عيد الام والتى فى الخزعبلى





كل سنه فى نفس ذات النفس يبدأ التى فى الخزعبلى بتاعنا اللى المفروض يتفجر من بدرى وبتوع التفجيرات يوجهوا نشاطهم ليه علشان يرحمونا من كميه العته اللى بتحصل عليه وعلى الفضائيات وهيئه الارصاد الجويه والمستشفيات فى تجهيز نفسها للحدث العظيم وهو عيد الام
ليه بقى التى فى بيطلع علينا باعلانات ليل ونهار اشترى خمس سحالى واكسب كلب هديه لعيد الام
اشترى مكنسه بالبطاريه واكسب مكنسه الساحرة الشريرة هديه لعيد الام
الادهى والانيل السنه دى بيريل الراعى الرسمى للاطباق والكوبيات عامل اعلان
وجاب شويه عيال سيس متخلفين علشان يقولوا كل سنه وانتى طيبه يا ماما
انا مش معترضه معترضه على الهطل اللى بيحصل
واحد شحط فى الجامعه طالع يقول انا امى بتعمل احسن محشى فى مصر كلها
على اساسا كل الامهات فشله
وبعدين هى دى الحسنه الوحيدة لامك علشان تطلع تقولها كل سنه وانتى طيبه
التانى يقولها انا مش هنسى يوم ما طلبت منك ملوخيه ونزلتى فى ساعتها جبتيها
ده بدل ما ينزل هو نزلت هى
والراجل الغلبان اللى طالع يقول لمراته كل سنه وانتى طيبه
يعنى التى فى بيجيب ناس بجد تكسف ومهمشه دور الام فى حله محشى وطبق ملوخيه وغسيل الاطباق
يعنى السيرفينت بتقوم بكل ده
هو ده دور الام
ده الجزء الاول ....

التانى بقى بعد ما نشوف الاعلانات دى طبعا النرفزه بتطلع والجو بيقلب زعابيب وده الجزء الخاص بهيئه الارصاد فاحترسوا الاقتراب منى فى الفتره دى بعد كميه الاعلانات
وبعدما تهدأ العاصفه بتنقل على المستشفى وتلاقونى بخرف مكنسه مكنسه اطباق طايره اطباق طايرة
انا نفسى التى فى وسى انس الفقى يرحمنا او يتفجروا

انا لو اعرف اللى بيعمل الاعلانات هربطه على العمود وكل يوم هضرب فيه رايح جاى واخلى العيال تقرقصه فى كل حته فى جسمه
ولو اعرف العيال السيس اللى بتوافق تسجل مع بتوع بريل هشربهم يريل بتاع الاطباق ده واخليهم يبقللوا

كأن التى فى متعمد فعلا انه يجيب ناس متخلفه يقولوا كلام متخلف
يا شوباب الله يكرمكوا اللى يسعده حظه يعنى مع انى مش بشوفها سعد اوى
ويطلع فى بورنامج يحاول يمسك كميه الهبل اللى بتقع علينا ولو الست المذيعه جامده اوى يعنى وانتم مش قادرين تمسكوا نفسكوا من النحنحه
يا ريت تنحوا النحنحه فى جنب وتشغلوا عقلكوا كسفتونا فى الخارج والداخل

فى النهايه

انا عاوزة اقول كل سنه وكل ام طيبه ودورها مش فى المحشى ولا الملوخيه ولا غسيل الهدوم دور الام اكبر بكتير

وعاوزه اقول للخمس امهات اللى عندى كل سنه وهما طيبين

ايووووووون مالكوا مذبهلين ليه انا عندى خمسه مش علشان بابا مزواج لا علشان انا بحب اجمع امهات
اول ام ...
مامى ست الحسن والجمال وعلى فكره ده اسم الدلع ست الحسن لان امى ماشاء الله عليها من صغرها كانت جميله وبيضاء زى القشطه طالعه ليه من يومها احم ..احم
بجد امى احلى الستات امى مربتنيش انا وتلاته اخواتى كمان لا دى ربت اخواتها لانها تانى واحده فى اخواتها وجدى وجدتى كانوا موظفين وهى اللى اتحملت مسئوليه اخواتها الاصغر وجدتى ما شاء الله ربنا يديها الصحه فرطت منها اوى ودبست امى
والادهى ان امى بمسئوليتها اتجوزت الحج والدى وهو اصغر واحد فى اخواته والمدلع بالقوى لاب شبه اقطاعى ( ومش عاوزة ضرب ونفسنه اغلبه راح فى الوباء يا هنادى) يعنى دلع وفلوس وجمال كمان فاكيد فى البدايه عملواجميع انواع الخناقات بس الحمد لله امى بجد ست بمليون راجل وطول عمر بابا مسافر علشان شغله وهى متحمله مسئوليه كل حاجه من بناء عمارة لمتابعة كل شغل بابا هنا وطول عمرها هتفضل ست الحسن والجدعنه كمان
وكفايه انى بنتها وهى طالعه شبهى شويه يعنى

كل سنه وانتى طيبه يا امى وبما انى ناويه اقرالك البتاعه ده هقولك متزعليش منى والله ساعات بتنرفز غصب عنى اصل مش منطقى يا امى يعنى تأخدى راى فى موضوع وتنفذى عكسه كل مرة كل مرة

طلب تانى كمان يا ريت بلاش تجيبى ليه طقم الحلل اللى بغطاء بيركس ده علشان انا ماسكه ديل قطه واكيد هيقع يدشدش وانا متنازله عن هديه عيد الام السنه دى او يا ريت طقم اطباق ورق اوفر برضه وميتعبش ايدى فى الغسيل
ايوه والله ماما كل سنه بتجيب ليه انا كمان هديه عيد الام طبعا بعد ما بتطلب هى هديه عيد الام ام بيروقراطيه فزيعه

الام التانيه ماما ريا او مجداويه

يا ماجى رغم انك كلاشينكوف موجهه بس بحبك والله ورغم انك عامله زى امى اللى قبلك دى بالظبط انك بتعصبينى وبتخلينى زى السمكه فى طاسه القليه بس بستفيد منك كتير

الام التالته دوللى قوس قزح ودى مانتى الصغيرة

يا مانتى خفى ايدك شويه من على الجرح بيوجعنى انا قولتها ليكى انك بتكملى مانتى الاولانيه وبتلاقينى لما اقول لا على حاجه بالك طويل وتكملى معايا وده بصراحه اللى مش عند مانتى الكبيرة لانها خلاص كنست عليا طريق المنصورة العريش من بدرى وادركت ان مفيش امل فى فردة الشوز المستوطنه فى دماغى

الاتنين الاخرنين
نانا جدتى والده ماما رغم الزهيمر اللى عندها وانها كبيرة فى السن بس حبيبة قلبى فاكرنى حتى لو طلبتها فى التليفون بتعرف صوتى وكلهم يستغربوا يقولوا لها اشمعنى دى تقولهم دى فرحتى الاولى لانى احم احم اول حفيدة ليها
والدلوعه بتاعتها كمان

الاخيرة بقى طنط سلوى خالتى

ودى القبل الاخيره من اخوات ماما واللى قضيت معاها كتير فى حياتى وكله بيقول عليه شبها
حتى امى لما اعمل حاجه تقولى جتك القرف وانتى شبهها كده .... فاقعد اضحك علشان عارفه انها تقصد سلوى لان نفس التصرفات اللى بعملها سلوى عملتها بالظبط حتى ولاد سلوى بيغيروا منى ويقولوا لها اشمعنى دى اللى بتحبيها وحتى لو غلطت تدافعى عندها يا سلوع ربنا يخليكى ليه يا بطوط

وكل سنه وكل الامهات طيبين وبخير

كل سنه وكل ام فلسطينيه فقدت ابنها طيبه


وكل سنه وكل ملاحيس التى فى مشنوقين غرقانين محروقين قادر يا كريم

انا رايحه اشترى تورته واشد الرحال كام يوم مع ماما حد مش عاوز حاجه

كان معكم ابن بطوطه ابى هانم

حكمه الامبراطورة

اللى ملوش خير فى امه ملوش خير فى البطاطس المقلية


95 اخبط وقول رايك:

صيدلانيه طالعه نازله said...

عاااااااااااااااااا

مفيش كل سنه و انت طيبه مخصوص ليا ماش ماش مخمصاكى و حصلت عليكى كل اعلانات التلفزيون و اظن ده ابشع انتقام
ههههههههههههههههههههه
كل سنه و كل مامات الدنيا بخير و صحه و عقبالك اما تنضمى للقافله و تبقى ماما بتنجانى على الاخر
اه و فيه امنيه اخيره ياريت كل ميسات المدرسه يبقوا زى مس سوسن بتاعه العربى اللى نبهت انها مش بتاخد هدايا وو فروا الهديه لماما احسن و مع ذلك الندل ابنى لغايه دلوقتى و لا عبرنى و زودت له المصروف من اسبوع عشان ميبقاش له حجه و برضه و لا كأن

قوس قزح said...

يعنى طلعتى الامهات كلها قوية و مفترية عليكى ههههههههههههههه

عارفة انا كنت زيك كده قبل ما اكون ام .. كنت بشوف ساعات تصرفات الامهات مش مفهومة او غلط او حتى بتحكم زيادة
بس بعد ما بقيت ام عرفت انهم عندهم حق بجد ..لان احساس الام مختلف عن اى احساس تانى فى الدنيا .. و يمكن علشان كده ربنا عمل لها مكانة خاصة زى ما حبها لاولاها حب خاص

اما بقى عن الهدايا .. انا اللى بيغظنى فى قصة الهدايا دى ان ليه بيشوفوا ان الهدايا الخاصة بالبيت هدية لها ؟؟ ليه نجيب حلة ولا فازة ؟؟ هى هتلبس الحلة فى راسها و لا تعلق الفازة فى ودانها ؟؟ الهدية للام يا جدعان مش للبيت .. مفروض الهدية تكون حاجة شخصيا لها .. الا لو هى طلبت حاجة معينة تريحها من شغل معين فى البيت .. و الكلام ده للزوج برضه بالمرة هههههههههههه

اما انتى بقى .. من اول مرة شوفتك فيها شوفت ان جواكى حاجات كتير غير أبى ام كوكب بخرفان ..و الحاجات دى جميلة اوى ..يمكن اجمل كتير من الخرفان .. و نفسى تخليها تظهر و تبطلى نشفان الدماغ ..و على اد ما الحاجات دى جميلة على اد صبرى و طولت بالى معاكى .. يعنى هتعبك كتير :))


ربنا يخليكى حبيبتى و كل سنة و انتى اجمل و اشقى ابنة

Sherif said...

اول تهنئة

كل سنة وكل االامهات الرائعين اللى حكيتى عنهم بالف خير وعافية

وربنا يقدرك على رد الجميل دايما ليهم

واخيرا .. عقبال مانشوفك مامى عن قريب .. تشجعى

كل سنة وانت طيبة

بدراوى said...

كل سنة و كل ام بخير
سواء عملت بقى ملوخية
و لا مكرونة فرن
و لا صنية محشى

الصراحة مشفتش الإعلان
بس وصفك ليه
عملى ازمة نفساوية
و بفكر انا كمان اطلع
فى الإعلان
و اقول طلبت منها صنية رقاق
قالتلى لأ حعمل صنية سمك سنجارى
يا واد
هههههههههههههه

و نعم الأم فعلاً

هههههههههههه

ربنا يخليلك كل امهات يارب
و تفرحى بيهم
دايماً
:-)
---
اه نسيت اقولك انى سمعت انهارده مزاج سيادتك الموسيقى
بعد ما كنت بقفله على طوول
و مش بسمعه

الصراحة الله ينور عليكى
بجد

اغنية فادى اندروس عالية اووى
شكلى كدة حسمع الراديو الخاص بمزاج حضرتك على طووول
-------
بمناسبة الامهات الفلسطينيات
ايه رأيك فى السبق المهبب للمصرى اليوم
يوم الإثنين اللى فات
و اللى كتبته عنه
أ/بيلا
فى مدونتها

Founoon said...

شكلك ما سمعتيش اعلان الراديو بتاع بريل

خدي عندك
( كل سنة وانتي طيبة يا ماما انا عارفه اني تعبتك اوي انا واخواتي وانا اهو دلوقتي بقول لبنتي انا تعبت ماما اوي )

ايوا نعم !!!!

ما علينا قصره

كل سنة وكل ام طيبة واللي مش ام لسه ان شاء الله السنة الجاية نقولها كل سنة وهي طيبة :)

رئيس جمهوريه نفسى said...

اولا انا مرحوم من عته التليفزيونات دة خالص ومش بروح ناحيته نهائيا مش حمل عته ولا هطل يعنى
***************
كل سنه وانتى طيبه يا امى وبما انى ناويه اقرالك البتاعه ده هقولك متزعليش منى والله ساعات بتنرفز غصب عنى اصل مش منطقى يا امى يعنى تأخدى راى فى موضوع وتنفذى عكسه كل مرة كل مرة


طيب وانتى زعلانة ليه من كدة يا بتنجاني ماهى مامتك عارفه انى رائك غلط فبتعمل الصح اكيد حد يمشى وراء راى واحدة بتنجانى

قي الاخر كل سنه وكل ام طيبة لانى بيفترض انى السنه كلها عيد ام لاني ابسط ما قيل للتعبير عن مكانة الام (إذا الام ماتت نادى منادى من السماء يا عبد الله ماتت التى كنا نكرمك من أجلها فا عمل عملا صالحا نكرمك من أجله (
ودة كفاية علشان نعرف فضل الام

اسامه عبدالعال said...

كل سنه وانتى وكل المامات دول وكل الناس بالف خير

حاجات جوايا said...

مممممممم
بما انى من الامهات
فهرد عليكى بقى واقولك وانتى طيبة يا قمر


كل سنة وانتى ومامتك وكل ماماهاتك طيبين وبكل الخير والهنا والرضا

وان شاء الله عيد الام الجاى تنضمى معانا لفريق الامهات

بالنسبة لاعلانات التى فى
اقفلى التليفزيون وريحى دماغك
بلا تعب اعصاب
هههههههههه

حسن حنفى said...

كل سنه وكل ام طيبه

يمكن دول مش شايفين في امهاتهم غير كده

ويمكن هم شايفينا ش شايفين في امهاتنا غير كده ؟!

romansy said...

هههههههههههههه
امبراطوره هنقول ايه غير كده
كل سنه وكل ام طيبه
وكل ام جايبه هديه لابنها او بنتها
وبتسعدهم دايما
ايوه مش دى امنا ولازم تسعدنا بقى
وربنا يكتر امهاتك كده يارب
وكل سنه وهما كلهم طييبين

قلب ينبض بالحب said...

كل سنة ومامهتنا طيبة وجميلة وامورة وربنا يخلهالنا وبوسات كتير على خدود ست الكل ام الست هانم بتنجاني وياريت مش تعوقي علشان عاوزين نشوفك يوم المكتبة يا وزة يالا سلاموز بالموز

محمد عتلم said...

كل سنه وانتى والخمس مهمهات اللى عندك طيبين وتمام التمام وزى الفل
وحته من التورته والنبى يا بتنجانى

بت خيخة وأي كلام said...

انا اعرف واحد ليه خير فى البطاطس المقلية ومالوش خير فى امه

مجداوية said...

السلام عليكم

انت كده يا آبي لبستيني توب الأدب وملكتيني بعطفك علياوتشريفي إن أكون أم ليكي ومش حاقدر أرفع الكلانشيكوف تاني في وشك ,,يادي الكسوف ياولاد

بس يا بخت من رفع الكلانشيكوف عليا ولا خلى الناس هي اللى ترفع كلانشيكوفاتها عليا

الحمد لله أن وصلك صح وإنه حب ليكي وخوف عليكي
وربنا يقدرني وأشتري مدفع أصل الكلانشيكوف مش مديني النتيجة اللي عايزاها
:)
:)

ربنا يخليلك والدتك العزيزة وتفضل متسمعش كلامك كده على طول وكلمة حاضر بتريح بس أنا حسيت من كلامك إنك إنتي اللي أمها
وبأقولها من هذا المزنق الله يكون في عونك يا ست الحبايب وانت عايشة وسط القلل والخرفان وطاسة القلية وكمان عايزاكي تسمعي الكلام
متفتشي على ضوافرنا بالمرة
عيال آخر زمن
حازي يا به

إنت سكرة يا آبي وبحب جنانك والعربي بتاعك المدشدش وبحب قلبك الطيب وبحب أغيظك لكن أقسم بالله العظيم والله شهيد علي إني أتمنى لك كل خير وتكوني أحسن الناس وبأدعيلك ربنا يرضى عنك ويرزقك بابن الحلال اللى يقدر يتحمل القلل وتكوني عن قريب أم وساعتها حتغني ظلموه وكل اللي عملتيه في مهمهاتك حيطلع عليكي
قادر يا كريم

:)
:)

كل عام وانت بخير وسعادة والعام اللي جاى نتشفى فيكي ان شاء الله ونقولك يا أم حلموس

وخلي السلاح صاحي
وأحلى من الكلانشيكوف مفيييييييش

مواطن مصري said...

كل سنة و كل ام بخير

فاتيما said...

كل سنة و امهاتك كلهم بخير يا بيبى
و تفضلى كدا منورة حياتهم و مجنناهم بشقاوتك و خفة دمك و عقلك اللى يتقال بالألماظ دا
أجازة سعيدة إن شاء الله
و هتوحشينا
بوسة و حضوناااااااااات

سارة نجاتى said...

خمس أمهات ؟؟ههههه

ربنا يخليهوم لك بجد

أما موضوع البريل ده ,أيوه نفسى اعرف بجد ايه ده , لا و نفس الكلام على المساحيق و الغسالات
و الحرامية بعد عيد الايوم بعشر أيام يقولوك ابعت على مش عارف كام عشان تطلع امك عمرة هدية عيد الأأم

ايه التحوير ده ؟؟

A.SAMIR said...

انا اللي بتضايق منه في عيد الام ان كل واحد بيطلع يقول انا امي احسن ام في الدنيا
طب ما اكيد ومنطقي وبديهي ان كل واحد بيشوف امه احسن حاجة في الحياة
ايه الجديد؟

المينيماليزم said...

ان جيتي للخمس سحالي ,,الناس مصرة علي انها تحول القيمة المعنوية لسلعة استهلاكية,,


العالم بتعد طول اليوم مشغلة اغاني تخلي الواحد يجيله
bi polar depression
اكتئاب ثنائي القطب,,دا انا اللي امي الي حد ما عايشة بكتئب مفيش مراعاة للاحساس ابدا

أحمـــــــــــــد أبو العلا said...

هههههههههههه
نيهاااااااااااااها

ايه الملوخيه والمحشي ده كله
شبعتينا ياشيخه
هه

بجد بقى
الموضوع في الاعلام هدفه الأول والأخير المكسب
(السحالي وبريل وبرسيل)
بس ياريتهم بيستغلوا الموضوع بشكل كويس
دول فعلا بيسفهوا الموضوع وبيتحول لشئ مقرف

زن زن زن واعلانات عمال على بطال

الأم تستاهل عيد تاني خاااااااااالص

كل سنه وكل أم طيبه

احم احم
اشمعنى يعني البطاطس المقليه؟
ههههه

أبو العريف said...

كل سنه وكل امهات مصر طيبين
وكل سنه و كل ام طيبه
اجمل حاجه ف الدنيا امي
وبمناسبة اني بعيد عنها
مش هنسي الكلمه اللي قالتها بكل تلقائيه وبساطه لما سألتها وانا صغير
مين اكتر حد بتحبيه فينا
قالتلي
الصغير لحد ما يكبر
والعيان لحد ما يخف
والغااااااااااايب
لحد مايرجع

أبو العريف said...

كل سنه وكل امهات مصر طيبين
وكل سنه و كل ام طيبه
اجمل حاجه ف الدنيا امي
وبمناسبة اني بعيد عنها
مش هنسي الكلمه اللي قالتها بكل تلقائيه وبساطه لما سألتها وانا صغير
مين اكتر حد بتحبيه فينا
قالتلي
الصغير لحد ما يكبر
والعيان لحد ما يخف
والغااااااااااايب
لحد مايرجع

Abo 7anf said...

ألسلام عليكم
اعلانات ايه
دا اكل عيش يهندسه
متزعليش نفسك
وكل سنه وكل الامهات بخير حتى لو عملوا كشرى

جنّي said...

السلام عليكم

كل عام وكل الامهات بخير ..وأدعو الله لأمي بالرحمة والمغفرة ..

البعض يختزل حب الام في يوم وفي عبارة كل سنة وانتي طيبة والبعض يختزل حبه في حلة محشي كالشحط الذي ذكرتيه .. ولكن هل يجزي حب يوم وعبارة واحدة ما فعلته امهاتنا لنا؟؟ اسمعي هذه الحكاية :

كان رجلا يطوف بالبيت يحمل أمه على ظهره ، وهو يقول : أحمل أمي وهي الحماله ترضعني الدرة والعلاله هل يجزين والد فعاله فقال له عمر رضي الله عنه : « لا ولا طلقة » ، فقال عمر : « لوددت أن أمي أسلمت فأحملها كما حملت أمك كان أحب إلي مما طلعت عليه الشمس أو غربت »

تحيتي
ولا زالت المقاطعة مستمرة لجنّي ولا ادري السبب ؟

مسدس صغير said...

تصورى ان انا ارفض عيد الام ده .
مش عشانه مكلف.
لا
ههههههههههه
لكن عشانه بيختزل الحب اللى بين الابناء والام فى يوم 21 مارس المسكين
حاجة غريبة فعلا
الام دى ام طول السنة مش يوم واحد بس ى السنة.
بس رغم كده هنجيب هدية عيد الام.
مرغمين بقى.
ههههههههه

wanna b a physician said...

والله يا اببى العته ده متأصل فى البرامج أنا اول اعلان شوفته كان بنت كدا واتشليت اخره ربنا ما يورى حد

انا بقا عندى خمسة برضوة بس للأسف فى واحده منهم مش هاعرف اقولها كل سنة وانتى طيبة

كل سنة ومامتك طيبة وكل اللى بتحبيهم
وانتى كمان طبعا يا ريسه


تحياتى

الربان said...

تحياتي

اولا كل سنه و كل أم بالف خير و سلام
و ربنا يرحم كل ام أنتقلت الي جواره.

الأم التي قاست و عانت و تحملت مرحلة
الحمل و الولادة...و مرحلة التربية و التنشئة...الام التي اقتطعت من نفسها
لتري رضيعها او رضيعتها تكبر و تنمو
تحبو...و تقف علي قدميها...الام هي
المدرسة الكبري للتضحية و إنكار الذات

ثانيا... الاعلانات و الرعاة...هي اعمال تجارية بحته...تستغل الفرص للوصول الي الناس... و ليتنا نأخذ
من هذه الاعلانات الصالح منها...و نترك
الطالح.

كل سنة و أمك بألف خير...و تحية لها
متمنين لها دوام الصحة و العافية.

كما اهنيء الاخوات مجداوية .. وقوس قزح.... فمن متابعتي لما يكتبن...و لانشطتهن...تعرفت علي شخصيتهما المميزة ...

اخيرا كل عام و كل أم..بالف خير و سلام
ورحم الله كل الامهات اللائي انتقلن الي جواره...و جزاهن خير الجزاء عما قمن به
من تربية و تنشئة اجتماعية و دينية
صحيحة لابنائهن...

تحياتي و تقديري....

لورنس العرب said...

طبعا كالعاده هفتح صفحة الحوادث تاني يوم عيد الام والائي حادثه عن ان هناك ابن قتل امه


مش عارف بيظبتوها ازاي دي

ساره said...

انتي عندك خمس امهات
ان عندي ثنتين
امي الكبير اللي هى جدتي وامي اللي هى امي

من جد انا انادي جدتي امي الكبيرة :)

الله يخلي امهاتنا يارب ويحفظهم لنا ولا يحرمنا منهم ابدا

مع اني ساعات اكون وحشة وازعل امي او اتعصب عليها بس والله العظيم اني بعدها ما اقدر انام او اشتغل الين ترضى

احبك ياقمر :)

محدش بيموت ناقص حلم said...

اللى ملوش خير فى امه ملوش خير فى البطاطس المقلية

الطائر الحزين said...

كل عام انت بخير

enjy said...

انتى تحفففففففففففففة يخربيت كدة

Sherif said...

يشرفنى ان ادعوك لحضور حفل توقيع أول كتاب لى فى عالم الادب " لست الا بعض الاوراق" والذى يقام باذن الله يوم الاحد 5 ابريل 2009

المكان : مكتبة ديوان بمصر الجديدة
العنوان : 105 شارع ابو بكر الصديق مصر الجديدة – مقابل نادى ضباط الجلاء بمصر الجديدة
التاريخ : الاحد 5 ابريل 2009
الميعاد : 7 مساءا

فى انتظار تشريفك

العراف said...

كل سنه وكل ام بخير ويارب يديهم الصحه ويخليهم لينا ومايحرمناش منهم ابدا يارب اما عن الهدايا يا جماااااااعه انا اتخرب بيتى الشهر ده عيد ميلاد بابا وماما وكمان عيد الام والله انا بصوووووووووت الحقوووووووووووووووووووووووووووووووووووووووونى فلست بس بردو لو بموت هجيب لها هديه لانها ست الحبايب

Zika said...

كل سنه وامهاتك طيبه يا آبي
وربنا يكون في عونك انا عندي واحده مطلعه عيني
انتي عندك خمسه

dr.lecter said...

عيد فاكس وهمه الاهم والاخير ينفع المحلات وبس

احنا امه من المحبين للشاعرات والمزيفات

عيد واب ايه وام اييه


انا عندي اخدم امي كل يوم في صمت واخليها سعيده علي اني اجيبلها هديه في يوم زي ده

كفايه ان امي ترضي عني وتدعي لي وتنبسط لما ابوس ايدها



انا امي مش مثاليه ومش الربيرفكت وومن لكنها في نظري امي وبس امي اللي ماحبيتش حد زيها ابدا


امي وبس مش محجتاج اطلع في الفضاء واقل انت ياااض ويابت تعالوا اتفرجوا علي امي


جتنا نيله في تخلفنا بجد

micheal said...

هههههههههههههههههههههههههه..هو لسه فيه حد بيتفرج ع التليفزيون المصري
والله يا بنتي أنا شفت الواد أبومحشي ده صدفة في لحظة خطيئة لما ايدي جت علي ريموت التليفزيون والصراحة أول ما سمعته
قلت فيها نشيد إحماوي
كل سنة وال5 مامهات طيبين يا بتنجاني وعقبال ما أشوفك أم محتاسة ورا العيال وبتجري وراهم في الشقة بالمنفضة كده
:)
باي يا قمر

أ / أحمد عبد المنعم said...

بسم الله الرحمن الرحيم
دعوة عاجلة للزيارة
لزيارة مدونتى " أمــــى "
لرؤية هديتى لأمى فى يوم الأم
آسف لعدم التعليق على الموضوع الآن .

ماما أمولة said...

كل سنة وانت طيبة وامهاتك الحلوين طيبين

kochia said...

ياستي كل سنة وانتي طيبة
وكل امهاتك طيبين يارب

والحقيقة اخر البوست نساني اوله فمش هتكلم عن الاعلانات اياها عشان

المهم ماله الطقم ابو غطا زجاج
حلو
خليه بس يجي ويبقي يحلها ربنا

تحياتي

سومه...مجنونه فى بلد عاقل said...

اختصرى وقولى انك بنت الشعب
:))
ايه يا بنتى دا كله
هههههههههههه وقوس قوزح مامتك معنى كدا انى المفروض اقول يا عمتى عشان انا فى حكم مرات اخوكى
:)
ماشى يا ملاك يا غلبانه
عارفه فى روايه اسمها تاكسى السواق طالع بيقول لو مسك رئيس جمهوريه حيلغى الاعلانات ابقى اديكى اسم الكاتب ونعرف منه السواق دا فين ونرشحه :))
كل سنه وكل الامهات بخير ويصبر اللى معهوش مامته

سومه...مجنونه فى بلد عاقل said...

زودى على الامهات حماتك يا حلوه عشان دا اول المفتريات:))

وومن said...

انا فاكرة ان انا علقت علي البوست دة بس زيادة تأكيد ميضرش

بالنوسبة ليتوع بيرل دول انا الحمد لله مش قابلت الناس الهاطلة دي انا بشوف شوية ستات اخف شوية واطفال كميلة خالث وعسولة

عيد الأم بقي ياروحي علية اميارح كنت قاعدة مع ماما قاعدة عيد الأم انا والمزغودة الصغيرة وقالتلي حاجات ومحتاجات وعيطنا بقي ومسحنا في كمنا - لاء الكلينكس موجود بس كنا مكسين نجيبة - متفهمنيش صح
علي فكرة بتسلم عليكي وبتقولك مبتصليش ليه
قال يعني انتي اللي كنت بتصلي ( وش شرير )

بمناسبة بقي عيد الأم وماسورة المهمهات اللي ضربت وبمناسبة اني حتة واقعه منك ممكن اقولك كل سنة وانتي طيبة يا ....... :P

Amal said...

هههههههههههههههه
انا مشوفتش الاعلان بس انتى موتينى من
الضحك
انتى كلامك عشره على عشره بصراحه
وكل سنه وماما طيبه

الفاتح الجعفري said...

سلام الله عليكم ورحمته وبركاته
ربنا يبارك فيكم يازميلة المعارك
وربنا يحفظ والديكي ويبارك في والدتك
وكل عام وانتم بخير
واهم طاعة بعد طاعة الله عزوجل طاعة الوالدين
يعني احسن حاجة اننا نسمع كلام ماما
(:
بارك الله فيكم
وجزاكم كل خير

سمو الأميرة سارة said...

ههههههههههههههههههه والله انتي زي العسل يا آبي وجيتي ع الجرح

عامة يعني في مجتمعنا بيحصروا دور الزوجة والأم في أدوار الشغالة والمشكلة انك بتلاقى ستات كمان بتؤكد ع الفكرة دي وكانها مش شايفة فيها اي اهانة

ربنا يخليلك ماماهتك كلهم يا آبي يا قمر

اكييييييييييييييييييد ما بتجيبيش ليهم هدية عيد ام لو كنتي بتجيبى خمس هدايا كنتى اتبريتي منهم ههههههههه

همس الاحباب said...

كل سنة وكل الامهات بخير
وربنا يكون فى عونهم
ليهم الجنة بسببك يا بنتى
تحياتى

عبد الحميد محمد said...

اختيارك للموضوع في الصميم
و طريقتك اكيد متميزة بخفة دمها و اللي غالبا انتي طالعة فيها لست الحسن اللي هيا الست والدتك يعني

.
.

بس انا مش شايف ان فيه تهميش لدور الام و لا حاجة لسبب بسيط ان مش من مصلحة اي حد انه يهمش دورها
لو كانت التعليقات مرتبطة بالاكل فده طبيعي لانه اعلان غسيل صحون
لو كانوا مثلا جابوا جمال بخيت يعيد عليها كان هيقول فيها قصيدة عصماء و ده لانه شاعر
انا مش بدافع عن التي في لا سمح الله
بس بقول يعني اللي ممكن يكون حاصل

و كل سنة و الخمس مامات بتوعك طيبين

Son of Egypt said...

السلام عليكم

كنت حارم نفسى والله بغيبتى دى من خفة الدم دى

طبعا بضم صوتى لصوتك واقول لكل ام كل سنه وانتى طيبه
وخصوصا امى الحبيبه
الطيبه الحنونه اللى دورها اكبر من كده بمراحل ومش تاخدى فى بالك كل ده اعلانات رغاوى بريل
كل سنه وكل ام بكل خير

اعتزر عن التأخير عن الفتره الماضيه وانا عارف انها مش فرقت معاكى كتير
تحياتى ابى هانم

صاحب المضيفة said...

هو ده اعلام الريادة يا رحاب

ربنا يستر على الباقي من عقولنا ويرحمنا برحمته يارب



تحياتي ودعواتي

mahasen saber said...

كل عيد ام ومامتك ودوللى والجميع بالف خير وسلام


ومتنسيش تجيبيلى مكنسه ما انا ام برضه

كل سنه وهما بالف خير يا جميله

ReEm said...

لاش تحرق دمك

المهم كل سنة و امهاتك طيبيبين

و مامتي انا كمان و كل امهات العالم بخير
يارب

تامر علي said...

في أغنية بتهز مشاعري كل ما ييجي عيد الأم وبتخلينى مش قادر أمسك نفسي من فرط الرمان ... بتقول
قالولي قالولي ...قالولي الأبلوات
إن النهارده عيد ... عيد الأمهات
رحت وجت لماما تسع هديات
الأولى هاديهالها في عيد الدراجات
والتانيه هاديهالها في عيد الموتسيكلات
والتالته هاديهالها في عيد السيارات
والرابعة هاديهالها في عيد"التعلب فات"
...... الخ (أي حد ممكن يكملها)

فعلاً اللي مالوش خير في عمته ... مش هايلاقي جزمته:)

صوت من مصر said...

مش هقولك غير كل سنه ومامتكوامهات المسلمين بخير وسلام

شمس النهار said...

ماشاء الله كل الامهات اللي حواليكي مفتريين عليكي
ياعيني ياغلبانه انت
طب والله فيكي الخير انك قلتلهم كل سنه وانتم طيبين
بعد معاملت الزنوج اللي بيعاملوهالك دي
طب يا الخمس امهات انا بقه بقول لكم كل سنه وانتم طيبين ومستحملين ابي:)

زهرة الأمل said...

:D

ضحكتينى بجد

كل سنه وكل ام طيبه

وكفايه أنا هديه لماما

مواطن مصري said...

اسمة عيد الاسرة و ليس عيد الام الاسم اتغير
:)))

بسنت said...

كل سنه وكل امهاتنا بخير
عندك حق اللى مالوش خير فى مامته مالوش خير فى الاكل كله
مش البطاطس بس
ربنا يحفظلنا امهاتنا يا رب

وبالنسبه لقطاع الاعلانات فى التليفزيون
نقوله
وتعيش الحكومه

Appy said...

صيدلانيه طالعه نازله
===========================
ليه بس يا لولو انتى كمان كل سنه وانتى طيبه وجميله يا رب
وبعدين ما احنا اتكلمنا عن القافله وقولت لكى انا مجنوه اه بس بمزاجى مش غصب عنى الدور والباقى عليكوا اتجننتوا غصب عنكوا














قوس قزح
==========
ايه بس الدلع ده كله
تصدقى حلوه فكره الفازه والحله دى تيجى اجربهم فيكى ههههههههه

Appy said...

شريف
=====
اتشجع ايه هى حقنه لا فى الحاجات دى فى التأنى السلامه مقدرش اوعدك اوى بدل ما ادخل فى حيطه وش







بدراوى
==========
هو انا مش قولت محدش يطفيها انت بتطفيها طيب ماشى عقاب ليك هكرب الزراير بتاعت الراديوم ها بقى

Appy said...

فنون
=========
نيهاهاها لا شوفته امبارح لايف يا اوختى
ايوه عملت زيك كده مفيش غير بيبى كده كميله هو اللى نصفنا وطلع قال كلمتين حلوين
عقبال ما تبقى ام وتشدى فى شعرك وشعر الجيران








رئيس جمهورية نفسى
==================

ماشى يا محمود طيب والله راى بيطلع صح انا فى النهايه
وعلشان الكلمتين اللى فى الاخر دول مش هرد عليك واغسلك هنا ليك يوم
كل سنه وماما طيبه وترجع لنا باسلامه

Appy said...

اسامه عبد العال
==================
وانت طيب يا اسامه وماما طيبه وبخير








حاجات جوايا
==============
هو انتم عملتوا فريق طيب بيلعب فى نادى ايه بقى

Appy said...

حسن حنفى
==========
وجهه نظر برضه يا حسن ليه لا والله










رومانسى
=============
ايوة طبعا هما ماسكين فى كلمه احنا بنتحملكوا تسع شهور طيب ما احنا الاولاد بتحملهم العمر كله ايه العذاب ده

Appy said...

قلب ينبض بالحب
=================
وانتى طيبه يا قمر واكيد طبعا ان شاء الله










محمد عتلم
=============
اممممممممم مكنش يتعز عليك يا محمد دى بتتنسف تقريبا ماما مبتأكلهاش لنا وبتفرقها على الجيران شوفت الكرم

Appy said...

خيخه خوخه
=============
هع هع هتلاقيها بتطلع محروقه منه شوفتى بقى








مجداويه
=========
ما هو يا ماما ريا علشان انتى كلاشينكوف قولت اخد ساتر هو انا غبيه اعملها وش كده انا مستغنيه عن نفسى
بصى يا مانتى علشان قلبك يرتاح
يمكن انتى مش شايفه حاجه متغيره ملموسه بعينك او متشافه ما علينا يعنى
المهم ان فيه حاجات كتير فعلا انتى غيرتيها من غير ما تحسى ولا تعرفى
مش بالكلاشينكوف
هو اه انتى طالعه ليه عصبيه وانا اعصابى بتفلت ساعات بس عادى بقى مانتى هعمل ايه
على فكره لو انا مش متاكده من حبك ليه وخوفك عليا عمرى ما كنت اغير يوم حرف ولا فكر ولا حاجه علشان انتى وجهتينى ليه
انا عارفه انك بتحبينى وبتقنعينى يعنى مبتقوليش كده وخلاص لا عندك الحجه القويه كمان اللى بتقنعنى انا شخصيا لانى مش من الناس اللى بتقتنع بسهوله
وكل سنه وانتى طيبه وايدك بقى والكلاشينكوف ليعورك

Appy said...

مواطن مصرى
=============
يا رب كلهم بخير مصريه وغير مصريه كمان
وايه عيد الاسره ده
انا اعرف سكر الاسره بس انما عيد الاسرة لا جديده دى









فاتيما
=============
قلب الام كل سنه وانتى بخير وطيبه يا ام يوسف
والسنه الجايه نحتفل معاكى ومع يوسف بيه

Appy said...

سارة نجاتى
=============
اللعب باحلام الشعب والغريق بيتعلق فى مقشه
نورتى يا قمر وكل سنه وماما طيبه








احمد سمير
==========
الجديد انه طلع بسحنته دى فى التى فى يخضنا شوفت العبقريه

Appy said...

المينيماليزم
===============
دة نوع جديد من الاكتئاب ده
طيب عاوزة اجربه ممكن او سمحتى بس
علشان شكله نوع هايل بجد










احمد ابو العلا
===============
ده سؤال حد مش عارف قيمة البطاطس تعرف ان دى الخضار الوحيد اللى تقدر تعمله ست سبع اصناف
فرن ومقليه ومحشى ومخلل وسلاطه
يوووووا فاضيه انا بقى اعد لك الفوائد بتاعت البطاطس

Appy said...

ابو العريف
=========
كل سنه وهى طيبه وترجع لها بالسلامه يا رب






ابو حنف
=========
والله يا ريس انا بس بتخنق علشان بيقطعوا الافلام والمسلسلات ههههههههه

Appy said...

جنى
====
يا لهوى مقاطعه ايه بس يا حج انا متابعه بطلوا افترى بقى
بس الوقت ضيق انى اقعد اعلق عندى انا دى يا جنى متزعلش








مسدس صغير
=========
هى الفكره مش اختزال الفكره انه يبقى احتفال كبير على مستوى العالم بس

Appy said...

الطبيب اللى سماعته ضايعه
=========================
كل سنه وماماتك كلهو طيبيبن
وبعدين انا بفكر اتصل ببتوع الاعلانات اشتغلهم ايه رايك








الربان
==========
هى المشكله ان انا مش شايفه منتج عدل بقالنا فتره طويله
يعنى زمان كانتالمنتجات مهمه دلوقتى مهمشه
ميرسى لحضرتك ومنورنى دايما

Appy said...

لورانس العرب
================
ههههههههههههههههه
تصدق والله ليه لا طيب صحيح ليه الموضوع ده







سارة
=======
كل سنه وجدتك وماما بخير وربنا يخليهم لكى يا رب
معلش حاولى تمسكى نفسك يا قمر شويه

Appy said...

محدش بيموت
==============
ايوه ايه بقى البطاطس مش عجباك








الطائر الحزين
===============
وانت بخير

Appy said...

انجى
=======
ميرسى









العراف
==========
اممممممم انت جاى تستلف
لا العب غيرها انا فلست بدرى
كل سنه وماما طيبه وبخير

Appy said...

زيكس
========
ما كله محصل بعضه يا ابنى والله كل واحده بشخصيه
ربنا يخليها لك








dr.lecter
==============
لا هو مش عيد فاكس ولا حاجه
هو عيد الهدف منه تجميع العالم كله فى يوم يحتفل اى نعم هو الحب مش مقتصر على اليوم
بس شوف لما تجمع كل العالم على الاحتفال بيه يبقى ايه بقى
اه على فكره تخلفكم اللى بجد ده مش فى مصر بس لو انت تقصد كده
ده على مستوى العالم
يعنى امبارح كان طول اليوم فى الام بى سى 4 افلام عن عيد الام
اى خدمه

Appy said...

فيشو
=====
منفضه هو انا لسه هجرى
لا يا خويا فى اختراعه اسمه بلكون اللى هيضايقنى هطوحه منها على طول احنا بنختصر برضه









احمد عبد المنعم
================
اسفك معاك ربنا يرحم والدتك

Appy said...

ماما اموله
===========
كل سنه وانتى جميله وطيبه يا ام قلب حنين انتى









كوشيا
========
يا بنتى الورق احسن لسه هنغسل ونقرف نفسنا اسمعى كلامى بس

Appy said...

سومه المجنونه
==============
احم احم حماتى ايه بس فى الزحمه دى هى ناقصه
عارفه روايه تاكسى يا مصيبه لا تكلكى
انا عن نفسى هلغى اتحاد الاذاعه والتلافزيون









وومن
=======
وانتى طيبه يا ميرا
وانا شوفت البيبى ده والله هو اللى عجبنى
كل سنه وماما طيبه وانتى مطلعه عينها

Appy said...

amal
=======
وانتى طيبه يا جميله وبخير يا رب
نورتى








الفاتح الجعفرى
==============
يا دى النور بزميل المعارك منور يا كابتن وكل سنه وماما بخير يا رب

Appy said...

سمو الاميرة
===========
اجيب خمس هدايا ياااااختى هما اى نعم يستهلوا
بس بس بس يعنى مش هما يستهلوا وانا انتحر
كل سنه وماما طيبه يا سارة









هم الاحباب
===========
يعنى بعد ما عفوت عنك وبقيت اكتبك همس الاحباب تطول لسانك تانى
طيب اشرب بقى

Appy said...

عبد الحميد
=============
اهلا بيك وميرسى لكلامك
بس هو مش مرتبط باكل انا نقدى للموضوع ان لما حد يطلع فى التى فى وعلى فضائيه شوف كام حد فى كام دوله بيشوفه
يعنى لما يشوفوا كده يبقى ايه
ثم واحد اتكلم عن الاكل وواحد عن اى كلام
ومفيش غير طفل وواحده لبنانيه اللى طلعوا قالوا كلام حلو اوى اوى
فهمت قصدى فين
نورت يا فندم وميرسى لكلامك










Son of Egypt
================
ليه مش هتفرق معايا مين قالك ان كل حد بيدخل هنا مش بيفرق معايا وجوده بيتهيا لك والله بالعكس انا ببص على الناس دايما وبلتمس العذر للى مش بيظهر بقول اكيد فيه حاجه متقولش كده تانى
لو سمحت
كل سنه وكل الامهات بخير

Appy said...

صاحب المضيفه
================
دى الرياله يا انس مش الرياده
نورت يا انس الدنيا كلها








محاسن صابر
==============
ايه الام الرخمه دى مكنسه امممممممممم
طيب عنيه اول مقابله هجيب لكى مكنسه تجنن اشربى بقى المقالب اللى هتتعمل فيك

Appy said...

ReEm
===========
وانتى طيبه يا جميله وماما بخير انتى كمان






تامر على
==========

ههههههههههههههه انت هتنافسنى على الحكم بتاعتى ولا ايه كده يا تامركده هغتالك قريب

Appy said...

صوت من مصر
=============
وانت بخير وسلام يا رب








شمس النهار
==============
ليه بقى دا انا بلسم
دول فرحانين بيه علشان ذكيه طيب اساليهم كده من ورايا
وعموما هبقى احفظهم يقولوا ايه
كل سنه وانتى طيبه يا شموس سلمى على بنوتك كتير

Appy said...

زهرة الامل
===============
وانتى طيبه ووالدتك بخير









بسنت
========
الله يحرقهم بيعلوا عندى الضغط بتوع الاعلانات
كل سنه وماما طيبه يا بوسى

صريح أوي said...

هههههههههههه
من زمان مش ضحكت بالطريقة دي علي وصف عيد الام بالطريقة الراقية دي
عالعموم
كل سنة وكل أم بتحب وبتربي في خير وسلامة وحب وود وحنان
وربنا يبارك في امهاتك الخمسة
سلاااامي

GeHaD-----(male) said...

ايه البوست الجامد دا
عجبني صراحه بس اللي عقدني اني كل شويه افضل اقول ايه التي في دا
ياتكتبيها بالعنجليزي او بالفرنطاوي

تحياتي

شفقة هانم واحسان بك said...

خمس أمهات ؟؟؟
كل سنة وهما طيبين
وربنا يكون في عونهم جميعا
طبعا إنتي فاهمة ليه !!!

وعقبال ما يبقوا سبعة
آه ماهم قريب إن شاء الله هيزيدوا إتنين

أولهم حماة المستقبل
اللي هتطلع القديم والجديد
وتاخدلنا بتارنا منك ومن قللك
يارب عجل بيها يارب

والتانية هيا إنتا يا جميل
يا أبيضاني ياللي شبه مامتك إنت
إنت كده علشان خالية مسؤولية
بس من يوم ما هتجيبي أولاد وتبقي أم
وخصوصا بقى لو طلعوا دماغهم زي دماغك كده
مش هاقولك هيحصلك إيه
بالمختصر كده هتتحولي وتبقي شبه شفشوقتي
هههههههههههه
وربنا يجعل كلامنا خفيف عليها


تحياتي
إحســـان

اصحى يا مصر : اسلام ديو said...

ايه يا ابى
كل سنة وطنط طيبة
مفيش سؤل علينا كدة؟
تسبينى اطلع مرينا لتانى مرة لوحدى
طيب تسلمى يا ستى بس ابقى اسألى بس :d

سلامى

dr.lecter said...

اه تخلف طبعا عارفه لييه؟

لان احنا عايشين في مجتمع استهلااكي مادي زينا زي بقيه الخلق للاسف واللي بيكسب من وراي ده كله الشركات والاعلانات بالظبط زي الفالنتين موضه غبيه

طب ليه مافيش عيد الاب ولا عيد الجد ؟ ولا دول مركونين علي الرف

احنا لو عاوزين بقي نعمل فعلا عيد للام يبقي يتعمل كل اسبووع يوم واحد

مش مره في السنه


كل اسبوع نفسح ماماتنا نريحها نضحكها نزورها وعيد عليها

مش نظام زوروني كل سنه مره

أنا حر said...

كل سنة وكل ماماتك بالف خير
بس هو في حاجة غريبة بخصوص الاعلانات انا اخدت بالي ان في اعلانات طالعة في قنوات دينية عن هدايا عيد الام وبعد الاعلان بيبدأ البرنامج الديني الي بيحرم عيد الام لانه دخيل علينا من الاعياد الغربية وملهوش دعوة بالاسلام
ياترى نسمع كلام الاعلان ولا الشيخ اللي في نفس القناة؟؟؟
تحياتي

البحث عن أنا شىء جنونى said...

احساس الام طبيعى ميحسوش غير الام

وكل سنة وكل الامهات الجميلة اللى اتكلمتى عنهم بخير وانتى بخير وهنا وحصة دايما يارب :)

اصحى يا مصر : اسلام ديو said...

سورى يا appy
اصل التعليقات دخلت فى بعضها :d

ahmed_k said...

كل سنه وأنتي طيبه يا آبي
وكل سنه ومامتك بخير وسلامه
وكل سنه وكل الأمهات اللي ذكرتيهم بخير وصحه

gogo!sf said...

صح اللى ملهوش خير فى اهلة مالهوش خير فى حد مش مامتة بس صلحى المعلومة
رضى الوالدين مهم جدا
بيخلى ربنا سبحانة وتعالى راضى عننا

وكل سنة وكل الامها طيبين

تقبلى مرورى