سلاح التلميذ الخايب


من الممكن ان اكون الوحيده التى تفائلت بوجود الوزير الجديد ولا اعلم سبب لهذا الانشكاح فى الاسارير اللى جالى لما عرفت انه هو برغم الفيديوهات والانتحارات والاشجابات واللى قالوا ان اللى جاى انيل من اللى فات
بس انا حبيته لله فى الله
ايون هو وزير الداخليه فى التربيه والتعليم انا فعلا فرحانه بيه يمكن علشان النزعه العدوانيه اللى عندى العنيفه
بس احب اوضح بعض النقاط اولا هو راجل تربوى بصرف النظر عن ابوه الله يرحمه
يعنى مجبوش واحد بياع بطاطا يمسكه التعليم
مجبوش بياع اثار يمسكوه التعليم
جابوا دكتور
انا عارفه ان ناس هتعرض على كلامى وتقولى قدمه نحس لدرجه ان موت الناس فى اللجان هو اتحمله
مع انه قضاء وقدر عن نفسى كل دا مش بيهمنى
انا فعلا نظرتى فيه مخيبتش
دا سورى يعنى ومقصدش بالمعنى الحرفى انه وزير بلطجى
بمعنى انه فعلا ميمشيش مع شويه المدرسين اللى معندهمش زمه ولا شويه العيال السيس اللى داخلين التعليم ومش بيستفيدوا منه غير واحد زيه
وعلى رايه هى النار اتعملت ليه علشان الاشكال دى
انا سمعته امبارح فى برنامج محمود سعد وعلشان ماتهوش منى هقولكم
اولا
ليه اولياء الامور فعلا مصممين يحفظوا العيال ويطلعوا جيل غبى حافظ مش فاهم
ثانيا
ايه يضر الاب اللى كان بيشتكى انه واقف تلات ساعات يجيب الكتاب اللى الوزاره اصلا مش موافقه عليه
طيب ما تفتكر كدا لو كانوا التلات ساعات دول لف فى الشارع على كعوب رجليك ورا واحده كنت هتشتكى
ولا منتظر واحد جايب لك تعميره لدماغك كنت هتشتكى برضه
الاغرب بقى
بعض الامهات تقولك انا لسه هروح اجيب الكتب من بره ليه
فعلا انتى تروحى ليه هى تجيلك دليفرى
وبعدين فعلا الوقت يا حرام هتقعدى امتى على الفيس بوك ولا هتقعدى امتى ترغى مع صحباتك
انا فعلا مستغربه احنا عاوزين ايه
اولا الوزارة مش عاوزه الكتب دى والراجل وجهه نظره صح ميه فى الميه
قالك عاوزين العيال تفكر مش تفهم اغلبيه التعليم الاجنبى بيقوم على البحث
هتقولوا ليه هو فيه وقت للبحث ومنين نجيب كمبيوتر
اقولكم كل بيت بقى فيه ولو مفيش زى ما بتدى فلوس لابنك يروح يعمل سيرش على اغنيه ولا يلعب يبقى يستفيد بالفلوس دى فى حاجه كويسه او بدل ما بيعملوا سيرش على افلام بورنو
مفيش وقت لايه الناس مبقتش عاوزه تتعب ليه
الستات عاوزين كل حاجه على الجاهز علشان متذاكرش لولادها ليه
هو الفيس بوك هيطير ولا جارتك هتعزل
ابقى يا ستى اربطيهم فى رجلين الكنبه
الرجاله مضايقه ليه ومصممين على الكتب الغبيه
طيب والله انا معاه قلبا وقالب لو المحكمه حكمت ياخد الكتاب ويروح يطبعه وتبقى حرقه دم
الراجل بيحاول يصلح منظومه فاسده يا ريت الناس تساعد وتبطل كسل وتواكل وتنطع على الارصفه
مش قادرين على التعليم يبقى متخلفوش واقعدوا ساكتين افضل
بالمناسبه انا معتدقش انى اشتريت سلاح التليمذ دا مره او مرتين فى حياتى
لانه فعلا بيخلى الواحد يتواكل
فى النهايه بصر فالنظر عن كرهه الناس ليه
انا بحبه ومتوسمه فيه الخير
وان شاء الله يودى كل المدارس النار وكل المخالفين



حكمه الامبراطورة

اللى يخاف من العفريت يطلع له

20 اخبط وقول رايك:

وجهة نظري said...

ساا ا ا ا ا الخير عليكم. أنا رجعت :) مصيبة، صح؟

أبو كريم said...

المشكله الى ما حدش بيبصلها إن الشيله التقيله بتاع التربيه والتعليم فى مصر متنيله من زمان لازم تاخد وقت على ما تترقع وبعد كده تتشال ... ربنا يوفقه

Foxology said...

الحقيقة الاعلام هو اللى مصور للناس الشخصية الدراكولية للوزير

من كام يوم كنت بتكلم مع شمس النهار فى الموضوع ده ورأيها كان تقريبا نفس رأيك ورأيى انه مش هيكمل لأن فى ناس اكبر منه واقوى منه مش عاوزين ان الدنيا تمشى مظبوطة وسليمة والأمثلة كتيرة اخرها عبد السلام المحجوب وزير الاسكندرية التاريخى اللى طار فجاة وغيره وغيره وغيره

دول عصابة يا آبى واحنا المتفرجين طبعا

تحياتى

Anonymous said...

وانتي فاكره ان الطالب لما موش يلاقي سلاح التلميذ هيروح يعمل سيرش ع النت

ببساطه ده بيشجع بيع ملازم الدروس الخصوصيه

المنظومه كلها غلط والمناهج غلط

يعني ايه ادي لطالب نشاط في الكتاب يدور عليه ع النت وانا عندي طلبه في الصعيد ماعندهاش كمبيوتر ولا ينفع توصل حتى نت

ده قاعد في التكييف وموش فاهم

تحياتي

Empress appy said...

وجهه نظرى


لا بجد انا مش مصدقه دا انا مزقططه زقاطيط
ابعت ليه مش للنشر علشان اطمن عليك احكى كنت فين ومختفى ليه كدا

Empress appy said...

وجهه نظرى


لا بجد انا مش مصدقه دا انا مزقططه زقاطيط
ابعت ليه مش للنشر علشان اطمن عليك احكى كنت فين ومختفى ليه كدا

Empress appy said...

ابو كريم


يا رب بس يا ريت الناس تساعده

Empress appy said...

فوكس

اهئ اهئ اهئ دا الوحيد اللى ضحكنى وخلى عندى امل

Empress appy said...

فتاه من الصعيد


حبيبتى هو مبيوقلش اعملوا سيرش انا اللى بقول التعليم فى الامريكان دبولما وحاجات كتير او بره قائم على دا
الراجل بيقول شغلوا مخكوا
ذاكروا من الكتاب الامتحان من الكتب بلاش الكتب اللى بتحفظكوا
على فكره هو مش قاعد فى التكييف هو بينزل ويتسحل
والصعيد كلها يعنى مفيهاش كمبيوتر طيب ما المدارس يا حبيبتى فيها

الطائر الحزين said...

كل الناس بتنجح بس مفيش حد بيتعلم

Empress appy said...

الطائر الحزين


الله يفتح عليك يا رب يا ايهاب

Anonymous said...

المناهج الجديده كلها مافيهاش شرح وبتعتمد على أن اطالب هو اللي يدور على الشرح في صيغه نشاط

وطبعا الطالب يا بياخد درس ... ولو مجتهد شويه بيذاكر من كتب خارجيه

أنا بنت اختي كانت موش بتاخد دروس وبتعتمد على الكتاب الخارجي رغم إن عندهم نت لكن موش كانت بتعرف تعمل حاجه لان مفيش تدريب على الطريقه في المدرسه

والصعيد في مدارس مافيهاش حمامات يا فندم..والعيال مرميه في الحوش بتاخد الدروس على تخته في الهواء الطلق

ولو في كمبيوتر المدرس بيخاف عليه وبيبقى عهده

واكيد مفيش مدرسه فيها جهاز لكل طالب

تحياتي

عمرو يسرى said...

ممكن يكون بيعمل حاجات كويسه
بصراحه انا مش متابعه اساسا بس هبقى اتابعه بس عارفه اول ما عرفت ان الجزار الدكتور احمد ذكى بدر مسك الوزاره توقعت انه هيخربها وكان ليا اسبابى
انا كنت طالب فى جامعه عين شمس لما كان هو رئيسها قبل مايمسك الوزاره ومن عمايل السرقه والنهب اللى عملها كرهته هتقوللى عمل ايه
اقولك
اول من ادخل خدمه 0900 لمعرفه النتيجه بالتليفون قبل ماتنزل فى الجامعه بيوم بيومين او اسبوع
هتقولى طب ماعندك الانترنت
المحروس احمد ذكى بدر قبل مايتركه عمل انك عشان تعرف نتيجتك من على الانترنت لازم تنزل الجامعه تشترى كارت بخمسه جنيه عشان تدخل الكود بتاعه اى كارت والكارت يجيب نتيجه واحده اكثرمن مره
هتقولى خلاص استنى لما تنزل فى الجامعه
كلها اسبو عشر ايام وتنزل
صح
بزمتك ديه ماكنتش سرقه ولا رئيس الجامعه د/ احمد ذكى بدر فى وقتها ماكنش مسئول عن السرقه ديه
وحاجات تانيه كتير
لو اكلمت عنها محتاج مليون بوست
اسف للاطاله
وهبقى اتابعه اشوف خربها ولا خلاها استثماريه ولا بيعمل حاجات كويسه
وشكرا

nody said...

السلام عليكم

بصى ياست ابى
انتى بتقولى ان الوزير ده تربوى
وهو مش تربوى ولا حاجه
لان ببساطه كلمه تربوى دى لا تتطلق غير على من درسوا فى كليات التربه وبالتاى عرفوا يعنى ايه على التربيه واهم المبادئ المتصله بهذا العلم
وليس كل استاذ جامعه تربوى بالعكس
طب ياريت دكاتره الجامعه ياخدوا دبلومات فى التربيه لان التدريس ماهواش علم اكاديمى وبس ولا هو بالدراع
ثانيا
السيد الوزير ده لما يعوز يلغى الكتاب الخارجى يبقى يدينى بديل اقدر اشتغل منه مع الطلبه
يعنى يكون فيه شرح وافى مش كلمتين وبس على طريقه فؤاد المهندس وكمان صور توضيحيه بألوان مناسبه مش صور بهتانه العيال ما يفهموش منها حاجه ويقرفوا من شكلها وكمان دينى فى الكتاب تدريبات وافيه متدرجه من الاسهل للاصعب وايضا تراعى الفروق الفرديه بين الطلاب مش تمرنين تلاته وكان الله يحب المحسنين
التعليم فى مصر منهار من جوه وبره
فى مدارس كتير اوى لا تصلح للاستخدام واقعه والرطوبه ضاربه فيها
دا غير ان الترقيات واقفه وكنتير من المدارس الى ماسكينها مدرسين اوئل لا مافيش لا نظار ولا مديرين ولا حتى وكلاء
قولى لى بقى المدرس من دول ها يدرس ولا ها يشوف احوال المدرسه
ولو فتحت بقى فى مهازل الامتحانات يبقى قدامنا للصبح
انا مدرسه ووالدى ووالدتى فى المجال التربوى
يعنى عايشين فى هم التعليم ليل نهار
الوزير ده اصلح له يمسكوه اصلحيه
ده الشىء الوحيد الى يقدر يعمله
انما التعليم المفروض فى اى دوله محترمه ان الى يكون مسؤل عنه راجل فعلا تربوى

VÖltaa said...

تصدقى
نفس رأيي بردو فى الوزير الجديد

عقبال كل الوزرا مايبقو بلطجية يارب

,
نايس مدونة

جرييتنجس (تحياتى يعنى بس قولت اتفزلك بما انها اول زيارة )

يا مراكبي said...

طبعا كلنا عارفين إن التعليم بايظ ومحتاج ثورة جذرية لإصلاحُه

ومن غير إصلاح التعليم لن تقوم لهذا البلد قائمة

هفترض معاكي فرض أنا مش متأكد منه وهو إن وزير التعليم الحالي بالفعل ناوي ومخطط وعارف هيعمل إيه لإصلاح التعليم

وطبعا معروف جدا إن أي تغيير بيتم مقاومته بشكل عنيف جدا من كل الناس

المشكلة فين؟ المشكلة في الأسلوب العنيف اللي الوزير بيتبعُه واللي بيخلق بينه وبين كل الناس والفئلت عداوات لا داعي لها

الأسلوب بيفرق .. وخصوصا إن المقاومة للتغيير قوية جدا .. فالطريقة العنيفة دي مش هتجيب نتيجة زي ما هو فاكر بل بالعكس دي هتقوّم الدنيا عليه أكثر وأكثر لحد ما الكثرة تغلب الشجاعة والرأي العام هينتصر في النهاية وكأنك يا أبو زيد ما غزيت

ولو كان فعلا هدفُه إصلاح التعليم .. هينهار كل اللي بيعمله ده .. وما حدش هيسنده كتير لأن الحكومة مش عايزة وجع دماغ كتير ومش ناويين يخوضوا حرب ضد المجتمع كله عشان يصلحوا التعليم

---

ادع إلى سبيل ربك بالحكمة والموعظة الحسنة وجادلهم بالتي هي أحسن

ولو كنت فظا غليظ القلب لإنفضوا من حولك

اميرة بهي الدين said...

تصدقي
انا كمان مبسوطه
بس حاقولك الشعب بقي فاسد لدرجه ان اي حد عايز يعمل ايه حاجه عدله حيعدموه في ميدان عام
ومن فات قديمه تاه وبلاش دوشه
مبسوطه انا من انبساطك بيه
اخيرا حسيت اني مش لوحدي في هذا العالم

Hossam said...

Appyyyyyyyyy
وحشتينى جداااااا
بقى كده حتى متساليش ولا حتى فى العيد ولا رمضان ماشى ماشى
الموضوع عجبنى اوى بس انا مش معاه فى نقطة
انتى عارفة لو فى كتب مدرسية فيها كمية الامتحنات والتمارين اللى فى الكتب الخارجية اقولك نستغنى عن الكتب دى او حتى المستر فى الكلاس يقول على كل جزئية الحتة اللى بتلف علها اسلوب الامتحان
بس ولا ده ولا ده بيحصل
by the way
I didnt practice alot in Egyptian Educational System,but I wish to them all the best
Peace

الحصان الأسود said...

كلامك صح و عندك حق

المشكلة ان الشعب نتيجه سياسات من 40 سنة خد عالبلادة و التناحه و الاستسهال و التواكل و

بس التغيير مطلوب باسلوب و بخطوات جادة و مدروسة مش عشوائية همجية هجومية

Ahmad Hossny said...

السلام عليك و رحمة الله

أنا ليا تعليقين واحد ليه علاقة بالموضوع و التاني لأ

الأول؛ أنا متفهم وجهة نظرك في إعجابك بالوزير ده لإن فعلاً المدارس عندنا محتاجة نوع من الإنضباط و الحزم على المدرسين و الطلبة على السواء ، و عشان كدة أحمد زكي بدر واخدها بدراعه و فاكر إنه كدة بيصلح

لكن لو حطينا في إعتبارنا إن المدرسة أصلاً المفروض تبقى من غير سور و إن كتاب المدرسة المفروض أصلاً يكون أكثر تشويقاً من الكتاب الخارجي و إن مدرس الفصل يجب أن يكون مستواه العلمي و التربوي أفضل من المدرس الخارجي ، سنجد أن ما يفعله أحمد زكي بدر هو أنه يعالج أعراض المشكلة و لا يعالج أسبابها

يا فرحتي إنه أجبر الطلبة كلها على الحضور لمدرسين لم ينجحوا في إمتحان الكادر الخاص !!!!! حيعلموهم إيه ؟ الخيبة ؟؟

يا فرحتي المدرسين بيحضروا كل ساعات العمل الرسمية و مش بيشرحوا أو بيشرحوا أي كلام فارغ لأن مرتب المدرس منهم 200 جنيه ؟؟ هل ده علاج للمشكلة ؟؟

يا فرحتي لو مفيش كتب خارجية نشتريها و كتاب المدرسة غبي و متخلف (أسف في اللفظ) ؟؟ كدة نبقى عذبنا الطلبة بكتاب فعلاً عقيم و أجبرناهم بدل ما يشتروا كتاب خارجي لازم ياخدوا مذكرات الدروس أو يشتروا كتب خارجية قديمة أو من السوق السوداء !!!!!ـ

اللي أحمد زكي بدر بيعمله هو إنه عشان يهرب من المنافسة المفتوحة ، بيقمع المنافسين بقوة القانون ، بيخلي المدرس الخصوصي مجرم بدل ما يحسن مدرس الفصل !!! و الكتاب الخارجي مجرم بدل ما يحسن كتاب المدرسة !!! و الحضور إجباري بدل ما يخلي المدرسة ليها لازمة !!!ـ

لقد إختار الحل السهل بممارسة القمع بقوة السلطة لإخفاء أعراض المرض و الذي هو فشل المنظومة التعليمية بدلاً من الحل الصائب الصعب و هو العلاج الفعلي للمشاكل من سوء المدارس و نقص المعامل و تدني مستوى الأساتذة و سوء الكتب الدراسية و غيره

أما التعليق الثاني ، و أرجو أن تعذريني فيه ، هو أنني من لحظة دخولي المدونة للحظة خروجها كنت مجبراً على سماع أغنية لا أعلمها و لست مستمتعاً بها و بصراحة جابت لي صداع ، و كنت مضطر أستحملها عشان أقرأ كلامك و أستطيع التعليق عليه ، و عندما حاولت إغلاقها أو إيقافها أو إلغاء صوتها لم أستطيع !!ـ

أسف على الإطالة و أرجو أن تتقبلي تعليقي

أحمد حسني
مدونتي قصاقيص

Share |