مناخير بنوكيو

طبعا كلنا عارفين بنوكيو اللى كان بيكدب ومناخيره تطول ده انا بقى طورت الموضوع وبقت اللى مناخيره فعلا طولت تعدى مرحله الكدب وبدأ يمارس هوايته فى حشرها فى حياه الناس وده تطور طبيعى للكدب والناس دى اصلا بتكون ماريونيت فى ايد مين مش عارفه جايز فى ايد حد تانى جايز عوامل تعريه (محدش يفهم غلط ) اقصد من الزمن يعنى

فيه ناس كتير اوى حاشرين مناخيرهم فى حياه ناس وممكن ميكونش الناس الاولين يعرفوا الناس التانين بس نقول ايه تلاقى المناخير طولها اربعه متر لقدام
كنوع من الفضول القاتل اللى مسيره فى يوم يقتلهم من كترة الهرى والنكت فى نفسهم والاكلان
لان نهاية الناس دى بتكون يا العباسيه كولج علشان ياخدوا كورسات علاج مكثف لمناخيرهم ويعملوا لها بتر
يا بوليس ستيشن كولج وده ببساطه لان مناخيرهم من كتر الطول هتخبط فى اى حد ويا حبذا لو الحد ده مهم اوى يقوم يحصل حادثه قووووم هووووب طراخ بووووووم تتتشششششششش تبقى نهايته سوده
طبعا محدش فاهم حاجه كالمعتاد لانى انا نفسى مش فاهمه
بجد انا بشوف ناس وحاجات رمى جتت مشوفتش زيها يبقى الواحد ولا الواحده قاعدين على بوتاجاز 50 شعله عاوزين يعرفوا كل حاجه فى حياة اللى قدامهم ومش فاهمه ايه الاستفاده
يعنى لو كنا اصدقاء اكيد انا لو مضايقه هحكى لو مش عاوزة احكى خلاص
لو مش اصدقاء ولا معارف يبقى انت او انتى ولا تخصونى ولا تخصوا حتى اللى قدامكوا هيفيدكوا ايه تعرفوا ده بينام بالليل على انهى جنب ...بياكل بايده ولا الشوكه والسكينه .. اطلقت ولا اتجوزت ولا ماشيه على ودنها وهى فى البيت
وساعات معرفه حاجات عن اللى قدامك كتير ممكن تجيب لك احباطات نفساويه فى النفس ازاى
مثلا اللى قدامك يعنى حياته احسن شويه علميا اجتماعيا ماديا تقوم انت تعرف حاجات تجيب لك محباطات تقوم تنفسن عليه وعلى نفسك وعلى اللى اهلك كمان ، ما هو اه ليه بقى مخلفونيش زى ده ، وتقعد تهرى وتنكت علشان تثبت انك زى ده ، طيب ليه ما تعيش حياتك زى ما هى واتقندل على عينك (اى اتلهى اى اتوكس اى اتهبب)
وممكن يبقى اقل منك وتكون بعد الشر من الناس اللى عندهم دم يعنى ونفسوياتهم بتتعب يجيلك اكتئاب وقرفه معده وتضايق وتكلف نفسك برضه فلوس ودكتور وحركات قرعه
ملخص الكلام بقى
كل واحد يخليه فى حاله وميشغلش نفسه بغيره الا اذا كان شايف ان غيره ده ممكن يستفيد منه يعنى يبقى عنده فكر زيه او يطور من نفسه
انما ميشغلش نفسه بيه علشان يطلع العقد اللى اهله عملينها فيه على الناس او الفضول بياكل فى نخاع مواسير عقله
ومن انواع الفضول واحد لا تعرفه برضه ولا يعرفك ويروح يسال بنت خالت عمه جوز مرات ابن عم خالتك عليك او يخلى حد صحبك ينتصل بيك وبيكون ناس حركاتهم قرعه ومكشوفه موت بجد علشان يعرف اخبارك
لو شغلنا بالنا بحياتنا فى البيت والشغل والحياه هنبقى ناس ناجحه بجد وبنقدر الوقت والشغل كويس
وخاصه الستات المتجوزين اللى بعضهم معندوش شغلانه غير فلانه قالت وعلانه قالت وام سحلول جابت وام جلمبو راحت الساحل وعاوزة ابقى زيها وبيكون يوم اسود على جوزها لو معملش كده
او برضه المخطوبين دى جابت بادى من عند عمر افندى وانا مش اقل منها لازم اجيب من باتا وهووووب الدنيا تتفركش
فى النهايه التدخل فى حياه الناس بيهدم الحياه وبجد احنا من الفضى والفراغ هنقتل بعض قريب سواء جيران اصحاب منعرفش بعض

سؤال :- انت بقى انت وهى وهو طول مناخيرك قد ايه :)
وايه شايفينه تانى اضرار من التدخل وحشر المناخير فى حياة الناس بطريقه او باخرى سواء لبس حاجات شخصيه

ملحوسه كعبورة :- ميرسى لكل الناس الحلوه اللى حضروا معانا زياره مستشفى فلسطين والناس اللى اول مرة اشوفها شمس النهار الجميله وتوته بنتها ، وعاشقه النقاب اللى كانت مفاجأه حلوة اوى هى وزوجها ، وطبعا الريس ميشو مايكل وتحيا الوحده الوطنيه ودينا زميلته ، وطبعا الشريك المتضامن بتاعى قوس قزح هانم ، وضياء وخالد هم الاحباب وشريف ومحمد عبد الغفار وميرا الحته اللى واقعه منى وطبعا اللى اتصلوا نهر الحب ونضال ورئيس جمهوريه نفسى بجد اليوم كان حلو وهيسبهم هما يحكوا كل القصص اللى سمعناها وشوفناها اللى يحب يروح المستشفى لوحده يروح الناس هناك لطيفه جدا ومحترمه اوى اقروا القصه دى الولد ده احمد ابو سلامه قابلناه امبارح فى مستشفى فلسطين اسمه الشهيد الحى كليك على الاسم ووالده حكى لنا القصه والبناتاخدوا صور له مع والد ربنا يشفيه

كان معكم مدرس اول لواء بحريه ابى هانم كايده العزال انا من يومى

حكمه الامبراطورة

من تدخل فيما لا يعنيه هيلاقى ابو ورده بيرد عليه