اسطبل عنتر

الصورة دى من اسطبل عنتر

بصوا انا مش عارفه ارتب الكلام فى بالى بس هتكلم معاكم كأنى بتكلم عادى مع حد شيفاه يعنى مش هراعى ولا كتابه ولا زعبوط العفريت لان لازم رأينا كلنا ولازم تساعدونى بأى شكل
لما اتوجهت وداليا صحبتى قوس قزح لموضوع عمل الخير ومساعده الناس كنت حريصه ان الحاجات توصل بادينا وايدين الناس اللى بيتبرعوا جميعا علشان ميكونش فيه مجال لقولنا وعملنا المهم اسطبل عنتر عملنا فيه حاجات تبع جمعية صحبة خير
اولا بنعمل بؤجه الخير والكل عارفه
ثانيا عملنا موضوع المكتبه وان شاء الله مش هنقطع الحاجات دى

بس انا جالى احباط ايوووووووون هقول لكم ليه يوم موضوع المسرحيه اللى هتلاقوه على بيكيا مقعدناش كتير اتكلمنا مع الاولاد بس يعنى لعبنا شويه كده معاهم طبعا المكان بتاع اسطبل عنتر لما طلعت فوق طلعنا بالباص بتاع الجمعية فمكنش فيه مجال كبير اشوف حاجه المره الاخيرة بقى بتاعت المكتبه واللى محدش جه فيها غير 6 افراد منهم انا وداليا واللى عمل ليه احباط كمان بسبب الحنجوريه اللى عاوزين ام البلد دى تتغير وهما تحت اللحاف او يتحرروا وهما قاعدين فى البانيو عادى كل واحد حر بس على فكره البلد دى مش هتتحرك ولا خطوة ولا بعد مليون سنه واقولكم ليه

السبب الاول الحنجوريه اللى بينتقدوا حتى النمله اللى معديه تحت رجليهم علشان عدت من الناحيه الشمال مش اليمين وعلشان النسبه القليله جدا اللى بتحاول يبقى ليها عمل ملعون ابو اللى خلى النت بجد ببلاش علشان يطلع علينا صراصير من البلاعات تقرفنا ويعملوا مناضلين من ورق

ثانيا العشوائيات ومصايبها الناس دى حالتهم زفت ونيله يعنى المشكله مش فى انك تديهم هدوم او تديهم فلوس او توفر علاج او حتى تسكنهم فى فلل لان الناس دى عندها قناعه بحاجه

اولا انك رايح تتفرج عليهم مهما حاولت تقرب هما هيأخدوها بتريقه وانت مش احسن منى وده كان واضح اوى فى تانى مره لما رحنا يوم المكتبه وطلعنا على رجلينا وبنت عندها 17 سنه تقريبا مش من الجمعيه بس من الاسطبل نفسه بتلقح بالكلام هى وواحده زميلتها تقولها جايين الماجيك لاند طبعا ده علينا فمن هنا فهمت اللى بيدور فى دماغ الشباب حتى الكبار البنت اللى كانت ماشيه معانا حاولت تخلينى اوطى صوتى كذا مره علشان محدش يسمع ويعلق على كلامى وحسيت ان الجمعيه او المتطوعين فى العمل فيها خايفين جدا مع ان المفروض الحال مش كده المفروض الناس دى تبقى عندها وعى واستعداد انك تغيرها الناس دى مش هتتغير ومن هنا جالى طيب المتطوعين دول بيعملوا كده ليه وفهمت شويه ان فيه منهم اللى عنده ابحاث
اذن الناس مش هتتغير لان مفيش تقارب ما بينهم وبين دول زى بالظبط المدمن طالما مش عاوز يتعالج عمرك ما هتقدر عليه يبقى نيجى بقى لكذا نقطه

العشوائيات مش هتتغير الا اذا حصل تقارب جدا فى الحل والفهم والاقتناع ما بين الناس المتطوعين وما بين اهل المكان العشوائيات مش هتتغير طول ما اهلها رافضين يسبوها او البعض والنسبه الكبيرة علشان خايفين تقطع المعونات اللى بتروح لهم واللى بيشتغل فى المخدرات

والدعاره وغيره العشوائيات مش هتتغير طول ما فيه حزب وطنى مسيطر على منطقه لان اللى اكتشفته برضه ان جمعيه صحبة خير عامله المقر مع جمعية النور اللى هى ماسكها واحد حزب وطنى وركزوا فى اللى جاى فالبالتالى اى حاجه بتوديها صحبه خير بيطلع ينط عضو الحزب ويثبت وجوده فالناس متخيله انه هو اللى بيعمل حاجه ودى فى حد ذاتها كارثه فى النهايه انا مش عاوزه اسيب الموضوع وبرضه مش عارفه اتصرف وبرضه مش عاجبنى اى حاجه بجد

على الناحيه المهنيه الاطفال بيحلموا احلام اكبر منهم ودى مشكله يعنى لما الاطفال بيقولوا عاوزه تطلعى ايه اللى تقولك مذيعه وهى متنفعش لان المذيعه لها مقاييس معينه والبنت دى عندها 13 سنه ولسه فى تالته ابتدائى واللى عاوزه تطلع ظابط انا مش معترضه على الاحلام اللى علموها لهم بس المشكله لما بحلم احلم على قدى ودول الحلم معاهم خطر واقولكم ليه لان دول عندهم فى المكان اللى هما فيه كل المصايب ولما بتربى طفل من صغره على حاجات معينه مع انهم مفيش فيهم البرائه الكامله يعنى فحاجه من الاتنين لما تكبر البنات دى وتشوف ان احلامها اللى علموها لها مش هتتحقق هتتنكس وترجع انيل من الاول يا مش هيلحقوا وهيبقوا عدوانين جدا زى الباقى الجمعيه عامله شغل كويس اوى وبتعلمهم حاجات وبتهدهم بس انا ببص لقدام لازم يبقى فيه متطوعين كويسين فاهمين الواقع ويخلوا الولاد يحلموا بقدر كويس علشان الصدمه النفسيه ولازم يبقوا الاهالى مقتنعين ان العيشه اللى هما فيها زفت ومش كويسه ولازم يبقى عندهم رغبه للتغير بصوا انا قولت كل اللى جوايا وفى قلبى ومش عارفه اتصرف بس اناعاوزه اعمل حاجه وعندى احباط يا ريت اللى عنده حل او عاوز يستفسر عن حاجه معنديش مشكله يالا صدعتكوا بقى وممكن متفهموش كتير من البوست بس دى مشاعير ولازم ارجعها فى وشكم كده زى ما هى

كان معكم ابى هانم المحبطه من امام اسطبل عنتر واركب الحنطور واتحنطر

ملحوسه :- فيه بوست على بيكيا بخصوص تجمع بورسعيد كلفوا نفسكوا مشوار على حسابى لغايه البلوج اللينك بتاعه فى الجنب عندكم واهو كمان انطح هنا

حكمة الامبراطورة

اللى ملوش كبير يشترى له غفير