آه لما بتوع مجلس الشوعب المرجانيه يدلعوا الحيتان



ادلع يا رشيدى على وش الميه هههههههههههه هههههههههههههههه بجد هموت من الضحك ده خبر خدته من عند المصرى اليوم استنوا بقى علشان تموتوا م الضحك بس هقولكم لييه انا بضحك الاول علشان انا زمان قوى قولت لناس اصحابى فاضل حاجتين فى مصر معملوش مظاهرات بتنجان ولا اعتصامات فى غيط ذرة مشوى ولا اشجبوا ولا انتحروا ولا حاجه من اللى بيحصل ده هما مين ايوووووووون الظباط والقوات المسلحه وجه اليوم بقى شوفوا الخبر بس والله مش هعرف امسك لسانى اللى هربان من حكم بالاعدام ده وكمان النحله والدبور وزنهم اعذرونى بقى

قررت لجنة الدفاع والأمن القومي في اجتماعها أمس، (الا مين الست لجنه اللى بيتكلمواعنها وهى معموله للشرطه بس والموظفين لا طيب هى نازله مواصفات خليجى يعنى ولا مصرى ) إرسال طلب الإحاطة الذي تقدم به نائب الوطني جمال الزيني،(هو مش طلب الاحاطه ده اللى بيتحزموا بيه ولا انا بقول غلط هااااا يا سوووو ) حول تدني رواتب ضباط الشرطة وباقي العاملين في الجهاز (ايوة جهاز الارسال والاستهبال )إلي لجنة الخطة والموازنة لبحث زيادة رواتب الشرطة بنسبة ما حد يدينى قله بسرعه اخلص عليهم

وقال أمين راضي، وكيل اللجنة، إنه يعرف أن كثيرًا من رجال الشرطة لايجدون ما ينفقونه علي أبنائهم، علي الرغم من أنهم يحمون أصحاب المليارات، (حطوا ايدهم على الوجع اهو اعترفوا اقفش بقى فى دى يقصدوا ايه ها يا سامبا) وأوضح أنه ستتم إحالة طلب الإحاطة الذي قدمه الزيني إلي لجنة الخطة والموازنة مصحوبًا بتوقيع ١٠ من النواب

وحذر النائب محمد عبدالفتاح عمر، الوكيل الثاني للجنة، من أن هذا جرس إنذار (حد يفتح الباب يا جدعان )لكي لا يجد ضباط الشرطة أنفسهم في موقف لا يحسدون عليه، (يعلقوا خرزة زرقاء هتبعد عنهم العين) وشاركه الرأي أمين راضي بقوله: «نحن نحذر من تدني رواتب الشرطة، الذي قد يؤدي إلي إضراب رجال الشرطة (ههههههههه هما لسه فيهم اللى مضربش.... اه صح علشان مظلمش حد فيه بجد احممممم احممم) وإن لم يتحقق اليوم فقد يتحقق بعد بضع سنوات انا قولت تعيش المسقعه حرة مستقله ».

وشكر اللواء أحمد ضياء الدين، مساعد وزير الداخلية للشؤون النيابية والقانونية النواب علي مخاوفهم ومطالباتهم، (اتنين ليمون هنا علشان شايفه د/أجدع بنوته هتضرب دماغها فى الحيطه بسبب تدنى المرتبات بتاعتهم) مشددًا علي أنه لا يمكن أن يحدث إضراب في وزارة الداخلية وقال: غير وارد إطلاقا أن يقدم رجل الأمن علي القيام بإضراب أو اعتصام. وأضاف ضاحكًا للنائب محمد عبدالفتاح عمر: « ليست لدينا أجراس في وزارة الداخلية حتي ندقها».

ايوة هما عاملينها فيبريشن ههههههههه وقال ضياء الدين: راتب لواء الشرطة في الجدول العام للرواتب «٤٨٦ جنيها» أساسيًا والعلاوات «٣٧٦» جنيهًا والحوافز «١٤٨٦» جنيهًا أي بالإجمالي «٢٣٣٠» جنيهًا، مشيراً إلي تمتع ضباط الشرطة بخدمات أخري اجتماعية وصحية وسكنية تدخل في إطار الدخل الخاص بهم، (فعلا الملازم اول بيأخد تقريبا الف جنيه وموظف الحكومه اقل من كده) وعلق رجب هلال حميدة علي كلام ضياالدين(يا نهارعلى النفاق حد يجيب حبل اكعبله زى االقطه وندبحه ونخلص منه هو دلوقتى بتوع مجلش الشوعب المرجانيه بيدلعوا الشرطه على حساب الناس ) بتأكيده أن راتب اللواء لا يكفي لشراء «٣٠ كيلو لحمة (تصدق عيب فعلا 30 كيلو لحمه طيب والله الموظفين لهم لحمه الصومال قصدى الجنه»،

وقال من غير المقبول أن يكون راتب اللواء بهذه الدرجة من التدني (واطى واطى يعنى ايه مقصدش بتاع مجلس الشعب بقصد البتاع التانى المرتب ايه الناس اللى بتفهم غلط دى )في حين أن أي معين حديثًا بقطاع البترول أو الجمارك يحصل علي ثلاثة آلاف جنيه، وطالب بصرف بدل «ضبط نفس» لرجال الشرطة ليتحكموا في أعصابهم أثناء تعاملهم مع الجماهير(ههههههههههههههه لا مش قادرة ضبط نفس ازاى يعنى هو الواحد لما يمسك اعصابه يدولوا بدل ضبط نفس طيب عندى اقتراح يركبوا لهم منظم يدخل النرفزة بهدوء وبجرعات او يجيبوا لكل ظابط عسكرى يمسك له نفسه وكمان يدوهم بدل ضرب فى الناس يعنى اللى يعدى يوم وميضربش حقن ..قصدى اشخاص يدوله فلوس وبدل استهبال وبدل استعباط )
طيب حلو قوى الكلام ده وفعلا المرتبات متدنيه فى مصر وكلنا بنقول كده بس انا فيه حاجتين مش فاهمهم وركزوا بقى ليه يعنى ميكونش فيه زياده فى المرتبات سنويه مش 10% على الاساسى الهبله اللى بيحطوها كل سنه لا تكون اكتر او يعملوا زى الامارات ويرفعوا المرتبات مرة واحد فى القطاع الخاص والعام وبكده هيقضوا على موضوع الاحتجاجات والمظاهرات والاعتصامات والمسخرة دى اللى بتحصل وفعلا زى ما قولت الشرطه والقوات المسلحه هما اللى فاضلين ودول طبعا ميقدروش يعملوا الكلام ده .
تانى حاجه الساده الافاضل المحترمين المبجلين المستحميين بتوع مجلس الشوعب الهوائيه دول ليه مش بيطالبوا للشعب كله اشمعنى الشرطه بالذمه مش دى مسخرة اللى احنا فيها طيب يخلوا عندهم شويه من البتاع اللى لونه احمر ده ويطالبوا للناس كلها حد هيقولى ما هى الشرطه بشر زينا هقول اوكى بس انهى اقوى اطالب لفئه ولا لبقيه الفئات وابقى انا راجل عادل وحقانى كده ومحترم طيب يا ريت يعملوا قانون يعلوا بيه المرتبات بدل الفتات اللى بيرموها لنا وعلشان كمان الارتفاع الخزعبلى الهلامى اللى فى الاسعار ده وبكده هيقضوا على كرهه الناس ليهم وهيقضوا على جرائم كتير بقت فى المجتمع.
واخيرا فى ظل المهلبيه والرز باللبن اللى بيقوله بتوع الحزن الوطنى وانا من كوكبى هذا اعلن انى سأقوم بثورة خرفانيه جامده اخر حاجه وهقعد على حرف الكوكب وادلدل رجلى وادعى عليهم بتوع الحزن الوطنى متبعين سياسه الهشتكه والزغزغه بس بجد ربنا يكرمهم ضحكونى موت واللهى يوقع من كل واحد دبورة او يزوده نسر فى عينه بس علشان منعممش الوحشين القروده الدببه بس اللى بيعذبوا الناس وبيفتروا انما الناس المحترمه لا طبعا ربنا يكرمهم ويهديهم والتانين برضه ربنا يهديهم او يهدهم عادى اى حاجه

كان معكم سيادة حضرة الظابط ملازم اول نقيب امين شرطه متقاعد آبى هانم.

الاسلام والاتيكيت


يا هاياااااااااات عليكوا شوفتوا العنوان كلمتين ارق من بعض ازاى ....... مش انا يعنى اللى رقيقه انتم عارفين انا برمى بقلل ...اه الاتيكيت اللى احنا فيه دلوقتى وبنتبعه نابع من الاسلام .

واحنا طبعا بما أننا بقينا فى المهلبيه وملناش فى اتيكيت ونسينا قواعد الاسلام فبقى كله ملخبط فى بعضه عارفين ان الاجانب استمدوا(يا عليا لما اكون رايقه)الاتيكيت من الاسلام ..مش عاوزه حد يفتح عنيه وتطلع بره ودانه اقولكم ازاى هنطبق امثله على ناس بشوفها وانتم اكيد بتشوفوها وغير كده ممكن نكون بنعمل حاجات منها بس مش واخدين بالنا منها وسيبين بالنا فى البيت علشان ميأخدش برد نبتدى الدرس البنات لوحدها فى خميه فيكونيه والاولاد فى خيمه تانيه مش عاوزة استعباط الخرفان واقفه مصحصحه والقلل ايه لسه مستورادها من الصين طازة(اه يا مرارتى حتى القلل بقت من الصين يا عينى عليكى يا مصر):- قبل ما اجيب بطوط حبيبه قلبى وروحى وعقلى اللى ربنا يستر عليها من كتر الحسد بعيد عنكم كنت ساعات تطق فى دماغى واركب ميكروباص واقول بلاش تاكسى ويا نهار بقى اول مرة اركب كنت عاده يا بعربيه حد من اصحابى يا اركب تاكسى قعد جنبى واحد ريحه طالعه منه مش عاوزة اقولكم عرق فظيع وشيل اديك من على مناخيرك انت وهو اشمعنى انا شميت الريحه بجد كان هيغمى عليا بس تماسكت طيب يا جدعان هو مش فيه زجاجه كده اسمها ديودرنت (مزيل عرق) علشان محدش يفتح بقه وسنانه تقع ويفتكر انى بشتم وده حتى ابسط حاجه ورخيص مش غالى طيب يا مسلم انت وهو مش هى دى النظافه اللى الرسول عليه الصلاة والسلام وصانا عليها ايوة هى ....تعالوا للاتيكيت والحركات يقولك لازم قبل ما تنزل من البيت تأخد شاور (لا ده مش بوكس فى عينك دش يعنى او تستحما) وتحط لو معندكش برفان تحط مزيل عرق او يا أخى ابسط حاجه فيه كريمات علشان الحاجات دى. تانى حاجه ريحه الفم يا جماعه يااااااااه بجد لو اقول انى ساعات بشم ريحه نفس ناس من على بعد مش هتصدقونى بحس ان مقبرة فرعونيه فيها عساكر متحنطين اتفتحت طيب ليه منغسلش أسنان قبل ما ننزل او حتى يبقى فى الشطنه لبان او هولز اى حاجه يعنى برضه ده الاسلام وصى عليه وكان زمان المسواك ودلوقتى معجون الحائط قصدى الاسنان . اللبس بقى وما ادراك ما اللبس بلاقى ناس لابسه تيكنى كالار (الوان ملخبطه )طيب والله ساعات عنيه بتوجعنى حد يقولى طيب مش بنعرف نوفق الوان مرة واحد زميلى فى الشغل بيقولى انتى ازاى بتعرفى تمشى الالوان مع بعض (مش امشيها اللى فى بالكوا دى الوان مش واحد وواحده مع بعض علشان النيات بس ) قولت له بلبس وابص فى المرايه اشوف عينى هترتاح ولا لا ....لان ربنا ادانا عيون حساسه ونعمه البصر حاجه هايله جدا بس تقول ايه للى مش عاوزين يستعملوها هتلاقى لو فيه كونتراست فى الالوان عنيك هترتاح لو مفيش هتلاقى نفسك متوتر ومش فاهم حاجه بصوا حولينا هتلاقوا الشجر مثلا منه ممكن تحددوا تلبسوا البنى او الزيتى مع ايه بصوا للخضار يعنى من الاخر بصوا للحاجه اللى الله سبحانه وتعالى خلقها حولينا هتعرفوا توفقوا الالوان وده الاتيكيت بيقول عليه ومن قبله (ان الله جميل يحب الجمال ). لبس الموضه (غطينى يا امى وزغرطى عليا )الاقى واحد ماشى فى ا لشارع او واحده عادى يعنى تخينه قوى ولابسه لبس هيتقطع عليها وتقولى موضه او لابسه بنطلون ليجن (يعنى استرتش بالبلدى كده ) وتقولى موضه بيكون نفسى اقعد على سور البلكونه وادلدل رجلى واخلع راسى وادعى على الناس دى فى المطرة موضه ايه بقى دى ولا لابسه حاجه مش لايقه عليها بجد بيكون منظر مقزز جدا تحس انها واحده عندها لبس ولابساه فوق بعضه وبس ولا الاولاد اللى يا عينى الاقى يا قلبه امه البنطلون واقع ونازل لغايه ركبته ومش عارف يمشى ويبقى عاوز حد يمشى وراه يقله اسم الله عليك لما يقع طيب ليه هيقولى دى موضه النيجرو (السود يعنى فى امريكا )طيب بس مش كويسه ومش لايقه عليك وموضه الل......... تحت البنطلونات تبقى باينه طيب اسمه عرض ازياء ده ولا ايه بيبقى مقزز ومقرف ولا واحد تانى يبقى نفسى اقولهم يا نهارلوا افصلوا الفيشه الواد شعرة وقف من الكهرباء ويقولوا ليه ده جل طيب استخدمه بس بطريقه شيك مش دبابيس ولا مسامير فى شعرك كأنك طالع من عند النجار او متعذب فى امن الدوله بالكهربا اعرف امتى وازاى تسرح شعرك ولا اللى الاقى مرتبه قطن على دماغهم زى الواد بتاع اعلان اتصالت الكووووول ده بحس ان غوريلا هربت من حديقه الحيوان ولا البنت اللى تبقى ماشيه ومبينه حاجات عيب كده يعنى ولا لابسه بادى قصير او محجبه ولابسه بنطلون هيتقطع عليها وبادى او جاكت قصير يااااا على التناقض اللى بشوفه ويقولك موضه وشياكه والله ولا شياكه ولا نيله خالص ا يا ساتر ايه المناظر دى على فكرة الناس دى بتأذى العين وده حرام بجد وده من الاذى وانا مش مسامحه حد بيعمل فيه كده كل ما بقينا بسطاء فى شكلنا شويه او متناسقين ومهتمين بنظافتنا كل ما هنبقى ناس راقيه ولو قرينا عن الوضوء والصلاة والقرآن كويس وفهمنا هنلاقى ان الاتيكيت اصلا جاى من الحاجات دى. طريقه الاكل يا جماعه ابسط حاجه وانت بتأكل الزم تقفل بقك ومش لازم تملا المعلقه للاخر وامسكوا منديل فى ايديكوا علشان تمسحوا مكان الاكل وبلاش البلونه اللى بتبقى فى الجنب دى شكلها وحش قوى ومنظر مش ظريف دا احنا اتعودنا من صغرنا على البفته على صدرنا علشان منوقعش الاكل نقوم لما نكبر نهرتل فى الاكل والاقى واحد واكل ومأكل وشه كله معاه طيب ليه يا عم ويقوم فاتح بقه زى الاسد وواكل السندوتش كله بيقى صعب قوى المنظر ده ميجيش واحد يقولى يعنى انزل من البيت مكوى اقوله اه لانك انت مسلم ولازم يبقى شكلك حلو وريحتك حلوة ونظيفه والناس متنفرش منك ومش معنى كده البنات تستحمى بالبرفان لا على خفيف او استخدموا مزيلات عرق وخلاص وبلاش اتباع الموضه والتقليد الاعمى. حاجات بسيطه بتحصل فى حياتنا ومش بنأخد بالنا بس بتبقى قاتله فعلا ولو دورنا على حل هنلاقى ومحدش يقولى مفيش وقت لا فيه الحاجات ولااهتمام بالنظافه الشخصيه وطريقه التعامل مش بتأخد وقت خالص. كانت معكم سعادة اللواء استاذ دكتور مهندس نجار مسلح فى فن البتنجان المقلى والمخلل جميع انواع الباميا آبى
ملحوظه ملحوسه :- المرضى لهم عذرهم على الرغم من ان فيه علاج انا مش بتكلمى عن المرضى بتكلم عن الناس العاديه فى موضوع الريحه

عسكرى لكل مواطن مصرى ..وتتابعا لمسلسل سلبيات مصريه


اوعوا سيبونى محدش يمسكنى هو انا ناقصه امراض العصر والضهر والمغرب تجينى وهسهس كمان بعد المعاناة طبعا اللى بعانى منها كل يوم فى انى اصحى بدرى يبدأ السيرك العالمى فى السواقه على الطريق اولا من ميكروباصات شمال ويمين لعربيات نقل وانا يا عينى عربيتى صغيرة وبحس فعلا انا ولا الاتوبيس ولا النقل بيشفونى بكون عامله زى النمله جنبهم بس ربنا بيسترها عليا فى النهايه وتبدأ المعاناة فى طريق طويل كده اسمه إن ايه ومحدش يسألنى ايه ده هو اسمه كده روحوا اسألوا شركة عثمان احمد عثمان على ما تناما لعلمى (حلوة تناما دى يعنى انا بطلع ومثقفه) والحمد لله مش هلاوس ولا هساهس ولا هواجس من اللى بتجيلى ساعات كده يعنى ان الطريق يمين وشمال او رايح وجاى ايه بقى النهارده الصبح فى صنيه كبيرة مش صنيه شاى لا بنلف منها نروح لاول الطريق كانت مقفوله العربيات زحمه وكان فيه حادثه تقريبا بس على خفيف واونكل الظابط واونكل الامين كانوا واقفين والدنيا اتقفلت قوم ايه انا قعدت ساكته وبقيت ادعى حاجه واحده (لا مش اللى فى بالكوا الطريق يمشى )ان محدش يجيله غباء على الصبح ويمشى فى المعاكس من الطريق وقد كان يا نهار زحمه خلاص ....فقدنا الصبر حتى فى المرور ايه ده الطريق ده اصلا مهم جايب من المعادى لمدينه نصر والقطاميه والقاهرة الجديدة يعنى هاى واى واتقفلت ومشيت شويه واحد محترم راكب نقل طويله قوى وكبيرة قام لقى الدنيا كده عمل ايه.........لا مش وقف دخل قفلها اكتر انا لغايه كده وخلاص اعصابى فراملها باظت واللى شجعنى واحده طنط كبيرة تقول للراجل استنى يقولها هى جت عليا لقيت نفسى طلعه من الشباك الصغير ده بتاع عربيتى والهاند بريك بتاعت لسانى قطعت والانذار اشتغل قولت له ما هو لو نبطل كل واحد يقول جت عليا كنا هنخلص لو نبطل أنانيه يبقى الدنيا هتمشى صح يقولى وانتى مالك يا خالتى .......انا يقولى يا خالتى تيتتتتتتتتتتتتتتتتتتتتتتتتتتتتت الرقابه بس والله مش حاجات وحشه انا بس قولت له طيب انزل بقى اوريك خالتك هتعمل فيك ايه (والله دى مش اخلاقى بس نرفزنى خالص) وقعدت اقوله هو يعنى الحديد اللى حضرتك محمله صلاحيته هتنهى كمان خمس دقايق المهم طنط دى بدأت تضرب امريكانى وتتراخم بجد الطريق كان واقف موووووووت وانا وراها وما يجبها الا ستتها طبعا والله بجد اصل الرجاله لما تتخانق بتضرب انما الستات قضيها باللسان وخلص وفتحنا فتحه زى معبر رفح كده يا دوب تزحلق عربيتها اللانسر وتعدى بطوط حبيبى وخفت الراجل بتاع النقل يريح بس كده كان زمانه عملنى زى السجاده اللى استفردت بيها شغاله صحتها كويسه المهم جت النيله الاكبر الناس لما شافواالطريق اللى جاى مقفول عدوا من اللى رايح يعنى مشيوا فى المخالف وطبعا طنط كانت على راس الجيش والمعركه تقول لوحد انت ليه جاى من هنا وانا اسمعه يقلها وانت مال اهلك يا نهار على الصبح كده وراجل كبير والله عيب يتقال عليه راجل وبعدين هى جت عليا (الا قولوا ليه هى الكلمه دى موضه يعنى هى دى الروشنه الجديدة ولا ايه ) طبعا حتى اللى جايين مخالف مش وراى بعض لا بتناحتهم جنب بعض يعنى الدنيا قفلت المهم قعدت تشتم تيييييييييت كتير بس انا المرة دى لميت نفسى بقى وقولت له يعنى لما شويه تفكير كده ونحرك العقل اللى ربنا اداه لينا ونحترم نفسينا مش هنعمل كده يقولى عدى عدى بالبتاعه بتاعتك دى (أنا بطوط بقت بتاعه) قولت لا بقى مش طالبه قولت له صحيح واحد ماشى فى المخالف يعنى عقله راجع لورا هتكلم معاك ازاى لقيت اللى معاه بيضحكوا قولت اكيد انا صح وهنا والرجاله بدأت تتحرك بالمدرعات ونزل واحد من عربيته وبدأ يزعق ويلم العربيات على جنب وساب لنا حته نتزحلق منها وقادت المسيرة طنط وانا وراها ........بجد كل ده والظابط يا عينى واونكل الامين محتاسين حوسه التلميذ اللى مذاكرش يوم الامتحان وبجد لو كنت فاضيه كنت جبت عصايه ونزلت ضربت الناس ومعرفتش اصور بس الجايات كتير لاننا شعب بيحب اللامبالاه حتى فى السواقه خفت اصور اصل بعملوا مظاهرة عليا وتبقى نيله وبعدين بجد ايه السلوكيات دى يعنى يجيبوا لنا عسكرى لكل واحد علشان نحترم اشارتنا وطريقنا انا بجد من هنا بحى وبنحنى تصفيقا وتهليلا لشعب الاسماعيليه هناك فى اشارات مفيش عليها عسكرى والناس بتقف بجد انا انبهرت بيهم زى برة مصر بالظبط
حاجه كمان هو اليمين مش للناس اللى بتمشى بسرعات قليله والنقل والشمال للناس المتهورة اللى زى الاقى بقى واحد او احدة بصراحه منقضه على الدريكسيون زى الفريسه او زى اللى قفش فى حرامى غسيل اقول ما علينا بس على فكرة ده غلط لازم نسوق واحنا ظهرنا مفرود علشان السمه المميزة لنا متظهرش(الكرش يعنى فى سركم) وكمان علشان العمود المتفقر اللى فى ظهرنا(معلومات طبيه ابقى زرونى فى الصيدليه بقى) طيب انا عاوزة اعدى اقلب نور كتير ولا كأنى بعمل حاجه طيب يا جماعه والله الكلاكس ده مزعج والنور بجد بيلفت النظر سواء الصبح او بالليل وده معلومه اكيده من ناس خبرة فى السواقه نما ايه على مين انت بتقلب نور ولا هعبرك وبعد طلوع الروح يعديك وانا بكل ادب ابص علشان اقوله ميرسى يقوم يحرك ليه ايديه كده كأنه هيقلع اللى فى رجله ويضربنى بها طيب هو انا عملت ايه اقول امشى يا شوشو على الصبح وبلاش رخامه. نروح للاشارات شمال ويمين يعنى اللى عاوز يروح شمال او يمين او يدخل شارع انا اكتشفت وده هطلب بحفظ حق الملكيه(لان ده اكتشاف بجد) فيه ان الناس نسيت الموضوع ده اكتر وده اللى بيسبب حوادث بجد ومرة وقفت واحد فضلت ماشيه وراه كتير وهو مشغل الاشارة الشمال وفى النهاية دخل معايا يمين فسالته قال اه معلش اصلى نسيتها قعدت اضحك الناس من كتر ما هى مش بتستخدم الحاجات دى بتنساها بجد وعلشان كده الطرق سلطه بجد وتحس انك وقعت فى طبق تورلى (خضار مشكل كده بس مبحبوش) ومش فاهم حاجه ولو فهمت حد يبص لك بقرف كده كأنك مثلا جاى من فيلم كارتون او طالع من سبيس تون وراجع ودى بجد طلباتى ويا ريت

توقعوا عليها معايا:-


الغاء جميع الاشارات من السيارات المصريه لاننا هنستعوض عنها برأس او ايد تعرف الناس احنا هنمشى فين (ومتستغربش بقى لما تلاقى السما بتمطر اعضاء بشريه) الغاء نور السيارة وذلك توفيرا فى الكهربا تكبير صوت الكلاكس علشان يجيلنا هلع وفزع واحنا سايقين ونعمل حوداث ونبقى خففنا من ازمه السكان والمواصلات
-يا سفلته الطرق علشان بجد عفشه العربيه باظت يا نسيبهم براحتهم يبوظوها ويعملوا لنا كبارى معلقه او تركيب جناحات للسيارت

ابيع عربيتى وان شاء الله ما رحت الشغل واقعد فى البيت
الغاء اختراع الحارات ويسيبوا الناس براحتها يعنى تلاقى واحد معدى من شمالك عادى يمينك ميضرش فوق مش مشكله
على فكرة البوست ده كنت نشرت منه حاجات قبل كده بس حادثه النهارده خلتينى اعيد كتابته وازود عليه اللى حصل النهارده ودى من ضمن سلوكيتنا اللى مخلينا متأخرين بجد اصبروا الدنيا هتفك من الزحمه وشغلوا عقولكم
بس بجد الحاجه اللى بطمن واللى تفرح مواقف الناس ساعة الحوادث بجد كله تلاقيه واقف وبيخدم وهو ده المصرى الجدع سواء بنت او ولد يعنى اعمل حادثه وانا مطمنه وفعلا السواقه ادب وفن وبطيخ

كل سنه وانتى طيبه يا هانم.....النحله والدبور عندهم حق

تحديث مهم:- للناس اللى بتقولى الموظفين غلابه فيه موظف شهر عقارى رفض 50مليون جنيه لتسهيل ارض لحماة احمد السيد لاعب النادى الاهلى ودى رشوة لان الارض ملك للقوات المسلحه مساحتها 450فدان وتمنها 2مليار جنيه يعنى لسه اهو فيه ناس نظيفه وهو رفض علشان الحرام يعنى فيه موظفين حالهم على قدهم وراضين يبقى التانين ايه بقى ردوا انتم ياللى بتقول فى بعض اوقات الرشوة جايز

عارفين قمه الغلاسه ايه ان واحد يقولك كل سنه وانت طيب فى وقت ميكونش فيه مناسبه عارفين قمة التناحه (اللى هى بتاعتى) انى ارد عليه اقوله وانت طيب والسنه الجايه فى الحج ان شاء الله.
بجد دى مش موضه جديدة دى موجوده فى كل مكان تلاقى كل ما ادخل مصلحه حكوميه او المطار مثلا او البنك وانا داخله وخارجه تلاقى العسكرى او الموظف او بتوع النظافه جاى يقولك كل سنه وانت طيب انا طبعا حواجبينى تتقلب زى شنبات الصراصار كده واتنفش زى الديك الرومى واقعد اخبط على النحله والدبور اللى فى دماغى واسالهم ليه.....الاقى دايما الاجابه عندهم ايه بقى الاستاذ/عاوز اى فلوس طيب ليه بتاعت ايه وعلشان ايه حد يعرف يرد يقولك علشان تمشى مصلحتك بسرعه الله ما ان شاء الله ما عنها ما مشيت هو انا على راسى ريشه يعنى هى الناس الغلابه اللى واقفه من الصبح دول ولاد القطه السودا وانا بنت قطه بيضاء .
مرة اول ما اشتريت شقتى رحت اسجلها عند عمو الشهر العاقر (الشهر العقارى) بجد لان ناس هناك فعلا عقولهم عاقر وكان معايا اخو صحبتى الانتيم لان هو اللى كان جايب ليه الشقه وبما انى كنت بنوته ولوحدى قالى هاجى معاكى لانه عارف الاجراءات لقيته جاى على جنب يقولى هاتى 100جنيه قولت له ليه يعنى هو مش انت جاى معايا جدعنه وانا بقول عليك جدع هى نظرتى فيك هتتغير ولا ايه ولا عاوز بقشيش قعد يضحك قالى لا نحطهم فى الدرج قولت له سلامة نظرك درج ايه ياابنى احنا واقفين على ا لسلم ولا تقصد درج العربيه لقيته قالى بطلى لماضه ويالا طيب ليه قالى علشان الراجل بتاع الشهر العاقر اللى بيسجل يمشينا بسرعه قولت له يا نهار ابيض وبصوت عالى جدا رشوه انا ادفع رشوة اناااااا وبقيت عامله زى اللى قرصتها نحله فى ودنها يقولى اسكتى وانا ابدا قولت له انت عاوزنى اروح النار يا عمنا اتقى الله دا احنا حتى فى رمضان كمان وانا بما انى مش بعملها فى الايام العاديه اعملها فى رمضان وانا راسى والف راس خروف انى مش هدفع وهبوظ البيعه والتسجيل على الفلوس وفى النهايه كلام الحريم مشى ووقفت فى طابور طويل جدا حتى هو من الزهق قالى ادفعهم انا قلت له كلا البطه ابدا هو الراجل هيأكل ولاده بفلوس حرام يقولى وانت مالك انتى هتمشى الكون على مزاجك.
هنا ونورت لمبه الخطر وطلع من ودانى الدخان وفرامل لسانى باظت تانى مرة ومسكته ساعه اقوله ما هو احنا لو بنصبر وواخدين الصبر فى قاموس حياتنا مكنش حد غلب يعنى ايه المشكله لما اتاخر ساعه وانا واقفه ولا يوم كامل علشان مصلحتى تخلص انا وغيرى يا اخى انا اقدر ادفع غير لا اجنى على الناس بحبى لنفسى يعنى واعود المرتشين على كده (حتى لو هما متعودين) وابقى بظلم الناس التانيه الغلابه فعلا طيب ليه لو انا وانت وغيرنا قولنا مش هندفع ونشتكى اللى ميرضاش يعمل لنا الشغل (وبما اننا شعب او فينا يخاف ميختشيش فا دى مجربه زعق بس او اسال على المدير هتلاقى الدنيا زى الفل) او يدينا حقنا ونعلى صوتنا ونجلل كده مش الناس دى هتبطل رشوه ايه يعنى لما ادفع فلوس زياده فى ضرايب وتعود عليا على شكل رصف شوارع دعم فى البتنجان اى مرافق اى حاجه ولا انى ادفع رشوة لواحد وهيأخده فى جيبه ويزود الدنيا خراب طيب لو هو معندوش زمه ليه اساعده انه ينشر فساده ليه اساعده انه يربى ولاده حرام هتقولى مفيش حاجه بتمشى غير كده هقول لا دى حجه اللى بيفرط فى حقه اللى بيستسهل الحياة اللى متبع سياسه اونكل مبارك (تكبير الدماغ).
وده طبعا غلط خلينا اقولكم مثل تانى فى السنترال لو الحرارة قطعت من التليفون بتبلغ خلاص يوم التانى التالت هتيجى الاقى بقى ناس تانيه تروح تقوم عامله ايه تدى الراجل فلوس ووخداه يصلح لها التليفون طيب يا عمنا ما انت كده بتضرنى انا هو مش فيه اختراع كده جاى من الفضاء الخارجى بس مش عندنا فى مصر اسمه نظام يعنى كل واحد بدورة طيب والله ممكن التليفون ده ميكونش الواحد بيستعمله فى البيت اصلا غير كل خمس أيام طيب ما تصبر اولا انت كده بتعمل حاجه حرام لانك بتساعد على فساد ورشوه وتانى حاجه بضر وتاخد حق ودور واحد تانى.
طيب ليه بقى منقفش للناس دى ونبقى ناس محترمه ونتحلى بالصبر كده ونبطل نمشى الدنيا برشوة ومحدش يقولى ما هما اللى بيأخدوا دول موظفين غلابه لا ده غلط ما احنا اغلب برضه ولا احنا فياكين فضائيه وهما من اهل الارض واحنا ضيوف لازم يبقى فيه نظام وبلاش استسهال واستهبال واستعباط لازم نقضى على سلبيتنا احنا اللى خلقنا بنا المرتشى واحنا اللى كبرناه احنا اللى خلقنا بنا الكسول كل واحد يعرف اللى ليه واللى عليه ويتقى ربنا هتلاقوا مصر بقت كويسه لان لو اعتمدنا بصراحه على الحكومه بس يبقى بكرة فى صباح الخير يا مصر هتلاقونى بجرى فى الشارع واقول انا حوس حوس وحوس حوس انا وهتلاقوهم بيقولوا لكم الرئيس جمال مبارك او علاء مبارك بيفتتح مستشفى العباسيه بمساحه اكبر.
بجد فوقوا واقضوا على سلبياتكوا واقلعوا الشوز بتاعتكوا واقضوا على سياسه تكبير الدماغ ويا عمم مشى حالك .
انا ممكن ادى فلوس لواحد غلبان لبتاع نظافه مش بتاع تناحه يعنى ميطلبش انا اللى اروح اساعده هو احنا كمان فقدنا الكرامه ولا ايه .
:- اياك اسمع ولا اشوف تعليق يقولى الحكومه بلاش نعلق سلبيتنا على شماعه منيله هى الحكومه عددها قد ايه واحنا قد ايه هى الحكومه دى مش ناس من وسطنا وكمان اعرف حقك ومتفرطش فيه اجهزة كتير بتحمى المستهبل قصدى المستهلك والله واشتغلت وعلى فكرة انا بدأت حمله مقاطعه التجار وفهمتها لجيرانى وطبقناها على واحد جنبنا وفهمناه انه علشان بيغلى الحاجه وهنروح نجيب من حد تانى لغايه لما نشوف النتيجه ارحمونى بقى دول النحله والدبور بقوا ايجابيين عننا

حد عنده مرارة للبيع بضمان يوم حتى


اولا احب ان انوه انه هناك بعض من الاشخاص يأخذون الاكسبريشن (الالفاظ يعنى) بتاعتى من كوكبى حبيبى ويحطوها عندهم وانا ارفض واشجب وأستنكر وهنتحر انهم مش بيقولوا انى دى بتاعتى وهعيط بس مش مشكله بقى كلهم حبايبى هههههههه حلوة الدخله الجامده دى شوفتونى وانا بنطح وبرمى بالقلل زى خرفانى يا خرفانى
نبدأ اولا جبت خبر كده من عند اخواتنا المصرى اليوم بيقولوا

وكيل لجنة الإسكان: الدولة ستعجز عن تنفيذ برنامج الرئيس الإسكاني بسبب أسعار مواد البناء
شهدت لجنة الإسكان، برئاسة المهندس سليمان متولي أمس، مناقشات ساخنة حول ارتفاع أسعار مواد البناء، وحذر الأعضاء من خطورة الوضع الحالي علي صناعة التشييد والبناء في مصر، مطالبين بمواجهة الفئة التي تتحكم في الأسعار لحماية ٨٠ مليون مواطن
هو برضه على حد علمى مش اللى بيغلى الحديد ده هو الاستاذ يتربى فى عزو حماده عزو ولا انا بيتهيأ ليه ولا دى بقى خطه جديدة من الخطط علشان يطلعوا قرار ان مفيش اسكان للشباب ومش هيكملوا برنامج اونكل مبارك علشان معندهومش دم يواااا قصدى حديد ويبقى وعد واتنسى و ذهب مع الريح وراح ولا عاوزين يرجعوا فى خطتهم بشياكه ويطلعوا دور الضحيه المضحيه طيب هما ميقدروش يكلموا حماده عزو فى الموضوع ولا يعضهم ويحط السيخ المحمى فى صراصير ودنهم بقى امممممممم ولا الناس دى واكله مستهبله ومستعبطه وبيطلعوها علينا طيب والله الاسكان اللى بيعملوة بيحل ازمه هما عوزين يغيظوا فينا يموتونا ويبقى خلص من الشعب ويقعدوا على تلها ويخربوها انا بقى عندى حل ما بدل حديد يتربى فى عزو يجبوا بشاى ولا اى حديد مش قولت تلاكيكو
نيجى للتانى من مصراوى افندى
حركة مصرية معارضة جديدة شعارها لسنا عبيدا وسنحارب الفساد
أعلن بمقر مركز العدالة والديقراطية لحقوق الانسان عن تأسيس حركة معارضة جديدة تحمل اسم التيار البديل

تضم الحركة عناصر من مختلف التيارات السياسية وهى ذات توجه ليبرالى وتتمسك بالتقاليد المصرية والعقائد السماوية وتلتزم بالدستور المصرى

طيب بزمتكوا انتم عارفين مصر فيها كام حزب فيها 27حزب طيب فين الدوله اللى فى العالم المتقدم وغيرة فيها الكميه دى جاوبم انتم كل يوم والتانى واحد طلع فكرة فى دماغه وهو نايم على اساس سحليه عدت على قفاه لقى نفسه مؤسس حزب ومحدش يقولى حريات وبتنجانات ده اسمه تفككات يا فتكات وقولنا من قبل الحريه لها اسقف لا يجوز اختراقها بجد لان ده بيدل على تزعزع القيم وعدم الوعى السياسى وبينى وبينكم اهى نصابيه كويسه يأخدوا بيها قرشينات ويرجعوا يقولوا بندور على مصلحه المجارى قصدى البلد طيب حد يفهمنى هدفهم من السطرين دول ولا التفكير ده بيمشى كله مع بعض ولا انا هيست ومش فاهمه
خدوا الخبطه التالته
تقرر فتح أسواق جديدة لاستيراد لحوم الجاموس والأبقار والماعز والدواجن (على اساس أننا فقدناهم فى الحرب ) لسد الفجوة الغذائية وحماية المستهلك المصري (افهم بقى حمايته من مين ها حد يقولى ).وقال الدكتور حامد سماحة رئيس الهيئة العامة الخدمات البيطرية أن الأسواق الجديدة ستقوم باستيراد لحوم الجاموس المشفاة والمجمدة من الهند (طيب ده يرضى حد بقينا نستورد من الهند دى جارتى بتجيبها وبجد ريحتها استغفر الله العظيم مش عارفه الناس بتأكلها ازاى بس بعذرهم ناس غلابه ) ، واللحوم البقرية المشفاة والمجمدة من البرازيل والأرجنتين و أورجواي وبارجواي وكندا وهولندا وأمريكا (امريكا دخلت فى الموضوع هما مش عارفين الناس دى انهم ممكن يكونوا هيصدرونا وباء مثلا ومحدش يقولى حجر صحى وبتنجان الفلوس بتمشى العفريت )، ولحوم الأغنام من أستراليا ونيوزيلندا (هى مش استراليا دى اللى قالت علينا نمورة وقروده ووحشين وبنعذب الخرفان يا حرام هيدونا ازاى يعنى )، ولحوم الدواجن من البرازيل (على اساس انهم معندهومش الفلونزا القرود مثلا قصدى الطيور ) حسبما ورد في وكالة أنباء الشرق الأوسط.
طيب حلو قوى كل ده هما نيتهم كويسه واحنا وحشين عاوزين يحموا المستهلك قصدى يحموه طيب ما تتصدوا للتجار الجشعين بجد بقت حاجه تزهق تروح تشترى مثلا كارت موبيل الشركه قالت بعشرة جنيه يقولك هو بعشرة ونص الله يا عمنا ما الشركه قالت كذا يقولك انا مليش دعوة معرفش وبما اننا شعب كسول فبنشترى ونخلص عرفتوا بقى العيب فينا بجد فكرة وبتتنطط فى دماغى كل فترة هو ليه احنا مبنقولش لا للتجار اللى بيستغلونا حتى فى ابسط حاجه الخضار ليه مندورش على الارخص ليه منقولش لا للحاجه الغاليه وهنلاقى فى مكان تانى بجد حتى لو اقل 25 قرش انت او انتى او ابنك او بنتك اولى بيها انا عن نفسى بجد بعمل كده انا بروح كارفور (على فكرة كارفور ارخص بكتير من البقاله العاديه حتى مش السوبر ماركت ) علشان بلاقى فيه الحاجه ارخص من برة مع ان جنب بيتى الكتير بس اغلى فيه حد يقولى البنزين اقولكم ريحوا نفسكم عربيتى ممكن تودينى كارفور وتيجى واكون استهلكت ب2جنيه بنزين مش مهم المكان بس نبطل كسل وسياسه تكبير الدماغ وندور على الارخص لينا ونناقش الناس بصراحه انا فى الحاجات دى بعمل كده لان حرام عليا افرط فى حق من حقوقى انتم برضه لازم تعملوا كده بالنسبه للعيش الناس فاكرة ان الافران الكبيرة او مثلا مونجينى بيبعوا غالى هو بيبع فينو بنفس سعر اللى بره بس الميزة بقى انهم محترمين ناس بتعمل حاجات نظيفه تحس نك بنى أدم وانت بتأكل مش العيش اللى بنجيبه من برة لا يرى بالعين لمجرده ومنستناش الحكومه ونقول دورها لا نأخد موقف كل واحد فى كل مكان لو وقف للجشع والطمع بتاع التجار هنلاقى الدنيا بقت حلوة وبما ان الاسعار زادت بطريقه خرافيه لازم نعمل حاجه انا بعد ما عملت حمله فليبينه صعيديه على التلاجه ونظفتها ورحت اشتريت حاجات لاقيت الدنيا ولعت بجد وده حرام يا جماعه ارجوكوا قاطعوا التجار المستغلين للظروف اتعب شويه وروح مكان تانى ومتكسلش هتجبروا الناس دى على خفض السعر حتى لو عشر قروش
كان معكم مراسلكم مفقوع المرارة آبى من كوكبها اللى هينفجر قريب من الغيظ

تخريف خرفان :- يا صديقى يا ابو الهول اوعى تقولى تانى انتى بتخبطى فى الحلل لانى بجد هقلب المطبخ على دماغك كله انا بتكلم علشان حقى وحقك جتك كسر حوقك (حد يعرف يقولى حوقك يعنى ايه اصلى معرفش بجد)

عقول محشيه مفرقعات للبيع

استهبال لابد منه قصدى استهلال خدوا بالكم من اللى بعد كده

تكمله لرحلات آبى موحد المحافظات الاسبوع ده نزلت المنصورة بلد ماما وده كان علشان افصل قوات ما بين الحاج والحاجه والحمد لله نجحت انى اعمل حائط صد للصواريخ الخارجه من الاتنين وعملت على اقامه هدنه جامده بينهم وفكيت المتاريس اللى كانوا عاملنها الحمد لله وكمان كنت بشوف الواد السكر منتارفيش اللى فوق ده (ده بقى ايمو او ابراهيم او هيما ميما زى ما بيقول على نفسه وده اللى سمانى آبى وهو ابن اختى ) وعلى فكرة يا جماعه بلدنا بلد الست ام كلثوم هى من مكان اسمه طماى الزهايرة ودى قريه تابعه لمدينة السنبلاوين وعموما السنبلاوين تانى اكبر مدينة من حيث عدد السكان والتوكتوك الاختراع الخزعبلى ده فى الدقهليه
بعدين هبقى احكى لكم عن انجازتها المهم قدرت افك الاشتباك وارجع العدو لاماكنه الطبيعيه واصالح القوى العظمى فى البيت الاباء بقى لما يزهقونا مش كفايه سترناهم وخلصنا منهم حتى بعد الجواز يزهقونا دى حاجه متعبه (ولكن الحاجه لها حق ما هو على راى الشاعر معرفش مين لما قال ست البنات الامورة الاصل احلى من الصورة سالتها الحلوة منين قالت انا من المنصورة) وبما ان بابا من العرايش فياااا على الدماغ الناشفه المهم شكلى كده هأخدهم اقعدهم فى بورسعيد وابقى خلصت منهم الاتنين.

نيجى بقى للاهم اخدت الواد السكر انترفيش ده ورحت كوافير بنت صحبتى هناك البنت دى اصلا خريجه أداب اجتماع بس مستنيتش وظيفه فتحت كوافير فى العمارة اللى سكنه فيها وهى متجوزة وعندها ولد وبنت يعنى بجد بعتبرها من البنات الجدعان قوى منها بتساعد جوزها وكمان مستنتش البيبرونه (القوى العامله يعنى ) والبنت دى على فكرة منقبه واغلبيه العرايس اللى بتروح لها محجبات او منقبات فبتحكى ليه لانها زعلانه بتقولى واحده بتحاربها قولت لها ليه فى ايه قال ايه بقى علشان هى بتقف فى الكوافير مش لابسه النقاب وممكن حد يدخل فجأة راجل طيب هى كاتبه على الباب ممنوع دخول الرجاله طيب تعمل للاغبياء ايه تقوم الاخت بقى التانيه تقول انا مش هتروح الكوافير ده لان صاحبته مش ملتزمه ومش تكتفى بكده طبعا لمت شلتها كلها وبتطلع عليها الكلام ده..... يا نهار ابيض طبعا قولت لها دى مين دى ولا ايه قالت ليه تبع الاخوان طبعا بصراحه انا مصدقتش معتقدش ان ده فكر الاخوان المسلمين حتى لو فكر بعض منهم فده يبقى قله لان انا شخصيا بكلم بنات منقبات ومخمرات وعادى (ولا هو التصنيف دلوقتى مش تبع الفهم والتدين بقى تصينف لبس ) غير كده هى حتى لو منقبه ليه تحارب واحده فى اكل عيشها هو يعنى ايه التزام اللى هى بتقول عليه ومش فهماه هو ده الدين.
تانى حادثه حكتها ليه بقى ان واحده يا حرام بعد ما حجزت عندها خلاص دخلتها والبنت دى منقبه برضه بعد يومين راحت اخدت العربون وبتعيط فسالتها صحبتى دى ليه مالك قال ايه المنيل طلقها اللى تجيله رصاصه فى عنيه طيب ليه بقى علشان مش عاوزها تقعد يوم الحنه وسط الستات بدون نقاب طيب ده يعقل بجد ما الستات لوحدهم والرجاله لوحدهم يقولها لا يا كدا يا خلاص ووبالفعل دمغها هى كمان ركبت شمال وقالت لا وطلقها طيب ايه الفكر ده بجد وجايبينه منين.
تالت حادثه واحده رايحه تؤجر منها فستان فرح تقولها لا مش عوزاه ابيض اصل الابيض بدعه (بدعه يا نهار من امتى ده بقى طيب نعمله علم مصر حتى يبقى اشيك )
قالت لها يعنى ايه بدعه تقولها الرسول عليه الصلاة والسلام خص الابيض للرجال فقط (ايه مين فين الحديث بقى ولا الايه اللى بتقول كده ) وان الابيض للستات ده من عند اليهود.
الحادثه الرابعه اللى بجد دماغى وقفت عندها ان فيه مجموعه من الرجاله يوم وقفه عرفات عملوا وقفه عرفات عند الجامع يا نهار ابيض والمشكله ان الناس فاهمه ان دول اخوان.
المصيبه بقى اللى عاوزة افهمها بدل ما بجد البس بيجامه كستور وشبشب فردة وفرده واجرى فى الشارع الناس دول مين هل فعلا اخوان ولا تبع انهى فكر من تعدد الافكار اللى حصل فى الدين بتاعنا وبقت حاجه زى حله التورلى ومحدش قادر يعرف الافكار دى طالعه منين نسيبنا بقى من كده يعنى هى الواحده لازم تبقى منقبه او مخمرة فقط علشان البنات دول يتكلموا معاها ولو مش كده يقطعوها ويحاربوها ولا يقولوا اصلها اخت مش ملتزمه ولا مهاش اخت فمش هكلمها يا سلااااااام طيب متتكلميش هما دول بزمتكوا اللى بيدعوا للدين دا الاسلام دخل فى عهد الرسول قلوب الناس واسلموا علشان سماحه الرسول صلى الله عليه وسلم كانت من اسباب الدخول فى الاسلام والناس حبته جدا طيب اللى بيحصل دلوقتى يا جماعه تنفير وايه القلوب المتحجرة دى مش فاهمه ومش عارفه جايبين فكرهم منين حتى حرام انها تعمل كده واللى طلق مراته وهو لسه مدخلش بيها هو ده اللى برضه دينا بيقول عليه . انا من وجهه نظرى يعنى الصغيرة النونو دى بيقول حتى لو واحده مش محجبه ولا منقبه يبقى اولى الناس دى تهتم بيها وتأخد بايدها لعلها تكون حاجه فى حسانتها ما يمكن الناس عاوزة تدخل وتتعمق فى فهم الدين بس مش لاقين الطريق ومش عارفين فين الصح يبقى الاحسن انى اهملها واديهم قفايا ولا امد ايدى. غير كده الكارثه بجد بلاقى ناس بتقول كلام بعيد تمام عن الدين وتحرم حاجات وتحلل حاجات وتكفر ناس ودول بقى بيبقى نفسى اسيب عليهم خرفانى كلهم واحبسهم فى الكوكب وافجره هو يعنى على حد علمى ان التكفير ده له شروطه ومين بيدى الحق لمين انه يكفر وعلى اى اساس ممكن يكون الواحد مش فاهم كل حاجه فى الدين او العقائد يقوم واحد فجأه قفاه ينقح عليه ويرشح ميه ويقولك لقد صبأت يا ابن ابو شفلحه وبجد بموت على روح من الضحك على الناس دى طيب يا عمنا اهدى وفهم الراجل او البنت الموضوع ايه انتم المفروض بتبقوا ناس وصلتوا لروحانيات وصبر وحب (المفروض يعنى ) وفهم للدين اكتر من الناس العاديه اه انتم بشر مش ملايكه بس برضه ربنا بيكون انعم عليكوا. انا نفسى يبقى فيه رقابه على الناس اللى بتخرب عقول الناس وتسممها ومش بتؤدى الامانه صح ولا بتنقل الدين صح بس مش عارفه اعمل ايه. اما عن البنت بقى فأشك انها اخوان او لو هى يبقى يا جماعه يا اخوان صلحوا الفكر الغلط اللى ما بينكوا ولو مش اخوان شوفوا الفكر ده جاى منين وعلموهم ان الدين حب وود ورحمه مش قلوب جاحده وغليظه ورخمه وكده ومتنفروش الناس منكم. فى المقابل علشان بس محدش يزعل والاقيكم جريتوا ورايا بقلل الكوكب كله والخرفان ووجهتوا صواريخ مضاده ناحيتى (وانا لسه طالعه من معركه )انا مش بهاجم الناس دى انا عاوزها تبقى فكر مظبوط وفعلا فيه ناس بتخرب العقول والله بجد فيه ناس فاهمين الدين صح وزى الفل انا نفسى بستفاد منهم جداااااا وربنا يجازيهم خير على كل حرف بيعلموه صح ومنهم ناس فى النت كمان بحترمهم جدا وبحب حتى أقرأ لهم حتى لو معرفتش اعلق لان بعد كلامهم مينفعش تعليق بعده. وبقول للناس التانيه ربنا يهدى وتقربوا الناس وترجعوا نفسكم فى الغلط ده واخيرا كانوا يومين تحفه علشان الواد السكر انترفيش لما ابو تريكه جاب الجون قعد يقولى انا ابو تريكه وقعدنا نلعب وبهدلنا نفسنا شيكولا

ملحوسه ملحوسه:- مش عاوزة حد يسيب الموضوع الاساسى ويمسك ليه فى شريعه الكوافير ولا لا الله يكرمك يا رب

انا عاوزة اتجوز ميكانيكى


طبعا هتمومت كلكم دلوقتى وتروحوا تغيروا شغلكم فى البطاقه وتبقوا ميكانيكيه بس بعينكم برضه مش هتجوز حد منكم .
بجد بقى انا بشوف حاجات كتير عن مشاكل الجواز (بما انى كنت عاميه قبل كده تقريبا) يعنى تلاقى اتنين ربنا هداهم وعاوزين يتجوزوا وخلاص ربنا هيكرمهم تطلع لك المشاكل زى مواسير الميه اللى بتنفجر فى مدينه نصر فجأة كده بدون سابق انذار ايه هى بقى المشاكل
البنت تقفل دماغها انا صحبتى جايبه فرش البيت من هابيتات والتانيه من العالميه والتالته من امريكان فرنيتشر (ده اعلان مدفوع التمن للاماكن دى ) اقولكم نصيحه محدش يجيب من هناك اصلهم غاليين موت وممكن تأخدوا الديزين من هناك وحد برة يعمله المهم ايه يا بنتى ما انتى عارفه الزير وغطاه تقول لا وانا مالى وشبكتى بقى من عند السرجانى او حسن عليش ( الماظ علشان محدش يسالنى) وكمان فى الفلانتين تجيب ليه موبيل (ما تتجوز صاحب فودافون احسن) وتروح الجيم ويبقى فيه عربيه اخر ديل (جين تو علشان انا بحبها ) وعاوزة اخرج اروح فرايدايز واصيف لو مكنش باريس يبقى الساحل (وديها ساحل العاج واخلص ) .
نيجى للولد انا عاوز بنت روشه موت اخر حاجه وتكون بتلبس واستايل وهاى كلاس وبتسافر بره مصر على اساس ان جوه مصر معدى بيجيب جرب مثلا وباباها عنده وعنده وووووووووووحاجات كتير وعندها عربيه اخر ديل يعنى (لو جيتا ماشى بما انى انا شخصيا بموت فيها) وتكون بتعرف تتكلم وده برضه على اساس انه هيشتغل بيها مذيعه فىالتليفزيون او نجوم اف ام.
دى طلبات بجد بتحصل فى بعض المستويات اللى هى كلاس قوى مش المستوى المتوسط طبعا وبتختلف من مكان لمكان يعنى فى المناطق الشعبيه لا انا بنتى متتدخلش غير ب10بطاطين و2لحاف متنجد وطقم المونيوم وطقم صينى و10اطقم كوبيات (بما انها هتفتح كافيه بعد الجواز) وحاجات كتير والولد برضه انتى امك لازم تجيب وتجيب وتعمل .
يا نهار انا بجد قابلت كتير جدا بيطلبوا بلاوى وبما ان اختى متجوزة فمش عارفه اقولكم احنا اتكلفنا جهاز قد ايه وكمان بصراحه اختى من الناس اللى عاوزة تتخبط بقله لانها عندها حاجات لغايه النهارده مستعملتهاش بس بصراحه منظرة فارغه منها (بس بما انها اقوى منى كنت بخاف اقولها كدها لتقعد عليا تتطلع روحى )
طيب ما هو بالشكل ده فعلا وبالطريقه دى من الاهل والاتنين اللى هيتجوزا مفيش حد هيتجوز ولا بعد ميه سنه ومن هنا تطلع مشاكل الانحراف والاغتصاب لدرجه بجد ان الاغتصاب طال الاطفال الصغيرة وبقت حاجه مقرفه .
فيها ايه لو نتساهل شويه او الاهل بمعنى اوضح متقضيش على مستقبل اولادها وتعرف ان الجواز مش للبنت بس سترة لا للولد كمان بجد علشان بيلمه عن معاصى كتير والجواز بيمنع الانحرافات (الا الناس بقى اللى غاويه ودول ربنا يهديهم او يهدهم عادى يعنى ) .
نيجى لمشكله تانيه الولد لما يكون عاوزة بنت معينه اكبر منه او اصغر او اى حاجه يعنى المهم طالما ماما مش هى اللى جايبها يطلع فيها القطط الجربانه الله طيب ليه ما هو اللى اختار ما تسيبوا الناس تجرب يعنى انا رأى اللى اختار وحده واللى اختارت واحد طالما الاخلاق والتدين والعيله وحاجات كتير مظبوطه وفى المعقول ومناسبين لبعض (علميا -وفكريا -واجتماعيا )طيب ليه لا ويمشوا المثل اللى بيقول (اللى يشيل أربه مخرومه تخر على دماغه ) يعنى ممكن تطلع الجوازة كويسه ولو طلعت بايظه يبقى نساعد الطرفين مش نقعد نقول ما احنا قولنا الكلام ده من قبل (لان بصراحه دى اكتر كلمه بتتعب البنت او الولد لما يشتككى لاهله من الطرف الثانى )
وبجد انا عاوزة نتباسط شويه فى متطلبات الجواز يعنى لو حالنا على قده ومش عندنا امكانيات يبقى نبدأ مع بعض ونساعد بعض واكيد الواحد هيوصل فى النهايه للى هو عاوزة يعنى مش لازم شقه كبيرة ومش لازم حاجات ثانويه كتير يعنى كل واحد على قد امكانيته وننفكر بعمليه شويه بجد والاجانب فى الحاجات دى فظاع عمليين جدا وانا ليه واحده صحبتى عايشه هنا ومتجوزة عراقى وهى هولندايه كنت بشترى معاها حاجات الفيلا عندها وبجد عجبنى دماغها فى تجهيز الفيلا وكانت بسيطه وتجيب الحاجات المهمه بس ومش لازم نجيب حاجات فوق طاقتنا وطاقه اهلينا .
والاولد بقى اللى تقولك لا البنت متساعدنيش الله ليه يا عم ازاى يعنى انا مطلوب منى حاجات لازم اجيبها طيب ما هى تقدر تساعد ولا فكرة الذكورة متأصله لسه فى الدماغ يا عم وافق تساعد وبعدين ابقى سدد لها بالتقسيط هههههههه
علشان بجد نقضى على الانحرافات اللى عند الاولاد والبنات كمان ونمنع الاغتصاب ونقضى على ظاهرة الجواز المنيل الاهبل اللى اسمه (عرف الديك ) العرفى ده لان بجد انا بشوفه انه اهدار لكرامة الاتنين وليه اللى يكتب عرفى ميكتبش رسمى ولا هو الجواز بقى تيك واى علشان الاتنين ميتحملوش اى مسئوليات وده غلط طبعا لان الجواز روابط كتير وكلنا عارفينها وبعدين الناس اللى بتعمل كده اغبياء بجد اللى يخليهم يأجروا شقه ولا اى بلاعه (بما نهم بعتبرهم سحالى وبرص جعان فى نظرى ) بيروحوا فيها ما يعملوا كده وهما رسمى انما تقول ايه مش عاوزين مسئوليات عليهم .
وده برضه يرجعنى للى قولت عليها ان لازم يكون فيه تعاون من الاهل والابناء وينسوا المتطلبات المجنونه الاوفر
واخيرا زغروطه حلوة لوووووووووووووووووووووووولى وتبقى لا باظت ولا خربت ولا جابت جاز
ملحوظه انا اكيد مش هتجوز ميكانيكى ولا حاجه بس دا كان حاجه بتتقال للناس علشان توضح بساطه الجواز مش اكتر (ولا اقولكم ليه لا يبقى مصلحه اصلح عربيتى ببلاش ههههههههههههههههه)

المنافقون المغفلون الكاذبون

النائمون فى الكفتات
اولا بجد انا منقهرة على النت لانى طبعا بما انى مسعده ومبخته فى حياتى لما النت يصلح فى الشغل خط التليفون اللى عليه النت يعطل
يقطع يالا حظ بقى وبما انى اولد اشون فى البيت وبستعمل الديل بتاع النت من التليفون فتأخرت عليكم
تتابعا للحاجات اللى بتغيظنى فى حياتى وتكمله للبوست اللى فات والتناقض اللى بقابله فى حياتى فى الشخصيات وبعد طبعا ما سمعت كلام مانتى حبيبتى (مامى يعنى )وقررت اخد بنصيحتها وبدل ما كل يوم اضيع فلوسى على مرارة مرة من الصين ومرة من اليابان وبرضه تنفجر فقلت اعمل بنصيحتها وارمى المرارة وانا بتعامل مع الناس دى فى حياتى سواء فى الشغل او الشارع او النت
وبما انى حسه ان هتجيلى الفلونزا القرود وهبل الخرفان وهروب الجديان من كتر التركيز فى الناس وسلوكياتهم قررت انى اشركم كلكم معايا (مش فى الفلونزا لا فى الموضوع.
ايه بقى الموضوع الاقى ناس تقعد كده فجأة تنصحك وتقولك اعمل واعمل واعمل من هنا للسنه الجايه طيب اتكسف انا بقى واقول يااااا دا الواحد مقصر قوى واتكسف وأحمر وابقى شبه طبق البطاطس المحمرة كده اوضح لكم يعنى مثلا بنات تلاقيها تقولك متكلميش ومتعمليش ومتخرجيش يا سلام اقول دى نعمه الصحبه والصديقه ابص بقى الاقيها هى اللى بتعمل اللى بتقولى متعملهوش يا نهارلووووو الله امال كنتى بتقولى ليه كده ليه حتى فى معامله الاهل والام اللى بينصح بوصل الرحم وهو لا مش بيوصله والاقيها بتعمل العكس يعنى كشفت عندى عيوب ومش شايفاها فى نفسها ولا ده من باب تعليق الغلط على الغير بس
.نيجى لواحدة تانيه او واحد تلاقيهم على النت يقولوا قال الله وقال رسول الله صلى الله عليه وسلم طيب حلو قوى الكلام ده وبعدين تقعد تقولك اتقى الله ومتعملش ومتعمليش والبسى ومتلبسيش ولما تقابلها بقى وجها لوجه وخد عندك مش قله فى الدماغ ده زير اه بجد تلاقى اللى بتنصح دى تحت شعار الدين والاخلاق ويقعدوا يقولوا لك أيات قرآنيه وأحاديث وياااا تلاقى نفسك بتعيط من الكلام طبعا لان ده كلام ربنا ومؤثر وحلو قوى وبجد اكتر حاجه بتدخل القلب تقوم انت تكتشف (وبجد تبقى صاحب سبق صوحفى) ايه ان دول بيقولوا ومبيعملوش واشكالهم تبقى عكس ما بينصحوا بيه حتى فى اللبس وهو ابسط حاجه ومعاملتهم ييعنى كلام بس الله ايه يا بنتى مش انتى اللى كنتى بتقولى وتقولى ...... وكمان اللى يقعد يقولك انا مقولش كده وعيب عليك اوعى تنعت (يعنى تشتم اصلى شوفتها فى اماكن كتير الكلمه دى) وتلاقيه هو فى مكان تانى لسانه عامل زى لسان الضفدعه المطلقه وبيشتم ودول بقى بصراحه اللى مش بيعملوابكلامهم خالص مالص يعنى برضه بيرجعوا الكلام فى وشك يععععععععع والنصايح بدون فهم ولا عمل (يعنى حافظين وبغبغنات ومش فاهمين ) انما ايه منظرة فارغه واللى يقعد يقولك اوعى تتكلم عن بنت فى غيابها ولا تبص لبنت وتلاقيهم يا نهار لسانه عامل زى لسان االسحليه طوله خمسين متر وعنيه عامله زى عنين الصقر وملوش سيرة فى حياته غير سيرة البنات والخوض فى عرض البنات وشرفها او الخوض فى عرض واحد صاحبه (وده حرام جدا وله عقوبه عند ربنا.
يالهوى وانا بقى كده ابدأ ادخل فى مرحله غيبوبه تامه وابقى شايفه الدنيا خمسين لون مرة واحده والاقى عصافير طايرة فوق دماغى والنحله والدبور اللى عندى عاملين بارتى ايه مقلوكوش يبقى جايب لغايه الصومال ويحصل ليه فوران فى الدم واطلع دخان من ودانى ولا وابر الساعه اتناشر اللى رايح على الصعيد الموضوع كبر عن المرارة وبقى غيبوبه .
طيب يا جماعه حلو قوى اننا ننصح بعض ونحذر بعض من الغلط بس مش قبلها نبص الاول لنفسنا ونقف قدام المرايه ونبص فيها كويس ولا هى مراية بيوتنا وقلوبنا وعقولنا اتكسرت ونصلح من أخطائنا وبعدين ننصح غيرنا ولا هو الدين والاخلاق بقى من منطلق المنظرة بس برضه فيه ناس بصراحه قولا وفعلا بيبقوا محترمين وبيرشدوا نفسهم الاول قبل الناس
الدين المعامله يا جماعه يعنى مقولش لحد متشتمش ومتسرقش واووووووووووو حاجات كتير وانا بعمل كده وبصراحه احنا اليومين دول حالنا ما يعلم بيه الا الله سبحانه وتعالى .

ولا الكذب اللى بقى بيجرى فى عروق بعض الناس اكتر من الدم يااااا طيب ليه ما هو اللى بيكدب ده بيكون جبان ومش قد الكلمه اللى بيقولها وعارفين ساعتها بفتكر كلمه بابا الله يكرمه يقولى لما يلاقى واحد كداب (عارفه ربنا ادى له الكدب يوزعه على الناس طمع فيه وخده لنفسه بس ههههههه)
يعنى واحد كداب او منافق اخر حاجه بجد لازم نعدل من نفسنا الاول وبعدين نبص للناس وننصح علشان ميبقاش شكلنا وحش لان اللى بيعمل كده بيبقى باين قوى وخايب قوى ومحدش بيثق فيه خالص جدا قوى وكمان بيبقى عامل زى حامل الفلونزا الطيور بقى وريشه نافش او شبه الفرخه البيضه اللى عندى بتاع الفراخ اللى بتبقى تعبانه ورميها بره القفص وعماله تتنطط على الاقفاص التانيه والناس بتضايق منه وتتجنبه يعنى لازم علشان نبقى امه اسلاميه بجد وعلشان نبقى شعب محترم وعلشان مصر حبيبتى وحبيبتكم كلم تبقى كويسه نبدأ بنفسنا ونصحح منها علشان منضحكش على بعض ونفقد احترامنا لبعض وللى حولينا ونبقى ناس بسيطه كده ومحترمه
واخيرا قد انفجر من عنذر وبنجر ولا عزاء للكذابين المنافقين
يا صديقى العزيز ويا قلبى لقد أثبت لى فعلا انك صاحب مبدأ فى حياتك وانا من هذا الكوكب اشكرك على كل اللى علمتهونى mora