يا مجانى يا مجانى


الحقيقه لا اعلم ما هو سر الفخر والفشخرة من الاخوة اللى تعاليمهم بفلوس وما هو سر الانكسار ومحاوله انك تدار العار الذى الصق بك انك تعليم مجانى
والاقى اصحاب مدارس سنيه شخلع للغات ومدارس عبدو بلطه للتعليم الحكومى ماسكين لبعض المعايرة
طيب انا بقى خريجه تعليم مجانى اى والله ابو وصل احمر دا فاكرينه ابو تقريبا 8 جنيه واحنا فى ابتدائى و42 جنيه واحنا فى ثانوى
بس كان عندى مدرسين محترمين مدرسين ليهم هيبه
اولا عاوزه اقول زى ما فى التعليم المجانى مدرسين ميتقلعوش من الرجل الشمال فيه برضه فى التعليم الخاص مدرسين اصلا تقرف تلبسهم فى رجلك
طيب احب برضه اغيظ الساده اللى بيتنططوا ويقولك انت تعليم مجانى
طيب انا تعليم مجانى اه بس انت اندفع فيك فلوس علشان حضرتك تفهم ويشربوك العلم بمعلقه
الاغلبيه دخلوا ولادهم المدارس دى علشان طنط سعاد تقعد مع طنط برشام تقولها انا ابنى ولا بنتى خريجه مدارس الكونزفوتار الفرنساوى
وكله كوووووووول يا برنس ويبقى جايبين لهم مدرسين بالكوم بفلوسى يا كليبه بقى
طيب انتم اغبياء فعلا علشان كدا بيدفعوا فيكوا فلوس
ملحوظه مهمه انا كان ممكن ابقى فى مدارس خاصه بس للاسف اقرب مدرسه بعيده عن بيتنا 25 كيلو يعنى انا كبيرة ماما واول فرحتها فمكنتش تقدر تودينى وعربيه تودينى وتاخدنى مكنش السبب مادى بس كان السبب قلب ام بتخاف
واهو انا زى الفل اهو يعنى مالى عندى اتنين رجلين واتنين عنين واربعين لسان وبعرف انجليزى وطشاش فرنساوى ومش مهم الالمانى يعنى ما هو انا مش ها استخدمه فى المطبخ
وانا نتيجه التعليم المجانى وانت بتقروا ليه بكل مستوياتكم وتعليمكم
نرجع تانى برضه البهوات اللى بيتكسفوا انهم تعليم مجانى او برضه بيعيروا التانين زى ما انا عملت احم احم يعنى
ما هو حضرتك دا برضه مش معناه اننا تعليم مجانى افضل لا ما برضه فينا المنيل بنيله واللى بيضرب وبيقل ادبه والفاشل والغير مثقف
لو ها اقعد اعد لكم كل مزايا وعيوب دا مش ها اخلص
الملخص ايه مش بالتعليم ابسلوتلى او مش بنوعيه التعليم
لا بالنشأه بدليل صيع وشمامين رجلين وشمامين بطيخ بيطلعوا من المدارس دى هباب واقطران وزفت مزفت
وبرضه فيه ناس بتطلع فله القله
وفيه ناس فى مدارس لغات اللى قواهم ورباهم دادات او امهات جهله
وفيه امهات متعلمين معرفوش يربوا كدا
فااللى عاوزه اقوله ميبقاش كل واحد يتكا على الكرسى اوى ويتخيل نفسه خديوى مصر ويقعد يقولك انت تعليم مجانى وانت جامعه امريكيه تبقى فاشل
دا اسمه استعباط الانسان مش ان اهله صرفوا عليه لفين ما ممكن يبقى بيدفعوا فلوس علشان ياخد الشهاده دى وفى الاخر يعلقها على قفاه وهو ماشى ويبقى تفكيره محدود
عبد الناصر الله يرحمه اتعلم مجانى علشان الناس اللى بتقول دا دخل التعليم مصر طيب وقبل كدا حضراتكم مين علم الباشا الله يرحمه مين علم اللى قبله التعليم ادعم شويه فى عصره انما الساده الجهله من الجانبين حتى التعليم لو كان بفلوس قبل عبد الناصر فكان موجود ومش غالى وكانت نفس الصراع اللى بيحصل دلوقتى مدارس بشاوات ومدارس اولاد الجناينى
العيب فى اللى معاه فلوس والعيب فى الجاهل والعيب فى تفكير مجتمع مش فى هو دخل مدارس ايه يا ما خريجى لغات وفاشلين وخريجى حكومه وصيع والعكس فى الجانبين بس الفكره انكم بتختاروا وسط معين تعيشوا فيه
النهايه بطلوا تتنكوا على بعض يا فاشل يا فاشل انت وهو
اه نسيت اقول ان اصلا التعيلم لغايه ما انا سبت ثانوى كان كويس بعد كدا كله فى الكاوتش
وانا مش كرنب انا كابوتشى يا باشاوات مصر

كان معكم ناظر محطه ابو الليف ابى هانم بتنجانى


حكمه الامبراطورة

الفاشل يجى على راس القرد ويفليها

29 اخبط وقول رايك:

Foxology said...

من حوالى اسبوعين تلاتة كان فيه حلقة من برنامج ( شيزوفرينيا ) لمحمد ناصر بتتكلم عن الموضوع ده والراجل الحقيقة كان منحاز جدااااا للتعليم المجانى باعتبار ان اللى بيمجح فيه ويبقى حاجة فده معناه انه انسان عنده ارادة قوية فعلا لأن بالرغم من ضعف الامكانيات عامة الا انه بيقدر يوصل للى هو عاوزه وبرضه منقدرش ننسى دور البيت لأنه رقم واحد فى الموضوع ده وياما ناس دكاترة ومهندسين واهلهم مبيعرفوش اساسا يقرو ولا يكتبو واعرف واحد زميل والدى كان اهله لا بيعرفو الألف من كوز الدرة لكن هو عمل ده سند ليه قوى وفضل ينجح ماشاء الله لا قوة الا بالله لحد ما بقى عميد احد كليات الحاسبات الكبيرة فى مصر ده غير طبعا فى الخليج ونشرات علمية فى اوروبا وأمريكا

التعليم المجانى اه هو فاشل فعلا على الأقل حاليا لكن اللى بيقدر يعدى وينجح بيبقى لكذا عنصر منهم البيت والشخصية نفسها والتعليم ونوعه اخر عنصر برضه

تحياتى على الموضوع المهم

Empress appy said...

فوكس

هو فعلا كلامه دا مهم جدا وصح برضه
بس انا فعلا غايظنى التحيز الفاشل من الناحيتيين لكل واحد بيعاير التانى على ايه مش عارفه وفعلا زى ما انت بتقول فى النهايه الاهل والشخصيه لهم عامل اساسى انا فعلا بحب المدرسين بتوعى جدا جدا لانهم فعلا محترمين وكانوا بيشرحوا لينا بكل اهتما وحب ومحدش فيهم عقدنا مدرسين اليومين دول فعلا كمان داخلين فى شجره

لورنس العرب said...

ولله انا اشتغلت بالتدريس فتره -كمدرس خصوصي بدون أجر وليس كمدرس في المدرسه- لاحظت ان الطلبه كلهم واحد
زي ما فيه فاشل هنا فيه فاشل هناك
لكن نسبة الفشل كانت عاليه في الجامعات الخاصه
يعني لو تركتي التعليم الاساسي والثانوي ورحتى الجامعات الخاصه ستجدي العجب
العيال تقريبا ضايعه تماما
ولكن بيتعلموا بفلوسهم وبعد التخرج بتكون الوظيفه في الانتظار
انا اعرف كذا جامعه منهم جامعه MTI
فاتحه مخصوص عشان العيال تروح تاكل سندوتشات شاورما وفول وطعميه
وعلى الرغم من ان المناهج بالداخل جباره والمستوى مميز لكن العيال ملهمش مزاج يتعلموا

لورنس العرب said...

بردو فيه نقطه مهمه
الحكومه نفسها هي اللي عملت الفرق ده
انا في مرة قرات اعلان لبنك حكومي -الاهلي على ما اتذكر- كان كاتب في الاعلان بالنص "خريجي امدارس الحكوميه يمتنعون"
ووقتها انا كنت هاتجنن
هو على كل حال مستوى الطلبه الآن يحزن ومفيش خوف على العلام زي زمان
الناس بتدخل العيال مدارس خاصه عشان العيال تتعامل كويس بس مش أكتر من كده
-----
فكرتيني بصاحبي شغال في فوافون
راح مدرسه في زهراء المعادي عشان يدخل ابنه كي جي 1
قالوا له عشان انت موظف في فودافون لك تخفيض- راح يشوف ايه الحكايه
لقي الطلب بس "الابلكيشن"اللي هو عباره عن كام ورقه بتقوم بملي البيانات عليها خصم 50% له لأنه موظف في فودافون
يعني هايدفع 2500 جنيه في الابلكيشن والمفروض الواحد العادي يدفع فيها 5000 جنيه


بس كده

ولكي التعليق

لورنس العرب said...

آه نسيت حاجه

المدرسين اللي كانوا عندنا في ابتدائي كانوا امهات مش مدرسين
يعني لا تقارني بينهم وبين مدرسين دلوقت
كانوا بيعلمونا لوجه الله مش عاوزين مننا حاجه
دلوقت الحال اصبح صعب والمدرس تعبان ولو لم يعطي دروس مش هايعرف يعيش
عشان كده هتلائي المدرسين سفاحين سواء في التعليم المجاني أو غير مجاني

أبو حميد said...

إيه ده؟ إنت تعليم مجانى؟
أيا يا إخيه على كده

إزيك الأول .. عاملة إيه فى الغربة؟
شوفى يا ستى اللى بيكلمك ده تعليم مجااااااانى على الأخر وده لأن أبويا كان موظف حكومة وإحنا خمس إخوات ومايقدرش على القدرة غير ربنا والحمد لله كلنا إتعلمنا ودخلنا جامعة وأنا كنت جايب فى ثانوية عامة مجموع يدخلنى أى كلية فى البلد ودخلت هندسة القاهرة وإتعلمت فيها تعليم مجانى برضه
ودلوقتى بشتغل فى مكتب إستشارى من أكبر مكاتب البلد... بس أقولك الصراحة عندى شوية مشاكل مع اللغة مع إن دراستى فى الجامعة كانت كلها بالإنجليزى والمشاكل دى جزء منها بسبب التعليم وجزء أخر كبيييير بسببى لأنى لازم أحسن نفسى وأحل مشاكلى دى بس تقولى إيه على الكسل والدماغ التعبانة

سورى على التطويل (إنجليزى أهوه) وفعلا الناس بقت حاجة تفقع

سلام يا إمبراطورة

Empress appy said...

لورانس

ابدا من النص موضوع فودافون بلاش علشان انت عارف ان لسان طويل عيب بلاش ها خليها فى سرك بقى اعتبرنى رديت
ثانيا المدرسات والمدرسين كانوا بيعلمونا فعلا علشان يقولوا ولادنا اهم تصدق بالله فيه مدرسه اسمها ابله نجاه كانت مدرستى فى ابتدائى اقسم لك بالله انها بتسال عليا لغايه النهارده لو شافت امى او خالى ولما تشوفنى لما اروح المنصورة تاخدنى بالحضن وتقول لاى حد دى بنتى شوفى بقت حلوه وكبيرة ازاى وبتفخر بينا كلنا مش انا لوحدى وابنها كان زميلنا فى الفصل وبيتعامل نفس المعامله

اما بقى بتوع التعليم البايظ نقول الحق برضه فيهم اللى اهاليهم بيعضوهم واولهم خالتى عندها بنتتين مش بتتنازل عن انهم يجيبوا الدرجات النهائيه ولو قلت واحده فيهم درجه او اتنين بتقعد تفطسها وفى نفس ذات البيت التالته متعرفش تكتب اسمها بالعربى ولا تعرف تقرا عربى
واهم فى بيت واحد
ربنا يرحمنا يا رب

Empress appy said...

ابو حميد


اىيا يا مامى انت كمان :P
بص يا سيدى سهل جدا نتعلم اى لغه فى العالم يعنى نقصان لغه عندك مش مشكله انما نقصان الفكر والفهم والابداع هو اللى مشكله تعليم لغه فى العالم مش مصيبه قوى نفسك وتبقى اكسيلنت
علشان تعرف اهو انى بعرف برضه

فتاه من الصعيد said...

انا مختلطه

اخدت شويه خاص وشويه مجاني

وللعلم التعليم الخاص ميزته الوحيده هون انهم بيطحنونا شغل وهوم وورك... المجاني بنعتمد على نفسنا اكتر وده بيساعدنا لما نكبر

بوست عميق

تحياتي

يا مراكبي said...

وأنا كمان كنت تعليم مجاني لحد ما قبل الدراسات العليا وكنت زي الفل برضه .. وكان عندي أغلب المدرسين محترمين وأكفاء وكل حاجة .. والمدرسة رغم تواضع مستواها إلا إنها كانت مش وقيع يعني

لكن الإشكالية مش في مجانية التعليم من عدمة .. الموضوع كله يتلخص في نقطتين

أولهم .. مستوى وجودة التعليم اللي بتقدمهم المدرسة

وثانيا هو مدى حرص المتلقي (الطالب) على العلم والتفوق والإبداع

بلا شك إن فيه سقف للإمكانيات لازم نعديه عشان الإبداع ينطلق .. ولكن من غير النقطتين الأساسيتين اللي أنا اتكلمت عنهم دول لا يمكن الإمكانيات تفرق في حاجة

إيش تعمل الماشظة في الوش العكر

:-)

واحد من العمال said...

الحكايه مش حكايه مجانى ومش مجانى
المهم فى الرغبه فى التعلم والرغبه فى تكرار الشعور بلذه أن أعلم
حتى فى ظروف التعليم الحاليه ممكن يتخرج مميزين
بس إللى حتكون عتدهم الرغبه فى أن يتعلموابعد إنهاء تعليمهم

ودمتِ بخير حال

karim said...

كلامك معظمة صح و كلنا اتخرجنا من التعليم دة و زى الفل , الرك على الانسان , بس ليا استفسار مش الكونسرفتوار دة معهد الموسيقى مش مدرسة ولا انا معرفش, تحياتى

dodda said...

!!!
fi ri7et nafsana gamda awi!!!

7ad 3amalk 7aga??
we ba3din da e7na btoo3 abo balash katar meno

elta3lim fi masr kolo btengan y3ni 7altin ma7shi btingan we kromb we kolo tamam
we bardo mabrook 3al gwaz

dr.lecter said...

مش هدخل في جدل عن عبد الناصر لان خلاص موقفي محسوم منه وخلصنا
اما عن التعليم اللي بفلوس احنا البلد الوحيده اللي فيها من غير فلوس
امريكا التعليم هناك بفلوس اي حته التعليم بفلوس

Empress appy said...

فاتاه من الصعيد


فلتى انت بقى التنوع حلو برضه






يا مراكبى

اتفق معاك يا كبير طبعا فى كلامك

Empress appy said...

dodda


نفسنه يا حرام على كدا انتى لسه عليكى بدرى يا ضنايا لما تعرفنى ولا انتى نسيتى لما قابلتينى انا عامله ازاى
وبعدين يا اوختشى اللغه اللى بتكتبى بيها دى عيب فى الكيبورد ولا تنكر للعربيه ولا قليل من الانجليزيه
يا ريت تحددى الهويه
الله يبارك فيكى يا سيدة البتنجان والمحشى

Empress appy said...

dodda


نفسنه يا حرام على كدا انتى لسه عليكى بدرى يا ضنايا لما تعرفنى ولا انتى نسيتى لما قابلتينى انا عامله ازاى
وبعدين يا اوختشى اللغه اللى بتكتبى بيها دى عيب فى الكيبورد ولا تنكر للعربيه ولا قليل من الانجليزيه
يا ريت تحددى الهويه
الله يبارك فيكى يا سيدة البتنجان والمحشى

Empress appy said...

ليكتر


اعرف من دا انه تهديد هههههههههههه انا معرفش موقفك من عبد الناصر وانا اصلا ولا بهاجم ولا بدافع انا بكلم الفشله بس
اما عن التعليم بفلوس فى الحقيقه فى لكويت الشكيكه مفيش برضه تعليم بفلوس حضرتك غير للوافدين اما اهل البلد مجانى وفيه برضه مدارس خاصه كمان للكوايته وبفلوس وحياتك مش احنا بس البلد الوحيده ولا حاجه

Empress appy said...

كريم



انا بتريق عليهم ايوه هو معلوماتك صح

Empress appy said...

واحد من العمال


ايوه الرغبه والاهل والتطوير مش العبط اللى بيحصل دلوقتى شرفت يا فندم

حلم بيعافر said...

فعلااااااااااا

الفاااااااااشل يجى على راس القرد ويفليها

Empress appy said...

دودوا

معلش عملت لتعليقك رفض بالغلط مع تعليق واحد مريض نفسى يا حبيبتى عندى دى
نيجى بقى لحاسه الشم اه تقريبا عندك مشكله فيها تقريبا لان البوست مش هو عن دا خالص ولان اللى بينفسن دا عموما حد عنده نقص وانا الحمد لله معنديش نقص فى حاجه ولا لغه ولا اتنين ولا تعليم ولا حاجه
وانا مش هنا علشان اقول عن نفسى
انا بقول وجهه نظرى عن الجانبين لكى ان تتقبليها او ترفضيها دى حريتك انما عن شخصيتى او اللى بتسميه نفسنه فدا مش موضوع البوست ولا ها اقبل بيه
ثانيا المحشى لو مبتعرفيش اب باء الست المصريه يبقى انتى عندك مشكله فى الهويه المصريه ههههههههههههه
وبعدين مش وحش يعنى دا انا شخصيا بعرف اعمله وبفتخر بيه كمان
اما عن الكيبورد بتاعتك فالف سلامه عليها
انا فهمت كلامك بالفرانكو ارب طبعا لانى زى ما قولتك اعرف حاجات كتير محدش يعرفها بس مبحبش اتشبه او اكتب بيها
على فكره فيه كتاب لتعليم الاكل لو مش بتعرفى علشان بس الازواج المصريين بيموتوا فى المحشى
نورتى

Empress appy said...

حلم بيعافر


اه قولهم بقى

re7ab.sale7 said...

مساء الورد
انا اول مرة ادخل هنا
يمكن عجبني العنوان وعشان كدة دخلت اشوف البوست بيقول اية
كلامك كله عال العال ومنطقي جدا
بس تطبيق بقي علي حالة مصر فانسي يا عمرو زي الاعلانات ما بتقول
كفاية ان الواحد يبص لك من فوق لتحت كدة ومن طراطيف مناخيره
انا اكادمية مرجان احمد مرجان
وانت اية يا شاطرة
في حاجات كتيرة غلط عندنا بس يا تري مين السبب فيها ...؟؟؟!!! المسؤلين والا انا وانت واهالينا ....؟ اكيد احنا كلنا مشتركين بس الخطأ الاكبر اكيد طبعا عند المسؤلين
وكفاية ان نظامنا التعليمي زي الزفت والله انا بتكسف منه
تحياتي وتقبل مروري

قوس قزح said...

بصى يا ستى
و ادى قاعدة
انا بقى جربت الاتنين
المجانى 3 سنين و الخاص 9 سنين
وطلعت بالاتى ( بس على ايامى انا )
المجانى كان احسن فى المدرسين و الطلاب
يعنى المدرسين فى الخاص كان مش فارق معهم اوى طلبة فصلهم شاطرين ولا لا
لكن فى المجانى كان المدرسين بيهمهم يطلع اوائل المدرسة من فصولهم
و كان الطلاب فى المجانى باحس ان التعليم لهم هدف للوصول لحاجة معينة مش ترفيه زى الخاص

بس نجى بقى للمناهج
مناهج الخاص مستواها افضل بكتير
خصوصا المواد اللى بره الوزارة
فى حاجات كتير بتعتمد على الفهم مش الحفظ
فاما عن التعليم دلوقتى
السؤال بقى هو فى تعليم فى المجانى اصلا ؟
الواحد بيسمع بلاوى عن مدارس الحكومة
احنا بندخل اولادنا الخاص مش علشان فشخر ولا الكلام ده
لا علشان فى تعليم و فى متابعة و تقدرى تروحى تحطى صوابعك فى عينهم لو قصروا فى شغلهم
خلاص يا رحاب التعليم المجانى دلوقتى اخره يطلع نوعين من الشباب
يا شباب عبقرى اوى لانه قدر يعدى التعليم ده بامتياز
او موظف حكومى على مكتب اخره يفطر و ينام عليه

التعليم فى مصر كله سىء يارحاب و مناهج عقيمة .. الواحد بيحاول على اد ما يقدر يختار اللى ينفع اولاده بعدين

Empress appy said...

قوس قزح


اهو دا كلام الناس العاقلين قولى بقى كدا للفاشلين الله يكرمك علشان يهدوا والفاشلين من الجانبين

Story pain said...

الفاشل يجى على راس القرد ويفليها

والله انت جبتي من الاخر بالحكمة دي لأن الفشل والنجاح مش مقياسهم المدرسة حكومي ولا خاصة..افضل علمائنا وكتابنا كانت دراستهم في المدارس الحكومي واتعلموا تعليم مجانى ...كام فاشل دراسته كانت في مدارس خاصة وكام انسان ناجح في شغله وكانت دراسته في مدارس حكومية
وفعلا تباه مشكله كبيرة لو اتكسفنا اننا اتعلمنا تعليم مجاني لانه زمان كان افضل من التعليم الخاص دلوقتي لان كان في سياسة دولة عايزة يباه في تكافؤ في التعليم والعمل لكن لان بلدنا دلوقتي سياستها ضد ابناءها فلازم ولاد طنط سعاد وطنط برشام بس هما اللي يتعلموا ويشتغلوا مش مهم باه الناس التانية تتعلم ولا تاكل.. ولا تعيش

احيكِ على اختيارك للموضوع

سعيدة اني مريت على مدونتك

Bent Men ElZaman Da !! said...

هى المشكله فى التعلم المجانى والا ابو فلوس
المشكله فى التعليم نفسه بوجه عام ان شاء الله يكون تعليم كوالالمبورى حتى
تعليم فاشل
فا معنى ان حد يقدر يوصل فيه لحاجه اصلا فا ده فى حد ذاته شئ كويس
على رأيك يعنى ياما ناس اتربوا فى مستوى كويس وفى لغات وماعرفوش يعملوا اللى فى المجانى عملوه
الموضوع مش بالتعليم
الموضوع بالاراده

P A S H A said...

كل سنة وحضرتك طيبة وبألف خير وصحة وسلامة إن شاء الله
:)
رمضان كريم