حصاله بكرش


زمان وانا صغيره شويه يعنى كنت دايما بحب احوش فلوس واعمل جمعيات فى المدرسه اعتقد كلنا مرينا بنفس الموضوع دا
وماما ربنا يخليها كانت بتنمى الموضوع دا دايما فينا على الرغم من ان الحمد لله كنا بناخد مصروفنا مضاعف وخاصه فى الفتره اللى بيكون متواجد فيها بابا ومش فى الخارج بما انه ابن بطوطه وطول عمره من السعوديه لليبيا للعراق لكل الدول الشكيكه حتى قبرص
ولكن كانت دايما ماما على الرغم من توافر كل شئ لنا والحمد لله كانت بتعودنا على دا
وانا كنت بتفنن فى الحصاله بتاعتى يعنى مره اشتريها على شكل قلب مره شكل فيل اخر حصاله امتلكها ومازالت فى بيتى الى الان هى حصاله على شكل مهرج كنت بشترى هدايا وانا فى ماليزيا لاولادى ناس اصحابى وفى المحل ادونى الحصاله دى هديه فرحة بيها جدا لانها اعادتنى لايام الطفوله الجميله
ةالتانيه كانت من فاتيما فى عيد ميلادى وفرحت بيها اكتر ولسه مححتفظه بيها لما ربنا يرزقنى بيبيى ان شاء الله هديها له واقوله من طنط فاتيما
ليه بقى كل الرغى دا
لانى قررت انا وزوجى العزيز المصرى الصعيدى المنشأ اننا نحول اغلبيه فلوسنا اللى حوشناها للبنك فى مصر
والحقيقه الفكره من البدايه كانت فكرته من يوم تنحى مبارك قالى الاقتصاد هيبقى واقع وقعه الكرنبه البايظه على قفاها قولت له انااعمل ايه طيب ايه الحل
قالى الحل اننا نحول الفلوس دى البنك او نشترى فى البورصه وحقيقى فكره البورصه كانت تستهويه من زمان بس انا اقنعته اننا علشان مش فى مصر مقدرش اعتمد على حد لازم اكون موجوده او هو على الاقل لازم حد يتابع طقت فى دماغه وقفشت انه يضارب فى بورصه الكويت قولت له على جثتى وبما انه صعيدى قعدت اقنع فيه شهر انه مينفعش
اخيرا وبما انى عندى حسابين فى بنوك مصريه قررت انى ابعت كل اللى حوشته واسيب جزء بسيط هنا لاى ظروف
اولا انا هستفيد جدا ان دلوقتى السعر عالى
تفكير مادى بحت انا عارفه هع هع هع
ثانيا هنساعد فى تحريك المياه الراكده فى البنوك والاقتصاد اللى باظ وانا مش زعلانه على فكره لان لكل ثورة نتائجها السلبيه والايجابيه بس فى ثورتنا الايجابيه اكتر
ثالثا انى بجد ودا احساس داخلى فزيع يمكن نرجسيه وبنفسجيه وبنكيه منى ان بحس بالامان انا وجوزى فى اننا لنا حاجه فى بلدى
ودا يظهر اوى فى انى لسه محتفظه بعربتى فى مصر وبدفع لها اقساط شهريه برغم من انى مش فى مصر ولا انا ولا هو من سنه
بس احساس انك ليك حاجه فى بلدك هو الاقوى وعلى الرغم من اننا الحمد لله راكبين احنا الاتنين عربيات اكبر واغلى من اللى فى مصر بس الشعور والوضع مختلف انا فعلا بحس ان اللى فى مصر بتاعتى انما اللى هنا لا مع انى بدفع فلوس الاتنين بس الانتماء الداخلى
الموضوع ببساطه لو كل واحد وفر ان شاء الله حتى 200 جنيه وحطهم فى بنك او اشترى اسهم فى البورصه هيساعد البلد
لغايه لما فلوسنا من الحراميه واولهم احمد عز الحرامى النصاب وشيخ المنصر مبارك وولاده يرجعوا فلوسنا
وانا املى فى ربنا ومن بعده النائب العام لان فلوسنا لو رجعت وضع البلد ها يتغير
حاجه تانيه الناس اللى فى الغربه زى حالتنا كدا يا ريت برضه يحولوا مبالغ على قد ما يقدر اكيد لكل واحد فينا حساب انا كنت عامله حساب توفير فى بنكين وبالمصرى مش الدولار على فكره
يا ريت يساعدوا يمكن احنا فى الغربه ومساعدناش كتير بس جه دور لينا انا عارفه ان ساعات الغربه مبتقدرش تحوش منها وخاصه الرجاله
معايا نفس الصنف خمس سنين بعد تخرجه من كليه صيدله وهو فى الكويت ومحوش ربع جنيه مخروم بس الحمد لله دلوقتى الوضع افضل بكتر الشباب اللى بيقروا لينا اخواتى اللى فى الغربه لو حولنا تمن تى شيرت جيس او ارمانى او حتى اتش اند ام هيساعد حاجات كتير
حاجه اخيره تحويل الفلوس او اسهم البورصه بتفكرنى بايام الطفوله واننا كنا بنحوش علشان كدا بتمنى من الناس توافق على اقتراحى وتبعت اى مبلغ مش لازم مبالغ كبيره وفى النهايه فلوسك متشاله وبتزيد كمان

ربنا يحمى مصر ويرجعنا كلنا لها بالسلامه

حكمه الامبراطورة

إذا ساء فعل المرء ساءت ظنونه وَصَدَّقَ ما يعتاده من توهم

2 اخبط وقول رايك:

nor said...

تسلمي يا ابي هانم و تحياتي لك و لزوجك الصعيدي طلع زيي و ربنا يبارك لكم يا رب

Empress appy said...

نور


تسلم يا رب ويبارك فيك