عيد الام والتى فى الخزعبلى

كل سنه فى نفس ذات النفس يبدأ التى فى الخزعبلى بتاعنا اللى المفروض يتفجر من بدرى وبتوع التفجيرات يوجهوا نشاطهم ليه علشان يرحمونا من كميه العته اللى بتحصل عليه وعلى الفضائيات وهيئه الارصاد الجويه والمستشفيات فى تجهيز نفسها للحدث العظيم وهو عيد الام
ليه بقى التى فى بيطلع علينا باعلانات ليل ونهار اشترى خمس سحالى واكسب كلب هديه لعيد الام
اشترى مكنسه بالبطاريه واكسب مكنسه الساحرة الشريرة هديه لعيد الام
الادهى والانيل السنه دى بيريل الراعى الرسمى للاطباق والكوبيات عامل اعلان
وجاب شويه عيال سيس متخلفين علشان يقولوا كل سنه وانتى طيبه يا ماما
انا مش معترضه معترضه على الهطل اللى بيحصل
واحد شحط فى الجامعه طالع يقول انا امى بتعمل احسن محشى فى مصر كلها
على اساسا كل الامهات فشله
وبعدين هى دى الحسنه الوحيدة لامك علشان تطلع تقولها كل سنه وانتى طيبه
التانى يقولها انا مش هنسى يوم ما طلبت منك ملوخيه ونزلتى فى ساعتها جبتيها
ده بدل ما ينزل هو نزلت هى
والراجل الغلبان اللى طالع يقول لمراته كل سنه وانتى طيبه
يعنى التى فى بيجيب ناس بجد تكسف ومهمشه دور الام فى حله محشى وطبق ملوخيه وغسيل الاطباق
يعنى السيرفينت بتقوم بكل ده
هو ده دور الام
ده الجزء الاول ....

التانى بقى بعد ما نشوف الاعلانات دى طبعا النرفزه بتطلع والجو بيقلب زعابيب وده الجزء الخاص بهيئه الارصاد فاحترسوا الاقتراب منى فى الفتره دى بعد كميه الاعلانات
وبعدما تهدأ العاصفه بتنقل على المستشفى وتلاقونى بخرف مكنسه مكنسه اطباق طايره اطباق طايرة
انا نفسى التى فى وسى انس الفقى يرحمنا او يتفجروا

انا لو اعرف اللى بيعمل الاعلانات هربطه على العمود وكل يوم هضرب فيه رايح جاى واخلى العيال تقرقصه فى كل حته فى جسمه
ولو اعرف العيال السيس اللى بتوافق تسجل مع بتوع بريل هشربهم يريل بتاع الاطباق ده واخليهم يبقللوا

كأن التى فى متعمد فعلا انه يجيب ناس متخلفه يقولوا كلام متخلف
يا شوباب الله يكرمكوا اللى يسعده حظه يعنى مع انى مش بشوفها سعد اوى
ويطلع فى بورنامج يحاول يمسك كميه الهبل اللى بتقع علينا ولو الست المذيعه جامده اوى يعنى وانتم مش قادرين تمسكوا نفسكوا من النحنحه
يا ريت تنحوا النحنحه فى جنب وتشغلوا عقلكوا كسفتونا فى الخارج والداخل

فى النهايه

انا عاوزة اقول كل سنه وكل ام طيبه ودورها مش فى المحشى ولا الملوخيه ولا غسيل الهدوم دور الام اكبر بكتير

وعاوزه اقول للخمس امهات اللى عندى كل سنه وهما طيبين

ايووووووون مالكوا مذبهلين ليه انا عندى خمسه مش علشان بابا مزواج لا علشان انا بحب اجمع امهات
اول ام ...
مامى ست الحسن والجمال وعلى فكره ده اسم الدلع ست الحسن لان امى ماشاء الله عليها من صغرها كانت جميله وبيضاء زى القشطه طالعه ليه من يومها احم ..احم
بجد امى احلى الستات امى مربتنيش انا وتلاته اخواتى كمان لا دى ربت اخواتها لانها تانى واحده فى اخواتها وجدى وجدتى كانوا موظفين وهى اللى اتحملت مسئوليه اخواتها الاصغر وجدتى ما شاء الله ربنا يديها الصحه فرطت منها اوى ودبست امى
والادهى ان امى بمسئوليتها اتجوزت الحج والدى وهو اصغر واحد فى اخواته والمدلع بالقوى لاب شبه اقطاعى ( ومش عاوزة ضرب ونفسنه اغلبه راح فى الوباء يا هنادى) يعنى دلع وفلوس وجمال كمان فاكيد فى البدايه عملواجميع انواع الخناقات بس الحمد لله امى بجد ست بمليون راجل وطول عمر بابا مسافر علشان شغله وهى متحمله مسئوليه كل حاجه من بناء عمارة لمتابعة كل شغل بابا هنا وطول عمرها هتفضل ست الحسن والجدعنه كمان
وكفايه انى بنتها وهى طالعه شبهى شويه يعنى

كل سنه وانتى طيبه يا امى وبما انى ناويه اقرالك البتاعه ده هقولك متزعليش منى والله ساعات بتنرفز غصب عنى اصل مش منطقى يا امى يعنى تأخدى راى فى موضوع وتنفذى عكسه كل مرة كل مرة

طلب تانى كمان يا ريت بلاش تجيبى ليه طقم الحلل اللى بغطاء بيركس ده علشان انا ماسكه ديل قطه واكيد هيقع يدشدش وانا متنازله عن هديه عيد الام السنه دى او يا ريت طقم اطباق ورق اوفر برضه وميتعبش ايدى فى الغسيل
ايوه والله ماما كل سنه بتجيب ليه انا كمان هديه عيد الام طبعا بعد ما بتطلب هى هديه عيد الام ام بيروقراطيه فزيعه

الام التانيه ماما ريا او مجداويه

يا ماجى رغم انك كلاشينكوف موجهه بس بحبك والله ورغم انك عامله زى امى اللى قبلك دى بالظبط انك بتعصبينى وبتخلينى زى السمكه فى طاسه القليه بس بستفيد منك كتير

الام التالته دوللى قوس قزح ودى مانتى الصغيرة

يا مانتى خفى ايدك شويه من على الجرح بيوجعنى انا قولتها ليكى انك بتكملى مانتى الاولانيه وبتلاقينى لما اقول لا على حاجه بالك طويل وتكملى معايا وده بصراحه اللى مش عند مانتى الكبيرة لانها خلاص كنست عليا طريق المنصورة العريش من بدرى وادركت ان مفيش امل فى فردة الشوز المستوطنه فى دماغى

الاتنين الاخرنين
نانا جدتى والده ماما رغم الزهيمر اللى عندها وانها كبيرة فى السن بس حبيبة قلبى فاكرنى حتى لو طلبتها فى التليفون بتعرف صوتى وكلهم يستغربوا يقولوا لها اشمعنى دى تقولهم دى فرحتى الاولى لانى احم احم اول حفيدة ليها
والدلوعه بتاعتها كمان

الاخيرة بقى طنط سلوى خالتى

ودى القبل الاخيره من اخوات ماما واللى قضيت معاها كتير فى حياتى وكله بيقول عليه شبها حتى امى لما اعمل حاجه تقولى جتك القرف وانتى شبهها كده .... فاقعد اضحك علشان عارفه انها تقصد سلوى لان نفس التصرفات اللى بعملها سلوى عملتها بالظبط حتى ولاد سلوى بيغيروا منى ويقولوا لها اشمعنى دى اللى بتحبيها وحتى لو غلطت تدافعى عندها يا سلوع ربنا يخليكى ليه يا بطوط

وكل سنه وكل الامهات طيبين وبخير

كل سنه وكل ام فلسطينيه فقدت ابنها طيبه

وكل سنه وكل ملاحيس التى فى مشنوقين غرقانين محروقين قادر يا كريم

انا رايحه اشترى تورته واشد الرحال كام يوم مع ماما حد مش عاوز حاجه

كان معكم ابن بطوطه ابى هانم

حكمه الامبراطورة

اللى ملوش خير فى امه ملوش خير فى البطاطس المقلية