صواريخ مضاده


مش ناويه اطول بس انا هقول لكم كلمتين بس حطوهم توكه فى شعركم حلق فى مناخيركم خلخال فى رجليكم انتم حرين


اللى ميقدرش يحفظ سره هو شخصيا
يبقى محدش ينفع يستأمنه على سره
واللى يحاول يتذاكى على الناس ويعمل فيها شرلوك هولمز ويسأل عن حاجات كتير بعينها
وفاكر ان الناس مش هتفهم ليه سواء بقى ولد بيسال عن بنت بنت بتسأل عن ولد
يبقى شخص غبى لان لو واحد صدق انه سؤا ل عادى الف هيشكوا فيه ولو هو بيقنع نفسه بغير كدا احب اقولهم اذا كان العقل بيشترى مكنتش الكرشه اترمت فى الاسواق
واخيــــــــــــــــــــــــرا

من الكوارث التى لا يوجد لها علاج الكذب على النفس فكذبك على غيرك قد يضره او لا انما المؤكد كذبك على نفسك

سيدمر شخصيتك


الشخص الذى يتدخل فى حياة الناس او يراقبهم ليجمع خيوط حول حياتهم سواء بقى الناس دى مهمه مش مهمه ممثلين مطربين رقاصات ناس عاديه
فدا شخص مريض لانه برضه بينسج افكار عن شخصيات هو خلقها فى باله وبس

اللى بيحاول يضحك على واحده او يعمل علاقه مع واحده سواء بقى بتحليل شخصيات وتدوير اسطوانات انتى رقيقه وبتكتبى حلو وانتى احساسك مرهف ويصوصو وينونو وميعملش اعتبار لكون الانسانه دى لها حياته
يبقى هو شخص واطى وجبان وميستهليش يعيش وهى تستاهل القلى فى مازوت علشان بتركن عقلها وتصدق ناس لابسين شرابات فى دماغهم

اللى تهد حياتها علشان واحد تبقى تستاهل تتعض من سمكه قرش وميلحقوش يلموا جسمها من المحيط

يالا كفايه كدا بقى

ملحوسه :- مش عاوزه واحد فقيق يبعت ليه يقولى انتى بتتكلمنى عن نفسك الكوكب دا يا جدعان علشان اكتب فيه كل المشاكل والملاحظات بتاعتى اللى بشوفها فى حياتى
اما حياتى الشخصيه فملك ليه انا وجوزى فقط مبكتبش حاجه عنها يعنى من الاخر وللمره الخمسه الاف محدش يعمل تسقيط عليا بميه مش نضيفه


كان معكم ابى هانم برنس الليالى ورمانه الميزان



22 اخبط وقول رايك:

adel said...

10/10 و في الجوووون

كام جملة كده في التمام


:)

أبو حميد said...

اذا كان العقل بيشترى مكنتش الكرشه اترمت فى الاسواق
أنا مش فاهم المثل ده يعنى إيه؟


عجبنى قوى الختام(برنس الليالى ورمانة الميزان)
كانت تحفة من سواق التاكسى فى فيلم ألف مبروك
يابرنس الليالى يارمانة الميزان
ياهاف ديفندر قلبى فينك من زمان

كل سنة وإنت طيبة ورمضان كريم

ويكا said...

ههههههههههههههههههههههههههه

ويكا said...

والله العظيم البوست ده دخل دماغى بطريقه خرافيه.

ابى

شبرا شبرا يعنى ( بس شبرا اجدع ناس والله العظيم).

بجد البوست هااااايل وجايب من الاخر ، وبت جدعه هي اللى كاتباها .

يخرب بيت دماغك.
يا( برنس الليالى ورمانة الزماااااان)

هههههههههههههه
انا بجد مش قادر امس نفسى من الضحك ، وخايف حد يدخل عليا يقول عليا مجنون.

Empress appy said...

عادل
=====
عارفه جيالك على هواك يا سوسه





ابو حميد

يعنى من امتى حد بيفهم ليه حاجه يعنى لو العقل دا وهو من مكونات االانسان بيتباع كان يبقى كل شئ غالى الكرشه ترمز للحاجه الرخيصه فهمت
وانت طيب ومنور دايما ميرسى يا فندم

Empress appy said...

ويكا


اخويا الصغنن انت على طول بتضحك ومش ماسك نفسك وفاضحنا فى الاسواق ودول الخليج الشكيك
ربنا يبسطك كمان وكمان

فشكووول said...

السلام عليكم ابى هانم .. مش ح أكمل الباقى
تحياتى
اولا : من زمان ما عملتش ليكى زيارة وانت كمان
عشان كدا كل سنهوانت بخير
رمضان كريم
ايه اخبار الكبسه
.. شوفى بقى اصل انا حشرى وانت منزله البوست عن الحشريين والكدابين واللى بيتزاكو على الناس
كل سنه وانت طيبه

Empress appy said...

فشكول


عمى العزيز
انا مش بزورك بس عارفه ايه اللى بيدور على لاساحه لا طبعا عارفه الانقاطاعات بتاعتك من بدرى وبسال سومه عليك كتير
وانت طيب وبعدين حضرتك تدخل براحتك خالص

كيــــــــــــارا said...

كنت مفتقداكي اوي في اللقاء

وكلامك في الجوووووووووووون ياابي بجد

ميه ميه:)

عمرو يسرى said...

كلام جميل

و قى الصميم

يا مراكبي said...

هدي أعصابك بس

:-)

ما إنتي عارفه إن النوع المريض ده من الناس منتشر جدا حوالينا من يوم ما بدأنا تدوين ولحد دلوقت .. مجتمع المدونين والفيس بوك زيه زي المجتمع العادي بالظبط فيه نفس المزايا والعيوب تماما

شمس النهار said...

بتنفخي ليه في قربة مقطوعة اصلا
ماكل واحد عارف نفسه اصلا

اللي داخل البلوجر يظبطت بنات واللي داخلو لنفس السبب
وناس لابسه وشوش غير وشوشها العكرة الاصلية

اكيد هتقولي ايه ده ياشمس اول مرة اشوفك بتتكلمي كده

بصراحة طقيت من النفاق والغباء والناس اللي عاملة حامي حما الاخلاقوقال الله وقال الرسول
وهمه لايعرفوا الله ولا الرسول

خلاص سيبي كل واحد وربه
وصدقيني هي هتصفصف علي الناس الكويسه بس

تحياتي

littilemo said...

كلام وبس

Empress appy said...

شمس

اتاخرتى فى الانفجار يا حبيبتى كنت متوقعاه من بدرى




ليتيل ايمو

سبت لك الفعل يا بتاع الافعال

Empress appy said...

كيارا

ربنا يخليكى ليه يا حبيبتى وانا كمان افتقدكوا اوى وصلنى سلامكوا كلكم





عمرو يسرى


متشكره يا عمرو

Empress appy said...

يا مراكبى


ما علشان كدا حبيبت اعرفهم حجمهم بس يا كبير فى الحياه والناس المحترمه بتبص لهم ازاى

بت خيخة وأي كلام said...

هييييييييييييييييييه

اخيرا بوست جميل ينفع اعلق عليه


البوست رغم انه قصير الا انه كله مواعظ وحكم وعايزله مجلدات علشان نعلق على نقطة نقطة



نيجى لاول نقطة بتاعة اللى محدش يقدر يحفظ سر مفسه

طب يا بتنجانتى واللى بيحفظ سر نفسه كويس جداااااااااا
وفى الاخر اللى حواليه يتهموه انه لئيم لانه مش بيقولهم اسراره دول تقوليلهم ايه؟


موضوع ان حد يقعد يسال عن حد ويلم خيوط حوالين شخصية
ااااااااااااه الموضوع ده بيحصل معايا
الاقى واحد او واحدة داخلين ماسينجر ويتكلموا شوية واذ فجاتن يسالوا عن حد تانى من المدونين
ساعتها اشك
هو او هى بيسالوا ليه
وبيكون ردى السريع والابيح فى نفس ذات الوقت هو
وانت مال اهلك


موضوع ان واحدة تسيب حبيبها علشان خاطر حد تانى
دى ما يتقالهاش حاجة
لان الزمن هاييلعب معاه لعبته الدنيئة وهاتعرف انها كانت غلطانة

ممممممممممممم

ايه تانى عايزة اقوله؟

مش فاكرة

عموما لو افتكرت هارجع تانى اكتب



انا عجبانى الحتة بتاعة حطوه توكة فى شعركم


هههههههههههههه

حلوة اوي وجديدة


سلام
اختك خيخة

dr.lecter said...

ياربنس الليالي ورمانه الميزان

wanna b a physician said...

اولا كل سنة وانتى طيبة

ثانيا انا اول مرة اعرف انك اتجوزتى فالف مبروك
ثالثا طبعا الكذب عالنفس اخطر انواع الكذب
يعنى كان فى واحد معايا بيشتغل نفسه انه ممكن يكون مدير المكان وبعدين مسك المدير شوية ولما مقدرش وقال لا اتقلش لاقصى حدود المحافظة كنوع من العقاب
عشان الكذب على النفس بيخلى الانسان يعمل حاجات تبهدله وشكرا

hasona said...

كل عام وأنتم من عواده
وكل سنة وانت بخير
وأسعدكم الله في عيد الفطر

فتاه من الصعيد said...

كل سنه وانتي طيبه يا رحاب :)

عيد سعيد عليكي وعلى زوجك وكل الأسره :)

م/ الحسيني لزومي said...

كل عام انتم بخير