الطاعون المتفشى

انا شخصيه مختلفه عن الاخرين معنديش تعامل بلون رمادى حاده وطباعى مزفته بطين  ... بالمناسبه بنتى طالعه زى بالظبط يعنى اضمنوا ان فيه حد هيقرفكوا فى عيشتكوا العمر كله ....ودا معروف لكل الناس 
فجأه وبعد انهيار مرسى من على الكرسى الاقى انى بروفايلى على الفتيس توك فيه خلايا نايمه اى والنيعمه لا وخلايا متحوله من اجل التحول فقط انا شخصيا ومدونتى تشهد على كدا معنديش مشكله فى التعامل مع كل الناس وبكل تفكيرهم اخوانى سلفى مسيحى بس يكون واضح توجهه مش واحد طول الوقت منحنح وطول الوقت معسل فى بعضه وفجأه يتحول انه لكائن خرفانى دا اللى مش هقبله ابدا والغريبه ان اكتشفت ان اللى حصل طلع الكائن الخرفانى اللى داخل ما كانوا يدعون الصداقه او الزماله او حتى مدونين والاغرب انك لما تسال حد انت اخوان يقولك لا مش اخوان  طيب لما انت شايف ان أخوان تهمه وانها مصيبه سوده وحاجه تعر بتعملها ليه 
علشان ايه التلون اللى زى الحربايه فى حياتكم على كل لون يا بتاستا زى ابو الفتوح الدهول بالظبط مع التيار رايح وجاى 
المهم مصلحتى 
بالمناسبه لاحظت فى اغلبيه اللى مش اخوان بس بيحترموهم واللى اخوان بيغلطوا حتى فى كتابه اسمائهم كنت قد ايه بتأذى لما الاقى ست كبيره كاتبه كلام مش عارفه اطلع منه بسطرين صح مع العلم انها مربيه اجيال 
طيب واحده زى انا اصلا بتنجانى ودلوقتى ام لتنين صغير وديناصور توأم يعنى بقت بتنجان رسمى تغلط محدش هيلومها انما دول ايه ها ايه
الغريبه ان الواحد تيجى تكلمه فجأه ينط فى ضميرك زى الفأر ويقولك ايوه انت شمتان انت بتنجان انت بربهان يا عم انا صعبان عليا الناس يقول لا انتم كذا وكذا انتم علمانين ابص للكلام واتنح وحواجبى تتشعلق فى الهوا واقول يمكن انا كدا بس انا فاقده الذاكره ما برضه العيال وخلفتهم تجنن المجنون
كانوا زمان بيقولوا
على الناس اللى بتقطع الطريق بلطجيه وكانوا بيبرروا السحل والضرب ويقولك هئ هئ هئ وهى ايه اللى وداها هناك حد قالها تلبس بكابسين حد قاله يحط رجله فى بؤ الاسد ( أقوال الخرفان) 
دلوقتى يمهل ولا يهمل بيتعمل فيهم نفس اللى برروه وبرضه الواحد مش عارف يشمت 
ومازال الخرفان على نفس الغباوه والاعجب مصدقين نفسهم 
طيب بالزمه مرسى ايه اللى يرجع يرجع علشان يعدم اللى فى الجيش يرجع علشان ينفى ناس كتير طيب انتم هبل ولا مجانين جيش مين اللى هيفرج عنه مرسى بيتحقق معاه بتهمت الخيانه
مرسى مين الاهبل اللى يرجع اللى طالع يقول لازم نحافظ على سلامه المخطوفين
الهوى دا أيهم ابنى ميقولش الكلمه دى 
ناس بتقول هما اللى فى رابعه تاعبينكوا فى ايه احب اقولكم روحوا شوفوا البى بى اللى بيعملوه فى الشارع وانتم تعرفوا روحوا شوفوا الروايح اللى فى رابعه وانتم تعرفه بالمناسبه بطلوا تقولوا ميدان رابعه لانه مش ميدان دى اشاره يا جهله بس معلش بحكم الاقاليم واللى بعيد عن القاهره مش عارف انا كنت ساكنه فى المنطقه دى وعارفاها شبر شبر
بالمناسبه اللى فى التحرير مكنوش بيعملوا بى بى فى جناين بيوت الناس
مكنوش بيطبوخ وبيدبح لهم عجل يا عجول يوميا 
لما اتقفش معاهم جبنه نستو وكشرى قالك جبنه نستو وتفاح يا معفنين 
اعتقد الناس دى هتفضل طول عمرها فى غباوه وربنا مش هيحرمهم منها 
فالينعموا بغباوتهم وللننعم بالضحك علىهم
كان معكم ابى هانم ام أيهم ولامار من قلب الاحداث فى الكويت 


13 اخبط وقول رايك:

L.G. said...

والله نشكر الأحداث انها رجعتك تدوني
المشكلة اني حاسة ان مفيش حد قلبه على البلد على راي غاندي كثيرون حول السلطة قليلون حول الوطن وحاسة ان فعلا هم همهم يرجعوا حثالة مبارك وكأن احنا ما بين اختيارين كلاهما سيئ شبه شفيق ومرسي كده يا اخوان يا ضالين هو مفيش في الدنيا ناس كويسة يعني لما جابوا في الوزارة الجديدة الراجل اللي الناس كانت بتهتف يا لبيب يا لبيب انت مكانك تل أبيب حطوه وزير يرضى ربنا ده يعني :( انا معنديش ادنى امل في مصر احنا بنطلع من نقرة نقع في دحديرة ربنا ينجينا بأه
سماح

لورنس العرب said...

انا حذفت حسابي من على الفيس بوك تجنبا لهذا الصدام الغير عقلاني والغير منطقي
كلام غريب وعجيب أسمعه- وأقارن بين موقف (نفس الشخص) في أحداث مماثله وأجده كان موافق زمان ومعترض الآن
صدق من قال أن معرفة الناس كنوز
والسبب في كده انك بتشوف منهم العجب

اما بالنسبه إلى أن مرسي يرجع بعد كل اللي بيجرى، أحب أقولك ان اللي اختشوا ماتوا من زمان
______________
سمعتي آخر نكته؟
الإخوان بيقولوا على عدلي منصور "طرطور" ،،، شفتي الزمن؟

فاتيما said...

حمدلله ع السلامة

:))

Empress appy said...

سماح

كنتى على بالى وانا بكتب البوست دا واكيد انتى عارفه ليه اما للامل ف الامل فى ربنا يا بنتى صدقينى هو اللى بينجينا من المهالك

Empress appy said...

لورانس

خير ما عملت مع انى افتقدتك يا صديقى بس حفاظا على مرارنك من اللى بيحصل
وبقول مش هتبقى الكلاب والاخوان عليك

Empress appy said...

فاتيما

يسلم قلبك يا حبيبتى يا رب

لورنس العرب said...

ولله في الفتره الأخيره خسرت ناس كتير وولله هما السبب مش أنا- لكن كنت ألاحظ ان فيه اللي "بيلئح عليا بالكلام" على الحائط بتاعه- أو اللي بيبعت رئاسل خاصه فيها كلام مش مظبوط وكأن مرسي ده واحد من العيله عندهم، ومش كده وبس، فيه اللي قال علنا بعد ما يكتب كلامه أن كلامه ده غير قابل للنقاش وبيهدد بأن أي حد هايقول حاجه مش هاتعجبه على الفور هايحذفه من عنده ولا كأنه مثلا الناس بتدفع فلوس عشان يتقبوا صداقته على الفيس
انتي قلتي كلمه من سنتين أو ثلاث سنين انا لسه فاكرها
قلتي ان النت ده لامم الأمراض النفسيه كلها
الجمله دي انا لسه فاكرها وبقولها لأصدقائي على لسانك

Empress appy said...

ومازلت بقولها يا لورانس اى والله انا شوفت بلاوى والفتيس لامم اكتر ربنا يعافينا

لورنس العرب said...

تهانينا بحلول عيد الفطر المبارك وكل عام وأنتم بخير

ehab bomman said...

طيب انا بقى مش هتكلم لأني اكتشفت اني مشهور عني اني اخواني مش عارف ازاي انا عمري ما انضميت ليهم ولا مره حتى ترشيحي ليهم في الرئاسه كان علشان مفيش غيرهم ومش عايز شفيق
في الشغل بيقولوا اني اخواني
كل الحكايه اني لما بشوف الطرف المواجه ليهم بيستعبط بذياده يعني اتهامات مش منطقيه قسوه في التعامل وخلافه مبيعجبنيش الحال
لكن الناس خلاص بقت بتصادر على رأيي بالتهمه الجاهزه اصلك اخواني
انا عارف دماغك يا رحاب من زمان واكيد انتي فاهمه قصدي

سلامي للعيال

الراقـــص مع الذئـــــاب said...

كنت مستني اشوفلك بوست بعد فض رابعة ودبح "الخرفان" وسلخهم وحرقهم
علي فكرة أنا مش خلايا نائمة ولا حاجة..أنا مؤيد لمرسي وإن كنت مختلف معاه في حجات كتير بس الحمد لله إن الإنقلاب حصل عشان أقوله انا اسف علي سوء ظني بيك
ممكن أبقي ضد الإخوان...بس عند الدم لازم أقف...عشان مبقاش حيوان

يا مراكبي said...

موضوع البوست مُلفت لأنه فعلاً أصبح ظاهرة غريبة جداً إن فيه عدد كبير من الناس المتحولين بهذا الشكل الرهيب كيفاً وعدداً

المُشكلة إن فيهم مُتعلمين ومُدونين ومُثقفين وحصل عندهم خلط غريب جداُ في المفاهيم!

يعني الإخوان بوظوا الدُنيا في سنة واحدة واستعدوا كل الأطراف لحد ما وصلونا للي إحنا فيه وسلمونا من تاني للعسكر بمبدأ أخف الضررين، ومع ذلك شايفين إنه لأ كنا نكمل معاهم أحسن، يعني نبقى شايفين إننا هنقع في بير غويط ونكمل عادي

الغريب بقى في الناس دي إن منهم ناس مستواها المادي عالي جداً ومش حاسين بأي أزمات للناس الغلابة، ومنهم ناس عايشين بره مصر في نعيم أوروبا وأمريكا، وتلاقيهم محموقين قوي

بيجاهدوا من بعيد وهما مش حاسين بالناس

P A S H A said...

كل سنة وحضرتك طيبة وبألف خير وصحة وسعادة ورضا وراحة بال وسلام وإن شاء الله يكون عام جديد سعيد عليكي وعلى أسرتك الكريمة وتحققين فيه كل ما تتمنين
:)

أطيب تحياتي