لما السلبيه تأكل عيالها



صباح الخير على الحلوين
مفيش باميه النهارده النهارده اليوم المفتوح للبتنجان
يالا كله يجهز البتبوتر بتاعه والكيبورد ويجاوب ما هو لازم اشغل عقولكم فى استمحانات حتى فى الاجازه مش زمان كانوا بيدولنا واجب فى المدرسه زى طابور الذنب فى الجيش كده فى الاجازة وقال ايه علشان عقولنا متركنش مش فاهمين انها اصلا راكنه لوحدها من بدرى ودلوقتى فى ظل الكرار الجميل اللى اصدرة الاستاذ القطنه مبتكدبش والاستاذ وزير التعليم من غير التربيه لانهم خصخصوا التربيه خلاص فى انهم هيستبدلوا الكتب بكمبيوتر محمول للاولاد وده بمقابل مادى بسيط كالص ومش هقول على الرقم علشان متتخضوش

(معلش دى زنه نحله ودبور فى الباميه )

نؤسف يا جماعه هنرجع تانى
هسأل أساله وان شاء الله يا رب ينطس فى الكمبيوتر بتاعه ولا فى الرامات بتاعته اللى مش هيجاوب بصراحه وهقول لكم ليه الاسئله دى هتوضح احنا ايه..... فى النهايه يعنى شخصيه كل واحد بس زى ما اتفقنا قبل كده كلام خرفان (لانى بعتبر كلامهم اللى ماشى وبجد دلوقتى وملتزمين بيه احسن من الروجاله بتوع الاحزان هههههههههههههههههه)
هنجاوب من غير دبلوماسيه ومن غير ما اخاف لا صورتى تتهزز على واحده ونص قدام الناس والبشريه والفياكين اللى فى الكوكب
ده اذا كنا عاوزين نبقى فياكين وفيكونات كويسين

شيفاك ياللى بتنفخ وتقول خلصى يا ست الكوتكوته وهقولك اخرس كالص مش عاوزة اسمع اى نطح هنا الاسئله للبنات والاولاد يعنى البنات هتحط نفسها فى نفس المكان بس هستخدم لفظ واحد بد ل ما اقعد اقول عرفت او عرفتى ... فاهمين ولا شكلكوا هتروحوا فى شجرة ومش هتفهموا هههههههههههههه يالا نبتدى

1- لو عرفت ان ابن جارك او قريبك مدمن فى بدايه الادمان او حاله متأخرة تصرفك هيكون ايه ؟ يعنى هتتكلم معاه هتقول لاهله؟

2- لو عرفت ان اخوك لا قدر الله هو اللى كده مدمن يعنى اى نوع من الادمان ان شا الله حتى مدمن نمل اه والله سمعت من البت شيمو انهم بيشموا نمل ههههههههه هتعمل ايه؟

3- لو بنت او ولد قريبتك او جارتكوا عرفتوا انها مرتبطه او بتحب او مصاحبه علشان الكلام يبقى واضح او عامله علاقه من اى نوع مع شا ب او اكتر وللاولاد مع بنت او اكتر هتعمل ايه؟

4- لو البنت دى او الولد كبار فى السن يعنى عدت المراهقه برضه هتعملوا ايه وانتم شايفين ان الولد ده مش كويس ؟ولو فى سن المراهقه كمان هتعملوا ايه؟

5-لو جارتكو او قريبتكوا او حد من الاصدقاء راجل او ست متجوز وبيخون زوجته او بتخون زوجها واتفقنا ان الخيانه مش مفروض تبقى موجوده بس علشان ارض الواقع اكتشفنا انها متنيله وموجوده هتعملوا ايه معاهام وتصرفكوا ازاى؟

6- لو فيه فرح جنب البيت بتاعكوا جيران يعنى وشوفتوا فيه مصايب يعنى رقاصات على حشيش حاجه تيجى كده على بانجوو على بيره هتعملوا ايه ؟ومش عاوزة هزار محدش يقولى هنزل اقعد معاهم قطم رقابتكوا ههههههههههه برضه بنات واولاد تقولوا تصرفك الحكيكى هيكون ايه ؟

7-لو شوفت واحد مرمى فى الشارع على طريق او فى جنينه هتعمل ايه او هتعملى ايه يعنى هتمشى ولا تقف ايه التصرف اللى هتعمله؟

كفايه عليكوا كده بس لو مجاوبتوش بزمه هعلقكوا على باب الكوكب من رجليكوا فى سفينه فضائه واخلى الخرفان والنحله والدبور يبهدلوكوا

تشكرات من نحله ودبور :- ميرسى لكل اهالى بورسعيد اللى استقبلونا فى بلدهم وخاصه بالشكر بابا ابو خالد بجد يا اليوم كان تحفه جدا ومبسوطه بيكم والحمد لله رجعت نمت بقالى يومين هههههههههههههه متشكرة قوى لكل اللى قابلتهم هناك

كان معكم ناظر اول ومدير تانى ومدرس تالت ومشرف خامس آبى هانم بتنجانى

82 اخبط وقول رايك:

الميكروباص said...

أنا جيييييييييت

الميكروباص said...

اجابة الاسئله:
1- أقولك الصراحه، انا أعرف كذا واحد كانوا أصحابي وجيراني وادمنوا ولكني لم أفعل أي شيء
ومنهم واحد توفى إلى رحمة الله من سنه ونصف لأنه أخد جرعه زايده
لكني لم أفعل شيئا على الاطلاق
لا أنا ولا حتى أخوه - وده على اعتبار أن الواحد بيقلق من الكلام معاهم خشية ردود الأفعال السيئه
2- لو أخويا هو اللي ادمن انا هاكسر الدنيا، مش هانصحه لأن مفيش وقت وكل يوم بيعدي عليه بيزداد سوء، على طول هقول للوالد ولازم ندخله المستشفى فورا قبل فوات الاوان
3- ولله لو أعرف أخوها هقوله- بشرط أن تكون عرقتي بأخيها قويه جدا- لأن لو علاقتي به عديه هتكون ردود الأفعال صعبه وهيقولي انت مال .....
أما لو كان واد هو اللي ماشي مع واحده همسكه امسح به الأرض مباشرة
6- عندنا عيله في المعادي اسمها عائلة أبو رواش، كان عندهم فرح كبير ومش بيعملوا الافراح إلا في الشوارع ،كان عندهم فرحين في اسبوع واحد، وقفلوا الشارع، والساعه 1 باليل البيره نزلت و القاعده كان مزاجها عالي اوي، انا رحت اتفرجت عليهم، رجاله بشنبات وقاعدين على ترابيزات في الشارع والبيره موجوده بكثره وأطباق الترمس على كل ترابيزه وبتبقى مسخره، لكن يا آبي انا هعمل ايه، انا بروح اتفرج عليهم انا واصحابي، وبنقول عليهم ناس وسخه ونمشي- وده لأن ناس من البوليس بييجوا بعربيات البوكس عشان ياخدوا الواجب بتاعهم بالمره، اشمعنى هما يعني
7- حصلت
كان واحد نايم في بير السلم عندنا
رحت جبت له البوليس- البوليس قومه- والضابط شم بقه لقاه شارب، وقاله طلع البطاقه لقى البطاقه من القديمه ومن غير صوره، راح ضربه حتت قلم جبار، واخده ومشي
أما لو كان واحد مرمي عشان حادثه أو حاجه تانيه فأكيد هعمل أي حاجه عشان اساعده- وربنا يستر لما يدخل المستشفى البوليس مايمسكنيش ويقولي انت اللي عملت فيه كده

اعفيني من اجابة السؤال الرابع والخامس

Vague said...

نياهاهاهاااااااا

انا مش مصدق نفسي يالمبي

تاني واحد..باعتبار ان الاول ده واخد تعليقين

بصي الاجابات الدبشية:

1-لو جاري وصاحبي..هكلمه (المشكلة بيقولي انا عارف انها غلط..وانا بشرب بمزاجي) ..انما لو ماليش علاقة بيه مش بحتك بيه


2- لو اخويا (انا معنديش ولاد) هكلمه برضه..مانفعش ولاقيته مبطلش هقفش عليه قفشة طين..يعني ضرب ممكن ..مافيش خروج..مافيش موبايلات..مافيش فلوس __كل ده بعد الكلام طبعا


3-لو بنت ليا حكم عليها..هكلمها الاول وانا ماسك نفسي خالص من اني اقوم ارزعها علقة
لازم تستجيب فالحالة دي

4-مش شايف ان السؤال ده جديد عن التالت


5-ماليش دعوة..مش هعمل حاجة بس هنظرلهم بنظرة كراهية..مش شفقة


6-لو فيه حشيش وبانجو هبلغ البوليس وش..وهبلغوا بتاع 543 مرة عشان مش بيجوا من أول مرة


7-اخخخخ..اتحطيت فالموقف ده وكان معايا واحد..قلتله تعالى نعمل حركة مرجلة ونوديه المستشفى..راح جري بالعربية زي مايكون هو اللي قتله فعلا
قلتله حرام عليك والله...قالي اسكت انت مش عارف حاجة ولسه صغير

ابن عمتي شاف واحدة طفلة مرمية فالشارع راح وداها المستشفى راح باعتوه عالقسم..قالوله انت ابوها ومتجوز عرفي..وقعد 3 تيام محبوس والله واهله مش عارفين هو فين..لحد لما يئسوا انه يعترف

واستني ماتمشيش..انا هروح ارود فالبويت اللي قابله تالت

الطائر الحزين said...

1- هكلمة واقول لأهلة


2- هروح بيه لاقرب مستشفى ونعالجة

3- هدعى ربنا يهديه أويهديها ومش هاقول لأهلها بس هحاول اوريه نفسى يمكن ينكسف ؟

4- نفس الجواب السابق

5- مش هعمل حاجة لا هقول للزوج ولا للزوجة يمكن يستحوا من ستر الله عليهم

6- ولا حاجة والموضوع مش محتاج فرح ده موجود فى الشوارع - يعنى البانجو ممكن واحد ماشى فى الشارع ولافف سيجارة عادى وكمان فيه بنات فى الشارع بتمشى اكثر من الراقصات على الاقل الرقاصة معاها رخصة

7- مرمى ازاى يعنى ميت وبعدين حالته ايه من الشحاتين ولا مقتول ولا ايه حددى؟

Hypatia said...

1-لو اهله ناس محترمين وبيننا موده ومعرفه واثقه انهم ناس عاقلين ومحترمين يبقي حأدخل بيتهم واتكلم معاهم بهدوء واقولهم اللى انا اعرفه عن ابنهم او بنتهم المدمنه بالتفصيل لكن لو ناس اي كلام فا انا مش حأهزق نفسي وادخل نفسي معاهم فى مشكله حساسه زي ديه لانهم ممكن يجيبولى مصيبه واللى فيهم يجيبوه فيا وديه بتحصل كتير لما الواحد بيوجه نصيحته لناس مش ولابد


2-لو اخويا عرفت عنه حاجه زي كده حأكسر الدنيا لدرجه انى ممكن ابلغ عنه حد من معارفنا فى البوليس يدخله مستشفي ويربطه فى السرير بكلبشات
حاعمل المستحيل فعلا من غير تردد

3-لأ العلاقات الشخصيه ديه عمرى ما باتدخل فيها ممكن يكونو بيحبو بعض وممكن تكون البنت كويسه والولد كويس ولما انا اقول للاهل بالطريقه ديه ابقي قطعت عليهم فرصه انهم يقولو لاهلهم بطريقه محترمه ولو بنت اعرفها مرتبطه بولد مش كويس حأقولها هى او حأقوله هو بس مش حأقول للاهل خالص

4-نفس الاجابه اللى فاتت

5-لو الست اللى جوزها بيخونها تخصني اوى اوى اوى حأقولها بس بعد ما اكون متأكده مليون الميه من خيانه جوزها ومعايا اثبات لو متخصنيش مش حأتدخل خالص
لو العكس ست اعرفها بتخون جوزها طبعا عمرى ما حأفضحها ولا عند جوزها ولا عند اى حد لو تهمنى او جوزها يهمني حأنصحها يا تطلق وتتجوز التانى بالحلال يا تقطع علاقتها بيه حانصحها بالمعروف من غير اطلاق احكام لان الله واعلم بظروف خلقه


6-حأبلغ عنهم البوليس انا مش باحب الازعاج ده الافراح ليها مكانها وفيه قاعات افراح فى فنادق وفيها شرب يروحو يعملو الفرح هناك ويشربو براحتهم بس ميقفلوش الشارع ويصدعونا طول الليل فا طبعا من غير تفكير حابلغ عنهم


7-لو واحد مصاب ومرمي طبعا حاساعده لو اقدر او على اقل تقدير حأجيبله مساعده واطمن انه وصل مستشفي
لو حد نايم او كده فا مش حاتطفل عليه اكيد

انتهي الاختبار
:))

ابي ياريت يا حبيبي تشوفيلنا موضوع التعويضات ده الناس استلموه ولا لأ انا عارفه انك جادعه وبميت راجل انا لو في مصر والله والله كنت سافرت مطروح وتتبعت الموضوع بنفسي

Empress appy said...

الطائر الحزين
==============

معلش يا شوباب هرد هليه اخونا مزنوق فى السؤال
ايا ان كان يا ايهاب واحد نايم فى الشارع شكله مبهدل او ماشى يكلم نفسه من اللى بنشوفهم كتير فهمت السؤال

الطائر الحزين said...

7- هسيبة مش هعمل له حاجة

===================
اللى بتحركنى فى كل هذه الاشياء نظرتى للشخص يستحق ام لا ايا كان احساسى يعنى

مدحت محمد said...

طيب اولا الصورىة اللى فوق تهلك من الضحك

تقريبا تلت ارباع الاسئلة حصلت معايا بجد

حدجارى مدمن كل اللى بعمله انى بنصحه الصراحة وبخوفه معملتش اكتر من كدة

لو اخويا انا معنديش اخوات ولاد هنصحه برضه واحاول اخوفه منها

لو بنت والله برضه نصحت

والله انا مش بعرف استخدم غير لسانى
والحمد لله بعرف ااثر بيه جدا

بالنسبة لخيانة الزوجة مكانش ينفع افضح حد
بس

بالنسبة للفرح كل الافراح بقت كدة اساسا فعادى يعنى


واحد مرمى فى الطريق
هخاف اجى جنبه بجد

لكن ممكن اوقف اى تاكس
وابلغه او اى حد قريب من المكان
لو انا غريبعن المكان طبعا ومعرفش الشخص
بس خلاص

مواطن مصرى نايم said...

1-
لا انا تعاملى قليل جدا مع اى حد فى المنطقة عندنا
برستيج بقى يا ايبى
حتى الجيران يمكن فى ناس متعرفنيش بجد و الله
ـــــــــــــ
2-
انا معنديش اخوات ولاد
هى بنت واحده
ـــــــــــــ
3-
بالنسبة لموضوع البنت
بصى هو حصل فعلا
بس كانت زماله
يعنى كانت بتعاملهم زيهم زى اى واحده صاحبتها
بس انا نصحتها انها تقلل كلامها مع اى ولد لان الناس بتاخد باللى هى بتشوفة
و اقتنعت و خلاص
لو ولد مصاحب بنات
بصى يا ايبى مصاحب دى معناها كبير
لا بصى انا عندى زمايلى بنات
بس مش صحوبيه
التعامل فى حدود انها بنت و انا ولد
ــــــــــــــــــ
4-
نفس الاجابة اللى فاتت
ــــــــــــــــــ
5-
ايبى
الطيبون للطيبات
لو هى بتخون جوزها هو كمان حيكون بيخونا
الطيور على اشكالها تقع
ــــــــــــــــــ
6-
انا قلت فى اول اجابة ان اختلاطى قليل
بس انا اتعزمت فى فرح فى اكاسيا نادى مشهور لو مش عارفاه يعنى
كان كده
بس حعمل ايه
لازم اكون سلبى لان الوضع اكبر منى
ـــــــــــــــــ
7-
مرمى فى الطريق
و الا نايم زى اطفال الشوارع يعنى
لو مرمى ححاول الاول اعرف من بعيد اذا كان حى و الا ميت
عشان انا ملبسش التهمة
لو حى و مثلا خبطاه عربية
حشوف حد فى الشارع ماشى و اقوله يشيله معايا نوديه مستشفى
لانى مينفعش ادخل بيه مستشفى لوحدى برضوا حلبس التهمة
ـــــــــــــــــــ
ايه بقى الاستجوابات دى يا سيادة اللواء عقيد طيار متقاعد ايبى هانم

محمد فوزي said...

يارب ,
ده قدرنا ومش هنعترض عليه خلتلنا في النت واحده عندها نحله ودبور وخرفان وقلل وبتسأل أسئله تودي في داهيه ,
صبرنا يارب !!!

الأول : لو جاري أو قريبي مدمن مش هتكلم معاه هو مباشرة هاروح لأهله على طول وأبلغهم بهدوء وأحاول إني أخليهم يستقبلوا الموضوع بعقل , ومش مهم إنهم ممكن ميصدقونيش ولا ممكن يطردوني حتى المهم أحس إني عملت اللي عليا

التاني : لو أخويا بقى طبعا بعد تجاوز الصدمه ولأنه صاحبي جدا فأنا هتكلم معاه بهدوء وأقنعه إنه يروح يدخل مصحه وأفهمه إن ده هيكون بيني وبينه ومحدش تاني هيعرف عنه حاجه ولا حتى الوالد والوالده وهنتحجج اننا مسافرين أجازه مع إصحابنا مثلا

انما لو رفض أعتقد إني هلجأ للقوه والإجبار وطبعا في الحاله دي الإستعانه بباقي الأسره

التالت والرابع : بصي الموقف ده معقد وكل حاله ليها ظروفها لكن لو بنت مراهقه أو ولد مراهق ولسه فيهم أمل هقول لأهاليهم بس بطريقه شيك يعني مثلا ممكن أقول للأب لو ولد أو الأم لو بنت إني ملاحظ إن فلان أو فلانه في شلته القريبه منه أو منها ناس مش كويسين أنا خايف عليه أو عليها منهم وهما المفروض يكملوا بقى , واضح

إنما لو تعدوا المراهقه
لو بنت سواء كانت بتحب واحد أو عشره طالما مش في منطقة وجودي ماليش دعوه

لو ولد وصاحبي هنصحه كتير ومش هقاطعه
لو ولد ومش صاحبي هنصحه مره واحده بس

الخامس : الخيانه إمممممم
لو راجل بيخون مراته هنصحه وأتكلم معاه وأزن عليه وأفضل وراه بس مش ممكن أقول لمراته طبعا

لو ست بقى هقطع علاقتي الأسريه بيها وبجوزها وبدون إبداء أسباب ومش هفضحها طبعا

السادس : بصي هو عموما الأفراح اللي من النوع ده بتبقى الشرطه عندها علم بيها وموافقه على الكلام ده كله للأسف وعليه مش هعمل اي حاجه

السابع : انا فعلا وقسما بالله لا أتخيل نفسي أسيب بني آدم مرمي على الطريق وأمشي وإن شالله حتي ألبس أساور , وفعلا مش نعر بشوف إن اللي بيعمل كده معندوش أي ذرة إيمان بربنا وثقه بعدله
وحصل قبل كده إني انا صدمت عيل صغير أبوه سابه والولد جري في نص الشارع فجأه وحاولت اتفاداه لكن صدمته بجنب العربيه وده بعد فرمله وإنحراف مريع بالعربيه وبرغم ان ده حصل قدام قريه الأب ده وبرغم إن أهل الولد كان ممكن يقطعوني بس وقفت ولأن الناس كانت حاسه إني مش غلطان معملوش حاجه وأخدت الولد وأبوه في العربيه على المستشفي ومسبتهومش إلا لما عملوا أشعه للولد وطلع إنه عنده إرتجاج خفيف ومفيش نزيف داخلي والحمد لله , رحت شغلي ورجعتله آخر النهار ولقيته زي الفل وحمدت ربنا كتير قوي على الموقف ده ولحد النهارده كل ما أفتكره

وأديني جاوبت بصراحه والله ومش فاضل غير إني أقول
منك لله يا شيخه
هههههههههه

في حب مصر said...

السلام عليكم
كل دي أسئله؟؟؟؟؟؟؟؟؟
لو عرفت ان ابن جارك او قريبك مدمن فى بدايه الادمان او حاله متأخرة تصرفك هيكون ايه ؟
الاجابة هاروح أدمن معاه.. لان الادمان هو الحاجة اللي بتخلي الناس تنسيى اللي هي فيه دلوقت..هههه وسمعت كدة ان الحكومة بقت سايبه تجار المخدرات والشباب المدمن براحتهم خالص.. تقريبا بدأت ترفع شعار خلي الشعب يتسطل؟؟؟؟

لو عرفت ان البنت جارتنا او قريبتنا مصاحبة؟؟؟ هاروح أفتن عليها وأقول لأهلها علشان يسودو عيشتها.. بس يارب ما يكونش أهلها عارفين ساكتين..ههههههه

لو عرفت ان جارتنا أو قريبتا بتخون جوزها.. أبتزها وأشغلها في الدعارة..ههههه.. لا لا بهرج.. هاروح أفتن عليها برضة وأخلي جوزها يقتلها ونخلص م الاتنين؟؟

لو شوفت فرح وفيه رقاصة.. هانزل الفرح وأنقط الرقاصة.. دي برضة ست بتتعب..ههههههه

لو شوفت حد ميت في الشارع.. اتصل بالاسعاف والشرطة واسيبه وأمشي احسن تيجي الشرطة تتهمني اني قتلته ويلبسوني قضية..هههههه

تحياتي

رئـــــيسـة حزب الأحلام said...

احاول انصحه -1
اخويا ربنا يستر عليه بجد مش عارفة رد فعلى هيبقى ايه -2
بصى الواحد لو اتكلم فى المواضيع دى البنت بترد على جامد ومابتحبش حد بنصحها فالواحد بيدعى لها بالهدايه -3
لو كبيرة هى عارفه مصلحتها بس هقلها بطريقة هاديه اما لو مراهقة غلازم تصحبيها وانتى بتكلميها -4
الصراحة الواحد مابقاش يبص من الشباك بس الجامع اللى قدامنا اكيد مابيسمحش بكدة -6
خيانة لا اكيد هنقف امامهم -5
السؤال الاخير جامد اوى بس فى مرة كان فى واحد نايم فى وسط الطريق وماحدش جة ناحيته
واهى دنيا
تحياتى لكى

WhItE HeArT said...

شيفاك ياللى بتنفخ وتقول خلصى يا ست الكوتكوته

انتي كنتي شايفاني بجد وله ايه

هههههههههههههههههههه

المهم نيجي للرد الاسئلة حلوه جدا ولازم الرد يكون جد جدا

1- هروح اسأله جبتلي قرص الكبابتشينو معاك علشان اكيد هكون مدمن قبله

2- هعلقه من قفاه على باب زويله

3- انتي مقلتيش فيهم اختي ولذلك انا مليش دعوه اللي عايز يصيع يصيع انا مالي

4- برضه مليش دعوه

5-برضه مليش دعوه

6-يااااه بقالي فترة مقعدتش القعده الشيك دي اكيد هنزل جري واقتحم الفرح وافرح بفرحتهم

7-ههههههههههههه هفتكره نايم ومش لاقي سكن وهسيبه وامشي

هههههههههههههههههههههه

تحياتي وطبعا دي مش اجاباتي دي اجابات النحله والدبور بتوع حضرتك اللي انا لتخنقتلك بسبب زنهم

متضايقكش من اني الاجبات اللي قلت اني مش هتدخل لإني فعلا من كتر المشاكل مبقتش ناقص مشاكل لكن لو اختي هناقشها بكل هدوء وهعرف رأيها في الموضوع ونتناقش لحد ماان شاء الله نطلع بحل يرضي جميع الاطراف ولو الشاب ده زباله هبينلها بموقف انه راجل لا يمكن الاعتماد عليه


تحياتي

Z_Diva said...

كده يا ابي هنتفضح رسمي و يظهر الوطيان و قلة الاصل :)))))))

ج1: ماهو حسب الظروف, يعني لو بيضرب حشيش و بانجو كده ترويش, خلاص يتفلق, لكن لو حاجة عويصة و ادمان و دهولة, اعتقد اني هقول لحد من فاميليتوتا, او ابلغ عنه و يتحبس و نخلص :))), لا مش هبلغ, بس هقول لحد من عيلته, او احتمال اطنش برضه, لو اتحطت في هذا الموقف هنعرف :)

ج2: لو اخوي -انا ماليش غير اخت واحدة,و هي بنت ناس قوي الصراحة, مش وش ادمان خالص, الحجات دي ممكن تطلع مني انا الصراحة :) -بهزر عشان اصحاب النية الطيبة اللي بتصدق, انا حتى السوجاير مبطلاها من تانية اعدادي :))))-- المهم يعني نرجع للجد, هحاول اكلمه او هانصبلوا فخ عشان اشحنة مصحة علاج ادمان, بس برضه لو حاجة جامدة يعني, انما لو سجاير ملغمة, هنصحه بس, و اوصيه ميتقلش العيار لتقلب بجد

ج3: لا انا معنديش مشكلة في حكاية اللي مصاحبين دول, بس طالما انهم مش بيعملوا حاجة غلط, يعني يتقابلوا في نادي او مكان كويس مليان ناس ماشي, لكن تركبلي معاه عربيات بقى و لا يروحوا السيما و يحجزوا اخر صف, تخد كلمتين في جنابها او لو اللي اعرفوا ولد هبهدله, عشان هما فاكرين نفسهم فوق القانون, مش معايا يا بابااااا

ج4: لو اللي مرتبطين بيه او بيها دول عالم لومامة, هنبههم و اكشفلهم الشخصيات الدنيئة دي, بس هما احرار بقى لو مسمعوش كلامي, يبقى يضربوا ذاتهم بالبشبش و يتفلقوا

ج5: والله بقى دي مش عارفة خالص, هل اقول للمتخان, و لا انبه الخائن و اهدده اني هقول للطرف التاني و لا اسبهم يولعوا في بعض, اعتقد هيكون حسب علاقتي بالناس دي و درجة قربي منهم

ج6: ماعتقدش ان ممكن يكون في جنبنا فرح زي كده, بس ممكن اروح فرح و يكونوا بيشربوا, بس هما احرار انا ماليش دعوة. مش هروح انا اقولهم ماتشربوش. هما ليهم انهم يشربوا و انا ليا اني ماشربش و خلاص

ج7: بصي هو لو واحدكله من بتوع الشوارع دول و نايم ولا سكران و لا مسطول او كده و لا هفكر اني اجي نحيته, لكن لو حد شكله محترم و مضروب ولا مقتول ولا حاجة هكلم البوليس او الاسعاف و يجوا هما يتصرفوا, طبعا هتصل من تلافوز عام و اخلع لما اسمع السارينة, بدل مروجلي تجي في التحقيق و يكتشفوا اني القاتل المتسلسل اللي ورا الجرايم التي هزت اعصاب المواطنيين الامنيين :))))

بس يا جميل ادي الحكيكة العارية اهي, بلا منظري امام الشعب بلا وجع قلب, خلي كله يبان لبته و تدوب قشرته, بس مافيناش من قلل و خرفان, اتفقناز ؟

shabfa2re said...

معظم الحاجات مش هقدر اعمل فيها حاجة

Anonymous said...

1_ علي حسب سنه ياابي هتصرف يعني انصحه لو كبير اقول لاهله وانصحه لوسنه صغير
لكن تعاملي معاه مش هيختلف هفضل اعامله زي ما كنت بعامله الاول وده مش كلام لاني اتحطيت في الموقف ده قبل كده
2_ اخويا هطخه واخلص من عاره ههههه لا اخويا هفضل وراه لحد مايبطل وفي الحكايه دي
انا ممكن اعمل ارجوز بقي لان عض قلبي ولا تعض اخويا في ناس مدمنه صابون ونمل فعلا
3_ تبع العلاقه وتبع البنت وشخصيتها يعني لو مضحوك عليها ولا هي عندها مشكله في تربيتها واخلاقها
بتحب يبقي ادعي لها انها ترتبط بالشخص ده وانصحها يعني
تتاكد اخر الحكايه دي ايه او هي اهلها عارفين واقولها لو قصده خير لازم يقول لاهلها لانها مش بتعمل حاجه غلط
لكن لو الحكايه بقي سنكحه وخليني ايزي فجده هيبقي من البنت لانها اساسا سلوكها هيبقي مش كويس
هنصحها برضه اتعدلت اوك مااتعدلتش انا شخصيا هبعد عنها بس هدعي لها بالهدايه بقي لان في بنات دماغتهم
قفل مصدي اقولها مش عارفه ايه تقولي ايه ببقي عاوزه اقلع الشبشب والله
4_لو البنت برضه كبيره يعني هنصحها واحاول اوصلها وجه نظري بالامثله الحي ودي كتير وهعمل كلومبوا
عشان اثبت لها ان الانسان ده مش كويس ويبقي الله اما بلغت لو في المراهقه هحسسها ان اختها الكبيره واخليها تطمن ليه واحاول اساعدها ويمكن كمان افبرك لها قصص عني واقولها ده حصل معايا كذا وكذا والقصص دي ممكن تكون من وحي خيالي بس عشان اوصلها النصيحه بطريقه غير مباشره لان السن ده له حسابات تانيه في الحالتين مش هقول لاهلها ممكن اخليها هي اللي تقول لهم لان ده ممكن يجيب نتيجه عكسيه


ابي اطلع البرشام بقي ولا ايه رائيك

5_هتصل بالبوليس ههههههه متحطش في الموقف ده ومش عارفه هعمل ايه بس غالبا مش هعمل حاجه
6_لا هقف طبعا والله لو هروح في داهيه هقف عمري ماهقول انا مالي ومره والله شفت ست عجوزه نايمه في الشارع افتكرتها تعبانه لانها كانت نايمه بطريقه عجيبه في شارع النصر اللي في امبابه عند قضيب القطر
حته مقطوعه نزلت وفضلت اصحي فيها اكتشفت ان ده بيتها ولما بحكي لماما كانت هتديني بالجزمه لان الحته دي وحشه بس مش بحرم
هتديني كام عارفه لو مطلعتش الاولي انتي حره ادبح لك النحله والدبور

حبيبـــــــة القمـــــر said...

ايه ياعم الاسئله الصعيييييييبه دي
وال انا جايه جري ال
مش قادره تعدى على اسماعيليه دي قريبه من بورسعيد حتى
ياللا بقى تعالي
تعالي اوااااااااااام
انتي لسه مجتيش

ماعلينا نبدا نجاوب وبصراحه عشان الدبابير والخرفان متشتغلش عليا

اكيد هكلمه وانصحه وهكلم اهله واعنفهم عشان سمحوا بكده ولو ميعرفوش تبقى انيل واضل

لو اخويا لاقدر الله هكلمه الاول اكتر من مرة بالليلن والعنف وبعدين لو مقتنعش هكلم ماما لو مقتنعش يبقى بابا يتعامل بقى

والله النوعيه دي كتير ومش بتقتنع بكلام حد بعيد عنها وان بينت انها مقتنعه وهتتغير
بس لو حد يهمني بفضل وراه لحد مايقتنع لو محصلش ببعد عنها وانا مقتنعه ان البيت هو السبب من الاول ومش هيحلها بسهوله

لو البنت عدت المراهقه تبقى فاهمه وعارفه ايه الغلط من الصح
ممكن اكلمها كنوع من التذكير للصح اللي هي تناسته ولو مقتنعتش وهي اخلاقها كده وعادي بالنسبه ليها يبقى خلاص هي مقدرتش كلامي يبقى ابعد عنها واتجنب حتى رؤيتها .

لو متجوزة تبقى مصيبه سوده لأن مفيش اي مبرر ولا حجه مهما حصل تخفف عملتها السوده
ولازم اكلمها واعقلها او ادور على اللي يعقلها من غير ماتحصل شوشرة

لو فيه فرح بالشكل الماجن دا مش بقدر اعمل حاجه
غير اني اقفل البيت كويس ولو قدرت اسيبه اليوم دا اسيبه
لأن باختصار محدش بيسمع الكلام والكل بيقول عايزين نفرح

لو شفت المنظر دا بجري مش بمشي بس
لأني ببقى واثقه انها مش مجرد ناس محتاجه بقدر ماهي ناس بتشتغل متسوله

كده خلاويص
تحياتي ياقمر

وجهة نظري said...

وبعدين بقي في الواجبات دي علي الصبح؟؟ إنتي مش تشوفي شغلك أحسن؟

بمناسبة الباميه، عندي شويه زارعهم لنفسي بس لو محتاجاهم ميغلوش عليكي. ههههه

السؤال الأول

نقطه ومن أول السطر .... الإجابه ... هههههه

لأ نتكلم جد بقي

1

أي حد سواء جار والا إبنه والا أخويا مدمن في البدايه أو النهايه مش حتكلم معاه لأنه مينفعش خلاص، حتكلم مع أهله علطول، ولازم تتاخد كل الإجراءات بعنف ضده، مش أذيه، إنما علاج وإجباري. بس أهم حاجه من غير فضح الشخص إجتماعيا

2

الإدمان محتاج علاج متخصص، يبقي لازم يتعالج علاج متخصص لو أقدر أتكفل بالمصاريف. أو يتشحن البلد ويتحبس لغاية مايبانله صاحب ههههه

3و4

لو جيران عادة ماليش دعوه اوي، بس ممكن أحرجها بأني أوريها إني شفت. لو حد قريبي لازم أتكلم معاه وأفهم الموقف

شوفي يا آبي

السؤال دا أجزاء .... الجزء الأول مرتبطه أو مرتبط وبيحبوا... مش حتقدري تمنعي الكلام دا، أصل لو مش في مدرسه يبقي في جامعه يبقي علي النت يبقي من إبن الجيران .... إلخ يبقي لازم تحصين من الأول بالدين والأخلاق وقيم المجتمع الصحيحه، ونسأل ونعرف ونتحاور مش نستخدم العنف، لأن العنف مش بيجيب نتيجه إلا لو حبسنا الشخص ومنعناه يعيش في المجتمع. لازم الحوار المباشر ونفهم إيه أخرة الحكايه دي وحتودي علي فين (إلي هو طريق واحد بس) وهل الشخص الأخر جدير بالأحترام وعنده مستقبل والا بيلعب وطبعا مع التشديد بحزم علي عدم المقابله ولا عدم الخروج لأن في سمعه للشخص، ولما الظروف تبقي مناسبه نبقي نشوف وندخل البيوت من أبوابها

الجزء التاني حكاية مصاحبه دي.... مبحبش الكلمه دي خالص، متنفعش عندنا في مصر... واحده تقلك دا صاحبي والا واحد يقلك صاحبتي... إيه العته دا، هو إحنا في أوروبا؟


الجزء التالت

حكايه بقي علاقات متعدده دي مينفعش فيها تساهل لأننا مسئوليين نربي ناس محترمه مش عيال سافله، ناس عايزه تعمل عيله مش تعمل عيله وتمشي علي حل شعرها.... برضه الحوار مهم جدا في الحكايه دي إلي مش باين فيها جديه، بس برده الحوار لازم يتبعه مراقبه للأخلاق

عموما كل النقط دي تحتاج بوست طويل لوحده

5

دي تعتمد علي الصله، لو جار معرفوش مش حاعمل حاجه، بس حرزع الباب في وشه أو وشها لما أشوفهم هههه

لو قريب لازم أتكلم معاه أو معاها شخصيا وبحده بس من غير فضايح، مع إمكانية التهديد بفضايح من غير تنفيذ، لأن في الأخر ربنا ممكن يهدي

6

مع إن الوسط دا بلدي خالص وبيئه، بس للأسف موجود

بعد مادلوق عليهم مايه سخنه، حقفل الشباك وأنام وأنا بحسبن عليهم ... أصل تبليغ البوليس معناه دعوه لظباط الشرطه للمشاركه في الفرح، محدش حيقبض عليهم، دا غذا مكانش كل ظباط القسم معزومين من الأول أساسا، من الأخر مينفعش ..... وبما إني مش من الجماعات الإسلاميه يبقي مش حقدر أهاجم الفرح بالسنج والسيوف وكرسي في الكلوب

أنا من الشعب المصري المغلوب علي أمره، أحلام سعيده وربنا يبعد عننا الشر والمنكر

7

نتكلم بواقعيه .... طالما أنا مش دكتور يبقي مش حعمل حاجه

لو مرمي علشان سكران أو شامم أو مبرشم يبقي يموت أحسن في ستين داهيه، ريح وإستريح

لو مرمي علشان راجل عجوز محترم عنده أزمه والناس إتلمت مش عارفين يعملوا إيه حدور علي دكتور قريب وممكن أدفع الأتعاب والأدويه. بس طبعا مش ححاول أكلم الإسعاف علشان مبقاش تريقة الناس وعلشان مش حتيجي، فمتعبش نفسي

لو حادثه ..... تحذير شديد وعن تجربه إن حد يتدخل ويشيل مصاب حتي لو كان هو إلي خبطه والناس قعدت تقنعه إنه ينقله مسشفي بسرعه .... للأسف

Jana said...

انتى بتجيبى الحاجات دى منين !!!!؟

ا- حأدور على واحد فايق وعاقل فى عيلته أقوله ...لأنهم هم اللى لازم يتحملوا مسئوليته لحد الآخر

2- لأ لو اخويا حأحاول الموضوع يكون بينى وبينه وأبذل قصارى جهدى ..وان مقدرتش لوحدى يبقى لا مفر من مشاركة الباقى

3- النصيحة هنا واجبة .لكن بعقل كده من غير زن ..وعشان ابقى مقنعة لازم أصاحبها واشاركها مواضيعها الاول ..ده حيخليها تقتنع بكلامى ...لو ولد بقى ده حسب مدى علاقتى بيه

4-نفس اجابة السؤال اللى فات ..بس حيبقى صعب لو ولد سنه كبير انى اعرف اقنعه بنفس الطريقة

5- لو ست .. الأمر ده يحتاج الى تنظيم ..مش اى كلام يعنى ..ياريت اعمل نفسى مش عارفة فى الاول ..واحاول القاء بعض مما قد يساعد فى طريقها عن طريق قص حكايات مماثلة وجزاء الخيانة .. اهم حاجة الغير مباشرة فى الموضوع .. وده بيكونله تأثير أكبر بكتير ....لو راجل ماليش دعوة اصلا..الا لو علاقتى بيه قوية جدا .. ممكن النصيحة هنا تبقى لزوجته من غير طبعا ما تعرف حاجة ..الا انى احاول اقناعها بالبحث فى حياتها عن خطأ ما ..واصلاحه ..مافيش راجل بيخون من غير سبب ..أعتقد والله اعلم

6- ولاااااا اى حاجة

7- لو مرمى بسبب حادثة يعنى والندل اللى ضربه جرى لازم حاتصل بالاسعاف الاول عشان نقله ممكن يبوظ الدنيا ..الا لو كان حيموت ادامى والاسعاف مالهاش نفس تيجى .. يبقى لازم حأستعين بحد معايا عشان مالبسهاش لوحدى ..ده اولا ..بس مش ممكن أسيبه مرمى فى الشارع ..دى لحظات ممكن تفرق فى حياة بنى ادم
انما لو من اللى بيكلموا نفسهم ومبهدلين ..حأقول فى سرى الحمد لله الذى عافانا مما ابتلاك به وفضلنا عن كثير ممن خلق تفضيلا ..واسيبه لحاله
بس الحالات دى عموما كتير ولكل واحد منهم ساعتها تصرف قد يختلف بحسب شعورك بصدقه ولا باستهباله

شفتى بنجاوب اهو ..مش بنبوس ونحط جنب الحيط
هههههههههههه

سبهللة said...

اولا اكتببى بوست طويييل عرييض عن رحلة بورسعيد لانى ما عرفتش اجى
ثانيا اجاوب وامرى لله
1- طبعا هاقول لأهله سواء كان جارىاو اخويا واهله يتصرفوا
2-لو اعرفها كويس واعرف ان الود مش ولابد اكيد هاكلمها بينى وبينها ولو ما اتنصحتش هاقول لاهلها
3- حتى لو فوق سن المراهقة برضه هانصح
4-لو الفرح زى ما بتقولى كدة هانكد عليهم واتصل بصديق ليا ماسك قسم شرطة المنطقة وهو هايقوم بالاواجب
5-بصراحة مش عارفة هاعمل ايه
بس غالبا مش هاتكلم
6-لو انا سايقة هايبقى صعب اقف
لكن لو انا ماشية على رجلى ممكن احاول اساعده خاصة لو كبير فى السن

ميرا ( وومن ) said...

آبي

ايه الأسئلة التعجيزية دي ولا الثانوية العامة تاخدي كام وتجيبي تموزج الإجابه انا ممكن ادفع لحد 75 قرش

ههههههههههههههههههههههههه
شوفي يا قمر
1- مفيش حد بيحب ان حد يقعد يوعظ فيه ويوقفة زي التلميذ اللي محلش الواجب وخصوصا بقي لما تبقي انت الكبير وفرق الطول مش مساعدك
انا مش بحب أدي نصايح بس هادعيله بالهداية في الصلاه وأوجه كلامي لباباه ومامته واحاول اساعدهم يعني ادورلهم علي دكتور كويس او اجيبلهم مقالات وكتب عن طريقة التعامل السليمة معاه

2- اخويا او أختي الموضوع هايختلف شوية طبعا كاتكلم معاه او معاها وأكلم اصحابه أو اصحابها يكلموه وأقنعه يتعالج طبعا بعد ماقول لبابا وماما لأنهم في الحالة دي هايشلوه هيلا بيلا علي المستشفي
ملحوظة
انا مقدرتش اقنع اخويا لحد انهارده انه يبطل سجاير

3- بصراحة بصراحة انا مش بحب اتدخل في اللي ميخصنيش بالنسبة لقرايبي وجيراني بس هما ليهم عليا حق النصيحة ده بالنوسبه للبنات
اما الأولاد فالموضوع هايبقي حساس ومش هاينفع اتكلم فيه
4- انا هانتكلم عن قريبيني علشان معنديش جيران
بس احنا والحمد لله بنات العيلة كلهم صحبات ومش بنتعامل بطريقة مسكنالك ذله يعني كلنا علي اتصال ببعض وبنحكي لبعض كل حاجة بصراحه وبرضة ليهم عليا حق النصيحة خصوصا لو مراهقين ولو الموضوع اوفر كلنا بناخد موقف وطبعا في الآخر الصح مبيختلفش عليه اتنين بس بالمناقشة والإقناع والحمد لله الطريقة دي بتنفع وتجيب نتيجة
5- سؤال صع صعب صعب بجد محصلتش قبل كدة ويارب ما تحصل ولو لا قدر الله حصلت مش هاقدر اصدم حد الصدمة الفظيعه دي

6- مش هاروح طبعا امبوسيبل بس هاقول لبابا يروح ويحكيلي
هههههههههههههههههههه
بص يا قمر مش هاعمل حاجة غير اني هاقفل الشبابيك والبلكونة علشان الصداع والدوشة
ومش هابلغ لأن بنتهي البساطة هايعرفوا ان انا اللي بلغت بعد ما يظرفوا امين الشرطة ببريزة كبيرة ( 100 جنية ) وواجب بيره وسجارتين حشيش وسعتها هاتبقي جنت علي نفسها براقش

7- حصلت قبل كدة واراجل وقع قبل كشك الحراسة بتاع الجامعه بشوية والعسكري معملوش حاجة وقولت لزمايلي الشباب ومحدش اتحرك مش بنفي السلبية عن نفسي خالص بس ساعتها كنت في الجامعه يعني خيبة بدرجة جيد جدا وبجد بتمني لو الأيام ترجع واغير موقفي

Unknown said...

ياخبر ابيض
كل دى اسئلة وكلها صعبة جدا لعلمك
بس انا هقولك للاسف الحاجات دى كتير خالص فى مجتمعنا بس انا مش بحب السلبية رغم انها بتجى على دماغى
وباخد مشاكل فى العضل والوريد منها لحد ما اكتفى
بس لو فى حاجة من دى حصلت ادامى وانا اقدر انى انصح بنصح عشان بيصعب على الشباب دول يرحوا فى شربة مية
لكن الناس المتزوجة والحاجات القرف التانية انا بصراحة ببقى هتجنن بس مش بعرف اعمل حاجة
انتى عارفة لو حاولت مجرد محاولة ممكن اورح انا فيها لانهم ميعرفوش معنى انهم غلط متفهميش هم مغيبين ولا مستحليين الموضوع
بس باختصار لو فى حد يقبل النصيحة بنصح لو فى حد محتاج لموقف زى انى ابلغ اهله بحاول بس بشكل يكون فيه حلم
اما عن الافراح والليالى الملاح فانا مش اقدر اقول حاجة
اسفة معرفتيش اجاوب بالترتيب زى الباقيين
فوضوية شوية انا
سلام واحتمال اقدر انظم نفسى وارجع لك

ana ga3an said...

لو عرفت ان ابن جاري او قريب مدمن
هاشجعة طبعا وادلة علي اجود الاستافات بلا شك

اما لو كان اخويا
هانضرب سوا اهو علي الاقل الواحد يوفر

لو بنت او ولد قرايبنا مرافق او مرافقة حد
اعتقد لو زوقة او زوقها كويس هاقولة تجيب صاحبتها و نخرج سوا


لو حد معرفة قرايب بيخون او بتخون جوزها
هادلة علي كتاب كيف تخون رفيقك في واحد وعشرين يوم بدون ان تنقفش


اما لو في فرح جنبنا في رقاصات و حشيش
بلا ادني شك هاجيبهم يكملو الزفة عندي في بير السلم


لو شفت واحد مرمي في الشارع
هاروح اعلق علية ورقة
ممنوع الازعاج ليكون الجدع نايم

!!! عارفة ... مش عارف ليه said...

1. هتكلم معاه واقول لأهله وده على اعتبار ان العلاقة تسمح بكده طبعا
2. اكيد لو ده حصل لا قدر الله هحاول اقنعه بالعلاج واكيد هنروح لعيادة علشان علاجة
3. لو العلاقة كويسة ونهايته شريفة وطبعا النهاية دي مش مفروض انها تكون بعيدة اوكي ولو طبعا مش الموضوع كويس اكيد هوضح وجهة نظري واقول اللي يمليه عليا ضميري
4. الجواب موجود في اللي قبله
5.بردو الاجابة موجودة في اللي قبل اللي قبله
6.ولا حاجة مش هبلغ عنهم وكمان مش هشارك وياهم بالرغم من ان سكوتي ده يعتبر ادانه ليا
7. اكيد هساعده ومش هسيبه لوحده والحمد لله اتبرعت بالدم قبل كده كذا مرة ولحالات اعرفها مش بتبرع كده وخلاص لبنك الدم وبعدين يروحوا يبعوه لأي حد محتاج لنقل دم .. وقصدي هنا مش اني اعرفه يعني قريبي لأ اقصد حاله محتاجة لنقل دم حتى لو بيندهوا عليها في الجامع

وربنا يعافينا جميعاً
---------
تحياتي لامتحانك الاسهل
من امتحانات العانوية السامة

وليد

مصــــري said...

آبي

يعني الواحد ما صدق خلص امتحانات
ومع ذلك

1-طبعاً هأقول لأهله مش أحسن لما يلاقوه مرمي في خرابة وميت بسبب جرعة زيادة.

2-طبعاً هاساعد أخويا وأفضل معاه لحد ما يكون انسان سوي لأني وبكل بساطة بموت في أخويا الصغير اللي بقي شاب كبير خلاص.

3-اللي بيشيل قربة مخرومة بتخر علي دماغه، بس يبقي في نصيحة بطريقة غير مباشرة عشان الاحراج.

4-ممكن أفكر في عملية مخابراتية لكشف حقيقة روميو.

5-موقف غبي لا اتمني اني ابقي فيه،وهاحاول اعرف الطرفين وتخليص الأمر ودي وان كنت اشك في حكاية ودي دي.

6-لو الأمر تم خلاص هانام في حتة تانية عشان نومي خفيف جدااااااا.
وربنا يسامحهم ويغفر لهم.
وان ما تمش نحاول انصيحة وبنشاط شوية.

7-والله هاساعد واشوفه مين ده وايه اللي عمل فيه كده ويبقي كده ضمنت تهمة محترمة وغضب أبوي عاصف.

8-ايه ده...الأمتحان خلص.
طب الحمد لله.
يارب أنجح.

تحياتي
أسامة

حـــــدوتـــــة said...

السلام عليكم

انتى دخلتينا فى ميت حوار بس ماشى
انا هجاوب بصراحة والارزاق على الله

لو واحد صحبى او قريبى مدمن هقول لأهله

لو بنت جارتى انا مليش حكم عليها عشان اتكلم معاها فى حاجة

لو واحد جارنا او قريبنا بيخون مراته لو ليا معاه كلام هنصحه ولو مليش مش هتكلم
اما لو جارتنا او قريبتنا هقول لجوزها يموتها ويغسل عاره

لو فى فرح بصراحة انا هنزل اقعد معاهم

لو شفت حد مرمى فى الشارع هقف بس هستنى اقابل حد تانى فى الشارع عشان ملبسش قضية على الفاضى

على فكرة انتى تعبتينى معاكى

سلالالالالالالالالالالالالالالالالالالالالالالالالالام

Mony said...

ازيك يا ست الكوكوتة

بصي يا ستي


1- هحاول اتكلم معاه بالراحة كده علشان يرتاحلي و يتكلم معاياو لو ما استجبش ممكن اكلم حد من سنه يكلمه و لو ما استجبش برضه يبقي كده مافيش غير اني اكلم اهلة بس اوصيهم ان العنف مش هيجيب نتيجة

2-هاخده من ايده و اوديه لدكتور و اخليه يتكلم معاه و يشوف دماغه فيها ايه و لو لزم الامر احبسه في المستشفي لحد ما يتعدل طابعا وانا واخداه مش هقوله رايحين فين و ليه

3-هحاول انصح من بيعييييد اوي علشان الموضوع ده بيكون حساس اوي و ممكن احاول اصاحبها علشان تستريحلي و تحكيلي و بكده ممكن الحقها قبل ما تعمل حاجة غلط

4-لو انا شايفة ان الولد ده وحش فعلا هنصحها و اقولها الناس بتقول عليه اي بس انا متأكده ان كلامي هيدخل من الودن ديه و يخرج من التانية

5-هستر عليه او عليها و ماحاولش افضحه خالص و انصحه بالتي هي احسن و لو ربنا رايد بالقضيحة الطرف التاني هيعرف من عند ربنا

6-للاسف مش هقدر اعمل اي حاجة خاااالص
لان الناس في الحالة ديه بتقول اهي ليلة و تعدي

7-اكيد طبعا لازم اساعده من غير تفكير


كده انا جاوبت بذمة ولا هتعلق علي باب الكوكب

Anonymous said...

انا جايبه رقم الجلوس بتاعى وداخله لجنه الاستمحان اهو وربنا يستر
:))

بصى يا ستى
1-هنصحه وهقول لاهله كمان بس بينى وبينك فى الحياه ولا كانى قلت حاجه سواء لده او لدول وحصلت وكانت فى سجاير كمان مش حاجه كبيرة والواد طنشنى وامه مصدقتناش
انا ابنى ميعملش كده ابداااااااا
الواد بجد صعب عليا ده انا اعتبر مربياه
يلاااااااا
وهو لسه بيشرب على فكرة

2-انا معنديش اخوات ولاد بس يااالهوىىىىىىىى
هكلمه وانصحه واعض اعيط عشان مبيسمعش الكلام
وفى الاخر ابلغ عنه
:)))))
لا بجد هتبقى مصيبه وانا لما بحس بالعجز خاصه فيما يخص اهلى بانهار
ربنا يستر على كل الشباب

3-بصى هكلمها وانصحها وعملتها كتيير قبل كده
بس زى ماقلت محدش بيسمع كلام حد اليومين دول

4-نفس الاجابه

5-اهى دى بقى مليش فيها
يعنى احيان كتيير الست بتبقى عارفه ان جوزها بيخونها انما انا مقدرش اقلها
بس فى حاجه لو لقيتها مهمله فى نفسها وبينى وبينها كلام وكده هاخدها وننزل نعمل نيو لوك
ونظبط الدنيا ومش بعيد انصحها من بعيد لبعيد

6-ولا حاجه انتى عايزانى اضرب ولا ايه
انما ممكن ابلغ البوليس بجد ضوضاء وممنوعات لبساهم لبساهم يعنى
:))

7-بصى الناس الى هيا دماغهم مش مظبوطه
مجانين يعنى
مش هعمل حاجه عشان دول بيخوفونى اصلا
انما لو حد محتاج مساعدتى وانا اقدر اكيد مش هتاخر وبتفرق بقى على حسب احساسى بيهم

خلصت الاستمحان
:))

سلامات يا جميل

z!zOoOo said...

أولا ازيك يا ست الكتكوته يا مشهوره ههههههه

ادينا اول مره نقرالك يكش يتمر هههههههههه

بهزر اوعى تزعلى

الهزار خلص نرد بقى

لو عرفت ان ابن جارك او قريبك مدمن
فى بدايه الادمان او حاله متأخرة تصرفك هيكون ايه ؟ يعنى هتتكلم معاه هتقول لاهله؟

هحاول معاه انى انصحه ولو قدرت المح لأهله من بعيد هعملها

2- لو عرفت ان اخوك لا قدر الله هو اللى كده مدمن يعنى اى نوع من الادمان ان شا الله حتى مدمن نمل اه والله سمعت من البت شيمو انهم بيشموا نمل ههههههههه هتعمل ايه؟

هحاول انصحه بكل الطرق ولو مرضيش هبلغ عنه هههههههههههه

3- لو بنت او ولد قريبتك او جارتكوا عرفتوا انها مرتبطه او بتحب او مصاحبه علشان الكلام يبقى واضح او عامله علاقه من اى نوع مع شا ب او اكتر وللاولاد مع بنت او اكتر هتعمل ايه؟

دع الخلق للخالق .. من تدخل فيما لا يعنيه ديه مش سلبيه لكن واحده مش قريبتى وكمان مش محترمه تبقى سورى فى الزباله

لو قريبتى هبهدلها وهبهدل الواد وهطلع عينيهم وهقول لأهلها وهخرب الدنيا وصباحه تسييح هههههههههه

4- لو البنت دى او الولد كبار فى السن يعنى عدت المراهقه برضه هتعملوا ايه وانتم شايفين ان الولد ده مش كويس ؟ولو فى سن المراهقه كمان هتعملوا ايه؟


لو ولد هنفضله او هنصحه مره لو قبل كان بها مقبلش يبقى براحته

وطبعا ده على حسب قربى من الشخص ده يعنى لو بنتكلم او أصحاب كده يعنى

لو بنت هقول لأهلها وأخواتها

5-لو جارتكو او قريبتكوا او حد من الاصدقاء راجل او ست متجوز وبيخون زوجته او بتخون زوجها واتفقنا ان الخيانه مش مفروض تبقى موجوده بس علشان ارض الواقع اكتشفنا انها متنيله وموجوده هتعملوا ايه معاهام وتصرفكوا ازاى؟


لو الى بيتخان قريبى طبعا مش هرضاها عليه ولازم اقوله لأن الى متجوزها متستحقوش

ولو ست جوزها بيخونها مش هقدر اهدم البيت

6- لو فيه فرح جنب البيت بتاعكوا جيران يعنى وشوفتوا فيه مصايب يعنى رقاصات على حشيش حاجه تيجى كده على بانجوو على بيره هتعملوا ايه ؟ومش عاوزة هزار محدش يقولى هنزل اقعد معاهم قطم رقابتكوا ههههههههههه برضه بنات واولاد تقولوا تصرفك الحكيكى هيكون ايه ؟


بصراحه بشوف من المناظر ديه كتير

يا بنزل من البيت بره الشارع خالص يأما بقفل البلكونه
وديه مش سلبيه لكن حق الجيره وان كانوا هما باردين لازم اكون انا الاحسن

7-لو شوفت واحد مرمى فى الشارع على طريق او فى جنينه هتعمل ايه او هتعملى ايه يعنى هتمشى ولا تقف ايه التصرف اللى هتعمله؟


مرمى مغمى عليه يعنى طبعا هحاول اشوف فيه ايه وهساعده

لازم احط نفسى مكانه

اما لو ميت يا فكييييييييك لو اتقفشت هروح فى ابو نكله

طبعا هتقولى انى سلبى من الرجه الاولى

لكن هقولك بصى لأبعاد رأيي وبعدين قررى سلبيتى

دمتى واجعه مخنا ههههههههه قصدى مشغلاه
ودمتى فى تألق


صحيح جميل قوى حكايه مقابله المدونين ده

وان شاء الله نحاول نعمل اجتماع لمدونين كتير

تحياتى

3ala asm masr said...

الاول وحشانى
ثانيا الاجابات
1-لو حد من اهله بيفهم وقريب منى كده ومبيقفش زى اخته مثلا هحاول المحلها واقولها

2- هقول لماما وهفضل وراه لحد مايشم صراصير
قصدى لحد ما يتعالج

3- هتكلم معاها واحاول افهم هى بتفكر ازاى وايه طبيعة العلاقه دى

4- فى الحلتين هتكلم معاها ولو الولد مش كويس هنصحها ولو مسمعتش الكلام هعمل بالمثل اللى بتقوله ماما
انصح صاحبك من الصبح للعصر لو جه عليه الليل ومتنصحش غرقه

5- هنصحها واحاول اتكلم معاها واحاول ادخلها من نحية الدين واجذبها مثلا لحضور دروس واعرفها على ناس متمسكين بدينهم اكتر

6- هطلب البوليس طبعا

7- مش عارفه بس للامانه انى هجرى عالبيت واحكى لماما وهى تتصرف

ka2en Makboot said...

ادخل في الاجابات علي طول علشان طويلة .. بس ملحوظة كدا انت هتلاقي اجابات ايجابية لا ن الشخصية اللي بتسيب تعليق بتبقي شخصية ايجابية غالبا والشخصية السلبية بتبقي سلبية حتى في التعليقات وبتكسل ترد ولو ردت تبقى بهدف الرخامة

ام هم

1- لو بنت هنصحها وهقول لاهلها ام لو ولد هقوله لاهله.
2-بعد الشر طبعا بس انا وما املك للفاميلي مش هسيبه الا لما يرجع معافى
3- هنصحهم طبعا
4- نفس الاجابة السابفة , وبتعرض لكلام سخيف من نوع احنا مش صغيرين وعارفين مصلحتنا
5-لو انا قريبة من الزوجة ديه هنصحها في السر وادعيلها بالهداية
6-ههههه لا ماليش دعوة
7- مرمي ازاي شوحات هعتف عليه من العتشف اما جريح هتصل بالاسعاف

واخيرا
( ليس عليك هداهم ولكن الله يهدى من يشاء)
( إنك لا تهدى من أحببت ولكن الله بهدى من يشاء )
(ما عليك من حسابهم من شىء وما من حسابك عليهم من شىء)

وختاما
(وذكر فإن الذكر تنفع المؤمنين)

ســـــلام

رئيس جمهوريه نفسى said...

الاسم : رئيس جمهوريه نفسى
رقم الجلوس :12345 الان نجرى بعض التجارب تيست مايك تيست مايك
بصى يا بتنجانى قبل ما اجاوب على اى سؤال احب اقولك انى من خلال ليبراليه الشى حا الى اتكلمنا فيها محدش حيقبل انى حد يتكلم مع التانى وابسط كلمة حتتقال انا ليبرالي
اجابة السؤال الاول
----------------
كان لى صديق مدمن فعليا حاولت اتكلم معاه بالحسنى وقولت ليه هو رايح على فين الواد استجاب وابتدى يبعد وقلى علشان مشوفش حد من شلة الشرب خليك معايه نخرج مع بعض اتفقنا على كده يوم والتانى كان زى الفل لحد ما فى يوم وقف عربية مخصوص اركب ركبت اابص الاقى نفسى فى حوارى واذقه غاب خمس دقائق ورجع تانى يوم سالت عرفت انى البيه خدنى عند تاجر مخدرات يشترى التموين وطبعا اليويمن الى كانوا زى الفل اتاريه كان مخزن كميه وبيشربها لوحده ولمعرفتى بوالدة ووالدته الى كان مهئى ليهم انهم ربو والدهم على انبل الاخلاق ومش ميتحملين عليه كلمة فضلت انى اسكت واقطع علاقتى بيه اصلا
اجابه السؤال التانى
-----------------
من غير اى تردد مستعيد انى ابيع عمرى علشان يبطل باى طريقه كانت حتى لو حربطه فى رجل السرير او حوديه مستشفى ولو تبليغى عنه فى علاج عليه اقسم بالله ابلغ عنه ياخد سنه ولا اتنين سجن احسن ما يموت قدام عنيه
اجابه السؤال الثالث
-------------------
لو ولد حيقبل النصيحه حنصحه بالحسنه انى كما تدين تدان وانه ممكن نفس الى بيتعمل منه فى بنات الناس ممكن يحصل فى اخواته البنات او بناته مستقبلا وبيبقى دورى انتهى
--------------------
اجابه السؤال الرابع
لو البنت مش كويسه وعندى ادلة عليها وعلى تصرفاتها حبلغه واقوله الى اعرفه والاختيار بعد كده ليه هو انا ماليش فيه انا دورى ببينتهى عند نصحه
-------------------
اجابه السؤال الخامس
بصراحه شديده حنصحه لو بيحبو بعض يبقى يتجوزها فى الحلال احسن ليه من الى هو بيعملوا دة
السؤال السادس
-----------------
بصى يا بتنجانى مفيش فرح فى الصعيد مفيهوش بانجو او حشيش والفرح الى مش بيكون فيه كده سبة وشتيمه يعنى اه بجد واللة حسلم على العريس والعروسة واقوم اطلع بيتنا جري اتفرج من فوق على الرقاصه :$ وش مكسوف
-------------
السؤال السابع
التصرف الطبيعى الى حعملة حوقف مواصله سريعه وانقله الى ااقرب مستشفقى وان كان فى تامين حدبره وادفعه للمستشفى واحاول اعرف اى وسيلة اتصال ابلغ اهلة
-----------------------
بتنجانى انا مخلص تعليم من 99 يعنى مش طالبة امتحنات وانا فى السن ده الصحة مش مساعدة يا بنتى على موضوع الكتابة الكتير

alshared said...

أيه الأسئله الصعبه دي
حرام عليكي
هانخلص من الدكاتره هاتطلعيلنا أنتي
طيب ما علينا

الاجوبه

1-بالتلأكيد هاتكلم معاه وأنصحه ولو ما قبلش النصيحه خلاص هاعمله عادي زي الاول ومش هافتح معاه الموضوع ده كل واحد حر واللي بيشيل قربه مخرومه بتخر علي دماغه

2-لو أخويا هاتبقي تقريبا نفس الاجابه الاولي بس هايزيد عليها اني هاتكلم مع الحاج والمعامله هاتتغير خالص

3-الموضوع ده بالنسبه لي مرفوض وبصراحه لو ليه كلمه عليها هاحاول أكلمها بس أنا عارف اني مش هاعرف أكلمها بهدؤ وممكن كمان أمد أيدي وعلشان كده بقول لأهلها وبحاول أقلل معاملتي معاها لأضيق حد

4-كبار مصيبه عن الصغيرين ممكن تحصل مشكله كبيره جدا وممكن البنت ما تخرجش من البيت خالص ده لو كلامي ماشي عليها يعني حد قريبتي قوي

5-الخيانه تعبير مطاط ممكن واحد يبص لواحده تانيه غير مراته مجرد النظر يبقي في نظرها خاين

بس الخيانه اللي أنتي قصدك عليها sexual relation

أكيد في الاول هانصحه ولو ما قبلش النصيحه هاقول لحد يقدر يأثر عليه
علشان دي فيها خراب بيوت
بالنسبه لو واحده بتخون جوزها أنا برضه مش هاقوله بشكل مباشر بس هاقول لحد يقوله

6-أحنا الحمد لله مفيش أفراح بالشكل ده بيتعمل عندنا في البلد بس لو أتعمل هايتعمل بعيد جدا عن بيتنا

بس لو أفترضنا جدلا مجرد افتراض أن فيه حاجه بالشكل ده أتعملت عندنا في شارعنا هايكون كل الناس اللي موجودين فيه أنا أعرفهم فهانزل أجامل صاحب الفرح وأسلم علي الشباب وأطلع مغموم وعندي زي ما بيقولوا كده غثيان

7-أكيد هاحاول أساعده وأكيد هاطلب الاسعاف بس هيا تيجي وأول ما تيجي هامشي علي طول

طولت قوي في الاجابات
ماتزعليش مني
أنتي اللي طلبتي الحكيكه

أه
أنا متأسف علي الغياب بس كان لظروف كهريه
:)

تحياتي

فارس بلا جواد said...

هاى ايبى
ازيك
بالنسبه للاسئله
1- طبعا لازم اسعده اعد معاه الاول وبعدين لو مسمعش الكلام اقول لاهله
2-لو اخويا بعد الشر هعمل معاه نفس الحكايه
3- مش عارف
4-ممكن اقول لاخوها لو مفيش هكلمها ودى منفعش اقول لاهلها
5-ننصح وبعدين نبلغ
6-هبلغ البوليس طبعا بلاش قرف
7-لو شحات وغلبان فعلا هساعده

صباح الخير يا مصر said...

Appyplanet
***********
إذا فعلت الخير سيتهمك الناس بأن لك دوافع أنانية خفية .....، افعل الخير على أية حال
الناس في أمس الحاجة الى المساعدة
لكنهم قد يهاجمونك إذا ساعدتهم ...،ساعدهم على أية حال
إذا أعطيت العالم أفضل ما لديك سيرد عليك البعض بالإساءة .....، أعط العالم أفضل ما لديك على أية حال

احاول التمسك بهذه الكلمات الحكيمه السابقه....لكننا بشر على اية حال

تحياتى

Mahmoud البطراوى said...

1- غالبا هبعد عنده لو مفيش بنا كلام بس ممكن انبه اهله لو عرفت

2- لا لو اخويه مش هسكت ولازم نتصرف وهعمل اجتماع مجلس اسره ووسعه لمجلس عيله ولازم يدخل مستشفى فى الاخر

3-على حسب لو بنت يتقوف على درجه القرابه وغالبا تصرفى هيدور بين النفرزه العاليه والشتيمه وحظر التجوال ... وبين هاتيه اشوفه
لو ولد هيبقى كلام عقلى شويه وحوار مترضهوش على اختك والكلام ده

4- اه اكيد هيختلف وغالبا هيبى الكلام طب خليه يقابلنا

5- غالبا هيكون لا تعليق

6- غلابا موقف سلبى

7- زى ماالناس هتعمل يعنى هيدخوه مستشفى هيحاولوا يفقوه وكده

دعاء مواجهات said...

اية يابنتى دة

انتى مسبتيش حاجة

فعلا كلها عيووب فينا

وهحاول اجاوب بلا مثالية

أولا المدمن هساعدة ولو مقدرتش هبلغ أهلة او أصحاب قريبين يساعدونى


البنت ولا كأنى أعرفها بس لو جة حد يرتبط بيها يهمنى هلمحلو او اقولوا


لو ولد مرمى فى الشارع بصراحة مش عارفة ممكن اعملوا اية


حتة هيروين دى بقى معرفهاش مجربتهااش
جربت البانجو بس

هههههههههههههههههههههههههههههههههه

.....
الخيانة بقى لازم احذر صحبتى وش كدة

تحيااتى لدمغوغتك العسل دى


بيس ياقمرى

snohe said...

بخصوص الادمان
لوشخص ممكن اساعده هساعده بالنصيحه او بالعلاج ان امكن


بخصوص العلاقات
اذا كان اطراف العلاقه سنهم صغير احول اوضح لهم الامور ببساطه من غير ما اسبب لهم عقده وفضيحه
اما اذا كان اطراف العلاقه ناس كبار مش ممكن اتدخل طالما بيحافظو على الاداب العامه


بخصوص الافراح
لايوجد عندنا فى مكان سكنى افراح بهذه الطريقه وان وجدت فهذا دور الشرطه




لو وجدت انسان مرمى على الطريق

اكيد هتصل بالنجده وبالشرطه وبالاسعاف وهتصل بالمحامى يحصلنى على قسم الشرطه حتى يطلقو سراحى



شكرا

Empress appy said...

لورانس العرب
============

حمد لله على السلامه بس جيت منيني
المهم نبدأ بقى
1- يبقى تتعلم من اللى جاى ومش قصه تقلق من الكلام لازم اهله يساعدوه حتى بالقوة انهم يودوه مستشفى قبل فوات الاوان والندم فيما بعد وشوفت موقفك اختلف ازاى مع اخوك اعتبر ابن جارك او صديقك اخوك الدنيا هتتغير كتير وحاول وربنا هيقف معاك
2- موضوع الافراح دى ظاهرة قذرة وفى اماكن كتير والدى جى اللى فى الشارع ومظهر مش حضارى بجد لازم الواحد يخلى باله افرض واحد مسطول من دول طلع عليك او على اهل بيتك وزى لما بسمع انها بتتحول لخناقات على فكرة مش كل البوليس بيجى ويأخد الواجب انا شوفت فرح بيتقفل بجد قبل كده وانا مروحه فى منطقه جنبنا ربنا ينسفها بقنبله من عنده
وفى النهايه هديلك 8 من 10 امرى لله
نورت يا لورنس






voug
=======
دبشه افندى كعب الغزال بص يا سيدى مفيش حاجه اسمها اكلمه وانا بشرب بمزاجى فيه حاجه اسمها اهله فيه حاجه احطها فى اعتبارى ان ممكن فى يوم لا قدر الله ده يموت وابقى انا متحمل ذنب معاه فيه حاجه اسمها يدهول يتعدى على حد من جيران فهمت يا دبشه
4- السؤال جديد يعنى الاولى بتكلم عن البنات المراهقه يا دبشه لان دول لانهم تفكير عن الكبار
اهم حاجه فى الحالتين انك مش هتتكلم عنهم يعنى مش هتكلمهم فى حاجه وفى نفس الوقت العاده السيئه اننا بنتكلم عن الناس من وراها فهمتى قصدى وهو ده القصد من السلبيه يا دبشتى
5 - الموضوع الاخير يا دبشه لازم تخلى حد شاهد معاك علشان دايما لازم نحط فى دماغنا افرض حد مننا او اهلنا جرى له كده داين تداين هو ده القصد من الاسئله يا دبشه روح ومتتأخرش او اقولك اقعد هناك احسن هههههههههههههههههه

Empress appy said...

الطائر الحزين
=============
اه منك انت مش هعرف امسك عليك غلطه اممممم لا استنى طيب اللى سترهم ربنا مش هتحاول تقدم لهم شخصيا النصيحه ..طيب فى حاله لا هل هتسمح ان حد قدامك يتكلم عنهم انا عارفه انك مش هتتكلم عنهم بس هل هتسمح بده
6- وبعدين ايه ولا حاجه ولما واحد من دول يطلع على اولادك ولا عليك ولا على زوجتك هتبقى تعمل ايه انا اقصد القرف اللى بنشوفه هنفضل شايفنه وساكتين ولا ايه
السؤال الاخير ليك نظره افرض واحد عنده غيبوبه سكر يا ايهاب وراجل غلبان ولا ضغطه انخفض واترمى فى الشارع هتسيبه افتكر لا قدر الله حد قريبك كده لو حصل له موقف زى ده داين تدان فهمت القصد من الكلام
نورت ومسكت عليك غلطه هههههههههههههههه







Nsreen Bsunee
================

طيب يا رينا فى موضوع الست والراجل هتنصحى وده حلو افرض منصحتيش لو حد اتكلم معاكى عنهم هل هتنساقى للكلام ولا لا ده اللى اقصده لان عادة فى مجتمعنا ممكن اقول وانا مالى ومن وراهم اتكلم فهمتى قصدى
وانتى تعرفى منين انه نايم مش ممكن يكون فى غيبوبه سكر او ضغط او ضيق تنفس ههههه
الملحوسه وحياتك اسرق عربيه حد من اصحابى او اجرجر حد من قفاه ونروح يوم ونيجى وهنزل الموضوع على طول يمكن على اخر الاسبوع لو اخدت اجازة اعمل كده
نورتى يا قلبى

Empress appy said...

مدحت محمد
==========
مش هتفضح حد فى الخيانه طيب والكلام هل هتتكلم من وراهم او لو جت السيره مع حد وبعدين افراح ايه اللى عادى يا لهوى المناظر دى عادى شكرا شكرا
نورت الكوكب





مواطن مصرى نايم
==================
اسلام السكر بص يا اسلام فيه حاجات كتير قولنا بتؤدى للخيانه هل لو شوفت كده ممكن تقول مليش دعوة بس هتتكلم من وراهم يعنى اذا حد فاتحك فى الكلام
وبعدين سلبى يا اسلام عيب عليك على الاقل احتج وامشى وعلشان برستيجك اللى بيقبل الغلط كأنه اشترك فيه بالظبط
نورت يا لولى

Empress appy said...

محمد فوزى
==========
اعترض اقولك قدم على طلب قانون بمنع النحله والدبور ما هى بقت قانونين جاهزة ههههههههههه
بص يا محمد اللى اقصده ان الست خاينه يعنى على الاقل لو حد تانى عرف وجه اتكلم معاك عنها وده بيحصل هل هتتجاوب معاه ولا لا اللى اقصده بصراحه اننا لو وقفنا سلبيين بنتكلم عن الناس من بعيد فهمتنى وده اللى مش عاوزاه فهمت الغرض من الموضوع اصلا
موضوع الافراح يا محمد صعب عليا بصراحه انى اتقبله بجد يا ليله نيله لما بسافر المنصورة والاقى حاجه زى دى عارف النحله كل شويه اتصل بالنجده وعموما هما حرموا يعملوا عند البيت او المنطقه عندى لانى بكل فخر بطلع اقول لهم انا اللى ببلغ وصدقنى القسم بيتجاوب معايا اه بعد عشرة اتصالات بس عادى
موقفك مع الولد ربنا يا رب يجعل كل المصريين زيك ويستر علينا وعلى اهالينا
ومنى لله عادى هو فيه احن منه فى الدنيا يا ريت يبقى منى له على طول هههههههههههههههه






فى حب مصر
=========
ههههههههههه هترفع شعار السطلنه للجميه ماشى بس اقفشك بس وهتشوف هعمل فيك ايه
وحلوة دى يا فتان بدل ما تتكلم من وراها هههههههه
والله انت مسخرة انت بتهزر صح ماشى صفرررررررررر على عشرة ويعاااااااااد فاكر الكلمه دى فى المدرسه يعااااد

Empress appy said...

رئيسه حزب الاحلام
===============

وده اكبر غلط انك تسيبى حد من غير ما تسالى عنه اقل حاجه انك تشوفى حد ماشى وتخليه معاكى وتشوفا الراجل ده بدل ما يكون فيه حاجه ويموت من غير ما حد يلحقه وتخيلى لا قدر الله حد فى نفس الموقف قريب منك فهمتى يا قمر
نورتى الكوكب




WhItE HeArT
=============
ما هو انا عارفه لسانك الطويل وبالعند فيك صفرررررررر ويعاد ابقى اقرى ردودى على الناس علشان تفهم وجهه نظرى

Empress appy said...

Z_Diva
=========

حبيبتشى ام زعبولا القله ههههههههه ما هو لازم تسييح على هواء مباشرة يا حبيبتى خلينا نشوف بلاوينا فى وشنا
1 تطنشى وهتقبليها على حد من الفوميليا بتاعت الانتى يا نيله انتى وبعدين ما هو الترويش بدايه عبده ادمان يا بنتى صدقينى
2- شوفتى الموقف اتغير لما بقى حد من قرايبك ازاى يعنى بتتعاملى بمعيارين هههههههه يا خيبتى فيكى ما لم ترضاه على نفسك لا ترضاه على غيرك يا ام زعبولا
يا ام زعبولا الغرض مش ابين اللبه ولا اضرب قلل انى اورى للناس التناقض اللى فى التصرفات وبنسسسسس يا قمر افهمتى عاد
ونورتى ومفيش خرفان انتى اصلا خرفانى نطحاكى من بدرى هههههههههه





shabfa2re
===========
احترم الناس اللى عرفه قدرتها بس افتكر لو المواقف دى مع قريب هتفضل سلبى معتقدش نورت الكوكب

Empress appy said...

مياده
========
لا يا مادى واضح انك هتطلعى الاولى بس موضوع الخيانه يا قمر بتاع الزوج والزوجه انا بشوف ناس تقول وانا مالى بس هل يا ترى نظرتك للست مش بتتغير او الراجل وفى نفس الوقت هل هتتكلمى مع حد ولا لا عنهم يعنى مقصدش انتى اقصد لو حد قالك فلانه ولا فلان بتخون جوزها فهمتى علشان احنا شعب يقول انا مالى ويقعد ينكت فى فروة غيره فهمتى قصدى
نورتى يا مادى ومتخافيش من ماما بس ابقى خلى حد معدى يقف معاكى وانتى بتعملى كده وربنا يجازيكى خير






حبيبه القمر
==========
بصى يا حبيبه موضوع البيت يتقفل ليه مش بتفكرى ان ممكن حد يطلع عليكى عادى مسطول ليه مش بتفكرى ان ممكن تحصل خناقه وواحد يموت فى الفرح وبتحصل صح اللى يشوف الحاججات دى ويسكت ميكونش انسان كويس صدقينى لان لها ابعاد كتير
ثانيا متسول انا مش قاصده كده حد عادى يعنى هتسبيه يا حبيبه ولا هتقفى جنبه افترضى لا قدر الله اخوكى ابوكى خطيبك حصل له غيبوبه تحت اى ظرف والناس عملت بموقفك ده ايه شعورك ساعتها
فهمتى الغرض من الاسئله يا حبى
نورتى الكوكب كله وانا جاى على الاسماعيليه حالا هههههههه

Empress appy said...

وجهه نظرى
===========
طيب اقولك اريحك منى ازاى هات اتنين كيلو باميا وكلب صغير من عندك مش علشان يعضنى علشان اربيه واتنين كيلو بتنجان وانا هسكت ههههههههههههه

بص يا معتز باختصار موضوع ان البوليس معزوم لا هى بتبقى تصريح انهميعملوا فرح فى الشارع بس مش تصريح بالخمور والقرف اللى بنشوفه ففى النهايه لازم نخلى بالنا من التجاوزات انا مش بتكلم عنى وعنك لان ده وسط بيئه وانا مش ساكنه فيه بس دى ظاهرة شوفتها لما بعدى اوبروح فى امكن تانيه فهمت قصدى طيب اقولك انا فى المنطقه عندى مكهرباهم من ساعة ما عملوا فرج بس فيه دىى جى فى الشارع وطلبت النجده واصريت يجوا كنت عاوزة انام وكانت الساعه واحده بالليل وطلعت قولت لهم انا اللى بلغت واللى هشوفه هيعمل كده تانى هولع فى الفرح ههههههههههههههه الناس خافت لان اصلا الشرطه جت بسرعهوده لان المنطقه عندى اصلا شيك فقالوا الناس دى عملت كده ازاى ههههههههههههه
بص يا معتز اللى اقصده من حد فى الشارع فيه ناس على قد حالهم بشوفهم بيمشوا يا عينى يجى لهم انخفاض فى الضغط او غيبوبه سكر او اى حاجه فبيقعوا والناس تخاف تبص عليهم او ممكن يكون قعد يريح فى مكان اغمى عليهم ده بيتساب من السلبيه بتاعتنا لغايه لما يموت وده حرام ده اللى اقصده موضوع الحوادث معاك فيه
نورت الكوكب كله ويا رب تكون بخير







Jana
========

عندى نحله ودبور يا حبيبتى هما اللى بيعملوا فيه كده
ههههههههههه انتى سكر خالص يا حبيبى والله
بس موضوع ولا هعمل حاجه فى الفرح ده غلط مينفعش اشوف غلط واسكت حتى ابقى ريحت ضميرى ويمكن اكون سبب فى منع مصيبه سوده بتحصل او هتحصل
نورتى يا قمر الكوكب كله

Empress appy said...

سبهلله
==========
واكتب ليه مجتيش ليييييييييييييه انتى طيب ينفع احكى فى التليفون هههههههههه حاضر يا حبيبى
حلوة صديق فى القسم دى هههههههههه لا بجد مواقف كويسه بس لو حتى سايقه لازم تقفى افرض محتاج مساعده ومفيش حد حواليه ومش شرط يكون حادثه يا حبيبتى
فهمتى قصدى نورتى يا قمر





وومـــــــــن
=============

بصى يا بتاعت براقش دى وحتى لو ظرفه ال100 جنيه وسجارتين الهباب يبقى انتى برضه غرمتيه واحنا شعب يخاف ميختشيش وخاصه تقرصيه بدفع الفلوس وهتتصيتى فى المنطقه والناس هتعمل لكى حساب
طبعا الموقف الاخير انا عارفه انك ندمانه ومش هتقرريها تانى يا قمر صح ولا انطح ههههههههههه

Empress appy said...

نهر الحب
========
حبيبة قلبى انتى اصلا كويس انك رديتى يا بنتى شكلك ميقولش انك ممكن تعملى حاجه ههههههههه لا مقصدش بصى يا حبيبتى فيه مواقف فى حياتنا لازم ولابد اننا ناخد موقف فيها ومش نسيبها كده تعدى وخلاص فهمتينى لان الدور بيدور على اى حد
نورتى يا قمر الكوكب كله







ana ga3an
==========
ههههههههههههههههخخخخخخخخ اعمل فيك ايه ادعى عليك بايه هتهزر اللهى يا رب مش عارفه يحصل لك اى حاجه كويسه
وايه كتاب كيف تخون مراتك فى واحد وعشرين يوم من غير ما تتقفش دى ده نزل السوق جديد
طيب بص بالعند فيك صفررررررر ويعاااااااد وملحق للدور التلاتاشر وهتحل الواجب وانت مدلدل رجلك من حرف البلكونه

Empress appy said...

عارفه مش عارف ليه
================
حلو ايجابيتك فى الموضوع بجد ولو انها بقدر قليل بس احسن من غيرك
ربنا يهدينا جميعا وشوفت الاستمحانات يالا قدم ورقك فى طب بقى هههههههههههههه






مصرى
=======

طيب تهمه ليه وغضب ابوى يا مصرى انا اقصد يعنى من الموقف لا قدر الله مش ممكن يحصل ده لنا او لاهالينا غيبوبه اى حاجه فبيكون صعب وهنيالك يا فاعل الخير ههههههههههه
نورت ونجحت قدم على صندله هههههههههه

Empress appy said...

حدوته
========
ههههههههههههه يعنى هتجيب مصيبه للراجل طيب ما تنصحها افضل يعنى
وبعدين ايه هتنزل تقعد ده ربا يوعدكم بظابط غلس يشدك انت وهو ههههههههههههه
وسورى يا حدوته هو انا ليه بركه الا انتم فى التعب
نورت الكوكب




mony
=====
لا يا حبى مش هتتعلقى خالص خالص انتى سكر مقالب يا قمر ههههههههههههههه
وبعدين حالوى بس متبقيش سلبيه فى موضوع الفرح حتى الفرح له اصول مش تتعدى على غيرك
نورتى يا قمر وكسبتى معايا مثلث هديه للعربيه ههههههههه

Empress appy said...

shayma
=========
جبتى السنكوشتات معاكى ولا لا هههههههههه
سكر يا شيكو وبجد انتى حد ايجابى مش سلبى ونجحتى وتم قبول اوراق فى سياسه واستقصاد ههههههههههههههه





z!zOoOo
========
يا لهوى مالك داخل كش ملك كده على طول ما هو لازم تقرالى طبعا مش خرفان واقفه فى قفاك بتههدك هههههههههههههه
وبعدين والله مش مشهور هى بس نهر الحب ببالغ وطمر يا خويا طمر
بص يا قمر موضوع البنت فى الزباله دى هل هتكتفى بكده بس ولا هتتكلم عنها من وراها ده كمان اللى اقصدة
انا مش اقدر اقرر سلبيه حد بس بوريكوا على الكتابه وقدامكم ايه التناقضات فهمت بس والله مش اكتر لعلى وعسى نقدر نتغير جميعا
وبجد سعيده بوجودك هنا وفى اى مكان وان شاء الله نتقابل نورت الكوكب كله

Empress appy said...

3ala asm masr
===============
ايون هما دول البنات بصى تم قبولك اوراقك فى كليه الشوربه اجرى بقى استخبى ههههههههههه برافوا عليكى يا هنوده بجد ربنا يهدى
وعلى فكرة انتى كمان وحشانى يا قمر





Two in One
==========
حبيبه قلبى الفيكون المائى
بجد انتى حاجه كويسه ومش سلبيه خالص يا بنتى وغير كده كلامك اللى ختمتى وبدأتى بيه لا غبار عليه ونجحتى فى الاستمحان ونقلنا اوراقك للمفتى لااااا بهزر قصدى لكليه اى حاجه من الكمه هههههههههههههه نورتى الكوكب

Empress appy said...

رئيس جمهوريه نفسى
================
طبعا سمعنى سلام صعيدى شحط محط لمحمود بيه وكمان اللحمه اللى غليت ههههههههههه فرصه بقى احرق دمك مش بتقولى بتتفرج على الرقاصه ههههههههه انا عارفه يا محمود انها عادات عندكم انما هنا لا دى بتبقى صعبه حتى عندكم اصول بتحكمها مينفعش يطلع سنج ومطاوى وضرب وقله ادب بس
وعموما رفقة بيك هنجحك وادخلك كليه زراعه قسم ذرة عويجه هههههههههههههه نورت يا دودو




الشارد
=======
مش عارفه ليه عندى محساسات انك بتجاوب بدبلوماسيه امممممممم بس هفوتها المرة دى ولما يجيلك غثيان خد كركديه ههههههههههههه
انا لن اجامل بل سابلغ ههههههههههههه
واحيلت اوراقك الى كليه العلوم قسم حشرات هههههههههههههه

Empress appy said...

فارس بلا جواد
=============

امممممم نجحت فى الاوختبارات وتم احاله اوراق الى كليه الطب البيطرى قسم حصان هههههههههههههههههه





صباح الخير يا مصر
==============
بجد بشكرك على كلماتك الحلو قوى والحكمه دى وفى النهايه احنا بشر بس بنحاول نصلح من اوضاع وسلبيات غلط فى حياتنا بتنورنى دايما بجد

Empress appy said...

بطوط حبوب
=========
اهلا يا ابو البطابيط
بص يا ابو البطابيط مش عيب انه يكون لنا موقف سلبى ولا اتنين العيب اننا منحاولش نغير سلبيتنا دى لانها غلط فهمت القصد من الاسئله
تم قبول اوراقك بكليه الهندسه قسم ميكانيكا سيارات مبططه علشان عربيتى ههههههههههههههه نورت يا محمود





دعاء مواجهات
===============
هيروين هو انا جبت سيرته يا بنتى هتهزرى ولا ايه ايه البنت اللى هتلبسنى فى حيطه دى
نتيجه الاختبار تم احالة اوراقك على كليه المعهد الفنى التجريبى ههههههههههههههه نورتى يا دودو

Unknown said...

ابى
اية شكلك ميدوليش دى انتى بتشهرى بيا ولا اية
هرفع عليكى قضية
لا حبيتى انا مش بحب اسيب الامور تعدى طلما انى قادرة اعمل حاجة صح لانى بحس انى مشتركة فى المسئولية ودا بيعرضنى لمواقف كتير بايخة ومشاكلكمان كتير بس انا مؤمنة انى لازم مكنيش سلبية رغم ان اصحابى بيقولولى انتى مش راجل عشان تعملى كدة حتى الرجالة مش بيعملوا كدة بس بصراحة انا بحب اصلح الاشياء الخطأ طلما انى قادرة
ولما اشوفك ان شاء الله هحكى لك موقف يفطس من الضحك على الموضوع دا
تحياتى وحبى لك ياقمر

رئيس جمهوريه نفسى said...

ليكى عندى واجب تعالي استلمية

Empress appy said...

snohe
=========
اجابات منطكيه خالص
بس يعنى ايه دور الشرطه افرض مش قريبه مش دورك بقى انك تبلغ
ولا ايه
عموما احيلت اوراقك الى دبلون التجارة هههههههههههههههه نورت الكوكب





نهر الحب
========
يا مامى يا مامى انتى بتهددينى طيب ماشى ماشى لنا بحر يلمنا يا نهر لما اشوف اخرتها معاكى ههههههههه
لا بجد لو انتى كده تبقى هايله وايه يعنى لما نصلح الخطأ ونطلع بمقالب ههههههههه نورتى يا قمر

3ala asm masr said...

ماشى يا أبى
أخرتها كلية الشوربه؟؟
هههههههه

wanna b a physician said...

اولا ازيك يا اببى فينك يعنى مش شايفك بقالى فترة فى المدونة
المهم
الاجابة
1- على حسب انا عارف ده بيقبل النصيحة ولا لا واهله هو يفرق معاهم ولا لا يعنى فى ناس مدمنة واهلها عارفه وعادى
2-لو اخويا اكيد هافضل اتكلم معاه واخلى اى حد قريب يتكلم معاه واكيد بابا وماما ولو يأسنا ووصل للادمان اكيد هاعالجه

3-الحقيقة ده حصل مرة مع واحده جارتى وهى اللى جت قالتلى مش تقول لحد وانا هابطل وهى دلوقت هتتجوز خلاص وقاعده فى بيتهم مش بتنزل خالص
ولو قريبتى هاحاول اقرب منها اكتر وافهمها ان علاقتها باكتر من واحد ده مش صح وان حتى لو واحد وهى مش متأكده من اخلاقه برضوة مش صح طالما مش الاتجاه الصحيح للعلاقات

4- سن المراهقة هاحاول اقول امثلة لناس ملتزمين ومدى نجاحهم وبرضوة جالهم حد كويس وبيحبوه مش شرط العلاقات وكمان ان الدين مش قال كدا ده كلام يختلف من شخصية لاخرى والكلام النظرى غير العملى
واللى فوق اجابة اتلى عدوا المراهقة

5-على حسب طبعا الخيانة دى يعنى الراجل لو متجوز هيبقى الموضوع صعب لان مهما كانت التانية فاحنا اكيد هنبقى عايزين نظلمها
اما الخيانة الجسدية فدى هيكون فيها نقاش حاد واتصال بالاهل فى حالة عدم جدوى الكلام
اما الست فهى هتبقى نصيحة مباشرة والاول غير مباشرة عن عقوبة الخيانة والذنب والكلام ده
ولو مش استجابت احاول اوصله لجوزها المعلومة بس بشكل غير مباشر يعنى اقوله الدين بيقول ان الست مش تخرج من غير اذن جوزها كدا
وفى حالة عدم الاستجابة
الحقيقة هاعملها كمين واخليه يقفشها شكرا

6- ولا حاجة اذا كان الدبابير بيقعدوا فيه انا هاشكيهم لمين
اللى هاعمله انى مش هانزل اقعد معاهم

7- ما يمكن نايم هو لازم تعبان ما انتى عارفه يا اببى شوارعنا مليانة بالناس دى
لو تعبان وانا اتاكدت من ده اكيد هاحاول اساعده وخصوصا انى دكتورررررررررررر


سلام يا احلى اببى

Unknown said...

جد والله أسئله جميله جدا انا

وحصل أكثرها معايا بس للأسف اتزمت بالصمت لأن هقول لمين مثلا ابنك مدمن هقولللأب المدمن ولا هقول للأم اللى بتشجع ولادها على.........ولا هقول لمين
قلت لواحد جارى تانى ملتزم قالى ابعد عن الناس دول أحسن يا مصطفى
وبعدين الناس بدأو يحطونى فى دماغهم ويطلعوا اشاعات وغيرها من اللبس بتاع الحشيشه دول

انتى فى رأيك اعمل اكتر من كدا ايه


أما لو كان الموضوع خاص بالاسره مثلا طبعا مش هاسكت وهاعمل المستحيل علشان أصلح أى أخطاء

والانسان بطبعه بيختلف فى تعامله مع اسرته عن خارج اسرته ودا خارج ارادته
معلش بقى مقدرتش اجاوب على الاسئله سؤال سؤال بس الكلام ده اعتقد انه وفى الاجابه

دمتى بخير

مصطفى

حنين.. said...

ازيك يا ابى.. هدخل علطول فى الالجابات وبدون ترتيب, لو لاقيت واحده او واحد جارنا مدمنين... دا حصل فعلاا, وقلت لماما... روحى وكلمى اهليهم... وحاولى تقنعيهم يتعالجوا... قاللتى انتى مجنو نه يابت.. عايزانى اروح اقولهم ابنكم مدمن.. وبعدين ما هما عارفيين, قعدت احاول مع ماما وقعدت اعيط وقولت لاخويه. محدش سمع كلامى, ومكنش ينفع بما انى بنت اروح اكلم المدمن, اما بقى لو اخويا... هقول للوالد, واحاول اقرب منه واقنعه با العلاج, اما بقى لو واحده صاحبتى بتحب وكدا, فمعظم البنات يا ابى دلوقتى بيحبوا, ولو كلمتهم... هيقولوا عليه متخلفه ومعقده.... لكن انا والله بكلمهم, وبحاول اوعيهم يقوللى( ما عدش ينفع
) اما بقى لو لقيت واحد على الطريق.. هشوف الاول اذا كان بيتحرك.. هحاول اساعده, اما اذا لاقيته ما بيتحركش.. فحاول اشور اى حد عاقل وكبير عنى فى الحكايه دى ساعتها.. تحياتى ليكى.. فى انتظار المزيد

جنّي said...

إن شاء الله ها أجاوب ولكن بعد عودتي من السفر

إخواني أخواتي الأعزاء

السلام عليكم ورحمة الله وبركاته

استودعكم الله الذي لا تضيع ودائعه

إجازة من التدوين ...

ولكني سأكون على تواصل معكم بزيارة مدوناتكم ...

أرجو أن تسامحوني على تقصيري في حقكم ...

وتفضلوا بقراءة البوست الأخير ...

إلى اللقاء والسلام عليكم ورحمة الله وبركاته

أخوكم

said

مواطن مصرى نايم said...

لا يا ايبى والله لو ليا كلام معاهم حنصحهم بس بطريقة غير مباشرة
يعنى احكىلهم حكاية شبة بتاعتهم بس عن واحد صاحبى و مراتة مثلا مده يعنى
و اوصل لهم اللى انا عاوز اقوله من غير ما اجرحهم

اما بقى كنت سلبى لانى لو اتكلمت مع اللى بيعملوا كده
حنزل لمستوى اقل من دماغى و ادنى اخلاقيا
انا لما واحد صاحبى بيشرب سيجارة و انا معاه
ببعد عنه لحد ما يشربها
و لما يخلصها بقولة انها تكون اخر مرة يشربها عالاقل و انا معاه
هى سلبية ايجابية فى نفس الوقت
فهمتى وجهة نظرى يا ايبى
عموما يا سيتى انا لو كنت اتدخلت و حد قل ادبة عليا كانت حتبقى ليلة الست الوالدة اللى جابته سوده
و كنت حقلبها دمار
لانى لما بتنرفز بفترى
هههههههههههههه
اه و الله

تحياتى لوكيل المدرسة يا حضرة الناظر اول مدير تانى و محقق تالت ايبى هانم
و سلامى للخرفان خروف خروف

د. إيمان مكاوي said...

دمك زي العسل يا آبي..ربنا يسعدك
بقترح نعمل إفطار جماعي حريمي في رمضان ..ونلتقي بعد غيابي عن رمضانات مصر 7 سنين
أنا أخبرت سبهلله وفاتيما .زقولولي رأيكم
تحياتي

Alkomi said...

س 1 و 2 و 3 و 4

لا تعليق

س 5

على حسب قوة العلاقة بالجيران

هحاول العلاج من غير ما الطرف التاني يحس

او باقل الخساير

بس لو حصلت خسارة بسيطة حتى اظن ان فتح الجرح و تطهيره افضل من التعايش معاه

س 6

لو الرقاصة حلوة طبعا هنتفرج

الحشيش

انا اسكندراني و شهادتي مجروحة فيه

هههههههههههههههههههه

لا طبعا

غالبا لو في دوشة و صداع هبلغ الشرطة

عالاقل يحللوا الفلوس اللي بيقبضوها من عرقنا و شقانا

س 7

الموقف ده بيتكرر كتير

مافتكرش حد يستحق المساعدة الا الضعيف فعلا

و كلنا بيبقى عارف الضعيف اللي بيستحق مساعدة من غيره بس اللي بيفرقنا عن بعض طريقة تعاملنا في ناس بتبقى متيقنة ان اللي قدامهم مش محتاج مساعدة و بيشتغلهم بس قلبهم حنين جدا و مايقدروش يستحملوا فعلا

س 8

هو انتي ما نزلتيش الموضوع ده تاج ليه ؟
باااااااااااااااي

الطائر الحزين said...

انت نسيت انى قلت اللى بيحركنى فى هذه الاحوال احساسى

Soooo said...

بسم الله الرحمن الرحيم

احمد سوووو
الفرقه الرابعه شعبة خراطه ودقدقه

اجابة السؤال الاول
هتكلم معاه في الاول واحاول افهمه ان اللي بيعملو ده غلط .. لو ما ارتجعش هقول لأهله

اجابة السؤال التاني
هصحى في يوم قبل ماهو يصحى واروح رابطه في السرير واتصل بأي مستشفى يجو ياخدوه عشان يتعالج .. وشيمو بتضرب نمل وصراصير وخنافس مؤخرا

اجابة السؤال التالت
هقولو او هقولها يركزو في مزاكرتهم ومصلحتهم دلوقتي ويسيبو الموضوع ده لما يجي وقته .. ومش ده هو الوقت المناسب لكده

اجابة السؤال الرابع
لو ولد هقولو مايلعبش ببنات الناس .. ولو بنت هقولها تخلي بالها من نفسها ولو اللي بيحبها جاد يبقى لازم ياخد خطوه ايجابيه

اجابة السؤال الخامخ
هقولو او هقولها ان كده غلط ولو هو او هي ماصلحوش من نفسهم انا مش عايز اعرفهم تاني على اي نطاق في الحياه .. لان اللي بيخون مره سهل انه يخون الف مره

اجابة السؤال السادس
هنزل ابارك للعريس وللعروسه واقولهم ربنا يوفقهم ويباركلهم ويبارك عليهم واخد بعضي وامشي من سكات .. ولو لقيت حد من صحابي هاخده في ايدي بدل مايتنيل على عينه وعين اللي خلفوه

اجابة السؤال السابع
هحاول اصحيه او اصحيها ولو لقيته تعبان او عيان او حاجه من هاذوها القبيله .. اتصل بالاسعاف واستنالهم يجو ياخدوه


انتهى



سلاموووووووووووووز

Oss said...

بصى يا آبى
معلش على التأخير اللى كان بظروف سفر
سوريز بأه

لذيذ الهوم ورك ده
أهى دى الواجبات ولا بلاش

1-بصى
انا ليا زمايل دفعه بيشربوا سجاير
وبما ان 15 سنه لسه سن صغيره
فده يعتبر فى شناعة الإدمان
ومش بنقول لحد
لأن أصلاً المتن بتاعهم بايظ وفاكرين ان السجاير دى رجوله
ولو قعدتى جنبهم قرنين ماحدش هيسمعلك
ده غير انى لو قلت لحد هبقى واشى واستحق الإعدام فى ميدان عام
خلينى ساكت مع ان ده غلط
واللى مزودنى سكوتاً إنهم مش صحابى
نفس الإحساس لما تمشى وتلاقى عيل شايل سجاره

2-لأ
أخويا لأ
مع انه الكبير بس هقطعه
:)
بداية هنصحه مره فى اتنين فى تلاته
ماكنش
على بابا عدل
واشى واشى مش مهم

3-لو فى حدود السليم والزماله
يبقى قشطه
عدينا الحدود لأ
عالأهالى عدل
(:
أنا واشى بالفطره

4-ماهو حلو وحش لازم حد يعرف
مراهق او مش مراهق
الحاجات دى مافيهاش هزار

5-على أهلى عدل بردو
هما هيتصرفوا كويس
بس لو انا مستقل بذاتى وقاعد لواحدى فى بيت
هاشوف حد كبير فى العماره أقوله
انا مش مؤهل لحل موقف زى ده

6-لعلمك الأفراح دى بيكون ليها ظهر
يعنى ياإما اللواء أو العميد فلان حاضر
يا إما خالة ابو العريس او ابن خالة ام العروسه
يا إما صاحب الفرح واصل
مش جهجهونى كده
فحتى لو بلغت انا اللى هاتلبس
وبردو هانزل واقعد معاهم بالعند فيكى
:)
ده فرح

7-ممكن أحاول اديله حاجه
أو لو معايا حاجه تتاكل اديهاله
ده اللى اقدر اعمله
انا كنت مره رايح المدرسه وكانت الدنيا ممطره والشوارع غريق وهاتك يا طين
ولاقيت واحد نايم زى الجثه
والله مش كنت طايق نفسى يومها
والله احنا فى نعمه من ربنا مش حاسين بيها ولو حسينا وشكرنا مش هنعرف نردها

أى خدعه
شاكلى هاطلع بماده معاكى
أو هاخد مقبول
اتوصى فى الدرجات

Doba said...

هستخدم نفس رد الطائر الحزين وهقولك على حسب أحساسى بالشخص ده فى الوقت ده وبناء عليه هتصرف

بس

فاتيما said...

أنا جاية متأخرة شوية ؟؟
طيب المهم لحقت اجاوب
متسحبوش الورقة
إيه يا آبى السؤالات دى كلها ؟؟
طبعاً إنتى عارفة إجاباتى
قبل ما أقولها
مش هفتح بقى
عشان مجبش لنفسى أى مشاكل
أنا بمشى حالياً جوا الحيطة مش جنبها
أنا نموذج فج للسلبية اللى بتتكلمى عليها
بس عندى أسبابى
منيش مبسوطة من نفسى طبعاً
بس الخوف يعمل أكتر من كدا بكتير
سلام

Empress appy said...

3ala asm masr said...

حد طايل يا بنتى هههههه هاتى انتى الرتب بس وملكيش دعوه





wanna b a physician

يا لهوى انا حطيتك على اريدر ابن اللذينه ومش جابك انا جاى على طول اهو
وبعدين دبابير لما تقرصهم يا دكتور انت ابن ناس خليك فى الكليه وانا هتصرف معاهم ههههههه نورت يا احلى دكتور وسورى على التاخير

Empress appy said...

egyboy
=======

بس الصمت وحش فى اوقات كتير عموما احالنا اوراقك الى دبلون الصنايع هههههههه
نورت الكوكب





حنين
====
هو يا قمر مجرد انك تأخدى موقف وتروحى لاهلك تقولى لهم فده كويس المهم اننا مش نسكت وخلاص
واحالنا اوراقك الى كى جى بما انك بتعيطى هههههههه

Empress appy said...

جنى
===
تروح وترجع بالسلامه هتوحشنا كتير







مواطن مصرى نايم
=============
يا واد يا تنك يا اسلام بص هحيل اوراقك الى كليه العندسه قسم عماره واقعه ههههههه

Empress appy said...

ايما
=====
انا موافقه وكانت سبهلله اقترحت الموضوع ده يا حبيبى
نورتى يا قمر




محمد الكومى
==========

انت حاله خاصه يا كومى ههههههههههههه
اعمل فيك ايه يا بتاع الشهادات المجروحه هههههههه
هحيل اوراقك على كليه تب من بوقك هههههههه

Empress appy said...

الطائر الحزين
==========

ماشى هفوتها المرة دى هههههههههههه
نورت الكوكب





ســـــووو
==========

والله يا سوو يا خويا احرجتنى باجاباتك الفزيعه الشنيعه دى وهحيلك اواقك لرياد الاطفال ههههههه

Empress appy said...

Oss
===
طيب اسخطك بقى اوديك فين هههههههههه
قولى احول اوراقك على فين يعنى اوديك ابتدائى
بس السجاير لا وهشهوالنبى ابعد على الاقل عنهم
نورت الكوكب تانى يا قمر



دوبا
=====
ماشى يا دبدوبه هههههههههه يعاد صفررررر دى نتيجتك هههههه
نورتى يا قمر

Empress appy said...

فاتيما
=====
والله والله والله والله كنت هزعل منك لو مجتيش واعترفتى من غير ضرب ههههههههههه
نورتى يا طمطم يا حبيبى

Mafrousa said...

أبي يا بتنجانى
انا من ساعة لما نزلتى البوست و انا حموت واعلق
بس لظروف نتيه بحته
و ظروف اني بعيده عن منزلي اتأخرت شويه
بصي يا بتنجاني..
انا مش حضحك عليكي...ولا على نفسي.....واقول كلام متناقض
انا حقولك.اني حفضل أكل فى نفسي و اتفرس و اغلى ان ازاي اخليهم يعرفوا من غير ما اقول بطريقه مباشره
و بعدين اى واحد فيهم لازمن اشوف هوه ميته ايه علشان اعرف انا حقوله ايه و ازاي
يعني كل حاله حتبقى مختلفه عن اختها
و ياخرب عقلك انتي ايه....
بس تصدقى اسئله صعبه بجد
ده انا بفكر فيها من ساعت ما نزلتي البوست

Empress appy said...

واحده مفروسه
===============
عارفه انك هتكلى فى نفسك طول الوقت مش قولت لكى انتى زى اى خدعه
انا بس حبيت اورى للناس التناقد فى ايه بقى تعالى اقولك

1- انه بيتعامل مع الغريب كأنه ميخصهوش يعنى يهتم باخوه وطززز فى الباقى ودى تبقى انانيه مفرطه اوك
2- فى نفس الوقت اللى مش هيهتم بيه هيتكلم عنه
ودى عادات المصريين تتكلم على بعض
3- البنات ميقبلش على اخته ولا قريبته انما هيقبل على الغريب ودى سلوكيات مزدوجه بحته فاهمانى طبعا
4- الست المتجوزة او اللى بتخون او الراجل قالك لما الست تخون تبقى جريمه شرف وتتقتل وحاجه تقرف
تعالى على الراجل عادى وبرضه فى الحالتين مش هيكتفوا بالصمت وبس
لا هيتكلموا على الناس دى ويجيبوا فى سيرتها مش زى ما البعض ادعى
5- موضوع الافراح طبعا لان الجبن ماصل عندنا وعدم مواجهه الغلط فالاغلب هيقولك انا مالى او هينساق بس برضه هينقد
ودى مصيبه كمان يعنى مش متعلمين نواجهه عيوبنا ولا خوفنا
6- موضوع الميت اللى فى الشارع او المرمى
هيقولك برضه انا مالى لان ده عدم تحمل مسئوليه تعالى بقى لا قدر الله لو حد من عيلته يعنى والده مشى فى الشارع وجاله غيبوبه سكر او ضغط واتساب تفتكرى لو الناس مش عبرته رد فعلك لما تروحى المستشفى ايه هتقولى الناس مش فيها خير على الرغم انك برضه فيكى نفس الموضوع يبقى دى سلبيات لازم تتغير ولا لا
يالا هاتى ربع جنيه وبفكر اعمل وجهه نظرى او تحليلى ده بوست ايه رايك بعد مناقشتك طبعا

قوس قزح said...

يعنى ارجع من الاجازة على الامتحانات على طول مفيش دروس تقوية ولا مجموعات

ماشى يا ستى الكوتكوتة

ندخل على الامتحان الهمام ( مع انى وصلت بعد وضع الاجابة الصحيحة هههههه )


1- ابن الجيران : حسب قرب الجيران دول ليا مينفعش اشوف واحد على اول الشارع مدمن و بيشم و اروح اقوله انت بتشم ليه و لا اروح لامه و ابوه و اقولهم كده ممكن يطلعوا تجار مخدرات اصلا
لكن لو الجار ده ابن ناس اعرفهم او يعنى اسمع عنهم انهم كويسين هنا ممكن جدا المح للاهل من بعيد و لو جات الفرصة اتكلم مع الولد هتكلم معاه بردو عن طريق التلميح من بعيد
القريب : هتكلم مع اهله و معاه بصراحة لان القرابة تدينى الحق ده

2- لو اخويا بقى هنكد عليه عيشته و افضل وراه لحد ما يسيب الهباب ده

3- علاقة البنت و الولد او العكس : بصى انا العادى بتاعى طول ما انا ماشية بنصح الناس - حاجة تخلى الناس تتخنق منى يعنى - يعنى لو شوفت الوضع ده هتكلم مع البنت او الولد و احاول انبه ان ده غلط الا طبعا لو حب حقيقى بحاول اقف جنبهم كمان

4- السن مالوش علاقة بطبيعة العلاقة لان فى اى سن ممكن تلاقى الشخص بيندفع فى علاقات غريبة الفرق بين السن الصغير و الكبير ان الصغير ممكن يكون مش فاهم لكن الكبير فاهم والاتنين بيرموا نفسهم فى دوامة العلاقات دى و بيحبوها كمان

5- الخيانة : الستر الستر الستر ده اهم حاجة و مش هتكلم مع اللى بيتخان لا هتكلم مع الخاين و مش بطريق مباشر

6- يوووووووه ده انا ممكن اطلب الامن بتاع المدينة لو عيد ميلاد و عاملين دوشة زيادة بس .. افرح و اتبسط بس متنكدش على غيرك يعنى ده مبدئى .. وبعدين عايز تفجر و تسكر انت حر بس من غير مجاهرة لان كده انت بتجرحنى كمان و من حقى اعترض

7 - لو شوفت حد مرمى هقف و احاول اوقف اى حد قبل ما اقرب منه .. لانى هخاف يكون ميت و من منظره ممكن احصله .. او يكون متنيل سكران ولا عامل كده استهبال علشان يسرق الناس .. يعنى لازم يكون حد معايا علشان خوف مش ندالة يعنى

اخر كلام بقى يا نحلة هانم و دبور بيه
متستغربيش لو ناس كانت سلبية .. ده مش بسبب الناس بس .. ده بسبب القانون اللى بيشوفك متهم لحد ما تثبيتى العكس .. و المجتمع اللى شايف نفسه انه صح و اللى حواليه هم الغلط .. يعنى ف ناس تحسى انهم يستاهلوا اللى بيجرى لهم من غبائهم

مش كل الناس هتشوفك ايجابية ممكن جدا تكونى حٍشرية و فضولية و طالعة فيها و عاملة نفسك فوق البشر

الواحد نفسه بجد يصلح الغلط بس مين يفهم و مين يسمع

ها بقى هتدينى كام ؟؟ :)

Empress appy said...

قوس قزح
==========
حبيبه قلبى طبعا عارفه ردى عليكى وانتى كنت مستنيه رايك علشان ناخد قرار فى بوست لازم مجلس ادارة الكوكب يجتمع
هههههههههههههههههه
وعموما هنحيل اوراقك لكليه الطبيخ ايووووووون الاقتصاد المنزلى يعنى بما انك متزوجه وتعولى ههههههههه

Share |