المنافقون المغفلون الكاذبون

النائمون فى الكفتات
اولا بجد انا منقهرة على النت لانى طبعا بما انى مسعده ومبخته فى حياتى لما النت يصلح فى الشغل خط التليفون اللى عليه النت يعطل
يقطع يالا حظ بقى وبما انى اولد اشون فى البيت وبستعمل الديل بتاع النت من التليفون فتأخرت عليكم
تتابعا للحاجات اللى بتغيظنى فى حياتى وتكمله للبوست اللى فات والتناقض اللى بقابله فى حياتى فى الشخصيات وبعد طبعا ما سمعت كلام مانتى حبيبتى (مامى يعنى )وقررت اخد بنصيحتها وبدل ما كل يوم اضيع فلوسى على مرارة مرة من الصين ومرة من اليابان وبرضه تنفجر فقلت اعمل بنصيحتها وارمى المرارة وانا بتعامل مع الناس دى فى حياتى سواء فى الشغل او الشارع او النت
وبما انى حسه ان هتجيلى الفلونزا القرود وهبل الخرفان وهروب الجديان من كتر التركيز فى الناس وسلوكياتهم قررت انى اشركم كلكم معايا (مش فى الفلونزا لا فى الموضوع.
ايه بقى الموضوع الاقى ناس تقعد كده فجأة تنصحك وتقولك اعمل واعمل واعمل من هنا للسنه الجايه طيب اتكسف انا بقى واقول يااااا دا الواحد مقصر قوى واتكسف وأحمر وابقى شبه طبق البطاطس المحمرة كده اوضح لكم يعنى مثلا بنات تلاقيها تقولك متكلميش ومتعمليش ومتخرجيش يا سلام اقول دى نعمه الصحبه والصديقه ابص بقى الاقيها هى اللى بتعمل اللى بتقولى متعملهوش يا نهارلووووو الله امال كنتى بتقولى ليه كده ليه حتى فى معامله الاهل والام اللى بينصح بوصل الرحم وهو لا مش بيوصله والاقيها بتعمل العكس يعنى كشفت عندى عيوب ومش شايفاها فى نفسها ولا ده من باب تعليق الغلط على الغير بس
.نيجى لواحدة تانيه او واحد تلاقيهم على النت يقولوا قال الله وقال رسول الله صلى الله عليه وسلم طيب حلو قوى الكلام ده وبعدين تقعد تقولك اتقى الله ومتعملش ومتعمليش والبسى ومتلبسيش ولما تقابلها بقى وجها لوجه وخد عندك مش قله فى الدماغ ده زير اه بجد تلاقى اللى بتنصح دى تحت شعار الدين والاخلاق ويقعدوا يقولوا لك أيات قرآنيه وأحاديث وياااا تلاقى نفسك بتعيط من الكلام طبعا لان ده كلام ربنا ومؤثر وحلو قوى وبجد اكتر حاجه بتدخل القلب تقوم انت تكتشف (وبجد تبقى صاحب سبق صوحفى) ايه ان دول بيقولوا ومبيعملوش واشكالهم تبقى عكس ما بينصحوا بيه حتى فى اللبس وهو ابسط حاجه ومعاملتهم ييعنى كلام بس الله ايه يا بنتى مش انتى اللى كنتى بتقولى وتقولى ...... وكمان اللى يقعد يقولك انا مقولش كده وعيب عليك اوعى تنعت (يعنى تشتم اصلى شوفتها فى اماكن كتير الكلمه دى) وتلاقيه هو فى مكان تانى لسانه عامل زى لسان الضفدعه المطلقه وبيشتم ودول بقى بصراحه اللى مش بيعملوابكلامهم خالص مالص يعنى برضه بيرجعوا الكلام فى وشك يععععععععع والنصايح بدون فهم ولا عمل (يعنى حافظين وبغبغنات ومش فاهمين ) انما ايه منظرة فارغه واللى يقعد يقولك اوعى تتكلم عن بنت فى غيابها ولا تبص لبنت وتلاقيهم يا نهار لسانه عامل زى لسان االسحليه طوله خمسين متر وعنيه عامله زى عنين الصقر وملوش سيرة فى حياته غير سيرة البنات والخوض فى عرض البنات وشرفها او الخوض فى عرض واحد صاحبه (وده حرام جدا وله عقوبه عند ربنا.
يالهوى وانا بقى كده ابدأ ادخل فى مرحله غيبوبه تامه وابقى شايفه الدنيا خمسين لون مرة واحده والاقى عصافير طايرة فوق دماغى والنحله والدبور اللى عندى عاملين بارتى ايه مقلوكوش يبقى جايب لغايه الصومال ويحصل ليه فوران فى الدم واطلع دخان من ودانى ولا وابر الساعه اتناشر اللى رايح على الصعيد الموضوع كبر عن المرارة وبقى غيبوبه .
طيب يا جماعه حلو قوى اننا ننصح بعض ونحذر بعض من الغلط بس مش قبلها نبص الاول لنفسنا ونقف قدام المرايه ونبص فيها كويس ولا هى مراية بيوتنا وقلوبنا وعقولنا اتكسرت ونصلح من أخطائنا وبعدين ننصح غيرنا ولا هو الدين والاخلاق بقى من منطلق المنظرة بس برضه فيه ناس بصراحه قولا وفعلا بيبقوا محترمين وبيرشدوا نفسهم الاول قبل الناس
الدين المعامله يا جماعه يعنى مقولش لحد متشتمش ومتسرقش واووووووووووو حاجات كتير وانا بعمل كده وبصراحه احنا اليومين دول حالنا ما يعلم بيه الا الله سبحانه وتعالى .

ولا الكذب اللى بقى بيجرى فى عروق بعض الناس اكتر من الدم يااااا طيب ليه ما هو اللى بيكدب ده بيكون جبان ومش قد الكلمه اللى بيقولها وعارفين ساعتها بفتكر كلمه بابا الله يكرمه يقولى لما يلاقى واحد كداب (عارفه ربنا ادى له الكدب يوزعه على الناس طمع فيه وخده لنفسه بس ههههههه)
يعنى واحد كداب او منافق اخر حاجه بجد لازم نعدل من نفسنا الاول وبعدين نبص للناس وننصح علشان ميبقاش شكلنا وحش لان اللى بيعمل كده بيبقى باين قوى وخايب قوى ومحدش بيثق فيه خالص جدا قوى وكمان بيبقى عامل زى حامل الفلونزا الطيور بقى وريشه نافش او شبه الفرخه البيضه اللى عندى بتاع الفراخ اللى بتبقى تعبانه ورميها بره القفص وعماله تتنطط على الاقفاص التانيه والناس بتضايق منه وتتجنبه يعنى لازم علشان نبقى امه اسلاميه بجد وعلشان نبقى شعب محترم وعلشان مصر حبيبتى وحبيبتكم كلم تبقى كويسه نبدأ بنفسنا ونصحح منها علشان منضحكش على بعض ونفقد احترامنا لبعض وللى حولينا ونبقى ناس بسيطه كده ومحترمه
واخيرا قد انفجر من عنذر وبنجر ولا عزاء للكذابين المنافقين
يا صديقى العزيز ويا قلبى لقد أثبت لى فعلا انك صاحب مبدأ فى حياتك وانا من هذا الكوكب اشكرك على كل اللى علمتهونى mora

59 اخبط وقول رايك:

DoctorAllam said...

بحجز مكان أركن فيه البوست بتاعي على ما أقوم من الغيبوبة كمان ست ساعات تقريباً
وعلى رأي أرنولد
I'll be back

mohand said...

السلام عليكم


مش معترض علي كلامك

بس اللي بيشرب خمر هو وصاحبه مطالب انه ينصح صاحبة ان الخمر حرام


واعتقد اني قولتها في مدونة قبل كده
كوني مذنب لا يمنع عني الامر بالمعروف والنهي عن المنكر


من وجهه نظري البحته طبعا

عموما المفروض ان اللي بينصح
بيحاول يكون علي قدر النصيحة يعني بيحاول يعمل بيها
ولو في الظاهر

تحياتي

عصفور المدينة said...

إيه التهديد اللي فوق ده

طبعا الصفة دي سيئة جدا بس الكلام العام فيها كدة بيوحي بإيه يا بنتي بس اوعي تزعلي
بيوحي بإن اوعى تنخدعوا في أي حد بينصح لأنه حتلاقوه في الآخر بيخالف فعله قوله وده مش صح تعميما طبعا ولا انت تقصديه بس ساعات فيه ناس بتاخد الكلام كدة

أقولك على حل أحسن من كدة احنا نبص للكلام لقيناه صح ناخد بيه إن شاء الله يجيلنا من إبليس نفسه

سيدنا عبد الله بن مسعود مسك إبليس تلات ليالي وفي الآخر إبليس قال له أعلمك حاجة وعلمه قراءة آية الكرسي قبل النوم والرسول عليه الصلاة والسلام قال له صدقك وهو كذوب
يعني خلاه ياخد بنصيحته
المهم حرصا على مرارتك خدي بنصيحتي وأنا صادق فيها
:)
خدي الكلام الصح من حيثما أتاك وما تشغليش نفسك بتقييم الناس ولو فيه معاملة ومحتاجة ثقة خلي عينيك في وسط راسك وخلاص
وهو ده اللي انا كان قصدي في تدوينة الظن

انا متابع هنا على طول بس ساعات مش باعلق لأسباب متنوعة منها النت طبعا

Nsreen Bsunee said...

حبيبتى ابى

بما انى نازله مصر يوم 6فبراير الاربعاء واكيد ان شاء الله لازم حاشوفك اعمللى حسابك انى لسانى طويل وبالبس بنطلونات وفيا بلاوى كتير يا اختشي بس على الاقل مش كدابه ولا باتصنع الحمدلله اهم حاجه انى 159 سم يعنى اوزعه عشان متتصدميش برضه انا قلتلك اهو لقد اعزز من فنتطز

انا عاوزاكى بقي تخططيللى يوم حلو زيك كده عشان انا جايه القاهره ولازم اروح البورصه لااااااااازم

ومتزعليش نفسك يا ابي الدنيا كده قليل اوى انك تلاقى حد صريح

Nsreen Bsunee said...

استاذ مهند

مش المفروض برضه انك توضح قصدك من التناقض عشان الكلام يكون واضح مش شايف انك لما ترمي كلمه غير مفهومه كده شئ مستفز

لماضة said...

ايه يا ابى ده
انا حاسه انك شويه هتحدفى حاجه فى وشنا هتطلع من الشاشه
واضح جدا انك مدايقه
احلى بقى واللى عاجبنى
انك زى ما تكونى اخدتى الكلام من على لسانى
وعبرتى عن غضبى انا كماااااااااان
يسلم فمك يا شيخه
خصوصا وانى كنت بفضفض امبارح ف الموضوع ده مع احدى صديقاتى الاعزاء
اقولك على كلمه فعلا دى اقل كلمة تقال للناس دى
لا تنهي عن خلق وتأتي بمثله

DoctorAllam said...

معلش يا شباب إتأخرت عليكم أصل سابوني نايم إسبوع بحاله وقمت بالصدفة والله
وشايف بوادر أزمة دبلوماسية بين المعلقين وشكلها حتقلب بقطع العلاقات وسحب السفراء وإحتمال تقلب بإعلان الحرب
عامة موضوع مهم وحيوي يا رحاب هانم بس زي ما قال عصفور المدينة إقبلي النصيحة طالما كويسة من أي حد وطالما حتفيدك مع إنها بتغيظ لما واحد ينصحك بحاجة ويبقى هو أولى واحد بنصيحته (زيي كده)
ومش عارف حاسس إن الموضوع ده حصل ليكي ليه طالما محموقة قوي كده ومطلعة اللي جواكي علينا .. إخنقي فينا براحتك يا قمر أهو كله صبر على البلاء
يلا بقى علشان العداد بيعد وراكن البوست هنا من بدري ومش معايا يكمل

Semsem said...

مش عارف اعلق اقول ايه
بس حاسس ان فى خناقة هتحصل فى الكومنتات قريب
ربنا يستر الحق نفسي واهرب
سمسم

احمد الجيزاوى said...

المنافقين الجدد
ابديت 2008
والله فعلا فى تطور حقيقى حصل
ايوة مش تطور الحاجه السقه لا دة تطور حاجه اسقع من كدة بكتير تطور المنافقين فا اسلوبهم فى شكلهم فى كلامهم
ايوة يعنى انا شيف فعلا اكبر دليل على كلامك
شيخ الازهر الشيخ الهشكه دة
المفروض انه اكبر دماغ دينى فى مصر ولكن من بيحترمه مين بياخد برايه
مفيش غير السلطه يعنى لمه نافق حسنى مبارك وقال الجلد لصحفين ضحك الناس عليه وعلى الازهر وكان مهزله
المنفقين فعلا وصله الى منصب شيخ الازهر

كارثه كبيرة جدا


علشان كدة امن اصول الدعوة التى تعلمنه من اشرف الخلق سيدنا محمد صلى الله عليه وسلم
امه ابداء بنفسك اولا

وقال رسول الله استفتى قلبك ولو افتاك الناس جميعا
حديث موقوف

عموما تحياتى
احمد الجيزاوى

الطائر الحزين said...

العبرة فيما يقال وليس فيمن قال

ولو أتاك النصح من شخص على غير الملة وهذا الرأى موفق حتى ولو كان صاحبة لا يفعلة نأخذ بالرأى طبعا

يعنى مثلا لو واحد بيقول ان الشجاير والشيشة اه الشيشة بتضر وبلاش تشربها وهو بيشرب يبقى كدة هو منافق وكذاب


لا طبعا


اسوأ شىء ان المنكر يتحول الى معروف من مرتكبى هذا المنكر


تحياتى

mado80 said...

ابي
ازيك الأول

أنا بس حابب أعرف الأول ايه هي الفلونزا القرود وهبل الخرفان وهروب الجديان، ربنا يعفينا يارب

يخرب عقلك أسلوبك تحفه يا أبي بجد
:) :)

عاوز أقلك كمان أنه فعلا فيه ناس تحسسك أنهم ملايكه ناقص بس يطلعلهم اجنحه ومع ذلك تصرفاتهم وأفعالهم غير ما بيقولوا خالص

أنا عن نفسي مش أي حد بسمع منه نصيحه أو توجيه اللي عاوز يدي نصيحه أو توجيه المفروض مش بالكلام بالفعل حتي علي الأقل تبقي فيها مصداقيه

تحياتي ليكي يا أبي وألف تقدير لشخصك الكريم

Rain man said...

يقول منافق _ ربما كان انا _ ان النفاق كلمات للبيع لا يشتريها إلا من يفرح بها
و انا و الحمد لله اشتريت كلمات كاذبة بعدد شعر رأسك يا آبى
اشتريتها بـ " حزن " نية
و رأيت ما لا يناسبنى منها و لم اتبعه
و رأيت ايضا ما يناسبنى و لم اتبعه كذلك :D
فأنا_ حفظنى الله _ لا اتبع الا كلماتى الخاصة
و التى تكون كاذبة بدورها
ولكن لا بأس
ما اردت ان اقوله هو ان النصائح جيدة فى كل الحالات
سواء كانت من شخص يعمل بها او لا يعمل
المهم ان تكون مناسبة لنا و ان نراها صحيحة
فأنا مثلا لن اقلع عن الصلاة لمجرد ان صديق لا يصلى قال لى صلى
..
ربما تكونين محقة فى غضبك من المنافقون هؤلاء
و لكن فكرى فى الامر
ما الذى دفعهم لنصحك
فأن كان منهم من يريد لعب دور الناصح الواعظ و كفى
فإن هناك من يحب الخير لكِ
ربما اكثر من نفسه

تحياتي

أنا حر said...

كلامك صح بس المشكلة الرئيسية من وجهة نظري هي مشكلة التقمص
احنا بنحب نتقمص ادوار لشخصيات في خيالنا وطبعا الشخصية دي بتكون شخصية صادقة بتقدم النصيحة وبتعمل وبتقول عكس كل الحاجات اللي بتعملها وبتقولها في الواقع اصلا
المبرر الوحيد من وجهة نظري للي بيحصل ده ان في مجتمعنا اصبح النصيحة بفعل الصواب اسهل من فعل الصواب نفسه
تحياتي

أحمد المصري said...

فيه ناس بتحاول تفرغ احساسها بالغلط في إنه ينصح ويعظ..ساعتها ممكن يحس إنه عمل حاجة صح تعوض الغلط اللي بيعمله..زي الأب اللي بينصح ابنه المراهق مثلا إنه ميدخن و هوا نفسه بيخلص علبتين في اليوم..و يمكن ازدواجية المعايير دي اللي بتخلينا في الآخر نتخنق من نفسنا ونتمادى لئلا في الغلط لئلا في تدين ظاهري..فكرتيني بموضوع كنت حكتبه قريب..شكرا إنك فكرتيني0

3ala asm masr said...

الكدب والنفاق وان الناس تقول غير اللى بتعمله ده بقت حاجه عاديه اوى
احنا فعلا لازم نتغير من جوانا
ربنا يهدى الجميع

جمعاوى روش طحن said...

إبتسم إنت الآن ف مصر

appy said...

د/علام
يالا يا رخم ماشى شكرا ما مخنوق

مهند
عليكم السلام ورحمه الله وبركاته
لا انا مش ممعاك انا فى راى للى ينصح وهو بيعمل غلط يبقى منافق وكذاب ولازم يبقى انسان كويس علشان اثق فيه
غير كده انا مشوفتش التعليق ويا ريت بلاش خناق هنا ولا مع نسرين ولا غيرها بليززززززززز علشان مضربش بقله وانا مش بحذف تعليق طالما مش فيه غلط وعموما تعليقك اللى مسحته مش شوفته اوكى
وكونك مش قابل تفكيرها ولا طريقتها فكل واحد حر واهلا بيك من غير معارك ههههه

appy said...

نسرين
يا حبيبى القاهرة هتنور معاكى تليفونى اول ما توصلى كلمينى وبعدين عادى انا

واخده على فقع المرارة هههههههههههههه
أستاذى /عصفور المدينة
عادى انا كده على طول بهدد الناس اعمل ايه فى نفسى اصل بصراحه بتجيلى حساسيه من طوله اللسان ههههه وعموما فاهمه وجهه نظر حضرتك ومتقبله نصيحتك لان ما اسمعه عنك بيخلينى احترمك من غير ما اشوفك ومش هقبل اعذار فى موضوع التعليق لان رأيك بيفيدنى وبيفيد الناس كمان بجد


لماضه
بيبى يا سكر انت انا دايما كده اخد الكلام من عقول الناس علشان بحس بيهم وخاصه النظاف هههههههههه ومبسوطة انى شوفتك بجد قوى

سمسم
اهلا وسهلا بيك لا متخافش انا عامله حظر تجول للكومنت هنا وبضرب بالقله على طول ههههههههه

احمد الجيزاوى
جامد الابديت ده وطبعا كلامك متفقين عليه وانا وانت مش بنختلف عموما غير نادر وبرضه بزعق فيك وانت تسكت ههههههههههه

appy said...

أستاذى الطائر الحزين
منور طبعا مع حضرتك حق بس انا بتكلم عن الناس اللى مزودينها شويه واهلا بحضرتك وبرأيك

مادووووو
اهلا وسهلا بس معنديش تفسير للامراض ههههههههه بس ده من هول ما اراه
وعموما الناس دى هى اللى بتكلم عليها وميرسى على المجامله

رجل المطر
مش مختلفه مع حضرتك وكل واحد له رأيه ووجهه نظرة وانا بحترمها جدا ومنورنى كده على طول يا رب

انا حر
ايووووون الله ينور عليك التقمص والشيزوفرنيا اللى بنشوفها فى حياتنا اللى موديانا فى داهيه ودى بجد مشكله تانيه خالص نورت يا فندم

appy said...

احمد المصرى
اهلا اهلا يا فندم الحمد لله انى فكرتك كويس عملت خير اهو طيب من فضلك اتنين جنيه بقى اجيب قله للكوكبههههههههه

على اسم مصر
ربنا يهدينا ونتغير فعلا بجد من جوانا وميرسى انك على طول بتنورينى

جمعاوى روش طحن
ايه مين جاب سيرة مصر وبعدين مالها مصر هتخلينى اضرب بالقله واسيب عليك الخرفان بتاعتى بعد ما جالها هبل وميل للطحن ولا ايه العيب فينا مش فى مصر وعموما انا هبتسم برضه وعاوزة اقولك ان الحاجات دى مش فى مصر بس لا فى اماكن كتير قوى

appy said...

يا جماعه بجد بحترم ارائكم كلكم بس بليزززززززززز من غير خناق مع بعض اصل احبسكم هنا واسيب عليكم خرفانى انا بحذر اهو

NIDAAL PAL said...

العزيزة / آآآآبى
اولاً بلاش رخامة و تقوليلى برده هتفضل ابنى .. و شكلى كدة هطلع اكبر منك و هتبقى كسفة فى الجوووووووون
هههههههههه
ثانياً : انا معترض فى نقطة واحدة
ان الى بيعمل غلط بيبقى حس بطعم الغلط و عايز ينصح كل الى حوليه
واصلة .. علشان صوابعى عندها برد و مش قادر اكتب
و شكلى هنضرب بقلة فى الدماغ و هتبقى ليلة
دمتى بالف خير ايتها العزيزة آآآآبى
و ابعدى عن انفلونزا القرود علشان دى بتخلى الواحد يتنطط فوق الشجر
و قد فنجر من بنجر ...

مروة الزارع said...

عندك حق فعلا يا أبى فى كلامك

وكلامك دة فكرنى بنفسى كتييييييييييييير

حسيت كأنك بتتكلمى عليا

أوعى تكونى بتتكلمى عليا يابت

ههههههههههههههههه

لا لا لا أتكلمى براحتك

...........

المهم

هقولك حاجة

اسمعينى

مثلا انا

انا متحجبة على فكرة من 6 شهور فقططططططططططططططططططططططططططط

وكنت قبل كدة بمشى من غير هدوم اساسا

اللبس اللى بالى بالك

مكنش يهمنى اية يبان من جسمى

وكنت ارفع من كدة كتييييييييييير طبعا

بحاول ارجع لوزنى تانى عموما يعنى



المهم


انا كنت واحدة تانية خالص

وعشت عمرى كلةةةةة معرفش اى شئ عن دينى

ولا ربنا ولا اى حاجة

عمرى ما صليت

ولا عمرى صومت

اول ركعة فى حياتى كانت من سنة تقريبا

اول رمضان اصومة رمضان اللى فات

بس

عمرى ما حاولت اعرف يعنى اية اسلام

عمرى ما عرفت من هما الانبياء

كان معرفتى بالإسلام كمعرفة مواطن عادى يهودى عايش فى الصين مثلا

معرفة غريبة

طراطيش كلام يعنى

وعمرى فعلا ما حضرت حتى حصة دين فى المدرسة

ولا قولت ورا أذان

عمرى ما عملت اى شئ خااااااااااااالص


انا بعترف بكل دة ومش خجلانة

عارفة لية

هقولك

انا كان كل دة مش وحاشة منى

لا ابدا

انا مكنش عندى حد يقولى خاااااااااالص

انا نشأت يتيمة الأبوين

بدون اهل واخوات

منفردة مستقلة بحياتى الى الأن

عمر ما حد وجهنى

ولا نصحنى

ولا دلنى

ولا فهمنى

ولا أى شئ

ولا حتى كان ليا اصحاب كويسين

خدت ثقافتى من من نفسى

ومن الشارع

ومن الكفيهات

وطبعا ثقافة الشارع والكفيهات انتى عارفاها

يا اما تصيب يا اما تخيب

وكتير طبعاااااا بتخيب

بس الحمد لله انها جات على اد كدة وبس

المهم

من ساعة ما ربنا هدانى

يعنى قولى من سنة كدة

ابتديت اعرف دينى اصلا

واكتشفت اكتشاف عظيم

انى جاهلة

احمل شهادة عليا وجاهلة فى دينى

معرفش اى شئ

فللللللللللللللللة

ابتديت اتعلم

عرفت ازاى اصلى

ومتكسفتش ودخلت جامع اسأل فية يعنى اية اصلى وازااااى

علمونى يا جماعة

وفعلا ناس كتير وقفت جمبى وعلمتنى


وحاولت ادرب نفسى على الصيام

صمت الاول لحد الظهر وبعد كدة لحد العصر وبعد كدة لحد المغرب

زى الاطفال يعنى

وقدرت الحمد لله اصوم رمضان كلة

كان صعب عليا جدا

بس أستحملت

عرفت القرأن وبحاول احفظ وببتدى بالصور الصغيرة

وحفظت لحد دلوقتى حاجات كتير بس طبعا مش مناسبة لسنى

لسة بحاول اتقدم

بطلت حاجات كتيييييييييييير

بعدت عن كل اصحابى اللى مش اصحاب اصلا

لبست حجاب وانا عارفة انة مش حجاب حقيقي بس انا لسة بحاول

نسيت كل اللبس اللى كنت بلبسة

غيرت حياتى كلها

كأنى أنسلخت من جلدى لجلد جديد

والله هو كدة بالظبط مش تعبير مجازى

بس لسسسسسسسسسسسسسسسسسة

بعمل حاجات كتير مش صح

لسة بحط مكياج

لسة مغيرتش عدسات عنيا (النظر) لعدسات مش ملونة

لسة نفسى البس عبايات بدل الجيب والبلوزات

لسة بحط ساعات روائح

انا بينى وبين نفسى مضايقة

نفسى ابقى احسن واحسن واحسن

بس بينى وبين نفسى برضة انا حاسة انى مش منافقة

انا اتغيرت كتير ونفسى اكون احسن

عارفة واحد امبارح قالى كلمة حلوة اوى

قالى يا مروة انتى زعقلك نبى

عارفة معناها اية

انى اتحولت تحول كامل

اقسم بالله انا لما حد بيشوفنى ما بيعرفنى

كأنى دخلت الإسلام جديد

بجد كأنى كدة

ودة السر فى نتسمية مدونتى الجديدة تائبة اللى الله

لأنى بجد بندم على 22 سنة من عمرى ضاعوا

وتبت اللى الله

يارب سامحنى واغفر لى وثبتنى وخلينى احسن

..............


انا اسفة طولت عليكى

كلامى دة قريب بإذن الله هتقرية مطول وبتفاصيل اكتر فى بوست عندى

انتى جيتى على الجرح

ادعيلى اعدى المرحلة الإنتقالية دى لمرحلة احلى

أدعيلى أثبت

ادعيلى ابقى الانسانة الكاملة اللى بتمناها

..............

وحشتينى

:))))

مهندس مصري said...

طيب تصدقي فعلاً أنا حسيت انك بتتكلمي على مدونين محددين قابلتيهم في الحقيقة و اتصدمتي من كلامهم خارج النت و شكلهم اللي مش زي ما انتي كنتي متخيلاه

عموماً احنا ملحقناش نتكلم في معرض الكتاب
و أنا ما نصحتكيش قبل كده على ما أعتقد
صحيح الكلام مش متوجه ليا بس أنا حساس و بأبرئ نفسي من تهمة لم توجه لي

أنا سعدت برؤيتك يا آبي و أتمنى أن تتاح ليا فرصة النقاش و الحديث المطول معاكي

و أنا بأكتب عن اليوم ده بوست تفصيلي حالياً

سلام يا اللي مدونتها مدوخة جهازي في الدخلة و الطلعة
:)

Nsreen Bsunee said...

مروه
جميله جدا الصراحه ومريحه جدا ليكي وللى حواليكي اكيد
ومن كلامك ده انا فهمت سبب تطرف افكارك الى حد ما
اسمحيللى انصحك نصيحه لكى حريه تقبلها
لن تكونى كامله ابدا ومفيش اى حد ممكن يكون كامل املنا الوحيد هو الثقه فى رحمه الله
انا واحده من الناس كل يوم باغلط بلا اى مبالغه كل يوم لكن بكل بساطه انا واثقه فى رحمه الله بيا
لا احكم على دين احد ابدا لانى احترم خصوصيه العلاقه بين الانسان وربه واعلم جيدا انه زى ما مستحيل حد يعرف علاقتى بربي انا كمان مستحيل اعرف علاقه حد بربه
لا احب دور الناصح ولا احب المثاليه اللزجه لذا اتمنى منك الا تنتهجى هذه الطريقه كنتى رائعه فى تحدثك عن تجاربك الشخصيه وكنتى متميزه لكن نزوحك للتطرف-واعذرك عليه بعد معرفة ما تمرين به-قلل من واقعيه كتاباتك
اتمنى لكى الخير واتمنى ان تعبري هذه المرحله بسلام والا تحملي نفسك ما لا تحتمل فالمكياج والعطر لا يضعك فى خانه الساقطات (وحتى الساقطات يدخلهم الله فى رحمته الغفور الرحيم)0

ابي هانت وحاشوفك يا قمر انا برضه مصممه على البورصه مصر وحشانى اوى وقلبي عمال يدق من ساعه ما جبت التذكره ادعييللى اوصل بالسلامه والنبي يا ابي

يعني ايه يا بت انتى واخده على فقع المراره هو انا حافقع مرارتك ياوحشه

Nsreen Bsunee said...

مهندس مصري
انا عاوزه اشوفك انت كمان لما اجى مصر الله اعلم ليا نصيب اجى تانى امتى
ادعيللى انت كمان اجى بالسلامه وان تحصل اى حاجه كويسه اثناء الاسبوعين اللى حاقعدهم فى مصر انشالله ناخد كاس الامم حتى نفسي اشوف الناس فرحانه

:)

مهندس مصري said...

نسرين بسيوني
=============
عينيا
بس حددي ميعاد على البورصة يوم خميس أو جمعة علشان ظروف الشغل عندي
و أنا أنزل من دمنهور للقاهرة مخصوص و نعملك احتفال تدويني بالعودة المؤقتة من الغربة للوطن الأم

انما لو حتنوريني في دمنهور يبقى في أي يوم براحتك انتي و أي حد من حبايبنا المدونين
:)

مهندس مصري said...

أنا كنت ناسي يا نسرين انك اسكندرانية
يعني جنبي فركة كعب
يبقى سهل نتقابل
:)
توصلي بالسلامة ان شاء الله

بحبك يامصر said...

ابى فى ايه فى القرأن بتقول(اتأمرون الناس بالبر وتنسون انفسكم)

يعنى فعلا مينفعش حد يكون بيشرب سجائر وينصح غيره بإنه يبط السجائر او انه مش بيصلى وينصح غيره انه يصلى
لانه بإختصار مش هيكون مقنع بس فى نقطه ممكن انا وانا عاصى انصح غيرى انه يعمل شئ ميكنش انا بقع فى خطأ الشئ ده يعنى مثلا لو انا مش بدخن بس بعمل اى معصيه تانيه ممكن انصح غيرى انه ميدخنش او يبطل التدخين
ده رأيى الشخصى

أنونيمس said...

صراحتك حلوة والله يا آبي
كويس ان الواحد يقول للي قدامه ما يضايقه منه
هي دي أحسن طريقة تخللي علاقة الناس ببعض سويه من غير عقد وكلاكيع

ياريتنا نبطل ننصح بعض شويه وكل واحد يتشغل بنفسه حبتين ياريت
بس نعمل أيه عاده وماشيه ف الدم
مبنشوفش غير عيوب الآخرين وكلنا عيوب

شوفتي أديني قاعد أنصح أهو
فعلاً حاجة وماشية ف الدم
:)

Dr-Abd-Alrahman said...

appy
انا والله مكنتش داخل اضحك وبس انا كنت مستغرب جدا من الصراحة الزيادة الي في البوست
مع وبالتالي دة الي خلاني اقول ان كل الناس معاكي يعني متفقة معاكي في كلامك
علي العموم يا ستي انا بسجل اسفي لو كنت ضايقتك بردي او ردي مكانش لائق
علي العموم انا متشكر جدا للفت النظر الي عملتيهولي
واحب اقولك حاجة انا اصلا المرة الي فاتت مكنتش قريت البوست كلة انا قريت يمكن النص الاول منه بس ولكن اتمني ان تنسي الموضوع دة واعتبري ان دة تعليقي الاول
وانا ذكرت في التعليق الماضي
حديث رسول الله صلوت الله وسلامه عليه
الذي رواه الامام احمد والطبراني والحاكم
(( ستكون بعدي سنوات خداعات يكذب فيها الصادق ويصدق فيها الكاذب ويؤتمن فيها الخائن ويخون فيها الامين وينطق فيها الرويبضة))

قال الصحابة ومن الرويبضة قال التافه من الناس يتحدث في امر العامة من الناس

صدق رسول الله صلاوات الله وسلامه عليه

وما اكثر التافهين في هذا الزمان
يتكلمون في الدين ويضلون العالمين فلما تخلينا عن مصدر عزنا جهلت الامة بعد علم وذلت بعد عزة
فبعد ان كانت الامة بالامس القريب مناره تهدي الناس في ظلمات الحياري
اصبحت الامه الان تتسول علي موائد الئام

علي العموم بوستك جميل جدا جدا
وصريح جدا احييكي عليه

واتمني ان لا يحجب تعقيبي في هذه المرة

عبدالرحمن

appy said...

الاول زغروطه حلوة منى لووووووووووووووووووووولى لان النت رجع بالسلامه الشغل وانا عاوزة اتنزح كده (ههههه يعنى اتنطط من الفرحه)
نبدأ بقى التعليقات والرد على الناس اللى شبهى فى الكوكب بتاعى

نضال
يا اهلا اهلا متخفش لما احب اضربك هضربك وجها لوجهه وعموما انا مش بتكلم عن اللى كان بيعمل غلط ورجع عنه وبعدين ده كويس انه ينصح الناس جدا ومبسوطه بيه انما التانين بقى يا اخويا نقول ايه عليهم هااا قول بقى


مروة
اهلا بيك احى فيكى اعترافك بغلطك بس انا مش بتكلم عن شخص بعينه انا بتكلم عن كله كله ولما بحب اقول حاجه لحد بقولها فى وشه وده للناس اللى عارفنى كويس عارفين انى عمرى ما كنت متناقضه فى شخصيتى ولا بقول حاجه واعمل عكسها ولا بكدب وصريحه ولسانى مزعل الناس فيه وعموما كويس ان الواحد يواجهه نفسه بخطئه

بشمهندس

لا بجد مش قصدتك يا جماعه انا اقصد شخصيات كتير حتى الناس البياعين فى الشارع وعموما يا ريت نقعد انا وأنت نضايق بعض بأفكارنا زى ما بعمل مع ناس كتير وبجد كنت مبسوطه قوىىىىى انى قابلتكم كلكم فى المعرض

appy said...

نسرين
يا حبيبى بدعيلك ومستنياكى وهوديكى البورصه بس الله يكرمك بقى هاتى شريطين بنادول وانتى جايه فى ايديك من الصداع اللى هتشوفيه هناك هههههههههه

بحبك يا مصر
والله برافو عليك انت فهمت اللى انا اقصده بالظبط

انونيمس
يا دكتور ما هى صراحتى دى اللى موديه علاقتى بالناس فى شجرة ههههههههه يعنى دايما فى حوادث معاهم ههههههه

د/عبد الرحمن
لا خالص انا كنت بهزر معاك ربنا يكرمك وانا مش بزعل من حد ابدا وبحترم الرأى الاخر ونورت الكوكب خد بقى خروف وانت ماشى هديه بس نصيحه ابقى عالجه ههههههههههه اصله بينطح

اجندا حمرا said...

عزيزتي ابي

فعلا بيستفزني اوي اللي بيقعد ينصح الناس و هو مش بيعمل بالنصيحه طب بدل ماتقعد تبص لغيرك و تنتقد اللي بيعملوه بص لنفسك و صلح منها احسن

المشكله ان الناس ياابي اتعودوا علي كده مايبصوش لنفسهم لأ يفضلوا يغلطوا غيرهم و كأنهم ملايكه مش بيغلطوا

مرسي علي الموضوع المتميز ياجميله
تحياتي ليكي

اجندا حمرا said...

اسمحيلي ياابي بعد ماقريت تعليق مروه احيييها عليه و علي شجاعتها في سرد ماحدث لها

ربنا يثبت ايمانك و ايمانجميع المؤمنين امين يارب

بت خيخة وأى كلام said...

والله يا ابى معاكى حق
كلامك ده بيفكرنى بالمثل الشهير
اللى بيته من ازاز يعمل ايييييه
ايييييييييون عليكى نور
اللى بيته من ازاز مايغيرش هدومه فى الصالون
وكل ده ليه علشان احنا بنحب مصر
وكنا رجالة ووقفنا وقفة رجالة
وعلى رايك
قد اذعر من بنجر
سلام
اختك خيخة

مثلية تبحث عن ذاتها said...

الايمان لابد أن يكون من قلب صادق و الدين معاملة وهذا هو اساس كل الأديان
ما كان عليه كل من يعرف ربه و كلمة قولتيها عجبتني قوي
ياريت كلنا نبدأ بأنفسنا و ليس بغيرنا واسمحيلي أن أضيف ليس من أجل الثواب والعقاب
لن احسن لفلان لمجرد أن يكتب لي ملاك حسنة ولكني أفعلها لمحبةالله و الأخوة فالله أهم من أي حسنة
كتير قوي بسمع من ناس
انا بصلي عشان بخاف عقاب ربنا
أو هتعذب و لازم أحفظ القرآن واختمه عشان كل حرف بحسنة وكأننا فاتحين حساب في بنك ربنا وبننسا دايما نحبه و نعمل كل ده محبة مش خوف و لا حسنات
الانسان محتاج يلمس محبة ربنا فقلبه للأسف الشديد ناس كتييييييير فاهمة علاقتنا بربنا غلط و حتاجة تعرف يعني ايه محبة ربنا و يعني ايه لما اسأل على فلان فعشان بحبه و لما بزور فلان و هو مريض كأنني في حضرة الله مش بس عشان سبعين الف ملك بيستغفرلي
مهم قوي نعرف اننا ربنا بيحبنا كلنا مسلمين كنا أو غيرمسلمين مادمنا على علاقة حقيقية و وطيدة بالله و اساس كل الأديان واحد و بيعطينا اختيارات و لسنا مجبرين على شيء ولن ندخل الجنة بحسناتنا أو بأعملنا لكن بمحبته
بشجع قوي أختي مروة وبهمسلها بكلمه و أقول
أوعي حد يعلمك دينك غلط وللأسف ما أكثرهم على الساحة وقبل يا أختي ما تحفظي القرآن افهميه عشان تعرفي دينك صح
التقرب لله مش بالحجاب و الصلاة والصوم وحفظ القرآن وده غلط و شعرك هتتعلقى منه يوم القيامة و متحطيش عطر عشان ده زنا و كل واحد بيزني (ليه كل الأمور الدينيه الروحنية الجميلة بنقلبها لأمور مادية الله أكبر من أن ينظر اليها) يا أختي قبل ما تهتمي بالحاجات الهامشية وأأكد (هامشية) الأهم حسن الظن بالله و محبته و محبة الناس الخالصة من غير مقابل حتي لو كان المقابل انهم يحبوني ... ولو كان المقابل حسنات متردديش اللي بيقولوه زي البغبغان وانتي مش عارفة معناه تعمقي اطلبي من الله وقوليله يارب عرفني طريقك
علمني محبتك وخذ بإيدي من قلبك و سعتها هتشوفي التغيير الحقيقي
يا أختي التغير مش بالمظهر بل بالجوهر أن الله ينظر ليس لما نلبس ولكن لقلوبنا أولا و ان كان الحجاب ده شيء دنيوي لحفظ وصيانة المرأة فالا أعتقد أنه سوف يكون سبب في هلاكنا ان لم نلبسه ولكن التعفف و الخلق الكريم هو الذي سوف نسأل عنه لأن مش الشعر هو أكتر حاجة بتلفت النظر فالمرأة وهجيب مثال بسيط في مجتمعتنا الشرقية كل ما حصل تقفيل بتزيد الانحرافات و في اروبا مثلا الناس بتبقى متحررة في مواضيع اللبس و أكيد في انحرافات لكن مش بالقدر اللي موجود في مجتمعتنا الشرقية لأن الناس هناك مبتبصش على حد والماديات والجنس مش شاغل تفكيرهم طول الوقت عشان الدنيا مش لبس و قلع و شهوة وبس!!!!

عندي كلام كتييير فالموضوع ده وانشاء الله هعمله بوست خاص و معذرة على الاطالة

نوراى said...

appy

اية اخبارك
يارب تكونى كويسة

بصى انا كمان عندى نفس ارائك
انا رايى ان الواحد لما يشوف اللى قدامة ماشى على مبادى معينة وسلوك معين
بيتعلم منة من غير ما التانى ينصحة ولا يفتح بقة

تاكدى ان كل اللى بيتكلموا بيتكلموا وبس
يعنى
اصحاب اقوال لا افعال

تحياتى الشديدة لكى

Che The Hermit said...

بيقولوا لا تنهي بخلق وتأتي مثله :: عار عليك إن فعلت عظيم
ودا فى رأيي صورة من صور النفاق نفاق النفس قبل اى حاجة وقبل اى حد بس فى حاجة تانية
ممكن يكون الشخص دا او مش ممكن هو غاليا بيسعى للكمال وعلشان كدا بيدعو ليه دايما وبيحاول يوصله بأي طريقة وانه مش قادر يوصله فى الحقيقة بيخليه يحاول يوصله فى العالم الافتراضي او النت وبيدعو اللى حواليه لكد علشان لما يكون الجو حواليه كويس دا هيخليه يمكن يبقي كويس بالظبط كدا بالنسبة ليا فى فترة قبل الامتحانات بسيب الشقة اللى انا قاعد فيها وبروح المدينة الجامعية لان وجود ناس كتير بتذاكر هناك بيشجع ع المذاكرة او ع الاقل اتكسف اقعد من غير مذاكرة والناس كلها بتذاكر دي برضه نفس الطريقة

اسف علشان طولت
تحياتى
تشي

الفاتح الجعفري said...

استاذه اابي
ازي حضرتك عامله ايه
ربنا يبارك فيكي
ايه العنوان الجامد ده وايه الكلام ده يبقي لازم حضرتك تنضمي ليه في المعارك علشان نكون جيش المدونيين ونولع في اي مدونه تخالفنا ههههههههههه
بهزر طبعا هو كلام حضرتك مظبوط جدا طبعا ,اننا اصبح عندنا ازدواجيه شديده في المعايير فنلاقي ناس بتنصح وتوعظ وهما غير صالحين وهي دي المشكله ان في انواع من الناس نوع عاصي لله عزوجل وعارف ويحاول التوبه ونوع عاصي ومش عارف ولايحاول ونوع طائع لله بس في نوع خطير جدا اللي حضرتك اتكلمتي عنه المنافق نسأل الله العفو والعافيه تصدقي حضرتك ان في سورة البقره القران تكلم عن المؤمنين في خمس ايات والمشركين في 3 ايات والمنافقين في 13 ايه .
نعم لانهم البلاء الاكبر والله في المجتمع والدنيا هؤلاء الذين يدعون انهم من المسلمين والمؤمنين ثم يخرجون وينكرون الحجاب ويتكلمون في كتاب الله بفير علم ويسبون الصحابه وفي الاخر يدعون انهم منا وايضا من يخرجون واعظين للناس في ثياب الواعظين وهم يفعلون مايفعلون
وكما قال استاذي عصفور المدينه لو هنصنف الناس ونتصيد الاخطاء هنتعب جدا
فناخذ من الناس الصح والكلام الصحيح ثم نتركهم لربهم (ولايضركم من ضل اذا اهتديتم)
فلا الانسان اللي بيوعظ وينافي قوله فعله انسان كويس يرضي عنه الله ولا الانسان العاصي الذي يعصي الله ايضا يرضي عنه الله
يااستاذه تعددت الاسباب وعصيان الله الملك الحق واحد
علشان كده لازم ننظر الي هدف واحد فقط هو رضي الله وان خالف جميع الله يجب ان اطيعه انا
يعني ايه الفائده من ان انا اكون عاصي وعارف اني اعصي الله بس صريح وصادق مع نفسي هذه معصيه وهذه معصيه اعظم يعني في الاخر انا هنزل الي قبري وحدي يسألني الله عن عملي انا واقف علي الصراط وحدي وتوزن اعمالي وحدي فلن يسألني الله عن احد الانفسي
لذا فنفسي نفسي
وفي الاخر الدعوه والامر بالمعروف هو من واجبات المسلم بشكل عام انظري الي قوله تعالي
(لعن الذين كفروا من بني اسرائيل علي لسان داوود وعيسي بن مريم كانوا لايتناهون عن منكر فعلوه لبئس ماكانوا يفعلون)
طبعا اسف جدا علي طول التعليق بس فعلا لان حضرتك ماشاء الله تقدمي موصوعات متميزه وحساسه ولغة حضرتك سهله وبسيطه
ربنا يبارك فيك ويعزك يارب
وجزاكم الله كل خير

أنا إنسان said...

جميل
بس الوان المدونه والخلفيه تزغلل العين
انا اطريت اقرا المقال من صفحة التعليقات

خبيب said...

إنسان كذوب وينهى الناس عن الكذب :

الأولى عليه

والثانية له

ولا علاقة بينهما

مطالب أن ينتهي عن الأولى

لكن لا يصح أن يمتنع عن الثانية لمجرد أنه يقوم بالأولى

--

أسمع لنصح الناس ولا أنظر لأفعالهم

لأن الأولى قواعد ثابتة لا يخترعونها ولا تتغير ( إذا افترضنا أنها منزهة عن الهوى وبأسلوب طيب )

أما الثانية فخاضعة للأهواء والنفوس ، ولا يصح أن أستمد منها تشريعاتي:

فإن كذب الناهي عن الكذب ، لا يجعله حلالا !

--

يعني المختصر : يعمل الاتنين مع بعض : يغير نفسه ، وينصح غيره ، لأن كل ناصح لو انتظر حتى يصلح نفسه تماما ، فلن نجد ناصحين

WhItE HeArT said...

بالسبة للنت ومشكلته وسمكة القرش اللي تقريبا عجبها طعم الكابل اللي عمري ماشفت كابل كهربا واللي هوه اهم كابل انترنت في مصر يتقطع سبحان الله دنيا

اما عن اصل الموضوع فردي هيكون بايخ بس تقبليه بصدر رحب احنا اخوات

وهقول لك قديمه كان المفروض تكتشفي ده من زمان حاولي تلحقي القطر بأه على رأي الاعلان الغبي اللي بييجي في وسط الماتش بتاع مصر الحق القطر ومتلحقوش والبلد بتتحرك والكلام الوردي ده


تحياتي ليكي

الربان said...

تحياتي

اوافقك القول تماما...ابدأ بنفسك أولا
ثم ادعو الاخرين...و القدوة الحسنة هي خير دعوة...

و أيضا القدوة الحسنة هي التي نفتقدها اليوم...في البيت و المدرسة و الجامعة و العمل....

و ايضا لابد ان نعلم ان الكمال لله وحده
واننا لابد ان نخطأ....لكن لابد لنا ان نصحح و الا يتحول الخطأ الي سلوك معتاد عليه ...بموت الحياء و القلوب.

تحياتي....و تقديري و دمت بألف خير.

3abdo me7tas said...

السلام عليكم
إزيك يا ست آبى
ألا هم الناس دول وصلو ليكي كمان
دا انا كنت بحسب عندنا بس
الناس اللى كل كلامهم حكم ومواعظ وبيعملو حاجات غيرها
بس على فكرة مش كل الناس بتعمل زى ما بتقولى
البعض منهم أكيد
بس
:D

appy said...

أجندا حمرا
يا اهلا وسهلا على ايه بس ده اقل واجب وهى دى تذكرة ليه وللناس كلهم

بنوته خيخه حلوة
أقولك يعمل ايه اللى بيته من ازاز يركب ستارة ويغير برضه فى الصالون هههههههه
نورتينى يا ام شيرى

نوراى
الحمد لله كويسه ازيك انتى بصى انا شخصيا بحب اتعلم من أخطأ اصحابى وبصراحه بستفيد

che
لا طول براحتك عادى اصل القعده عندى بحرى وانا عملاها علشان كده ونتكلم براحتنا وكلامك مظبوط فى الجزئيه دى

الفاتح الجعفرى
أهلا وسهلا بصديق المعارك انا مليش دعوة يا كابتن انا مش بولع فى حد انا بنسف بس وعموما بيعجبنى كلامك لانك بتشرح وجهه نظرى بطريقه تانيه

appy said...

انا انسان
اهلا اهلا يا رب نكون كلنا انسان بس اقولك نصيحه البس نظارة فيكونيه فضائيه وانت تعرف تقرأ نورتنى جدااااا

د/خبيب
طيب حضرتك يعنى لو نصح ومعملش يبقى ايه وهو ده اللى بتكلم عنه

WhItE HeArT
اعمل ايه يا اختاه انا جيت متأخرة بس هفضل متمسكه برضه بالمبادئ بتاعتى

الربان
اهلا يا استاذى اناعارفه طبعا وكمان احنا بشر ووارد الخطأ فين بس زى ما قولت اننا نحسن من نفسنا

عبده محتاس
طبعا مش كل الناس اكيد فيه الكويس

appy said...

مثاليه تبحث عن ذاتها


طبعا اكيد الله اهم ومحبته فى قلوبنا بس لما تحبى حد لازم تعملى الله هو بيحبه واذا كان ربنا حطنا كبشر مع بعض علشان نتقرب منه عن طريق الاحسان لبعض والثقه واننا نعمل باللى بيقوله يبقى كويس ولازم نعمل كده
بس كمان ما ممكن نحبه زى ما انتى بتقولى بس معملش حسنات وبكده مش هدخل الجنه ولا ايه رأيك وبعدين ده فى القرآن يعنى

ونقطه كمان زى ما وضحت التقرب لربنا بالحاجات اللى هو قال اعملوها علشان يبقى ده دليل على حبنا ليه
نقطه الحجاب هو مش شئ دنيوى بس عموما فيه ناس افقه منى ممكن ترد عليكى فيها

اما نسبه الانحرافات دى بقى مش عارفه انتى جايبها منين لا طبعا احنا معندناش انحرافات اكتر من الدول الاروبيه بدليل انها حتى لما وصلت لنا من بعض الناس دول اساسا كانوا فى مجتمعات اروبيه احنا لسه بيحكمن دينا

a7med3bdelfta7 said...

لو اتكلمنا عن النفاق اللى شاع.. يبقى مش هنخلص
الفكرة - ربما - اننا بندور على نموذج مثالى بنحاول نكونه حتى لو بالكذب
أو يمكن انتشار الانترنت وعالمه الافتراضى وشخصياته الافتراضية خلق التناقض ده
كل واحد فينا بيكون ع النت الشخصية اللى هو عايزها..
بس هل الشخصية دى هى اللى بتوافق حقيقته
هو ده السؤال

النجم القادم said...

ابى هانم
منورة بصى انا ليا تعليق على موضوع ان حد يقولك متعمليش كده وتلقيه هو بيعمله
تردى عليه او عليها وبقوله تعالى

اتأمرون الناس بالبر وتنسون انفسكم

صدق الله العظيم

appy said...

a7med3bdelfta7

بصراحه ولو السؤال موجهه ليه انا اقولك شخصيتى على النت هى بالظبط اللى فى حياتى لان كتابتى بتنبع من شخصيتى والناس اللى شافتنى على المدونة وفى الحقيقه عارفين ده كويس نورت الكوكب يا فندم

النجم القادم
انا عارفه ده انا نفسى هما يفهموا بجد ان شكلهم بيكون نيله يعنى انا مثلا مش محجبه وبتمنى ان ربنا يهدينى للحجاب والصح مروحش بقى ابقى عبيطه واقول لوحده اتحجبى يعنى ايه هو علشان انا مش عارفه يبقى افرض على غير لا طبعا ححتى يكون فيه مصداقيه فى الاجابه بس

3ala asm masr said...

appy
انا جيت احط اللينك ده عندك عشان عارفه ان نفسك تروقى مصر
يلا نروقها سوا
http://hnro2masr.blogspot.com/

بنت الاسلام said...

كبر مقتا عند الله أن تقولوا مالا تفعلون

صدق الله العظيم

وكفي

النجم القادم said...

ابى هانم
======
شكرا على كلامك الجميل ده
وانتى انوى بس انك تلبسى الحجاب وربنا هيعينك باذن الله اتفقنا
سلااااااام اختى الكبيرة

صوت من مصر said...

الكلام ده كبير وانا مفهمتش حاجه مش عارف ليه بس يا مسهل طريقه لذيذه كالعاده يا ابى ؟

الفاتح اليعقوبي said...

السلام عليكم
اتساذة ابي عاملة ايه
النفاق ده مشكلة بس دعيني اقول لك مقولة الامام علي بن ابي طالب :(اعرف الحق تعرف رجاله ولاتقس الحق علي رجال)

ويقول الرسول صلي الله عليه وسلم :(الحكمة ضالة المؤمن اينما وجدها فهو احق الناس بها)0

من الممكن ان يخالف قولنا فعلنا في بعض الاوقات ولكن فقط اعلمي يااستاذتنا الكريمة اننا بشر نخطئ ونصيب وان لم نخطئ فالاولي بنا ان نكون انبياء او صديقين ونحن لاهذا وذاك

حاجة تانية احب اقولها لحضرتك
واقصد هنا من يتكلمون عن وعن شرف الدين واهميته وعظمته وتجديهم لايطبقوا اي منه علي حياتهم يعني مثلا في احدي المدونات وجدت احدهم يجاوب عن سؤال هل دولة الرسول في المدينة دولة ليبرالية ام شيوعية ام اسلامية
وكان السؤال ده ساله احد المدونين فقام واحد من هؤلاء الذين يقولون انهم اصحاب فكر
فجاوب السؤال وخرف بما فيه الكفاية وخلي دولة الرسول صلي الله عليه وسلم دولة ماسونية اي كويكتيل اديان وهذا كذب وافتراء والراجع الي التاريخ الاسلامي يعرف اجابة هذا السؤال بمنتهي البساطة
لو سالتي مثل هذا لقال لك انه يحترم الدين ويقدسه وماالي ذلك ولكن عندما دخلت مدونته لم اجد قفيها الا كره للاسلام والمسلمين وائمتهم مسبش شيخ الا وسبه وشتمه من الشيخ القرضاوي الي الشيخ الشعراوي الي كل الشيوخ اللي واحد يوعي عليهم

اي حب للاسلام هذا ده كره ولكن لااجد خيرا من كتاب الله ليرد علي هؤلاء
يقول تعالي:(واذا لقوا الذين امنوا قالوا امنا واذا خلوا بشياطينهم قالوا انا معكم انما نحن مستهزئون *الله يستهزئ بهم ويمدهم في طغيانهم يعمهون)0

ويقول تعالي :(واذا قيل لهم امنوا كما امن الناس قالوا انؤمن كما امن السفهاء الا انهم هم السفهاء ولكن لايشعرون)0
وهذه ايه لااجد خيرا منها اهديها الي هؤلاء المنافقين الذين يدعون الثقافة والرقي والتحضر ولكنهم اذا لقوا اي مظهر من مظاهر الدين وصفوه بالتخلف والجهل واذا حدثتهم عن الاسلام من الممكن ان يبكوك من كلامهم عنه واللهي علم مافي صدورهم وصدرونا
هدانا الله جميعا الي مايحب ويرضي

والسلام

appy said...

بنت الاسلام
صدق الله العظيم
بجد يا بطه جبت اللى فيها ميرسى ليكى يا قمر

على اسم مصر
يا رب تروق عنيه هروح واجيب مكنسه وجلانس ونشوف هنعمل ايه

صوت من مصر
هو انا بكتب لوغاريتمات ولا ايه ما تهز دماغك يمين او شمال كده يمكن تفهم الله يكرمك

الفاتح اليعقوبى
ازي حضرتك انا متفقه معاك بس فيه حاجه عاوزة اقولك عليها انا بتكلم على الناس اللى طول الوقت بيتكلموا وعاملين نفسهم واعظين وحماة الحمى وهما بصراحه حمى قلاعيه فى حياتنا وبجد انا عمرى ما قولت حاجه وعملت عكسها وصريحه مع نفسى جدا وعارفه عيوبى وبحاول اصلحها بإذن الله وعارفه كمان اننا بشر لا ملائكه ولا أنبياء بس لازم يبقى فيه اعتدال او على الاقل اللى يخطأ مش يكابر ويقول انا اخطأت مش يتمادى فيه اما الموضوع اللى حضرتك اتكلمت عنه بتاع الدوله المثونيه ده انا قريته وعارفه الحوار كله لانى بتاع ردودك فى اماكن كتير وبتناقش مع ناس تانيه لما بكون مش فاهمه وفهمت الحمد لله اخيرا
ربنا يهدى الناس جميعا وميرى لحضرتك ووجودك هنا فى الكوكب لان بوجود الايات اللى حضرتك بتكتبها بحس كده بحاجات حلوة فى الكوكب والدنيا بتهدى علشان ده قران ربنا

النجم القادم
النيه موجوده بجد ان شاء الله

د/اجدع بنوته said...

بسسسسسسسسسسسسسس

انتى جيتى منطقتىىىىىىى

وسعى بقى كده وسبينىىىىى

علشان انا اعرف واحده م اللى انت بتقولى عليهم دول

ياسمين ياريت متبقيش تقفى مع فلان الفلانى

ياستى كنت بسأله ع معاد الندوه الفلانيه

ومتعدتش بالظبط دقيقتين

تانى يوم الاقيها واقفه مع نفس الولد

ساعتين ههههههههه

ياسمين ياريت وانتى داخله السكشن متبقيش

تحكى بالشوز ف الارض

..

احك ياابنت ابو سحلول

علشان متزعجيش حد .. تانى يوم برده

الاقيها جايه بكعب 7 سم وماشيه تطقطق

مثال للشخصيه المتناقضه ع الاطلاق

الناصح والفاسق ف نفس ذات الوقت

تنصح البنات ان الحب حرام

وتروح تجبله هديه ف الافلانتين

انتى بقى لو تعرفى البنت دى

مش كان جالك هبل النسوان

وانفلونزا الخرفان بس

كنتى عرفتى ماهية الموت الاكلينيكى

ودخلتى ف غيبوبة بالاجل

تحياتى ياأأأبى واستمرى ف سلسلة السلوكيات دى

appy said...

د/أجدع بنوته
عيونى يا حبيبى وبعد الشر عليا وعليكى من الامراض دا احنا نفضل ورا البنات دى لغايه لما نعدلهم يا ينتحروا