اختبار البالونه


طبعا كله مستغرب من اختفائى ورجوعى الحقيقه انا نزلت مصر فتره طبعا قابلت ناس وشوفتهم وناس عرفت انى جيت وكبرت وناس طنشت وناس حاولت والناس اللى كانت بتمثل الحب وانى وحشاهم فى النهايه اللى كان نفسى اشوفهم فعلا شوفتهم
كنت نازله قلقانه مصر مفيهاش تغيرات كتير دا مبدئيا كل مشكله الناس فى عدم السهر والسرمحه والحقيقه انا ملقتش مشكله كبيره معايا فى القصه دى لانى بقالى سنه متعوده انى انام بدرى واصحى لشغلى بدرى واخرى فى الويك اند الساعه اتناشر وانام
الملحوظ بلطجيه عباس العقاد زادت
نفشه الريش على بعض الناس اللى ملهومش اصل ولا فصل وعره حسوا بنفسهم وفكروا انهم حاجه
العسكرى الغلبان اللى حصل لامهم انكماش وحسه انهم موقفين عيال من ابتدائى ملوش اى ذنب باللى كانوا بيعملوه شويه الظباط المتخلفين الغير محترمين فى الناس يا ريت منطلعش دا فى دا
لانى انقهرت من البلطجه اللى بشوفها فى السواقه وخاصه من جرابيع الميكروباصات

النهايه امهات كام ظابط من اللى انا اعرفهم شخصيا يا حرام لسه عايشين الدور وشايفين ولادههم اللى بيشربوا مخدرات ومرتشين انهم مظلومين ومحترمين وربنا ها ينصرهم وفيه واحده معينه عاوزه اقولها يا شبعه بعد جوعه يا محدثه النعمه التصوير بتاع مكتب العدلى انتى مش شايفه المكتب بالفخامه دى وان الشباب عروكى دا بقى على اساس انك بنت سلطح باشا وعايشه فى القصر الرياسى يا خالتى اللى يشوف شقتك ولا اللى يشوف عربيتك ولا شقه اسكندريه ميقولش انك تجرؤى تقولى كدا على شباب ضفرهم برقبتك انتى واهلك كلهم وساعات بتعيشى الدور وتنسى انك كنتى ولا زلتى ولا شئ ولو ناسيه اصلك يا ريت تتقى ربنا شويه فى صحتك لانك ايامك فى الحياه معدوده والحقيقه مش فاهمه انتى ليه واخده الدنيا على طر مناخيرك جبتى الثقه فى نفسك دى منين صحيح خنفسه شافت ولادها على الحيط قالت دا عقد لولى
الاهم من كل دا تعليقى على المجلس العسكرى واللى بيعمله يا سياده المشير بطل شغل البالونات والفرقعه اللى بتعمله فى اهالينا كل شويه وترجعوا تتطلعوا بيان بخصوص اللى نشره الاعلام فيه ام قانون اسمه قانون الصحافه يعاقب اللى بينشر اخبار غلط لو انت صادق ليه مش بتطبقه
يا سياده المشير اللعبه القذره اللى بتحصل مش فى مصلحه البلد بطل شغل الهى الكلب بعضمه
يعنى فتنه طائفيه
بعدها اشاعات اقتصاد بعدها هروب مساجين من اقسام كأن الماسوف على شبابه العادلى كان بيجيب اقفال صينى للاقسام
وتيجى فى النص ترمى مهموز صغير وتقول سوزان اتنازلت وهنعفو
سوزان مش ميراث ابوها اللى سابوا لها دى فلوس الناس اللى سرقتها مش بكيفها تتنازل غصبا عليها
ومفيش عفو
ومش بمزاج مبارك يطلب نعاقبه ازاى علشان برضه يتنازل
محدش يملك حق العفو غير كل اهالى شهداء مصر من تلاتين سنه دا دم ياللى معندكوش دم
شويه الارجزوات اللى بتلعبوهم وترجعوا تقولوا احنا بنحترم القانون احب اقولك مبارك كان بيقول زيك كدا وكان فيه قضاه بيموتوا بالذبحه الصدريه علشان ضميرهم انت تقدر تخلى القانون بمزاجك بس اللى انت ناسيه ان الناس واللى لهم حق مش هيسكتوا
الكسب غير المشروع اللى واضح ان القانون بتاعه فيه خرم فى المله شكله بيقبض على كل راس
يا سياده المشير متولعوش البلد انتم عملتوا كويس من الاول كملوا بقى
واياك تنسى انت او عصام شرف او عيسى او اى شخص
ان فى كل مكان ما زال شرفاء ومحترمين وانت يا سياده المشير بيتك كله زجاج يعنى عندك ظباط فى ثانيه هتهد الدنيا متولعش مصر علشان صداقه شخصيه متولعش مصر علشان ولا حاجه
مبارك اتذل وهنفضل نذله لاخر نفس فى عمره لان اللى طلع برا مصر فعلا حس بالذل والاهان اللى كان مسببه لنا الكلب دا اكتر من اللى جواها
والله الموفق انتهى

وسمعنى زغروطه يا عدلات

15 اخبط وقول رايك:

Foxology said...

اولا حمد الله ع السلامة

ثانيا موضوع البلطجة فى السواقة وخصوصا من السادة سائقى الميكروباصات والأتوبيسات وكمان الملاكى حضرتك بقت شئ ملحوظ وزاد عن حده جداااا وهنفضل نقول علاقة الشرطة بالمواطن اللى كلها ارتكاريا وحساسية من صاعة الثورة وكسر شوكة الداخلية من اكبر لواء لحد اصغر عسكرى مجند ملوش فيها زى ما قولتى فى البوست ...

المجلس العسكرى الحقيقة الواحد احتار فى أمره ومش عارف هنفضل كدة لحد امتى

تحياتى

AhMeD RaDy said...

ونقول حمد الله على السلام دا اولا

ثانيا .. ايه .. بنقولى ايه .. يعنىايه ؟؟؟

بصراحة بقى كدا وعلى بلاطة ... الشعب انضحك عليه فى عملية متقنة اسمها الثقة الهبلة

بصى مع كل اللى الواحد شافه دا .. احب اقولك ..

النظام مستمر وبنجاح فائق

النظام مستمر ... ويالعيعيش الشعب المصرى ... مضحوكا منصوبا عليه

وربنا يسترها علينا بجد

وياريت بقى الناس تركز فى اكل عاشها عشان ربنا يوفقنا وتعدى

لورنس العرب said...

مصر أصبحت مثل طبق الكشري
الشامي محطوط على المغربي وكله على كله
وكله شايف نفسه مظلوم اوالآخر ظالم
اما بالسبه لمحاكمه مبارك- هو الآن امام القانون- وممن ياخد براءه
لكن القانون اللي اخرج زكريا عزمي هو اللي سجن العادلي
مش عارف وقتها الناس هايقولوا ايه

نأمل ان يصلح الله الامور في الشوارع قريبا- ولو اني لا اعتقد وأفتكر ان الامور هاتفضل سايبه سنتين او ثلاثه

بت خيخة وأي كلام said...

لولولولولولولولولولولولولي


الزغروطة اهي

اى خدمة يا معلمة


وحشتينى يا بتنجانتي

ومنورة مدونتك


سلام
اختك خيخة

فتاه من الصعيد said...

حمد الله ع السلامه .... ووتوصلي بالسلامه :)

الداخليه بتدلع الهي يولوعوا كل الحراميه اللي فيها ..

ومبارك وعيلته بتدلع .... والمجلس بيتدلع ..

وكله بيتدلع على قفا الشعب

Empress appy said...

فوكس
الله يسلمك يا رب
لا دول بقوا بجاحه ما بعدها بجاحه بس الحق يقال لما تديه على قفاه يتظبط انا كنت ها اكل واحد بسبب قله ادبه وقولت له على فكره انا مش هعمل فيك حاجه انا هخلى الناس اللى اتعطلوا ورانا دول ينزلوا يمرمطوا بيك الارض مشى زى الكلب

Empress appy said...

احمد راضى

الله يسلمك يا احمد
لا يا احمد النظام بيفرفر وبيشوف هى شوطه فى الشعب وهتخلص ولا لا والدليل ان المجلس رجع يكذب بس الحقيقه انا مش قابله الوضع دا

Empress appy said...

لورانس العرب

والله يا لورانس طبق الكشرى هيجيب لهم مغص ونشوف لهم محلول ساعتها بس الاحساس بالقوه هو اللى انا شيفاه طاغى على الكل ودا خطر فى حد ذاته لو مش استخدم صح

Empress appy said...

خوخه خوختى

حبيبه وصديقه عمرى واختى الفزيعه الشنيعه وحشانى يا عدلات اوى اوى

dr.lecter said...

الله يجببر بخاطرك ياابي ايوه كده

احنا لازم نصر علي مطالبنا ومنتهزش

الشنكوتي الكبير said...

وتيجي وتمشي كأنك مجتش

وسمعني سلام قلة الأصل يا كبير

ما علينا المهم انك روحتي بالسلامه وخلاص
موضوع بلالين الجيش ذاد قوي الفتره دي وحركة الأقسام اللي عماله تتكسر زي البيض الممشش كأنها اقسام كارتون يعني بقت تفقع المراره والبوليس على رأي واحد شفته على الفيس بوك بيقولك بيلعبوا بنظرية التناحه الكبرى علشان تعرفوا قيمتنا وقيمة البلطجه بتاعتنا ناس فعلا ملهاش كبير يربيهم


ربنا يستر على بلدنا
احنا في اخطر مرحله والمشكله اننا مضطرين نثق في ناس من العهد القديم ونقبل بحلولهم البطيئه والغير مفسره احيانا
ربنا يولي من يصلح


سلاااااااااااام
اخوكي ايهاب

Ms3a_miso said...

اولا .. حمدلله على السلامة ..
اول مرة افتح بلوجك ..كتابتك كويسة اوي .. وفضفاضة :D
متفق معاكي في اللي بتقوليه شبر شبر .. زنجة زنجة
احساسي بأننا شعب بينسى بسرعة حتى شكيت ان ممكن اصحى الصبح الاقي مبارك طالع من حمام قصره بالفوطةو البيجامة الحرير وبيقولنا وهو بيتمطع صباح الخير يا جماعة قال ايه انا حلمت انكو شلتوني ..
..وبالنسبة للبلطجة السواقية فا دي موجودة من الاول الصراحة جايز كان العسكر مقليلنها شوية لكن كل اناء ينضح بما فيه ...لما تسيبله السايب في السايب
اشاسا احنا عندنا في اليكسالشرطة مأموصة وقاعدين نطبطب عليها ونحايلها عشان تنزل .. تحسي كده انهم واخدين اوامر انهم ماينزلوش من رتبه عالية

Empress appy said...

ايهاب

طول عمرك شنكوتى اتوقع منك ايه يعنى معرفتش من الفيس بوك معرفتش من خيخه دى حتى دوبا خدت التليفون ومكلمتنيش انت غاوى اسيح لك عموما هى اجازه كانت قصيره اسبوع بس او تحديدا تسع ايام ومنهم ايام طبعا مع بابا وماما معلش متعوضه

Empress appy said...

Ms3a_miso


الله يسلمك عموما انا حسه ان الشوربه خدت اجازه على حس الثوره ودا مش كويس اقولك شغل لهم اغنيه اطبطب وادلع يمكن يرجعوا نورت المدونه المتواضعه وميرسى لرأيك يا فندم

الشنكوتي الكبير said...

يا بنتي الفيس بوك ده اختراع غتيت على قلبي
وانا بتابع اخبار المدونين من مدوناتهم مش من الفيس بوك لأن انا اصلا فاشل فيه وبتوه انا رايح فين وجاي منين عموما يبقالنا عندك عزومه المره الجايه
سلاااااااااااااام بقى