صباح النور جميعا بصوا بقى يا حلوين البوست ده عارفه انه هيقلب عليا الصداع شمال ويمين وانا معنديش مشكله خالص للحكايه دى بس براحه علشانكوا مش علشانى انا لا سمح الله

السنه اللى فاتت دعي بعض الشباب لاضراب 6 ابريل وانا كنت من المرحبين بيه جدا اوى خالص
وليه كنت مرحبه شيفاها فكره جديده مبتكره بتجمع الناس على هدف محدد وهو كان ارتفاع الاسعار
وبعد ما خلص وطلع ابطال من ورق وطلع ناس كويسه وبرضه طلع ناس مش كويسه وهوايتهم الشو الاعلامى بس مش اكتر وده اتعرف على مر الايام بعد كده
ومن كلام سمعته من البعض بوداناتى
المهم
الاخوه الافاضل دلوقتى عاملين اضراب
طيب السنه اللى فاتت اتعمل وشوفنا احداث المحله وايه اللى اترتب عليها
وبعدها اخدنا العلاوة وان شاء الله يا رب اطفحها اذا كنت شوفتها اصلا بس ما علينا
وبعدها احم احم اخدنا على قفانا بس قفا كان قوى شويه وكنت هحط بسبب الزياده عصير قصب لبطوط بدل البنزين وعدت الحمد لله
هتلاقوا اللى حصل ليه فى بوست قديم اسمه حوار على المصطبه وتفاوض لبيع بطوط
اليومين دول كل ما افتح حاجه الاقى
اضراب 6 ابريل
طيب على اساس ايه عيد ميلاده مثلا على اساس بقت موضه كل سنه فى نفس الميعاد هنعمله ونحتفل بيه
ولا هنأجل مطالبنا كل سنه ليوم 6 ابريل نجمعها ونطالب بيها الحكومه
انا مبقللش من اللى بيعملوه الشباب
مع انى بقولها لهم وصراحه من هنا بجد واللى هيقرا منهم هيفهم
ان فى وسطهم اللى غاوين شو اعلامى مش اكتر واللى غاوين شهرة على الفاضى وانا مبتكلمش من فراغ ولا سمع وانا قاعده بأكل مهلبيه انا قابلت ناس بالصدفه البحته وجمعتنى انى اتكلم معاهم
يا شباب بجد اه البلد محتاجه حاجات كتير بس مش محتاجه تكرار محتاج تفكير
انتم نجحتوا المره الاولى فى نظرى بس علشان عرفتوا تجمعوا الشعب
انما مش علشان حققنا اى حاجه احنا لعبنا مع الاسد وقعد يلاعبنا بصوابعه وفى الوقت المناسب قام شايط برجله
وطبعا مش هنتكلم على اللى حصل فى المحله سواء ان كان السبب الامن او البلطجيه والحراميه
بس انا مبحبش ده يتكرر
علشان تأخدوا قرار بحاجه لازم تبقى مترتبه لازم يبقى فى سياسه معينه وتنظيم افكار شويه
انا بجد معنديش مانع اقعد فى البيت ان شاء الله طول السنه تبقى 6 ابريل بس ها ايه النتيجه بقى

غير كده المهازل اللى بشوفها من ردود فى الجرايد ما بين الوفد والشباب دول والتجمع والاخوان اللى حبه فوق وحبه تحت
ميديش اى امل ولا عمر ولا احمد حتى فى الموضوع ده خالص
انا مبجبش احباط لحد بس لو حد قادر يغير ليه الفكره دى يا ريت المره دى يغيرها

او تسبونى بقى براحتى واعمل انا حركه 32 ابريل او 25 يناير ايهما اشيك وكمان الوزارات تعمل اضراب اشمعنى هما يعنى بيتفرجوا علينا
هذا وبالله التوفيق ومحدش يحدفنى بطماطم كله يجهز شوم



كان معكم رئيس تنظيم بوتاجاز منفذ مدينه نصر ابى هانم




حكمة الامبراطورة


زى ناطح الصخره قرونه اتكسرت والصخرة متحركتش

بقالى فتره شاغلنى موضوع هام جدا طبعا مش هقعد زى الهبله اللى مسكوها طبله وارغى فى موضوع التحرش بتاع العيال السيس الهفأ بالبنات ولا الستات
هى حلها معروف اديله باللى فى رجلك ولو اعترض غزيه بالمطوة او بابو ورده وخلصى من الاخر
وخلصينا وخلصى نفسك

الاقوى بقى الناس الكبيره ايوووووووون اللى مثلا تخطت الخمسين او اواخر الاربيعينات وانت طالع دول بقوا موضه جامد بالقوى يعنى تلاقيه مركب طقم سنان وبيتنحنح ولا شعره كله ابيض ولا بلاش علشان فيه ولاد صغيره شعره طق من الغيظ
المهم وتلاقيه عماله يتسهوك وصوصو صو ونونو نو على بنوته ممكن تكون اصغر من ولاده
انا طبعا تصرفى الوحيد لما اكون راكبه العربيه ولقيت واحد من دول حل من الاتنين يا اطلع له لسانى زى العبيطه اى والله
يا اقوله عدى بقى يا جدو عيب كده هتتأخر على الدوا
طبعا انا بكون مضايقه اوى بس هو اللى بيجبرنى على كده
ومش هنقول هنا الرجاله بس فيه بنات صغيره عاوزه اطقم رقبتيها وتفضل رقبتيها مددله على سدرها كده قدامها علشان ايه دول بقى عاوزين جدو من دول يدلعهم يقعدهم فى مكان يجيب لهم هديه
والعيب هنا على جدو المتصابى وعلى البنت وعلى المكان اللى بيرضى اصلا يقعدهم
المنظر بيكون مقزز جدا ومقرف اوى بجد
طبعا ده جاى من عادات من زمان توارثت فى بلاد كتير ان الراجل يبقى عنده 70 سنه ولا اكتر ويروح يتجوز واحده قد احفاده
علشان عنده طين على دماغه طيب فسيولوجيا هيديها ايه طيب معنويا هيديها ايه
اعتقد كل الفكره ماديا فى اهل بيبيعوا بنتهم وبعدين يخلفوا عيال عندهم عاهات ويطلعوا معقدين لان ولا اب هيدى حنان وحب ولا ام هتكون فايقه لانها هتحس ان شبابها ضاع او مش هيخلفوا من الاساس

ودلوقى برضه ماديه فى بنت لسه عيله عاوزة تجيب موبيل وتلبس من مكان شيك وتتمشى فى عربيه
بس الموضوع ده حله صعب انا معنديش مشكله فى الطموح بس عندى مشكله فى طريقه تنفيذه ما يخلصوا تعليم ويشتغلوا وتطلع عنيها ليه حب السرعه فى كل حاجه

وانا بلفلف كده ادور على حاجه اشربها فى التى فى قصدى اسمعها لقيت اغنيه تحفه لديانا حداد والنبى على قلبكوا لتشوفوها شويه وبعدين نتخانق فى الكومنتات بقى
لما سمعتها افتكرت اغنيه قديمه اووووووووى مش فاكره من قد ايه ولا بتاعت مين بس هى دايما بتيجى لما اشوف الناس دى بتاعت ايه يا راجل انت ده ايه اللى انت عمله ده عيب عليك فى السن ده يطلع منك كل ده
فى النهايه ليه مطالب اتمنى من هيئه الانتصالات عدم توصيل النت للعيال الصغيره والعيال الكبيره برضه المنحنحيين وسحب عربياتهم وعقابهم فى البيت يقعدوا يعملوا شيرز ههههههههههه

يا رجاله وستات برضه اللى بتتنحنح على عيال قد ولادها
كل سن له رونقه يا ريت تعيشوه كل فتره ولها اولاويتها
اسيبكم مع الاغنيه ونلتقى بعد الفاصل وكله يحضر شوم وكلاشينكوف ومدافع فى الكومنتات





ملحوظه :- فيه بوست على بيكيا يا ريت تحنوا عليه وتكلفوا نفسكوا والله شويه وتشوفوه منكن يعنى او سمحتوا


كان معكم رئيس مكافحه الاخلاق بنت ام حميده ابى هانم كعب الغزال



حكمه الامبراطورة


حبك في قلبي يا بهية زي حب الاقرع للكوفية

اممممممممم هنترجم الصورة بصوا بقى انا عاوزة وصف ليه او اوصفنى فى كلمه وممكن اتنازل ويبقى فى كلمتين
ده طبعا هيختلف من الناس القريبه منى والناس البعيده
بس من غير مجامله يعنى الوصف ده هيكون تقييم
واللى يحب يقول ليه قيمنى بالشكل ده مفيش مشكله خالص
بس حتى لو نقض معنديش مشكله بس اياكم والشتومه اعلقكم على باب الكوكب وهتلاقوا الكلاشينكوف شحن ذاتى اشتغل
وطبعا مش محتاجه اقول الناس اللى مش عارفانى هتقييم المدونة او كتاباتى
ليه بقى يعنى حبيت اغير شويه وادى مساحه للناس تقول رايها وفى نفس الوقت يمكن هما شايفين غلط انا مش شيفاه
يالا كله هجوم

كان معكم أستاذ دكتور علم نفس لواء مدرعات ابى هانم


حكمه الامبراطورة

الناس بتشوف عيوب غيرها ويجليها عمى عن عيوبها

كل سنه فى نفس ذات النفس يبدأ التى فى الخزعبلى بتاعنا اللى المفروض يتفجر من بدرى وبتوع التفجيرات يوجهوا نشاطهم ليه علشان يرحمونا من كميه العته اللى بتحصل عليه وعلى الفضائيات وهيئه الارصاد الجويه والمستشفيات فى تجهيز نفسها للحدث العظيم وهو عيد الام
ليه بقى التى فى بيطلع علينا باعلانات ليل ونهار اشترى خمس سحالى واكسب كلب هديه لعيد الام
اشترى مكنسه بالبطاريه واكسب مكنسه الساحرة الشريرة هديه لعيد الام
الادهى والانيل السنه دى بيريل الراعى الرسمى للاطباق والكوبيات عامل اعلان
وجاب شويه عيال سيس متخلفين علشان يقولوا كل سنه وانتى طيبه يا ماما
انا مش معترضه معترضه على الهطل اللى بيحصل
واحد شحط فى الجامعه طالع يقول انا امى بتعمل احسن محشى فى مصر كلها
على اساسا كل الامهات فشله
وبعدين هى دى الحسنه الوحيدة لامك علشان تطلع تقولها كل سنه وانتى طيبه
التانى يقولها انا مش هنسى يوم ما طلبت منك ملوخيه ونزلتى فى ساعتها جبتيها
ده بدل ما ينزل هو نزلت هى
والراجل الغلبان اللى طالع يقول لمراته كل سنه وانتى طيبه
يعنى التى فى بيجيب ناس بجد تكسف ومهمشه دور الام فى حله محشى وطبق ملوخيه وغسيل الاطباق
يعنى السيرفينت بتقوم بكل ده
هو ده دور الام
ده الجزء الاول ....

التانى بقى بعد ما نشوف الاعلانات دى طبعا النرفزه بتطلع والجو بيقلب زعابيب وده الجزء الخاص بهيئه الارصاد فاحترسوا الاقتراب منى فى الفتره دى بعد كميه الاعلانات
وبعدما تهدأ العاصفه بتنقل على المستشفى وتلاقونى بخرف مكنسه مكنسه اطباق طايره اطباق طايرة
انا نفسى التى فى وسى انس الفقى يرحمنا او يتفجروا

انا لو اعرف اللى بيعمل الاعلانات هربطه على العمود وكل يوم هضرب فيه رايح جاى واخلى العيال تقرقصه فى كل حته فى جسمه
ولو اعرف العيال السيس اللى بتوافق تسجل مع بتوع بريل هشربهم يريل بتاع الاطباق ده واخليهم يبقللوا

كأن التى فى متعمد فعلا انه يجيب ناس متخلفه يقولوا كلام متخلف
يا شوباب الله يكرمكوا اللى يسعده حظه يعنى مع انى مش بشوفها سعد اوى
ويطلع فى بورنامج يحاول يمسك كميه الهبل اللى بتقع علينا ولو الست المذيعه جامده اوى يعنى وانتم مش قادرين تمسكوا نفسكوا من النحنحه
يا ريت تنحوا النحنحه فى جنب وتشغلوا عقلكوا كسفتونا فى الخارج والداخل

فى النهايه

انا عاوزة اقول كل سنه وكل ام طيبه ودورها مش فى المحشى ولا الملوخيه ولا غسيل الهدوم دور الام اكبر بكتير

وعاوزه اقول للخمس امهات اللى عندى كل سنه وهما طيبين

ايووووووون مالكوا مذبهلين ليه انا عندى خمسه مش علشان بابا مزواج لا علشان انا بحب اجمع امهات
اول ام ...
مامى ست الحسن والجمال وعلى فكره ده اسم الدلع ست الحسن لان امى ماشاء الله عليها من صغرها كانت جميله وبيضاء زى القشطه طالعه ليه من يومها احم ..احم
بجد امى احلى الستات امى مربتنيش انا وتلاته اخواتى كمان لا دى ربت اخواتها لانها تانى واحده فى اخواتها وجدى وجدتى كانوا موظفين وهى اللى اتحملت مسئوليه اخواتها الاصغر وجدتى ما شاء الله ربنا يديها الصحه فرطت منها اوى ودبست امى
والادهى ان امى بمسئوليتها اتجوزت الحج والدى وهو اصغر واحد فى اخواته والمدلع بالقوى لاب شبه اقطاعى ( ومش عاوزة ضرب ونفسنه اغلبه راح فى الوباء يا هنادى) يعنى دلع وفلوس وجمال كمان فاكيد فى البدايه عملواجميع انواع الخناقات بس الحمد لله امى بجد ست بمليون راجل وطول عمر بابا مسافر علشان شغله وهى متحمله مسئوليه كل حاجه من بناء عمارة لمتابعة كل شغل بابا هنا وطول عمرها هتفضل ست الحسن والجدعنه كمان
وكفايه انى بنتها وهى طالعه شبهى شويه يعنى

كل سنه وانتى طيبه يا امى وبما انى ناويه اقرالك البتاعه ده هقولك متزعليش منى والله ساعات بتنرفز غصب عنى اصل مش منطقى يا امى يعنى تأخدى راى فى موضوع وتنفذى عكسه كل مرة كل مرة

طلب تانى كمان يا ريت بلاش تجيبى ليه طقم الحلل اللى بغطاء بيركس ده علشان انا ماسكه ديل قطه واكيد هيقع يدشدش وانا متنازله عن هديه عيد الام السنه دى او يا ريت طقم اطباق ورق اوفر برضه وميتعبش ايدى فى الغسيل
ايوه والله ماما كل سنه بتجيب ليه انا كمان هديه عيد الام طبعا بعد ما بتطلب هى هديه عيد الام ام بيروقراطيه فزيعه

الام التانيه ماما ريا او مجداويه

يا ماجى رغم انك كلاشينكوف موجهه بس بحبك والله ورغم انك عامله زى امى اللى قبلك دى بالظبط انك بتعصبينى وبتخلينى زى السمكه فى طاسه القليه بس بستفيد منك كتير

الام التالته دوللى قوس قزح ودى مانتى الصغيرة

يا مانتى خفى ايدك شويه من على الجرح بيوجعنى انا قولتها ليكى انك بتكملى مانتى الاولانيه وبتلاقينى لما اقول لا على حاجه بالك طويل وتكملى معايا وده بصراحه اللى مش عند مانتى الكبيرة لانها خلاص كنست عليا طريق المنصورة العريش من بدرى وادركت ان مفيش امل فى فردة الشوز المستوطنه فى دماغى

الاتنين الاخرنين
نانا جدتى والده ماما رغم الزهيمر اللى عندها وانها كبيرة فى السن بس حبيبة قلبى فاكرنى حتى لو طلبتها فى التليفون بتعرف صوتى وكلهم يستغربوا يقولوا لها اشمعنى دى تقولهم دى فرحتى الاولى لانى احم احم اول حفيدة ليها
والدلوعه بتاعتها كمان

الاخيرة بقى طنط سلوى خالتى

ودى القبل الاخيره من اخوات ماما واللى قضيت معاها كتير فى حياتى وكله بيقول عليه شبها حتى امى لما اعمل حاجه تقولى جتك القرف وانتى شبهها كده .... فاقعد اضحك علشان عارفه انها تقصد سلوى لان نفس التصرفات اللى بعملها سلوى عملتها بالظبط حتى ولاد سلوى بيغيروا منى ويقولوا لها اشمعنى دى اللى بتحبيها وحتى لو غلطت تدافعى عندها يا سلوع ربنا يخليكى ليه يا بطوط

وكل سنه وكل الامهات طيبين وبخير

كل سنه وكل ام فلسطينيه فقدت ابنها طيبه

وكل سنه وكل ملاحيس التى فى مشنوقين غرقانين محروقين قادر يا كريم

انا رايحه اشترى تورته واشد الرحال كام يوم مع ماما حد مش عاوز حاجه

كان معكم ابن بطوطه ابى هانم

حكمه الامبراطورة

اللى ملوش خير فى امه ملوش خير فى البطاطس المقلية

بعدما راودنى الامل الخبيث الذي يضاهي فى هذه البلد بنت عم القرد ميمون عشم عيشه ام الخلول فى المياه العذبه وايضا حصول الارمله المطلقه على معاش
ان التغيير الوزاري الجديد سيؤتى بثماره علينا وهنتنغنغ ونعوم على وش الفته فى اول ايام الوزاره الجديده ولكن هيهات وهأوات مصاحبه باصوات متحشرجه لا اعلم مصدرها احم احم

اتضح لى من البعد البؤري المتمركز فى اللاوعي المتفنيخ فى الركن البعيد الهادي ان الوزراه القديمه متزوجه من القيادات العليا جواز لا يجوز له الطلاق
ولازقه لزقه الكلب الجربان فى العمود وهو يقوم بحك ديله ( ومشوها ديله )
انتظرت وعينى تلمع لمعه الماس هذا التغيير ولكن جاءت عربيه الزباله بما لا تشتهي الانوف ولا البرك والمستنقعات ولكنهم رفضوا رفضا شديدا من الحديد الصلب ان يحركوا هؤلاء ولكن بما ان الموضوع داخل فيه برك ومستنقعات قالك مزعلش الشعب الطيب ده واعمل لهم وزاره جديده منها اجامل فيها امشيره هانم الصديقه الاولى لسيده القصر وليس البلد لانى لا اقبل ان تكون هذه الشخصيه سيده ترأسنى لانها كبيرها تترأس على السلم


وافرحوا يا عيال فقد قاموا بعمل وزاره جديده اسمها السكان وانا حقيقه الامر لا ادعي المعرفه بمعناها لان الحمد لله فى هذه الحالات على نعمه الجهل الذي اعيشها فى معرفه الادوار فى مسرحيه فاشله ولا مجاملات ليس لها معنى فانا بعد جهد جهيد عرفت معنى هيئه المجتمعات العمرانيه الجديده ووزاره الاسكان والتعمير
فنداء من كلبى من معاميقه يا من تعلمون ما هو معنى وزاره سكان ان ينوبكم هذا الثواب وتشرحوا لى او تشرشحوا ايهما اقرب لقلوبكم معنى هذه الوزاره

فانا اعلم انها لا تتعدي الخط الاحمرررررررر ده اولا ولا تتعدي مجامله ركيكه من الاخت طنط اسمها ايه دي ولا تتعدي نقل دم من قلوبنا وجيوبنا للوزاره الجديده لانج وسيارات فارهه وتشريفات وبدل انتقال وبدل استهبال وبدل استعباط
وبدل هرش وبدل زغزغه

ولم يكتتفوا يا ساده بهذا وذاك ولكن لا اعلم ما فعله الصديق العزيز اللى اساسا معرفوش وزير الري وهنا تدق اجراس الخطر فى بالى ما هو فائدته اصلا ولا اعلم ومن هنا اناشد السيد الوزير ان يتقدم باستقاله حتى التجديد حلو يا راجل انت مزهقتش من الوزراه ده بعد 8 سنين مبيكونش عندك ابداع وانا ماشاء الله شايفه ان فيه وزراه بقالهم ردح بفتح الراء من الزمن ارحمونا يرحمكم الله هو مفيش فى قاموس حياتكم حاجه اسمها تنيمه بشريه دا اللى متجوز واحده بيزهق وبيجدد
طلقونا بقى الله يكرمكوا احنا زهقنا انا بأقر وبعترف انى هرفع على الوزاره قضيه خلع وهستخدم حقى الدستوري
وهمرمطهم فى المحاكم ان شاء الله يكنسوا عليا الدائري والاتوستراد
مش هرحم ابدا اطلقه يا بابا اطلقه

وفى النهايه اكتشفت ان تغير حجر الشيشه اهم وانفع بكتيرررررر من الامل فى التغيير الوزاري

يا نصه غير يا ابنى الحجر خلينا نقوم

وكما قال الشاعر الشيشه حلال والتغيير الوزاري حرام

شعب نمرود صحيح قال يغيروا قال

كان معكم معلم كافيه الحياه ابى هانم توصيل الفقعات والوزارت للمنازل

حكمه الامبراطورة

اللى له ضهر ميتشالش من تغير وزاري واللى له مؤخره يتحط فى وزاره

من فتره على غير العاده طبعا بتاعتى ماسكه شويه كتب وبقرأ فيهم وطبعا بلف على المدونات كلها فى الاستبوخس كده ومبعلقش علشان الوقت بس عندى متقندل اليومين دول خالص المهم بجد بقيت بشوف حاجات غريبه فى الكتابه حتى الكتب اللى بمسكها ولما اتناقش مع حد يقولى المعنى فى بطن الشاعر الكلمه استفذتنى جدا انا خلاص زى ما بدى سى الشاعر ده حقه ان المعنى يبقى فى بطنه انا من حقى انى احافظ على معدتى من الترجيع يععععععععع
بجد وبعد كام لفه كده اتخبطت عن طريق الصدفه من صديق ليه كنا بنتكلم عن بطن الشاعر وودنه ورجله واى عضو بشرى لامؤاخذه موجود فيه
وبما انه فاهم انى مبعرفش اعبر كويس عن القصد من كميه القرف اللى بشوفها وبقراها لناس ....
قالى البوست ده هيبعبر عن اللى جواكى وبالفعل لقيت اللى بدور عليه وكأنى فجأه طلع ليه مارد من البحيرات المرة يقولى شبيك لبيك عبدك وملك رجليك البوست لقيته عند العبقرى الفنان اشرف حمدى صاحبه مدونة كاريكاطظ واستأذنته انى الطش منه البوست زى ما هو والبوست ده اهداء لكل الاخوه المتشفلحين المتغيبين اللى فاكرين الناس قاعده فى عقولهم وواخده قانون جديد ارحموا اهلينا مش عاوزين نعمل بجد زى اللى مفهمش قالك الله ده ابداع ده فن سرطانزم ده سيرالى امبريالى متشفلح فى القاولون ايه يا راجل هو ولا ابداع ولا بتاع هو تعذيب علشان تكرهونا فى القراءه سواء كتب او مدونات ارحموا الناس انا هخبط لكوا البوست ده وبشكر اشرف بجد انه عبر عن معاميق معاميقى وانه وافق انى الطش منه البوست

كأي شيء جديد \ غامض كان شغفي بعالم المثقفين وجلسات مقاهي وسط البلد والكوفية الشهيرة وربما البيريه أيضا والشعر المعقوص على طريقة ذيل الحصان ( للرجال أقصد ) والكتب التي تحمل أسماء أفعوانية مثل قوقلة اللامتناهي أو رواية ورقة بيضاء مضمحلة بفعل الجاذبية أو قصيدة الحلزونة الأرجوانية ، ربما كان انجذابي اللا إرادي إلى صفوة المجتمع ، الصفوة العقلية والفكرية أقصد ، أنا شخص يعيش على الأفكار ، والفكرة عندي أكثر إثارة من قبلة أنجلينا جولي ، ومن أفخاذ النساء جميعا ، الفكرة العبقرية هي التي تبقيني مستيقظا لثلاثة أيام وتجعلني أتقافز كالبرغوث وأهز رأسي كالدراويش في حلقات الذكر مستطعما جمالها وتفرّدها ,، ربما كانت رواية عبقرية ، أو فيلم عبقري ، أو كاريكاتير عبقري ، أو جلسة مع عباقرة . ولكن من خلال إحتكاكي بطبقة المثقفين لاحظت أن أغلبهم وليس كلهم بالطبع تستهويه فكرة أن يكون مثقفا وأن يمارس ما أتفق عليه عبثا أنه فعل وسلوك ومنهج المثقفين ، هذه الفكرة في حد ذاتها هي الهدف لهم ولا أنكر أنها استهوتني شخصيا ولكني في واقع الأمر لن أقضي حياتي مرتديا كوفية وبيريه عاقصا شعري كذيل الحصان وتحت إبطي رواية بعنوان الأفق المفشوخ دون أن ينعكس ذلك على العملية الإبداعية . وجدت أنني أكثر حكمة وثقافة من غالبيتهم التافهة ، وعذرا إن قلت تافهة لأنه من الصعب على أن أنمّق الكلمات في حين أنني أرى مستقبلا حالك السواد من الناحية الإبداعية لو استمر نمو فيروس المثقفين على هذا النحو .

في الواقع ربما أكون مخطئا في مسألة تقدير نسبة هذه الفئة ، وأعترف باحتمالية الخطأ في كونها تمثل غالبية المثقفين كما ذكرت ، ربما كانت نسبة ضئيلة ولكن الذي لا شك فيه أنها ظاهرة بدرجة أكبر من المثقفين الحقيقيين ربما لأن المثقف الحقيقي لا يهمه لفت الأنظار إليه ولا يهمه مقاهي وسط البلد بقدر ما يهمه ما سيتم طرحه عليها من أفكار . لذا وجب التنويه إحقاقا للحق .

ولأنني لا أجيد الاسترسال دعوني أقدم لكم بعض مظاهر فئة المثقفين \ مدعي الثقافة التي أقصدها

الغموض : لابد وأن تكون غامضا فيما تقدمه ، لو رواية أكتب فيها : والسماء تحلب العسل الضيق لتفرش على صفحة الماء الرملي براثن جحر منقرض فتموت أزهار السوسن تحت أقدام الورق المنصرم أعواما كثيرة . حدث هذا أمام الدكتور علاء الأسواني على مقهى بوسط البلد والرجل خجل أن يعلّق صراحة في حين نظرت لدكتور ميشيل حنا صديقي اللدود وإنفجرت نظراتنا بالضحك الصامت ، كان القاص الشاب يتحدث عن رائحة أرجل حبيبته المتعفنة ، والله العظيم بجد مش بهزر . بالطبع هذا كلام فارغ ، وأغلب من يكتب هذا الخراء الفكري لا يفهم أساسا ما يكتبه ، والباقي يكتب ذلك عن عمد ويكون تعبيرا بالفعل عن فكرة حقيقية ولكن ما قيمتها وقد جعلصتها بحيث أصبحت لا تناسب إلا أنت ، لأن حتى باقي المثقفين لن يفهموا ما تقوله . والفن أي فن هو في الأساس علاقة من طرفين ، الفنان والمتلقى ، وحينما تكون لغة التفاهم بينهما هي ميتافيزقية سلق الجمبري المتحولق فهذا يلغي الفن من أساسه .

الإلحاد : لابد وأن تكون ملحدا ، أو على الأقل تحمل لقبا مثيرا تقدم به نفسك إلى وسط المثقفين ، بهائي ، قرآني ، باذنجاني مخلل ، أنا أفهم جرأة بعض المثقفين في تناول علاقة الإنسان بالله ، كما أفهم الإلحاد حينما يخرج عن دكتور مصطفى محمود في بداياته والذي أصبح بمثابة مفكر إسلامي كبير فيما بعد ، وأفهم مشاعر ربما تكون صادمة للبعض مثل أن يكون الإنسان على خلاف مع الله ، بالبلدي ( ليه كده يا رب ؟ مش فاهم عاوز مني إيه يا رب ولا فاهم خلقتني ليه ؟ ولو أنا مش فاهم ده مش ذنبي ، ليه ما فهمتنيش يا رب؟ ) كلام قاسي أليس كذلك ؟ ولكن على الأقل أنت مؤمن بالرب ! أما الإلحاد فهو لا يليق بطفل في الثانية من عمره لأن وجود الله بديهي ولا علاقة له بدين ، ولقد توصل أجدادنا الفراعنة لفكرة الإله الواحد منذ آلاف السنين ومن السخف بعد كل هذه الأديان التي أنزلت إلينا أن ننكر وجود الله. هذا الإلحاد ظهر كثيرا على المدونات وتوغل في المجالس الثقافية على نحو مستفز ، يعني تافه وحمار وكمان كافر ؟ كتير قوي مش كده ؟

الإنفلات الأخلاقي : هذه نقطة صعبة وشائكة لأن الأخلاق نسبية ، وما يمكن إعتباره إنفلاتا أخلاقيا للبعض ربما يمثل تطرفا دينيا عند البعض الآخر ! أنا نفسي هناك من يقول عني عم الشيخ وآخرين يعتبرونني منفلتا ، ولكن هناك دائما ما يطلق عليه المتوسط العام ، على الأقل لا يصل الأمر لحفلات جنس جماعي مثلا ، لا اعتقد أن هناك خلاف على كون ذلك أنفلاتا أخلاقيا ، هذا مجرد مثال بالطبع وأعتذر عن تقديم أية أمثلة حول نقطة الإنفلات الأخلاقي لأنها ستثير جدلا كبيرا وهي نقطة فرعية في الأساس ، ربما أذكر فقط مسألة دعم السحاق واللواط باعتباره موضة عصرية ، السحاق واللواط مسألة شخصية بحتة يمكن ان تناقش عند الطبيب النفسي أو متخصص في علم الإجتماع أو المسائل الجنسية ولا علاقة لها بثقافة ولا فكر ولا بالباذنجان المخلل أيضا ، ما أريد التركيز عليه هو فكرة الصفوة بأن الأخلاق تم اختراعها لعامة الشعب أما هم ففوق الأخلاق وفوق الدين لأنهم فنانون عباقرة ومثقفين جهابزة ، وبالتالي هم من يصنع الأخلاق ليتخلّق بها بهائم الناس ! وحقيقة الأمر أن فئة المثقفين يعاني أفرادها من احتباس البول والإسهال وفيروس الانفلونزا ، يأكلون ويشربون ومن ثم .... انت تعرفون بالطبع ! هل ينكر أحد تلك المظاهر الفيسيولوجية ؟ إذن فمبدأ نحن فوق الأخلاق مرفوض منطقيا وليس أخلاقيا أو دينيا فقط .

سؤال فرعي مقرف : هل بول المثقف يختلف عن بول عم حسنين بائع الفول على ناصية شارعنا ؟

أما عن بعض الأمثلة لمن تحدثت معهم في جلسات ثقافية ولم تنطبق عليهم أيا من النقاط السابقة فهم على سبيل المثال وليس الحصر الفنان جورج البهجوري
دكتور أحمد خالد توفيق
الكاتب بلال فضل
الدكتور علاء الأسواني
الفنان خالد الصاوي
الكاتب والشاعر الغنائي عمر طاهر
الدكتور ميشيل حنا
وعدد كبير من المدونين ورسامي الكاريكاتير يعصب ذكرهم جميعا

مثقفين أهم ، ماحدش فيهم قال إنه ملحد أو قال مثلا : تفشحط الغنداق في قوافل الأرندلي ، وأعترف حقا بأنه لم يحاول أحدهم أن يقبلني من فمي حتى الآن


منحوسه كونوسه :- انا اكتر واحده اتصدمت فى الناس بجد بلاقى ناس بتكتب بشكل فى مدونتها وفى الحقيقه حد تانى خالص مقصدش اللى بيكتبوا قصص من خيالهم طبعا
الناس بجد دول يا اما بينقلوا من مكان ومش فاهمين يا اما مش عارفه هما كائنات متحوله منبعثه من ريحه شراب مش نظيفه لان لما تتناقش فى الحقيقه معاهم تلاقيهم صفر على الشمال بجد فى النقاش ومعندهمش الجرأة ولا الاسلوب اللى بيكتبوا بيه يا دوب حافظين كام كلمه حتى مش عارفين يوظفوها فى انهى جمله
يا ريت الناس لو بتنقل حاجه تقول انها نقلاها علشان ترحمنا وترحمنى من الخرعات والفجعات اللى بتحصلى ويا ريت برضه مش كل واحد حافظ كلمتين يرجعهم فى هدومنا يحتفظ بيهم لنفسه ويخبيه بدل ما يتجمركوا منه

كان معكم استاذ وزير اول مهندس زراعى ابى هانم

حكمه الامبراطورة

ترتر وحرير على غطاء زير

استمحان قوي اوي اوي يالا كله يجيب الروقات والاقلام ويكتب

علشان انا رايقه اوي ومستعده اعض واضرب اي حد
ماذا تفعل لو كنت بتحب شخص ولكنه لا يبالى ؟
الجووووون بقى ان فيه تاني بيحبك وانت من كام سنه وانا ميال ميال ؟
حبك هيكون لمين الاولويه يعنى؟ احم احم
تعمل ايه لو التانى بيهتم بكل مشاعيره والاولانى مطوح مشاعيره بطول دراعه فى ترعه ميتها راكده والقراميط المعفنه سكناها؟
تعمل ايه لو الاولانى منكد عليك طول الوقت وفى نفس ذاتيات الوقت التاني ميدك كل وقته ومش زي الاول مديلك على قفاك
طبعا المواقيف دي كلها بنمر بيها مش انا طبعا نيهاهاها .....لا كدابه اكيد وانا كمان بس عادي يعنى
المهم مش عاوزه واحد يلف حوالين ودناته ويقعد يدور على اجابه دبلوماسيه انا خلاص خلعت الارقام الدبولماسيه انا من العامه الان
يعنى بمعنى اوضح عاوزه اصابات حره ومباشره وعورا عادي عندنا شاش وقطن ومركركوم نداوي الجراح
يعنى اصابات يعنى اهداف يعنى جوووووووووون
هنشوف بقى وهعرف اللى هيجاوب اجابات متحوره وحوارتجيه واللى هيقول اجابات مقنعه
وله جايزه هونا فى الكوكب
معاك ربنا بقى واتنين ملايكه وواحد شيطان هيطلع روحكوا ان شاء الله

ترسل الاجابات مع حله محشى بتنجان وورق عنب على العنوان المذكور

كان معكم استاذ طيار جناج عسكري مراجيح مولد النبى ابى هانم استنجلينا تيررررررارررررررا

حكمه الامبراطوره

لا تندم عندما لا يساوي الندم بادي استبريليس

احداث الازهر لم تنتهى ومن هنا من قلب العاصفه اتابع الاخبار والتصريحات الخزعبليه والمنشيتات العسكريه والغير عسكريه

والجهد الجهيد الذى تبذله العباسيه فى توريد المختلين عقليا للداخليه وعلى الجانب الاخر بشكر مقدما العباسيه فى الجهد الشنيع المريع اللى بتعمله فى محاوله لعلاج الداخليه بس احب ابشركم ان العباسيه خلص خلعت ايديها وعنيها ورجليها من القصه فقد خرجت ودخلت ولفت علينا الصحف المقصوفه على شبابها فى نقل طبيخ حمضان من طبيخ الداخليه وقالك ايه ان فيه المفتشه خرومبوس ودى غير كرومبو
يقال ان فيه صله خرابه فى العقليات بينهم كانت الست اللى فى عمر زهور الصبار بتفنسح ولادها فى الحسين وقال ايه شافت اتنين واحد فوق بيرمى لواحد تحت شنطه عند فسدق الحسين اللى بيقولوا ان التفجيرت حصلت من عنده هووووب التانى اللى واقف تحت ولا الحضرى فى زمانه اتلقى الشنطه على صدره قام مطلعها من مناخيره واولللللللوووووووووليه جووووووووون حطها تحت الدكه كل ده والست مرجانه واقفه تتفرج وكان فى ايدها الكام وخافت تصور وبعدين جريوا جريوا وقعدوا يجروا وركبوا تاكسى وحصل الانفجار

وطلعت الغازات السامه على بتوع الداخليه اللى هناك وبالتالى اتنقلت العدوى اكيد للباقى انا قولت يطعموهم ضد العض محدش سمع كلامى المهم السوت مورجانه دى ركبت عربيتها وجريت وراء التاكسى وشافتهم داخلين بيت وسالت البقال (انا شوفت الفيلم ده فين قبل كده )
وبعد الحادث بكام يوم بلغت اه يا عينى اصلها اتخضت خضه الارمله المطلقه يا عينى عليها

والله بجد ده اللى حصل واتنشر فى العدد بتاع المصرى اليوم يوم 25/2/2009
اولا ردا منى ند بند لبتوع الداخليه بما انى بروح الحسين كتير جدا واصحابى هناك اولا البارك بتاعت التاكسيات لو انت وشك لشارع الازهر مش الاتوستراد هيبقى على اليمين وممنوع وقوف اى عربيه الناحيه التانيه جامع السلطان الغورى واول شارع الغوريه وممنوع اى عربيه تقف هناك غير التاكسى وبقى نادر البارك الخاص بالعربيات فيه اتنين واحد فوق عند مستشفى الحسين والساعه بتلاته جنيه اى والله حار ونار فى جتتهم يا الشارع اللى بعد الشريف للبلاستيك فيه عيال بلطجيه هناك بنركن عندهم العربيات بنات وولاد والساعه بخمسه او عشره جنيه على حسب مش الساعه الوقت كله عموما بس بما انى كنت شبه يومى هناك فكنت انا مبلطجه عليهم وطلعهم كل مره غلطانين ومبدفعش حاجه

المهم يعنى نووووووو واااااااااااااااااى يا سياده المفتش خرومبو اللى انتى بتقوليه خالص انتى وخريجي العباسيه

اتنين بقى ملاحظه ان شويه اتنين منقبات لا واحد ملتحى كأن الملتحى ده بيخبى فى دقنه قنبله طيب وحياة مانتى لو شوفت واحد ملتحى وكان معرفه يعنى لافتش دقنه وانا حنزرت اهو
المنقبات قولنا فيه فرق مش معنى ان واحده لابسه نقاب تبقى هى منتقبه ممكن واحده مستخبيه او واحد وده مش معناه عيب فى اللبس العيب فى الشخص ولو الداخليه بترمى على ده انها تلزق فى اى حته وبس يبقى بالمره الغوا الباروكه والماسك والميك اب لان كل ده بيغير الشكل
اه والحلوين اللى بيخافوا من المنقبات يا ريت لما واحده منقبه تتعرض لكى ابقى كعبليها اى والله مش بهزر لان طبعا صعب بلبسهم انها تجرى فبالتالى علشان متخافوش وتقولا دول مجاهيل بالنسبه ليه قومى حطه رجلك ومكعبلاها على بوزها لو عملت فيكى حاجه

لو يهمك اوى تعرفى دى بنت ولا ولد مع انه ميخصش حد ابقى اساليها الساعه كام او اساليه ا اى حاجه واعتقد لو حد عنده الشجاعه وحد منقب اتعرض له من السهل يشد الطرحه من على وشه وكده ابقى حليت مشكله المتخفيات مش المنقبات لانى اعرف ان المنقبه محترمه اما اللى غير كده فهى بتسئ لروحها ومش للنقاب فى حد ذاتها تصفيييييييق ححاااااااااااااد على الحلول بقى

ملاحظه اخيرة اى والله لاحظت ان بعد موضوع الحسين كل يوم والتانى يمسكوا واحد بصباع محشى بيحب فيه ويقولا عليه ارهابى وفجأم طلع مهندس ماشى من غير رخصه ولا بطاقه وحاطط فى عربيته ديناميت ولاب توي وحاجات كتير مش عارفه اخترعوها امتى وقال ايه الظابط قفشه من قفاه طيب يا ولاد المجانين واحد ماشى بكل البلاوى دى وهيلفت النظر ليه ويمشى من غير ارقام للعربيه وكمان فى الهرم
غطينى يا مانتى وزغرطى بجد على اللى بيتقال
وعيل بيرمى زجاجه هايفه مليها جاز وسخ على دماغه ودماغه اللى خلفوه يقولوا عمليات تفجيريه هى ايه القصه ما كل يوم مناطق بتولع ومفيش فايده
هى الداخليه مش عارفه تعالج عجزها فهتطلع علينا حد يجيب لهم فياجرا يا جدعان بلاش كده هيبهدلوا الشعب ابن اللذين ده

يا شعب والنبى خفوا ايدكوا الداخليه والحكونه تعبت بس على راى صديقى بالذمه مش موضوع مختل عقليا احسن من اللى بيعملوه ده وبيقولوه حتى والله اخدنا عليه وبقى عشرة كده والعشره مبتهونش غير على ولاد الحرام اى والله وعموما بلدنا بقى فيها منهم كتير

ومن هنا ينتهى تصريحات البقليه (الدخليه وده اسمها الجديد بم ان يعنى كل كلامهم مبقلل كده يعنى ) اللى طالعه علينا بالتقليه ليل ونهار

ومن موقعهم وبالنيابه عنهم بما انى حسه انهم فيصوا ونفسوا وجابوا اخرهم بيهدوا الشعب الاغنيه العظيمه للفنانه اللولبيه المهلبيه اللى منه لله اللى ورهانى اغنيه آآآآآه يانا تعبانه ودى اهداء من الداخليه ليكوا ارحموا الست بقى انطح الاسم هتروح للاغنيه

تفجير :- اياك اشوف حد بيحدفنى بالطماطم دى هديه ليكوا ومحدش يردها عيب دى الداخليه بتحافظ على الامان مع الملابس الداخليه وده هدفها فى الحياه حتى اسالوا اللى راحوا قمل الدوله نيهاهاهاها

كان معكم ملازم اول عميد استاذ دكتور ابى هانم استنجلينا

حكمه الامبراطورة

زى الابره بتغطى غيرها وهى عريانه