اس ام اس


الرسايل دى مختصرة ولكنها مفيده اوى اوى لكل الحالات عن تجربه
غير كده الغرض من كتابتها مش انى مخنوقه ولا مضايقه بالعكس انا فى احسن حالاتى وفى احسن ايامى الحمد لله بكل المقاييس
انا بس حبيت اريح الناس اللى شاغله بالها كتير بغيرها وقولت بالمره اطرى على قلوبهم غير كده فعلا عن تجارب اللى بقوله ده بيحصل يعنى مش معناه انى مضايقه انا فعلا سعيده جدا اليومين دول وقولت افتح الاعب الهاموش والناموس شويه

الرساله الاولى

عنى اولا هفتح الانونيمس علشان اللى البواسير بتاعتهم بتاكلهم وبيحبوا يروحوا يشتمونى عند الناس مع انى مش معبرة حد يهدوا ويشتمونى فى بيتى
وده ليه علشان احاول اساعد انى اخليهم رجاله محترمه وبتواجه او ستات محترمه مش خريجى شارع الهرم واهو مع التدريب يمكن يقدر وتجيله الجرأه فى انه يدخل باسمه ونصيحه لكل واحد بيتشتم وبيتالف عنه قصص غرام وانتقام وقصص عفاريت نص الليل يعمل كده يمكن يساعد العيال دى ان يبقى عندها دم

الرساله التانيه

لما حد يقول اى حاجه عن اى حد جارك اختك عمتك خالتك قريبه جوز الجزمه اللى عندك فى البيت يا ريت تبقوا تسألوا الناس مباشره هل فيه كده ولا لا وده لسبب بسيط جدا لو انت بتسال علشان انت الفضول واكلك اوى تبقى عرفت الحقيقه لان الكدب بيجيب اكلان وهرش اكتر او لو ده يهمك تبقى عرفت الحقيقه او لو يعنى بتعمل باخلاقك ودينك يبقى متحملتش ذنب

الرساله التالته

لما تحس فى كلامك مع اللى قدامك انه بيكلمك ببرود ولامبالاه ومش متحمل منك كلمه اعرف انه ادالك قفاه من بدرى حتى لو مش قادر يقولها وده ممكن لاسباب كتير انه خلاص لقى مفيش منك امل او انت بالنسبه ليه اتكشفت فيك اوجهه كتير هو مكنش ينفع يتغاضى عنها او خلاص بقى كل واحد ميقرفش التانى

الرساله التالته

لما اتنين يبعدوا عن بعض ميقعدش الطرف التانى يحك ايده فى مناخيره كل شويه ويهرش ويطلع القمل والبراغيت بتاعته على الطرف الاول لان دايما اللى بيسيب ويبعد مبيفكرش فى الطرف التانى ابدا وبيكون خلاص محاه من ذاكرته فمفيش داعى للحككان كل شويه وتفكره انه فى يوم من الايام كان بيتكلم مع السحنه دى ولا العقليه المعمليه المفرقعه دى ويا ريت السيره متجيش بالخير ولا بالشر يعنى مثلا قريب واحد تحفه من ناحيه واحده اتحف منه بعت ليه على الفتيس توك يقولى انا فلان اللى كنت صاحب فلانه قمت بكل غلاسه قولت له انا معرفش مين فلانه مش يسكت بقى لا بيفكرنى فى النهايه فهمته انى فعلا معرفش دى ولو كنت عرفتها فى يوم من الايام فالهاموش اللى بيجى من ناحيتها هو اللى بيفكرنى بيها

الرساله الرابعه



اللى غاوى وجع دماغ يشغل نفسه بغيره واللى معندوش شغلانه يشغل نفسه بغيره

الرساله الاخيرة

شويه المقاطيع اللى عاملين فيها ثورجيه وهما حافيين عاوزة بس اقولهم مش انتم اللى هتحرروا البلد انتم لو لا قدر الله مسكتوا فها فرع واحد فى اى وزاره ولو افترضنا المجارى اللى هى هيئه الصرف يبقى نقول على البلد يا رحمن يا رحيم
فبطلوا تعملوا نفسكم ابطال وابضايات وتطلعوا بيانات وتعملوا حروب هايفه لانها متهمش حد غيركم بس البلد دى علشان تنضف لازم اولا تنضف منكم بس وبعدين من التانين على الاقل احنا عارفين التانين بيعملوا ايه انما شغل تلقيح الجتت والكلام ونسب بطولات مزيفه عن كل واحد ورمى الناس وبعضكم باتهامات ده اللى يتخاف منه لان انتم معندكوش مبدأ


ملحوظه اولى :- ايمن نور راى فيه مش هيتغير خاصه بعد ما قابلت جانب فخامه معاليه فى حفل لبلاك تيما فى ساقيه الصاوى ونفس الاحساس كبر واتجدد انى فعلا حسه انى مش طايقه الشخص ده وانه ممثل بس كومبارس مش شاطر



ملحوظه :- اوعى يفتكر اى هاموش ولا هاموشه من اللى هفتح لهم الانونيمس انى هزعل ولا اضايق ولا هيرخموا عليا مهما عملوا بالعكس انا هبقى مبسوطه لانى هساعد فى علاجهم من الهرش والجرب اللى عندهم ده لانى بقت حسه انهم بيصحوا من النوم مفزوعين يندهوا باسمى
وعلى فكره انا مقصدش حد معين والله ولا فى بالى حد لان سبحان الله ناس بترخم عليا وانا اصلا معرفهاش بس بيرخموا من باب التنفيس وتعويض النقص اللى فى حياتهم يالا سلام عليكم بقى اشوفكم على خير فى اقرب فرصه

كان معكم ابى هانم الجناح اليمين لحزب وداد قلبى

حكمه الامبراطورة

مش كل من عمل بطاقه بقى بنى ادم ده عاله اتزودت على البلد

افطار ابو الريش


كل عام و انتم بخير

و رمضان كريم

و يارب يتقبل صيامنا و صلاتنا و قيامنا فيه


السنة اللى فاتت ربنا وفقنا و عملنا يوم جميل التقينا فيه على الخير و اسعدنا اطفال كتير معنا فى مستشفى ابو الريش

و يمكن يومها شوفنا ان اغلب الاطفال سنهم صغير و بيحتاج وجود مرافق معهم و
غالبا بيكون المرافق ده ام الطفل او باباه .. الناس دى لاحظنا انهم وقت الفطار
بيدور على اى حاجة بسيطة تنفع يفطروا بها لدرجة ان فى امهات فرحت بشوية
البسكويت اللى وزعناهم للاطفال علشان تخليها للفطار


طفل مريض و بيتالم حاجة صعبة جدا .. لكن فى نفس الوقت المرافق له بتكون حالته اصعب لانه مش
عارف يخفف عنه ازاى .. و علشان كده الفكرة المرة دى هتكون للناس دى .. محاولة للتخفيف عنهم و نقولهم اننا بنشارككم حتى لو بوجبة افطار بسيطة


و طبعا اللى يحب منا يقدم تبرع مادى او عينى بجانب الوجبة يبقى جزاه الله خيرا


الوجبة هتكون عبارة عن : رز + خضار + قطعة فراخ او لحمة + مخلل
عيش + ثمرة فاكهة

و هيكون تكلفيتها 10 جنيه
و المعاد هيكون يوم 5 سبتمبر

الساعة 3 قدام باب مستشفى ابو الريش اليابانى للاطفال

نفس المستشفى اللى اتجمعنا فيها قبل كده


و لو ربنا اكرمنا و كان عدد الوجبات يفرح و عددها كتير ممكن نفطر التمرجية
بتوع المستشفى او نطلع على المستشفى اللى جنبها و هى مستشفى المنيرة لاطفال و
نوزع على المرافقين هناك


و اليوم ده مش بس للناس ده كمان لنا احنا لان الرسول الكريم قال " مَن فطَّر
صائماً كان له مثل أجره غير أنه لا ينقص من أجر الصائم شيء "يعنى ان شاء الله ناخد اجر صيام كل شخص قدمنا له وجبة


و فى حاجة عايزة اقولها للناس اللى مش هتقدر تشارك فى التبرع انهم ممكن
يحضروا معنا و يشاركوا فى توزيع الوجبات و التخفيف عن الاطفال و اكيد ده
بردو له اجر عند الله


و طبعا لاننا مش هنلحق نرجع بيوتنا على وقت الفطار ممكن بعدها نروح نفطر مع
بعض فى نفس المكان اللى روحناه المرة اللى فاتت - جزا الله سوو خيرا هو اللى راح
صور المكان و جاب قائمة الاسعار منه - محل ابو خالد فى شارع شمبيليون و
ده بيقدم مشويات و رز و سلطات و سعر الفطار عنده ممكن يكون فى حدود ال 30 جنيه

و لو حد عنده اقتراح بمكان تانى للفطار ياريت يقول لو المكان ده مش مناسب
وممكن لو تحبوا نعمل حسابنا اننا نفطر من نفس الوجبات اللى هنقدمها للناس معهم


اما بقى عن الوجبات اللى هنقدمها للناس فيفضل كل حد ناوى يشارك معنا يبعت يقولنا على الايميل او برسالة على الموبايل بالعدد اللى ناوى يشارك به علشان احجزه

المرة دى مينفعش نحدد يومها لازم على الاقل يوم الاربع اكون عارفة عدد الوجبات اللى هحجزها علشان تتحضر ليوم السبت


ده ايميلات الناس المسئولة عن اليوم





و ده ارقام ممكن تبعتوا رسالة عليها او تسالوا على اى شىء خاص باليوم ده

داليا صاحبة مدونة قوس قزح

0117742287

استاذ خالد صاحب مدونة همس الاحباب

0101345140


ملحوظه من عندى بقى :- اللى يعرف مكان كويس واسعادره اقل فى الفطار عن الراجل اللى اسمه ابو خالد ده يقول لان فعلا مش كله هيقدر يتحمل ومش عاوزه ناس تيجى وتمشى يا هفكر فكيره تانيه اريح واقل وممكن نجيب فطار معانا وناكل فى مكان واحد بس هفكر فين واقول لكم بعد ما نتشاور مع باقى العصابه

اللهم ارزقنى و اياكم فى هذا الشهر رحمة الايتام و إطعام الطعام و إفشاء السلام و
صحبة الكرام يا ارحم الراحمين
البوست منقول من عند قوس قزح علشان انا مقدرتش اكتب

رمضان كريم

تحديث: الحمد لله جبت العربيه وسمتها سيمبا على اسم ليون كينج معلش بقى يا خوخه الاستفتاء طلع كده ادعولى بقى ربنا يبارك فيها وكل سنه وانتم طيبين





كل سنه وانتم طيبيبن رمضان خلاص قرب والشياطين هتتكعبل ووتكلبش عقبال شياطين الانس المؤذيين لما ربنا يهدهم يا رب

بالمناسبه خدوا النكته دى
العيال فى الشارع بيغنوا رمضان جانا هل هلاله وقف الشيطان بعيد بيعيط وقعد يغنى رجب حوش صاحبك عنى رجب صحبك جننى


محتاجه دعواتكم بقى
امممممم علشان محدش يسال انا قمت بحركه جريئه وبعت بطوط علشان اغيرها بس مستنيه موافقه البنك علشان بجيب قسط فبقالى اسبوع زى العرب من غير كلب
انا بجد كنت بحب العربه دى اوى وكان نفسى اكتب عن مدى حبى وارتباطى بيها بس قلبى مش مطاوعنى خالص لانى بجد بزعل وبتقهر بس غصب عنى بطوط صغرت عليا ومبقتش هتتحملنى خالص انا بقيت بجرى كتير وكلها فتره وشغلى يتنقل بره القاهره بتلاتين كيلو فلازم اجيب واحده اقوى
انا لغايه النهارده لما بنزل من البيت ببص على مكانها لانى كنت بركنها فى مكان محدش يجرؤ يقف مكانها على الرغم من صغر شكلها بس كانت سيطره
بجد
ربنا يبارك للى اشتراها يا رب انا مبيهونش عليا ابدا حاجه تبقى بتاعتى تروح منى وخاصه ان دى كانت زى بنتى ووشها حلو عليا اشترتها قسط وكانت اول فرحتى فى الحياه وكنت كتير بحلم انها اتخبطت واصحى قلبى مقبوض ومعيطه من الحلم وامشى بيها براحه وكتير اتعصبت عليها بس كانت شيلانى
محمود رئيس جمهوريه نفسى لما بقوله بيقولى انا بحس بطوط دى بقت بنتنا كلنا فرحت اوى لانى حسه فعلا انها بنتى ايييييييييه يالا دنيا بقى
ادعولى علشان استلم التانيه البنوك بقت رخمه وهبقى اكتب لكم بوست عن تجربتى مره من المرات فى الايام اللى فاتت لما ركبت اتوبيس ايون اللى لونه اخضر تجربه توجع القلب علشان اللى سمعته من الكمسرى اقعدوا بالعافيه بقى

ملحوظه كبيرة :- فرحانه للصيادين اللى رجعوا وقرفانه اكتب من الخارجيه وموقفها



كان معكم حزينه هانم عباس ابى هانم


حكمه الامبراطورة

اللى ملوش خير فى القديم ملوش خير فى الجديد

ما يحكمشى وان حكم ميتحكمشى

العائله المالكه صحبة العزبة





تحذير
اولا ممنوع على الحوامل وذوات الضغط العالى والواطى وبين البينين قرايه الكلام الفارغ اللى انا بقوله ده
وتحذير لكل تجار الخضار علشان اناعارفه ممكن يحدفونى بطماطم بعد البوست ده
البوكس واقف وهيلم كله وكله متسجل انا بقول اهو


خدوا الكلمات دى مفاجعه من العيار التقيل عارفين لو يعنى مثلا مثلا واحد غنى لبقره هقول وماله عنده الرفق بالحيوان
لو غنى لسحليه اقول وماله تلاقيه بيرحم نفسه من لسانها
انما واحد يغنى لجمال اهو ده اللى مش ممكن ابدا
البقرة الصغننه اللى بتغنى دى بيغنى لجيمى حبيبى المجانين
انا بجد عاوزة اقولكم الصدمه الكبرى انى لما بسال بعض الناس تقول وماله ليه ميحكمشى دا كويس
وهو اصلا ميعرفوش حد غيره بمعنى ان اغلبيه الطبقه الفقيرة اللى ميعرفوش حاجه غير قوتهم اليوميى يقولك اه يمسك دا ابن الريس واضح يا شوباب اننا بس قله مندسه واحنا اللى مش عاوزين
خدوا كلمات الاغنيه علشان تتفرسوا وبعدين اتفرجوا على الكليب وشوفوا البقره اللى بتغنى
علشان يجيلكم صدمه عصبيه
وكله قبل الفرجه يحضر رقم الاسعاف

ونداء من قبل على كل من يعثر على هذه البقرة الضاله او يعلم اى شئ عن مكانها ان يرسل ليه رقم موبيله او اى حديقه حيوان بيغنى فيها وانا اخد العيال ونروح نقطعه بابو ورده تقطيع

الكلمات اهى
يا عم مصرى.. ياعم مصرى جمال مبارك أنا بحبه.. وهسمع مهما هسمع برده بحبه.. كلام كتير قولتوه أنه ميحكومشى.. طيب ليه ما يحكومشى.. طيب ليه ما يمسكشى..
طيب ليه ما يحكومشى.. طيب ليه ما يمسكشى.. ده فاهم وابن ريس والموضوع مدروس.. ولا محتاج لسلطة ولا محتاج لفلوس.. سيبك م الأونطة.. سيبك.. سيبك م التهييس.. سيبك.. سيبك م اللى يقولك هياخودها بالتوريث.. سيبك م التهييس..
كل الصاعايدة.. بيحبوا جمال.. والفلاحين.. بيحبوا جمال..
المصريين.. بيحبوا جمال.. المصريين.. بيحبوا جمال
ولا.. ولا.. ولا محتاج لسلطة ولا محتاج لفلوس.. ده باشا وابن باشا والموضوع مدروووس..
جمال مبارك هانتخبوا.. هانتخبوا.. لو رشح نفسه هانتخبوا.. هانتخبواااا.. لو رشح نفسه هانتخبوا.. هانتخبووااا..

بص بعينك كويس فى الـ80 مليون.. طلعلى حد غيره بس يكون مظلوم.. طيب ليه مايحكومشى.. طيب ليه مايمسكشى..
زى ما عاشت فى الأمان عايز عيالى يعيشوه.. إيه يعنى جمال مبارك يجى بعد أبوه..
لو رشح نفسه هانتخبوا.. هانتخبووااا.. جمال مبارك أنا بحبووووا..
لو رشح نفسه هانتخبوا.. هانتخبووااا.. جمال مبارك أنا بحبووووا..
99% بيقولوا عايزين جمال.. 99% بيقولوا حابين جمال.. كل الصعايدة.. بيحبوا جمال.. والفلاحين.. بيحبوا جمال.. المصريين.. بيحبوا جمال



مع السلام عليكوا
كان معكم انا انا ابى هانم وانتم وجيمى والنقطه دى حايره طايره من البقرة النونو وسمعنى سلام يا حبيبتشى يا مصر يا مصر ومتقولش اي ادينا جيمى قول ها نيدى ايه لجيمى لوووووووووووووووول عقبال عندكم هروح الحق العباسيه اصل النهارده الخميس وهتقفل


حكمه الامبراطورة



مفيشششششششششش غير كلمه اولها زى اخرها



..


انت تسال وجيمى يجيب

غمض عنيك وانت بتبص على الصورة


تحديث:- انا بعت سؤال وكنت متاكده انه مش هيرد او هيرد فى ناحيه تانيه وبالفعل اللقاء متكرر نف سالكلام بتاع ابوه الخالق الناطق ونفس الكلام اللى عاوز مترجم من وراه يشرحه للناس البسيطه ونفس هطل بتوع الحزب فى انهم يدافعوا ويساندوا
بس الميزه ان فعلا كان بيتصدم بالاسئله وده اللى كنت عاوزاه انه يعرف ان الناس مش مغيبه ويعرف هيتعامل مع عقليات عامله ازاى
وده الغرض النهائى بالنسبه ليه لما قولت لكم ابعتوا اسألوا

الظاهر بعد ما الوزاء والقيادات لقوا الشوبا ب يزنقوهم كل فتره فى الاسئله وبيحرجوهم فى كل مكان ققرراوا يعملوا عمليه انتحاريه ويخلوا الشباب يسال مباشر بس عن طريق مواقع بدل يعنى يعنى ما تتعبوهم وتحرجوهم فى التليفزيونات
الموضوع ببساطه ان جيمى عامل اللينك ده علشان اللى عاوز يسال وهو هيجاوب
http://www.sharek.eg/

بصوا بقى خلينا نتكلم جد الموضوع انا قريته فى المصرى اليوم
احنا ليه لا منسألوش ونرتب اسئله كويسه
بمعنى منكونش هجوميين لان الناس دى لما تهجم عليها تقولك شعب متخلف ملوش فى الديمقراطيه ولا الحوار وبتكون دى حجتهم ودايما يقولوا غوغاء زى جمعاء كده اللى كان بيقولها اسمه ايه ده فى فيلم خلى بالك من زوزو
طيب طالما الحج مقدم السبت نروح احنا له الاحد
بمعنى هو عاوز يعمل حوار وعامل موقع ليه لا ننتناقش ونبعت له الاسئله
بس يا ريت نبعت اسئله هادفه ومحدش يسالنى ازاى انا مش عارفه اصلان اصلان يعنى
بس فرصه من غير ما نشتم ولا نتكلم كلام مش لطيف نزنقهم فى الكلام والمناقشات
ولو الموضوع مش جد اوى وهما هيطنشوا حاجات يبقى على الاقل قريوها وعرفوا ان الناس بقى عندها وعى اكتر وعارفه البلد اكتر
مش عايشين فى البالوظه
الخبر هنا فى المصرى اليوم بس لينك الفتيس توك مش شغال التانى ده هو اللى شغال
كليك هنا


كان معكم ملازم اول بحار قسم اذاعه حره واهداف ساميه جمال ابى هانم بتنجانى


حكمه الامبراطورة

قليل العقل يلاقى المطبلاتيه كتير

نظيف القطنه طلعت قصيرة التيله




للمرة التانيه على التوازى التوالى المحورى يتحرج القطن طويل التيله ويتحول بقدرة قادر لقصير التيله ويصبح اضحوكه فى المولد كما الارجوز الخايب
وحظه دوننا عن كل القطن انه يبقى زى قليل البخت اللى عضه الكلب فى المولد تقريبا انا بدات اشك انه فى الوزاره دى علشان يتلقى الاحراج من الداخل والخارج وانا علشان قلبى طيب وبنت حلال متصفيه من كل الدم اللى عندى علشان هما نشفوه منهم لله احب اقول استقيل بقى يا راجل ربنا يرحمك هتقصر اكتر من كده تروح فين القصه وما فيها وفى بورسعيد هجيب لكم الكلام خبط لزق وهعلق على رد القطنه

البظاظو «رئيس الوزراء»: «الفساد فى كل مكان.. وحاسس إن البلد مش بلدى»



وقف الطالب عبد الله أحمد بظاظو فى مواجهة الدكتور أحمد نظيف، رئيس مجلس الوزراء، وهتف قائلا: «أشعر بالفساد فى كل مكان وبقيت أتنفسه ومش حاسس بمقاومة من جانب الحكومة. كل يوم الصبح أحس بالغربة، وإن البلد مش بلدى. ليه المواطن يشعر أن كرامته بره أو جوه مش موجودة، وهل بكيت سيادتك عند غرق العبارة والجنود اللى بيموتوا على الحدود».

( يبكى تحت الليالى والخوف من فقد الكرسى يملى القلوب ، مش عارفه ليه حسيت ان الواد ده كان ماشى حلو وفجأه عواطف قفشت فيه من قفاه واتنحنح هو ده بيبكى ده بفلوسى يا كليبه وبعدين الميه مبتوصلش فى العالى كده بسهوله فاكيد مش هيبكى عيال ساذجه صحيح)

وفور انتهاء الطالب من كلمته دوت قاعة المسرح بالتصفيق لمدة تزيد على ٥ دقائق.

خمس دقايق طيب اجيب اوباما علشان يصقفوا اكتر ولا ايه طيب الواد قال كلمتين جامدين بجد هو الشعب ده مبيصقفش غير لحاجه واحد الرقاصه واعتقد اوباما شويه زيها لان هز قلوبنا كلنا تيررررررررارررررر مين بيحدف طماطم هنا يا عيال انا مقصدش حاجه وحشه )

كان هذا واحدا من سلسلة المواجهات الساخنة التى دارت بين طلاب الجامعات ورئيس الوزراء فى معسكر إعداد القادة فى بورسعيد مساء أمس الأول، وكانت معظم الأسئلة حول الفساد وبيع القطاع العام وتصدير الغاز لإسرائيل والعلاقة مع أمريكا وإيران وإثيوبيا والغلاء والبطالة.

وصل عدد الأسئلة إلى ١٩ بعدد الجامعات المشاركة.


واستهل رئيس الوزراء الردود باعترافه بأن الأسئلة كلها فى الصميم،

( اى والله والبعيد معندوش ميه بقى علشان يحس شويه وهو يعنى مكنش عارف الاسئله دى ولا كان غايب من مصر ساعه لما حصل ده ادى اخره اللى له واسطه فى مصر يغيب كل الحصص بتاعت الفساد براحته انا هطالب انهم يلغوا الاجازة فى حصص الفساد )

وقال: هى الحكومة المصرية تبقى مين؟

( تبقى ناس متعفنه من اول ريحه شرابها لغايه شعر راسهم يعععععععع )

اللى مالوش قريب فى الحكومة يرفع ايده؟

( انا ارفع ايدى ورجلى وودنى كمان بس انهى حكومه حكومه الوز وابن العز طبعا معنديش )

لو الحكومة فاسدة نبقى كلنا فاسدين..

( شفيق يا راجل انت مصدق بقك الكبير ده ايون احنا عندنا فساد لاننا اتعلمنا خلاص كله بيهبش فى التورته اذا كان موظف بيتنيل على عينه يسرق بتمرمطوا اللى خلفوه انما لو باشا كبير بقدره قادر او بعصاية الساحره الطيبه بتنقله بره مصر قبل الواحد ما بيغمض له عين )


0نحن نبذل جهودا غير عادية لمقاومة الفساد،

( ايوة بياخدوا كل حاجه فى جيوبهم علشان يضمنوا يا حلوين محدش ياخد هو بيحافظوا لكم على فلوسكم اما شعب نمرود صحيح حتى شوفوا نتيجه بذل المجهود بيعرقوا ويسيبوا الناس تخبط دماغها فى الحيطه ويسافروا يعمل مانيكير وباديكير)

وفسادنا من نوع مختلف،

( انت هتقولى ده احمر وبترتر الفساد بتاعكوا )

الفساد اللى عندنا والحمد لله منتشر فى حتت صغيرة.

( ايوه فى تهريب فلوس صفقات شراء اراضى وتصقيعها نهب الشعب فى ضرايب وبلاوى زرقه دى بسيطه خالص هو الشعب مياكلش ميه ولا يشرب محشى ويكتفى بالحشيش وهيخف ان شاء الله )


ووجه نظيف كلامه للطالب عبد الله بظاظو قائلاً: لا يا حبيبى مصر دى كبيرة قوى وإحنا ما بعناش بلدنا إحنا بنينا بلدنا

( ايوه مبعناش باماره القرى السياحيه اللى فى سيناء والاراضى اللى فى طابا مش مخلين جنس مصرى يعمل مشروع ولو عمل فعلا فعلا كأنهم بيرموا له عمل على الباب ارض توشكى مش اتباعت ولا مصنع دمياط اللى كان هيتعمل فطيس ولا الفنادق ولا القرى السياحيه اللى اصحابها اجانب مصر مش اتباعت خالص مصر استلفوها شويه وهيرجعوها ركزوا انتم بس )


، عايز ادعو زميلنا ده يزور القرية الذكية

( فعلا قريه ذكيه ووزير اسم الله عليه اغبى من ولا بلاش علشان مظلمش حاجات تانيه ملهاش ذنب )

علشان يعرف مصر، مصر العاشر من رمضان

( هئ هئ هئ ايون اللى مهجوره من السكان والمصانع طالع تربنتين اللى خلفوهو مصر مدينه بدر اللى بقالنا داخلين على تلات سنين مش عارفين نركب خط تليفون للمصنع قبل ما يشتغل حجزين بقالنا سنه

وآلاف الأفدنة التى تصدر البطاطس لأوروبا

( على ايدى بطاطس بزمتك مش عيب نبقى بلد القطن والقمح وتقولى بطاطس يا راجل يا فيرى )

، مصر زويل ونجيب محفوظ والبرادعى والسادات وجمال عبد الناصر وحسنى مبارك

( اخص ونسيت جمال مبارك والوزراه والحكومه وانا وانت ورقصنى يا جدع تيت تيت تي )

ونسى يقول مصر امراض وعشوائيات وسرقه ونهب ودمار فى اماكن كتير نسى يقول مصر مجاملات وحرايق واهمال وانحدار فى المستوى بين الناس من غلبهم

نسى يقول مصر اطفال بتتعالج فى كوليدور المستشفيات

نسى يقول مصر شباب بتغرق فى البحر وناس بتموت على رغيف العيش وناس بتموت من حسرتها على ولادها اللى بيرجعوا فى صناديق خشب

نسى يقول مصر الفراعنه بنوا الهرم واحنا حكومتنا قضت على الفراعنه وعلى احفادهم نسى يقول مصر بقت ملكيه خاصه وعزبه خاصه واتحولت لساحه معارك نسى يقول مصر راحت تجيب ورقه بوسطه ومجتش هى فين مصر دى منك لله

انا بجد مقهورة منه وموجوعه هما لسه مستهيفنا للدرجه دى ولا مناخيرهم اتقطعت مش عارفين يشموا الفساد انا تعبت منهم لدرجه قرفى من كل حاجه

يالا ربنا يستر فى اللى جاى ولو انى عارفه انه مش هيبقى اسوء من اللى احنا فيه

ملحوظه الخبر من المصرى اليوم اللهى يحرق دمهم انطح هنا

كان معكم لواء اركان حراب برتبه عميد اعالى الترع والبحار ابى هانم بتنجانى


حكمه الامبراطوه


كيس الجوافه اتحول اومليت افرحوا يا عيال .

وجهان لعمله واحده المدب والصريح هو انا


منذ فتره طويله اوى كما طريق مصر الصعيد وكل اصدقائى فى بعض الاحيان بعد مناقشات طويله بينا جدا ينظرون لى شذرا وشيرازا وشيرزا

وفى نفس واحد كا من يدخنون الشيشه ويخرجون الدخان سويا كأنها مسابقه جمال الدخان
وفى نفس واحد يقولون بطلى تبقى مدب كده فى كلامك بلاش الصراحه اللى بتوجع دى

الحقيقه مكنتش عارفه ازاى الحقيقه او الصراحه توجع قعدت انا ونفسى اضرب فيها واشد شعرها واعض مناخيرها بما انى واخده بطوله الجمهوريه بلافخر ولا فشخره فى عض المناخير اى مناخير تقع تحت ايدى ان نفسى تعترف او تقول تحلف ميه طلاق بالتلاته انها اصلا مش فاهمه يعنى ايه الصراحه واكون مدب

يعنى موقف بينى وبين احدى الاصدقاء سالنى بخبث وبنص عين ونص لسان علشان هو الدغ فى حرف السين بس بينى وبينكم سكر قالى ممكن فى يوم من الايام متكلمنيش وتخصمينى او تزهقى فانا بدون تردد رديت قولت له اكيد ليه لا يعنى بس فيه حالتين انا لما بقول خلاص لحد الموضوع منتهى بيكون فعلا الموضوع انتهى ليه ومينفعش نكون اصدقاء او اى حاجه فى الدنيا والحاله التانيه انى بدلع علشان اللى قدامى يقولى طيب ايه حصل طيب انا زعلتك فى ايه

وفى كلتا الحالتين انا بيكون باين عليا انى بتكلم جد او بدلع
بص ليه بنص عين وقالى انتى دبشه ومدب وخفى كلامك بلاش الصراحه الزياده دى

طيب انتم بالله عليكم السيده فى ضهركم وصلاح سالم فى وشكم وطريق المطار يستر عليكم
انا مدب فى ايه غلطت فى ايه كان المفروض اذوق الكلام ازاى انا اتستالت سؤال وجاوبته خدوا بقى من ده طول الوقت كل حد اكلمه يقولى

دبشه هانم اتهد
يا قطر الصعيد امسكى لسانك يا مترليوس موجهه حاسبى على كلامك
لما شككونى فى صحه لسانى وفى عقلى وبقت حسه انى حد مش طبيعى خالص
وكله كوم

وربنا واعدنى بحد طول الوقت يقولى الملافظ سعد يا ام احمد
انا مش عارفه الكلام بيتوجهه لمين ومين ام احمد انا بجاوب اللى بيجيى فى بالى ليه اقعدافكر فى الكلام وفى تذويقه ليه مقولش الكلام زى ما هو ما هو
فيه مشكله بيجهلها ناس كتير اوى وهى ايه بقى
ان انا لما بسال برضه حد فى حاجه والاقيه حور فى الكلام وبقى شخص حاورتجى ( التصريف التالت للى بيحوروا يعنى ويعملوا حوارات ) بيبان عليه وبفهم على طول وبضايق وبيكون نفسى انقض على مناخيره اكلها طيب ليه انا اعمل كده ليه احنا منقولش الكلام زى ما هو فى قلبنا واللى قدمنا يفهم انه مش جرح بس يمكن دى حقيقه جوانا بنقولها مبكونش فعلا متعمده اضايق ولا بكون متعمده اجرح انا بقول اللى فى قلبى وعقلى وبس
وبعد مناقشات مع بعض الاصدقاء لمده يوم كامل وكل شويه يطلبوا عصير لا ميه لا شيشه
وفجأه حط ايده على قلبه وهو بيفرفر وقالى انتى يا بنتى يا حبيبتى اللى هيتجوزك هيمشى شايل دوا القلب والضغط فى جيبه ليل نهار بصيت له شذرا انا بقى اشمعنى انا يعنى وقولت له انا انا دا انا نسمه بس نسمه فى امشير نيهاهاهاها

بجد بجد لازم منزعلش من حقيقه الناس اللى لسانها فالت كده انا مش مدب انا مبعرفش اقول غير الصح وغير اللى جوايا وفيه زى كتير اوى الناس اللى بتجامل وتذوق دى بيبان وفيه ناس بتتقبل الذواق والمجامله وفيه ناس لا فيه فرق بين اللباقه والكدب والنفاق انا يمكن عندى شويه لباقه بس مش هعرف اكدب ولا انافق مع انى ساعات اصلا بشك فى اللباقه دى لان كله مصمم على انى مدب وانا فعلا بدأت اقتنع انى مدب ومدب صناعى كمان انا عن نفسى مبزعلش من الصراحه او الكلمه اللى بتطلع من القلب مره واحد وبس ومع الاروفورا عليكم

كان معكم من امام مصلحه العباسيه للاحوال المدنيه ابى هانم كعب الغزال

حكمه الامبراطوره

بكره تتخنق يا كتكوت لما تموت