مصر مش اومليت


اولا ميرسي للناس اللى بتسال عليه عقبال كل اللى متاهلش يتاهل زي كدا ويروح بيت العدل او بيت الامه حتى
ندخل فى الموضوع بجد مصر بكل اللى فيها مش اومليت مصر فيها حياه بكل قرفها مصر فيها ناس الكويت بلاستيك كل اللى فيها بلاستيك الوشوش متقدرش تعرف الناس دي سعيده ولا هبله بكل اللى فيها من مظاهر نضافه وحاجات كويسه ورخيصه
بس من الساعه عشره فكله بيتك بيتك
مصر فيها ناس شقيانه وناس بتضحك وناس بتعيط فيها راي وراي اخر هنا متقدروش تفهموا الناس دي ايه
وكله كوم والالولاد كوم اكتشفت ان الولاد عندنا رجاله اي والله
هنا العيال بتطلع من الكهربا على الشارع ولبسهم غريب اخدوا مظاهر الحضار بس انما تنفيذها صح فلا
شبيه بعندنا بس عندنا فيه وسط انما هنا لا
مصر محتاجه ناس كويسه علشان تبقى كويسه
فيها حاجات كتير احنا حضاره 7000 سنه
هنا بيعملوا من المركب حضاره
انا فعلا مفيش حاجه بتبهرنى صدقونى كل اللى فاكر انه بره البلد دى هيبقى مرتاح فاحب اقوله انت هتبقى مرتاح لانك ميت بس بتتنفس
انما مصر لا كله بيتنفس وعايش
دايرين فى ساقيه بس عايشين
انا قولت اخطف بوست على السريع قبل ما اروح للحياه البلاستيك اللى هنا
وعلى الهامش
بالرغم من حبى لطلعت السادات بس شوفته فى كذا لقاء بسبب مشكلته ولاول مره احسه بيكدب مش عارفه ليه
معنديش سبب بس احساس
بتمنى يكون غلط
الريس فقعتوا مراره الراجل اخير الحمد لله اخير فيه امل انه يجري له حاجه
البرادعى بطل من ورق برغم من كل ما يدور حواليه

كان معكم ابى هانم من الاراضى البلاستيك للكاهرة بنت ام عز مباشر

حكمه الامبراطوره

ارضى بنصيبك يا ابن ادم علشان انت مش فى ايدك حاجه

55 اخبط وقول رايك:

AHMED SAMIR said...

اولا الف مبروك و لو انها متأخرة
ثانيا
بخبرة الغربة في دولتين عربيتين احدهما في الشرق و الاخرى في الغرب اسمحي لي اقول لك و بالفم المليان
انتي لسة شفتي حاجة؟
ثالثا:
طلعت السادات ما اقنعنيش المرة دي انا كمان
من الواضح كدة و الله اعلم ان الحياة السياسية في مصر طلعت مسرح كبير قوي و كله بيمثل علينا
تحياتي و تبريكاتي

Anonymous said...

ربنا يوفقك في الغربه يااااااا رب

ويظهر اننا موش بنعرف قيمه بلدنا فعلا غير لما بنسيبها :(

ترجعي بالسلامه ان شاء الله

الف مبروووووك تااااني للتأهل :)

تحياتي

Baskouta said...

ازيك يا ابي
وحشتيني يا قمراية
مبسوطة انك طمنتينا عليكي

يارب دايما بخير يا حبيبتي
تحياتي البسكوتية

أمل حمدي said...

ألف مبروووك يا حبيبة قلبي ربنا يسعدك ويصلح بالك اللهم أمين

وحشتيني بجد واللقاء الاخير كان ناقصك

بس الحمد لله انك بخير

بكرة ها تتعودي يا آبي اصبري اصبري

ربنا معاك اللهم امين يا أجدع مصرية بموت فيها

Empress appy said...

الله يبشرك بالخير يا احمد انا بجد مش عاوزه اشوف اكتر من كدا يا عم والنبى انت قول للملهوفين على الحياه بره علشان يفهموا ان مفيش حضاره ولا روح

الحياه السياسيه فى كل العالم على مسرح ماريونيت وخيوطه مش فى ايدينا يا دكتور خالص






فتاه من الصعيد

والله طول عمري بقول مش عاوزه اسيبها
ولما حصل وغصب عنى فعلا عرفت ان كان عندي حق عقبالك يا قمر

Empress appy said...

ماما اموله


ما انا صابره يا حبيبتى المهم طمنونى عليكم انا قريت عن اللقاء عند خيخه وكنت مبسوطه كانى معاكم




بسكوته الجميله

تسلمى يا ست البنات وانتى كمان وحشتينى

micheal said...

أصيلة يا بت..كنت حاسس أنك حتيجي تشقري علينا ببوست قريب وقد كان
:)
بما اني ماسفرتش وبثق في رأيك وبحترمه فحقول يجوووز جدا أنا كمان لو سافرت ألاقي نفسي مفتقد حاجات هنا..ايه هي معرفش
عموما أنا أصلا بقيت فاقد الإحساس بالأشياء..أريح والله
نياهههههه
حلوة بطل من ورق دي
تحياتي يا مدام اابي هانم

فاتيما said...

ازيك يا عروستنا


الف مبروك
انا اتطمن عليكى من قوس قزح و الله يوم الجمعة
يا ريت تكون قالتلك

ربنا يسعدك يا رب


عارفة و حاسة باللى بتقوليه
يا بيبى لأنى جربته زمااااان
و بناء عليه بقول اللى قولتيه
انى محبش اخرج م البلد دى
الا غصب عنى او مضطرة


و طبعا انتى دلوقتى
سا فندم
ف حكم المضطر
عشان امى دايما تقول
الست مع جوزها فى أى حتة
ان شالله تكون
بلاستيك

آخر كلمة
دى بتنجانى بقى

بكرة تتعودى يا بيبى
و ان شاء الله تاخدى على كل حاجة
و تخليها بمبى
و مليانة خرفان
و تطلعى برعى على اللى يزعلك
و تشوفى سيمبا بس تنفع تمشى
فى شوارع الكويت بقى
مش سيمبا الجبار بتاع مصر


ربنا يسعدك
و تتهنى يا قمر التدوين كله

شكرا لانك طمنتينا عليكى

وعقبال ما نسمع عنك
الخبر الاحلى

بوسات و حضونات
من هنا
يعنى مش بلاستيك خالث

R-H-S said...

احسن تعبير وشوش بلاستيك
مصر دي في روح تحسي بالحياه فيها بالرغم من زحمتها بتحسس الواحد بالروح
من الحر للساقعه للعرق للتكييف للنيل للعائله للاصدقاء للوشوش الشقيانه اللي تشوفيها في الشارع
لكل حاجه فيها وان شاء الله هينصلح حالها اكتر واكتر

حياة زوجيه سعيده ان شاء الله

عاشقة القمر said...

بجد انتي خالص روحتي الكويت دايئما اعرفه وآخر واحده بارغم كنت بطئمني عليكي في الياهو
كده مش قولتلي انا زعلان منيك جدا
بس على عموما ألف مبروك
مبروك

عاشقة القمر said...

الغربه جمره من ناره بس عايزه شوية صبر حتى تعودي عليه
ربنا يوفقك في حياتك زوجية

مجداوية said...

السلام عليكم

ايه ده ايه ده !!!!!؟؟؟؟

وكمان سافرتِ يا آبي ؟؟

ومن ورا أمك ريا

وطلعوكي إزاى من المطار من غير ما أعرف ؟

:)

أنتي مش قولتيلي حتدعيني على الفرح
طيب أنا عايزة حقي في البسطة

:)
ربنا يسعدك يارب وألف مبروك
أنا علقت على التدوينة اللي فاتت لكن مش لاقية التعليق ؟!!

المهم تكوني بخير وسعادة
وقال بلدك فين يا جحا قال اللي فيها مراتي

فالكويت أو مصر واحد طالما مع بعض

لكن صحيح مليون في المائة حكاية الحياة البلاستيك دي لكن أراهنك حتتعودي عليها لو عشتي هناك كتير ومش حتعجبك طبيعة مصر النايلون
الميزة اللي في مصر
هي نفسها العيب اللي فيها

ناسها

عاشقة القمر said...

مفيش أحد بيرتاح غير في بلدوا مهم كان بحسي أنوها غريب

الشعب لابد له من حكومه تشكمه said...

ههههههههه هو اى نعم الكويت من الساعه عشره بتقفل لا وبتلاقى ناس تمر على المحلات من الشرطه علشان تنبهها..
بس والله حلوه يا ريحاب بصى ليها من ناحيه كويسه هههههههههه...

بس الشوباب فعلاهناك متكهربين شويتين:) اصبرى واحلى منظر باه لما تلاقى واحد منهم راكب الهامر وساحب اليخت فيها وطالع على الخليج ههههههههههه ياخلاثى تحسى ان الشوباب المصرى دا مسكين اوى ويصعب عليكى..

بس انا معاكى ان مهما كان المكان حلو احساسك بمصر مختلف وفعلا مصر بزحمتها بدوشتها بكل عيوبها ليها طعم تانى وطعم حلووووو..

حفيدة عرابى said...

اولا الف مبروك ياعروسة ربنا يسعدك
وتملى الدنيا اباطرة وامبراطورات
هههههه
مش عارفة بتتكتب ازاى
بما انى ماعشتش بره مصر فأى حاجة هتقولى عليها مش هعارضك فيها
هى نقطة واحدة بس
حتى لو البرادعى بطل من ورق
مانجرب
مش هنخسر اكتر من وضعنا المأساوى

تحياتى لك

Unknown said...

مبروك يا خالتى
الف مبروك اية يا خالتى اللى دخلك نت من قبل ما تكلمى اسبوع بلاستيك يووووه قصدى اسبوع عسل؟؟
عموما كل واحد خلاص اتعود على روح بلده وحياتة فى بلدة انا مصر عجبانى كدة بقرفها وبجمالها بترابها وبظافتها عجبانى بكل ما فيها
وفى ناس تانية مش عاجبهم حاجة دا فرق بين اللى بيحب واللى مش بيحب يا ابى
كمان الناس فى الكويت عاجبهم وضعهم ووضع بلدهم بالشكل دا
عموما ربنا يوفقك يا خالتى فى ارض البلاستيك
ويكرمك ويسعدك
و
و
و
ووو وحشتينا جدا جد يا عروسة لو بعرف ازغرط كنت سمعت اهل مصر والكويت

sakayar said...

أولاً : ألف مبروك يا امبراطورة على الزواج الجميل
اللهم بارك لكما وبارك عليكما واجمع بينكما في خير
:)
كان نفسي أدعيلك الدعاء ده من زمان
:D
ثانياً : مرحباً بيكي في بلاد الخليج
وبجد نفس الشعور اللي حسيته في الامارات وصفتيه بدقة .. بس انا مكنتش بقول عليهم بلاستيك ... أنا كنت بقول عليهم آلات
ثالثاً : ادعيلنا بقى وانتي في السفر دعوة المسافر مقبولة بإذن الله
:)
رابعاً : احنا حضارة أربعتاشر سنة واكتر مش 7000 سنة بس ... دول الفراعنة ... ولو على المسلمين احنا حضارة ألف وربعميت سنة
:)
خامساً بقى : زعلت لما عرفت انك بتحبي طلعت السادات ... معرفش ليه انا مجرد ما كنت بشوفه كنت بقلب القناة
سادساً : ربنا يقويكي ويعينك في الحياة الجديدة ويسعد قلبكم سوا ويرضى ربنا عنكم
وأخيراً : تقبلي مروري بعد كل اللك اللي فوق ده
:)

adel said...

المصري معروف بجبروته
:):)
يابنتي كلهم فالصو و بلاستيك

سمعتي ان جمال خلف و جاب عقبال عندك محمد
وهما في المانيا
يعني ان شاء الله الريس اللي بعد اللي جاي ده هيكون اول ريس يحكم مصر معاه جنسيتين
والالماني قبل المصري
:):)

Unknown said...

بت يا ابى
اية الجواز حلو ولا اية
؟؟
طمنينى عنك يا قمر
والف مبروك على الجواز عقبال البكارى هههههههههه
دعواتك يا خالتى وانتى فى الغربة
الا يا بنت انتى قاعدة على النت وانتى لسة عروسة هو لحق طفشك
ههههههههههههه

Empress appy said...

ميشو

لما تطلع هتعرف وبعدين انا مقدرش ابعد عن عنها انت عارف الله فيها عقبالك بالعند فيك



فاتيما

يااهلا يا اهلا باهل مصر الحلوين
والله كلكم وحشتونى خالص يا طمطم
بس على راي جحا قالوا له بلدك فين قالهم اللى فيها مراتى بس انا برضه بلدي هى مصر هصبر بقى علشان خاطر محمد ربنا يرجعنا منها بالسلامه يا رب وعلى خير
خلى بالك من نفسك يا طمطم

Empress appy said...

عاشقه القمر


معلش والله انا حجزت بسرعه وقبلها كنت بقفل شغلى وبعمل حاجات كتير انشغلت اسبوعين قبل السفر اللى سبت فيهم الشغل كمان







عاوز اصحى

نفسى بس اللى فيها يفهموا انها بلد حلوه وتتعدل

Empress appy said...

مجداويه

بس بس بس بقى قال علقتى قال هو خدوهم بالصويت ليضربوكوا ههههههههه
وحشانى خالص بجد والله يا امى الدنيا اتكركبت عليا بسرعه فرح اخويا وتقفيل الشغل والبيت وكل حاجه جت بسرعه متعوضه لما ننزل ان شاء الله
اما موضوع الحياه النيلون صدقينى افضل من البلاستيك دى صعبه اوي اوي
خلى بالك من نفسك يا ريا







الشعب لابد له من حكومه


عااااااااااا لا يا ستى العيال هنا مش عارفه هما اصلا نوعهم ايه بيلبسوا لبس غريب بيوجع العين والعربيات هبله مش حسه بحلاوتها لا وكله كوم واللى بيلعبوا بالريسنج فى الشارع كوم
يالا ربنا يعديها على خير

Empress appy said...

نهر الحب

يا بنتى البلد تتلف فى يومين فخلاص بقى وبعدين احنا ناس كويسه عندنا شغل والتزمات يا امى لازم نخلص منها ومن ام البلد دى وبعدين محمد الحياه كلها معاه عسل مش شهر بس يا نوسه






سكريار الطاغيه


ازيك يا ابن العم والله لك وحشه عقبال لما افرح بيك يا رب كدا
بقولك ايه ما تحول وسيبك من دبى ونعمل حزب هنا ايه رايك

Empress appy said...

حفيده عرابى


حبيبه قلبى انا معاكى نجرب مش هنخسر غير الوقت بس هههههههه لان مفيش فايده عارفه لو هو حد قوى كنت وقفت وراه بكل جوارحى انما للاسف محبطه وهو اخد التعليمات من يوم امن الدوله ما شقطته فى المطار وراح على الرياسه على طول اسالينى انا خلاص كدا بخ كل اللى بيحصل ريكلام زي اللى حصل ايام ابو قصه ايمن نور

Empress appy said...

عادل

بطل حقد على الواد يعنى ايه المشكله المانى ولا يونانى ولا زيتون كالاماتا ما كله قفا واحد يا عادل ههههههههه
يعنى عادي بقى بلاش الحقد دا يا ابنى :PPP

الجواز و سنينه said...

الف مبروك يا عروسه
الوووووووووووووووووووووووى
و ياستى المهم انك مع العريس
حتى لو فين الدنيا هاتكون حلوه بيه
و هاتتعودى المسأله مسأله تعود مش اكتر
و كل واحد بلده هيه ام البلاد و احلاهم لانه فاهمهم و عارف تعابيرهم
لكن انتى عامله زى النونه اللى راح حضانه لاول و لاول مره بيسيب البيت
بيكون مش فاهم الدنيا ماشيه ازاى
بس مسأله تعود
ماشوفتش طلعت السادات
اما البرادعى هو بطل بس ماينفعش معانا
عايز ناس تكون بتاكل سيمون فيميه و بالشوكه و السكينه
و احنا ما اخدناش على كده
لما الاول نوصل لاننا نحترم آداميتنا
ساعتها هايمشى معانا البرادعى

خواطر شابة said...

بداية مبروك الزواج وان شاء الله يكون فاتحة لحياة سعيدة تعيشينها بالرفاه والبنين ان شاء الله
وأنا أقرأ البوست وضعت نفسي مكان أي كويتي يقرأ ووجدت ان الاحساس صعب اقرأي التدوينة مرة اخرى من وجهة نظره وسترين الوطن قيمته كبيره عند كل واحد وكل واحد منا لايستبدل وطنه ولو بكل بلاد العالم
مرة اخرى تمنياي لك بحياة سعيدة ان شاء الله وان يرد الله الى بلدك سالمة غانمة ان شاء الله

مجداوية said...

والله علقت يا آبي

وحتى قولتلك إني مردتش على طول عشان حكاية الفالنطين دي
:)
وكمان شكرتك إنك وجهتي رسالة حب ليا وافتكرتيني مع اللي بتحبيهم
ربنا يحبب فيكِ خلقه ويديم الحب بينا يارب
وألف مبروك لأخوكي و في انتظار عودتك
مقولتيش إنتِ في الكويت ليه ؟

يا مراكبي said...

:-)


استعجلتي في الحكم على الأمور والمقارنة بدري بدري .. استني بس لما تعدي فترة كبيرة شوية (وياريت مش أقل من سنة) لحد ما تحددي كل الإيجابيات والسلبيات اللي في الغربة ونفس الموضوع بالنسبة لمصر وبعد كده
اعقدي مقارنة موضوعية

صدقي أخوكي أنا خبرة في المواضيع دي

ما تستعجليش

:-)

الميكروباص said...

كنت لسه هدخل أسأل عليكي ولقيت فيه بوست بالصدفه
حمدا لله على السلامه وألف مبروك الزواج وعوده حميده للبلوج

اما بالنسبة للحياه بالخارج
ولله كنت جربت السعوديه
وقريبا هاجرب الجزائر -ولو اني متردد-
المعيشه في هدوء حلوه
والبلاد دي فعلا نضيفه
بس بدون روح وده بإعترافهم
(فيه عندك كلاب في الشارع؟)

dr.lecter said...

ياااااااااااااااااااااه
عودا احمد ياست الكل وزغروووووووطه كبيره مني ليكي عايزين بقي فياكين صغنططين كده قريب


البرادعي مش بطل من ورق البرادعي رجل الاقدار وهتشوفي بنفسك هو مجرد رمز كنا محتاجينه مش اكتر علشان نتحرك

akeedba7ebha said...

ازيك يا ابي عامله ايه اهم حاجه يرايت ويارب دايما تكونى بخير انتى ومحمد ودائما

انما بقى بالنسبه لمصر فا الى ميعرفش الكلام ده حتى لو عايز يسافر يبقى فعلا ميعرفش مصر

مصر طول عمرها فى بلدان العالم كله يعرفوا الكلام هو فيها بلاستيك بردوا اليويمن دول كتير

بس البلاستيك بداخله نفوس مصريه عظيمه ويارب يحميها دايما ويوقعها فى ايدي المؤمن يااارب

ويحميكي انتى ومحمد ويخليكوا لبعض دايما

لاسع افندى said...

الف مبروك الجواز
مصر ستهم


تحياتى

مواطن مصري said...

منورة يا ابي انا بقى شكلي

مش اشوف تأهيل خالص ييا ابي


عمال ادور على شغل و مش لاقي بعت لكل المواقع و مستني حد يرن مش يتكلم

:D

واحشانة يا ابي بلاش تقطعي كدة فجأة

الف مبروك يا ابي

جنّي said...

السلام عليكم

ازيك والف الف مبروك .. ما كنتش اعرف والله لاني غبت عن التدوين لفترة طويلة .. المهم المدونة نورت ..

نفس الاحاسيس كانت أحسها في السعودية .. ولكن عندما سكنت في جدة وفي حي كله من المصريين احسست اني في مصر مع بعض الفوارق البسيطة ..بس ها تتعودي ان شاءالله .. وبنفس الشوق للسفر للقاهرة وبمجرد العودة لمصر ان شاء الله واستنشاق العادم والغبار وترين الضجيج وزحام القاهرة المرعب ها تحبي تقطعي الاجازة وترجعي بسرعة ..

اما موضوع الفارق بين الاولاد عندنا وعندهم وبحكم عملي في التعليم اوافقك تماما ..

تحيتي وسلامي

ahmed_k said...

الف مليون مبروك يا آبي
وبلغي زوجك العزيز مباركتي لكما وتمنياتي لكما بحياة ملؤها الحب والسعاده
والكويت أنا عشت فيها سنوات سبع
وللحق أقول فإن تلك البلد قد وحشتني جدا لأن تلك المرحله تركت بداخلي ذكريات جمه لا يمكن أن تنمحي
وبما إنك في الكويت زوري منطقة العمريه بجوار منطقة الفروانيه وأمام منطقة خيطانيه هههه قصدي خيطان ثم أنظري لذلك المسجد الأحمر المطل على شارع المطار أمام الكوبري الكبير وأذكريني بالخير فهنا ترك أحمد_ك بصماته هههه
ترجعي لمصر وأهلك وأصدقاءك بألف سلامه

Unknown said...

مبروك يابطوطه

بالنسبه لمصر فدي فعلا مزيتها
مفيش بلد في الدنيا شبها ولا تغني عنها رغم كل عيوبها
ولا في مصري يقدر يكون عايش مرتاح وهو بره مصر

ربنا يسعدك ياحبيبتي

Foxology said...

اولا : الف مبروك للمرة التانية

ثانيا : وما الدنيا الا مسرح كبير .. ودى خلاصة الكلام الكل بيمثل دوره باتقان شديد وعارف امتى يدخل المسرح وامتى يخرج منه

تحياتى

صوت من مصر said...

يا امى طول عمرى متاكد انها حياة بلاستيك روحى وحاولى تتأقلمى

خايف من الحقيقة said...

الف مبروك يا ابي وتحياتي لزوجك الكريم
وصدقيني هتحبي الكويت
بس بلاش مقارنه لان الوطن هو اغلى واحلى شئ في الكون
بس الكويت فعلا جميلة وهتحبيها
وعموما عزومة السمك بتاع بورسعيد ممكن تتعوض هنا في الكويت
شدي حيلك انتي ود. محمد وانا في الانتظار انا وست الناس
تحياتي والف مبروووووووووك

Migo Mishmish said...

ابى هانم
الف مبروك ولو انها متأخره
احب اقولك انى مصدقتش طلعت السادات بس صدقتك انتى جامد لان بوستك مكتوب بصدق وطالع من القلب ..احب اقولك حالتك دى لخصها صلاح جاهين على حبه للبلد : احبها والعن جدودها وسنسفيلها فى عشق زى الداء ...وفعلا هى دى مصر يا ابى
تحيااااااااتى
ميجو وزوجته مشمش

أحــوال الهـوي said...

انا عايش كل اللي بتقوليه

و اول مرة حد يوافقني علي راي

و حشتينا

تحياتي

فاتيما said...

حاضر يا بيبى هخلى بالى
اول مرة تقوليهالى
لأ الجواز عامل فرق جامد أهو
ما شاء الله
ربنا يهنيكى يا رب


وانا بخير يا حبيبتى
و فى اسعد حالاتى
متقلقيش عليا


المهم انتى

افرحى يا رحاب بالجواز
و عيشى
و انبسطى
و اعملى كل اللى احنا
مقدرناش عليه
عوضينا و النبى عن الأخفاقات
و حسسينا كداان فينا
حد فلح و النبى


انتى شاطرة
و قوية
و قادرة تفرضى ارادتك
و تحققى كتير من احلامك
طول عمرى بقولك انتى جدعة
و حرة و دماغك توزن بلد

و ان شاء الله حظك
يبقى احسن من كل حظوظنا مجتمعة
و كل اللى كنتى بتقوليه
فى بوستاتك يتنفذ عملى
و بنجاح ان شاء الله


اسمعى كلام نبع الحكمة
عم مراكبى


الغربة فعلا
عاوزة شوية صبر
و تعود و بعدين تكتبى رأيك تانى
بعد النظرة المتأنية
بس اغرقى ف العسل الاول يا بيبى
و الكويت على مهلها
مش رايحة ف حتة

ربنا يسعدك
و يكتبلك كل الخير

بوسات و حضونات

Empress appy said...

فى السريع


خواطر شابه

حبيبتى انا مش بغلط فى حد بحد ذاته انا بقول احساسى ببلدي فعلا مصر فيها روح فى كل حاجه انا مش بغلط فى الناس الحياه نفسها هنا غريبه جدا
وبدليل انى مش بغلط فى حد انا رحت بلاد كتير وحبتها وبلاد كرهتها
وليه فى كل بلد اصحاب منها حتى الكويت برضه بس تقريبا فيه قله منهم مش فاهمين الحياه صح هما نفسهم بيشهدوا بدا






مراكبى


نيهاهاهاهاها ابقى قبلنى على كوبري قصر النيل اذا غيرت راي وتكون الساعه 12 الضهر




لورانس

عامل ايه يا معتز والكلاب عامله فيك ايه قولى

Empress appy said...

مجداويه

فى الكويت بصطاد سمك اصل مفيش فى مصر هههههههههه
يا امى يا حبيبتى مع زوجى هو هنا يا حبيبتى وانا معاه اسيبه لوحده يعنى







لاسع افندي


اهلا اهلا منور يا فندم

Empress appy said...

مواطن مصرى


بكره تتاهل يا ابنى لا تستعجل






خايف من الحقيقه


لا متقوليش انت هنا يا ربى اخيرا هلاقى الناس اللى بحبها طبعا مش هنرحمك من العزومه ابقى ابعت ليه رقمك وانا مش هنشره

Empress appy said...

صوت من مصر


تصدق اول ما انزل ابقى فكرنى اعلقك على شجره مش عارفه ليه بس هو كدا:pp




فاتيما

حاضر يا حبيبتى ادعيلى



اسراء

يا لولو بكره الناس تعرف كتير

Empress appy said...

باقى الناس
متشكره جدا انا كويسه وبتاقلم على الجو شويه بشويه
ومش قصدى عيب فى حد
احمد يا صعيدى
عنيه هروح واسلم لك عليه

معلش انا برد بسرعه من امام البوتاجاز لوووووووووول
اتفضلوا اتغدوا بقى

Empress appy said...

ميجو ومشمش


سلم على ميجو كتير


احوال الهوا

مبسوطه ان راى زيك يا فندم والله ربنا يكرمك يا رب

karim said...

عوداا حميدا سيدتى افتقدناكى كثيرا ارجو عدم الغية كثيراا, تحياتى

الـسـيـدة نـون said...

ايه ده؟
ده امتى البوست ده وحصل ازاى

طب هو انا علقت عليه وناسية ولا ايه بالظبط


مااااااااااااااا علينا

انا مش جاية اتكلم عن موضوع البوست لانى ماقريتهوش اساسا
او يمكن قريته قبل كدة وناسية

بصراحة مش فاكرة

المهم
انا جاية اسلم عليكى يا بتنجانتى

الناس كلها بتسلم عليكى
انتى وحشتينا كلنا

ترجعى بالسلامة يارب وانتى معاكى البتنجانة الصغنونة

سلام
خيخة

Unknown said...

حمدالله ع السلامة يا مدام رحاب و ألف مبروك الجواز

بالنسبة للكويت اصبرى شوية انتى لسه شفتى حاجة؟ مصر هى الخير والبركة مهما حصل

تشوفيليش عقد عمل ف الكويت ؟

محمد ام 5 ام

L.G. said...

يارب دايما مبسوطة
كمان يا ست ايوة كده البوست ينبض بالحياة عايزين مراسلين في كل دول العالم
على فكرة شكلك بتكتبي بسرعة وحماسة عشان كده الإملاء بعافية شوية :)) بس المهم الموضوع ده عجبني

تحياتي يا مودام رحاب
يارب دايما بخير

Asmaa mahaba said...

اخيرا حد رايه من رايى ربنا يرجعكم لينا بالسلامه

الميكروباص said...

حلوه أوي الاغنيه اللي موجوده بتاعة ايهاب توفيق
فكرتني بأيام ما كنت في ثانوي
كان شريط تحفه

Share |