احساس غريب


قررت فجأه امبارح اننا نخرج نتفرج على الماتش بتاع الجزائر وانجلترا ولا اخفى عليكم خبر ان اختكم بطيخه فى الكورة يعنى اى فريق قدامى كبيرى اقول عليه ليبيا ما عدا فرق مصر طبعا اللى حفظاهم فلنه فلنه وشراب شراب
وبعد مشاورات ومحايلات من محمد ليه انى ربنا يهدينى واتفرج على الماتش وافقت بس الاول نعدى على المول اتفرج او اشترى حاجه ودا طبعا مش استغلال للموقف قد ما هى انتهازيه منى نيهاهاها
المهم جت لنا دعوة من صديق كويتى اننا ممكن نتفرج على الماتش فى صاله اسمها المونديال
وافقت وقولت فى عقل بالى احسن خليه يتلهى مع اى حد بدل ما انا مش عارفه اصلا انا هتفرج على ايه وفى الاخر ممكن لو جه جون اقول هيييييييه مصر كسبت
فعلا رحت الخيمه مكان كبير وعاملين باصات فى باركنج تركن عربيتك والباص يوصلك
كل دا مش مهم
المهم ان تليفزيون الراى بيسجل فى الخيمه واختكم قاعده بتستخبى هقول ايه بشجع ليبيا ولا انجلترا
وكان فيه طبعا ناس جزائريين
فجأه المذيع جالنا ان ان ان تششششششش
ودا كان مقلب من صديقنا الكويتى الله يسامحه
بجد محمد قال انجلترا هتغلب تلاته صفر
انا لقيت نفسى بقول لا مش هتغلب ولو حصل اجوان الجزائر اتنين واحد
المذيع جالنا وطبعا محمد اتكلم كويس بس مقدرش احكم احساسه ايه همن جواه
وزنقنى المذيع وسالنى وطبعا كان قاصد علشان انا مصريه
قولت له الجزائر فريق قوى وانا طبعا بشجعه احنا كلنا عرب
وفعلا لاول مره احس انى مسئوله عن شكل بلدى وعن اى لازم اقول كلام كويس
مش بس كلام ولا والله فعلا كان احساسى انى نفسى الجزائر تكسب وتلعب كويس
واللى اكد ليه احساسى طول الماتش والقاولون اللى جالى
وكان معايا بنت لبنانيه اول مره بشوفها فرحت قوى لما قالت ليه اكيد لو مصر اللى كانت بتلعب كان هيبقى احسن بكتير معاكم بنحس بالفرحه اكتر
كل الك اللى فوق دا ليه بقى
علشان فعلا كلمه مصر مش قليله كونك تحس انك بتمثل بلدك مش قليل
كونك تقول الكلمه بصدق مش مجرد كلمه وخلاص وتحسها بيديلك احساس بالفخر فعلا
يا ريت الساده المتسولين بتوع بلدنا يأخدوا بالهم من دا
وكل الناس المغتربه لاننا فعلا مش بنمثل نفسنا وبس
كان معكم مزنوقه هانم بنت بطوطه

حكمه الامبراوطورة
فشخرنجى بنى له بيت فلسنجى سكن له فيه

30 اخبط وقول رايك:

حفيدة عرابى said...

ياسفير المصريين انت ياجامد:)
مجربتش انا شعور انك مسئولة عن سمعة بلدك بره
لكن نجحت ياباشا اهوه وبامتياز

وبجد فعلا انا نفسى الجزائر تكسب وننسى الهبل اللى كنا فيه
ونرجع مصر تانى اللى كلهم بيحبوها ومقامها كبير عندهم

أشاركك تماما فى شعور وفكرة البطيخة:)

Empress appy said...

وانهى سفير دا انا سفير بتكسف وحالتى حاله لدرجه قالوا ليه الحلقه هتتذاع النهارده على الراى الكويتيه الساعه 2 الضهر وانا مكسوفه اشوفها ههههههههه

عاشقة القمر said...

صباح الخير
شكليك نسيتنا ياابي ههههه
اخبارك ايه اخبار كويت
عارفه كنا متجمعين في منزل عمتي

ايضا قالو ياريت لو كانت مصر كانت لعبت إحسن

ويكا said...

ابى هانم كعب الغزال يا متحنى

ازيك

وبغض النظر عن الحكمه التحتانيه دى ، اللى مش فاهم معناها اساسا ولا حتى عرفت انطقها .

بس انتى صح ، ومعاكى حق ، ووالله ياريت فعلا كل واحد فينا يعمل حساب انه بيمثل بلده بره . لان فعلا لو الواحد عمل حاجه غلط ، مش بيقولوا اسمه ، لكن بيقولوا شوف المصرى عمل ايه .

عارفه : مره كنت انا وواحد مهندس صحبى واقفين على الكورنيش فى جده وكان فيه بنات واقفين جنبنا كده (شكلهم مش على بعضهم ) فبعد شويه قاموا مشيوا ، وصادفت ان صاحبى هو كمان كان عايز يمشى ، فانا ما رضيتشى امشى ، قالى ليه قولتله لو مشينا الناس هتفكرنا كنا قاعدين عشانهم .

قالى ما يفكروا طظ ايه المشكله ، قلتله (لااااا) ، انا مش همشى علشان احنا مصريين ، وانا مش عايز يتقال شوف المصريين بيعملوا ايه.

وفعلا قاعدنا دقايق بسيطه وبعد كده مشينا.


المكشله لقينا البنات واقفين جنب العربيه بتاعتنا هناك .(صدفه طبعاً)

هههههههه
بس مشينا برده ، عيب عليكى

البنفسج الحزين said...

الحقيقه مش عارفه أصفي أبدالفريق الجزاير ولا جايلي قلب أشجعهم ...

ساره said...

يا خساره يارتني اتفرجت على الراي امبارح :))

Empress appy said...

لا ابدا عاشقه القمر ازيك يا حبيبتى











ويكا

رجاله طول عمركم ويا ريت بجد الشباب يفكر فى دا انا لقيت نفسى بتكلم عن الجزائر كعرب كانى بتكلم عن مصر وفعلا حطيت فى بالى شكلى كمصريه ايه لو اتكلمت وحش لدرجه المذيه جاله انشكاح فى الاسارير وبقى ماشى ينقط علينا اسارير فى كل حته
على فكره انا شوفت هنا عكس موقفك دا بس المبات كانوا بتصوروا بنات فلبنيات
واتفرج على كلام المصريين بس برضه شكلهم مش مستوى اوى يعنى كبيرهم بياعين سواء البنات اوالولاد
وانا طبعا اللى فاهمه الكلام اللى بيتقال قد ايه كان نفسى اقلع اللى فى رجلى واضربهم بيهم لولا ان محمد مش بيحب الدوشه الى ممكن انا اعملها
اما عن المثل
فمتحطش فى بالكك يا ويكا اللى بيجى منى بيجى مره واحده وبس

Empress appy said...

لا ابدا عاشقه القمر ازيك يا حبيبتى











ويكا

رجاله طول عمركم ويا ريت بجد الشباب يفكر فى دا انا لقيت نفسى بتكلم عن الجزائر كعرب كانى بتكلم عن مصر وفعلا حطيت فى بالى شكلى كمصريه ايه لو اتكلمت وحش لدرجه المذيه جاله انشكاح فى الاسارير وبقى ماشى ينقط علينا اسارير فى كل حته
على فكره انا شوفت هنا عكس موقفك دا بس المبات كانوا بتصوروا بنات فلبنيات
واتفرج على كلام المصريين بس برضه شكلهم مش مستوى اوى يعنى كبيرهم بياعين سواء البنات اوالولاد
وانا طبعا اللى فاهمه الكلام اللى بيتقال قد ايه كان نفسى اقلع اللى فى رجلى واضربهم بيهم لولا ان محمد مش بيحب الدوشه الى ممكن انا اعملها
اما عن المثل
فمتحطش فى بالكك يا ويكا اللى بيجى منى بيجى مره واحده وبس

Empress appy said...

البنفسج الحزين

حبيبتى كونك بتشجعى فى البيت اوك انا اتحطيت قدام تى فى يعنى احساسى فعلا اتغير مش معناه انه نفاق بس فعلا حسيت بمسئوليه وبعدها حسيت بتكلم من جوايا لما بدات اشجع معاهم

AHMED SAMIR said...

ايه اللي جاب سيرة ليبيا بس في الموضوع؟؟!!!
ربنا يسامحك يا آبي هتودونا في داهية...و سلومة الأقرع ما يعرفش صاحبه
هههههههههههه

همس الاحباب said...

بالرغم من رواسب الكراهية لما حدث فى تصفيات كاس العالم
لكن واجب اننا نشجع الجزائر كمنتخب عربى يمثل كل العرب
والحمد لله لعب مباراة جيدة امام انجلترا
طبعا الكلمة مسئولية يا ابى هانم لانها تعلى من شان امة وممكن تجعلها فى مكان سحيق
تحياتى

نجم الرياضة said...

ابى فى التلفزيون

http://www.youtube.com/watch?v=nelkbXEVdHM

Empress appy said...

هكذا اسلموا

انت بتشتغلنى فين دا مفيش حاجه وملحقتش اصلا اشوفها يا راجل

نجم الرياضة said...

اصبرى هرفع الفديو تانى

نجم الرياضة said...

http://www.youtube.com/watch?v=-5bTKljWVNs

اى خدمة

نجم الرياضة said...

http://www.youtube.com/watch?v=-5bTKljWVNs

Anonymous said...

بطولي الغيبه ليه يا رحاب :(...بتوحشينا :((

بس كلامك تمام انتي جدعه ... والاهم اني عارفه ان ده احساسك بجد موش بس علشان التي في :)

ربنا معاكي يا رب

تحياتي

بنت وولد said...

طبعا كلمه مصر احلى كلمه و بنحس بجمالها قوى و احنا بعيد عنها
و احلى حاجه اننا نبقى واجهه مشرف لبلدنا و احنا بنتكلم
الجزائر فعلا امبارح لعبت حلو و كانت ند بالند لانجلترا على عكس توقعات الجميع

دمتى بود

مدونة عرفة فاروق said...

السلام عليكم

فضلت أدور على البتاعة بتاعت المزيكا اللى حاطاها دى ملقيتهاش بوظتلى اغنية للملك منير وايه نعناع الجنينة كنت هكسر المدونة كلها

بس ربنا ستر وقريت بسرعة

اللى انا عايز افهمه بقى هى الجزائر كسبت ولا خسرت

Empress appy said...

متشكره خالص خالص تعبتك معايا والله









فتاه من الصعيد

معلش يا حبيبتى والله بيكون غصب عنى الطبيخ والغسيل والشغل بقى

Empress appy said...

عرفه

ايه دى مش دى اغنيه بلدى بحب انا كنت حته فى بلدى استنى اشوفها

Empress appy said...

بنت وولد

ايوه ربنا يكرمك قولى للى مش راضين

Lady E said...

فعلا يا
APPY
ياريت مش بس المتسولين لكن بعض المصريين اللي بره مصر ومش واخدين بالهم انهم سفرا لبلادهم وتصرفاتهم بتبقى مش مشرفة اطلاقا وتكسف

بالنسبة لموضوع تشجيع فريق معين او لأ دي حرية شخصية

Asmaa mahaba said...

هههههههه سفيره النوايا الحسنه ايبى
ربنا يصلح احوال الجميع بس بصراحه انا مبقيتشى احترم الجزائر جماهير ولعيبه بعد ضربهم المشجع المصرى ودا رايى الشخصى البحت حتى ماما معرضانى فيه
وربنا يهديهم

(ست* جنى* الحسن) said...

سلامو عليكو..
الله يصلح الاحوال.
بحييكى على الكلام اللى قولتيه .
ربنا يكملك بعقلك.
انى احبك فى الله

صوت من مصر said...

والله يا ابى مصر كلها بتتكلم عن ده
وبتقول ياريت مصر على الاقل كنا عملنا حاجه فعلا

يا مراكبي said...

ده كده بوست كويس جدا وموضوعي جدا وعقلاني جدا

كل الكلام والانفعالات اللي ممكن نقولها ما بيننا لازم تتلاشي تماما اول ما نبقى في وضع مسؤلية وشكل بلادنا وانطباع الناس عتها هياخدوه من تصرفاتنا وافعالنا وحكمنا على الأمور

انتي كده ببساطة شديدة ضربتي مثل كويس جدا لموضوع كيفية تمثيل بلادنا .. حتى لو اللي جوانا غير كده

Foxology said...

كلامك سليم تماما واحييكى على موقفك الحقيقة وانا عن نفسى بالرغم من انى حزين على اللى حصل الفترة اللى فاتت لكن كنت مبسوط جدااا وانا بتفرج على الماتش ان الجزائر فعلا كانت قوية وقدرت تثبت انها فريق كويس ويستحق انه يوصل لكأس العالم

تحياتى

حـــــدوتـــــة said...

السلام عليكم

ابى هانم اخبارك ايه
والله انا اتفرجت على الماتش برضو
بس مقدرتش اشجع الجزائر وكنت عايز انجلترا تكسب
يمكن يكون قلبى اسود !!!! يمكن

سلالالالالالالالالالالالالالالالالالالالالام

نجم الرياضة said...

http://gouaelgool.blogspot.com

Share |