حوارت خرفانيه


خروفى البمبى:- مالك يا طنط على الصبح صاحيه فيس اتوبيس ليه وبقالك كام يوم على كده

آبى :- بنجور على قله الادب خير يا اونكل مالك ما انا كويسه هو مج شاى وتبقى فله القله خالص

خروفى البمبى :- عليا انا انتى من كام يوم مضايقه من ايه تتحسدى هو انتى فيه حاجه بضايقك

آبى :- صباحه حسد على الصبح ارحمنى بقى ما هو انا من القر والنق ده جبت بنزين 80واهو شاحح فى السوق
كمان عجبك كده عملتها الحكومه بنت التيييييييييييت وسابته مش زودت سعره وفى النهايه شاحح وعليه طوابير بقاله اسبوعين وابقوا شربوا عربيتكوا عصير برسيم وتبقى ماركه شى حا هههههههههه


خروفى البمبى:- برضه مفيش فايده فى النحله والدبور بتحولى كل حاجه سياسى والبلد يا بنتى انتى مفطومه على الهم ما تسيب الدنيا تمشى زى ما هى هتغيرى ايه اذا كان الناس مسنتحه ومكبره وبتجعجع ومش عاوزة تتغير طيب بزمتك قولتى كام مرة غيروا من نفسكوا خليكوا ناس كويسه فى التعامل هاتوا حقوقوا حد عبرك

آبى :- امممممممم ما هى دى اللى جايبه ليه الاحباط الناس مش بتحافظ على مظهرها وتصرفاتها وحتى النظافه يالا مش مهم بس انا صديقى اللى مش عارفاه سافر وانا زلاعانه منه وكمان متصلش بيه هو بخيل قوى كده ولا ايه

خروفى البمبى :- قولى كده بقى انتى مضايقه من كده يا ست الكوتكوته طالما مش عارفاه زلاعانه ليه بقى يا وزة

آبى :- يا غبى لا انا عارفاه بس مش عارفاه.... اتلهى على عينك ولا هتفهم هى ناقصه عبط اه انا كنت بحب وجوده هنا حتى لو مش بشوفه بس كنت حسه بامان مش عارفه ليه يكونش هو ده حزام الامان بتاع بطوط هههههههههه

خروفى البمبى:- لا خالص ده الخوزه يا خفه .... لا عارفه علشان انتى حسه انه فاهمك صح اطلعى من دول يا قرده انا نطحك ورافسك هههههههههههخخخخخخخ

آبى :- ايون عارف ده الصديق الجميل انا مشكلتى بزعل مع اصدقائى بس مش بقول بأخد جنب وبس عارف لانه بيكونوا غلطانين ومش حاسين او فاكرين انى زعلانه من حاجه تانيه مش فاهمين انى ممكن اكون زعلت من كلمه اتقالت فى حدث او موقف مش من الموقف كله لانه ممكن مش يخصنى
ولا اللى اقعد اكلمها متردش وفى النهايه تقولى انا عارفه انك زعلانه
ها وبعدين ولا حاجه تسكت على كده وابقى انا كسبت مصاصه هديه وخلاص
عموما انا مبقتش احط فى دماغى خلاص بس مش مسامحهم بجد
وغير كده ما زالوا مش فاهمين وبيخبطوا فيه بس انا مش هرد عليهم


خروفى البمبى :- ههههههههههىىىىى قلبت رومانسيه قولت طول عمرك عيله مصدقتيش انا قولت انتى سهل الواحد يصالحك بس يا بنتى دول ناس مش فاهمين معلش تعالى العبى بالبالونه دى وقوليلى صديقك وحشك ولا ايه

آبى :- ملكش فيه اتهد..... الا قولى هو سى كوزى بيقابل الريس عوكل فى افتتاح مؤتمر قمه الاتحاد اللى هو ايه يعنى استنحاد ده وبيبحث علاقات ثنائيه فى السلام ...هو مش السلام ده برضه اللى بعد العاشر ولا السلام اللى هو كوبرى السلام اللى فى الاسماعيليه طيب هو كوبرى السلام ماله مضايق من حاجه .

خروفى البمبى:- ههههههههههه انتى برضه مفيش فايده .... ايون برافو عليكى ما هما كل ما يتزنقوا فى قرشينات او بدلات ولا حاجه يقولوا سافر بيقابل الريس تعريفه ولا الريس بتنجان جاى وطبعا كله على قفانا او تحديدا قفاكم انتم ههههههههه احنا ملناش دعوة انتم اللى ساكتين سلام ايه وبعدين يا بنتى السلام ده اللى بيضرب فى الافراح وبيقولوا سمعنى سلام بودعك هههههههه

آبى :- آآه ما انا هودع أرقام بطوط اول الشهر عارف لو مطلعش الموضوع ده كويس وطلع افتكاسه والارقام هتبقى وحشه او متخلفه وتضحك الناس علينا هكنس عليهم السيده بالمكنسه بتاعتى اللى بالكهربا وبالمرة اغيرها من شارع عبد العزيز ولا لا مش الحاجات اللى هناك مضروبه اغلبيتها وصينى

خروفى البمبى :- ههههههههه ولسه الصين هتحتلكم وهيجيبوا لكم عقول صينى وابقى قابلينى بقى اذا عارفتوا تدافعوا عن نفسكم وقال يقولك تطوير يا بنتى الحاجه الصينى تتلبس مرة وفجأه تلاقيها كشت ونفشت ورفست واتهرت واتقطعت واتنيلت والله ما بقت بالجوده اللى قبل كده

آبى :- جوده هى مش دى الجبنه اللى بأكلها مش غليت هى كمان الكيلو بقى بكتيرررررررر هههههههه ولا الاجهزة اللى بتيجى فى الاعلانات فى الاختراع الخزعبلى اللى بيسموه تتى فيفى ده والله المصرى برقبتها بجد ولا الاعلانات عن مكنسه مش عارف اللهلوبه ولا المنكوبه كلها مع تانى ولا تالت استخدام تتحرق ولا الاطقم البراككس دى اللى بتتحط فى الفرن بتفرقع جتهم القرف بيقلبونا واحنا عندنا كسل طول الوقت وعاوزين البيبرونه تجيلنا مكانا واحنا قاعدين ومش هنتغير وهنفضل نكسل لغايه ما نبقى زى الفيل اللى من غير زلومه علشان مش بنفكر ولا بنتحرك ولا بنشوف فين الصح

خروفى البمبى :- طيب اهدى وانتى دخلتى الخطوط فى بعضها كده كل ده علشان صديقك ههههههه ....لا اتهدى شويه قوليلى اتبسطى امبارح فى الخروجه والتجمع بتاع نون النسوة الشهرى ههههههههههههه

آبى :- مش قولت اتكتم بدل ما اربطك فى الكنبه دى ...( وش محمر زى البطاطس )
اه اتبسط اخر حاجه واتعرفت على ناس جميله جدا غير الناس اللى عارفاهم من قبل كده والحمد لله مفيش حد فيهم وحش ولا بيغير من التانى ولا كداب
بسسسسسسسسسسس انا زلاعانه علشان صحبتى عيطت بس معلش انا سبتها براحتها

ومفروسه وسبهلله طلعوا حاجه حلوة قوى هما كمان سكر مقالب ههههههههههههه والخيط الرفيع يا عينى اللى جت من المنصورة عسل خالص والبنوته البترفلاى هى فعلا فراشه حلوة وبقولها شكرا شكرا انى شوفتكم ههههههههه

وكمان اشترينا ........هههههههه ولا بلاش اقول لا هقول هى الليفه بتاع الناس اللى بنستحمى بيها دى غليت كده ليه اشتريت الواحده 7.5 جنيه ليه بقى هما بيزرعوها فى توشكى هههههههههه

خروفى البمبى:- طيب كويس محدش ضايقك اهو وكنتى كويسه وايه توشكى دى هو انتى معرفتش انهم لسه بيشحتوا عليها وبيقولوا هيصرفوا مش عارف قد ايه على تصليح الرى وهيأخدوا فلوس من دبى شوفتى النصبايه الجديدة هيرموا فلوس كمان فى الارض ويغرقونا ديووووون اكتر ما احنا ويرجعوا يقولوا مفيش موارد ولا برسيم فى البلد طيب نعمل ايه فى البرسيم

آبى :- طيب بزمتك بعد اللى انت بتقوله ده وبعد الريس متقال ما بينسحب واحده واحده وعوكل بيتوغل وينتشر وقاعد ساكت سكوت غريب يقلق ومش عارفه ليه الحياة عاوزها ازاى بقى معايا وتقولى اتوبيس هيئه نقل عام تصدق حلوة قوى لان دى اللى لسه محافظين عليها ومش بيكهنوها هما بيودى الناس فيها على الاخرة

خروفى البمبى:- هههههههههه برضه دخلتى فى ميه موضوع يا بنتى مش سبهلله قالت لكى بطلى تدخلى الخطوط فى بعضها انتى بتهيسى يا بتنجانى يا حبيبتى

آبى :- اعمل ايه اصلى متلخبطه ومش عارفه اكتب فى حاجه ووقوع بيت المنصورة دة نكدنى اكتر واننا طبعا لسه مش عندنا الحاجات او الامكانيات اللى تبقى موجوده فى وجود الكوارث دى حاجه هم
وبنسيب الناس تموت ومش عارفه مين الضحيه اللى هيشيل القضيه المرة دى ما هو لازم كبش فدا ههههههه بلاش كبش علشان عارفه انه قريبك يعنى مشيها اى حاجه
هما بس شاطرين يوفروا طيارات لرجال الاعمال علشان يحلوا ازمه فى الجزمه طيب وباقى الناس هو احنا ولاد تيتتتتتتتتتتت يعنى ولا تصدق حلوة قوى انا اقعد فى البيت واطلب تاكسى الطيارة واتفسح واتف عليهم من فوق ههههههههخخخخخخخ والله احنا بقينا مسخرة بجد
وبعدين كله ملخبط فى دماغى فقولت ارميه فى وشهم مرة واحده واللى يعجبه موضوع يناقشى فيه . بس برضه صديقى وحشنى قوى بس هى حاله وهتعدى وساعتها هقولها عدى يا ليله هههههههههههههههه


خروفى البمبى :- قومى قومى لمى الغسيل يا بيضه وشيلى الليفه من مكانها واشربى الشاى واشوفك بالليل على كوبرى السلام هههههههههههههههخخخخخخخخخخخ

كان معكم فيس اتوبيس هيئه النقل العام آبى هانم شكمان

117 اخبط وقول رايك:

Mafrousa said...

احلى تخاريف خرفاني
بعد مج النسكافيه اللى شربتة
اقوم اعملى واحد تاني
يمكن يعدلى السلوك اللي دخلتيهالي فى بعضها يا بتنجاني

وانا كمان كتبت عن امبارح فى ارض الاحلام لاقيت انه انسب مكان
بس تصدقى نسيت مين الخيط الرفيع

يالهوى على الذاكرة اللي طارت مع استعمال الليفه

كان مالها الليفه الناعمه اللي ما بتشلش حاجه تملس و بس
كان لازم يعني اسمع كلامك؟؟
بتنجاني بصحيح

محمد مارو said...

ههههههههههههه
فرحان فيكى يا ابى

على شان تبطلى تركبى بطوط ههههههههه


ماله الموتو رجل

معلش بقى قلبى معاكى


بس هنعمل ايه فى حكومه قراراتها عشوائيه و مش مدروسه

Hosam Yahia حسام يحيى said...

يمكن ابقا تانى تعليق

Hosam Yahia حسام يحيى said...

لئه التالت :d

مش مهم فيه تقدم باذن الله المره الجايه يمكن ابقا التانى والمره اللى بعدها الاول

حضرتك جبتى برنامج الرقابه بتاعه التيت ده منين

HERO said...

ههههههههه
حوار فعلا ملوش حل على الصبح كده
وفعلا انتي اتكلمتي في 100 موضوع وانا تهت مش عارف اعلق على انهي نقطة
بس هعلق على موضوع الليفة اللي ب 7.5 اللي تعتبر كده رخيصة احنا مرة لقناها على طريق اسكندرية الزراعي ب 15 جنيه هههههههه

وانتي ايه اللي نزل بمستواكي الاجتماعي كده لغاية بنزين 80 صحيح ؟؟
والعربية ازاي وافقت على كده

ومش تضايقي نفسك صاحبك هيرجع قريب

تحياتي

عايش... ولكن !!!! said...

يا نهارى
ليفه ب7.5
ليه بتشتغل بالكهربا
هههههه
حلو الحوار الخرفانى ده
الواحد من كتر ما قرأ فى الموضوع شكله هيطلعله قرون

تحياتى
علاء

المنسى said...

سيبك إنتى
أهم حاجة فى المو ضوع ده
إنى لحقت مكان قدام

عشان نظرى ضعيف بقى وكده

فكرة لما علقت عندك وقولتيلى أنا تهت منك على فكرة
هو ده إللى حصل بالظبط
مش فاهم أى حاجة وكله دخل على كله

بس شكلك كده فى حالة ليست على ما يرام

ربنا يستر
لما آبى تبقى كده إحنا نعمل إيه

لالا إهدى شوية
وسيبك من الخرفان والدبور والنحلة دول خاااالص دلوقتى

ده إحنا فى شهر مفترج

nor said...

بوست تحفه
و كمان اللي منزلاه في كتاب مدونون جميل اوووي
ربنا يوفقك

فارس بلا جواد said...

ازيك ياappy
بوست طبعا مميز وافكارك دايما مبتكره
وحوار عجيب جدا
بس متناول مواضيع كتير

تحياتى

blue-wave said...

انا مش هاتكلم ولا اعلق
انا قولتها قبل كدا
مالكيش
حل

الشريف / جمال طة said...

يابنت

اكتبى عليها ماتبصليش بعين رضيه شوف أمى وأبويا أد ايه صرفوا عليى

حتحسدونى على ايه

ولا هى الكحكه فى ايد اليتيم عجبه

ولا انتم من جماعة حسدوا ألأعمى على كبر عينه

الله ينتقم منكم ده انا اغلب من الغلب حلوا عنى وأرحمونى الله ينتقم منكم عيونكم زى الزفت يارب يجليكم رمد ربيعى

ميرا ( وومن ) said...

آبي
بصي انت متتكلميش مع خروفك البمبي دة تاني احسن

بيجرجرك في الكلام وبيطلع المستخبي ومحسسني انك بتفضفضي علي نيد سبيد فور فضفضة كلها مطبات وطرق متعرجه داخلة خارجة انا اظاهر عليا توهت

هالف وارجع

تحياتي يا قمر

Unknown said...

لالا بجد بلوج جامد وم النهاية ..

حنتظر مرورك على مدونتى

معلش ملحقتش اقرا الموضوع كله عشان عندى ميعاد

تحياتى

سلام

nody said...

هههههههههه
اوعى امن الدوله يشموا خبر عن حوراتك انتى وخروفك ده
يتخاف منكم على الامن القومى
تحياتى

صاحب المضيفة said...

طيب ده خروفك البنبي وبتعملي فيه كده

ومال لو مش كان خروف كنتي عملتي فيه ايه


وبعدين اخرة ركوب البطوط كده

هههههههههههههه


ربنا معاكي

رصيف نمره خمســــــه said...

هههههههههه يابنتى انا تهت مش عارفه اعلق على ايه بس دخلتى كل حاجة فى بعضها بطريقة حلوة اوى

هما هيعملوا فينا اكتر من كده ايه كل يوم لازم يبقى فيه مليون مصيبة فوق دماغنا يابنتى احنا هندخل الجنة من وراهم

سلااااااام

Vague said...

انا لسه مقريتش حاجة
بس حبيت اكون من اول عشرين واحد قبلما يقفلوا ال 100 ..

انتي مشغلة سميرة سعيد وانا عمال اقفل فالريال بلاير والميديا بلاير والجيت اوديو اللي عندى وفالاخر تطلع انتي


ايه اللي شفته ده... انتي حطاني على الشمال!! مش كفاية اني بكلمك
والله انا بحس بالعالمية او على مية وتسعين لما بكلمك

طبعا انتي روحتي شفتي الواجب.. حليه بقة

وهقرى الحوار بتاع الخروف ده بعدين..
i g2g
سلام يا بتنجان

رئـــــيسـة حزب الأحلام said...

ياخرفانك ياابى
مال الخروف مدوخاة معاكى ليه
اهم حاجة انك تكونى مبسوطة
وربنا يسعدك ويفرحك
الف تحيه لكى

زفته وقطران said...

ابي
حستاذنك اروح اجيب كهربائي
يظبط سلوك نفوخي اللي ضربو

ياابي ياحبيبتي
متركزيش مع الاوضاع اللي حواليكي
حتتعبي
وحنحتاج دكتور
والدكتره موالهم موال
ولا اققولك
لو اتزنقنا اوي
حجيبلك الواد قطران اخويا
يتعلم فيكي

سبهللة said...

انا ازاى ادخل عندك وادور على الفيكونة الرقيقة بتاعة
ومالاقيهاش؟؟؟
ثم انتى مافيش فايدةفايدة فيكى
مش بتسمعى الكلام ليه ؟؟
ماماى بتسلم عليكى وبتقولك وواحدة واحدة علينا والنبى
اتكلمى فى موضوع واحد بس

R-H-S said...

انا كنت مستنى اعرف مين اللي وحشك دا
يكونش بطوط ؟
هو بخير ولا ايه ولا السلندر بتاعه ضرب ولا بتعمليله عمره

همس الاحباب said...

هههههههههه ههههههه
يا حوارتك يا ابى
ايه يا بنتى ما كنتى بعقلك
ايه اللى جرى
بس تعرفى ان خروفك البمبى طلع بيفهم اكتر من ناسكتير قوى
بس بيجرجرك لمتاهات وحوارات جامدة
تحياتى اختى العزيزة

ka2en Makboot said...

حبيبتي آآبي

بجد انا خايفة عليكي من كتر كلامك فى السياسة .. يا حبيبتي احنا بنات ومش وش بهدلة .. ماشوفتيش القانون الجديد اللي بيمنع نشر اي مادة مسموعة او مرئية علي اي ميديا(تلفزيون راديو ونت) ولازم يجيب تصريح من الداخلية قبل النشر والعقوبة من شهرين لسنتين لاما غرامة 50 الف جنيه
ديه مجرد بداية والخطوة الجاية على الكلام نفسه علشان يقفشوا كل المدونين وانتى عارفة انهم بيتلككولنا

الحوار كان زي العسل بخفة دمك .. بس كان طويل وبيتكلم فى اكتر من موضوع توهنا بجد .. ومين مزعلك وانا اقتلهولك .. اختك دموية جدا هههههههه
والحمد لله انك انبسطتي في لقاء الاصدقاء ولا لاقيتيش الحكوديين والشريريين :)

سلامات كبيرة خالص خالص

كائن مائي دائما وابدا :)

مواطن زهقان said...

بجد بوست هايل
انا استمتعت بالحوار

تقبلى مرورى

Soooo said...

ده النحله والدبور اتفقو مع الخرفان البمبي ومزودين الجرعه حلو قوي قوي قوي

كده انتي وصلتي تمام والحمدلله

----

ايه يابنتي ده كللو
مدخله عشرتاشر موضوع في عشرتاشر موضوع
لا حول ولا قوة الا بالله
وعامله حوار مع الخروف كمان
لا اله الا الله
وهتقلبي عربيتك بنزين تمانين وتلبسي فيها خوذه وتضحي بيها زي كبش الفدا في الاتحاد الاوروبي في المنصورة كمان

لاااااااااااا

كده انا اتطمنت على مستقبلك قوي قوي

ماتاكليش سمك ولا بيض .. ولا جبنه جوده
خليكي في البرسيم .. مفيد ومتيييييين





سلامووووووووووووز

في حب مصر said...

السلام عليكم
ازيك يا آبي
كل الزعل ده علشان صديقك سافر.. يا ستي بلاش تدقي كلها كام شهر وتنسيه.. هو السفر كدة دايما ليه تنازلات وسعات بتكون كبيرة
وكويس انك دخلتي زينا كدة مرحلة تشاؤم.. هههههه.. انا عمال أقول البنت دي على طول متفائلة ليه .. هو فيه ايه؟؟ ههههههه
لا بجد ربنا يسعدك
تحياتي

أحمد بكر said...

دماغك عاليه مووت يا بنتى متعمليش عقلك بعقل خروف حتى لو بامبى

حنين القلب said...

مالك يا آبى
ايه اللى مزعلك يا حبيبتى
بصى يا آبى مش فيه حد بيفهم اللى جوا التانى ايه يعنى مدام بنحب حد يبقى لازم نقبله على عيبه ومميزاته
والصداقه دى من اجمل العلاقات اللى فى الدنيا يبقى لازم نحافظ عليها وبلاش الزعل لان الدنيا اصلا مش مستهله زعل
ومدام اصدقاء يبقى لازم نحافظ على بعض صح ولا ايه
وبعدين ايه التخاريف دى كلها والله الخروف البمبى عنده حق
بس احلى تخريف سمعته والله
سلام يا احلى آبى فى كوكبها وسلامى للخروف اللى شكله عجبنى

Mony said...

لالالا

انا كده سلوكي كلها لمست مع بعض

و مطلعتش من الموضوع غير بالتجمع الشهري


كده محتاجة كوباية شاي بالنعناع علشان اضبط الطاسة مرة اخري


وكده بقي العاقل اللي فينا هو الخروف
ههههه

مواطن مصرى نايم said...

بصى يا ليفه
قصدى يا ايبى
هههههههههههههههه
انا دماغى لفت لفتين و مش عارفة ترجع مكانها تانى
فى حاجات تايهه منى انا و الخروف بتاعك مش فاهمنها
هههههههههههههههه
بس الاغلب انا فاهمه
بس برضوا و الله دماغى لفه
حاسس انى غبى عالعاده
هههههههههههههههه
بس انا ميت من الضحك حاسس انى مهيس
من البوست
بس جامده الفيس اتوبيس
هههههههههههههههه
عموما اللى انا فهمتة من البوست
يوضح ان البوست جميل
حروح اعمل واحد كابتشينو
عشان افوق و ارجع اقرى البوست تانى
الملم اللى مش فهمه انا و خروفك
تحياتى
اسلام

وجهة نظري said...

إيه يا شيخه ... إيه يا شيخه ... راديو وفتح؟؟ أنا كل ما أقرا حته انسي إلي قبلها كانت إيه ههههه

بالنسبه لموضوع بنزين 80، دا متوقع يحصل من زمان.... دا جزء من مسلسل طحن الناس والإحتكار ... بعد حلقة زيادة أسعار مكالمات التليفون

حكاية الصين ومنتجاتها مش غلطة الصينيين، هما بيعملوا منتجات بجوده عاليه أوي لغاية منتجات بجوده واطيه أوي ... المستوردين المصريين، وهم علي فكره بقي ليهم مكاتب في الصين زي الرز، مبيستوردوش غير أحقر حاجه ممكنه علشان يعملوا أكبر ربح ممكن في مصر... وطبعا بدل ما الحكومه تشجع أي تصنيع، بتشجع الإحتكار لغاية ما بقت المنتجات الصينيه هي الغالبه. ولسه

ليفه بـ 7.5؟؟ ليه يعني؟

تحياتي

صباح الخير يا مصر said...

Appyplanet
**********
بجد بجد انا بدأت اقلق عليكى...دا أنتـى سيبتى الحاره اليمين و الشمال وكل الحارات و نزلتى على الترابه...و ربنا يسترها و يحميكى
عارف انك متحمسه بس المثل بيقول : سوق براحه عشان نوصل بسرعه

تحياتى

Vague said...

رجعت بعد ما قريت

ويارتني ما قريت..

تهت وصدعت ومش فاهم هل ده قصدك ؟؟

الظاهر اني المفروض اكون متابع الحلقات اللي فاتت

-ايه ده...اول وتاني تعليق مش فاهمين حاجة برضه... يبقى انا كده فالسليم

وبتركبي بطوط؟؟

انا ضااااااااايع

سلام احسن بقة
kun min

Z_Diva said...

eh ya o5tchy kol da, dana toht mnik we galy 7awl fe ma5o5y, rbna ysam7k ya 7asanat :S

la bas wala yhmk wala tz3ly zatytk abtan abtan, kllo bytla3 fel3'aseel, we ingarry ro7y lmmy el3'aseel :D

Alkomi said...

و انا راي نشوف حل للخروف اللي انتي محيراه

ياندبحه يا الا نوفرله البرسيم

بالنسبة للبنزين

حولي غاز و اديكي تساهمي في حرمان اسرائيل منه

بالنسبة لليفة

و انتي ماشية عالطريق الزراعي اي طريق زراعي ممكن تشتري واحدة طولها متر بجنيه و نص بالكتير اوي

او نبطل نظافة و خلاص

على فكرة انا تهت خالص

بس عموما اتمزجت و انا بقرأ البوست

باااااااااااااي

ساعد نسرين الايمن said...

ابي الجميلة

نفسي اشوف الخروف ده علي الاقل عشان احلف انني شوفت اللحمة
بوست جميل
بس علي فكرة السلام مش بعد الاسماعلية اللي بعد الاسماعلية اسرائيل
حرم عليك طيرت العسل المحجر اللي كان في دماغي

wael said...

دمك زي العسل والله
انا اسف بجد اني بقالي كتير معدتش على مدونتك بس بجد انا منقطه شويتين عن الحياه
على العموم حمدلله على سلامتي
هههههههههههههههههههههههههه

kochia said...

رغم المحتوي
لكن ببتسم
الحمد لله
وده ساعات بيكون كفاية

تحياتي

عبده الرايق said...

ههههههههههههههه
انا شايف ان الخروف البمبى ده لازم ياخد جايزه موبيل
لانه فضح الصين وجاب من الاخر
انا ممكن اتنازل له عن دكتوراه من اللى عندى
اصلى عندى كتير مالهمشى لازمه
ويبقى الدكتور خروف البمبى

Mahmoud البطراوى said...

ههههههههههههههه

والله يا بنتى انتى كده خطر عليكى

يا عينى على البت الى هتتحول

شايله هم البلد على هم السلام والاسعار والعربيات اييييييييييييييييه
لقيا دماغك؟؟
دى دماغك يا قبلى حافظى عليها ل ضاعت مش هيصرفولك غيرها
هههههههههههههههههه

سلام قبل ما تجنن

mohaawad8 said...

هو بصراحة اللي انتي بتعمليه ده مش
مش عارف اقول ايه
مش طبيعي
ايه يا بنتي داخلة يمين و شمال في كله

براحة علي التيييييييييييت
مش متعودين علي كده
متعودين ان حتي تييييييت دي اصلا باللي معاها في الدرج مقفول والمفتاح في الــــ
ولا اقولك بلاش تلبيخ خليني طيب احسن

الاسعار دي الذ تمسيلية
علي راي واحد ما اقولش اسمه احسن
رفعوا المرتبات 30%و رفعوا الاسعار 90%

بس اكيد لمصلحة الشعب والتنمية الكوسية

كله يا اختي العزيزة بتكهربه كلمة سياسة
بس صدقيني
احنا اتغيرنا كتيير
التحمل زاد
بس هما لسا ما حسوش و بيعاملونا بنفس الفولت القديم

الصداقة
بلاش دي عشان بقت حاجة متعبة اوي
يمكن بقت انأح من الحب
عملة نادرة بجد

السلام علي فكره بتاعة
peace y man

و طبعا غزو الاعلانات مسيطر
والصين دي بقت حاجة تبع
وراك وراك

هو المشكلة ما عدتش عملية كبش فدااا
دي بقت
شعب فدااا
عشان خروفك البمبي ما يزعلش

اما عن صاحبك
اديله عذر الحب

طبعا sry طولت عليكي بس واحد متطفل
زيي لازم يرغي

يلا سلام بقي الحق اتوبيس النتيجة
ادعيلي
:D

ahmed_k said...

والله مش عارف ارد علي ايه ولا ايه
اهو كله فضفضه مع خروف
بس انا حقولك السلام ده
اللي بين الفلسطينيين واليهود
أهو ده السلام
يعني يقفوا قدام الكاميرات ويسلموا علي بعض
ويبقى كده حصل السلام

والسلام عليكم

Empress appy said...

واحده مفروسه
**************

انتم اصلا اصلا ناس مينفعش معاكم الليفه الليفه دى للناس الكبيرة بتوع زمان شوفتى من اول غسله الذاكرة وقعت يا دى النيله طيب نعمل ايه بقى بعيد ربنا يستر وبعدين شاركينى وجدناينا فى اللخبطه ولا اتفرجى وانا بوديكم الملاهى الفكريه بتاعتى نشاط يالا واحد اتنين
وكسبتى معايا جايزة اول تعليق ليفه وش ووش هديه هههههههههههههههههههههههههه








محمد مارو
**********

كده يا مارو ماشى اللى يعلقوا لك نمره على ضهرك وانت ماشى ليك يوم وبعدين هى القرارات دى تيجى على دماغنا فى الحر ده اللى يخرب بيوتهم نورت يا مارو

Empress appy said...

حسام يحيى
**********
لا يا حسام مش جبته انا يا ابنى اتربيت عليه بدل ما ماماى تبرأ ليه اروح انا فيها ههههههههههههه نورت يا حسام الكوكب





هيروو
*******

لا والله بطوط دى اتنكت عليا لما حطيت لها 90 بدل 92 وزعلت وزمجرت انا يا هيرو اللى جبت بنزين 80 مش جاز يعنى قولت تبقى فى الشياكه شويه ههههههههههه
وصحبى هيرجع اه ما هو متعود على كده بس انا بحب اصحابى قوى ومش بحبهم يبعدوا بفتقدهم
ميرسى ليك خالص ونورت الكوكب

Empress appy said...

عايش ولكن
********
طيب انت بتقول كده على السمع امال يا خويا لو اشتريت انا عن نفسى هحنطها واحلف عليها ههههههههههههههه
نورت الكوكب






المنسى
******
مش عارفه والله اصل ربنا بيوعدنى بناس غريبه فى حياتى ي منسى عندى ومعايا بكلام وفى اماكن تانيه بتلقيح كلام تفتكر الناس دى ايه ملتها ومتخافش عليا انا اعرف اخد حقى كويس من اى حد واعرف افضل قويه عمرى كله
نورت الكوكب

Empress appy said...

nor
***

ميرسى ليكى يا قمر خالص واحرجتينى بذوقك نورتى الكوكب كله اول مرة وخدى بقى خروف هديه وانتى خارجه فى ايديك نورتى





فارس بلا جواد
==============
طيب اللى يفهم حاجه يقولى خدوا بايدى ههههههههه نورت يا فارس

Empress appy said...

blue-wave
-***********
لا كده كتير هتقعد تقولى ملكيش حل خلاص اشوف لك مفك يا ابنى ولا نغير الكوالين وتتحل ايه فى ايه ههههههههههه ميرى ليك ونورت





جدو جمال طه
**********
اه يا جدو مش افهمين بس كده هقلبها ميكروباص ولا عربيه نقل وهى اصل لا ترى بالعين المجرده
نورت يا جدو الكوكب كله

Empress appy said...

وومن
****

طيب اعمل ايه يا ميرا اللهى يخرب بيته هو كده كل يوم يقعد يكلمنى لما جابلى هسهس فى دماغى بس والنبى شوفتى خرفانى فاهمه فى السوياسه ازاى مش احسن من ناس تانيه
يالا روحى بقى وتعالى بسرعه بس اوعى تتوهى ههههههههههههه





المبرمج المحترف
***********
اهلا بيك فى الكوكب اول مرة نورت

Empress appy said...

nody_1987
**********

هو انتى معرفتيش يا نودى مش هما عاوزين يأخدوا خرفانى يوظفوهم معاه بس على مين انا لن اقبل بقى انا خرفانى تلبس بدل وتحط سماعات فى ودانها لااااااااا يععععععععع ايه القرف ده كلا البته ههههههههه نورتى يا قمر المنصورة





صاحب المضيفه
************
لا وحياتك دى اخرة الحر اللى احنا فيه وحال البلد اللى ماشيه بقفاها بعيد عنك
نورت الكوكب كله

Empress appy said...

رصيف نمره خمســــــه
************************
والله يا ايمى مش عارف هيعملوا ايه زهقت وطلعت من نفسى خالص من كتر القرف اللى بيحصل وبرضه متحملين
نورتى يا قمر





Vague
*********
هو انا ليه بكره وخيط الا انت يا دبشه بس بلاش 190 علشان الردار يا خفه ههههههههههههه وايه كل البرامج دى هتستهبل ولا ايه يالا امشى مش عامله واجبات اعمله انت وهديلك ربع جنيه هههههههههه

Empress appy said...

رئـــــيسـة حزب الأحلام
**************************

خروف متعب وحشرى ولكاك يا شيخه الحمد لله كنت مبسوطه بيكم قوى نورتى يا حبيبتى





زفته وقطران
*************

لا يا بنتى انتى روحى مركز صيانه على طول وان شاء الله تتعدل ههههههههههه
وبعدين انت هتسيبى قطران يتعلم فيه لااااااا خلينى مع خرفانى احسن ههههههههههه

Empress appy said...

سبهللة
**************
لا رقيقه مين دى ايه ده انتى بتدورى على حد غلط خالص بجد حاضر سلمى على مامى وقولى لها بتاعت المخضروات هتتكلم فى موضوع واحد ههههههههههههه نورتى يا حبيبه قلبى





GeHaD-----(male)
******************
االلى واحشنى صديقى يا جهاد اقرب حد ليه وفى فترة قصيرة سابنى وسافر وبعدين فال الله ولا فالك تف فى وش اللى جنبك يا اخى ههههههههههه بطوط الحمد لله بخير رايحه اركب لها سماعات النهارده واغير كهربا وزيت مش معاك الف جنيه سلف عااااااااااااا

Empress appy said...

همس الاحباب
****************
يا ابنى انا اساسا خرفانى دول دبلوماسيين وخريجى ماء ماء كوليدج ايشه فهمكم انتم بس ههههههههههه نورت يا ابو همسه






Two in One
***********
فيكون مائى حبيبى الضرب للجدعان وامن الدوله للخرفان لا تقلقى وطبعا فاهمه الحركه القرعه اللى عملوها اللى زعلنى ناس كتير قوى فوق مما تتخيلى بس عادى والله ربنا يسامحهم بقى ويقدرنى واسامحهم ولو فيه اى خناقه هجيبك يا ريس انت تؤمر سعيده برجعوك بالاسم ده علشان بحبه قوى
على فكرة كان نفسى تيجى هستناكى المرة الجايه

Empress appy said...

مواطن زهقان
*****************
ميرسى ليك ومتزهقش من اولها كده نورت الكوكب كله





Soooo
**********

يا مصبرنى على سووو يا رب يا ربى طلبت منك تبعده عن وشى وانا وشى بيلعب فيه خمسين خروف وش بتقبل منى يا رب يبقى انت قابل انى اعلقه من رجليه خلاص اوكى

بص بقى يا سوو يا ابنى خرفانى دول خريجى ماءماء كوليدج يعنى متحلمش تدخلها وغير انهم كده معاهم كل اللغات الماءماءيه والنحله والدبور ناس من العيله المتملكه فى الغابه شوفت انا بقى مستوايا ايه
وبعد الاستنحاد مش فى المنصورة يا دى النيله الاستنحاد فى العريش ورايحه الاسبوع الجاى تيجى معايا اعلق هناك هههههههههه وبعدين ماله عصير البرسيم عارف يا سووو انا بقول على ايه عصير برسيم والله بجد عصير القصب شوفن انت بقى بتشرب منه قد ايه هههههههههههههخخخخخخخخ
نورت يا اجدع واحد فى بلوج سبوت وولاد خالته وعمات

قوس قزح said...

بعد الحوار الطويل الملعبك الملخفن المتداخل الاطراف
احب اقول لحوارك مع الخرفان

سمعنى سلاااام امنت بالله

ايه يا بنتى
كل ده فى دماغك و لسه بعقلك !!
بصى يا ابى
انا كنت بفكر انزل بوست عن قانون المرور الجديد
بس رأفة بحالك و بحال بطوط هكتفى بنشر الصور

المهم الليفة طلعت حلوة ولا ايه
اوعى بس تستخدمى معها العنف هتبوشى :))

Empress appy said...

فى حب مصر
**********
عارف مشكلتى ايه فى حياتى لما برتبط بحد وبحبه قوى مبينفعش يغيب عنى وبيتحول لميول عدوانى الموضوع صديقى طول عمرة مسافر لما نزل ومشى تانى اضايقت قوى لانه قريب منى
وبعدين بعد الشر عنى ان شاء الله اللى يكرهونى انا وخرفانى انا بس بغير موود علشن الحسد هههههههههههههه ربنا يرجعك بالسلامه يا رب




بيكر
****
ميرسى ليك بس بلاش عاليه دى بتتفهم غلط ههههههههههههههه نورت يا بيكر

Empress appy said...

حنين القلب
**********
ما بقاش فيه اصدقاء كتير يا حنين والناس الوحشه والنفوس الضعيفه كترت قوى بس عادى يعنى بكبر دماغى وكفايه انتم ناس كويسه فى حياتى
نورتى يا قمر بجد





mony
******
النبى انتى جبتى من الاخر خرفانى كلها هى اللى فاهمه من البدايه وعاقله شوفتوا بقى ضحكتوا علينا الخرفان ههههههههههههه نورتى يا قمر

Empress appy said...

مواطن مصرى نايم
****************

يا اسلام تلملم ايه بس خروفى فاهم انت مش فاهم انا هقوله يفهمك ههههههههه وبعيدن حلوة بصى يا ليفه دى ماشى يا ابو لسان طويل اللهى ينطحك خروف من بتوعى والحمد لله انك هيست وفهمت احب الناس دى قوى تهيس وتفهم انت فاهم انا قول ايه علشان انا مش فاهمه ههههههههههههه نورت يا لولى






وجهه نظرى
**********

والله يا معتز انت اخويا وحبيبى انا حسيت انك اللى هتأخدى بايدى من المقلب اللى عمله فيه الخروف ابن الخروفه ده هههههههههه لانى بعد ما كتبت مفهمتش هو كان عاوز ايه شوفت عملوا ايه فى الناس فى البنزين ولا موضوع الصين والله بجد معاك حق انا نفسى الناس تفهم كده طيب اقولك ابن عمى سافر امريكا كان عنده كورس كده على السريع اسبوعين قولت له هات ليه كوتشى من هناك جاب ليه كوتشى اديداس تخيل مكتوبه عليه صنع فى الصين بقيت الطم اقوله ازاى يقول كل حاجه هناك صينى بس الفرق بقى الجوده عاليه جدا وفى ماليزيا نفس الموضوع
بس كده احنا هنروح فى شجرة قريب من اللى بيحص
النبى لو فهمت حاجه تانيه فهمنى هههههههههههههه وهطفى الراديو حاضر نورت الكوكب ومش هتنزل مصر ولا ايه

Vague said...

هههههههه

والله انتي بتتعبي قوي فالرد على الناس

انا عارف انك بتوكتوبي دلوقتي الردود

Empress appy said...

صباح الخير يا مصر
****************
بس انا مش بعرف اسوق بالراحه وده عيبى بجد لان مبقاش وقت صدقنى فى حاجه
نورت الكوكب وميرسى لذوقك بجد





Vague
*******
ههههههههههههه تستاهل اخير عملت فيك عمله مش كويسه ورديت جمايلك عليا بص يا دبشه اقراه تلات مرات قبل الاكل وتلات بعد الاكل وبعدين بطوط دى عربيتى يا ابنى فهمت
نورت يا دبشه

Empress appy said...

Z_Diva
********
ام زعبولا حبيبتى شوفتى اوختك آبى واللى حصل لها الحر سيح فافوخى فى بعضياته عجبك كده انتى يا بنتى مش هتيجى ولا بلاد الجاز عجباكى شكلك ادمنتى الريحه ههههههههههههه





محمد الكومى
**********

لا يا محمد بطوط بتعمل دماغ 92 او 90 ساعات انما اللى جبت جاز وبنزين خلاص من الحسد ههههههههههه وبعدين تصدق فكرة شريرة تفتكر هتنفع
اما موضوعالليفه دا انا لو بالتمن ده اشترى خمسه سته ولا عشرة واتاجر فيهم ههههههههههههه
نورت يا كومى الكوكب

Empress appy said...

ساعد نسرين الايمن
*************
لا بقى او سمحت السلام ده كوبرى السلم بتاع الاسماعيليه حتى بحب اطلع وانزل عليه علشان زى المراجيح وبعدين يعععععععععع عسل محجر ايه يا ابنى عندك الفواكيه احسن روح اشرب نفس وتعالى كمل ههههههههههههه نورت الكوكب





wael
*******
معلش يا وائل انا عارفه انك راجل مهم وكل يوم بتصحى من النوم ووراك كنس وطبخ ههههههههههههههه نورت وحمد لله على سلامتك من القعاد على القهاوى

Empress appy said...

kochia
********
والله يا حبيبتى لما قريته برضه ضحكت من اللى جالى فى مخى بجد من التفكير نورتى الكوكب كله






الدكاترة عبده الرايق
*********************
شرف ليه منح الدكتوراه بتاعتك للخروف البمبى بتاعى بس عاوزة اقولك انه دبلوماسى يعنى معديك بمراحل بس انا مش عاوزة احرجك قدام جماهيرك الغفيرة ههههههههههه نورت يا عبدوو باشا

Empress appy said...

بطوط حبوب
********

وهنيالك يا فاعل الخير عااااااااااا شوفت يا بطوط اللى بيحصل لاختك بطوط عربيتى واللى بيحصل فى الدنيا الا دماغى دى راحت فين مش عارفه هههههههههه لو شوفتها ابعتها نورت يا بطابيط





mohaawad8
**********

مبسوطه ان فيه حد فيهمنى يا مان لووووووووووووولى شاطر وربنا ينجحك يا رب وافرح بيك كده بس السلام ده برضه كوبرى السلام اللى بعد الاسماعيليه هههههههههههههه نورت الكوكب

Empress appy said...

ahmed_k
**********
لوووووووووووووولى وادى تعريف كمان للسلام ايون كده يبقى الراجل هادف الى حمايه مدينه السلام صح طيب اتصور جنبه والنبى يا خويا ههههههههههه
نورت يا احمد





قوس قزح
********
جارتى الجميله
لااااااا يا حبيبتى انا قريته ومش قادره اكتب فيه حاجه اللهى يسترك يا رب ويخلي ليكى كل الالوان اللى فى الدنيا اوعى عااااااااااا سيبينى عامله نفسى مش فاهمه حاجه كده هى ناقصه ما هو انا اللى اتنيلت وقولت للظابط يوم ما بيسحب الرخصه اقوله ممكن ادفع فورى خدوها من طرف لسانى اللهى يخرب بيوتهم ههههههههه
نورتى يا قمر

Empress appy said...

دبشششششششششششششه
****************

انت محتل المدونه ولا ايه طبعا انا بحب كل الناس والله يا دبشه وبحس وانا برد عليهم كانى بتكلم معاهم ببقى بشتغل وبرد على الناس المدير بتاعى بيقولى انتى سوبر بنت باللى بتعمليه ما هو كمان بيقرى ليه المدونه هههههههههه ذنب عليهم كلهم فى الشغل يقروا ليه

نورت يا دبشتى

رئيس جمهوريه نفسى said...

هى هى هى مع الليفه بتنجانى اكثر بتنجانا كان مالك مال الليف البلدى يا بتنجانى مالله الطبى وبعدين مش مضبطين انك تشترى ليه واحده حلوه الدئنيه دى خليكى فاكرة
خساره النمر والله يا بتنجانى انا اول ما شفت بطوط شدتنى النمر من اول لحظه نيعاهاهاهاهاهاهاها
موضوع الرئيس بيره والاخ كوزى وفى بينهم علاقه يعنى البيره بتتشرب فى الكوزى احيانا فبيكملوا بعض هو رايح يعمل اتحاد من اجل المتغرب ولا المتشرق ولا المتوسط يتلم على حال بلده ويعمل ليها اتحاد امور تجن بجد
موضوع صديقك يابتنجانى ربنا يكرمه ان شاء الله ويرجع تانى بالسلامه بس لازم يشوف مصالحه يعنى وشغله
انتى بتتكلمى على توشكى السجائير ولا توشكى المشروع اصلى الاتنين ليهم فوائد توشكى السجائر خلت ناس كتير تبطل تدخين وتوشكى المشروع سبب ازمه سيولة فى البلد لمجرد انه يتقال حدث فى عهد الرئيس بيره والمشروع ده اتعرض على عبد الناصر على فكره وبعد الدراسه اكتشفوا انه غير مجدى اقتصاديا بس اهو حاجه والسلام
موضوع بيت المنصورة احنا مش بنفوق غير لما تحصل الكارثه وبعدها شكرا لا حياه لما تنادى ناخد يومين نبحث ونقرر وبعد كده ولا كانى حاجه حصلت وارجع بالهستورى والميمورى بتاع مخك تلاقى عماره مدينه نصر عماره لوران اسكندريه وغيرهم كتير ولسه مش بنحط حلول ولا حاجات تمنع الكوارث دى
الخروجه الحريمى يارب تكونوا انبسطتو يارب فى اليوم ده
بتنجانى خفى ايدك فى الووووود شويه صوابعى طققت من كطتر الضرب على الكى بورد فى تعليقك

Anonymous said...

نحلتك ودبورك دول مش هيجيبوها لبر سمعت انهم مطلوبين علي وجه السرعه
____________
بالنسه للزعل ياقمر عندك حق انك تزعلي بس انت لو تعرفي حماتي تعرفي سياستها في التنكيد عليه
هي كل اللفه دي عشان اتخانق مع عمرو
وهو اتحايل عليه اني افوتها عليه
قمت انا سمعت الكلام زي الهبله
شوفي ليه تسريبه لها ربنا يخليكي
بدل ما اموت نفسي

Anonymous said...

يعني في ظل كل الوضاع اللي زي الهباب في مصر دي فأنا بقترح انك تشوي لنا خروفك البمبي و اهو تفرجي عننا شويه


هاا العزومة امتى

micheal said...

هههههههههههههه..ده أتوبيس إيه ده
:)
بسشبجد نصيحة..نفضي للخروف البمبي ده بعد كده
:)
تحياتي

مصر يا موكوسه .....يا مزارع الكوسه said...

مش عارفه اكتبلك ايه يا ابى بصى
تعليق
كفايه كدة

ابو صهيب ( الجمعاوي الاصيل)سابقاً said...

ههههههههههههههه

كل ده يحصل معاكي
الله يكون في عونك

Anonymous said...

يا سيدى على حواراتك الخرفانى
بس ايه ده
الواحد قال خروف بمبى يبقى الحياه فل وعال العال
انما الحقيقه مطلعتش وقلبتو المواجع علينا

Eman Henaish said...

ألبتي علية المواجع يا آبي :(

وبالنسبة للقضية اللي هترفعيها علي الوحش ... كلنا وراكي يا آبي :)

حنين القلب said...

ازيييييييييييييييييك وحشتينى والله
مكالمتك النهارده غيرت مودى خالص من مخنوقه وزهقانه من الشغل لحاله من الاحساس والحب بجد والله يا آبى
عايزين نكررها كل يوم ولو تفتكرينى برنه يا ستى
سلام يا سكرة
بحبك فى الله

Oss said...

يالهوى
ايه ده
انا دماغى ضربت
احنا بنتكلم فيه ايه بالظبط؟؟
:)
بس حوار حلو كده
والخروف ده لذيذ
ابقى سلمى عليه

وسيبك من الهم ده
انا مش باقول بيعى القضيه
بس مش توترى اعصابك كده
انا بطلت اسمع الطبعه الأولى والله علشان خاطر النرفزه

ملحوظه زوغننه
أنا ضفتك عندى فى الليست بتاعة الأعداء اللى على البلوج
(وش شيطان)
ان كان مافيهاش حاجه

son's egypt said...

السلام عليكم
دايما الضحية القضاء والقدر
وده عمرهم اللي مكتوب ليهم

RaRa said...

تخاريف خرفان تحفة
بجد بوست تحفة
ويسعدنى معرفتى بمدونتك الجميلة
وان شاء الله مش هتكون آخر زيارة ليا

خالص تحياتى
تقبلى مرورى

اربعين سنة ستيوتند said...

تصدقي خروفك ده ابن حلال و مستمع جيد
انا حاجيب واحد
:)

Unknown said...

والله الخروف ده دماغه عالية جداً
وبيفهم أكتر من ناس كتير متحكمين ف خلق ربنا ومالهومش أي لازمه

معلش ع التاخير

Zika said...

بصي يا ستي
هلا هلا عالجد والجد هلا هلا عليه
اولا نصيحه من اخ يعني
الخروف البمبي ده عايز قله في دماغه عشان كل شوية يضحك علي حاجه بتقوليها
معرفش مله الخروف ده
خرفان اخر زمان
الا قوليلي
انتي مش ناويه تحني عليا بخروف من دول ولا ايه ؟
:D
لا لا لا انا مش حاطط عيني عليهم من زمان ولا حاجه

محمد فوزي said...

بصي يا آبي , غير إني طبعا هنضم لفريق اللي مش فاهمين حاجه أو فاهمين بس كل حته لوحدها , إنما انا برده متدايق عشان انتي متدايقه ده أولا

ثانيا بقى لفت نظري حكاية إنك لما حد بيزعلك بتاخدي جنب دي , انا عايز أقولك إن انا بشوف ده أكبر غلط بيرتكبه صديق في حق صديقه , إنه يزعل منه من غير ما صديقه يعرف أولا إنه زعلان منه وثانيا هو زعلان منه ليه

أنا مش بتفق معاكي في الحكايه دي
خااالص ياريت متعمليهاش

تحياتي

WhItE HeArT said...

جميل حكاية الخروف البمبي ده عجبني بصراحه

ردوده عامله جو جامد

انا بفكر انتي ومفروسه تعملو مدونه واحده اسمها المفروسين لحسن انا حاسس انك خلااااص شوية وهتفرقعوا ياعيني

ههههههههههههههههه


ولا يهمك

تحياتي

Unknown said...

صباح التخاريف بقولك ايه هو انا نسيت اول الموضوع بس ده طبيعى ماهو كله بقى صينى فى تايوانى على حبه كورى

ربنا يرجعلك صديقك اللى غايب عنك

تقبلى تحياتى

alexandrany said...

يا بنتي في ايه ع الصبح كده
يا فتاح يا عليم يا رزاق يا كريم
ع الصبح كده
الواحد بيعد الايام اللي هينزل فيها مصر وانتي مش راحماني
يا بنتي مصر جمييييله
الواحد خايف ينزل لا ما يعرفش يعيش من الكلام اللي بيسمعه ده
بصي يا بنتي انتي عايزه الناس تبقي ايجابية
طب خدي الطريقة دي عندك
تمسكي البوست بتاعك ده ولو عايزة بوستات تانيه كمان معاها ماشي
وتطبعيهم على برينتر ليزر الوان
خلي بالك لازم تكون ليزر الوان مش ابيض واسود
وتجيبي طشت كبير وتليهم فيها وتفضلي تشربي في الميه دي تلات ايام ورا بعضهم
قبل الاكل وبعد الاكل وقبل النوم وبعد النوم كماان
رابع يوم هتلاقي نفسك زي الفل وابقي ادعيلي

الا قوليلي صح
الليفه صح بقت بسبعه جنيه ونص
اللي كنا بنجيبها بجنيه وباتنين جنيه
اشطه جدا
البلد زي الفل


ملحوسة كده من بتاعتك
اوعي تشتمي ولا تطولي لسانك المرة دي
انا مش ليا شتومتين عندك ولا ناسييييييييييييية
ههههههههههههه

Empress appy said...

رئيس جمهوريه نفسى
*****************
عيب عليك يا دودو انا شيلالك واحده بس بتاعتك ب105 يعنى ضرايب يا خويا اشمعنى انا هههههههههه طيب حلو الى طلعت بيه من كلامك الاتى على حد تخريفى اللى انا فيه
1- كوزى وبيرة دة مشروع عمل دماغ مساطيل درجه اولى
2- صديقى مش مهم دلوقتى هيجى غصب عنه
3- توشكى طلعت سجاير الحمد لله يعنى مش بهيس اهو لووووووووووووووولى
4- البيوت اللى بتقع عيوب تصنيع وانا من هنا بقترح انهم يعملوا لنا مكعبات او بيوت مكعبات واهى تبقى سهله كيك فى الهد والبنى
روح منك لليفه تهريك هو انا كنت ناقصه هسهس امشى من هنا هههههههههههههه






mayada
********
اديت اوردر للنحله والدبور يدوروا لها على قنبله زمنيه نفجرها بيها بس بالكلام مش الفعل الله يكرمك الكوكب متنيل مش ناقص ههههههههههههه نورتى يا مادى

Empress appy said...

ketchup
********
امشى انا ممكن اتفرج عليكوا انما مش افرج عنكم عيب عليك دى خرفانى اجدع من احسن واحد ماسك البلد دى واللى جنبها كلا البته لا اضحى بالولادى ابد
نورت يا كاتشوب





micheal
********
لااااااااااا انفض ده هو اللى فاهمنى فى البلد دى ههههههه نورت يا ميشو

Empress appy said...

ابتسم من فضلك
*************
يا ربى حتى الكيبورد مزرجنه فى الكتابه دى حاجه وهشه قوى يالا كفايه نورك عليك






الجمعاوى الاصيل
===============

شوفت اللى بيحصل ليه بدون داعى ولا مقدرمات يالا ربنا يستر على الجزء اللى باقى

Empress appy said...

shayma
==========
لا خرفانى بمبى لونا انما عقلا سوداويه اخر حاجه اعمل فيها ايه بس بدل ما تطق منى نورتى يا شيمو





Eman
=====
والبنى هى متقلبه لوحدها ايون يا اختى اقول يالا وخليكوا ورايا واجى ابص الاقيكوا كلكم اللى فى البى سين واللى فى مارينا وتبقى نيله لااا تمضوا على كده ههههههههههه نورتى يا قمر

Empress appy said...

حنين القلب
=========
حبيبتى انا كنت اسعد والله ويا سيتى انتى جيتى فى جمل عويناتى دى حتى الرنه لسه ببلاش ومقولوش هتبقى بخمسين قرش ههههههههههههه





Oss
=====
قايمه اعداء يبقى اهلا بالحروب ليه اعداء يا ابنى يالا مش مهم اموت فى الحرب انا ههههههههههه ليه الشرف يا فندم وجود اسم كوكبى فى مدونات الاعداء ههههههههههههه

Empress appy said...

son's egypt
=============

هو انا جرى ليه حاجه لا اله الا الله انا حالتى صعبه قوى كده يا ساتر يالا معلش بكرة تتعدل هههههههههه نورت الكوكب




rara
-=====

اهلا بيكى يا ست البنات ومبسوطه بيكى نورتى الكوكب كله وسعيده بانضمام فيكون جديد فيه

Empress appy said...

اربعين سنة ستيوت
=================

لااااااااا اوعى دى خرفانى حصريه فى الكوكب اصلك متعرفش معلش لسه جديد نورت الكوكب كله




انونيمس
=======

يا الها بالناس المختفيه المهم انك بخير الحمد لله ربنا يطمنا عنك دايما

Empress appy said...

زيكـــا
=======

زيكس يا ابنى بعينك وبعدين القلل دى للى زيك يا قلبى هههههههههه مش لخرفانى امشى من هنا دول دبلوماسين دول لو مسكو البلد هتتعدل كفايه انهم مظبطين كوكبى





محمد فوزى
=========
يا دكتور موستخبى فين بس بص يا سيدى انا اساسا مش فاهمه اللى انا كتباه بس عادى
موضوع الاصدقاء طبعا بيكونوا عارفين وعارفين زعلانه من ايه بس بيحبوا يستعبطوا فاهم فخلاص تفتكر اروح اصالحهم انا يعنى لا طبعا
وبعدين مالك بتدينى اوردر زى بابا كده حاضر يا حج مش هعمل كده تانى ههههههههههههههه
وبعدين انت كنت غايب فين مش لاقيك ولا اوعى عمرو مواطن مصرى يكون اكلك ههههههههههه

Empress appy said...

القلب الابيض
==========

تصدق فكرة هعرضها عليها بس كده يا ابنى الدنيا تولع بجد نورت يا قمر وعامل ايه





هيثم الدهشان
==========

ههههههه هو انت دماغك كمان قلبت صينى وعلى كله ربنا يكون فى عونك نورت يا هيثم

Empress appy said...

alexandrany
================

ومسكنى الواد الاسكندرانى من ايدى اللى بتوجعنى يا ريت كنت انطسيت فى الكيبورد بتاعتى ولا كونتش كتبت لك الكلمه دى انا بتتريق عليا ماشى علشان الوعد لك مرة كمان والتلته بقى هفرج عليك بلوج سوبت والنت كله واخلى الشات روم يتكلم عنك هتشوف هههههههههههههه
وبعدين بتسأل على الليفه ليه قولش الواد بيأخد شاور كل خمس دقايق دا انت كبيرك تنزل البحر وتطلع منه ينفضوك ويحطوك على الحبل تنشف هههههههههههههههه
ترجع بالسلامه يا قمر

الميكروباص said...

يا لهوي؟؟؟
بنزين 80 يا آبي
لالالالالالالالالالالالالالالالالالا
ازاي تصيفي في مارينا وتستعملي بنزين 80؟
خياااااااااااااااااانه

مهندس مصري بيحب مصر said...

انا تهت في البوست ده
عموماً انا جاي اسلم
:)
سلام عليكم

مهندس مصري بيحب مصر said...

انا تهت في البوست ده
عموماً انا جاي اسلم
:)
سلام عليكم

wanna b a physician said...

تصدقى انا اتلخبطت بس فى حاجة فاكره ان الاتوبيس مش بيتكهن فعلا لانه هيتركب هيتركب مهما كان
وكمان لما بيكهنوا مش بينزلوا غيره لا خلاص على كدا
وبيقولك قال عايزين يعملوا اتوبيسات من غير كراسى ما شوفتيش ههههههههههههههههههههه
بلا وكسه

alexandrany said...

ما هو مافيش بحر هنا عشان كده انا بسال عن الليفة
هههههههههههههه

نونو said...

يا نهار ابيض الواحد مش عاااارف
يعمل اية ؟
انا ملسوطة اوى انى دخلت اشوف الحوار دة ضحكتينى جدااااااااا
دومتى مبدعة

انا من اهوى ومن اهوى انا said...

appy :

اية المواضيع دى كلها

خروفك البمبى دا بيفكرنى بحمار الحكيم

لكاتبنا الكبير توفيق الحكيم

بس خروفك دا مصيبة بيدى حقن من تحت لتحت وانتى اصلا ماتتوصيش بتسخنى علطول

خلى بالك علشان خروفك دا ممكن يطلع أمن دولة ويغرغر بيكى وينطحك نطحة توديكى ورا الشمس

تحياتى متألقة دايما ومفرداتك قوية أخر حاجة

محمد فوزى

ادم المصرى said...

ايه ده انا مش عارف فى ايه بظبط بس تعرفى مفيش احسن من العجله البدال سريعه بردو احسن وربنا يبارك فيهم هع

محمد فوزي said...

انا مكنتش موستخبي ولا عمرو أكلني ولا حاجه احنا بس اللي عندنا النت عنده حالة هسس مزمن اليومين دول وخنقني فعلا , ده غير إني أنا أصلا اليومين دول مش في أحسن حالاتي

بس انا لسه عند رأيي لازم تحطي إحتمال صغنون إن أي حد حتى لو كان ذكي أحيانا دماغه بتضلم وعقله بيخبط في شجره وبيبقى محتاج حد ينبهه

ولا أيه ؟

Lady E said...

بجد الحوار كميل جدا زي صحبته

وكمان الخروف زي العسل اوعي تفرطي فيه وتدبحيه على عيد الأضحى

دي مش أول زيارة للبلوج الرائع بتاعك بس بجد مش هتكون اخر زيارة

bastokka طهقانة said...

عسول قوي خروفك البمبي ده و انتي اعسل منه

اوروفوار

funckydoctor said...

ههههه
باضحك على بوست يبكى فعلا
ربك يستر

غادة said...

ابى ازيك
بصى بقى بما انك اتكلمتى فى كل حاجه كل اللى اقدر اقوله بكره ان شاء الله احتمال تتعدل دا احتمال يعنى اصل مش باينلها بس سيبك م اللى بقوله
قوليلى الخروف العثل دا جايب اللماضه دى كلها منين
وبعدين واخد عليكى اوى
واحشتيى و احلى سلام ليكى

Mohamed Hesham Safa said...

بوست قوي ومتشابك كالعادة ... لكنه هذه المرة متشابك جدا ...

حاجتين لفتوا نظري :

أولا : البنزين الـ 80 ما غليش بس المشكلة انك تلاقيه ... أحد سواقيت التاكسي في القاهرة قال تعليقا على هذا الوضع : "احنا بندور على البنزين الاول وبعدين ندور على الزبون"
حاجة تجن الصراحة يعني هو الحاجة اللي متغلاش يطلعو عينا عشان نلاقيها ...
حسبي الله ونعم الوكيل ...


ثانيا : أنا مش فاهم امتى هنبقى بني آدمين ... احنا فعلا نفتقد أقل وأبسط الاستعدادات لمواجهة الكوارث والمشاكل العادية مش الكوارث بس ... والاهمال أصبح ظاهرة عامة وأساسية ... والعملية ماشية بستر ربنا ... اه والله بستر ربنا بس ... يعني قبل ما يشوفوا الطيارات اللي هتنقل رجال الاعمال دي طب يشوفوا طيارات هليكوبتر للطوارئ عشان الناس اللي بتموت دي ... أو ياخدو فلوس من المشروع الأول عشان يمولوا التاني ... ولا ايه ؟؟؟

ربنا يصلح الحال يارب ...

تحياتي ...

والسـ ختام ــلام

ahmed_k said...

يا آبي تعالي بسرعه عندي في مدونتي ليكي واجب انما اييييه
حتة سكره
مستني اشوف اجابتك عليه
متتأخريش
انا هناك معاي خروف من خرفانك البمبي
واخده رهن لحد ما تاجي

وبصراحه الخروف عامللي دوشه
بسرعه بقه

Empress appy said...

لورنس العرب
***************
مش عربيتى يا عم دى انا اللى جبت كده ههههههههه دى عربيتى تنكه تناكه مفيش زيها نورت يا لورانس






مهندس مصري
**********

اهلا يا هندسه ازيك الحمد لله انك بخير نورت بلوج سبوت تانى

Empress appy said...

wanna b a physician
************************
طيب ما هو بكراسى من غير الناس كده كده راكبه فوق بعض حتى يبقى اوسع هههههههههههههه نورت يا دكاترة






alexandrany
****************
ههههههههه ماشى يا اسكندرانى موافقه ابعت لك واحده هات العنوان

Empress appy said...

نونو
========
اهلا بيكى يا حبيبى نورتى الكوكب كله وسعيده بيكى






انا من اهوى ومن اهوى انا
************************


اهلا بيك واو سمحت انا خروفى مش حمار عيب ده لسه على قده استر عليه بدل ما يروح بقى قمل الدوله نورت الكوكب

Empress appy said...

أدم المصرى
**********
ايووووون هو ده الحل الجامد الصح نورت يا ادم






محمد فوزي
**********
كلنا فى نفس الحاله وحاضر يا محمد هحاول اسمع كلامك بجد نورت الكوكب

Empress appy said...

Lady E
=========
بلا متخافيش خرفانى مش للدبح دى اللى بتفكر ليه نورتى الكوكب وسعيده بيكى







bastokka طهقانة
=======================
ميرسى يا قمر ربنا يخليكى ونورتينى خالص

Empress appy said...

funckydoctor
****************
يا رب يا دكتور نورت الكوكب بس انت بتضحك عليا كده عاااااااااا


نور
=======

خروف تربيتى اعمل ايه بيدلع عليا نورتى يا نور الدنيا كلها

Empress appy said...

محمد هشام
==========

انا عارفه انه مش غلى انا بقول غلوا التانى وسابوا ده وبعدين بدأ ده يتلاشى فهمت يا محمد ومعلش انا عارفه انى لخبطكم نورت الكوكب كله







ahmed_k
**********
عقابا ليك يا احمد علشان الواجب ده هسيب خروفى عندك يبهدل الدنيا وشم جايه هههههههههههههه

Share |