حوارات اطفال بيربونا معاهم

ايمووووو حبيب قلبى وهو عامل شنديد

صباح الخير

الحوار ده دار بينى وبين ايمووو (ابراهيم ) ابن اختى يوم الخميس وبجد اكتشفت حاجات فزيعه شنيعه مريعه ومرعبه فى نفس الوقت ايموو حبيبى عندة سنتين وتلات شهورى:-

آبى :- (أول ما شوفته ) تعالى هاتى حضن وسكر مقالب لآبى

ايموو:- رمى نفسه فى حضني وأدانى بوسه كبيرة ...وسكت شويه .... تعالى نروح بقى

آبى :- فين يا ايمو عاوز نروح فين ...طبعا مسبقا انا عارفه لما ايمو يحب يخرج معايا فى العربيه ميقوليش يقولى تعالى نجيب طعميه وفول هههههههه لان فى واحد بعيد قوى فبنروح بالعربية وهو لما بينام معانا عند ماما بنروح الصبح بالعربيه نجيب منه السندوتشات فلما يحب نخرج في اى وقت علشان مش أتحجج وأقوله تعبانه او بطوط نايمه يقولى على الفول والطعميه (عارف ان خالتو طفسه ههههههههههه) لانه جرب العادي وانا قوله خلاص بطوط نامت علشان انا بكون تعبانه.

ايمو:- وأنا عاوزة (طبعا هيبتدى لائحة الطلبات وانا مقدرش اقول لا) اثنين خروفين واتنين ارنوب واتنين عاااااااابيه (عربيه) واتنين كوله (كوره)

آبى :- افتكرت انه عنده حاجات فى البيت قولت له ايمو هو مش انت عندك عربيه فى البيت وعندك ارنوب خالو جابه لك وعندك كوره وخروف صغير

ايموو:- بصه خبيثه وقالى لا واحد كوله بثثثثثثثث (بس يعنى لأنه الدغ فى السين) وضغونونه وانا عاوزة واحد كوله العب عند تيته مع إبه (نسمه اختى هو نادر لما يقول خالتو حتى بيقولها هاتووو وكانت اول حاجه قالها ليه قبل آبى )

آبى :- قولت له اوك يبقى هنجيب واحد كورة بس يا ايمو مش اتنين وأخدته ونزلنا واحنا ماشيين بسم الله ما شاء الله عليه بقى بيشاور ليه على مكان الراجل اللى مامته لسه شاريه منه الكوره الصغيرة من عند جنينه كده للاطفال بيلعبوا فيها وهى بتوديه وجابت له الكورة وانا دماغى مقفله واقوله هنروح من بعيد علشان ندور وانا طبعا بدور على حد بيبيع وكل ما نقرب من المكان يقولى هنا بقى هنا

فى النهايه بصيت قولت له فين الراجل مش لاقيه قام مطلع صوباعه اللى زى الدوده الصغيرة كده وقال اهو عمو اهو...قولت له تعالى بقى اختار وشلته على رجلي في العربية وطلعته من الشباك يشاور على اللون اللى عاوزة

وجبت الكورة ادتها له وقولت شكرا للراجل .وانا بقعده على الكرسي تانى جنبي وأديته الكوره

ايمو::- بصه حلوة كده ليه وقالي ثكلا يا هاتوو (شكرا يا خالتو )

طبعا لانى قولت للراجل شكرا فهو فهم لما حد يديله حاجه يقول شكرا وأنا دايما لو هو ادانى حاجه فى ايدى أقوله شكرا علشان يتعود على كده وحتى ماماته وفى البيت كلهم كده

آبى:- هنجيب ايه تانى يا ايموو ( وانا فى سرى بقول يا رب استر بقى هههههههههههههه لا طبعا بهزر انا ما بصدق اجيب له اللى هو عاوزة بس بحساب علشان مش يتعود على اى طلب وخلاص)

ايموو :- عاوزة ثاقعه (آيس كريم) ودرة لتيته وإبه وكوكى(ماماته) وديدو (جدو ) ومنديد (مجدى خطيب اختى ) وثيبسى لاااا علشان كوكى قول لا لا يمو (ماماته مش عاوزة تأكله ثيبسى ونكيب (نجيب ) الديدااااااااا (البيبرونه )

آبى : - مش كوكى قالت خلاص ايموو كبر ومفيش ديداا تانى ونشرب اللبن فى الكوبايه بتاعت ايمووو وبس

أيموو:- ايه ايه ايه (طبعا كانه مش سمع او بيستعبط مش فاهم فانا كررت الكلمه وسكت وهو استسلم للأمر الواقع ودى محاولهمن محاولاته الفشله اننا نرجع له البيبرونه تانى يشرب فيها هههههههههههههه

المهم روحنا وادالهم الدرة وهو أكل واحده درة بس وجه قالى

ايموو:- ( وهشه كالث مث عاوزة اميها كلاص ) وحشه خالص ومش عاوز وخلوا بالكوا مش تفها من بقه الا لما قالى وانا قولت له تفها

آبى :- طيب كل الايس كريم وخلاص والعب بالكورة

ايموو: - اعملى تنديد التاتيرى

آبى :- طبعا وشى قلب وبقيت شبه العبيط وفتحت بقى وبقى شبه نفق الأزهر ورفعت حواجبينى زى شنبات الصرصار وقولت بسم الله الرحمن الرحيم الواد ماله قلب هيروغوليفى كده يمكن الايس كريم فيه حاجه وبسرعه ندهت لكوكى قولت لها الحقى ابنك فيه ايه وسألته

المهم ردت قالت ليه بيقولى اعمليه زى شنديد الدرديرى (شخصيه فى مسلسل بيجى على بانوراما دراما مش فاكرة اسمه كان عمرو واكد بيعملها ) وطبعا عاوز اربط له الطرحه على دماغه زيه لانه كان جايب ليه طرحه بيضه طبعا سخست من الضحك وندهت له تانى وسالته انت شوفتها فين

ايمو:- باتورابتن ثب ؤاتثيب اآآآلامه فى بيتك ....

آبى :- يا دى الليله الواد اتكعبل فى لسانه تانى ترجمى يا بنتى قالتليى بانوراما دراما هتسيب علامه فى بيتك ههههههههههه قعدت اضحك طبعا هنا اكتشفت انا ايمو متابع جيد جدا مع جدته للمسلسلات وحفظها ويجى يقولى ابحك واهوطك فى الششششششششششششوال

ودى من مسلسل تانى برضه اسمه الدم والنار شاف راجل ادبح واتحط فى الِشِِوال

وطبعا نبهت على ماماته تخلى بالها من اللى بيشوفه قالت ليه ده بيحب الشعراوى بيغنى الاغنيه بتاعته قولت لها كويس بس بلاش المسلسلات الرخمه يعنى لانه بيتأثر بها

ايمو::- انا موتى ابو نفيثه وضربتيها بالثبث وكانت كتييييييييييير وبتأجرى تحت (وبيضم صوابعه على بعضها زى السكر كده رمز انها كتير قوى ويحركها) ووقعدت ابوس فيها وهو بيعمل كده

آبى :- اوبااااااا طيب ام نفيسه وانا اتعلمتها من المرة اللى فاتت انت قاعد تكتشف العيله ابو نفيثه ده مين طبعا جت المترجم وقالت ليه انه بيقول على الصورصارات ابو نفيثه

ام نفيثه اللى هى الخنفسه مرة شوفانها وقالى ايه دى قولت له خنفسه من ساعتها وهو بيقولها ام نفيثه ولما شاف الصورصارات وسال وقالو له صورصار قال لا دى ابو نفيثه هههههههههههه

ايمو :- سؤال بخباثه على الموبيل مين ده (يقصد صورة اسلام )

آبى :- بصيته له وقولت له مين قول انت ايمو عارف مين ده صح سكت شويه وبص ليه

ايمو:- اثلااااااااااام اكلمه ههههههههه

قولت له صح انا مردتش اقوله معرفش مع انى عارفه انه عارف لان لو قولت له مش عارفه هيبقى بعلمه الكدب وانا عارفه انه بيدلع وعاوزنى اقوله وحركة لئم منه وخلاص فعكست له السؤال لان خطر انك تردى على طفل بانك متعرفيش وهو متأكد انك عارف

ولما اسلام اتصل ايمو مرضيش يكلمه ههههههههههههههه

ليه بقى الحوار كله ركزوا فيه هتكتشفوا انكم انتم اللى من السهل تعلموا اولادكم براحه من وهما صغيرين يسمعوا الكلام وميكونوش عنديين طبعا ايموو ساعات بيكون عنيد بس بالتفاهم معاه من غير ضرب بيرجع فى كلامه

الطفل بيلقط كل حاجه وهو صغير يعنى لما طفل يتأثر بالمسلسل والشخصيات يبقى لازم نخلى بالنا كويس قوى هو بيشوف ايه وبيركز فى ايه ومفيد ولا لا

احنا اللى نقدر نعود اطفالنا على القناعة والرضا بالشئ

احنا اللى نقدر ننمى فيه موهبه حتى لو صغيرة زى حبه للكوره او الرسم اى شئ

احنا اللى نقدر نمنعه عن الغلط وانه يطلع مؤدب ومن غير ما يشتم لان بصراحه بشوف بعض الناس بتتبسط قوى لما اولادها بيشتموا ويقوله تف على ده واشتم ده ويقولك لما يكبر هيبطل لاااااااااا استحاله لانه فيه من صغرة

ايمو وانا بوصلهم للبيت شاف واحده جارتهم فى الشارع قالت له تعالى يا ايمو اقعد معايا ومش استأذنت من كوكى ندهت عليه وقولت له تعالى رجع تانى ليه العربيه قولت له هات بوسه باسنى قولت له اطلع مع كوكى علشان هى قاعده من غير بابا العب معاها فوق فبص ليه وبص للست اللى ندهت عليه وكان عاوز يفضل معاها وقالى هاتر (حاضر ) وقولت انا للست معلش الوقت اتاخر ومينفعش فلازم يطلع يغير

واعتذرت لها وهو طلع ورا مامته

يعنى احنا اللى بنعوده بالادب على سمعان الكلام لان بشوف اطفال فزيعه بجد ولا كأن الام بتنادى عليهم ولا كأنها بتقول لا وبصراحه ده من البدايه ومن التربيه وبتغاظ لما اسمع ست تقول اصلى مش بقدر عليهم بيبقى نفسى اديها بالبوكس فى وشها لان هى السبب بصراحه

فى النهايه سلوكيات الاطفال كتير وخلوا بالكوا من التليفزيون وخلوا بالكم من الاطفال قوى علشان منندمش

كان معكم من حديقه الطفل اللى بيربينا معاه قبل ما بنربيه استاذ لواء عسكرى اصلح بوابير جاز هاتوو آبى هانم