انت بدود ليه



سؤال بجد بيحيرنى اليومين دول ومش قادره اقفش فيه رايح جاى زى بندول الساعه لما جاب ليه تربنه فى دماغى الداخليه وعقلى الخارجى
احنا بندون ليه ؟؟؟؟؟؟؟
يعنى علشان حاجه تتغير ... ما هو مفيش حاجه بتتغير


علشان نأثر فى بعض........ دا احنا بنقرأ من هنا والكلام بيطير زى الكحول من هنا
علشان نفش غلنا مثلا ..... طيب ما انا اجيب بتاعه الهبله الكبيره دى بتاعت البوكس واقعد اضرب فيها او اضرب حد من اصحابى انا عندى ناس غاويه العب بوكس فى اكتافهم
او اروح الجيم ومنها رياضه واستفاده

علشان الناس تدخل وتقولى الله كلامك حلو .... يا سلام طيب وايه الفايده كلامى حلو ولا وحش انا مش شايفه اى تأثير من اى اتجاه

الناس اخلاقها وحياتنا بقت دووووووون دوووووووووون دووووووووون يا شوباب والله
ومتزعلوش من اللى هقوله فيه ولاد بقوا اكثر تناحه واستعباط وفيه بنات بقوا اكثر صيدا للعرسان والتفاهه وفيه ولاد عايشين على قفا بنات وفيه بنات عايشين على قفا رجاله كبار
والبلد باظت اى والله باظت انا صحيت من النوم فجأه لقيتنى شيفاها بايظه

دا انا اكتشفت ان فيه ستات محترمات بنات عائلات شورعيات سورى يعنى غاويه فرقعات اعلاميات فى التليفزيونات باى استعباطات

طيب نرجع لسؤالنا بقى
انتم بدونوا ليه طالما مش هنغير
انا عن نفسى
عندى اقعد ااشتغل مفرش تلاجه بالخيط والابره افيد مع انى برضه دى مبعرفش اعملها اى والله طول عمرى فاشله فى القصص دى
سؤال كمان احنا شغلين نفسنا بحاجات مش بتاعتنا ليه
هو احنا عارفين نعدل المعوجه اللى عندنا لما نعدل المايله اللى برا مش كل حد يتلهى على عينه ويخليه فى نفسه

هو انتم زهقنتونى بسرعه ليه
امممممممممم يالا بقى ردوا عليا والله ومحدش يسفسط عليا على راى نواره علشان معضش حد من مناخيرة وانا بنقرف اصلا

ملحوسه خفيفه :- البوست اللى فات الراجل لغايه دلوقتى اتعمل له اربع قضايا منهم بتاعت سرقه ميزان وكهربا ومش عارفه ايه بس انا عاوزه الموضوع ده الصحافه كلها تنشره ومش عارفه ازاى لان ده هيبقى رادع لناس كتير اليوم السابع كلمونى بس برضه اسكت هوس محدش عمل حاجه مع انهم اللى كلمونى مش انا يكونش خافوا من الراجل
يالا ما علينا

اعتذار كمان :- انا عارفه انى مبزورش حد كتير او والله بقرا بس مش بعلق الوقت عندى مهبب بهباب اسود لون الزفت بتاع الاسفلت فمحدش يزعل انا تقريبا بقرأ لناس كتير بس مفيش حاجه اعلق بيها هبقى اجيب مشبكين اعلق بيهم فمحدش يزعل منى

اتمسوا بالخير بقى
كان معكم مراسلكم من جوه التلاجه لواء اركان حرب آبى هانم

حكمه الامبراطورة

الشاطرة تغزل برجل خروف

امسك حرامى الدقيق





اصباح الخير عليكوا
الصور اللى فوق دى حصريا وانفراد وكل المسميات الهبله اللى بتتكتب عندى انا بس
ده بقى مخبز فرن يعنى بتاع عيش مدعم الراجل تروح له حصه الدقيق كما يقال عليها وبعد ما يغير الدقيق بدقيق اردأ بيبيع التانى انا مش عارفه السعر تحديدا
بس عارفه انه بيكسب فيه كتير اوى اوى
القصه ببساطه الراجل ده الناس حذرته كتير لانه بيأخد حقها كده وهو عباره عن بلطجى بيتخانق ويضرب ويعلم على حد قوله على الناس واللى هيتعرض له مش هو بس هو واهله واللى واقف فى الصورة معاه والده
الصور هتلاقوا فيه المخبز واضح وده لانه فى بيتهم
ولما واحد وقف له مره عمل معاه خناقه وعمل جرح لنفسه وراح عمل قضيه للتاني
انا نفسى افهم بقى احنا حكومه وبتسرقنا علنى وملايين بتتهرب بره
احنا كمان بقينا بنتشطر على بعض
بقينا ما بنصدق نخطف اللقمه من بعض علشان نكسب احنا بالحرام
الناس اشتكت لمفتش التموين وهو قال انه مشفش حاجه وطبعا ده لانه لازم ينوبه من الحب جانب
فيه مفتشين محترمين جدا جدا وفيه ناس تانيه ولاد تيييييييييييت
الناس اصحاب الافران بيكونوا فى بدايه دخولهم المجال مش اغنياء خالص ولا حيلتهم ويمكن بيستلفوا حق اللى بيعملوه بعد فتره تلاقيه بنى بيت دورين تلاته
الغريبه ان الحاجات دى فى المنصورة يعنى المفروض لا
متحصلش
انا عاوزه اعرف الناس باعت زمتها للدرجه دى خلاص وكمان ببلطجه وقله ادب والمفروض ان الطيبه بتيجى من الفلاحين وزى ما انتم شايفين فى الصور والده فلاح وهما كده يعنى ناس قيمه زمتها فين
ده واحد على الاف من اللى بيعمل كده الفرن ده انا عارفه مكانها وعارفه اصحابه تحديدا
انا مش جايبه الصور فرجه وبس انا فعلا قدمت شكوى فى وزاره التموين وفى كذا مكان بس معرفش لانى مش متواجده فى المكان انى اعرف ايه اللى حصل
اعتقد لو كل واحد عمل كده ووقف للظلم والسرقه دى هنبدا نرجع حقوق لنا كتير اوى

يالا اقعدوا بالعواف عليكم

كان معكم مدير اول مباحث مراجيح مولد النبى لواء ابى هانم امسك حرامى

حكمة الامبراطورة

أسد عليَّ وفي الحروب نعامة



امرأة المتناقضات




اتتعجب انى لا اقرأ ولكنى اكتب عنك
اتتعجب من عدم رومانسيتى ولكنى احب
اتتعجب كونى امرأه بلا شطأن وانا ابرع قبطان

لا تتعجب

فانا امرأه كل المتناقضات
انا من هويتك ولكنى اخفقت فى حبك
انا من عشقتك ولكنى لم استطع ان اكون عشيقه
انا من تاهت بين الدروب ومعي بوصله الحياه
انا تلك المرأه وهذا البركان
انا من تهوي ولكن تخاف الهجر والالم
انا من تعشق انفاسك وتغوص فى بحر الاحزان


انا من تنتظرك لتطل عليك من خلف القضبان
انا ذالك السجن وتلك السجان
واناالهوي التى لم يكن يوما فى الحسبان
انا تلك الطفله التى تجري عليك لتختبأ من الايام
وتلك المرأه التى تحمل قلبها بين ضلوعها وتخاف عليه من الحرمان
انا تلك من تعذبت فى هواك ولم تمت يوما من الهجر والحرمان
انا تلك وذاك فهل تجد يوما تفسيرا لتلك الاحزان
انتظرك فهل ستأتي يوما لتمحي تلك الالام
وتخرج بى من العتمه واعود يوما لقلب لم يكن يوما
مكانه الا الاحزان


دى محاوله فشله منى علشان اكتم الغضب اللى جوايا شويه ناحيه الاحداث السياسية اللى موجوده بينى وبينكم نفسى اتسدت حسه اننا بندن فى فى بار والبوست الجاى بالصور هوريكم الناس بتعمل ايه فى بعضها واوريكم صور فرن بيسرق دقيق مدعم ويبيعه
وطبعا بما انى مبيهونش عليا منكدش عليكوا عاوزه اقولكم دعم الغاز اتخفض من 6.5 مليار الى 1.5 مليار الخبر لسه مش متأكد بس اعتقد هيتنفذ ومحدش يقولى اكتبى عن الموضوع ده يا رب يولعوا بجاز
ركزوا فى البتاع الفاشل اللى انا كتباه فوق ده وبس
يالا تصبحوا على خير علشان منمتش من امبارح

ملحوسه للبت خيخه محدش يقراها :- انتى اللى شمعه من اجل الاخرين يا خوخه ومش هقولك ليه وموتى بغيظك ها بقى
كان معكم لواء اركان حرب برتبه شاويش ابى هانم كعب الغزال

حكمة الامبراطورة


لا تثق فى كل من ابتسم لك .. يا حدوقه

البرطمان المصرى


اليومين اللى فاتوا الناس زعلانه ومضايقه ان اتنين نواب فى البرطمان بتاعنا واحد وقف وقال للتانى انت زى العاهره والتانى قاله انت مراه لعوب او معرفش قالوها ازاى
ببساطه جدا مستغربين ليه مضايقين ليه
نرجع بالزمن لفتره طويله اول ما نزلنا وانتخبنا الاشكال دى
مش دول برضه اللى كانوا لهم معارف ومحاسيب وانا هنا بتكلم عن الاتنين حزن وتنى ومستكلين الا القليل منهم اوى
مش دول اللى بيدفعوا رشوه مش دول اللى لمين الناس حواليهم وبياكلوا ده وبيشتروا ده وبيوعدوا ده بكذا حاجه
مش هما برضه نفسهم اللى كانوا بيجيبوا بلطجيه لتقفيل اللجان ويضربوا البطايق علشان الناس تنتخب
انا عاوزه افهم باى منطق تزعلوا انهم بيفرشوا الملايات لبعض
انا عن نفسى الناس دى مبتمثلنيش فى اى حاجه بالعكس بحس انهم فقره كوميديه مقرفه بتفكرنى بالطمع بتاعنا لما انتخبناهم وبطمعهم فينا لما قعدوا فى البرطمان واتمكنوا فى القعده
ومن هنا احب اقولكم طالما المجلس بقى عاهرة وأمراه لعوب يبقى على الشعب انه يمسك صاجات واهو ينوبه من الكباريه كرسى وحد يلم النقطه بقى


الخبر التانى
64 مقعد فى نفس البرطمان للمرأه الموضوع فى حد ذاته حلو مش وحش
ومبسوطه بيه
الخوف كله بقى من وجود الستات فى البرطمان ده يبقى عن طريق الحزن الوتنى ويجامل بيه طنط سعاد وطنط بكينام وطنط ام سحلول وبنت اختها ام الخلول
ساعتها يبقى البرطمان هيتحول لسلسه مطاعم تشيلز فى نهار جمعه خارجى
واللى ميعرفش تشيلز فى الوقت ده يبقى يعدى يلاقى ناس قرفانه متنشيه كده على الصبح وشاربه كوبايه نشا
وطبعا استحاله يبقى فيه واحده بتمثل اسطبل عنتر ولا اى منطقه شعبيه انا راى يقصروا الانتخابات على الزمالك ومصر الجديده وجاردن سيتى والمهندسين
وكمان متبقاش عن دواير لا تبقى عن شوارع معينه
منعا لدخول ناس مش ولا بد ولازم نعمل عضويه لكل واحده للدخول للمجلس ونخلى اماكن الستات لونها بينك او بيربيل


الخبر التالت والاخير علشان المراره الكاوتش

تعيين اول رئيسه للجامعه وهى ست مجتهده جدا وتستاهل تعليق منى الشاذلى قالته ومش عارفه او مش متذكره هل هو عن لسانها ولا عن لسان جعر تانى
ان ايه بقى ان دى بركات اوباما افندى مين يا خويا اى والله ده بيقولك بركات اوباما ومطالبته بتحقيق حموم المرأه بالشاور جل مش بالصابون العادى علشان ريحه العرق
يعنى مش علشان تستحق او علشان لها مكانه لا علشان اوباما قالك ولد خرسيس فرسيس لازم تدى للمرأه حق الاستحمام
انا حسه ان الناس بعد كده هيعملوا مولد سيدهم اوباما وكل واحده عندها ثور مبيخلفش تأخده وتروح تلف حوالين المقام شويه يمكن يخلف معزة صغيرة
ومن هنا تنتهى الاخبار اللى قدرت استوعبها الايام اللى فاتت بما انى فاصله ارضى وهوائى ولاننا فى الصيف والدكتور مانعنى من تعاطى الاخبار ونصحنى بالسفر اغلبيه الايام
فاحب اقولكم ان الايام والاخبار كلها شبه بعض كله ماشى بقفاه


كان معكم ابى هانم ابو العافيه من امام مجلس الشوعب الهوائيه اللى هنخليه بينك قريب علشان الستات تتبسط اللى انا منهم

حكمة الامبراطورة

قرعه ومسكوها فرشه ومشط

الجواز واللى عاوزينه


الست تنبهر بهذا الممثل الأجنبي الذي يحتضن زوجته على الشاطئ وهو يرتدى مايوه وهى ايضا ترتدى مايوه بكينى


ثم يرتميا سويا على الرمال ويتدحرجا إلى أن يصلا إلى البحر


ثم يعودا ويتدحرجا بالعكس على الرمال على الشاطئ الهادئ الخالي من أي بني آدم،


ولذلك يحلم الرجل بأن يكون هو هذا الممثل صاحب العضلات والذي يرتدي البوكسر


وأن تكون معه هذه الفتاة الرشيقة الجميلة التي ترتدي هذا الكاش مايوه وتضع 'صن بلوك' على يديها،


ولكن في الزواج يا عزيزتي انسى كل هذه الخيالات تماما،


فسوف تذهبي إلى شاطئ يعج بآلاف المواطنين الذين يبحلقون لأي دراع معدي أمامهم،


كما أنك لن تأخذي راحتك لأنك مشغولة بإعداد الساندويتشات وكأنكم في الجونينة يوم شم النسيم،

بالإضافة إلى أن الكرش الذي سيظهر له بسبب الاكلات والانتخه على الكنبه امام التى فى سيمنعه من ارتداء البوكسر،


وهذا غير انك ستتحولين بفعل عوامل الزمن لكائن غريب يشبه الى حد ما شجره الجميز من جسم غير متناسق بسبب الحمل والاطفال وشعر متكهرب على 280 فولت عالى

وهنا ستدركين حقيقه انك لن ترتدى الاختراع الذي يسمى كاش مايوه

وستكتفي بجلابية مليئة بالتطريز إذا كان حالته مستعصية،

أو ترتدي بنطلون برمودا ضيق إذا كان روش طحن ومعه شبشب بلاستيك بصباع

وعادة ما يكون بمبي أو لبني وستجلسين على كرسي صغير على الرمل أمام البحر مباشرة

وتدلدلى رجليكي وترفعهما مع كل موجة ببلاهة غريبة وستكوننى في قمة السعادة من كتر الغباء اللى بقيتى فيه

وفجأه يلتفت هو لكى بكرشه المتدلى امامه خمسين متر واصابعه التى تلعب فى الرمل وينظر لك من خلف الكتاب التى يقراه او الجرنال او لو كان حبيب شويه هتلاقى شايل لاب توب فى كل مكان ثم يلتفت لكى ويقول

' المية حلوة قوي النهاردة .. هاتى شاندوشت بلوبيف'


كل هذا وأنتي جالسه خلفه على الكرسي الأخضر الكبير تحت الشمسية وتنظري له من تحت النضاره ام عشره جنيه


وتتحسري على الكاش مايوه والكرة الشاطئية لأن الوضع أصبح حلل محشي وطاولة وجلابية


زوجه في المطبخ


يستيقظ الرجل صباحا على السرير الأبيض النظيف وشعاع الشمس ضارب في عينيه،

ويمسح وجهه بيده استعدادا للفوقان ثم ينزل من على السرير وهو يرتدي التي شيرت البادي الأبيض

مع شورت كاروه قصير ويبحث عن زوجته ليجدها في المطبخ تجهز التوست والجبن المطبوخ

وترتدي فقط تيشيرت أبيض طويل يصل حتى فوق الركبة بعشرين سنتيميتر وترتدي فوقه

مريلة مطبخ ربما أطول من التيشيرت الأبيض من الأمام ثم يقف الرجل خلفها مباشرة ويقبلها

ويرمي نفسه على الكرسي المجاور لترابيزة المطبخ ليصنع الكابتشينو حتى يصحصح

كل هذا بالطبع لا يحدث في الواقع، لانه فى خيالك فقط ومن كتر الفرجه على الافلام الامريكانى اللى خربت عقولنا ولا احنا عارفين نحب ولا نفضل مجانين


ولكن الصورة الواكعية ستختلف تماما عن الصورة السابقة،

فسوف يستيقظ الرجل من تحت اللحاف المشجر ويجد الحجرة ضلمة كحل لا داخلها شمس ولانور

لأنك مقفلة الشبابيك عشان محدش يجيله نزلة برد رغم أن نزلة البرد مكمكمة في المنزل

ونفسها تلاقي باب شباك اتفتح عشان تخرج منه،وخوفا على الاولاد من البلكونات لان لا قدر الله لو حدث شئ لطفل منهم سوف يقوم هو بمقاضتك فورا والحصول على نفقه منك ومش بعيد يطالب باعدامك فى حين انه طول السنه ولا بيفتكر ان عنده اطفال لهم متطلبات غير الفلوس

ثم يمسك الرجل أنفه بسبب ريحه البصل وغلي اللحمة وهبو المطبخ اللى هو طبعا بسبب طلبات سعادته واطلب يا سيدى ويطلع عين ابوكى يا هانم

وتقولى ايييييييه فين ايام بيت العز يا بيتنا

ثم ينزل من على السرير وهو يرتدي ترينج التوحيد والنور ليذهب اليكى في المطبخ

لينظر اليكى نظره الذئب للضحيه ويمصمص شفتيه مستنكرا حالك وكأنه ليس السبب في العيشة الضنك،

ثم عليكى عزيزتى بأن تحدفيه بأى كوب امامك لكى تتخلصى من هذا البوز اللى على الصبح

ولكى تواجهى الواقع المرير فى انك متجوزتيش براد بيت وانك اتجوزتى ابو رجل مسلوخه

وبالتبعيه اصبحتى انتى كما القرنبيطه العبيطه

او امنا الغوله

ولا تنسى ان ترمى له الفوطة المتسخة المصرية الشهيرة وتقول له بكل الاطه ارفع اللحمة من ع النارعلشان انا جهزت طعام الغداء منذ الصباح،كما امرت يا ابن المفجوعه

وبالطبع كل ذلك وهي ترتدي جلابية وتحتها بنطلون وتيشيرت هاي كول صوف.


دى الحياه المعاصرة للجواز المصرى انا جاتلى على الميل بس العكس وعلى غرار انهم بيحاربونا عاوزه برضه اوريهم الصورة ازاى

فيا ايها الرجل انت لست براد بيت وبالتالى انا لست انجيلينا جولى

احنا الاتنين انتاج مصرى ميه فى الميه فمتحلمش كتر وبطل عنيك تزوغ لبره


كان معكم كايده الرجاله انا من يومى ابى هانم


حكمه الامبراطورة

اللى ميشوفش من الغربال يركب لينسيز

ايه تأخد القرعه من التوكة


انتابنى شعور غريب من قبل زياره اوباما الى بعد الزياره
وهذا الشعور عباره عن اننى البس طرطور واقف فى مولد الحسين وكل يوم يزيد هذا الاحساس عن اليوم الذى قبله
اولا قبل الزياره مكنتش اقدر اقول او انتقد خالص لانى اصلا مكنتش فاهمه الحوار ايه ولا هو ايه الغرض من الزياره
لان ببساطه لو هنتقد نيته يبقى كده مينفعش لانى معرفش النوايا ولا الزير
لو هستغرب واعلق حواجبيبنى لفوق وارفع شنباتى انه ليه اختار القاهرة فتفكيرى السذاج هيقولى علشان نفسه يزور الهرم
وبصراحه لا اجد اكثر من ذلك غرض يعنى مصر ولا هى مناره الاسلام ولا هى بتمثل اى حاجه غير جوانا احنا الا اذا كان حاطط عينه على قناه السويس وهيقول جدى هو اللى بناها
بس لو اتكلمنا جد هو ميقدرش يلقيه من السعوديه لان كده الناس عنده هيطرقعوا له بابو ورده ويقولوا عليه مسلم
مع انه حلف على المصحف انه مش مسلم
وانا بكل صراحه وبجاحه ووضوح لا يعنينى كونه مسلم من غيره لانه فى النهايه بيتبع اجنده للامريكان ميقدرش يحيد عنها
ملحوسه خبيثه حكامنا مسلمين ومعتقدش ان ده له علاقه بالحكم اصلا لانهم مبيراعوش ربنا فى اى حاجه
كونه برضه اختار القاهرة بنت ام عز يمكن علشان فعلا هى اكبر دوله فى الشرق الاوسط تأثير ايووووووون بنأثر على بعض وعندنا كميه اختلافات ومسميات لا حصر لها يعنى السعوديه مثلا والدول العربيه معروف عندهم كام مسمى حبه شيعه على حبه علمانين على حبه ليبراررين بس كله بيلم نفسه
مصر ما شاء الله كل ده زبادى فى الخلاط بالعسل السنه منقسمين والسلف شرحه والاخوان شرحه والعلمانين شرحه والرابراريين شرحه
و27 حزب فى عين العدو
بزمتكوا هيلاقى احلى من كده شعب يبخ فى ودانه اى كلام منين والشعب يصدق ويقولك انا بوجهه للعالم الاسلامى ماشى تنور معندناش مشكله معاك المايك
ده انطباعى قبل الزياره

يوم الزياره

ماشاء الله عندنا مذيعين عاوزين يتحطوا تحت قطار سكه حديد بارد يمشى عليهم براحه قمه فى الهيافه والسذاجه والهطل ومقدرش اقول استخفاف بعقول الناس لان اللى بيستخف بعقل حد على الاقل بيكون هو عنده عقل انما دول عقلهم عاملينه بانيه
كان ناقص وهو فى المسجد يقول يااااه شوفت وشه نور من الايمان ازاى
دة بقى غير لو راجعتوا كومنتات البوست اللى فات على انه لابس خف ولا لا فى رجليه وان ده لما بيعمله انه بيحترم تقاليد الاسلام هو الالتزام بالنسبه لنا بتعاليم الاسلام فى دخول الجامع اسمه تقاليد
هما مش فاهمين ايه الفرق ما بين تقاليد وتعليم وواجب
ولا انا اللى الشمس ضربت البرجين اللى فى عقلى وساحوا
تانى حاجه النظافه اللى كانت فيها القاهرة بعض المناطق والجيزة انا شايفه ان دى استفاده عظيمه بجد حتى ولو ليوم واحد واعتقد دى مهمه للى زى علشان مبحبش اشوف زباله فى الشارع
اكتشفت اننا بلد انجازات لما نحب نعمل حاجه بنعملها فى ايام
السؤال بقى ليه مش دايما بنعمل كده ونضف
الاجابه لاننا شعب مهمل واكيد الحكومه اكبر مننا سنا وعارفه اننا عيال وحشه وبنرمى زباله فى الشارع ومبنشربش اللبن قبل ما ننام

الموضوع اللى كان شاغلنى اوى النافورة اللى عند جامع السلطان حسن
كان ايه مصيرها
بصوا فوق على الصورة وانتم تعرفوا الاطفال قلعوا هدومهم وبيبلطوا فيها ده بيحصل فى منطقه سياحيه بصرف النظر عن ان ده اساسا مش المفروض يحصل

فى الجامعه عجبنى العيال السيس بتوع الحزن الوتنى اللى حافظين اسمهم بالعافيه دول لما كانوا بيصقفوا راى الشخصى كل واحد يعمل فرح او يكون عنده فرح حد قريبه ياخدهم معاهعيال فزاع بجد مش ممكن غلبوا على بتوع التوك شو

النخبه اللى قالوا عنها احب اقول ان دى ولا نخبه ولا بتمثل مجتمع غير فئه ملهاش لازمه بالنسبه لنا
انا مخترتش حد يروح يحضر بدالى اذن مش من حق حد يتكلم عن لسان ويقول وى لاف يو
ثم انا مش بلاف حد يلبسونى مصيبه ليه

اوباما

اللى طلعت بيه من الموضوع
كاريزما حلوه بيعرف فعلا يستخدم كل ادوات الهمس واللمس احم احم اقصد الروحى يعنى
واللى مساعده السذج اللى فاكرينه صلاح الدين الابنودى
بس هو كشخصيه يعتبر فى طريقه كلامه احسن رئيس جه
بس الفكره انه تحت اجندا فاكيد عمرة ما هيتحرك

الخطاب والى مستنين منه حاجه :- هو قالها صراحه انا مش هعمل كل ده لوحدى لازم يبقى فيه مساعده

الديمقراطيه والانتحابات الحرة:- كان نفسى ابقى موجوده واقوله وده فين بقى انت بتطالب بيه فى العزبه اللى احنا عايشين فيها بتاعت عوكل وولده ولا فى المملكه اللى بتتورث كل دول الخليج كده
حتى لو اضحك عليك واتقال هيبقى فيه ديمقراطيه هتبقى بالتزوير ما كل سنه يقولك شفافيه شفافيه وانا مبشوفش الحجه شفافيه دى غير فى قمصان النوم اللى فى المحلات فى الشوارع لو حد شاف شفافيه تانيه يقولى

باقى القضايا هو لخصها تبع الاجنده علاقته باسرائيل قويه فاختشوا على دمكم بقى وافهموا ان الحق يرجع باديكم

طالبان :- بصراحه مش فاهمه التار اللى بينهم

العراق:- هما تقريبا بقوا نسايب وافتكر بتوع العراق برضه كانوا سبب فى اللى حصل لهم واللى احنا عاوزين نكرره دلوقتى ونقول هو اللى هيحررنا من البلاوي وياكلنا ويلبسنا ويشيل لنا الزباله اللى فى مخنا وفى الشوارع

ببساطه جدا اوباما لو نيتك خير مكنش رماك الطير
اوباما مش هتعرف تعمل حاجه لوحدك
اوباما انت تبع اجندا بقالها سنين بتتورث فاكيد مش مصدقه بقك
انت قولتها بصراحه انا لوحدى مش هعرف اعمل حاجه
وانا بقولها لك من موقعى هذا واحنا مش هنتغير لان احنا تربسنا على كده

الناس اللى سالتهم فى الشارع اغلبهم ولا عارفين حاجه جيرانى يعنى والباقى مش مهتم والباقى يقولى اه حلو وهيعمل حاجات حلوه حسسونى انه اتعين رئيس حى عندنا

اخيرا ضميرى كان واجعنى علشان النافورة الحمد لله ان العيال برضه مخيبوش ظنى وراحوا استحموا فيها بدل ما الحكومه تلمها تانى وتخبيها
مع انى اظن انهم ممكن يقبضوا على العيال بتهمته استهلاك الميه ويدفعوهم فواتير استهلاك ميه النافورة

ده راى بكل صراحه فى اوباما
ومعنديش غيره يمكن سلبى او ايجابى يمكن شوفت الموضوع بمنظور تانى بس الفكره كلها انى حسه ان كنت بتفرج على سيلين ديون فى تيتانك والدمعه هتفر من عينى وفى النهايه اتحولت لشاكيرا وقعدت ارقص شويه وبعدين الحفله انفضت ورجع ابوك عند اخوك

مع السلامو عليكم بقى

كان معكم من امام جامعه ام حزمبل للفنون الغنائيه ابى هانم بتنجانى


حكمه الامبراطورة
ايه ينوب جامع العسل غير القرص

مدونة سبهلله واووووووباما مع بعض


صباح الخير يا شوباب الحجه سبهلله عملت المدونة بتاعتها للقراء بتوع بلوجر فقط علشان فيه ناس من برا بتقراها فقررت تعملها للقراء فقط اللى هى تدعوهم اللى يحب تعمل له انفيت الايميل بتاعها اهو ابعتوا ليه تعمل لك ابروفل علشان تقروها raniarachad@yahoo.com

الاعلان ده مدفوع تمنه هى هتعمل ليه ساندوتش مربى وكبايه شاي وعلى راي المثل اعمل الخير وارميه فى البى سين

حاجه كمان النهارده اليوم المفتوح للكلام بما انى اجازه وقاعده فى البيت يعنى اللى عاوز يرغي فى اي حاجه معايا فى التعليقات يدخل يرغي انا قاعده اهو بتفرج على التى فى
ومستنيه اوباااااااا ماااااااااااا
يتحدث شوفتوا الريس متقال فى لقطه ماله كده واقع خالص وشكله تعبان اوي اوي بجد يالا ادينا قاعدين فى البيت طول اليوم نتفرج
بس عاوزه اسال هو ليه رايح مسجد السلطان حسن يا نهار ليقول ده بتاع جدي
طيب سؤال كمان دول عملوا نافوره قدام المسجد فى 24 ساعه علشانه واشتغلت
اه احنا بلد الانجازات اه والشعب الصامد عبد الصميد حميده
بس السؤال بقى بعد ما يمشى هيلموا النافوره دي ولا هيبعوها خرده


وبعدين بعد لما اشوف الخطاب بتاعه من على الممبار فى الجامعه هبقى اكتب انطباعتى الشخصياتى عن الموضوع
بس انا مبسوطه كنت فاكره نفسي هنزل الشغل النهارده واجر اذيال الخيبه لكنهم طلعوا جدعان وقعدونا فى البيت ومش هيتخصم مننا حاجه بالعند فى نواره نجم علشان هما هيخصموا منهم
يالا اقعدوا بالعافيه بقى اللى عاوز يرغي معايا يدخل الكومنتات انا مرزوعه اهو



ابى هانم بتنجانى من امام التى فى من على كنبه بيتهم الكاهره الجديده



حكمه الامبراطوره
ايش تاخد الريح من الاسفلت

فستان


شعرت انها تملك العالم يوما حدثها واخبرها بميعاد نزوله اليها
فرحت كما طفل يتيم يفرح بملابس عيد جديده
ذهبت من فرحتها لاغلى محلات الملابس واشترت اروع فستان تراه عين
فستان يكشف الكثير من مفاتنها ويخفى الاكثر
تخيلت فى كل لحظه وهي تختار انه معاها يختار لها
لم تختار بذوقها اختارت بعيونه هو كما راتها اول مره وكيف ينظر لها
كانت تبتسم عندما تتخيل ردود افعاله عند اختيار اي فستان
واخيرا اختارت ما يحب ان يري عليها
وهي تمر بين ردهات المحل وجدت بيبى دوول رقيق لا يشف الكثير ولكنه مثير للغايه اخذته بدون وعي ولا تفكير
لا تعلم لما
ولانه لم يحدث بينهما شئ من قبل ولا كانت تخطط لذلك فهي كما هي تحافظ على نفسها ومظهرها امامه وبين ربها
اخرجت من شنطتها الكريديت كارد ودفعت الثمن ولم تنتبه انه دفعت كثير
فكانت فرحتها بقرب لقائه اكبر من ذالك
رجعت مسرعه الى البيت وخلعت عنها ملابسها وجربت الفستان مره اخري على حذاء عالى قررت شراء شنطه تليق به
احمر وجهها خجلا عندما امسكت بالبيبي دووول وانتبهت لنفسها ولكن سرعان ما زال ما جاء فى خاطرها
لملمت الاشياء ووضعتها فى وضع الاستعداد للقائه
كانت تنظر لهم كل يوم وهى تقطع ورق النتيجه من امامها لتقطف الايام كما يقطف الجناينى الورد
وكانت سعيده
كانت تبتسم خجلا عندما يحدثها عن لقائهم وما يدور فى خاطره فى هذا اللقاء وكيف هو مستعد له ومشتاق
وجاء يوما وتغير ولم تكن تعلم السبب ولكنها كانت تشعر رغم انكاره ان هناك شئ ما بداخله
وكانت احساسها به رغم البعد كبير لانها تعشقه فشعرت به
الى ان جاء اللحظه التى اخبرها فيها ان قلبه يعتصر من الالم لاحساسه بالخيانه وانه يشعر تجاه زوجته بالخيانه
لملمت اشلائها التى تمزقت وانتبهت انها يوما كانت ترفض هذه الخيانه على الصعيد الشخصى فكيف لها ان تقبلها على غيرها
قالت له بكل كبرياء اذا الوقت حان لكي نفترق ولم يعد لى بداخلك مكان شعرت بمراره الالم وشعرت بمراره الفراق
قررت ولم تكن تملك سوا القرار بالبعد لينعم هو بهدوء فى حياته حتى لو شعرت يوما بالحرمان منه
فكان هو عندها هو الامان ولن ترضى بغير ذالك فى حياتها
رجعت الى بيتها وهي تبكي وتحضن الفستان وسالت نفسها هل يوما سارتديه ام سيصبح فى طي النسيان
انتبهت لنفسها وهي تقول ان يوما لم اكون خطيه لاني قررت الحب بدون اغراض
لم اكون يوما مخطأه انى اخترت هذا الانسان ولكن الظروف هي ما تحول بينه وبينها
تمنت له اسعد الايام ومضت فى طريقها ولا تعلم ما ستخبأه لها الايام
ولكنها انتبهت فى نفس الوقت لما كانت ستسببه من الم يعتصر قلبها وقلبه عند الشعور بالذنب تجاه شخص اخر لم يكن يوما فى الحسبان


القصه شبه حقيقيه من واقع حياه كتير بيوقع فيها بس بينتبه فى اخر لحظه للذنب اللى ممكن يعمله

المهم بقى القصه دراما من تاليفى مع بعض الحقائق بس ابوس ايديكم وش وقفا محدش يعمل اسقاط عليا يعنى القصد ان دي مشاكل من اللى بتقع كتير من البنات والستات وبرضه الرجاله وموجوده بالفعل فى حياتنا انا كتبتها على الفتيس توك من فتره واطلب منى انقلها علشان يبقى النقاش على اوسع فى مشكله من مشاكل الحياه واللى بيقع فيها كتير اوي
اقروا وافهموا ومش مطلوب تبرير لان الغلط غلط من البدايه بس اكيد كلنا عندنا المشاعر الانسانيه الملخبطه الاهم اننا ننتبه فى الوقت المناسب ليه
اهو فيه شرح اكتر من كده وكل واحد يقول وجهه نظره ورايه بصراحه على فكره اول مره اكتب قصه بالشكل ده وبالطريقه دي ومش عاوزه مجامله يعنى وحشه ولا حلوه اقصد الاسلوب يعنى كمان
ونناقش مشكله بتحصل من وجهه نظر الاتنين الفياكين والفيكونات وكله يحط نفسه مكانهم
يالا اقعدوا بالعافيه

كان معكم حلال المشاكل حلال العقد لواء اركان حرب أبي هانم بتنجانى

حكمه الامبراطوره

لا تعطي ثقتك لمن يعطيك نص وجهه والنصف الاخر يخبأه