فوفا خسر والمصرى برضه خسر


اليومين دول كانت الانتخابات بتاعت اليونسكو وعلى الرغم من خساره فوفا حسنى واللى الطبيعى اننا نزعل مش علشان فوفا لا قدر الله ولكن علشان دى حاجه كانت لمصر لقيت كل البشر بما فيهم انا فرحانه ونفسى ينفذ كلمته ويستقيل ويبقى كده اول وزير محترم لو يعنى طلع قد كلمته مع انى اشك شكه الملوخيه ساعات حططان التقليه

السؤال بقى هو احنا كمصرين بقينا بنكرهه مصر للدرجه دى ولا مش معترفين بالناس دى للدرجه دى ولا ايه التتغير اللى حصل فى شخصياتنا


ملحوظه اتنين

الناس كلها دلوقتى بتعارض انا بقرأ مدونات كتير وجرايد واخبار كله بيعارض طيب انا عاوزه اسال اللى بيعارضوا انتم بتعرضوا على اى اساس يعنى عندكم خطط بديله سواء المعارضه للحكومه او حتى لفكر شخص سواء كان مسلم مسيحى رجل دين رجل مجارى رجل كباريهات اى رجل واى كلام احنا بقينا بنعارض علشان نعارض وبس يعنى واحده مثلا لبست شوز حمرا هتلاقى الدنيا قامت وقعدت ليه معرفش علشان الاحمر وحش ولو ان لا مؤاخذه هنلاقى اغلبيه اللى اعترضوا عندهم اللون الاحمر ده بس فى حته تانيه ومحدش يفهمنى صح بجد
انا بقيت بتنقط انا لما بعترض على اى تصرف لاى حد بكون واضعه لاعتراضى اساسيات
يعنى مينفعش مثلا ابو رجل مسلوخه جاى يزور حاجه عندنا هووووووووب نقول لا ابو رجل مسلوخه ميدخلش ونعمل مظاهرة
مينفعش مثلا نقول هنعمل تجمع فى مكان وفجأه تلاقى الاعلام وكام شحط طالعين يقولك الامن فطسنا والامن كان حوالينا ما ده طبيعى ده تجمع وتجمهر ومش عارفين هيحصل فيه ايه احنا هنعترض ليه سواء بقى الامن بيحمينا ولا حتى بيعمل حاجات وحشه فى البنات طالما انا ارتضيت يبقى خلاص اسكت

مينفعش يبقى فيه تواجد مكثف للناس فى اماكن واعترض انهم بيلغوا مولد او بيلغوا حاجات مقفوله وعندنا وباء انا عاوزه اعرف الناس المعترضه بتعترض ليه ايه هى اساسيتها يعنى

مينفعش اعترض على النقاب علشان امشى فى موضه مينفعش انتقد الحجاب علشان يتقال عليا متحررة
مينفعش برضه واحد تعترض على غير محجبه علشان يتقال عليها ملتزمه انا نفسى اللى يعترض يقول مبرر صح واحد بس

وابوس ايديكوا لما تعترضوا على كلامى برضه قولوا ليه مبرر قولوا ليه

برضه المدونات كترت ليه اوى كده ما شاء الله مبقتش ملاحقه
يعنى اللى بقى بيدخل التدوين ده جديد ليه علشان ايه الهدف مدونه تفتح شهر وتقفل ولا شهرين وتقفل

اصلا انا عاوزه حد يقولى انا ايه مصبرنى عليكوا وعلى البلد دى وعلى انى اقرأ واكتب كل ده منك لله يا اللى فى بالى

وكل الحاجات اللى متنيله فوق دى مكتوبه نطلع منها بايه على راى خيخه
ان ليكم الجنه انكم متحملين واحده زى كده بجد كل سنه وانتم طيبين ومعترضين بالعقل

كان معكم لواء اركان حرب قائد جناح الطابيه اليمين ابى هانم


حكمه الامبراطورة

يغور القاعود اللى يجى من ناقة جربة

50 اخبط وقول رايك:

رئيس جمهوريه نفسى said...

موضوع فوفا هو مش مصري علشان نزعل قوي يعنى دول مصريين اسماء فقط وعلى الورق

موضوع المعارضه انا ادليت بدلوي ما فيش داعى انى اكرره تانى

Foxology said...

اولا : بالنسبة للوزير المتثقف لا اعتقد انه هيستقيل لأن الطبع يغلب التطبع مع احترامى ليه

ثانيا : الناس بتعترض لمجرد الأعتراض فقط لا غير كنوع من انواع التنفيس عن الكبت المتولد من العجز عن التغيير

معلش احان دايما كدة وهنفضل كدة لأننا كدة من ايام الفراعنة :))

تحياتى :)

ست البيت said...

آبي هانم بتنجاني وخرفاني
عيد مبارك
تقبل الله منا ومنكم
عساكم من عواده
هابي فيست
اؤدك تماما في رفضي للاعتراض من باب الاعتراض واانا بعترض يبقى انا موجود ومن النشطاء كمان
وبعدين كلامك دا حيخليني اكتب بوست وانا كنت ناوية اجيب ضرف المدونتين
الله يجازيكي خير يا بت يا آبي
طبعا الناس فرحانة في فاروق حسني مش لبكرهنا لمصر
أولا المنصب دا ما كان حيزودنا ولا بلدنا شي
كل الحدوتة انه منصب المستفيد الأول منه فاروق نفسه
ثم من ادراك ماذا كان يمكرون
وماذا مكر الله
يعني حضرته امبارح على الحياة كان بيتكلم كلام هبلوله خاااااالص
بس وقع في كام كلمة
من الآخر يستاهل بدل ما يعترض على الحجاب ويدوس قوي كده في فرض ربنا
ويقعد يتمحلس لليهود الاسرائيليين بالذات
ويتمحك فيهم زي البت لولو قطتي الجميلة ولو أن البت لولو عندها دم وعزة نفس
دا خلى رقابينا زي المستحكة اللي من غير حبهان
ثم عمال يقول احنا عوزين سلام وبتنجان
مش دي باين منظمة غير سياسية
عموما ما حدش كان مممكن يتخيل لو كسب كان عمل في اهلنا ايه
دا اذا كان في مصر حارقها وناهبها ومضيع فلوس الوزارة على ناس حرامية - الواد اكن اسمه ايهعبد المنعم؟_
عموما متهيألي انه كان ممكن يفرض علينا كل سنة نترجم ما لا يقل عن ألف كتاب للعبرية ومن العبرية
ومن ضمنها كتب مشكوك في امرها وتخدم اليهود طبعا
عشان كده انا بقولك مكر الله خير
ومكر أولئك هو يبور
عموما الحمد لله
ارتحنا
وانا من هذا المنزنق اقترح ان احنا نعين الست البلغارية دي وزيرة للثقافة عندنا وبكده يبقى
كسبنا اليونسكو
وكسبنا وزير ثقافة
تحياتي يا آبي هانم وسلامي للتجمع النون النسوى
كل عام وكلكم بخير

Appy said...

نحنوت
========
عوده قويه يا ابن العم
بس يا نحنوت انا برضه الدلو بتاعى قالك
المهم يعنى مفيش حاجه اسمها مصريين بالورقه احنا يعنى خلاص بقينا سهل نتنازل عن جنسيتنا ولا علشان فوفا








فوكس
======
الفراعنه بلاش نجيب سيرتهم على الاقل الناس دى استخدمت كل الامكانيات المتاحه لها فى انها تعمل حضاره لس لغايه النهارده مش عارفين يخلصوا اكتشافها احنا عار على البشريه بجد

dr.lecter said...

بصراحه انا من اسبوع مكنتش باتمني له انه يفوز بجد علشان انا ليا تحفظات كتيره عليه بس قلت وطيب وفيها ايه لما يفوز ويبقي اسم مصر مقترن به مش يمكن فعلا الراجل ده يكون كفؤ في المكان بتاعه اللي هيبقي هناك ويعمل حاجه تفيد العالم

وفي نفس الوقت كنت بشوف برنامج لابراهيم عيسي علي او تي في كان بيقول لو فاز فاروق حسني هيسيب الوزاره وهييجي بداله واحد تاني
فاروق حسني بقاله وزير 22 سنه
يعني كفايه اووي
وانجازاته قليله جدا عاوزين وزير ثقافه جديد لمصر بداله

وطبعا عمك حسني ماسك في فاروق حسني بسنانه وايديه وحالف بالطلاق علي سوزي انه مايخلعش فاروق من مكانه

طيب ياعالم ماتخلوا الراجل يفوز نبقي ضربنا عصفورين بحجر

الراجل خد مكانه رفيعه باسم مصر ادام العالم كله وفي نفس الوقت غار في داهيه وجه بداله واحد محترم ينفع يبقي وزير ثقافه فعلا


عامه مالناش في الطيب نصيب لا طولنا بلح الشام ولا عنب اليمن

اهو قاعد علي قلبنا زي سيده لغايه مايمشي مع سيده

افرحوا بقي وهيصوا

Appy said...

ست البيت


كل سنه وانتى ست الناس بجميع اللغات ايه يا اوختى انت حافظه اللغات وبتسمعيها هنا
بصى يا ستى ايون منصب ليه هو بس اسم مصر فيه انا عارفه ظاهريا يعنى
بس فعلا زعلت وانقهرت لما البلغاريه كسبت بس قولت مش فوفا يعنى اللى تمثلنا دى هتعرنا ده بقاله كتير اوى وزير ثقافه واحنا على ايديه الثقافه العامه حتى بتنحدر
وبعدين ايه تجيبى ضرفها دى حرام عليكى يعنىى انا وكام واحد من الناس القديمه اللى صامدين لدلوقتى حرام عليكى خليكى بقى
اما المعارضه فمن كتر ما بتعارض يا اوختى اصبحت قشه ولا ليها لازمه

mohamed ghalia said...

ياحينى
ربنا يصبرك عليتا فعلا
انا متفق معاكى تمام اننا مش بنعرف نعترض وبنحاول نعترض من غير منقدم حلول بديلة
قدمنا كتير لسه
مودتى

adel said...

بصي ياستي
انا فرحت انا فاروق خسر
و من قلبي
واحد بقاله اكتر من 22 سنة بوظ ثقافتنا و اثارنا
تفتكري افرح لما اشوفه مد نشاطه التخريبي علي باقي اثار العالم ؟؟؟

ومعتقدتش انه هيستقيل
هيقولك الرئيس تمسك بيه

اما الانتقاد من باب الانتقاد او الاعتراض
ده شئ مش منطقي اساس
بس احنا اساسا معندناش ثقافة حوار فبالتالي الناس بتختلف و السلام
و نسبة 85% من النعترضين علي اي شئ بيردودا كلام و السلام مش فاهمينه
يعني المعترض علي الحجاب والمعترض علي عدم الحجاب و النقاب و علي الدين و الدنيا و العيشة و اللي عيشنها

والدليل لما تنقشي اي حد فيهم ولا الهوا من اول دقيقتين هيسكت

احنا معدناش ولا ثقافة حوار ولا ثقافة اختلاف
يعني اللي ضدنا بنقول 100% غلط و كافر و فيه عبر الدنيا

رئيس جمهوريه نفسى said...

مش موضوع تنازل عن جنسية من عدمه خدي عندك الحكومة ولجنة السياسات ورجال الاعمال لو بحثتى او عملنا ليهم أختبار انتماء بالنسبة لمصر حتطلع النتيجة كوارث الناس دى عمرها ما حبت البلد علشان تنتمى ليها الحكومة وشلتها لو حبت البلد وخافت عليها خوف راجل الشارع العادى كانت عملت حاجة ليها ولو قليلة بس والله كانت فرقت معاها كتير جدا

Appy said...

dr.lecter

هو احنا عاوزين وزير ثقافه بس احنا عاوزين وزراء جداد فى كل حاجه حتى الواحد يحس ان ريتم البلد اتغير مش فوفا وبس







محمد

--------
لا يصبركوا انتم عليا

Appy said...

عادل


ليه هو العالم فيه اثار تخيل مصر بكل اثارها المنهوبه وبرضه فيها تلت اثار العالم
المشكله مش فى كده فى انتمائنا احنا تصدق بكره لو المنتخب كسب هنقول واحنا مالنا انا حسه ان ده الوضع بعد شويه
الاعتارض مش علشان اختلاف ولا ثقافه اختلاف
لا علشان ناس عاوزه تعمل فرقعه وبس

Appy said...

نحنوت
=======
بص يا سيدى وما ستك الا انا
من ملاحظتى الفتره اللى فات اللى كنت فيها هاديه لقيت ان حب البلد دى مرتبط بالحاله الماديه للافرد يعنى لو واحد معاه فلوس وعايش فى خير هيحب ام البلد دى لو واحد على قدها هيلعن اللى خلفوها
يبقى الموضوع م انتماء جوانا
بس على فكره اللى بيحبها اكتر الاغنياء لانهم المستفيدين

daloo3a said...

عادي الكل احين جيه

المفروض نتعود عليهم كلهم

Appy said...

daloo3a

هو انا تقريبا مش فاهمه حاجه من تعليقك انتى عاوزه تقولى ايه بقى

ويكا said...

بصى يا ست ابى
اولا انا مش معاكى خالص فى موضوع الاغنياء ده واللى معاهم فلوس هما اللى بيحبو البلد ، بالعكس تماما تماماً.
بصى يا ابى انا كنت شغال فى مصر والحمد لله كنت بقبض مرتب يعنى الحمد لله كويس جدا جدا ، ومع ذلك ما كنتش لا طايق نفسى ولا البلد ولا الكل كليله ، ووافقت فى الاخر انى اسافر بره غالبا بشبه نفس المرتب ، وبجد فعلا حسيت بالفرق .
البلد فى حاله لا يرثى لها ، وصدقينى ما كنتش عايز اسيبها دلوقتى بالحاله دى علشان ما احسش انى كنت سلبى و استسهلت وهربت ، بس صدقينى لقيت ماليش اى دوووور فى الوقت الحالى ، اخرى هعترض برده على الحكومه وخلاص ، وهما برده هيسيبونى افك عن نفسى واعترض وولا هيقولولى الى كلمه .
بس هيبقى الوضع كما هو عليه.
الناس بتكره دلوقتى الحكومه فى شخص مصر . صدقينى
انا بقيت بقول انى مش طايق مصر ولا الناس فى مصر ، ومع ذلك لما كان شغال مشهد فى فيلم ادامى ان بطل ملاكمه من مصر وقع على الحلبه والناس اعدت تهتف لمصر (وهو قام وكسب وهما بيهتفوا باسم مصر ) صدقينى دموووووع كتير نزلت من عينى وقلبى بقى سخن على الاخر ، لدرجة انا قلتى لنفسى انت هتعمل زى ماما لما بتقعد ادام المسلسلات وتعيط ولا ايه . ده فيلم ياعم .
فرجعت وقلت ، وايه يعنى ، انا بعيط علشان بحب مصر من جوايا بجد .

بس بجد بجد صدقينى ، الحكومه مش عاطيانه فرصه نحب البلد دى .

بجد البلد زهقت وملت ومكبوته لدرجة الاستسلام.

وسلام

Appy said...

ويكا

انت اولا سبت البوست وبتعلق على كلامى مع محمود طيب هحرمك من المصروف
ده اولا
ثانيا انا بتكلم عن الاغنياء بجد اللى عايشين فى القطاميه هايتس واللى زى ساويرس هو انت بتعتبرك نفسك من الاغنياء ولا ايه يا عم روح
القصد ان حب البلد دى مرتبط بحاله الانسان هو ممكن ميكونش الاغلبيه بس من مراقبتى للناس الفتره اللى فاتت اتضح ليه ده ركز وانت تفهم
هات شويه من العيال اللى طالعين يقولك مصر هى امى وبتاع وشغله فى اى مكان واديله قرش هيقولك الحكومه دى حبيبتى
مبقاش عندنا حد زى الزعماء بتوع زمان
لان زمان كان التعليم بيعد قاده انما دلوقتى التعليم بيعد فلوس
ههههههههه فهمت يا ويكا

فتاه من الصعيد said...

هو فوفا ما ينفعش يبقا رمز لمصر .... والا كان كمان عوكل بقا رمز لمصر ومينفعش ننتقده او نعترض عليه .... الناس دي رمز لنفسها وبتعمل لنفسها

وبعدين لما يمسح جزمه اسرائيل علشان المنصب ده .... يبقا احسن انه ماخدوش علشان يعرف انه مهما عمل موش هيرضوا عنه ومحدش يقلده تاني

اما الاعتراض لمجرد المعارضه فده سائد فعلا ومن غير مبرر ..... علشان في ناس بتعترض علشان مثلا فلان تقيل على قلبي .... او فلان واقف في زوري من غير اسباب كده

بس الفوضى دي نتيجه وجود حريه بالذات ع النت .... وكبت حريه بره النت وده اللي مزود المدونات ... كل واحد عايز يصرخ ويفضفض ويتكلم ويعترض ويحجر على راي غيره برضه :)

في دراسه بتقول ان المصريين اول واكتر ناس بيستخدموا الفيس بوك لغرض سياسي ..... ويقال ان ده سبب تعريب الفيس بوك

اسفه للاطاله .... بس كلامك مهم

تقبلي مروري

Appy said...

فتاه من الصعيد




حبيبتى كل سنه وانتى طيبه
اولا انتى طولى براحتك لانك عارفه انك من الناس اللى انا بحبها وبحب مناغشتها
ثانيا موضوع انه رمز هو للاسف كان داخل باسم مصر مش اسمه لوحده وده اللى ضايقنى فعلا
موضوع الفيس بوك فعلا صح
بس مفيش حريات مكبوته صدقينى خالص
هى اعتراض لمجرد الاعتارض ومتفقه معاكي فعلا ان كل واخد بيكره حد بيعترض وبس
نورتى يا قمر

دعاء said...

المشكلة مش في الإعتراض لمجرد الإعتراض بس ده اللي مستفز أكتر هو الموافقة لمجرد الموافقة
يعني تلاقي الواحد من دول يوافق و يؤيد حاجات بالجملة ممكن يكون مجاملة أو خوف أو بس يمشي مع التيار و خلاص.

شفتي أهو أنا من غير ما أقصد اعترضت على اعتراضك.
الظاهر الاعتراض بقى في دمنا.
هههههههه

سلام

لاسع افندى said...

انا اعترض
اذا انا موجود



تحيه لاسعه

nody said...

يعنى هو روقه الجن ده
عنده 71 سنه
نفسى اعرف بقى عاوز ايه من الدنيا يعنى
دا غير يعنى هو ها يعمل ايه للينسكو

اوعى تقولى زى الى عمله للثقافه فى مصر
يبقى كده قضينا على العالم كله
انا من راى انه كفايه عليه يرسم لوحتين من الفن السريالى بتاعه
يصرح له كام تصريح
ويرجع يقول ماحصلش
اكتر من كده
لا

محمد ابراهيم said...

لو علي فوفا حسني
بجد كشخصية احتقره جدا لانه هاجم الحجاب و بعض الرموز لاسلامية
و بالنسبة ليه كله بقي بيعارض
لان الشعب كله بقي يفتي في اي حاجة

تحياتي
محمد

Che said...

صحفى سأل واحد من اقطاب المعارضه الكبرى و قاله لو مسكتوا البلد بكره هتعملوا ايه ... ايه البرنامج بتاعكوا
القطب الكبير رد عليه و قاله وقت الله يعين الله
هو ده تعليقى

قوس قزح said...

بالنسبة لموضوع الوزير

تصدقى ان احساسى كان زى ما يكون بيمثل نفسه مش بيمثل مصر .. يمكن لانى عارفة ان كل واحد فى البلد دى مش بيشتغل علشان يخدم بلده لكن علشان مصالحه الشخصية


بالنسبة للمعارضة
للاسف احنا اتعلمنا ان المعارضة صوت مسموع و خالف تعرف و نسينا نتعلم اذا نسمع و بعدين نفهم و بعدين نتكلم بالمفيد

قهوة بالفانيليا - شيماء علي said...

يا آبي
الراجل دة انسلخ من مبادئه و قعد يغازل اسرائيل و اليهود عشان المنصب..
عارفة لو قال انا مسلم مصري و مش هتغير عشانكم
و الله كانت البلد عملت له مظاهرات فرحا بانتمائه..
!!!!
حتى لو كان خسر !!
اصلا بصي معايا كدة
ايه هي انجازاته جوة مصر عشان نفخر بها برة مصر؟؟
يعني ايه الحاجة الجبارة يعني اللي عملها؟؟
و مش هيستقيل على فكرة
شوفتي انتي حد بيستقيل في حكومة ؟؟
__________

بالنسبة لموضوع المدونات
في مدونات مستواها الادبي تعبان اوي
المدونات دي لو حد شجعها يبقى بجد بيعمل جريمة في حق اللغة و الثقافة و كل حاجة !!
_______

ربنا يستر بقى

ابو على said...

بس كان ماتش وحش اوى
يعنى المصرى يخسر من طلائع الجيش اللى كان متعادل مع الاهلى

دى مهزله يا ددع

ابو على said...

بس كان ماتش وحش اوى
يعنى المصرى يخسر من طلائع الجيش اللى كان متعادل مع الاهلى

دى مهزله يا ددع

نور الدين said...

اهلا آبى
شوفى يا استاذة آبى أما فلسفة الاعتراض نفسها فدة شيء طبيعى أكيد وانت صغيرة لما كان بيجيلك لعبة جديدة كنتى بتهريها لعب ولما بتعرفى شيء جديد كنت مش بتسبيه وبتنشغلى بيه فترة طويلة
والشعب المصرى ولله الحمد طول عمره محروم من التنفس ولم يعرف فلسفة كلمة لآ مطلقا
فلما وجد ثغرة إنطلقت الصرخات وبعدها يحدث النضج للمعترضين وتتحول المعارضة العشوائية إلى منظمة وقطعا أعتقد أنك تتفقين معى ان هناك الف شيء وشيء يستحق المعارضه
ومتقوليش هاتو البديل ما داموا اختاروا أن يحكمونا جبرا فليحتملوا اعتراضنا غصب عنهم
ايتها الكريمة أما عن الذى يعترض بدون فهم فهذا لا ينفع اى قضية بقدر ما يضرها ولكن حتى هذا علينا توجيهه وتعليمه كيف يعترض وكيف ينقد
...
أنت بقيتى حزب وطنى ولا ايه يبنتى شكلك روحتى جمعية جيل المستقبل ويبقى ياخوفى يا آبى ههههه
وعلى كل : كل سنة وانت طيبة ومش معارضة وبتسمعى الكلام
....
نورالدين محمود

Sweet Violet said...

اعتقد انه مش كره للبلد
هو عدم اعتراف فعلا بالناس دى انها ممكن تكون واجهة مشرفة للبلد
v_v

اما بقى موضوع الاعتراض
اتفق معاك جدااا فى الموضوع ده
مع انى يوم ماقولت كده اتقبلت بالاعتراض فى المدونة

للأسف الشديد الثقافة دلوقتى
الاعتراض دليل المعرفة.. اما التأييد فهو جهل و خيانة عظمة
v_v

لورنس العرب said...

بالنسبة لموضوع فاروق حسني
الناس كلها فرحانه أنه خسر
ومش عارف لو كان كسب ايه اللي كان هايزعل الناس
يمكن بسبب تصريحاته عن الحجاب وعن اليهود اللي قالها من فتره
لكن لو كان دخل حد غيره بردو كان هايخسر بسبب ان العرب ضعفاء
والاجانب ما يريدوا ان يفعلوه يفعلوه
تكتلوا على الراجل واخرجوه من السباق وانتهى الامر وكان لهم ما ارادوا وهي دي المصيبه
....
في هذا الشأن تحدث الكاتب المأجور عبد الباري عطوان امبارح في صحيفة القدس العربي متشفيا وقال في العنوان الرئيسي "هزيمة حسني هي هزيمة للنظام المصري"
رديت عليه وقلت له ان لو كان حسني كسب كنت كتبت وقلت ان امريكا تكافيء النظام المصري على الطاعه العميا لها - يعني الحمد لله الردود علينا جاهزه مسبقا مهما كانت النتيجه
حتى في الفضائيات لاحظت ناس من مختلف البلاد العربيه وصحفيين سعداء بالنتيجه
طيب احنا في مصر عندنا موقف منه- انتم ايه مشكلتكم انا مش عارف
....
اما بالنسبة لموضوع المعارضه
فهناك اتجاه دائم عند معظم الناس وهو انا اعارض إذن انا موجود
انا اعرف اني لما اعترض يبقى عندي خطه بديله لما اعترض عليه
تماما مثل الاعتراض على جمال مبارك
15 حلقه في برنامج اوراق مصرية على قناة الحوار في رمضان تتحدث عن عدم التوريث
ناس داخل وخارج مصر وصحفيين بيقولوا لا لجمال مبارك- ومحدش طلع لنا حد ينفع او حتى شاور لنا على حد ينفع
والنتيجه هايفضلوا يقولوا لا لجمال لغاية ما ييجي الحكم
ونقضي باقي حياتنا نجري ورا بعض في كل حته - هو يمسك الحكم واحنا نعترض
قيسي على كده كل حاجه

يا مراكبي said...

بوست كومبو .. اتنين في واحد

الجزء الأول عن خسارة فاروق حسني .. لسه كنت سايب تعليق في مدونة بأقول فيه إن موضوع شماتة المصريين في أي هزيمة من أي نوع ده مؤشر خطير جدا لدرجة إننا ممكن نلاقي الشعب ده بيتقبل إحتلال من دولة تانية مثلا عشان يشمتوا في النظام الحالي .. بجد مصيبة

الجزء التاني .. الخطط البديلة موجودة .. وفيه ناس كتيرة عندها من العلم والخبرة والإحصائيات اللي ممكن تدعم بيها البلد لو بس اتيحت ليهم الفرصة ومسكوا المراكز القيادية .. لكن لن تتاح ليهم الفرصة طبعا .. وده متعمد

Appy said...

هرد رد فى السريع

الوزير ولا يعنينى فى شئ كل الفكره اننا فعلا بقينا بنفرح لاى خساره لمصر واحنا مش واخدين بالنا مهما احنا قولنا بينا وبين نفسنا
ان ده بيمثل نفسه بس فالعالم مش عارف كده العالم عارف ان ده بيمثل مصر
والا ابسط حاجه احنا ليه مش بنحتج جامد عليه

موضوع المعرضه
هرد على نور الدين
يا نور المعارضه بتاعت اليومين دول قرف مفيش فيهم بدايل قولى كده مين كويس كلهم ارزقيه
مش معنى كده انى موافقه على الحزن الوتنى ولا انا بقيت حزب وطنى كلا وحاشا وتف من بقك يا راجل
انما انا بتكلم واديت امثله فى العموم حتى فى الحجاب وفى كل حاجه مش شرط الحكومه
يعنى ممكن واحده تعترض ان جوز واحده سافر وجاب لها يبقى هو حرامى فهمت وجهه نظرى

مراكبى

احنا عندنا اه ناس كويس بس بتستسلم بسرعه شوف المستشار الخضرى
هيقولك بالسلامه والكل يقولك راجل
طيب يا جدعان ما هو بيسيب مجال للفساد اكتر
لو كل واحد كويس صمد فى مكانه هتتغير


شيما قهوه بافانيليا
اهلا بيكى يا قمر
ومتفقه معاكى فى رايك عن المدونات خاصه




ابو على

انت فاكر انك فى الاستاد ههههههههههه يا عم ماتش ايه بس

Appy said...

لاسع افندى
-----------

اعترض واتوجد براحتك يا فندم





Sweet Violet

احنا مبقناش
عارفين نفرق ما بين كرهنا للناس والبلد خلطناهم ببعض يا حبيبتى





لورانس
ايون يا معتز ده اللى بقول عليه يسلم كيبوردك يا اخى

Appy said...

ch
======
فهمت تعليقك يا فندم شكرا

سومه...مجنونه فى بلد عاقل said...

والله يا بنتى فى الاول فكرت زيك بعدين قولت لنفسى كويس انه منجحش الا كانت مصر امنا اتفضحت على مستوى العالم
وبقيت فضيحتها بجلاجل

بسنت said...

بالنسبه لفاروق حسنى انا كنت بشجعه لان كان نفسى فعلا فى ان اسم مصر يكون فى مركز دولى وكويس
بس اكيد الشخص نفسه مش بشجعه ولا افتكرله شئ مفيد واحد
انا زعلت على مصر ولانه نافس فعلا بجداره مش على الشخص بردوا

بالنسبه للمعارضه متهيألى كل واحد حر انه يفتح او يقفل مدونه وحكايه الهدف دى كفايه انها تكون متنفس لفاتح المدونه يعنى هتبقى انتى والزمن عليه

المعارضه لهدف المعارضه موجوده زى ما البدايل موجوده بردوا بس السؤال مين اللى هيسيبك تغيرى حاجه اصلا فعليا بيسيبوا اللى بيتكلم وبس

آبى هانم
دمتى بخير

Me7'o said...

أولاً كل سنة وإنتى طيبة

أما بقى بالنسبة لفوفا فأحب أدعى وأقول

اللهم أرزقنا الشهادة أو أحد الحسنيين لإن اتنين كتير

أما بقى عن الاعتراض فأنا معاكى قلباً وقالباً

الاعتراض يبقى عن أساس مش عن مزاج

وآهو جوزيف بلاتر قدامى آهوه عمال يقول

"شكراً والسلام عليكم"

الظاهر أوباما بهت عليهم

تحياتى

Anonymous said...

كلامك سكر ودمك شربات

safa7_karmooz said...

اعترض

wa said...

http://www.youtube.com/watch?v=VEZH9somJa0&feature=related


شوفي دة كدة

سبهللة said...

بقولك ايه
كل سنة وانتى طيبة
بلا فوفا بلا نيلة
اهو اخد جزاءه

وبالنسبة للمعارضة
انا اعارض اذن انا اعيش
دة مبدأ ناس كتير جدا
وفيه ناس تانية مبدأها
خالف تعرف

الرخم said...

قرار 101
بعد المشاورات و المؤتمرات و المناقشات
قررنا نحن رخم باشا و رخمه هانم
انشاء بلوج نرخم بيه عليكم
و من باب التكرم و التفضل و الرخامه
حبينا نقول لكم عشان تيجوا تزوروا البلوج غصباً عنكم

و مش هقول سلاااام
رخامه بقى هه

قهوة الرخمين
:D

Ahmed Mubarak said...

يستقيل .. مم
لسه مدخاتش قاموس الوزراء

Ahmed Mubarak said...

كلمة استقاله مش في قاموس الوزراء

kafrawy said...

هههههههههههههههههههههههههههههههه

انا اعترض

كل سنه و انتى طيبه

شمس النهار said...

كل سنه وانت طيبه

ماهو يا امي الاعتراض بقي موضه
لازم تعترضي علشان تبقي ثورجيه وسياسيه ومطقطقه كده

ولازم تحبي جمال عبد الناصر وتكرهي السادات وتشتمي في الحكومه
وتكوني حزينه ومكتئبه

وتصلي التراويح في جامع بيصلي في سبع ساعات

كله بقي موضه

لا اللي بيعترض عارف بيعترض ليه
والا حد من اللي بيحب جمال او يكرهه عاش حكمه والا قري عليه حتي

والا اللي بيحب او يكره السادات يعرف عنه حاجه واعتقد والا يعرف حتي اسمه بالكامل

واللي بيشتم في الحكومه مايعرفش مين الوزراء

صدقيني ريحي نفسك

اغلب الناس كده

واللي عارف تاه مع اللي مايعرفش

عارفه السلطه دي اللي بتتاكل
بس السلطه اللي احنا فيها دي مابتتاكلش خالص
علشان مره

Appy said...

ميخو

منور وانت طيب وبخير يا رب







سبهلله


الراجل ده لو مستقالش انا هولع فى تمثال رمسيس

Appy said...

شمس النهار


الله ينور عليكى يا شموسه






احمد

نفسى اعرف مين كان بيدرس لهم ونسى يعلمهم كلمه استقاله

Appy said...

المجهول

ميرسى لذوقك





سفاح كرموز

======

روح مجلس الشعب يمكن تعرف تعلمهم الكلمه دى

Appy said...

كفراوى
=========
طالما غيرت صورة الروفايل بتاعتك يبقى اعترض براحتك مسموح ليك