خمسه وعشرون سنه اعدام

الصورة رسم الفنان اشرف حمدى ودى عباره عن كيس اخضر فيه بانجو

أيوه متستغربوش من العنوان هى كدا احنا بنتعدم كل يوم بينزل ضرب فينا تلاتين مخبر من اللى اديهم زى المركب دى واحنا عاملين مش واخدين بالنا خمسه وعشرين سنه واحنا بنتسحل ونتهان ويستخفوا بعقولنا واحنا مش داريين وخاصه الداخليه ويا سلام عليهم لما يتزنقوا بقى اعتقد لو دخلوا موسوعه جينس للغباء هيكسبوها بجداره الامر ببساطه الداخليه قالت لفافه البانجو هى اللى قتلت خالد ابسلوتلى اى نعم هى المجرمه دى الناس ثارت وهاجت وماجت والشباب السيس طلع فى مظاهرات وبقينا نشوف العجب شباب خارجين مظاهرة علشان بانجو طيب علشان حشيش ماشى النائب العام قالك شرحوا الجثه تانى اللجنه اخدت العصير والبيبسى والشندوتشات وراحت على هناك تقطع وتشرح ومنعوا الدخول او الخروج من المقابر وفى النهايه ربنا هداهم انهم يلاقوا لفافه البانجو تانى مع ان فى البدايه قالوا حشيش بس ما علينا دول ناس متربيه ومش هيعرفوا الفرق بين الاتنين طيب السؤال بقى ومتأخدوهوش بمحمل انى عيله سيس وسو ولا قاسم السماوى ابدا بتاتا البته بس انا عاوزه دكر من بتوع الطب الشرعى ولا حتى طب من بقك ولا حتى حانوتى يجاوبنى على الاسئله دى ومتقولش ليه مقولتيش دكر من الداخليه لانى قولت قبل كدا الداخليه مفيهاش دكر فيها دكر بط دكر وز دا كبيرهم

السؤال الاول
المره الاولى لما شرحوا مش المفروض طلعوا أم الكيس اللى محير تلاتين ابوهم دا وحللوه وعرفوا ان فيه بانجو؟

السؤال التانى لما اتشرح تانى لقوا برضه لفافه البانجو ونفس الكيس على اساس انه بيتكاثر جوه زوره مثلا ؟

طب مصير لفافة البانجو ايه؟ سابوها في زوره تاني؟ تحسباً لتشريح تالت؟ و
لا شربوها و هما بيكتبوا التقرير؟ و لا رجعوها للمخبرين على إنها عدة شغل؟
معاً من اجل معرفة مصير لفافة البانجو

لو عرفت الاجابات دى ابعتها على وزاره الداخليه ولو لقيت دكر منهم يرد ابقى حطوها فى عينى انا

الداخليه اتزنقت ومش عارفه تطلع من المزنق زنقوهم يا مرزوق اخوكم مزنوق
ساعدوهم بقى
بس على شرط يجاوبونى على السؤال دا بس
انا لو مكانهم عارفه التفكير دا الداخليه او اعترفت بالموضوع يبقى كأنها بتقول للناس انا بكدب رسمى فى كل حاجه وعارفه ان الناس مش هتقول دول فاقوا ورجعوا لضميرهم عارفين اننا هنقول دول كدابين فطبعا لازم تبجح وتطلعنا غلطانين طيب احنا غلطانين بس حد يجاوبنى على السؤا ل دا لان ببساطه لو محدش جاوب احب اقولهم ان التقرير اتكتب بالتليفون بناء على التقرير اللى قبله وبالشفا علينا الاعدام

ملحوظه مهمه :-
تعاطفى مع موضوع خالد مش علشان خالد كشخص انما علشان الاف الناس اللى بيحصل ليهم كدا ومنهم صاحب كشك مدينه نصر عم سعيد اللى فجأه وقع وجاله السكر ودماغه اتخبط فى الرصيف ومحدش جه جنب انا بنصح الداخليه تشيل كل الارصفه والمقشات وكل حاجه بتعور وربنا على القوى

كان معكم ابن بطوطه ابى هانم

حكمة الامبراطورة


لا تأمن لمن خانك مرة

16 اخبط وقول رايك:

HERO said...

اتصدقي صح والله الناس كلها اتشغلت في موضوع خالد ونسيوا موضوع البانجو خالص
كويس انك نبهتينا
بقالي كتير مدخلتش وبالتالي هقلك مدونة جميلة يا ابي

دودو said...

ياوجع قلبى ياااااااااااااااانى

خلااااااص قرفت من العيشه واللى عايشينها
الله يحرقهم بقى

Foxology said...

نفس السؤال اللى بسأله من وقت ما قريت التقرير امبارح ... يخرب بيت الغباء والكدب

الناس دى مش عارفة اننا بقينا مش مغفلين ومش بنصدق اى حاجة ؟؟؟ بيعاملونا بمنطق اننا فى دولة الواق واق مثلا ومش دارين بحاجة

ربنا يريحنا منهم او يريحهم منا ايهما اقرب

تحياتى

Anonymous said...

انا متغاظه من امبارح...

هما بيراهنوا على غبائنا ولا استكانتنا ..

هما اكيد بيراهنوا على انشغالنا بكاس العالم وفرحتنا لما الجزاير اتغلبت من البلد اللي بيدعم نظام بيديهم بالجزمه ويبلعهم لفافه بانجوا :( ..

تحياتي

Asmaa mahaba said...

يا بنتى معروفه قوى واول ما مات الولد دا يا عينى وقالوا بانجوا ماما قالت اكيد هم الى حاطينهاله
خلاص يا ايبى كل شىء اصلا بقى على المكشوف منغير خوف ونخبط راسنا فى الحيط

(ست* جنى* الحسن) said...

سلامو عليكو..
لا ممكن اللى يعرف الحل يتصل على زيرو زيرو زيرو اربع اصفار
هيرد عليه واحد يقولو الحل ويلعن اللى جابوه لو حاول يتكلم
والمكسب 2 مخبرين يجبوه من قفا امو ويسحلوه ويرموه قتيلا بلا هوية
لك تحياتى

جنّي said...

السلام عليكم

ازي حضرتك ..

دول ما كفاهمش 25 سنة .. هايجيب لنا جمال علشان يبقى اعدام مدى الحياة ..

karim said...

انا بجد مش عارف اقول اية , لا وامبارح اية طالعين المذعيين فى كذا قناة يقوليك لازم نصدق التقرير ما هو مصيبة ولا مش بقينا نصدق الجهات المسئولة الناس دية هبلة ولا ايية انا مش فاهم, من امتى بنصدق اى حد من الحكومةو اةةةةة يابلد عايزة ولد

حلم بيعافر said...

اللفافة متجهزة لاى حد

أميرة علي كوكب مهجور said...

حسبي الله و نعم الوكيل

ويكا said...

ههههههههههه

فعلا الناس عندنا فى مصر بتستهبل يا بتنجانه

كلهم بينضربوا لوحدهم.

Humman being said...

أول مرة أدخل عندك... جميلة المدونة بتاعتك

الشاب ده هوه اللى رجعنى للتدوين تانى بالرغم انى كنت واخدة قرار مكتبش حاجة تانى لأن مفيش فايدة

بالتوفيق

dr.lecter said...

احترس من فضلك اللفافه بها سم قاتل

maxbeta3zaman said...

ولا الكدب المساوى نافع ولا الكدب المنعكش نافع ولا الضرب اللى موت باين ولا الواد اللى مات حيعود
وطول مالنيه معقوده
وده يطرمخ وده مسنود
ليلتنا تبقى ليه سوده
وزورنا بالحشيش مسدود
كفايه قتل فى المظاليم
لييجى اليوم وتبقى رديم
وجيش النمل لو يزحف
على العاتى حاياكله اكل زى الدود

دعاء العطار said...

هو فيه ايييييييه الحكومه ماتعاملتش معانا فيه ع أننا اغبيا ومش فاهمين اىىىى حاجه فى أى حاجه ؟

الحكومه دايماً تقول كلام مايصدقوش عيل بيرضع ومع ذلك بتقوله بمنتهى منتهى البجااااااااااااحه

لان فى دماغها حتى لو فهموا يعنى هيعملوا ايه شوية مظاهرات ودمتم

طب ومااااالوا مايعملوا

ماشين معانا بمبدا نعمل اللى نعمله ونقول اللى نقوله وانتم لو مش عاجبكم ادى الحيطه وادى راسكم

دمتى بوووووود

Empress appy said...

لكل الحلوين اللى علقوا انا بس مشغوله انى بعمل شركه علشان ندور على لفافه البانجو
ربنا على الظالم بجد وميرسى لتواصلكم وميرسى لقله اصلى معاكم انى مبقتش عارفه ارد على كله :P

Share |