خزعبلات


العواف عليكم طبعا غايبه وهقعد اعتذر وكلام قرع انا اساسا مش مقتنعه بيه فمش هعتذر واللى يزعل يشوف حد غيرى يصالحه بس هو عذر واحد اللى عندى انى فعلا عامله زى الزرعه اللى طول عمرها فى بيئه معينه وهواء معين وفجأه اتنقلت لمكان تانى فدا مخليها بتغرق تغرق تغرق تحت الانقاض فاذا مكنش دا عذر مقبول فخلاص كل واحد يضرب اللى جنبه بالقلم ويريحنى المهم

البرادعى :- باختصار مسرحيه هزليه هايفه جدا مش علشان الراجل كشخصية ابدا انما علشان الخطوات المتبعه يعنى ابقى واحد عارف قانون بلد وماشيه ازاى اقوم امشى فى ناحيه والبلد فى ناحيه ببساطه واوضح عندنا دستور يا سيدنا بيقول لازم يكون فى حزب طبعا هو مش فى حزب وبالتالى عاوز يضرب الارض تطلع رامبوتينا ومحدش يسالنى دى ايه لانى مش هقول
طيب لو واحد مش عاوز شو واى كلام يبقى الصح اغير وابقى فى حزب لو مش هينفع قشطه جدا يبقى خطوتى تتركز ان الدستور يتغير وطبعا يا حلوين مفيش دستور هيتغير ونطلع من دا بايه ان اللى بيحصل هبل فى اى هبل يعنى ميبقاش عندى قتيل على الرصيف فى الناحيه اليمين وانا اجرى بالاسعاف فى الشمال

اتنين
المحامى
اللى بيقولك مبارك مات من ساعه عمليه المانيا وسوزان بتحكم على طريقه شجرة الدر واتفقوا مع الالمان انهم يجيبوا بديل
القصه مش كدا خالص ابسولوتلى ولا هنقول دا محامى خياله واسع ولا عاوز فرقعه ولا شرب قهوة مغشوشه الموضوع ان بقى فيه موضه ماشيه كل واحد عاوز اسمه يطلع فى اى حاجه فى اى حته يقول اى كلام المشكله ان اللى فى مصر مش حاسس باللى بيحصل دا وبناخده على انه نكته المشكله فينا احنا اللى بره مصر وشكلنا بقى قد ايه مهزله ومسخره وملطشه ملحوظه انا محدش يقدر يجى جنبى فى الغربه لان اخره اللى فى رجلى

موضوع والد سوزان تميم


الراجل فجأه الدين ظهر عنده وقالك انا هتنازل علشان ربنا عفو وغفور
طبعا عاوزه اقول كلمه اعتراضيه بس عيب علشان فيه اطفال بتدخل عندى الدونه وهمشى ورا الكداب ايون لغايه بابا الدار مش علشان اعمل فيه حاجه لا سمح الله ولكن لو هو مبداه كدا ابن القرنبيطه دا معملش ليه مع السكرى كدا هنقول علشان دم بنته وتبقى عيبه يبقى مبدأ الدين والسماحه مش موجود يبقى المبدا ايه يا شطار ايون الفلوس ولا عزاء للكرامه ولا الرجاله اخيرا مش هغيب تانى اوعدكم ووحشنى الخناقات فى الكومنتات مالكم بقيتوا مسالمين كدا لا يا شباب عاوزه دم انتم عارفين ومتقلقوش القطن والشاش على الدكتور

حكمه الامبراطورة

لا تحزن على ما فاتك فالقادم محتاج حزن اكبر

20 اخبط وقول رايك:

karim said...

اولا عوداا حميدا, واضح ان الغربة ماثرة قوى و دة بيخوفنى انى ابقى زيك لو سافرت علشان لسة بفكر. ثانيا انا زيك معرفش عم البرادعى مش عايز لية يكون فى حزب علشان ينتخب الا لو هو شايف حاجة احنا مش فاهمنها او هى حركات من الحزب ايااة قال يعنى فى حرية و كدة, تحياتى سيدتى

sweet angel said...

أعتقد ان انا أول تعليق
احتمال يعني
يلا أول مرور وأول تعليق
برافو عليا

sweet angel said...

طب عاوزه خناق في الكومنتات ازاي وانتي عامله اشراف؟؟

المهم ..
أولا : البرادعي ولو إني مؤيده للتغيير انما مش واثقه ان الراجل ده هيفضل زي ما هو كده لغاية وقت الانتخاب

ثانيا : ده العادي .. أي واحد فاضي يفكر في أي حاجه يقولها .. واياك الدنيا تولع مش مشكله .. اهو المحامي ده فكرني بالغبي أحمد شوبير

ثالثا : هشام طلعت مصطفى برئ وكده كده هيخرج فالراجل قال أعملها بجميله وأبقا أنا الي اتنازلت :)

sweet angel said...

طب عاوزه خناق في الكومنتات ازاي وانتي عامله اشراف؟؟

المهم ..
أولا : البرادعي ولو إني مؤيده للتغيير انما مش واثقه ان الراجل ده هيفضل زي ما هو كده لغاية وقت الانتخاب

ثانيا : ده العادي .. أي واحد فاضي يفكر في أي حاجه يقولها .. واياك الدنيا تولع مش مشكله .. اهو المحامي ده فكرني بالغبي أحمد شوبير

ثالثا : هشام طلعت مصطفى برئ وكده كده هيخرج فالراجل قال أعملها بجميله وأبقا أنا الي اتنازلت :)

Bent Men ElZaman Da !! said...

حمدالله على السلامه الاول

حوار البرادعى ده بصراحه ماكنتش مشجعاه من الاول
كل حاجه مش فى صالحه انه يترشح
ومع ذلك عامل هيصه وحكايه وروايه الله اعلم المقصود منها توصل لفين

انا اول مره اسمع حكايه ان مبارك مات وسوزان بقت شجره الدر دى !!!
غريبه والله

من ساعه ما سمعت خبر التنازل عن القضيه بتاعه هشام طلعت دى وانا مقتنعه تماما ان الموضوع فيه آنه
مش حكايه بقى ربنا وعفو وافتكروا انه قتلها غلط والكلام الفاضى ده

فتاه من الصعيد said...

البرادعي ده عشم الناس وخلع ... يظهر لقيها كبيره عليه :(

ابو سوزان تميم ده راجل موش ولابد... واللي كان بيبيع بنته وهي حيه لازم يبيع دمها وهي ميته للي يدفع

ومفيش خناق لانك انتي اللي بقيتي مسالمه وبوستاتك هاديه
بركاتك يا دكتور محمد :D

وحشانا ياقمر ... ماتغيبيش كتير بقا

تحياتي

دودو said...

شوفى ياستى بقى
حكايه البرادعى دى انا مش مقتنعه بيها ابدا ابدا
ساعات والله باحس انالراجل مضحوك عليه
ومتدبس ياقلب امه
ونفسه يخلع بس مش عارف
:))
اما بقى حكايه ولى النعم وشجره الدر

عايش ومش عايش
مابقيتش تفرق وحياتك

اما بقى ابو سوزان تميم لازم نعذره ده بيقولوا الموضوع هيعدى ال100 مليون دولار
والحى ابقى من الميت ياحبيبتشى

أحمد الحيدر said...

سلام ..

طبعا الموضوعين الأولانيين مش حتكلم فيهم لحسن حد يقولي وانتا مالك :p

بس موضوع تميم دا حلو بصراحة .. يقال انهم مية مليون .. وهما أصلا مع احترامي لهم عايلة عاوزة تسترزق بأي طريقة .. والبنت ماتت وخلاص .. يبقى أكيد ربنا غفور رحيم .. ولا إيه رأيك ؟ :)

تحياتي ..

خواطر شابة said...

عود أحمد انا معاك في الثلاث نقط اللي ذكرتيهم لم تجاوزي الحقيقة أبدا في أي منهم
حكاية الخناق في الكومنتات ممكن تحصل لما تكون في مواضيع خلافية انما غير ذلك الناس تتخانق ليه
دمت بكل ود عزيزتي ورد الله غربتك على خير ان شاء الله

FOrty said...

هى اول سنه بتعدى صعب قوى و كل يوم حتبقى عاوزه ترجعى و بعد تانى سنه حتلاقى الوضع محتمل بس بعد تالت سنه مش حتبقى عاوزه ترجعى اصلا و حتنسى و تتنسى كمان
تحياتى

هوبتي said...

السلام عليكم
ازيك عامله ايه؟ يارب تكوني بخير اما انا فالحمد لله شمعه منوره

الماوضيع الي انتي اتكلمتي فيها يا سبحان الله كنت بتكلم فيها امبارح مع اصحابي
البرادعي وزاي ما انتي قلتي مسرحية هزلية لانه مش بيتبع خطوات صحيحه تفيد البلد لا دا شكله كده عايز يرجع البلد للخلف

اما موضوع مبارك فا دا ماليش تعليق عليه مش لاني خايفه او مرعوبه لا لان انا اول مره اسمع موضوع ان ماما سوزان (ههههه)هي الي بتحكم بصراحه بطريفة شجرة الدر

ونيجي بقي للقنبلة الي اتفجرت اول امبارح علي قناة الحياة والد سوزان تميم
اهو دا بقي بجد بيجسد معني الرجوله والاسلام الي بيظهر فجأة كده من حيث لا نعلم من عند ربنا
يا سبحان الله دلوقتي بس افتكر ربنا وشرعه طيب كان فين رابنا ياراجل لما سبت بنتك تغني وتتعري قدام الناس
استغفر الله العظيم
سيبوا العباد للي خلق

اللهم اني استغفرك واتوب اليك

شفـقــة و إحســــان said...

زى ما قلتى يابوبو لا عزاء للكرامة ولا الرجالة الموضوع كان واضح من الاول
كله همهم الفلوس
يا بنتى دول 700 مليون والنعمة لو 700 الف لكان باع بنته برضه فما بالك ب 700 مليون
يلا هى دى الدنيا صحيح زمن الفلوس
وحشتينى اوى اوى
وسلامى للدكتور يا ترى عامله فيه ايه؟

عالم ماريونت said...

هههههههههه

انا مش هحزن لا على اللي فات ولا على الي جاي
مفيش حاجة تستاهل الحزن اصلا يا ابي

بوست حلوة كالعادة يا ابي و ابو سوزان تميم كان مفروض يقول وش كدة انه هيتنازل عشان 750 مليون جنيه ولا دولار مش عارفة بس هي دي الحقية

ربنا يعفي عننا بقى
وحشتيني جدااااااااااااا

سلام
رنا

Foxology said...

حمد الله ع السلامة

وكالعادة التعليقات اللى بتقول كل حاجة وبتجيب من الآخر كدة :)

بالنسبة للدكتور البرادعى قالها صراحة من الأول كدة انه (((( محتمل )))) يرشح نفسه ((( اذا ))) توافر المناخ الديمقراطى المناسب لكن احنا شعب مهياص بيجرى ورا اى كلمة ويتعلق بيها تعليقة الغرقان فى القشاية

بالنسبة لموضوع الريس والدوبلير والحركات دى بتاعة هوليوود وصدام حسين الله يسامحه ويرحمه اعتقد انه فعلا الموضوع واسع منه طبعا

اما بأة لموضوع والد سوزان تميم اعتقد انه فى أنّ كبيرة جداااا والله اعلم اللى جاى ايه

تحياتى

dr.lecter said...

لسه عندي امل في الراجل رغم كل حاجه

بالنسبه لمبارك هو ميت روحيا ومعنويا وعاجز فعليا لان اللي بيحرك البلد هم زبانيه النظام

موضوع سوزان طلعت مصطفي
موضوع مالوش لازمه وهيصه علي الفاضي وفاكس

لورنس العرب said...

1- البرادعي مشكلته انه مش باين هايعمل ايه، الناس رافعين صوره في الشوارع وعلى الصوره كلمة "نعم"، وهو أصلا مش عاوز يبقى رئيس، ولا فيه دستور هايتغير ولا نيله وكله كلام في الهواء
2- احنا نجيد النصاحه لأبعد الحدود، الرئيس ظاهر في التليفزيون وقالوا انها تمثيليه، وقالوا انه مش قادر يقف وفي غيبوبه، نصاحه بعيد عنك، دائما حد يطلع ويظهر نفسه انه الاعلم ببواطن الامور وعارف المستخبي
3- بالنسبة لوالد الست سوزان الله يرحمها، الفلوس أبقى من الميت

لورنس العرب said...

وبعدين انتي عاوزه واحد ملياردير زي هشام طلعت يتشنق؟
هي سايبه ولا ايه
اللي بيتشنقوا دول العالم العاديه
اما ده راجل ملياردير
واللي زي ده في بلدنا حبل المشنقه بيتكسف منه

بدراوى said...

ازيك يا آبى

اسمك جاى فى بوست جديد كتبته
ياريت تطلى عليه

عندك حق بخصوص البرادعى وبخصوص موضوع سوزان تميم

مع تحياتى

يا مراكبي said...

ولا تخاريف ولا حاجة .. البوست كويس .. انتي كويسة وسليمة ما تقلقيش

:-)

فعلا البرادعي لسه ما أخدش أي خطوات مقنعة وعملية ومحددة وده اللي بيخلي ناس كتير تشكك في تحركاته .. لكن أنا لسه عندي أمل وأمل كبير كمان .. بس على الأقل يحط جدول زمني محدد للخطوات دي عشان نطمئن

أما بقى الخبرين التانيين فخليني مؤدب أنا كمان زيك كده

هههههه

حبيبـــــــة القمـــــر said...

آآآبي وحشاني ياحبوبة
لعلمك الموضوع بالنسبة للبرادعي مجرد امل كداب الكل مستني التغيير وفاكر انه هيحصل بايد غيره
وناسي ان الله لا يغير ما بقوم حتي يغيروا ما بانفسهم
وحكاية سوزان بقت زي رياح الخماسين كله هيعدي وبكرة الدنيا تروق وتحلي وتبقى زي ما حبايبنا عايزين واحنا هنستني كالعاده

سيبك انتي بجد وحشتيني يارب تكوني بخير ياقمري