البوتاجازات والهاتيفه

تحديث: للتوضيح انا مش بنصف جانب على حساب جانب علشان محدش يفهم كده بس انا اضايقت من اللى عاملين اصحاب لكل الجوانب وبدأو يشتموا برضه فى كل الجوانب سواء مجهول او بوستات متغطيه وانا مش بحب دا او تعليقات مش كويسه وتلقيح يا ريت بقى تقروا بوست خيخه وتفهموا اللى اتقال انا مش عاوزه فذلكه ولا حد يقولى انتى بتنصفى مين انا برضه محدش بيوقعنى فى غلط غير كده البوست دا مش عن الموضوع اللقاء بس لو فكرتوا فيه هتلاقوه بيحصل لناس كتير فيكوا وانا واحده منكم برضه حصل معايا كده

طبعا انا كنت فى اجازة وما زلت الحقيقه بس بتابع الملاعب من على دكه الاحتياطى وهو دائما ما يعطينى فرصه لرفع حواجب ورسم علامه انبهار وازبهلال بكميه الغل والفضاء الروحى اللى عند الناس عموما وليس معنى هذا ان جميع الناس كدا لا سمح الله

ولكن الاكثر

ندخل فى الموضوع الشخص البوتاجاز او الهتيف صفاته

تجده لا ينام الليل ويظل ساهرا يبحث فى الفضاء السيبرى على اى كلمه هنا او هناك بين اثنين ويبدأ بمسك الفتيل واشعاله

تجده فى اللقاءات يحمى الفتيل ويمسك بأذن الاخر ويهريها كلام ورغى عن هذه وذاك وتلك وهذوه وكان واخواتها

تجده رافع شعار حمامه (لا مؤاخذه ) السلام دائما ولو تمعنت النظر فيه تجده ذو القرنين اى شيطان بذيل

تجده يتحدث عن الاخرون ولا يقوى ولا يجروا ان يتحدث امامهم

تجده نصب نفسه قاضى معارضات ونيابات ومحاكمات على الناس وهو نفسه يقع فى نفس الخطأ

تجده يأكل ضوافره ليلا الى ان يصل لكعوب رجليه من كتر التفكير فى كيفيه الوصول لتليفون او ايميل شخص ليبلغه مصيبه اخترعها خياله المريض

على مستوى الاصدقاء

تجده يوسوس لك من تجاه من تحب ويقول لك دى كذا وكذا وكذا ويصورها لك كأنها فتاه ليل وهو عينه فيها وهيموت عليها ولكنه يمارس هوايته فى التسخين

تجده يشجعك على العط والنط والفط مع بنت ولكن لا تتزوجها فهى تستطيع ان تمسك ايدها ورجلها وشعرها ولكن تتجوزها تيجى ازاى دى ميصحش ومش اصول ومش عادات

ولو سنحت له الفرصه مع هذه البنت لمشى على ركبه وقفاه وتسلق على النجف وعمل قرد لكى تقبل به زوجا

تجده دائما يا حشاش يا فاشل يا واخد على قفاه من واحده يا معقد نفسيا يا خمورجى يا نسونجى

واكيد كله بيقابل الشخص دا فاحذروا منه ومن وسوسته

حتى لا تندم ويفوت الميعاد وتقعد تغنى فات الميعاد لام كلثوم

الهاتيفه

هما من يشتروهم فى الماتشات والانتخابات المزوره لكى يهتفوا لفلان او علان او ترتان

واهم مميزاته

انعم الله عليه بصوت شبه صوت البقره فى تجعيرها فتسمع صوته من بعيد وقريب ولكن تنفر منه

هو من يقوم بقول الله عليك هايل فزيعه معاكى حق او يسيس الموضوع للتلقيح ايضا على شخص اخر

الهاااااتيفه يا ساده عيال سيس لسه متفطمتش ولسه مطلعش لها بذرة عقل حتى

عندما تجدهم يكتبون الشعارات تنبهر بيهم

وعندما تتناقش معهم تجد ان عقول الجحش اكبر من عقولهم او حتى عقل الفرخه

الهاااااااتيفه عيال تافهه سيس سرس هايفه

عندما يجدون شخص اخطأ ينسون كل شئ ويبدأون فى البحث عن نقط الضعف فيه ويوضحوا للناس سلبياته فى حين انهم فى يوم من الايام كانوا يتقربون من الشخص

بس خلاص

فاحذورا هؤلاء ايها الكبار وانظروا حولكم وربنا يكفيكم شر اصحابكم اما اعدائكم فانتم عارفينهم

مع السلام عليكوا

كان معكم ابى هانم رغم انف اللى مش عجبه واللى مش عجبه ايه يمسك سلك الكهرباء 300 فولت