اليومين دول كانت الانتخابات بتاعت اليونسكو وعلى الرغم من خساره فوفا حسنى واللى الطبيعى اننا نزعل مش علشان فوفا لا قدر الله ولكن علشان دى حاجه كانت لمصر لقيت كل البشر بما فيهم انا فرحانه ونفسى ينفذ كلمته ويستقيل ويبقى كده اول وزير محترم لو يعنى طلع قد كلمته مع انى اشك شكه الملوخيه ساعات حططان التقليه

السؤال بقى هو احنا كمصرين بقينا بنكرهه مصر للدرجه دى ولا مش معترفين بالناس دى للدرجه دى ولا ايه التتغير اللى حصل فى شخصياتنا

ملحوظه اتنين

الناس كلها دلوقتى بتعارض انا بقرأ مدونات كتير وجرايد واخبار كله بيعارض طيب انا عاوزه اسال اللى بيعارضوا انتم بتعرضوا على اى اساس يعنى عندكم خطط بديله سواء المعارضه للحكومه او حتى لفكر شخص سواء كان مسلم مسيحى رجل دين رجل مجارى رجل كباريهات اى رجل واى كلام احنا بقينا بنعارض علشان نعارض وبس يعنى واحده مثلا لبست شوز حمرا هتلاقى الدنيا قامت وقعدت ليه معرفش علشان الاحمر وحش ولو ان لا مؤاخذه هنلاقى اغلبيه اللى اعترضوا عندهم اللون الاحمر ده بس فى حته تانيه ومحدش يفهمنى صح بجد
انا بقيت بتنقط انا لما بعترض على اى تصرف لاى حد بكون واضعه لاعتراضى اساسيات يعنى مينفعش مثلا ابو رجل مسلوخه جاى يزور حاجه عندنا هووووووووب نقول لا ابو رجل مسلوخه ميدخلش ونعمل مظاهرة
مينفعش مثلا نقول هنعمل تجمع فى مكان وفجأه تلاقى الاعلام وكام شحط طالعين يقولك الامن فطسنا والامن كان حوالينا ما ده طبيعى ده تجمع وتجمهر ومش عارفين هيحصل فيه ايه احنا هنعترض ليه سواء بقى الامن بيحمينا ولا حتى بيعمل حاجات وحشه فى البنات طالما انا ارتضيت يبقى خلاص اسكت

مينفعش يبقى فيه تواجد مكثف للناس فى اماكن واعترض انهم بيلغوا مولد او بيلغوا حاجات مقفوله وعندنا وباء انا عاوزه اعرف الناس المعترضه بتعترض ليه ايه هى اساسيتها يعنى

مينفعش اعترض على النقاب علشان امشى فى موضه مينفعش انتقد الحجاب علشان يتقال عليا متحررة مينفعش برضه واحد تعترض على غير محجبه علشان يتقال عليها ملتزمه انا نفسى اللى يعترض يقول مبرر صح واحد بس

وابوس ايديكوا لما تعترضوا على كلامى برضه قولوا ليه مبرر قولوا ليه

برضه المدونات كترت ليه اوى كده ما شاء الله مبقتش ملاحقه يعنى اللى بقى بيدخل التدوين ده جديد ليه علشان ايه الهدف مدونه تفتح شهر وتقفل ولا شهرين وتقفل

اصلا انا عاوزه حد يقولى انا ايه مصبرنى عليكوا وعلى البلد دى وعلى انى اقرأ واكتب كل ده منك لله يا اللى فى بالى

وكل الحاجات اللى متنيله فوق دى مكتوبه نطلع منها بايه على راى خيخه ان ليكم الجنه انكم متحملين واحده زى كده بجد كل سنه وانتم طيبين ومعترضين بالعقل

كان معكم لواء اركان حرب قائد جناح الطابيه اليمين ابى هانم


حكمه الامبراطورة

يغور القاعود اللى يجى من ناقة جربة

غمض عنيك وانت بتبص على الصورة


تحديث:- انا بعت سؤال وكنت متاكده انه مش هيرد او هيرد فى ناحيه تانيه وبالفعل اللقاء متكرر نف سالكلام بتاع ابوه الخالق الناطق ونفس الكلام اللى عاوز مترجم من وراه يشرحه للناس البسيطه ونفس هطل بتوع الحزب فى انهم يدافعوا ويساندوا
بس الميزه ان فعلا كان بيتصدم بالاسئله وده اللى كنت عاوزاه انه يعرف ان الناس مش مغيبه ويعرف هيتعامل مع عقليات عامله ازاى
وده الغرض النهائى بالنسبه ليه لما قولت لكم ابعتوا اسألوا

الظاهر بعد ما الوزاء والقيادات لقوا الشوبا ب يزنقوهم كل فتره فى الاسئله وبيحرجوهم فى كل مكان ققرراوا يعملوا عمليه انتحاريه ويخلوا الشباب يسال مباشر بس عن طريق مواقع بدل يعنى يعنى ما تتعبوهم وتحرجوهم فى التليفزيونات
الموضوع ببساطه ان جيمى عامل اللينك ده علشان اللى عاوز يسال وهو هيجاوب
http://www.sharek.eg/

بصوا بقى خلينا نتكلم جد الموضوع انا قريته فى المصرى اليوم
احنا ليه لا منسألوش ونرتب اسئله كويسه
بمعنى منكونش هجوميين لان الناس دى لما تهجم عليها تقولك شعب متخلف ملوش فى الديمقراطيه ولا الحوار وبتكون دى حجتهم ودايما يقولوا غوغاء زى جمعاء كده اللى كان بيقولها اسمه ايه ده فى فيلم خلى بالك من زوزو
طيب طالما الحج مقدم السبت نروح احنا له الاحد
بمعنى هو عاوز يعمل حوار وعامل موقع ليه لا ننتناقش ونبعت له الاسئله
بس يا ريت نبعت اسئله هادفه ومحدش يسالنى ازاى انا مش عارفه اصلان اصلان يعنى
بس فرصه من غير ما نشتم ولا نتكلم كلام مش لطيف نزنقهم فى الكلام والمناقشات
ولو الموضوع مش جد اوى وهما هيطنشوا حاجات يبقى على الاقل قريوها وعرفوا ان الناس بقى عندها وعى اكتر وعارفه البلد اكتر
مش عايشين فى البالوظه
الخبر هنا فى المصرى اليوم بس لينك الفتيس توك مش شغال التانى ده هو اللى شغال
كليك هنا


كان معكم ملازم اول بحار قسم اذاعه حره واهداف ساميه جمال ابى هانم بتنجانى


حكمه الامبراطورة

قليل العقل يلاقى المطبلاتيه كتير

للمرة التانيه على التوازى التوالى المحورى يتحرج القطن طويل التيله ويتحول بقدرة قادر لقصير التيله ويصبح اضحوكه فى المولد كما الارجوز الخايب وحظه دوننا عن كل القطن انه يبقى زى قليل البخت اللى عضه الكلب فى المولد تقريبا انا بدات اشك انه فى الوزاره دى علشان يتلقى الاحراج من الداخل والخارج وانا علشان قلبى طيب وبنت حلال متصفيه من كل الدم اللى عندى علشان هما نشفوه منهم لله احب اقول استقيل بقى يا راجل ربنا يرحمك هتقصر اكتر من كده تروح فين القصه وما فيها وفى بورسعيد هجيب لكم الكلام خبط لزق وهعلق على رد القطنه

البظاظو «رئيس الوزراء»: «الفساد فى كل مكان.. وحاسس إن البلد مش بلدى»

وقف الطالب عبد الله أحمد بظاظو فى مواجهة الدكتور أحمد نظيف، رئيس مجلس الوزراء، وهتف قائلا: «أشعر بالفساد فى كل مكان وبقيت أتنفسه ومش حاسس بمقاومة من جانب الحكومة. كل يوم الصبح أحس بالغربة، وإن البلد مش بلدى. ليه المواطن يشعر أن كرامته بره أو جوه مش موجودة، وهل بكيت سيادتك عند غرق العبارة والجنود اللى بيموتوا على الحدود». ( يبكى تحت الليالى والخوف من فقد الكرسى يملى القلوب ، مش عارفه ليه حسيت ان الواد ده كان ماشى حلو وفجأه عواطف قفشت فيه من قفاه واتنحنح هو ده بيبكى ده بفلوسى يا كليبه وبعدين الميه مبتوصلش فى العالى كده بسهوله فاكيد مش هيبكى عيال ساذجه صحيح) وفور انتهاء الطالب من كلمته دوت قاعة المسرح بالتصفيق لمدة تزيد على ٥ دقائق. خمس دقايق طيب اجيب اوباما علشان يصقفوا اكتر ولا ايه طيب الواد قال كلمتين جامدين بجد هو الشعب ده مبيصقفش غير لحاجه واحد الرقاصه واعتقد اوباما شويه زيها لان هز قلوبنا كلنا تيررررررررارررررر مين بيحدف طماطم هنا يا عيال انا مقصدش حاجه وحشه ) كان هذا واحدا من سلسلة المواجهات الساخنة التى دارت بين طلاب الجامعات ورئيس الوزراء فى معسكر إعداد القادة فى بورسعيد مساء أمس الأول، وكانت معظم الأسئلة حول الفساد وبيع القطاع العام وتصدير الغاز لإسرائيل والعلاقة مع أمريكا وإيران وإثيوبيا والغلاء والبطالة. وصل عدد الأسئلة إلى ١٩ بعدد الجامعات المشاركة. واستهل رئيس الوزراء الردود باعترافه بأن الأسئلة كلها فى الصميم، ( اى والله والبعيد معندوش ميه بقى علشان يحس شويه وهو يعنى مكنش عارف الاسئله دى ولا كان غايب من مصر ساعه لما حصل ده ادى اخره اللى له واسطه فى مصر يغيب كل الحصص بتاعت الفساد براحته انا هطالب انهم يلغوا الاجازة فى حصص الفساد ) وقال: هى الحكومة المصرية تبقى مين؟ ( تبقى ناس متعفنه من اول ريحه شرابها لغايه شعر راسهم يعععععععع ) اللى مالوش قريب فى الحكومة يرفع ايده؟ ( انا ارفع ايدى ورجلى وودنى كمان بس انهى حكومه حكومه الوز وابن العز طبعا معنديش ) لو الحكومة فاسدة نبقى كلنا فاسدين.. ( شفيق يا راجل انت مصدق بقك الكبير ده ايون احنا عندنا فساد لاننا اتعلمنا خلاص كله بيهبش فى التورته اذا كان موظف بيتنيل على عينه يسرق بتمرمطوا اللى خلفوه انما لو باشا كبير بقدره قادر او بعصاية الساحره الطيبه بتنقله بره مصر قبل الواحد ما بيغمض له عين ) 0نحن نبذل جهودا غير عادية لمقاومة الفساد، ( ايوة بياخدوا كل حاجه فى جيوبهم علشان يضمنوا يا حلوين محدش ياخد هو بيحافظوا لكم على فلوسكم اما شعب نمرود صحيح حتى شوفوا نتيجه بذل المجهود بيعرقوا ويسيبوا الناس تخبط دماغها فى الحيطه ويسافروا يعمل مانيكير وباديكير) وفسادنا من نوع مختلف، ( انت هتقولى ده احمر وبترتر الفساد بتاعكوا ) الفساد اللى عندنا والحمد لله منتشر فى حتت صغيرة. ( ايوه فى تهريب فلوس صفقات شراء اراضى وتصقيعها نهب الشعب فى ضرايب وبلاوى زرقه دى بسيطه خالص هو الشعب مياكلش ميه ولا يشرب محشى ويكتفى بالحشيش وهيخف ان شاء الله ) ووجه نظيف كلامه للطالب عبد الله بظاظو قائلاً: لا يا حبيبى مصر دى كبيرة قوى وإحنا ما بعناش بلدنا إحنا بنينا بلدنا ( ايوه مبعناش باماره القرى السياحيه اللى فى سيناء والاراضى اللى فى طابا مش مخلين جنس مصرى يعمل مشروع ولو عمل فعلا فعلا كأنهم بيرموا له عمل على الباب ارض توشكى مش اتباعت ولا مصنع دمياط اللى كان هيتعمل فطيس ولا الفنادق ولا القرى السياحيه اللى اصحابها اجانب مصر مش اتباعت خالص مصر استلفوها شويه وهيرجعوها ركزوا انتم بس ) ، عايز ادعو زميلنا ده يزور القرية الذكية ( فعلا قريه ذكيه ووزير اسم الله عليه اغبى من ولا بلاش علشان مظلمش حاجات تانيه ملهاش ذنب ) علشان يعرف مصر، مصر العاشر من رمضان ( هئ هئ هئ ايون اللى مهجوره من السكان والمصانع طالع تربنتين اللى خلفوهو مصر مدينه بدر اللى بقالنا داخلين على تلات سنين مش عارفين نركب خط تليفون للمصنع قبل ما يشتغل حجزين بقالنا سنه وآلاف الأفدنة التى تصدر البطاطس لأوروبا ( على ايدى بطاطس بزمتك مش عيب نبقى بلد القطن والقمح وتقولى بطاطس يا راجل يا فيرى ) ، مصر زويل ونجيب محفوظ والبرادعى والسادات وجمال عبد الناصر وحسنى مبارك ( اخص ونسيت جمال مبارك والوزراه والحكومه وانا وانت ورقصنى يا جدع تيت تيت تي ) ونسى يقول مصر امراض وعشوائيات وسرقه ونهب ودمار فى اماكن كتير نسى يقول مصر مجاملات وحرايق واهمال وانحدار فى المستوى بين الناس من غلبهم نسى يقول مصر اطفال بتتعالج فى كوليدور المستشفيات نسى يقول مصر شباب بتغرق فى البحر وناس بتموت على رغيف العيش وناس بتموت من حسرتها على ولادها اللى بيرجعوا فى صناديق خشب نسى يقول مصر الفراعنه بنوا الهرم واحنا حكومتنا قضت على الفراعنه وعلى احفادهم نسى يقول مصر بقت ملكيه خاصه وعزبه خاصه واتحولت لساحه معارك نسى يقول مصر راحت تجيب ورقه بوسطه ومجتش هى فين مصر دى منك لله انا بجد مقهورة منه وموجوعه هما لسه مستهيفنا للدرجه دى ولا مناخيرهم اتقطعت مش عارفين يشموا الفساد انا تعبت منهم لدرجه قرفى من كل حاجه يالا ربنا يستر فى اللى جاى ولو انى عارفه انه مش هيبقى اسوء من اللى احنا فيه ملحوظه الخبر من المصرى اليوم اللهى يحرق دمهم انطح هنا كان معكم لواء اركان حراب برتبه عميد اعالى الترع والبحار ابى هانم بتنجانى حكمه الامبراطوه كيس الجوافه اتحول اومليت افرحوا يا عيال .

على السريع بما انى فعلا مخنوقه على الاخر وقرفانه من البلد دى ومن كل حاجه وحسه اننا فعلا خلاص لو اتغيرت احنا مش هنعرف نعيش فيها من كميه العدوانيه والتجمد وحب الذات اللى فيها هقولكم كام ملاحظه على السريع اولا انا معملتش اضراب لانى مضطر اخاك لا بطل انى لازم اروح الشغل صاحب الشغل ملوش علاقه بالاضراب ولا الحقوق هو مش مقصر معانا بصراحه بلاس بقى انه مش مصرى نيهاهاها

2- السنه اللى فاتت الشوارع كانت الى حد ما فاضيه والقاهرة الجديده كان فيه بين كل كام متر ومتر ظابط وكمين النهارده الدنيا زحمه بجد او العادى بتاعها وكمان مفيش عسكرى يوحد ربنا حتى حونكل الامين اللى بيقف عند الصينيه بتاعت شارع التسعين لغايه 8 الا ربع مجاش والحياه بمبى خالص

3- واحده متضامنه مع الاضراب ولابسه اسود وواقفه تشترى حاجات ؟؟؟؟؟؟؟؟؟ هو مش المفروض النهارده منشتريش حاجه دى ملاحظات برئيه لغايه دلوقتى والله (ونعم الشعب اللى واعى وافهم ومش بيقلد الموضه وخلاص)


اللى جاى ده اتبعت ليه على الفتيس توك بتاعى اللى هى

اهداف الاضراب طب ليه بنقول اضراب 6 إبريل 2009 ...

ليه حنضرب بكرة ــ ضد الاستبداد والديكتاتورية ــ ضد توريث السلطة ــ ضد سيطرة رأس المال علي الحكم ــ ضد رجال الأعمال الوزراء ــ ضد الاحتكار ــ ضد جباية الأموال من المواطنين ــ ضد الرشوة والمرتشين ــ ضد تصدير الغاز إلي إسرائيل ـ ضد تزوير الانتخابات وإرادة المواطنين ـ ضد تعذيب المواطنين في السجون وأقسام الشرطة ــ ضد الاعتقالات ــ ضد اعتقال البنات ــ ضد المحاكمات العسكرية للمدنيين ــ ضد حبس الصحفيين ــ ضد محاكمة الصحفي مجدي أحمد حسين ــ ضد الفساد والمفسدين ــ ضد فرض الحراسة علي النقابات

بتمنى فى النهايه ان اى حاجه تدينى اى امل فى اى حاجه ومتكونش دى خطوة مش محسوبه تقتل حاجه او بذرة حاجه كانت هتبقى حلوة اوى واللى هما الشباب دول بس على فكره مصر مش هتتغير بده بس يا شباب لان البنيه الاساسيه خربانه يا عم خربانه

اه من ضمن الملاحظات بنات اتاخدوا من الجامعه بنتين من كام يوم وهما بيوزعوا منشورات ومحدش يقولى ده حق العالم كله ممنوع توزيع منشورات فيه كان فيه اكتر من طريقه بدل العلانيه دى انا مع انهم يوزعوا بس مش علنى مروحش احط ايدى فى بق الاسد واقوله عضنى اللى عاوز يفهم قصدى يفتكر الظباط الاحرار والتنظيم بتاعهم كان مبنى على ايه والظهور امتى علشان ايه برضه فى النهايه اليوم لسه طويل ويا رب متصدمش بجد
ملحوظه اخيره برضه قلب الام بيرق ويحن ولبست حاجه سوده :)

يا رب البسها على اللى فى بالى يا رب

العواف عليكم بقى علشان عندى شغل

حكمة الامبراطورة

روعة البلد دى زى روعه الحب الاتنين عاوزين الحرق والاعدام بحقنه ميه ساقعه

بعدما راودنى الامل الخبيث الذي يضاهي فى هذه البلد بنت عم القرد ميمون عشم عيشه ام الخلول فى المياه العذبه وايضا حصول الارمله المطلقه على معاش
ان التغيير الوزاري الجديد سيؤتى بثماره علينا وهنتنغنغ ونعوم على وش الفته فى اول ايام الوزاره الجديده ولكن هيهات وهأوات مصاحبه باصوات متحشرجه لا اعلم مصدرها احم احم

اتضح لى من البعد البؤري المتمركز فى اللاوعي المتفنيخ فى الركن البعيد الهادي ان الوزراه القديمه متزوجه من القيادات العليا جواز لا يجوز له الطلاق
ولازقه لزقه الكلب الجربان فى العمود وهو يقوم بحك ديله ( ومشوها ديله )
انتظرت وعينى تلمع لمعه الماس هذا التغيير ولكن جاءت عربيه الزباله بما لا تشتهي الانوف ولا البرك والمستنقعات ولكنهم رفضوا رفضا شديدا من الحديد الصلب ان يحركوا هؤلاء ولكن بما ان الموضوع داخل فيه برك ومستنقعات قالك مزعلش الشعب الطيب ده واعمل لهم وزاره جديده منها اجامل فيها امشيره هانم الصديقه الاولى لسيده القصر وليس البلد لانى لا اقبل ان تكون هذه الشخصيه سيده ترأسنى لانها كبيرها تترأس على السلم


وافرحوا يا عيال فقد قاموا بعمل وزاره جديده اسمها السكان وانا حقيقه الامر لا ادعي المعرفه بمعناها لان الحمد لله فى هذه الحالات على نعمه الجهل الذي اعيشها فى معرفه الادوار فى مسرحيه فاشله ولا مجاملات ليس لها معنى فانا بعد جهد جهيد عرفت معنى هيئه المجتمعات العمرانيه الجديده ووزاره الاسكان والتعمير
فنداء من كلبى من معاميقه يا من تعلمون ما هو معنى وزاره سكان ان ينوبكم هذا الثواب وتشرحوا لى او تشرشحوا ايهما اقرب لقلوبكم معنى هذه الوزاره

فانا اعلم انها لا تتعدي الخط الاحمرررررررر ده اولا ولا تتعدي مجامله ركيكه من الاخت طنط اسمها ايه دي ولا تتعدي نقل دم من قلوبنا وجيوبنا للوزاره الجديده لانج وسيارات فارهه وتشريفات وبدل انتقال وبدل استهبال وبدل استعباط
وبدل هرش وبدل زغزغه

ولم يكتتفوا يا ساده بهذا وذاك ولكن لا اعلم ما فعله الصديق العزيز اللى اساسا معرفوش وزير الري وهنا تدق اجراس الخطر فى بالى ما هو فائدته اصلا ولا اعلم ومن هنا اناشد السيد الوزير ان يتقدم باستقاله حتى التجديد حلو يا راجل انت مزهقتش من الوزراه ده بعد 8 سنين مبيكونش عندك ابداع وانا ماشاء الله شايفه ان فيه وزراه بقالهم ردح بفتح الراء من الزمن ارحمونا يرحمكم الله هو مفيش فى قاموس حياتكم حاجه اسمها تنيمه بشريه دا اللى متجوز واحده بيزهق وبيجدد
طلقونا بقى الله يكرمكوا احنا زهقنا انا بأقر وبعترف انى هرفع على الوزاره قضيه خلع وهستخدم حقى الدستوري
وهمرمطهم فى المحاكم ان شاء الله يكنسوا عليا الدائري والاتوستراد
مش هرحم ابدا اطلقه يا بابا اطلقه

وفى النهايه اكتشفت ان تغير حجر الشيشه اهم وانفع بكتيرررررر من الامل فى التغيير الوزاري

يا نصه غير يا ابنى الحجر خلينا نقوم

وكما قال الشاعر الشيشه حلال والتغيير الوزاري حرام

شعب نمرود صحيح قال يغيروا قال

كان معكم معلم كافيه الحياه ابى هانم توصيل الفقعات والوزارت للمنازل

حكمه الامبراطورة

اللى له ضهر ميتشالش من تغير وزاري واللى له مؤخره يتحط فى وزاره

احداث الازهر لم تنتهى ومن هنا من قلب العاصفه اتابع الاخبار والتصريحات الخزعبليه والمنشيتات العسكريه والغير عسكريه

والجهد الجهيد الذى تبذله العباسيه فى توريد المختلين عقليا للداخليه وعلى الجانب الاخر بشكر مقدما العباسيه فى الجهد الشنيع المريع اللى بتعمله فى محاوله لعلاج الداخليه بس احب ابشركم ان العباسيه خلص خلعت ايديها وعنيها ورجليها من القصه فقد خرجت ودخلت ولفت علينا الصحف المقصوفه على شبابها فى نقل طبيخ حمضان من طبيخ الداخليه وقالك ايه ان فيه المفتشه خرومبوس ودى غير كرومبو
يقال ان فيه صله خرابه فى العقليات بينهم كانت الست اللى فى عمر زهور الصبار بتفنسح ولادها فى الحسين وقال ايه شافت اتنين واحد فوق بيرمى لواحد تحت شنطه عند فسدق الحسين اللى بيقولوا ان التفجيرت حصلت من عنده هووووب التانى اللى واقف تحت ولا الحضرى فى زمانه اتلقى الشنطه على صدره قام مطلعها من مناخيره واولللللللوووووووووليه جووووووووون حطها تحت الدكه كل ده والست مرجانه واقفه تتفرج وكان فى ايدها الكام وخافت تصور وبعدين جريوا جريوا وقعدوا يجروا وركبوا تاكسى وحصل الانفجار

وطلعت الغازات السامه على بتوع الداخليه اللى هناك وبالتالى اتنقلت العدوى اكيد للباقى انا قولت يطعموهم ضد العض محدش سمع كلامى المهم السوت مورجانه دى ركبت عربيتها وجريت وراء التاكسى وشافتهم داخلين بيت وسالت البقال (انا شوفت الفيلم ده فين قبل كده )
وبعد الحادث بكام يوم بلغت اه يا عينى اصلها اتخضت خضه الارمله المطلقه يا عينى عليها

والله بجد ده اللى حصل واتنشر فى العدد بتاع المصرى اليوم يوم 25/2/2009
اولا ردا منى ند بند لبتوع الداخليه بما انى بروح الحسين كتير جدا واصحابى هناك اولا البارك بتاعت التاكسيات لو انت وشك لشارع الازهر مش الاتوستراد هيبقى على اليمين وممنوع وقوف اى عربيه الناحيه التانيه جامع السلطان الغورى واول شارع الغوريه وممنوع اى عربيه تقف هناك غير التاكسى وبقى نادر البارك الخاص بالعربيات فيه اتنين واحد فوق عند مستشفى الحسين والساعه بتلاته جنيه اى والله حار ونار فى جتتهم يا الشارع اللى بعد الشريف للبلاستيك فيه عيال بلطجيه هناك بنركن عندهم العربيات بنات وولاد والساعه بخمسه او عشره جنيه على حسب مش الساعه الوقت كله عموما بس بما انى كنت شبه يومى هناك فكنت انا مبلطجه عليهم وطلعهم كل مره غلطانين ومبدفعش حاجه

المهم يعنى نووووووو واااااااااااااااااى يا سياده المفتش خرومبو اللى انتى بتقوليه خالص انتى وخريجي العباسيه

اتنين بقى ملاحظه ان شويه اتنين منقبات لا واحد ملتحى كأن الملتحى ده بيخبى فى دقنه قنبله طيب وحياة مانتى لو شوفت واحد ملتحى وكان معرفه يعنى لافتش دقنه وانا حنزرت اهو
المنقبات قولنا فيه فرق مش معنى ان واحده لابسه نقاب تبقى هى منتقبه ممكن واحده مستخبيه او واحد وده مش معناه عيب فى اللبس العيب فى الشخص ولو الداخليه بترمى على ده انها تلزق فى اى حته وبس يبقى بالمره الغوا الباروكه والماسك والميك اب لان كل ده بيغير الشكل
اه والحلوين اللى بيخافوا من المنقبات يا ريت لما واحده منقبه تتعرض لكى ابقى كعبليها اى والله مش بهزر لان طبعا صعب بلبسهم انها تجرى فبالتالى علشان متخافوش وتقولا دول مجاهيل بالنسبه ليه قومى حطه رجلك ومكعبلاها على بوزها لو عملت فيكى حاجه

لو يهمك اوى تعرفى دى بنت ولا ولد مع انه ميخصش حد ابقى اساليها الساعه كام او اساليه ا اى حاجه واعتقد لو حد عنده الشجاعه وحد منقب اتعرض له من السهل يشد الطرحه من على وشه وكده ابقى حليت مشكله المتخفيات مش المنقبات لانى اعرف ان المنقبه محترمه اما اللى غير كده فهى بتسئ لروحها ومش للنقاب فى حد ذاتها تصفيييييييق ححاااااااااااااد على الحلول بقى

ملاحظه اخيرة اى والله لاحظت ان بعد موضوع الحسين كل يوم والتانى يمسكوا واحد بصباع محشى بيحب فيه ويقولا عليه ارهابى وفجأم طلع مهندس ماشى من غير رخصه ولا بطاقه وحاطط فى عربيته ديناميت ولاب توي وحاجات كتير مش عارفه اخترعوها امتى وقال ايه الظابط قفشه من قفاه طيب يا ولاد المجانين واحد ماشى بكل البلاوى دى وهيلفت النظر ليه ويمشى من غير ارقام للعربيه وكمان فى الهرم
غطينى يا مانتى وزغرطى بجد على اللى بيتقال
وعيل بيرمى زجاجه هايفه مليها جاز وسخ على دماغه ودماغه اللى خلفوه يقولوا عمليات تفجيريه هى ايه القصه ما كل يوم مناطق بتولع ومفيش فايده
هى الداخليه مش عارفه تعالج عجزها فهتطلع علينا حد يجيب لهم فياجرا يا جدعان بلاش كده هيبهدلوا الشعب ابن اللذين ده

يا شعب والنبى خفوا ايدكوا الداخليه والحكونه تعبت بس على راى صديقى بالذمه مش موضوع مختل عقليا احسن من اللى بيعملوه ده وبيقولوه حتى والله اخدنا عليه وبقى عشرة كده والعشره مبتهونش غير على ولاد الحرام اى والله وعموما بلدنا بقى فيها منهم كتير

ومن هنا ينتهى تصريحات البقليه (الدخليه وده اسمها الجديد بم ان يعنى كل كلامهم مبقلل كده يعنى ) اللى طالعه علينا بالتقليه ليل ونهار

ومن موقعهم وبالنيابه عنهم بما انى حسه انهم فيصوا ونفسوا وجابوا اخرهم بيهدوا الشعب الاغنيه العظيمه للفنانه اللولبيه المهلبيه اللى منه لله اللى ورهانى اغنيه آآآآآه يانا تعبانه ودى اهداء من الداخليه ليكوا ارحموا الست بقى انطح الاسم هتروح للاغنيه

تفجير :- اياك اشوف حد بيحدفنى بالطماطم دى هديه ليكوا ومحدش يردها عيب دى الداخليه بتحافظ على الامان مع الملابس الداخليه وده هدفها فى الحياه حتى اسالوا اللى راحوا قمل الدوله نيهاهاهاها

كان معكم ملازم اول عميد استاذ دكتور ابى هانم استنجلينا

حكمه الامبراطورة

زى الابره بتغطى غيرها وهى عريانه

الصوره اهداء محمد عتلم ايوه اشمعنى انا اروح فى شجره لوحدي لازم حد يبقى معايا اي خدمه يا فنان

سبيب بترتر واحد ( يعنى شكرا بالروسي شوفتوا الثقافات

==================

بما ان برضه حكومتنا الرشيده النظيفه بنت ام عز مصممه على انها تعاير فينا فالسلام ده حاير طاير منى ليهم ونبتديهم بالكبير كبير اونكل عادلى
طلع علينا فى عيد الشوربه ووزع شيكولا على الناس فى بعض المناطق المجاوره وبما اننا مش عارفين ومش راح نعرف ايه هى المناطك دي يبقى الراجل مبيكدبش زي القطنه بالظبط بس انا معترضه اييوووووون انا ماخدتش الشيكولا بتاعتى يا اونكل والله وانا مبحبش غير هيرشيز ولاحظت ان كل حاجه رخصت الا هى وبقدم التماس ليك علشان ترخصها يعنى حرام تلاته جنيه وخمشه وشبعون قرش ادفعهم غير ان غالبا مبلاقيهاش غير فى شون ذا رن فانا اشجب واعترم واطالب بالشيكولا بتاعتى
ونصيحه اخويه يا معلم الشعب مش محتاج شيكولا الشعب محتاج الاحترام من ولادك يا كبير العيله محتاج الكبار يخفوا عنهم علشان ميطلعوش تتتيييييييت ابونا احنا او على الاقل الغلابه
وشكرا لكم لحسن فرستنا بالقوي

شكر بترتر اتنين
========

لابو عوكل يعنى الادب يعنى الاخلاق يعنى الكبير والله يا ريس جمايلك مغرقانا فى بحر فى جو فى حتى حله شوربه ولا مايوه محوق ولا علمنى العوم والنبى يا سمسم نافع برضه:)
يعنى هتدينا اجازه يوم عيد الشوربه طيب انا موافقه بس على شرط اروح القسم الاقى ظابوط كده مستحمي ويقولى احنا اجازه النهارده ...ها كده عدانى العيب واتزحلق ملكش عندي حجه اهو هسمع كلامك لاول مره لا مش لاول زي كل مره فى حياتى
بجد احنا مش محتاجين اجازتهم احنا محتاجين امممممم انظر الكام سطر اللى قبلك ايون اشمعنى انتم هريتونا فى كتب الوزراه انظر ص 34 ومعرفش ليه الرقم ده هو كده

ميرسي بترتر ثلاثه
================

يا اونكل عادلى معلش نسيت اقول لحضرتك انت بتقول مفيش تحرش وهو مش ظاهره اه فعلا احنا شعب نمرود قرود فعلا هو مفيش تحبرش ده فيه تلزيق فى الناس بس هو يا اونكل مش قلت لحضرتك يا ريت تنزل بس من الهامرشيدس وتبص على الشعب ابن النمرود ده علشان تشوف ولا اللينسيز مش جايبه حاجه معاك خالص عموما ممكن اتبرع لك انا والشعب ....وانا بما انى امبراطوره هحكم عليه بده انه يتبرع لك وتعمل نظاره على حسابنا او حتى نشترك لك فى التاميم الصحى الا صحيح انت عندك تاميم صحى زينا كده اللى بيعمل للناس اسواء نضارات
يا رااااجل ده حتى العيال الصغيره اتعلمت تتحبرش ولسه جايبه اتنين متحبرشين بكاوتش عربيتى عيب كده والله طيب العربيه ترد تعمل ايه غير انها شغلت الانذار ورقعت بالصوت البطوطي ولما خافت من الفضيحه قامت طبت سكته يا قلبى عليكي يا بطوطي

ثانك يو بترتر اربعه
====================

وان مكنتش انت تدلعنى مين هيدلعنى مع كامل احترامي لعمرو موسي طبعا كلنا شوفناه واللى عمله فى مؤتمر دارفوس دي ولما قام ومبقاش عارف يعمل ايه يمشى ولا يقعد وبقيت حسه انه بيغنى مشينا كتير تعبنا كتير لمحمد وفؤاد وفى الاخر قعد
بس بصراحه انا احترمته الوحيد اللى لما برر تصرفه برره بحاجه بجد كويسه وقال كان لازم استنى يا هوا علشان لو ابو بريزه قال كلمه كده او كده وانا ... وبصراحه معاه حق ابوبريزه ده راجل لئيمه وعمال يتكلم وانا مقطعه الملايات من العياط بصراحه والشحتفه اه بجد صعب عليا بس بجد البتاع ده مصدق نفسه وهو كده كائن هلامي جمبري بكلامه ابو ريحه وحشه ده
انا بقى واحده من الناس احترمته لانه عامل الشعب ده على انه بيفهم
ومن هنا بجد بقوله السيده فى ضهرك والعدرا فى وشك يا جدع اى حد يقول اي حاجه من باقى الحلوين يا ريت تطلع انت تصحح غلطهم وخليهاعليك يا كبير ولو معملتش كده هكنس عليك صلاح سالم رايح جاي ويبقى حرام عليك انا واحده صاحبه مرض وبطوط مع بعض

جراتسيا بترتر خمسه
==================

يا عم القطنه قولنا انها بتكدب مش قلنا قبل كده كدب مساوي ولا صدق منعكش افيش فايده برضه مصمم انك تضحك علينا برضه تطلع تقول اقتصاد مصر متاثرش ايييييون فعلا هو بقى اوزعه مش اتقصر يا راجل ده الحاجات رخصت ومحدش بيشتري طيب يرضى زمتك اللى باستك دى
طيب انا مش راح ارد عليك علشان مانتى قالت ليه مترديش على حد اطول منك
وبهذا تنتهى نشره الاخبار المحليه من غير سكر وعشانا عليك يا رب

كان معكم ابى هانم المحروسه من امام تصريحات كبار مصر المأروصه

حكمه الامبراطوره

عامل فيها معلم ولا عارف يتكلم

تحديث هام جدا:- مستشفى فلسطين كلمونى فيه حاله محتاجه حقن حديد بنت هى سنها فوق التلاتين كانت مناضله واتسجنت تلات سنين وطلعت تعبانه جدا اللى يقدر يجيب ليه الحقن يا ريت هي مستأصلين الامعاء بتاعتها يعنى بتاخد حقن بس اللى عاوز يساعد يقولى فى الكومنتات يا شباب

اللى هى يعنى معاهده كامب ديفيد علشان احنا كل يوم نعيد ونزيد فى نفس القصه وكل يوم الاخوان والمستقلين والشعب يقولك اوقفوا تصدير الغاز طيب يا جدعان اساسا ده بتنجان توقفوا ايه مش هيتوقف افهموا بقى الحكومه سيباكوا تضربوا فى بعض ما بين مؤيد ومعارض وهى مش هتعمل كده ولو بعد ميه سنه الا اذا استرجلت ووافقت على الحرب واقولكم ازاى الاتفاقيه فيها نصوص بكده لو وقفت تصدير الغاز يبقى بتعلن الحرب على اسرائيل وطبعا مصر مش هتعملها وهحط لكم بنود الاتفاقيه حسب الترتيب لو عملنا كده بس ركزوا علشان تفهموا ادى اول حاجه من نصوص المعاهده

تفق الطرفان على أن العلاقات الطبيعية التي ستقام بينهما ستضمن الاعتراف الكامل والعلاقات الدبلوماسية والاقتصادية والثقافية وإنهاء المقاطعة الاقتصادية والحواجز ذات الطابع المتميزة المفروضة ضد حرية انتقال الأفراد والسلع. كما يتعهد كل طرف بأن يكفل تمتع مواطني الطرف الآخر الخاضعين للاختصاص القضائي بكافة الضمانات القانونية وبوضع البروتوكول الملحق بهذه المعاهدة ( الملحق الثالث ) الطريقة التي يتعهد الطرفان بمقتضاها - بالتوصيل إلى إقامة هذه العلاقات وذلك بالتوازي مع تنفيذ الأحكام الأخرى لهذه المعاهدة.

وطبعا عارفين اى حد يخل باى جزء فيها يبقى بيلغى الهدنه ويعلن حرب رسمى تانى حاجه علشان اللى مش عاوزينها تدخل قناه السويس برضه هتدخل غصب عن مناخيركوا وادى النص

تمتع السفن الإسرائيلية والشحنات المتجهة من إسرائيل وإليها بحق المرور الحر في قناة السويس ومداخلها في كل من خليج السويس والبحر الأبيض المتوسط وفقا لأحكام اتفاقية القسطنطينية لعام 1888 المنطبقة على جميع الدول. كما يعامل رعايا إسرائيل وسفنها وشحناتها وكذلك الأشخاص والسفن والشحنات المتجهة من إسرائيل وإليها معاملة لا تتسم بالتميز في كافة الشئون المتعلقة باستخدام القناة

وفيه نص على ان مصر لا تشترك ولا تحرض ولا تتحرك من مكانها بشكل او باخر بخصوص اى عدوات مع الجيران ولا تشترك فيهاولا تحرض بشكل او بأخر

تعهد الطرفان بالامتناع عن التهديد باستخدام القوة أو استخدامها، أحدهما ضد الآخر على نحو مباشر أو غير مباشر، وبحل كافة المنازعات التي تنشأ بينهما بالوسائل السلمية.
2 - يتعهد كل طرف بأن يكفل عدم صدور فعل من أفعال الحرب أو الأفعال العدوانية أو أفعال العنف أو التهديد بها من داخل أراضيه أو بواسطة قوات خاضعة لسيطرته أو مرابطة على <2> أراضيه ضد السكان أو المواطنين أو الممتلكات الخاصة بالطرف الآخر. كما يتعد كل طرف بالامتناع عن التنظيم أو التحريض أو الإثارة أو المساعدة أو الاشتراك في فعل من أفعال الحرب العدوانية أو النشاط الهدام أو أفعال العنف الموجهة ضد الطرف الآخر في أي مكان. كما يتعهد بأن يكفل تقديم مرتكبي مثل هذه الأفعال للمحاكمة.

يبقى مصر مكنش فى ايديها الا انها تقف ساكته ويطلع الريس متقال يقول لازم الصديكه توافق على فتح المعبر لان مش بادينا يا اخوانا كمان تقليص عدد افراد الجيش الى 250الف جندى فقط وطبعا مصر دلوقتى بالشباب اللى يفرح ابو بوكس احمر وعليه دباديب اى والله بشوف العيال فى الشارع ماشين فرحانين بيه كده وشكلهم مقزز جتهم القرف وفى ظل الظروف المخضراوتيه دى كله بيتهرب من الجيش واللى بيقضى الجيش يا عين امه بيتسحل سحله البوبى الاعور يا بيبنى كبارى يا بيكنس الشارع يا بيجيب طلبات للهانم والبيه من عند بتاع الخضار يبقى معنديش حد احارب بيه متدرب

كمان سحب السلاح الروسى اللى كان عندنا وتعهد الولايات المتحده بامدادنا بالسلاح من عندها وطبعا الروسى اقوى (طبعا بمب وصورايخ ومصاصه لولى بوب ده السلاح الامريكانى) والمعونه طبعا وده لان بعض الدول اللى ايامها موافقتش على معاهده السلام دى فخالتنا الولايات قالت انا هديكم فلوس مقابل متضايقوش الناس الصديكه علشان كده احنا بنسكت علشان المعونة
وبعد كده طبعا باقى الدول انضمت وبقت بتاخدهم بالاحضان بعد كل ده تفتكروا مصر دوله ذات سياده فى اى حاجه

هتقولوا الغوا المعاهده مش هتتلغى لانك معندكش جيش ولا تقدر تعمله ولا تقدر تمنع تصدير الغاز ولا حتىتقدر تمنع صواريخ بتترمى على اهلنا فى رفح وواحد كل يوم والتانى بينشنوا عليه ومينفعش دلوقتى على راى صديق ليه تقولوا له استرجل لان عمره ما هيسترجل ويغير فى حاجه هما سايبنا كل يوم والتانى نقول الغاز الغاز وعلى راى المثل رموا لنا عضمه يلهونا بيها وبنطلع اى كلام جوانا

انا لما قريت الاتفاقيه دى جتلى صدمه لان باقى بنودها كلها لصالح اسرائيل وفكرت بمنطقين مصر مش هتقدر تلغى حاجه لان معندهاش استعداد ولا امكانيات
تانى حاجه كل حاجه تتحل بالاتفاق زى كده كل حاجه بالخناق الا الجواز بالاتفاق وحاول نغير الزفته المهببه دى
نطلع من ده بايه
مصر طلعت من حرب اكتوبر مش منتصره دى دخلت فى مرحله الوكسه الاكبر انا مش ضد معاهده سلام وعلى فكره الاردن معانا فيها انا ضد انها تعجزنا بالشكل ده فبقولكوا ايه ريحوا نفسكوا وسيبكوا من اللى كل يوم والتانى عاملين واقفين زى البط وواقفين على رجل واحده على السلالم والنقابات ونقول الغاز لان ده برضه لمصلحه الحكومه لسبب بسيط بتقول لامريكا انا شعبى مش ملتزم بس انا كويس اهو
فوقوا بقى وشوفوا حاجه تانيه
هذا وبالله التوفيق واللى عاوز يجيله ارتفاع فى ضغط الدم يدور على الاتفاقيه من على النت ويقراها من كذا موقع

ملحوسه :- علشان محدش بيفهم بقفاه يدخل يقولى انتى موافقه على تصدير الغاز فبقولها لا طبعا مش موافقه بس احنا مربوطين ولازم نفك الربطه المنيله دى عن طريق انه يسترجل ويقلب بنود الزفته دى دلوقتى لمصلحتنا ازاى معرفش يبقى تركيزنا فى تغيرها مش هنبقى على الارض وعاوزين نمسك القمر ده عبط بجد واللى هيقولى حكم قضائى اخدناه فى تصدير الغاز هقوله انقعه فى شويه ميه واعمل به فنجان قهوة وانت بتقرا الجرايد لانه مش هيتنفذ بس لازم يبقى فيه حل تانى


كان معكم عسكرى اول برتبه عقيد ابى هانم

حكمه الامبراطورة

كلب حى احسن من اسد ميت

انتبهوا جميعا يا شوباب :- ايناس صاحبه مدونة نهر الحب عامله دعوه لزياره الجرحى الفلسطنين فى الاسماعيليه وادى اللى قالته ليه نتقابل فى الاسماعيلية يوم الجمعه 16/1 الساعه 11 ظهرا امام الباب الرئيسى للمستشفى الجامعى عدد الجرحى فى الاسماعيلية 19 حالة بعد ان توفيت شابه هذا الصباح منهم سيدة تبلغ من العمر 58 عام وشابة فى العناية المركزة عندها 17 سنة والباقى رجال من سن 17 عام الى الاربيعنيات ومازالت المستشفى تستقبل المزيد غير الجرحى اللى بالمستشفى العام
محتاجين تبرعات مالية وبعض الملابس عصائر للاستفسار رقم تلفونى هو 0188047779
اما عن نفسى ان شاء الله مسافره يومين وهحاول ارجع على الاسماعيليه نتقابل هنا محدش يتصل بالبنت يعاكسها بلاش الحركات القرعه دى اناعارفاها وعلى فكره هنروح زياره تانى بعد فترة بس يا ريت تبقو موجودين وخاصه مدونين الاسماعيليه


تحديث مزفت بزفت :- شوفوا الخبر ده شوفوا الخيبه اللى بيقينا فيها انا عاوزه حد يرد والنبى عليا ربنا يكرمكوا قولا ده اسمه ايه انطح هنا ابوس ايديكوا شوفوا علشان عاوزه حد يرد بس على السياده والرياله


براحه ومن غير عصبيه اهو الحلوين الكتاكيت اللى خايفين مصر تحارب وبيرددوا كلام زى البغباغانات وقولت لهم متخافشو احنا عندنا شباب فل اخره فرقعه من على الكيبورد وانا مش موافقه مصر تحارب اصلا لو عاوزين حد يحارب يبقى كله مع بعضه ده لو عندهم امكانيات اصلا واللى ماسكين فى كلمه ياسر عرفات الله يرحمه مع انى اصلا عمرى ما سمعتها ولا اصلا مصدقه انها صح انا هدافع لاخر جندى مصرى دى انا عن نفسى مكدبه الكلمه دى ولو صح يبقى زله لسان راجل بجد عمره ما يقصدها ابدا اكيد ربنا يرحمه يا رب وهو كان فيه كل الامراض اللى تخليه ميعرفش يقول كلمتين على بعض الدور والباقى على اللى لسانهم عامل زى لسان السحليه وبيغلطوا فى الكلام والتصريحات وبيكسفونا
انا مش ضد بلدى انا حزينه ومقهورة بجد من الحكومه الشعب غير الحكومه العالم كله عارف كده واللى مش عاوز يفهم ده يبقى ابن ستين تييييييييت وتيييييييت وتيييييييت كمان
لو اى حد له اى صاحب جنسيه تانيه هيقوله احنا عارفين المصريين انهم غير الحكومه وكله بيشهد لنا بده
ولما بيتعشموا فينا علشان احنا طول عمرنا عندنا بطولات وامجاد ونيله وعلشان مصر هى الكبيره
محدش طلب مننا نحارب محدش قال موتوا نفسكوا قال اضغطوا على الحكومه لانهم كانوا مغشوشين فينا وفاكرين عندنا ورق نقدر نضغط بيه طلع عندنا ورق كوريشه بتاع الزينه وحتى مش محصل ورق كوتشينه

وبرضه الناس اللى يقولك مقدرش الغى المعاهده يا مامى اصل علشان اصل ممكن يعنى كده مصر تتبهدل وتدخل حروب واحنا البلاى ستيشن بتاعنا بايظ

طيب والله يعنى ماشى حاضر انا موافقه علشان كله خايف الا مجموعه صغيره من الشباب اللى لسه عندهم نخوه ومش فارقه معاهم وبيطلبوا الشهاده زيك يا ابو صابر

انا مش هشخط ولا ازعق ولا اقول بطلوا تتفرجوا على افلام والت ديزنى والنبى وتطلعوا الهبل وكتر اكل المصاصه والفيشار علينا

ممكن بقى حد يفسر ليه كام سؤال كده براحه

1- من زمان وكل يوم والتانى الكلاب الازرائليين ينشنوا على واحد مصرى ظابط او مدنى وخاصه الاطفال فى رفح كانهم بيدربوا علينا وتطلع الحكومه بنت العز وتقولك نيران صديكه انا نفسى افهم صديكه دى مااشيه على حل شعرها على طول كده ما علينا واحنا برضه هنسامحها ويضيع دم اطفال وناس حلو؟
جت مجموعه من فلسطين وضربت نار على اخواتهم مصريين ودول اتقتلوا ودول قامت الدنيا ومقعدتش وقالوا المقاومه ويخرب بيتها هما مبيشوفوش والعتب على الباب والكلام الفارغ ده وعلشان يزودوها قالك ده اتقتل فى مكتبه وهو من غير سلاح طيب ازغرط انا بقى ولا اعمل ايه هو فيه ظظظظظظابط مصرى مش على الحدود لا فى اى قريه مجهوله المعالم حتى بيخرج من غير سلاح ؟؟

طيب ازاى يعنى وقامت الدنيا ومقعدتش وقولنا ربنا يرحم الاتنين برحمته وياخد اللى كان السبب فى وقوفهم قدام بعض بالشكل المخذى ده ويصبر قلب دول ودول

امبارح بقى علشان كل حد يقولى المعاهده ومش المعاهده هسمعه اغنيه على الزراعيه يا رب اقابل حبيبى وهديله باى حاجه فى ايدى ومشوها ايدى يعنى

لما تدخل اسرائيل تضرب من على الحدود بتاعتنا فى الاجواء المصريه ولما ترمى رسايل على الناس تقولهم سيبوا الاماكن دى علشان هنضربها لما رائد وملازم اول واطفال وعساكر تتصاب بشظايا
مسمعتش كلب هوهو ليه وطلع عبرنا ابو قردان فين من ساعه ما قال دور مصر هو التعر..... واتكتم
مطلعوش نددوا ليه وشجبوا وانتحروا

السؤال بقى للبهاوات اللى بيقولوا اصل لو فتحنا المعبر يا مامى الفلسطنين هياخدوا سينا على اساس سينا دى يعنى اللى ساكنين فيها ولا اهلها بلاش اهل مصر كلهم فرد شمال

فين المعاهد مين اللى بيخترقها دلوقتى مين اللى متمسك بيها وبيتذل انفاسه بيها ومين ضاربها فى الحيطه

مصر سكتت ومعملتش حاجه او مش مصر حكومه الوز سكتت ونفشت ريشها علينا وقالت انتم خونه واحنا بنحميكوا بالليفه والصابونه يا كليبه يا غوغائيين يا وحشين واحنا اتكسفنا وسكتنا

وقولنا صح وبقينا حيرانين هما بيحمونا دول كبار وفاهمين
طيب بعد اللى حصل امبارح تحديدا ومش راح اقول من قبل كده والحاجات اللى بتتهدم والناس اللى بتموت سواء فى سينا ولا فى غزة
لسه بتسالوا عن المعاهده لسه فاهمين انهم بيحمونا احنا ولا بيحموا الكراسى لسه برضه مصممين ان الحكومه خايفه علينا
انا معنديش كلام بجد اقوله

معلومه على الماشى برضه الاونروا منعت من يومين توزيع الغذاء على الفلسطنين علشان العاملين معاهم استشهد منهم واحد والانروا زعل وخافت على المتطوعين بيها دلوقتى ازرائيل بتضرب فى الانفاق وانطح هنا وشوف وقرب المعبر علشان يتقفل رسمى ومصر تخاف اكتر..... ازرائيل بتضرب قنابل فسفور لونها ابيض وممنوعه دوليا يبقى معناه ايه؟
اهل غزة معندهومش اكل وعلى فكره ده قبل ما يتقال لهم ان الدقيق بدل يخلص مش شايفين ربط غريب وازرائيل ضربت ومصر قالت انا مش عاوزه مراقبين من ناحيتى خالص وهما بيهددونا علشان احنا رفضنا على الله حد بقى يفهم والنبى
حماس طلعت قالت انا موافقه بس ينسحبوا ويجيبوا مراقبين ...ازرائيل بتكمل خطتها وبتضرب
لسه برضه هنتهم بعض؟ ولا هنفهم اللعبه لسه برضه هنقول مين السبب ولا نفوق بقى
ها ردوا عليه هتفكروا ولا برضه هتغموا عنيكوا وتتشدوا ورا اى كلام ربنا هيدينا عقل ولا هنفضل متنحين ومنقادين ومش فاهمين وبغبغانات

الخبر اهو انطح هنا علشان تشوفواوبالمرة فيه خبر للست عايشه عبد الهادى بتقول اللى هيجى ناحيه مصر هنكسر رجله اه والله يا ام عبدوو انا عارفه انك قادره وتعمليها بجد بس مقولتيش تقصدى مين اصلك لو تقصدى اسرائيل يبقى كده روحى بقى اضربيهم على ايديهم وورينى هتكسرى المصاصه ازاى يا بيضه

ملحوظه :- يا ريت تشوفوا البوست برضه اللى قبل ده وتساعدونى فى الترجمه على الرغم من الاحباط اللى انا فيه

كان معكم مراسلكم من مجلس الوز الموقر ابى هانم كعب الغزال

حكمه الامبراطورة

وبكره ترجع ريما من عند صديقتها فى مارينا

تحديث:- ميرسي لكل اللى عمل يوم التدوينه البيضا بجد انا مبسوطه اننا اتجمعنا فى حاجه كويسه واليوم السابع هتكتب ان شاء الله عن الموضوع بجد مبسوطه اوي اننا اتجمعنا فى عمل كويس ويا رب يبقى بنتيجه شكرا استاذ احمد شقير



بما انى حد عاقل جدا فى بعض الاوقات وليس من عاداتى الدائمه انى اكون هذا كلا وحاشا وفاشا ومسك كل حاجه بالكماشه فقد قررت الفتره الماضيه عدم قراءة اى اخبار بترتر فى اى مكان
بس على غير العاده طلعت عيله وقريت ويا ريتنى ما قريت يا يونس يا خويا
لقيت الخبر ده انا هجيبه كله بصراحه علشان مقولش انطح ومحدش ينطح وتنطحونى انا

القاهرة - محرر مصراوي - شدد جمال مبارك الأمين المساعد ورئيس لجنة السياسات بالحزب الوطنى، على ضرورة التركيز في مراجعة تنفيذ مشروع توشكي على أرض الواقع، بدلاً من التقارير الورقية المكتوبة، مطالباً المواطنين بمحاسبة الحكومة والحزب الوطني على تنفيذ تلك البرامج

طيب سيبونى طيب بجد محدش يمسك فيه وانا هفهم انا مثلا بقول لواحد حل المساله دى واحده زائد رجل فرخه وودن كلب ورجل فار مسلوخ يساوى كام

اللى يعرف يحل المساله دى يحل اللى الباشا بيقوله يا جماعه

يا فندم انا معاك قلبا وقالبا وكوارعا وامعائا دقيقه فى انى احاسب الست نسيبتكم اللى هى الحكومه الرشيده النظيفه بنت العز واكل الوز بس ازاى وبعدين اوعى ترجع فى كلامك الراجل مش بس بكلمته الراجل براعيته لبقرته وعزبته

وحضرتك يا فندم مشروع توشكر ده بقالنا 100 سنه فيه ومفيش حل طيب احاسبهم ازاى

بص يا هندسه حضرتك فكرتينى باغنيه كلامنجى بتاعت الواد اللى بيغنى فى القطر ده

طيب يعنى اجيب ورقه وقلم واروح احاسبهم وبعدين حضرتك تانى بتتكلم عن الشعب

اى شعب بس ده اللى بيلف من شارع تانى علشان ميحركش قالب طوب من قدامه ويحاسب ازاى

بص بقى حضرتك يعنى بما انى صاحبه مرض وبطوط مطلعين عينى غير الكلاب الضاله غير الكمين اللى تحت البيت عندى

انت قولى على الطريقه واوعدك وعد اشرف عبد الباقى اروح على طول احاسبهم وهجيب لهم معايا ابو ورده وامها وعيلتها

فياكينى وفيكوناتى رفقا بى وبحالتى الرجاء على كل من يحل فزورتى يرسلها اللحزن الوثنى ويقوله حل فزورة ابى هانم

اسهل بكتير من اللى انتم بتقوله يا ناس كلموا الشعب بلغه يفهموها الله يكرمكوا يعنى ويوعدكوا بشقه فى مساكن الزلزال وتركبوا عربيه 127 زى باقى الشعب وربنا يرضي عليكوا يا رب

ارحمونا بقى وعلشان بس اكون تييتوقراطيه زى ما حضرتك علمتنا فعلا فعلا موضوع الصرف الصحى وتغطيه

المصارف بتكلف كتير وفعلا رمى الناس للمخلفات بتاعتهم فى الترع والمصارف بتكلف بس والله حضرتك انا شوفت

ناس بعد ما اتقفل المصرف ده عملوا جنينه قدام بيوتهم وبقت حاجه تفرح اى والله

وحضرتك برضه بقالكم يعنى 20 سنه بتصلحوا فى وصله من بعد ميت غمر لغايه بلد اسمها صافور حضرتك كاوتش العربيات النقل باظ منها 20 سنه حضرتك بلا مبالغه والطريق ده متعدلش فيه عود حطب حتى

يعنى يا فندم عفاريت الاسفلت الكاوتش العالى يعنى سواقين القطش اللى مبتغلطش والنقطه دى حايرة طايرة
اتخنقوا خنقه الدبدوب الميت يبقى اللى زى حالتنا يعملوا ايه بس
يا ريت حد لو فهم حاجه ينوبه ثواب ويفهمنى بجد

تفجير :- متنسوش التدوينه البيضه بكره تاخدوا اللوجو وتكتبوا العنوان التدوينه لبيضه وبس خالص تسبوها كده

كان معكم سواق قطش لواء اركان حرف ابى هانم

حكمة الامبراطورة

اللى يجيبه العويل يشربه

تحديث لاخر مره :- يخرب بيت التحديثات انا اللى عملت كده فى نفىسي وبقيت مؤدبه من الاول هشيل الالفاظ اللى بتجرح فى السيد ال.... شيخ الازهر بناء على طلب ناس بحبهم علشان بس ميزعلوش ودي اخر مره كلمتى هتنزل الارض وبرضه زعلانه منه ها بفى

تحديث تانى :- والنبى كلفوا خاطركوا واقروا اللينكات قبل ما حد يدخل يرد علشان يفهم انا اقصد ايه مش كل شويه هدخل اقول بجد انا تعبت وللتوضيح بس علشان مش عاوزه كلام من حد انا لما بنقد شيخ الازهر بنقد تصرفه لما قولت عره ااقصد التصرفات هو كشخص انا مبغلطش فيه ده بس للتنويه مش اكتر انا مبغلطش فى اشخاص انا معرفهاش انا مضايقه من تصرفات من ناس محسوبه للاسف علينا ومحسوبه على الازهر اللى هو منارة الاسلام

بما ان البلد بقت حاجه مفرحه اوى وقلبت مع حضرتى بانشكاح بصراحه وبقيت طول الوقت متنحه ومزبهله ومبقاش عندى اى رد فعل لاى حاجه فى الدنيا ورد الفعل هو الاكشن اللى بناخده اننا حتى نتعصب ولا نولول ولا نزغرط او حتى نلسع اللى قاعد جنبنا قفا فقلت احاول برضه اقرى اخبار بترتر لقيت الاخبار مشخلعه اوى ونفس الحاله المصاحبه بقيأ وهرش ونطح هى هى اول خبر بترتر

شيخ الازهر
=======

بما انه عيب يعنى اقول لراجل كبير عيب من باب العيب مش من اى باب تانى بس مضطره اسفه اقول انت راجل تصرفاتك مش مظبطه بصراحه طيب شيمون ابو بريزه وسلمت عليه وعملت مش واخد بالك وطلعت تقول ما هما اللى قالوا ليه انا مشفوتوش وجت بالصدفه واحنا حفاظا على مرارتنا استهبلنا وقولنا معلش انما جاى تقول دلوقتى انا مكنتش اعرف انهم محاصرين غزة يبقى اسفه بقى ليه هو الخبر مخبينه خوفا على سمعه غزة ولا يمكن علشان يجوزوها ويستروها فمش بيقولوا لك انها متحاصرة ولا خوفا على مشاعير حضرتك فمحدش قالك ويا راجل يا كوباره لما تقول فكواالحصار تقول لاسرائيل بس كخ كده وفكوا الحصار مش عارف تدور وشك هنا وتقولهم لموا نفسكوا شويه يا عم ترتر انت فعلا اثبت ان الازهر بيزدهر اى نعم والله حرام عليك هو فاضل ايه فى مصر متحولش لطراطير بترتر بسببكم روح يا شيخ منك للى كلت دراع جوزها انطح هنا الخبر متلقح اهو

خبر بترتر اتنين
========

وصوتى ياللى منتيش غرمانه كل يوم والتانى اخ قتل اخته اب قتل بنت عمة جوز خاله ام احمد الا مين ام احمد دى ما علينا واحد قطع شريان ايد بنت وهو بيسرق شنطتها وده حصل فى التجمع عندنا والحمد لله اتقبض عليه سحلو زوجه دكتور برضه وسرقو دهبها وعادى برضه كل الحوادث دى والحكومه تقولك مصر مفيش فيها بطاله ونسبتها بتقل واحنا نقول هما ادرى دول عارفين مصلحتنا احنا اللى سوداوين ومش شيفين الحياه والناس دى بتسرق وتقتل من باب الفشخره والفضا عادى يعنى بيروشوا على نفسهم وفى الاخر يرزعونا الخبر ده واخير الحكومه الرشيده النظيفه بنت ام عز اعترفت ان اساسا فيه بطاله انا ليه طلب قبل ما اموت اشوف حد اتعين من الهباب اللى بيقولوا عليه ده ولا حد بياخد مرتبات كويسه وبعدين هما بيصدروا الناس لبره علشان فى النهايه يقولوا مفيش بطاله ولما الطلبات يقل تبقى البطاله زادت هما الناس دول معندهومش من الاحمر اللى عند الناس

اخر خبر بتراااااااتير وحاجات بتطير
================

بما انى من اللى بيكرهو ايمن نور جدا وبحسه ممثل فزيع وفاشل كمان بس فى النهايه بقول يا رب فك سجن كل مظلوم اذا كان مظلوم ايمن بيه نور من فتره زعلان انه مبيصليش فى المسجد بتاع السجن ومعترض ورافع قضايا على دبان وشه والمحكمه حكمت له وبيقول ادارة السجن مرضيتش تنفذ الحكم ورافضه رفض شنيع مريع وتقوله كلا البطه يا وزة
طيب ده يبقى انتهاك للبتنجان والمصقعه بتاعته فى ايه
انما اللى انا مش فاهماه يعنى هو بيصلى علشان ربنا ولا علشان يتقال بصلى فى جامع ويعمل شوو هى الصلاه فيها شو هى عباده ربنا فيها شوو ما تصلى فى اى مكان بنبقى مسافرين على طريق وبنركن نصلى فى العربيه ايه لزمه الدوشه ووجع السنان ده مش قادره افهم كل اللى فهماه ان كل يوم بيزيد اعجابى بتمثليه وانه قادر يلفت انتباه المقروصه امريكا اللى رامى نفسه فى حضانها زياده ايمن انا بجد بكرهك ومبقتش تصعب عليا انت بقيت ممثل فاشل وبعدين هما نهوك عن الصلاه فى مكانك يا نووووووور افندى اللى عاوز يصلى بيصلى فى اى مكان رابعه العدويه كانت بتصلى فى سجنها وبيترمى عليها حشرات وبتصلى اتقى ربنا ومتاخدش من ده شو اعلامى انت مش ناقص بهلونات الخبر متلقح اهو لحرقه الدم اللى انا مش فهماها

واخيرا كده برضه انا لسه عندى حاله تناحه متناهيه وشايفه انى برضه مش فاهمه حاجه ومستغربه البلد دى كأنها مش موجوده وكانى فى عالم وهى فى مكان تانى وانا قررت مجبش سيره حد غايب بعد كده علشان عيب

كان معكم ابى هانم من امام عالم ديزنى هذا وبالله التوفيق واحترس البلد بتولع باللى فيها

حكمه الامبراطورة
تاج القيصر لا يمنعه عنه الصداع

فى يوم فى الشغل جالى تليفون واحد عادي بيعرض خدماته علينا المكامله كالتالى

الشخص:- صباح الخير يا فندم معاكي فلان الفلانى من شركه كذا بنصنع اكياس تعبئه مكرونه وعاوز اعرف انتم اتفقتوا مع حد ولا لا

انا:- صباح النور حضرتك الموضوع ده مش معايا ممكن اديلك رقم دكتور نور واتفق معاه هو المسئول عن الموضوع واديته الرقم

الشخص :- بذكاء فزيع مشوفتش زيه هو حضرتك دكتور نور فى مصر ولا بره

انا :- مذبهله قولت له حضرتك رقم موبيل فى مصر يبقى هو فين اكيد فى مصر بس بره الشركه دلوقتى

الشخص:- ايوه يعنى بره الشركه بره مصر

انا:- لاااااااا دا حضرتك حالتك صعبه بقول لحضرتك بره الشركه اكيد ما هو لو بره مصر هديلك رقم جوال يعنى مش محتاجه ذكاء

الشخص:- هو حضرتك ليه عصبيه اوي كده انتى اسمك نهله

انا:- وعنيه مبراه وكان قدامي المحاسب بيمضى منى اوراق لقانى هشد فى شعري وشكلي جاب ميه لون وهقع من على الكرسي من الغيظ والفرسه كتم الضحكه لانه عارف لو ضحك وانا فى الحاله دي هنفجر فيه زيه ماسوره الميه المكتومه

ورديت ببرود على الولد قلت له نهله ليه حضرتك يعنى اولا انا قولت لك اسمي بس انت ماخدتش بالك يبقى ليه نهله مش عارفه

الشخص :- اصل كان معانا واحده فى جيل المستقبل واسمها نهله وعصبيه زي حضرتك

انا:- نورت لمبه المخيخ عندي وبدات اكتم الضحك وانا خلاص هرفص من كتر الضحك والاستغراب والاستعجاب والاستنكار وزي ما أكون لقيت كنز قلت له جيل المستقبل هو حضرتك تبع الحزن الوتنى

الشخص :- بكل زهو وحسيت ان رقبته اتمدت بقت زي رقبه الزرافه من الافتخار والفشخره كانه قال انا ملاك نزلت من السما ايوه يا فندم وهى ايه المشكله

انا:- طيب حضرتك اتصل برقم دكتور نور وهو يفيدك فى الموضوع ده لان انا مش ده اختصاصى خالص هو اللى ماسك ده

الشخص:- طيب وحضرتك ليه زعلانه من الحزب الوطنى

انا:- زعلانه لاااااااااا دا انت حالتك صعبه وهو ايه عمله الحزن حضرتك علشان مزعلش منه يعنى

الشخص:- يووووا كتير عارفه حضرتك انا ساكن فى الهرم وبروح الدقى كل يوم كان بياخد منى المشوار ساعه ونص بعد الحزب ما مسك مصر حضرتك انا بروح فى ساعه الا ربع

انا :- بقاطعه بسرعه مين فين اولا اسمه الحزن الوتنى وحفاظا على مشاعرك مش عاوزه اقولك الحزن الوثنى غير كده هو ده الانجاز ده اقصى املك انك تختزل الوقت هو ده امل المصريين يعنى ما هو احنا لو ماشيين منظمين فى المرور وكل حاجه هنوصل لو ملتزمين فى حياتنا عمرنا ما هنبص الحزن عمل ايه وهنحس انه مش موجود فى الحياه لانه مصالح شخصيه

الشخص :- لاااااااا حضرتك فاهمه غلط ده بيدينا كورسات وبيعملوا اجتماعات وبيجيبوا لنا تى شيرتات وشنط هدايا وبيشغلونا

انا:- يا حرام اه اصل الشعب ماشي من غير تى شيرتات هو حضرتك مش حاسس بكل اللى بيحصل عموما علشان بس انا ورايا شغل كلم دكتور نور فرصه سعيده وربنا يوفقك وياخد الحزن بكل اللى بيتكلموا باسمه يا رب مع السلامه

لغايه هنا واتفرطت ضحك على الارض هو ايه الشباب اللى ده تفكيرهم هما الناس دي معندهمش ثقافه النقاش ليه بيردوا اى كلام فى اي كلام مفيش حاجه لها علاقه بحاجه خالص زي واحد تقله الساعه كام يقلك اسكت مش ام فاروق ولدت

هههههههههههههه طيب ايه علاقه ده بده بعد المكالمه دي افتكرت فردوس عبد الحميد وهي بتهرش فى شعرها وتقول هما اللى قالولى وانا مالى وحسيت انى بقيت شبها وعملت ازعاج للسكان اللى فى شعري والمحاسب مشي وقالى هجيلك وقت تاني لانى تحولت قدامه تماما هههههههه

الشباب دول حافظين انهم دايما متهمين ومحفظنهم كام كلمه يرجعوها فى وش الناس

ومكنش ده اول حاله تقع تحت ايدي من الحزن خالص ده كان فيه حاله مستعصيه واحد بيناقشنى ان الحزن اداله شرعيه مش عرفيه وفاهم انه طالما فى الحزن يقدر يعمل حاجه معندوش ادنى فكره ان اللى يحيد يمين او شمال عن الحون بيطير وبالقوي كمان وبيهدلوه وخاصه اذا كان عارف حاجه او قريب من الكبار او لو ناقش دول عاملين زي الغبغنات فى زمانها

بجد حسره عليها يا حسره عليها اللى يكون عندها شباب بالشكل ده ضايع فى التفكير

وقال عاوزين مصر تتقدم طيب منين وفين وامتى وازاي

باماره ايه طيب ده حتى المختلفين فى الافكار مبيعرفوش يتناقشوا مع بعض اللى فى حزب مش عارفين اهدافه وحتى لو عرفوا مبياخدوش بالهم انها مجرد ريكلام بس مفيش تنفيذ غير المصالح الشخصيه وشخصنه المسائل لحسابهم بس وبيتخلوا عن مبادئهم كلها قدام مصالحهم

وبالمناسبه دي اهديكو اللينك ده انطح يا معلم عن الحزن والتغيرات والشياطات اللى هتحصل ما بينهم قريب بسبب الحرس القديم والجديد

ونطلع من ده بايه بقى

اولا لما تكون سيلز مان فى شركه اياك تجيب سيره الحزن

ثانيا حاول تبقى لبق وذكي لانه مينفعش تكون غبي وانت بتكلم حد ومتعرفش ظروفه ايه فى الشغل

ثالثا ربنا ما يوقعك فى مديره زي كده يكون عندها حساسيه من الحزن ومتحاولش تستظرف

رابعا كلمت نور وانا بضحك وحكيت له اللى حصل ومات من الضحك ورفض العرض لان الشركه اللى تشغل حد بالشكل ده تبقى واقعه واقعه يعنى حتى بعد ما بعتوا العرض هههههههههههه

ملحوسه :- انتظروا قريبا حركه احم احم برياسه الريس ميشو والنايبه التقيله بتاعته اللى هو حضرتي بس اللى هيدخل لازم يجاوب على ميثاق شرف الحركه وتعيش حركه احم احم من اجل مستكبل كوي اشمعنى الحزن هبقى انزل لكم الميثاق

ومع السلام عليكو

كان معكم مفروسه هانم من قلب العيد الكبيير اللى اتسرق ابى هانم كعب الغزال

حكمه الامبراطوره

بكره نقعد على الحيطه ونسمع الزيطه

اصباح الخير عليكوا
بصراحه كده بما انى يعنى هقول راى بيصدم العقليات البشريه فتحملونى يا اخوة ويا اخوات بجد
انا بجد مش شغله نفسى بالاخ اوباما ده او اوبا بأعتبار ما سيكون .... لانى حسه انه زيه زى غيره
هيحب يقرص مصر ويقرقصها يقولك شيلوا المعونه وطبعا حكومتنا العفيفه الشريفه النظيفه متقدرش على كده دى بيوت ناس برضه
بالعقل وبراحه اوبا افندى هيغير ليه سيستم اللى جاى ناس حطه عليه امل فى مصر بتاع ايه
الاخوان والغد والوتنى لااااا سورى الوتنى مش مهم بعتوا له تهنئه ليه على اساس بيشتغلوا نفسهم ويقولوا مسلم هو رجع فى وشنا وقال انا مش مسلم
هو مٍسلم بالامر الواقع بس مش اكتر
الحجه ملك اللى بتخوفنى دى الداعيه ان شاء الله كانت رايحه تعمل معاه مباحثات فى شئون المرأه المصريه ليه هو ماله اصلا هى عادتنا زيهم ولا تقاليدنا ولا الدين بتاعنا زيه هى الست دى اتهرشت انا اه مش بحبها اه بتزعق ولابسه اسود على طول وبتخوفنى وانا اه توتى خالص وبتخض ايه يعنى
طيب ايمن نور ومهروش فى عقله وطول عمرة بيجرى ورا الامريكان وبيتمسح فيهم الاخوان بيهنوه ليه هيرفع لهم علم الاسلام هناك
شوفوا الخبر ده
انطح يا ريس وهتنطحوا بالعند فى اللى مش بيحب الكلمه دى هههههههههههههههههه

بيقولك هبعت حد يصلح علاقات مع مصر اه هيدق مسمرين جداد فى نعشها ومش بعيد نقوم الصبح نلاقى الشوارع كلها بقوا امريكان
يعنى هى كانت بايظه من ايام بوش ابو وشين والحكومه الظريفه اللطيفه كانت كدابه مش قولت انهم بتوع الكدب المنعكش حد يجيب لهم مشط يا جدعان
وبعدين باعت مبعوث يقابل رئيس دوله بزمتكم مش ده عار يعنى ينفع يا اخى والله انا مكسوفه لكم بجد يعنى فيه حاجه اسمها برستيج انت على طول ممرمط كرامتنا فى الارض ويقولك مطالب مصر خير بقى المطالب دى ايه حد يقولى وبناء على ايه بتطلب وايه كمان خبطها فى وشنا هنساعدكم عسكريا ونبعت طيارات طيب افهمها بقى دى بجد يعنى ايه عسكريا هو اللى بيدرب الجيش امريكان يا لهوى لا بجد هى مصر ماشيه على خطه عسكريه امريكيه اه صح والجيش عمال يبنى كبارى اى والله تسلم ايديه
ويقولك هنصلح العلاقات مع سوريا طيب بامارة ايه اذا كان بوش قايل انهم حلفاء للقاعده هتيجى انت يا حج تعدل على اجندا ماشى بيها الكونجرس كله بلا استثاء
بصراحه يا الراجل ده واكل مسقعه ومستهبله مصرى يا بيشتغل الناس والناس مبسوطه بالاشتغاله
انا بسمع كلام اونكل ابو الهول فى الحاجات دى هو قالى يا بنتى ايش تأخد الريح من البلاط قولت له بمعنى قالى هو ماشى على سياسه سيبك من الوعود البراقه (هى ايه البراقه دى ) اللى بيقولها علشان كان يكسب ود الناس بعد شويه هيدى لكله بالشوز على قفاه
انتم اتلهوا على عينكوا خليكوا فى بلدكوا وفى حكومتكم والريس متقال وولده الحج عوكل وبطلوا تتواكلوا وكل واحد يدخل يقول عندى امل
يبقى ده اهداء منى ليه يسمع اغنيه الامل بتاعت الست ام كلثوم ويروح يقعد على حرف البلكونه ويخليه عايش فى الاحلام والاوهام لان مفيش جديد
فى النهايه اتفقت مع اونكل ابو الهول على ده
انا بقول مش بيهمنى غير اللى هيأثر عليه انما اللى بنوا أمل وعمر واحمد كمان على اوبا افندى فاقول لهم من مزنقى هذا ابقى قابلنى يا كابتن عند اول قفا هنأخده

ملحوسه على جنب:- اللى بيقولوا الامن هو اللى حرق الغد اقولهم بلاش عقدة الامن يا اغبياء لان معروف ان الغد مين اللى حرقه الاعضاء وقله ادبهم والسلطه اللى بينهم والطمع فيها وجتكوا البلا مليتوا البلد بغابئكم وخبيتكم القويه وتعليق الخيبه على شماعات ناس تانيه الامن هيحرق الغد ليه ودلوقتى تحديدا هو ايه اللى حصل اصلا علشان يعمل كده غير كده للى بيقولوا مفيش تواجد امنى اقولهم انتم مش بتشوفوا لان مديرة امن القاهرة على بعد اقل من كيلو من المقر وشارع الموسكى اللى واصل لحزب الغد مليان دبابير ومعروف المنطقه دى بكده يا مجانين

كان معكم من قلب الاحداث وقلب ورق الخس
ابى هانم بتنجانى


حكمه الامبراطورة

ما يكابر في الامور الا غبي أو مغرور

الخبر ده من مصراوى عن انباء الشرق الاوسط بس والله لو حد جاله الضغط او السكر او حتى شلل او امراض العصر والمغرب يروح يرفع عليهم قضيه لانه يبقى اضرار بالصحه العامه للمواطنين وكما قال المثل خدوا فالكوا من عيالكوا وخاصه ابناء الحزن البار قال احنا اضرينا نفسيا ومعنويا ووقعدنا نعيط من الهم
انا هحاول اترجم الكلام بتاعه على قد ما ااقدر واللى يفهم حاجه ينوبه ثواب يفهمنا كلامى هيبقى بين قوسين وان شاء الله اترجم صح ادعولى بقى الى الجهاد

نبذل أقصى الجهد لرعاية الأسر الأقل دخلا وسكان العشوائيات

- أكد الرئيس حسنى مبارك زعيم الحزب الوطنى الديمقراطى أن للحزب رؤية شاملة لرفع مستوى معيشة المواطنين ( مواطنين العزب ولا مواطنين المنتجعات السياحيه ) ويسعى لتقديم حزم متنوعة ( كده بيعمل لصحتنا هيقدموا لينا حزم فجل وجرجير وبصل ولا بلاش بصل ريحته وحشه وحزام مفخخ يخلصنا من الهم اللى احنا فيه )

لبرامج تحقق التوزيع العادل لثمار النمو الاقتصادى والتنمية بين المواطنين والمحافظات المختلفة ( ايوه شوفتوا هيوزعوا خضار عليكوا هيصوا بقى ومخضروات ) .

وقال الرئيس مبارك إننا نبذل أقصى الجهد للوقوف الى جانب الأسر الأقل دخلا والقرى الأولى بالرعاية وسكان العشوائيات

( يعنى ان شاء الله هيحولها لمقابر جماعيه وهيحولها لجونينه حيوانات علشان يقف وييغنى على الاطلال ههههههههههخخخخخخخخخ) .

وأعرب

(يا ماشاء الله ما شاء الله ده بيعرب اهو امال بتقولوا ليه مش بيعرف يتكلم عربى ده بيعرب ويصرف كمان)

الرئيس مبارك فى رسالة وجهها لأعضاء الحزب الوطنى

( هههههههههخخخخخخخ هو فاكر ان الشعب كله بقى حزن وتنى ولا ايه اوبااااااا انا فهمت غلط نؤسف بقى يبقى الرساله للحزن مش لينا )

بمناسبة انعقاد المؤتمرات السنوية لوحداته الحزبية ، ( ايوه ما هو مفيش غير الحزن هو اللى فى البلد وباقى الاحزان رابطه راسها وقاعده تولول على بختها والتورته اللى ضاعت منها )

عن تطلعه لإجراء مناقشات جادة خلال المؤتمر السنوى القادم للحزب

( طيب خلاص خلاص يعنى هما كل سنه بيهزروا والسنه دى جد طيب يا جماعه ادوهم فرصه بقى )

مطلع نوفمبر وطرح مقترحات خلاقة تدعم سياسات الحزب وتحركه فى هذا الاتجاه

( اتجاهه صلاح سالم ولاالمرج علشان نفهم بس بدل ما المترو يدخل فى بعضه).

ووجه الرئيس مبارك تحياته لأعضاء المؤتمرات السنوية للوحدات الحزبية فى حوالى 6600 وحدة حزبية على مستوى الجمهورية الذين يعقدون مؤتمراتهم السنوية حاليا .

وأعرب عن تقديره لجهودهم خلال الشهرين الماضيين استعدادا لهذه المؤتمرات وتحضيرا للمؤتمر السنوى الخامس للحزب فى نوفمبر

( الناس دى بتتعب اوى يقعدوا يلموا كوبيات واطباق وجاتوهات ومفارش ويتنقعوا فى الجاز ربنا يولع فيهم طول الشهرين علشان يبقى ريحتهم حلوة يوم البتاع ده).

وقال الرئيس مبارك فى رسالته إنه يتابع عن قرب الاجتماعات التحضيرية للوحدات الحزبية وما تتناوله مختلف لجانها من موضوعات تتصل بقضايا الوطن والمواطنين

( بسم الله الرحمن الرحيم وطن مين ده اللى بيتكلم عنه حد شافه ومواطنين يا فياكين اللى شاف اللى هو بيتكلم عنه ده يطلعه علشان عيب ).

ودعا أعضاء الوحدات الحزبية الى مواصلة التحرك النشط فى نطاق وحداتهم الحزبية كى يعطوا القدوة والمثل فى الألتحام بأبناء الشعب

(ايوه من ناحيه بيلتحموا فالداخليه قايمه بالواجب وزياده وكل يوم والتانى ضرب على القفا واعتقالات وايه والله الناس منغنغينا على الاخر ولا تحمل هم انت بس اطمن )

والتواصل معهم وكى يتعزز احساس القواعد الجماهيرية

( هههخخخخخخخخخ كل واحد يعزز قعدته بقى واللى معندوش قاعده يروح لدكتور تجميل يعمله قاعده عيييب امنعواالضحك)

بدور الحزب وأنشطته على اتساع أرض مصر ومحافظاتها .

وقال الرئيس مبارك -إنه سيتم خلال أعمال المؤتمر السنوى الخامس للحزب مناقشة سياسات الحزب وبرامجه لتوسيع قاعدة الرعاية الصحية والارتقاء بجودتها بما فى ذلك سبل تطوير نظام التأمين الصحى الشامل"

(اه انا شاهده على ده بامارة الاطفال اللى فى ابو الريش بيتعالجوا فى كلودور المستشفيات ومفيش سراير وهما بيجملوا فى السرطان علشان الهانم هى اللى متكفله بيها وتحت رعايتها علشان الواجهه للعالم ويدوهوا جايز الراجل اللى بيعور نفسه ده ايزنهور )

مشيرا إلى أن الهدف هو تحسين الخدمات الصحية المقدمة للمواطن وحصوله على الرعاية الصحية المتكاملة سواء فى المستشفيات أو فى الوحدات الصحية بالمراكز والقرى

( بزمتك ولا بزمتكوا انتم حد من اللى عايش فى القرى ولا حتى البلاد التانيه فى المحافظات شاف اى حاجه من دى طيب والنبى اللى عنده مستشفى عام يصورها ولا وحده صحيه ويجبها لزقها على باب الحزب خليهم يشوفوا الخيبه اللى احنا فيها ) .

وأوضح الرئيس مبارك أنه سيتم , خلال المؤتمر , تناول قضية التعليم وما حققناه حتى الآن لتنفيذ رؤية الحزب لإصلاح وتطوير العملية التعليمية ورفع قدرات المعلم والتوسع فى المدارس وخفض عدد التلاميذ فى الفصول ومواءمة منظومة التعليم ومخرجاتها مع احتياجات سوق العمل

( اهو بقى دى مقدرش اتكلم فيها قضيه التعليم انهى تعليم ده اللى بيتكلم عنه دا العيال دماغتها ماشيه بالعكس ولا بقت فاهمه حاجه وبقوا متنحين المدارس الخاصه فاتحه للرحلات والحكومه بتضرب العيال وتعلمهم قله الادب والوقاحه والضرب) .

وأشار إلى أنه يتم حاليا إدارة نقاش حول موضوعات الزراعة والأمن الغذائى لبلورة استراتيجية

( بلورة دى يعنى ايه بقى زى الوظه كده ايوه هما بيألوظوا العمه علشان نلبسها طيب الزراعه بقى مبيلموش القش ليه اللى كابس ريحته على قلوبنا وجابت لنا حساسيه وربو وقرف فى البلاد الفلاحين ويعملوا مصنع واعاده تصنيع ليه ربنا ينتقم منهم)

للتنمية الزراعية حتى عام 2020 (لاااااااااااااااااااا هو ناوى يقعد لكل ده عااااااااااااا اللهم لا اعتراض لا يا رب لا وحياه حبيبك النبى ده كده هيدخل على احفادى )

تقوم على التكامل بين سياسات الانتاج والتصنيع الزراعى وتزيد من دخل الفلاح وتأخذ فى اعتبارها احتياجات مواطنينا من السلع الغذائية وتدفع صادراتنا الزراعية إلى الأمام .

وأضاف: سنتابع خلال أعمال المؤتمر السنوى جهودنا المتواصلة لتلبية حق كل مواطن فى مسكن مناسب يضمن له حياة كريمة

( اه دى صدق النبى عامل شقق 54 متر فى التجمع مقولش لكم عليها بصرف النظر انها اتوزعت دكاكينى بس ايه الواحد يتمطع ايده تسلم علىالجيران ههههههههههههه وده من مطلق مثل على قد لحافك مد رجليك مش لما يبقى عندنا لحاف اصلا)

ويحقق له طموحاته الاقتصادية والاجتماعية .. وسيتم متابعة الجهود المبنية على رؤية متكاملة لخدمات الاسكان والمرافق والتنمية العمرانية هدفها تطوير هذه الخدمات وتوسيع قاعدة المستفيدين منها ومواصلة ما حققناه حتى الآن فى مجال تخطيط القرى والمدن المصرية ومشروعات مياه الشرب والصرف الصحى والطرق والتعامل مع العشوائيات القائمة والحد من ظهور عشوائيات جديدة

هذا وبالله التوفيق فى حرق البلد وجعل المواطن ماشى بقفاه

طيب اللى يعرف يترجم الخطاب ده يبعت ليه على زيرو تسعمايه زيرو تلات فرخات

كده كفايه عليا حرقه دم والجاى انيل بس ادعوا انتم بس

كان معكم آبى هانم الهندى

حكمه الامبراطورة ودى منى للحزن برضه

اعرج يسحب مكسح يقول له تعال نتفسح