خنزير الحلو يا خنزيرووووو


اولا ميرسى للناس اللى علقت فى البوست اللى فات بس انا فعلا كنت مصدومه ومضايقه ومش شايفه الموضوع شخصى قد ما هو من ضمن سلسله المهازل وانحدار القيم والمبادئ فى مصر وانهيار اى علاقه بين اتنين اصحاب متجوزين اخوات اهل اى حاجه المهم بجد اكتشفت ان كلنا اكلنا على قفانا هههههههههه ودى الحاجه اللى خففت عنى شويه وقولت يالا ما الناس اهى كلها فله اشمعنى انا يعنى اللى هبقى عجبه بس عموما الحمد لله انا عمرى ما هخون ثقه حد فيه لان انا مش بتأثر بالسلب

نيجى بقى للموضوع العجيب الفلوكسا الخنازير طبعا الكل بيلك يلوكوا الكاكا فى الموضوع بس اللى هيموتنى غباء الناس اى والله بجد هجيب لكم تعليق واحد على خبر موضع قرار الحكومه بذبح كل الخنازير وتعويض اصحاب المزارع اللى الناس نفسهم امبارح لما جبوهم لايف على قناه الحياه قالوا انهم موافقين وهما هيشتروا بدل الحاجات دى الخنازير يعنى خرفان وماعيز وانا قررت طالما هيشتروا خرفان هروح اشرف عليهم نيهاهاهاها المهم الناس معندهاش مشكله مش عارفه الكام بتاع اللى اتمطعوا وقالوا هنعمل احتجاج واستعباط واحتكاك ونبعت لاونكل اوباما نشتكى له علشان بيضهدونا دول المفروض مسيحين طبعا انا شامه اقباط المهجر ربنا يجعل كلامى خفيف عليهم فى الموضوع مش عارفه ليه ما هما كل شويه يطلعوا لنا بافتكاسه وهقولكم على اروع افتكاسه سمعتها منهم بجد وبصراحه عارفين الواد ميشو ده قولت له على موضوع الخنازير وقد ايه هو طبعا يهمه مصلحته وقرف من الناس جدا اللى رافضه الدبح هو اه صعبان عليه الناس اللى مش هتلاقى شغل بس اكيد هيلاقوا يعنى ميشو ده مسيحى ومعندوش مشكله فى دبح الخنازير اهو وبعدين فيه حاجه للاخوه اللى بيقولوا ده اضطهاد اقوله اتلهى على عينك لان امبارح مسيحين ومسلمين بيربوا الخنازير دى ولما جابوهم فى اللقاء بصراحه كنت اول مره اعرف ان مسلمين كمان بيربوا الخنازير يعنى لو قولنا خراب مش هيكون على مسيحى بس فاتبطوا بقى زى البط البلدى كده واهمدوا ومتالفوش وخلى اوباما ينفعكوا جتكم القرف التعليق الظريف بقى اللى فعلا اكتشفت اننا بنستورد غباء والناس بتتعطاه حقن

تسقط الحكومة المفجوعة

مجموعة من الوزراء و كبار رجال الأعمال فى مصر راحوا استوردا كمية كبيرة من الفراخ المجمدة و طبعاً بأسعار مخفضة جداً و مش مهم اذا كانت الفراخ دى صالحة للإستخدام الآدمى و لا لاء ماهو الناس اللى فى مصر دول مش بنى ادمين اصلاً طبعاً الناس شافت الفراخ المجمدة و شكلها اللى يقرف و ريحتها الغريبة و طعمها الغير جيد فبعدت عنها و بدأت تاكل الفراخ الصاحية و البضاعة وقفت و حنفية الفلوس اتقفلت فجأة و خللوا بالكم من فجأة دى ظهر مرض انفلونزا الطيور و لأن الحكومة بتحبنا عملوا اعلانات فى التليفزيون بتوعى الناس بأهمية الفراخ المجمدة للمحافظة على صحة الناس من مرض انفلونزاالطيور و لما الحكومة زهقت من الشعب اللى مش بيسمع الكلام اتجهوا لإغلاق محلات الطيور و قطع أرزاق الناس و مش مشكلة اصحاب المحلات دى لما يشحتوا و لا يجوعوا و الناس اللى بتشتغل عندهم يقعدوا فى البيت من غير شغل لكن المهم ان الفراخ المجمدة تتباع و لما البطالة و معدلات الجريمة تزيد محدش يسأل إيه السبب أهم حاجة محلات الفراخ تتقفل و خلاص و السبب الظاهرى هو القضاء على أنفلونزا الطيور فى مصر أما السبب الآخ فلا يعلمه إلا الله


هو مين جاب القلعه جنب الكشك بتاع السجاير ومين اخد ابو الهول من مكان بجد ده كان احساسى لما قريت التعليق
يعنى مثلا كل العالم فيها الفلونزا الطيور ومصر الوحيده اللى اتوكست فيها اكتر علشان الناس معندهاش وعى ومش عاوزه تفهم ومش عاوزه تحافظ
العالم كله كان كداب ومكنش فيه الفلوكسا الطيور
هما الوزرا بتوعنا ورجال الاعمال سيطروا على العالم يااااا ده الفراعنه تاثيرهم قوى اوى يا جدعان
طيب الخنازير كمان كدبه ابريل مثلا انا بجد مصدومه هو الناس بقت عايشه فى نظريه المؤامرة ليل ونهار

اه فيه وزرا مش كويس ورجال اعمال بس ده فى حدود مصر يعنى مش هيسيطروا على المكسيك يعنى ولا اسرائيل ولا اى بلد ولا يمكن ليه لا بركاتكم يا رجال اعمالنا هى دى الفراعنه ولا بلاش

لا دى مش مؤامرة ده غباء ده غبااااااااااااااااء بجد انامش عارفه واحد يكتب تعليق زى ده على خبر دبح الخنازير ازاى وواحد تانى الناس بتقول هندبح فى المدبح والمصانع وفى الاماكن نفسها بتاعت الخنازير التانى يقولك انتم هتكفوا كل ده ازاى هو احنا عندنا امكانيات يا لهوووووووى يعنى الناس قالت وانت تقول امكانيات لا بجد كده كتير ما هما قالوا الحل يعنى احنا بنشكك فى كل حاجه وخلاص ولا ده غباء هو يعنى لو تشكيك تبقى مبلوعه انما نوصل لحاله التردى دى والغباء ده كده كتير عليا انا شخصيا بجد القرار انا شيفاه صح ومفيش مسيحين معترضين بالعكس معندهومش مانع

موضوع اقباط المهجر
النكته دىىىىىىى جديده ومن عندى ومش هعلق عليها لو حد مسيحى يدخل يقول

عاوزين يسمحوا للمسحين يدرسوا فى الازهر تيرررررررررررررارررررررر طيب انا بس هفهم اخوانا ان معنى كده هيقرا وهيحفظ القرآن وهيدرس شريعه وفقه وووووووو وحاجات كتير فى الدين الاسلامى هل هما عندهم استعداد لده ولا ايه اقباط المهجر مقومين الدنيا ومش مقعدنها علشان ده طيب دا انتم عندكم مش هيوفقوا يبقى ليه على فكره هما بيعملوا اى فتيل وخلاص اى حاجه تعمل قلق بين مسلمين ومسيحين وبس ويا ريت ننتبه لده




كان معكم ابى هانم المفش



حكمه الامبراطورة
لما تطصدم خليك مطاطى بس اوعى تطاطى

الثقه


لما تفقدوا الثقه فى اعز انسان ليكوا تعملوا ايه ؟
لما يكون هو اخر لكم فى الدنيا وهو اللى مخليكوا شويه متمسكين بيها وتفقدوا ثقتكم فيه ايه احساسكم؟

بجد انا مش عارفه انا بجد محتاره ومش محتاجه كلام يطبطب عليا انا محتاجه كلمه حق
ليه انسان ممكن يخليك بحاجه هايفه تفقد الثقه فيه ليه انسان بعد ما يدلك الامل فى حياه ياخدها تانى مش شرط يكون ولد علشان انا بنت ممكن تكون بنت الانسان ده ممكن يكون صحبك صحبتك اى مسمي ليه ممكن حد يقتل حد فى ثانيه ايه اللى يخلينا نعمل كده انا مش لاقيه اجابه قولوا انتم

احترس البوست فيه سم قاتل



انا عندى القاولون اه بجد مش مصدقين اه انا دلوقتى متعصبه ومضايقه
شوفوا معايا المقتطفات الهايله اللى انا شايفه انها جاوبت بطريقه منطقيه على سؤالى بتاع البوست اللى فات
اه احنا عندنا نعره كدابه اى نعم ودى حقيقه مش راح اقبل فيها نقاش
وشوفوا السم القاتل

اولا
=====

دهشور بلد فقيره جدا من ضمن الاف القرى اللى فى مصر فيها ناس فقيره اوى ومتعرفش اى حاجه فى الدنيا غير قوتها اليومى وبس
الخبر هنا طبعا قريته عنه بتاع الهانم اللى من اسبانيا اللى جمعت تبرعات للمصرين وجت تديها لهم
طبعا ست عجوزه جدا باست ايدها
الجميل بقى انهم نشروا لها الصورة علشان الست كتر خيرها بتجمع لنا تبرعات وعلشان تعرف الناس قد ايه احنا مذلولين ومتهانين
انا مبلومش على الست الفلاحه دى بجد الفقر اللى هى فيه يخليها توطى على رجلها كمان انا بعيب على البلد القذرة حكومه وناس وشباب ايوه
فيه شباب البلاد دى المتعلمين لو كل واحد بدل ما هو متلقح على قهوة صايع ولا واقف على ناصيه ولا بيتفرج على مصيبه
ليه ميعلمش الناس دى ليه ميساعدهمش انهم يبقوا بنى ادمين
ليه كل واحد ماشى ماسك منديل على مناخيره ويقول ياى قرف
ليه كل واحدهولا واحد عاملين نفسهم مناضلين وعايشين جنب منهم قريه ولا هما شخصيا فى قريه متعلمش الناس دى وتعرفهم حياتهم تمشى ازاى
ولا احنا شاطرين نتنطط على بعض وخلاص
خلاص اشربوا
الناس اللى بتقول لا دى سياده مصر وازاى تعمل زياره من غير ما تقول
مش عاوزه بصراحه اقول لفظ وحش هكتفى بتيييييييييييييييت كبيره بجد والقفا اللى واقف جنبها متصور فى الجنب ده ايه
وبعدين سياده ايه ما خلاص ما كل يوم والتانى اى حد عاوز يدخل بيدخل عاوز يخرج بيعمل اللى هو عاوزه الحكومه المعفنه بس بتتشطر على الناس انما الغرب بيوطى يبوس رجليهم طيب سياده مصر فين مع اسرائيل سياده مصر فين مع الناس دى ولا هى سياده ورياله مصر بس مع اللى بيعملوا حاجه كويسه وعاوزين الشعوب يبقى عندها كرامه وعاوزين بلاد تتحرر من الاشكال الزباله يالا روحوا افتخروا بنفسكم بقى وكل واحد عمال يلطش فى اللى جنبه شويه اخوان شويه معارضه شويه رقاصه شويه فلانه ولدت شويه محدش يدوس على خيال ابو قردان وابو ودان والكلب الجربان
ابقوا قابلونى اذا البلد دى نظفت طول ما الاشكال دى فيها
جتكم القرف ربنا يولع فيكم
والشباب كمان اللى ملوش لازمه ربنا ياخدكم بدل ما تقعدوا على القهاوى والسيبرات وسايبين الناس ها بقى ومحدش بيساعد حد
بس فيه حاجه كمان انا بجد حيرانه يعنى زمان كده كنت اسمع واعر فان الفلاح عنده عزة نفس وكرامه دلوقتى ايه اتنشلت مثلا
اللى يلعن الحوجه اللى فيها الناس




الخبر التانى

بما اننا مش عاوزين نتعلم ولا نأخد بالنا من حاجه وعلشان ظهرت الفلونزا الخنازيروقبلها بكام يوم اطفال ماتوا بسبب الفلونزا الطيور اللى بقالنا بنوعى فيها الناس من سنين ومفيش ام فايده فى القصه دى
يبقى نعمل توعيه للطيور والخنازير يخلوا بالهم من بعض واللى يتعب التانى يبلغ عنه طالما الناس مش عاوزه تفهم ولا تستوعب
يالايمكن الحاجات دى يكون عندها مخ ومش واخداها فتونه وفاتحه صدر


الخبر التالت

الحكم على ظابط شرطه ومندوب بعشر سنين وغرامه

والنبى يا حج عادلى بالمره اعمل تحليل لكل الظباط كل فتره علشان تطلع باقى البلاوى
ولا نص الحشيش فى جيوبهم والبانجو يا بيصلحوا بيه عربياتهم ويعملوا واجب مع الصنايعيه يا بيدوه هدايا ويشربوا مع اصحابهم على فكره ممكن الظابط ده ميكونش له ضهر يتسند عليها علشان كده عملوا فيه ده اصل دول كمان فى تصنيفهم بينهم اللى له ضهر سورى ميضربش على قفاه منظومه قذره كلها
يعنى كمان عشر سنين فى المخدرات ومفيش حاجه للتعذيب
عرفتوا بقى بلدنا نظيفه ازاى

تحديث:- الناس بس اللى زعلانه علشان انا متعصبه اهدى ليكوا الخبر ده كمان علشان المفروض انى ابقى هاديه
محاسب اتقبض عليه بيلم الفراخ الميته بالفلونزا الطيور وكان هيبعها مجمده للناس ها كده المفروض ابقى هاديه صح
علشان شايفه انى عايشه وسط ناس عندها ضمير انا هاديه اهو ومبسوطه ومش متعصبه ومنشكحه

انا كده مخلصتش اخبارى انا لسه شويه واتحملوا اللى جاى بقى معلش

ملحوظه:= اللى بيقول المدونه بتقوله رساله ان فيها فيرس يبقى يمسك اى شبشب جنبه ويطرقع للفيرس
قال فيرس قال يا شوباب هتلاقوا بس الفاير وول عندكم هو اللى بيعمل كده وبعدين قولت افتحوا بالفلوك او الفاير فوكس
يالا اتمسوا بالخير
بالنسبه للرد على البوست اللى فات الكام بوست الجايين بما فيهم ده هيردوا عليكوا جميعا

كان معكم مراقب اول الفالوكسا الشعب المصرىحكومه وشعب الى هانم


حكمه الامبراطوره

بلد المتغطى بيها عريان

سؤال عن مصر



الصوره الاولى دي فى مكان انا رحته هنا فى مصر اسمها العزبه فى المريوطيه شوفتوا البلد فيها اماكن حلوه ازاي

على قد ما ليل ونهار كلنا بنلعن البلد دي واللى فيها حتى وصلنا لمرحله اننا زهقنا من نفسنا
ومن كل نفس بيطلع فيها
والخوف جوانا مسيطر على كل حاجه حتى فى شغلنا وفى حياتنا
والخوف اتملك ممنا ولا الدم فى الشريان

السؤال بقى وببساطه
برغم كرهنا لكل حاجه فيها ليه مبنتحملش حد يجيب سيرتها بكلمه مش كويسه ليه بنضايق ليه عروقنا بتتنفض من مكانها؟ على فكره انا بضايق لو حد مش مصري بالذات نقض مصر فى حاجه ودايما اقول كل واحد ادري ببلده وكل واحد يخليه فى خيبته وبعدين يعدل على غيره :(
هل علشان احنا بنحبها ومش عارفين
ولا علشان كرامتنا
ولا علشان نعره كدابه
انا منكرش انى بحبها وبلعنها برضه بالرغم من عشقى ليها ولكل حاجه فيها وبكون مبسوطه لما بكتشف مكان جميل فيها او اقضى يوم حلو مع اصحابى الانتيخ يعنى
بس برضه بلعن فيها ليل ونهار

حد يقدر يجاوبنى على السؤال ده

بس خلاص انا قولت اللى عندي

تحديث:- مع انى لسه منزله البوست بس والله ما حد يغش اللهى اللى يغش قبل ما يجاوب يجيله حول فى الكيبورد بتاعته واسكربوط فى ودانه وحول فى مناخيره وهسس فى عنيه
تامر صلاح ضد الحكومه جاب ليه قصيده لعمنا جاهين حلوه اوي بس كتبها عنده انا خلتنى عيطت ادعى عليك بايه يا تامر بس
القصيده اهي

كان معكم محتاره هانم ابى هانم كعب الغزال

حكمه الامبراطوره
عويل يقول للخايب يا ريتنى مكانك

زعبوط السلطان


احمد احمد عارفينه بتاع طبيب بلا بتاعه او سماعه عادي يعنى خبطنى بزعبوط فى دماغي ومع انى مكنتش عاوزه زعابيط تاني بس قولت وماله اتزعبط عادي يعنى نبدا بس على فكره فيه اساله محرجه اوي وهجاوبها يالا هذكي عن صحتى وعافيتى

أسمك ؟

ريحاب او آبى او الساحره الشريره

سنك ؟

اوبا ليه كده بس هقول مع انى عارفه ان ناس هتتصدم بس عادي يعنى 32 سنه وماشيه فى ال18 بس الشوز ضيق عليا

مجال دراستك ؟

ماسوف على شبابها فى مصر خدمه اجتماعيه اربع سنين دح والله مكنتش بزوغ ويمكن ده اللى نفعني فى حياتى العمليه مع انه مش مجال شغلى وتوالت الدارسات بعدين بقى فى الكورسات المنيله اللى ملهاش لازمه

إسم مدونتك ؟

ما هو متلقح فوق اهو كوكب أبى

صورتك الرمزية فى المدونة بتعبر عن إيه؟

ههههههه عن نظرتى للحب وفيها شبه منى كبير فيه فرق واحد او اتنين عن الحقيقه بس نفس الشبه بنسبه 99
%

هل فكرت فى إغلاق مدونتك؟ و السبب؟

نعم ليه يعنى واقرف فى مين لاااا بكدب فكرت مره علشان حد مش كويس وفاكر انى حطاه فى بالى مع انه اخره معايا يتحط فى شوز قديم بس والله ولا بلتفت له بس برضه مش فاهمه ليه بقيت حسه ان الشخصيه دي لابسه طاسه فى دماغها وبتجري فى الشارع حافيه وبيجلها كوابيس باسمي لا بجد والله هى فعلا مش فى بالى واضايقت انى نزلت لمستوي مش كويس فى معرفه الناس بس قلبى طيب بقى وقولت كله بثوابه ومكنش القفله علشان الشخصيه دي انما علشان زعلت على نفسي انا نزلتها لمستوي مش كويس فى معرفه بعض الناس اللى ميستاهلوش والشخصيه دي مكرره على فكره


إيه رد فعلك لو حد قل أدبه عليك فى المدونة؟

هع هع ليله اهله سوده بهزئه طبعا بس بالادب لانى مبعرفش اقل ادبى مع ان كل الناس حافظه قواميس شتيمه بس صعب انى ابقى قليله الادب وبعد كده بمسح اي تعليق ليه من غير ما ابص اول ما اشوف الاسم بس فيه حاجه لو حد بيختلف معايا معنديش مشكله انما يغلط فيه فده اللى مش هقبله لانه ميعرفنيش شخصيا علشان يغلط فيه وبالتالى بمسح تعليقه وربنا يشفى المرضى والمتخلفين عقليا


أسوأ مدونة دخلتها ؟

هههههههه كتير والله مدونات تجيب الترجيع وحفاظا على نفسيتى مبقتش ادخل لان دول تعبانين فى مخهم وبكون عارفه شخصيتهم الحقيقه من بين كتابتهم او الصدفه المنيله قابلتنى بيهم فى الحقيقه وعلشان كده بكون عذراهم علشان التعب اللى فى حياتهم واهى دي الفايده الوحيده برضه لدراستى

هيحصل إيه للايميلات بعد ما تموت ؟

هدفنها فى مقابر الصدقه بتاعت الهوت ميل وانت داخل على ايدك الشمال

إديت الباسورد لحد من قبل ؟

طبعا اكيد ابسكوتلى بس غيرتها بعدها بيوم شريره انا نيهاهاهاها

السفر بالنسبة لك ؟

حياتى بجد بعشق السفر جوه مصر وبره مصر وسافرت كتير اوي لانى بشوف ناس تانيه وتفكير تاني وشوبنج تالت

المود بتاعك إيه ؟

اخضر وباستك من فوق .... يعنى على حسب الحياه لان اللى زي شخصيه مودي جدا جدا

الأكلة المفضلة ؟

المكرونه بكل انواعها وشاطره فى عمايلها جدا جدا جدااااااااااااااا

الصفات اللى اخدتها عن والدك ؟
الصفات اللى اخذتها عن والدتك ؟


بابا اخدت منه العند والكبرياء وطيبه القلب
وقوه الشخصيه برضه

امي اخدت منها القوه فى شخصيتها والاعتماد على النفس بالقوي يعنى

أكثر 6 حاجات بتكرههم ؟

الهبل .. والهطل .. والغباء... وقله الادب طبعا ... والنفخه والنعره الكدابه.. المظهر السئ...الكددددددددب


أكثر 6 حاجات بتحبهم ؟

االموسيقى الفوكال والقديمه.... الخرفان .. الفراشات ..الصديق اللى بقلب حبيب:) اللون البمبى...السفر والشوبنج واصحابى القريبين واخيرا بطوط

شخصيتك نوعها ايه ؟

كروهات نيهاهاهاها امممم شخصيه مودي جدا عصبيه اوي سهل استفذاذها.. حنينه شويه مش كتير صريحه لدرجه انها مدب صناعي كبير منظمه فى حياتى وموسوسه فى النظافه لدرجه تغيظ اي حد بس مش عارفه ايه تاني اللى عارف يقول


لماذا دخلت عالم التدوين ؟
من باب الرخامه يعنى هيكون ليه ما هو مش ممكن اكون يعنى بتغاظ وبتضايق ليل ونهار واسيب الناس تبقى كويسه ليه مضايقهمش برضه باللى اشوفه وبالمره يمكن يمكن اعرف اغير فى حد او حد يغير فيه وخاصه انى قابله للتغير فى الحاجات الوحشه وفعلا مكنتش بحب القرايه وحبتها جدا

أهمية التعليقات بالنسبة لك ؟

زي البوب كورن بالنسبه ليه حاجه بتخلينى افكر وانكش فى الناس وتنكش فيه وبطمن على اللى بعرفهم من خلالها اممممممم وباخد خمسه جنيه على التعليق حد له شوق فى حاجه

أحلى بوست كتبته مع لينك له والسبب؟؟

سؤال الى من لا اعرفه ؟ لاني كتبته وانا بعيط وكان باحساس اوي اوي بجد وفيه بوستات كتير شخصيه كمان بتاعت اعترافات ليليه بحبها لانها انا وبتاع انا مش ليلى يا عبدووو

أفضل مدونة قرأتها ؟

هما طبعا كتير بس الاكتر ليه
الله .. الوطن ...ام الخلول بتاعت انا جعان اسلام بيه السيزر

نواره نجم طبعا ....الطائر الحزين ..احمد شقير
فرنسا هانم ..اسلام مواطن مصري نايم ...
محمود رئيس جمهوريه نفسي ...ميمى جزره

اشرف حمدي ..الكسندريا فاراواي ..جو غانم..
وكل اللى عندي على الريدر بلا استثناء


أفضل بوست قرأته ؟


هههههههههه الرد بتاع نواره عليا فى بوست نظريه ام حلموس لفهم النفوس كنت انا كاتبه البوست ده وهي ردت عليا فى بوست عندها هو بس عجبنى علشان حركه مكنتش متوقعه وفيه اسامه عبد العال كتب بوست برضه حلو عن التحرر فى الفكر اسمه مثقف لا تساوي كافر
والبت خيخه بتكتب بوستات حلوه برضه
وانا جعان كل بوستاته تجنن لدرجه انى قريت المدونه دي مرتين رايح جاي اشغال شاقه مؤدبه

الشغل بالنسبة لك ؟

حياتى طبعا لانى معتمده على نفسي كليااااااا فى مصاريفى وكل حياتى ومهم ليه فى شخصيتى وبيدينى ثقه فى نفسي كبيره اوي لان عمري ما قولت حاجه فى الشغل وبتطلع غلط اعتقد هو ده السبب فى قوه شخصيتى وفهمي لحاجات كتير

الانترنت بالنسبة لك ؟

ادمان يا خويا ادمان وبعدين شغلي اغلبه معتمد عليه فلازم اكمل طول اليوم على التنترنت ده بس ساعات بمل وبزهق هو مجال كويس للمعرفه وتشغيل الدماغ للى عاوز يعرف ويفهم يعنى وميكونش خروف وسط قطيع وبس

تمرر التاج لمين ؟
لمحابس امن الدوله نيهاهاهاها والداخليه والمطافى وابورجل مسلوخه

كل شم فسيخ وانتم عندكم مغص يا شوباب هههههههههههه

كان معكم ابى هانم بتننجانى من اعالى البحار راسا

حكمه الامبراطوره


حافظوا على نظافه مدينتكم من المتخلفين عقليا والملاحيس

بورسعيد بلد الابطال




طبعا انتم فاكرين من بوست اسطبل عنتر انى مش هكمل فى الحاجات اللى بنعملها لا يا شوباب انا هكمل بس المشكله انى نفسي اعمل حاجه لها ايجابيه اكتر واغير حاجه ان شاء الله حتى طريقه كلام المهم احس ان المجهود مبيروحش على الفاضى


المهم بقى طبعا بورسعيد من البلاد اللى بحبها جدا ومن صغري اوى وبابا كمان لان فتره الحرب كلها قضاها هناك لانه كان قناصه فى الجيش وبعدين راح المخابرات شويه بعد ما الحرب خلصت وحبى فى بورسعيد اتولد من حبه هو شخصيا ليها وذكرايته


وتشاء الظروف انى اكون ليه ذكريات فيها مع ناس جدعان اوى اوي ويمكن فى يوم من الايام مكنتش الصوره واضحه ليه اوي فى طباع الناس وكنت بتاخد منهم شويه بس مع معرفتى بيهم اكتر حبيتهم وحسيت قد ايه هما ناس جدعه اوي اوي


لما ايناس نهر الحب عملت يوم بتاع ذوي الاحتياجات الخاصه وقررت اروح لها كنت اولا عاوزه اروح علشان اشوف الدنيا ماشيه ازاي واساعد فى حاجه من المفترض انها مجال دراستى بما انى خدمه اجتماعيه اساسا بس فى البلد دي ملهاش لازمه بس اللازمه اللى ليها الحاجات الانسانيه بصراحه وده اكتشفته لما رحت وعرفت اتعامل مع الناس واتكلم معاهم ومقرفش من حد ايووووون انا بقرف وخاصه لما يكون المكان مهمل فى الناس بس انا كنت مبسوطه ومبسوطه اوي وانا قاعده جنب منى ودي ست كبيره من المطريه وفى المدرسه دي داخليه وقعدت تحكي ليه قد ايه مفتقده مامتها وقد ايه هى زعلانه وعيطت وخلتنى عيطت ولقيت نفسي بكلمها على انها طفله واقولها بابا وماما عند ربنا واحنا هنا فى الدنيا تعبانين هما لا هما اكيد مبسوطين مش انتى هتكوني مبسوطه وهما كويسين بكل برائه قالت اه ومسحت عنيها


ولما البنات حبوا يفرقوا اللعب عليهم وتقولى انا عاوزه يا طنط على الرغم انها سننا اكبر منى اتبسطت اوي بجد حستها طفله واتعاملت على الاساس ده


وواحده تانيه مريضه بحاجه فى عينها ومبتكلمش ولما قعدت ااكلها واديها العروسه وادت بوسه للعروسه الصغيره


قد ايه حمدت ربنا على اللى انا فيه كله بجد وكمان انى قدرت اتعامل مع الناس دي


واميره اللى صوتها يجنن بجد على الرغم انها اكتف جدا وجباره بس حبيت ضحكتها الجميله


وبالرغم من تحفظاتى على المكان والمعامله بتاعت الناس غير الادميه جدا بس ايناس هتكمل وقولت لها على ملاحظاتى وبكل حب هى اتقبلتها


واثبتت ليه شخصيا انها مش واحده عاوزه فرقعه وشو ودي بتعمل لوجهه الله ونفسها تبقى احسن هى واللى معاها من شباب بورسعيد سواء مدونين او من الشباب العادي ومنهم محمد بتاع الحزب الوطنى اللى قعدت اهزر معاه وازنقه فى الكلام وهو مقتنع بكلامى وقالى انا اصلا مشيت من الحزب بس برضه كل الشباب جمعهم هدف واحد وهو مساعده الناس وحب الخير


رغم المحاربات اللى بيشوفوها بس الحب اللى بينهم حلو اوي والعمل كمان وادونى امل ان مصر حلوه وبينا احنا هتتغير لان الشباب دول بيقفوا فى وش اي حد ومبيخلوش حد يستغلهم ولان نيتهم لربنا فالحمد لله ربنا معاهم اوي


انا بجد شوفت مجموعه حلوه اوي وبيقنا اصحاب وكلهم ولاد ناس جدا بكل المعانى اخلاق وادب وعيله


نيجي للمدونين


ابو العربى .. انت مصيبه متحركه ضحكتنى من قلبى يا محمد بجد انت فعلا ابو العربي ومش هسيح ليك


ايناس.. انتى فعلا نهر حب علشان الخير اللى جواكي وعلشان بنت جدعه ميهمكيش بتوع الهلا ل الازرق ولا العفريت كملى يا بنوته


نسمه .. يا اسم غالى انتى بحب فيكى انك عامله زي نسمه اختى حساها مستخبيه فيه على طول


داليا اهو ده عيبه .. يا بنت انتى بميه راجل دا انتى تاكلى حوت بعياله


دعاء .. كداب اللى قال عليكى ربع ضارب انت احلى بنوته شوفتها بجد


ماما اموله .. بجد اتبسطت بيكي وانتى بتاخدينى فى حضنك حسيت بحنيتك اوي بجد وبنوتك زي السكر خلتنى ارجع طفله وانا بتمرجح معاها


اسراء .. انتى فعلا برنسيسه مفقوده وزي ما قال ضياء انتى يوتيوبيا


شباب الهلال الازرق .. هههههههه معلش بقى علشان مضايقه منه شادي وشريف ومحمد وصادق العراقى وباقى البنوتات ومش فاكر الاسماء يا شباب اعذرونى بس ايناس كاتبه الاسماء بجد انتم شباب زي السكر وفرحت بيكم


احمد قاسم .. او احمد ك الصعيدي يا راجل والله الصاعيده مش واخدين حقهم فى ام البلد دى انت جدع اوي


احمد سكر .. بص يا سنكره بعد كده اللى هيدوس على خيالك حاجتله واتاويها


عسقول .. نفسي اعرف شوفت ايه فى الفنجان نيهاهاها


رامز عباس.. مكنتش متخيلاك كده بس ارتحت لك شويه لما اتعاملت معاك ولادبك بجد


ضياء.. بيوتفل مايند يا ريت يا ضياء الشباب كلهم بنقاء قلبك


فنون .. على الرغم انك مجتيش بس بجد مش عارفه اشكرك ازاي على المجهود اللى عملتيه والحاجات اللى جبتيها وبذلتى مجهود فيها


فيه ساره كمان ست البنات الاموره بنت المنصوره الجميله بجد


اليوم بجد بكل المعانى كان حلو اوي من اول ما رحنا المكان وبعدين عدينا بورفؤاد اتغدينا فى نادي الشوربه وعلى فكره يا ايناس السمك تعبنى بس هفوتها لكي المره دي الحبه النونو اللى ركبت فيه المرجيحه زبطوا الدنيا


وبعدين رجعنا بورسعيد تانى وقعدنا فى الباتروس ومحدش يروحه ها بقى متزعلوش يا شباب المكان معجبنيش ها بقى


بس فرح بيتش عجبتنى


واللى يروح بورسعيد هيشوف كميه البالونات اللى بتتعلق فى الافراح بحس ان العريس والعروسه بجد داخلين الانتخابات نسيت اصور لكم المره الجايه بقى


بابا ابو خالد افتقدناك يا بابا


بجد كل اللى كانوا موجودين بشكرهم وبشكر اهل بورسعيد اوي على اليوم الحلو ده والبلد دى هتبقى حلوه بولادها فعلا


الصور الباقيه عند ايناس هنا انطح اه البنت حطه ليه صوره اللى يعرفنى ميقولش انا فى انهي صوره اللى ميعرفنيش يخمن ويقولى


ملحوظه فلحوسه:- فيه بوست على بيكيا بميعاد بؤجه الخير اللى هيكون يوم الجمعه 1مايو يا ريت تشوفوه


كان معكم ابن بطوطه ابى هانم البمبوطي




حكمه الامبراطوره




اهري يا هبله وانا مش سأله

رشيد اثبت بقى يا راجل



تحديث:- لابد منه يا شوباب انا زيكم مستعجبه من اللى عمله رشيد واللى بقاله فتره بيعمله وعرفت من زمان لما وقف لعز انه كان هيقدم استقالته ففعلا رشيد بيعمل واجبه بس فى زمنا وفى مصر بصراحه بالذات شايفه انها عجيبه علشان محدش بس يفهم غلط

طبعا متفقين الا ما فيه وزير يوحد ربنا عندنا عدل وابن حلال مصفى كده وبيعمل نيته لله واحده
وعلشان منكونش ناس ظالمه حتى اللى بيحاول يبقى كويس بتعدى الايام ويتعدى من مرض الاستهبلال والاستعباط المخيم على الوزارات
وده بدلهم عذرهم فيه بقول من عاشر القوم بقى فلازم عدوى اللامبالاه والسرقه وتطنيش الشعب واعتباره كماله زى كده كماله الكشرى
بس ان يطلع وزير لسه بيفكر ويتصدى للناس ويتصدى للاحتكار حتى لو بهزه صغيره كده فده بصراحه اللى مكنتش مصدقاه

وخايفه تكون بس طريقه لهد الغير او تصفيه حسابات
الموضوع بصراحه انى شايفه رشيد بيعمل حاجات كويسه
يعنى موضوع الحديد بعد ما ولع والناس بقت كل همها تشترى سيخ حديد تحتفظ بيه للزمن وتضارب بيه زى اللى بيضاربوا فى البورصه والستات تعايير بعضها ودى تقولها انا جوزى عنده سيخ حديد والتانيه ترد تقولها اوووووه نووووووووو انتم على فكره فقراء خالص انا جوزى عنده اتنين
وفى المناطق الشعبيه بقى اقتناء سيخ حديد فى البيت من الاثاث المطلوب لجواز اى عروسه
وبجد وفجأه كسر رشيد شوكة عز وفتح استيراد الحديد اللى اجبرت عز انه ينزل الاسعار بطريقه كبيرة جدا

وقبلها موضوع الرز بعد ما كان الكيلو وصل لخمسه جنيه رجع الكيلو باتنين جنيه وده علشان قراره انه يمنع تصديرة


تالت حاجه بتاعت الاسمنت دلوقتى والخبر
هنا انطحوا واللى مش هينطح هيتشك فى صوابعينه ان شاء الله

كل ده جامد وحلو جدا
راى بقى شخصيا ده راجل عمل حاجات كويسه تعالوا فى المقابل
اولا الحديد فعلا نزل وعز اتلم وحط بطه فى بقه وسكت والموضوع ماشى وطن الحديد فى النازل وبالتالى كل التجار التزموا يبقى كويس مع ان فيه البعض اللى ملتزمش بالموضوع وفضل سايب الحديد سعره عالى وده بىق الاستغلا يا جدعان مينفعش الحكومه تعمل حاجه واحنا نستمر فى استغلال نفسنا وغيرنا ده صعب اوى احنا كده هنرجع نولع فى بعض
ثانيا نفس الموضوع فى الرز يعنى كارفور الرز فيه واى سوبر ماركت مش اقل من اربعه جنيه مع انه عادى فى اى مكان باتنين جنيه كبيرة اوى اتنين جنيه ونص يبقى هنا العيب فى مين ردوا انتم
موضوع الاسمنت فجأه يوم ما بتوع العربيات النقل اللى ربنا يهديهم يا رب ويعقلوا بدل ما بيعدوا بعض على الطريق وتلاقى واحد منهم مسطول ولا ضارب اى مصيبه تشيله بيجرى وبيأخد غرز والله شوفتها بعينى وطبعا اللى معندوش عربيه مش هيعرف معاناه اللى معاهم عربيه من الاشكال دى لانهم ولا يفهموا قواعد مرور ولا غيره
ولا ناس بجحه بتعمل اعتصام علشان انهم يلغوا موضوع المقطورة عاوزنها تفضل عاوزه اقولكم ان تقريبا 80% من الحوادث على الطرق سببها النقل ميحسش دى اوى غير اللى عايش قريب من طريق هاى واى انا بلا فخر كل اسبوعين عربيه مولعه على الدائرى غير عربيه مدخله 15 عربيه تانين فى بعض
المهم دول طبعا فئه منيله بنيله واللى كان موافق على اضرابهم جاهل ومش فاهم حاجه خالص وده مش موضوعنا هبقى اتكلم فيه بعدين
المهم البهوات بقى لما اضربوا بقدره قادرة برضه الاسمنت غلى طيب بناء على ايه قالك التجار
يعنى ام البلد دى كلها مفيهاش غير العشرين عربيه اللى اضربوا يقوم التجار يشتغلونا طبعا دى حجه اخدها منعدمى الضمير الحراميه بمعنى اوضح علشان يكسبوا اسرع وخاصه تجار الحاجات دى لانهم حراميه رسمى بختم الجمهوريه كمان
فى النهايه رشيد كان حقه علينا زى ما بطلع تربنتين عنيهم تهزيئ انى بصراحه اشكره على الكام موقف اللى جامدين فعلا
وكمان اوضح ان العيب هنا فى السلع والحاجات دى مش الحكومة وبس لو احنا ساعدنا وبلغنا عن الاستغلال اللى احنا فيه بيتهيأ ليه البلد دى ممكن تتعدل فيا ريت محدش يفرط فى حقه ومش هنخسر حاجه اذا لقينا واحد بيبعي غالى سبناه ورحنا لواحد تانى او رفعنا سماعه التليفون وقدمنا بلاغ
بس كفايه عليكوا كده انتم رغايين كده ليه


كان معكم مدير اول مرور كوكب البطابيط والخرفان ابى هانم


حكمه الامبراطورة

إللى يدوق الحرام ياكل ما يشبعش


اسطبل عنتر

الصورة دى من اسطبل عنتر


بصوا انا مش عارفه ارتب الكلام فى بالى بس هتكلم معاكم كأنى بتكلم عادى مع حد شيفاه يعنى مش هراعى ولا كتابه ولا زعبوط العفريت
لان لازم رأينا كلنا ولازم تساعدونى بأى شكل
لما اتوجهت وداليا صحبتى قوس قزح لموضوع عمل الخير ومساعده الناس كنت حريصه ان الحاجات توصل بادينا وايدين الناس اللى بيتبرعوا جميعا علشان ميكونش فيه مجال لقولنا وعملنا
المهم اسطبل عنتر عملنا فيه حاجات تبع جمعية صحبة خير
اولا بنعمل بؤجه الخير والكل عارفه
ثانيا عملنا موضوع المكتبه وان شاء الله مش هنقطع الحاجات دى

بس انا جالى احباط ايوووووووون هقول لكم ليه يوم موضوع المسرحيه اللى هتلاقوه على بيكيا مقعدناش كتير اتكلمنا مع الاولاد بس يعنى لعبنا شويه كده معاهم طبعا المكان بتاع اسطبل عنتر لما طلعت فوق طلعنا بالباص بتاع الجمعية فمكنش فيه مجال كبير اشوف حاجه المره الاخيرة بقى بتاعت المكتبه واللى محدش جه فيها غير 6 افراد منهم انا وداليا واللى عمل ليه احباط كمان بسبب الحنجوريه اللى عاوزين ام البلد دى تتغير وهما تحت اللحاف او يتحرروا وهما قاعدين فى البانيو عادى كل واحد حر بس على فكره البلد دى مش هتتحرك ولا خطوة ولا بعد مليون سنه واقولكم ليه

السبب الاول الحنجوريه اللى بينتقدوا حتى النمله اللى معديه تحت رجليهم علشان عدت من الناحيه الشمال مش اليمين
وعلشان النسبه القليله جدا اللى بتحاول يبقى ليها عمل ملعون ابو اللى خلى النت بجد ببلاش علشان يطلع علينا صراصير من البلاعات تقرفنا ويعملوا مناضلين من ورق

ثانيا العشوائيات ومصايبها
الناس دى حالتهم زفت ونيله يعنى المشكله مش فى انك تديهم هدوم او تديهم فلوس او توفر علاج او حتى تسكنهم فى فلل لان الناس دى عندها قناعه بحاجه

اولا انك رايح تتفرج عليهم مهما حاولت تقرب هما هيأخدوها بتريقه وانت مش احسن منى وده كان واضح اوى فى تانى مره لما رحنا يوم المكتبه وطلعنا على رجلينا وبنت عندها 17 سنه تقريبا مش من الجمعيه بس من الاسطبل نفسه بتلقح بالكلام هى وواحده زميلتها تقولها جايين الماجيك لاند طبعا ده علينا فمن هنا فهمت اللى بيدور فى دماغ الشباب حتى الكبار البنت اللى كانت ماشيه معانا حاولت تخلينى اوطى صوتى كذا مره علشان محدش يسمع ويعلق على كلامى وحسيت ان الجمعيه او المتطوعين فى العمل فيها خايفين جدا مع ان المفروض الحال مش كده المفروض الناس دى تبقى عندها وعى واستعداد انك تغيرها الناس دى مش هتتغير ومن هنا جالى طيب المتطوعين دول بيعملوا كده ليه وفهمت شويه ان فيه منهم اللى عنده ابحاث
اذن الناس مش هتتغير لان مفيش تقارب ما بينهم وبين دول
زى بالظبط المدمن طالما مش عاوز يتعالج عمرك ما هتقدر عليه يبقى نيجى بقى لكذا نقطه

العشوائيات مش هتتغير الا اذا حصل تقارب جدا فى الحل والفهم والاقتناع ما بين الناس المتطوعين وما بين اهل المكان
العشوائيات مش هتتغير طول ما اهلها رافضين يسبوها او البعض والنسبه الكبيرة علشان خايفين تقطع المعونات اللى بتروح لهم واللى بيشتغل فى المخدرات

والدعاره وغيره
العشوائيات مش هتتغير طول ما فيه حزب وطنى مسيطر على منطقه لان اللى اكتشفته برضه ان جمعيه صحبة خير عامله المقر مع جمعية النور اللى هى ماسكها واحد حزب وطنى وركزوا فى اللى جاى فالبالتالى اى حاجه بتوديها صحبه خير بيطلع ينط عضو الحزب ويثبت وجوده فالناس متخيله انه هو اللى بيعمل حاجه ودى فى حد ذاتها كارثه فى النهايه انا مش عاوزه اسيب الموضوع وبرضه مش عارفه اتصرف وبرضه مش عاجبنى اى حاجه بجد

على الناحيه المهنيه الاطفال بيحلموا احلام اكبر منهم ودى مشكله
يعنى لما الاطفال بيقولوا عاوزه تطلعى ايه اللى تقولك مذيعه وهى متنفعش لان المذيعه لها مقاييس معينه والبنت دى عندها 13 سنه ولسه فى تالته ابتدائى واللى عاوزه تطلع ظابط انا مش معترضه على الاحلام اللى علموها لهم بس المشكله لما بحلم احلم على قدى ودول الحلم معاهم خطر واقولكم ليه لان دول عندهم فى المكان اللى هما فيه كل المصايب ولما بتربى طفل من صغره على حاجات معينه مع انهم مفيش فيهم البرائه الكامله يعنى فحاجه من الاتنين لما تكبر البنات دى وتشوف ان احلامها اللى علموها لها مش هتتحقق هتتنكس وترجع انيل من الاول يا مش هيلحقوا وهيبقوا عدوانين جدا زى الباقى الجمعيه عامله شغل كويس اوى وبتعلمهم حاجات وبتهدهم بس انا ببص لقدام لازم يبقى فيه متطوعين كويسين فاهمين الواقع ويخلوا الولاد يحلموا بقدر كويس علشان الصدمه النفسيه ولازم يبقوا الاهالى مقتنعين ان العيشه اللى هما فيها زفت ومش كويسه ولازم يبقى عندهم رغبه للتغير بصوا انا قولت كل اللى جوايا وفى قلبى ومش عارفه اتصرف بس اناعاوزه اعمل حاجه وعندى احباط يا ريت اللى عنده حل او عاوز يستفسر عن حاجه معنديش مشكله يالا صدعتكوا بقى وممكن متفهموش كتير من البوست بس دى مشاعير ولازم ارجعها فى وشكم كده زى ما هى

كان معكم ابى هانم المحبطه من امام اسطبل عنتر واركب الحنطور واتحنطر

ملحوسه :- فيه بوست على بيكيا بخصوص تجمع بورسعيد كلفوا نفسكوا مشوار على حسابى لغايه البلوج اللينك بتاعه فى الجنب عندكم واهو كمان انطح هنا


حكمة الامبراطورة

اللى ملوش كبير يشترى له غفير

اضراب اليوم





على السريع بما انى فعلا مخنوقه على الاخر وقرفانه من البلد دى ومن كل حاجه وحسه اننا فعلا خلاص لو اتغيرت احنا مش هنعرف نعيش فيها من كميه العدوانيه والتجمد وحب الذات اللى فيها هقولكم كام ملاحظه على السريع
اولا انا معملتش اضراب لانى مضطر اخاك لا بطل انى لازم اروح الشغل صاحب الشغل ملوش علاقه بالاضراب ولا الحقوق هو مش مقصر معانا بصراحه بلاس بقى انه مش مصرى نيهاهاها

2- السنه اللى فاتت الشوارع كانت الى حد ما فاضيه والقاهرة الجديده كان فيه بين كل كام متر ومتر ظابط وكمين النهارده الدنيا زحمه بجد او العادى بتاعها وكمان مفيش عسكرى يوحد ربنا حتى حونكل الامين اللى بيقف عند الصينيه بتاعت شارع التسعين لغايه 8 الا ربع مجاش والحياه بمبى خالص

3- واحده متضامنه مع الاضراب ولابسه اسود وواقفه تشترى حاجات ؟؟؟؟؟؟؟؟؟
هو مش المفروض النهارده منشتريش حاجه دى ملاحظات برئيه لغايه دلوقتى والله (ونعم الشعب اللى واعى وافهم ومش بيقلد الموضه وخلاص)


اللى جاى ده اتبعت ليه على الفتيس توك بتاعى اللى هى

اهداف الاضراب
طب ليه بنقول اضراب 6 إبريل 2009 ...

ليه حنضرب بكرة
ــ ضد الاستبداد والديكتاتورية ــ ضد توريث السلطة ــ ضد سيطرة رأس المال علي الحكم ــ ضد رجال الأعمال الوزراء ــ ضد الاحتكار ــ ضد جباية الأموال من المواطنين ــ ضد الرشوة والمرتشين ــ ضد تصدير الغاز إلي إسرائيل ـ ضد تزوير الانتخابات وإرادة المواطنين ـ ضد تعذيب المواطنين في السجون وأقسام الشرطة ــ ضد الاعتقالات ــ ضد اعتقال البنات ــ ضد المحاكمات العسكرية للمدنيين ــ ضد حبس الصحفيين ــ ضد محاكمة الصحفي مجدي أحمد حسين ــ ضد الفساد والمفسدين ــ ضد فرض الحراسة علي النقابات

بتمنى فى النهايه ان اى حاجه تدينى اى امل فى اى حاجه ومتكونش دى خطوة مش محسوبه تقتل حاجه او بذرة حاجه كانت هتبقى حلوة اوى واللى هما الشباب دول بس على فكره مصر مش هتتغير بده بس يا شباب لان البنيه الاساسيه خربانه يا عم خربانه


اه من ضمن الملاحظات بنات اتاخدوا من الجامعه بنتين من كام يوم وهما بيوزعوا منشورات
ومحدش يقولى ده حق العالم كله ممنوع توزيع منشورات فيه كان فيه اكتر من طريقه بدل العلانيه دى انا مع انهم يوزعوا بس مش علنى مروحش احط ايدى فى بق الاسد واقوله عضنى اللى عاوز يفهم قصدى يفتكر الظباط الاحرار والتنظيم بتاعهم كان مبنى على ايه والظهور امتى علشان ايه برضه فى النهايه اليوم لسه طويل ويا رب متصدمش بجد
ملحوظه اخيره
برضه قلب الام بيرق ويحن ولبست حاجه سوده :)

يا رب البسها على اللى فى بالى يا رب

العواف عليكم بقى علشان عندى شغل

حكمة الامبراطورة

روعة البلد دى زى روعه الحب الاتنين عاوزين الحرق والاعدام بحقنه ميه ساقعه