الناس البجحه


بعد ما كنت قررت قرار لا رجعه فيه من قراءة الاخبار المصرية والتزمت التهييس واللعب على لافيس بوك والفعده فى البيت والمناكفه فى جوزى
ايدى اكلتنى برضه ورحت على مصراوى وقوم ايه الاقى الوزير الغير فنان برضه بيتكلم
انا افتكر زمان ولغايه دلوقتى ان الواحد لما بيغلط غلطه ولا يعمل مصيبه وكارثه كدا كان بيبقى عينه مكسورة ومش قادر ينطق الى ان تمر سنين وتبدا الموضوع يروح فى الوباء او فى الرجلين
فاروق افندى اه على وزن الباز افندى اه
طالع برضه يهاجم فى النقاب وفى القنوات
طيب انا متفقه معاه ان القنوات فيها بعض الناس اللى شغاله فته بالموزه ليل نهار وانا شخصيا برفضها وبقعد كتير احللها حتى بالعقل والمنطق بتاعنا والمنطق بتاع سعيد صالح مش لاقياه واكله معايا عيش من الاخر
انما النقاب كمان قالك خطر على الامن العام وقالك جاى من الصحراء
انا شخصيا معنديش مشكله معاه من دلوقتى ولا قبلين وبالعكس الناس المنقبات لغايه دلوقتى اللى قابلتهم فى حياتى سواء جيرانى او اصدقاء بيتعاملوا معايا كويس جدا
على الرغم من انى حتى مش محجبه ومنحله على راى خيخه وبحط روووووج
وبالعكس تعاملهم معايا كويس ولا عمر حد كلمنى حاجه كله بيدعى باهدايا للى قدامه وخلاص ومعتقدش لما حد يقولى ربنا يكرمك ويهديكى يبقى بيدعى عليه يجلى برى برى يعنى انا شخصيا ساعات بدعى للواد اسامه ان ربنا يهديه او يهده عادى يعنى
الكلمه بقى لساعده البيه الوزير ال. ولا بلاش
طيب مش من باب اولى يعنى كنت تنتقض المثليين اللى انت كنت رايح تسهر معاهم ولا دى حريه شخصيه والنقاب وحياه الناس حريه ملك لك واحدك
طيب مش من بابا اولى بدل البغبغه بتاعتك دى برضه تشوف موضوع لوحه الخشخاش اللى شربتوها
وطالع بكل بجاحه تتكلم من تانى
الحقيقه فعلا على راى المثل اللى عنده دم احسن من اللى عنده فاروق حوسحوس
سؤال بس اخير ليه بيقول ان الحجاب خطر على لاعقول ليه هو بيقفل عن العقل الميه والهواء والله انا مش بدافع عن حاجه علشان مفيش خحمار ماشى بالبوبو بتاعته يدخل يقولى لما انتى بتدافعى ما اولى تعملى انا بس احب لما حد ينتقض حاجه ميبقاش بيروج لعكسها
الحريه الشخصيه وتكوين الشخصيه مش باللبس يا روقه
الشخصيه بافكار ومبادئ وحياة

كان معكم ابى هانى من بلاد الواك واك

حكمه الامبراطورة

حبيبي كان ماشي تاتا تاتا كبر و اتعلم الغتاتة

8 اخبط وقول رايك:

Shaimaa said...

هوه بنى آدم كله على بعضه كدة معندوش دم ... ممكن تسميه وزير المصائب والكوارث ... بس الرئيس ومراته معجبين بيه وحالفين ما همه شايلينه خالص الا لما يخلص على كل أنواع الفنون فى مصر

Foxology said...

مازال الجدل مستمرا بخصوص الحجاب والنقاب وايهما شرعى وأيهما غير شرعى .. اتفق معاكى فى نقطة ان المظهر حتى لو كان علن خلفية دينية بيبقى مرجعه للشخص ومعتقداته وافكاره ومش حكر على بنى آدم واحد نصب نفسه الحاكم بأمر الله

تحياتى وربنا يهديه مهو ان لم تستح فاصنع ما شئت

AHMED SAMIR said...

الوزير فاروق حسني تقريبا من كتر قعاده على الكرسي اللي قرب على 30 سنة اصبح هو و الكرسي كيانا و احدا
جزءا لا يتجزء

Empress appy said...

شيماء

الكبير هو ومارته معذورين علشان حكم السن يا شيمو





فوكس

والله انا راى زيك ان كل واحد حر فى اختياره ومش علشان شويه جرايم يبقى فيه حكر حريه طيب ما اولى يروحوا يشوفوا اللى مش محترمين ومتلقحين فى جامعه الدول وغيرها

Empress appy said...

احمد

انا نفسى الوزاره تعمم نظريه الكراسى التيفال دى علشان محدش يلزق

يا مراكبي said...

هي فعلا بجاحة ما بعدها بجاحة

ولا كأن فيه حاجة خالص

طيب يداري خيبته التقيلة على الأقل في الوزارة

أو يحط منخُل على وشه
:-)

بت خيخة وأي كلام said...

وانا من هذا المزنق احب اهديلك اغنية


وبحب الناس البجحة
اللى بتتكلم علطول


انا فطست على روحى من الضحك لما قريت اسمى

والله يا بتنجانتى واحشتينى و واحشنى كلامك


بصى يا رحابتي الغالية

هو انا مش مقتنعة بالنقاب برضه

وموضوعك فكرني
بمرة كنت بدردش مع واحد صاحبي
مراته منقبة
قلتله ربنا يهديها وتقلع النقاب
فراح قاللى وهو مخضوض وبيضحك
ربنا يهدك يا خيخة

المهم يعنى ان انا اه مش مقتنعة
لكن شايفاها حرية شخصية


واللى يقول على الشذوذ الجنسي حرية شخصية

يبقى اولى بيهم انهم يعترفوا بحق المنقبات بحريتهم الشخصية فى ملبسهم


وبعدين انتى ليه تتعبى نفسك وتقري حاجة تعكر دمك

يا بنتى كبري دماغك من المهاترات دى

دول عالم وسخة مايجبوش غير الضغط


نقفل التعليق ده
وهابعتلك واحد تانى غير قابل للنشر

سلام

اختك خيخة

اميرة بهي الدين said...

روقه
خساره فيه الاسم والله
روقه بتاعت فيلم العار كانت بت جدعه وضحت بنفسها علشان الحبيب
هو بقي مش روقه خالص
بس
------------
ارجعي هيسي علي الفيس بوك
وسيبيكي من الجرايد خالص هي والمواقع
دي حاجات تحرق الدم يااختشي ودمنا مش ناقص
------------------
بس خلاص