انسانه بلا وطن


دخلت بلا استأذن الى عالم ليس له حدود لم تعرف نهايته ولا بدايته

رات فيه كل شئ جميل وقبيح

رات من يحب بصدق ومن يمسك بالماوس ليلقى بكلمات غزل هنا وهنا

ومن كتب النصيحه ومن طلب النصيحه

رات الكذاب والصادق

احست بالالم من اجل الاخرين

احست بالخوف يوما على صديقها

احست بالحنين لحبيبها

اكتسبت جرأه زياده على جرئتها

اوقعتها فى مشاكل بعض الاحيان ومواجهات كانت تأتي بنتيجه ايجابيه

واخري سلبيه عليها وعلى الاخرين

رات الان فى بعض الاوقات الاختلاف يفسد الاحترام بين الناس وبينهم وبين انفسهم

واوقات اخري تكتسب من الاختلاف احترام الاخرين وتزويد معلوماتها وتصحيحها

لم تخجل يوما ان تقول لا اعلم ولا اعرف الكثير

لم تخجل من برائتها فى رايها وقلبها

هى بنت عاديه ومصريه اووي

تقوقعت مره اخري

لتغمض عيناها لكي لا تري الجراح التى تنذف امامها

لم تسمح للدموع بالخروج من عيناها خوفا من الالم التى ستعانيه

جرت الى فراشها وحضنت قلبها وطبطبت بحنيه على نفسها

وقالت

يوما ستشرق الشمس على وطني يوما ساجد من احب

يمسك بيدي وياخدها لبر الامان

سمعت صوته يهمس لها

انا هنا من اجلك رغم وجود ما يشوب هذا الحب من الم

لم تصدق نفسها عندما رات تلميحاته لاخريات

فهناك منهم لم يعرف ما يدور بينهما

فالتمست له ولهم العذر

تقوقعت بداخل نفسها وانكمشت

كما تنكمش الطفله من والدها عندما برتفع صوته امامها

غاصت فى النوم بالرغم من الامها

افاقت على صوت

سيخرج العصفور من القفص

ستجدين يوما الوطن

انه بداخلك وفى عيونك التى دائما تداريها بالنظاره التى ترتديها

ستجدين وطن فى قلوب من حولك ومن يحبون هذا الوطن

ولكن سسيبقى السؤال

هل يوجد وطن ام انه وهم تعيشيه؟

هل ستجدي الحبيب ام انك تناشدين سراب

ولكنها قررت ان تخرج من القوقعه


كان معكم ابى هانم وهي تبحث عن وطن


ملحوسه:- انا من تبحث عن وطن انا من افقت يوما على تلوث وكرهه وحب وجمال وقبح وحنيه وقسوه
المقصود فى الكلام كله الوطن بس انا حساه انه الحبيب والوطن والحياه كلها



116 اخبط وقول رايك:

انسان وبس ! said...

آبى
انتى نسيتى حكمة البوست
وكمان المفروض تشغلى اغنية يعنى كلمة وطن مع البوست

بجد حاسس انك بتكتبى الموضوع ده من قلبك

جهاد خالد said...

ربما لا أخط حديثا الآن

فالدمع يغلبني

أردت فقط أن تعلمي أن لكِ في القلوب وطن

:)

Alkomi said...

هو في ايه يا رحاب ؟

حاسس ان الامور مش مزبوطة معاكي

من فترة كدة

يا رب خير

Mafrousa said...

ايه النكد العالى ده
ايه الحكاية؟؟
هيه الدنيا كده يا آبي
نفضل طول عمرنا ندور على مرسي نرسي عليه
ومش نلاقى
نفضل طايرين و محلقين فى السماء و نقابل ناس و نشوف ناس
فيهم اللى بنتعلم منه و فيهم اللى بيعلمنا و فيهم اللى بنحس معاه
بالراحة و الامان
و فيهم اللى نحس بقلق و توتر
ووسط كل دول نفضل ندور على القلب الكبير اللى ممكن يحتوينا
حلى الحضن الدافي اللى يحمينا و يحتضنا
على السند
و بنفضل هايمين لغاية لما نلاقيه
و ساعتها بيكون لينا وطن
الوطن تلاقيه مع الحب و الدفء و الاحتواء و الامان
وحنفضل ندور

بسمه عبدالباسط said...

كلماتك وراها حزن فيه ايه ؟

blue-wave said...

قريبا ستجدين الوطن الذى تحلمى به
فمن يتق الله يحعل له مخرجا

مجداوية said...

السلام عليكم

الانتماء والوطن ستجديهم اذا أوقفت البحث عنهم لأنهم بداخلك فنحن دائما نبحث بعيدا والأشياء أمامنا ولا نراها ,,
سيدنا على ابن أبى طالب قال ,,الفقر فى الوطن غربة
والفقر مش مال وبس لكن فقر مشاعر وأمان ورضا
وقال أيضا والغنى فى الغربة وطن
وبرضه الغنى مش فلوس وبس لكن غنى النفس والعزة والصحبة والصحة
ربنا أنعم علينا بنعم كتير جدا لو شفناها وحسينا بيها حنلاقى الوطن
انظرى الى داخلك ستجدى وطنك ,,المهم تشوفيها بعين الرضا والحمد
وحتلاقيه ان شاء الله

بس اظاهر الموضوع ده مكتوب وانت مدلدلة رجليكى من البلكونة مع فنجان قهوة محوجة ومظبوطة جدا لأن الكلام جميل جدا وحسيته منك أوى
وصلك كلامى على الياهو ؟؟
جالك كلامى

Eman Henaish said...

الله يا آبي كلماتك جميلة أوي وصادقة أوي
بس زي ما النجمة الصامدة قالت لك وطن في قلوب من يحبوكي

و علي فكرة يا آبي ما يوجد من قبح وكذب في الكون من أجل الاتزان الكوني

وعلشان لو ما كنش القبح موجود ما كناش هنعرف الجمال

(ان نقص الكون هو عين صلاحيته ، و لو أنه استقام لما رمي )

ولا ايه؟ :)

حنين القلب said...

يا آبى ايه الاحساس الجامد ده
يا حبيبه قلبى هتلاقى الوطن والحبيب ان شاء الله
بس الدنيا كده زى ما فيها الاخلاص والحب فيها الكدب والخداع بس يا ترى ازاى نفرق بينهم للاسف مش بنعرف الفرق الا بعد ما بننجرح اوى منهم

حبيبتى حاسه ان فيه حاجه وجعاكى والبوست ده صرخه احتجاجيه على شىء جواكى
كلامى صح ولا غلط؟؟
ربنا يطمنى عليكى يا حبيبتى

dr.Roufy said...

ايه بس يا آبي
انتي تقولي لي ابعد عن الكآبة..وتدخلي انتي فيها
:)
مالك بس يا بنوتة
كلنا هذا الرجل..المغترب
المتنيل على عينة
:((
كلامك وجعني لأني حساه قوي

قوي

كـــيــــــــارا said...

ايه ده في ايه يابت

قلقتيني ؟

بس هقولك حاجه وطنك هتلاقيه مش بكلام اي حد بالاحساس فقط

Abo 7anf said...

السلام عليكم
كل واحد ليه وطن
صدقينى ساعات بنبقى نفسنا فى حاجه وهى قدمنا
بس مبنشفهاش
ممكن كتير يتغدر بينا
بس المهم اننا نفضل زى محنا علشان الغدر بينا ميفرحش
البوست جميل
بس اتمنى انوا ميكونش عن حاله شخصيه
ولو كان كدا
ركزى هتلاقى وطنك

عُمر said...

أوك

بصراحة خايف أقول إن كلماتك تعبر عن الوضوح والشفافية مع النفس والكلام ده .. تفتكري إني بأجامل لأن المجاملة في المدونات حاجة تفرس فعلاً

وبالنسبة لأسئلتك

متهيألي المفروض إنتي اللي تدوري على إجابتها بنفسك

و

بس

ده أول تعليق ليّ هنا وموش عاوز يكون دمي تقيل

بس عموماً مبروك الخروج من القوقعة

وأتمنى إنك تكسريها كي لا تغريكِ بالرجوع إليها مرة أخرى

وبس

خالص تحياتي

عُمر

وبس

Soooo said...

لا بقى
اابي اللي انا اعرفها قويه

وعلى رأي المثل .. ياجبل مايهزك ريح


ربنا يلهمك ويهيئلك اللي فيه الخير ليكي دنيا وآخره




سلامووووووووووز

الطائر الحزين said...

لكى لا تأسوا على ما فاتكم ولا تفرحوا بما آتاكم

هكذا الدنيا

(ولكنها قررت ان تخرج من القوقعه )
(ولكنها قررت ان تخرج من الشرنقة )


لابد أن الخروج برفق حتى لا تصطدم بالضوء الشديد

Z_Diva said...

oh sweet apps, i really hope every thing will be just gr8, and u'll get all u wish for and even more :)

عبدالرحمن الشافعي said...

موضوعك جميل قوي ...

عجبتني فعلا ...

وبإذن الله هتلاقي الوطن إلي إنتي عايزاه ...وربما يرجع الوطن بتاعنا زي ماكان أيام زمان وأحسن كمان ...



كلمات أكثر من رائعة ...

تحياتي لكي ..
وتمنياتي لكي بالنجاح في إيجاد الوطن الجيد

سلامي ...

عبدالرحمن

ana ga3an said...

شوفي بالرغم من عيوب الوطن الكثيرة
الظاهر منها والخفي
وظلمة لنفسة قبل اي احد
بس انا متاكد انة بيحبك
ففي النهاية لا يقابل الاحسان الا بالاحسان
وان جار الوطن علينا لبعض الوقت فلنلتمس لة العذر
الف عذر

الكلام دة محتاج تتر رأفت الهجان ينزل وراة

صاحب المضيفة said...

رائعة تلك التدوينة بحق

سلمت يمناك ولمزيد من الابداع والتطوير

كل عام وانت بألف خير

محمد فاروق الشاذلى said...

لست وحدك التى تنتظر قدوم هذا الحبيب (الوطن) فكلنا فى انتظاره
يارب يعود وطننا إلى مكانته ومكانه بايدينا نحن

Empress appy said...

انسان وبس
==========

لا مش نسيت يا سوسه بس انا لقيت نفسى بكتب حكم لوحدياتى فى البوست فقولت ارحمكوا بقى هههههههههههههههه
وفعلا بكتبه من قلبى ومن قلب الليل







النجمه الصامده
===============
وحشتينى خالص
ويا رب نلاقى فى كل القلوب اوطان لينا تجمع كلنا
وسلامة عنيكى من الدموع

Empress appy said...

محمد الكومى
===========
لا يا ملك مفيش والله انا قرده اهو بس هو شويه حنيه وقولت فعلا نفسى اكتب اللى شوفته حوليه من العالم اللى احنا فيه وحال البلد اللى كل يوم مش عارفه رايح فين
انما انا قاعده على قلبكوا
وميرسى لسؤالك بجد








واحده مفروسه
==============
وحسه اننا بنلف فى دواير مغلقه مع اننا لو اتجمعنا على شئ واحد هنلاقى كل حاجه حلوة ما هو مش طبيعى ابقى انا بدور وانتى وغيرنا ومش لاقينا ما هو عندنا بس ليه مش بنتقابل
وبعدين ده مش نكد دى تهيس اخر الليل وقله نوم هههههههههههههههه

only spot said...

سلام عليكم
ازيك يا ابى يا رب تكونى بخير وكل سنه وانت طيبه بالرغم انها متاخر بس يا ريت تسمحينى

ابى كلانا يبحث عن وطن ولكن للاسف لا نجد الا اشلاء اوطان متناثره حولنا وبدواخلنا ربما لفقداننا كنز غالى اسمه الحب والثقه فى الاخرين بس لعنا نجد هذا الوطن يوما ما

خالص تحياتى لكى وبجد احيكى على صدق مشاعرك

Empress appy said...

bos bos
==========
حزينه على وطن حزينه على ناس مبقوش هما حزينه على جرح ناس كل يوم بينزف
بس هتعدى انا بس موجوعه
تسلمى على سؤال يا قمر بجد







blue-wave
==========
يا رب الاقيه يا رب
بس انا عارفه انه موجود جوانا يا دكتور
بس لو بصينا كويس اوى هنلاقيه
الحمد لله ربنا يجعلنا ممن يخشونه
نورت الكوكب كله تانى

Empress appy said...

مجداويه
========
على الرغم من انك من الناس اللى كانت بتحسسنى بالوطن وبعدت معرفش ليه بس مبسوطه من كلامك لانك قولتى اللى انا عاوزه اقوله كمان اننا فعلا لازم ندور جوانا علشان كمان نبقى ايد واحده ووطن واحد
كلامك باين اتنشل ابقى شوفى مين اللى نشله
وحشتينى اوى
وبعدين انا فعلا كنت فى البلكونه بس مش مدلدله رجلى مدلدله خيبتى منها علشان الهوا يبعدها عنى ههههههههههه
والنبى ما تغيبى تانى








ايمان
=========
وزى ما قولت لجهاد
يا رب نلاقى فى قلوبنا كلها وطن
وعارفه وفاهمه كلامك بس عاوزه اقولك ان ساعات الحاجات دى بتكتر وبتالم اوى اوى اوى
يالا هتعدى ميرسى ليكى يا ايمى يا جميله

Empress appy said...

حنين القلب
===========
احتجاج على البلد اللى مبقتش شايفاها عن بعد ناس بحبهم عنى
عن اختفاء الناس الحلوه اوى من حياتنا بدون سابق انذار
عن اختفاء قيم ومبادئ عن جرح حبيب وصاحب
يوووووووووا كتير يا حنين
بس سيبك اختك قرده وهتعدى منها بس حبيت اقول حاجه حساها نورتى يا حبيبه قلبى







د/روفى
========
مش كآبه قد ما هو برد دخل جوايا فجأه بدون مقدمات وبدن استأذان عامل زى بتوع قمل الدوله كده
فقولت اقوله لان ده احساسى ناحيه بلدى فبقى صعب اوى
نورتى يا قمر وهرجع اصدعكم تانى

Empress appy said...

كيارا
=========
انتى مختفيه فين يا خيارة هانم انتى
انتى لسه قاعده فى البلكونه مع العريس ولا ايه هههههههههه
انا كويسه وهيرجع الاحساس مع الوطن اكيد






ابو حنف
=========
عارف لما تفتح عنيك تحس انك مش فى بلدك هو ده بقى احساسى كل حاجه حلوة بتتسرق حتى العيد وفرحته بتاعت زمان اتسرقت
بس ايام وبتعدى
ومتخافش عليا
مش التركيز اللى هيرجع الوطن اهله اللى هيرجعوه
نورت يا محلاوى

Empress appy said...

عمر
====
مش عارفه ساعات بحب بلدى اوى وببقى شايفاها وساعات مش بلاقيها قدامى خالص ولا ناسها ولا قلبهم بقيت بشوف زحمه وزهق وخنقه
نورت الكوكب اول مرة واهلا بيك على طول





soooo
========
لما الريح تبقى قويه عليا يا سوو مقدرش اتحملها
لما احس انى غلطت فى حق نفسى يبقى مش هتحمل
لما احس انى مقدرتش اقيم حاجات قدامى ووجعت نفسى تانى
يبقى كتير اوى
لما اقوم الصبح اشوف ضباب قدام عينى وغيوم يبقى لازم اتهد واتوجع
بس هتعدى
نورت الكوكب تانى وميرسى لدعوتك










الطائرالحزين
============
انا مش فى شرنقه لانى مش فى بيات طول الوقت انا فى قوقعه بدخلها لما بهرب من الدنيا وبفتحها تانى الشرنقه لها ميعاد خروج مش بتحكم فيه
ومتخافش عليا انا لابسه نظاره ههههههههههه
وانا عمرى ما فرحت اوى ولا حزنت اوى
انا بس موجعه على بلد مبقتش شايفه اهلها

Empress appy said...

Z_Diva
=======
ام زعبولا اهو انتى من الناس اللى بتدينى امل فى الحياه الحلوة لسه لانى بحسك زى الطفله اللى بتتنطط فى كل مكان
نورتى يا ام زعبولا






عبد الرحمن (الشافعى)
======================
ميرسى ليك على ذوقك ويا رب نلاقيه ونتجمع وميبقاش حاجه بتفرقنا يا رب ولا مذهب ولا تطرف ولا ضيقه من بعض
نورت الكوكب ومبسوطه بوجودك

Empress appy said...

ana ga3an
==========
ااااه لو يعرف انا بحبه قد ايه بجد
مش هيبقى قاسى عليا اوى كده
وانا بلتمس له العذر لان عارفه ان فى النهايه مش فى ايده احنا اللى بنعمل كده
المشكله انى عارفه انه مش بيجور علينا بمزاجه بس علشان مليش غيره بعاتبه ونفسى اشوفه تانى قدامى بفرحه وبعيون حلوة
وبعدين ليه رافت الهجان ما تخليها ذئاب الجبل هههههههههههههه
نورت يا سيزر






صاحب المضيفه
===============
احرجتنى خالص
بجد ربنا يخليك وميرسى لذوقك

Empress appy said...

قلب مصرى
===========
يا ريت احنا اللى ندور عليه يا ريت ونتجمع تانى
نورت الكوكب دايما بكلامك







onlyspot
=========
شيمووووو وحشتينى خالص خالص
بجد كل سنه وانتى بخير ويا رب اشوفك قريب

انا من اهوى ومن اهوى انا said...

الحزن محاوطكى
وهمك تاعبكى
ولية موش قادرة تبكى

الأعيان خانوكى

سارقين طين أبوكى

لعدوك باعوكى ولإيد الزمن

باعوكى وشافوكى وهما بيدبحوكى

وضحكوا وفاتوكى وقبضوا التمن

عروكى فى ميدانهم ولا واحد أدانهم

وعلوا أدانهم وبقالهم جرس

جلادك محامى وحاميكى حرامى

وبإية ينفع كلامى يا ساكنة الخرس

الحزن محاوطكى وليـــة موش قادرة تبكى


افتكرت الاغنية دى لعلى الحجار من مسلسل النديم عن الوطن

تحياتى ليكى يا أبى

Anonymous said...

تحياتى لمن بكى حين احس بدق قلبه
وسلامى للقلوب التى عانت من وحده الانسان

Soooo said...

لما اقوم الصبح اشوف ضباب قدام عينى وغيوم يبقى لازم اتهد واتوجع
-----------
تتوجعي ماقلناش حاجه
انما تتهدي؟؟
ليه يعني؟؟
كل ضباب وفي اخره شمس

النور هاييجي
قولي يارب




سلاموووووووووووز

Anonymous said...

بقولك صحيح قوليلي ايه رايك فى الشكل الجديد للمدونه بتاعتى رايك يهمنى

مطلق said...

يعني ايه كلمه وطن

اكيد هو الامل و الامان و الحلم و الاهل و الاصدقاء و الطموح

وانا الحمد لله معنديش اي حاجه من الي فوق دي حاسبي علي نفسك لتبقي زيي

Ahmed Mohamed said...

رات الان فى بعض الاوقات الاختلاف يفسد الاحترام بين الناس وبينهم وبين انفسهم
واوقات اخري تكتسب من الاختلاف احترام الاخرين وتزويد معلوماتها وتصحيحها


فعلا سعات الواحد بيشوف انه صح والباقي غلط
مع ان ده هوه اكبر غلط

طب لو لقيتي بقي الوطن ابقي خديني معاكي
اصله وحشني علي راي نواره المهيسه

Fatma said...

كلنا نبحث

انا ايضا انسان بلا وطن

لمستيني اوي بصدق كلماتك يا ابي

Anonymous said...

إذا كان الأمس ضاع ..
فبين يديك اليوم وإذا كان اليوم سوف يجمع أوراقه ويرحل .. فلديك الغد ..
لا تحزن على الأمس فهو لن يعود ولا تأسف على اليوم .. فهو راحل

وعن تجربه ياابي متبصيش وراكي كتير
ارمي ورا دهرك

Ehab said...

بسم الله الرحمن الرحيم
الأجابه حضرتك تبقى تونس

وبلاش ابو ورده يا بنت انتي لحسن اقطعك حتت
البوست جااااامد قوي بس مش عارف ايه الحكايه كل المدونين اليومين دول او معظمهم جاي على بالنا كلنا نفكر في الناس اللي نعرفهم من المدونين وغير المدونين وعلاقتنا بيهم وفي رأينا في الأشخاص بصوره عامه جايز بقى بالعدوى

بس بجد بجد بجد ابي دي حد مختلف جدا وكلها مفاجأت كل ما تكون عنها فكره تلاقيها جواها الف مليون فكره
ساعات بحس ان احسن وصف ليكي انك مليانه بالحياه
بكل حاجه فيها
وهسميكي دنيا مش ابي

سلاااااااااااااااااااااااام يا بتنجانه
اخوكي ايهاب

مصــــري said...

آبي هانم

انتي انسانة لكن تمتلكين وطن.
وقلبك هو وطنك.
اسكنيه وأثق أنك ستجدين الراحة.

في كلامك شجن لعل السبب خير.

أسامة

مصعب رجب said...

كلمات رائعة
كل التحية والتقدير

Empress appy said...

انا من اهوى
===============
حلوة اوى عارفاها الاغنيه دى كنت بسمعها
مع انى مش من واه على الحجار
تسلم ايديك يا رب







اسامه
=========

ميرسى يا اسامه يا رب قلوبنا كلها تحس ببعض
نورت وانا رحت مدونتك والله قبل ما تطلب منى وعجبنى التصميم

Empress appy said...

sooo
========
اتهد من جرح اتجرحت من حزن جوايا
بس انا عندى امل ان الشمس تطلع والغيمه تتشال من قدام عنيه
وانا مليش غير ربنا اللى بلجأ له






كريم
=======
لاااااااااا انا لسه عندى امل وحتى لو وقعت شويه بقوم وانظف التراب من هدومى دا انا مصريه وبحبها
ومحتاجه حضن الوطن
عقبالك لما تشوفها بعيون وقلب حبيبه يا رب

Empress appy said...

ღღAhMedღ3LaMღღ
===========
الغلط انك تكابر فى الغلط وتقاوح ومتعترفش انك غلطان انا كتير بغير راى بسبب ناس
حاضر لو حطينا اديدنات فى ايد بعض كلنا هنرجع لنا الوطن وبتصرفتنا الصح هنرجعه
نورت يا احمد












فنون
=======

يا رب نلاقيه ونبقى فى حضنه وحنانه ليل ونهار
نورتى يا قمر

Rania Lelah said...

هتزعلى منى؟؟؟؟؟؟
اجمل بوست قرتهولك يا آبى
بجد رائع جدا احساس صادق و مشاعر بجد حقيقه اووى
دة غير طبعا ان كلامك بيوجع بجد

تحياتى

Empress appy said...

mayada
===========
عمرى ما بصيت يا مادى بالعكس المشكله ان اللى دلوقتى هو اللى صعب علينا نتحمله
بس هتعدى اكيد
نورتى يا قمر وصورة البيبى ماشاء الله كميله بوسيه ليه






الشنكوتى
==========
دنيا انا دنيا
اممممممممم لا انا فعلا حد عادى بس الافكار دى بتنطط فى دماغى وانت عارف فيها ايه
بس يا ايهاب انا مش بقيم حد انا بقيم حياتى كلها والوحد كحتاج ده كل فتره
نورت يا شنكت

Empress appy said...

مصرى
========
وقلوب الناس يا اسامه
هسكن لوحدى انا عاوزه الدنيا كلها معايا
نورت وانا كويسه الحمد لله





ابو اسامه
===========
ميرسى ليك خالص نورت

ana ga3an said...

نسيت
للى على راسه بطحه يشيل ايده من عليهاعلشان انا ناويه اعملها له حفره

طب والله ضحكت
شوية صغننين
ابتسامة كدة يعني
متهيصيش اوي

Empress appy said...

Rania
=========
ليه يا حبيبتى ازعل ليه
بالعكس طيب كويس انى كتبت حاجه عجبتك انا عارفه فيه ناس بتميل لده وناس بتميل للسياسه اكتر
عادى يعنى اختلافى بتنجان ههههههههههههه
والله كتبته من غير تفكير ولا ترتيب يمكن علشان كده طلع من قلبى
نورتى يا قمر

Empress appy said...

ana ga3an
===============
ههههههههههه طيب اعمل ايه دا انا لقيت ناس كتير عندها بطحات قولت اشغل شنطه المسعافات الاوليه وانظف لهم الجرح
واعمله حفره لمخلفات التفكير ههههههههه

وبعدين يا سلام لينا الشرف يا سيزر اننا نضحك بس اناعارفه انك بسببى بتقفش نفسك بتبتسم او تضحك
اهو خليت التركى
ينفش

!!! عارفة ... مش عارف ليه said...

آبي .. الحبيب هو كل الأوطان


تحياتي
وليد

حسن حنفى said...

ربنا معاها يارب

وياريت كلنا نكون زيها

وبالتاكيد هتلاقي الوطن في يوم من الايام

من الحق حضرتك ليكي تاج عندي

:d

اسف علي التاخير بس الدراسه بقي

دعواتك

أحمد القبرصي said...

الكل بلا وطن
أصبحن قرايب

حبيبـــــــة القمـــــر said...

يااااه يا ابي
شكلك موجوع اوي
كلامك يتحس اوي اوي
خليكي متمسكه باحلامك يا قلبي صدقيني هى الامل والنور لينا
دوام الحال من المحال
والجاي اكيد هيبقى احلى بس انتي متبطليش حلم

عاشقة القمر said...

هو في ايه مدنتك دي في الشطيان ههههههههههههههه كل مادخل مش بلقيك منزل بوست جديد لم ادخل لقي عندك تعليفيات كثير وانا الاخير هههههههههه انتي مابنيزل متي اول انا مش بشوف حاصل ايه هههههه شو هذا ليك فترة قالب نكد ان شاالخير كلماتك ورا حزن ان شاءالله اهتلاقي وطن
بس وطن هي محتجالكم اوي هي برضو حزين عايزكم تقفوا معاه لاب فرح مش اهدخل الا بيكم انتم بس شدوا حالكم رجعوا وطن زي اول واحسن كمان بس عليكم ان تحدتوا عشان ترجعلكم وطن وترجع كل الاوطان دوال عريبه
ان شاءاله اهتفرج قريب عليكنا بدعوات

ojg said...

ياخوفي يا آآبي
انهارده دخلتي في اللغة العربية
بكره هتروحي فين بس
:)
والله حاساكي بتتكلمي بلساني
و لسان بنات كتير قوي
انتي بتتكلمي بكام لسان يا بت انتي
:))
وبالنسبة للوطن
مممممم
نبقى نشوف الموضوع ده

مهندس مصري بيحب مصر said...

انتي بتتكلمي عن نفسك و تجربتك في التدوين و علاقتك بالناس
اكتر ما بتتكلمي عن الوطن يا آبي
أنا حسيت البوست ده كده
و إتأثرت بيه
عايزك تقري قرآن ياما زي رمضان كده و ربنا حيكرمك و يفك كربك إن شاء الله
و قولي دعاء فك الكرب
و يارب ما أشوفكيش زعلانة ابداً و يجعل ايامك كلها فرح و يهديكي لكل خير يا آبي يا بنت أم آبي
:)

هانى زينهم said...

البوست ده فى حاجات كتير مختلفة بس الحاجة الوحيدة اللى بتجمع بين المختلفات دى الافتقاد . الافتقاد لوطن وحبيب وده احساس غالبا معانا كلنا بس من وقت للتانى وبيروح وييجى بس هى مسألة وقت . اما التدوين فزى اى عالم فيه الحلو فيه الوحش فيه الجميل وفيه القبيح وحنا اللى بنختار نعمل ايه ونتعامل مع مين . حاسس ان دى مجرد خواطر اكتر منها احساس شخصى وانك اقوى من كدة .

عاشقة القمر said...

هو في ايه مدونتك دي في الشطيان ههههههههههههههه كل مادخل مش بلقيك منزل بوست جديد لم ادخل تاني لقي منزل بوست كمان عندك تعليفيات كثير وانا الاخير هههههههههه انتي بنزيل بوست جديد متي ولا انا مش بشوف حاصل ايه هههههه شو هذا ليك فترة قالب نكد ان شاالخير كلماتك ورا حزن ان شاءالله اهتلاقي وطن
بس وطن هي محتجالكم اوي هي برضو حزين عايزكم تقفوا معاه فرح مش اهدخل الا بيكم انتم بس شدوا حالكم رجعوا وطن زي اول واحسن كمان بس عليكم ان تحدتوا عشان ترجعلكم وطن وترجع كل الاوطان دوال عريبه
ان شاءاله اهتفرج قريب عليكنا بدعوات

امل said...

السلام عليكم آبي
بوست حزين بس حاسة ان الجو اليومين دول بيشجع على الحزن الرومانسي شوية ربنا يسعد قلبك يااااااااااارب ويبعد عنك الاحزان وتلاقي الوطن اللي قلبك يرتاح فيه

romansy said...

استفهام؟ وتعجب
وناس تنهزم
وناس تغلب
وناس تصدق
وناس تكدب
وافضل مستغرب
طب ليه كل ما اهرب
الاقينى اقرب؟

Unknown said...

آبي :)
اول مرة ازورك دي :)
آبي يا حبيبتي
الوطن كلمة كبيرة اوي
انا فهمت حاجات كتير من البوست لأني حسيتها
صعب تتقال او تتشرح في تعليق او في اي كلام
المهم
خدي بالك من نفسك يا آبي.

Asmaa mahaba said...

ازيك يا ايبى انا اسفه انتى عارفه ساعات ببقى غبيه بس انا والله مكانش قصدى ازعلك فى ردى انا كنت برد على حد تانى مش انتى
اما حكايه حلكلك لكاليك كانت تهريج والله بس انحشرت وسط خناقه:((
بس متهيالى مفيش وطن
على فكره كلامك جاى ع الجرح عندى وفى وقته
ساعات بحس مش عاوزه اشوف حد ولا اكلم حد ساعات حتى بقعد يوم واتنين متكلمش مستحقره تفكير ناس كتير من جوايا واحيانا مستحقره نفسى وساعات مستخسرانى وساعات مستخسره غيرى
ييييييييييه حكايات
اختك سومه وانا اسفه لو زعلتى
سلام

kochia said...

حساس ومعبر
وساعات الحاجات المعبرة اوي بيكون فيها جزء من التجربة الشخصية
ارجو انك تلاقي الوطن بشمي بدون سحب

تحياتي

وجهة نظري said...

عارفه نفسي في إيه؟ نفسي أمسك كل الدنيا واحد واحد وأطبطب عليه وأطمنه إن فإن مع العسر يسرا - إن مع العسر يسرا

كفايه، فتحتي السد إلي كنت كاتمه

الميكروباص said...

انتي مالك اليومين دول كده؟؟؟

Anonymous said...

آبي

الله يسامحك

وجع تاااااااااني على وجعي

: ((

سبهللة said...

يا ستى بكرة ربنا يرزقك بالوطن اللى بتحلمى بيه
مافيش حاجة بعيدة على ربنا

tamer.sala7 said...

هو حصل ايه في العيد ؟؟؟

بجد مستغربك شوية في الفترة دي
يعني حتي اسلوبك في الكتابة بقي غريب ؟؟

في ايه ؟؟

الـسـيـدة نـون said...

مش حلوة اللغة العربية معاكى
وانا بتنرفز لما اشوف غلطة لغوية

خليكى فى العادى بتاعك

وبعدين انتى مش قلتى ان البوست اللى فات مالهوش علاقة بيكى


بصراحة مش حاسة انك بتتكلمى عن الوطن انت بتتكلمى عن حاجة تانية خالص


وحياة والدك يا شيخة ما تكتبي لغة عربية تاني

سلام
اختك خيخة

قلم رصاص said...

أبي بجد كلامك جميل واحساسك مباشر

وان شاء الله تتلاقي مع الوطن المنشود

تقبلي مروري

ميرا ( وومن ) said...

آبي

ساعات كتير بقف قدام كلامك وابقي مش عارفة ارد اقولك عندك حق ولا بتقسي علي نفسك ولا وجعك واجعنا

بتوه في معاني الكلام واللي ورا الكلام

حد فاهم حاجة حد حاسس حد شايف حد سامع
اهي دنيا وعايشينها نقلب فيها صفحة نهار ونستني في الليل تاني نهارد

دايرين من غير ما نقف ونسأل فين الوطن

هو الحبيب يبقي الوطن ولا الوطن هو الحبيب

ولا احنا عايشين مستنين وجوانا الأمل

يااااااااااااه ده احنا في الآخر طلعنا بلا وطن

تحياتي

الدفاع said...

ياضهر مين يسندك؟؟؟
وانت الضهر وانت السند؟؟
بتفتش عن ضهر ليه
هو انت افتكرت انك
ممكن تتسند؟؟؟؟
وطنى وطنك كله موجود
ومش فى دي قلة العدد
بس اللى هنا وطن مكسور
وطن مدبوح
وطن مالوش وطن
وطن محتاج نركب له وطن
وللاسف حبك مش هايعدله
كمان حبه مش هايعدلك
ومش هاقول ازاى نعمله وطن
اصلها مش بالقواله ولا بالخطب
ولاحتى بكلمتين شعر وزجل
دى بالاتفاق على الجهد والعمل
اوعاك تحلم يوم بوطن
لحد لما السند يتعدل
ولحد لما الجحور ترجع ضلمه
والنور يمشى جنب الامل
هاتفيد بايه ترفع ابو ورده
وتحارب حشرات الوطن
ماالدنيا ضلمه ودى للحشرات
الف وطن
لما النور يطلع هاتبقى الجحور
للحشرات هى الوطن
ويرجع للوطن سنده
لااااء هايرجع للوطن ....وطن

محمد فوزي said...

تريدين من الوطن مثلي ومثل الجميع أن تشعري معه بالألفه والأمان
فالوطن هو الاحتواء والاحساس بالأمان
وكم هو قاس أن نفتقد هذا الشعور داخل الوطن فتصبح جدران حوائطنا هي اوطاننا أو ربما نختزله في صورة أقرب إنسان وربما تضيق الصوره اكثر لتكون جدران قلوبنا هي فقط ذلك الوطن الذي نشعر معه بالإنتماء , وكلما فقدنا الامان اكثر كلما انكمش الوطن اكثر وتقوقعنا داخل انفسنا اكثر كما تصفين حالتك بعض الأحيان ,,
ولكن عندما يحدث هذا لا بد ان نعلم اننا بذلك ليس فقط نفقد الطريق الى الوطن ولكن ايضا نحرم الآخرين من اوطانهم , نعم فكما نشعر بان الوطن احيانا يتجسد لنا في عيون شخص وعبيره فنحن ايضا لبعض الناس اوطان وعلينا ان نختبأ قليلا لنقوى ونستقوى ثم نخرج من جديد للبحث عن الوطن والمشاركه في رسم تفاصيله

آبي
اكثر من رائع هذا البوست

تحياتي

Empress appy said...

عارفة ... مش عارف ليه
========================

بتكسفنى ليه طيب
ما انا عارفه
بس بس لازم انا وهو نبقى فى وطن واحد وبلد تحبنا
كل سنه وانت طيب مع انها متاخره











حسن حنفى
==========
لا خليك فى الدراسه ربنا معك يا رب انت وكل اخواتى الصغيرين اللى زيك

Empress appy said...

احمد القبرصى
===========
اهلا بيك فى العيله انضم
هههههههههه
نورت اول مرة






حبيبه القمر
============
الاقيش معاكى حبل اربطها جنبى الاحلام دى عاوزة تهرب بس متخافيش هقفش فيها
نورتى يا حبيبه

Empress appy said...

عاشقه القمر
=============
ان شاء الله كلنا هنلاقى
اما عن البوستات معلش هو حسب ما بيطق فى دماغى بكتب منورانى دايما بجد








ogj
=======
وزة انا بتكلم بكل السنه العالم ههههههههههه
يا بنتى لغاه عربيه ايه انتى هتشنعى عليه ايه الكدب ده بس
الوطن هو الاهم يا وزة صدقينى لو لاقيناه هنلاقى نفسنا

Empress appy said...

مهندس مصرى
==========
التدوين هو اللى خلانى عرفت اللى بيحصل فى البلد اكتر هو اللى خلانى اهتم بالناس اكتر
واحسن اكتر انى مفتقده الوطن
بس انا كويسه والنبى يا خويا لا تكلق
انا زى القرده ومش حزينه اوى
نورت يا هندسه









هانى زينهم
=============
صح يا هانى هو فعلا افتقدنا لحاجات كتير بحييك انك فهمتنى صح
وانا عارفه ان كله فيه الحلو والوحش

Empress appy said...

امل
=======
وطنى هو مصر هو بلدى
انا مش حزينه بس اضايقت شويه وخلاص هفك هفك
نورتى يا كميله





رومانسى
==========
علشان منقدرش نبعد كلنا فى مركب واحده بس
جميله كلماتك

Empress appy said...

قهوة بالفانيليا - شيماء علي
=============================
اهلا بيكى وتنورى فى اى وقت وفى كل وقت
والحمد لله انه وصل لكى كلامى
سعيده بوجودك







سومه المجنونه
=============
تصدقى انك عبيطه فعلا انا ازعل منك يا مجنونه انتى
لا طبعا ايه العبط ده
انا عارفه ان الموضوع شديد عندك شويه فعادى اهدى يا حج وروق كده بدل ما احتل الاوضه بتاعتك وانتى فاهمه

Empress appy said...

kochia
==========
يا رب كلنا نلاقى ده
وميرسى ليكى يا كوشيا ولرقتك








وجهه نظرى
==========
مش عارفه اقولك ايه بس الوحيد اللى تنحت قدام تعليقه لانى حسيته فعلا من قلبك
ربنا يخليك لينا
يا رب

Empress appy said...

لورانس العرب
===============
حبه هدوء مش اكتر
من بعد العيد بعيد حسابات كتيره فاللى بيجى على بالى بعمله
وبقوله بس
انا كويسه وقرده وهرجع اناكف فيكم تانى








Bannoura
===========
اسفه يا قمر
تعالى اقعدى فى الصف جنبى وندلدل رجلينا فى الترعه هههههههههههههه

Empress appy said...

سبهلله
=======
فى ظل العهد المبارك الجميل جمال معتقدش يا بنتى ربنا يستر








تامر صلاح
==========
من سنين كنت بفرح فى العيد العيد ده حست ان كله اكتئاب وكان عادى حاولت اسرق الفرحه حتى معرفتش حتى الناس بقت بتضحك ضحكه صفرا

Empress appy said...

بنت خيخه واى كلام
==================

اصوت واجيب الناس تشهد على دماغك اللى مزنوقه فى حته وحشه
خيخه ركزى
البوست ده عن الوطن انا مبقولش كلام مرتين
غير كده انا فعلا مليش علاقه بالبوست اللى فات زى ما فهمتك فى التليفون
يا حجه وشرحت لكى كل حاجه ولا انا بشرح لكى وانتى مركزه فى حته تانيه
غير كده انا مبغيرش كلامى يا قله
اخيرا انا مكتبتش ولا حسيت انى بكتب لغه عربيه فصحه دى لانى مبعرفش اصلا
بس عموما بما انك خيخه الزمخشرى ابقى صححى لينا يا ستى وتعالى على نفسك
بوسى شريف واضربى نفسك على بال ما اشوفك







قلم رصاص
===========
ميرسى ليك ويا رب كلنا نلاقيه

Empress appy said...

وومن
=======
عرفتى تقولى اللى كنت انا عاوزه اقولك
انتى فعلا بالف عقل بجد
نورتى يا عقل الكوكب الجميل






الدفاع
=========
جبت الاخر فى دى
دى بالاتفاق على الجهد والعمل
اوعاك تحلم يوم بوطن
لحد لما السند يتعدل
كده ارجعك مستشار تانى ونخلع لقب كابتن

Empress appy said...

محمد فوزى
==========
انت برضه مصمم تتكلم لغه عربيه يا دكتور
ماشى
بس اللى احلى من البوست كلامك بجد


نعم فكما نشعر بان الوطن احيانا يتجسد لنا في عيون شخص وعبيره فنحن ايضا لبعض الناس اوطان

حلوة اوووووووى وصح
نورت وميرسى ليك

momken said...

سيدتى
ليس الوطن هو المكان الذى نحيا على ارضه او نقيم عليه او نولد عليه

انما الوطن هو المكان الذى نعيش فيه
ونحيا داخله ونولد على يديه

الوطن هو الذى يسكننا
الذى يمنحنا ويرعانا

اختارى وطنك ياسيدتى فالوطن ليس دين يجب ان نولد ونموت عليه
واختيار الوطن ابداً ليس كفرا

البوست جميل ومؤلم جدا

تحياتى

الميكروباص said...

وده اللي احنا عاوزينه
ارجعي للنكف تاني
اصل مخبيش عليكي
الكلام المؤثر ده انا ماليش فيه - يمكن معنديش دم مش عارف

Anonymous said...

عم تبحثين آبى؟
عن الوطن؟

الوطن هو حيث كل محبينك

لو ان كل الذين يحبوك وتحبينهم سافروا كلهم الى سوريا .. ستحسين بالغربة فجأة .. وستودين الذهاب فورا الى هناك حيث تعود اليك السكينة والرحمة والهدوء

فماهو الوطن؟

الـسـيـدة نـون said...

وعندك واحد شبشب أبو وردة
لأبي هانم بتنجاني
لضرب المدعوة خيخة فوق دماغها المصدية

أيييييييييييييوة جاااااااااااااي

Anonymous said...

يااااااااااااااااأبي
مش عارف اغير اللون

Empress appy said...

momken
===========
بس بلدى هى وطنى وبحبها ومش بحس غير بيها
ميرسى لكلامك الهادى ولذوقك
ولنصيحتك






لورانس
=========
لا انت مش معندكش دم بس احنا من كتر الصدمات بنقوا معلش
حاضر هخليك تنكش شعرك وتجرى على الكورنيش قريب ههههههههههه

Empress appy said...

شريف
=======
انا مختلفه شويه الوطن هى بلدى اللى اتربيت فيها وعشقتها وحبتها
اللى مستنيه حبيبى فيها وطنى هو مصر اللى سرقوه الحرميه
وطنى هو بيتى اللى فى مصر
طنى هو حبيبى المصرى برضه اللى بيحب مصر
وطنى هو انتم المصريين اللى بيحبوا مصر
ربنا يخليك وسطنا على طول يا رب







خيخه يا خوخه
=============
لا يا خوخه ابدا ما عاش ولا كان ولا اخواتها اللى يعمل كده
ابووردة ده للحشرات الضاله يا حبيبتى انما انتى اختى مينفعش
بس انت ساعات دماغك بتتزنق كده مش انتى اخضر وباستك برضه هههههههههههههههههه

mohamed ghalia said...

بجد إنتى إحساسك عالى قوى ربنا يزيدك يارب
بس مش عارف إيه حكاية مسحة الحزن إلى فى كتابات المدونين كلهم فى الفترة الأخيرة
ياريت تشرفينى فى مدونتى ناوى أكتب موضوع عن الحزن ده
كل سنة وحضرتك بخير

الـسـيـدة نـون said...

هههههههههههههههههههههههه
ههههههههههههههههههههههههههه
هههههههههههههههههههههههههههههه

ايوة فعلا انا ناسية انى بأستك وأخضر من فوق

معلش اعذرينى الأستك كان قافش على الجمجمة

ههههههههههههههههههههه

Empress appy said...

mohamed ghalia
==================
الحزن عندي مرتبط بحبيبي وبلدي اكتر لو تابعت مجونتى هتلاقينى مش حزينه لان اللى زي لو ساب نفسه فى الحون هيجيله اكتئاب بس مرحله وهتعدي وعدت بيكم طبعا مستنيه موضوعك








خوخه خيخه ام استك
==================
ههههههههههه النبى انتى سكر مقالب هبقى اجيب واحد برباط وعليه كلمات متقاطعه وحليها بقى يا خالتى الا انا مش عارفه احلها لدلوقتى يخرب بيت اللى اخترعها اجيبه لكي تحليها هههههههههههه

ابراهيم بكر said...

الله على هذا الكلام المؤثر انا بحب الاسلوب الحزين فى الكتابة (ليس المتشائم)

تحياتى لكىخالص

mohamed ghalia said...

appy
متشكر جداا على كلامتك الرقيقة
ويارب موضوعى القادم يعجبك أنا هكتبه إهداء لكل أخوانى وأخواتى من المدونين إلى حاسسس فى موضوعاتهم بنبرة حزن وألم

Asmaa mahaba said...

هههههههههه قريتى فيها اديهم اصدروا قرار ببقائى فى اوضه الجنينه ومصادره غرفه النيل لصالحهم ههههههههه
حضرى الجيوش للغزو واعلان الانقلاب على خالتك ام سومه

Empress appy said...

hinger
=======
الحمد لله عمري ما كنت متشائمه هههههههه ولا عمري هعملها
نورت الكوكب








محمد الغاليه
============

ربنا يكرمك والله منورنى اقعد بقى فى الكوكب العب مع خرفانى واقعد على النهر شويه

Empress appy said...

سومه
=====
هتلاقيها قفشتك وانتى بتعكسي ابن الجيران اللى فى البر التاني اللى بينك وبينه خمستاشر كيلو ده ههههههههه
اصل انا عارفاكي ههههههه واو فكره الكافيه ابو زحاليق خافت لتعمليها بس جاهز يا ريس انا جاي
سلمي عليها وبوسيها ليه كتير بوسااااات كبيره وقولى لها وحشتنى

Zika said...

جديد شوية الموضوع ده عليكي
مش واخد منك عالنكد
بس تعرفي انك ليكي في النكيد يا ابي والله
برافو عليكي
كل سنه وانتي طيبه

mohaawad8 said...

دي مش خرافات
دي حاجات جوانا كلنا
منا اللي شايفها
و منا اللي اتعمي عنها

لكن اكيد
في ناس شافت النور تاني بكلماتك

لانها اليوم جبال تضرب في القلوب و العقول

مش هطول في الكلام لان كلامك يكفي اي كلام

ابو اعصار said...

قديما قال احمد مطر نحن الوطن !
من بعدنا تبقى الدواب والدمن
نحن الوطن !
إن لم يكن بنا كريماً آمناً
ولم يكن محتوماً
ولم يكن حُراً
فلا عشنا.. ولا عاش الوطن
الوطن مو شرط البلد اللي انت تحمل جنسيته بل البلد الذي يحميبك ويعطيك الامان
كل سنة ووطننا بخير
وانت بخير

سارة درويش said...

آبي خطر في بالى سؤال لما قريت البوست وقريت اللى انتى كاتباه تحت الصورة اللى في الجنب .. هو انتى علشان كده عملت كوكب آبي .. علشان يبقى كوكب بقوانينك ونظامك يمكن تحسى فيه بأمان ؟؟

محمد حمدي said...

عجبنى بجد خلطك بين فكرة الحبيب والوطن والفضاء السيبرى

مش بعيد عنك كتابه جميله وقريبه كده لان ما خرج من القلب اكيد هيوصل للقلب

تحياتى

مـحـمـد مـفـيـد said...

ممكن يكون اول مره اعلق عندك
بس انا متابع المدونه من زمان
أحيكي علي أحساسك بالبوست
سنظل نعيش ونحيي داخل هذا الفلك حتي يحدث التغيير
وقريب هذا
فكلما اشد الليل سوداً جاءت اشراقه الفجر لتقضي علي عتمته
دمتي بخير

ahmed_k said...

بالصبر وبالأمل ستعثرين
على هذا الوطن
وطول ما إحنا بنلجأ إلى الله
فربنا لن يخذلنا أبدا

وأول ما تلاقي الوطن قوليلي
علشان أنا بدورلك أهوه
فأول ما تقوليلي لقيت وطني
حبطل تدوير

ربنا يوفقك للأصلح دايما

في أمان الله

mohamed ghalia said...

لا زلت فى إنتظار رأيك فى موضوعى الجديد

الجواز و سنينه said...

يعنى انتى عامله appy planet
و بتدورى على وطن
طيب نعمل ايه احنا الغلابه بقى
بس لو لقيتى الوطن اللى انتى عايزاه
ابقى قوليلنا
يمكن نيجى نشاركك
اهه حتى نبقى جيران

Empress appy said...

زيكا
========
يعنى قولنا نعمل نيو لوك هههههههههه
نورت يا زيكس






mohaawad8
==========
ميرسى لكلامك ربنا يخليك يا رب
ومنورنى دايما

Empress appy said...

ابو اعصار
===========
لا انا وطنى اللى اتربت فيه وهو برضه اللى حبيته
كل سنه وانت طيب وبخير






سمو الاميرة ساره
===============
صح يا سارة انتى فهمتى صح انا عملت الكوكب ده علشان رافضه اللى بيحصل فى بلدى ونفسى اعمل عالم خاص بيه واجيب فيه كل اللى بحبهم
منورانى دايما يا سمو البرنسيسه

Empress appy said...

Mohamed Hamdy
===============
ده خارج من معاميقى
كل سنه وانت طيب ونورت






محمد مفيد
==========
اهلا بيك اول مرة تعلق ومنورنى دايما كحد بيقرا ليه بس
وميرسى لكلامك وذوقك

Empress appy said...

ahmed_k
=========
طيب طالما بتدور النبى لادوخك واخليك كده حتى لو لقيت هههههههههه
ربنا يسعدك يا احمد ميرسى ليك







الجواز و سنينه
==============
اهلااهلا ما هو ساعات بنزل من الكوكب واروح على الارض اتفقد حال الرعيه ههههههه
تعالى عيشى مايا فى الكوكب

عمرو said...

دورى حواليكى
مش يمكن فيه قلب بينفتح لك شويه بشويه و عاوزك تسكنيه و أنتى مش واخده بالك ؟
أصل القلب برضو ممكن يكون وطن
صدقينى

Share |