رسايل حب


اول رساله طبعا

الى زوجى العزيز

كل ليله حب معاك عيد ويا رب يقرب البعيد يا حب العمر كله

الى مانتى الجميله قوس قزح

بحبك اوي ولو انتى فى اخر الدنيا هفضل فى قلبك وهتفضلى فى قلبى

الى خوخه خوختى

بحبك بطوله لسانك يا ام لسان زي السحليه

الى مانتى ريا
بحبك يا مجداويه وعارفه انك بتدعى ليه طول الوقت

الى مفروسه
على الرغم من انك فرسانى بس برضه بموت فى ضحتك اللى عامله زي الطفل دى
الى كاميليا

انتى وحشانى انتى وبابا ابو خالد اوي

الى الغائب الحاضر انا جعان

يا اسلام انت اجدع صديق فى الدنيا بجد انا بحترمك اوي وهفضل بتعلم منك

الى كل اللى بيدخلوا ليه واصحابى كلهم ويستنوا مواضيع
كل عيد حب وانتم طيبين

الى اصحاب الفيس بوك والمزاراعات الفاتنات والمزارعين الخناشير

انا بجد حياتى من غيركوا وحشه اوي اوي

بالرغم من انى السنين اللى فاتت محستش بعيد الحب ولا اهتميت الا ان محمد بجد غير حياتى وخلانى ابص للموضوع بنظره تانيه خالص
محمد انا بحبك اكتر من اى حاجه فى الدنيا
الى كل من جرحنى

مش مسامحه ليوم الدين وبينى وبينكم ربنا

ملحوظه الاغنيه لزوجى العزيز محمد انا بحبك اوي يا واد انت

كان معكم ابى هانم بخرفانها البمبى من امام شاشه اللاب توب
ووسط الزحمه اللى هى لسه فيها
حكمه الامبراطوره

كل ليله حب عيد

50 اخبط وقول رايك:

صيدلانيه طالعه نازله said...

عينى يا عينى على الحب
والله و صوتنا وطى يابت يا رحاب و بقينا حنينين قوى
يا هناك يا عم محمد
يا بخت من رضيت عليه بؤبؤ

ربنا يهنيكى يارب و يطمنا عليكى دايما

Appy said...

تسلمى يا لولو ليه يا رب وتفضلى حبيبتى على طول انتى والبت فضفضه دي اللى بموت فيها زيك كدا واقعد انكش فيكوا واقابلكوا بعد سنه واطلع لكم لسانى هههههههههه

Baskouta said...

كل عيد حب وانتى مبسوطة وفرحانة يا رحاب
كل ليلة حب وانتى بخير ومتنية مع حبيبك
كل يوم يعدي عليكي في حب وبالحب
I wish you a Happy Valentine's Day
May love surrounds you and your husband wherever you are.
With all my love.
Baskouta

Mohamed said...

رحاب آبي إمبراطورة حياتي
وملكة قلبي
أشكرك
مش عشان الرسايل دي وبس
إنما الأهم
عشان انتي في حياتي
حبيبتي وصاحبتي ومراتي
يا أجمل هديه وهبهالي ربنا
ربنا يحفظك ليا قمر ينورلي
وبسمه تبهجني
وقلب يساعني
ويجعل كل لحظه بيني وبينك عيد
ويبارك في حياتنا وفي ولادنا
اللي بتمناهم منك

بحبك

Appy said...

بسكوته

كل عيد حب وانتى بسكوته جميله كدا يا رب

Appy said...

محمد


ربنا يخليك ليه يا زوجى العزيز ويعوضنا ببعض خير يا رب

وومن said...

إيه دة هو الفلانتين جه محدش أداني خير

وخييييييير إيه ده برعي فين الله يرحم فاكرة كنتي بتقوليلي ايه في الفلانتين


هه فاكرة

بركاااااااااااااتك يا محمد

كل عيد حب وانتي طيبة وسعيدة وبتحبي

ربنا يهنيكي ويسعدك

فاتيما said...

كل عيد حب
و انتى طيبة يا بيبى


اموت انا فى الخرفان البمبى و هيا هيمانة و بتتغنى
باجمل مشاعير ف الدنيا يا فندم


ربنا يسعدكم يا رب

و السنة الجاية فى الفالنتين
ان شاء الله
تكتبيلنا بوست مشابه

بس هتزودى عليه
اسم النونو
اللى هتكونى يا دوب لسه جيباه للدنيا و عمره كام يوم و لا حاجة


ربنا يتمملك بخير
و يقرب البعيد يا حبيبتى
إن شاء الله

reem said...

كل سنة وانتى طيبة

وربنا يخليكو لبعض انتى وزوجك يارب

والسنة الجاية ان شاء الله يكون معاكى بيبي عسول كدا

نهر الحب said...

كل دا حب
طب احبك الله
ودايما يارب على منورة المدونة ومنورنا
كل سنة وانتى طيبة

Foxology said...

ماشاء الله لاقوة الا بالله

بارك الله لكما وبارك عليكما وجمع بينكما فى خير

تحياتى

أمل حمدي said...

كل سنة وأنت طيبة يا جدعة قوي

ربنا يسعدك ويصلح حالك اللهم أمين

قوس قزح said...

مش قادرة اعلق عليكى

:'(

واحدة مفروسة said...

ياعينى على الحب و سنينة
كل عيد حب و انتى طيبة يا خرفاني
و لو ان واضح كده ان الدكتور محمد و الله اعلم عرف يربط الخرفان
ههههههههههههه
كل سنة انتى و هو طيبين و بخير
و كل سنة و انتى بتحبي كل الناس و محبوبة من كل الناس

و بعدين تعالى هنا
بقا انا اللى فارساكي يا بتنجاني
و لا انتى اللى بتفرسيني بخرفانك السايبة؟؟؟
ههههههههههههههه
ربنا يجعل ايامك كلها حب و سعادة يارب

islamz said...

يا بختك يا عم محمد .. وكل سنة وانتوا مع بعض احلى واحلى ...

nor said...

الف مبروك حببتي
فرحت او يما فهمت انك اتجوزتي ربنا يوفقك يا قمر
و تفضلي رومانسيه كده و تنزلي بوستات مفيهاش خناقات
ربنا يخلي كل ايامك حب
و الف مليوووووم مبروك

star in the sky said...

ربنا يخليكم لبعض
ويارب تفضلى مبسوطة وحواليكى اللى بتحبيهم

كل فالانتين وانتى طيبة يا ابى

صوت من مصر said...

ابى كل سنه انت و " جوزك يا اسماعيل بيه " بخير وسلام وحب

أحــوال الهـوي said...

سبحان الله
يفعل الحب الاعاجيب
كل هذه الرقة و العذوبة كانت تنتظر الفارس الهمام الذي قهر الحصون و اثني القلاع
و اسر الكوكب و من يملكه
هنيئا لك بزوجك و حبك له
هنيئا له بك و حبه لك

ولان كوكبك قد دخل الي مدار فلكي باحوال الهوي اثبتي بان المحظوظ في هذا العالم من يحب و الاسعد من يجد من يحبه و يأمن له

كفاكم الله شر حاسد اذا حسد
قل اعوذ برب الفلق

تحياتي

karim said...

كل عيد حب و انتى بخير وعلى زوجك محمد و يارب يكرمكم بكل شىء حلو و سعيد. وتكونى دايما مع الناس اللى بتحبيهم وبيحبوكى بجد, تحباتى

مـحـمـد مـفـيـد said...

اغتنمي لحظات الحب فهي قليله
:)
مبروك

أبو حميد said...

يا سيدى على أحلام الزلانطين الوردية
أنا مصر على إن إظهار المشاعر لايحتاج إلى زلانطين

ساره said...

يارب يجعل كل ايامك حب وسعاده
انتى فعلا تستاهلي كل خير

انا طبعا وحده من المزارعات الفاتنات

:D

صيدلانيه طالعه نازله said...

طلعى لسانك براحتك ياريت يا اختى
اهو نحس ان فيه واحده رفعت رايتنا و انتصرت فى معركه الحياه

بحبك يا بؤبؤ

راجى said...

مبروك عليكم اول عيد فالنتاين

أم بتول said...

ربنا يديم عليك الحب و يكون طول العمر مش يوم واحد بس فى السنة
ربنا يسعدك آبى

حفيدة عرابى said...

المدونات السنة دى بتحتفل احتفالات عاتشفيةجدا
ربنا يسعدك ياقمر ويفرحك دايما
واشكرى ربنا دايما على نعمه
علشان تحافظى عليها وتزيد


ومفيش فايدة
الامبراطورة امبراطورة
انسيهم ياجميل على اد ماتقدرى
ماتخليهمش ياخدوا أى مساحة من تفكيرك وقلبك



السنة الجاية ان شاء الله
يكون عندنا
امبراطور أو امبراطوره صغننين

أو انا بحب التوائم
ياريت يبقوا توأم

ربنا يكتب لك الخير

بت خيخة وأي كلام said...

يااااااااااااااه يا بت يا ابى
رسالتك دى
عاملة زى كوباية مية ساقعة
فى يوم حر جدا
وانا عطشانة جدا

بجد رفعتى من روحى المعنوية جداااااااااا
انا كنت خلاص هاقفل الكمبيوتر وادخل انام
معتقدة انك واخدة اجازة ومش هاتكتبى حاجة جديدة

بس قلت ما بص بصة كدة على ابى يمكن تكون كتبت حاجة جديدة

وفعلا دخلت عندك
لاقيت العنوان مبشر بكل خير

قلت اقرا يمكن ينوبنى من رسايل الحب رسالة

وفعلا ربنا ماخيبش ظنى ولاقيت رسالة منك
فرحت بيها زى العيال الصغنانين



ربنا يجبر بخاطرك يا ابى زى ما جبرتى بخاطر الخيخيين اللى زى حالاتى


كل سنة وانتى طيبة يا حبيبتى وربنا يسعد ايامك كلها


هانشوفك امتى؟

خدى بالك من نفسك يا كميلة

اختك خيخة

بت خيخة وأي كلام said...

الله اكبر الله اكبر الله اكبر

انا فرحت اوى يا ابى
ان جوزك معلق عندك

شكل تعليقه جميل ومنور صفحة التعليقات
بسم الله ما شاء الله

ربنا يسعدكم دايما
ويبعد عنكم كل عين حاسدة او حاقدة


وانا من هذا المزنق
ببعت سلامى الى جوزك العزيز



ازيك يا استاذ محمد
كل سنة وحضرتك طيب
شايفنى عندك؟
انا طالعة عندك فى الصورة؟
طب صوتى واصللك فوق؟

انا اللى بعمل باى باى

نيهاهاهاهاهاهاهاهاهاهاهاع

فتاه من الصعيد said...

وانتي طيبه يا رحاب

ربنا يتملك على خير يا رب .... ويخليلك دكتور محمد :)

تحياتي

عاشقة القمر said...

كل سنه انتي طيبه يار ب تدوم المحبه بينكم ويجعل ايامكم كلهاحب

akeedba7ebha said...

ربنا يخليكوا لبعض ياابي وبردوا لينا يعنى ماهو احنا منقدرش بردوا على بعدك

:) ودايما فى حب واعتزاز وكريازى مافيش كلام ههههههه

هابي فالانتينوووو

Mohamed said...

واحده مفروسه

طبعا لمينا الخرفان يا مفروسه امال إيه إحنا عندنا خرفان تسيب ؟
بس الكلمتين دول خليهم في سرك أحسن ممكن تسيبهم عليا دلوأت ههههههه

كل سنه وانتي طيبه

Mohamed said...

خيخه

ازيك انتي يا خيخه عامله إيه
طبعا شايفك وواضحه في الصوره أهو عندي
بس ياريت تعلي صوتك شويه عشان مش سامع
:D

كل سنه وانتي طيبه
وربنا يديم صداقتكم بخير دايما يا رب

Mohamed said...

كل الأصدقاء الغاليين

يا جماعه ربنا يخليكم انا حاسس اني بسرعه بقيت واحد منكم وفعلا
انا بعتبر إصحاب رحاب وإخواتها وعيلتها في التدوين كلهم أصحابي وعيلتي انا كمان

الف شكر على دعواتكم وياريت تكتروا منها على قد ما تقدروا
ربنا يتقبل إن شاء الله

ـ-ـ- أحمد عبد العدل-ـ-ـ said...

كل سنة و انتِ بخير و سعادة و يارب كل ايامكم حب و سعادة و فرح
ربنا يجمعكم على خير إن شاء
تقديرى

رحله البحث said...

تصدقى اول بوست اقراه عن الفلانتاين واحس ان له معنى
حلو اوى انك لفتى نظرنا لنوع حب غير حب الدباديب
حب الاصدقاء
تحياتى
وامنياتى لكى ولاسرتك بالسعاده والصحه

sony2000 said...

انا اول مره اعلق هنا وبأذن الله موش هتكون الخيره
يارب ديما تكون ايامك كلها حب واعياد
تقبلي مروري وتحياتي

يا مراكبي said...

الله عليكم

بسم الله ما شاء الله .. ربنا يسعدكم ويحميكم من عيون الناس

ربنا يبارك ليكم في الجوازة الجميلة دي ويارب يديم عليكم الحب والسعادة

عمار مطاوع said...

انا اسف بصراحة كمت ناوي اعلق بس لما قرأت التعليمات اللي فوق البوست
رجعت في كلامي ..
ابعد عن الشر وغنيله
رغم اني كنت هاعلق تعليق عادي والله

قيس بن الملووووح said...

نحن في حاجه الي رايك في مشاكل القراء علي مدونة"دقات قلب فوق الخمسين"

سومه...مجنونه فى بلد عاقل said...

ربنا يسعدك يا رب احسن كلمه شوفتها فى موضوعك الى زوجى العزيز فرحت قوى كل ما بسمعها او بشوفها منك بتطمن عليكى وقلبى بيرتاح
ربنا يا رب يسعدك على طول ويتملك على خير

المنسى said...

كل سنة وكووووووووولكم بألف خير وصحة وحب وسعادة وسلامة وإيمان وكل حاجة حلوة

Omar... [ خروشات ] said...

لا اعرف كم تأخرت عن الحضور واللحاق بكم


لكن رجعت فوجدتكم توصلتم اخيراً الى المعنى الحقيقى للحياة المحببة

و هذا اكثر شىء اسعدنة

لكم التحية

و لى متعة القراءة

عمر المصرى

Appy said...

عمر


اد ايه انا مبسوطه برجوعك بجد حمد لله على سلامتك مبسوطه انى اطنت عليك

مواطن مصري said...

ازيك يا ابي اخباراية عاملة اية غريبة يعني بقالي فترة بدخل عندك و مفيش موضعات جديدة زي الأول نتمنى أن يكون خير بأذن الله

مش هتكتبي رائيك عن البرادعي

micheal said...

بالتوفيق يا اابي في حياتك الجديدة
لسه شايف البوست حالا
أنا كنت منقطع عن عالم المدونات زي ما أنتي عارفة
:)
تحياتي

Lady E said...

ربنا يسعدك يا appy

بت خيخة وأي كلام said...

هاميس
هامييييييس

عودي يا هاميس



انتى فين يا بتنجانتى
اوعى يا بت تكونى سافرتى فى السكرتة



احنا فى انتظارك يوم الجمعة
الكل عايز يشوفك قبل ما تسافرى

شفـقــة و إحســــان said...

كل سنة وانتى طيبة يا جميل
ربنا يباركلك ويسعدك يارب
ويارب يجعل ايامك كلها سعادة وهنا وحب
ويبعد عنك العين والشر
سلامى ليكى ولاسماعيل بيه