سؤال عن مصر



الصوره الاولى دي فى مكان انا رحته هنا فى مصر اسمها العزبه فى المريوطيه شوفتوا البلد فيها اماكن حلوه ازاي

على قد ما ليل ونهار كلنا بنلعن البلد دي واللى فيها حتى وصلنا لمرحله اننا زهقنا من نفسنا
ومن كل نفس بيطلع فيها
والخوف جوانا مسيطر على كل حاجه حتى فى شغلنا وفى حياتنا
والخوف اتملك ممنا ولا الدم فى الشريان

السؤال بقى وببساطه
برغم كرهنا لكل حاجه فيها ليه مبنتحملش حد يجيب سيرتها بكلمه مش كويسه ليه بنضايق ليه عروقنا بتتنفض من مكانها؟ على فكره انا بضايق لو حد مش مصري بالذات نقض مصر فى حاجه ودايما اقول كل واحد ادري ببلده وكل واحد يخليه فى خيبته وبعدين يعدل على غيره :(
هل علشان احنا بنحبها ومش عارفين
ولا علشان كرامتنا
ولا علشان نعره كدابه
انا منكرش انى بحبها وبلعنها برضه بالرغم من عشقى ليها ولكل حاجه فيها وبكون مبسوطه لما بكتشف مكان جميل فيها او اقضى يوم حلو مع اصحابى الانتيخ يعنى
بس برضه بلعن فيها ليل ونهار

حد يقدر يجاوبنى على السؤال ده

بس خلاص انا قولت اللى عندي

تحديث:- مع انى لسه منزله البوست بس والله ما حد يغش اللهى اللى يغش قبل ما يجاوب يجيله حول فى الكيبورد بتاعته واسكربوط فى ودانه وحول فى مناخيره وهسس فى عنيه
تامر صلاح ضد الحكومه جاب ليه قصيده لعمنا جاهين حلوه اوي بس كتبها عنده انا خلتنى عيطت ادعى عليك بايه يا تامر بس
القصيده اهي

كان معكم محتاره هانم ابى هانم كعب الغزال

حكمه الامبراطوره
عويل يقول للخايب يا ريتنى مكانك

51 اخبط وقول رايك:

micheal said...

ممممممممممم...عشان أكون صريح معاك يا سيادة المفتش لو سمعت حد أجنبي بيشتم فيها بتضايق وممكن مسكتش إنما لو حد أجنبي وإنتقد فيها بشكل طبييعي وموضوعي بدون تشنج وقلة أدب..فالموضوع بالنسبة لي عادي خصوصا لو كنت مقتنع بالعيوب اللي مضايقاه
يعني المعيار هنا بالنسبة لي طريقة النقد نفسها
:)
تحياتي يا كبيرة

A.SAMIR said...

مصر دي في دمنا كلنا يا آبي
و هو الواحد ايه اللي حارق دمه و جايب له امراض الدنيا غير اننا نفسنا انها تكون في مكانة اعلى بكتير من اللي هي فيها
مصر والله العظيم تستحق انها تكون زي كوريا ولا ماليزيا و لا سنغافورة
انما الله يجازي اللي كان السبب واللي وصلنا و اللي بيوصلنا لكدة
تحياتي

حياة said...

ما اجمل مصر واوافقك ان هناك اماكن رائعة لا توجد على مستوى العالم وبهذا الجمال ولكن هل نحافظ على هذا الجمال فالبحر الاحمر به اجمل شعب مرجانية فى العالم ولكن تفاجئ بقرية سياحية تردم البحر لتوسع الشاطئ لازم نحافظ على الاشياء الجميلة ولكن صعب فالشعب ارتبط بالاهمال واصعب كلمة فى العالم وانا مالى او انا اللى حعدل الكون فلكى الله يا مصر

تحياتى لاظهرك جمال مصر

ساره said...

عارفه يا أبي
انا زيك
شوفى انا سعوديه وبلعن فى بلدي اشتمها بس ما استحمل احد غير سعودي يقول فيها شئ
لانه قبل ما ينتقد بلدي .. يعدل فى بلده اول وبعدين يجي يتفلسف على بلدي

ولما اسافر وابتعد عنها صدقيني يجيني شعور غريب وحب لها واشتياق

ولما ارجع اول كلمه اقولها
No Place Like Home

احنا نحب بلدنا ولا نعرف
وكمان عشان كرمتنا
والنعره الكذابه
عشان كل اللي قلتيه
مالنا غنا عنها
نحبها ونسبها

tarek momen said...

ايوة بنلعنها احيانا علشان نفسنا انها تبقي احسن بلد في الدنيا
بنلعنها من كتر حبنا ليها
في ناس غيرنا مش بتلعنها لكن سابتها ومشيت لبلاد تانية لكن بعد فترة بتحس انها محتاجة ترجع لها بشدة حتي لو ها تلعنها
يخرب بيتك يامصر ده الواحد بيحبك حب
تحياتي

أحمـــــــــــــد أبو العلا said...

لو حد مش مصري شتم في مصر يبأه هع هع هع
هيسمع من المنأي ياخيار ويافقوس ويابطاطا كمان

لكن لو مصراوي مننا وعلينا اهو بيشتم من اللي احنا بنشوفه وبنقول معاه حق مهو من اللي شايفه

ده حب طبيعي جوانا
بنفتخر جدا لما نفتكر أن الرسول صلى الله عليه وسلم وصى على مصر وأهلها
وفي نفس الوقت بنقرف لما نفتكر أننا مصريين في زمن الفساد والحراميه

تناقض طبيعي هيزيدنا حيره وحيره

بس لو ملقناش غير الحيره برده بنفرح بالحب ده وبنفتخر بيه

أحمد الحيدر said...

بالنهاية ..

هي الوطن ..

وما أثمن الأوطان ..

الله يحفظ بلادكم وبلادنا :)

tamer.sala7 said...

انا لقيت الاجابة حتبقي طويلة اوي وكراسة الاجابة اللي انتي بفرقيها مش حتكفي فجابوت عندي في البلوج

http://tamer-sala7.blogspot.com/2009/04/blog-post.html

مواطن مصري said...

براحة لما بسمع عرببي يشتم يف مصر كشعب او اي حد سواء عربي او اجنبي ابقى نفسي انط في كرشة في نفس الوقت ابقى لعن فيهم ليل نهار

بس في حتت جميلة جدا في مصر مدن جديدة و قرى سياحية

كفاية ان مصر فيها نادي الزمالك و منير


الظاهر جينات يا ابي هانم

مواطن مصري said...

كفاية ان فيها الاسكندرية او القاهرة او سينا حتت مش موجودة في العالم غير في مصر و مش هتلاقي في جمالها

أمبارح كان عمرى عشرين said...

مش عارف ليه احنا بنعمل كده
بس اكيد مش نعرة كدابه ولاحاجه

يعنى من الاخر من له فخر كافخرى
وطبعا مش فخرى الابيمثل

مين اسم بلده ذكر فى القرآن خمس مرات واربعه وعشرين مرة على سبيل التوريه مين عنده تاريخ قد تاريخى

مين عنده حاكم بيفضل 30 سنه وعلى قلبنا زى العسل ابو طحينه كمان

لما بنردد مقوله مصر هى أمى
اظننا بنبطقها اوى لما حد يتكلم على مصر

ممكن امى متكنش اجمل ولا افضل ام
بس امى الابحبها كده وهفضل احبها وافضل اعدد فى افضالها على

وذى ما قال عمنا صلاح جاهين
بحبها والعن ابوها بعشق زى الداء

الراجل ده بيجيب الخلاصه ياناس هههههه بنحبها وبنلعن ابوها بعشق زى الداء

انالو اتكلم عليها مصرى وشتم كا العاده بدوس معاه منا مخنوق زيه
لكن واحد غريب مش بعيد اخنقه

هنفضل نحب فى مصر لغايه ما يجى اليوم الامصر تحبنا فيه بقى

فتاه من الصعيد said...

استاذه ابى
عندك حق...ادعى على بلدى واكره اللى يقول امين
اما لو حد اجنبى شتم لون وشى بيحمر وافضل العن سلسفيل اللى جابو بلده
دمتى بخير...تقبلى مرورى

محمد عتلم said...

مصر بلد جميله اوى يا رحاب
بس احنا اللى مش كويسين
مش بنحافظ عليها . بيتاخد منها كل حاجه ومش بنديها حاجه
بتتسرق عينى عينك
احنا ساكتين مش بنعمل حاجه .. بنتكلم وبس .. وبنشتم .. ونتف .. ونشتغل بعض .. وننصب على بعض .. ونفتى عن عدم فهم ..ونتمنظر على بعض .. وآخر طموحاتنا الفلوس والجواز ووظيفه حلوه وخلاص .
مبنتعلمش لا من اخطائنا ولا من اخطاء الغير . شوفى احنا كام مليون .....وفينا كام واحد مثقف او متعلم تعليم محترم
عندنا موارد كتير حلوه اوى .. وبنستغلها غلط وموارد اكتر مش مستغله تماما
عندنا شباب وطاقات بشريه بيتوجهو فى الغلط
عندنا اطفال زى الفل بيتعقدو فى المدارس وينضربو فى البيوت ويتربو على الجهل . ماهو اهاليهم اصلا مش عارفين يربو . وفى الاخر الطفل يكبر ويبقى عنده كلاكيع الدنيا
بس برضه مصر هتفضل طول عمرها حلوه بس تبقى الاداره بتفهم شويه وهيا تكون اشطه

سارة نجاتى said...

الصراحة تامر رد و زيادة

كلمات جاهين يتعيط عليها فعلا

سلام يا باشا

مجداوية said...

السلام عليكم

الاستعمار قسمنا لدول وقبليات وفي الدولة الواحدة متقسمين لجنوب وشمال وبحري وقبلي واهلي وزمالك ومسلم وشيعي ومسلم ومسيحي

يا بنتي أرض الله واحدة
والانتماء لازم يكون لدينك أولا والبلد اللي يتهان فيها ديني تبقى ملهاش لازمة وأدور على أرض تانية لأنها كلها أرض الله
مصريتي مش أهم من اسلامي لكن كنت أتمنى تكون مصر أرض بتحمي ديني مش تحاربه !!!!
واللي احنا فيه نعرة كدابة لأن مفيش أمارة على العزة حتى دم الشهداء اللي كان الحاجة الوحيدة اللي مغلية تراب مصر باعوه بالرخيص

أنا كنت أتمنى أفضل أردد لو لم أكن مصريا لوددت أن أكون مصريا

لكن بعد اللي شوفته فيها ومنها وبعد العصابة ما احتلتها

فأنا حزينة لحد النخاع ونفسي أفر بديني لأى مكان لكن الحدود مانعة التجول في أرض الله

سيد حجاب كتب قصيدة بالعامية تحفة اسمها مش باقي مني

وأشرف توفيق صاحب مدونة أخف دم كتب مرثية تحفة اسمها كبر تعيش

الكل بينعي وبيخر حزن وأسى

dr.lecter said...

علشان احنا مش عايزين نشوف فيها الا النص الحلو
ومش عاوزين نعيش مع النص الوحش

مش عاوزين ننزل في مديان رمسيس والزحمه والحنقه والناس والمنرو والمعامله الزباله والفساد والحقد والتخلف اللي معشش في قلوب الناس

مش عايزين نحاول نصلح من عيوبنا كلنا شايفين الباقيين غلطانين واحنا بس الملايكه واحنا بس اللي صح مع اننا اول الغلطانين

كلنا انانيين وعاوزين حته من مصر لنا لوحدنا وطماعين ولا مؤاخذه يعني كل واحد شايف مصلحته فوق اي حاجه


ولما مش هتلاقي ان ده بيتحقق في مصر هتضطر تشتم وتتف وتعلنها وتقول مصر مادتنيش حاجه انا ماخدتش حاجه من مصر يلعن ابو مصر

ده كله علشان احنا فشلنا نعرف نعيش عهيشه كريمه في مصر

كريمه مختار


احنا مابقينناش
طايقين بعض

انزلي الشارع في شبرا ولا امبابه ولا وسط البلد او التحرير شوفي الناس ماشيه ازاي

كلهم مكشرين كلهم مكتئبين

كلهم حزنانين

حلوه حزنانين دي

تلاقيهم بيتخانقوا لاتفه سبب وتلاقيم مابيبطلوش نقد لبعض وسب ولعن في الحكومه والنظام والحزب وبعد كده يقولك تيييت ام مصر

فاكره جمله بثينه في روايه عماره يعقوبيان

كانت بتقول لزكي الدسوقي

مصر بقت قاسيه اوي علي ولادها


فعلا بس مش مصر الوطن

مصر الناس

مصر الناس بقت لا تحتمل

لكن مصر الاوطن مالهاش ذنب

مصر الوطن ضامم كل المصريين ومليان خير وجمال في كل حته

لكن احنا حاجه من الاتنين ياما مش عارفين نستفيد من الجمال ده وبنشووههه

ياما بنسرق الجمال ده ونعيد تشكيله في صوره قبيحه


انا مروحتش جنوب سيناء الا مرتين بس

قلت لا يمكن تكون دي مصر اللي بعيشها كل يووم

ازاي الجمال ده والطبيعه دي له ماحدش لمسها من البشر


اسكندريه نفس الكلاام

اسكندريه بحس فيها فعلا بمصر

اسكندريه مختلفه تماما عن القاهره

اسكندريه فيها عبق التاريخ وجمال الاصاله


القاهره تحس فيها بريحه فسيخ بايظ

نفس الشيء عن جمال ورقه الاقصر واسوان


ودي مشكله

اننا مش شايفين الا ااماكن الجذابه بس في مصر ومتخيلين اننا مش هنشوف الا ده


مشكلتنا اننا مابقيناش عارفين نشوف الجمال الحقيقي في مصر الزحمه

مش عارفين نتاقلم مع الحتت النظيفه الفاضله لسه في مصر ماتوسختش بوساختنا




انا واحد بعشق مصر من غير ناسها

يعني لو مصر تفضي كده تبقي اشطه بالعسل

لكن مابقيتش قادر اتاقللم اكتر من كده


صدقيني مش هكدب عليكم لو قلت لكم ان الشباب مصيره حاجه من الاربعه


يبقي مجنون رسمي ويتهبل

ياما يبقي متعصب ومجرم

ياما ينحرف

ياما يموت من جوااه


احنا السيبب في ده كله

احنا اللي وصلنا لنفسنا الحاله دي

احنا اللي قتلنا الزمن الجميل وبقينا عايشين الزمن القبيح

ومصر مالهاش ذنب

الذنب ذنب ولادها




فيه جمله بعيط لما اسمعها في فيلم وداعا بنوابرت

مصر هتفضل غاليه عليا


بقيت خايف يحسن الجمله دي مش تبقي صحيحه


معلش طولت بس انت دفعتيني اتكلم

على عبدالله said...

السلام عليكم

.........لو لم اكن مصريا
مش مشكلة
المهم انى اكون مسلم
دينى الاسلام
وطنى الاسلام
هويتى اسلامية
جنسيتى اسلامية
هكذا المسلم ،كل بلاد الاسلام وطنه
سيبك انت من الوطنية والمواطنة ،، والله دا حق يراد به باطل لانها صرفت الناس عن اصل الانتماء
لكن دا ما يمنعش انى اعتز بانى مصرى
مصر المكان
مصر التاريخ
!!!!!!مش مصر الان
لان الله عز وجل زكى مصر فى اكثر من موضع تصريحا وتلميحا
والرسول صلى الله عليه وسلم قال استوصوا باهل مصر خيرا
واجمل كلمة اتقالت
نعيب مكاننا والعيب فينا وما لمكاننا عيب سوانا
لذلك ان مش بادافع عن اشخاص
يعنى مثلا لو واحد قلى حكومتكم فاشلة
هابصملوا بالعشرة واقله موافق ،لكن ماذا عن باقى الحكومات العربية
لا تعايرنى ولا اعايرك ،الهم طايلنى وطايلك
لكن لو حاكم عربى او اجنبى عمل موقف مشرف هايبقى حبيبى
اما لو اتكلم عن مصر كمصر وحاول انه ينال من مصر
هنا هاقله استنى عندك .. انت كداب
طاب انا هاصدقك انت ولا كلام الله عز وجل وكلام الرسول صلى الله عليه وسلم؟
طبعا هاضرب بكلامه عرض الحائط

انت فكرتينى بواحد زمان بيتهيألى نبيل شعيل ولا محمد عبده والله مش فاكر
المهم انه فى مرة قال ان الرسول صلى الله عليه وسلم سعودى الجنسية !!!
يا حلاوة جابوها منين دى
هو كان فى سعودية اصلا
:)

اسف للاطالة
لكن من الانصاف واحقاقا للحق

شكرا

مواطن مصري said...

@مجداوية مصريتي ووطن قبل اي شىء انتمي الي بلدي

الوطن قبل كل شىء

مواطن مصري said...

@مجداوية

معلش الي مؤمن بكدة يبقى مش بيفرق عن الاسرائيلين في حاجة

ان الدين وطن هو نفس منطق الصهاينة

Tamer Nabil said...

السلام عليكم

كلنا بنحب بلدنا

نعترض ونلعن بعض الاشخاص اللى مخلين صورتها مش حلوة

لكن بلدنا غالية علينا

ابى مش قولتى ليا اعمل اية

فى الموضوع اللى قولت ليكى علية

ياريت تكتبى ليا الخطوات كاملة عشان امشى عليها

تحياتى

مهندس مصري said...

بصي يا بنتي
مصر هي وطني و أنا بأحبها جداً و قصيدة جاهين دي بتعبر عن معظمنا

لكن المكان الحلو اللي انتي بتقولي عليه ده تذكرة دخوله بكام
يكلف كام يعني
متاح دخوله لكام في المية من الشعب
انت عارفة مشكلة البلد دي إنها منهوبة

أنا لما باقارن بين شغلي هنا و شغلي في السعودية هناك مجهود الشغل أقل و المرتب اكبر و نظام الحياة مريح لدرجة تحسس الشخص بآدميته

حسيت اننا هنا كنا عبيد او اقل من العبيد بننطحن في دوامة ملهاش آخر و في الآخر بنآخد فتافيت و مفيش عائد و ما كانش لها لازمة الحياة

تصدقي بالله البلد دي فيها خير يكفي تماماً لإعطاء كل موظف و عامل مرتب يماثل تماماً نظيره في بلاد الخارج و ساعتها ستعتدل الحياة و ستستقر البلد كثيراً و ستحل العديد من المشكلات

لكن البلد منهوبة و تقارير الجهاز المركزي للمحاسبات بتتكلم عن إهدار مئات المليارات من الجنيهات ده غير الرشاوي اللي مجموعها برضه بمليارات
كل المليارات دي كافية إنها تعيش الشعب ده حياة كريمة

حسبنا الله و نعم الوكيل في اللي خلانا عايشين ميتين جوه بلدنا و متشحططين في بلاد الله

أما بالنسبة لكلام الاجانب لو بينتقدوا البلد بمنطقية و بموضوعية و بدون شماتة فيا اهلاً بكل إنتقاد شريف

أما لو بيشتموا و خلاص فما يستهلوش غير جزاء من جنس العمل

أشوفك في البؤجة
سلام

* Alwaan * said...

فيه فرق كبير اوى بين مصر البلد بشعبها وناس الطيبين ومصر الحكومه ال....ز

احنا بنحب بلدنا جدا ولو مكناش بنحبها مكناش اتحمقنا عليها ولا كنا انتقدنا اوضاعها ولا كان همنا تتسرق متتسرقش ولا اى حاجه من دى

احنا فعلا بنحبها عشان هى فعلا تتحب

رودى هانم سابقا

رئيس جمهوريه نفسى said...

على اسم مصر

التاريخ يقدر يقول ما شاء

أنا مصر عندي أحب وأجمل الأشياء

بحبها وهي مالكة الأرض شرق وغرب

وبحبها وهي مرمية جريحة حرب

بحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلاقيني جنبها في الكرب

والنبض ينفض عروقي بألف نغمة وضرب

على اسم مصر

صلاح جاهين

بدراوى said...

انا بحب مصر
بس هيا مش بتحبنى
خالص
نفسى تحبنى زى ما بحبها
نفسى تحسسنى بقيمتها شوية
تخاف عليا

عارفة انا كنت كتبت تدوينة قديمة زماااان

ياريت تعلقى عليها هى بتتكلم عن مصر
http://ta3melboyout.blogspot.com/2008/04/blog-post.html

karim said...

اولا ياترى انتى كاتبة الكلمتين دوول علشان عيد سيناء ولا اية , المهم كل المصريين زيك وبيعملوا كدة و محديش عارف ليية, زى حاجات كتير فى بلدنا بتتعمل و مالهاش تفسير, ببساطة هى دى مصر, تحياتى

Ahmed Talk said...

لازم نفرق ما بين مصر الحكومة ومصر الناس اللي هما اهلنا وقريبنا

قوس قزح said...

بسيطة اوى الاجابة

زى ما الام كده بتدعى على اولادها
بس لو حد دعى عليهم تاكله

عارفة ليه
لان الواحد بتكون حمقته علشان نفسه تبقى احسن بلد فى الدنيا
لكن نية غيرك انتى مش عارفها علشان كده مش بتستحملى كلمة منه


واللى محدوش خير فى بلده معندوش دم

لورنس العرب said...

لو أقولك انا بدافع عن البلد بإتماته داخل مواقع الأخبار أمام المعلقين العرب لن تصدقيني
لدرجه ان الكثيرين اتهموني اني أحصل على راتبي الشهري من جمال مبارك
هذا على الرغم من الظروف القاسيه التي مررت ولازلت امر بها
لكن ليه بعمل كده
انا مش عارف الحقيقه!

micheal said...

لولولوليييييييي
أخيرا انا اول كومنت
:)
معلش كان نفسي فيها من زمان
:)

قلم رصاص said...

الوطن شيئ غالي

مواطن مصري said...

فاكرة مشهد الام في حين ميسرة اهو دة انسب رد



على السؤال

مواطن مصري said...

هو انا لية بيظهرلي الرسالة دي اول ما افتح المدونة

Warning: Visiting this site may harm your computer!


؟؟؟ظ

ReEm said...

انا طبعا مش مصرية بس عندي قناعة

لنه ماحدش بيكره بلده مهما كان الا

اتذل فيها و مش قصدي الذل ده اللي بتاع دواير حكومة و كدة ده كلام فاضي قصدي يتذل زي مثلا بشكل مهين على ايد شرطة وكدة

غير كدة صعب الواحد يكره بلده و اللي ما في خير في بلده اساسا ما راح يكون فيه خير لاحد

ابو اعصار said...

مصر بعشقها وبكرهها في نفس الوقت
لكن خل حد بره يفكر يسئ لمعزه في مصر لازم انتف ريشه
لازم نحدد موقفنا من مصر نكره واقعها لكن نعشق حتى زبالاتها مش نعره عشق البلد هو الانتماء الاكبر
بس في نفس الوقت حبي لبلدي لا يدفعني الى انتقاد البلدان الاخرى لانها كده تبقى عنصرية
سلام

بت خيخة وأي كلام said...

ومين قالك ان احنا مابنتحملش ان حد يشتمها؟

انا عن نفسى بتحمل عااااااااادى
واللى عايز يشتم يشتم


نيهاهاهاهاهاع



لا نتكلم جد
هو بصراحة بالنسبالى انا ما تحطتش فى موقف ان حد من برة مصر يشتم مصر
يمكن اللى بشوفهم بيشتموا
بيكونوا من اهل البد نفسها
يعنى شوفت مصريين كتير بيشتموا مصر
ودايما الشتيمة بتكون نهاية حديث دار بينى وبينهم
وكانوا هما زهقانين من موقف حصلهم
يا إما روتين مالهوش لزمة
او ظلم وقع عليه
او ظابط ابن وسخة مارس سلطته بسادية وبقلة ادب
او .. او .. او .. الى اخر الأوأوات من المواقف اللى احنا كلنا عارفينها ولا تخفى علي اى حد مننا


بس لو ركزتى فى الشتيمة
هتلاقى ان المقصود بالشتيمة مش البلد
المقصود منها الحكومة
بس الناس اتعودوا خلاص ان البلد هى الحكومة والحكومة هى البلد
فبالتالى مش هتفرق يشتموا مين



وانا يحضرنى فى هذا الموقف
نكتة بتضحكنى اوى

مرة واحد ماشى فى الشارع
رفع ايده وقال الله يخرب بيتك يا سيد

راح مخبر سمعه
وراح ضربه على قفاه وقاله
وكمان مش عارف اسم الريس

نيهاهاهاهاهاع




طب خدى النكتة دى كمان

اتنين ماشيين فى الشارع
مذيعة وقفتهم
وسالت اول واحد مصر بالنسبالك ايه؟
راح رد بثقة وقالها مصر هى امى طبعا
وسالت التانى وانت تقدر تقول ايه عن مصر؟
راح رد وقالها
انا مقدرش اتكلم
عن ام واحد صاحبى كلام بطال

نيهاهاهاهاهاهاهاهاهاع




المهم يا ابى هانم
الصور تجنن
ماتبقى تخطفينى مرة معاكى فى الاماكن اللى تشرح القلب دى


ربنا يسعد ايامك كلها

سلام
اختك خيخة

صيدلانيه طالعه نازله said...

الكلام ده فعلا صح و بيحصل
مره كنت فى الشروق فى ميدان طلعت حرب
وواحده لبنانيه فضلت تقول المصريين مستغلين و بيبيعوا الحاجات اغلى للسياح
و فضلت تقول حاجات انا متأكده انها صح
المهم و هيا بتحاسب على الكتب بعد كل ده اشترت حاجات ب50 جنيه رحت راميه كلمه ان المدام اشترت بخمسين و هزءتنا بالف جنيه راحت بصتللى كده بصه استنكار و مشيت

مـحـمـد مـفـيـد said...

دي مصر
ممكن تكرهي تصرف
تكرهي حكومه
تكرهي مسئول
انما صعب اوي تكري كيان
صدقيني مصر بتجري مجري الدم فينا
ولو مش بنحبها مش هنقسي عليها كده

الشنكوتي الكبير said...

يا بنت طيب كنتي خدتينا معاكي نتفسح شويه ونشم هوا

يا ساتر عليكي بنت جلده

اقولك هي البلد دي كده ناس ليها تتفسح
وناس تقعد تتمسح

بس اقول ايه بقى بلدنا هنعمل ايه
لو كان عندنا بلد تانيه ننتسب لها كنا انتسبنا
لو كان حد غيرها ممكن يقبلنا ويتبنانا كنا وافقنا
ولو اننا ساعتها كنا برده هنبقى مواطنين درجة تانيه علشان احنا متبنين مش اصليين ولا من دمهم
يعني لأنها من دمنا فأحنا همها وهي همنا

فاهمه ولا لسه
اقول كمان
يعني لما ابويا يكون شديد
او امي تكون بعيد
معرفش اجيب والدين غيرهم من جديد
لما يكون حالي وحالك عجب
والظلم واقع علينا من غير سبب
مقدرش اخونك وابيعك عشان الدهب

فهمتي ولا اطول
يعني عشان في كل بلد في الدنيا البلد بتعز ناسها
اما في بلدنا دي فبلدنا كانت صبيه
ماشيه في الفجريه
طلعوا عليها ولاد الجنيه
خدوا منها شرفها وسابوها مرميه
بكت وديل جلبيتها بالطينه منديه
وجه ابوها واخوها
وقفوا ونار الذل في قلوبهم معبيه
تفتكري ايه رأيهم
يسيبوها مرميه
ولا ياخدهوا ويهربوا من اقرب معديه
ولا يجيبوا ولاد الكلب
ويعرفوهم التربيه


سلااااااااااااااااااااااااااام
اخوكي ايهاب

thunder said...

والله سؤال صعب يا ابى جدا
بس الاكيد انها مش نعره كدابه
عارفة ايام الهوجه ولحصار على غزة والضرب كان مستفذنى اوى اصحاب انصاف العقول اللى كانوا ماشين فى الهوجه وبيشتموا فى مصر برة وجوه وفعلا كانت بتنرفز من اللى مش مقدر مجهودنا واللى بنعمله
فعلا احنا بنحبها اوووووووووووووى لكن بنكره افعال اشخاص فيه مش بنكرها هى كان فى بيت كتابته قبل كدا ينطبق اوى على الوضع دا
مصر دى بلدى
نيلها ترابها وكل بيوتها حتى هواها كله جميل
انما لما تحب تعيش جواه لازم تسكن جوى شقوقها إما هتمشى جامب الحيط
اقولك تانى ولا فهمت
مصر دى ناس ولا مساكن ولا شوارع
لما تحب وتكرة فيها مين بظبط هتبكى علية

انا عن نفسى يا ابى بحبها اوووووووووووووووووووووووووووى ومحبش اى حد يقول لو حرف عليها انما بختلاف زى زى غيرى على افعال ناس فيها
اختى العزيزة دمتى بكل ما تحبى وفى رعاية الله وحفظه

مجداوية said...

السلام عليكم


بعد إذنك يا آبي

**************
مواطن مصري


شكرا

انت مسلم ؟

إعتقادي إنك مش مسلم

ولو مسلم
تبقى غلطان
ومحتاج تقرأ أكتر عن دينك

ولو مش مسلم
تبقي وجهات نظر
وأحترم رأيك
وأعذرك على إتهامي بالصهيونية !!!!

وبأطلب منك تحترم وجهة نظري

بسنت said...

زى المثل اللى بيقول ادعى على ابنى واكره اللى يقول آمين
لان مصر انتمائنا ليها مش بالفاسدين اللى فيها
انتماء ارض مرتبطين بكل جزء فيها
واينعم بنعايب عليها بس المنقصود مش مصر دى بريئه يا عينى
المشكله فى الحفنه الفاسده اللى كرهتنا فيها
ربنا ياخدهم ويريحج مصر واحنا منهم
وتعيشى يا مصر

مواطن مصري said...

مجداوية انا مسلم و الحمد الله و هذا يخص الله و انا ولا بشر بيننا وسيط في الديانة

انا بحترم اختلاف الاراء و كلنا نناقش باحترام
تحياتي

Abo 7anf said...

السلام عليكم
مصر كلنا بننتمى ليها
بتجرى قينا
منرضاش حد غيرنا ينقدها
او يطلعها وحشه
زى ما الزاحد ممكن ينقد والده فى شئ معين
بس ميقبلش حد يتكلم عليه
و بعدين منا بقالى سنين بشتم الزمالك
بس برضه بشجعه

kafrawy said...

بنحب البلد و بنحب مصر

بس كارهين اللى بيحصل ف مصر

من ولاد .........


دمتى بود

mUsLiM said...

انتى مشكله يا بنتى اقسم بالله

عليكى شوية تعبيرات بتموتنى من الضحك :))

ربنا يعزك يارب ويكرمك

بصى انا عن نفسى بفرق بين انتقاد النظام المصرى والحكومة وانتقاد مصر كمصر واى انسان بيخلط ما بين الاتنين دول يبقى مش فاهم حاجه عندى

لانى انا بنتقد كل الانظمة والحكومات العربية هل معنى كده انى بنتقد الوطن العربى والاسلامى

لا طبعا

وكذلك اى انسان ممكن جدا ينتقد الحكومه والنظام المصرى مهما كانت جنسيته او ملته

لكن مصر بتاريخها وشعبها وثقافتها وأهلها وجمالها وشوارعها وكل حته فيها

كل ده مزروع فى قلب كل مصرى

وده شئ موجود بقلوبنا بالفطره

من لى بسقيا فى هجير المشتهى ... يا مصر أنتى فى حياتى الساقى

:))

السلام عليكم

صيدلانيه طالعه نازله said...

على رأى رافت الهجان فى خر لقطه بلدنا جميله و تستحق
مصر محتاجه مكنسه بالكهرب بس تكون 10000 وات تشفط الزباله اللى بقت ماليا الدنيا كلها طبعا انا مش قصدى الزباله الماديه انا قصدى الناس الزباله اللى عامله كل اللى فى وسعها من اجل الاساءه لمصر و للاسف الناس دول يبقوا ولادها
احنا ليه وصلنا لكده ليه وصلنا لاننا نناقش احنا بنحب بلدنا ولا لأ متهيألى الموضوع ده من البديهيات مش محتاج تأكيد خالص
تأكيدنا بس اننا نحكم قلبنا قبل ضميرنا قبل ما نعمل حاجه
انا اتهزيت قوى من جوايا من تعليق dr.lecterو قصيده جاهين اللى كتبها رئيس جمهوريه نفسى و لقيت دموعى نزلت وحدها احنا كويسين قوى و الله احنا كويسين بس فقدنا الدافع اللى يخلينا نستمر كويسيين
و مش حأقدر اقول غير حسبنا الله و نعم الوكيل فى اللى خلانا كده
بدل ما نقول نعمل ايه بقينا كل واحد بيحاول يثبت انه اصلا بيحبها

سوبيا said...

علشان
مصر هي أمي

واللي يجيب سيرة مامتي
أكله بسناني

بس بردو

اللي يتجوز أمي اقوله يا عمي

:))

ابو صهيب ( الجمعاوي الاصيل)سابقاً said...

على اسم مصر التاريخ يقدر يقول ما شاء


أنا مصر عندي أحب وأجمل الأشياء


بحبها وهي مالكة الأرض شرق وغرب


وبحبها وهي مرمية جريحة حرب


بحبها بعنف وبرقة وعلى استحياء


واكرهها وألعن أبوها بعشق زي الداء


واسيبها واطفش في درب وتبقى هي ف درب


وتلتفت تلاقيني جنبها في الكرب


والنبض ينفض عروقي بألف نغمة وضرب

على فكرة انا حاطت البوست ده عندي من تاريخ 19 /3يعني مش غش بس هس فعلا القصيدة دي معبرة جداً عن حال مصر وعلى راي عمنا صلاح جاهيين وعجبي

مجداوية said...

السلام عليكم

بعد إذنك يا آبي تاني

مواطن مصري

مين جاب سيرة الوسيط أو حتى المصري اليوم لكن حضرتك لو مسلم فأنا باستغرب إن حضرتك فهمت كلامي بالمشقلب

بمعنى إننا كمسلمين عارفين إن أرض الله واحدة ودين ربنا واحد وهو الاسلام وأى بلد أأمن على نفسي وديني فيها تبقى وطن رغم ارتباطي بمكان ميلادي لكن لو حضرتك مثلا مصري وقضيت بعض سنوات فيها وبعدين هاجرت مكان تاني في الخارج مثلا وحياتك فيه على أحسن ما يكون لما بتيجي مصر زيارة بتبقى سياحة وبتبقى نفسك تخلص الرحلة عشان ترجع بلدك اللي هي مش بلدك

الانتماء بيكون متبادل بين المكان والانسان لو أنا ذليلة في بلدي أو مضطهدة او باموت قدام الفرن عشان العيش تبقى ملعونة البلد اللي بتذل فيا ومش عارف أهج منها لفقري أو لعجزي أو لقلة حيلتي

وطني هو المكان اللي يحفظ كرامتي وأعيش فيه مرفوعة الرأس وأحس بالأمان فيه

شوف التدوينة الجديدة لآبي والست الفقيرة بتبوس ايد الخواجاية اللي قلبها حن عليها وحكومة بلدها تبيعها برغيف عيش

المسلم لو عاش في أى بلد متصانة فيه كرامته ويأمن على نفسه ودينه طالما فيه حرية عبادة ومسجد يصلي فيه بأمان بينتمي له لكن الصهاينة العكس
الصهاينة عملوا الدين حجة ومكان الهيكل وسيلة لاحتلال أرض غيرهم بالقوة وابادتهم أو طردهم لاعتقادهم أنهم شعب الله المختار

عشان كده استغربت تكون مسلم
وكمان لما دخلت مدونتك لقيتك متضامن مع البهائيين
فقلت لا يمكن تكون مسلم
لكن طالما بتقول مسلم
يبقى خلاص

انت مسلم

وغلطان
ومحتاج تقرأ عن دينك كويس

عشان تعرف الفرق بين الفكر الاسلامي والفكر الصهيوني

وغلطان كمان في تضامنك مع البهائيين لأنهم مرتدين

وده مش رأى دي عقيدة

هم حرين طبعا ان شالله يعبدوا الشرطة بتاعتهم لكن مش من حقهم يروجوا لفكرهم في بلد اسلامي

وبرضه ده مش رأى
دى شروط الاقامة للأقلية التي تعيش في بلد مسلم طبقا لتعاليم الدين الاسلامي



>مع تأييدي للحكم لفصلهم عن المسلمين عشان ميختلطوش بينا >>

Sherif said...

حد يقدر مايحبش امه؟

مهما كانت هاتمد ايدك وتزوقها لو خارجة

لما يكون عندك عيل صغير هاتقول ياه .. وازاى استحملتنى لما بقيت شحط

فى الآخر لازم تاخد ايدها وتبوسها

ومش هاتقدر تشوف غير كل حاجة حلوة فيها

لما الناس تقول عليها ايه

أقول كمان؟

said elmasry said...

دى اول مره زور فيها مدونتك
بس من الاخر
ممتازه
اتمنى زيراه مدونتى
https://gogo0.blogspot.com
انا انتظر رائيك