الشرطه لما تلبس طرحه

انا عارفه انى قاعده لوحدى اهوى هنا ومحدش بيقرا ليه ولا حد بيسمعنى بس عادى اهو بعمل اللى عليا

اولا الشرطه ايوه لبست طرح العادلى بيحمر عينه ويقول لمبارك انت من غيرى ولا حاجه

وادى اوامر للشرطه تقعد فى بيوتها

سؤالى بقى لكل شرطى ولا لكل ام ولا اخت ولا حبيبه حتى يا ريت تسألوهم قولوا لهم انتم بتشتغلوا عند العادلى وقولته له هو القسم ولا للوطن

كل الشرطه اللى قعدت فى البيت من راى تتخلع وتنزل تكنس الشوارع كل اللى ساهموا ان البلد تتحرق ينزلوا يشتغلوا بوابين دلوقتى لمحايتها دول عار على البلد اصلا

اذا كان العادلى ها يتحاكم يبقى كل اللى قعدوا يتحاكموا

العادلى مستكبر ودماغه جزمه عن مبارك

اللى بيحصل كان منظم جارتى بكلمها فى مصر والقسم على بعد 100 متر من البيت بتقولى القسم اتحرق الاول وبعدين هجموا على لابيوت بس احنا عندنا رجاله فى العماره انا بقولها دول لو الستات طلعوا عليهم ها ياكلوهم انا عارفه

والجيش نزل التجمع وبينزل فى اى مكان

المشهد التانى

قناه الجزيره اول يوم تعاملت مع اللى بيحصل على انه اتنين بيتخانقوا وطنشت

بعد كدا لقت الموضوع فيه سبوبه بدأت تزود لما الدنيا هديت بدأت تسيب صور وتقنع الناس ان فيه ناس فى الشارع على لارغم ان مكنش فيه غير قليل مع الجيش اللى بيحموا شوارعهم

متنقلوش كل حاجه عن قناه الفطيره اصل شعللتها دى اكل عيش

المشهد التالت

العربيه قناه العربيه فيها سم قاتل بتجيب ناس من بيوتها مستحميه وحاطه جل وتقولك انا كنت فى المظاهرات والناس اللى بتخرب لا الشرطه والامناء هما اللى خربوا لحظه انسحاب الشرطه الحزب الوطنى اتحرق

الموضوع منظم ججدا من العادلى بعد ما ادى اوامر بالانسحاب وانهم يسيبوا اللى فى السجون

قناه العربيه فيها سم قاتل

المشهد الرابع

القنوات المصريه اول يوم كانت بتدى للناس مهدئات لغايه لما وعيت للصح وبدات توعى الناس وتساعد فعلا لما جيرانى اتصلوا على المصريه فى خلال ربع ساعه فعلا الجيش وصل عندهم انا اللى خلانى اتصلت انى سمعتهم بيتكلموا فى المصريه

المشهد الاخير

انا مع عمر سليمان عمر سليمان مفيش حاجه تشوبه شفيق محترم جدا وسمعته حلوة

الوباش بتوع الاحزاب المعارضه اللى ركبوا الموجه زيهم زى البرادعى كل شويه يقولك نعمل حكومه وطنيه ودستور وقصص وكل ما المذيعه تسال طيب فين دول طيب سمى حد بيتهرب حاجه منتهى القذاره يعنى

راى مبارك اول مره يتصرف صح انه يعمل نائب ويعين شفيق لانه كدا او كدا ماشى لو مشى وساب البلد فى ايدين الوسخين الباقينن فعلا هتولع بجد اذا كان الاحزاب ببتخانق ما بينها وبين بعض داخليا علشان رئاسه حزب تفتكروا مش ها يتخانقوا على تفصيل دستور كل واحد على حسب هواهم وعلى رئيس

انا شايفه ان اللى احنا فيه انجاز نهدى علشان منبقاش عاملين زى تونس بقينا بنحتج لاننا محتجين

العالم كله عرف دلوقتى ان شعب مصر مش قليل واى رئيس ها يمسك هيبقى عارف دا

نهدى ونشوف بيوتنا ونتكتل ونحمى مصالحنا ومنسبش مخربين

فى النهايه دا راى انا شخصيا اللى مش عجبه مش مشكله بس يحاول يفكر بطريقه اهدى بس