عديها على خير بقى


اولا كل سنه وانتم طيبين وحلوين وعاملين دايت فى رمضان ثانيا بقى بما انى واحده شايله الصح والغلط على كتافى من قديم الاذل وواجع كتافى بجد هقولكم بعذ من الحاجات اللى بتعمل ليه صداع فى الحياه وانتم قولوا ليه انا اوفر ولا لا

الموقف الاول
=========

بمناسبه رمضان جارتى الحشريه :- تعالى صلى معانا التراويح فى الجامع
آبى :- لا معلش مش بصلى فى الجامع انا بحب اصلى فى البيت مش عارفه ساعات بحس ان الناس بيشتتونى فى الجامع
جارتى :- يا ستى ليه دى بتبقى حلوة والقعده جميله
آبى :- وحواجبينى مرفوعه خمسات فى سبعات ازاى قاعده حلوة انتم قالبينها كافيه هناك
طبعا الفضول هيأكل فيه وعاوزة اعرف فيه ايه بس تقلت المرة دى قولت لها بكرة هاجى معاكوا عدت عليا قولت لها تيجى نروح بالعربيه قالت لا احنا كتير وبنتمشى قولت احسن برضه مشينا بتاع ربع ساعه كل اللى بيحصل ضحك وهزار فى الشارع بصوت عالى جدا وانا بتنيل بضايق من الموضوع ده جدا ومش بحب كده بحس شكلى وحش وصلنا الجامع لقيت بلا استثناء الناس رايحه تنقد بعض شوفتى دى لابسه ايه وشوفتى دى بتصلى ازاى وووووووووو كل اللى تتخيله فى انتقادات وبعد الصلاه رجعوا للوكلوك تانى بزمتكوا ده ينفع من حقى اتغاظ ولا لا ورجعت لقواعدى سالمه وبصلى فى هدوء جدا فى البيت حتى على الاقل ابقى ضمنه اللى هأخده من حسنات مش هيتنطر منى كده ولا كده فى التريقه على الناس والنقد وانا مصيبه ولسانى ميتوصاش صلاة الفجر كمان بيروحوا فى الجامع الستات بسمعهم بيدقوا على بعض بالمقشات زى الساحرات ههههههه بيصحوا بعض وبينزلوا من غير راجل النبى ده يصح
ده رمضان اللى فات على فكرة ومن ساعتها فعلا حرمت ولا هعملها خالص

الموقف التانى
=========
السواقه وطبعا احنا فنانين فى الفن التشكيكى و الابداعات على الطرق يعنى الطريق رايح وطريق راجع هوووووب يتقفل واحد لحادثه او ماشى ببطئ تيجى ازاى بقى لازم نبدع ونفنن ونروح نمشى من الطريق التانى ما هو ده الانفراد بتاع المصريين فى كل حاجه فى التصرف والجيش بيقولك اتصرف يقوم الاتنين مقفولين
الله طيب ما كده ولا هنوصل بدرى ولا هتتحل ابدا ليه مش بنصبر وتيجى تكلم حد
تلاقى فلنه داخليه طالعه لك من الشباك ويا سلام لو سواق ميكروباص والنبى ارحمينا يا طنط احنا صايمين اللهم انى صايم
سبحان الله يعنى بعد ما يطول لسانه ويمشى اصلا غلط يقولك اللهم انى صايم طيب هو كان ناسى ولا ايه ولا الصيام ده عن الاكل والشرب بس على فكرة كل الفئات او اغلبيتها بتعمل كده فى رمضان وبتغاظ من اللى يعمل مصيبه ويقولك اللهم انى صائم يا ريت نتحكم فى غضبنا شويه ونهدى علشان لو الطريق مقفول منقفلهوش اكتر
المثلث العاكس يا جدعان مش بيتعلق على العربيه من ورا بجد ايه العقول دى ده بيتحط فى الشنطه علشان لما نعطل انا بلاقى ملاكى كمان وميكروباص معلقينه على الزجاج ورا والعربيات النص نقل اغلبيتها وعلى طريق الزقازيق ومش عارفه ايه الحكمه معلقينه قدام يمكن عندهم فى بلدهم قانون تانى يا ريت بتوع الشرقيه يفيدونا وبجد ده غلط لو جهل من الناس اللى يعرف يفهمهم يعمل كده واللى الاقيه حاطط تلات مثلثات طيب ليه بيخزى عين الظابط هههههههههههههههه ومش بعيد بكره الاقى الناس لابسين المثلث فى دماغهم علشان يحلفوا انه معاهم فى العربيه هههههههه المثلث بيتساب فى الشنطه علشان لو عطلت تحطه على مسافه عشره متر من العربيه

الموقف التالت
========

الخيم الرمضانيه انا طبعا مش هقولكم حفظاهم ظهرا عن قلب وممكن اسمع لكم بالاماكن والعناوين بجد انا اخدت سنه تقريبا كنت بروح يوم ويوم بس بدافع الفضول مش اكتر لقيت ان مش ده رمضان خالص يا جدعان رمضان مش سهر وسماع اغانى وكركره طول الليل مع الاصحاب ممكن اقابل اصحابى ساعه بجد ودى بتكون حلوة انما مش تفانين يعنى واسمع المطرب ده وارقص هو ده جو رمضان واللى بيغيظنى البنات بالذات اللى بيجوا فى خيمه سوليدير دول مصيبه بجد ايه دة وبلاش دى شوفوا بتاعت دريم اللى بيتذاع منها على التليفزيون اه رمضان نخرج ويحب اللمه انما مش السرمحه ما احنا طول السنه متسرمحين اصلا هههههههههههههههههه طيب بزمتكوا ليه حق اتغاظ ولا انا اوفر

ملحوسه مهمه جدا جدا :- يا شوباب ويا شوبات انا فاتحه الكومنتات علشان نتناقش مش اكتر وكله يرد على بعضه بس فى حدود الادب والاحترام فاى حد يرد على راى اى حد هو حر انا مش عامله الكومنتات علشان حد يدخل يقولى انتى هايله وكميله وقمر وعقلك يوزن اتنين كيلو بتنجان لا انا عاملاها علشان نستفيد او على الاقل انا كمان استفيد

حكمه الامبراطورة
=========

الطول طول الباب والعقل عقل الذباب


كان معكم عسكرى مرور بدرجه لواء آبى هانم

109 اخبط وقول رايك:

amr said...

كل سنة و انتي طيبة و ربنا يكملك بعقلك :)

fahd said...

انتى هايله وكميله وقمر وعقلك يوزن اتنين كيلو تفاح


لا بجد

جزاكم الله خيرا ونفع بك


انا بدور علي علاقة تربط رمضان بالمسلسلات والافلام ومواسم الاذاعه والتفلفزيون والخيم

مش لاقي


خير




كل سنة وانتي طيبة

blue-wave said...

ابى الجميله
كل سنه وانتى طيبه
انا بس عايز اقول ان كل موقف من التلاته دول يفرس اى بنى ادم عاقل
الموقف الأول للأسف موجود فى صلاة الستات فى الجوامع
وكفايه انى اقولك اننا بنبقى سامعين حواديتهم ولا كأننا فى سوق مش فى مسجد
والتانى دى عادة الشعب المصرى اللى بيحاول يستذكى ويثبت لنفسه انه اذكى من كل الناس اللى واقفه ورا بعض دى
طيب هوا مايسبقهمش ليه؟؟؟
اما الخيام الرماضنيه دى ف بيقال ان الصيام لا يرفع الا بها:))
حاجه بجد تحزن اننا نصوم بالنهار ونضيع صيامنا باليل
مش بس فى الخيم دى لكن فى المسلسلات والفوازير والخروجات اللى مالهاش لازمه ووووو
ياريت بجد نعرف قيمه رمضان
معلش طولت عليكى
وكل سنه وانتى طيبه

ماء تشرين said...

عندك حق والله بس انا مش معاكى في صلاة التراويح الى فى البيت هى حلوتها الجامع بس مش الجامع بتاعكو ههههههه
لا بجد انا روحت يمكن تلات اربع جوامع جامع القى في الستات جايبين عيالهم الصغيرين وكأنه منتزه مش جامع والتانى كل واحد عايزكى تبقى على مزجها وكلهم ماشاء الله بقم على جمعه كلهم وستات مصر يموتو في الفتوىالمهم انى في الاخر استقرت على واحد وحست فيه انى بصلى وربنا يتقبل يارب منا ومنكم اما بنسبه للخيم فاانا مش عارفه عندنا في اسكندريه في ولا لا مع انى اعتقد طبعا انو في بس انا عمرى مافكرت اروحها مش عشان حاجه بس مفيش وقت اساسا مهو الفضول وحش
ورمضان كريم عليكى يارب

حسن حنفى said...

السلام عليكم

كل سنه وحضرتك طيبه

للاسف الناس بتفنن في تضيع الحسنات في رمضان

باي طريقه ومعظم الناس عندها سياسه

ان الصوم عن الاكل والشرب بس

ومسموح يعملوا اي حاجه

واله فيه ناس حتي مش بتصوم

ومش بتتكسف من نفسها وبتمشي وهي بتشرب

سيجاره في الشارع

؟؟!!!

والواد اللي بيمشي مع بت وهو صايم

كل ده بيضيع الصيام

يعني الحسنات اللي بياخدوها في الصيام بيضيعوها في النم والغيبه و.....الخ

وومن said...

أبي
كل سنة وانتي طيبة

بصي الي انتي بتقولية ده حصل معايا بالظبط امبارح ودي اول مرة اروح اصلي في الجامع

بس انا مسكتش بعد الصلاة روحت للإمام وقولتلة علي الهرج والمرج اللي بيحصل ووعدني انه هاينبه عليهم يتلموا وعرفني بالمدام علشان لو اي تجاوز اقولها وتطلع كارت احمر للأخت اللي بتصلي

بالنوسبة للخيام بقي مش عارفة اقول ايه بصراحة بس في ناس فاهمين رمضان غلط

كل سنة وانتي طيبة وربنا يتقبل منا ومنكم اللهم آمين

مهندس مصري said...

كل ملاحظاتك صح يا آبي
و عقلك يوزن 3 كيلو بدنجان :)
:D
هههههههههه

د/اجدع بنوته said...

أبى هانم بتفكيرها اللوزعى

ليه بس تجيبى سيرة الشرقيه

بالاضافه كنتى بتعملى ايه اصلا ف الشرقيه

ههههههههه صباح الفل

وكل سنه وانتى طيبه

واهو المثلث عاكس يتحط ورا يتحط قدام

المهم يعكس وخلاص

لولاااااااااااااات

انا بقى لسه مجبتوش

هو مش المثلث اللى كانوا بيدهولنى ف المرور ده

مثلث برده

ولا م ام واب تانيين

ههههههههههههه

طبعا ملاحظاتك كلها ف السليم

يارب الكل يعرف ان الصور مش صوم بطون وبس

الصوم صوم جوارح كامله

تحياتى

الطائر الحزين said...

كلها تلاهى وملهيات
اللهم اغمض اعيننا عنها
وتقبل منا وارحمنا

اسكندراني اوي said...

طب بالذمه دا وش واحد يقول تعليقات مفيده وفي الصيام
يا دي الحوووووووووسه
طب بلاش 2 ك بدنجان نخليهم 3 كيلو

Abdou Basha said...

على فكرة الأصل في التراويح انها تكون في البيت
بس الناس بتحب اللمة والونس

مصــــري said...

آبي هانم بتنجاني

كل عام وانتي بخير وسعادة وهنا
وانتي مش أوفر ولا حاجة.

صلاة المرأة في بيتها أفضل.
وسواقين الميكروباص دول كائنات أخري ممنوع الاحتكاك بهم تماماً.
وبما أني شرقاوي الأصل شبراوي الجنسية هارد وأقولك اني شوفت نفس المشكلة علي طريق أسيوط الصحراوي.
تقدري تقولي ان التوعية المرورية منعدمة.

ايه الكلام الكبير ده؟

ايه علاقة رمضان بوجود خيم له؟
الحقيقة انا جاهل خيمياً.

التنويه الأخير كان كويس وفي وقته عشان المعركة الحامية الوطيس اللي حصلت في تعليقات البوست اللي فات.

أصلي بحب اتفرج من بعيد.

كل سنة وانتي طيبة
أسامة

appy said...

OpenID appysaid said...
===========================

معلش يا جدعان هرد على الشاب ولا الشابه اللى داخل بشبه اسمى ما هو انا ناقصه
لا حضرتى ولا اتنقبت ولا اتحجبت بس حضرتى محبتش الحاجات دى ولا قبلتها حضرتى مش محجبه وربنا يهدينى يعنى بس عارفه الصح من الغلط
ولما رحت معجبنيش الناس اللى هناك
على فكرة لان مش كلهم ولاد ناس فيهم اللى بس معاهم فلوس وخلاص ودول بيبقى حالتهم صعبه اوى يعنى ناس ولا تعرف دين ولا احترام ولا حاجه
وعلشان تهدى مش بروح دلوقتى والكلام ده قولت من سنه تقريبا او اكتر رمضان قبل اللى فات
يا ترى هديت الحمد لله للرد
نورت وشرفت

appy said...

OpenID appysaid said...
============================
اه نسيت اقولك حجابى ولا نقابى ملكش فيه حضرتك يعنى وبعدين انت تعرف منين هو انت تعرفنى شخصيا ولا حاجه ولا تكونش ممشى ورايا حد يراقبنى يااااا على الاهتمام الزايد
بس النبى بلاش اللهى يخليك يعنى تدخل باسمى او بحاجه شبه اسمى وعملتها قبل كده وانا فوتها
ومن غير ما تنور المرة دى

حـــــدوتـــــة said...

السلام عليكم

كل سنة وانتى طيبة ورمضان كريم

والله انا امى بتنزل تصلى التراويح
بس بعد اللى سمعته ده هخليها تصلى فى البيت احسن
اما موضوع الخيم الرمضانية ده فربنا يرحمنا جميعا من الزنوب اللى بتحصل هناك
بس السؤال اللى ديما بييجى على بالى
مش الشياطين بيبقوا محبوسين الشهر ده
امال المصايب دى كلها مين السبب فيها
ده على كدة الشياطين مظلومين معانا واحنا السبب
ولا انتى ايه رأيك

سلالالالالالالالالالالالالالالالالالالالالالالالالالالالام

مواطن مصرى نايم said...

كل سنة و انتى طيبة يا ايبى
ياللى مش كميله و لا عقلك يوزن اتنين كيلو بتنجان و لا هايله و لا قمر

ههههههههههههههههههه
اى خدامات مقلتش حاجة من اللى قلتى عليها

بس بالنسبة للبوست بقى
عارفه بالنسبة للجامع و الستات و كده
انا ولدتى بتروح
بس بتبقى فحالها
لان فعلا فى ستات كتييير زى ما بتقولى كده

و بالنسبة لحكاية اللهم انى صايم
لو دخلتى عالضاحكون حتلاقنى كاتب بوست كده

بوست جميل يا ايبى

تحياتى يا امبراطورة هانم يا صاحبة الحكمة اللى فأخر البوست
هههههههههههه

اسلام

سمو الأميرة سارة said...

كل سنة وانتى طيبة يا احلى آبى يا اللى دماغك توزن الدنيا كلها
بجد مش استفزاز يعنى اللهم انى صايمة ههههههه

احم انا هرد على الموقف التانى الاول علشان عندى اعتراف صغنتوت
انى اول مرة اعرف فايدة المثلث منك .. بجد ربنا يكرمك بس انا يعنى ماعنديش عربية اكيد لو كان عندى كنت هحاول اعرف ع الاقل انا شايلاة البتاع دا ليه

بالنسبة للموقف الاولانى فجيتى ع الجرح انا روحت التراويح 3 مرات فى حياتى
وبجد حسيت انه ياريتنى بصلى مع الرجالة لو كان ينفع
حكاوى .. عيال بتلعب وتجرى فى المسجد .. بصة من فوق لتحت بحسها بتعمل كوبى وبست للهدوم فى دماغها علشان تبقى تروح تحكى للى ما شافتنيش ..بجد حسيت انى كارهة نفسى وفعلاً حرمت اروح
اعرف ستات بيروحوا يصلوا كل الصلوات فى المسجد واصلا فى الاسلام مش مستحب ابداً ان الست تروح تصلى فى المسجد كتير كده ربنا يهدى يارب

رمضان كريم يا قمر وما تعصبيش نفسك حبيبتى

Amgad said...

علي فكرة
انتى هايله وكميله وقمر وعقلك يوزن بلد
ههههههههههههههه
الموقف الاول انا متفق معاكي
بس ده مش سبب اني مروحش لو عايزة اروح
يعني ممكن تروحي وتبقي كويسة
او مش تعملي زيهم
الموقف التاني تقولي لمين
الموقف التالت
حرام عليكي تضيعي الخيم الرمضانية
ده حتي دينا بتطمن زوارها
في رمضان انها لسه كويسة
والاصابة بسيطة وماثرتش عليها
وهترجع في رمضان احسن من الاول
طيب ده كلام يخش العقل

محمد said...

أبى
أولا لاأعلم أن كانت ٌبلت لهم صلاتهن أم لا ولكنى أعلم أنهن بنميمتهن على الاخريات قد كتب لهن سيئات
فلا هن أتبعن القرأن ولا أتبعن سيدنا محمد
بأمانه
لهن أقول أنتن عار على الاسلام والمسلمين
فالمسلم سواء رجل أوسيده لايتطلع الى غيره ويفحصه ولايتكلم قى سيرة الاخرين
ولايحسد ولايحقد ولايكذب

أبى أن كانت هذه هى صلاتهن فصلى بمنزلك أكرم لكى وأخفض للبصر والبصيرة

محمد said...

أضيف ,أقولها للكل الاسلام ليس فقط حجاب ولاجلباب ولاذقن ,ألاسلام عمل صالح
الاسلام صدق ,ألاسلام أمانه, الاسلام أعطاء صاحب الحق حقه
الاسلام عدل
الاسلام عداله
الاسلام كرامه
الاسلام حفظ خصوصية الغير
الاسلام علم وليس جهل
حسبى الله ونعم الوكبل فيمن
يتجاوز مبادىء الاسلام ويسرق ويغش وينم

وجهة نظري said...

عامله دوشه ليه مش كفايه الصداع إلي عندي

حكاية الستات في الجامع دي بدعه أكاد أقول أنها ضلاله ... بدون مبالغه... هما بس عايزين يقولولك رايحين الجامع وجايين من الجامع، خيبه بعيد عنك ... وإلي بتنزلي في صلاة الفجر دي ... إيه الخيابه إلي إحنا عايشين فيها دي؟

المثلث دا بيحطوه زينه .... فلح بعيد عنك ... زي موضوع السي دي هات لما يلزفزها علي العربيه كده علشان تعكس النور

ما هي البلد كلها بقت فهلويه

ويعني إيه يا هانم بتروحي خيم يوم ويوم دي؟؟؟ معندناش حريم بتروح أماكن زي دي واصل يا ولد

أهو رزق الهبل علي المجانين ... زي المسلسلات الرمضانيه والإعلانات

يالا روحي إفطري ... المغرب بيدن في مصر أهو ... يا محظوظين، أنا لسه فاضلي ساعه

كل سنه وإنتي طيبه

فزلوكة said...

أولا ككل سنة وإنتى طيبة
ثانيا وبما إن إحنا الإتنين مشتركين فى النرفزة فأحب أقولك
إن أنا دمى بيتحرق من موضوع الخيم دا بجد والله ببقى خلالاص على آخرى من إعلاناتها

بس يا بنتى المسجد إللى عندنا مش كدا خالص
يعنى بجد بيبقى فيه روحانيات حلوة أوى
وأحيانا بيكون فى حاجات غلط
بس يعنى مش بنسبة كبيرة
عموما
رمضان كريم يا قمرة وينعاد عليكى بالخير واليمن والبركات

tamer.sala7 said...

كل سنة واتنتي طيبة

بالنسبة للموقف الاول لا تعليق لأن الستات ناقصات عقل ودين
:P
الموقف الثاني هو فعلا السواقة بتخلي الواحد عصبي بالذات بالنهار يعني
رمضان والصيام ملهومش دعوة
بالنسبة لكمية المثلثات اللي علي طريق الزقازيق ده بمناسبة ان الشراقوة معروفين انهم اهل كرم علشان كدة مينفعش يجيبو مثلث واحد
:D
بالنسبة للموقف الثالث موضوع الخيم الرمضانية دي انا مش بحبها بس انا مرة اتعزمت علي سحور في خيمة رمضانية والمفجأة كان في راقصة تخيلي واحد بيتسحر علشان ينوي الصيام وهو بيتفرج علي الرقاصة والاخيب بقي فطار علي انغام الدي جي ويا سلام بقي لو دي جي وليد الحريري عايز اقولك البنات مش بتاكل قد ما بترقص

بالنسبة للملحوسة المهمة اللي عايز اقولهالك : البلوج بتاعتك بقت تقيلة اوي من بعد النيو لوك اللي اتعمل ومش ديما بتفتح معايا حاولي تتصرفي

عالم حبيب said...

السلام عليكم

وكل سنة وانتي والمسلمين جميا بخير

شوفي .. موضو المسجد ده معاكي حق فيه .. وان كان النبي صلى الله عليه وسلم أمر بعدم منع المرأة من الذهاب للمسجد .. وقال : ان صلاتها في بيتها أفضل .. لكن اللي بيحصل دلوقتي مثل ما وصفتي لا يمكن التعليق عليه الا : ربنا يهدي .. ومش كل الستات .. في ناس وناس

تعليق على موضوع السواقة هاقولك حاجة يمكن تضحكك ويمكن تبكيكي على الحال عندنا في مصر .. طبعا انا معايا رخصة مصرية .. وهنا في دبي باحاول اطلع رخصة لأن الحياة هنا مستحيلة من غير سيارة لأن الدنيا زحمة والمواصلات صعبة .. تخيلي اني صارف على الرخصة الى الأن حوالي 7000 درهم .. يعني 10.000 جنيه مصري تقريبا .. ويوم قلتلهم ان معايا رخصة مصرية .. طبعا التعليق : ان فيما معناه بلها واشرب ميتها

الحمد لله ان كان في خيم رمضانية اسمها " السحور الراقص " اظن انها مش موجودة دلوقتي

تحياتي وربنا يوفقك

محمد فوزي said...

والله يا آبي هانم التعميم مرفوض وكل واحد ادرى بحاله , يعني اللي هتحس نفسها بتروح الجامع بتستفيد وتخشع اكتر تروح طالما فيه التزام , اللي هتحس انها هتصلي احسن في بيتها يبقى خير وبركه ,

انما الفجر لوحدها من غير راجل ؟
ها هاها هااها ها ها
( ضحكه مشمأنطه )

بالنسبه للخيم بقى , للأسق في ناس بتتعامل مع ربنا غلط , فاكرين ان المسأله استغفر الله حقي وحقك !!

احنا مش عبدنا وصومنا وتعبنا أهو , نفرفش بقى ولا اييييييه ؟

وعلى هذا النحو لو ركزتي شويه هتلاقي اسوأ احوالنا مع ربنا بتكون بعد عباده من وجهة نظرنا مرهقه

هي اللمه حلوه , بص رقاصه في رمضان أكيد نشاذ

هذا وبالله التوفيق

Habiba said...

شوفى هو عندك حق

بس حكايه المثلث دى والله مش عارفه السسواقين بتعمله كده ليه

غالبا والله بيعتبروه نوع من التزيين للعربيه والا مش هيعلقوا تلاته احيانا

بعدين مالهم الشراقوة ياست ابى؟؟

ها؟

كل رمضان وانتى طيبه

blackghost said...

ابى انا بقول مش فاهم اية العلاقة اللى بتربط بين رمضان والمسلسلات والخيم المفروض دة شهر دينى حد شاف فى الدنيا شهر دينى يتعمل فية كدة.اية حكاية بتنجانى دىعلشان انا لسة جديد بس.3لية انا حاسس ان الملحوظة الاخيرة فيها تنبيط عليا مش انا اعتذرت.ما تقوليلنا رايك فى المسلسلات السنة دى خصوصا هيمة وزمن الرعب والحب علشان الاتنين يفرسو


معلش اصلى باين مهيس شوية

nody_1987 said...

ابى كل سنه وانتى طيبه

الستات بتوع التراويح اتفرجى عليهم لو اعتكفوا ليله
كل واحده بتيجى
كل واحده بتيجى بسندوتشاتها وشايها
وكانهم طالعين رحله
وطبعا الاطفال حولين المصلين وكانها حضانه
حاجه تقرف
اما بقى بالنوسبه للطريق
فا احنا شعب المعجزه
ماحصلناش فى الاستعباط

والخيبه الرماضنيه دى نوع من انواع النطاعه
الناس دى لو صايمه بالنهار على حق ها تستخسر تضيع صيامها على الهلس
انما تقولى ايه كله بقى ديكور

مسلم said...

‏وكل إنسان ألزمناه طائره في عنقه‏
اعتقد ده الرد المناسب يا ابى
بصى مبدأيا موضوع صلاة المرأه فى الجامع انا مش حابه بس مش هقولك مينفعش
اللى هقولهولك لو انتى شايفه انك هتبقى اقرب الى الله وخاشعه اكتر لو ورا امام مسجد او لو هتصلى يعنى فى المسجد صلى فى المسجد ومش شرط تبقى مع الناس دى لانك هتتحاسبى عن نفسك مش عنهم

اما موضوع السواقه بقا فده بقا شىء عادى لان لو كل واحد مصرى مخرجش عن الصف ميبقاش مصرى

الخيم بقا دى حاجه للى عاوز يظبط مزاجه وكبر الجى ويروق الدى ومش فارقه معاه ده مش بعيد يكون بيستنى رمضان علشانها
عموما ربنا يهديهم
.............
على فكره يا ابى انا عجبنى ردك اوى على الاخ الى داخل باسمك ده لانى مقتنع بقلامك ميه فى الميه مش كل بنت مش محجبه تبقى مش كويسه والعكس صحيح برغم ان الحجاب مطلوب بس لازم يكون عن اقتناع ورضا علشان لما تلبسه متقلعهوش تانى والمفروض اللى يتكلم فى حاجه زى دى يدعى بالهدايه مش اكتر وكلنا بنغلط المهم نعرف غلطنا فين ونحاول نعالجه
عموما ربنا يهدينى ويهديكى ويهدى كل المسلمين يارب
معلش طولت عليكى
علاء

kochia said...

والله كل سنة ببقي عاوزة اروح تراويج الجامع
بفضل اني اروح جامع بعيد معرفش فيه حد عشان الرغي
والريحة
والعيال
حاجاة غريبة جدا مش عارفة ازاي بيعملوها

والخيم بقي الله يعفينا
مش عارفة اعلق اقول ايه
مش عارفة ليه الناس فاكرة انها لازم تكافئ نفسها علي يوم صيام بانها بالليل تعمل كل اللي يتعمل زي ما يكون مينفعش اليوم يعدي من غير موبقات
لازم شوية موبقات علي الماشي

مش عارفة ايه ممكن نقترح لحل ده

تحياتي

جبهة التهييس الشعبية said...

يا بنتي انا حرمت انزل الجامع اللي قصاد بيتنا على طول بسبب الطبقية اللي فيه
اه والله
العيال ولاد السكان وانت بتصلي يركبوا على راسك وعلى ضهرك

عادي انا مش باتضايق من الاطفال بالعكس انا باحب الاطفال تبقى في الجامع وتعمل دوشة وتعمل اللي نفسها فيه اصلا الجامع ده المفروض انه بتاعهم هم

لحد ما مرة ابن بواب دخل وكان ابوه بيصلي التروايح مع الرجالة
مجرد ما الواد دخل المسجد وكل الناس اللي لسة مسلمة من الصلاة هبت في العيل ونزلوا فيه زعيق لحد ما الواد يا حبيبي اتفتح في العياط

وكل ده ليه؟ مش عشان عيل ولا حاجة
هو صحيح مسك الميكروفون واحنا بنصلي وقال الوووووووووو
:))
بس ما كل عيالهم بيعملوا كده واكتر من كده كمان

بس طبعا عيالهم يعملوا اللي هم عايزينه لكن ابن بواب يدخل على اسياده؟ مش كفاية سايبين البوابين يصلوا معاهم

من ساعتها ما رحتش تاني ومش ح اروح

تخيلي في جامع الناس فيه سواسية امام الله وناس بتتكبر على بعض
تفتكري يعني وضع الصلاة اللي بيصلوها ايه وهم بيتصرفوا كده مع طفل لمجرد انه ابن بواب

انسان بلا عنوان said...

الموقف الاول:
ـــــــــــ
جارتك ( اللى قولتى عليها حشريه ) ( وش مغمض عينياه ويتحرك يمينا ويسارا ))..انها تقولك تعالى صلى معانا فى الجامه بنا يجازيها خير على الدعوه ...انهم يروحوا بشكل غير لائق وضحك فى الشارع فده غلط...خير صفوف النساء اخرها ليه؟... اعتقد عشان هتبقى فى اخر صفوف النساء فتكون اولهم ذهابا بعد تأدية الصلاه ومتعدش للنميمه والله اعلم

"بيصحوا بعض وبينزلوا من غير راجل النبى ده يصح "

يصح ورب النبى ( عليه الصلاه والسلام )...طالما جوزها عارف عادى ...( لا تمنعوا اماء الله ان يذهبوا الى المساجد ) او كما قال ص
والاحسن استفتى شيخ عن الاولى ..وعموما كله خير

الموقف التانى:
ـــــــــــ
متفق معاكى تمام وبستغرب ولاحظت حكاية الاستعجال دى فالسواق يسد الاتجاه المعاكس للطرق بالمره بقى
بيمشوا الظاهر بمبدأ لنعيش عيشه فل لنموت احنا الكل
وصحيح بيتزاكوا والصبر قليل
موضوع انى صائم ده مش محتاج تعليق الا ان اقول اصله ...حديث ما معناه ان الجمله تقال لمن شاتم الصائم مش العكس ..ان الشتيمه تكون من الصائم ..!!
(اما بقى انه يقول لك انتى اللهم انى صائم فممكن يكون فيه سبب تانى ..!!).

المثلثات اوفيتى الكلام فيها ...بس اقول ان الناس اغلبهم بيخاف فبيظهرها من الخوف مش اكتر....ولو حصل حادثه او عطل ..اظن ان كتير منهم هينسى المثلث اصلا ...هو بتاع ايه المثلث ده اصلا ؟؟؟ هههههههه

الموقف التالت :
ـــــــــــــ
الخيم الرمضانيه ..انتى ادرى منى انا عمرى مرحتها
بس على وصفك وعلى ما اسمع عموما
عندك حق وليكى حق تتغاظى
اتغاظى براحتك يا ابى مش تزعلى

اما عن الحكمه
ــــــــــــ
سؤال من غير متفهمينى غلط هو انتى
طويله ولا قصيره ؟ هههههه

اخوكى الصغير محمود
وكل سنه وانتى طيبه ورزينه كده دايما

الربان said...

تحياتي

و الله حضرتك قلتي كل ما في خاطري...

بالنسبة للصلاة في المسجد بالنسبة للمرأة...قرأت و سمعت كثيرا عن الضوضاء
التي يحدثها الاطفال الصغار الذين بصحبة
امهاتهم....و ايضا الثرثرة بعد الصلاة.

بالنسبة للفهلوة المصرية...فعلا نحن كافراد مسؤولين...عن السير في عكس الاتجاه
و عن اشياء اخري كثيرة في سلوكاياتنا
اليومية التي تزيد من عذاب و تعب الناس....و لو سمعوا ووعوا الحديث الشريف فيما معناه " اعطوا الطريق حقه..."....لكان وضعنا غير هذا...

بالنسبة للخيام الرمضانية....اعتقد
ان ما يحدث فيها منافي لتعاليم الدين
الحنيف....لكن البحث عن المال و المكاسب
سواء بطريق حلال او غير ذلك اصبح هم الكثيرين منا...

احد المطربين اجره عن الليله الواحدة
300000 جنيه نعم ثلاثمائة الف جنيه..
و احدي المطربات اجرها 250000 نعم
مائتا و خمسون الف جنيه في الليلة
الواحدة.....

رمضان شهر صلة الارحام...و العبادات
و التقرب الي الله.....ياريت مرتادي هذه
الحفلات و الخيم يتبرعوا بمصاريفهم في الخيم
الي مستشفي او اطعام مسكين او اي من مصارف الخير الاخري...

شخصتي بعض من امراض المجتمع المصري...جزاك الله خيرا...

تحياتي و تقديري

appy said...

amr
=========
ونات طيب يا عمرو وبخير وميرسى لعى الدعوة نورت الكوكب






fahd
========
انت بتظهر مع فوزازير رمضان ولا ايه يا فهد ههههههه
كل سنه وانت طيب وبلاش الغيبه دى يا حج فهد
مدورش دى موروثات معاتيه عادى يعنى علشان مش تتعب

appy said...

blue-wave
========
اهلا اهلا لا يا سيدى طول براحتك الكوكب مفتوح لكل الاراء
واهو انت منورنا
الا حلوة مش بيرفع الاعمال الا بالخيم دى ليه هما بيقفوا فوقيها هههههههههه
نورت يا دكتور وميرسى ليك






ماء تشرين
============
يا حبيبى يعنى انا هقعد ادور على جامع بصى انا من زمان وماما معودانى على كده فعلا انى اصلى فى البيت وبعدين القاهرة الجديدة كلها مش فيها كام جامع منهم واحد اصلا زحمه جدا
والله عارفه ان لها حلاوتها بس بحس فى البيت تركيز اكتر بالنسبه ليه
احسن متجربيش الخيم هتضايقى صدقينى
كل سنه وانتى طيبه ومنورة الكوكب

appy said...

حسن حنفى
===========
وانت طيب يا حسن
ربنا يسهل ونحافظ على الحسنات دى لو نقدر وفعلا مش صيام عن الاكل والشرب بس
نورت وشوفت تعليقك على بوست الصداقه والحمد لله انك اقتنعت سعيده بيك خالص






وومـــن
==========
ههههههههه حلوة كارت احمر دى فعلا لو عملت كده واثقه انها هطلع للكل
الخيم حلاوتها فى اللمه والاكل الحلو انما بجد مش المسخرة وقله الادب
نورتى يا ميرا يا كميله

appy said...

مهندس مصرى
===========
يعنى اطمن يا هندسه هعيش من غير فرسه لاخر الشهر هههههههه كل سنه وانت طيب يا بشمهندس ومنورنى دايما







د/اجدع بنوته
===============
سمسمه الكميله والله يا بنتى ما انتى عارفه ده طريقى وانا رايحه عند مامتى لا يا سمسم حتىالناس فى السواقه حاجه صعبه مووت بصى بتوع الملاكى مش كلهم فيهم ناس كويسه الميكروباص والسرفيس والعربيات الربع نقل من اول بلبيس ببقى هموت واتشل منهم بجد وبعدين ما هو انا لو كنت بروح من طريق تانى كنت انتقدتهم برضه لو بيعملوا غلط هههههههه
على فكرة المثلث هنا كمان فيه ميكروباصات حطه كده ههههههههههههههوملاكى
مش عارفه بيدوه لكى ولا لا يا سمسم انا لسه مجددتش الترخخيص بس ان شاء الله يطلعوا قرايب ههههه
نورتى يا دكتورة

appy said...

الطائر الحزين
=============
دى ولا ملاهى السندباد بجد
نورت الكوكب وكل سنه وانت طيب






اسكندرانى اوى
===============
طيب اتعدل علشان اشوف وشك هههههههه كل سنه وانت طيب وبخير نورت وسعيده بيك جدا

appy said...

Abdou Basha
==============
اهلا اهلا
حلو اللمه والونس بس لما يبقى بالتشتيت دة بلاها بقى لمه وونس
نورت يا باشا الكوكب






مصرى
======
والله يا اسامه انا مش بامشى من طريق تانى علشان كده لما بكون مسافرة المنصورة بتبقى مأساه فعلا والمشكله انى بحب الطريق ده جدا لانه قريب منى كمان
موضوع الخيم ده مشكله انا كنت بحب اروح شويه علشان اللمه والقعده ونأكل مع بعض بس لما لقيتها بالشكل ده بتبقى دوشه وحاهبجد أذى جدا فبطلت

اما عن الملاحيظ كويس انك اخدت بالك زهقونى يا اسامه بجد وكل بيتأمص وكله فاكر انى باجى عليه
يالا مش مهم كل سنه وانت طيب

appy said...

حدوتة
=========
صاحب الاكتشاف فعلا احنا ظالمينهم معانا النى اكتشفت ان اغلبيه المصايب احنا بنعملها لوحدياتنا هههههههههه
كل سنه وانت طيب يا محمد






مواطن مصرى نايم
===============
شوفته يا اسلام البوست كميله
اما عن والدتك فى حالها اكيد فيه ستات كتي ركده بس الاغلبيه بيبقوا وش يا راجل
كل سنه وانت طيب ونورت يا لمض

appy said...

سمو الأميرة سارة
=================
اهلا اهلا يا برنسيسه اهو شوفتى احساسك ده بقى هو اللى حسيته بالظبط من موضوع الجامع وخاصه انى بحب الهدوء
كل سنه وانتى بخير وسعيده بيكى هنا يا بنوته







Amgad
=========
المشكله يا امجد مش انى اعمل زيهم لا المشكله فعلا انهم بيشوشروا على اللى بيصلى او يقرا قرآن فاهم
ايه دينا مالها استغفر الله العظيم ههههه
والله الحمد لله مش صادفت انى اشوف راقصه البنات التانين كانوا قايمين بالواجب هههههههه
لا بجد يعنى مش بتوصل لرقاصه رقاصه ايه فى رمضان ولا غير رمضان دى لا انا مش بحبهم
نورت يا امجد

appy said...

محمد
========

الله ينور عليك يا محمد الاسلام اخلاق وتصرفات واحترام يعنى اساسيات الاول وبعديها حاجات كتير
اما عن الستات ربنا يتقبل منهم ومنا ويهديهم يا رب
نورت يا محمد وكل سنه وانت طيب









وجهه نظرى
=========
معلهش ياا بوى انا مكنتش اعرف انك مش عترضى ادلا على الخيم ابقى زمر عاد
ههههههههههههه والله بص انا اصحابى اللى عزمونى قولت وماله اروح انا بس ضايقنى الموسيقى العاليه انا بطبعى بتوترنى جدا والغنا انما القعده فى حد ذاتها ومع اصحاب بتكون حلوة اوى
انما اللى كان بيحصل قدامى بيوجع عينى بجد وانا مش بحبه خاصه انها حاجات اوفر اوى اوى
وبعدين بطل حقد تعالا مصر وانت تفطر معانا
كل سنه وانت طيب وبخير

appy said...

فزلوكه
========
ما هو يا حبيبتى مش كل الناس فى المساجد بس انا بيد عنك اتعقدت وبركز اكتر فى البيت الحمد لله
الخيم ربنا يتوب على الجميع منها ويهدى الناس
كل سنه وانتى طيبه يا حبيبتى







تامر صلاح
===========
اخص عليك انت عارف يعنى ايه ناققصات عقل ودين هااااا ولا اشرحلك بقى يا حج
هههههههههههه حلوة موضوع المثلثات ده بجد بس هما فاهمين غلط
لى فكرة فيه ملاكى فى القاهرة حطينها برضه وده منظر بينرفز بس علشان ان الناس مش فاهمه ده لايه ومش بيشغلوا عقلهم فيه
هههههههههه اما عن وليد الحريرى لا تحدثنى ارجوك ادبيت مرة وحضرت مكان كان فيه وحرمت والله انا كنت بحاول اشوف مكان هادى بس مفيش فايده
البلوج افتح عن طريق الفاير فوكس يا تانر هتبقى كويسه معاك
كل سنه وانت طيب

appy said...

عالم حبيب
=========
موضوع الرخصه والسواقه مصدقاك فيه طبعا وعارفه الاجراءات اللى عندك وصعوبتها فى الموضوع ده
ربنا يقويك ويهدى الجميع كل سنه وانت طيب






محمد فوزى
==========
ايه يا حجهو انا عممت
بس الاغلبيه اه بقى يا محمد وتعالا وانت تشوف بعنيك بجد
موضوع حقى وحقك لا مش اعتقد كده خالص وان كان فيه ناس بتعمل كده
بس هى المساله انها قلبت يا محمد بقت عادات بعد ما كان رمضان زمان فوازير حلوة وصلاه وصوم وعباده قلب بجد بحاجات وحشه جدا والناس بدأت تتفنن فى ده بجد
ركز كده افتكر رمضان زمان ودلوقتى بعد وجود شيوخ الفته اللى بيغيظوا وخلوا الناس تتسرمح بجد
ربنا تاب علينا خلاص الحمد لله ههههههههه
كل سنه وانت طيب ونورت الكوكب يادكتور

appy said...

Habiba
==========
يا لهوى هو انا اقدر لا يا حبيبه مالهم زى الفل انا بس نقدت حاجه شوفتها لان ده طريقى دايما وصعبان عليا الناس تستخددم الحاجه غلط فهمتى ثم انه لما بيتساب فى الشمس بيسيح وبعدين مش فى الشرقيه بس على فكرة فيه ناس ملاكى كمان الاسماعليله لقيتهم عاملين كده هههههههههه
وبعدين انا اقدر يا حبيبه كل سنه وانتى طيبه يا قمر






blackghost
==============
علاقتهم ببعض زى علاقه مرات الاب بولاد جوزها هههههههههه
بتنجانى لقب عادى انا مطلعاه على نفسى
الملحوظه ملكش علاقه بيها دى توضيح للناس كلها واعتقد انك برضه اخدت ايمل ام 5 ام ووضحت له وجهه نظرك وصفيت اللى بينكم صح
موضوع المسلسلات لا اختك اللى هى حضرتى
تقعد طول الشهر مش فاهمه اى حاجه فى اى مسلسل ولا بتابع كبير تامر وشوقيه وعباس وايناس والدالى بعد كده ولا اى حاجه باجى على اخر الشهر اختى تقعد تصحح ليه المعلومات يعنى فهمى ليهم زى فهمى للغه الهيروغليفى بالظبط
نورت الكوكب

appy said...

nody_1987
===============
الا هو فيه اعتكاف للستات اول مرة اسمع يا نودى خالص الكصه دى ههههههههه
كل سنه وانتى طيبه يا قمر






مسلم
========
اهلا بيك
الموضوع مش موضع اتحاسب عن مين بجد لانهم بيشتتونى والله من الدوشه والحكايات يعنى تبقى قاعد فى حالك غصب عنك تسمع دى بكلمه ودى بكلمه فهمت
موضوع ردى على الاستاذ ده
مش فاهمه هو عاوز ايه واحد داخل يقولى كنتى بتروحى الخيم والرقص والشيشه مع انى مجبتش سرة شيشيه انا اقصد كركرة يعنى ضحك بس هو فهم كده
يقولى على اساس انك اتنقبتى واحنا مش عارفين
ناس مستفذه بجد وحتى لما بيسالوا مبيفهموش
يعنى هما المحجبات والمنقبات ممنوع عنهم الخروج والسهر ولا ايه
ناس بجد دماغها تعبانه ربنا يشفى
نورت الكوكب وكل سنه وانت طيب

appy said...

kochia
=============
ولا حاجه هتقترحى ايه اذا كان البينات والاولاد فاهمين ان هو ده رمضان وانه بيستنوه علشان يخرجوا يسهروا مع اصحابهم فى الخيم دى ثقافه والاعلام وجها خلاص
نورتى يا كوشيا وكل سنه وانت طيبه يا قمر









جبهة التهييس الشعبية
========================
لا ده صعب اوى فعلا هو ايه بقى الفرق ما بينا قدام ربنا غير اعمالنا
ما هو ده اللى ضايقنى يا نوراة بجد
موضوع اللبس وشوفى دى ايه اللى لابساه وجايبه دى منين
بجد بحس رايحين النادى يا بنتى
انما توصل لكده مع طفل بصرف النظر عن كونه ابن بواب حتى
فده صعب
ربنا يرحمنا كل سنه وانتى طيبه يا نوراة ومنوارانى دايما

appy said...

انسان بلا عنوان
================

لا مش تغمض حشريه مش علشان قالت تعالى نصلى لا هى حشريه فى حاجات تانيه ههههههههههه كتير انما موضوع الصلاه ده كويس بس دى الصفه بتاعتها زنقه مناخيرها فى كل حاجه

موضوع النزول الفجر على حد علمى ان الرسول عليه الصلاه والسلام قال ان خروج المرأة بعد صلاه المغرب لابد من وجود محرم معاها حفاظا عليها وبما اننا فى عصر مينفعش فيه اوى ده وان الست بتخرج للضروريات وتتأخر فجايز ده كويس
انما الفجر ومش للضرورة لا صعب حتى لو جوزها عارفه
وعلى فكرة مش لسبب غير نه كمان ممكن تتععرض لاعتداء من اى حد وبعدين انا اساسا اقترحت عليهم يصلوا كلهم فى شقه واحده منهم الفجر جماعه انت عارف يعنى ايه الست تنزل الفجر وفى القاهرة الجديدة وبينها وبين الجامع ربع ساعه مشى
فهمت قصدى
على فكرةة الصلاة للست فى البيت مستحبه اكتر
صلاه الستات فى اخر صف دى علشان مش يتكشفوا على حد وده على حد علمى الصغير او قرايتى الصغيره والله اعلم


اللهم انى صائم
تقصدق علشان مش محجبه لا وحياتك بيقولها لاى حد وبعيدن حتى لو مش محجبه انا بلبس محترم يعنى وبعدين الكلمه بشوفها وبسمعها مش شرط ليه انا لوحدى يعنى ممكن اتنين ماسكين فى خناق بعض بعي اونا شايفه الموقف بس برضه تلاقيه بيقولها
على فكرة لما بنقد مواقف مش لازم تكون حصلت معايا علشان انقدهاالحمد لله انا لماحه زياده عن اللزوم ودماغى بتفكر فبشوف حاجات كتير مش بتعدى عليا بسهوله وده تاعبنى

لا انا ولا طويله ولا قصيرة هههههههه والحكمه المعنى منها ان فيه ناس كتير بالرغم من كبر سنهم او اجسامهم انما عقولهم صغيره يعنى تمشى طول وجسم وسن
نورت يا محمود الكوكب وسعيده بالنقاش معاك

appy said...

الربان
========
اهلا اهلا يا بشمهندس
بص حضرتك الفكره كمان مش فى ازاى لمكسب افتكر حضرتك رمضان زمان كان ازاى ودلوقتى وصل لفين بجد بقى حاجات تتعب وتلاقى الاعلام موجهه لاتجاه معين فى الحاجات دى احنا بقت عدنا عادات غريبه مش هنكر ان القديمه كان فيه منها الاغرب بس دلوقتى بقت قاتله اعتقد حضرتك فاهمنى
كل سنه وانت طيب وبخير
نورت الكوكب كله

عاليا حليم said...

كل سنة و أنت طيب يا عسكري

موضوع عدم أحترام الصلاة ده كارثة
المشكلة أنهم بيعكروا علينا فعلا صف و جمال و روحانية صلاة التراويح و الجماعة لو زكلمتي و لا زعترضي تبقي أنتي ما بتحبيش تصلي جماعة

----------


أدعوك لزيارتي للأهمية

قلب مصرى said...

أولاً كل سنة وانتى طيبة
ثانيا أنا هاعلق على موضوع المثلث بس:
99% من السواقين المهنيين حاطين المثلث فى مكان ظاهر بس علشان يهربوا من غلاسة أمناء الشرطة عليهم وتلاكيكهم اللى مش بتنتهى علشان فى الآخر ياخدوا المعلوم
أما الـ 1% فبرضو حاطو فى مكان ظاهر علشان مش فاهم هو المفروض يتحط فين.

تقبلى تحياتى

شملولي بن سحلولي said...

آبي
بحب جدا الناس اللي نظرات عميقة في كل اللي بيجري حواليها
بعض النظر انك كميلة وزي القمر
بس اسلوبك في تحليل المواقف شدني مش هقدر اعارض علي حاجة
لان ببساطة
مش عقلك يوزن اتنين كيلو تفاح
انت عقلك كبير يا آبي

صاحب المضيفة said...

على رايك يا ابي فعلا


ربنا يحفظنا ويقدر لنا الخير دوما ويبعدنا عن الشر بأنواعه


ويرزقك عبادته خير العبادة في رمضان وغير رمضان


كل سنة وانتي طيبة يا ابي هانم بتنجاني

انسان بلا عنوان said...

انا كل الحكايه مكنتش حابب انك تغتابيها ومكنتش عايز اقولك كده

انا معاكى مبدئيا انه لو المراه لا تؤمن على نفسها فالاولى انها تصلى فى البيت خصوصا لو المشوار بعيد كمان
اما عن صلاة الفجر تحديدا فالاحسن فتوى

موضوع الانكشاف ده بديهى عشان كده النساس خلف الرجال وده بيفى بالغرض
لكن ليه اخر صفوف مين ..صفوف النساء يعنى حتى مش اوسطها اكيد فيه حكمه او حكم تانيه

تصدقى انا مكنتش اعرف انك مش محجبه ..بس يمكن عندى بصيره او بصاره تعالى كلى ههههههه
لا بجد حسيت من كلامك انتى بحاجه تخليه يقولك انتى مخصوص اللهم انى صائم ...خصوصا انه بيستعرض بالكلمه دى عليكى ادام الناس

انا فاهم انك بتنتقدى حكاية التحجج بالصيام - بالرغم من افعالهم المنافيه له -عموما وانك مش واخده الموضوع بشكل شخصى

انا فاهم الحكمه كويس بس كنت بهزر معاكى
على الله متزعليش منى
ومن تكرار التعليق
وكل سنه وانتى طيبه

appy said...

عاليا هانم حليم
=================

كل سنه وانتى طيبه يا عليا
وميرسى ليك وشوفت وربنا يسهل واجيلك يا جمر






قلب مصرى
===========
علشان كده انا بقول نفهمهم وبعدين ما و لو بيتجنب الامين يبقى غلطان عارف ليه لانه ممنوع تعلق حاجه على الزجاج يعنى بقت نيله وغرامه المثلث لو سال عنه هطلعه من الشنطه
نورت يا ابو رقيه

appy said...

شملولي بن سحلولي
*****************

الها اهلا ميرسى على ذوقك بجد ويا ريت كل الناس يبقى لها نظره ومتأخدش الامور بسطحه صدقنى هتبقى احلى بكتير
نورت الكوكب وسعيده بيك







صاحب المضيفه
=============

يا رب اللهم امين
كل سنه وانت بخير وفين الفانوس بتاعى يا حج انت

appy said...

انسان بلا عنوان
================
ما هو انت اسمك محمود ومحامى لازم ربنا يخلصنى من واحد وواخد اجازة اللى هو محمود برضه رئيس جمهورية نفسى هتطلع انت ههههههههههه
لا بهزر اتناقش عادى براحتك
اولا انا مش قصدت اغتابها اكيد
بس على فكره هى عارفه ان ده راى فيها هههههههه ومتقبلاه
المهم انا قولت كده بس من باب الهزار
مش اكتر والاعمال بالنيات بقى ولا ايه

موضوع فتوى دى اسمها اتستفتى قلبك ارجع لكتاب الشعراوى فى الاسئله والاجابات وانت تعرف انا عندى واحد برجع له على طول طيب ليه جوزهم مش يروح معاهم برضه ما علينا

انا معرفش غير الحكمه دى لان جدى قالها ليه بس

بصارة لاااااااااا بعد الشر مش بحبها المهم كلمه اللهم انى صائم بس علشان كل الناس حتى تلاقى الرجاله بتقولها لبعض

عارف ايه الحاجه يكون طريقى واقوله اصبر يا عم ده طريق او يزنق عليا بالعربيه وانت عارف سواقين النقل والميكروباص ميتوصوش

انت تنور فى اى وقت يا محمود وتتناقش براحتك خالص
كل سنه وانت طيب

المحارب المتيم said...

كل عام وأنت إلى الله أقرب

ومنه أخوف

وبه أعرف

وإلى دار كرامته اسبق

رمضان كريم

محمد الكومي said...

و الله هو بالنسبة لموضوع صلاة التراويح

برضه في حد معين واجع دماغه بيا اوي و روح صلي في الجامع و كدة و انا كسلان بطبعي و كمان مابحبش فرض الوصاية

موضوع المرور انا مش حاسه اوي يمكن لشوية اسباب
اولا اسكندرية مش مكلكعة مروريا

ثانيا انا سكتي للبيت حلوة من سموحة يعني شوارع واسعة و سيولة مرورية

ثالثا قطر ابوقير هو بطل رمضان الاول لو المرور اتئزم

تالت حاجة الخيم

انا جربتها سنة و بطلتها لسبب مهم جدا و هو الصرف العبيط اللي كنت بصرفه

و غير كدة الصراحة الخيم بحس ان رمضان مابيوصلهاش غير بالاسم بس

كل سنة و انتي طيبة ويجعله عامر

و ابقي بطلي تبقي سوسة

ههههههههههه

appy said...

المحارب المتيم
==============

كل سنه وانت طيب وبخير يا رب دايما










محمد الكومى
=========

ههههههههههههههههههههههه انت قفشنى كده على طول انت بس اللى فاهمنى غلط طيب جت بالصدفه يا عم مش سوس ولا حاجه
المهم بطل بقى تذلنا بالسيوله بتاعت اسكندريه دى اصل اخبطكم عين الدنيا تتزحم ال جى بتقولى المحافظ بيكسر فيها يبقى سيوله منين يا عمنا
ههههههههههههههه
كل سنه وانت طيب يا ريس

بنت سيناء said...

آبى
اصبتى عين الحقيقة ان لم تصيبى قلبها

هذا خارج المنزل وكيف ما على ىالساتلايت؟؟من مهازل وتعرى وبرامج تافة أمثال غمض عينك تاخد كف (على فكرة دة من تأليفى)عشان اضرب بية كل البرامج..وبعدين انتى مش ناوية تيجى تفطرى عندنا يوم فى سينا؟يعنى من العريش منظر بس؟

أنا حر said...

كل سنة وانت طيبة ورمضان كريم
وبما ان الشعب المصري بيموت في الاختراعات فطبيعي انك تلاقي الاختراعات دي عندنا زي مثلا تحويل الجوامع لاماكن مقابلة ودردشة وده انا شفته كتير على فكرة ومن شباب كمان مش بنات بس
اما بخصوص المثلث فعلشان يبقى على عينك يا تاجر وعلى فكرة انت لو سألتي معظم اللي جايبين المثلثات بتاعت المرور هما جايبينها ليه وايه سبب استعمالها هتلاقيهم مش عارفين وهما جايبينها علشان المرور مش اكتر يعني لو حد عربيته عطلت مش هييجي جنب المثلث
اخر حاجة بقى موضوع الخيم الرمضانية فده كده زي مسلسلات رمضان نوع من انواع البيزنس مش اكتر ملهوش اي علاقة برمضان اوغيره
اللي يعيش في مصر ياما يشوف
تحياتي

دكتور بهــدوء said...

رمضان كريم يا طنط
اللهم اني صايم
فعلا يا آبي عاقله بجد
طول السنه نحله ودبور وقلل بس ساعه الجد عاقله
ربنا يكملك بعقلك
صلاه الست ف البيت افضل لها
عندنا ف الجامع اللي بصلي فيه
واللهي العظيم تاني يوم
حصلت مشاده كلاميه بين الستات والامام يعلي صوته ودول يعلو اكتر
والامام يعلي وهما يعلو
كنا سامعين ايه اللي بيتقال
ربنا يستر علي عبيده

واحدة مفروسة said...

اه منك يا بتنجاني اه
هوه ده بس اللى لفت نظرك فى رمضان؟؟؟هههههه
طيب مش لفت نظرك ان سواقين الميكروباسات بتشتم و تقول اللهم انى صايم
ولا المسلسلات السنة ديه
الله الله كاها قالع مش لابس
هيه صحيح الهدوم غليت بس ده مش معناهاان الناس تمشي كده....تراوة
المهم انا حبيت اقولك لو عاوزه تتقرسي صحيح...لفضلى طول النهار و الليل اتفرجس على الناس
و بعدين خيم رمضان مالهاش ضرائب السنة دسخ

Copa Zaki said...

لا الصراحه انتي اوفر اوي اوي اوي اوي
هههههههه بهرج

بس برضه اوفر
ليه علشان انا انسان وانتي انسانه يعني انا معرفش في جو البنات بيحصل ايه في الصلاه و كدا محضرتش قبل كدا و مليش اخوات بنات كمان علشان اعرف
و بالنسبه للسواقه احنا مش هيظبطنا غير لما واحد يجي زي الي كان ماسك قبل كدا و مخلي في كل ناصيه عسكري و رمضان كريييم الله اكرم

مسلم said...

وانتى بألف صحه وسلامه يا ابى
انا فهمت قصدك
اه بالمناسبه علشان اخينا اللى رد اتكلمتى عنه ده وكان بيقولك اتنقبتى
ده طلع كويس بالنسبه لناس تانيه
واحد داخل عندى مسمى نفسه المنافق
داخل يشتم فى أئمة الاسلام وبيستهزأ بيهم ولما دخلت مدونته لقيته حاطط صور عريانه وفرحان بده اوى
تفتكرى مين ارحم فيهم

ربنا يرحمنا بجد من الناس دى

على فكره اناعايش ولكن بس دى المدونته التانيه شغاله فى رمضان دايما ابقى تابعيها

A7MeD F@hMy said...

كل سنة و انتي طيبة يا ابي هانم و يا رب رمضان السنة دي يبقي مختلف و اجمل و مليان خير و بركة
خليكي صلي ف البيت احسن و اقوم كمان

يااااااه انتي ماسكة ف المثلث
دة المهازل كتييييييير

كمان الموديلز دول ماتتخيليش انا بتضايق منهم اد ايه و كنت شايف معاهم حوار ف برنامج صبايا و مقتنعين تماما باللي بيعملوه جدا و الناس فرحانة بيهم ما شاء الله

ياللا كل سنة و انتي طيبة كمان مرة
:) :) :)
----------
روووومانسي

Sherif said...

كل شئ جميل فى رمضان .. كنت مرتاحة للصلاة فى جماعة ماشى .. مرتاحة اكتر فى البيت صح برضه

اساس العبادة الاطئنان النفسى والراحة .. مافيش حد وصى على حد وماحدش بيطلع على قلب الواحد غير ربنا .. وطالما الواحد قلبه سليم .. يبقى الحمد لله .... ربنا عفوّ يحب العفو

طبعا العصبية بتزيد فى رمضان ..بالذات فى السواقة .. ويبدو انه فى عرفنا ليست هناك علاقة مباشرة بين الصيام والتصرفات .. زى مانت بتحكى بالضبط

اما الخيام فى رمضان .. فهى فى النهاية ارزاق

اعاد الله الشهر الكريم عليكى وعلى الاسرة بكل خير

دعاء مواجهات said...

اولا كل سنة وانتى طيبه يا آبى هانم

بالنسبه للصلاة فى لاجامع

بصراحة انا بحبها جدا

لانى بشوف كتير من الناس الى مش بشوفهم

طوول السنة

وبالنسبة للمرور والعربيات

احب اقولك انى ف اول يوم رمضان شوفت

بتاع 8 حوادث ع لاطريق السريع

فى اقل من ساعة ونصف

وكلهم فورى فورى

ربنا يرحمنا بجد

بيس ياقمر

جمعاوي said...

السلام عليكم آبى ورمضان كريم عليك وربنا يعينك على الاستفادة من الشهر الكريم ...مش عارف اقول ايه على اللي انتى بحكى عنه ده ........على العموم اللى انتى شايفاه صح اكيد هتعمليه

وبانسبة للخيم ؤبنا يسترها علينا ...طبعا زي ما بتقولى كفاية بقى

دتى لنا بخير ويلا سلام

زُمُرده said...

كل سنه وانت طيبه

للاسف الناس من زمان ربطت رمضان بالمسلسلات والخيم الرمضانيه وانواع الاكل والعصاير والحلويات

مع انه شهر واحد 30 يوم او اقل للعباده
لربنا
ما احنا طول السنه متقضيه

اما بالنسبه للجوامع فعندك مليون حق
لا ومش كده وبس ده كمان الللي تجيب العيال وجيران العيال طالعين نزهه
ولا احنا نركز ولا هم للاسف بيضيعوا ثوابهم وبياخدوا من ذنوبنا وكمان بيكرهوا الناس في بيت الله

مع ان في جوامع والله لما تصلي فيها تتمني ان العمر يقف وعمرك ما تخلصي
والناس فيها ملتزمه

اما الخيم فدي مرفوضه مليون الميه
ممكن نتجمع ع الفطار ونتكلم ونضحك
بس مش هنقضي ساعات في اغاني ورقص و.......و.....و

ربنا يهدي
اما السواقين وغيرهم
فعجب عجاب بجد

appy said...

بنت سيناء
=============
المهم انى اصبت حاجه عينها ايديها رجلها المهم انى نشنت صح هههههههههه
كل سنه وانتى طيبه لا ان شاء الله هاجى بس اخد اجازة من الشغل وهقول لكى ان شاء الله يا حبيبتى






انا حر
=======
ما هو اللى غايظنى ان الناس مش عارفه طيب مين فهمهم بقى بس فيه ناس عارفه ومقفله دماغها بعيد عنك
كل سنه وانت طيب وبخير

appy said...

دكتور بهدوء
============

الحمد لله ان لسه باقى فيه عقل يا دكتور وسط الناس دى
كل سنه وانت طيب ونورت الكوكب







واحده مفروسه
==============
فرفس حبيبى انتى عاوزة تشلينى صح قولى انا عارفه انتى حاطه عينك على الكوكب بس مش هديلك ولا حتى خيمه فيه
ناس مين دا الساعه اللى بقضيها فى الشارع بتغيظنى تفتكرى هفضل كده كتير
اما عن الهدوم فالدنيا حر يا حبيبى متحطيش فى بالك
نورتى يا قمر

appy said...

Copa Zak
=============

وهو حتى لو انسان مش ربنا عرفوه بالعقل وفيه حاجات لازم يعنى ناخد بالنا منها يا عم الحج ولاايه
كل سنه وانت طيب






مسلم
=======
طيب انا شوفت المنافق ده وتقريبا ملحد بس يا سيدى فى البوست القبل الاخير عنده شوف مين من اللى انت بتعلق عندهم بقى بيروح عنده وموافقه على كلامه ده للفت الانتباه مش اكتر وده احسن حاجه متردش عليه لان قله ادبه هتزيد اكتر
ربنا يرحمنا يا رب
نورت دايما وميرسى علىالكتاب بجد وهتابعها ان شاء الله

appy said...

A7MeD F@hMy
==============
احمد دول مش موديلز دول بنات عاديه وفيهم محجبات وده اللى ضايقنى بجد انهم بنات عاديه جدا
يالا ربنا يهدى الجميع كل سنه وانت بخير






استاذ/ شريف
============
اهلا اهلا بحضرتك منور الكوكب
بس دى رزق الهبل على المجانين ههههههههه والله نفسى اروح بس ميكونش فيه الدوشه دى خالص ولا الحاجات دى
كل سنه وحضرتك طيب وبخير ومنورنى

appy said...

دعاء مواجهات
==============
كل سنه وانتى طيبه يا دودو
وبعدين يعنى انتى مش بتشوف الناس غير من رمضان لرمضان يا نهار عليكى
نورتى يا دودو وربنا يحفظنا







جمعاوى
==========
اهلا اهلا بالناس الكويسه اللى حاطه خرفانى فى دماغها
ربنا يهدينى للصح يا رب نورت وسعيده بيك

appy said...

زمرده
=======
ايوة نتجمع ونتكلم ونحكى بس فى هدوء وفى حدود الادب مش الدوشه يا حبيبتى انا اعصابى باظت منها بجد
كل سنه وانتى بخير وجميله

Doba said...

مواقف تتكرر مرارا وتكرارا طوال الشهر الكريم وللأسف سنظل من سىء لأسوأ طالما نزاد بعدا عن ربنا

محدش عارف رمضان أساسا معمول ليه
==============
انا نفسى اعرف بدل الخناقات اللى بيعملوا فى التليفزيون عالاعلانات والمسلسلات ليه متتوزعشى على مدار السنة ويخفو العب عن البشر علشان يعبدوا ربنا عن حق

مش كل حاجة تتحول لإسفاف كده

عقلك يوزن 7 كيلو باطس من النوع المفتخر
==========
كل سنة وانتى طيبة
ورمضان كريم

هبة

ahmed_k said...

أيه ده
هو في حد قبل كده قالك إنتي هايله وكميله وكمر وعقلك بيوزن !!!!
مين هو ده شاوري عليه
وأنا أروح اسلم عليه بالكف

بخصوص الملحوظه الأولى
ياريت كل البنات والنساء تقتنع ليه رسول الله صلى الله عليه وسلم اخبر أن أفضل صلاة المرأه في خدرها
أي في غرفة نومها


وتقبلي تحياتي

رمضان كريم

Sherif said...

آبى الجميلة
=========
كنت دائما تنادينى شريف وأنا استريح لكل من ينادينى باسمى

وفجأة أستذتينى وبقيت استاذ
بقيت حاسس انى لابس طربوش ونظارة كعب كوباية مش شايف لحد عندها

ممكن من فضلك .. من فضلك يعنى تنادينى زى ماكنت؟
شاكر أفضالك

ana ga3an said...

ابقي طلي هنا كدة
:)

رمضانيات

صانعة الأحلام said...

عارفة يا آبي

انا اكتر حاجة ضايقتني اكتر حتى من الخيم الرمضانية وسواقين الميكروباص اللي لسانهم عايز ينقطع منه حتة

البنات اللطاف اللي رايحين الجامع المفروض ان دة مكان صلاة يعني نروح مؤدبين ونرجع مؤدبين

عارفة من وجهة نظري الغلطة في انهم وهما نازلين من بيتهم ما اخلصوش نيتهم لله ... انا بحب جدا اصلي التراويح في الجامع ... بحس ان كل الناس صف واحد ... او مش كلهم اوي عدد كبير منهم .. بحس بروح الاسلام اكتر .... اننا نكون متجمعين ... بس ساعتها بقى بختار اصحابي اللي اروح معاهم اصحاب بجد يعينوني عالعبادة


وكل سنة وانتي بالف صحة وسلامة يا ابي

الدفاع said...

آبى لا انتى مش اوفر
كل عام وانتم بخير

appy said...

دوبا
========
ايه ده قلب الام عندنا يا مرحبا ادبح لك قوس قزح ولا خيخه اامرى بس
كل سنه وانتى بخير يا دبدوبه ويوسف بخير هو كمان ومنورانى








ahmed_k
=======
امممممممممم تسلم عليه بالكف علشان غلط وقال كده صح انت قصدك انى مجنونه ماشى يا احمد هسامحك علشان رمضان كل سنه وانت طيب يا ابو كف ههههههههههه

appy said...

شـــريف
=======

طيب هات النظارة والطربوش نرجعهم لصاحبهم او سمحت هههههههههه
كل سنه وانت طيب






انا جعان
=============
حلو اوى يا اسلام بجد فكرة فى الجون
الا قولى انت بتجيب الافكار دى منين تاخد باس وورد الكوكب تظبطها ليه بس يا عينى دا انا كوكبى فيه خرفان هيدوخوك لا بلاش
نورت الكوكب يا رئيس السلطنه

appy said...

صانعه الاحلام
==============
ايوه ده فعلا ضايقنى علشان كده قولت يبقى البيت افضل بقى
كل سنه وانتى طيبه ومنورانى يا قمر







الدفاع
==========
الله يخليك يا اسامه يعنى هخف ان شاء الله ههههههههههههه
نورت وكل سنه وانت طيب

appy said...

صانعه الاحلام
==============
ايوه ده فعلا ضايقنى علشان كده قولت يبقى البيت افضل بقى
كل سنه وانتى طيبه ومنورانى يا قمر







الدفاع
==========
الله يخليك يا اسامه يعنى هخف ان شاء الله ههههههههههههه
نورت وكل سنه وانت طيب

محدود الدخل said...

هو جميل وحلو
بس مفهمتش أيه الدروس المستفادة من النقاش

عموما رب رمضان هو رب شعبان هو رب شوال
هو رب العالمين
ياريت نفتكر ده بعد رمضان
وكل سنه والكل بخير

سنووايت said...

الموقف الاول يا ابي بصراحة انا ما جربتش التراويح في الجامع لحد دلوقتي بصليها في البيت بس نفسي اجرب بس نا سمعت كتير عن حكايات وخاصة اللي بياخدوا ولادهم ويقعدوا يعملوا دوشة في الجامع ويشتتوا الناس , عموما صلة المرأة في بيتها أكرم

الموقف التاني السواقة في رمضان مسخرة كله بيبقي عايز يجري يلحق يروح ومش مهم اللي ماشي قدامه ولا وراه وفي الاخر اللهم اني صائم طيب صائم يبقي مش تتعصب وتشتم المفروض تبقي متسامح وهادي والمثلث تقريبا بيحطوه علشان يقولوا لعسكري المرور احنا ملتزمين اهو ومعانا المثلث هههههههه

الخيمة الرمضانية او بمعني اصح "الخيبة الرمضانية" ما هي الا ناس بتروح تضيع صيامها وثوابها اللي اخدته الصبح مع ان المفروض الوقت دا الواحد يكون بيصلي وبيدعي دا شهر وحد بنستناه طول السنة علشان نجدد النية

بجد كل اللي قلتيه يفرس بس محدش بياخد باله
كل سنة وانتي طيبة يا ابي ويارب رمضان الجاي يبقي احسن وتبيقي الفرسات دي اختفت من الدنيا

سنووايت said...
This comment has been removed by the author.
norahaty said...

السلام عليكم ورحمة الله وبركاته
اه من مصلى النساء وما يحدث فيه مثل ما قلتى واكتر كمان بس الواحد صايم ومش عايز يفسد صيامه بالكلام
اما الخيم الرمضانية فهى اشتغالة بمعنى استرزاق وتجارة لا تتورع عن الكسب والبيع لاى شىء حتى الايام المفترجة دى بس عايزة اعرف قعدتى سنة تلفى على الخيم الرمضانية ؟ليه كنتى بتعملى التكتورررررراة فيها حضرتك؟
وفى الاخر تقوللى الحكمة التُمام دى
(الطول طول الباب والعقل عقل الذباب)
جبتيها منين ؟
كل لحظة وانت بالف خير

appy said...

محدود الدخل
=============
انهى نقاش شاور انت بس
وانا افهمك واشغل الفهامات
لو تقصد فى الكومنتات طبعا مهم علشان لو حد عنده معلومه غلط ممكن حد يفهمه له او يصلحها انا عن نفسى فيه ناس بتضيف ليه
لو النقاش مش مهم ليك يبقى التعليق فى حد ذاته مش مهم
كل سنه وانت طيب نورت الكوكب









سنووايت
==========
اهلا يا قمر طيب بزمتك حتى لو قال للعسكرى كده هو اساسا ساله لا بجد دى مناظر غريبه يا ناس فعلا المثلث مش يتلزق يتحط فى الشنطه علشان لما تعطل دى امخاخ
كل سنه وانتى كميله

appy said...

norahaty
=============

ههههههههه دكتوراة فى الخيم الرمضانيه اسكتى بدل ما الرايق يسمعك يجى ياخدها منى ههههههههههه
بصى يا قمر هو انا اقصد ان السنه اللى قبل اللى فاتت كنت بروح يوم ويوم فى رمضان كل مرة اقولهم لا نورح واحده تانيه يمكن اهدى والناس احسن بجد بلاقى مصايب تانيه فزهقت بس هو نوع من الغلاسه على اصحابى بس لانهم بيحبوا الدووشه وانا الهدوء فبجد كان نفسى يبقى فيها مكان احس فيه برمضان يعنى سحور حلو وقعده هاديه ومحترمه طبعا فيه ناس كتير محترمه بتروح بس انتى عارفه العين دايما بتشوف الوحش وانا الرقص والاغانى مكنتش بتعجبنى والكركرة يعنى الضحك علشان فيه ناس فهمت غلط هههههههههههه
الحكمه فيه فيه موقع بجيب منه بصراحه بتاع امثال بس بعدل شويه فيها هههههههههه
نورتى يا قمر وكل سنه وانتى طيبه

وجهة نظري said...

فاكره الموضوع دا في مدونتك إلي فاتت:

خدوا بقى دى خبطه فى الجون فى الدماغ
أباظة يهدد بإجراءات صارمة ضد شركة الوليد بن طلال لتقاعسها في استصلاح أرضها بتوشكي

الرد بتاعوا أهه في جريدة الدستور النهارده
"
ترددت أنباء عن دخول بعض الشخصيات السعودية النافذة في هذا الملف خاصة اذا علمنا أن رجل الأعمال هشام طلعت مصطفي كان علي خلاف كبير مع الملياردير السعودي الوليد بن طلال دفع الأخير إلي تصفية معظم أعماله المشتركة مع هشام طلعت لكنه احتفظ بملكية بعض الأسهم في فنادق الفورسيزونز" .... شوفتي العلاقه؟

بيعاقبوا الوليد بن طلال علي إنه ساعد حكومة الإمارات وضغط علي الحكومه المصريه للقبض علي هشام طلعت .... أو بيضغطوا عليه هما كمان، أصلهم ميقدروش يعاقبوه

تحياتي

wanna b a physician said...

هى دى المشكلة ان كل واحد فاهم رمضان على اللى يريحه
الستات تروح الجامع اهو تلاقى حد ترغى معاه مش اكتر
طب تخيلى شوفتهم بيصلوا بره الجامع كأنهم رجاله مثلا
اذا كان ده اصلا يلغى صلاتهم عالم غريبة بجد
وموضوع المثلث ده هما بيحطوه كدا عشان يقولك انا معايا المثلث مش توقفنى تسألنى عليه دماغ برضوة
اما الخيم ان شاء الله تتهد على دماغهم عشان نخلص حاجة تشل

كل سنة وانتى طيبة

محمد الكومي said...

المحافظ بيكسر و ماله ربنا يكسر كل اللي يكرهك يا اسكندرية انشالهه يكون رئيس جمهورية حتى

انما انا قلتلك ايه

انا شخصيا سكتي سهلة من سموحة و شوارعها واسعة او قطر ابو قير بطل المرور في اليكس

انا خايف بقى من عينك لحسن التكسير

يوصل سموحة

ساعتها اقول عليكي سرك باتع بجد

عايز اعمل خمسة و خميسة بس مش عارف

اه جاتلي
فكرة

55555555555555555


بمناسبة اني فقستك

انتي نسيتي ولا ايه داحنا دافنينه سوا

وش بيغمز و طالع منه دخان شيطاني احمر

رصيف نمره خمســــــه said...

كل سنة وانتى طيبة ياقمراية

جايلك متأخرة شوية بس انتى عارفة بقة بلوج

التلات مواقف دول يفقعوا مرارة اى حد فى الدنيا
يعنى الناس رايحة تصلى ولا رايحة تنم
وبرده السواقين بتوع الشرقية بما انى منها ومعرفش بيعملوا كده ليه؟ لما تعرفى ابقى قوليلى
ولا حكاية الخيم والرقص والاغانى دى مش لمة دى

ربنا يكملك بعقك يااختى

سلاااااااااااااام

حنين القلب said...

بصى يا آبى كل واحد بيحتفل برمضان زى ما اتعود اللى بيصلى ويختم القرءان ويحس انه شهر عباده بجد
واللى ويروح بالليل الخيم دى ويرقص ويغنى وهو شايف انه حر
يا بنتى انتى مش اوفر وكلامك صح بس هتصلحى الكون ازاى
وزحمه العربيات مهو الاهمال فى كل شىء قشمعنه العربيات والزحمه
والله يا حبيبتى خايفه عليكى شيلى شويه من على كتافك
كل سنه وانتى احلى آبى فى الدنيا
سلام يا صوت الضمير

ساسو said...

كل سنه وانت طيبه ياعسل ورمضان كريم
_______
والله معاكي حق انا بروح اصلي في الجامع لان لو قعدت في البيت ممكن اكسل او حاجه تشغلني
بس كل مره اروح اصلي ارجع وقول لا انا اصلي في البيت احسن
مقولكش علي بشوفه في الجامع عيال بتعيط وامهات بترضع وزعيق وضرب وتلتيش في العيال ودي تبصلك من فوق لتحت وتبقي بتصلي ومش سامعه الامام من الدوشه
والله ساعات كتير في اللحظه دي بتمنا اني اكون ولد عشان انزل اصلي مع الرجاله
ربنا يهديهم

بيكر(baker) said...

كل سنه و انتى طيبه و حاولى تصلى فى الجامع ده ثوابه اكبر بس زوغى من جارتك

alexandrany said...

كل سنة وانتي طيبة يا رحاب
ورمضان كريم
وربنا يتقبل صيامنا وصلاتنا وقيامنا

معلش جت متاخرة بس ظروف بقى
سامحيني
كل سنة وانتي بخير

المحارب المتيم said...

السلام عليكم


بصى يا ستى

انا سبتلك واجب تدوينى عندى على المدونة

وهو واجب جديد وجرئ وجميل ومن تأليفى

تعالى شوفيه

كوارث said...

كل عام وانتي بخير

في حب مصر said...

كل سنة واني طيبة
على فكرة انا مقدرتش اقرأ حاجة لاني كل ما افتحت المدونة بتاعتك النت يفصل مش عارف ليه.
بس هحاول كذا مرة لحد ما تظبط
تحياتي
رمضان كريم

safa7_karmooz said...

ياااااااااااااااااااااااااااه

طيب

ما ده بقى العادى

عليه العضو بقى :D

3ala asm masr said...

كل سنه وانتى طيبه الاول ورمضان كريم
والله افعال الناس بقت مستفذه اوى
خصوصا موضوع الصلاه فى المسجد بس على فكره انا بروح المسجد فى اى وقت غير رمضان بيبقى فاضى او صف واحد بس والواحد بيصلى فى هدوء ويمشى بعد الصلاه
لكن فى رمضان بيعملوا اجتماعات مغلقه داخل المسجد
ربنا يهدى الجميع

ابو اعصار said...

كل عام وانت بالف خير
تانيا مدونتك تقيله جدا على اجهزة كتير من الموبايل للكومبيوتر االلي في السايبر انا غيرت السايبر عشان اقرى مدونتك
ثالثا عقلك يوزن اتنين كيلو بطيخ مش بتنجان
تسلمي

مدحت محمد said...

كل سنة وحضرتك بالف خير

son's egypt said...

السلام عليكم
مش عارف ليه رمضان بقي كله خيم ومسلسلات
ما هي ضرورة خيم رمضان
هو رمضان بقي اصبح للخيم
وتسمعي خيمة فلان وخيمة علان
يلا ربنا يتقبل منا