كدب منعكش



زمان مَاما كانت تقول ليه اللى بيكدب بيروح النار وكانت قربتنى من ولاعه علشان تعرفنى النار دى مؤلمه قد ايه دلوقتى بقى ومع التطور الطبيعى للحياه الغلط اللى عايشنها اللى بيكدب بيستعطف قلوب الناس واللى بيكدب بيقى طيب ومحبوب واللى بيكدب بيروح مارينا كمان
بصوا بقى انا يمكن اوفر شويه فى الموضوع ده انا مبعرفش اكدب ومبعرفش اتعامل مع حد بيكدب حتى لو مكدبش عليا انا شخصيا يعنى لو راح اشتغل حد غيرى هتقولوا ليه عادى طالما مش بيكدب عليكى هقولكم لا طبعا لان المبدأ واحد اللى يكدب على حد من السهل انه يكدب عليا والكدب بيضر سواء ماديا او معنويا
لا وايه طلع مبررات للكدب هايله واحد بيكدب علشان يستدر عطف الناس باى مصيبه باى اشتغاله دى قطتى وقعت من الدور الرابع دا انا نزلت لقيت البواب مش راضى يقوم يقف انا اتكعبلت فى حرف السجاده صوباعى الصغير طلعه له توأم
اى كلام علشان تحس انه مقهور ومظلوم تقوم تهتم به
هو يا عالم الاهتمام بالشخص مينفعش اللى فى المصايب والله انا فى حياتى ناس حياتهم عاديه جدا جدا ومهتمه بيهم اوى وبحبهم كمان يعنى اللى بيعمل كده عمره ما هايلفت انتباهى واحد تانى تلاقيه واحده ادته شبشبين على قفاه يقوم يقعد يقولك دى بتتلزق فيه وبتتصل وهتموت عليا وبترن ليه خماشر الف مره فى الدقيقه انا طبعا بقلب زى الضفدعه اللى عنيها طالعه لبره من كلامه
طيب يا حج ازاى يعنى والبنت واضح انك مش فى دماغها لا وايه يفسر اى تصرف بعيد عنه انها تقصده هو
طيب ده تسموه ايه بجد
ولا النوع اللى يغيظ اكتر متسالهوش فى حاجه خالص ويجى يقولك دا انا بعمل وبعمل وبقدر وبشتغل تقول الله ايه الناس اللى زى الفل دى واول استشاره هبله هايفه فى المجال اللى بيقول عليه تلاقيه وقع زى الجردل واحتاس وبقى شبه الفأر اللى طالع من حله خضار سخنه والمشكله انه من جهله يتنرفز عليك طيب ده برضه اسمه ايه هى الناس دى مش حسه ان كدبها منعكش ومش متساوى واى حد يقدر يكشفه بسهوله وان الحكايات لازم يبقى فيها لخبطه مهما ان كان عامل سيناريو جامد برضه لازم ديفوهات
الانيل بقى واحد تروح تساله على واحده يقولك دى دى وحشه وبتخرج وتدخل على اعتبار ان دلوقتى الدخول والخروج عيب وبتلبس جينز وبادى وبينتقد طيب يا حج والنبى مش دى برضه اللى انت بتمشى انت وغيرك وراها فى الشارع وتبقى هتموت علشان بس توافق تغسل لها الاطباق اللى فى المطبخ او تشيل لها الشنطه بقت وحشه ويع دلوقتى وفى مصلحتك تبقى حلوة وكميله وست البنات ويبقى عندك استعداد تمسك لها الشوز بتاعها
طيب اعمل ايه طيب فى الناس دى تقولوا ليه عادى هتلاقيه فيه حاجات حلوة
لا انا معرفش بقى الا الكدب ده انا مش بحبه ولا من ستات تدعى اى كلام ولا رجاله ومقدرش اتعامل معاهم حتى لو فيه مميزات الدنيا والاخره لا برضه مش هتعامل انا حتى ببقى خيبه لما بحاول اكدب وبعد ما بقول كلمتين على بعض اقوم قايله للى قدامى انا بكدب صح يقعدوا يضحكوا عليا انا ممكن اسكت او اقول وانا مالى وساعات لسانى بيفلت واقول الحقيقه ايوووووووووون انا لسانى فالت منى وبعترف اى حد بيكدب على حد وانا عارفه الحقيقه مش بسكت بقول على طول فانا بحذر اهو محدش يدخل يسالنى فى حاجه انا بكرهه اللى بيكدبوا وبكره الحكومه علشان هى كمان كدبها منعكش فى كل حاجه ومش راكب مع بعضياته خالص بجد انا مش عارفه اتاقلم يمكن العيب منى معرفش بس اكيد فى ناس كتير زى صح انا لو كدبت بضايق وبتنرفز جدا وبيبان عليا كمان وممكن اقعد اعيط والانيل ان الناس التانيه مش بتنسى الكدب اللى قالته بتفضل فاكره هى قالت ايه انا زهقت
حد زهق ولا انتم عادى طيب قولوا العيب فى مين بعد اللك ده كله


ومن امام مارينا نقلنا لكم حالتى بعد العيد اللى اتسرق من مصر خلاص ابى هانم كعب الغزال

حكمه الامبراطورة
بعد ما كان بيحجل زى الغراب لبس جزمة و شراب

108 اخبط وقول رايك:

هانى زينهم said...

المسألة يا ابى متشابكة شوية . اولا بالنسبة لموضوع الكدب الخاص بالبنات ده فده مرتبط بمرحلة سنية معينة اللى هى المراهقة انما الراجل لما يكبر ويعديها لابتفرق معاه بنت ولا غيره و بيعقل الا فى حالات نادرة . انما الجزء التانى من البوست مش كدب اد ماهو ازدواجية فى المجتمع بنعيشها كلنا تلاقى الراجل هيموت على هيفا مثلا انما لو مراته عملت زيها هيولع فيها احنا كدة يعنى المسألة اكبر من الكدب حبتين وليها دعوة بظروف اجتماعية ونشأة واحيانا من النضج ان الواحد يتعامل معاها على انها مسلمات لانها مش هتتغير .
تقبلى مرورى وتحياتى

الطائر الحزين said...

كلنا فى العيوب نسبح
وما اتحمله من شخص ما لعيب فيه لا يتحمله غيرى وما تتحمليه أنت لا يتحمله غيرك

لانه لا يوجد انسان مثل الاخر

Unknown said...

هههههههههه

انا علي فكره برضه مبعرفش اكدب و بتدب

و بقول الحقيقه و لو كدبت

بتبقي حياتي متلخبطه و بكره نفسي

و لو كدبت دلوقتي حالا بعد دقيقه تلاقيني بعترف بالحقيقه

لحد ما بقيت أتعب بجد و بقيت أريح نفسي و مكدبش .. انا هوجع قلبي ليه !!

Unknown said...

اه صحيح نسيت أقولك متكدبيش يا آبي و متحاوليش تتأقلمي .. خليكي زي ما انتي.. و الله الصدق منجي

حاولي بس تتحاشي اللي بيكدبوا دول عشان اللي بيكدب ممكن يعمل اي حاجه

بدليل ان المؤمن ممكن يبقي زاني ممكن يبقي سارق لكن استحاله يبقي كداب

أعتقددي كفايه اوي

ياللا سلام

ست البيت said...

ايه العيد المزحلق والاسطباحة الزرقا دي يا آبي؟
ايه اللي حصل بس عشان كل دا ؟ يا بنيتي الكدب دا عادي في بلدك ...يغني ينفع الريس متقال يطل عليكي الصبح ويقولك في ازمة عيش ولا بنزين ولا نيلة زرقا ؟
لأ لازم يقولك كله تمام ويحذو حذوه -حلوة دي- ؟ كل من الباشا رئيس وزراء خربستان ..ووزير صناعة ضياعستان ...ووزير تجارة حرامستان
وووزير مواصلات حوادثستان...
حتى نصل للموظف الغلبان ..ايون بتاع فوت علينا بكره ...ولازمن هو كمان يكدب عشان الباشا المأمور قالوا كده
طبعا دا مش صح ولا انتي غلط ولا حاجة
بس بعض الأخطاء بقت مألوفة لدرجة بعيدة يعني خدي عندك مثال صغنون قوي واحنا بندرس تاريخ مصر اكتشفنا أول مرة في حياتي أن شجرة الدر أسمها شجر الدر مش شجرة ودا شيء يفرق في التاريخ قوي
ايه اللي حصل ؟ الناس فضلت تقول عليها كده كنوع من الخطأ الشائع ولما تحبي تصححي لحد يقولك يا عم قول يا باسط
يعني العيب مش فيكي خاااااااااااااااااااااااااااااااااالص
العيب في النظام حضرتك
العيب في الناس اللي بتكدب ومش بس كده لأ وكدب منعكش
بصي في مثل دايما اقوله ع الحكومة
إن كنت كداب ..أفتكر....
يا عيد سعيد بلاش مبارك احسن فارس يطق ولا حاجة

Anonymous said...

بصي الكدب نوع من انواع تعويض النقص وده ممكن يكون فى مليار حاجه فى شخصيه الانسان وكلنا بنكدب على فكره بس بدرجات متفاوته فى اللى بيكدب على الناس وفيه اللى بيكدب على نفسه وعايز اقولك ان اللى بيكدب على نفسه اخطر يعنى مثلا لو بحلم بحاجه مستحيل تتحقق ابقى بكدب على نفسي فى بقي الكدب الاهبل اللى قصدق عليه اللى هو بتاع انا لا اكذب ولكنى اتجمل وده بتاع ناس معندهش اى ثقه بنفسها وحاسه انها اقل من غيرها وبالنسبه لموضوع اللى بيشوف واحده يعيب عليها وهو هيموت عليها فده نفاق وقصر ديل
وحمدالله على السلامه

قلم رصاص said...

هههههههههههههههه

بوست هايل جدا جدا جدا
عارفه بجد يا أبي والله كل كلمة انتي قولتهيا بجد والله من غير كدب ولا مجامله انا بأيدها ومقتنع بيها.. دا انا اساسا كان في نيتي اكتب حاجة زي كده بس مكنتش مقرر يعني

المهم

الكدب بالنسبة لي شيئ مكروه جدا جدا..ورغم انه يقال عني في بيتنا على الأقل اني أحيانان صارم ولي شخصية وبتاع يعني..هههههه..إلا اني لو حاولت أكدب ببقى مكشوف أوي لأني بفشل في اني أكدب.. لأني باختصار مببقاش مقتنع بإني أكدب .. ببقى بكدب على مضض يعني ..مين مضض دي..هههههههههه

وعجبني اوي الحتة اللي بتقوليها بتاعة التلاكيك دي عشان حد ياخد باله من التاني..فعلا منتشره جدا..هو صحيح يعني لازم البنت الا اذا انقذها من كارثه.. أو هو يحبها أما يحس انها أعلى منه اجتماعيا ..مثلا يعني

فين البساطة والبراءة والمثاليه
أعتقد الحاجات دي رغم ندرتها يا أبي إلا انها مازالت مووجودة صدقيني

عموما كل سنة وانتتي طيبة

تقبلي مروري

romansy said...

دايما الكدب مش كويس سواء كانت الكدبه
كدبه بيضاء
او حتى فوشيا
الكدب كدب
والصدق صدق
ودايما زى ما بيقولوا ان الصدق بينجى صاحبه

حسن حنفى said...

اللي يكدب علي غيري لو عرف وقدر هيكدب عليا واللي بيتعود ويكدب مره واتنين وتلاته مش بيبطل كدب وبيفضل طول عمره كداب

"عبير النجار "نيجار said...

ابي حبيبتي
الموضوع ده هيخليني اشد شعري والله المشكله اني اول ما شتغلت عرفت ان شغلي بيتلخص في قضيه او عريضه يعني شكوي المواطنين او الموظفين في الدوله يعني القضيه عندي بتتكون من شاهد او شهود ومتهمين اول حاجه اتعلمتها ان الشاهد لازم احلفه اليمين يعني يقول والله العظيم اقول الحق وطبعاً بيتثبت ده في المحضر ولما سألت ليه الشاهد بس اللي بيحلف مش المتهم كمان قالولي انه اكيد هيكدب علشان يدافع عن نفسه وعلى رأي المثل قالو للحرامي اكدب قال جالك الفرج المهم ياستي الاول كنت بحلف في ناس والاقي في ناس بيبقى الصدق بينط من عينيهم و بيقولوا اليمين قبل ما خلص جملتي وناس بيحلفوا وهما راسهم في الارض وعينيهم مش عايزه تواجهني وناس أول ما يعرفوا ان فيها حلفان يقولولي احنا هنقولك الحقيقه بينا وبينك بره المحضر وجوا المحضر هنقول كلام تاني علشان ما نتإذيش وانتي من كلامنا هتعرفي توصلي للحقيقه طبعاً بلاقي ناس ييجوا يشهدوا بالكدب ومنهم اللي دقنهم لحد بطنهم وعلامه الصلاه والسبحه في ايديهم واتاريهم علشان هم المتهمين الحقيقيين طبعاً كنت بتصدم قوي واقولهم ده انتوا حلفتم يمين الله تخافوا من البشر وما تخافوش من ربنا طبعاً بقيت اقبل ما احلف اليمين افكر الشاهد اللي قدامي ما تنساش ان اليمين ده هتتسأل عليه قدام ربنا وانت مش قد عذاب الشهاده الزور عند ربنا في ساعات كلامي بيـأثر في ناس وناس بيبقوا بجحين طبعاً لا ارادياً بقيت اشك بس برضه بقيت احس بالحقيقه بجد يا ابي بحسها في صوت اللي قدامي ، ويمكن كل اللي بيشتغلوا شغلانتنا فيهم حته الشك بس انا الحمد لله بفصل شغلى عن حياتي والا كنت هبقى في عذاب صعب انك تشكي في اللي حواليكي معلش يا ابي طولت عليكي يا حبيبتي بس انتي اللي جيتي على الجرح وكل سنه وانتي طيبه يا قمر تحياتي

"عبير النجار "نيجار said...

ههههههههههه
ابي حبيبتي القلوب عند بعضيها انا رجعت المدونه لقيتك سايبالي تعليق
والله فرحت قوي وعلى فكره انا بعشق السفر وذيك بجيب خرب الابره عن المكان اللي عايزه ازوره من النت بجد ايه التوافق ده تحياتي

seven said...

اكيد ربنا برده ليه حكمة فى موضع الكدب يعنى ربنا كان حاطط الكدب عشان
نستخدمه الاستخدام الصح
اللى هوه عشان نصلح بين الناس المتخصمين مع بعض وكده
اللى هوه الكدب اللى ربنا محلله
بس الناس ساقت فيها وبقت تكدب على مزاجها وعموما الكدب ده نوع من انواع الانانية يعنى اللى بيكدب ده بيكدب عشان نفسه
مش مهم بقة الناس الباقية ديه
حتى لو هتضر مش مشكلة
اعتقد لو حد مش انانى هيبقة عنده الكدب ده مش من اساليبه
عموماً
ربنا يحفظنا جميعا

alshared said...

ازيك يا ابي

كل سنه وانتي طيبه

بالنسبه لموضوع الكذب فده بقي حاجه عاديه جدا في مجتمعنا

كله بيكذب علي كله
مجتمع عنده بارانويا

المشكله هنا ان أحنا جزء من المجتمع ده

شق القمر said...

قالوا عنى فى صدقها خشونه تزعج المنافقين فيتهمونها باللؤم والخبث والبلبله


انا كمان شايفه ان الكدب المنعكش = نفاق

بس انا بعترض على فكرة انك لو تعرفى الحقيقة وحد بيكدب على حد تقولى ... لانه مش فى كل الاوقات مطلوب تتدخل كده وتخبط فى الحلل زى ما بيقولوا :)

لازم نعرف سبب الكدب الاول وخاصة لو مش يسبب مشاكل

كل سنة وانتى طيبة آبى

وكده احنا هنحسد
مارينا .. طب عبيلى شوية هوا من عندك :))

Alkomi said...

الإدعاء

للاسف آفة اجتماعية جديدة تضاف للآفات المتعددة في مصر

و الله انتي يا ابي جبتي المفيد في الكلام و للاسف لاول مرة حاسس اني مش هقدر اضيف في الكلام عشان كدة سايب كومنت كاثبات حضور ليس الا لاني ماعنديش كلام اقوله ولا يمكن عشان لسة صاحي من النوم؟
عموما ابقى اقرا اخر النهار يمكن الصبح لسة ماجمعتش

Asmaa mahaba said...

يا سلام يا جدع انا التعليق الستاشر وتقدم احق للبت سومه خطيبه بطيخ بيه كعب الغزال
وبدانا نقوم ونفوق م الغيبوبه يا رجاله
فاصل ونواصل

Asmaa mahaba said...

يييييييييه اسكتى يا بت يا ايبى يا اوختى انا بقى قابلت حد كان كدا بعيد عنك الشر معجنه كدب اتحداكى لو مسكتى ليه كلمه بيقولها صح مش كدب
المصيبه انهم مش مقتنعين انهم غلط والمصيبه الانيل ان البعاد بححه ومفيش حيا ولو واجهتيهم بكدبهم بدا ما يعتذروا يقولولك
انتى عرفتى منين ..؟؟ مين قالك؟؟؟
كل سنه وانتى ايبى
لى عوده اخرى

Asmaa mahaba said...

والله يا بنتى الواحد لما ييجى يعيش مود الكابه شويه ميستحملوش ويرجع تانى زى ما كان فرفوش انا عارفه انتى تقصدى مين وغلطتك انك قولتيلى وانا لسانى بيلعب وحروح اقول لبطيخ ايبى بتنجانى بتتكلم على................. .
ولا بلاش ربك امر بالستر

Asmaa mahaba said...

اوعى تكونى تقصدينى عشان بقول فى بطيخ والبطيخ موسمه خلص انتى عارفه ان هو الوحيد اللى بيصبرنى على الدخول فى مستنقع العنوسه
اسكتى يا ايبايه امبارح دخل عليا وفى ايده مفتاح جاجوار ويبوس رجلى وانا راسى والف سيف 127 يعنى 127 تقولى ايه مبحبش الاحجام الكبيره فى الموتسيكلات
بقولك ايه خدى الجاجوار وهاتى بطوط

Asmaa mahaba said...

اه عاوزه اسالك سؤال مهم جدااا العربيه اللى صورتها محطوطه بتستخدم انهى معجون بالظبط
........
اه معلومه صغيره احيانا فى ناس بتكون مريضه نفسيا
ساعات بتتخيل حاجات حصلت وهى محصلتش
فمتظلميهمش
او بيكون كدبهم مرضى
............
انا قابلت ناس كدا

tamer.sala7 said...

هو ايه اللي حصل في العيد ؟؟؟

المهم
بصي يا ابي انا مقتنع بأن اللي
بيقول انا مش بكذب ده كذاب لأن مفيش حد مش بيكذب وممكن يكون بيكذب علي نفسه ويصدق كمان وده بقي منتشر دلوقتي وفي كمان اللي بيكذب من أجل الكذب يعني بيكذب علشان هو عايز يكذب بس مش علشان يخرج من مصيبة مثلا ولا علشان يقضي مصلحة لا ده بيكذب كدة لوحده
ومش كل الكذب ممكن نقول عليه كذب يعني غير ان الكذب مشروع في ثلاث حالات بس
1- الكذب في حالة الحرب
2- الكذب للصلح بين المتاخاصمين
3- الكذب علي الزوجة

و حاجات مثلا بتتعمل علشان نخلص حاجة ومضطر اعملها وهي اصلا مش ح تأذي حد بس اللي حواليكي هم اللي بيخلوكي تعملي كدة
زي مثلا لما روحت اعمل شهادة مزاولة نشاط للشركة بتاعتي في الغرفة التجارية الراجل قفلت مع اهله اروحله الصبح لقيت نفسي غصب عني بقوله يا ابني انا وكيل نيابة وبخلص ورق لأخويا ومش فاضي اجيلك ازاي بكرة ؟؟؟
مجرد ما قولت الجملة دي لقيته بيقولي طيب ده علشان خاطرك انت بس يا باشا و الورق بتاعي خلص تفتكري انا كدة ابقي كذاب مثلا ؟؟
ممكن بقي تقيسي علي كدة حاجات كتير

معلش طولت شوية

اهو ده عيبه said...

كل سنة وانتى طيبة ياآبى
حنعمل ايه هى العيشة بقت كلها كدب فى كدب
وعلى رايك كفايه عليهم يروحوا مارينا
سلام

جبهة التهييس الشعبية said...

بصي بقى
اللي يكدب لازم تفضحيه فضيحة المظاهر يوم طلوعه ع المعاش
هو عن ذات نفسيته مش ح يبطل كدب
بس على الاقل ح يعرف انك فضيحة ولسانك زالف فيتقي شرك
عشان كده انا ما احبش حد يقول لي ح اقول لك بس ما تقوليش لحد

لا انا باقول لحد
ما تقوليش اذا كنت مش عايز حد يعرف
عشان بس ما تدخليش نفسك في لت وعجن الناس

الدفاع said...

اللهم احفظنا جميعا من الكدب ومن كافة العيوب

AHMED SAMIR said...

اولا كل سنة وانتي طيبة
ثانيا انتي مش عارفة ان احنا في زمن الكذب ولا ايه؟!!!!
دة حتى الصدق الزمن دة بقى دمه تقيل فعلا
انتي ناسية ان الكل في الزمن دة بيكدب من اعلى رأس لاقل واحد في البلد دي؟
دة حتى الجهة الوحيدة اللي كنا بنثق فيها انها ما بتكدبش اثبتت الاسبوع اللي فات انها اكبر فشارة (راجعي حدوتة اطلاق سراح الرهائن)
الحاجة الوحيدة اللي ما بتكدبش الزمن دة هي القطنة بتاعة مدام نظيفة
ثالثا انتي فين؟؟ما باشفكيش في المدونة عندي على الرغم اني باستمتع باراءك وتعليقاتك القيمة
في موضوع لسة نازل عايز اعرف رأيك فيه
تحياتي واحتراماتي

Anonymous said...

مارينا ؟
انت صح ياآبى ..اخطر حاجة هى الكدب .. الاصل بره ان كل شئ صدق .. والاستثناء هو الهزار والضحك

عندنا الاصل هو الهزار .. ولما نعوز نكلم جد نقول شوية جد ياجماعة كفاية ضحك

لايمنع اننى شخصيا أؤمن بالكدب الابيض .. الذى لايضر احد ويخفف من وطأة الحقيقة .. مش معقول واحد فى الانعاش واروح اقول لوالدته الحقيقة عشان تقع من طولها

الكذب للتجمل كما يحكى احسان عبد القدوس هو ايضا وجهة نظر اخرى

يبقى فى النهاية اننا لنا عقل نميز به .. ونستطيع به ان نقرر متى نقول الحقيقة .. ومتى نؤجلها لمصلحة اهم

تحياتى لموضوعاتك المثيرة

احمد قطب said...

السلام عليكم

موضوعك جميل وفى كتير من الناس دلوقتى

بيعتمدوا على الكذب مهما كان الكذب فلابد من

الانسان الكذاب ده ينكشف الكذب بتاعه

ما فيش أحسن من الصدق والصراحه فى كل شئ

تحياتى ملك المدينه

Z_Diva said...

appsy welcomz backz after the stolen 3eed -eh r2yk fel7ta elsakalans de-

ana now 3aysha be rule, in ay 7ad y2oly 7ga, ayan kan el7ad da, b7ot fe baly ino 50% sade2 we 50% kdab, we ahy 7ga we sm3tha we 5las, y3ny la bsd2 7ad wala akdeb 7ad -shofty elnsa7a b2a :D-

3ammatn ybnty elly by7war da w7ed mreed, we bykon 3ndo morkabt na2s we low self steam at least da mareed we loh 3zro, lkn el7koma b2a m3rfsh btkdeb leh elsra7a, ymkn 3ayna ro5ra ??!!! -hawdy nfsy marina dew2ty ana, kol da 3shan msyftesh elsanady :S-

enty elkbeera ya apps, best of luck ya bnty, best of luck.

Alkomi said...

مساء الخير

فوقنا و خدنا الدش اليومي و نقدر نعلق دلوقتي

بصي يا رحاب
غالبا ده بيبقى مرض نفسي و بيكون صاحبه عاجز عن فعل حاجات يامة في نفسه فبيعوض ده بالكذب و الادعاء

كمان ساعات بيكون صاحب الادعاء عنده معاناة من الاهمال فبيخترع حكايات و حواديت و يلت و يعجن عشان يلفت نظر الناس ليه و يخش في دايرة اهتماماتهم بالعافية

و ده في كتير من الاحيان يستحق مننا الشفقة و مساعدته اكتر من نقده

بس تحديد معاملته يتحدد على معدنه
يعني لو ادعاءاته دي مابتسببش ضرر للناس يبقى نقف جنبه و نحسسه انه موجود في حياتنا و ليه مكان فيها و ان اهتمامنا بيه موجود حتى لو هو ما دورش

احنا برضه مهتمين بيه


صدقيني ده علاج بينفع و انا شخصيا جربته مع ناس من النوعية دي

اما النوعية التانية بتصطدم غالبا برغبتي السادية في كشفهم و احراجهم علنا

قشطة

سلاموووووووووووووووووووووووز

بالمووووووووووووووووووووووووز

صبرني يارب said...

الصح هو الصح يا آبي

ما تكدبيش وما تصدقيش الكدابين
الرسول عليه الصلاةوالسلامقال لا تصدق كاذبا ولا تكذب صادقا

وقال يظل الرجل يكذب حتى يكتب عند الله كذابا .
على فكره انا كمان مش باعرف اكذب عارفه ليه
لان السبب فى الكذب مثلا انك ترضي حد طيب فى حد يستاهل ترضيه وتغضبي ربنا ؟؟؟
وكمان مش باطيق الكذابين
انا كانت بتجيلى شغاله ظروفها وحشه جدا زي كل الشغالين وانا كنت باعطف عليها
لكن هى امعانا فى الغباء هى كانت مدمنه كدب لاستدرار عطف الناس
وكل شويه تطلعلي بحكايه وانا اتأسى عليها وكام يوم كده واكتشف كدبها
ماهو الكدب مالوش رجلين
حقيقى مشيتها وقلتلها انتى بتكذبي عليا وانا باكره الكذب
صحيح رجعتها تاني لما صعبت عليا تااااااااني بس برضه انا بكره الكدابين
وما احبش اتعامل معاهم
ولا اتواني فى احراج اي كداب حتى لو كان مييييييييييين
اثبتي على موقفك والصح صح

صبرني يارب said...

الصح هو الصح يا آبي

ما تكدبيش وما تصدقيش الكدابين
الرسول عليه الصلاةوالسلامقال لا تصدق كاذبا ولا تكذب صادقا

وقال يظل الرجل يكذب حتى يكتب عند الله كذابا .
على فكره انا كمان مش باعرف اكذب عارفه ليه
لان السبب فى الكذب مثلا انك ترضي حد طيب فى حد يستاهل ترضيه وتغضبي ربنا ؟؟؟
وكمان مش باطيق الكذابين
انا كانت بتجيلى شغاله ظروفها وحشه جدا زي كل الشغالين وانا كنت باعطف عليها
لكن هى امعانا فى الغباء هى كانت مدمنه كدب لاستدرار عطف الناس
وكل شويه تطلعلي بحكايه وانا اتأسى عليها وكام يوم كده واكتشف كدبها
ماهو الكدب مالوش رجلين
حقيقى مشيتها وقلتلها انتى بتكذبي عليا وانا باكره الكذب
صحيح رجعتها تاني لما صعبت عليا تااااااااني بس برضه انا بكره الكدابين
وما احبش اتعامل معاهم
ولا اتواني فى احراج اي كداب حتى لو كان مييييييييييين
اثبتي على موقفك والصح صح

Alkomi said...

رجعتي الموديريشن ليه

هي الحشرات الضالة زحفت تاني

عموما انا برضه وقع في قرفتي واحد بس لسة مانتحرنيش

نيااااااااااهاهاهاهاههاها

كل اللي عرفت اجيبه الاي بي بتاعه

و الحاج الجعان الله يباركله

عرفني انه من مدينة العاشر و بس

مهندس مصري بيحب مصر said...

هو أنا كل اللي فهمته
إن الكذب غلط
و ده كل الناس عارفاه طبعاً
و إن في ناس بتتمسكن بالكدب علشان تلفت إنتباه الناس التانيين ليها
و إنك مخنوقة من الكدب و الكدابين
و إنك ما بتعرفيش تكدبي

بس حاسس إني تهت منك في وسط الكلام

عموماً أنا حطيت عندي شرح مفصل للعداد اللي انتي حطاه عندك بالصور اللي بيجيب بيانات الزوار كلها
علشان تريحي إيدك من مسكة أبو وردة طول النهار
إبقي بصي عليه

مطلق said...

المشكله ان الكدب اصبح عاده
هو في البدايه بيكون مرض وبعدين يقلب عاده
بتلاقي الناس بتكدب عمال علي بطال بسبب او بدون سبب
وتسالي بيقولو عادي

Mony said...

و الله يا ابي اللي بيشيل قربة مخرومة بتنزل علي دماغه

يعني اللي بيكدب مرة و حد صدقه المرة اللي جاية محدش هيصدقه

و مرة ورا مرة هيتفقس


اما الكدب التاني
(النوع التاني)

فليه الراجل مايفكرش من وجهة نظر تانية

لان لو مراته عملت زي هيفا ولا اي واحدة تانية من المعروفين
ساعتها مش هتطيق تبص لجوزها ده

و هتشوف انها تستاهل حد احسن منه 100 مرة

و الحمد لله ان ربنا خلاها بمستوي الجمال ده علشان خاطره

علشان ترضي بيه


مش كده ولا ايييييه؟؟

أمل حمدي said...

ههههههههههههههه

الكدب حبيبتي مالوش رجلين والكداب دايما بيقع على بوزه

انا بعرف الكداب من عنيه

لكن على النت هانعرفه ازاي

بالفراسة وتناقد افكاره

هايقع هايقع

ربنا يكفيكي شرهم

لكن الحكومة دي هاتعملي معاها ايه

والمتنعكش هاتلميه ازاي

افرحي بالعيد حتى بعد ما خلص ومتخليش

حد يسرق فرحتك

سلام

Gannah said...

آبى
احنا فى عالم أصبح للكدب فيه أشكالا منمقة جميلة وأصبح كل شىء يعلم الأطفال أن الكذب ينجى بينما كنا نحن نتعلم أن الصدق ينجى
أنا بكره الانسان الكداب جدااا وباشعر انه انسان ضعيف جداا والكدب حيلة بيستعملها لانه لايعرف المواجهه ويخاف من الحقيقة
ربنا يكفينا شر الكدابين
تحياتى

kochia said...

فيه ناس مش بتعرف تعيش من غير كدب
وتقريبا بقي منتشر لدرجة انك مش دايما تستغربي
اسبابه كتير
وهي شجاعة انك متكدبيش اليومين دول وبحييك علي كدة

تحياتي

ROSA E OLIVIER said...

Wonderful!...and for you...

"love is the one who masters all things."

Mawlãnã Rumi.

أبو فاطمة / هويتي إسلامية - مدونون من أجل فلسطين said...

علي فكرة الاسم لوحدة حكاية
اما الموضوع فذات اهمية من كل الجهات
اولها : ان الله سبحانه يكره الكذب وصدقت امك عندما بغلت عن رسول الله صلي الله عليه وسلم بأن الكذاب في النار.
ثانيها : انها من الناحية الاخلاقية لا تصح ان تكون صفة من صفات الرجال فضلا عن المؤمنين سئل النبي (ص) ايكون المؤمن كذاب قال لا .
ثالثا : ان الكذب يصنع من المستقبل وحش مارد متوحش علي صاحب فان الكذب لا يدوم تصديقة.
رابعا جزاك الله خيرا عن ذلك واتمني لكي التوفيق من كل مدونتي و الي الامام دائما.
ابو فاطمة.

Anonymous said...

آبي
إنتي مش غلطانه أكيد
زكل كداب بيبان عليه
سبحان الله

أنا مش عارفة المشكلة فين تحديدا
هل في الكدب من أجل التجمل
الاستعطاف
الحياة
مش عارفة

بس كلنا بنكدب
يعني
: )

بنكدب على نفسنا
أنا عن نفسي
عايشة دلوقت
أكبر كدبة في حياتي
كدبتها أنا...عليا
وصدقتني
: D

BTW :
I love Mounir especially ta7t el yasmeena : ))))

Eman Henaish said...

مش انتي اللي غلط يا آبي ، المجتمع اللي أحنا فيه هو اللي بقي غلط في غلط ، وبقت كل حاجة فيه عكس

بجد اثبتي و أوعي أي موقف يزعزعك (حلوة يزعزعك دي :) )

وحافظي ديما علي مصداقيتك ، علشان تحافظي علي نقاء روحك ، لأن الكدبة الصغيرة ممكن يشد لكدبة أكبر اللي ممكن


وزي ما قالت عاقلة علي أرض الجنون .. المؤمن ممكن يبقي زاني ممكن يبقي سارق لكن استحاله يبقي كداب

وربنا ليه حكمة في كدة
أن الكدب الحاجة الوحيدة اللي ممكن توصل لكل الأخطاء دي (هو حلقة الوصل)

وبجد تحيياتي ليكي ، ما بقاش في زيك كتير

الـسـيـدة نـون said...

ايوة فعلا يا ابي
انتي بيبان عليكي لما تكدبى
بيبقى منظرك تحفة
وخصوصا لما تقوليلنا
متسألونيش بقى علشان انا بكدب دلوقتي
ههههههههههههههه



انا ساعات بلجأ للكدب
معرفش بقى بيبان عليا ولا لأ
بس بلجأ للكدب علشان خايفة من رد فعل اللى قدامي

ده طبعا مش مبرر
وانا عارفة ان اللى بيكدب بيروح النار

بس انا عشمي في ربنا كبير
انه يتوب عليا من الكدب
واكون صريحة و دوغري واللى يحصل يحصل
ان شالله حتى تتطربق السما على الارض


ملحوظة على جنب
من صفات الخيخة
الكدب
وانا خيخة
وليس على الخيخة حرج



ملحوظة تانية على جنب برضه
اول البوست كنت حاسة انك بتتكلمي عادى عن موضوع الكدب

من اول مادخلتي على حكاية ان واحد يكدب على واحدة
حسيت ان الموضوع شخصي

حسيت ان حد قالك بحبك
وبعدين طلع كداب

وكمان حسيت ان حد هيموت عليكي
ولما اديتيله الطرشة
كدب وقال انك انتي اللى بتحبيه

فبصراحة مش فاهمة حاجة

هل انتي بتتكلمي عادي
ولا انتى بتتكلمي عن تجربة شخصية ليكي

اهه انا دلوقتي حاسة اني فضولية ورخمة وغلسة


بس خلاص
اختك خيخة

WhItE HeArT said...

الكدب

ههههه

متفكرنيش لإن الغش والكدب بقة صفة الواحد بيشوفها في وشوش الشعب المصري خلاص

والله انا وصلت لدرجة ان واحد صاحبي بيقول لي انته بقيت مبتثقش في حد انا خايف لتكون مبتثقش فيا قلتله دي حقيقه اللي يتلسع من الشوربة ينفخ في الزبادي


عيد سعيد

تحياتي

mohamed ghalia said...

ومن قينا يحب الكدب
ربنا يهدى الناس
كل سنة وحضرتك بخير

عايش... ولكن !!!! said...

الكدب
تعرفى انه حلال فى حالات معينه
بس عموما بقت حاجه عاديه فى مجتمعنا فى وسط كل اللى بيحصل
بالنسبالى مبقيتش اثق فى حد بسهوله

***************
هيا المنصوره عملت عمايلها معاكى ولا ايه :)
شوفتينى وانا بشاورلك عند سندوب :)

Mafrousa said...

فيه ايه يا بتنجااني مالك؟؟
فيكي ايه؟؟؟
مين زعلك و كدب عليكي؟؟؟
و بعدين يا ستى ما الناس كلها بتكدب
يعنى انتى عمرك ما كدبتى
؟؟!!!!
و بعدين انا مامتى ربنا يخليهالى قالتلى اللى بيكدب بتطلعله فى لسانه فقفوفة
قوم اختك مفروسة عملت إيه؟؟؟؟؟
راحت الصيدليه و جابت دوا للفقافيق
ههههههههههههههههههههههه
روقي يا حجه بلاش تبقى حمبليه
و مش لازم كل حد يعرف كل حاجه عن اي حد
فهمتى حاجه؟؟؟؟؟
ههههههههههههههههههههه
و لمى خرفانك اللى سارحين فى المدينه
كل يوم واحد يزعل ولا مدونه تتقفل

د/ رامي شهاب الدين said...

الكذب صفة وحشة ..ومفيش مبرر ليه
يعنى مافيش كدب ابيض ولا موف ولا حتى فوشيا
الكدب هو الكدب مهما كان لونه

ليه الناس بتكدب؟؟

أحيانا فيه ناس بتكدب خوفا من شئ ما ، أو لإخفاء شئ أخر ، أو حتى للحصول على حق غير حقها
أما أكتر أنواع الكدب إللى تفرس فعلا هو النوع إللى أشرتى إليه ، يجى واحد فارد لك نفسه ويقول أنا وأنا ولما تيجى تسأليه عن حاجة هو بيدعى معرفتها تلاقيها بقى عامل زى الكتكوت المبلول

أخر نوع من أنواع الكدب وهو الكدب المرضى ، وده بيبقى عبارة عن مرض نفسى ، لازم له علاج وتأهيل نفسى

ربنا يعافينا كلنا من صفة الكذب الذميمة
دمتى بكل خير..تحياتى

الميكروباص said...

الكذب ما هو إلا وسيلة للوصول إلى الهدف بأقصر الطرق
لكن الكل يكذب
والكل يمارس الكذب
والكل يمارس تأليف المواضيع للخروج من بعض المواقف بسلام
سواء كان مع بنت- مع الوالد- أو في الشغل
بنعتبرا حيله بسيطه من أجل الضحك على اللي امامنا

حبيبـــــــة القمـــــر said...

ازيك يا ابي
الكدب دايما مالوش رجلين زي مابيقولوا
بس المشكله ان الكدب بيسبب جرح فظيع
خصوصا لما تبقى عارفه ان اللي قصادك بيكدب ومفضوح وبيقاوح ويصمم يكدب اكتر
ولا الازمه بقى انه يدعي انك انتي السبب في مصايب حصلت بسبب غشك وخداعك ويعيش دور الحزين المخدوع ويبقى هو اللي اساسا عايز ضرب النار
انا وربنا مفقوعه
لأني للاسف عايشه الازمه دي
ونفسي ومنى عيني امسك الكداب دا واقول لكل البشر ياناس محدش يسمعله دا وبااااااااااء

عين فى الجنة said...

كل سنة وانتى طيبة وعيد سعيد

kafrawy said...

نعيب زماننا و العيب فينا

وما لزماننا عيب سوانا

Hossam said...

نفسى تغلطى وتيجى تزروينى كده غصب عنك
تتكى غلط على اسم مدونتى
وحشتينى جدا
موضوعك كالعادى بيقنعنى برايك
والحكمة الاخرانية دى تحفة
سلام صديقتى

عاشقة القمر said...

ازيك
في ايه مين مزعلك جاءي قطع لسانوا
عدنا مثل في السودان
يقول
الكذب حبلو قصير
يعني الكذب مهمهم كذب بنكشق
يعني بتعرقف ان كاذب
احلي حاجه الانسان يكون صريح
ربنا يهدينا ويهدهم

همسة said...

الصدق منجاة و الكدب خيبة

مصــــري said...

آبي هانم

شكلك كده مفروسة من حد ومتغاظة منه اوي.
المهم ياهانم ان الكدب ده مرض نفسي وبما انك ما بتعرفيش تكدبي تبقي لسة الحضارة لم تأتي علي قلبك البرئ.

انا ساعات باقعد مع ناس بأحس انهم عباقرة وجهابذة الزمان وفي المعظم بيطلعوا حاجات تانية لا أجد المدونة لائقة لوجود تلك البذاءات.

اشربي الليمون

تحياتي
أسامة

ana ga3an said...

شوفي يا ست العرايس
بما اني عارفك كويس وبابقي فاهمك لما تلقحي كلام علي حد
فانا ومن موقفي هذا ادعوكي انك تقولي مين هذا الفسل
وادعو الشرفاء لرجمة بالصرم القديمة
وفضحة فضيحة المختونة


والا اقولك حرام برضة وربنا امر بستر الولايا
وكفاية منظرة قدامك وقدام اللي عارفينة


عارفة في مقولة بتعجبني اوي
ان الصادق ما هو الا شخص لم يتم اكتشاف كذبة بعد

سبهللة said...

كل سنة وانتى طيبة يا ابى
مع انها متأخرة شوية

قوس قزح said...

احنا مش ملايكة
و كل واحد فينا مش كامل و عنده ديفوه و لو هنقول ايه الكدب هقولك الكدب من اول ما تقولى لحد بهزار بص العصفورة و مفيش عصفورة
و كلنا عارفين الموقف بتاع السيدة اللى كانت قابضة ايدها و بتنده على ابنها تعالى خد علشان يقرب منها و تمسكه و هنا حذرها الرسول ان لو كفها فاضى فهى هتحسب عليها كدبة
متخيلة الكدب لحد فين ؟؟
تفتكرى فى حد بالقياس على الحكاية دى مكدبش ؟؟
طبعا صعب
لكن الواحد يشوف الموضوع من نقطتين تانية
ايه هو سبب الكدب ؟
و هل الكدب مؤذى ولا لا ؟

و حسب الاجابة للسؤالين تقدرى تقررى تتعاملى مع الشخص ده ولا لا
و انت فى بالك حاجة واحدة بس
ان الله غفور رحيم
فماذا عنك !!



فى كدب لا يغتفر منا كبشر و سببه بردو عيوب فينا و اننا مش ملايكة مش يعنى سببه ان شخصيتنا قوية و صح ميه فى الميه لان لو احنا صح هنسامح و هنغفر
بس محدش هيلومك لو مقدرتيش تسامحى لانك فى الاخر بشر

لكن تقولى واحد قال رايح مارينا و طلع رايح راس البر يبقى مش هعرفه تانى
كده اقولك بلاش تتعامل مع حد خالص من دلوقتى لان كلنا هنقول رايحين مارينا :)

اسفة طولت عليك بس تقدرى تقولى موضوع الكدب ده من كتره خلاص اتعودت على وجوده زى الميه و الهوا


تحياتى

مواطن مصرى نايم said...

فعلا يا ابى عندك حق و الله
يبقى الواحد من دول من كتر ما بيمشى ورا البنت بقى حافى و شبشبه داب من المشى
و يبقى حيلحس التراب اللى بتمشى علية
و لو حد سأل عليها
تبقى وحشة و عيوب الدنيا فيها

بس عارفه السبب ايه ؟؟
انه مش عارف يوصل لها
و ده فعلم النفس تشوية الهدف الذى لا يستطيع الفرد الوصول له و تجميل الشئ السئ الذى يستطيع الوصول له
يعنى لفه كده و وحاله نفسية اكتر من كونها كدب

ربنا يرحمنا

mostafa rayan said...

آبي كل سنة وانتي طيبة
انا عايز اقولك حاجة من وجهة نظر ذكورية محضة قد لا توافقين عليها
الراجل ممكن يعاكس بنت لابسة بدي ممكن يمش معاها ويخرج ويعمل كل الحاجات دي
لكن لما حد يسأله عنها بغرض الجواز هو هيكون اول حد يعترض على كدة وهيقوله على كل عيوبها الرجل بيعرف يفرق كويس قوي بين الست اللي يهرج معها واللي يتجوزها
بخصوص موضوع الكذب فانا موافق معاك الكذب ابشع شئ في الدنيا
تحياتي لك ودمت بخير

ojg said...

والله يا بتنجاني
أنا أكتر حاجه في حياتي بكرهها الكدب والكدابين
وانتي في البوست ده جبتي انواع كتيرة من الكدب
يعني بحث مصغر يعني
مش كنتي تقولي يا شيخة مين عينة البحث
:)
بس هنعمل ايه يا آآبي
الكدب بقى عادة واللي يغيظ فعلا البجاحة اللي بنتقابل بيها لو قلنتا للي قدامنا انه كداب
ولا أقولك ابقى اعملي زيي
أنا لما بشوف واحد كداب كدب الإبل كده
بصراحه يبقى قلة وجوده أحسن
سلميلي على خرفانك
:))

شمس النهار said...

كل سنه وانت طيبه
ايه الانشراح ده
اخراج المدونه جميل قوي
والصوره الجديده غريبه قوي
بس لطيفه
الكدب كدب
واصل المثل صدق منعكش والاكدب مزوق
بس للاسف الناس كلها دلوقتي بتكدب وفاكرين انها فهلوه وشطاره
مع ان الناس دي الاخسرين اعمالا
المهم انك ماتصدقيش غير اللي يمر الاول علي عقلك ويصدق علي هذه الموافقه احساسك الداخلي
وكل سنه وانت طيب ووحشتيني

Empress appy said...

هانى زينهم
===========

طيب والله يا هانى فيه بنات فى سن المراهقه مش بتكدب ولا حاجه خالص لان اتربوا صح وانا عن نفسى عارفاهم
وبعدين المسلمات الغلط بتتغير طبعا لازم انك تبدلها







الطائر الحزين
==============
الا الكدب انا مينفعش اتحمله وخاصه لما يجرحنى

Empress appy said...

عاقله على ارض مجنونه
===================
ايوه هى الدب دى يا بنتى لا انا بقعد اضحك معرفش ليه هههههههه







ست البيت
==========
ههههههههههههه اه والنبى بلاش مبارك ده
ربنا يهديهم بس هما عرفوا ديتهم بيكدبوا ويروحوا مارينا على طول
نورتى يا قمر

Empress appy said...

اسامه
=====
مش عارفه ليه مش بصدق ان حد بيكدب على نفسه لانه بكده هيبقى مجنون فعلا
يعنى ممكن ابقى عارفه ان فيه حاجه غلط
انما مش اضحك على نفسى
نورت يا اسامه






قلم رصاص
=========
هو مفيش مثاليه بس فيه ناس عايشه كويس بس علشان ده يفضل كده يبقى هيتجننوا زى حالاتنا
نورت الكوكب

Empress appy said...

romansy
=========
فوشيا هو ده لون جديد
والله لسه ياما هنشوف والله والجاى اكتر
نورت الكوكب





حسن حنفى
=========
صح كده برافو عليك

Empress appy said...

نيجار
========
يا عينى عليكى ربنا يكون فى عونك والله حسه وفاهمه
معلش والنبى خلى شعرك زى ما هو شدى فى شعرهم هما

فعلا عرفت انك بتكتبى كومنت عندى لما رجعت من عندك صدفه حلوة
نورتى يا قمر





seven
=======
بس مش ناخده على الفاضى والمليان
نورت الكوكب

Empress appy said...

الشارد
========
ايون جزء تعب والله
ربنا يهدينا جميعا
كل سنه وانت بخير






شق القمر
=====

ههههههههههههه انتى جايبه الوصف بتاعى
اممممممم بس دى حقيقه بصى يا قمر انا مش بقول علشان اوقع حد لان اللى جه قالى الحقيقه هو نفسه اللى راح غيرها لغيرى فانا بضايق لما بلاقى حد بيكدب على حد
فهمتى وساعات بسكت واقول انا مش هقول حاجه
نورتى يا قمر

Empress appy said...

محمد الكومى
===========
لا انت بتكروت علشان نايم لسه هرد عليك تانى يا محمد نورت مؤقتا






سومه المجنونه
===========
انتى يا بنت احتليتى المدونه
لا يا حبيبتى مش اللى كنت بتقولى ليه عليه على الرغم من انه برضه ده فيه طيب بزمتك محستيش وهو بيتكلم بالموضوع ده ههههههههههههه
وبعدين ولا ميه جاجور يخلونى اتنازل عن بطوط هتهزرى ولا ايه
بتستخدم معجون حلاقه امشى يا بت انتى من هنا هههههههههههههه
روحى بطيخ بينادى عليكى

Empress appy said...

تامر صلاح
===========
العيد كان فيه فايرس
بص يا تامر اولا انا بقولك مبكدبش ففعلا مبكدبش
لان انا معنديش حاجه اخاف منها ولا اساسا بخاف من حد بعيد عنك
اللى بعمله حساب ربنا فمش ممكن هرضى الناس وازعله
انما انا ممكن محكيش اخبى بس او مقولش كل حاجه انما مش ابدلها بحاجه تانيه وممكن اقول للى قدامى متدخلش
عارف اغلبيه مشاكلى فى ايه انى على طبيعتى واللى بيجى فى بالى بعمله ومش فاهمه ولا عارفه ان الناس او بعضهم قلوبهم مش نظيفه
موضوع الصلح ده بين اتنين
مش عارفه طيب ما يواجهوا المشكله وخلاص
واللى غلطان يعتذر الحرب ماشى
انما الزوجه ليه يا تامر
يعنى تعيش مع واحده بتخدعها
اممممممممم معرفش كل واحد له وجهه نظر
اما اللى انت عملته معلش ده ممكن اقبله لان انت عارف لو معملتش كده مش هتخلص وبعدين انت مضرتش حد ولا معنويا ولا ماديا
وبعدين طول براحتك يا سيدى الكوكب بتاعك








اهو ده عيبه
==============
اهلا ازيك يا قمر بس لا كده مش هينفع نفضل كده

Empress appy said...

بنت سينا
==========
علل ما بين الاقواس هههههههههههههه
ما انتى عارفه الطع متحطيش فى دماغك






جبهة التهييس الشعبية
======================
والله يا نواره هسمع كلامك لانه مش نافع غير كده
المشكله انك لما تيجى تحسسيه بده
يبقى مفيش فايده ويجيب اللى فيه فيكى
يعنى تقولى اتكلم بالذوق شويه ولا حاجه
تلاقيه يقلب الترابيزة عليكى بس على رايك متبقاش خنقه بقى ويخبط راسه فى الحيطة
نورتى يا حبيبتى

Empress appy said...

الدفاع
=========
اللهم امين يا رب
نورت يا كابتن






احمد سمير
=====

والله اولا بقرأ لك كتير يا احمد لانى عاملاك على الريدر بجد
شوفت ومكنتش مصدقه من اول ما قالوا البيان
وانا روحت عندك وسبت لك كومنت ولا تزعل نفسك
وميرسى لثقتك فى راى وكلامى

Empress appy said...

شريف
=======
مش عارفه يا شريف بس انا بقول مواجهه الموضع على طول يبقى احسن يمكن انا قلبى جامد شويه فى الحاجات دى
يعنى على راى ماما وجع ساعه ولا كل ساعه
منورنى دايما يا شريف بارائك بجد







ملك المدينة
==========
اهلا بيك وربنا يبعد عنا الكدابين

Empress appy said...

Z_Diva
========
يا سلام وانا بقى اعمل كده واعيش على الرول دى طيب يا دماغ ما انا هفضل شاكه فى اللى قدامى هههههههههههههه
ذكيه طول عمرك هو انتى غاويه وجع دماغ بصى انا خلاص اللى هيبقى فيه حاجه مش عجبانى خلاص ابعد وبسسسسسسسسسس
وبعدين انا اتكلمت عن الموضوع علشان فيه حاجات كتير اوى اوى اوى فى المجتمع مش شكل شخصى بس
نورتى يا جمر







محمد الكومى
=============
والله فعلا وجهه نظر
بس لما بيكون بيعمل كده مع اشخاص كتير ما انت مش هتقدر تقعد تفهم كل الناس ان ده مريض هو عموما يا ريت الناس تاخد بالها وبس
وبعدين مصلحه الجارى اشتكت من الميه ارحمنا يا حج ههههههههههههه

Empress appy said...

صبرنى يا رب
==========
عارفه يا حبيبتى والله موضوع الشغاله انا مجرباه بقى مع ناس تانيه كتيررررررررر
بس الناس بقت كتير وحشه وبتاذى اللى حواليها
نورتى يا قمر





محمد الكومى
==========
لا مفيش اسكت ربنا يهدى هو بعيد عنى ولما اساسا بيجى ويسيب كومنت مش بنشره حتى لو كويس والله هو ساعات مش بيقول كلام رخم بس مش ناقصين طيب تصدق اصلا مبقتش اقرا تعليقاته انا بعمل ريجيكت او ديليت للتعليق من غير ما اقرا فيه ايه
هو وناس تانيه حتى لو مش عامله مودريشن بقوم مسحه من غير ما اقرى

Empress appy said...

مهندس مصرى
===========
طيب اقعد اشرب كوبايه شاى وانت تفهم ههههههههه
ما انت فهمت اهو صح وان الكدب بياذى سواء انا او غيرى







كريم
========
ربنا يشفيهم يا رب
وفيه ناس بتحاول تبقى ابطال
عادى يعنى
نورت يا كريم

Empress appy said...

مونى
=======
ههههههههههههه طبعا كده هو انا اقدر اعترض على كلامك يا حبيبتى
وحلو القربه دى اللهى تعمل عليهم ميه مش نظيفه






ماما اموله
==========

محدش سرقها الحكومه بس هى اللى سرقت العيد من كل الناس والله
ربنا ينتقم منهم
كل سنه وانتى طيبه

Empress appy said...

Gannah
==========
ضعيف وغبى جدا جدا
كمان
والله البلد اللى بيحصل فيها ده مش من شويه ربنا يستر






kochia
==========
انا نفسى الدنيا كلها تبقى كده مش انا بس
نورتى يا حبيبتى

Empress appy said...

ROSA E OLIVIER
================
thx






هو كده
=======
انا اللى ميرسى على كلامك وبجد شرفتنى جدا ونورت كمان

Empress appy said...

Bannoura
===========
عارفه ساعات ممكن مش اكدب على نفسى اقنعها بحاجه تانيه مثلا يعنى لما اكون تعبانه اوى اقول لا هو شويه والتعب هيروح وابقى لازم اروح للدكتور وبما انى بكره الدكاتره مرضاش اروح
بس مش بكدب عليها لانك هتصحى فى وقت على الواقع الصعب اللى انتى رافضاه
الاغنيه دى لها ذكرى فى قلبى ههههههههههههه







Eman
=========
مش زعززعك دى جايه من زعزوعه ههههههههههههه
حاضى يا ايمى عنيه ويا رب كلنا نبقى كده وانا اقوى بيكم كمان وكمان

Empress appy said...

بنت خيخه ام شيرى
====================
ههههههههههههههه يعنى لازم تسيحى ليه على الفضائيات
طيب والنبى قولى لهم اصل فيه ناس مش مصدقه
لا يا خوخه ولا موقف من دول تبعى خالص
الا الاخير واحد مريض ماشى يلم صورى ويوديها لواحد تانى
تعبان وجاهل وقال ايه بيتكلم فى الحلال والحرام وهو كل اللى بيعمله دلوقتى حرام
دا الكداب المجنون خاطب وماشى يقول للناس انا مش خاطب علشان يلم البنات حوليه
ولما كان بيجى هنا ويعلق تعليقاته سخيفه وبتدل على انه مش اصلا بيقرا الموضوع بس زى اللى بيلم زباين
مجانين بعيد عنك تعملى لهم ايه
وبعدين مين ده اللى يضحك عليا عيب عليك
انتى عارفه اخره الحشرات الضاله معايا ايه ابو ورده انما ده هسيبه يهرى وينكت فى نفسه وعندى اللى يخليه يعمل اكتر من كده كمان وكمان
نورتى يا خوخه









القلب الابيض
==============
ليه علشان الزبادى تسقع ههههههههه
لا انا لسه بثق فى الناس لان فيه ناس قلوبهم كويسه اوى

Empress appy said...

mohamed ghalia
==================
وانت طيب
اهلا بيك طبعا محدش








عايش ولكن
=============
ايه ده هو انت اللى كنت واقف فوق القطر ده هههههههههههههههه
ولا حاجه يا ريت كل الناس زى بتوع المنصورة يا ابنى والله على الاقل جدعان ومش بيخافوا

Empress appy said...

واحده مفروسه
===========
اقولك على حاجه انا مره اخدت قلم من بابا وكانت اول واخر مرة عارفه ليه لانى قولت له الحقيقه بس مكنتش خايفه ومزعلتش لانى غلطت فعلا وقفت مع بنت هو مش عاوزنى اكلمها ولما سالنى قولت له اه مع انى عارفه نتيجه اعترافى ده ايه
بصى انا ممكن مقولش الحاجه انما مش اكدب
واللى بيسالنى بقول
وبعدين مالهم خرفانى الناس هى اللى متجننه والله اعمل لهم ايه
وبعدين خرفانى بمبى وكميله
نورتى يا مفروستى الكميله







د/ رامي شهاب الدين
=====================
حق غير حقها ده يبقى مش كويس
برضه
لانك بتظلم حد تانى
ربنا يحفظنا يا رب
ونورتنى جدا

Empress appy said...

لورانس العرب
===============
بس كتير ده بيبقى مؤلم اوى اوى وانا مش بحبه
وبعدبن انت راجع بعد العيد مكشر ليه
على فكره اغلبية مشاكلى فى الشغل انى بقر وبعترف على طول ههههههههههه






حبيبه القمر
==============
ادينى فرصتى دى انا اجى وامسكه لكى فى وسط الشارع واقعد اقول كده اامرى انتى بس يا قمر

Empress appy said...

راجى
========
وانت طيب وبخير يا رب






كفراوى
==========

هو مش الزمن ده برضه احنا ولا مش احنا
وبعدين انا بعيب فى الناس مش الزمن

Empress appy said...

حسام
========
ببص وبطل عليك كمان يا حسام
بس انت بتكتب حاجات مقدرش اقول راى فيها هههههههههههههه
من غير زعل يعنى
نورت الكوكب






عاشقه القمر
===============

لا يا حبيبتى انا بتكلم عموما
على آفه ومرض فى المجتمع
تسلمى ليه على طول

Empress appy said...

همسه
=======
لا خيبه ونيله وهبل والله
نورتى الكوكب







مصرى
=======
ههههههههههههه بلاش بذائات والنبى بس انا مش مفروسه من شخص بعينه من كذا حد والله ومن ناس كتير وحبيت اقول قد ايه دى مؤلمه

Empress appy said...

ana ga3an
===========
اولا
كفايه الكلمتين اللى انت قولتهم اكيد اكيد هيوجعوه اوى
ثانيا ده مرض فى ناس كتير اوى اوى اوى
وبما انك عارفنى وفاهمنى كويس اوى اوى اوى برضه
فاكيد هتعرف لوحدك
ههههههههههههههههه
او فى الخباثه بس انت عارف انى مش بربط على شخص واحد ده بلاقيها فى المجتمع ومكتبتش الا فعلا لما اضايقت

اما المقوله
فالرد عليها
يا خوفى منك يا بدران ههههههههههههههه
نورت الكوكب يا سيزر






سبهلله
==========
وانتى طيبه يا قلبى ومنورة

Empress appy said...

قوس قزح
=========
عارفه لما تكون مرة اكيد بنغفر انما لما تكون طول الوقت لا
عارفه لما يبقى له مبرر ممكن انما طول الوقت لا
وبعدين ايه جاب مارينا لراس البر
هههههههههه
انا بتحمل الديفوهات يا حبيبتى بس انا قدرتى على تحمل الكدب مش كبيرة خالص
وبتحمل لغايه لما اجيب اخرى
وعموما الموضوع مش شخصى اوى بس هو حصل موقف اللى فجره
نورتى وطولى براحتك يا حبيبتى









مواطن مصرى نايم
================
والنبى انت سكر مقالب يا سمسم
عندك حق بجد
ربنا يخليك لبتوع نحن الاميه يا رب واشوفك خوجه قد الدنيا

Empress appy said...

mostafa rayan
================
معلش يا مصطفى مش كل بنت لابسه بدى وخارجه يبقى عاوزه تتعاكس فيه ناس هو ده مستواهم او بيئتهم او تربيتهم ومش معناها انهم مش محترمين بالعكس ممكن يكونوا انظف من ناس تانيه كنتير اوى اوى
بس مستوى اتربوا فيه
فاهم اقصد ايه
وبعدين يعنى هو يرضى على اخته او حد قريبه كده داين تدان
وبعدين اللى يهرج معاها دى مش كده بيخدعها وبياخد وزرها
ولا ايه
ولا هو حلال طالما لمزاجه وتفاهاته وقله ادبه
دة راى برضه ولك انت ترفضه او تتقبله
نورت يا مصطفى







ojg
======
هههههههههههههههه عينه من العشه يا حبيبتى اللى فى الدنيا
بلاش خلى الطوابق مستورة
وبعدين يووووووووا لو دورتى يا وزة هتلاقى حوليكى كتير بس ركزى انتى
نورتى يا وزتى

Empress appy said...

شمس النهار
==============
وعادت لتنور الكوكب
انتى كما وحشتينى خالص
وفعلا انا مش بعمل غير كده وبمشى ورا احساسى دايما
يا شموس
نورتى يا قمر

dr.Roufy said...

الكدب دهان جميل قوي بقت كل حاجة لازم تتدهن بيه علشان حالها يمشي
ورغم ان الكدب في حد ذاته كارثة..لكن في كدب ممكن التمس لصاحبه مبرر..خوف مثلا..أو خجل
انما الى بيقتلني الكذب غير المبرر..طب ليه؟
وايه الفايدة؟
تقريبا بيبقى هواية يا آبي

بس عجبتني حكمة العدد الى في الآخر
:))
هو دا الكلام

Unknown said...

ازيك يا ابي

المشكلة مش في الكدب وقلته
المشكلة في الضمير

لو في ضمير مفيش اي سلوكيات غلط


بس من وجهة نظري
ان مدي غضبي من الكدب يعتمد علي نوع الكدبة

لان لو كلامك ده حقيقي ومبدأ
يبقي هتخاصمي اي حد بيقول نكت لان النكت كلها كدب صح ولا ايه

انا شايف انك بتعممي الموضوع كنوع من التمويه لموقف حصل من شخص معين كدب عليكي ودايقك لكن هقولك علي حاجه
صوابعك مش زي بعضها

وعايز اقولك انه الكدب بيختلف بدليل اختلاف عقابه عند ربنا

يعني كدب وسائل الاعلام اكبر عقاب لانه بيضلل شعب
وكمان الكدب في المجتمعات غير لما تكدب علي شخص واحد
او حتي تقول نكته


وبالنسبة لموضوع تصرفات الشباب
الولد مقلش انها وحشه لانها مكلمتوش بالعكس حتي و وافقت تكلمه او تخرج معاه وهي اللي مسكتله الشوز بتاعه وهي لبسها مش محترم
اؤكدلك انها في كل الاقوات مرحله وانه مش هيرتبط غير بالمتدينة دا لو كان هو حد محترم

وتحياتي ليكي

اخوكي

برقش

ميرا ( وومن ) said...

آبي

مش عارفة اعلق واقول ايه بس فرصة كويسة اني اعترف

اني ايام مكنت صغننة في اعدادي كدة كنت فشارة موووت وباكل فشار كل يوم

بس مع الوقت اتعلمت ان مفيش احسن م الصدق ونتايجة احسن بكتير وبتخلي الواحد بجد مطمن كدة

الحمد لله اني كبرت واتعلمت ابطل كدب وعلي فكرة انا اصلا كدابة فاشلة ولما بكدب الاقي اللي قدامي يقولي علي فكرة شكلك بتكدبي

جتني خيبة

بالنسبة لإذدواجية الرجالة فده العادي بتاع الرجالة الشرقيين هما شايفيين ان هو ده الصح ربنا يشفيهم

كفاية بقي لحد كدة

الـسـيـدة نـون said...

حاجة مالهاش اى علاقة بالموضوع

امبارح بقلب فى صوري وانا عيلة صغيرة
لاقيتلك ايه يا بت يا ابى
لاقت صورة ليا وانا عندى حوالى سبع تمن سنين
وبقى ده من الودن دي لحد الودن دى وقاعدة وحاطة رجل على رجل بمنتهى الألاطة
والاقيلك فى رجلى اييييييييييييييه؟
اه والله
لاقيتنى لابسة شبشب بوردة
ومش اى أبو وردة
ده ابو وردة الاصلى بتاع زمان

اول ما شوفته جيتى فى بالى علطول
وقعدت اضحك
وقلت المفروض ابعتلك الصورة دى تحطيها عندك شعار للمدونة
علشان الناس تعرف المصير اللى مستنيها لو ضيقوكي


مستنياكي يوم الجمعة من غير اى استغلال
ولو انى مش فاهمة استغلال ايه
بس ماتقلقيش مش هنستغلك


سلام يا كميلة
اختك خيخة

كوارث said...

مش عايز اكتب تعليق اشتم الكدب فيه والكدابين وفي الآخر أطلع منهم على اساس اني شريف يعني
ممكن يكون الكدب بينجي
بس المشكلة انه لو اتوجد في شخصية فعلا بتنعدم الثقة فيها
واحنا وصلنا للحال ده من ايه
اسألي اي موظف هيحلف بشرفه وشرف أمه
ونزاهته ونزاهة أمه
هتضربي كف على كف
الفساد ده كله منين يا جدعان
السنغال؟

Empress appy said...

dr.Roufy
==========
يعنى يا روفى لو له مبرر ايوه وقوى كمان مش اى كلام التمس عذر انما على لافاضى والمليان لا طبعا
نورتى يا قمر الكوكب






برقش
========
وايه مقايس المحترم بالنسبه ليك بس الاول
غير كده ابقى اقرى ردى على مصطفى ريان
نورت يا دكتور الكوكب كل سنه وانت طيب

Empress appy said...

وومن
========
عارفه مرحله وبنعدى منها يعنى هى ماما قربت منى الولاعه ليه
ما برضه علشان ساعات كنت بكدب بس احتكرت نفسى واتعلمت بجد وقولت اواجهه حتى لو فيها ايه
وبعدين انتى كميله سيبك من المزدوجين دول ربنا يشفى بقى
نورتى يا قمر







خيخه خوخه
=============
ابعتيها على الميل
طيب تصدقى طلعتيها فى بالى اصور شبشب بورده واحطه فى المدونه مع الخرفان هههههههههههههههههه
والنبى انتى سكر
الاستغلال يعنى روحى هاتى معرفش ايه ببطوط وتعالى واعملى واحولها عربيه ربع نقل
ههههههههههههههههه
لا طبعا عادى انا بهنزر انتى عارفه يا خوختى

Empress appy said...

كوارث
========
لا احنا هونا مش بنكتوب شتومه احنا ننتقد بس وخلاويص شتومه لا
ونسيت بيحلف بالميتين والصاحين هههههههههههههههه
اهدى يا حج معلش

Ehab said...

استني عليا شويه متاخديناش في دوكه يا بنت انتي
الأول اقولك كل سنه وانتي طيبه وبصحه وسعاده وزي القرده على قلبنا قاعده
وبعدين اقولك وحشتني لماضتك وطولة لسانك يا فلاحه
وبعدين بقى نيجي للخناقه
ايوه الكدب وحش وابن تيييت كمان
بس ساعات بقى صدقيني غصب عننا لازم نكدب ساعات الشخص اللي قدامك ميستاهلش الصدق لما تكدبي عليه ينبسط قوي ولو تصارحيه بالحقيقه يزعل جدا ويتخانق ويقفل الدنيا في وشك هي الناس فيها كده مش كل الناس طبعا علشان كده اللي يستاهل الصدق نقوله الصدق واللي ميستاهلش ومالوش عندنا حاجه برده ياخد على دماغه ونقوله الصدق لكن اللي كبر وعجز اللي مخه على قده اللي اصلا مفتري كل دول ناس مينفعش غير نريحهم بكدب يبسطهم وبكره تتزنقي فيهم وتكدبي غصب عن خرفانك كلهم

نيجي بقى لأهم نقطه غايظاني بقى في البوست انتي بتقولي الولد اللي بيجري ورا بنت وبعدين عايز يغسلها الصحون لو ده في مصلحته وهو حضرتك اصلا عارفه ايه مصلحته ولا هو اصلا لما بيعاملها كويس في وشها هو بيكون غرضه ايه مش عايز اقولك ان كل ولد مهما كان لما بيشوف من البنت اكتر من اللي المفروض يشوفه بيطمع يوصل لأكتر منه هي الرجاله كده وعلى رأي انيس منصور الله يسامحه بيقول الرجل المهذب هو ذئب ايضا لكن طويل البال
ودمتم بقى على كده وسلام يا سكره
سلااااااااااااااااااااااااااااام
اخوكي ايهاب

micheal said...

استهبال علي إزدواجية علي أفكار متعفنة
هو ده الملخص
حكمة الإمبراطورة في الجوووووووووووول
ليكي حق تهربي بره في الأعياد والا حتشغلي الفلفل الخار
وأنتي فاهمة طبعا
:)
تحياتي

امل said...

السلام عليكم ورحمة الله
الكدب ده فعلا من أبشع الحاجات حتى لو اتهيأ لنا انه ممكن يكون سبيل للنجاة والرسول صلى الله عليه وسلم بيقول لايكذب المؤمن حين يكذب وهو مؤمن يعني ان الايمان بيروح منه لحظة الكذب ربنا يغفر لنا ويعيننا على اننا منكدبش أبدا

darkskies said...

انا قريت اخر مقالين كده بسرعة ومن الواضح ان الصيف والعيد كانو حلوين السنادى
انا طبعا بمتحن ففقدت الشعور بالاشياء دى
ده بس مجرد مرور سريع
كل سنة وكلنا طيبين

maxbeta3zaman said...

دى أصبحت ثقافة عامه .. لو نظرنا للأفلام كام فيلم اسمه ومضمونه فيه كلمة كدب أو كداب ..كام أغنيه تتكلم عن الكدب بين المحبين "حلو وكداب ليه صدقته " ليه تكدب على من أول ميعاد ..دا حرام الأسيه" ؟ ... موش الكدب؟؟ لاحظو!! حتى المثل الشعبى يقوللك "كدب مساوى ولا صدق منعكش" يعنى ساوى نفسك وافتكر الجخ بتاغك أحسن تنكشف ..حتى عبد الوهاب قال يكدب على ..واصدق كدبته ..وازاى أكدبه ..وانا روحى تعشقه ؟؟
يعنى حتى المحب ماهوش عاوز يكدب الحبيب المعار!!

Empress appy said...

الشنكوتى
==========
والله يا هوبا محدش بقى عارف نيه حد فى الحياه خالص
بس عاوزه اقولك ان ده كنايه عن انه يتمنى يكلمها ويعرفها فهمت
وبعدين اجرى يا واد من هنا انت فيه حاجه بتغيظك دا انت مصيبه
نورت يا اجدع اخ فى الدنيا









micheal
=============
ليه ساكت متقول عاوز تقول انه معايا اه معايا ههههههههه
بص يا ميشو النبى لو مشينا برشاش برضه مفيش فايده خالص
لازم الناس تتربى من تانى

Empress appy said...

امل
=====

يا رب يا امل اللهم امين ويقوينا على نفسنا يا رب
نورتى يا حبيبتى ووحشتينى خالص







darkskies
===========
ربنا معاك يا رب وترجع تانى وتنور الدنيا كلها

Empress appy said...

maxbeta3zaman
=================
تصدق برضه فكره
وهيدرسوها بقى وتبقى ليلى نهارى وانا عايش كداب
هههههههههههههههههههههه
نورت الكوكب

Share |