الدويقه ضاقت باهلها


تحديث رابع :- يا شباب محتاجين شباب اولاد يروحوا علشان يوزعوا الفطار على الناس والسحور هتلاقوا هناك بتوع الجمعيات الخيريه هناك يا ريت تقدروا تساعدوا
البنات يا ريت تأجلوا مرواحكم يوم او اتنين او ابعتوا الحاجات للناس مع زمايلكم او اخواتكم الاولاد لان صعب تواجد بنات هناك


تحديث تالت:- الناس دلوقتى فى حديقه الفسطاط فى معسكر اللى عاوز يروحيقدم مساعدات هما هناك لغايه ما ينتهوا من الانقاذ الجرحي 36 واحد والوفيات 25 فرد لغايه دلوقتى


تحديث تاني:- ماما عبله الكحلاوي ربنا يبارك لها بعتت اتوبيس مساعدات لهم ناس تأكلهم وتقف معاهم يا ريت كلنا
نقف معاهم انا ان شاء الله رايحه بكره اللى عاوز يجي يقولى واقولكم نتقابل فين اللى يقدر على حاجه من بيته يجابها ربنا يكرمكوا بقى
تحديث:- اللى يقدر يساعد الناس يا جماعه يروح بجد الناس دي محتاجه اكل اكيد ولبس اللى يقدر يعمل حاجه الاخوه الدكاتره يا ريت تتصرف وتروح المنطقه دي الانقاذ هيفضل لبليل يعنى هيحتاجوا مساعدات
مش هنعتمد على الحكومه وبس ويا ربت الناس تلتزم النظام شويه يعنى المكان مش للفرجه
الدويقه من ضمن الامكان العشوائيه فى مصر
وفيهم اللى رفض من زمان بروح شقق تانيه علشان هما هناك عايشين من غير ايجار ولا حاجه
بس اهو جه اللى هيخلوهم يوافقوا بقى
يا رب باقى العشوائيات تتنقل يا رب

على الصبح خبر بانهيار جزء من المقطم على اناس فى الدويقه
النا س تحت الانقاض
بيقولوا فيه ناس بدأت تتصل من تحت الانقاض الانهيار حصل الساعه 8 الصبح على 40 منزل
لغايه دلوقتى 20 واحد توفوا
محتاجين يفتتوا الصخور
حيدر البغدادي بيقول بالفم المليان ان الناس دي اتظلمت ما بين المجلس المحلى وما بين المحافظه والاسكان والتعمير
لان فيه 1300 شقه فاضيه فى اسكان طنط سوزي
وهما الكبار بيهلبوه ما بينهم وبين بعض
هو بنفسه حيدر عضو مجلس الشعب عن المنطقه بيقول الفساد كتير فى الحزب ولا ينظروا للحكومه
الخيبه بقى ان البيه المحترم بيقول انا اري على شاشات الجزيره الان ان الجهود بسيطه
هو البيه منزلش مرحش ليه
يعنى برضه نفس القصه بيعيب على غيره وهو فيه العيوب
وبعدين المجنون على الصبح الجزيره مكرره نفس المشاهد
الفضائيه بث حى
والقوات المسلحه وصلت والدفاع المدنى وعثمان احمد عثمان والجبلى فتح المستشفيات
هو قاعد فى التكييف وبيتكلم يخيبك على الصبح يا راجل زيه زيهم اهو وانا اللى فاكراك نزلت جري من بيتكوا
اتفرجوا بقى على اللى بيتحرك وبيجروا من اماكنهم قاعد فى البيت وبيتفرج على الحدث من الجزيره ويعلق حسبى الله ونعم الوكيل فيكم وفى الوطنى كمان
والغلابه لهم ربنا

68 اخبط وقول رايك:

قلب مصرى said...

هو سيادته مش برضو حزب وطنى ؟؟
ولا معارضة مسيسة ولا إيه؟؟

فبالتالى إيه الغريب فى اللى هو بيعمله؟

حسن حنفى said...

والله معاكي حق

هو عمال ينتقد وهو اصلا كله عيوب

حسبي الله ونعم الوكيل

صاحب المضيفة said...

حسبنا الله ونعم الوكيل

عايش ولكن said...

انا مش شايف ان اللى بيعمله غيرب سواء كان بقا حزب وطنى حزب وفد او حتى اخوان مش هتفرق كتير احنا خلاص وصلنا لمرحله مش عارفين نحدد بنضرب منين بالظبط اصل من كتر ما الضربات بقت ورا بعض مبقيناش عارفين نحدد ايه اللى بيحصل ولا مين الل بيعمل كده
عموما بالنسبه لعشوائيات المقطم احب اعرفك انهم اكيد اكيد هيسيبوهم فى الشراع لان اللى اعرفه (ومش عارف صح ولا غلط بصراحه ) ان الارض اللى عليها العشوائيات دى اتباعت لمستثمر وربنا يخليلنا ماما سوزى وبابا حسنى
حسبنا الله ونعم الوكيل

وومن said...

يا آبي

بجد حاجة ترعب والأهالي مرعوبين ومنظر الجيل يخض

لما الجيل يقع احنا نعمل ايه

ومين ده اللي ينزل يا حبوبة امال الفضائيات تتصل بيه ازاي تلاقي حد قالة ان هناك مفيش شبكة
محدش يتصل

وجهة نظري said...

إيه في إيه ... ماتسيبي الراجل في حاله، صايم وبيصلي ويدعي طول الليل، الناس إلي وقع عليهم الجبل دول أكيد عملوا حاجات وحشه في رمضان وماكانوش بيدعوا فربنا وقع عليهم الجبل

وبعدين عااااادي خالص، مش أول مره يعني، ما وقعت حجاره علي البيوت قبل كده ومات 20 30 واحد ومحصلش حاجه، الدنيا ماتهديتش يعني

يا شيخه، ماتكبريش الموضوع كده، والحزب الوطني والا الإخوان ما كله منفد علي بعض ويا قلبي لا تحزن .... قولي يا باسط

ADAM said...

السلام عليكم

معلش يا آبي

الظاهر إن مصر

مش هتبقى حاجة تانية غير مصر


سلام

رمضان كريم

بس مصر لأ


آدم

appy said...

عايش ولكن
============
لا الجيش فتح ادار المناسبات اللى قريبه من المكان لتسكين الناس مؤقتا المجلس المحلى لازم ياخد الباقى يودوهم الشقق ببس مش عارفه امتى
علشان كده بقول نساعد الجيش فى مصر لسه بخير صدقنى

appy said...

وجهه نظري
==========

انت عارف اللى غايظنى ايه انه طالع ومش مركز الصوره عماله تتعاد وهو زي المجنون فى الزفه بيقولها مش شايف حد وصل والكلاب بتلف حوالين
الصخور
ومش مركز ان الصور واقفه ومش هاين عليه ينزل وعمال يشتم فى الحكومه كأنه لقى جنازه وما صدق
حاجه توجع القلب بجد

مهندس مصري said...

يا ستي حيدر بغدادي كان حزب ناصري و بعد ما وافق على تعديلات الدستور العجيبة في جلس الشعب اتفصل من الحزب الناصري و إنضم للحزب الوطني

انتي لخبطتي بينه و بين رئيس كتلة الإخوان المسلمين في المجلس اللي اتكلم بعده

و لو تفتكري لما حيدر ده اتكلم عن قضية هايدلينا بتاعة هاني سرور
تاني يوم كان بيتوزع في مجلس الشعب السي دي بتاع حيدر و هو بيرقص مع رقاصة و بينقطها

عموماً هي بلدنا دايماً كده بلد الكوارث الناتجة عن الإهمال و الفساد
ربنا يكون في عون الغلابة
:(

مهندس مصري said...

و بعد بتاع الإخوان ما إتكلم اتكلم رئيس كتلة المستقلين

مهندس مصري said...

الغريب ان حيدر حزب وطني و قعد يهاجم أجهزة الحكومة و دي غريبة جداً بس ما قدرش ينزل و يروح
لأن حسين عبد الغني مدير مكتب الجزيرة قال ان الناس مستحلفة له لو شافته حتقطعه لأنه نايب الدايرة و حزب وطني و معملهمش حاجة

appy said...

مهندس مصري
============
سوري صح كلامك

اصلى كنت لسه صاحيه من النوم
بس الا قولى هو مش كان بيعلق برضه

وهو فى البيت ولا راح ههههههه
يعنى كله واحد مفرقتش والله يا بشمهندس ولا ايه رايك

appy said...

قلب مصري
==========
اه حيدر وطنى واللى اتكلم بعديه من الاخوان وقال نفس الكلام وبعدين بتاع المستقل المشكله انه بدع فى الشتيمه

مهندس مصري said...

بالضبط كله كان بيعلق من منازلهم
و يا عالم الموضوع حيرسى على كام قتيل و كام جريح
المصايب بقت ورا بعضها
كتير قوي كده
:(

appy said...

مهندس مصري
==========
نسيت اقولك بينى وبينك
السي دي حقيقي بجد انا شوفته عند حد كان سهران فى المكان ده قبل ما يتنشر عارف قعدت اشبه علي الراجل ده ومش افتكرته وحتى جوز صحبتى اللى عنده السي دي مكنش عارف ده مين
هتقولى جاب السى دي منين اقولك كان سهران فى نفس المكان مع ناس اصحابه هههههههههههههه بس كانت طالبه معاهم مكان بيئه فعلا وانا بالصدفه فى البيت بتفرج على الاب توب بتاعه وبعمل له حاجات لقيت الفيديو ده وقعدنا نضحك على التصرفات البيئه دي وكمان انه راح مكان زي ده

Copa Zaki said...

هو انتوا لسه شفته حاجه
ربنا يستر علينا في 2009
اهو كل الي فات كوم و السنه دي كوم تاني

ليكوريكا said...

لسه عارف الموضوع ده من شويه

الطف بينا يارب :(


ربنا يسهل كل احتياجات الناس دي

وينجي كل اللي تحت الانقاض

الطائر الحزين said...

الا لعنة الله على الظالمين

مواطن مصرى نايم said...

حيدر بغدادى
دا خبؤ
و بطيخة قرعة من غير بذر
يا ايبى الراجل ده مش بينزل لى من زور
بجد لما بشوفه بتنرفز
ما هو برضوا من اللى شافطين البلد فى كرشهم
ربنا عالظالم
و الغلابة ليهم ربنا

د/اجدع بنوته said...

انتى كاتبه بلاش الفاظ مش كويسه

بس بجد يا أأبى الواحد مبقاش قادر يمسك نفسه

هأأأأأأأأأأأأأأأأأو بجدددد

كام كارثه ف كام سنه يامصر

كام كارثه كمان محتاجينها

علشان يعرفوا انهم يروحوا يقشروا موزز

وياكلووووووه افضل ليهم ولينا

م المناصب والكرفتات اللى بيتقمعوا بيها

لا حول ولا قوة الا بالله

فاض بينا والله بجد فاض بينا

يارب ارحمهم وارحمنا

يارب عليك صلاح الحال

الحمدلله ولا حول ولاقوة الا بالله

seven said...

هوه فعلا المشكلة مش ان مفيش شقق
المشكلة ان الشقق اللى بتتبنى
بتتوزع غلط
كل واحد ليه واحد قريبه يديله شقه
والناس اللى محتاجة شقق فعلا
يقللهم حددو النسل عشان تلاقو شقق
حسبى الله ونعم الوكيل

Ahmed Al-Sabbagh said...

برافو عليكى دايما سباقة للخير
وربنا ما يوقع لك صخرة

blue-wave said...

يا خوانا المنظر هناك مؤلم جدا
انا لسه راجع
بجد بجد حاجه تخلى قلب الواحد يتخلع من مكانه
ربنا يلطف بينا وربنا يلطف بيهم

A.SAMIR said...

الناس دي ارتضت من زماااان انها تبقى ناس مهمشة
واهو جت على دماغهم في الاخر
عرفتوا بقى السلبية بتوصل لفين؟

صوت من مصر said...

ممكن اعرف ليه الحكومه مجبتش خبر واحد فى التليفزيون المصرى
هل عشان رمضان ولا عشان هى مش ناقصه ؟
عموما حسبى الله ونعم الوكيل

ahmed_k said...

الدويقه ومنشية ناصر من أكثر أحياء القاهره عشوائيا
والبيوت هناك أشد هلاكا من بيوت الصفيح
وهذه المناطق يكثر فيها المخدرات والبلطجه وكل أنواع الفساد
من سرقة سيارات وتروح هناك وتختفي
ولو لم يتم وضع حد لتلك العشوائيات حياجي اليوم اللي تختفي من مطار القاهره طائرات ونكتشف أنها راحت إتفكت هناك وإتباعت خرده هههههه

والسيد العضو بالتأكيد حزب وطني فمايهموش الناس دي في حاجه
لأنه في نظره ناجح ناجح

وتقبلي تحياتي يا آبي

appy said...

صوت من مصر
==========
لا يا حج الفضائيه ذاعت مباشر سلامه النظر بقى

نهر الحب said...

لا اله الا الله
اقول اية حكومة مالها غير الكبار وحل الازمات بعد المصايب ووجود ضحايا

محدود الدخل said...

الجيش المصري
في تقدم وأزدهار
بيصنع حلل وغسالات وبيعمل أسفلت وكباري
وبيطفي حرايق
وبيشيل المقطم لما يقع
جيش يشعرنا بالفخر

وكأن مصر معدش فيها أي حاجة تنفع بدون تدخل الجيش

ياريت يا جماعة الي يقدر على أي حاجة ميتأخرش في أنو يقدمها لأهالي الدويقة
والله لومجرددعم نفسي هيفرق مع الناس دي
وربنا الي يعلم أن لولا أني صعب أروح كنت رحت من الصبح
فياريت أي حد يقدر يروح ميترددش
صبرهم ساعدهم وفرلهم لقمة يفطرو بيها أو يتسحرو بيها
أي حاجة
الناس دي في مصيبة وواجب علينا دعمهم
مش وقت حساب حيدر زفت ولا حكومة الهم
دلوقتي وقت مساعدة الناس دي
بعد كده عندنا الوقت كلو نقول في الحكومة والمحافة وكل المسؤولين الي أحنا عايزينه

Habiba said...

ياحببتى
هو انتى متوقعه غير كده؟

ربنا يقويكوا ياقاهريه على فعل الخير بقى
كل مااشوف ده اقول ياريتنى كنت عندكوا

شفى بجد ربنا يتولاهم

واللى توهم اولانى بين المحافظة والمجالس يتوههم دلوقتى بين البشر عديمه الرحمه

ربنا معاهم

blackghost said...

انا الموضوع دة عملى قلبة فى دماغى انا حاسس انى مش فاهم حاجة وبقيت معبطط فى ردو\دى شوية عموما كان نفسى اجى بس بما انى معنديش اى ممتلكات شخصية ولا اى حاجة فمش هقدر اجى

WhItE HeArT said...

أبي ربنا يوفقك

لسه كعادتك بتقفي وقفات جميله

اسف لتأخير بس برضه مفيش سؤال عن الواحد ؟


ربنا يوفقك ورمضان كريم وكل سنة وانتي بخير

تحياتي

واحد مفقوع said...

appy
ياريت تلفتى نظر الناس على الاقل اللى مش حيقدر يساعد ويجى لو امكن يفتكر الموتى والشهداء بالدعاء لحظة الفطار او ان كان ممن يقومون الليل يكفى صلاة ركعتين مشمولين بالدعاء عليهم ربنا يرحمهم ويصبره ذويهم
وحسبى اللة ونعمة الوكيل فى اللى كان السبب

قوس قزح said...

appy
من فرج عن مسلم كربة من كرب الدنيا ، فرج الله عنه بها كربة من كرب يوم الاخرة

جزاكى الله خير على عرضك للمشاركة فى مساعدة الناس دى

و ياريت كل شخص يحط نفسه مكان حد من الناس دى و يشوف وقتها اد ايه اى مساعدة من الناس هتفيده ازاى

HafSSa said...

انا خلاص فقدت القدرة على الاحساس
الظاهخر ان كترة المصايب بتولد العطب في القلوب
بس حرجع و اقول اني متضايقة فوق الحد
معقولة اللي بيحصل ده؟
و لسه نظيف فيه حيل يكذب؟
يعني يقولوا انهم كانوا بدوا يسكنوا الناس و الناس تقول انهم ولا معاهم خبر
يعني ايه؟
كانوا بيبعتولهم اشعار التسكين على البوتجاز مثلا ولاايه؟
اللي انا مش فاهمة بجد هو امتى الناس حتتكلم وتثور على الاوضاع دي؟
دي مصيبة واحدة منهم لو كانت حصلت في بلد تانية كان زمانها الحكومة دي نزلت و اتجاب بدالها عشرة
ايه يا ناس
مبقوش يحسوا خلاص
عاجبهم الوضع اوي يعني؟؟

قوس قزح said...

انا اسفة
الحديث بيقول
يقول الرسول صلى الله عليه وسلم كما في صحيح مسلم
((من فرج عن مسلم كربة من كرب الدنيا ، فرج الله عنه بها كربة من كرب يوم القيامة . ومن ستر مسلما ، ستره الله يوم القيامة))

الربان said...

تحياتي

لا اجد ما اقول غير حسبنا الله و نعم الوكيل ....لو وجدوا مساكن لهم لما قامروا و غامروا بأنفسهم و عاشوا في
هذا الخطر الداهم يوميا...

رحم الله الموتي...و اتم للجرحي الشفاء.

و بارك الله فيك علي هذه الدعوة الخيرة
و دائما ما نجد منك كل ما هو جميل و اصيل في زمن قل فيه الجمال و الخير....
وفقكم الله دائما و جعل اعمالكم في ميزان حسناتكم.

تحياتي و تقديري.

شملولي بن سحلولي said...

ربنا يتولاهم برحمته

Founoon said...

صباح الخير يا ابي

ايه الاخبار ؟!

بالنسبة لعندي كل الناس بتؤكد ان صعب او شبه مستحيل بنات تروح هناك وبيقولوا بهدلة فوق الوصف

وانا مازلت بحاول اني اروح

الحاجات جهزت وفي حاجات راحت امبارح

الناس مبدئيا محتاجين اكل ..اي وجبات هتنفع

ياريت تقوليلي ايه الاخبار عندك وهتروحي امتى

appy said...

فنون
===========

نفس القصه اتقالت ليه برضه انه صعب جدا الناس كمان حالتهم صعبه
بس الجمعيات الخيريه قايمه بالواجب علشان دول شباب حتى اتوجهت دعوة على الفيس بووك بس للشباب لانهم قالوا البنات صعب مش عارف نستنى يوم كمان

ضى القمر said...

على مات يتم أنقاذ الباقيه هيكون عدد الموتى زاد جدااا
بجد الموضوع ده كارثه
واضح ان الحكومه بقت بتكيفنا لتقبل الصدمات والكوارث بس

أصل الحكومه عارفه اننا شعب طيب مسالم .. هنحزن من جوانا وكبيرنا نقول حسبنا الله ونعم والوكيل والموضوع انتهى خلاص

بذمتك يا آبى شوفتى شعب طيب ومسالم زينا كده ..

لأ وبنقول الموضوع ده مش هيعدى بالساهل .. طيب لو عدى هنعمل ايه ؟؟
لو طلع الغلط على الهضبه هنعمل ايه ؟؟
اللى هعمله اننا هنحول دعائنا على الهضبه وخلاص ..

بجد بقينا ضعفاء أوى أوى ..
وبقه سكوتنا ده السبب فى اللى بيحصل فينا واللى لسه هيحصل لينا

(احمد سكر ) said...

السلام عليكم ورحمة الله وبركاته

جزاكى الله كل الخير ياريحاب

ياجماعه عاوزين فعل

تعالو نحاول نعمل اى شىء

حتى نشيل طوبه صغيره

اهى بردو اسمنا عملنا حاجه

وزى ابى ماقالت

مش نروح نتفرج

بأذن الله

انا رايح دلوقتى

قلب ينبض لله said...

حادث مؤسف ومؤلم جدا

فجأة الواحد يصحي من النوم ويلاقي نفسه بيفقد اهله وبيته والحاجات الضروريه اللي بتبئي في حياة أي أنسان بمنتهي السهولة

أنتي عارفة المشكلة فين ياآبي
أن كل واحد مش شايف أنه المشكله وأن الناس التانية هما المتسببين في أي مشكله بتحصل

مش معقول كل شويه كدا بنموت بالكوم
مرة عبارة ومرة حريق قطر

ربنا يصبر الناس اللي لسه عايشين وفقدوا اهلهم

ويرزق الناس اللي توفت الجنه يارب

سلام

hend...hanady said...

ربنا معاهم ويعنهم وياريت بجد كل من يقدر يساعد يروح
وبلاش سيرة حيدر بغدادى لانه نفسه خايف من المرواح لينضرب ماهم بقالهم زمن بيستعطفوا جنابه يعمل لهم حاجة ونايم افتكرهم دلوقت

ahmEd_H said...

شكرا على التحديث و الموضوع

انسان بلا عنوان said...

ازيك ابى عامله ايه فى الصيام ؟
حيدر البغدادى راح لمكان الحادث على فكره ....بس الرجل وباعتباره بيمثل الشعب هههههههه حب يعرف الحقيقه من مصدر موثوق كما يفعل الشعب وبالتالى اتفرج على الجزيره بس هو راح للموقع وانا عرفت انه راح واتكدت ...من قناة الجزيره !!هههههه
هم يهؤهؤ وهم يهىء هىء

الدويقه داقت باهلها

مصر ضاقت باهلها وبحكامها
وهو منه لله حسنى

منه لله

اليس كلنا مننا لله ؟

ولنا الله

appy said...

انسان بلا عنوان
==============
اه فعلا راح وبيقدم اكل للناس هو والشرطه والقوات المسلحه فعلا مش هزار
بس بعد ايه افتكر الناس الناس يقطعوا القلب والاطفال البنات هنروح كمان يومين بجد
الناس بدات تسكن فى الشقق بس اغلبتهم سايبين المبيوت وفى الموقع علشان اهاليهم

الدفاع said...
This comment has been removed by the author.
الدفاع said...

نا لله وانا اليه راجعون
اللى حصل ده مصيبه بكل المقاييس سواء على المستوى الانسانى او على غيره
انما اللى لافت نظرى ان احوالنا وصلت لدرجه من السوء ان الجبل بدأ يتحرك ويسقط واحنا زى مااحنا لا نتحرك الا بقدر يسير وبعد فوات الاوان
فماذا ننتظر؟؟؟؟ بعد ان تساقطت حجارة الجبل
(ظهر الفساد فى البر والبحر بما كسبت ايدى الناس)اللهم
اغفر لنا جميعا وارحمنا

طارق الغنام said...

لا حول ولا قوة الا بالله
مش عارف اقول ايه يمكن انا كتبت بوست بس والله اللى قلبى اكتر
دة احنا فى رمضان
المشكله ان المسئولين عارفين ان المنطقه دى احتمال يحصل فيها كدة
حسبنا الله ونعم الوكيل
تحياتى ياابى
معلش من حرقه قلبى مش عارف اكتب ايه

Hossam said...

HELLO APY
firstly,زعلان منك جدا عشان مش بقيتى تخشى عندى
عن الموضوع بقى
الحكومة المصرية دى اصلا زبالة
بس انا خايف يكونوا اهل الدويقة عارفيين خطر الصخر ده وكانوا عارفيين ومش اشتكوا تبقى مصيبة يبقى العيب مش من الدولة سعتها ويبقى منهم
يا رب ظنى يخيب
سلام ياللى مش بتسالى

appy said...

مش عارفه اعلق على كلامكم
لان الموضوع مش محتاج تعليق منى خالص
انا رديت على الناس اللى فيه نقط مش عارفينها
انما كلكم عارفين الباقى
ويا ريت ندعو للناس ربنا يصبرهم لان حالتهم صعبه جدا جدا والاطفال اللى ماتوا والناس اللى لسه صاحيه تحت الانقاض يا رب فعلا تكون حقيقه
القوات المسلحه والشرطه وبعض من بتوع مجلس اشعب بعتوا للناس والناس بدأوا فى تسكينهم بس المشكله ان الناس كل يوم تقريبا فى الدويقه تانى
علشان اقاريبهم واهليهم
بعد ما الامور تهدى هنشوف هنعمل ايه ان شاء الله للناس دى وبرضه الشباب اللى يعرف يروح اولاد مش بنات يا ريت يروح

لست أدرى said...

انا كمان كاتبه بوست عن الحادثه
بس اللى انا شفته ان اهل الدويقه بياكل ويشربو كويس تبع القوات المسلحه
والغريب ان الناس دى مبسوطين
وبيقولو انهم كانو عايشين فى عشش صعبه لكن دلوقت القوات المسلحه وفرت لهم خيم ايواء وبتلبى ليهم كل طلباتهم
شفتو الناس وصل بيهم الحال لايه؟؟؟؟؟؟
وصل بيهم الحال انهم مبسوطين انهم فى خيم ايواء وكأنهم عايشين فى قصر

اللى انا سمعته فى الاخبار يوم الحادثه ان الدوله هتوفر شقق للناس دى
بس الشقق بقت خيم
بس هيفضلو فى الخيم لحد امتى؟؟

appy said...

لست ادرى
==============

الناس فعلا بدأت تتسكن من امبارح
وفعلا الجيش والشرطه واعضاء الاحزاب بتساعد بالاكل والشرب والحاجات دى
بس المشكله ان فعلا الناس وصلت للمرحله دى فعلا مصر وصل اهلها انهم بيرضوا باقل القليل ومش فى ايديهم حاجه

appy said...

تامر صلاح
===========
اسفه يا تامر انا شوفت تعليقك اللى انت مسحته وفيه تليفونك من على الميل
بص هو هتجى من هناك تعمل ايه بس اقولك حل احنا هنعمل حاجه بس بعد الناس ما تتسكن فاهم هبقى اكلمك واقولك لو تحب تشترك معانا
وميرسى ليك خالص الا ما عملوها بتوع القاهرة

مواطن مصري said...

نورتي مصر
لو شوفتي المقطم بيقع عليكي وا نتي نايمة
يبقى اكيد اكيد انتي في مصر

amr said...

طيب و بعد مايتسكنوا يا ابي .. اية النية ؟ اية الخطة ؟

appy said...

عمرو
=========
بص يا سيدى هو لما يتسكنوا هنشوف الاسر قد ايه فهمت وكله يجيب اللى يقدر عليه وهنوديه لهم كل واحد يجيب حاجاته ويوديها بنفسه فهمت يعنى انا ولا بجمع حاجه ولا هاخد حاجه كلكم باديكم
وعلشان نشوف ايه اللى ناقص للناس دى علشان الناس دى فقدت كل حاجاتها لبس ومستلزمات البيت وكل حاجه
فهنساعد باللى نقدر عليه
وقولت لك لو عاوز تروح روح ودى لهم هما فى حديقه الفسطاط
وفى المساكن الجديده اللى فى منشيه ناصر وابقى عرفنا عملت ايه ربنا يكرمك يا رب

appy said...

مواطن مصرى
=============
يا لهوى والله انا مش فى المقطم بس خلاص ليه لا
عموما متحذر من الانهيارات دى من 15 سنه

المحارب المتيم said...

آبى هانم

بصى يا ستى

الموضوع من يوم ما بدأ وهو شاغلنى لسبب
واحد الاستاذ جمال مبارك زار اكتر من قرية وحى فقير

والمقطم منطقة حيوية ومش هضبة أى كلام

وأكيد بتوع الجيولوجيا كانوا عارفين أنه هيتدم فى أى لحظة

لية الاستاذ جمال مراحش أى حتة من عشوائيات القلعة الكتيرة

من عند منشية ناصر والحتت اللى حواليها لحد السيدة نفيسة

أكيد كان واخد خبر

وأهو كلوا علشان حملة الوقفة مش عايزين الناس متخلفش
أهوفرصة المواليد اللى بتيجى كل سنة اتنين مليون
فى ساعة مات لدلوقتى 35

ورمضان كريم

بنت سيناء..سويركية وافتخر said...

عندك حق يارب يا شيخة يقرا كلامك..

وجهة نظرى


ضحكتنى اوى والله دة طول الليل بيتعبد مش فاضى

انا ودماغي said...

بجد ربنا يستر على البلد دى أحنا بجد شعب فظيع جدا و بيستحمل العجب أحنا بس محتاجين بقرب من ربنا عشان اللى بيحكمونا يتغيروا و يرحمونا كويس...و بعدين اللى بيحصل ده عادى جدا من الحزب الوطنى ما هو الحزب الوطنى

أحنا نحمد ربنا إن لسة فى ناس فى قلبها خير و ده من رحمة ربنا

و كل سنة و أنتى طيبة

فزلوكة said...

سبحان الله أصلا قبلها بأيام بس كنت بزور منطقة عشوائية بعمل عنها تحقيق
الناس دى فعلا والله مش عايشة
وبعدها كان موضوع الدويقة دا
أنا مش عارفة فيه إيه
لو تلاحظى إ‘حنا بقينا كل شهر تقريبا كارثة

بجد ربنا يتولانا على إللى بيعملوا فينا دا
سيدنا عمر قال لو عثر ت دابة لسأل عنها عمر
فما بالك بأرواح بنى آدمين
حسبنا الله ونعم الوكيل

محمد الكومي said...

على فكرة اضافة لكلام مهندس مصري اللي في الاول

حيدر ده اصلا هو النائب بتاع سي دي الرقاصة المشهور بتاع الحصانة الحصانة الحصانة على طريقة العنب العنب العنب

فيعني هنستنى ايه من نائب زي ده

و بعدين الحكاية مش حكاية نائب

العملية ان دلوقتي لو يوم عدى من غير كارثة يبقى مش طبيعي

ساعات بيجيلي احساس استغفر الله العظيم يعني

ان ربنا قدر الموضوع ده عشان يقولنا حتى لو اترحمتوا من الكوارث البشرية انا مش هسيبكو و هاديكوا على دماغكو لحد ماتفوقوا

ربنا يرحم الموتى و يصبر الاحياء اللي هم برضه موتى

و يمكن يكون اللي ماتوا وضعهم احسن دلوقت

مين عارف

Lady E said...

كل سنة وانتي طيبة وبخير وصحة وسلامة يا أحلى آبي

على اد ما انا مقهورة ان كل شوية اشوف مصيبة في بلدي لكن في امل طول ما في ناس زيك وزي معظم الشباب فيهم خير وبيحبوا يساعدوا الناس وبيظهر معدنهم الأصيل في الازمات

معلش انا مقصرة في الردود عندك وده لأن البوستات والبلوج مكانوش بيظهروا عندي نوهائيا

appy said...

محمد الكومى
=============
ابقى اقرى ردى عليه انا كملت له موضوع السى دى ههههههههه





ليدى
========
عارفه يا حبيبتى وخفتها خلاص والله

blackghost said...

ابى مش هعرف اتكلم فى الموضوع دة علشان معرفش حاجة عنة

بس انتى معاكى نمرة نوارة نجم علشان خلت المدونة للمدعوين فقط وانا عاوز اخشها