حد عنده مرارة للبيع بضمان يوم حتى


اولا احب ان انوه انه هناك بعض من الاشخاص يأخذون الاكسبريشن (الالفاظ يعنى) بتاعتى من كوكبى حبيبى ويحطوها عندهم وانا ارفض واشجب وأستنكر وهنتحر انهم مش بيقولوا انى دى بتاعتى وهعيط بس مش مشكله بقى كلهم حبايبى هههههههه حلوة الدخله الجامده دى شوفتونى وانا بنطح وبرمى بالقلل زى خرفانى يا خرفانى
نبدأ اولا جبت خبر كده من عند اخواتنا المصرى اليوم بيقولوا

وكيل لجنة الإسكان: الدولة ستعجز عن تنفيذ برنامج الرئيس الإسكاني بسبب أسعار مواد البناء
شهدت لجنة الإسكان، برئاسة المهندس سليمان متولي أمس، مناقشات ساخنة حول ارتفاع أسعار مواد البناء، وحذر الأعضاء من خطورة الوضع الحالي علي صناعة التشييد والبناء في مصر، مطالبين بمواجهة الفئة التي تتحكم في الأسعار لحماية ٨٠ مليون مواطن
هو برضه على حد علمى مش اللى بيغلى الحديد ده هو الاستاذ يتربى فى عزو حماده عزو ولا انا بيتهيأ ليه ولا دى بقى خطه جديدة من الخطط علشان يطلعوا قرار ان مفيش اسكان للشباب ومش هيكملوا برنامج اونكل مبارك علشان معندهومش دم يواااا قصدى حديد ويبقى وعد واتنسى و ذهب مع الريح وراح ولا عاوزين يرجعوا فى خطتهم بشياكه ويطلعوا دور الضحيه المضحيه طيب هما ميقدروش يكلموا حماده عزو فى الموضوع ولا يعضهم ويحط السيخ المحمى فى صراصير ودنهم بقى امممممممم ولا الناس دى واكله مستهبله ومستعبطه وبيطلعوها علينا طيب والله الاسكان اللى بيعملوة بيحل ازمه هما عوزين يغيظوا فينا يموتونا ويبقى خلص من الشعب ويقعدوا على تلها ويخربوها انا بقى عندى حل ما بدل حديد يتربى فى عزو يجبوا بشاى ولا اى حديد مش قولت تلاكيكو
نيجى للتانى من مصراوى افندى
حركة مصرية معارضة جديدة شعارها لسنا عبيدا وسنحارب الفساد
أعلن بمقر مركز العدالة والديقراطية لحقوق الانسان عن تأسيس حركة معارضة جديدة تحمل اسم التيار البديل

تضم الحركة عناصر من مختلف التيارات السياسية وهى ذات توجه ليبرالى وتتمسك بالتقاليد المصرية والعقائد السماوية وتلتزم بالدستور المصرى

طيب بزمتكوا انتم عارفين مصر فيها كام حزب فيها 27حزب طيب فين الدوله اللى فى العالم المتقدم وغيرة فيها الكميه دى جاوبم انتم كل يوم والتانى واحد طلع فكرة فى دماغه وهو نايم على اساس سحليه عدت على قفاه لقى نفسه مؤسس حزب ومحدش يقولى حريات وبتنجانات ده اسمه تفككات يا فتكات وقولنا من قبل الحريه لها اسقف لا يجوز اختراقها بجد لان ده بيدل على تزعزع القيم وعدم الوعى السياسى وبينى وبينكم اهى نصابيه كويسه يأخدوا بيها قرشينات ويرجعوا يقولوا بندور على مصلحه المجارى قصدى البلد طيب حد يفهمنى هدفهم من السطرين دول ولا التفكير ده بيمشى كله مع بعض ولا انا هيست ومش فاهمه
خدوا الخبطه التالته
تقرر فتح أسواق جديدة لاستيراد لحوم الجاموس والأبقار والماعز والدواجن (على اساس أننا فقدناهم فى الحرب ) لسد الفجوة الغذائية وحماية المستهلك المصري (افهم بقى حمايته من مين ها حد يقولى ).وقال الدكتور حامد سماحة رئيس الهيئة العامة الخدمات البيطرية أن الأسواق الجديدة ستقوم باستيراد لحوم الجاموس المشفاة والمجمدة من الهند (طيب ده يرضى حد بقينا نستورد من الهند دى جارتى بتجيبها وبجد ريحتها استغفر الله العظيم مش عارفه الناس بتأكلها ازاى بس بعذرهم ناس غلابه ) ، واللحوم البقرية المشفاة والمجمدة من البرازيل والأرجنتين و أورجواي وبارجواي وكندا وهولندا وأمريكا (امريكا دخلت فى الموضوع هما مش عارفين الناس دى انهم ممكن يكونوا هيصدرونا وباء مثلا ومحدش يقولى حجر صحى وبتنجان الفلوس بتمشى العفريت )، ولحوم الأغنام من أستراليا ونيوزيلندا (هى مش استراليا دى اللى قالت علينا نمورة وقروده ووحشين وبنعذب الخرفان يا حرام هيدونا ازاى يعنى )، ولحوم الدواجن من البرازيل (على اساس انهم معندهومش الفلونزا القرود مثلا قصدى الطيور ) حسبما ورد في وكالة أنباء الشرق الأوسط.
طيب حلو قوى كل ده هما نيتهم كويسه واحنا وحشين عاوزين يحموا المستهلك قصدى يحموه طيب ما تتصدوا للتجار الجشعين بجد بقت حاجه تزهق تروح تشترى مثلا كارت موبيل الشركه قالت بعشرة جنيه يقولك هو بعشرة ونص الله يا عمنا ما الشركه قالت كذا يقولك انا مليش دعوة معرفش وبما اننا شعب كسول فبنشترى ونخلص عرفتوا بقى العيب فينا بجد فكرة وبتتنطط فى دماغى كل فترة هو ليه احنا مبنقولش لا للتجار اللى بيستغلونا حتى فى ابسط حاجه الخضار ليه مندورش على الارخص ليه منقولش لا للحاجه الغاليه وهنلاقى فى مكان تانى بجد حتى لو اقل 25 قرش انت او انتى او ابنك او بنتك اولى بيها انا عن نفسى بجد بعمل كده انا بروح كارفور (على فكرة كارفور ارخص بكتير من البقاله العاديه حتى مش السوبر ماركت ) علشان بلاقى فيه الحاجه ارخص من برة مع ان جنب بيتى الكتير بس اغلى فيه حد يقولى البنزين اقولكم ريحوا نفسكم عربيتى ممكن تودينى كارفور وتيجى واكون استهلكت ب2جنيه بنزين مش مهم المكان بس نبطل كسل وسياسه تكبير الدماغ وندور على الارخص لينا ونناقش الناس بصراحه انا فى الحاجات دى بعمل كده لان حرام عليا افرط فى حق من حقوقى انتم برضه لازم تعملوا كده بالنسبه للعيش الناس فاكرة ان الافران الكبيرة او مثلا مونجينى بيبعوا غالى هو بيبع فينو بنفس سعر اللى بره بس الميزة بقى انهم محترمين ناس بتعمل حاجات نظيفه تحس نك بنى أدم وانت بتأكل مش العيش اللى بنجيبه من برة لا يرى بالعين لمجرده ومنستناش الحكومه ونقول دورها لا نأخد موقف كل واحد فى كل مكان لو وقف للجشع والطمع بتاع التجار هنلاقى الدنيا بقت حلوة وبما ان الاسعار زادت بطريقه خرافيه لازم نعمل حاجه انا بعد ما عملت حمله فليبينه صعيديه على التلاجه ونظفتها ورحت اشتريت حاجات لاقيت الدنيا ولعت بجد وده حرام يا جماعه ارجوكوا قاطعوا التجار المستغلين للظروف اتعب شويه وروح مكان تانى ومتكسلش هتجبروا الناس دى على خفض السعر حتى لو عشر قروش
كان معكم مراسلكم مفقوع المرارة آبى من كوكبها اللى هينفجر قريب من الغيظ

تخريف خرفان :- يا صديقى يا ابو الهول اوعى تقولى تانى انتى بتخبطى فى الحلل لانى بجد هقلب المطبخ على دماغك كله انا بتكلم علشان حقى وحقك جتك كسر حوقك (حد يعرف يقولى حوقك يعنى ايه اصلى معرفش بجد)

67 اخبط وقول رايك:

mermaid said...

هاااااااااجر هنا

MerMaid said...

ازيك يا ابي؟؟
معلش يا ابي
اتعودي ع الصدمات و الخبطات

تحياتي ليكي يا قمرنا
:)
منورة

الطائر الحزين said...

وايه الجديد

عارفة المثل اللى بيقول

من دقنه وافتله

يعنى كل حاجة منهم فيهم

هما اللى يغلوا وهما اللى يشجبوا وهما المرتاحين فى الأخر


تحياتى

بنت الاسلام said...

بالنسبة للتخريفة الاولي

واضح ان عز ظهره وجعه شوية

طبعا فاهمة الحكومة بدأت تتخلي عنه

لان عليه العين

والكلام عليه زاد وعاد

فقال اخبط انا كمان


يالا خليهم يخبطوا في بعض ماعلينا

التخريفة التانية بقي


الاحزاب السياسية


هما كتير اه

لكن اين الاصوات

لا صوت يعلو فوق الوطني

والاخوان


وانا مش معاكي الصراحة

انا شايفة ان تعدد الاحزاب شيء مهم وضروري


وعلامة مميزة علي افكار جديدة بتنطرح

انا عن نفسي بفكر اعمل حزب

للمدوووووونين


هاتي صوتك معانا بقي


اما


التخريفة التالتة


بتاعة الفراخ والحمة


ماهما موتوا فراخنا وقالولنا انفلوزا

عشان يشجعوا حركة الاستيراد والتصدير

طبعا استيراد الامراض

وتصدير الاوجاع

تحية كبيرررة قوي


لكوكبك بخرفانه

واستهدي شوية

لسة علي الموت من الغيظ شوية

walaa said...

سبتى السفر ومستكى فى السياسه انت كده هتتقفشى ادينى بقولك اهو
عندك حق غى كل كلمه قولتيها بجد
الناس بقه عندها لا مبالاه متعرفيش ليه كده ولا اكنها عايشه فى البلد
وفعلا متعرفيش عايزين ايه اكتر من كده علشان يتحركوا مش لقين جواز ولا فلوس ولا حتى عارفين ياكلوا اكل ننضيف زى الناس هيتحركوا امتى متعرفيش
ولاء

appy said...

هاجر
اهلا وسهلا وخدتى اول قلم قصدى جايزة او تعليق شيوكلاته بربع جنيه
لا مش هتعود لازم نبقى ايجابيين يا هاجر مينفعش كده بجد بلاش معلش دى هتودينى فى داهيه

appy said...

أستاذى الطائر الحزين
اشعر بنغمه يأس كده لا طيب نقاطع احنا بلاش نكبر دماغنا نتعب شويه يمكن بلدنا تتصلح


بنت الاسلام
بطوط يا قمر لا احزاب ايه ومبيعملوش حاجه ما يروحوا يشتركوا فى الحزن الوطنى ولا يعملوا مستقلين يا امى انتى فهمتى السطرين يا بطه اللى كاتبنه وايه نوعيه الحزب بلا نيله حاضر خدى صوتى وادينى 10 جنيه امون العربيه هههههههههههههههه

appy said...

ولاء
اها يا ختى سبتها تنازلت عنها زهقت هتجنن بجد زجاجه الزيت وعلبه سمنه كيلو وعلبه شاى باكت صغيره وربع جبنه رومى وزيها بيضاء وعلبه فراخ ثرى شيفس وحاجات هبله ادفع 87جنيه ليه دا انا كنت بشترى المحل كله بكده الزيت بقى اللتر ب8.50 مش حرام بجد
طيب نتحرك احنا نقاطع نقف للناس

only spot said...

سلام عليكم
نمسكها حته حته بالنسبه لغلاء اسعار المواد البنائيه فقولك ايه تقريبا دور احمد عز قرب ينتهى وعشان كده الحكومه فى الفتره الجايه هتلاقيها بتقوم عليه الناس اكتر ما هى قايمه بنفس القناع البرئ الى احنا متعودين عليه
استيراد اللحوم والطيور اصل يا عزيزتى رغم كل الامراض الى بنعانى منها الا ان احنا زى القطط بسبع ترواح ففكرت حكومتنا الرشيده النظيفه انها تخلص مننا بتلك الطريقه واكيد من وراها يبوبه حلوه متقلقيش يا خبر النهارده بفلوس
بالنسبه لمقاطعة التجار الجشعين انا معاكى بس يا عزيزتى يا ترى انتى بتتكلمى عن اى فئه عن ناس بسطاء تماما لا يملكوا قوت يومهم عيزاهم يروحو كارفور ولا عن طبقه تكاد ان تتلاشى دا غير ارتفاع اسعار المواصلات جدا يبقى اى حد هيحسبها بالعقل الى انا هوفره باليمين هيتاخد منى بالشمال مواصلات وبهدله لحد ماروح بيتى
عموما تحياتى ليكى

3ala asm masr said...

مره كنت راكبه تاكسى من تلات سنين كده ولا حاجه كنت رايحه درس تقريبا كان احياء ايام ما كان كيلو اللحمه بحاجه وعشرين المهم سواق التاكسى عمال يتكلم ويقول والكيلو اللحمه مش عارفه وصل كام وبما ان انا كنت لسه صغيره ولحد دلوقتى بردو لسه عيله وماما عمرها ما قالت اودامنا ان ده غلى ولا ده غلى فرديت عليه بقوله ياااه كيلو اللحمه بقى بكذا وفى دماغى بقول يا بت يا هند انتى بتكلى فى الاسبوع لحمه كام مره لاء كتير ده امى تقريبا كل ما تنوى تعمل اكل تطلع لحمه المهم
لقيته بيقولى انه زمان كيلو اللحمه كان وصل مش عارفه كام كده تلاته جنيه تقريبا وان الناس وقتها بطلت تاكل لحمه والتجار لقوا نفسهم هيخسروا والحاجه هتبوظ رخصوا اللحمه غصب عنهم
لكن مين دلوقتى هيعمل كده
مفيش
يعنى على رايك انا جمبى واحد بيبيع الكارت ب 11 جنيه
ومع ذلك مش بيهون عليا امشى لحد اول الشارع وهجيبه ب 10 مش 10 ونص
كسل بقى
اسفه انى طولت عليكى

بحبك يامصر said...

ابى
المشكله ان احمد عز ده تقريبا بيأكل كل المسؤلين الكل بياخد مرتبات شهريه عشان هو راجل وطنى عايز يدخل ضمن اغنى ناس فى العالم فإحنا الشعب والحكومه لازم نساعده عشان ياخد اللقب العظيم ده (اغنى رجل فى العالم)بس خلاص على رأى شعبوله

بت خيخة وأى كلام said...

لا يفل الحديد الا الحديد
ياترى كلامى مفهوم ولا اوضح اكتر
والنبى تقوليلى مفهوم
علشان مش هاعرف اوضح
سلام
اختك خيخة

صوت من مصر said...

والله اخبار فى الجون يا ابى لكن فى معلومه المنظمه المصريه بدات فكرتها فى نص سبعه لانى كنت هبقى منهم لكنى مش محكوم عليه الابالفقر وعموما لو مصر هتستورد دواجن وجاموس وبقر وماعز امال احنا بنربى ايه عشان نستورد ده كله ؟
وعجبى

أنونيمس said...

شكلك مش مداومه ع الجرايد يا أبي

لو داومتي هاتتعودي ومرارتك ها تبقى ايلاستك ومتنفجرش بسهوله
:))

ابن حـجـر الـعـسـقـلانـى said...

أنا مش عارف هانستورد بقر و جاموس من الهند إزاى ؟؟؟ هم مش بيعبدوها هناك برضه ؟؟ دول مابياكلوهاش عشان لو حد من عبدة البقر شاف حد بيدبح بقرة .. هايقوم عليه يدبحه

و لا الناس اللى اقترحت المشروع دة بيهيسوا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الفاتح الجعفري said...

استاذه اابي
قولتها قبل كده
عز محتكر الحديد
الشركات الاجنبيه احتكرت الاسمنت
الشركات الاجنبيه احتكرت الادويه
ابو علاء احتكر الشعب
ابو علاء بتاع ريبوك وفيلا وكده!
متودوناش في داهيه
مفيش حد ابن حلال يجي ياخد البلد ويمشي
انتي عارفه ابوعلاء من سنتين كان بيفتتح شوية مصانع فالراجل صاحب المصنع بيقوله الاسعار كويسه جدا فهو بخبرته العظيمه في عالم الملابس مسك بدله وقالوه بكام قالوه ب1850 جنيه
قالوا طب كويس
كويس مين ياابوعلاء انت علشان ربنا فاتحها عليك وبتفتح محلات في كل حته تقول كويس
----------
طيب انا مش هقولك بلاش نمنع الاحزاب بس الحزب ده ايه هدفه وبرنامجه وخطته الاصلاحيه ولا هي ملوخيه بالتقليه يعملوا حزب للمهلبيه
ومحدش فاهم حاجه
-------------------
فراخ ولحمه مجمده
نيجي للاكل
انا مش عارف الناس دي عايزه مننا ايه طيب يسيبوا الناس تاكل
والله في برنامج الراجل غلبان ماسك الفول كيس صغير بيقول ده بجنيه فول !وهو عنده خمس عيال غير مراته فبيجيب ب2 جنيه فول وب3 جنيه عيش وب2 طعميه يعني بيفطر ب7 جنيه يعني عايز 210 جنيه فطار في الشهر وهو بيقبض 150 جنيه!!!!الفول مش عارف ياكله
هنقول فراخ ولحمه
طيب والاطعمه المسرطنه والمياه الملوثه
اه اكتر بلد في العالم تعاني من امراض الكبد والكلي مصر بسبب المياه الملوثه
---------------
مينفعش كده ابوعلاء
وفينك ياقرموطي
معلش بقي انتي اللي دوستي علي المراره
وجزاكم الله كل خير

نوسه said...

يارب الحديد يرخص يا آآبى
والاسمنت
والطوب والرمل
:(:(
عشان الراجل يبنى البيت بقى :(
ونتجوز بقى
عاااااااااااااااااااااااااااااااااااااااااااااااااااااااااااااا :(

بالنسبه لمقاطعة التجار عشان يرخصوا الحاجات بقى
نحن شعب لا يقدر على هذا ياعزيزتى
مفيش راى عام
اللى مش معاه اهو هيقاطع غصب عنه لكن اللى معاه بقى هيقولك وانا احرم نفسويتى ليه؟ وبيشترى عادى والفقير ياخد بالشوز
ياصبررررررررر ايووووووووووووووب

Che The Hermit said...

انا مش فى البيت علشان كدا مش هعرف اقري واخد وادي فى الكلام غير ان الفاير فوكس عندي فى البيت بايظ
انا بس جيت اقولك انى عملت للبوست الاخير تحديث ازاى نضيف فى ويكي

مستني رأيك ولو فى استفسار

تحياتى
تشي الحزين

alshared said...

تحيا مصر

بلد الفساد

بلد السيد أحمد بك عز

المشكله أن سعر الحديد في مصر بتحدده عوامل كتير قوي
أولها بالتاكيد رغبه الباشا في أنه يكسب شوية فلوس زياده
وثانيها أن الباشا ملتزم بتوريد الحديد لبناء جدار الفصل العنصري

النهارده بشوف في الجرايد لقيت اسعار الحديد زادت 450 جنيه عن ألاسعار قبل شهر واحد من دلوقتي

مع العمل ان السعر بره اقل من عندنا مع القدره الشرائيه الغير عاديه الموجوده خارج مصر

يعني المفروض تكون الاسعار أرخص بكتير

المهم
الحكومه ساهمت في هذه الزياده بمضاعفة سعر بيع المازوت

الحكومه بايديها ضربت قطاع المقاولات بالكامل في هذه الزياده الغير مبرره

وطبعا لازم يشتكوا لانهم اصلا مكانوش يقدروا ينفذوا البرنامج الخيالي بتاع السيد الرئيس أنا كنت حاسس وانا باسمع البرنامج ده أن الريس هايحكم بلد تانيه غير دولة الفساد اللي عايشين فيها دلوقتي


ثانيا
الحريه مكفوله للجميع بشرط الا يسئ استخدامها فحدود حريتي تتوقف عند حدود الاخرين

تاسيس الاحزاب حريه بس المهم ايه الجديد اللي هاتقدمه الاحزاب دي لمصر أعتقد لا شئ

فعندنا لوبي تزوير لو كل الناس شايفه شغلها زي ما الناس دي شايفه شغلها أعتقد اننا كنا بقينا قوي عظمي


بالنسبه للحمه
الناس مش لاقيه عيش تاكله رايحين يجيبوا لحمه من بره

لما شوال الدقيق ال50 كيلو يوصل ل 180 جنيه يعني سعره زي المازوت مضروب في 2 في أقل من شهرين يبقي أكيد أحنا عايشين في مصر

أول مره ازور المدونه الرائعه دي
وان شاء الله مش هاتكون الاخيره

تحياتي

a7med3bdelfta7 said...

ههههههههههههه
مش قولتلك انك ساخرة من الطراز الأول
عاوز أقولك حاجة كمان
بجد انتِ أول حد يقنعنى ان التدوين بالعامية مش وحش للدرجة اللى كنت متخيلها

الربان said...

تحياتي

تعليق بسيط جدا علي ما ورد علي لسان مسؤول وزارة الاسكان في المصري اليوم بتعذر تنفيذ برنامج مبارك لاسكان الشباب... : اقول ان الحكومة التي ستنفذ البرنامج هي نفسها التي باعت مصانع الحديد الي مسؤول في الحزب و مصانع الاسمنت الي مستثمرين....يعني الحكومة مسؤولة مسؤولة و لا مجال للتنصل من المسؤولية.

اما الاحزاب و الجبهات و ما شابه فهي
لافتات جميلة... و اسباب للوجاهة الاجتماعية ...و دمتم...


تحياتي و تقديري و دمت بالف خير.

ana ga3an said...

الاعراض اللي عندك دي
نهايتها وحشة
في الذكور بتؤدي لتساقط الشعر
والضغط و السكر و القولون العصبي
وتنتهي بالهجرة من البلد

ابقي تعالي صيفي عندنا

مش عارف لية عندي احساس شنيع اني اعرفك
الشخصيات اللي زيك
المصابة بحرقة دم مزمنة غالبيهم عدو عليا
كنا بنتعالج في مصحة واحدة

appy said...

only spot
بص يا قمر بين كل تاجر وتاجر مسافه صغيرة حتى بين كل فكهانى وفكهانى سيبك من كارفور انا بضرب مثل عليا لان فيه ناس فى محافظات فيعنى لو تعبنا شويه وسيبنا التاجر اللى بيبع غالى ومشين حتى 300متر هنلاقى واحد تانى يقوم الغالى يرخص حاجاته فهمتى يا قمر

هند الجميله
بصى يا حبيبتى حتى المشى رياضه والله انا مش بتكسف اعمل كده وبكون عارفه ان الناس تقول ايه اللى بتمسك فى خمسين قرش وربع جنيه القصه مش كده خالص لان فى المقابل بصرف الكتير فى اللبس المنيل بس عادى انما لازم التاجر او البياع يعرف انه يبيع بما يرضى الله لازم نوصل لهم كده وبعدين الناس لازم نوعيها ولو احنا الناس المتعلمه اللى فاهمين عملنا كده يبقى كويس ستات المعادى عملوها من قبل ونجحت

الطائر الحزين said...

لا طبعا ليس يأس

اعوذ بالله

لا قنوط من رحمة الله

ولا قنوط من اأن الأمل قادم

تحياتى

appy said...

بحبك يا مصر

بس اللى بيحصل ده بشاير انهم هيوقعوة ويبقى كويس ونغنى نقوله ايه الخروف وقع هاتوا السكينه وساعتها يستاهل وده اخرته قربت خلاص

بنت خيخه وسكر
طبعا فاهمه بس بس لازم نكون احنا حديد كمان يا امى ولا ايه رايك

appy said...

صوت من مصر
ايه يا عمنا انت متعرفش فى حياتك غير كلمه فقر اممممم هفضل وراك لغايه لما انسيها لك انت ليه شايف الدنيا بشكل وحش بصلها باحسن من كده وبعدين نتعب شويه علشان نعمل اللى عاوزينه بس نبطل كسل

انونيمس
لا يا دكتور الحمد لله اتعالجت منها من زمان ولا معارضه ولا غيرة ما الواقع اجمل

ابو العساقيل
هما بيهيسوا وشايفينا بنربى عصافير فوق دماغنا طيب ايه رايك فىالحمله اللى بقول عليها


الفاتح الجعفرى
اهلا اهلا يا عمنا انت تقصد ابو علاء اكتيف صح المحل اللى فى السراج متقصدش اونكل مبارك خالص متودنيش فى كوكب القرود الله يكرمك مش ناقصه عموما انت عجبك اصلا اهداف الحزن الجديد ده والله حرام طيب قولى رايك فى الحمله دى لانى بجد هفضل وراها لغايه لما اعملها

appy said...

نوسه
يا رب يا دكتور ان شاء الله بصى يا نوسه انا مش بقول منشتريش نشترى بس من اللى بيبع ارخص حتى لو ربع جنيه يقوم التانى يضطر يرخص فهمتى انا بتكلم عن كل الطبقات على فكرة ليه اصحاب كتير مرتاحين ماديا والحمد لله برضه بنعمل كده ومش بنتكسف فهمتى يا قمر

che
ترجع بالسلامه هشوفه من عويناتى

alshared
اهلا اهلا بالفياكين الجديدة بس ايه الدخله اللى بمظاهرة دى اسمها تحيا مصر بلد المصريين يا كابتن الله يكرمك لا حريات ايه انت مقتنع باللى بيعملوه ولا بيقوله لا يا راجل دا انا افتركت انى اعميت وانا بشوف الهدف من الحزن ده ميرسى ليك على المجامله ويا ريت تبقى معانا فى الحمله

appy said...

احمد
ميرسى يا فندم ده من غلبى بس وانى بحب البلد دى ونفسى فعلا اعمل اى حاجه وانتم تساعدونى


استاذى الربان
اهلا اهلا ايوة بس هما خلاص هيوقعوه وده كويس فى حد ذاته يعنى نفخوه لغايه لما هيفرقع ادخل معانا فى الحمله بقى الله يكرمك

انا جعان
انا كنت فى العباسيه يا راجل انت رحت هناك ههههههههه طيب اشترك معانا او قولهم فى البيت ويبطلوا كسل ممكن

استاذى / الطائر الحزين
طيب ممكن تشترك معانا وتقولى لو عندك فكرة يعنى من بلدك اكيد هتلاقى ناس بتبيع بأسعار كويسه الله يكرمك ساعدنى فى الموضوع ده علشان كلنا نرتاح وشكرا ليكى بجد على متابعتك ليا دايما شرف ليه بجد

Anonymous said...

azayek ana andy kalam kteer nafsy tasmaeeh meny bass mesh areef momken hatsaday wala laa ana falan mogab kttteeeerr beky fe el fatra el sogayara de we nafsy nokoon maa bad ala tool bass hasses anek mesh madyany forsa ya reet tkony fahmany we hassa baya ana aref any momken akoon bastagel bass ana habeet akool ely fe kalby we ely ana hasses beeh wahashteny bass mesh !!!!(tayb mashy azay )medo

nonoymm said...

ازيك يا استاذة ابي
البوست مهم جدا
وبصفتي ربة منزل ومديرة مالية رائعة معتزلة لارتفاع الاسعار الدائم
من هنا اعلن فرستي مع حضرتك
والمقاطعة دي احد الوسائل للحد من ارتفاع الاسعار
عارفة الاسبوع قبل الماضي الخطبة في الجامع اللي حنبنا كانت عن اساليب مواجهة ارتفاع الاسعار وبما ان اللي سمعها ما عملهاش تدوينة منضطرة اقوم بعملها لاحقا
تابعيني وسانديني لنشرها
ربة منزل مفروسة

appy said...

ميدووووو
ايه بس يا باباكده على الهواء فى الكوكب طيب ماشى اجى بقى اعمل لك حواديت فى شغلك
عموما هنبحث مشكلتك قريب جدا بس انت تحط على الطلب كيلو فول للخرفان بتاعتى نورتنى اخيرا هنا

appy said...

nonoymm
اهلا بستالبيت المفروسه بص مش كفايه يا حبيتى بوست جمعى جيرانك والناس القريبين منك وفهميهم انا عملت كده فىالشغل بتاعى النهارده واقتنعوا وهيعملوا كده ويا ريت الناس تشاركنا نورتينى

شقاوة شعب said...

آبى الجميلة
دى اول زيارة لمدونتك
كل مادخل مدونة الاقيهم بيقولوا آبى آبى
والاقى صور وحجات
قلت اروح اشوف مين اللى عامل دوشة فى عالم التدوين

مدونتك لذيذة جدا
واكبريشناتك خاصة جدا

بالنسبة بقى للبوست
اولا بعد كدة مافيش سكن ..هيبقى فى خيام
يبقوا بقى يغلوا القماش

ثانيا ..اللى عملوا حركة مش عارفة ايه
شغااال..انا شخصيا بشجع اى تحرك يحارب الفساد سواء كان بشكل منظم يعنى حركة او حزب او مجموعة
او بشكل فردى ..يعنى مدون او ناشط حقوقى
انا نفسى الناس كلها تتحرك .. كله يشارك فى التغيير ... كل الناس تقول لأ بصوت عالى


ثالثا :
احنا دلوقتى محتاجين نستورد عيييييييييش
وبعدين نبقى نفكر فى اللحمة

دايهة بقى لو يوردولنا عيش فيه انفلونزا الدقيق



تحياتى
شيماء

mado80 said...

آبي

ازيك

معلش يا آبي انتي في مصر أم الدنيا ولازم تتعودي انك كل ما تمشي في حته تلاقي حاجه تغيظك
وتفرسك وتطلعك عن شعورك مش أم الدنيا ولا ايه

المهم تحليلك للأخبار ممتاز يا آبي بجد

علي فكره يا آبي أن بقيت من مدمنيين أسلوبك
أسلوبك وألفاظك يجننو
بس صحيح ايه حكايه السحليه اللي بتعدي علي القفا دي وبتخلي كل اللي بتعدي علي قفاه يعمل حزب

بجد تعبيراتك تحفه

ههههههههههههههههه

:) :)

تحياتي ليكي يا آبي وألف تقدير لشخصك الكريم

appy said...

شقاوة شعب
دا انتى شقاوة شعب مصر كله هههههههه نورتى يا قمر اهلا بيكى شوفتى عاملين عليه مظاهرات فىالكوكب يا اختى عاوزين يحتلوه ههههههههه بس يا شيماء انا غرضى من البوست اننا نقف للجشع بتاع الناس ونبطل نعتمد على الحكومه الالكترونيه المتكهربه دى اللى زهقتنا فى عيشتنا نتحرك ولا لا يا شقاوة الشعب قولى يا شعب هتبقى معايا وتوعى جيران ولا هتطلى شقاوة علىالفاضى نورتينى فى كوكبى خدى خروفين مرة واحد وانت ماشيه وخدى فيكون فضائى صغير يسليك فىالطريق ويحرك الشعب

appy said...

mado
مدمنين لا الله يكرمك انا فتحت فرع للعلاج بتاع المشاكل انما ادمان لا الله يكرمك اوعى مش هعرف اعالجك هههههههههه
ميرسى لمجاملتك بس يا ريت تقتنعوا بفكرتى وتنشروها فىالبيت وتنفذوها ومع اصحابكم عاوزين نبقى ناس كويسه ولا ايه رايك نقف مكانا نتفرج

Zika said...

هو انتي مينفعش تكتبي موضوع مريح خالص
لازم ااجي هنا عشان اتكدر
ااااااخ دماغي صدعت يا ابي والله
والمشكله بعد كل ده اقلب بالصدفه عالفضائيه المصريه والاقي الاعلان بتاع البلد بتتحرك بينا
انا خايف نعد نتحرك نتحرك لحد ما نلاقي نفسينا صحينا من النوم لقينا نفسنا في الاكوادور
اشمعنا الاكوادور يعني؟
مش هقولك

Omar... [ خروشات ] said...

انا هاعلق على كلمة ومعنى حوقى او حوئى بالدارجة العامية

حوقى = هوا اناء من جزئين نصفها لحفظ ما يستلزم حفظه و نصفه غطاء لحفظ ما بالنصف السفللى

حوق = قنينة او اناء سرى لحفظ ما يراد حفظه

يالا طلعت بفايدة و قلنا معلومة يارب تعجبك

و السلام للامام

الراقص مع الذئاب said...

السلام عليكم

عاشقة الاسماعيلية آبي

انا الاول هعلق علي الموضوع دا وبعدين نبقي نحكي عن اسماعيلية

اولا يا بنتي خدي ناصحتي ومتقرأيش اي حاجة في السياسة
لو هتشتري الجرنان اشتريه عشان 3 حجات
الحاجة الاولانية اخبار الرياضة...بس متكونيش اسماعلوية...عشان دمك هيتحرق من التحييز للأهلي في كل الاخبار

تاني حاجة تكوني بتحبي الكلمات المتقاطعة

بس لازم تعرفي تتحكمي في اعصابك كويس عشان سعات كتير بتطلع المسابقة في غلطات وبتبوظ وانتي بتحليها

الحاجة التالتة بقي مش فاكرها

طل عمرنا بنسمع كلام وتصريحات ووعود
والنتيجة...مفيش جديد حصل


خلي بالك من مرارتك عشان مش هتلاقي مرارة اصلية بعد كدا
اللي في السوق كله صيني



اما بقي بخصوص إسماعيلية فأنا هوصفهالك وصف مش ببالغ فيه

كان وصفي ليها عبارة عن فزورة
تعالي نحلها مع بعض


من تكون حبيبتي؟؟؟؟؟
إنها ذات روح وردية...وهل للروح الواناً؟؟؟
نعم إن لها الوانا شتي....فمنها سوداء قبيحة...ومنها البيضاء الصافية...وهاهي روح حبيبتي وردية تريح ناظرها
اذا أغمضتي عينيك وهممت السباحة في احلام يقظتك وجدها بحراً عجيبا...لا يُغرقُ صاحبه ولا يقتله....ما الذّ وأمتع الغرق في هذا البحر
هل سمعتي من قبل أن للغرق نشوة ولذة؟؟
إنه الغرق في بحر مخيلتها...تلك الحبيبة التي يخفق قلبي لذكرها ...وتهيم روحي حبا وعشقأ لسماع إسمها......
أجزع وأموت هلعاً أذا المها مكروها...وتسهر عيني ولا تنام الا إذا أمنت ونامت
لست بارعا بما يكفي لوصف حسي مرهف.....
ولنبدأ بالوصف الجسدي لحبيبتي
ما أرق قوامها ....وما أجمل وجهها....تري خصلة من شعرها الاصفر الذهبي تداعب وجهها الجميل في تغنج ودلال يذيب كل من يراها عشقا فيها حتي النخاع
وهاهي عيناها الزرقاء....صافية....تلمع ساعة الغروب بأرق دمعة تبعث في القلب شجن يهمّ صاحبه بضمها الي صدره لينتزع منها هذا الشجن والحزن القديم ويحمله عنها....فهو لا يتحمل أن يري دمعات وإن كانت كحبات الؤلؤ تجري في عينيها
تتشح حبيبتي ثوبا أخضر جميل ....يظهر مفاتنها ولا يخفيها....انه ثوبا عجيب.....بدون هذا الثوب لا تجد مفاتنها...وبه تري مفاتنها ويذوب فيها العشاق
هل تخيلتي حبيبتي
اليكي أغرب ما في الموضوع.....
لست وحدي أحبها....ولكن غيري كثير..وأنتي أحدهم...والعجب أني أسعد عندما أجد غيري يحبها....نعم إني كذالك
أريد أن يحبها ويتغزل فيها كل العالم كبيراً وصغيراً
أريد أن أعطي صورتها لكل من أقابله وأعاهده عل حبها وعشقها
والان من تكون الحبيبة بعد كل هذا

انها مدينتي التي ولدت وتربيت فيها....نعم اني اعشقها عشقا يفوق الخيال
لم اكذب ولم ابالغ قط في وصفها
فشعرهاالاصفر لون رمالها الصفراء ...وعيناها الزرقاء لون مياهها الصافية الزرقاء
وثوبها الاخضر هو كثرة ما فيها من حدائق ومسطحات خضراء يندر ان تجدها في مدينة غيرها
شجنها وحزنها علي اولادها من الشهداء...فهي لاقت ويلات الحروب منذ عدة اعوام

انها مدينة الاسماعيلية حبي وعشقي.....


توقيع

عاشق الاسماعيلية
محمد صابر


دمتي في خير اختي الكريمة

Soooo said...

تصدقي يا آآبي
انتي اتولدتي عشان تكوني مدونه
بجد والله مش مجامله
البوست ده اقوى بوست واكثر بوست توعية للناس وتنبيه بحقوقهم

وبجد بجد بجد .. انتي عندك حق في كل كلمة من كلامك


ملحوظه
الحوق هو كان زمان هو معيار القياس لما الناس كانت بتكيل القمح والرز وخلافه لما بتروح تشتري احتياجاتها من السوق .. وكان لكل واحد حوق خاص بيه عشان لما ينزلو السوق ماياخدش حوق البياع ويلف بيه على باقي البياعين .. خصوصا انه زمان ماكانش في اكياس بلاستيك وكانت مجرد شنط بتتصنع من القماش او الجلد .. ولو كانو خلطو القمح عالرز على العسل في الشنط دي كانت تبقى يخنه .. فجرى الدعوه على الناس بكسر الحوق او المكيال بتاعه كنايه عن الدعوة بعدم قدرته على الشراء والاكل

ملحوظه تانيه
بخصوص يوم الجمعه الجاي في الاوبرا ان شاء الله .. لو انتي هتبقي جايه بالعربيه بتاعتك من وسط البلد وطلعتي كوبري قصر النيل .. بمجرد ماتلاقي الاوبرا في وشك هتروحي داخله يمين من بعد الكوبري .. وتلفي من ورا النادي الاهلي لفه شبه كامله وتسألي على المدخل لمركز الابداع وتدخلي منه عالاوبرا .. وبمجرد ماتدخلي هتلاقي في بارك قدامك والكافتيريا على يمينك
وعموما انا هعمل موضوع النهارده اشرح فيه طريقة المقابله واسهل طريق للمكان .. وهقول انا هبقى لابس ايه وهسيب رقم موبيلي عشان لو حد تاه ولا حاجه يتصل بي
وياريت تيجي بجد




سلاموووووووووووز

Ahmed Al-Sabbagh said...

ههههههههههههههه

اولا احب اعتذر لك عن تأخرى وانتى بقى عارفة ظروف الايام اللى فاتت

ثانياانتى بتبقى عسوووولة اوى وانتى بتتكلمى فى السوياسة

ههههههههههههههههههه

بتبقى عسل بجد

وكمان ايه موضوع الناس اللى بتسرق الكلام ده

طب انا كتبت عندى فى المدونة كلمة
"من"

وجيت ليتها عندك هنا

تبقى "من" دى بتاعتك :)

ههههههههههههههه

على فكرة انا قريت البوستات اللى فاتتنى

حلوة اوى اوى اوى وعسسسسسسسل بجد

مدونتك بقت ماشاء الله من اجمل المدونات اللى بدخلها

تسلمى يا ابى

تحياتى

احمد

رئيس جمهوريه نفسى said...

بالنسبه للجزء الاول انظر من المتحدث
وكيل لجنه الاسكان وبديل وكيل اللجنه يبقى النبى حرسه وصاينه عضو فى مجلس الشعب وبدل وصل لوكيل لجنه يبقى تبع الحزن الوطنى الى البلد بتتقدم بيهم للموخره بتاعت الدول طبعا
مش برضه بتوع الحظب الوطنى الى رفعوا النسبه فى قانون الاحتكار علشان يبى ابن عز تحت النسبه ومعدهاش ومتطبقش عليه قوانين الاحتكار مش برضه بتوع الحزب الوطنى الى وقفوا تقرير الممارسه الاحتماريه فى جهاز حمايه ( المستهلك )ملحوظه الكلمه الى بين قوسين شكلوها برحتكم
مش برضه الحكومه الى وقفت مصنع الصلب عن الانتاج وباعته متقشر لاحمد بن عز صلب الله وجه بمعنى زاد صلابه رغم انى المصنع ده ممكن يعمل دخل قومى 2 مليار جنيه لانى المصنع مخصص لتصنيع الصلب استيل وهو الوحيد فى الشرق الاوسط ولا هى دى حكومه ودى حكومه
بس خلاص لو علقت على الباقى حعمل بوست كبير عندك

محمد الجرايحى said...

هو فى حاجة من برنامج الرئيس طبقت أصلاً
كلها أوهام.. وكلام .. والكلام مافى أرخص منه
ومين عارف يمكن سعره يزيد هو كمان

أنا إنسان said...

انا لسه مالحقتش اقرا المقال اللي فات
!!!!!!!!!!!
بالراحه علينا شويه
المقال اللي فات رائع جدا
وعجبني حسن الاستهلال
!!!!!!!!!!!!!!!!!

mohammad hamza said...

......
الموضوع ده مليان أوى .. بس حلو أوى ..
وفعلا الأحزاب فى مصر بقت زى الرز اللى نفسه بحزب بيعمله ..

موضوع يضايق فعلا..

بالمناسبة تم انشاء حزب جديد وهو الحزب الحمزاوى نرجو الانضمام اليه (حزبى انا)XD

الموضوع بجد حلو

أنا حر said...

معقولة عايزة مرارة بس علشان الكام خبر دول طيب انا اعمل ايه اللي كان حظي وحش واتفرجت على جلسة مجلس الشعب الاخيرة اللي اتحرم فيها النائب من الحضور لنهاية الدورة لأنه اتهم وزارة الداخلية بالسرقة
انت محتاجة مرارة بس؟؟؟
انا كمان عايز ... بس انا عايز وطن بجد
تحياتي

فرنسا هانم said...

ازيك يا ابى
شفتى الاعلان الاهبل ابو رياله بتاع العز
اللى بيقول
اكتر من سبع واحد يعملون لدى حديد عز
شوفتى الهبل
شوفتى العبط
شوفتى الخولل
علشان سبع تلاف
نجوع 80 مليون
هما مارحوش مدارس ولا ايه

appy said...

زيكا
اقول على حل للصداع من زمان كان واحد زميلنا والده تاجر خرفان لما كان يجيلوا صداع ينطح خروف الصداع يروح ههههههههه اقولك انطح لك خروفين من هنا الف سلامه عليك هو انا بجيبهم من بيتنا الاخبار دى ولا ايه طيب انا اعمل ايه المهم خليك بقى فى الجزء التانى وحارب التجار الجشعين ومتخافش


خروشات عمر
يا اهلا ايه النور ده كله عندى فى الكوكب ميرسى على المعلومه بس يا ريت تقاطع زي الناس دى بتاعت الاستغلال وميرسى لزيارتك



الراقص مع الذئاب
الاسماعيليه واهلها هنا نورونى ياااا وايه الجمال ده كله فى الشعر لان انت تفوقت عليا فى حب ابلد دى بصراحه طبعا وليك حق بجد كفايه هدوئها وجمال وطيبه اهلها كفايه نظافتها
اما بخصوص الجرايد اقولك الفايده التالته نحطها على السفرة علشان الاكل ميوقعش على المفرش ههههههه بس عموما يا ريت تساعدنى فى التصدى للتجار دول وميرسى لوجودك هنا على فكرة انا بموت فى لعب الاسماعيلى فى الماتش هههه مع انى اهلاويه

appy said...

سووووووووو
ميرسى بجد دى شهاده اعتز بيها من قلبى ربنا ييخليك يا طفل يا تخين عموما ان شاء الله جايه انا نفسى اشوف الناس الكويسه دى والوصفه سهله الوصفه هايله ههههههه

خالو ابو المخاليل الصباغ
ميرسى يا صباغ عادى دول اخواتى انا بهزر بالعكس انا اتبسط وبعدين يا خفه هى من دى اختراع لا بقول على اكسبرشن بس مش مشكله انا كده بعرف ان الناس بتقرأ ليه حتى لو مش علقوا بس يا رب يستفيدوا من الكلام

رئيس الجمهوريه من الصعيد
بس هى دى بشرة خير انهم يقلبوا عليه هو كده الكرف طالع لفوق تانى ودى حاجه فى صالحنا انهم بدئوا منهم فيهم ينظفوا وربنا يسهل اشترك بقى معانا فى الحمله بتاعت مقاطعه التجار ربنا يكرمك

appy said...

محمد الجرايحى
يا استاذى بصراحه له بعض الانجازات يعنى عندنا فىالقاهرة الجديدة عمل مشروعات الشباب بتاعت الاسكان بس عاوزينه يكملها وعمل فى المحافظات وده الاختلاف نورتنى واشترك بقى فى الحمله بليز وهكتب عنها البوست الجاى

انا انسان
معلش حضرتك بتيجى متأخر وميرسى لمجاملتك انا بسيب البوست تلات ايام اعمل ايه حاضر هسيبه شويه كمان

صاحب الحزب الحمزاوى مقدما
اممممممممم انت عدت عليك سحليه انت كمان وعاوز تعمل حزب ههههههه طيب ربنا يوفقك وتطلع بقرشينات بقى


انا حر
وطنا موجود بس احنا مش عارفين نحتويه احنا بوظناه بجد ومش عارفين نعمل حاجه غير اننا نشجب ونستنكر وبس


فرنسا هانم حبيبتى
انا بطلت التليفزيون بتفرج على الافلام القديمه بس او افلام الكارتون او الاجنبى غير كده مش هعانى من المرارة بس لا من كل الامراض بس بشرة خير انهم يقلبوا على عز كده حاجه مطمنه ويا رب نسمع بكرة فى الجرايد انهم يسألوة من اين لك هذا هههههههههه

sa7afia_rwsha said...
This comment has been removed by the author.
sa7afia_rwsha said...

انتى بتشتكى ومش حاسة بالموضوع زيي انا خطيبى مهندس ومعيشنى الكلام دة بالصوت والصورة
وشغلهم متعطل خالص عادى يا ابى كله بيسرق
انا مثلا بتتسرق منى المواضيع مش المصطلحات
عادى المهم ان الناس عارفة انها بتاعتك انت
لكن بعد اذنك يعنى انا عملت ساعة زى بتاعتك
عموما حاجة حستها وشاكة شك بسيط يعنى
انت كنتى عايشة بره مصر قبل كدة؟؟
عموما ابقى زورينى فى مدونتى وهاتيلى قلتين معاكى اخبط بيهم اى حد يسرق منى انا كمان

احمد الجيزاوى said...

المشكله الكبييرة انى البياع الصغير هيتظلم لانه بايخد من التاجر الكبير المشكله فى التاجر الكبير هو اى بيحتكر وبيظلم صغار التجار وبيجبرهم يغله الثمن
عموما
هى فكرة ممتاز تستحق الدراسه وخصوصا انه حصلت فى مصر مرتين مرة فى المعادى سيدات كلهم قاطعه بيعين الخضار وترة يرخصه السعر
وايضا ايان السادات لمه لحمه غلت قفل كل محلات اللحمه لخيت الجزرين اترة لترخيض ثمن الللحمه
تحياتى الى منخير ابو الهول
اى جت الارض
وتحياتى لالامن والامان فى مدونتك وكوكبك

محمد عادل جمعة said...

انا اول مرة آجي المدونة دي.. بس احب اقللك دمك خفيف اوي يا آبي.. و من كلامك كدة باين عليكي ذكية أوي..

بس هي المدونة متعبة للعين شوية و عايزة شوية تظبيط في موضوع الكتابة من اليمين للشمال و من الإينكودينج و خلافه..

ربنا يوفقك..
سلام عليكم..

Nsreen Bsunee said...

حبيبتي انتى بجد بجد جامده ودماغك كبيره وكل يوم باتاكد من كده
احييكى على ايجابيتك ياريت كل الناس تفكر كده كان الحال بقي احسن من القرف اللى احنا فيه ده

يا بت بقيتي نجمه فى عالم التدوين ماشاء الله وفى وقت قصير
وكمان صورك اللى عند الصباغ قمر قمر الله اكبر عليكي يا حبيبي
كل سنه وانتى طيبه بمناسبه عيد الحب
:)

appy said...

sa7afia_rwsha
اهلا وسهلا ايهالنور ده لا عادى دول حبيبى ومش مشكله بالعكس انا بفرح اما موضوع الساعه فخدى كل اللى تحبيه الكوكب كوكبك يا قمر
انما جبتى موضوع السفر ده منين بقى يعنى بسافر وبرجع مقدرش اعيش بره مصر حبيبتى خالص مالص فالص ابدا ولا اهلها
نورتى وخدى القلل اللى انتى عاوزاها


جيزاوى
انت يا ابنى بتاع شعارات وخلاص هههههههههه دايما تجيب ليه احباطات نفسويه طيب اللى مش بيظلم وبيجيب نتيجه المظاهرات يا مجانين ههههههههه بص يا احمد المصيبه فىالتجار القطاعى الصغير الطمع ولما نضغط على ده هو بالتالى هيضغط على اللى اكبر منه فهمت
اما ابو الهول فالحمله الفرنسيه هى اللى كسرت مناخيرة عقبال املتك حضرتك
ودايما كوكبى يعج بالامن ولالامان يا جيزاوى وعديها على خير احسن لك انت عارف هعمل فيك ايه
وفكر فى الفوكيرة بتاعتى دى

appy said...

محمد عادل جمعه
اهلا وميرسى على ملاحظاتك وهحاول اظبطها


نسرين يا حبيبتى
وحشتنى خالص حمد لله على سلامتك هنا كمان ربنا يخليك على الكلام الحلو ده طيب ساعدينى بقى فى تحقيق الايجابيات والقضاء على سلبيتنا دى بجد انا وانتى وغيرنا اللى هنقدر نعمل حاجه وكل يوم حب وايامك كلها حب يا قمر

الراقص مع الذئاب said...

السلام عليكم

انا فرحت جدا يا آبي إن موضوع المثليين عجبك
عشان بصراحة لما شفت اجندا حمرا في الفيفوريت عندك شكيت إن ممكن تكوني مش معترضة علي وجودهم

دلوقتي انا متأكد إنك متعرفيش إن اجندا حمرا تبع نقابة الشواذ

والدليل هنا

http://agenda7mra.blogspot.com/2007/03/blog-post_8348.html


علي فكرة....انتي دخلتي عندي في جروب الاسمعلاوية....طبعاً دا شرف لينا يا آبي

انتي عارفة إن امبارح انا نزلت قعدت علي الكويري والكورنبيش لغاية نص الليل.....في عز البرد...بس كانت جميلة اوي القاعدة....وافتكرنا انا وأصحابي زكريات اجمل في المكان دا من سنين فاتت

سلام بقي عشان بحضر العدة لموضوع جديد بطريقة جديدة


وهنزله الناهرده بالليل ...اوعي بقي متجيش

سلام

راجى said...

دمك شربات والله يابى
واللى بيته بعيد عن كارفور ممكن يروح سبينيز؟

فزلوكة said...

عارفة الأخبار دى كلها ليه؟؟
وهما بيعملوا فينا كده ليه؟؟
لإن إحنا "سورى فى اللفظ " "هبل " وبنصدق
صدقنا أصلا إن فى برنامج انتخابى وهيتنفذ..فزعلنا إنه دلوقتى بيقولوا مش هينفذوا منه جزء

أما طلبك للمرارة فأعتقد إنك هتلاقيها عند هؤلاء" أحمد عز , ساويرس , كمال الشاذلى , نظيف وهو نظيف " كفاية عليكى كده
دول هتلاقى مرارتهم جديدة نوفى
وسلالالالالام لحللك

محمود المصرى said...

بسم الله الرحمن الرحيم

الحوق مقصود بها عظمة الحق فى منطقة الحوض وبتبقى وحشة اوى فى الاصابات ربنا يعافينا

بالنسبة لموضوع حماية المستهلك فالناس خلاص عديمة الثقة فى اى جهاز حكومى واى واحد تسأليه يقولك يوم الحكومة بسنة , اذا كان القضاء اللى هو المفروض ليه سلطة الضبط الناس بتقول اللى عاوز حقه يضيع يلجأ للقضاء , وحضرتك عاوزة الناس تثق فى كلام بتوع حماية المستهلك؟
اما بالنسبة لأحمد عز فالظاهر حضرتك لم تتابعى الحملة الاعلامية الاخيرة , ماشفتيش ازاى انه عاوز ينافس العالم كله ؟ يا جماعة لازم نساعد احمد عز علشان يغزو العالم كله مش الشرق الاوسط بس حتى لو مالقيناش شقق نتجوز فيها لأنه مصرى وابن مصرى وزى ما قالت نانسى عجرم ابن مصر الله عليه .

الفارس الملثم said...

بالنسبة للخبطة الاولي انا شايف انكم ظالمين عمو حمادة عزو رغم ان الراجل حريص علي مصلحة الشعب لدرجة انه قرر انه ايدي سيخ لكل شاب عاوز يجوز في محاولة منه لحل ازمة الاسكان بس هو الحديد مقصر معاه اليومين ربنا يكون في عونه ويبارلكله في شوية المليارات اللي لمهم بالعرق والدم والدموع والكوسة والسبانخ والقرع ..

اما بالنسبة للاحزاب فمعروف ان معيار تكوين اي حزب هو درجة التفاهة فكل ما كان الحزب تافه كل ما كان احتمال الموافقة عليه اكبر يعني لجنة الاحزاب اللي هي من الناحية العملية تتبع الحزب الوطني بتختار الاحزاب الهايفة بس

اما بالنسبةللحوم والدواجن او رغيف العيش اللي من كتر دعم الحكومة ليه ايتباع اقراص في الصيدليات فالواحد خلاص مبقاش عنده مرارة يتكلم ويجعل بيت الحزب الوطني عمار ويتخرب بيت الشعب

بوست جميل اوي ويتبع كوميديا شر البلية ما يضحك وتقبلي مروري

الجحيم هو الحقيقه said...

appy

هايل البوست بيضرب كذا عصفور

بقله واحده

الزيف الحكومى

وموضة الحركات الاصلا حيه اللى بتتولد عشان الاشتغالات وحب الظهور ولزوم النيو لوكات وبعدين بتموت باحيك على البوست الساخر الهادف

رئيس جمهوريه نفسى said...

يا ابى منتى مش عارفه زى ما ساويرس باع حصته فى مصانع اسمنت مصر لشركه لافارج الفرنسيه احمد عز بيتفاوض مع شركه ميتال الهنديه وحيبع نصيبه فى سوق الحديد المصرى للشركه دى بمعنى انى الى مصر بتبيعه للمصريين بعد كده بيتباع للاجانب وبالصلاه على النبى مصر مبيقاش فيها حاجه اسمها صناعه استراتجيه واختلص الحابل بالنابل
انا مواقف على الاشتراك فى الحمله بتاعت مقطاعه التجار لانى كده كده تعاملى مع تجار السجائر بس السلعه الوحيده الى بشتريها من المحلات فنا مقاطعهم خلقه

NIDAAL PAL said...

العزيزة / آآآآبى
اول حاجة صدمتنى هنا انى لقيت ردود سلبية خالية من اى امل فى التغيير او التغير
بالنسبة للاحزاب السياسية و تعددها
المفرووض انه يبقى فيه تعدد اوكى
بس فين افكار و اصوات الاحزاب دى
ولا اؤيد التعدد بالحجم الكبييير اوى ده لانه بيلغبط و بيبقى معظم الاحزاب دى ماشية ببركة الحكومة و توجهاتها و توجيهاتها يعنى مش هيقدر يقول رايه اساساً .. هو يقول الى يعجب الحكومة فقط ..
حكاية الاستغلال بقى بتاعت التجار دى
بما ان الحكومة مش شايفة شغلها يبقى لازم يكون التحرك مننا احنا الشعب تجاه هذه الظاهرة
يعنى فى العريش من قريب ساعة حكاية الحدود دى التجار بجد جتلهم نوبة جشع فااااااااااااحش .. كيلو السكر بـ25 جنيه ليييييييييييييييييييـــــه؟
و للاسف لم تتصدى الحكومة المصرية لهم بل بالعكس و جدنا ان الحكومة المصرية تمنع قوافل الدعم و المواد الاغاثية من الوصول حتى للعريش مش لغزة !!! غريب و الله امر الحكومة دى !!!
و ما لقينا الا تجار قليلين جداً الى هما من العريش اساساً بيبيعوا باسعار عادية خااالص و الباقى الجشعيين كانوا معظمهم من القاهرة و الاقاليم
بس خلاص ولا تعليق على بقية الموضوعات لانه لا يوجد شىء يقال !!!!!
بوست جميل و زى ما بقولك عالطووووووول
كيب موفينج يا ريس و احنا وراااااااااااااااااااااااااااك
بس لو كانت الموفينج دى هتودينا للعقرب يبقى هولد ناو احسن
هههههههههههههههههه

الفجر الباسم said...

جميله مدونتك يا ابي
ده اول زياره ليا
وعلى العموم الدار درهم والعزبة عزبتهم واللي مش عجبه ..........يتفرس

appy said...

الراقص مع الذئاب
يا راجل عيب عليك كده برضه ماشى ماشى الله يسمحك وتقعد تحت المطر تلات أيام وبعدين انت بتغيظ فيه طيب هاجى لكم ادبسكم يوم تقعدوا معايا طول الليل فىالبرد لغايه لما تتحيلوا عليا امشى انا كمان عملتها قبل كده قعدت على الكورنيش فى شارع عمارة لغايه متأخر والدنيا برد هبقى اوريك الصور وانت تعرف اكيد هتعرف من مناخيرى اللى احمرت ووقعت وبقيت قاعده بدور عليها


استاذى/راجى
ينفع ليه لا يعنى ما هو ساعات بيعمل اوفر على حاجات روح واحنا وراك يا استاذى

محمود المصرى
أتابع مين بس هو انا ناقصه عته فى دماغى طيب نتصرف بقى ونقف للناس دى قبل فوات الاوان وميرسى على المعلومه القيمه وبعد الشر عن الناس كلها

الفارس الملثم
شرفتنا يا الكوكب كله نور بيك ويا ريت تشترك فى الحمله

الجحيم هو الحقيقه
ايه يا كابتن انت فين من زمان لعلا المانع خير من عدم وجودك حتى مدونتك خاليه على عروشها بلاش الغيبه دى

رئيس جمهوريه نفسى
اقولك على حاجه انا بقيت اقول مش مهم تتباع بس الحاجه تنزل سعرها حتى لو هندى انما كده حرام اصله فعلا كان بيعمل البرنامج اللى بيتمثل فى شقق الشباب وكانت بتحل ازمه انما تقول ايه بقى


نضال
هروح اضرب بتوع العريش كلهم علشان بلغ يا نضال عن التجار ما سلبيتنا دى هى اللى مودينا فى داهيه متخفش مش هتروح العقرب انا فتحت فرع فى مارينا معايا يا شعب ولا لا ههههههههه

الفجر الباسم
ميرسى على وجودك وشرفتنى