بصوا بقى من زمان كده وكنت كل يوم والتانى اسمع عن واحد اسمه غبى الوحش محامى
طبعا كلكم عارفينه وعارفين انه قاعد فى الشارع ليل ونهار يدور على نمله لابسه مايوة مش شرعى يرفع عليها قضيه التحرش بصورصارات او يعمل لها قضيه ممارسه البصبصه على النواصى
امبارح بتفرج على روتانا وفجأه لقيت وفاء الكيلانى وطبعا دى انا بموت فيها لجرئتها ورقتها وعقلها بصراحه فى برنامج ضد التيار
وفجأه لقيتها جايبه الاستاذ الليمونى نبيه الوحش البيه مخلاش حد بجد الا لما رفع عليه قضيه وافكارة رايحه فى شجرة ومش راجعه
بجد فيه قضايا انا معاه فيها بس هى هايفه يعنى من اولى يرفع على وزير الداخليه قضيه علشان شعار الشوربه طيب يشيلوا الشعار يرموه يعملوه بادج ويعلقوة على عربيتهم ومشوها عربيتهم ههههههههههه
هو بيفيدنا بايه ولا فى المقابل يرفع قضيه علشان التعذيب اول تناقض
قضيه دينا فى المدارس اللى رقصت يرفع عليها قضيه او على المدرسه ولا يحرك الشرطه انها تمنع بيوت الدعارة اللى مترميه فى كل مكان وتحت الكبارى ولا الكباريهات اللى قرفانا فى عيشتنا ورقصين استغفر الله العظيم عليهم
يرفع قضيه على ممثل سورى قال ان مصر كونها اول حاجه فى الفن بما معناه ان ده مسئوليه كبيرة ومش رياده وبس ولا يرفع قضيه على الخنازير اللى بيقتلوا اولادنا كل يوم على الحدود
يرفع قضيه على عبير صبرى اللى قلعت الحجاب ولا على حماده عزو ونظيف اللى خربين بيتنا
هو انت ربنا يا عم انت هتحاسبها ليه انت مالك يقولك بطبق الشريعه (البيه بتاع الشريعه لابس دبله دهب اصفر وواحده تانيه فضه فى ايده ) طيب ما تطبقها على كله اللى بيسرقوا البلد واللى بيغتصبوا كل يوم والتانى اولادنا واللى بيرجعوا متحملين فى نعوش من الغرق
وعلى عمرو دياب انه أسأ لمصر ولا اولى يفع قضيه على اللى بيطبعوا مع اسرائيل ولا المركب اللى اضربت فى ليبيا والاهانه اللى بيشوفها المصريين
انا عاوزاكم بس تلاحظوا الاسماء اللى بيختارها
يرفع قضيه على تامر حسنى وفيلم عمر وسلمى علشان الافيش مش فى سياق الفيلم ويتهم السبكى انه جزار وملوش فى الفن ونصب نفسه انه هو اللى بيفهم فى الفن ويقول تامر مينفعش انه يكون قدوة للشباب ليه يا سيدى بيلبس القميص ويفتح صدرة (ملحوسه البيه امبارح الكبير فى السن صعيدى الاصل لابس قميص وكرافت ليمونى لا تعليق منى (وش مدلدل مناخيه وعويناته بتوجعه) وده اللى بيتكلم عن الذوق يقول تامر هربان ومزور
وهنااااااااااا القصد بقى من اللى هقوله اولا تامر ولا غيرة مينفعش نأخده قدوة ممكن يكون بيلبس كويس والشباب او بعضهم بيبصوا عليه مش مشكلتى خالص بس الاهم انه بيتكلم تهربه من الجيش بزمتكوا وبحياديه جدا كام واحد اتهرب من الجيش بواسطه او بطبى او برشوة قولوا كده طيب ما يلاحق دول بقى احسن ما يبص عليهم انا شخصيا اعرف ناس كتير ومنهم والله قرايب ليه
السبب ان الجيش دلوقتى بقى قهر على الواحد بجد وذل ويا ريت بيروحوا يتعلموا حاجه دول الظباط مبهدلينهم جدا
بس فى المقابل انا واثقه من اولاد بلدى ان يوم لاقدر الله ما يحصل حاجه فى البلد الصغير قبل الكبير بنات واولاد هيقفوا ويحاربوا الجيش مبقاش للحرب دلوقتى ولا بيخلق رجاله بيخلق ذل وانكسار جوا العساكر انا فى طريقى منطقتين وبشوفهم عاملين ازاى
نرجع تانى له مواقف كويسه انه رفع قضيه على نجلا ودى متدخلش مصر كويس بس ميخوضش فى اعراض الا سورى اذا كان البيه يعنى على درايه كبييرة وخبررررررررررة (وبلاش نيه كويسه انا ولا قولت انهم رفضوا يقابلوه ولا حتى انه بيشتغل دش ) وكان معاهم خطوه بخطوه انا طبعا مش بدافع ولا عن حد فيهم بس يبقى بالعقل لما اتهم حد
مش فاهمه هو كان مع روبى يعنى ولا دينا ولا بوسى زفت الطين ولا نجوى فؤاد وكله كوم وميرنا المهندس كوم لبست الحجاب وقلعته مسلمتش منه وقالك دول بيأخدوا فلوس يلبسوا الحجاب وفلوس يقلعوه
والراجل ده كداب كدب بجد مش ممكن قالك انا مع المسيحين ومش ضدهم وبساندهم طيب ها وبعدين والقضايا اللى عملتها وموضوع التنصير اللى ماشى وراه يقولك لا انا مليش دعوة وبعدها وقع بلسانه وجاب اماكن تنصير فى المحله بعناوين واتهم ناس بالعماله ولما قالت له مرفعتش قضايا ليه يقولها رفعت واتحفظت لاسباب امنيه وسكت زى الماعزة ودى كمان خدوها علشان تعرفوا كدبه الوحش فى خناقة مع نخلة على الهوا : المساجد بتقفل بعد كل صلاة والكنائس 24 ساعة
بجد الراجل ده اللى فاهم شخصيته يفهمها ليه انا نفسى افهم له وضع بس بجد طول عمره محيرنى جدا ومش فاهماه وعجبتنى جدا والده طالب من المدرسه الفرنسيه لما قالت له انت بقى مين عينك واصى على الشعب المصرى احنا من طبقه معينه ودى حياتنا انت مالك ومبنحبش حد يدخل في حياتنا ولا يعمل واصى علينا وبعدين عممت الكلمه على الشعب كله والله برافوا عليه وليه بقول برافو لان رده كان هباب فكرنى بواحد فى الحزب الوطنى هحكى حكايته بعدين لما يرد بعدها على وفاء ويقولها هى جاهله بالدستور وبحافظ على الفضيله والاخلاق انهى فضيله دى وهو سايب كباريهات درجه 95 مفتوحه انهى اخلاق وهو مش بيرفع قضايا فى التعذيب انهى اخلاق وفضيله وهو ممعناش صوته فى الغلاء ولا فى الاضرابات ولا فى غرق عباره ولا فى موت البمبوطيه
انا من موقعى هذا بقوله اتنيل على عينك واتعلمها الاول وتعالى اتكلم بيها طيب انا هسيب لكم الحكم ده بيحافظ على ايه بجد فهمونى يمكن مش فاهمه عنده خمستلاف قضيه وبيمسك فى الهيافات لو قعدت اعد اللى المفروض يعمله بدل الهطل ده مش هيخلص والمصيبه اللى فى الاخر وختم بها اللقاء الفزيع اللى اتحملته وانا بأكل كيلو مانجو وعنب وتفاح انه هيطبع كل الدعاوى دى فى كتاب على أجزاء طيب انا شريرة وعندى نحله ودبور واحد بيطبع المحاضر ليه قولوا انتم بجد هيدرسها لبتوع الشرطه ولا للمحامين اللى فى الشارع ومقلش ليه رايه فى هند صبرى بصراحه علشان هى محاميه ولا علشان ايه
انا نفسى اقابل الراجل ده واقوله الكلام ده اللى يعرف يوصله له يقوله فعلا يا مصبرنى على الجحش بجد لازم الناس دى تفوق لازم الناس دى تقف عند حداها بجد متعملش ابطال على حسابنا وهو فى نظرى مش بطل ولا عمرة هيبقى بطل

المفجأه بقى :- انه رافع قضيه على روتانا ومنع بثها فى مصر لانها مش واخده تصريح ورايح يصور معاهم طيب دفعوا لك كام يا بيضه وابقى سلم ليه على الاخلاق والشرف والفضيله وده واحد من ضمن الالاف اللى عاملين ابطال وعاوزين شهرة على قفانا يا جدعان قفانا مش متحمل ولما تحبوا تعملوا ابطال اعملوها فى الصح مش الغلط احنا مبقناش شعب غبى ولا عمرنا هنكون كده

ملحوسه من واحده متغاظاه:- فيه بوست على بيكيا بس يا ريت بلاش نأخد الموضوع هزار احسن لكم ولا اوريكم النطح على اصوله

كان معاكم سعاده محامى اول دكتور طبيب صياد آبى هانم بتنجانى

صباح 55اسعاف عليكوا

من كام يوم واحده صديقه نتيه يعنى مدونه يعنى من وراء البتوبوتر يعنى التعامل على الشاشه
بعتت ليه ميل تطلب رقم واحده نتاويه تانيه هما مين البنت المفروسه بعتت ليه ميل عنوانه كلمه واحده بس النجدة فتحت الميل
قولت يمكن البونيه فى مأزق فرسها ولا حاجه مش ناقصين فتحت الميل بسرعه لقيتها بتقولى محتاجين نمرة البنت المفقوع مرارتها بسرعه

والله والله بدون تفكير فتحت الموبيل وكتبت الرقم وبعت لها وحتى مرضتش ابص على الوقت ولا التاريخ ليكون اتاخرت فى فتح الميل وعدى الوقت على النجده 911 اللى هى كانت عاوزاها هههههههههههههه وحسيت بالذنب مع ان لو فكرنا صح مش هلاقى عليا ذنب انا مش فاتحه الميل 95 ساعه فى اليوم .
فبعتت ليه خروفين من بتوعى ينطحونى بصراحه ودول اتأمروا معاها ووجعونى فى ضميرى قوى وانا لسه مشربتوش الشاى تقولى يعنى مفيش ازيك ولا عامله ايه تخبطى النمرة فى وشى كده على طول ههههههههههههههه
بجد لقيت نفسى متنحه وبعدين سخست من الضوحك قولت سبحان الله يعنى انا كنت بفكر ازاى وبسرعه ببعت لها النمرة وناس تانيه بتسيب الناس تموت

انا طبعا مش زعلانه من مفروسه هى بتهزر وانا رديت عليها وقولت لها السبب انى اتخضيت ليكون فيه حاجه او مصيبه لا قدر الله اصل دول مبيعرفوش بعض غير فى الفرسات وفقعه المرارات هههههههههههههههه

ليه بقى كتبت ده علشان اقولكم الناس المفروض تتصرف ازاى فى الحالات دى والبلد بتتقدم بينا ازاى واحنا جل المستقبل الملزق
بقالى يومين كل ما اروح فى مكان وخاصه الدائرى يوم الخميس رايحه المعادى وامبارح نازله وسط البلد وبرضه الاتنين من الدائرى الاقى حوداث وطبعا مقلكوش حوادث الدائرى عامله ازاى

اصل فجأه تبص وانت ماشى فى امان الله حاجه طايرة وهووووووووب بووووم طاااخ تششششششششششش وقعت قدامك ايه بقى بنى أدم اه والله انسان زينا ليه الدائرى بجلاله قدرة اللهى يتشك فى دماغه اللى عمله قادر يا كريم مش عارف يعمل انفاق للناس تعدى منها او سلالم تمشى عليها (مع ان عاده المصريين بيستخدموا كوبرى المشاة لبيع المنتجات البلاستيك والدبابيس مش لانهم يعدوا من عليه ههههههههههههه بس فيه نسبه بتخاف على عمرها بتعدى

ودى كانت يوم الخميس واحد شال واحد بالعربيه والله مش بتكون غلطتنا اولا الطريق مش منور قوى ثانيا كله منحنيات وهضاب ومرتفعات اه والله من عند مودرن اكاديمى اللى يعدى من هناك هيفهم وهيعرف ومطبات هوائيه ايه مقولش لكم اللى عاوز يفسح ولاده يخدهم الدائرى رايح جاى هيلعبوا كل اللعب وببلاش واهو تبقوا اخدتم حاجه من الحكومه

الحادثه التانيه امبارح عربيتين نقل كبيرررررررررة دخلو فى بعض بالعرض ازاى محدش يسال هو كده انا ده اللى شوفته ومكنش معايا الكام اصور هو تقريبا واحد بيعدى من الناحيه التانيه بتاع النقل الكبير وطبعا من مكان مفيش فيه يوو تيرن والتانى جاى بسرعه فبووووم طشششششششش طااااااااااخ زربوووووو دخلوا فى بعض
الحمد لله محدش مات وده اللى عرفته بعد وقفه ربع ساعه اذلال فى انهم يحركونا

انا ليه بقى كام استفسارات برئ من النحله والدبور يعنى يعنى هو لازم العربيات تقف لغايه لما سعاده اللواء المحافظ يجيى يعاين وعلى بال ما يجى بيجى طبعا من الطريق المعاكس ويقف البوكس اللهى يجيله بوكس فى عينه
وبالتالى بيوقف الطريق المقابل
طيب ليه مش بيجيبوا لهم موتسيكلات وحتى تبقى اسهل فى التحرك ويروح يعاين بسرعه علشان الطريق يتفتح
الكارثه والفجعه النجعه والفضيحه ام جلاجيل واللى بتجيب ليه غممان فى النفس على بال ما يطلبوا الاسعاف ويبدأ يتحرك ويأخد مجراه من استهبلات واذونات ويسيبوا الشاى اصلا الناس بتكون فرفرت وممكن ميكونش فيه عربيه اسعاف اصلا او قلبينها عتبه رمسيس ههههههههههه

المصيبه الاكبر فى الشرطه بقى النجده لما تتصل بيهم وتبلغهم بلاغ ولا بيعبروك والله واحده صحبتى فى التجمع من كام سنه حصل قضيه قتل والبنت دى جارة القتيل وكانت سمعاه والاتنين الاولاد بيتخانقوا معاه وبيقتلوه طلبت النجده اربع مرات وفى الاخر الحمد لله راحو بعد ما خلصوا على الراجل وسلخوه وخافت تصوت الاولاد يعرفوا انها شافتهم يموتوها هى كمان هى ايه الشرطه مش بتتحرك غير بعد القتل ولا الظباط بيكونوا بيلعبوا اونو فى القسم ومش فاضيين يا ناس بجد الرحمه

اما بقى البوب الكبير قوى والعفريت اللى محدش يقف قدامه ودول بيجوا بسرعه جدا ....المطافى الحمد لله ناس محترمه بس حاجه من الاتنين يا مش معاهم مياه فى العربيه علشان مدفعوش الفاتورة ....او الحنفيات بتاعت المطافى اللى فى المكان مش شغاله يا مش موجوده اصلا واتسرقت وكتب عليها بضاعه اتلفها
الهواء

وانا من موقعى هذا بقترح عليهم وعلى الساده المسئولين اللى سحلين اهالينا وجيوبنا وقال عاوزينا نحلم قال 1
-يا تجيبوا للظباط موتسيكلات او حتى حصان يروحوا بيه حتى يبقى شكلهم حلو تفاديا للزحمه اللى بقت بتفرفر الناس يا عالم انا امبارح كنت حسه انى زى الايس كريم اللى ساح ووقع على الارض من الحر وكمان ممكن اكون رايحه مشوار مهم او لمريض فى مستشفى ارحمونا

2- تيدوا دروس للظباط بتوعكوا الصغيرين سخسيا يعنى بلاش تناكه وده نداء منى للاخوة الظباط بلاش والنبى التناكه على خلق الله فى الحر اصل بتجبوه لنفسيكم يعنى ما احنا عندنا نفسيات طافحه علينا بلاش النفسنه ربنا ميوقعكوش فى واحده لسانها هربانه الفرامل بتاعته ومش لاقيه لها تيل زى انتم مش احسن مننا وانا فى الحر مبعرفش بابا ولا اهلى وتفاديا لهذوه الحركات يا تبعدوا عن وشى يا اركب دش فى العربيه وكل شويه اخد شاور بقى بهدومى ما هى مش هتفرق كتير وبلاش نظرة الاستفذاذ للحوادث والامبالاه الناس بتبقى فى مصايب اللهى يستركوا وتمشوا بشورتات فى الشوارع

3- السيد الاستاذ المفحل المونخل المهلل وزير الصحه يا سيدى راضين بوجودك وسحلك لمرضانا وعارفين انك بتحل ازمه السكان فى انك تقضى علينا بس النبى على قلبك يا راجل وفر عربيات اسعاف بقى هو انت جايبها من بيتك معلش تعالى على نفسك وهات لينا حتى ميكروباص ننقل فيه الناس وفى نفس الوقت يبقوا يموتوا فى المستشفى مش مهم بس المهم تفك ازمه المرور ولعلى وعسى يقدر حد ينقذه ومعلش عارفه انك هتضايق انك مش عارف تقضى علينا

4- النجده يا جدعان دى غريزة يعنى ساعد محتاج مش بشحت لا شوفوا الناس فيها ايه وانتم اصلا بتقدروا تتأكدوا من الارقام اللى بتتصل يعنى هتعرفوا صح ولا غلط بقيت بحس انكم عاملين زى فوووت علينا بكرة يا سيد او ابقى قابلينى بعد ما تموت او تتسرقى يعنى مش فاهمه مش انتم شغلانتكم تمنعوا الجريمه ولا تسيبوها تقع وبعدين تتصرفوا وبلاش استميشن فى الاقسام واونو بتجيب تخلف عقلى وانتم مش ناقصين ولا اللى ماسك الموبيل وعمال يلعب عليه ولا اللى قاعد يحب فى البنت بتاعته وبرده نداء للبنات والنبى سبوهم يشتغلوا مش يشتغلونا يعنى اللى تتطس فى عقلها وترتبط بظابط مش مشكلتنا بس بلاش تعملوا ليهم خيله كدابه ما هو متقندل قاعد فى القسم هيكون يعنى بيخونك مع المساجين اللى بيعذب فيهم يعنى بجد شاكرين ومهللين لحسن تعاونكم بس السرعه يا سلاحف

5- الشعب المصرى الجميل اللهى يخليكوا طالمما مش هتساعد فى الحادثه متقفش وتقفل الطريق بلاش تبقى حوادث من جميع الاتجاهات بلاش ام الفضول اللى بتقتل دى انتم بتعطلوا ناس تانيه ساعد حتى باتصال من موبيلك للنجده وبلغهم وانت ماشى او الاسعاف مش لازم تتفرج ما هى مش سينما

والله مش عاوزين نبقى زى الدول المتنيله بس اقل حاجه اعملوها لينا بلاش يبقى مفيش كده بجد زهقتتتتتتتت وهفطس وهموت ومرة هتبقى فيه حادثه هنزل امسك الشبشب واطيح فى الناس كلها واسيب خرفانى عليهم ويبقوا يودنوى العباسيه بقى
الا انتم معرفتوش مش بقت بواسطه لووووووووووووووووووولى

وابوس ايديكوا استخدموا الاشارات وخاصه الانتظار فى الحوادث بدل ما اسمع اصوات ارتطام فى قفايا وانا وقفه والطريق متنيل

كان معكم رئيس قسم الاسعاف والنجده والمطافى شاويش لواء برتبه قائم مقام آبى هانم

تحديث هام جدا جدا جدا جدا:- اقروا البوست ده على مدونه فرنسا والرايق والضاحكون اول عمل بيجمع اكثر من مدون فى حوار عائلى مـــــــــن هنا

صباح الفل والياسمين والبتنجان ابو زيت عباد الشمس
بصوا بقى مش عاوزة ضرب انا هقولك على حاجات فى شهرزاد (الستات ) وده من واقع نظرى (بتكلم فسحه اهو ) يعنى ناس بشوفهم وشوفتهم وعموما بعض الصفات فى الستات المصريه مش كلهم بس بعضهم والتحول الرهيب الشنيع والصدمه اللى بتعملها من قبل الجواز لبعده فمش عاوزة ضرب واللى هيضرب هو الجانى على نفسه انا بقول الحاجات دى والله بس علشان نلاقى نقطه تقاهم ما بين شهرزعابيب وشهرلوك لوك ههههههههههههه ومش عاوزة حد رخم يقولى انتى رايقه يعنى احنا متنيلين فى لقمه العيش والجرى ورااها وانتى بتقولى الكلام ده اقوله لا يا رذل كلامك غلط علشان الحاجات دى ممكن تتعمل باقل حاجه وتغير فى الحياه وتساعد على ان الواحد يتغلب على حاجات كتير فى حياته


# اياكى يا كميله من انك تقابليه وهو راجع من الشغل وتظبطى نفسك على محطه نجوم اف ام للرغى تقعدى بقى (ام سماعيل قالت وام ابراهيم ولدت والارنب جاب تلاتشر مش خمستاشر ) ولا انا روحت البيوتى سنتر النهارده البنت عملت المانكير وحش وشوفت بادى واو يجنن ..... طبعا الراجل بيكون راجع من الشغل ميت ومش متحمل يسمع نمله جنب ودنه فقبليه كويس وشوفى موده لو هو كويس رجعى فى وشه الكلام لو لا خلاص حولى نفسك على الفيربريشن واعملى من غير كلام ولا موسيقى تصويريه وده للستات اللى قاعده فى البيت وجوزها بيشتغل


# الستات اللى بتشتغل طبعا دول الله يكون فى عونهم بجد يعنى برضه لازم الراجل يراعيهم شويه وبرضه مش لازم تقابله تحكيله المدير ابن التيييت قال وشوفت بكينام كانت جايه ببلوزة ياااااااى مش شيك خالص ولا ام فاطمه جابت كيلو الباميا بعشرة جنيه يعنى اختارى وقت علشان تتكلمى بعد ما يتهد ويقعد ويغير لان الموضوع ده بيضايق الراجل وبيحس ان الست بتكون بتفكر فى نفسها وبس بس انا عاوزة اقول حاجه لشهر زعابيب ان الست بتستنى الراجل علشان هى بتكون مفتقداه وعاوزة تعرفه كل حاجه فى حياتها مش من باب اللك او الاستعباط والصداع وخلاص (اى خدمه حته دفاع مرتد اهو )


# اتجددى يا ام الخلول .. ايون ام الخلول علشان اللى عايشه على نمط واحد دى بتبقى يعععععععع بجد صعب جدا وترجع تزعل من الراجل وتجيب العيب فيه مع انها راكده ومملحه زى ام الخلول بالظبط حتى لنفسك يا شيخه تحسى انك فريش كده مش مروحه لا حياتك فيها امل ازاى يعنى غيرى من شكلك كل واحده على قد امكانيتها يعنى غيرى لون شعرك غيرى لبسك طريقته مكياجك طبعا فى البيت علشان فيه محجبات كمان هنقول الصبغه غاليه ويقال انها حرام ماشى الحنه مش حرام ..يا لهوى بس اوعى تعملى حنه وهو قاعد فى البيت ويبقى قاعد شايف قدامه تمثال الحريه الاقرع وتبقى شكل قطعه فنيه من الفن التشكيكى ده هههههههههههههههه خليها وهو متلقح على الكافيه ولا واقف تحت عمود النور (اللهى الفولت العالى يتخانق معاه ههههههههه) مع اصحابه والكل عارف الحنه بتغير لكام لون مش هشرح واقلبها بيوتى سنتر


# اعملى مفاجعه له يعنى يبقى راجع البيت ولعى فى البيت مثلا واطلبيه يجيب المطافى ههههههههههههه لا بجد سربى القطط (الاولاد يعنى) عند ماما عند اختك عند مامته هو اى حاجه يوم او مرتين فى الشهر وبلاش يبقى ميعاد محدد يعنى مش الخميس مثلا ممكن فى وسط الاسبوع غيرى الميعاد علشان الملل ويرجع يلاقيك ناكشه شعرك ولابسه اسود وواقفه وراء الباب فى الضلمه يتخض يموت يبقى خلصنا من وجع الدماغ ههههههههههههه بهزر يرجع يلاقى قدامه واحده امورة حلوة


# الايام العاديه النبى على قلبك يا حجه بلاش يرجع يالاقى البرفانات العاليه فى البيت بصل وصلصه وحركات واقولكم دى سهله وانتى واقفه بتطبخى هاتى حله صغيرة وحتى كوبايه ميه وفيها كيس فانيليا وسبيها تغلى وقللى الهار عليها بصى لو عامله قتيل فى البيت اصعب ريحه الفانيلا بتشيلها حتى السمك وابقى اعمليها على طول حتى لو عندك شفاط للمطبخ وبلاش معطر علشان الناس متقوليش الميزانيه

# اوعى يرجع البيت يلاقيك رابطه دماغك ببندانه (الايشرب يعنى ) ومنزلاها على عينك ولابسه بيجامه رجل ورجل ولا قميص فيه شبابيك وتقولى ما هو ده لشغل البيت ولا بادى وشورت بتوع خالك ولا حاجه يعنى حاولى تظبطى نفسك على ميعاده وتظبطى حالك


# اختارى وقت الطلبات وهو رايق يا ست الكوتكوته يعنى مش تلاقيه قرفان وتقعدى تخبطى على دماغه بالحلل وابقى قابلينى لو عبرك ولا جاب ليكى حاجه ...وغالبا مش بيكون رايق فاكتبى ورقه وقولى مرة واحده احنا عاوزين الطلبات دى يا حبيبى وارميها فى وشه قبل ما يرميكى من الشباك ههههههههههههه

# بلاش الصوت العالى فى المناقشات عارفاهم مستفذين ورخمين ويجيبوا الضغط للنمل والصورصارات بس حاولى تمسكى نفسك ومتديش له فرصه يجيب هدف ويتلكك


# شيلى ايديكى من التفتيش الدورى يا عسكرى الدرك وبلاش شغل المباحث وكل يوم تقلبى فى موبيله ليكون مخبى واحده تحت البطاريه كلنا معترفين ان اغلبيه الرجاله بيكلموا بنات ماشى وده رافضينه بس بالطريقه دى هيعند وهيرخم ويتغابى وهيدارى عنك وهتبقى عايشه فى نار ليل ونهار دورى بس على المدى البعيد علشان مش تقلبى حياتك راس على عقب ول اعتذر عن غلطه بلاش اللبانه تشتغل وكل شويه تفكريه بيها يعنى خلاص عدى علشان حياتك وحياته يعنى حاولى تبقى تلاجه 95 قدم


# جينا للمهم طيب ولما تلاقى الاول شوفى انتى مقصرة فى ايه وعاده هتقولى مش مقصره فى حاجه اسالى حد غيرك ايه اللى ناقصك علشان هو يعمل كده او اساليه بس من غير ما تقولى السبب ولو قالك على حاجه غيريها وبعد ما تظبطى الدنيا اقعدى معاه فى البلكونه بالليل وارميه منها ههههههههههه او حطيله سم فيران فى الشاى لا بجد اتكلمى معاه مباشر بهدوء وادب وفهميه غلطه وعرفيه انك مش هتتكلمى فى ده تانى واوعى تديله فرصه يدافع اصلهم اساتذه وهيكسب منك الجوله انتى قوليله وبس وفهميه انك مش هتقبلى كده تانى وراقبى حركاته من بعيد لبعيد وبلاش الذكاء الزايد والاتصالات الكتير اللى بدون داعى بس لمجرد المراقبه وخلاص لانها بتبقى مفقوسه خالص


# اتصلى بيه مره مرتين فى اليوم مش لازم كل مرة تكلميه هات فينو العيال بتطلع على الستاير البطيخه طلعت قرعه البنت اتكعبلت فى رجل السجاده لقيت صورصارات فى البيت والله ده بيحصل قدامى وطول اليوم ههههههههههههه مع المدير المالى بتاعى وواحد قريبى كمان مراته اتصلت به وهو فى الجلسه لانه مستشار علشان فيه صورصار فى البيت ههههههههههههههههههه

# اعتمدى على نفسك فى حاجات وحاجات خليكى ذكيه وارميها عليها وده للستات القويه المفتريه زى انا والاتنين اللى عارفين نفسهم كويس اصحابى واخواتى ههههههههههههه اقول ولا اسكت ههههههههههههه يعنى فيه رجاله بتحب الست المعتمده على نفسها وفيه رجاله تحب تحس انها كل حاجه حتى تاخدى رايه فى انك تحطى التلاجه يمين ولا شمال هو دماغه كده حسسيه بده واستعملى ذكائك فى اللى انتى عاوزاه اتناقشى بهدوء واختارى الوقت نفذى الطلب بس بطريقتك وحسسيه انه هو كلامه ماشى

# اللى عندهم اولاد كبار شويه حاول تخلوهم يساعدوكم فى البيت فى ترتيب سرير فى شيل لعب عودوهم من صغرهم على كده هتلاقوا وقت لكل حاجه ودى تربيه ليهم كمان

# اصحى معاه بدرى غصب عنك حتى مش مهم خمس دقايق اديله البيبرونه هههههههههههههه اعملى له شاى ساندوتش حتى لو مش عاوز يبقى اسمك عزمتى عليه ..دايما خلى ريحتك وشكلك فى البيت حلو بليييييز ولا هتلاقوهم بصوا لعيفاء ولا الاخت انسى عجرم ولا الحاجه رولا ابدا كبيرهم صباح ههههههههههههههه


# خلى بالك من لبسه والنبى اصل بعضهم عنده عمى الوان وبيجبها فى الست طيب يا عم وذوق بيطلع معندوش معلش خلى بالك من الوان شرباته والشبابيك المفتحه ارمى الشربات دى على طول والفلنات الداخليه اللى بيكون فيها شبابيك ارميها ليتخانق بره البيت ويقلع القميص والناس تشوف الفضايح ساعات الحاجات دى الست مش بتأخد بالها من الهدوم الداخليه بس خلوا بالكوا والله خالتى كانت بتكوى الشربات والهدوم الداخليه لاونكل بس دلوقتى بيجرى ورا بيلا وجاك يجبوهم ههههههههههههههه الكلاب بتوعهم


# فى النهايه احتوى الحاج شهر زعابيب ومتديش له فرصه يبص بره ومش اسمع واحده تقولى معنديش وقت حطى كريمات جنب صابون الغسيل لاديكى كيس فازلين حتى وده مش هيحتاج وقت اعملى اللى قولت عليه فى موضوع الاكل هتلاقوا الوقت ومش عاوزة ضرب اصل خرفانى مستعده وسنين دماغتهم وهينطحوا على طول انا مش بتجنى انا بشوف نماذج ممكن تكون بتعمل حاجات كبيرة قويه ومضحيه فى حين انها بتهمل حاجات صغيرة ممكن تهد وتبنى البيت بجد


مرة واحد قريبى قالى ان الراجل فى حياتى الست بنسبه 75% يعنى وال 25% الباقى اصحابها واولادها وشغلها اما الراجل فالعكس ال75% اصحابه وشغله وخروجاته ونزواته اللهى يجيله نزوة برد وال25% مراته بس ودى نسبه لو قارنها هنعرف ليه الرجاله بتشتكى من شهر لوك لوك كتير ههههههههههههههه

ملحوسه نونونونونونو :- ممكن تشوفوا مدونه بيكيا وخلوا بالكوا من التعليقات علشان تفهموا وشدوا حيلكوا معانا بقى
مــــــن هنــــــا

كان معكم من امام كوكب آبى سياده لواء طيار بحار نجار آبى هانم بتنجانى