
==========
استغفر الله العظيم يا رب طيب يا بنتى توبى بقى واتوضى وصلى ركعتين حزن وتنى حررررررررررام انا عملتها قبلك بس توبت بس انا خدتها من قاصرها من على الباب لقيت مينفعش يا اوختى خالص
انا بفكر اعمل حزب اسمه الحزب الخرفانى تنضمى ههههههههههههه نورتى يا قمر

mohamed elkayal said...

الرد على ردك على Vague

بصي يا ابي ... الاخطاء بتاعتهم ممكن تكون على المستوى الشخصي... يعني واحد يغلط وهما مش موافقين على كده

انما اخطائهم كجماعة نادرة

تحياتي

محمد جمال (صاحب عطوة)

appy said...

مواطن مصرى
===========
اهلا بيك صباحه فل وياسمين يا عم الحاج
معندناش مانع يتعمل اللى يتعمل بس ينفع ويحصل
ومورتنيا دى عدت معاها بس انا سامعه النهادره انهم معندهمش معارضه يعنى لموا من كل الناس وعملوا حزب واحد لما نشوف النهايه
نورت الكوكب







افندينا
==========
والله يا فندم بنقدم الاعتذارات عن ما فعلناه فى عبايات ابو جمالات ومكنش قصدونا خالص افندم
لحمه لحمه استغفر الله العظيم ايه بس الحاجات دى يا راجل عيب انت ازاى تقول الالفاظ دى انت مش عارف انى بمنع الشتومه فى الكوكب طيب اورى وشى ازاى لخرفانى دلوقتى
يالا علشان اول مرة تشرفنى بس نورت الدنيا

appy said...

mohamed elkayal
=================
اهلا بيك وشرفت معنديش مشكله خالص ان اخطائهم نادرة بس ازاى والقرارات المتضاربه دى معناها ايه وموضوع لما وقفوا ضد طلعت السادات فى المجلس بسبب انه قدم استجواب علشان تشرد 4000 اسرة علشان هما كانوا محتجين
على القرار ضد زميلهم
يبقى هنا بيدورا على مصلحه مين موقفهم فى المجلس ولا الشعب
بص انت بتدلفع ومش عارفه ليه وبعدين لما تبقى جماعه قويه غلطه الفرد من غلطه الجماعه وده المفروض يعنى
بس شوفت انت جرجرتينى لفين وانا رافضه ده اصلا انا بقول نجنب ده مين وايه دلوقتى ونقف ضد الكبير واقرى كلامى اللى فى البوست كله وافهمه وقولى رايك بعيد عن الدفاع عنها علشان تفهم وجهه نظرى
حتى لو انا ضد حاجه دلوقتى يبقى لازم اوحد كلمه علشان نقف ضد الاكبر قهمت اللى بدور عليه
وبعدين يا سيدى اخطأ فرديه ولا مش فرديه مش هتهمنى فى حاجه الاكتر ايه اللى بيتعمل للناس
ميرسى على وجودك ونورت الكوكب كله اول مرة واتمنى تبقى تانى

المنسى said...

هسسسسسسسسسسس
أنا جيت
بس من غير تريقة
إيه رأيكم نعمل حزب للمدونين
إيه رايكم فى موضوع عندمارو أقروه عايزين يعملو رقابه على الفيس بوك والمدونات نقول لأ بس مش هنكتف بالكلام
نعمل مسيرة سلمية
أو وقفة إحتجاجية
ممكن يكون فيها أعتقال وماله بس هنغير
أكيد هنغير
أيه رأيكم فيه موضوع عندى إقروه
ونشوف ممكن نبدأ نشتغل فيه إزاى
على مدونة ناا وصاحبى فيى موضوع بتاع مناقشة منظومة التعليم فى مصر وممكن نعمل إيه عشان نعدل التعليم الكتابة والكلام مش كفاية
وإللى زينا مفيش فى أيده غير إنه يسجل إعتراضه ننز الشارع
نعمل وقفات إحتجااجية على أى حاجة مش عجبانة
نظام تعليم
مشروع قانون الفقى
أى حاجة
نتكلم ونعبر مش بس من خلال المدونة
وهنلاقى ميت ألف واحد يساندونا
والمجتمع إللى مقفول نفتحه ونشوف أخره فين وأوله منين

نشوف الناس إللى بتحب مصر بس كل واحد بيشتغل فى حتة نلمهم كلهم
نقعد
نتكلم
نتناقش
نشوف ]ه إللى ممكن نعملو ينجز حاجة إن شاالله يكون بعيد عن الحكومة
غحنا مش عايزين منهم حاجة
نشوف الناس إللى على شاكلة طلعت السادت وفهمى هويدى وقادة كفاية
والناس إللى بجد بتعمل لصالح البلد ونطط كلنا إيدينا فى أيين بعض
وخلينا فاكرين
أيد لوحدها متسقفش
تعالو كلنا نشتغل فى مكان واحد
فى مثلا على الفيس بوك عشرميت جروب بيتكلم عن الغاز أو الصلاة
أو رمضان
أو ماإلى ذلك
مبالكم لو كل 70 80 جروب بيتكلموا فى حاجة
يوحدا نشاطهم ويعملو جروب واحد
ويحددوا هدف يخرجهم من على صفحات النت
ويجمعهم على أرض الواقع
من خلال الجمعيات والمنظمات
صدقونى هنقدر نعمل حاجة
مستنى ردك وتفكيرك يابتنجانى

محمد فوزي said...

انا شايف من خلال التعليقات إن ناس كتير مقتنعه إننا لو عرفنا نغير اللي مش عاجبنا مره هنعرف نغيره على طول وعشان كده هو ده اللي بيخليني أركز إنتقادي على الناس أنفسهم على السلوكيات الغلط على السلبيه والهمجيه والفهلوه وووو

ومن هنا برده انا شايف إن الحل يكمن في المشاركه في العمليه الإنتخابيه يا جماعه لو مش هنقدر ننتخب اللي احنا عايزينه المره دي على الأقل هنجبر الحكومه إنها تحترمنا , تحترم إرادة الناس اللي هتكون إتعودت خلاص على المشاركه بأعداد كبيره وساعتها محدش يقدر يمنعها

حبيبـــــــة القمـــــر said...

ياحبيبتي المشكله مش في عمايله دا اسهل من صينيه البطاطس بس المهم في الاخر الطعم مش يبقى منظر عالفاضي واخده بالك انتي
بس عموما اعمليها وانا معاكي

NIDAAL PAL said...

زنهار آآآآبى هانم بتنجانى
زانهار اسود _ انتى مختلفة مع الاخوان
يبقى اهدروا دمك
و مختلفة مع الوتنى _ يبقى بيتعملك جواب اعتقال
و مش عاجباكى المعارضة _ يبقى ركبى رادار دفاع جوى فوق البيت علشان الصواريخ وكدة
............
اساساً انا مش بعترف سياسياً لا بوتنى ولا بأخوان و لا بغد ولا بأمس
لان دول كلهم القيادات فيهم ليهم مصالح شخصية بتقدمها على حساب المصالح العامة مش هقولك للشعب ولكن المصالح العامة لاعضاء الحزب نفسه
و بالنسبة للانتخابات فى مصر بتفكرنى
بطريقة حاورينى يا كيكا و حاورينى يا عفريتة . ما بتعرفى مين الى صح و مين الى غلط و كل ده بسبب الترابيزة و الى بيحصل تحتها . احنا نقلب عليهم الترابيزة
ونعمل زى الحتة الى دخلت دماغى اوى
لا الرقاصه هتبطل رقص ولا الطبال هيبطل تطبيل الا اذا هدينا الكباريه على دماغتهم
.....
بقولك ايه يا آآآبى هو الكلام ده كله بيتعارض مع وثيقة تنظيم الانترزفت الجديدة دى .. يعنى علشان نحضر شنطنا كدة بالصلى عالنبى و يدخل الواحد السجن بعد كدة و يقولوا له تهمتك ايه يقولهم فاتح بلوجر على الناصية بدون ترخيص و متهرب من كتابة البروفايل
انتى حاسة بيااااااا ... هنفجر من الفقى

تحياتى
نضال

حـــــدوتـــــة said...

السلام عليكم

الله ينور عليكى ده الكلام الموزون
فى ناس وهبت حياتها فى كره الاخوان
وفى مدونات مبتعملش حاجة فى الدنيا غير الشتيمة فى الاخوان والحجاب والنقاب
انا مش اخوان ومبحبهمش بس ده ميمنعش انهم موجودين وليهم دور ومن حقهم يحلموا بالحكم ذى اى حد
احنا نختارهم او لأ ده موضوع تانى

اما بالنسبة لموضوع الحكومة
فالحية تفسد من رئسها
المطلوب تغيير السيد محمد حسنى مبارك
اى حاجة غير كدة تبقى ضحك على الدقون

سلالالالالالالالالالالالالالالالالالالالالالالالالام

همس الاحباب said...

ههههههه
بصراحة ليه نص ساعة مش عارف اعلق
ولا اقول حاجة
غير سمعنى اغنية بودعك
تحياتى

Abo 7anf said...

السلام عليكم
ازيك ياابى
انا معاكى تماما
فعلا مينفعش نجيب حد يعبر عن رأينا
ولا أخوان ولاغيره
بس للأسف الناس مش مدركه قيمه صوتها
و سبحان الله بفى عندنا أعلام بيحول أهتمام الناس بطريقه غريبه
ويقدر يشغلهم واحنا بنتقبل كدا
و بنمشى وراهم
و يصوروا لينا اننا كدا فل و الحياه ملبن وعمرها مهتبقى احسن من كدا
خلاف بقى البيفكروا دول خايفين على مستقبلهم وعيالهم
من البهدله و الحبس وخلافوا
و البيكملوا بيطلعوا يلاقوا الناس منفضه ليهم
وهما البتهدلوا علشنهم
المسئله معقده
لا لا
الكتاب اسهل
اقوم اذاكر

خايف من الحقيقة said...

ابي الغالية
شكرا
بجد على اهتمامك وتشجيعك
بس
الشكر مش كفاية
وانا مش ناسي اكلة السمك
استعدي
انا جاي مصر قريب
جدا
تحياتي

محمد الكومي said...

شوفي يا ابي انا اصلا من سكان دائرة الرمل يعني بعيد عن دائرة بحري كدة زي من مدينة نصر و قصر النيل او ممكن المهندسين

دايرة الرمل دي بقى هي اشهر الدوائر اللي شهدت تزوير علني في الانتخابات ضد الاخوان لصالح الحزن الواطي الديمقراطي

و برضه شهدت احداث عنف متبادل و ركزي اوي على كلمة متبادل دي

ركزي جدا لان اتوبيسات البلطجية كانت من الناحيتين

انا شخصيا ايامها كنت بدرس في جامعة المنصورة و مروح بيتنا فضلت برة المنطقة عالشارع الرئيسي
شارع احمد ابوسليمان
اكتر من 11 ساعة لحد ما عرفت ادخل بيتنا

ان عديت من الامن افندية الاخوان يبقوا مفكرينني دسيسة من الحكومة

ما سبق بالمناسبة يدل على اني ارفض التزوير حتى لو ضد الشيطان

و ارفض ايضا البلطجة حتى لو جائت من محراب المساجد و المعابد و الكنائس

اوكي

نيجي للمهم

فعلا حصل تزوير

و فعلا الصناديق اتقفلت من الصباح الباكر

و فعلا الاخوان ليهم حق

و لكن ايه اللي اكدلهم انهم كانوا هينجحوا و ده على فكرة ماينفيش حقهم في الدفاع عن نفسهم

موقف الاخوان في انتخابات اول امبارح هو نفس موقفهم في انتخابات الاعادة في دائرتنا في 2002 بعد احداث مشابهة

و هو ما يعني غياب الرؤية السياسية و التصعيد باي شكل مع النظام

2002 كانوا داخلين و حمتاكدين انهم في جميع الاحوال خسرانين

و المرة دي برضه كدة

و في المرتين اتصرفت فلوس كتير جدا في الدعاية

يا ابي و الله العظيم كان في يفط في دايرتنا اليافطة الواحدة تكلفتها اكتر من 200 جنيه باسعار سنة 2002

ده في الوقت اللي دايرة الرمل بتضم افقر احياء اسكندرية

كمان الاخوان ما غيروش كتير في مجلس الشعب
و مافيش اي مكاسب سياسية ليهم غير التواجد و اللي كان موجود قبل ما يدخلوا المجلس
يعني مش مجلس الشعب اللي اداهم التواجد

الاخوان بالمناسبة موجودين في افقر الاحياء و هي كتيرة بالمناسبة و الدليل انهم سقطوا في الاحياء الراقية او ما قدروش ياخدوا الكرسيين

احب اهديلهم قصة سيدنا عثمان ابن عثمان حين اختار ان يجود بروحه و يضحي بها حتى لا تسود الفتنة في الامة

من يوم ما الاخوان اخدوا ال 8 مقاعد في اسكندرية و المدينة بتتعاقب حالتها من اسوا الى اسوا

الشوارع باظت

الاتوبيسات غليت جدا

تخيلي لو كنتي بتركبي اتوبيس نقل عام ثمن تذكرته 25 او 35 قرش انهاردة بجنيه على الاقل و لنفس المسافات

فرص العمل باظت

اسكندرية اللي كان الخلق بيهجوا ليها في الصيف دلوقتي مافيهاش شغل

نظرة سياسية و اجتماعية مشتركة

كانت تفرض عليهم عدم التصعيد لمصلحة ابناء هذه المدينة

المدينة التي كانت اول مدينة تحصل على الدقيق من المراكب صارت الان يا دوبك فيها احتياطي دقيق اسبوع باسبوع

احلى رغيفعيش كان في اسكندرية
دلوقتي اتفرجوا
المدينة اللي ماكانش فيها طوابير

دلوقتي كل حاجة بالطوابير

ما سبق ليس دعوة مني لهم برفع الراية البيضاءامام هذا النظام الفاسد فمحاربته واجبة

و لكن فقط دعوة للمحاربة السليمة

هل كان المقعدان سيحولان الاخوان الى اغلبية


هل ممارسات النظام فضحت امس فقط

النظام طول عمره مفضوح

ابي سوري اني طولت بس و الله انا ممكن اكتب اكتر و اكتر لان الناس في اسكندرية حقيقي مخنوقة خلاص

و اذا كان فعلا وجدت ارضية لا باس بها للاخوان في اسكندرية لا ينكرها الا اعمى او اصم او ميت لا يدري بالاحوال

فاتضح الان انها كانت برقة امل في التخلص من النظام و قطف الاخوان ثمار هذه الحركة

و لكنهم يجب ان يتذكروا الاغلبية الصامتة التي تبلغ اكتر من 77 %
من هذا الشعب و يدركوا انهم لم يعطزهم اصواتهم و لم يكونوا يعطوها و الا فماذا منهعهم من الذهاب لصناديق الانتخاب

و في النهاية لو احنا غلط ربنا يهدينا للصح و لو هما الصح ربنا يوفقهم

سوري كتير للاطالة

محمود المصرى said...

بسم الله الرحمن الرحيم

كلام جميل كلام معقول اقدر اقول عنه كام حاجة .
اولا بالنسبة للاعتراض على ثنائية المنافسة السياسية فى مصر بين الاخوان والحزن الوثنى , هذه الثنائية موجودة فى اكتر من دولة اشهرها امريكا طبعا , لكن هذه الثنائية فى حقيقتها ليست ثنائية حزبية , يعنى مش حزب وحركة هما اللى مسيطرين على الحياة السياسية , لكن هى ثنائية الحكم والمعارضة , يعنى الحزب الوطنى يمثل السلطة الحاكمة والاخوان تمثل قوة المعارضة الوحيدة القادرة على تقديم التضحيات والاستمرار فى المواجهة مع هذه السلطة متحملة الخسائر المادية والمعنوية بل والبشرية ايضا , فالناس اما موالية للحكم واما معارضة له , لو موالية ليه يبقى هاتختار الحزب الوطنى ولو معارضة ليه هاتختار القوة الوحيدة التى تصلح ان تكون قوة معارضة .
ثانيا بالنسبة لمسألة السعى نحو مصلحة او دهان العربية دوكو او النزاع على المكلية فدا كله يغفل حقيقة مهمة الا وهى ان الاخوان المسلمين بدأت كدعوة وليست كتنظيم , وهذه الدعوة تمثل فكر متكامل يحمل رسالة اعادة دولة الخلافة وحاكمية الشريعة وتطبيق القران , وحتى لو كان لبعض المنتسبين للجماعة مصالح او اطماع ذاتية من وراء انتسابهم لها فالسؤال الاهم هل تم مصادرة هذه الجماعة لصالح شخص او فئة تسعى لمصلحتها الذاتية ام ان التحرك الاساسى للجماعة هو خادم للرسالة الاولى التى نشأت عليها الجماعة ؟
ثالثا التبريرات التى يسوقها البعض تجاه رفضهم للاخوان هى مبررات ظاهرية تخفى وراءها امور اخرى لا ندعى اننا نرى عبر سجف الغيب ونعلمها , لكن بصراحة كلها حجج لا تستقيم والمنطق السليم , وعموما ربنا اعلم بالنوايا .
تحياتى

أحمد كمال said...

للأسف كنت كاتب رد مفتكس لكن طار ..

لكن بصي أنا حاجيب لك من الآخر لأنك حطيتي إيديك على الجرح المفتوح في قلوبنا و ماحدش بيحاول يعالجه ، بصراحة مافيش ناس كتير عندها استعداد إنها تضحي و لو بأقل حاجة علشان البلد دي ، و بصراحة أكتر و لا حتى علشان نفسها ، منتظرين حل معجزة ، و بندعي الظالمين ربنا ياخدهم من عنده ، و بالتالي مش بنفهم عقلية اللي بيضحي بحياته علشان قضية أو بيصرف آخر مليم عنده علشان يكشف الظلم و يفهم الناس الحقيقة .

أسهل حاجة إن كل واحد يتهم و يفتي ، و يقول ده صح و ده غلط ، لكن مابيقولش هو عم العريف عمل إيه علشان أي حاجة .

أنا ممكن أختلف مع ناس كتير في أفكارهم ، لكن ماقدرش أمنع نفسي أحترم حد يجاهد و يضحي في سبيل اللي بيؤمن بيه ، في الوقت اللي الباقي بيطاطي و بيستعجب هم بيعملوا كده ليه .

من الآخر كده إن الله لا يغير ما بقوم حتى يغيروا ما بأنفسهم ، و اللي مش مستعد يتعب و يكافح مايستاهلش يدوس على ترابها .

عروسة ننوسة said...

ايه الكلام الجامد ده؟؟

عمرو (مواطن مصرى) said...

إعتراضك على الإخوان سياسى , طيب وهل فى نوع تانى من الإعتراض؟؟!!

ا|لإخوان يا أستاذة اللى يكلموكى سياسة , وفى النص يقوم هابدك حديث نبوى ولا آية قرآنية علشان تسلمى نمر فى النقاش وتقوليله انت صح,,

أما يلبس السياسة عباية الدين دى فعلا لعبتهم من يوم ما نشأت جماعتهم الميمونة... مش اتهام يعنى ولا حاجة...
مرة يقولوا احنا بتوع دعوة ودين وتلاقيهم بعد كده فى الانتخابات والسياسة..و على المواطنين حل اللغز الخالد هو دين ولا سياسة؟؟

_ وماحدش قال انك ربنا اللى هيحاسبهم, بس فى السياسة يا أستاذة آبى ,,المواطن له الحق يحاسب أى شخص يمارس العمل السياسى , ودول ماشاء الله موجودين فى كل حاجة مجلس شعب ونقابات وجمعيات أهلية, يعنى منتشرين .. يبقى من حق المواطن يسأل ويحاسب ,,

وبرضه بتتكلمى عن حالة وصولهم للحكم برومانسية أوىD:

أبقى شوفى أى دولة وصل فيها تيار دينىللحكم ووصلت لفين؟؟
مش عارف بتتكلمى فى جزئية مفيش إكراه فى الدين على لسانك انتى ولا لسان التيارات الدينية ؟؟

الكلام النظرى غير التطبيق العملى خالص,,, أه مفيش إكراه فى الدين لكن فى مليون إكراه فى السياسة ,,

وفى مليون حجة دينية برضه تخللى اى حاكم يعطل آية (لا إكراه فى الدين)..

الفرق بين الحكومة والإخوان مش بعيد, الحكومة لو إعتقلتك هيتهموكى بالعمالة وعدوة الوطن ودى فيها شوية تعذيب وحكم بالحبس أو قرار بالإعتقال,,

الإخوان لو حكموا هيتهموكى إنك عدوة الله وعدوة حكم الله فى الأرض ودى فيها شنيور صغير يتبعه قطع رقبة أو إعدام ظريف...

تحياتى يا آبى

الفارس الملثم said...

بداية بالنسبه للاخوان ,انتي ممكن تلاقي فيهم ناس عندهم وعي وفكر بصوره مبهره حقيقي , وفي ناس منهم حطين كاوتشات اديداس في دماغهم ..

وطبعا انا زيي زي اغلب المصريين دلوقتي نفسهم يناموا ويصحوا يلاقوا الحزب ولع باللي فيه , علي فكره المشكله مش كونه حزب سياسي اسوأ من الاحزان الكارتونيه التانيه , المشكله انه حزب السلطه في دوله ماشيه علي قانون ايموحتب ,فتلاقيه ملجأ كل النفعيين والفاسدين ,انتي عارفه في ناس معلوماتهم عن السياسه علي طريقة مسرحية المتزوجون " يا بخت من وفق راسين في الحلال " بيطلعوا كارنيه الحزب الوطني عشان ينفعهم لو في حاجه اتتفرق

سلامممممم يا ابي وسلميلي علي الخرفان

Sherif said...

أدعو لك أن يعطيكى الله القدرة على المواصلة والمثابرة

الوعى ربما كان موجودا .. لكن ماالجديد؟ كأنها فيلم مكرر للمرة الألف

سومه...مجنونه فى بلد عاقل said...

معلش يا ايبى انا مقصره معاكى ومع الكل اعزرونى...انا يا بنتى جنب الحيط انتى عارفه الواحد فاضله سنه وبعد كدا يقدم ورق تجنيد والجيش وعلى قفايا وحتمد مليش دعوه بالزيازه انتى حره انتى خلصتى جيشك من زومان
سلام

فزلوكة said...

إيه دا
أنا جيت متأخر أوى كدا
بصى يا ستى
فى البداية بس أسجل إعجابى بدماغك الجامدة دى وبالذات الملحوظة الأخيرة

فى قاعدة عامة كدا بتقولك لما تغلى المية حطلها فتحات
ودا إللى حكومتنا الموقرة بتعملوا

موقف الإخوان , فى رأيي بتكون المشاركة إحراج للحكومة
بمعنى إنهم صحيح بيبقوا عارفين إن الإنتخابات هتتزور لكن لأى درجة دا إللى بيختلف
إللى بيحصل إنهم بينسحبوا فضحا للممارسات إللى بترتكبها الحكومة

تعرفى يا آبى
أنا نفسى ألاقى حياة مصرية مختلفة
عارفة أيام زمان لما كانوا بيجوا فى المسلسلات ويتناقشوا فى أحوال البلد بثقافة ووعى عالى
ياريت دا يرجع تانى
حالنا هيتغير كتيييير

زفته وقطران said...

بصرف النظر عن اني مصره انك حتودينا ورا الشمس
بس مش مشكله
كده كده باظت
بصي ياابي
انا مشكلتي الوحيده
ان مفيش حد منهم ايا كان اتجاهه ايه
مفيش حد عاوز مصلحه البلد
كله عاوز مصلحته الشخصيه
اهم حاجه
ادخلي كده المدونه نوريني
واختاريلك تاج من الموجودين

appy said...

المنسى
=====

فكرة الحزب مش هعمله مدونين لانى هحتاج ناس كبيره بجد وشباب واعى وانا اكتشفت ان فيه مدونين بس بيدونوا ومش فاهمين بس الفكرة قائمه من بدرى فى دماغى فعلا بس مش عارفه ابدأ ازاى هحاول لما ارتب الافكار وساعتها هتعرف
ميرسى لافكارك يا منسى





محمد فوزى
==========
انا معاك يا محمد والله فى الفكرة جدا بس المشكله فى الناس انهم لما يروحوا هيختاروا مين يا محمد اغلبيه اللى بيترشحوا شويه حرميه دلوقتى معندهمش نيه للاصلاح حدد ناس كويسه وانا اول واحده هروح وطبعا فكرتك كويسه
بس كلمه فى سرك انا اكتشفت انهم بيقولوا كلام وخلاص والحدق يفهم ههههههههههه

appy said...

حبيبه القمر
==========

والله وده اللى مخوفنى يا حبيبه ومنين تعلمى ان نيه الناس اللى معاكى كويسه مش مصالح شخصيه عاوزة عنيكى تبقى فى وسط راسك خلينى افكر فيها بجد الفكرة وبعدين اعرضها عليكوا





نضال
=====

تصدق يا نضال بجد انا زهقت من مصر كلها يا اخى دا انا والله لسه بقولك لواحد اخ يعنى انا يمكن بحاول اشوف الدنيا بمبى علشان اقدر اعيش فى مصر غير كده كان زمانى ولعت فى الفقى وفى مصر كمان ههههههههههههه
طيب بقولك ايه لو فهمت حاجه من بتاع الاعلام ده ابقى فهمنى انت عارف مخى على قدى فى الحركات دى خالص
او الاسهل اجهز مايوهاتى وعلى مارينا على طول تيجى هههههههههههههههه

appy said...

حدوته
=======
اهو انا مش غايظنى غير الناس دى عمالين تأخدوا كل قفا وشالوت والتانى من الحكومه وفى النهايه برضه ماسكين فى ايه والمصيبه ان دول نفسهم اللى يقولوا لك دا الناس طلعت القمر وانتم لسه بدوراو على شرعيه الحجاب طيب ارد اقولهم ايه بقى بزمتك هما الناس دى معندهاش مرايات بلا نيله
اما الحيه فلازم احنا اللى نسمها مش هى تسممنا زى ما بتعمل
نورت يا حدوايتتتتت






همس الاحباب
=============
ما ودعناه من بدرى يا ابو همس ازيك يا قمر نورت الكوكب تانى

appy said...

ابو حنف
=========
انا قولت من بدرى يا شوباب المذاكره احلى من لعبه البامياجيه السياسيه دى مش مصدقنى مش عيب كده عليكم ولا ايه ربنا معاك فى الاستمحانات يا قمر





خايف من الحقيقه
===============
ياااااااااا يااااااااا راجل الحمد لله انى اطمنت عليك انزل بس نطمن عليك والله مش عاوزة حاجه الحمد لله على سلامتك نورت الدنيا كلها والله مبسوطه قوووووووى

appy said...

محمد الكومى
===========
ايوون بعبع بقى يا خويا باللى عندك هو ده اللى عاوزة الناس تفهمه ان فيه تجاوزات من الناحيتين وفيه هجوم ودفاع يعنى مفيش حد برئ مش مهم الهجوم منين ولو ان الناحيتين بقى متربصين لبعض
وفعلا لو وجهوا الحاات دى للناس بدل المصاريف الشعبيه هتزيد بس هى لعبه بقت بتلعب مش صح ولعبه السياسه قذرة طول عمرها يا محمد ومش بتتلعب صح ابدا فى اى مكان وبقى قذرة اكتر فى مصر
بجد سعيده بتعليق وربنا يهدى الجميع







محمود المصرى
==========
هو انا عارفه لازم استفذك بحاجه علشان ترد يا محمود ههههههههههه
المهم سعيده انك رجعت لارض المعارك وقولنا الاختلاف فى البتنجان لا يفسد للمسقعه صينيه
نبتدى يا محمود حته حته مع انى مكنتش عاوزة احول الموضوع لدفاع وهجوم على الاخوان او الحزب انا رسالتى واضحه جدا ومجاش وقتها انك تتدافه او تهاجم
بس نتكلم علشان خاطرك



اولا يا محمود فى امريكا مش حزب دينى وحزب للدوله دى احزاب عاديه ها اللى بعده
محمود متنساش ان فيه احزاب تانيه هى المشكله والحسنه الوحيده اللى للاخوان تنظيمهم يعنى منظمين جدا وعددهم اكبر وده انا عارفاه كويس
لا يا محمود متقولش تضحيات تانى الله يخليك على كده بقى احنا ايه اه يمكن مش قادرين نواجهه بس شوف هما عايشين ازاى والناس العاديه الاخوان بضحى علشان مصلحه ليها والتضارب الاخير يا محمود واضح فى كل حاجه

خسائر ايه تانى قولنا مرميش نفسى فى طريق بغير ذكاء وبعدين اندم السلطه ممكن تحاربها من غير ما تمسك عليك حاجه
وبعدين انا مش معترفه ان دى القوه الوحيده هى شكلا بس يا محمود مش اكتر انما مفيش اى حاجه تانيه وبرضه انا مش هدخل فى الموضوع ده كتير انا مع الاخوان لو طلعوا ليهاجندا صح تتنفذ صح ويبقى استخدام صح للناس كلها والتنفيذ قبل الكلام يا محمود ساعتها اهلا وسهلا بيهم وبأى قوة تانيه ولو انى مش اظن
محمود الناس عندها اسباب انها مش شايفه حاجه عملى خالص خالص فاهمنى
وبعدين محمود الدين هو اللى بيعمل دوله متقدمه صح ده اللى انت بتقوله يبقى مش اقفل الدين على حاجات متواكبش العصر او الزمن انا معاك فى الدين بس يبقى يتطور مش يوظفوه على القديم واخيرا يا محمود يورونا عملى
ويا ريت احنا وهما نجتمع على تخليص البلد الاول وبعدين نبقى نشوف مين يستاهل انما دلوقتى انا مش شايفه حد يستاهل
نورت يا محمود وانضم يالا للحزب بتاعى لما افكر فيه علشان الاقى حد اشد فى شعره طول الوقت

appy said...

احمد كمال
==========
يبقى زى ما انا قولت كله مصالح شخصيه
يبقى كده لك واحد ليمون بقى عندى ههههههههه وبعدين طار ليه راح فين مش عارف هدور لك عليه ولو لقيته هرجعه نورت يا بشمهندس





عروسه ننوسه
=============
ميرسى نورتى الكوكب

appy said...

عمرو ..مواطن مصرى
==================

يا نهار ابيض ختمتها بشنيور يا عمرو اللهى تتكعبل فى حرف سجاده بيتكوا
نرد يا عمرو مع انك رديت على نفسك لما سالتنى وهقولك ازاى اصبر

فيه نوع تانى من الاعتراض يا عمرو موضوع الدين بيقولك بيفسروا كل حاجه على مزاجهم وبيستخدموا الدين لمش عارفه ايه يبقى ارد ساعتها اقول مليش دعوة انا ليه عقل ارد عليه وبص يا عمرو اى حد فى الدنيا لو جاب لك ايه قرانيه وانت اتكتمت قدامها وفعلا تفسيرها على الموقف يبقى موقف اللى قدامك صح
انما استخدامها فى لعبه حقيرة زى السياسه يبقى لا وبرضه لو هو غلط يبقى ارد عليه اعتراضى السياسى عليهم يا عمرو هو انى شايفه تصريحات متضاربه وبدأوا يلعبوا غلط ويلوشوا والمصلحه الشخصيه بدأت تظهر عليهم وده اعتراضى فهمتنى انما لو هما بيداروا ورا عبايه الدين خلاص ربنا عليهم بقى هعمل ايه انما اقدر اقف قدامهم فى السياسه وفى الدين علشان غلط انما مقولش اصلهم هيلبسونى الحجااب هيمنعوا الخمرة الله ايه الحجج الهبله دى لا انا افول هيدمروا اقتصاد بلد متمثل فى اى حاجه مش الكلام التانى فاهمنى وبعدين زى ما قولت معتقدش اغبيه والا ما هما شايفين التجارب دى فاشله فى كل الدول اللى بتستخدمها ازاى


بص يا عمرو متنساش ان احكام كتير من اللى ماشيين عليها زى الميراث وحاجات كتير من الدين فاهمنى يعنى متفصلش قوى بس مش انى ادخله فى كل حاجه مع ان لو دورت هتلاقى حياتنا كلها ماشيه عليه بس بتتوظف حسب كل عصر من اللى احنا ماشيين فيها وده اللى المفروض مش اعمل قالب جامد للدين يعنى زمان كان المواصلات الجمال دلوقتى طايرات فهمت يعنى الدين نزل لكل العصور ده بعيدا عن الاخوان انما لو قولبوه فى حته واحده يبقى لا واى حد يعمل كده يبقى هو متخلف ومش هينجح

اوك حاسبهم فى عملهم السياسى ولما يزنقك بايه قرانيه ازنقه بالتانيه لو هو غلط ويبقى هو الجانى على نفسه بس مع ان زنقتهم فى حاجات سياسيه كتيررررررررر

هههههههههههههه حلوه رومانسيه دى بجد انا لو مش رومانسيه مكنتش اتحملت علشان اسمك بس ههههههههههههههههه
بص يا عمرو انا عندى يقين مبقاش فيه شك ان زفت الطين مش هيسبها عارف الواحد اللى بيقول لابنه هطلعك القمر وهوعارف ان اصلا مفيش قمر هو ده قصدى هههههههههههههههه حاول تركز معايا اكتر علشان تفهم وفى النهايه يا عمرو ما هى مصر برضه ودى كلمه حق مش ماشيه بالدين وفيها انحلال وانقسامات واخلاق ضايعه فى شجرة
يا عمرو مصر كتير فيها مظاهر الدين وقلت اخلاقه بقينا اسوا من البلاد التانيه عارف حتى السعوديين ممسوكين وعندهم انحلال اخلاقى وبنقول علشان السيطرة بتاعت الوهابيين احنا معندناش ده وعندنا دعارة قد ايه ومخدرات واغتصابات وكل حاجه واحنا مجتمع مفتوح يبقى نحكم عقلنا مش عواطفنا عمرو شوفت حلقه الابراشى اللى مدرسه اغتصبت طفله فى حضانه مدرسه انثىىىىىىى يا عمرو يعنى عندنا انحلال الدين الناس مش بتعمل بيه فى كل الدنيا مش الاخوان بس دى كلها مظاهر يا رب تكون وجهه نظرى وصلت وفهمتها صح

بس فيه حته عاوزة اقولها مش الحكومه تتهنى بالعماله مصر بقت حاجه من اللى جاى لو انت مش اخوان تبقى امن الدوله ولو مش امن الدولهتبقى اخوان مصر مبقاش فيها ناس عاديه يا عمرو فهمتنى
ونورت الكوكب كله





الفارس الملثم
==============

اسكت يا محمد الحزن ده حاجه هم بجد طيب والله يا بنى متراقبين دول متخلفين عقليا
نورت يا محمد

appy said...

Sherif
=========
والله محتاجه الدعوات دى يا شريف كأنى بأذن وسط ناس طرش وكمان مش بيشوفوا
نورت يا شريف




سومه المجنونه
===========
جيش اه انا خلصته يا بنتى انا اللى عامله اغنيه انا طالع بكره على الجيش بتاعت وائل هههههههههه المهم وحشتينى يا نيله انتى

appy said...

فزلوكه
========
لا يا قمر انت تنور فى اى وقت بصى يا حبيبتى موضوع الاحراج ده انا معاكى فيه بس بزمتك بينى وبينك كده بيصرفوا قد ايه فى الحاجات دى ومين اولى بيهم لو هما يعنى مهتمين قوى بالناس مش يدوا للى محتاج
بصى هو فيه حلقه مفقوده وسيناريو بيتعمل مش فاهماه اجابته عند القيادات بس يا حبيبتى لو نقدر نوصل لهم
نورتى يا حبيبتى




زفته وقطران
============
انا هعمل حسب اسميه هباب الطين وتعالى معايا فيه ههههههههه ما هى الدنيا بقت مصالح يا حبيبتى
نورتى الكوكب

بنوتة said...

appy
----
ههههه
اول كلامك موزون على الميزان بتاع عم صبحي اللي في البقالة ههههههه
زي القهوة المظبوطة تماما
بس انا مش شايفة ان عندك خرفان و لا حاجة لأن كلامك كل صح طب لو حبوسونا في البيوت ازاي البنات ححتجوز اهنيكي على البوست الجميل و يارب تزوري مدونتي المتواضعة
تحياتي

لورنس العرب said...

الحكومه بتاعتنا ذكيه يا آبي
سايبه الناس تعمل اللي هي عوزاه عشان تظهر أمام الناس بمظهر الديمقراطيه
وفي نفس الوقت باقي الأحزاب عارفين الموضوع ده كويس جدا
وكل واحد واخد دوره
اللي مع الحكومه معاها- واللي بيعارض بيعارض
والجرايد بتتباع - والبرامج بتستضيف ناس في الفضائيات- والسبوبه شغاله على ودنه
ولله احنا اللي مضحوك علينا في القصه دي يا آبي

Migo Mishmish said...

صباح الفل يا ابي
انا جبت نمرة الراجل المسئول عن الست اللي انا كاتبه عنها في البوست الاخير
حاولي تبعتلي ايميل ولو حتى على ايميل المدونة بتاعي اللي هو
migomishmish@gamil.com
ابعتلي ايميل منك وانا ابعتلك فيه كل اللي انتي محتاجه وكلمي الراجل وشوفي تقدري تساعديها ازاي
Love,
MishMish

امل said...

السلام عليكم ورحمة الله
أنا هقول واعترف على كل حاجة أنا زماااان أيام الكلية مش من زمان قوي يعني ههههه كنت بشارك في الحاجات دي وعندي فكر سياسي وأصحابي يقولولي ملكيش دعوة بحاجة وأنا مفيش فايدة بس شوية شوية لما شفت ان فيه ناس بتقول شعارات وتحمس الآخرين ولما ييجي وقت التنفيذ ندور عليهم منلقيهومش - مش الكل طبعا - شوية شوية بقيت بكره السياسة قوي وبتخنق من الاحزاب - ماعدا حزب الاحلام ههههه - وبحس انها مجرد كلام وشعارات على الفاضي رأيي ان الاصلاح مفروض يبدأ من كل واحد فينا
تحياتي

Hosam Yahia حسام يحى said...

مستوايا بينزل خالص فى الترتيب

..............


انا لا ارى انا لا اسمع انا لا اتكلم

ده ردى
على البوست

:))

محمود المصرى said...

بسم الله الرحمن الرحيم

بالنسبة لمسألة عدم وجود حزب دينى فى امريكا فدا لم يكن قصدى لكن كان قصدى ان الثنائية السياسية ليست بالضرورة معبرة عن خلل فى العملية السياسية .
بالنسبة بقى للاخوان والتضحيات , لا احد ينكر ان الشعب كله يضحى يوميا ويدفع كل لحظة ثمن بقاء نظام الحكم , لكن انا قصدت ان الاخوان بين كل فصائل المعارضة تقدم تضحيات اثناء معارضتها لنظام الحكم ومواجهتهم معه , والتضحيات تتمثل فى الاعتقالات والاحكام العسكرية ومصادرة الاموال والمحاربة فى مصادر الرزق والنقل التعسفى فى الوظائف الحكومية والتضييق على المسافرين للخارج سواء للعبادات او للعمل , وغيرها من الاثمان التى تدفع ولا ينكرها احد .
بالنسبة لقولك ان الاخوان بيعملوا كده علشان مصلحتهم فأنا قلت فى المداخلة اللى فاتت انى لا انكر وجود اناس داخل جماعة الاخوان لهم مصالح شخصية وراء انضمامهم للجماعة لكن هل تم مصادرة الجماعة لصالح هذه الفئة ام لا؟ هو دا السؤال , يعنى الاخوان بيقدموا تضحيات علشان الزعيم بتاعهم ياخدله قرشين زيادة او يتعين وزير ولا محافظ ولا بيقدموا تضحيات علشان يحققوا مكاسب سياسية للجماعة ككل؟ لو الثانية فهذا يندرج تحت نصرة المنهج الذى يتبعه الاخوان , هما مش مطلوب منهم يضحوا علشان الشيوعيين يوصلوا للحكم او ان مصر يحكمها ليبراليون عالمانيون , اما بقى لو قلتى انهم المفروض يضحوا من اجل الناس العادية هاقول ما هو تضحيتهم فى سبيل نصرة منهجهم هى بالاساس غايتها نصرة الشعب المصرى واصلاح احواله .
اما موضوع ان الدين يواكب العصر فأنا افهم ان الدين هو اللى يحكم على العصر ويحكم على السلوكيات والمعاملات وكل شىء فى حياتنا مش ناخد من الدين اللى يوافق العصر , هنا النقطة , الا لو كان فى حد شايف ان الدين فيه حاجات ماتنفعش لزماننا دى قضية تانية .
ان شاء الله هانضم بس اشوف البرنامج واهم حاجة تكونى عملية عاوزين ناس عمليين مش بتوع كلام وبس .
تحياتى

عمرو (مواطن مصرى) said...

آبى
هم شايفين تجارب الدول التانية آه بس برضه أغبية, لأن سيادتك هم مايلزمهومش أى (صح أو خطأ) المهم الحكم,مش معنى انهم شايفين غيرهم وقع فى خطأ التجربة انه هيتلاشاها علشان خاطر وطنه, المهم الكرسى يدوم ,,.

أما تفسيرات القرآن فده موال كبير , والتفسيرات تحتمل جميع الأوجه, يعنى مافيش تفسير واحد علشان الناس تتبعه وخلاص, والا ماكنتيش شفتى كل الإختلافات والتضارات اللى احنا فيها دى,,
ولو دخلت التفسيرات والفتاوى أروقة الحكم هتبقى مهزلة...

ولما هو يدينى تفسير آية أرد عليه بتفسير آية يبقى الوضع إيه فى النهاية , مزيد من البلهة والتخلف,,

أما السعودية للى محكومة بالحديد والنار فبرضه فيها كل أنواع الانحلال الخلقى , واللى عاش هناك يحكيلك,,

وعموما مافيش أخلاق بتفرضها حكومات أو قوانين ,, الأخلاق فى النهاية قناعة شخصيةوإقتناع ,إن لم تأتى باقتناع تتحول إلى نفاق ...

تحياتى يا آبى

محمود المصرى said...

بسم الله الرحمن الرحيم

عمرو مواطن مصرى

ان الرجل لينطق بالكلمة من سخط الله لا يلقى لها بالا تهوى به فى النار سبعين خريفا

لما تقول ان دخول الايات القرانيةوالتفاسير فى اروقة الحكم مهزلة ومزيد من البله والتخلف دا كلام لا اظن انك تعى معناه فياريت ماتقولش كلام قبل ما تفكر فيه وياريت الناس تسيبها من التجرؤ والتطاول والاستهتار وتحاول تحترم نفسها وهى بتتكلم عن القران شوية .
انا اترك لصاحبة المدونة حرية التصرف مع هذاالكلام لأنى بصراحة مش عاوز اغلط فى ضيف من ضيوفها .

ňįĝŗő said...

إزيك يا آبي
أخبارك إيه ؟

يالنسبة لموضوعك
إممممممممممم

لأ مش هأعلق عليه
أصل أنا دماغي دلوقت في مرحلة النقاهة
و مفضيها من أي كلكعة
اتكلكعي انت لوحدك يا حبيبتي
بس حاسبي تتكعبلي


يلا سلام

غني يابهيه said...

يا نهار مش فايت ده انتى دوستى جامد
دوسي اه بس بالعقل

وعموما انا كمان ضد الاخوان فى حاجات كتيييير اوى
وده مش معناه ابدا ان انا مع الحزب الوطنى

سلامى وتحيات بهيه

عمرو (مواطن مصرى) said...

محمود المصرى

لو قيل قول يحتمل الكفر من مائة وجه ويحتمل الإيمان من وجه واحد لوجب أن يحمل على جانب الإيمان


يبدو أن مستوى فهمك وإدراكك لم يقدك جيدا لمعنى كلامى , لذلك لم تستطع أن تفهم ماقلته أنا هل هو بشأن القرآن أم بشأن الحكم؟؟!!,,

فما الذى أوحى لك بكونى أسخر من القرآن, ولم لم تتأنى قليلا قبل أن تصدر حكما أهوج على إيمان شخص مسلم؟؟


وأنا أعى تماما لما أقول وليس فيه ما يخالف عقيدتى أو إيمانى إلا فى تفكيرك المتواضع ..

و يبدو أنك تريد أن تقف متباهيا بإيمانك على حساب من حولك حتى لو كان من حولك مؤمنين أيضا وربما بشكل يفوقك
..


ولكن هذا ليس بغريب على من يحاول اثبات صحة وجهة نظره بالتشكيك فى إيمان الغير , فهى لعبة بدائية ربما تليق بفكرك....



ولكن هذا المستوى المتدنى من الإدراك ليس بغريب فى ظل فكر محدود يسعى الكثيرون لنشره على أنه إيماناوأخلاق كأخلاقك (السامية) الواضحة من اتهامى بالتطاول والاستهتار والتجروء على القرآن.!!..

أما تهديدك بانك لا تريد أن (تغلط) فيا, فهو سخف لا تعليق عليه
وأراك قد أحلت اوراقى إلى صاحبة المدونة لكى تقوم هى بالواجب لأنك لا تريد أن تغلط فى زوارها, بينما يمكنك أن تغلط فى مكان آخر!!

حقا إنها أخلاق سامية وغاية فى الرقى
وبناء عليه فأعتقد أنك وجهت لى حديث شريفا فى بداية حديثك من الواجب ان تتأمل فيه جيدا وتتدبر معناه وتحاول أن تربطه بما وجهته لى من اتهامات!!

محمود المصرى said...

بسم الله الرحمن الرحيم

يا ايها المعلم غيره الا لنفسك كان ذا التعليم
لا تنهين عن خلق وتأتى مثله عار عليك اذا فعلت عظيم
يبدو ان هناك فئة استمرأت الهجوم على الاسلام بصورة مستترة فلو انبرى واحد للرد قالوا انه تكفيرى ويطعن فى ايمانهم ويحكم عليهم , بينما انا لم اقل كلمة واحدة عن ايمانك او كفرك او اى شىء من هذا القبيل والحديث الذى ذكرته لا يحمل بأى وجه مسألة الايمان او الكفر , لكن طبعا علشان مايحطش نفسه فى موقع يلزمه باظهار حقيقة ما يقول يلجأ لهذا الاسلوب .
عموما يعنى انت بتقول ان مافيش تفسير واحد متفقين عليه , وكل تفسير ايه يمكن معارضته بتفير ايه اخرى , وهذا طبعا لا يقوله من عنده مثقال ذرة من علم , ايات القران فيها المحكم وفيها المتشابه , والمحكم ما لا خلاف على معناه اما المتشابه فلا نفتى فيه برأينا وكل واحد يجيب تفسير من بيتهم , لكن نرجع فيه الى الراسخين فى العلم كما اخبرنا الله , الحكاية مش هيصة ولا مزاد فى وكالة وانت تجيب ايه وانا اجيب ايه .
ولكن دعنا نتجاوز عن الفاظك الى النتيجة التى تريد الوصول اليها , هل ما اردت ان تصل اليه ان الحل فيما ظننته اشكالا متصورا هو تنحية الاسلام عن الحكم ؟ ان كان هذا هو استنتاجك فتلك اعظم من الاولى .
اما مسألة الاخلاق فأظن ان مكانتك ايا كانت لا تصل او حتى تدانى مكانة القران ولا ايه رأيك ؟

كيكى said...

عووووووووووووووووووو انا جيت اتخديتى
............................
ههههههههههههههههههه
هههههههههههههههههههههههه
يانهاااااااااااااااااااااار
مش ممكن
...........................
ربنا يستر ومنكش مترقبينا دلوقتى
هههههههههههههههههههههه
................................
بوستاتك عسسسسسسسسل وبجد موضيعك دايما فى الجون...
عوووووووووووووووووووووو

3ala asm masr said...

على فكره كلهم بيتخنقوا عشان كل واحد ياكل التورته لوحده مش عشان يصلح حاجه
وانا بردو مبحبش الاخوان لله فى لله كده من غير حاجه

عمرو (مواطن مصرى) said...

يتضح كل مدى من تعليقاتك مدى مستوى الضحالة واستمرار الاتهامات الجزافية
والواضح أنك تحفظها عن ظهر قلب حتى ولو لم تكن مناسبة للحدث,

بدأت كلامك بالشعر ولا أعلم أى خلق نهيت عنه وأتيت مثله!!

ورجاء راجعه لعلك أخطأت فى نقله!!

أراك تنفى إتهامى الذى ذكرته واضحا فى تعليقك السابق, رغم أنك قد أكدت عليه فى هذا التعليق , فى تناقض غريب

وهذا ماذكرته فى تعليك السابق لعلك لم تراه
(وياريت الناس تسيبها من التجرؤ والتطاول والاستهتار وتحاول تحترم نفسها وهى بتتكلم عن القران شوية )

هل تعتقد أن اتهامى بالتطاول على القرآن والإستهتار لا يعد إتهاما فى الإيمان؟!!!

ثم تقول فى تعليقك الأخير مايلى
(يبدو ان هناك فئة استمرأت الهجوم على الاسلام بصورة مستترة فلو انبرى واحد للرد قالوا انه تكفيرى ويطعن فى ايمانهم ويحكم عليهم ,)

وهل هذه الفئة التى تتطاول على الإسلام وأراك لماحا ذكيا فبلا أية أسانيد أو فهم قد استنتجت أنى من الفئة التى تتطاول على الإسلام!!..

من انت لكى توجه مثل هذا العبث إلى ؟؟
كون مستوى تفكيرك قد أوصلك إلى هذه الترهات فهذا مما يعيبك أنت لا مما يعينى أنا.. وغير مسموح لك مرة ثانية بتوجيه أية اتهامات سخيفة كالسابقة...

_وبعد كل الكلام السخيف الفائت أراك تحاول مناقشة تعليقى الأول والثانى قبل ردك , لكى تبدو فى ثوب المناقش ,,
إذا كنت تريد نقاشا لكنت إخترت ألفاظا طيبة وبدون توجيه اتهامات حمقاء,,وكان هذا مكانه الطبيعى أول تعليق..

ولكن ليس بعد أن تتهمنى فى عقيدتى وتوجه إلى حديثا نبويا بأن كلامى قد يرمينى فى النار سبعين خريفا, ثم تحاول أن تبدو فى ثوب المعتدل لكى تنهى أثر تعليقاتك الغير طيبة فى تعليقك السابق..

_ وكل مدى يظهر فى تعليقاتك أثر ضحالة الفكر, فأراك لم تفهم أى شىء من ردى على (آبى) وكل مافهمته هو مايناسب تفكيرك المتربص..

وأراك ترد على ماتريد متربصا بمعنى بعينه!!

اما بالنسبة للقرآن وخلقه ,فأنا لم أقارن خلقى بالقرآن والقرآن ليس فى مفاضلة مع أحد , إلا إذا كنت تعنى أنك والقرآن شيئا واحد,ولا أعلم ماذا تعنى بهذه الجملة..

_انت لا تدافع هنا عن القرآن لأن ليس هناك من يهاجمه أصلا إلا فى خيالك أنت..

يسيطر عليك التربص ولا أعلم صراحة لماذا؟
ولكنه للأسف طبيعة فكر منتشر بيننا !!!

محمود المصرى said...

بسم الله الرحمن الرحيم

مرة اخرى اؤكد انى لم اقل انك كافر او اطعن فى ايمان احد , بمعنى انى لا اطعن فى اصل الايمان , وقد يأتى احدا قولا او فعلا كفريا ويعذر بجهله , فانزال حكم الكفر على المعين يستلزم تحقق شروط وانتفاء موانع وهذا ليس من مهامى , ولكن يجب ان احكم على القول الكفرى بانه قول كفرى , وعلى الفعل الكفرى بأنه فعل كفرى بل ويجب على ان اؤمن بكفرية القول الكفرى والفعل الكفرى , فهذا من لوازم الايمان كأن اؤمن بكفرية القول بألوهية المسيح او اؤمن بكفرية تنحية الشرع او اؤمن بكفرية القول بأن دخول الايات القرانية او التفاسير اروقة الحكم هى من المهازل او انها تزيد البله والتخلف , فكل هذه الاقوال اؤمن بأنها لا تليق لكن لا احكم على قائلها بعينه فهمت الفرق ؟ اتمنى .
ولكن طبعا هذا اسلوب عهدناه فى المتجرئين ان يظهروا انفسهم مظهر الضحية المذبوحة بسيف التكفير رغم انى لم اذكر كلمة الكفر فى اى مداخلة سابقة لهذه المداخلة .
ولكن ان كنت انا لا اقدر على استخرج درر العلم الكامنة فى تعليقاتك السابقة فأتحفنا بما يمكن ان يعد تقوية للأيمان واعلاءا لكلمة الله فى اقوالك السابقة :
"ولو دخلت التفسيرات والفتاوى أروقة الحكم هتبقى مهزلة"
"ولما هو يدينى تفسير آية أرد عليه بتفسير آية يبقى الوضع إيه فى النهاية , مزيد من البلهة والتخلف,"

عمرو (مواطن مصرى) said...

مرة أخرى وأخيرة,,هذا الهراء المستمر فى نقل نفس المعنى بأساليب متعددة, هو استمرار لنفس الأسلوب السخيف وتوجيه نفس الإتهامات , لذا فهذا آخر رد لى قبح أسلوبك وسخفه..
فمثل هذا الكلام الذى نقلته لكى توضح لى أن كفرى كفر نطقت به كلماتى عن (جهل) منى أيها العالم ببواطن الأمور , وتعلمنى بما نقلته انت من مواقع الإنترنت بشأن التفرقة بين الكفر الشخصى ومقولات الكفر التى عددتها أنت كفرا,,

ثم ترجع وتقول أنك لم تتهمنى بالكفر , فى تخبط واضح منك !!

_وقد اوضحت لك كلمات فى تعليقى السابق ووضعتها لك بين أقواسا علك تراها ولكن يبدو أن عين الرضا عن كل عيب كليلة!!
وأراك تعيد تزيد فى نفيها فى كذب واضح وصريح..

_ثم ترجع وتذكر( ولكن طبعا هذا اسلوب عهدناه فى المتجرئين ان يظهروا انفسهم مظهر الضحية المذبوحة بسيف التكفير رغم انى لم اذكر كلمة الكفر فى اى مداخلة سابقة لهذه المداخلة )

ولك أقول هذا إتهام آخر صريح بالتجرؤ , التجرؤ على ماذا أيها النبيه؟؟
اوليس هذا إتهام جديد..

وأبشرك بأنى لا أتباكى ياعزيزى فالبكاء أتركه للذين ينوحون صباحا مساءا على حالهم وإضطهادهم!!
وأراك لست غريبا عن هؤلاء..

_وفى آخر كلماتك الراقية وجهت لى كلاما غاية فى السخافة حين تقول(ولكن ان كنت انا لا اقدر على استخرج درر العلم الكامنة فى تعليقاتك السابقة فأتحفنا بما يمكن ان يعد تقوية للأيمان واعلاءا لكلمة الله فى اقوالك السابقة )

ولسيادتك أقول لست فى حاجة لإثبات إيمانى أمامك , لا أعتقد بأن هناك وظيفة مهمتها إثبات إيمان الناس من عدمه,

وأيضا لاأنت ولا ألف متعجرف مثلك يستطيع انتزاع كلمات منى بغرض اثبات ايمانى, لأنك ببساطة شديدة ليس لك أى صفة تذكر وأعتقد أنه لن يكون لك أيها الانسان الفاضل..

يبدو انك تظن أنك سيف الله المسلول الذى يحاسب هذا او ذاك على الإيمان, ويريد دلالة على هذا الإيمان,,
حقا انك مثير للشفقة!!!

أما انك تفهم كلماتى على انها إيمانا او غير ذلك فتلك مشكلة عقلك القاصر الذى لا يستطيع أن يرى سوى كفرا وإيمانا , بل ويبالغ ويرى أن على من امامه ان يقدم له تأكيدا على إيمانه..


_ وأقول لك ثانية ماقلته فى تعليقى السابق بدأت كلماتك بتوجيه كلمات سخيفة واتهامات أسخف, ومنعت نفسك عن الغلط فى أيها المهذب الفاضل..

ثم تستمر فى توجيه اتهامات سخيفة , ثم تأتى لكى تسأل عن نقاش لست أهلا له..

وهناك العديد من النقاشات التى دارت بينى وبين أناس افاضل ربما يكونون فى نفس إطارك الفكرى دارت بيننا فى غاية الهدوء ودون أية تجاوزات أو اتهامات..
ولكنهم إلتزموا أدب الحوار, فاستمر الحوار بيننا لى مايرام دون حدوث مايسىء,

و عدم الر على أمثالك ممن يسيئون الأدب هو خير مايفعل الإنسان..
............................
أستاذة (آبى) آسف جدا على هذه المساجلة التى تمت دون أن أستأذنك ورجاء اعتبريها من باب العشم..

تقبلى شكرى وتحياتى وإعتذارى أيضا

ahmed_k said...

هي محاولة التغيير لوحدها شيئ كويس
بس ليه ميكونش في مصر فكر حر بمعني
ايه يمنع شخص ينتمي لحزب معين ويكون معارض لبعض توجهات حزبه
يعني المجالس النيابيه بنلاحظ ان اعضاء الوطني علي قلب رجل واحد يقولوا نعم لأي قرار صادر من الحكومه حتى لو فيه اضرار بمصالحهم الشخصيه
ارد علي نفسي وأقول مش معظمهم جاي بالتزوير
طيب في ناس من الوطني ونجحوا فعلا بأصواتهم
ليه هؤلاء ميكونش ليهم وقفه ضد كل ما هو فاسد في البلد
مقولش يغيروا الفساد الأداري
بس محاولة التغيير شرف لهم
واللي انهارده مجرد محاولات بكره حيكون تغيير فعلي لصالح هذا الشعب وهذه البلد
أحنا با اختي مشكلتنا الأكبر فينا كشعب

ان الله لا يغير ما بقوم حتي يغيروا ما بأنفسهم

محمود المصرى said...

بسم الله الرحمن الرحيم

يبدو انى اخطأت اذ ظننت فيك القدرة على الفهم , قلت لك يا هذا ان الحكم على القول بأنه كفرى شىء والحكم على قائله بالكفر شىء اخر , يارب يفهم .
لما كائن يقول ان التفاسير لو دخلت اروقة الحكم هاتبقى مهزلة ومزيد من البله والتخلف واحكم على هذا القول بحكم غير لما احكم على قائله بحكم اخر , وانا لا يعنينى ان كنت مسلم او ملحد او نصرانى او هندوسى او عالمانى او على اى ملة , لكن ما يهمنى هو توضيح حقيقة القول الذى خرج من فيك , حاول بس تستوعب النقطة دى رجاءا .
اما اتهامك لى بالكذب فهو مما يدل على انغلاق عقلك وعجزه عن فهم ما قلت رغم توضيحى المتكرر له ورغم وضوحه الشديد لكل ذى لب لكن هانقول ايه
قد تنكر العين ضوء الشمس من رمد وينكر الفم طعم الماء من سقم
اما ما ظننته وهما سعى منى لنقاش فيبدو انك خلطت بينها وبين الرغبة فى توضيح الكلام وتبسيطه لمن لا يستوعب , فالحوار ليست غاية فى ذاته انما هو وسيلة .
واحب ان اقول تجنبا لمراء لا طائل من ورائه انى لن اعلق على اى كلام تهرف به بعد ذلك فقد اوضحت فكرتى لمن ارار ان يفهم اما من أبى فتلك مشكلته هو .

أنا حر said...

متكلميش حد من الحزب الوطني تاي علشان متتعديش من غبائهم
تحياتي

سومه...مجنونه فى بلد عاقل said...

بنت يا ايبى اوعى تكونى اتقفشتى هههههههههه مستنياكى فى مدرسه البنات انا عدت تانى وبقولك باركيلى على اللاك توب حزنبل بتاعى
سومه_87

مصــــري..!! said...

آبي

الحزب الوطني معروف عنه كل حاجة وفروتة متقطعة علي كل لسان.
مع الأعتذار لخرفانك طبعاً.

بس انا شايف - رؤية - ان النعارضة التي تنادي بالديموقراطية لا تمارس الديموقراطية داخل مقارها.

والشعب ما بين شقي الرحي.

الشعب يثق في الأخوان لأنه يكره الحزب الوطني.

بوست رائع...وربنا يستر عليكي من قمل الدولة.

تحياتي
أسامة

الراقص مع الذئاب said...

السلام عليكم
والله موضوع الاحزاب والمسميات والكتل والأتجاهات بالنسبالي لا محل لها من الأعراب
اللي اعرفه ان فيه حاجة اسمها شريعة اسلامية ...هنحكم بيها هنسود الدنيا
مليش دعوه بقي هتبقي علي هوي مين ....أو ضد مين....مليش دعوة فلانة مش عاوزة تلبس الحجاب وعاوزة حزب يدعم موقها ويدلعها
مش عاوز اتكلم عن حزب معين او اتجاه معين
بس كلهم وجوه مختلفة لعملة وحدة
وهي لعبة السياسة القذرة

نهر الحب said...

ابى حبيبتى
بجد حبيبتى اولا انا فخورة جدا انى اتعرفت عليك واتمنى نكون اصحاب على طول
ثانيا طبعا دى مش اول زيارة لى هنا
اما بقى عن الحزن الوطنى والخزن الاخوانى رغم ان مفيش حزن اخوانى المهم يعنى الاتنين وحطيى عليهم التلات كمان مش بيفكروا بشكل جاد الا فى مصالحهم الشخصية واصلا لو حد فكر فى غير كدة على غير العادة يعنى فمكانه من مش مجلس الشعب ولا غيرة
المهم يعنى كلا منهم له شعاراتة اللى بتصفى على مفيش
ما عن الدين والحكم والحجاب
فزى ما قلتى لا اكراه فى الدين كمان مصر تخطت المسألة دى من زمان

عارفة مشكلتهم انهم بيسيبوا المشاكل الرئيسية ويمسكوا فى ذيول فرعية بلا نتيجة يعنى تتوهية او تغيب او اثارة نقاشات فى الهوا

بس خلاص يارب مكنيش خرجت عن النص لانى ساعات بشطح

دمتى بخير ابى

وينكى said...

هاهاهاااااااااااااااى
يا ست آبي كله هايطلع فى الغسيل
وطول ماحنا مكفينا البرسيم مش هانقول حاااااااااا
رشي شوية فليت عندك يا اوختشي
هاتطلع الملايات كلها وهاتتفرد مافيش بعد كده
يخرب بيت العته
الواحد يروح فين بس ياربي
انا جالى احباط خلاااااااااص
انا بازابورتى جاهز وهاطير على كنكا

صاحب المضيفة said...

تشبيهاتك رايقة قوي يا ابي بجد

وبعدين وانتي من امتى وانت بقيتي محللة سياسية يا ستي

على العموم رأيك جدير بالملاحظة والقراءة فعلا


ربنا يسعد أيامك يارب


تحياتي

نور said...

بصى يا ابى
هوا فعلا الحزن الوتنى عامل زى السوسه اللى عماله تنخور فى الخشب واحنا مش عارفين او مش عاوزين او مكسلين اننا نخلص منها فنقوم نعمل ايه زى ما قولتى نمسك فى الاخوان ونقول هيعملوا كذا وكذا دا على اساس ان الحزن ده او الحكومه هتسمح لحد برا شلتها يمسك البلد دا من رابع المستحيلات طبعا
هما عايزين يفضلوا ماسكين البلد و ماسكين اهلها فى ايدهم يتحكموا زى ما هما عايزين المفترض احنا طبعا نعمل حاجه نزحزح بيها جبال الهم دى بس اقول ايه بس مش عايزبن نجتمع على حاجه واحد كل واحد فى اتجاه والمصالح بتتصالح و كلوا يمشى نفسه
سلامى ليكى

appy said...

بنوته
=========
طيب ممكن اتنين كيلو حلاوة علشان كلامى ده ههههههههه شرفتى الكوكب ونورتيه يا قمر






لورانس العرب
==============
الكومه هى اللى سايقه من الاخر يا لورانس بس خلاص
نورت الكوكب وابقى قول كده للمعارضين اللى مصدعنا على الفاضى

appy said...

امـــــل
========
وهو ده يا حبيبه قلبى اللى بقوله عليه ونبطل نمسك لبعض على الواحده
نورتى يا قمر





حسام يحيى
=========
والله انت سكر وجبت من الاخر نورت يا سمسم

appy said...

محمود المصرى
=========
برضه والله يا محمود حولت الموضوع للى انا مش عاوزاه وقولت لك برضه مش هما لوحدهم اللى بيقابلوا تعسفات بس انا بحترم الاخوان فى حاجه وهى الظهور الاعلامى يعنى بأمانه عندهم توجهه اعلامى يجنن ملوش حل فبيظهر كل ده
وبعدين يا محمود بقى ده تعسف امال الناس اللى مش لاقيه تأكل ايه بس
على الاقل لما واحد من الاخوان بيقع الباقى بيقف جنبه انما الناس اللى فى السجون وبتقع وعاديه مفيش حد جنبها
عموما برضهمش عاوزه احول الموضوع وده غرضى من البدايه اننا دلوقتى فى مرحله الوقوف امام السطله القويه وهى زفت الطين اللى على قلبنا وبعدين نشوف مين يستاهل انما لو فضلنا فى صد رود عن جمايل الاخوان وبلاوى الحزن مش هنخلص ولا هنتقدم وفى النهايه الناس العاديه خسرانه يا محمود
محمود الدين يواكب العصر اقصد ان القرىن نزل لكل الاوقات فهمتنى يعنى نشبهها بحاجه علشان تفهم قصدى نزل فى القرآن السواك او عن السنه صح فاحنا دلوقتى اخرعنا بفضل من ربنا المعجون والفرشه فده مش هيتعارض مع الدين ولا ايه رأيك فهمت قصدى وبلاش تمسك ليه رشاش احسن ما اوجهه ليك هههههههههه
موضوع اتهم يسعوا علشان شيوعين ولا مش عارف ايه ده مش قصدته خالص بس تفتكر يا محمود الاخوان لو حد عادى خالص زى مثل اتجهه للحكم ومقدمه لهم كل الحاجات الكويسه اللى تتضمن للناس عيشه محترمه فى ظل الحياه هيوفقوا مأظنش يا محمود ده هدف وسياسه لعى مستوى العالم
بجد سعيده بمناقشتك وشكرا ليك







عمرو مواطن مصرى
================
بص يا عمور ده حاجه تانيه موضوع تفسيرات القرآن دى لانه واضح كون البعض بيوجهه زى ما هو عاوز وحسب اهوائها يبقى ساعتها اديله باللى فى رجلك بجد لان نص القرآن واضح قوى قوى
موضوع مهاترات وبلهه
اظن تقصد بيها الحوار صح ولا ايه يا عمرو هههههههههههههه
النبى حدد يا خويا الناس ما بتصدق انما اكيد متقصدش الحوار
عموما يا عمرو ده اللى بقوله علشان كده بقول نتوحد كلنا
عمرو سعييدة بوجودك هنا وهناك من غير ضرب

appy said...

محمود المصرى
==========
معلش يا محمود انت فهمت قصد عمرو غلط شويه لان عمرو اناعارفاه دبشه كده بس هو ميقصدش الفهم اللى وصلك ممكن التعبير خانه العبوا مع بعض يا اولاد متتخنقوش
وبعدين ايه هحيلوه لصاحبه المدونه على اساسا انا مفتى الكوكب اه صحيح وليه لا عادى يعنى
عموما انا طالبت تفسير من عمرو ولو انى فاهمه قصده لانى على طول بتخانق معاه ففاهمه مفردات كلامه
نورت يا محمود






نيجروووو
==========
حبيب قلبى النبى تعالى اقعد هنا انت وحشتنا خالص يا ابنى كده بتخلع من اختك شكراام يا نيجرو مردوده لك

appy said...

غنى يا بهيه
=========
والله شكلها هتزنق على صوابعينى نورت يا جميل





عمرو مواطن مصرى
=================
بالراحه يا عمرو برضه محمود ميقصدش العبوا مع بعض بدل ما اسيب خرفانى عليكوا انتم احتلتوا المدونه ولا ايه

appy said...

محمود المصرى
=============
يخرب بيت اللى يسيب لكم المدونة بتاعته هههههههههههههههه

بص يا محمود انت وعمرووووووووو

بجد اللى انتم فيه ده هو اللى انا قصدته انكم بتنقدوا وتدافعوا فى حاجات مش ضروريه دلوقتتى احنا عندنا حاجه اكبر افهموا القصد بقى اللى انا سعيت له
ولا اقولكم كلوا بعض انتم الاتنين ههههههههههههههه






كيكى
====
انا اتخضيت وبحب اطمنك اننا فعلا كده يا قلبى متراقبين هههههههههههههه

appy said...

3ala asm masr
================
مش مهم نحبهم ولا نكرهمه المهم احنا دلوقتى عاوزين حاجه ضد الاكبر وبعدين نشوف دول
نورتى يا هنوده





عمرووووووو مواطن زهقنى
=======================
بجد مستمتعه كده بحواركم يا عمرو علشان تعرفوا اللى انا قصدته اختلافكم بيؤدى لتفكك والله بضحك عليكم انتم الاتنين يالا كلوا بعض

appy said...

محمود المصرى
=============
انا مش فاهمه ايه وصل الموضوع للكفر بس ما علينا بما اننا بنتلكك لبعض






عمرو مواطن مصرى
=================
لا عادى يا عمرو المدونه مفتوحه لاى حد يتناقش فى اطار الموضوع وعلى فكرة محمود طيب وكويس جدا بس هو اختلافى عادى ما بينكم يعنى مواضيعه بتكون كويسه معلش قربوا وجهه النظر والبيت بيتك يا خويا ممكن بقى ربع جنيه حق الحبر هههههههههههههه

appy said...

ahmed_k
==========

بص اللى بيدخل الحزب مفقوووود اسالنى انا بجد بس فى المقابل بيسبوهم ساعات الكويسين يخدموا اهل ديرتهم يعنى بيتوقف على الشخص نفسه
نورت يا احمد




انا حر
========
والله بحب اتكلم علشان اضحك بس مش اكتر
نورت الكوكب

appy said...

سومه
====
لا يا حبيبى انا هنا ومبروك يا ام حزنبل
نورت بلوج سبوت تانى






مصرى
========
صح لانهم اساسا ميعرفوش غير مصالحهم وده اللى بقوله
نورت يا مصرى

appy said...

الراقص مع الذئاب
=================
اوجزت فأنجزت او العكس المهم هو ده الصح
ولاالهم ان الناس تتوحد على حاجه واحده لغايه لما يكون فيه حياه كويسه
نورت يا ح الظابط





نهر الحب
=========
والله انا اللى سعيده خالص بيكى يا قمر بجد واتبسطت قوى نورتى يا قمر

appy said...

وينكى
========
شوفيلى معاك كوبايه فى كنكا يا اوختشى والنبى ههههههههههه نورتى يا وينكى





صاحب المضيفه
=============
دى رايقه لا هما فى نظرى كده بجد مش اكتر ولا اقل
وعموما طول عمرى محلله للباميا وبعرف انوعها انت قشر بس هههههههه نورت

appy said...

نورر
=====

هو ده اللى غايظنى يا نور وواضح انه مفيش فايده برضه
نورتى يا قمر

Vague said...

وساعات بيأخدوا الجماعه ساتر ليهم لمصايب تانيه واقولك هديلك واحد من بتوع الشرقيه ايميله وكلمهعلى انك واحده وابقى اتفرج على نوع من ضمن النوعيات يا دبشه مش بقول كلهم البعض فهمت مصالح شخصيه يا خيبه يعنى ايه

ده كلامك
الرد:
طيب ماحنا مسلمين..شوفي أخطاء المسلمين الفردية..هل معنى كده ان المسلمين كلهم من نفس فصيلة من اخطأ

ربما اللي بتتكلمي عنه ده دخل الجماعة غلط..او مش مقتنع..او لسه جديد ماترباش عندهم

ايوة انا بدافع عنهم..واتمنالهم الخير لانهم الاقرب الى الصحيح

Vague said...

الراقص مع الذئاب
----------------

مش عارف اذا كان من حقي ارد ولا لأ..

انا مع ان يكون في تعدد للاحزاب ولكن ليس بالمعنى الحالي

اتمنى تعدد احزاب ذو هدف واحد فقط (اللى هو يهدف الى مصلحة الوطن ويرفع راية الاسلام) ولكن كل حزب مستقل بطريقته في تحقيق هذا الهدف
طلاما لا يخالف الشريعة الاسلامية

appy said...

أأأأأدم
==========

يا دبشه رد براحتك عادى على فكرة اللى انت قولته تقريبا محمد يقصده بس عاوز يبقى شريعه اسلاميه وفى النهايه المصلحه الواحده
ومطنتحش فيه دة اخويا يا دبشه اتلم
ههههههههههههههههههههه

appy said...

ادم
=====
تانى يا دبشتى
لا مش غلط ده بيكتب فى موقع اخوان اون لاين على فكرة قولت لناس فى الاخوان عنه واضايقوا عادى يعنى
بص يا ابنى افهم فيه ناس فعلا بتاخدها ساتر لبلاوى زى ما قولت لك وده هنا دور الجماعه بقى انها تنقى
ثانيا والله يا دبشه لو عملوا حاجه كويسه وفعليه وده عشمى يعنى واتمنى اهلا وسهلا بيهم