حكومه الوز



Add Image


الفيديو اللى تحت ده عمله االاستاذ/احمد شوقى صاحب مدونة صباح الخير يا مصر اه معلش سامحونى معرفتش اطلعه فوق مش عارفه مضايق باين منى وبصراحه له حق انا بقالى يومين مطلعه عين استاذ احمد بس هو ربنا يكرمه اتحمل الرخامه اللى واقعه منى بقالى فتره
الصور دى رد على اداعاء الاغبياء اللى بيقولك احنا مبنقتلش اطفال

اللينك اهو للى مش عارف ياخد الفيديو من عندى ابعتوا اللينك بس فى ايميلات او حطوه على مدوناتكم انطح يا ريس


بيان رقم واحد واحذروا البيانات اللى بصدرها اليومين دول لان انا عامله زى الكلاشينكوف وشحن ذاتى كمان


الاغبياء اللى فاكرين صور الجرحى والموتى استعراض

علشان الجبلى وزير الصحه اللى يتقطع لسانه يا رب يقولك ان الفلسطنين طالعين يستعرضوا
هو الموت فيه استعراض هو اللى بيكون عنده ميت ولا مصاب هيستعرض ليه هما بيصوروا شريهان ولا نيللى فى فوازير ولا يمكن روبى
علشان بس التفكير المحدود الناس دى فى غزة فاكرين ان محدش حاسس بيهم ولا يعرف حاجه عنهم بيسيبوا الاعلام يصور يمكن العرب يحسوا على دمهم او امريكا او الدول تعطف عليهم وترفع عنهم اللى بيحصل
الناس دى معندهاش كهرباء ولا اكل ولا اى حاجه واللى مبيشوفش التليفزيون يبقى يحط شوز فى بقه ويتكتم
وعيب قوى لما يطلع وزير الصحه ويقول كلمتين هايفين وتافهين تدل على عدم انسانيه ومتنفعش من دكتور محترم قد الدنيا علشان يدافع عن تقصيره يقول كده

ومش راح اقع فى نفس الغلط واقوله يا رب تجرب نار الناس دى هو وكل حد يقول كده لان اليهود بس اللى بيقولوا كده حرام هو ولا بيرحم ولا يخلى رحمه ربنا تنزل حسبى الله ونعم الوكيل وليه يوم هما
وبتوع البربور العربى وجعوا عينى كل يوم اشوف واخلص علبه مناديل والله ما هو من الاغنيه لانها قشوريه وجمبريه وتقرف بس من صور الاهانات والضرب والاطفال اللى بتعيط
انا بصراحه نفسى افهم ازاى حد يجيله قلب اصلا يشوف طفل بيبكى وهو شفايفه بتترعش كده ويقول كلام هايف بالشكل ده دا انا اللى معنديش اطفال قلبى بيتقطع ربنا معاهم يا رب بجد

غير كده بقى علشان نكمل فقع المراره نفسى حد ينوبه ثواب يفهمنى يعنى ايه عمالين نقول دول السبب لا ام جلمبو السبب لا دول حكومه شرعيه لا دول حكومه انفاق بالزمه يعنى اى دين فى الدنيا بيقول كده اى دين فى الدنيا بيقول نسيب ناس تموت ونقعد زى الجرب نهرش لبعض ده ينفع والله حرام يعنى بستغرب وبنقرف ويجيلى انقرافه واكتئاب من الناس تدخل تقول اصل حماس ....اصل فتح ... اصل مصر... اصل ام زعيزع وام عبدووو لما راحت لقت ابو فصاده هناك
ايه ده بالزمه ده كلام ناس عاقله وبتحب بلدها وعندها انسانيه دا انا خلاص على مشارف الانتحار بسبب قله العقل دى
بجد اللى بيعمل كده تسمح ليه اقولك وكلى اسف و مع السورى واسكوزا بكل لغات العالم جتها نيله اللى عاوزه خلف شبه حضرتك

بيان رقم تنتين محمد حمدى عمل مدونة للاعلام انطح هنا هتلاقى لينكها وطالب ناس تساعده انا شايفه الفكره حلوة اوى يا ريت كلنا نساعده
ولا بلاش كلنا الناس اللى بتعمل من قلبها مش عندها حنجرة فارغه وعماله تكاكى ليل ونهار من تحت البطانيه وفى ساعه الجد الاقى اكياس الجوافه ليها فايده عنها لان الفتره اللى فاتت برضه كله بان على حقيقته بجد ومعلش يا صديقتى انا فهمتك اللى فيها انا مبقتش اسمع من ناس عندهم عقد وكلاكيع اجتماعيه وشخصيه وانحطاط فى الاخلاق فبيعملوا اسقاط على البلد وعلى الناس اللى حواليهم وزى ما قولت لكى لو اديتى لاى حد فيهم عروسه لعبه وكام جنيه من الصبح هيقولك ملعون ابو البلد على اللى فيها دول حناجر مخوخه فاضيه ودول مينفعش معاهم دكتور نفسى لا دول عاوزين الاباده

الفيديو ده يا ريت ننشره على مدونات الاسرائلين واللى عنده مدونات كلاب اليهود يجيب ليه لينكاتهم وانا انشرها على اقذر حبل عندى علشان نعمل عليهم حرب نفسيه خليهم يجلهم هبل الماعز ونخلص منهم وننشرفى كل الميديا والايميلات اللى فى البوست اللى تحت واللى قبله
واهو بنعمل محاوله يا رب تجيب بنتيجه يا رب


كان معكم من قلب سوق الخضار ابى هانم بتنجانى



حكمه الامبراطورة

لو اتفرقت الغنم يقودها الماعز الجربان


الفيديو

video

61 اخبط وقول رايك:

محمد عتلم said...

نحن نشجب وندين ونعارض ونستنكر ونندد ونعدد ونستهبل ونستعبط
ناس بؤ والله
وسلامتها ام حسن
ولن نقبل ونحذر ونهيس ونتوعد ولن نسمح وايضا لن نجرؤ

الطائر الحزين said...

جزاك الله خيرا
ربنا على المفترى
انا بحس ان الكلام اللى بيصرح بيه المسئولين بيقع منهم مش بيمر على دماغهم فاكرين ان كل اللى بيسمع أهبل

أما عن مدونة الاعلام هذه الفكرة طرأت لى من سنة تقريبا
ربنا يوفقه

micheal said...

أولا...أنتي متأكدة أن وزير الصحة المصري قال كده؟
:)
أصلي أول ما قرات جملة بيستعرضوا دي وقعت علي نفسي من الضوحك
ده ايه الاشكال اللي عندنا دي يا بنتي
مااااا علينا
ع العموم أنا داخل أشوف الحكاية ايه عند محمد حمدي وسيبك من الدخول في جدل مع الشخصيات الحنجورية لانه الكلام لا حيقدم ولا حيأخر وخليهم هما يكملوا ملاحم الندب علي الكيبوردات
عجبتني جدا جدا حكمة الامبراطورة النهاردة
تحياتي

Foxology said...

سيبك من تصريحات السادة الوزراء جميعا لأنهم للأسف فاشلين سياسيا والمتابع لتصريحاتهم من اول ما دخلو الوزارة هيعرف كدة

غزة ليها ربنا واحنا لينا ربنا برضه

تحياتى :)

البت المشمشية حلوة بس شقية said...

ربنا يهدهم الكفرة دول
ومحدش واقفلهم
كلو سايب الناس دى لوحدها

يلا ربنا معاهم





بلنسبة للتاج
ابى حبيبتى
عشان انتى مقرتيش البوست كلو
وقريتى اول سطرين بس
اقدر اقولك ان التاج مش عن القراية
وان انا عاملة تاج ليا لوحدى فى اخر البوست

~*§¦§ Appy §¦§*~ said...

محمد عتلم
===========

مالها ام حسن هو قالك انها تعبانه ولا ايه يا راجل طيب قولى اروح لها
بس انا اقدر اعمل الكتير ادعيلى متهورش





الطائر الحزين
===========
لا يا ايهاب فيه ناس بتصدق وبتردد زى البغابغانات الاغبياء نفس الكلام شوفت الشلل اللى انا فيه جارتى كانت بتقول نفس الكلام

~*§¦§ Appy §¦§*~ said...

ميشو
=========
الكلام كان فى مصراوى وفى مكان تانيه قريته امبارح وكان الفقى والشريف فى الموضوع ربنا يوعدهم بتريلا يكون سواقها اعمى يا رب
نورت يا ريس







فوكس
=========
احن لينا ربنا يهدى عقولنا يا فوكس والله الا انا زهقت وهطق بجد من الغباء اللى الناس بقت بتاخده زى الانتى بيوتيك
نورت يا فوكس

~*§¦§ Appy §¦§*~ said...

البنت المشمشيه
===============
انا الوحيده بقى اللى بقرا اى بوست من اوله لاخره شوفتى ازاى وعندى استعداد اطلع فى مدونات كتير تناقد فى كلمات مش فى جمل واقول دى كانت بتقول ايه وبعدين قالت ايه انا مش تاعبنى يا حبيبى غير تركزيى ده
انا حبيبت ارمى نكته واضح انك مفهمتيش انا قولت انا مبحبش القرايه دليل على اول سؤال فى البوست يعنى اوله صد نفسى ثانيا
انا والله من زمان قولت مش هجاوب تاجات خاصه انى بحس انى بجاوبها لنفسى ومحدش بيقراها يبقى مفيش داعى منها بصراحه الا لو كان فيها هدف
متزعليش يا كميله والله

رئيس جمهوريه نفسى said...

كل واحد صدر منه الكلام احب اسمعة نشيد حركة احم احم احم احم احم مصحوبة بكل الترجمة المتوفرة للنشيد للغات الحية والميته بشرية وسخة لا عايزة ترحم ولا تخلى رحمة ربنا تنزل انا شفت كلاب بتعلن تعاطفها مع اطفال اسرائيل اللى محدش منهم اتصاب
فسورى يعنى تيــــــــــــــــت ليهم

محمد فوزى said...

للأسف احنا انتقلنا من زمن الوزير السياسي إلى زمن الوزير التكنوقراط ( يعني المتخصص بدون خلفيه سياسيه ) وإذا صحت الجمله دي عن وزير الصحه نكون وصلنا بحمد الله إلى زمن الوزير البصمجي لأنه أبسط قواعد اللياقه التي لا تحتاج إلى فهم سياسي متخلهوش يقول كده
فعلا اهالينا في غزه ميعرفوش اننا معاهم لأنهم معندهومش كهربا اساسا وانا لذلك عجبتني فكره سمعتها من احمد المسلماني في الطبعه الأولى وهي الإتصال العشوائي بيهم بدل ما في ناس بتتصل ببرامج هايفه ومسابقات نصب مفضوح , نحاول نكلم الناس دي وندعمها ونقولها احنا معاكم , وده واجب إنساني وديني وكل حاجه
للأسف كان البرنامج عارض 3 ارقام ملحقتش انقل غير رقمين وللأسف بحاول اتصل بيهم لكن الإتصال مبيتمش
الأرقام هي
00972825500000
00972822840000
مع وضع اي ارقام عشوائيه بدل الأربع اصفار دولياريت يا جماعه لو حد كان متابع البرنامج والأرقام دي انا غلطت في نقلها يصلحلي

بالنسبه لإرسال الفيديو يا آبي هانم احنا مكملين المشوار وهنبعت وربنا يوفقك وتمدينا كل يوم بالجديد وبقولك بالنسبه للحلم العربي واللي زيه خليه يبقى وقود يحركنا ويصحينا كل ما ننسى او نهدى شويه لكن برضه ميحبطناش المناظر دي لأننا لو أحبطنا هتتكرر وكتير
وبالنسبه لبتوع مين السبب فدول ناس مش عاوزه تعمل حاجه فبتلهي نفسها بأي كلام يخليلها عذر عن انهم مبيعملوش حاجه

حسن حنفى said...

تصدقي بالله انا اخر برج في مخي طار

شفتي وانا لسه صغير :((

كل ما اقابل اي حد من اصحابي نيجي نتكلم واحنا راجعين من درس ندردش

يقولي غزة تستاهل اللي حصلها اقوله ليه يابني يقولي اصل حماس وحماس ومش عارف عملت ايه

علي اساس ان حماس بس هي اللي بتموت وعلي اساس ان حماس دي مش بني ادمين زينا

قليل جداا اللي حاسس باللي بيحصل واللي بيدعي او بيقاطع واللي اقوله قاطع حتي لو فتره دي بس يقولي يعني الفلوس دي اللي هتفرق معاهم !!

حسبي الله ونعم الوكيل

واحد من البلد دى said...

السلام عليكم

والله يا آبى الفكرة مش فى إنى نزلت بوست..

لكن انا بانزل بوست لما الاقى وقت صغير اقعد فيه على الكمبيوتر..

وبعدين انا أب لثلاث أطفال..إتنين منهم فى المدرسة و الرابع جاى فى السكة إن شاء الله

وطبيعى لما انزل بوست يبقى انا قاعد على الكمبيوتر و طبيعى إنى لما أقعد على الكمبيوتر يبقى لازم أزوركم..

وبعدين تقدرى تسألى إسلام أنا حصل معايا إيه الأيام اللى فاتت..

عموما ..

كلامك مؤثر جدا جدا..
والسبب فى البوست اللى عندى هو فعلا أوبريت(البربور العربى)

وبعدين السيد(و.......زير الكحة)لو كانت الأطفال دى قرايبه مثلا كان ممكن يعمل إيه..
كان حيخليهم يسافروا يتعالجوا على نفقة الدولة..

ربنا يبتليه بمثل ما يسخر منه..
هو وكل من على شاكلته

آمين

عذرا لتقصيرى

tarek momen said...

بصي عايزك تساعديني في حل المشكلة دي
صحيح الوقت مش وقت تهريج
بس هي فلا بقت مشكلة
ياحنا نغير اسمنا من الشعب المصري لأي حاجة تانية
الشعب الهمايوني مثلا
يا اما الحكومة دي تغير اسمها للحكومة الهليهلية
لكن ماينفعش احنا الأثنين نحمل صفة المصري
دي ناس تعر ووزراء عرة ومسئولين عرة
جابوا لنا العار

أحمد الحيدر said...

الله يعطيكم العافية ...

soska said...

لا واللي يحرق الدم و يجيب شلل رعاش و بعديه سكته قلبيه على طول ان الموكوس الله يحرقه شمعون بيريز شوفي قال ايه امبارح في الجزير (ومعلقًأ على المواجهات بين فتح وحماس في غزة قال شيمون بيريز: "تعلمون أن حماس في وضح النهار أخذوا المئات من قادة فتح وألقت بهم من فوق أسطح المباني، وهذا أمر حدث لم يكن له مثيل، وحماس تمردت على الرئيس الفلسطيني محمود عباس، وهم في نظره غير شرعيين، وليست لهم شرعية في عين المصريين والكثير من العرب يدركون أنهم فاقدي الشرعية، وأنا ليس لدي أي شيء يختلف عن وجهة نظر عباس أو مصر، وهذا لأن مصر دولة مسئولة تدرك ان السلام يخدم الجميع العرب واليهود والمسلمين والمسيحيين، والخلاف اليوم ليس بين الأديان وإنما بين الإرهاب والسلام".)
واللينك كمان اهو
http://www.islammemo.cc/2009/01/05/74618.html

والكلب بتاعنا مردش علي اللي قالوا
ربنا يتولاهم ويتولانا
دول بقوا يستغيثوا بالأجانب عشان العرب الله يرحمهم مغيبين

وومن said...

آبي

تقولي ايه في اللي انعدم عنده الدم والضمير في نوبة واحدة

حاجة تعلي الضغط وتفقع المرارة بجد

هي الناس دي بقت ايه مبتحسش

البربور العربي وماشابة انا بطلت اسمعه او احاول اردد كلامة بيني وبين نفسي حتي

الأغاني محلتش حاجة ولا هاتحل وكفاية علينا تقطيع قلب وتقطيع كلينكس كمان

غيرنا مش لاقي حتي ورق شجر يستخدمة زي ايام الإنسان البدائي

!!! عارفة ... مش عارف ليه said...

اللهم لا تؤاخذنا

بما فعل السفاء منا

حروف (دلو مرة ثانية وجرح ثاني سابقا) said...

يا ابي ياحببتي انا اتخنقت من اللي بالي باللك يعني يجمعوا نفسهم بصلاةع النبي ويندبوا ويشجبوا ويعددوا ويلطموا ويلهوي ويخرابي وفي الاخر يقولوا نروح نعرض الموضوع علي العالم حسبي الله ونعم الوكيل جزاكي الله كل خير وربنا يصبرك ويصبرنا علي الناس دول علي مجهودك بقوللك ايةلو حصل تغير نادي عليا انا عند الجيران بتفرج علي الجزيرة سلام يا جميل وكل سنة وانتي طيبة

انسانةعادية فى عالم مش عادى said...

جزاكى الله خيرا يارب وجعله فى ميزان حسناتك وياااااااااااااااارب يجى بنتيجة

enjy said...

اوك هيحصل بس سؤال هو فين مدونات الاسرائيليين دى يا ابى؟؟؟ يعنى فين اللينكات طيب؟؟؟
طب انتى روحتى عند حد منهم قبل كدة يعنى وللا ايه؟؟

Abo 7anf said...

السلام عليكم
مهو مش اول وزيير مبيعرفش
قصدى يتكلم
والاعلام بتعانا نازل تقطيع فى حماس
ومفيش ولا واحد من بتوع غزه الاتحصرواو اتضربوا ومات منهم غلط فى غزه

nor said...

مش لاقيه اي كلام
غير حسبنا الله هو نعم الوكيل
و انا لله و انا اليه راجعون بنقولها في المصيبه دي ..تحياتي لمجهودك و صبرك يا ابي هانم بجد انتي ما شاء الله صبورررررررررررررة

Son of Egypt said...

السلام عليكم


هقولك ايه

انتى لخصتى الكلام كله فى كلمه واحده

حكومة الوز بس ناقص حاجه وهى عيشة العز

تحياتى إبى وربنا ياخدهم كلهم مره واحده واحنا حالنا ينصلح

Son of Egypt said...

السلام عليكم


هقولك ايه

انتى لخصتى الكلام كله فى كلمه واحده

حكومة الوز بس ناقص حاجه وهى عيشة العز

تحياتى إبى وربنا ياخدهم كلهم مره واحده واحنا حالنا ينصلح

ماما أمولة said...

ربنا معاكم يارب

وسيبي الظلمة لله

جزاكي الله كل الخير يارب

قلم رصاص said...

مش جديدة على المسئولين المصريين اطلاق تصريحات غبية تحرق الدم

وكان على راسهم رئيس الوزاراء بنفسه
دا متخصص في الحاجات دي والله تقريبا


وانا افتكر اقتراح جميل لاخوناالمدون الجميل محمد حمدي لما قال : اقترح انشاء لجنة حكومية لمراجعة تصريحات المسئولين قبل النشر

مشكورة يا ابي وعلم وسيتم التنفيذ

في حفظ الله

«۩AhMeD 3LaM۩» said...

نص البوست خناق ايه ده!!!بعد كده يا تنشرو اسماء يا بلاش انا شكيت في نفسي :))
بخصوص المدونات فا انا مش بحتفظ بيها انا بروح احط اللينك بالاضافه للترجمه واخلع
بس في واحد عنده 200كومنت من بلوجرز مختلفه اجنبيه
http://sverdades.blogspot.com/
انا عملت المشوار ده من عنده

EmY said...

انا لا اقبل لا اقبل ولا بد ان تعلم اسرائل ان كده كخ و عيب و لا تلعب بالنار واوا ااح واوا ااح

يا حبيبتي لا حياة لمن تنادي دي ناس معندهاش قلب قادرين يعملو كده يبقي هايتأثروا من الصور و المجتمع الدولي شايف و ساكت

العرب دول اكبر وكسه في التاريخ سايبين الي بيحصل و ماسكين في خناق بعض الرؤسا العرب عاملين زي العيال الصغيره الي مش متربين

ربنا مع الفلسطنين

لورنس العرب said...

عندما سألوا المتحدث الرسمي للجيش الاسرائيلي في الزيره عن قتلهم للأطفال قال سبب وجيه، قال ان حماس بيطلقوا الصواريخ من الشوارع ولما بنيجي نضربهم بيكونوا العيال واقفين جنبهم فالصواريخ بتيجي فيهم هما كمان طيب واحنا هانعمل لكم ايه؟؟؟؟؟؟؟؟؟؟

الكلام ده كان اول امبارح

بس المشكله زي ما قلت لك في البوست اللي فات
العالم كله مصدقهم لأن فيه حالة عداء مسبقه ضد المسلمين
اما عن نشر الفيديو بين الاسرائيليين
فكلهم مجرمين يا آبي
لن يؤثر فيهم شيء
ولكن دعوتك محترمه وسنحاول التنفيذ

الربان said...

تحياتي

كثير من المسؤولين لا يجيدون التعامل مع الاعلام...و هذا بيسبب مشاكل كثيرة لهم.

يا ريت يتركوا هذه المهمة للمتحدث الرسمي باسم الوزارة او الهيئة...

و حتي إذا أفترضنا جدلا ان صور الجرحي و القتلي هي استعراض...فهذا يدخل ضمن الحرب النفسية و استخدام كل الوسائل
نحو شحن الرأي العام العالمي للتعاطف
مع القضية....

هناك قول مشهور معناه:

كل شيء مباح في الحب و الحرب.....

تحياتي و تقديري

بنت الغربة said...

معاكى حق ياابى
تصريحات المسؤولين دى بيقولوها علشان الكبير بتاعهم يسمعها مش علشان الشعب يسمعها لانهم عارفين ومتأكدين ان الشعب مابيضدحكش عليه
بس هم يهمهم ايه من الشعب ...
االمهم اللى مقعدهم على الكرسى مايكونش متضايق من كلامهم
ويتحرق بقه اى حد تانى
حسبى الله فيهم كلهم
هم هيروحوا من ربنا فين؟
تحياتى

3asheg.nawara said...

أنا سبت التعليج ده عند نوارة و جاي أسيبو حداكي كمان
ممكن يا غالية أدعوكي و ضيوفك تحطوا الغنوة دي في مدوناتكو

http://www.ashefaa.com/files/enshad/abo-rateb/mahma-kayam.rm

أنا مستحي منك لجل ما تجلت عليكي

hasona said...

السلام عليكم
الناس دي ( مسئولي الحكومة ) بيتكلموا كأنهم مش عايشين معانا وكأنهم في بلد أخر

احنا مش محتاجين تغير وزاري فقط
احنا محتاجين حاجة أكبر من التغير الرئاسي كمان- لأن حتي التغيير الرئاسي ليس كافي
،،،
كل وزير منهم بيتكلم علي كيفه بدون تفكير حتي - حاجات مش مقنعة حتي لطفل
وكأنهم تصوروا أنهم يقولوا ما يريدوا فانهم لن يحاسبهم أحد

حسبي الله ونعم الوكيل

،،،


مش قادر أكمل

تحياتي لك

Dr Ibrahim samaha said...

جزاكم الله كل خير

ربنا يعينك ويعنا

محمد الجرايحى said...

الأخت الفاضلة
السلام عليكم ورحمة الله وبركاته
أحيى جهدك الطيب
وأسلوبك الجميل فى الطرح
أسلوب مغلف بسخرية من واقع مخزى
فجاءت فى مكانها
تقديرى واحترامى
أخوك
محمد

أحمد كمال said...

آبي أنا عايز أشكرك على اهتمامك بالأزمة و نشاطك في كل مكان

أسأل الله ان يتقبل منك صالح الأعمال ، و أن يصلح حالنا جميعا ، و يجعل هذه الأزمة سبب لتوحدنا حول قضايانا الحقيقية

شقاوة شعب said...

بقولك ايه بقى يا آبى يا جميلة

انتى طلعتيها فى دماغى
عايزين حد فعلا يجيبلنا مدونات اسرائيلية ومواقع ومنتديات

وندخل على الحجات دى نكتب بالعربى وبالانجليزى .. هما كتير منهم بيعرف عربى والباقى بيعرف انجليزى
ونحطيلهم فيها صورهم وهما بيعيطوا وصور قتلاهم لأن دى اللى بجد هتعمل حرب نفسية
لأن صور شهدائنا بتفرحهم ... هما عندهم قناعة ان سفك دماء المسلمين ده قربة الى لله حتى لو ماعملوش اى حاجة وحتى ولو كانوا بيتمسكوا بس بأرضهم

انا كان ممكن أطلب الطلب ده على مدونتى ..بس حاسة ان هنا ان شاء الله هيكون له صدى اكبر .. وده المهم

فلو كتبتى بوست فيه الطلب ده وبدأت الناس تتفاعل وتجمعلنا اللينكات ونحطها مرة واحدة زى ماحطيتى ايميلات المنظمات الحقوقية
هتبقى شئ رائع

مستنية ردك على فكرة

تحياتى
شيماء

حرة المداد said...

حبيبتي ربنا يكرمك ويجزيك كل خير وينصر غزة بنا وبكل الشرفاء

عاشقة القمر said...

ازيك ياقمر انا جيت قوليك مع سلامه قبل ماقفل مدونه

حروف (دلو مرة ثانية وجرح ثاني سابقا) said...

نورتيني يا ابي وقريت البوستين القدام نفس الفكرةاظاهر انها مطلب عام طيب نتجوز عشان نطبق بئا الافكار الاستراتيجية دية
دمتي بالف خير بس مقلتليش عجبك البوست ولالا

همس الاحباب said...

جزاكى الله خيرا
وسوف بتم النشر والمساعدة بقدر الاستطاعة
وحسبى الله ونعم الوكيل
الموقف صعب للغاية فى غزة
والعرب فى نوم وسبات عميق

Mohamed Hamdy said...

بجد شكرا ليكى يا ابى على نشرك للموقع .. ربنا هيخليه فى ميزان حسناتك ان شاء الله .. كمان شكرا على تعليقاتك على مواضيعى ... انا بس كنت عاوز الفت نظرك لحاجه ان مقابله امبارح دى مكانتش اول مره اقابل فيها مدونين بالعكس انا من زمان جدا بحضر تجمعات للمدونين ... من كذا سنه حضرت تجمع كبير للمدونين فى مجلة كلمتنا كمان حضرت حفل توقيع كتاب مصطفى فتحى الى كان كله مدونين .. ناهيكى ان اقرب صحاب ليا فى العالم الواقعى مدونين بس .. متهيالى دى كل حاجه

تحياتى ليكى وبجد متشكر اوى .. تعليقاتك ودعمك بتعنيلى الكتير ... متقطعيهاش

الفقير الى الله said...

السلام عليكم ورحمة الله وبركاته

انا اسف على الكلام ده بس هما عارفين ايه اللي بيحصل وايه اللي بيعملوا جيشهم
ياسيدتي احنا مبنستعطفش حد احنا زهقنا بقلنا 100 سنه بنستعطف العالم مفيش حل الا المقاومة

مجهودك جميل
اسف على ردي
تحياتي

~*§¦§ Appy §¦§*~ said...

لكل اللى دعمونى شكرا ليكم بجد
واللى احبطونى ان شاء الله هنطحكم بكره لانى معنديش تركيز ويا جماعه اللى عاوز ينقل اي حاجه من هنا ياخدها انا معنديش مانع خالص طالما فيها فايده ومساعده للجميع

~*§¦§ Appy §¦§*~ said...

{ئيس جمهوريه نفسى
======================
صحتك يا ريس براحه على نفسك









محمد فوزى
========
ميرسى يا دكتور بس تكنوقراطى دى حلوه اوى انت عارف انى بصمجيه فى اللغه العربيه

~*§¦§ Appy §¦§*~ said...

حسن حنفى
===========
لا يا ضنايا انت لسه صغير امسك نفسك شويه وعض صحبك بس







واحد من البلد دى
================
انا كنت دايما بطمن عليك من اسلام بس حتى هو بقاله فتره مختفى الاختفاء الاعظم بالعكس انا بتبسط لما بتنزل بوست علشان بطمن على حضرتك منورنى دايما يا فندم والله

~*§¦§ Appy §¦§*~ said...

طارق
=======
لا حكومه الوز لو سمحت انما الشعب والله فيه امل يتحرك بس انت تمسك بالامل او حتى سور البلكونه







احمد الحيدر
==========
اهلا بيك ميرسى لحضرتك خالص مبسوطه بمتابعتك

~*§¦§ Appy §¦§*~ said...

soska
=========
طيب ليه بتعملى كده يعنى يا حبيبتى انا بقعد قدام الجزيره لغايه لما انام ونعمه ربنا عليا بتنسينى شويه الاحداث تقومى تجيبى كلامه تانى فى وشى طيب ليه انا غلطت فيكى ربنا يسمحك ويولع فيه






وومن
========
ليه ده البربور العربى جميل يمكن بيحرك مش هو يعنى الصور بتاعت الناس ان ناس تانيه تتحرك يا ميرا الامل فى ربنا

~*§¦§ Appy §¦§*~ said...

عارفه مش عارف ليه
=================
اللهم امين يا رب









حروف الدلو
===========

يا بنتى الجيران اشتكوا ارجعى لبيتك يومين وهحضر لكم حاجه والله ان شاء الله

~*§¦§ Appy §¦§*~ said...

انسانه عاديه
===========
ميرسى ويا رب هيجيب نتيجه لا تقلقى








انجى
=======
اها يا حبيبى هتلاقى فى البوست اللى فات الدبج جايب ليه لينك من الماسوفين على شبابهم

~*§¦§ Appy §¦§*~ said...

ابو حنف
========
ما هى الهبله لما تجنن تنكش شعرها على اخواتها وهو ده اللى بيعملوه







نور
=======
ميرسى يا حبيبى بس للصبر حدود والله عااااااااااااا

~*§¦§ Appy §¦§*~ said...

son of egypt
==============

لا اسمها حكومه الوز نازله تهز نورت الكوكب






ماما اموله
==========
ربنا يكرمك يا ماما يا رب

~*§¦§ Appy §¦§*~ said...

قلم رصاص
===========
واللهما هينفع معاهم دول عاوزين اباده يخرب بيوتهم








احمد
=====
لا والله مش اقصدك انت بس خليك شاكر لما تروح مدونه جر لينكها من الدوت كوم بتاعته وهاته ليه هنا وانا افضحهم فضيحه المطاهر يوم طلوعه على السطوح

~*§¦§ Appy §¦§*~ said...

ايمى
========
سياده اللواء
عرب خرسيس افندم حقك على حزرتنا يا فندم
ربنا يجننهم كمان وكمان هيجننوا ليه البنت معلش معلش








لورانس العرب
===============
ايوه هو اللى ضربنى بوشه على ايدى يا سعاده البيه
لا يا لورانس بيجيب نتيجه صدقنى فيه ناس متعرفش ومبتشوفش وده دورنا بقى فاهمنى

~*§¦§ Appy §¦§*~ said...

الربان
=========
يا استاذى العزيز
ده مش كلامهم اللى ملخبط ده تفكيرهم للاسف ومتحدث مين ده فى فتره طلعوا كدبوا بعض دى حاجه تكسف
وبعدين الكلام مش صح هما يعنى اللى بيروحوا يصوروا نفسهم ما التليفزيون اللى بيصور هما مبيطلوبوش من حد حاجه حتى لما الناس بتروح تزورهم فى المستشفيات برضه بالعافيه لما بيوافقوا ياخدوا من حد حاجه







بنت الغربه
===========
ده على اساس انه واقع على ودنه اذا كان هو بيطلع يقول تصريحات خايبه منيله بنيله

~*§¦§ Appy §¦§*~ said...

hasona
========
هما مفيش تنسيق وفاكرين الشعب غبي جدا مش فاهمين ان الطفل الصغير بقى فاهم نورتنى يا فندم







د/ ابراهيم
===============
شكرا يا فندم

~*§¦§ Appy §¦§*~ said...

محمد الجرايحى
==============
متشكره لحضرتك جدا ومنورنى دايما








احمد كمال
=========
اهلا بالناس المختفيه فى المدونات
نورت يا استاذنا

~*§¦§ Appy §¦§*~ said...

شقاوة شعب
=============
حبيبى بندور عليها وتابعى نواره نجم هتلاقيها بتجيب لينكات البوست الجاى ان شاء الله اكون جبت كذا واحده يا قمر تحت امرك







حرة المداد
==========
ربنا يكرمك ميرسى ليكى

~*§¦§ Appy §¦§*~ said...

عاشقه القمر
==============
ايه التهور ده بس فيه ايه يا بنتى







حروف الدلو
================
طبعا عجبنى جدا يا قمر هو انا اقدر

~*§¦§ Appy §¦§*~ said...

همس الاحباب
=============
ربنا يكرمك يا ابو همس








محمد حمدى
=========
انا قصدت تجمعات خير زى دى يا محمد وميرسى لكلامك خالص

~*§¦§ Appy §¦§*~ said...

الفقير الى الله
==============
لا حضرتك والله فيهم اللى مغيب وفيهم اللى مش عارف وعلشان احنا نايمين على ودانا وهما مستخدمين الاعلام صح فده لصالحهم انما احنا اخرنا فى الاعلام نجلا والحصان
فحاجه زفت لازم لازم نكسف على الميديا والنت كمان ونورت يا فندم