كلمة الزن عادة ما تصاحب الى اذهاننا الطفل لانه المشهور فى الشهور الاولى وحتى الى السنوات الاولى من عمرة بالزن وهى طريقه نصب عالميه من بعض الاطفال فى الوصول الى هدفهم وما يريدونه

وتكبير للجى والدى عند الاباء والامهاء وفى بعض حالات الاستسلام للزن والصوت العالى والدموع التى تفوق دموع التماسيح يوافقون على الطلب سواء كان برضاهم ورغبتهم ام للتخلص من هذا الصوت المزعج الذى يسبب ارتباك وانشطار فى الاذن الوسطى وشلل التماسيح الرباعى فى الاطراف

وهناك من يقاومون ويقفون كوقفه الاسد امام الفأر فى هذه الحالات ويقررون فى وقت قصير وياخذون قرار حاسم بتعلق هذا الطفل الزنان على المسمار حفظنا الله منه وهى طريقه متبعه مع بعض الاطفال او الدبايح او الملابس الغير مرغوب فيها وايضا طريقه مفضله لدى وهى تعليق الشخص من قفاه على الحائط ويكون عبره لكل العالم

وهذه هى قوه شخصيه الاهل ووقوفهم فى وجهه هذه الاصوات الفزيعه ولكن مع كثرة الضغوط تجد ان الاهل المقاومين اندثروا مثل الديناصورات اصبحوا كائنات خرافيه

هناك بعض الاشخاص ايضا الذى يهدفون الى الوصول لموضوع معين فيستخدمون مثل الزن على الودان امر من السحر ويااااا الله لو هذا الشخص او الشخصه يحبون اخر ويبدأون بالزن فى اشياء معينه مستخدمين هذا المثل شعار ودافع لحبهم

وهم لا يعلمون ان الزن على الودان اتغير من امر من السحر للقود الى القتل والزهق والملل

فيا من تزنون ابتغاء الوصول لهدفكم فاود ان انصحكم ان هناك طريقين لا ثالث نتيجه الزن

الاول

الانصياع لكلامكم والعمل به على مضض يعنىمن تحت الضرس يعنى واللى قدامك قرفان كما من وقع فى بلاعه مجارى طافحه فى الوراق او بولاق الدكرور

او المقاومه والاستبسال من اجل ان لا يستسلم وهنا ستجدون مدفع مترليوس مندفع تحت اى بند فى وجهكم

فى النهايه الزن بيولد الزهق ولو ولد الاستسلام فبيكون استسلام معوق فى اطرافه اى مصاب بشلل وصم وعمى حيثيى

والحل اما ان تترك من تزن عليه ليرجع لعقله اذا قرر عمل الشئ بيكون شئ نابع من داخله وسوف تستمتعون به او يجر اذيال الخيبه ويجر ما تبقى له من اعصاب ويذهب بعيد وفى هذه الحاله هيكون الحال افضل

الزن التالت

وهو البطاقه الانتخابيه كله بيزن علشان يبقى عندنا بطاقه انتخابيه علشان تقول لا علشان تقول اه لحاجه انت عاوزها

انا موافقه وانا من الناس اللى عندها الحمد لله

ليه بقى مش بنستخدم الزن بتاعنا اللى بنمارسه فى حياتنا العاديه على الحكومه بمعنى استخدم حق الزن بتاعك مع الحكومة وبلاش مع الاشخاص واعمل بطاقه انتخابية

حتى لو انت عارف انهم مزورين لعلى يستجيب لنا الله ويرزقهم برعد وبرق وصواعق من العيار التقيل تقضى عليهم

ودى دعوة واحده ودانها عليها زن لما بقت قد ودان الفيل بس لن استسلم الموت البتنجان ويسقط يسقط الاستقلال

يالا اقعدوا بالعافيه

كان معكم مدير اول مراجيح ملاهى دريم بارك ابى هانم

حكمة الامبراطورة

ومن الحب ما قتل ومن الجهل من تسبب فى خلل

صباح الخير اولا انا عندى كام سؤال يعنى كده محشورين فى صوباع رجلى الصغنن ومش عارفه البس الشربا بجد

يعنى فيه حاجات بتحصل لما بقعد اهزها شمال ويمين مبتوقعش غير براغيت وصراصير واقعد اجرى وراها بالشبشب علشان تجاوبنى عن غرضها بتتخرس ومبلاقيش نتيجه

اللى عنده اجابه بدون حنجوريه فارغه يا ريت يقولى اللى فكر فى الاسئله دى يقولى اللى عارف للحاجات دى فايده يقولى بجد لانى فعلا مش عارفه وفيه فرق ما بين مش عارفه ومش شايفه

دى كلمه ودى كلمه

المهم بقى السؤال الاول

ان ان تششششششششش

يعنى ايه محاكمه شعبية دى زى النزله الشعبية كده يعنى ؟

انا بسمع عنها بس ايه الفايدة العايده منها علينا يعنى الناس اللى بتدعوا ليها واللى بيعملوها ايه الفايده يعنى محاكمه عن تصدير الغاز الىل مش هنخلص منه بقالنا سنين وبنخبط دماغنا فى الحيطه

محاكمه عن احداث الجزاير وفى النهايه قاعدين نولول اهو

محاكمه لاحمد عز والراجل كل يوم ولا ماثر فيه شعره بيطول وسايح ونايح ولا السمنه البلدى

حاجه تانيه

سمعت ان فيه بنت اعتقلت من صلاه العيد انا طبعا ضد العبط ده بس داخل واحد يقول علشان اخوها لابس كوفيه بتاعت فلسطين وهنا يصدر صوت مدوى منى جدا يهز ارجاء المأروصه امال اللى رابطينها على كتافهم ليل نهار محدش بيكلمهم ليه الواد نضال اه هبلغ عنه ما هو اهو لابسها والناس اللى رابطاها فى عربيتها كمان طبعا السبب ولا له معنى اكيد فيه حاجه

السؤال بقى وقفه احتجاجيه والامن ضربهم على صوابعينهم جريوا طيب لزمتها ايه الوقفه ولا القاعده

البيان الىل هجيب لكم جزء منهم بجد رعبنى يا مامى

خصوص واقعة الخطف الاجراميه لبنت من بنات مصر بنت الزقازيق الطالبه بكلية العلوم على يد مخبر امن الدوله محمد عبدالله و عناصر معاونة من الشرطه من مصلى العيد بالزقازيق

يؤكد اتحاد شباب مصر ان هذه العمليه الاجراميه بخطف بنت مصريه على يد اى عنصر كان لن تمر مرور الكرام

كما يؤكد ان ما حدث لم يكن عملية ضبط قانونى ونحمل المدعو محمد عبدالله ورؤساءه فى جهاز مباحث امن الدوله المسئوليه كاملة عما حدث كما نحملهم المسئوليه عن الغضبه الشعبيه من جماهير الشعب المصرى العزيز

كما يطالب اتخاد شباب مصر جماهير شعبنا العزيز بالمشاركه فى الةقفه الاحتجاجيه المقرره يوم الاثنين الموافق 30 من نوفمبر بعد صلاة الظهر مباشرة امام المحامى العام بالزقازيق ( المحكمه ) بشارع الزراعه

يعنى البهوات اللى بيقولوا مش هيمر مرور الكرام عملوا ايه راحوا وقفوا زى دكر البط والامن جراهم البيه اللى نافخ نفسه وكتب البيان ده هيحط السيخ المحمى فى صرصور ودنه

طيب بجد ليه بنتريق على الحكومه لما بتقول انا بدين واشجب وانتحر ما هما كمان بيقولوا كده وفى النهايه بيج طزززززز فى كله

انا مش فاهمه ايه الفايده من الحاجات دى يعنى اولى البنت يقوم لها محامى ولا يشفوا السبب ونبطل بقى نقول الشعارات الجوفاء دى وكام واحد صايع يروح مش وراه شغله ولا مشغله علشان يتلطش شالوت ويروح يعيط ويقولك اختطفونى ورامونى فى الصحراء مع الكليبه يا مامى

انا طبعا مش هقلل من مجهود ناس كتير بتشتغل بس العيال اللى طالعه تصدعنا دى وتقلب لها قرشين تتلم بقى علشان كده ضيعوا بنات فى رجليهم

السؤال التالت

رئيس هيئه السكك الحديد متشلش ليه كل يوم قطار طالع نازل واكل شارب

واحنا بندين ونشجب ونعيط برضه العيب فى الهيئه كلها قضبان مش كويسه وقطارات زباله وناس معندهاش وعى لاى استخدام فى اى حته

ده مش بيتشال ليه

السؤال الرابع

هقولكم عليه لما يجيلى التعليقات

كان معكم آبى هانم كايده العزال

حكمة الامبراطورة

اتلم الشبشب على الصرصار والاتنين بقوا من الابطال

الحزن الوتنى

لسه بيقول كلام محدش فاهمه بس متخيله شكل الناس وانا واحده منهم قاعده ومبرأه عنيها وفاتحه بقى وحطه طبق بوب كورن قدامى وباكل فيه كأنى بتفرج على فيلم رعب رخم ومش فاهمه منه حاجه برضه رغم التركيز

ايمن نور ورجب حميده

لما يختلف الحراميه يبان المسروقات اتنين شراشيح ملهومش لازمه

الاخوان

حسه ان واحد مسك عصايا وقعد يضرب فى العيال فى الشارع بعد ما جمعهم فى مكان واحد كلهم وبعد ما عدمهم العافيه العيال بدأت تجرى زى الفيران فى كل مكان وتتخبط

وعلشان يوقفوا الضرب اللى هما مش قده من الاول بدأوا يتفقوا مع الراجل يضرب حبه ويسيب حبه

ويا حسرتاه على الفيران اللى بتجرى

حزب الوفد

مش عارفه سمعت اسمه فين

الناصرى

هو الحزب ده بيعمل ايه

لقطات تانيه

شوبير

ست شرشوحه شبعه من بعد جوعه

مرتضى

ست بلطجيه مدوره موقف وجنبه مزج لكذا حد

ماتش مصر والجزائر

ملعون ابو الوحده العربيه دا احنا شويه مجانين

وبكده انا ابقى مسكت نفسى شويه عن الشتيمه علشان البوست ده كان هيبقلاى كله شتيمه

كان معكم لواء اركان حرب مصر المأسوفه على شبابها ابى هانم

حكمة الامبراطورة

ما لم تحبه يوما لن تحبه ولا بعد مائه عام

دائما وابدا ابطال مصر من اجل الحراسه يعملون ليل نهار فى مواجهه اى عدوان آثم غاشم ناقم على مصرنا الحبيبه
ولا ننكر طبعا دور ظباط الداخليه الفزاع ورجال قمل الدوله الهمام فى كشف اى مصيبه سوده وطبعا الجرايد بتاعتنا اجدع جرايد تكتب اى انفراد واى كلام

بس العجيبه انى بحب المصرى اليوم والمره دى الحقيقه مش عارفه هى وسعت منهم ولا هى اصلا واسعه عليهم ومبهوئه ومكنتش انا واخده بالى الخبر اهو انطح برجلك مش براسك هنا

القصه وما فيها تفجيرات الحسين اللى قعدوا يعملوا فيها خرومبو وشمال يمين وقولنا هتطلع فى الاخر مختل عقليا حسب تقفيل الداخليه او عز الدخيله ايها اقرب وبعد فحص ومحص وتفعيص الداخليه والرجاله الجامدين اخر حاجه اللى ميعرفوش حاجه مش كلهم طبعا او ميقدروش يفرقوا بين الماوس بتاع الكمبيوتر والماوس اللى هو الفأر العادى قبضوا على التنظيم الشنيع وانا معاهم قلبا وقالبا ومش معترضه بس يا حضرات اللى هتقروه ده خزعبلات ده كده بقى جلا جلا دا الموضوع اتحول من مختل لمختلين قالوا التنظيم فيه اجانب قولت ماشى مستبعدهاش قالوا فيه مصرين قولت والله كويس
ولازم الموضوع يختم بفلسطين وقالوا انهم فلسطنين كمان معاهم وان كل العناصر دى ادربت فى غزة كده كنت هزعل لو مقالوش الكلمتين دول كنت هقول هى مالها الداخليه يعنى عقلت فجأه كده ولا حرارتها مرتفعه طبعا وعلشان الملف والورق الفولوسكاب يتكتب بضمير ويتعمل الف ورقه وظابط اهبل بيحب على روحه على النت ليل ونهار ياخد مكافأه يقولوا مسكوا دبابات ومن هنا ينطلق منى لفظ اعتراضى فزيع مقدرش اقوله هنا علشان الرقابه وهكتفى بتيييييييييييت اهليكم يعنى ده اولا مش عارفه هيخبوا فين الدبابات ولا يمكن جايبنها ماركة استرتش بتتنى وتتفرد
لا ولازم اسم سيناء يجى فى النص والامن يلعب لعبه الوسخه مع المرضى النفسين بما انه مبيقدرش على البدو اللى هما بيحموا مصر اصلا من الجهه دى ويقولوا ساعدوهم وطبعا كلامهم كدب ولنفترض اعلى ما خيلهم يركبوه واذا كانوا ناسين ظابط قمل الدوله اللى اتقتل ومكتمين عليه ولغايه النهارده مش عارفين يجبوا مين قتله يسالوا نفسهم ليه اتقتل وبرضه يقولوها تلات مرات قدام المرايا البدو مفيش حاجه عندهم اسمها هتك عرض ويسكتوا على حد ده قدامه القتل ربنا يرحم جميع الموتى

والحاجه الجامده اوى ومش فاهمه ايه جاب القلعه جنب البحر وكشك السجاير فى المطبخ بتاعى لو افترضت ان هما ناس جامدين اوى خالص اوى وبيتكلموا صح يقولوا ابه بقى يا ولاد ان الناس دى كانت هتفجر خط الانابيب بتاعت الغاز طيب حلو اوى ويا ريت انا اقدر اعملها هى مش عيب ولا حرام ده المفروض يحصل وعلشان منزعلش الناس مش علشان الفلسطنين الوحشين ولا حاجه لا علشان ده حقنا كمصريين

طيب براحه هى انابيب الغاز دى واصله من الحسين ولا واصله منين بالظبط واحد عاوز يفجر الهرم يروح يضرب برج الجزيره على البوبو بتاعته ليه ( البوبو محدش يسالنى يعنى ايه دى كلمه عيب )

انا طبعا مش قادره اعرف اذا كان ده تصريح من الملابس الداخليه وجميع القطع اللى مصاحبه ليها
ولا ده فبركه من المصرى اليوم بكل الحالات

لو فبركه المصرى اليوم يبقى هطالب الداخليه تحبسهم كلهم
لو تصريح من الداخليه يبقى هطالب العباسيه تاخدهم كلهم

وفى النهايه الشعب فى خدمه الداخليه وتعاونوا علشان خاطرهم واعملوا على تلبيه النداء الاتى علشان نريح الناس دى شويه

اولا :- المساعده فى القبض على المختل عقليا المتسبب فى كل التفجيرات وحوادث الاغتصاب والسرقه والفتنه الطائفيه

ثانيا :- القبض على كتائب الشهيد ماس بقياده الجناح يمين شمال فولت عالى فى التسبب فى الحرائق


ثالثا :- القبض على سمكه القرش الغاشمه فى فى التسبب فى انقلاب العبارات واكل الناس مش زى ما الحقودين بيقولوا عيب فى العبارات

رابعا :- القبض عليا انا شخصيا وتسليمى لاقرب مستشفى ان شاء الله مستشفى الكلب اهو يبقى شفقه ورحمه بيه من اللى بيحصل

خامسا : احب اعرفكم ان

الاتفاقيه الامنيه فى مصر .... عباره عن تأمين الشورت فى البى سين ولا عزاء للاسكريتش

وعلى اللى يمسك اى حد من دول الاتصال بالدخليه والتبرع لها بكارت بعشره جنيه علشان تعرف تتصل بيك تانى وتقولهم الاماكن او ولوعوا فى نفسكوا واخلصوا

كان معكم لواء اركان حرب عميد برتبه مناخوليا ابى هانم بتنجانى

حكمه الامبراطورة

انا مش بالغباء ده ولا انت بالذكاء ده

اليومين اللى فاتوا الناس زعلانه ومضايقه ان اتنين نواب فى البرطمان بتاعنا واحد وقف وقال للتانى انت زى العاهره والتانى قاله انت مراه لعوب او معرفش قالوها ازاى
ببساطه جدا مستغربين ليه مضايقين ليه
نرجع بالزمن لفتره طويله اول ما نزلنا وانتخبنا الاشكال دى
مش دول برضه اللى كانوا لهم معارف ومحاسيب وانا هنا بتكلم عن الاتنين حزن وتنى ومستكلين الا القليل منهم اوى
مش دول اللى بيدفعوا رشوه مش دول اللى لمين الناس حواليهم وبياكلوا ده وبيشتروا ده وبيوعدوا ده بكذا حاجه
مش هما برضه نفسهم اللى كانوا بيجيبوا بلطجيه لتقفيل اللجان ويضربوا البطايق علشان الناس تنتخب
انا عاوزه افهم باى منطق تزعلوا انهم بيفرشوا الملايات لبعض
انا عن نفسى الناس دى مبتمثلنيش فى اى حاجه بالعكس بحس انهم فقره كوميديه مقرفه بتفكرنى بالطمع بتاعنا لما انتخبناهم وبطمعهم فينا لما قعدوا فى البرطمان واتمكنوا فى القعده
ومن هنا احب اقولكم طالما المجلس بقى عاهرة وأمراه لعوب يبقى على الشعب انه يمسك صاجات واهو ينوبه من الكباريه كرسى وحد يلم النقطه بقى

الخبر التانى

64 مقعد فى نفس البرطمان للمرأه الموضوع فى حد ذاته حلو مش وحش
ومبسوطه بيه
الخوف كله بقى من وجود الستات فى البرطمان ده يبقى عن طريق الحزن الوتنى ويجامل بيه طنط سعاد وطنط بكينام وطنط ام سحلول وبنت اختها ام الخلول
ساعتها يبقى البرطمان هيتحول لسلسه مطاعم تشيلز فى نهار جمعه خارجى
واللى ميعرفش تشيلز فى الوقت ده يبقى يعدى يلاقى ناس قرفانه متنشيه كده على الصبح وشاربه كوبايه نشا
وطبعا استحاله يبقى فيه واحده بتمثل اسطبل عنتر ولا اى منطقه شعبيه انا راى يقصروا الانتخابات على الزمالك ومصر الجديده وجاردن سيتى والمهندسين
وكمان متبقاش عن دواير لا تبقى عن شوارع معينه
منعا لدخول ناس مش ولا بد ولازم نعمل عضويه لكل واحده للدخول للمجلس ونخلى اماكن الستات لونها بينك او بيربيل

الخبر التالت والاخير علشان المراره الكاوتش

تعيين اول رئيسه للجامعه وهى ست مجتهده جدا وتستاهل تعليق منى الشاذلى قالته ومش عارفه او مش متذكره هل هو عن لسانها ولا عن لسان جعر تانى
ان ايه بقى ان دى بركات اوباما افندى مين يا خويا اى والله ده بيقولك بركات اوباما ومطالبته بتحقيق حموم المرأه بالشاور جل مش بالصابون العادى علشان ريحه العرق
يعنى مش علشان تستحق او علشان لها مكانه لا علشان اوباما قالك ولد خرسيس فرسيس لازم تدى للمرأه حق الاستحمام
انا حسه ان الناس بعد كده هيعملوا مولد سيدهم اوباما وكل واحده عندها ثور مبيخلفش تأخده وتروح تلف حوالين المقام شويه يمكن يخلف معزة صغيرة
ومن هنا تنتهى الاخبار اللى قدرت استوعبها الايام اللى فاتت بما انى فاصله ارضى وهوائى ولاننا فى الصيف والدكتور مانعنى من تعاطى الاخبار ونصحنى بالسفر اغلبيه الايام
فاحب اقولكم ان الايام والاخبار كلها شبه بعض كله ماشى بقفاه


كان معكم ابى هانم ابو العافيه من امام مجلس الشوعب الهوائيه اللى هنخليه بينك قريب علشان الستات تتبسط اللى انا منهم

حكمة الامبراطورة

قرعه ومسكوها فرشه ومشط