ابو الهول اضمن



خبطه تانيه قويه عليا وصدمه بجد من الزوج الغير محترم ولا زوجته القذره الصوره اللى فوق بتاعتهم وشوفوا كلامهم اللى يجيب القئ هنا بجد انطح هنا

انا بس ليه سؤال نبيه الجحش فين بقى مطلعش بطلته البهيه علينا فى الموضوع ده ليه ولا الموضوع عادي ليه
علشان محدش يصطاد فى الميه العكره مش معنى ان الحقيره دي محجبه ولا لابسه اسدال يبقى العيب فى الاسدال العيب فى اللى بيداروا ورا المظهر الاسلامي ولولا انها عارفه انها بكده بتدراي مكنتش لبسته وزي ما قولت قبل كده للاسف احنا بقينا فى زمن كثره فيه مظاهر الاسلام وقلت اخلاقه او انعدمت اساسا

تحديث : عمرو الحمد لله سمحوا لهم يروا الارض وطلبوهم يروحوا يكملوا زرع وبيقول ان الريس متقال بنفسه اهتم بالموضوع بس يا رب يفضل صادق ومحدش ياخد منهم ارضهم ولا يضايقوهم وتنتهى المشكله يا رب
بس بجد انا فرحانه اوى اوى لعمرو واللى معاه



عمرو انا مش اعرفه بس هو دخل ساب ليه اللينك ده انطح هنا

وقالى هنعمل ايه رحت قريت دمى اتحرق تعمل ايه مش عارفه اقعدوا فى ارضكم متسبوهاش مش كل شويه يصفوا حسابات مع رجل اعمال والضحيه تبقى الناس والشباب
مش كل شويه يقتلوا حلم ويرجعوا يقولوا احنا بنواجهه بطاله
طيب انهى بطاله اللى بيوجهوا
انا قولت هاخد اجازة بس واضح ان مش هينفع واضح ان قرارى بالانضمام لصفوف ابو الهول والالتزام بالسكوت مبينفعش فى البلد دى
انا اول واحده ضد ان الشاب او الشابه تقعد فى البيت بعد التخرج انا مع انهم يعملوا اى حاجه فى الدنيا اى شغل محترم وخلاص
طيب بيعملوا فيهم كده ليه بيخلوا الشباب تصمم على الهجرة ليه لمصلحه مين بجد اللى بيحصل هما قلبهم مش بيوجعهم على ولادهم ليه
النوباريه كمنطقه كمان تحفه وفيها خضار يجنن وموتوا الشباب وحلمهم هناك ومحدش بيشترى حاجاته
الفاكهه بتبوظ وهما امكانيتهم ضعيفه فى نقلها
طيب بيقعدوا يشخطوا فينا ليل ونهار ويقولوا شباب مانتخ شباب الجيل والبنطلون اللوويست والتى شيرت ابو ترتر وقولنا ماشى معلش ما الناس اتحركت اهى ليه عاوزين ايه
اللى عنده يا جماعه اقتراح والنبى لعمرو وزملائه يقول بجد انا مش عارفه انا قولت له متسوبهاش موتوا فيها اكرم لكوا لانكم زى ما بتقول بعتم اللى وراكوا واللى قدامكوا

الخبر التانى بجد الست ايناس الدغيدى واضح ان رغبتها اتحققت
فانا من موقعى هذا اناشد كل المواطنين يمشوا على مدأ الاخت ايناس يمكن الحظ يضرب ويتححق امنياتها هى كانت بتطالب بترخيص الدعارة طيب وعلى ايه يا بنتى دا الطبقه اللى المفروض متعلمه ومنورة كده وعلى راسها لمبه فولت 250وات عملت اللى عمرنا ما كنا نتخيله ولا بيجى فى خيالنا طيب والنبى بقى اللى بيقولوا الطبقه الفقيره اللى بتعمل كده يتبطوا لانه واضح انه بقى كله
والدعاره خلاص بقت علنى وجنس جماعى كمان وحاجه قرف ومن ناس المفروض محترمين واحد محامى ومراته مدرسه ومش هتكلم فى الموضوع ده لانه بجد حاجه تقرف دا الحيوانات فى الغابه مش بتعملها مش عارفه ايه اللى حصل لمصر ورجالتها وستتاتها واضح ان الهرومنات اللى فى الفراخ البيضه اثرت على النوعين رجاله وستات وبقى مفيش دم
الناس دى معملتش كده علشان فلوس لا ابسكوتلى بتاتا البته دول عملوا كده فانتازيا بيقلدوا الغرب وعلشان برضه منظلمش الغرب ولا الشرق ولا اى اتجاهات اللى بيعمل كده هناك منبوذ والمجتمع بيديله بابو ورده وام ورده طيب دول عملوا كده بمناسبه ايه بقى ابعت الاجابه على قصر الرئاسه ولك جايزة مفاجئه كارنيه انضمامك للحزن الواطى
مش عارفه نظام كلاب الحراسه ده هيفضل لامتى
هو عجبهم البلد بالفضايح اللى فيها
هو ده غرضهم ده اللى عاوزينه من الناس والشباب وكل يوم الحزن الطبال قاعد يعمل مؤتمرات لااااااااااا مؤامرات على الشعب ويقولك لمصلحته انهى شعب ده اللى بيتكلم عليه انهى ناس وانهى شباب
وانا هروح اقعد جنب ابو الهول برضه شويه اهو اغير جو واهدى اعصابى يمكن الصحرا تفتح دماغى لحاجه علشان انا خلاص الضفيره بتاعت دماغى ضربت من بدرى الحمد لله

كان معكم ابى هانم بتنجانى عميد مباحث كرابيج قمل الدوله

حكمه الامبراطورة

خسارة الصوف ولا خسارة الخروف

نظريه ام حلموس فى فهم النفوس



بالصلاه على النبى كده يا فياكين ويا فيكونات انا بقالى فتره بعمل نظريات وفاكره نفسي ايكاشتين ده ولا ابن سينا وضربه فى نفوخي مواسير مجاري الفكر كله

اقولكم ازاي كل يوم الصبح بصحي زي خلق الله بس ببص لنفسي فى المرايا اشوف اتوبيس هيئه نقل عام ابو شرطتين فاعمل ايه علشان اوصل للشغل متخانقش مع كل البشر ومتخانقش مع اللى فى الشغل وبما انى استنجلينا برتبه لواء فبسلى نفسي فى الطريق واطلع البتنجان على الناس

فاخيرا توصلت ان الراجل لمجرد انه يشوف ست بتسوق يضرب فى نافوخه هرمونات الذكوره المتاصله عنده ازاي يعنى افهممكوا

بعمل لعبه هبله انا المسافه من بيتى للشغل بتاع 14 كيلو يعنى ربع ساعه عشر دقايق وانا طريقى هاي واي فبعمل لعبه صغيره الاقى عربيه فيها راجل بشوف من بعيد مش لازم جنبه اقوم اجي واجري بالعربيه قدامه او اكسر عليه براحه علشان ميكونش راجل كبير ويتخض هووب يقولم لابس فى عمود نور ويطلع ليه عفريته بعدين يطلع الهسس عليه كله
ولا يكون غشيم يلبسنى انا فى شجرة لان الرجاله يا عينى الكبيره قلبهم ضعيف يقوم هو يجري يبص يلاقى بنت يقعد يشد قدامي وانا طبعا ولاببص ناحيته ولا كاني شايفاه وطبعا من كل خمسه مثلا يطلع واحد او اتنين بالكتير هرمونات الذكوره مش بتنقح عليهم والكرامه تاخدهم وازاي بنت بتجري ويحاول يثبت انه يعنى راجل فت بقى وان البنت مش بتعرف تسوق واننا عملنا زحمه سواقه على الفاضى (قال هما اللى استاذه والسواقه احتكرت عليهم
)
وده المفهوم الخاطئ عند البعض لان السواقه مش مرتبطه ببنت وولد واكتر الحوادث بسبب الخوف او عدم التصرف بسرعه لحظه التردد هي لحظه الحادثه

دي اول نظريه والسؤال ليه الرجاله بجميع الاعمار بيجروا ويحاول يثبتوا شطارتهم فى ده مع الملاحظه ان ولا بنت بتسخن وتجري معايا

النظريه التانيه واحد كرامه وصلحه
================
بتعمد استفذ المحيطين بيه من رجاله علشان فى النهايه يقولى لو سمحتى انا راجل وعندي كرامه ومقبلش بكده وهنا بقوم واقعه على ضهري من الضحك وارفس برجلى ليه بقى
لان البنت لما بيتجرح كرامتها او بلاش تحس ان حد هيهينها تقولك لا لو سمحت انا عندي كرامه عمري ما سمعت بنت بتقول انا بنت وعندي كرامه انما الراجل
دايما ولازمن ولا بد وحتما انه يقولك انا راجل وعندي كرامه وفكروا كده مع نفسكوا او خدوا بالكوا من الكلام هتلاقوا فعلا ده اللى بيحصل هي حاجه ممكن تقولوا عليها عادي بس هي لها مداليل نفسيه للراجل ويا رب اللى ما يقول صح يتكعبل فى سجاده بيتهم صوابعينه كلها تتعور

والرجاله تجاوب بقى وارهنكوا على الكوكب ان كله هيدخل ينفش ريشه فيها هههههههه وابقى ثبت نظريه تالته من غير ما اخد بالى هههههههههههه
السؤال ليه الرجال ميقولش بس انا عندي كرامه ولا هي الكرامه بقت بس حكر على الرجاله ههههههههههههههه
طيب ما تقول انا انسان وعندي كرامه وخلاص هو يعنى حد حلفه انه لازم يقول انا راجل ما انا شايفه بعنيه انه راجل مش ست يعنى

اللى بعده

الواحد اللى مرتبط او خاطب او متجوز او اخ يقول للبنت لا متنزليش متتاخريش متروحيش وده كويس ومتتاخريش اهمها بيدى انطباع طبعا انه بيخاف وبيغير
وده حلو بس تعالا مثلا لما يقولها فى حاله المرتبطين او اللى مخطوبين نخرج ويبقى الوقت متاخر وتنزل تقابله فى مكان بعيد عن البيت
الله هو مش ده اللى كان بيقول لا برضه ولا اتغير ولا مثلا اخ يعوز من اخته حاجه يقولها روحي هاتي او اعملى طيب معناه ايه
ولا اللى متجوز وهى عاوزه تودي الاولاد للدكتور او تجيب حاجات يقولها روحي انتى

السؤال بقى مش هي دي اللى انت رافض كل الحاجات دي علشانها ليه بتحللها فى اوقات واوقات لا ولا المبادئ بتتجزا
وليه البنت اللى بتسمع الكلام فى كلمه لا هي برضه اللى بتسمع الكلام فى كلمه روحي وانزلى ليه مش بتعترض وتواجهه بازدواجيته دي
وازدواجيه نفسها فى انها عاوزه تقول حاضر ونعم من غير تفكير
وادي نظريه كمان الازدواجيه من الطرفين ويبقى على قلوبنا حلو ولما نتخانق نطلع الهسس على بعض طيب ليه منبقاش طبيعين ونخلى بالنا
ممكن تقولوا ام حلموس بتلك ليه فى الكلام ده
اقولكم لان بجد المفاهيم الغلط اللى فى دماغنا من الجنسين ناحيه الجنس التاني هى اللي عامله المشاكل والمشاحنات وشد الشعر وتقطيع الهدوم بين الاتنين دايما وهي اللى بتخلى الزواج والخطوبه والعلاقات بتفشل
يبقى المطلوب تجاوبوا على الاسئله وتفكروا
والى اللقاء فى نظريه اخري

كان معكم من قلب المعمل والانفجارات الدكتور طبيب جراح لواء ابى هانم ام حلموس

ملاحيس فتانيس:- انا بجد لما بعرض حاجه بفكر فيها بصوت عالى بدور على المشكله فين مش بثبت ان الرااجل ممكن نستغنى عنه اوالست لا انا بدور عن ان الاتنين كيان واحد والبلد دي مش هتنفع ولا تتقدم ولا نقدر يبقى عندنا اي مفاهيم صح الا اذا صلحنا اخطائنا وانا عن نفسي من المناقشات والخناقات وتحديف القلل بستفيد وبغير حاجا ت فى شخصيتى علي الاقل نطلع من الحوار باى تغيير ان شاء الله تغير زيت بطوط اللى اتحرق مقابل اثبات النظريه بتاعت الهرومنات دي هههههههههخخخخخخخخ

تحديث :- الحجه نوارة رئيسه جبهه التهييس الشعبيه والشريك المتضامن فى حمله كلنا برعى والله جاوبت الاستمحان عندها بس والله مشاكل ومصايب اكتر وفتحت نظريات تانيه باجابتها ابقوا اطلعوا عليها واضح اننا هنقضيها نظريات ومش هنشوف اكل عيشنا فى البلد دى ههههههههههههههههه انطح يا ريس


حكمه الامبراطورة

لا تقهرني ولا اقهرك الزمان دهمنلي ودهملك

انا مش ليلى يا عبدوو




تحديث مع زغروطه اقروا الخبر عند نواره علشان تعرفوا ان زمن برعي المفش احلي واننا مش ليلى وشوفوا البنت اهي مسابتش حقها واتحكم على واحد اتحرش بيها تلات سنين كمان انطح يا ريس

وادي كمان حوار البنت اتفرجوا بقى على الناس والشعب والمجتمع والناس اخواتي تلبس وتاكل هههههههه وده بقى اقوي دليل على البوستين الاخرنين ليه جبتش حاجه من خرفانى
انطح هنا يا ريس

ايوون انا مش ليلى انا برعى ايوه برعى المفش مال عنيكوا طلعت لبره كده وبقيتوا شبه ميكى ماووس
انا مش بحس نفسى ليلى لانى مش مقهورة واللى بتقول على نفسها مقهورة تبقى هى اللى جابت القهرة لنفسها
انا برعى المفش اسما انما شكلا انا بنوته انا اعرف اخد حقى ومش هستنى حد يجيبه ليه
انا عارفه حدودى كويس جدا فى حياتى ومش بصوصو ولا انونو ومش بخاف لما حد يطول لسانه لانى بعرف ارد عليه مش لازم ارد باى اكون قليله ادب بس اعرف اضحك طوب الارض عليه
اعرف احرق دمه واخليه طول الليل بيتشوى زى السمكه الصاحيه على النار
وهو ليه لما الولد يقف يشتم ويهلل يبقى راجل والبنت تبقى مش محترمه اه علشان الحياء اوك بس هوالحياء ده ربنا قال عليه للبنات بس والاولاد لا ده سيدنا عثمان بيقال ان الملائكه كانت بتستحى من حيائه ايه عاوزين ايه اكتر من كده
انا اتعلمت ونزلت مجال العمل وبسافر وبقعد مع ناس كتير فى شغلى وبعرف اوقف كل واحد عند حده
اللى عقله بيميل شمال او يمين فى انه يتحبرش بيه الست والدته بتكون داعيه عليه
خلينا متفقين محدش بياخد حاجه من حد غصب عنه محدش هيجبرك على ضحكه وانتى مش عاوزاها محدش هيمسك ايديك وانتى مش عاوزة
ولو عملها غصب عنك ليه متصرخيش فى وشه وتبعزقى كرامته وتوزعيها على النمل الكبير ده حرامى الحله
ليه لو واحد قال كلمه بايخه وقله ادب مردش عليه يعنى هو جرئ وعنده لسانه وانا رابطه لسانى بسلوتيب
انا اعرف ارد ولو قالها بينى وبينه لو وقفت له مرة والتانيه مش هيقدر يجى ناحيتى
ناقصنا ايه تعليم واتعلمنا شغل وبنشتغل
بنصوصو ليه علشان مدير ولا زميل بيتحبرش اقفى طالبى بحقك طالما معاكى حق
ربنا عمره ما بيجى على مظلوم اقفى وعنيكى جامده وقولى حقى وبالادب والذوق مش بانونوه ولا الصوصوه
لما تغلطى متكابريش قولى انا غلطت هيديكى ثقه فى نفسك وفى اللى حواليكى هيثقوا فيكى
انا بعترف ساعات انى غلطانه حتى صديقى يشهد عليا ههههههههه
هوا نا بطلع روحه بس عادى هو بيتحملنى (وش بيغمز محدش يقوله هههههههههه)
مش هنكر ان فيه ستات اتظلمت بس علشان هى وافقت ليه مكملتش تعليمها انا اعرف ناس سابت التعليم علشان تشتغل علشان تلبس وتخرج وتجيب موبيلى
دول يستهلوا يبقوا ليلى ونص علشان هما تفكيرهم محدود وتحت رجليهم مبصتش لقدام وحياتها وهتتجوز واحد عامل ازاى ما هى اكيد هتتجوز واحد يطلع روحها ويضربها ويهنها
الستات المتجوزين بلاش تناطح وتقول اعطينى حريتى سيب المخده فيه شرع ربنا قال عليه لازم نمشى بيه والاتنين يا سى عبدوو انتى وهى يعنى لما الراجل يعامل الست كويس اكيد اكيد هى هتبقى كده مش عجباك طلقها وربنا اللى قال واديها حقوقها وعيش انت حياه تانيه كويسه بس متغضبش ربنا
لو الاتنين راعوا ربنا واحكامه وشرعه صح صدقونى ولا هيبقى فيه ليلى ولا عبدو خالص
يا بنات اوعوا تخافوا من حد ويا اولاد انا مش بخاف ومش قليله الادب ولا بجحه انا اعرف اخد حقى وانا مش ام نوميست دى اللى بتقولوا عليها هههههههههههههه
لا انا بنوته ربنا خلقنى حلوه وذكيه وادانى كل حاجه كويسه بتحرك فى حدود امكانياتى وبنميها دى مش وصفى انا ده وصف كل بنت
انا اعرف اشتغل كل المجالا ت حتى ظابط بس ادونى الفرصه وانا ابهدلكوا ههههههههههه
لا بجد احنا مش ناقصنا حاجه بلاش تبصى لشغلانه تفقدك انوثتك اشتغلى الحاجه اللى تقدرى عليها وتبقى ذكيه هو مش اتوبيس يا ام احمد هتتزنقى فيه لا دى حياه هاديه ورقيقه بس ساعه الجد ابقى برعى المفش واوعى تخلى حد يجيى ناحيتك ومتتكسفيش انا ضد ان واحده تغتصب او يخدش حيائها ومتروحش تبلغ علشان الفضيحه يغور المجتمع فى داهيه بس حقها ميضعش مجتمع متخلف عادته باليه
ولو فى القسم لاقوا اللى قدامه بتصوصو وتنونو وتكاكى هيقدروا عليها ويجوا عليها ادخلى وانتى نافشه ريشك اوعى تطاطى ابدا
لما ولد يقولك بحبك ويدخل لكى من الحته الشمال حركى تفكيرك متحبش الكلمه ولا الحب لمجرد انك عاوزة تخلصى وسنك كامم ولازم تتجوزى ده اللى بيخرب الدنيا كل حاجه نصيب متتنزليش عن شخصيتك علشان ضل الحيطه معلش بقى يا عبدو اصلك فى الزمن ده ضل حيطه يا خويا ههههههههههههه
متخافيش لو واحد شدك ولا قرب منك فى الشارع بقوتك واديله على قفاه وامسحيه بيه الارض علشان يبقى عبره
وانت يا عبدو انت مش سيد الموقف انت من غيرنا مش هينفع تعيش احتوى ليلى يا عبدو علشان تعيشوا حياه صح
وبلاش نفشه الرومى اللى على الفاضى دى
ربنا كرمنى زى زيك ولا مصطفى امين ولا العقاد ولا ام الخلول ربنا اللى فوق الكل
بس خلاص وانا مش ليلى وعمرى ما هكون ليلى انا برعى المفش واستنوا شعار الحمله هههههههههههههه

كان معكم ابى هانم بتنجانى الشهير ببرعى المفش


حكمه الامبراطورة برعى
أسمعيني يا أستيته كبيرنا فلفل وصغيرنا شطيطه

متحرره ...حر..حرانه

تحديث:- عااااااااا قررت انا ابى هانم قفل المناقشه على هذا البوست الجملى حيث اننى خاااارت قواى ومبقتش قادره ارد تانى اللى يعلق براحته بس يقرى ردودى لان اكيد الكلام هيبقى مكرر وانا صوابعى اشتكتنى فى محكمه الضوافر ومبقتش قادره عليها عاااااااااااااااا


اصباح الخير على الحلوين بس الفياكين والفيكونات انا كده بقالى كام يوم ربنا موقعنى فى ناس فله فله بجد وكل شويه حد يقولى لا يا ابى يا اختى دى البنت دى متحررة اقوم انا اتنح واقول متحرره يعنى ايه دى وحوجبينى تقلب زى شنبات الاسد وشعرى يدخله فولت الفين وات وتخيلوا بقى منظرى ليه لانى بحس ان الناس بتقول الكلمه دى على انها شتيمه وانا على قد فهمى نظمى رمزى اللى فى دماغى عارفه ان الكلمه دى كويسهومحترمه وبنت ناس كبار اوى والتحرر هو الخلاص من قيود وعادات متخلفه فى المجتمع انما الناس حولوا الكلمه بقدره قادر لحاجه وحشه وطبعا دى اشهد بيها للمصرين انهم الشعب الوحيد اللى بيحول كل حاجه من معناها الجميل لمعنى يخليك تمشى بقفاك وتلبس زعبوط وتمشى بفرده بووت والفرده التانيه تحت ايديك يعنى لو بنت حطت صوره رومانسيه او صورة كتبت اسمها عليها يقولك دى متحرره اوى وده دليل على التحرر يا جدعان ولا ايه مش عارف الله هى دى صورتى يا ناس وبعدين صورة حلوة ما احنا ليل ونهار بنشوف افلام وكليبات ومولتى وبوبى اللهى كلب يعضها والست نانسى اكرم وبلاوى زرقه اشمعنى جت على دى هسألكوا كام سؤال بجد علشان نحط حد للمهزله والتخلف ده وجابوا وممنوع تعريف التحرر بالتعريفات الاتيه

التحرر هو الواحد الحرانه طول الوقت

التحرر هو الواحدة اللى مش محتله
يعنى مش عاوزة هزار نتكلم بجد بس مش قوى


يالا الاسئله وبرضه كله يجاوب البنات والاولاد لان فيه بنات هقولكم ومش تقولوا لهم مش فاهمين معنى التحرر ودماغتهم مزنوقه برضه فى كعب فنجان قهوة

السؤال الاول ربنا يستر
=========

ايه هو معنى التحرر؟

التانى اه يا خوفى يا بدران
=============
هل التحرر حاجه كويسه ولا وحشه من وجهه نظرك وتعريفك له ؟

التالت ضغط على الزرار واللمبه هتولع ههههه
=====================
هل التحرر له علاقه باللبس والتصرفات ولا له علاقه بالرغبات اللى جوه الانسان؟


الرابع وهنا هيبدأ تحديف الجماهير بالفته
===================

هل التحرر يتعارض مع الدين الاسلامى او الدين والتدين عموما؟

الخامس عشانا عليك يا رب
==============

الجواز من واحده متحرره او واحد متحرر كويس ولا وحش وايه سبب رفض الجواز منه او منها ؟

يالا حلوا بقى الاستمحان وربنا يكتر فى الاصفار اللى هديها لكوا ان شاء الله تحذير يا فيايكين محدش يفتح الكتب ويجيب ليه المعنى الا النبى اذنبكم على الباب وكل اللى رايح واللى جاى يديكم قفا انا عاوزة اللى جواكم واللى انتم فاهمينهم ومحدش يتكسف يقول الحقيقه علشان لو هو فاهم غلط الكل يصلح له وكل يرد على بعضه هنا عاوزين مناقشات وكلام مع بعض علشان نصلح مفاهيم ومعايير(حلوه معايير دى فى الزمخشرك يعنى الجردل اللى بنحط فيه الميه هههههههههههههه) غلط فى حياتنا

ملحوسه :- انا مش عاوزه التعريف والنبى انا عارفاه انا عاوزة وجهه نظركم ومحدش يقولى ده نسبى ومش نسبى انا عاوزاه بعيونكم انتم مطققونيش بقى بدل ما اسيب الخرفان عليكوا ...زومحدش يربط البوست بيه مش كل حاجه بكتبها تبقى عنى الله يخليكوا انا اللى بيجى ناحيتى ملوش عندى غير خروف وقلتين يعنى مش بسكت فى الحقيقه هههههههههههههه
كان معكم معلم اول ناظر مدرسه اخلاق بنت ام حميده ابى هانم بتنجانى


حكمه الامبراطورة

افتكر لك إيه يا بصلة وكل عضة بدمعة

حنه وفرحه لاحلى كامى فوندامى

تحديث:- لوووووووووولي كامي زفتها كانت الساعه تسعه الخميس النهارده فى المانيا ادعوا لها ربنا يبارك لها وعليها ويجمعهم على الخير ويرزقهم الذريه الصالحه يا رب ويكفيهم شر كل حسود
وعقبال كل البلوجريه واخواتهم وجيرانهم يا رب وسمعونى زغروطه حلوه لووووووووووووولي
دى هديتى ليكى يا احلى كامى

كامى كما تخيلتها ده الفستان ده جيباه انا من عمر افندى دافعه فيه دم قلبى هههههههههههههههههههه

كان يا ما كان
كان فيه بنوته كميله ورقيقه وقلبها طيب
وفجأه دخلت حياتى بدون استأذان
وحبتها اوى اوى اوى
وبعدت عنها بس قلبى فضل متعلق بيها اكتر واكتر
لغايه ما رجعت ليه تانى ومعايا
اسمها زهره الكاميليا
بس من رقتها انا سمتها كامى فوندامى واللى ميعرفش الفوندام هو حلويات جميله كلها من السكر وبتدوب بسرعه وعلشان هى بدوب فى القلوب بسرعه وبتتملكها سمتها كده
الليله الاربعاء حنه احلى فوندامى فى الدنيا وبكره فرحها
هى اه مسافر بس احنا قررنا نقلب بلوج سبوت واخواته ونعمل لها احلى ليله حنه وفرح فى الدنيا
كامى يمكن انا علمتك حاجات عمليه قوتك فى حياتك بس انتى علمتينى انى احب بقلبى وعقلى وعنيه
وانى اشيل اللى بحبهم فى عنيه

ربنا يتمم لكى على خير يا قلبى ويسعدك واشوف كامى فوندامى صغيره بتلعب حوالينا
اممم انا اخترت لكى كام فستان على تورته على الهديه الكبيرة جبت لكى رقاصه مش ممكن نعدى اليوم كده يعنى
على فكره الرقاصه هترقص غير للستات بس الفايكين الرجالى تغمض عنيها ههههههههههههههه
ومش هلاقى احسن من الاخت دينا ههههههههه ترقص لكى يا قمر

الف مبروك من قلبى يا كامى وربنا يسعد قلبك وايامك كلها يا رب ويبارك لكى فى احمد ويبعد عنكم شر العيون الوحشه يا رب






طبعا وبما انى ديكتاتورة وبحب الفراشات فقولت اجيب لها تورته عليها فراشات وكمان علشان هى رقيقه زيها




بصى بقى هنا قولت لازم اسيب لكى حريته الاختيار فى الكوشه بس انا برجح اللى فيها فراشات ههههههههههههههه



وطبعا لازم الزفه تبقى بالاخت المبجله دينا والسهره صباحى فى الكوكب والرجاله تقوم تنام مش عاوزين صداع ههههههههههههههههههههههه

بجد انا فرحانه ليكى اوى ومش عارفه اكتب حاجه غير انك فعلا برنسيسه يا كامى بجد
بقول ايه كله يسمع الاغاني عقاب ليكوا والسهر صباحي فى البلوج هنا واياك محدش يجي ايووون هو كده
عقبال كل الناس يارب جميعا اللى مش اتجوز واللى اتجوز ميتجوز تانى لووووووووووووووووووولى

حد يترجم بسررررعه


الخبر ده من مصراوى عن انباء الشرق الاوسط بس والله لو حد جاله الضغط او السكر او حتى شلل او امراض العصر والمغرب يروح يرفع عليهم قضيه لانه يبقى اضرار بالصحه العامه للمواطنين وكما قال المثل خدوا فالكوا من عيالكوا وخاصه ابناء الحزن البار قال احنا اضرينا نفسيا ومعنويا ووقعدنا نعيط من الهم
انا هحاول اترجم الكلام بتاعه على قد ما ااقدر واللى يفهم حاجه ينوبه ثواب يفهمنا كلامى هيبقى بين قوسين وان شاء الله اترجم صح ادعولى بقى الى الجهاد

نبذل أقصى الجهد لرعاية الأسر الأقل دخلا وسكان العشوائيات




- أكد الرئيس حسنى مبارك زعيم الحزب الوطنى الديمقراطى أن للحزب رؤية شاملة لرفع مستوى معيشة المواطنين ( مواطنين العزب ولا مواطنين المنتجعات السياحيه ) ويسعى لتقديم حزم متنوعة ( كده بيعمل لصحتنا هيقدموا لينا حزم فجل وجرجير وبصل ولا بلاش بصل ريحته وحشه وحزام مفخخ يخلصنا من الهم اللى احنا فيه )

لبرامج تحقق التوزيع العادل لثمار النمو الاقتصادى والتنمية بين المواطنين والمحافظات المختلفة ( ايوه شوفتوا هيوزعوا خضار عليكوا هيصوا بقى ومخضروات ) .

وقال الرئيس مبارك إننا نبذل أقصى الجهد للوقوف الى جانب الأسر الأقل دخلا والقرى الأولى بالرعاية وسكان العشوائيات

( يعنى ان شاء الله هيحولها لمقابر جماعيه وهيحولها لجونينه حيوانات علشان يقف وييغنى على الاطلال ههههههههههخخخخخخخخخ) .

وأعرب

(يا ماشاء الله ما شاء الله ده بيعرب اهو امال بتقولوا ليه مش بيعرف يتكلم عربى ده بيعرب ويصرف كمان)

الرئيس مبارك فى رسالة وجهها لأعضاء الحزب الوطنى

( هههههههههخخخخخخخ هو فاكر ان الشعب كله بقى حزن وتنى ولا ايه اوبااااااا انا فهمت غلط نؤسف بقى يبقى الرساله للحزن مش لينا )

بمناسبة انعقاد المؤتمرات السنوية لوحداته الحزبية ، ( ايوه ما هو مفيش غير الحزن هو اللى فى البلد وباقى الاحزان رابطه راسها وقاعده تولول على بختها والتورته اللى ضاعت منها )

عن تطلعه لإجراء مناقشات جادة خلال المؤتمر السنوى القادم للحزب

( طيب خلاص خلاص يعنى هما كل سنه بيهزروا والسنه دى جد طيب يا جماعه ادوهم فرصه بقى )

مطلع نوفمبر وطرح مقترحات خلاقة تدعم سياسات الحزب وتحركه فى هذا الاتجاه

( اتجاهه صلاح سالم ولاالمرج علشان نفهم بس بدل ما المترو يدخل فى بعضه).

ووجه الرئيس مبارك تحياته لأعضاء المؤتمرات السنوية للوحدات الحزبية فى حوالى 6600 وحدة حزبية على مستوى الجمهورية الذين يعقدون مؤتمراتهم السنوية حاليا .

وأعرب عن تقديره لجهودهم خلال الشهرين الماضيين استعدادا لهذه المؤتمرات وتحضيرا للمؤتمر السنوى الخامس للحزب فى نوفمبر

( الناس دى بتتعب اوى يقعدوا يلموا كوبيات واطباق وجاتوهات ومفارش ويتنقعوا فى الجاز ربنا يولع فيهم طول الشهرين علشان يبقى ريحتهم حلوة يوم البتاع ده).

وقال الرئيس مبارك فى رسالته إنه يتابع عن قرب الاجتماعات التحضيرية للوحدات الحزبية وما تتناوله مختلف لجانها من موضوعات تتصل بقضايا الوطن والمواطنين

( بسم الله الرحمن الرحيم وطن مين ده اللى بيتكلم عنه حد شافه ومواطنين يا فياكين اللى شاف اللى هو بيتكلم عنه ده يطلعه علشان عيب ).

ودعا أعضاء الوحدات الحزبية الى مواصلة التحرك النشط فى نطاق وحداتهم الحزبية كى يعطوا القدوة والمثل فى الألتحام بأبناء الشعب

(ايوه من ناحيه بيلتحموا فالداخليه قايمه بالواجب وزياده وكل يوم والتانى ضرب على القفا واعتقالات وايه والله الناس منغنغينا على الاخر ولا تحمل هم انت بس اطمن )

والتواصل معهم وكى يتعزز احساس القواعد الجماهيرية

( هههخخخخخخخخخ كل واحد يعزز قعدته بقى واللى معندوش قاعده يروح لدكتور تجميل يعمله قاعده عيييب امنعواالضحك)

بدور الحزب وأنشطته على اتساع أرض مصر ومحافظاتها .

وقال الرئيس مبارك -إنه سيتم خلال أعمال المؤتمر السنوى الخامس للحزب مناقشة سياسات الحزب وبرامجه لتوسيع قاعدة الرعاية الصحية والارتقاء بجودتها بما فى ذلك سبل تطوير نظام التأمين الصحى الشامل"

(اه انا شاهده على ده بامارة الاطفال اللى فى ابو الريش بيتعالجوا فى كلودور المستشفيات ومفيش سراير وهما بيجملوا فى السرطان علشان الهانم هى اللى متكفله بيها وتحت رعايتها علشان الواجهه للعالم ويدوهوا جايز الراجل اللى بيعور نفسه ده ايزنهور )

مشيرا إلى أن الهدف هو تحسين الخدمات الصحية المقدمة للمواطن وحصوله على الرعاية الصحية المتكاملة سواء فى المستشفيات أو فى الوحدات الصحية بالمراكز والقرى

( بزمتك ولا بزمتكوا انتم حد من اللى عايش فى القرى ولا حتى البلاد التانيه فى المحافظات شاف اى حاجه من دى طيب والنبى اللى عنده مستشفى عام يصورها ولا وحده صحيه ويجبها لزقها على باب الحزب خليهم يشوفوا الخيبه اللى احنا فيها ) .

وأوضح الرئيس مبارك أنه سيتم , خلال المؤتمر , تناول قضية التعليم وما حققناه حتى الآن لتنفيذ رؤية الحزب لإصلاح وتطوير العملية التعليمية ورفع قدرات المعلم والتوسع فى المدارس وخفض عدد التلاميذ فى الفصول ومواءمة منظومة التعليم ومخرجاتها مع احتياجات سوق العمل

( اهو بقى دى مقدرش اتكلم فيها قضيه التعليم انهى تعليم ده اللى بيتكلم عنه دا العيال دماغتها ماشيه بالعكس ولا بقت فاهمه حاجه وبقوا متنحين المدارس الخاصه فاتحه للرحلات والحكومه بتضرب العيال وتعلمهم قله الادب والوقاحه والضرب) .

وأشار إلى أنه يتم حاليا إدارة نقاش حول موضوعات الزراعة والأمن الغذائى لبلورة استراتيجية

( بلورة دى يعنى ايه بقى زى الوظه كده ايوه هما بيألوظوا العمه علشان نلبسها طيب الزراعه بقى مبيلموش القش ليه اللى كابس ريحته على قلوبنا وجابت لنا حساسيه وربو وقرف فى البلاد الفلاحين ويعملوا مصنع واعاده تصنيع ليه ربنا ينتقم منهم)

للتنمية الزراعية حتى عام 2020 (لاااااااااااااااااااا هو ناوى يقعد لكل ده عااااااااااااا اللهم لا اعتراض لا يا رب لا وحياه حبيبك النبى ده كده هيدخل على احفادى )

تقوم على التكامل بين سياسات الانتاج والتصنيع الزراعى وتزيد من دخل الفلاح وتأخذ فى اعتبارها احتياجات مواطنينا من السلع الغذائية وتدفع صادراتنا الزراعية إلى الأمام .

وأضاف: سنتابع خلال أعمال المؤتمر السنوى جهودنا المتواصلة لتلبية حق كل مواطن فى مسكن مناسب يضمن له حياة كريمة

( اه دى صدق النبى عامل شقق 54 متر فى التجمع مقولش لكم عليها بصرف النظر انها اتوزعت دكاكينى بس ايه الواحد يتمطع ايده تسلم علىالجيران ههههههههههههه وده من مطلق مثل على قد لحافك مد رجليك مش لما يبقى عندنا لحاف اصلا)

ويحقق له طموحاته الاقتصادية والاجتماعية .. وسيتم متابعة الجهود المبنية على رؤية متكاملة لخدمات الاسكان والمرافق والتنمية العمرانية هدفها تطوير هذه الخدمات وتوسيع قاعدة المستفيدين منها ومواصلة ما حققناه حتى الآن فى مجال تخطيط القرى والمدن المصرية ومشروعات مياه الشرب والصرف الصحى والطرق والتعامل مع العشوائيات القائمة والحد من ظهور عشوائيات جديدة


هذا وبالله التوفيق فى حرق البلد وجعل المواطن ماشى بقفاه

طيب اللى يعرف يترجم الخطاب ده يبعت ليه على زيرو تسعمايه زيرو تلات فرخات

كده كفايه عليا حرقه دم والجاى انيل بس ادعوا انتم بس

كان معكم آبى هانم الهندى

حكمه الامبراطورة ودى منى للحزن برضه

اعرج يسحب مكسح يقول له تعال نتفسح


مش طلعنا برائه من تشويه سمعه مصر



بما انى كنت منكده عليكم قولت والله اضحكم شويه يعنى اكسب فيكم ثواب وبما انى اكتشفت ان الناس فعلا يا حرام بيزعلوا علشانى وبقلب عندهم المواجع زى البطاطا على النار
يبقى واجب وتنى كومى انكم تضحكوا على الصبح معايا
خدوا بقى واقعدوا فى الكوكب والعبوا مع الخرفان واقروا الحاجات دى
النطحه الاول

الحزن الوتنى التيروكراتى بقى عنده ثقافه الاسلحه البيضاء وان شاء الله بكره يتطور ويتهور ويتعور ويبقى عنده برضه الاسلحه الحمرا هههههههههه
الاعضاء الغير محترمين فى الاسماعيليه فى امانه الشباب بيضربوا بعض وجايبين بلطجيه بس سؤال هو يا ترى الخناقه كانت على تقسيم انهى تورته المرة دى هناك
انا هقولكم معلومه والله شوفتها بعينى
الحزن ده بشوف فيه اعضاء مش عارفه هما ازاى بيبقوا حزن وطنى يعنى المفروض انه على حسب تفكيرهم هما وحسابتهم مش احنا ان دول واجهه لمصر يعنى لازم تبقى متأيفه ونظيفه وناس مستحميه ومنشيه كده ( اللى هما بيشربوا نشا كل يوم الصبح وينزلوا من بيوتهم مكشرين دول)
انما اللى بشوفه والاعضاء الغير بشريه اللى فى الحزن حاجه فعلا تحزن
والحزن بما انه عامل زى الست العداده اللى بتقعد تصوت فى المياتم دى
بيقبل اى حد اهو بيسترزق والتانين بياخدوه ستار علشان يمشى يقول انا شايل كارنيه الحزن وتتفتح فى وشه سبع غرز ههههههه قصدى الابواب
فطبعا بيدخل الحزب عديمى الثقافه والبلطجيه والجهله
بس احقاقا للحق والاحقيه
فيه ناس زى القمر احم احم لا مقصدش يعنى كويسين وولاد ناس بس يا عينى بيزهقوا ويسبوه بدرى بدرى يمكن علشان ولاد ناس
طبعا بكده احنا يا سحالى ويا تماسيح طلعنا برائه من اننا اللى بسوء سمعه مصر مبروك عليكم البرائه والله ويشربوا هما بقى بما انهم بيقولوا علينا قله مندسه وبنجيب فى سيرتنا امنا طيب بزمتكوا فيه حد بيجيب فى سيره امه بحاجه وحشه منهم لله والله

بالمناسبه فيه ولد ظريف خفيف لطيف امور كده مبيعرفش يكتب عربى عامل مدونه اسمها ابن الحزب الوطنى البار
وانا والله سالته هو مش البار ده اللى بيقدموا فيه مشروبات بنت روحيه دى وحاجات اصفرة مردش قولت يمكن مش عارف
اللينك بتاعه اهو انطح
الهى النطحه تيجى فى دماغه بس امانه عليكوا الواد توتى خالص براحه عليه بس انتم حاولوا ترجعوه لدينه ويندم على ما فعل فقط لا غير ههههههههههههههههه


النطحه التانيه بقى

اللهم لا اعتراض وتحيا الوحده الوطنيه وتعيش جمهوريه مصر العربيه حره مستقله ومعنديش مشاكل
بس واحد سعودى دخل فى موكب القنطه الكدابه نظيف بيه
قوووووم ايه اخدوه على جنب وقالوا ليه يا قطه تعملى كده قالوهم اصلى كنت مستعجل ورايح الجامعه فى 6 اكتوبر
قوووووم ايه هوباااااا قالوا له باى باى ومشى
ده حلو اوى السؤال هنا بقى لو واحد مصرى يعنى طالع روح خالته وعمه وعيلته ووراه استمحان اخر سنه وعمل الليله السوده دى هيعملوا فيه ايه والله مش بعيد يجلدوه فى مكان الحادث ويلفقوا له انه فجر البرجين فى احداث سبتمبر وانه كان رايح شارب فخفخينا ومختل عقليا وكان عاوز يسرق العلامه اللى على العربيه بتاعت المعلم
الا هى نوعها ايه صحيح ههههههههههههه
بجد بقت حاجه تجيب شلل رباعى زى الدفع الرباعى كده
طبعا مش عاوزه اقولكم اساسا العرب دول بيسوقوا ازاى فى مصر وفى اكتوبر اللعينه خصوصا اليوم اللى رحت مع خوخه هناك قضيته معاها كنت حسه انى مش فى مصر خالص حسيت احتلال عربى على مصر وكلهم معجبين بنفسوياتهم اوى فى السواقه زباله زباله زباله
واللبس اللى لابس بترتروبربرق بربرق كده والبنتكورات خلوا بالكوا انا بتكلم عن الولاد البنات مش هقول علشان عيب هههههههه
واللى لابس العبايه رمز لبلده واللى من عمان واللى من الاردن واللى من مش عارفه فين وتلاقيهم بيتعاملوا كانهم هما اصحاب البلد
انا مش بحبهم بجد ايوووووون انا بكرهه النفسيات المنفسنه دى فيهم الكويس بس القليل اوى والاغلبيه عندهم برانويا وتحسه ماشى نافش نفسه كانه بالونه واتنفخت فجأه
بس نفسى اسال الاستاذ صاحب الكدب المنعكش نظيف بيه باشا كعب الغزال لو اللى عمل ده مصرى كنت رحمته يا جدو ولا مصيره المزبله زى الباقى

هذا ونقلنا لكم اكتر الاخبار اللى ضحكتنى النهارده بعد موود النكد اللى كنت فيها وعظيمه يا مصر يا ارض اللواء

كان معكم محدثكم من قلب الاحداث لواء اركان حرب مساعد اول نجار مسلح ابى هانم

حكمه الامبراطورة منى للحزن

ربك يسلط أبدان على أبدان حتى القمل على السيبان

انسانه بلا وطن


دخلت بلا استأذن الى عالم ليس له حدود لم تعرف نهايته ولا بدايته

رات فيه كل شئ جميل وقبيح

رات من يحب بصدق ومن يمسك بالماوس ليلقى بكلمات غزل هنا وهنا

ومن كتب النصيحه ومن طلب النصيحه

رات الكذاب والصادق

احست بالالم من اجل الاخرين

احست بالخوف يوما على صديقها

احست بالحنين لحبيبها

اكتسبت جرأه زياده على جرئتها

اوقعتها فى مشاكل بعض الاحيان ومواجهات كانت تأتي بنتيجه ايجابيه

واخري سلبيه عليها وعلى الاخرين

رات الان فى بعض الاوقات الاختلاف يفسد الاحترام بين الناس وبينهم وبين انفسهم

واوقات اخري تكتسب من الاختلاف احترام الاخرين وتزويد معلوماتها وتصحيحها

لم تخجل يوما ان تقول لا اعلم ولا اعرف الكثير

لم تخجل من برائتها فى رايها وقلبها

هى بنت عاديه ومصريه اووي

تقوقعت مره اخري

لتغمض عيناها لكي لا تري الجراح التى تنذف امامها

لم تسمح للدموع بالخروج من عيناها خوفا من الالم التى ستعانيه

جرت الى فراشها وحضنت قلبها وطبطبت بحنيه على نفسها

وقالت

يوما ستشرق الشمس على وطني يوما ساجد من احب

يمسك بيدي وياخدها لبر الامان

سمعت صوته يهمس لها

انا هنا من اجلك رغم وجود ما يشوب هذا الحب من الم

لم تصدق نفسها عندما رات تلميحاته لاخريات

فهناك منهم لم يعرف ما يدور بينهما

فالتمست له ولهم العذر

تقوقعت بداخل نفسها وانكمشت

كما تنكمش الطفله من والدها عندما برتفع صوته امامها

غاصت فى النوم بالرغم من الامها

افاقت على صوت

سيخرج العصفور من القفص

ستجدين يوما الوطن

انه بداخلك وفى عيونك التى دائما تداريها بالنظاره التى ترتديها

ستجدين وطن فى قلوب من حولك ومن يحبون هذا الوطن

ولكن سسيبقى السؤال

هل يوجد وطن ام انه وهم تعيشيه؟

هل ستجدي الحبيب ام انك تناشدين سراب

ولكنها قررت ان تخرج من القوقعه


كان معكم ابى هانم وهي تبحث عن وطن


ملحوسه:- انا من تبحث عن وطن انا من افقت يوما على تلوث وكرهه وحب وجمال وقبح وحنيه وقسوه
المقصود فى الكلام كله الوطن بس انا حساه انه الحبيب والوطن والحياه كلها



كدب منعكش



زمان مَاما كانت تقول ليه اللى بيكدب بيروح النار وكانت قربتنى من ولاعه علشان تعرفنى النار دى مؤلمه قد ايه دلوقتى بقى ومع التطور الطبيعى للحياه الغلط اللى عايشنها اللى بيكدب بيستعطف قلوب الناس واللى بيكدب بيقى طيب ومحبوب واللى بيكدب بيروح مارينا كمان
بصوا بقى انا يمكن اوفر شويه فى الموضوع ده انا مبعرفش اكدب ومبعرفش اتعامل مع حد بيكدب حتى لو مكدبش عليا انا شخصيا يعنى لو راح اشتغل حد غيرى هتقولوا ليه عادى طالما مش بيكدب عليكى هقولكم لا طبعا لان المبدأ واحد اللى يكدب على حد من السهل انه يكدب عليا والكدب بيضر سواء ماديا او معنويا
لا وايه طلع مبررات للكدب هايله واحد بيكدب علشان يستدر عطف الناس باى مصيبه باى اشتغاله دى قطتى وقعت من الدور الرابع دا انا نزلت لقيت البواب مش راضى يقوم يقف انا اتكعبلت فى حرف السجاده صوباعى الصغير طلعه له توأم
اى كلام علشان تحس انه مقهور ومظلوم تقوم تهتم به
هو يا عالم الاهتمام بالشخص مينفعش اللى فى المصايب والله انا فى حياتى ناس حياتهم عاديه جدا جدا ومهتمه بيهم اوى وبحبهم كمان يعنى اللى بيعمل كده عمره ما هايلفت انتباهى واحد تانى تلاقيه واحده ادته شبشبين على قفاه يقوم يقعد يقولك دى بتتلزق فيه وبتتصل وهتموت عليا وبترن ليه خماشر الف مره فى الدقيقه انا طبعا بقلب زى الضفدعه اللى عنيها طالعه لبره من كلامه
طيب يا حج ازاى يعنى والبنت واضح انك مش فى دماغها لا وايه يفسر اى تصرف بعيد عنه انها تقصده هو
طيب ده تسموه ايه بجد
ولا النوع اللى يغيظ اكتر متسالهوش فى حاجه خالص ويجى يقولك دا انا بعمل وبعمل وبقدر وبشتغل تقول الله ايه الناس اللى زى الفل دى واول استشاره هبله هايفه فى المجال اللى بيقول عليه تلاقيه وقع زى الجردل واحتاس وبقى شبه الفأر اللى طالع من حله خضار سخنه والمشكله انه من جهله يتنرفز عليك طيب ده برضه اسمه ايه هى الناس دى مش حسه ان كدبها منعكش ومش متساوى واى حد يقدر يكشفه بسهوله وان الحكايات لازم يبقى فيها لخبطه مهما ان كان عامل سيناريو جامد برضه لازم ديفوهات
الانيل بقى واحد تروح تساله على واحده يقولك دى دى وحشه وبتخرج وتدخل على اعتبار ان دلوقتى الدخول والخروج عيب وبتلبس جينز وبادى وبينتقد طيب يا حج والنبى مش دى برضه اللى انت بتمشى انت وغيرك وراها فى الشارع وتبقى هتموت علشان بس توافق تغسل لها الاطباق اللى فى المطبخ او تشيل لها الشنطه بقت وحشه ويع دلوقتى وفى مصلحتك تبقى حلوة وكميله وست البنات ويبقى عندك استعداد تمسك لها الشوز بتاعها
طيب اعمل ايه طيب فى الناس دى تقولوا ليه عادى هتلاقيه فيه حاجات حلوة
لا انا معرفش بقى الا الكدب ده انا مش بحبه ولا من ستات تدعى اى كلام ولا رجاله ومقدرش اتعامل معاهم حتى لو فيه مميزات الدنيا والاخره لا برضه مش هتعامل انا حتى ببقى خيبه لما بحاول اكدب وبعد ما بقول كلمتين على بعض اقوم قايله للى قدامى انا بكدب صح يقعدوا يضحكوا عليا انا ممكن اسكت او اقول وانا مالى وساعات لسانى بيفلت واقول الحقيقه ايوووووووووون انا لسانى فالت منى وبعترف اى حد بيكدب على حد وانا عارفه الحقيقه مش بسكت بقول على طول فانا بحذر اهو محدش يدخل يسالنى فى حاجه انا بكرهه اللى بيكدبوا وبكره الحكومه علشان هى كمان كدبها منعكش فى كل حاجه ومش راكب مع بعضياته خالص بجد انا مش عارفه اتاقلم يمكن العيب منى معرفش بس اكيد فى ناس كتير زى صح انا لو كدبت بضايق وبتنرفز جدا وبيبان عليا كمان وممكن اقعد اعيط والانيل ان الناس التانيه مش بتنسى الكدب اللى قالته بتفضل فاكره هى قالت ايه انا زهقت
حد زهق ولا انتم عادى طيب قولوا العيب فى مين بعد اللك ده كله


ومن امام مارينا نقلنا لكم حالتى بعد العيد اللى اتسرق من مصر خلاص ابى هانم كعب الغزال

حكمه الامبراطورة
بعد ما كان بيحجل زى الغراب لبس جزمة و شراب