يومين والميه مقطوعه فى القاهره الجديده
مش فاهمه باى منطق مكان جديد وكل معداته جديده وكل حاجه فيه مستواها حلو تتقطع فيها الميه
محافظ حلوان من ساعه ما مسك والدنيا متنيله
علشان البوست القديم اللى كتبته عنه انه بيتنك وبكره نشوف بشايره هلت علينا
ميه تقطع مشاكل فى موضوع الخنازير من قبل كده
بلطجه وزفت يعنى هيبوظ المحافظه
مع انه المفروض التجمع كله والمعادى هى التورتايه بتاعت المكان هو ليه مش بيحافظ عليهم
بس شهاده لله يعنى الجهاز فى التجمع مش مقصر اى والله
فيه عربيتين زى بتوع الرش ماشيين فى كل مكان بيملوا للناس ميه

حظ اختكم بقى اللى هى سيادتى ان الحنفيه بتاعت الجنينه الخاصه بالعماره بتاعتنا
اصل كل عماره لها حنفيه للجنينه بتاعتها حظى اننا العماره الوحيده فى الشباب والمستقبل كله
ويمكن التجمع كله اللى حنفيتها فيها ميه ضعيفه بس ماشيه
انا عاوزه اعرف باقى الناس بتعمل ايه بجد اللى عندهم اطفال الرحاب كمان مفيهاش ميه
هو المحافظ ده بيعمل ايه
وماسورة ايه اللى بينيلوها على ينهم بقالهم يومين
طبعا الكومبوند بيدخله ميه على طول فى عربيات ده انا شوفته بصراحه
بس ده مش اسلوب كويس احنا مش منظقه عشوائيه ولا قرى فى محافظات
انا برضه عاوزه اعرف المحافظ ده وشه وحش علينا ليه
يالا ما علينا انا قررت انزل اقعد فى الجنينه واستغل الناس الجركن بربع جنيه اه الناس عندنا شيك بتشيل جراكن جديده وزجاج ميه مش اطباق وحركات كده اى والله ويتنكوا وهما شايلين الميه شكلهم مسخره نازلين من العربيات كل واحد بجركنه فى ايده

ادعوا لنا الميه تيجى ويخرب بيت المحافظ الفقر اللى وشه زى قفاه ده والنبى


كان معكم ابى هانم بتنجانى من امام حنفيه الميه
جنينه عمارتهم


حكمه الامبراطورة

لما يزعق غراب فى جنينه متستنوش منه انه يعمرها

الحياة بدون كاتشاب
مجموعة قصصية جديدة للكاتب
أحمد ثروت القاضى
تصدر قريبا عن دار دوِّن للنشر والتوزيع

تقديم

ينتابنا الشعور بالافتقاد منذ بداياتنا الأولى .. نحيا الإحساس الدائم بالابتعاد عن كل ما تعلقنا به بداية من صدور أمهاتنا .. وانتهاءاً بالدنيا ذاتها! نترك كل حين شيئاً ما خلف ظهورنا وتدفعنا الدنيا ربما في اتجاه بعيد رغبناه أم لم نرغبه، لكننا نندفع تاركين جزءاً من نفوسنا فيما عرفناه وعبرناه .. ذلك الجزء هو الذي يعيدنا كل حين لذكرى بعيدة ويحييها كأنها حدثت بالأمس .. فنبتسم أو نتعمد الابتسام لنخفي شعوراً بالوحشة



لعل افتقادنا للناس والأشياء نتاج تعلقنا بها أو تعودنا عليها حتى لو كانت مجرد أحلام ألفنا وجودها بين أجفاننا .. لكننا نمتلىء افتقاداً .. وكلما أوغلنا في الحياة يزداد تعلقنا ومن ثم افتقادنا لكل ما ترك علامة حُلوة في الروح .. ربما حب قديم .. أو ذكرى ضاحكة .. أو شارع ملأناه حياة .. ما أشبهنا بصندوق يحوي بقايا ذكريات!

لكنا رغم كل شىء نحيا مبحرين حاملين في أعماقنا اغترابنا .. نستلذه أحياناً ونستعذب آلامه .. ونهمله أحياناً أخرى مدّعين عدم إحساسنا به وانقضائه .. لكنه دوماً هناك .. ليس كزجاجة كاتشب ترقد على موائدنا بلا معنى متصورين انه يمكننا دائما استبداله بصورة أو بأخرى وربما الاستغناء عنه نهائيا .. لكنه جبل ثلج لا يظهر منه غير قمة خادعة

دي مقدمه عن الكتاب بتاع المهندس احمد القاضى صاحبه مدونه يا مراكبى
التوقيع يوم الخميس فى مكتبه حنين فى وسط البلد التفاصيل هتلاقوها فى الجروب لو ضغطوا على الصوره اللى فى الجنب على الصوره مش البنت
وبالمناسبه اللى هيشتري الكتاب اتفقنا نوريه صوره البنت كامله نيهاهاها
يا ريت كل اللى يقدر يجي يكون موجود عاوزين نكون كتير وفرصه نشوف ناس مشوفنهاش قبل كده واللى مشوفنهامش بقالنا كتير
لما اعرف تفاصيل اكتر هقول لكم العنوان شارع الديوان من شارع القصر العينى.
انا هكون موجوده ان شاء الله
يالا اقعدوا بالعواف عليكم

كان معكم مذيع اول نشره اخبار لواء اركان حرب قرب على التقاعد ابى هانم

حكمه الامبراطوره

الحياه مش تعليم فى كتاب ولا دراسه الحياه مواقف من حياتنا بنتعلم منها ونطورها

من قديم الازل وتتمتع الشعوب العربيه بلا استثناء بالفهلوه وتفتيح المخ او الجيب او الابار كل على حسب امكانيته
فالعربى الخليجى اذا اراد منك شيئا فتح جيبه التى من المؤكد وصلت لها السيوله من الابار التى يمتلكونها ويفتح جيوبه ومحفظته بصرف النظر عن شرعيه طلبه او احقيته فيه فهذا يدفع هنا لينال الراحه وهذا هنا لينال الابتسامه وهذا هنا لينال شئ حرام عليه

اما المصرى اذا اراد شئ فيقوم بتفتيح مخه وياويلك يا سود ليلك لو المصرى فتح مخه حاجه من الاتنين يا يعمل حاجه صح جدا جدا ويكون عبقرى وحاجه تكون نافعه جدا ليه وللناس كلها يا يعمل مصيبه من الممكن انها لا تضره ولكنها بالتاكيد هتضر غيره وهنا فى نقطه وصل بين الاتنين

يعنى العربى عاوز اى شئ وبأى تمن وبالتالى فتح جيوبه حتى لو شئ هايف مع انه ممكن يحصل عليه بدون مقابل لو كان حقا ليه او فى حدود المشروع ولكنه عاوزة بسهوله وفهلوه ايضا

والمصرى يفتح مخه او السورى او اى جنسيه تانيه ليحقق لك املك وفى هذه الحاله يظن كل منها انه الفهلوى وانه بيشتغل الاخر ولكن للاسف الاتنين بيشتغلوا بعض والاتنين بيقللوا من قيمه بعض اذا كان باقى ليهم قيمه امام دول العالم الكبرى وتتعدد الفهلوه والتسارع فى الظهور بين العرب من قديم الازل

فلو ركزنا منذ زمن بعيد على الجرائد وطلبات المساعده فيها لشخص مريض او يحتاج الى عمليه خطيره جدا اجد ان حل من الاتنين يا الحكومه تتبرع بعلاجه وده طبعا دلوقتى بقى زى الخل الوفى يعنى من رابع المستحيلات

ولو حنت عليك وعملت كده هتشوف الويل وسواد الليل يا مسكين ليل ونهار وهتدوخ دوخه الارمله المطلقه فى حصولها على المعاش ما بين التأمين الصحى اللكومسيون لمستشفى الكلب

او الحل الاخر تبرع من الاخوه العرب لمعالجه هذا المريض وهذا بعضهم وليس كلهم يا علشان يبتغى وجهه الله سبحانه وتعالى فعلا يا علشان يتفشخر ويتباهى باللى عمله قدام الناس ويتذكر اسم فلان ابن علان قريب ترتان قدام الجميع

وبكده يبقى اصبح حتى المرض للمتاجرة الجديد بقى جدا ان دايما كنا نقول الناس الكبيره الاغنياء هما نصابين وبيسرقوا فلوس الشعب اكتشفت ان المقوله دى غلط جدا

فيا ساده ويا حضرات اصبح الكل ينصب على كله العربى على العربى وانا هنا اقصد كل الدول العربيه ليس دول بعينها والفقير على الفقير فمن كام يوم حكت ليه صديقه عن صديقه لها تعمل فى نفس مكان الشغل انها وهى جايه راكبه تاكسى فالسواق تقريبا توسم فيها الهبل والهطل والطمع ايون الطمع لانها بتشتغل فى مكان كويس جدا فاشتغالها بمعنى اوهم الهانم انه ممكن يشغلها فى شركه بيبسى كولا بمقابل 1000 جنيه مصرى يا بلاش والله انا اعرف ان اللى عاوز شغل اى الشركه هى اللى بتبحث عن موظفين مش بنديهم فلوس علشان نشتغل ما علينا وادلها نمرة تليفون ست وقالها انها بتشتغل فى الشركه وممكن تساعدها وبالفعل اتصلت بيها وردت عليها الست وقالت لها اول شهر سبعه تيجى تمضى العقد بناء على ايه مش عارفه وعلشان ايه مش عارفه قولت يمكن دلوقتى بيعينوا بالصوت وطبعا بسمع وانا منهدش الاندهاشه الكبرى لا والبنت علشان تعمل ناصحه وميضحكش عليها قالت له مش معايا غير 500 جنيه بس وبالفعل ادتهم له انا طبعا كنت هتجنن اقولها طيب بناء على ايه تقول ما هى كلمت الست طيب تديله كل ده ليه تقول شركه بيبسى بقى الغريبه ان رقم سواق التاكسى بعد كده مبيردش اللوحه بتاعته اللى متعلقه على التاكسى مش موجوده يعنى مزوره لانها الحاجه الوحيده اللى عملتها صح انها اخدت رقمه وبرضه طلع غلط الست طبعا مبتردش

وطبعا الاتنين دول ينطبق عليهم مثل طمعنجى بناء له بيت فلسنجى سكن له فيه يعنى دلوقتى الفقير بقى بينصب على الفقير وده بيقلب من هنا ومن هنا وده حال كل الشعوب كله بينصب على كله

كام واحد عربى قال لكام واحد هجيب لك فيزا واسفرك ونصب عليه الفيز اللى فى الدول العربيه رسومها قليله جدا وفيه بعض الشركات بتاخدها كتير شوفوا بيدفع فيها كام علشان الواحد الشحط من دول يسافر يعنى فى النهايه رساله لكل الدول العربيه والاخوه فى العروبه على راى عبد الناصر الله يرحمه لا تعايرنى ولا اعايرك دا الهم طايلنى وطايلك

اتمنى يوم يجى نعرف كلنا مفيش فرق بينا والحياه مش مستاهله الصراع ده وان كل واحد مننا يمسك غلطه لاخوه العربى من اى دوله تانيه لان كل واحد عنده بلاويه ولو فضلنا كده الدول الكبيره هتفضل تاكل فينا وتفككنا فعلا ليه ميكونش عندنا فعلا امم عربيه متحده احنا دلوقتى اللى عندنا امم عربيه منتحرة ومع السلام عليكوا بقى بطلوا رغى


كان معكم رئيس جامعه الدول العربيه لواء اركان حرب دفاع جوى ابى هانم


حكمه الامبراطورة

اللسان الطويــــل .. دلالة على اليد القصيرة والعقل المرفوع من الخدمة .