يقف الابداع بين كل الاطراف عندما يثق الشخص من قدرته على ادارة الامور والحياه يقف ابداع المراه عندما يتحكم فيها الرجل يقف ابداع الرجل للمراه عندما يظن انه تملكها تقف كل الابداعات عندما لا تجد الحياه المحيطه لك تساعدك على هذا
ندخل فى الموضوع بقى الكلام اللى فوق دا ملوش اي علاقه باى حاجه خالص فى الدنيا بس هو كان فى بالى وقولت ارجعه فى المدونه وخلاص ومحدش يتفذلك ويحاول يفسره لانه مش هيفهم ولا هيعرف وهنضطر نصرف له كوبايتين نسكافيه وواحد شيشه عنب واتنين شاي وبرضه محدش هيفهم حاجه بس السؤال اللى بجد وعاوزه اجابته منكم كل واحد يقول من غير تحوير ولا حوارات ولا فلفسه ولا افتكاسات

امتى اخر مره عملت حاجه مبتكره او ابدعت فى حاجه؟ ولو حصل ايه هى الحاجه دي؟ ولو طلعت واتوجدت ايه المقاومات اللى ساعدت على كدا؟ ملحوظه المقاومات ممنوع ذكر الشاي والقهوه والسجاير والشيشه :पपप
بس جاوبوا بقى وهتناقش معاكوا بما انى اجازه واخر الاسبوع والايام هنا فى دوله الكويت الشكيكه هبله جدا بتمطر وتحرر وتبرد وتعمل برق ورعد فى يوم واحد لما انا مبقتش عارفه اطفى التكييف ولا اسيبه يالا جاوبوا والطلبات على حساب الكوكب
اقعدوا بالعافيه

كان معكم عبقرينو الصغير ابى هانم بتنجانى
حكمه الامبراطوره
الحب فى القلب زي الكهربا فى السد العالي

طبعا لا تعليق على الصورة اللى شوفتوها دى ببساطه القصه اننا عاملين اعلان عن طلب وظائف فى الشركة عندنا وطبعا بما ان الاعداد كتير المطلوبه او ظائف كتيره فقولنا تيجى الطلبات عن طريق صندوق البريد

وطبعا اختكم اللى هى سعادتكى اللى بتفرز الطلبات دى

وبالصدفه اكتشفت الجمال ده

كل الطلبات والجوابات جايه عليها طوابع فرعونى باشكالها كلها زى ما جبت لكم

وفجأة ان ان ان تشششششش

لقيت طابع عليه محمد رشدى من 2005

طيب افهم بمناسبه ايه محمد رشدى رمز لايه يعنى

لو حد يعرف الحل يبعت على ص.ب الهرم واحده وييييى نص

عمار يا بلدى لما يبقى على بريدك مطربين وده علشان الاخوه اللى زعلانين انى بقول العالم بيبنى حضاره واحنا بنهد

يالا فتوكوا بعافيه

كان معكم ابى هانم حفيده حتشبسوت سابقا

حكمة الامبراطورة

ويل لامه عاقلها أبكم وقويها أعمى ومحتالها ثرثار

اقر واعترف انا آبى هانم كعب الغزال وا بتنجانى كما يحب ان ينده لى البعض انى فعلا لا استطيع ان استوعب

استنوا هفهمكوا انا فعلا كونفيوسيد ومش عارفه اقرر ولا عارفه احدد مين الغلط ومين الصح وبفكر بدون عصبيه القرار باصدار الحكم صعب عليا اوى

الله يكون فى عون القاضى فعلا هو بيصدر حكم ازاى ما علينا

ولا الحكم بتاع الماتش لاااااااا الموضوع صعب وانا بقيت واقعه فى حيص فيص ميص خالص

وعلشان اقول لازم تمشوا على النقط اللى جايه دى كلها وعلشان زى ما قولت نقول حكم عادل فهمى نظمى

انما لو اتكلمنا عاتشفى مش هنحكم وهنقول اى كلام وانا المره دى مش عاوزه اى كلام

هقولكم الاسئله اللى فى بالى خبط لزق كده بجد حتى لو ساذجه مش مهم قدركوا تقروا ليه ووتردوا عليا

السؤال الاول

مصر اتفقت مع ازرائيل تعمل جدار علشان التهريب اللى بيحصل فى الانفاق حلو حلو

ليه بقى

علشان ميهربوش سلاح لانهم بيقولوا ان الاغذيه والادويه بتدخل من البوابات انما الممنوعات هى اللى بتدخل من الانفاق

وعلشان بيقولوا ان حماس هى اللى بتهرب الحاجات دى علشان مفيش حاجه من اللى بتدخل من البوابات بتدخل لهم

وناس تانيه وركزوا فى دى فلسطنين بيقولوا ان حماس مش هى اللى بتهرب من الانفاق وانهم ناس عاديين وده ليه لان حماس بتستولى على كل المعونات اللى داخله

طبعا ده المبررات اللى بتتقال

مصر بتقول انا بعمل الجدار الفولاذى علشان احمى حدودى المفوتحه على البحرى كمان سواء من رصاص طائش من العدو ولا اللى بيحصل من الفلسطنين وعلشان مش كل يوم ياخدوا متر من سينا ويضموه ليهم بمعنى كل يوم يحطوا سور ويشلوا سور وفى ده بيضموا امتار لفلسطين وعلى فكره دى حقيقه بس ازرائيل اللى بتعملها

وعلشان تمنع الاجتياح اللى بيحصل على المعابر لان ازرائيل عاوزه تهجر الناس لمصر ويفضوا لها فلسطين

السؤال التانى بقى

وركزوا واربطوا الكلام ببعض

دلوقتى فلسطنين ضربوا على المعدات والمصريين نار وهما بيشتغلوا طيب ليه ما برضه من الجانب الازرائيلى بيشتغلوا

اشمعنى يضرب على عمال غلابه يعنى اه انا زعلانه بجد ومقدره زعلهم بس برضه ميضربوش فينا ما يضربوا فى التانين

ولا مقدروش على الحمار بيشدوا فى البردعه

الزغروف الكبير بقى

بعد كل الاسئلة دى مين معاه حق احنا علشان بنامن بلدنا ولا هما علشان حاسين بالظلم

طيب فيه معابر تانيه فيه على الاردن ولبنان ليه كل اتصب على مصر

فى النهايه طبعا اللى هيدخل ويقولى انتى ارحمى الفلسطنين وياخد الكلام بالمقلوب انا مستورده طقم من ابو ورده هنسله على دماغه انا مش عاوزه غباء انا مش عارفه اصدر حكم فعلا انا كله صعبان عليا

ومش علشان بكره الحكومه التيتتتتتت بتاعتنا يبقى كل حاجه غلط بيعملوها ما احنا مضغوط علينا ومتجوزين الامريكان عرفى يعنى وده غصب عنا

والمثل بيقولك لو جالك الطوفان حط ولدك تح السرير ولا مش عارفه ايه

انا فعلا محتاره ومش عارفه اتصرف ومينفعش برضه نقول ما حكومتنا هتعمل لا مش هتعمل حاجه ومش هنقدر نضغط عليها لان اللى هما عاوزينه بيتعمل وبس واحنا بنجعجع فى الهواء

انا ليه بقول ليه ده لان فعلا اصدار الحكم على جانب بالعقل صعب اوى اوى

الحمد لله انى مش قاضى

كان معكم مستشار اول وزير النقل والمواصلات ابى هانم بتنجانى

حكمة الامبراطورة

اللى ميعرفش يقول عدس بالبصل

طبعا فى ظل الاحداث المؤسفه دي اللى بيهون عليا شويه تخاريفنا على الفيس بوك اهو بنهون على بعض شويه
واحده صديقه وبحبها جدا على الرغم من انى متشرفتش بيها شخصيا هى اصلا مدونه كتبت استاتيوس على الفيس بوك وقعدنا نعلق عليها عاوزه اوريكم بجد نموذج للست المصريه الفزيعه لما تقلب معاها بخفه دم وتخاريف ورغي وانها تدخل الخطوط فى بعضها ابطال الموضوع كنت انا وهى واتنين مدونين كمان هرمز لهم باول حروف اسمهم علشان الرقابه لو عاوزين يذكروا اسمائهم يبقوا يدخلوا بقى فى التعليقات يقولوا بس ركزوا فى طريقتها لاول مره من فتره بجد اضحك من قلبى والشغل عندي يسمع صوتى يمكن بقالى اربع شهور مش عارفه اضحك هجيب لكم الحوار
الاستاتيوس بتاعتها بدات بكلمه

والدنيا بتشتى والحمد لله مغسلتش الستاير
وادي التعليقات

اناعلقت وقولت
رشى ميه على الساتير وبعدين نشفيها بالسيشوار وبكده تبقى اتغسلت
هي
بالسشوار !!!!؟
:))))))))
بس انا كنت عايزاها كيرلى

انا
عملى بالسيشوار وبعدين هبعت لكى المكوه بتاعتى هى بيبى ليس اعملى بيها هتبقى تحفه
هي
طب مانا اعملها كيراتين اسهل وخلاص ...ولوماتعدلتش ...احلق للشبابيك وخلاص بقى بلا وجع دماغ
:-)


زميل تانى
وصلتني دي على التويتر امبارح: عندما يبدأ قرص الشمس في المغيب .... والنبي يا سعاد ماتنسي تلمي الغسيل من على الحبل

يكونش دي احلام شاعر واتحققت؟
هي
:))))
ده مكانش شاعر ...ده خبير ارصاد جوية مراته كانت غاسلاله البنطلون البيج القطيفة اللى بيلبسه على البلوفر الزيتى اللى جابه من عند اسمه ايه اللى فتح جديد ده ..اسمه ايه ده اللى فوق محل العصير وانت طالع من الميدان رايح تاخد المحور عشان تجيب العيال من المدرسة اللى قفلت فصلين لحد دلوقت ومش عايزة تدى باقى العيال اجازة مع ان اجازة العيد 10... ايام ॥والله مش بطالة المهم الشتا يهدى شوية عشان الناس تعرف تخرج تزور قرايبها ।قال يعنى حد بيروح يزور حد دلوقت ..الناس بقت وحشة ...ودك النهار اتنين اخوات لسه متخانقين لموا عليهم الشارع ..والشارع اصلا عايز يتسفلت مش كفاية البلاعة اللى سرقوا غطاها ...شفت الولد نام من غير غطا قوم جاله برد وخد الدوا على معدة فاضية اصل مكانش فى عيش وهو مصمم ياكل ساندوتش جبنة ..طب ماهو كان فى كورن فليكس ما كان ياكله وخلاص..ايه الدلع ده . هو لازم عيش يعنى ..صحيح لازم الناس تجيب عيش مقمر عشان الفتة بس بيقولوا ان سعاد عليها نفس فى الفتة ماشاء الله ...سعاد مين!!!؟ ...سعاد مرات الشاعر صاحبك ..لحقت تنساه ولا ايه

الزميل تانى
هو انا كان اسمي ايه؟
انا جيت هنا ازاي؟

زميله س
عسل يا ن صباح الفل
هى
مالك يا باشمهندس ..فى ايه !!!؟
صاحبك جوز سعاد هو اللى وصّلك لحد هنا وراح يشترى حاجة وقال جاى تانى ..استناه بقى وعلى ما ييجى حاحكيلك حكايته مع سعاد لما اتخانقوا وضربها بالألم قدام الناس ..راحت الناس اتلمت وسعاد طلعت تجرى فى الشارع راح خبطها توك توك ..ونزل بقا السواق واتخانق مع جوز سعاد ..وبالصدفة كان معدى جوز نادية راح مهدى الموضوع ونادية خدت سعاد عندها عشان تهدى واقنعوه يجيبلها ورد عشان يصالحها ..لكن سعاد دماغها ايه ..ابدا ما يصالحها بورد ابدا ..ليه يعنى هى مالهاش اهل ..لازم يتجاب ويتربى ..واخوها سعيد ايده طرشة وبيلعب بوكس وبطل النادى فى البنج بونج .بس هى جابت سيرته قدام جوزها وده قام اتنطط ..سعيد لأ سعيد لا حقك عليا وادى راسك يا ستى وادى ايدك وادى رجلك وماقولكش كان عامل ازاى ...قصره ..هى سامحته بعد ما باس راسها قدام الناس برده وحلفلها يجيبلها انسيال دهب زى بتاع بنت خالتها اللى اتجوزت مهندس فى البحر الاحمر ومرتبه شىء وشويات ..لكن طبعا ميسلمش مع القر ده كله ..رفدوه وراح اشتغل فى البحر المتوسط بس للامانة يعنى هو مرزق ..بيصطاد سمك وجمبرى وكابوريا بالصنارة كده من غير شبكة ..وبييقولوا انه لقا فى بطن سمكة كبيرة خاتم الماظ اداه هدية لمراته اللى هى بنت خالة سعاد .واول ما لبسته سعاد نقرتها بالعين التانية خدو جوزها يا عينى وشغال دلوقت فى البحر الميت ..قصره عشان ماطولش عليك كلمة منه منها وصلوا لخاتم دهب وحلق بدلاية عشان ترجع
معاه البيت
واذ فجأتن ....ان ان تشششش....
.........................
يُتبع
:-)

هي
.. تابعى الحلقات ....لا تقوليلى نور ولا مهند ...احنا معانا سعاد
وفى مسابقة فى نهاية الحلقات
:-))

صباحك ياسمين
:)

الزميله س
ههههههههههههه متابعه متابعه مش تقلقى
على امل الفوز فى المسابقة طبعا
:))

انا

ههههههههههههههههههه احمد
هيكره اسم سعاد ومش هيدخل عندك تانى
انا متابعه الحلقات كملى

هي
بقوا معنا يا بنات
والجوايز كتيرة
بس اتصلوا على
0900 5%&*#@$7999
وكل ما تتصلوا اكتر فرصتكوا فى الفوز تكتر
...
انتظروا السؤال فى نهاية الحلقات
...
فاصل
تامر حسنى
الستات بيشجعوا سعاد ..واحنا معاهم
مدينتى
لافاش كي رى

انا

هههههههههههههههههههه انتى عامله دماغ ايه

الزميله س
ههههههههههه انا حاسه برضه يا ابى
ياريت ن مش تبخلى علينا بالوصفه السحرية
ولا دى هتكون الجايزة؟؟؟؟؟

الزميل التانى
هه؟
وش فاتح بقه
هو الستيتس كان عن إيه أساسن؟

هي
سعاد كعادتها كتومة ..وغامضة كده ..سهنّة يعنى .. حاولت تعرف جوزها بيروح فين كل يوم بعد الغدا وبعد ما بيشرب الشاى وياكل الكيك او أم على او ام عباس ..يعنى اى حاجة حلوة والسلام اكمنه يعنى عنده السكر وبياخد انسولين ولازم يا...... ده مش موضوعنا ..المهم ابتدت سعاد تسأله بشكل غير مباشر يمكن يقع فى الكلام وتكتشف اى تناقض فى التفاصيل فتقفشه .. لكنه كان حويط... وعمره ما وقع بلسانه معاها ...حاولت انها تتجسس على موبايله عشان تعفأه مرة من افاه..لكنه كان دقرم وبيمسح رسايله اول باول ...النهاردة بالذات كان متشيك على غير العادة وراشش ريحة"يعنى برفيوم" فقررت سعاد انها تتنكر وتمشى وراه بعد ما يخرج علها تعرف مخبى عنها ايه ..لبست سعاد الباروكة الحمرا اللى كان جايبهلها معاه من اليونان ..وبالطو المخبرين ومنسيتش اهم حاجة اتعلمتها من الافلام العربى القديرة وهى انها متلبسش جزمة بكعب زى بتاعة نجلاء فتحى لحسن هو اللى حيعفأها من افاها .. فطبعا لبست باليرينا ودى للى ميعرفهاش جزمة فضى على الارض بتخلى البنى آدمة طايرة فى الهوا بتؤدى بحيرة البجع وهى رايحة السوق ..اه وطبعا ممكن الوان تانية .. لطفى كان حاطط شوية حاجات بجد تجنن .برده مش موضوعنا..المهم ..نزلت سعاد واقتفت أثره "حلوة اقتفت دى" لقيته قعد على القهوة اللى فى آخر الشارع فدخلت باب العمارة المواجه عشان تراقبه عن كثب "حلوة كثب برده" شافته بيطلب شيشة ..عادى الشيشة مسموحة ولا تدل على شىء ..وبعدها طلب سحلب ...برده عادى ..مادام معمول على مية بيضا ..لكنه اول ما طلب قهوة اتنرفذت ..لانه كان بيقوللها انه مالوش فى القهوة وكبسها يوم ما عملتله كابشتينو يا سونة ..وندمت يومها على علبة اللبن البودرة اللى جابتها مخصوص عشان كان عليها هدية ميكسر ..البتاع ده اللى بيضرب النسكافيه عشان يعملله فوم عالية زى بتاعة غسالة ام سيد ..وهى اصلا مبتحبش تشرب لبن نيدو وامها دايما كانت بتقولها لبن الجاموسة يخليكى عروسة ...فجأة جاله واحد على القهوة واول ما شافه قام جرى لدرجة انه مشربش باقى قهوته ..أخده ومشى ... جرت وراه عشان تلحقه واذ فجاتن
......
to be continued

الزميله س

ها وبعدييييييييييين
اذ فجأتن ايييييييييييه
لالالالالا انتى هتسيبنى كده على اعصابى كتير
انا مركزه مركزه عشان المسابقة

الزميل التانى
ألألألألألألألألألألألألأ
إذ فجأتن إيه؟ ها؟
أنا اندمجت ولازم أعرف ॥ عندي اجتماع كمان تلات اربع ساعة ومش هأستحمل انزل من غير ما اعرف ايه اللي حصل

هي

حيلكوا عليا ...ده انا باكتبلكوا بايد وماسكة الزعافة فى الايد التانية
...
قصره
...فاصل ونعود

احلى رنات ..واجدد اغانى منير "ماعدا طبعا اغانى حفلته الاخيرة مع الشاب خالد"

بريل قاهر الدهون ولمعان مضمون لشعر زى الحرير

محبى القهوة بيشجعوا سعاد واحنا معاهم

لا فاش كى رى ..برده

انا
عارفه لما تخلصى هعمل كلامك ده بوست عندى دا انتى مش ممكن
اهو ده رغى الستات بجد طول عمرى بسال ايه هو انتى قدمتيه ليه على طبق دهب

هي
وإذ فجأتن تنكفى سعاد على بوزها ...جاتها خيبة امال لو مكانتش لابسة باليرينا كانت عملت ايه .. فيجرى عليها الناس ويتلموا تحاول واحد ست تقومها . لكن سعاد استسلمت للوقعة وحبكت معاها تستعيد بعض الذكريات المؤلمة زى ما حصل فى المسلسل الخليجى بتاع الساعة 9... ..اللى فيه البطلة جوزها كان بيخونها وسرقها وضربها وهى مستحملة لحد ما جه اليوم اللى اللى كان سقعان فيه فلبس "اللكلوك "بتاعها عشان يتدفى وصحيت هى من النوم ملقيتش اللكلوك تحت السرير فمشت على الرخام الساقع "ماهم فى الخليج ارضيتهم جرانيت مش سيراميك طبعا" فجالها برد واعدت تعطس ..نزلت الدور التحتانى "ماهو بيت بدورين طبعا" لقت المحروس قاعد لابس اللكلوك اللى على شكل بطة بمبى وحاطط رجل على رجل وبيتكلم فى الموبايل .. فضلت تعطس على السلم طول ماهى نازلة واتدألجت فى اخر سلمتين لانها مرضتش تجيب دوبلير تقوم بالحركة مكانها وفى نفس الوقت مرضتش تقع من على 3 سلمات خوفا على السليكون من الصدمات ..ولما وصلت عنده بتزك فى رجلها راح حدفلها اللكلوك البطة وقاللها ايش هذى البطة الهبلة لا بتدفى ولا بتكفى ... وهنا افتكرتله كل حاجة وحشة كانت مستحملاها لكن عند البطة ولازم يقف ..كانت البطة البمبى هى القشة التى قصمت ظهر البعير فانفجرت بالبكاء واعدت تشد شعرها لحد ما طلع نصه فى ايدها ماهو كان صناعى لو ركبتيه مع الضوافر بتاخدى خصم ..وقامت مسكت فيه واعدت تخنقه وهى بتقوله ايش بيج يالرجال ايش بيج لحد ما كان حيطلع فى الروح لولا المخرج قال كت عشر مرات .. مرت هذه اللقطات امام عيون سعاد وهى ممددة على الارض زى اسمها ايه فى فيلم فؤاد المهندس لما كانت بتغنى شابا دابا دا ..الناس ملمومة والحلقة بتزيد حواليها ..ومن بعيد سمع جوزها وصاحبه الهرج والمرج فرجعوا تانى يشوفوا زى غيرهم فى ايه .. ولما وصلوا عندها ودقق فى ملامحها وقبل ما ينطق او يتكلم كانت بتؤدى دور البطلة ام سليكون بالظبط وبدون خروج عن النص وهى تردد ايش بيج ايش بيج .وبحركة بهلوانية فيها تمكن كانت واقفة على قدميها وماسكة زمارة رقبته بايديها ... بالكاد عرف ينطق وهو مبحلق عنيه ..شفت يا دكتور ان حالتها سيئة فعلا وبتزداد سوء ..مش قلتلك .. لكن الدكتور مكانش سامعه لانه كان بيطلب المستشفى عشان يبعتوله عربية واتنين متغذيين وقميص ابيض فى ابيض
....
تمت

الزميله س
اهئ اهئ كده تهون عليكى سعاد يا ن
كل ده عشان يتجوز عليها
رجالة ملهاش امان يا اوختى

هي
آبى .... يا لهوى بوست ايه ..لا بلاش فضايح ...دى آثار التنفيض ..بكرة ان شاء الله حابقى كويسة وزى الفل
بس اخلص اوض الولاد
:)(

س ..سعاد اصلا انا معرفهاش يا سوسو ....دى مش تبعى ..الباشمهندس احمد هو اللى جابها الستيتس ...
:))

هي
كمل ايه يا آبى ...تمت
وهو بعد ما لبست القميص وراحت لهنومة حتقوملها قومة المسكينة
:))

انا
هههههههههههههههههه قريت التكلمه
بوست تشريده فى الجون

هي
الحمد لله انى مش بنفّض كل يوم
:))

الزميل
أنا جيت من الشغل ولسه داخل الفندف أهو
أنا معرفش سعاد دي ولا عمري سمعت عنها .. ما تلبسونيش تهمة

سعاد اللي عندي كانت بطلة قصيدة شعر .. لكن سعاد الل هنا دي (سعاد المجنونة) أو (سعاد المهبوشة) مش هتفرق كتير .. ودي لازم تعدمة في ميدان عام رميا بالبراطيش
:-))

ودي كانت اخر حاجه افتكست قصه لاحظوا القصه بتحصل كتير من الستات لما تكلموها فى موضوع وتدخلك فى الف موضوع تانى ودي جزاء اللى بينفض فى العيد وهى جابت نموذج حي للابداع فىالقصص بجد وخفهالدم
انا بشكرها على الاستاتيوس دي اللى هلكتنى من الضحك
وكل سنه وانتم بخير يا رب

كان معكم ابى هانم بتنجانى رسمى فهمى نظمى من امام احدي صفحات الفتيس توك اللى بقى ادمان

حكمه الامبراطوره

احترس الخرفان عندها الفلوانزا القرون

بمناسبه ان البرادعى عاوز يرشح نفسه بس بشرط يضمن الانتخابات عادله ونظيفه ورشيده

الراجل ده بيستهبل جايب كل اسماء الوزراء وعاوزه تبقى خضرا

المهم ما علينا يعنى ومع قناعتى الشخصيه اللى محدش له علاقه بيها ولا تأثر على قناعه ولا امل حد

ان اى مرشح قدام الحزن هيبقى مجرد ريكلام

ومعنى الريكلام فى صحيح بتوع شارع الهرم ورواد الاقسام انه مجرد مناظر فارغه زى الماريونيت بتتحرك عن طريق الحزن

تصدقوا انا توهت انا عاوزه ايه اه

افتكرت الواد زيكس بتاع الكشك مره سأل على الفتيس توك سؤال مش برئ خالص قصدى برئ

وانا هنقله لكم لانه كان ماده خصبه لخيالنا الواسع ايه بقى

هى مصر ليه مش بتخصب يورانيوم؟؟؟؟؟؟؟

طبعا والبرائه فى عنيه والبرائه اتنقلت لعقولنا

فى النهايه بعد اجابتكم

هبقى اجيب لكم نموذج الاجابه

كان معكم امبراطورة الكوكب ابى هانم البريئه

حكمة الامبراطورة

اتعلم الادب من قليل الادب

لا ده مش اسم الفيلم ده مقال نقلته منون صحبتى على الفتيس توك وعجبنى وجبته شفقه واحسان بالرجاله يمكن ينفعهم يوم مينفعش فيه غير كده يا ابو ورده يشتغل وانتم عارفين بيوجع قد ايه انا هسيب لكم النصايح وهعلق تحت كل واحد بلون تانى
هذه طرق الرجل التي يجب ان يعامل بها المرأة كي يبقى الحب موجود لاخر العمر

عندما تمشى مبتعدة عنك (إلحق بها)
او اعمل نفسك اتكعبلت ووقعت وسيبك منها
عندما تتجاهلك ( أعطها اهتمامك الكامل )
قوم اعمل كوبايه شاى
عندما تريد الابتعاد عنك قليلاً ( لاتوافقها الرأي )
لو منك اقولها فى شجره
عندما تراها في أسوأ حالاتها ( قل لها أنها جميلة )
يعنى لو شبه امنا الغوله كده نيهاهاهاها
عندما تراها تبكي ( أحضنها ولا تقل شيئاً )
ايوه وامسح الحاجات اللى نازله من مناخيرها يععععععععع
عندما تكون خائفة ( أحميها )
ايون البس لها وش الاشكيف
عندما تأخذ منك شيئاً عزيزا ( دعها تأخذه فلن يكون أعز منها )
ايوه بدل الزن يا خويا اسالونى عن زن الستات
عندما تمازحك ( مازحها وأضحكها )
يعنى بطبق احدفه فى دماغها شدها من شعرها
عندما لاتجيب الهاتف لفترات طويلة ( أكد لها أن كل شئ على مايرام )
بانك تحرق التليفون ومتشلهوش تانى
عندما تشك بك ( انسحب قليلا لتعطيها وقتا للتفكير )
لاااااااا اوعى هتسود عيشتك اثبت لها انها الشجره والفجله والجرجير اللى فى حياتك
عندما تقول أنك تعجبها ( فهي حقا تكن لك مشاعر اكبر مما قالت )
يعنى هتلاقى مشاعر بالعض بالضرب
عندما تمسك يديك ( أمسك يديها)
واضغط جامد لغايه لما تكسرها
عندما تقول لك سرا ( أحتفظ به ولا تخبر به أحداً )
لان اكيد هيكون ذم فيك فخلى عندك كرامه واحتفظ به
عندما تنظر إلى عينيك ( لاتلتفت حتى تلتفت هي )
عارف التثبيته بتاعت الكلب تفضل مثبت نفسك بدل ما يعضك
عندما تفتقدك ( فهي تتألم من الداخل )
اااااااااااه علشان مش هتلاقى حد تنكد عليه
عندما تحطم قلبها ( الألم لن يزول بل سيستمر )
علشان مش هى اللى سابتك اسالنى انا فى غل الستات
عندما تقول أن العلاقة انتهت ( فهي لازالت تريدك )

اشك بس ممكن
أبق على خط التليفون معها حتى لو لم تقل شيئا
اه ما هو مش انت اللى هتدفع الفاتوره اشرب بقى
عندما تغضب احضنها ولا تتركها
بدل ما تكسر البيت على دماغك
عندما تكون صامته ( اسألها ما المشكلة )
اكيد واحده من اصحابها نكدوا عليها او ريحه سنانك
عندما تقول أن كل شئ على ما يرام لا تصدقها بل تحدث معها عن المشكلة
ايون
لأنها بعد عشر سنوات ستظل تتذكرك

أتصل بها في أول ساعة من يوم ميلادها وقل لها أنك تحبها
طبعا هتقول خير يا رب ماله ده
اتصل بها قبل أن تنام وبعد ماتصحو من النوم

علشان تريح بالك من زن طول اليوم
عاملها كأنها كل شئ مهم لك في الحياة
اكيد مهمه هو فيه ارق من كل للى انا قولته

مازحها ودعها تمازحك ابق معها طوال الليل عندما تكون مريضة

لا الا لمرض واجب برضه وزياره المريض صدقه
شاهد معها فيلمها المفضل أو برنامجها المفضل حتى لو كنت تعتقد انه غبي
اكيد هتبقى الافلام السيكوباتيه اللى عاوزه تتفرج عليها
أعطها العالم
اه البلوره اللى معمول فيها العالم دى والستات هبله وبتصدق
عندما تحس بالملل أو متضايقة اخرج معها واجعلها تتسلى
ركبها عجله او ابعتها سفارى ووصى الراجل يتوها
دعها تحس أنها مهمة لديك عندما تجري لك باكية ، أول سؤال تقوله لها ، مين اللي زعلك حبيبتي

اكيد انت اللى زعلتها هو فيه غيرك هم فجهز نفسك للاجابه

منقـــــول بتصرف

حكمة الامبراطورة

نهيتك ما انتهيت والطبع فيك غالب وعمر ديل الفيل ما هيطول حتى لو ربطوه فى السلالم

الميل ده برضه تحفتنى بيه بنت خالتى وشوفت بجد قد ايه المراره على الرغم من انه مضحك جدا بس زعلت على نون النسوه فى مصر ودى حقيقه عاريه شمتوا الرجاله فينا
اتفرجوا وقولوا رايكوا
وتحذير يا ريت الرجاله تغض البصر علشان عيب
وعلشان برضه تجنب لاننا نشوف شلالات دم فى البيوت بسبب الصور دى
والمحاكم تزدحم بسبب الطلاق اتفرجوا بقى واقروا وشوفوا فعلا الفرق

الروسية بتوع العسل الأبيض

الشرطة النسائية القبرصية بتوع العنب والخروب

الاندونيسية بتوع الأرز والجمبري

الايطالية بتوع المكرونة والبيتزا

الأوكرانية برضه بتوع العسل الأبيض

اليابانية بتوع الأدب والطاعة

اليونانية بتوع الزيتون الكلاماته

الأمريكية بتوع كله والتفاح الامريكانى

الصينية بتوع الشاي الأخضر

الهولندية بتوع السمنه والجبنة

وأخيرا الشرطة النسائية المصرية

بتوع الكشري

وبتوع الفول المدمس

والفول الحيراتى

والترمس

والطعمية

و المحشى الكرنب

والمومبار

والكرشة

والكوارع

وأم على

وأم فتحى

وأم أربعة وأربعين

علما بأن الشرطة النسائية المصرية لا تتواجد فقط

في الأماكن العامة بل موجودة في كل منزل مصري

وهى لا تستخدم المسدس أبدا

ليه........و هى المقشة راحت فين

ولا تحتاج إلى المدفع الرشاش

ليه ..........ماهو لسانها موجود

هذا وقد أصدر وزير الداخلية قرارا بتعديل الاسم

الى الشرطة النسوانية المصرية

نظرا للصفات النادرة للشرطية المصرية

والغير موجودة لدى الشرطة النسائية حول العالم

شوفتوا الفرق بقى فى الاشكال والاجسام والاحجام
جتها خيبه اللى عاوزه كده
الا صحيح هما ليه لغوا كليه الشوربه للبنات طيب مش بالذمه كان هيبقى قلبنا حنين على المجرمين بدل ما نعذبهم وحموم الانسان تقعد تحط مناخيرها فى كل حاجه
انا لو فتحها تانى هروح ولا تيجوا نعمل جروب نطالب فيه وزير الملابس الداخليه بده
انا مستعده اتزعم الحركه


كان معكم لواء شرطه قسم الطافى والحرايق وانابيب البوتاجاز ابى هانم



حكمه الامبراطوره


العتبه يا ناس هينقلوها الوايلى واللى مروح يا ناس ابص الاقيه جايلى

الايميل ده جالى وقريته حسيت انه مفيد بجد هو كتير بس اعتقد مفيد وفيه حاجات انا عن نفسى احاول اعمل بيها حتى لو عملت النهارده اتنين وبكره اتنين وكل يوم على قد ما اقدر بس اعتقد اننا محتاجين للتغير شويه
قولت انقله يمكن ينفع حد كمان

خصص من وقتك 10 إلى 30 دقيقه للمشــي . . و أنت مبتسم

2- أجلس صامتاُ لــمدة 10 دقائـــق يـــومياُ

3- خصص لنومك 7 ساعات يوميا

4- عش حياتك بــثلاث أشياء : (( الطاقة + الحماس + العاطفة ))

5- العب ألعاب مسلية يوميا

6- أقرأ كتب أكثر من التي قرأتها سنة 2008

7- خصص وقتا للغذاء الروحي : (( صـــلاة ,, تسبيــح , , , , ))

8- اقض بعض الوقت مع أشخاص أعمارهم تجاوزت الـ 70 سبعين عام ,, و آخرين أعمارهم أقل من 6 أعوام

9- أحلم أكثر خــلال يقظتك

10- أكــــثر من تناول الأغذية الطبيعية ,, و أقتصد من الأغذية المعلبة
11- أشرب كميات كبيرهـ من الماء

12- حاول أن تجعل 3 أشخاص يبتسمون يوميا

13- لا تضيع وقتك الثمين في الثرثرة

14- أنسى المواضيع ,, ولا تذكر شريكة\شريك حياتك بأخطاء قد مضت لأنها سوف تسئ للحظات الحالية

15- لا تجعل الأفكار السلبية تسيـــطر عليك .. و وفر طاقتك للأمور الإيجابية

16- أعلم بأن الحياة مدرســـه .. و أنت طالب فيــها .. والمشاكل عبارة عن مسائل رياضية يمكن حــلـــها

17- كل إفطارك كــالـملـك ... و غدائــك كـالأميـــــر .. و عشـــائك كـالفقيــــــر..

18- أبتسم .. و أضحك أكــــثــــر

19- الحياة قصيرة جــــدا .. فـــلا تقضـــها في كـــــرهـ الآخرين

20- لا تأخذ (( جـمـيـع )) الأمور بجــديــه .. { كــن سـلـسـا و عـقـلانـيـا }

21- ليــس من الضروري الفوز بجميع المناقشات والمجادلات .. (( حاول أن توافق على الخطــأ ))

22- أنسى الماضي بسلبياته ,, حتى لا يفسد مـــســـتــقــبــلك

23- لا تقارن حيــاتك بغـــيرك .. ولا شريكة\شريك حياتك بالآخرين ..

24- الوحيـــــد المسئول عن سعـــادتك (( هو أنــــــت !! ))

25- سامح الجميع بدون استثناء

26- ما يعتقده الآخرين عنـــك .. لا عــــلاقة لك بـــه

27- أحــســن الــظــن بالله .

28- مهما كانت الأحوال .. (( جيــدهـ أو سيئة )) ثق بأنها ستتغـــــير

29- عملك لن يعتني بك في وقت مرضك .. بل أصدقائــك.. لذلك أعتـــنــي بــهــم

30- تخلص من جميع الأشياء التي ليس لها متعة أو منفعة أو جمـــال

31- الحســد هو مضيعة للوقت (( أنت تملك جميــــع احتياجاتك ))

32- الأفـــضــــل قادم لا محالة

33- مهما كان شعورك .. فلا تضعف .. بل أستيقظ .. و أنطلق ...

34- أعمل الشي الــصح دائماٌ

35- أتصل بوالديك .. وعائلتك دائـــماُ

36- كن متفائــــلاٌ .. وســـعـــيدا..

37- أعطي كل يوم .. شيئا مميزاٌ وجيـــداٌ للآخرين ..

38- أحــــــفـــــظ حــــــدودك ..

39- عندمـــا تستيــــقظ في الصبــــاح .. و أنت على قــيد الحياة .. فأحمد الله على ذلك ..

يالا اقعدوا ذاكروا بقى وسيبكوا من تنضيف البيت وتطليع المراتب والسجاد فى الشمس بلا وجع دماغ بحس الناس فى دخله العيد كأنها مبتنضفش طول السنه وبتستنى العيد
سؤال على الامش هما ليه الاجانب مفيش عندهم سجاد كتير فى الارض زينا ولا عندهم عفش كتير مع انهم اغنى
انا عارفه الاجابه بس بلفت نظركوا ليها
يالا اقعدوا بالعواف عليكوا

كان معكم من امام البلكونه المطله على الجنينه اللى بيتفرقع فيها بمب وصواريخ ابى هانم كعب الغزال

حكمه الامبراطورة

عندما يكون الكلب سعيدا يهز ديله واذا تحدث المنافق فيهز لسانه

الحياه ليست حلم ولكنها واقع لابد ان تعيشه ولا تعتمد على خيالك

الحب ليست كلمه ولكنها مسئوليه كل فرد تجاه الاخر ولكن هناك فرق بين المسئوليه بحب والمسئوليه باجبار

الصداقه نادر ما تتواجد بين الناس وذلك لسببين الاول الانشغال الدائم ومتطلبات الحياه
الثانى الانانيه المفرطه وحب الذات عند البعض

الموت حقيقه لا يمكن تغيرها
الله سبحانه وتعالى حقيقه ندركها بعقولنا وقلوبنا

الرزق ياتى اليك عندما تسعى اليه بجهد

الحبيب هو من اغمض عينى على صورته وابدأ نهارى بصوته

حكمه الامبراطوره

اذا كان الرجل بحر فعلى المرأه ان تكون عوامه

ده الفرق

ما انا قولت مش ممكن بصراحه كلنا نحتفل بعيد ميلادتنا يعنى ومنحتفلش بيه هو
انا مش حد وحش زى العيال الوحشين التانين
انا بجد هسأل سؤال بمناسبه عيد ميلاد الريس وعيب يا ولاد بصراحه انا مقدرش اغلط علشان انا بابا قالى متغلطيش فى حد اكبر منك
مش علشان هو كويس لا علشان المفروض ابقى مؤدبه

عاوزين له هديه فى عيد ميلاده ايه هى بقى

السؤال الاول تتتتتتتتتتتتتتن تتتن تششششششششششش

اذكر خمس انجازات بس للريس على مر الحكم بتاعه ومش هذكر كام سنه علشان كل ما اقراها وافتركها احس ان هيجيلى هارت اتاك؟


السؤال التانى

بصراحه مش قادره اقول لكم خمس مساوئ اصل حد يعضنى اقولكم ماشاء الله العدد فى الليمون قولوا زى ما انتم عاوزين بس خليكوا ناس عادله بلاش ظلم اصل انا عارفاكوا ما هتصدقوا وتفشوا غلكوا فيه ههههههههههههههه

بس ابعتوا الاجابات على الكوكب وان شاء الله نتقابل فى مارينا جميعا الصيف ده ..

وكل سنه وانت كبير يا كبيررررررررر وكابس على نفسنا وابو كل حاجه فى الدنيا والحدق يفهم نيهاهااها


كان معكم لواء طيار دكتور اركان حرب ابى هانم

حكمة الامبراطورة

لو دامت لغيرك كانت دامت ليك يا حدوقه

صباح النور جميعا بصوا بقى يا حلوين البوست ده عارفه انه هيقلب عليا الصداع شمال ويمين وانا معنديش مشكله خالص للحكايه دى بس براحه علشانكوا مش علشانى انا لا سمح الله

السنه اللى فاتت دعي بعض الشباب لاضراب 6 ابريل وانا كنت من المرحبين بيه جدا اوى خالص
وليه كنت مرحبه شيفاها فكره جديده مبتكره بتجمع الناس على هدف محدد وهو كان ارتفاع الاسعار
وبعد ما خلص وطلع ابطال من ورق وطلع ناس كويسه وبرضه طلع ناس مش كويسه وهوايتهم الشو الاعلامى بس مش اكتر وده اتعرف على مر الايام بعد كده
ومن كلام سمعته من البعض بوداناتى
المهم
الاخوه الافاضل دلوقتى عاملين اضراب
طيب السنه اللى فاتت اتعمل وشوفنا احداث المحله وايه اللى اترتب عليها
وبعدها اخدنا العلاوة وان شاء الله يا رب اطفحها اذا كنت شوفتها اصلا بس ما علينا
وبعدها احم احم اخدنا على قفانا بس قفا كان قوى شويه وكنت هحط بسبب الزياده عصير قصب لبطوط بدل البنزين وعدت الحمد لله
هتلاقوا اللى حصل ليه فى بوست قديم اسمه حوار على المصطبه وتفاوض لبيع بطوط
اليومين دول كل ما افتح حاجه الاقى
اضراب 6 ابريل
طيب على اساس ايه عيد ميلاده مثلا على اساس بقت موضه كل سنه فى نفس الميعاد هنعمله ونحتفل بيه
ولا هنأجل مطالبنا كل سنه ليوم 6 ابريل نجمعها ونطالب بيها الحكومه
انا مبقللش من اللى بيعملوه الشباب
مع انى بقولها لهم وصراحه من هنا بجد واللى هيقرا منهم هيفهم
ان فى وسطهم اللى غاوين شو اعلامى مش اكتر واللى غاوين شهرة على الفاضى وانا مبتكلمش من فراغ ولا سمع وانا قاعده بأكل مهلبيه انا قابلت ناس بالصدفه البحته وجمعتنى انى اتكلم معاهم
يا شباب بجد اه البلد محتاجه حاجات كتير بس مش محتاجه تكرار محتاج تفكير
انتم نجحتوا المره الاولى فى نظرى بس علشان عرفتوا تجمعوا الشعب
انما مش علشان حققنا اى حاجه احنا لعبنا مع الاسد وقعد يلاعبنا بصوابعه وفى الوقت المناسب قام شايط برجله
وطبعا مش هنتكلم على اللى حصل فى المحله سواء ان كان السبب الامن او البلطجيه والحراميه
بس انا مبحبش ده يتكرر
علشان تأخدوا قرار بحاجه لازم تبقى مترتبه لازم يبقى فى سياسه معينه وتنظيم افكار شويه
انا بجد معنديش مانع اقعد فى البيت ان شاء الله طول السنه تبقى 6 ابريل بس ها ايه النتيجه بقى

غير كده المهازل اللى بشوفها من ردود فى الجرايد ما بين الوفد والشباب دول والتجمع والاخوان اللى حبه فوق وحبه تحت
ميديش اى امل ولا عمر ولا احمد حتى فى الموضوع ده خالص
انا مبجبش احباط لحد بس لو حد قادر يغير ليه الفكره دى يا ريت المره دى يغيرها

او تسبونى بقى براحتى واعمل انا حركه 32 ابريل او 25 يناير ايهما اشيك وكمان الوزارات تعمل اضراب اشمعنى هما يعنى بيتفرجوا علينا
هذا وبالله التوفيق ومحدش يحدفنى بطماطم كله يجهز شوم



كان معكم رئيس تنظيم بوتاجاز منفذ مدينه نصر ابى هانم




حكمة الامبراطورة


زى ناطح الصخره قرونه اتكسرت والصخرة متحركتش