كل سنه وكل الدنيا بخير
ويا رب اللى محققش حاجات فى 2007 يحققها فى 2008 او حتى فى 2020 المهم يحققها
ودى امنياتى للعام الجديد وخاصة انه بعدها بكام يوم هيكون عام هجرى جديد علينا
* الشوباب اللى ما اتجوز يتجوز بس يا بنات امانه عليكوا يعنى بلاش طلبات زياده فيلا وعربيه والسرجانى(ده الماظ بس) يعنى ممكن وشيه تنازلات كده والله الشكليات دى ما لها اهميه واللى بيحب حد بيتحمل معاه كل حاجه ونقف جنب بعض يعنى نشتغل وبكرة (حلنى بقى)نبقى كويسين ونحقق احلامنا ولى أولدنا المهم الرضى النفسى عن الحياة يعنى لو اوضه وصاله( وده اللى ممكن تلاقيه متوفر حاليا) مش عيب بس باتنين بيحبوا بعض تبقى جنه
* والشبا ب بقى متستهبلوش وتقولوا ما هى رضيت باى حاجه يعنى اعمل اللى تقدر عليه والله الستات دول قلبهم طيب وبيضحك عليهم بسهول(ايوة لما تدخل لهم من الحته اللى فى الشمال دى) يعنى كلمه حلوة هديه بسيطه تقدير للى بتعمله وشوفها كل يوم بعين تانيه ومش عاوزة حد يقولى يعنى ابصلها من فوق لتحت ومن الجنب لا شوفها انسانه جديدة وده دور البنات برضه اتجددى يا ام الخلول بلاش القوقعه اللى انتى فيها.
* المتزوجين بقى يبقوا سعداء يعنى اللى مزعله بعلها تصالحه يعنى تعمل له مفاجعه كده يعنى مرة تستناه ورا الباب وتنكش شعرها وتقف فى الضلمه لابسه اسود وااااااااااو وهو اول ما يدخل يطب ساكت(ويبقى خلصنا من وجع الدماغ) لاااااااا انا بهزر يعنى تهتم بنفسها شويه والراجل كمان يهتم بالنسبه فى البيت زى برة البيت (فاهمينى ولا اضرب بالقلل ) ونبطل زن اصلى عارفه الست والبنت لما تزن يا ساتر لو يعملوا لنا فيبريشن زى الموبيل يبقى احسن.
* اما لما لمصر امى وحبيبتى فيا رب كل مسئول يكون عنده ضمير وبيبص لمصر كويس ربنا يحميه ويزيده ويساعده اما بقى اللى نايم وعجلته نايمه نوديه لخالتى فرنسا تنفوخها ليه ههههههههه (اصلها خبرة فى العجل عندها واحده عامله دوشه) ربنا يهديه كده ويبص للناس الغلابه.
* اما المدونين اللى اعرفهم ومعرفهمش يا رب يكون موضوع التدوين ده بينفس عن اللى جوانا ونلاقى اللى يساعدنا فى حل مشاكلنا ونقدر نوصل حاجات كويسه للمجتمع ونصلح من نفسنا.
* اما عن نفسى اكبر بطوط شويه (عربيتى) وابو الهول ينطق واروح اسكن معاه تحت سفح الهرم وربنا يرضى عنى وعنكم ويحفظنا ويسترنا فى الدنيا والاخرة.
وابطل اجيب لعبد الرحمن فارس الضغط ولو زعلت حد منى والله ميزعلش انا قلبى طيب بس عبيطه كده واللى فى قلبى على لسانى معلش سامحونى
كل سنه وكل الدنيا طيبه

بس زى ما قولت مش هنشر صورى اعذرونى على التصوير اصلى كنت بصور من العربيه والجو كان برد شويه وانا بخاف من البرد قووووى علشان الدواء وميزانيه الكريمات بتاعت التقششف اللى يسببه البرد وكريمات الشعر كمان (اقتصاديه قوى انا مقولكوش) على فكرة فى تاريخ 1/1/2006 ده غلط بس الكاميرا كانت مهيسه شويه ومكنتش ظبط التاريخ بتاعها دى الصح بتاعها 13/12/2007 وكمان البطاريه بتاعت الجمل قصدى الكاميرا خلصت بس وعد منى لو رحت تانى هجيب لكم صور احلى لان فيه حاجات كتير مصورتهاش او اجيب لكم صور من بلد تانيه اروحها اشوف ايه الكويس والوحش اللى فيها يا رب مصر تبقى كلها نظيفه وحلوة كده وناسها طيبه قوى كده

علشان الناس اللى اتريقت على ابن بطوطه وفطوطه وهو فى رحله الاسماعيليه بس فيه صور انا فيها ومش هنشرها علشان الناس متخفش ومتتخضش ويجلها هلع وفزع وكوابيس بالليل وتدخل البلوج تانى هههههههه فيه صور من المرة الاولى بس دى كانت على السريع كده وفيه اتنين ناس كبيرة وطيبه قوى كانوا على الكوبرى اللى فى شارع عمارة السياحى ولما لاقونى بصور قالوا ليه اشمعنى هما صورتهم وكانوا زى السكر وعزموا عليا بالشاى والله لانهم شايفيين عربيتى ملاكى القاهرة بنت خالتى ام عز

وعلشان الناس اللى اتهمتنى انى مش رايحه علشان الغروب واتهمونى بحاجات تانيه(طيب يا ريت دا ابو الهول مش راضى ينطق ولو عندكم حل لفك الحصار اللى عامله على قلبه والمتاريس والمدرعات والدبابات دى يقولوا ليه حل علشان افك الحصانه والحاجات دى وينطق قبل ما انتحر وارمى نفسى من فوق السرير) وانتم عارفين انتحار من على السرير بتبقى بهدله ونيله

خبر طازة حالا
القبض على حوالى 35 شخص من اهالى الاخوان المعتقلين فى الفيوم والقبض على صاحب مدونة اكيد فى مصر من امام المحكمه
لانه النهارده كان محاكمه مجموعه اخرى من الذين تم القبض عليهم من قبل
الخبر ده وصلنى من عبد الرحمن فارس وهو اكيد هيكتبه
تعليقى بقى معرفش هيفرجوا عنهم ولا هيسبوهم ومعرفش ايه سبب القبض عليهم اصلا لما اعرف هقول واللى قبض عليهم امن الدوله
يا جماعه والله انا معاكم انه ده مؤسف جدا اللى بيحصل انا نفسى افهم ايه السياسه دى اللى هما بيعملوها طيب مبيحبوش الاخوان بيدخلوهم مجلش الشوعب المرجانية ليه طيب ودخلوا بيقبضوا عليهم ليه طيب اروح لحد مسؤل يفهمنى بجد لان دى قضيه منيله من زمان ولا احنا فاهمين وبنعمل مستهبلين ولا زى ما بيقولوا ان الاخوان دول كلهم مصالح شخصيه طيب نصدق مين ما كل واحد فى الدنيا له مصلحته الشخصيه الاول طيب معلش ربنا يفك اسرهم وربنا يظهر الحق ويرجع الحق لكل مظلوم ويهدى

اللى عاوز الاخبار يشوفها عند عبد الرحمن فارس

تحديث هام :- تم القبض على الناس دى لحين الانتهاء من محاكمه او التحقيق مع المحجوزين قديما ولم يتم حجز هؤلاء بل تم خروجهم بعد الانتهاء من الجلسه

صباح بقى الخير كده عليكوا

ومش عاوزة حد يقولى اهدى بجد دا انا بقيت زى نقار الخشب والقط والفأر وسبيس تون ومالكوم ان ذا ميديل دا انا عامله زى اللى بيلف فى دواير مقفوله
الاوفس بواى(عامل البوفيه) فى الشغل هيجننى كل يوم لازم الف وراه فى المكتب اقوله اعمل كذا وغير كذا طيب انا هشوف شغلى ولا شغله وكمان بيجى متأخر المهم ان ظروفه مش كويسه ومش عاوزة اخصم منه ومن كتر ما بقوله يعمل ايه مبقتش عارفه انا اصلا بشتغل ايه طيب هو ليه الواحد ميعملش اللى عليه من غير ما حد يقوله والنبى هنبقى كويسين ومحترمين.

كيلو الزيت بقى بثمانيه جنيه طيب استبدل الزيت بإيه بقى بلاش اكل حاجه محمرة بلاش استخدم زيت طيب استخدم ايه زيت عربيات غالى طيب زيت شعر بيجيب حاجات وحشه فى الشعر وسكان وحاجه نيله طيب اعمل ايه

مونجينى غير الشوكليت بوول اللى بحبها وعملها كده شكل غريب بس نفس الطعم بس ليه غير شكله دى كانت شبه البطه الاول وكنت انقض على رأسها اكلها الاول واقطم رقبتها وارتاح شويه واكمل الايدين والرجلين والبطن والحاجات دى وببقى مبسوطه عملها شبه البتاع ده اللى اسمه اكلير ييييييييييييييع وانا مش بحبه اصلا مش كفايه بقى وحرام اختراعات حتى الحاجه اللى بحبها ضاعت.

مش كفايه العربيات النقل طول ما انت ماشى مخبين ولد فى الصندوق ويرمى عليك طوب يكسر ليك الزجاج ويقولك الهوى طيب هو الهواء الوحش ده طيب ما تحكموا قفل الحاجات دى ولا لازم الزجاج يتكسر ونعمل ميزانيه للعربيه.
مش كفايه المطب اللى عند مستشفى مبارك بتاع الشرطة عامل زى اللى بيطلع جبل متكسر وتريح فوق شويه وبعدين تنزل عمرى ما شوفت مطب طوله متر ومكسر والا اللى بعديه يا دى النيله زييه بالظبط طيب هما هيخسروا ايه لما يغيروة ولا يسفلتوة .

مش كفايه اروح كل اسبوع اتخانق مع بتوع شركة النظافه الل بينظفوا السلم بتاع العمارة وعلشان مش بيجوا يعملوه كل اسبوع وبعد ما ينظفوة تقولش الاطفال اللى فى عمارة مستنين اللحظه دى وبينقضواعلى السلم ويحوشوا اكياس الشيبسى واللبان ويرموها عليه والله غلبت معاهم ومع اهليهم ويردوا بكل برود هى مش شقتك نظيفه ملكيش دعوة بالسلم هو السلم ده مش فى العمارة ولا ابن البطه السودا ولا المصيبه تلاقيهم عاملين اجتماعات كل يوم يشربوا نسكافيه فى شقة واحده ويتكلموا فى الدين طيب دى اول حاجه فى الدين النظافه (بس اوعوا تخافوا عليا انا اصلا مش بصاحب حد منهم لانهم بجد ستات فاضيه ووجعوا دماغى وجهله حافظين مش فاهميين وكمان مش بحب النسكافية).

انا شكلى كده هسيب شغلى والبس شوال وامسك واحد تانى فى ايدى وايدى التانيه عصايه وامشى اعلم الناس من جديد انا شكلى اتجننت صح.........

والا البنزين اللى بيقولك هيغلى طيب ليه ده ب140قرش طيب احط للعربيه ايه عصير قصب ده حتى غلى كنا بنجيبه زمان حدانا فى الكفر الاتنين ب25قرش دلوقتى العود الواحد ومن غير زعزوعه كمان ب4 جنيه وعلى رأى ابن اختى الصغير (سكر يا حصب) زى الراجل اللى فى الشارع بيقول بس هو لسه عنده سنه وثمانيه شهور فكلامه مقطع الراجل بيقول سكر يا قصب.
مش كفايه الاغانى فى الاختراع اللى اسمه تليفزيون ماله الراديوم وحش اهو على الاقل بنتصدم فى الاصوات بس مش فى الاشكال كمان.

مش كفايه الاستاذ/ كوزى ده اللى جاى ومعاه صحبته عادى مش مهم ويقعدوا فى جناح واحد عادى برضه ما كل الارانب قصدى الاجانب اللى فى مصر بيقعدوا مع صحبتهم فى اوضه واحده (دى ثقافتهم وحياتهم وحرياتهم ) بس المصيبه بقى ان ده اصلا بيكره العرب كلهم وبيقول انه هينظف فرنسا من الكلاب اللى فيها(يقصد العرب) وده عن لسان واحد مصرى صديق ليه عايش هناك طيب ليه يجى يقرفنا فى مصر بيطبعوا معاه البوس يوووووووا اقصد العلاقات (عموما كلها مهام رسميه ).

مش كفايه اللى مشوهين صورتنا جوة وبرة مش كفايه الشباب اللى بيهاجر لانه زهق من البلد (بس ده ليه تحفظ عليه شويه لانه ممكن زى ما جمع الاف يسافر بيها كان يفتح بيها مشروع فى بلده) بس معلش الاحلام الزايده.

مش كفايه فته الجمهوريه اللى فيه ناس افقهه منه بكتير وده طالع يرش علينا من اطباقه مش كفايه الناس اللى طالعين داعية اليومين دول وهما مش قادرين يكونوا اسوياء فى حياتهم وعندى نموذج كان جارنا منهم وبيطلع فى الفضائيات اه والنبى اللى وديتنا فى داهيه .

مش كفايه اللى بحبه وعامل زى ابو الهول مبينطقش ولا يقول (نفسى حد يعلمه حتى لغه الصم والبكم يمكن يتكلم ويقول الكلمه دى وبعدها هموته بايدى بس ينطق)عارفين ابو الهول هينطق قبله ويغنى ليه كمان وهو هيفضل ساكت وكل يوم يعمل زى شهرزاد هقولك بكرة يا مولاى عاوزة اعمله خطه مضاده يتكلم بيها حد عنده حل للموضوع ده.

مش كفايه الصين غزت مصر وبقوا عاملين زى الصراصير فى كل مكان انا خايفه بعد كده يستوردوا لوزة واكلها من الصين دا اللبس كله صينى وانا مش بحب اللبس ده لانه بجد خامات رديئة جداااااا وبضطر اسفه اشترى بران نيم (ماركات يعنى بس ببين لكم الثقافه) ودى بتخلص المرتب كله فى جاكت او بنطلون هى الصناعه المصرى وقعت من الدور التالت وانتحرت .

ومش كفايه سيادة المستشار اللى بيسرق حاجات من المدونات ويقلف بيها كتب وكمان رافع قضيه يقفل المواقع (طيب خلى عنديك شويه من اللى لونه احمر بتسرق احلام شباب صغير بس القضاء المرة دى اثبت هو والقانون انه معندوش خرم فى المله وتم تصليحها)

مش كفايه الدواء اللى بقى اسعاره نار عارفين انا رجعت للطبيعه اه والله بشرب الحاجات اللى ربنا عملها وقررت اعمل مقاطعه للدوا انا اصلا مبحبوش معدتى بتوجعنى منه ولما اصدع انطح خروف من خرفانى يروح الصداع او اخبط قله عادى (اللى عاوز يقول ابعت له خروف او قله والتليفرى مجانا)
طيب بجد اتجننن ولا اعمل ايه انا اصلا نسيت انا كنت كاتبه دليه

صباح الخير عليكوا
بجد انا مبسوطة جدا لانى رحت مكان شوفت فيه الحاجات الحلوة دى كلها يوم الخميس وبعد الشغل بنخلص بدرى بدل الساعه 4 بنخلص 2 عقبالكوا يا رب كده المهم نويت وعقدت العزم كده يعنى انى اسافر البلد دى وخاصة انا سافرت قبل كده مرة واحده قعدت 3 ساعات ورجعت يعنى لقربها من القاهرة بنت أم عز اللى احنا عايشين فيها المهم عملت فيها ابن بطوطة وابن ماجلان واكلت الجمل ونويت الرحيل ورحت بدرى شويه علشان الحق الغروب(علشان اصور مش احب للناس اللى بتفهم غلط بس) المهم الطريق من القاهرة للاسماعيليه ساعه تقريبا بس طريق هايل لاحد بيكعبلك(المطبات يعنى) ولا حد بيديك كتف غير قانونى (بيزنق عليك) الطريق واسع وصلت بسلام ونزلت المخله من على الجمل وربطته(دى بطوط عربيتى يعنى) .
وقعدت الفلف بقى قبل كده كنت يعنى خايفه شويه وبلد جديدة ومعرفش حد هناك ليه واحده صديقتى يتيمه كده بس مش دايما بتكون هناك المهم فيها شارع كبيرررررررر اسمه عمارة السياحى وانا سألت الاولاد الحلوين اللى فى الكافيه اللى قعدت فيها (بس المرة دى من غير لوزة صحبتى)قالوا ليه انه شارع على اسم عبد المنعم عمارة والله فيه الخير ... انا مكنتش مصدقه نفسى من اللى شيفاه بجد لما رحت بالنهار نظافة ايه وجمال ايه ونظام والكوبرى والكورنيش اللى على القناة وشكل الغروب والقرى السياحية مفيش بعد كده وطبعا التكسيات هناك لونها اورانج وفيه بتاع صغير كده أصغر من الميكروباص مش عارفه اسمه لونه اورانج تحس كده وانت ماشى انك وقعت وسط جنينه برتقال واستفندى وهيص يا مان .
الاحلى بقى ان الحمد لله هموت وانا مبسوطه انى شفت ناس بتحترم الاشارات (ودى عقدتى طبعا) وفيه اشارات ديجيتال عقبال امالتكم زى الكاميرا كده بالثوانى تفتح وتقفل لوحدها والله ومفيش عسكرى وسبحان اللى الناس بتقف وبتحترمها انا فرحت قوى وحسيت كأنى فى كوكب تانى او اتخطفت وانا فى الفضاء الخارجى وخاصة انى ولا كنت نايمه ولا لوزة معايا يعنى انا صاحية اهو وعنيه متفتحه للحياة ومعنديش هلاوس وقولت مش هموت ونفسى فى حاجه شوفت ناس تختشى ومتخفش عكس(تخاف متتختشيش) وكمان الناس هناك حلوة وطييبين جدا .
والقناة (ربنا يرحم اللى حفروها بدمهم )كمان والمراكب اللى فى القناة وبتعدى والصيادين وبجد الشارع مش فيه زباله ولا حاجه والجناين وتحت السجر يا وهيبه ياما كلنا برتقال انا شوفت نخل وشجر يجنن بجد
بس الناس هناك لهم شكوى فى الاعياد ان الضيوف اللى بتزورهم وتصييف عندهم بجد بتبهدل البلد ومش بتحافظ عليها
وهما بيضايقوا قوى ( يا ريت للاخوة الزوار بلاش زباله فى الشارع ممكن نحطها فى كيس)علشان منقولش الحكومه بتعمل ومتعملش يعنى احنا اللى فينا سلبيات اهو ومش عاوزة ضرب بقى علشان انا مبسوطة
شوفتوا بقى يا جماعه ان سهل قوى علشان نبقى مجتمع نظيف وراقى وكويس ومتحضر ومعندناش انتهاكات لحقوق انسان ولا لكرامة حد سهل قوى بس نبدأ بنفسنا بجد نبدأ بالاسرة اللى هى الاساس كل واحد يعود نفسه على الكويس مش يمشى على رأى عليوة مع القطيع احنا مش قطيع احنا ربنا ميزنا بالعقل علشان نفكر مش نبقى كدابين زفه وكل واحد يقولك انا مالى نفسى نبقى زى البلاد اللى بره فى كل حاجه وعوا أولادكم على النظافه والالتزام واحنا كمان واحنا كبار سهل نصلح أخطائنا بلاش اهمال فى حياتنا هنرتاح الاهمال زى ما هو سهل كمان الالتزام سهل وبيريح وساعتها بس مش هيكون فيه فرق بين اى حد فى الثقافات طالما هنتمسك بحاجات كويس والدين بتاعنا خير مثل لينا
وأخيرا عاد ابن بطوط من رحلته الخزعباليه من بلاد اليس فى بلاد العجائب لانى بجد مكنتش مصدقه انى فى مصر واللى مرحش البلد دى يروحها لانها قمة الهدوء والنظافه وكمان رخيصه جدا الكافيهات هناك (يعنى اللى عاوز يأخد الموزة خطيبته يعنى مش حاجه تانيه او الموديم المدام يعنى والاولاد يروح على ضمانتى )والاكل كمان والسمك .....السمك السمك تحفه بجد وان شاء الله اشوف ايه البلد الجايه ايه لانى زعلانه من نفسى اسافر برة مصر ومش اشوف مصر كلها (والدور الدور الدور الدور موعوده ياللى عليكى) الدور على مين اللى مرحتهاش قبل كده واللى عاوز يجى معايا اهلا وسهلا الجمل بيشيل اتنين وممكن نجيب حمار صغير كده والزاد والزواد موجود
على فكرة الاسماعيليه فيها حاجات من الطراز الانجليزى يعنى بعض المبانى الاحتلال بقى بس ساب حاجه كويسه

امبارح كله هجم عليه علشان الظباط وكله بعت ليه اللينك اللى بيقول ان ظابط مرور قتل واحد وانا التزمت الصمت وقولت ياليله عدى بقى ورحت بعد الشغل والقصه كالاتى:-
الظابط ده كان فى كمين عادى يعنى بيكشف على الرخص زى الدكاترة كده والراجل بتاع العربيه النقل كسر الكمين وخبط القرطاس(البتاع المستفز ده اللى لون اورانج) المهم الظابط جرى ورا الراجل علشان الرخص بالعربيه بتاعت المرور طبعا ووقفه قدام محجر على الطريق على ملحقه يعنى (مطاردة شريرة) وبعد كده حصلت خناقه بينهم تدخل فيها ناس كتير من المكان ده ومن ضمنهم راجل صاحب محجر المهم الخناقه تحولت من ما بين الظابط والسواق الى السواق وصاحب المحجر لان تقريبا صاحب المحجر عارف الظابط او السواق غلط فى الراجل مقدرتش اعرف فالراجل خبط السواق بحجر فى دماغه واتعور واللى نقله للمستشفى الظابط والراجل توفى زى ما الناس عارفه وتم اخلاء سبيل الظابط من النيابه والراجل محبوس على ذمه القضيه واللى عاوز يعرف يروح يسال الناس والله اعلم ولو عرفت جديد والله هقوله بصراحه مش هخبى علشان اعرف اول قله من القلل بتاعتى هتوقع على دماغ مين
تحديث:-
اسم الراجل اللى محبوس وضرب السواق على مصطفى محمود وده بتاع المحجر
وزى ما قولت المصادر بتاعتى الناس بس مش شخص واحد واللى عاوز يعرف الحقيقه يروح المكان اللى بتحصل فيه الحادثه ويسأل اكتر من حد ويفكر ما بينه وبين نفسه ايه الصح والحقيقه فين وده طبعا اللى دينا كمسلمين او مسيحين بيحس عليه اننا يكون لنا مصادر فى تقصى الحقيقه من ناس اهل للثقه ولها شروط اعرفوها وانتم هتفهموا وبلاش ننقل اخبار من بعض وبس يعنى انا مكنتش بقول حق البنزين استعباطا لانى رحت جد وبينى وبين الشرقيه حوالى 80كيلو

أوعى سيبونى محدش يمسكنى هو انا ناقصه هسهس بعد المعاناة طبعا اللى بعانى منها كل يوم فى انى اصحى بدرى وضرب الموبيل كل يوم او محاوله التودد اليه علشان يسكت الصبح وهو بيصحينى وانزل الشارع وبعد عواصف طول الليل امبارح فى روسيا قصدى القاهرة الجديدة والحمد لله امر بسلام من الناس اللى بيخافوا من عمو رصيف الوحش ده .
تبدأ الاكروبات العالميه فى السواقه على الطريق اولا من ميكروباصات شمال ويمين لعربيات نقل وانا يا عينى عربيتى صغيرة وبحس فعلا انا ولا الاتوبيس ولا النقل بيشفونى بكون عامله زى النمله جنبهم بس ربنا بيسترها عليا فى النهايه حاجه غريبه جدا احنا عندنا فى القاهرة الجديدة كمبوند أجانب القطامية هايتس( وده مش انجليزى يا مرسى) بس الاجانب دول بجد حاجه عبقريه عندهم الاختراع الحلو اللى اسمه احترام المرور والمفارق مش عندنا احنا مفارق مين الفرق فى الشعر وكمان عندهم الاختراع اللى احنا مهملين فيه وانا من اول الحاجات اللى هطالب بيها انهم يلغوا اشارات العربيات اللى هى شمال ويمين فى العربيات بجد ناس محترمه فى كل حاجه فى بلدهم وخارجها يا رب تتنقل لينا العدوى دى
وتبدأ المعاناة فى طريق طويل كده اسمه إن ايه ومحدش يسألنى ايه ده هو اسمه كده روحوا اسألوا شركة عثمان احمد عثمان على ما تناما لعلمى (حلوة تناما دى يعنى انا بطلع ومثقفه) والحمد لله مش هلاوس ولا هساهس ولا هواجس من اللى بتجيلى ساعات كده يعنى ان الحارة اليمين للناس اللى بتمشى بسرعات قليله والنقل والشمال للناس المتهورة اللى زى الاقى بقى واحد او احدة بصراحه منقضه على الدريكسيون زى الفريسه او زى اللى قفش فى حرامى غسيل اقول ما علينا بس على فكرة ده غلط لازم نسوق واحنا ظهرنا مفرود علشان السمه المميزة لنا متظهرش(الكرش يعنى فى سركم) وكمان علشان العمود المتفقر اللى فى ظهرنا(معلومات طبيه ابقى زرونى فى الصيدليه بقى) طيب انا عاوزة اعدى اقلب نوووووووووووورررررررر كتير ولا كأنى بعمل حاجه طيب يا جماعه والله الكلاكس ده مزعج والنور بجد بيلفت النظر سواء الصبح او بالليل وده معلومه اكيده من ناس خبرة فى السواقه (خبرة خبرة يعنى)انما ايه على مين انت بتقلب نور ولا هعبرك وبعد طلوع الروح يعديك وانا بكل ادب ابص علشان اقوله ميرسى يقوم يحرك ليه ايديه كده كأنه هيقلع اللى فى رجله ويضربنى بها طيب هو انا عملت ايه اقول امشى يا شوشو على الصبح وبلاش رخامه.
نروح للاشارات شمال ويمين يعنى اللى عاوز يروح شمال او يمين او يدخل شارع انا اكتشفت وده هطلب بحفظ حق الملكيه(لان ده اكتشاف بجد) فيه ان الناس نسيت الموضوع ده اكتر وده اللى بيسبب حوادث بجد ومرة وقفت واحد فضلت ماشيه وراه كتير وهو مشغل الاشارة الشمال وفى النهاية دخل معايا يمين فسالته قال اه معلش اصلى نسيتها قعدت اضحك الناس من كتر ما هى مش بتستخدم الحاجات دى بتنساها بجد وعلشان كده الطرق سلطه بجد وتحس انك وقعت فى طبق تورلى (خضار مشكل كده بس مبحبوش) ومش فاهم حاجه ولو فهمت حد يبص لك بقرف كده كأنك مثلا جاى من فيلم كارتون او طالع من سبيس تون وراجع ودى بجد طلباتى ويا ريت توقعوا عليها معايا:-
الغاء جميع الاشارات من السيارات المصريه لاننا هنستعوض عنها برأس او ايد تعرف الناس احنا هنمشى فين (ومتستغربش بقى لما تلاقى السما بتمطر اعضاء بشريه)

الغاء نور السيارة وذلك توفيرا فى الكهربا

تكبير صوت الكلاكس علشان يجيلنا هلع وفزع واحنا سايقين ونعمل حوداث ونبقى خففنا من ازمه السكان والمواصلات
-يا سفلته الطرق علشان بجد عفشه العربيه باظت يا نسيبهم براحتهم يبوظوها ويعملوا لنا كبارى معلقه او تركيب جناحات للسيارت

ابيع عربيتى وان شاء الله ما رحت الشغل واقعد فى البيت

الغاء اختراع الحارات ويسيبوا الناس براحتها يعنى تلاقى واحد معدى من شمالك عادى يمينك ميضرش فوق مش مشكله
بس بجد الحاجه اللى بطمن واللى تفرح مواقف الناس ساعة الحوادث بجد كله تلاقيه واقف وبيخدم وهو ده المصرى الجدع سواء بنت او ولد يعنى اعمل حادثه وانا مطمنه
وفعلا السواقه فن وأدب وبطيخ

انا بس عاوزة اسأل الناس اللى واجعين دماغنا بحموم الانسان والكرامة للانسان والتعذيب فى الاقسام والشعارات الكدابه اللى خنقتنى دى
اولا انا من قبل كده عملت بوست عن واحد بعت تظلم لحقوق الانسان فى قطر وهو مصرى ومحدش اتحرك ما علينا تعالوا بقى للقصه والله دى حصلت فعلا يوم الواقفه:-
بلاغ من النجدة(122) لاحدى الاقسام فى بلد (طبعا هنا فى مصر )فى الاقاليم المهم اتنقل ظابط المباحث وراح البلاغ ايه اللى شافه طفله عندها 13سنه لا تمت للانوثه بشئ طفله لسه مغمى عليها فى بيتها وملابسها شبه مقطعه والدم على انحاء جسمها وام فلاحه غلبانه ملهاش غير الطفله دى كانت برة البيت ورجعت لقت بنتها كده المهم نقلها الظابط القسم بعد البنت ما فاقت وراح بيها القسم واتقلبت الدنيا البنت فى حاله ذهول ولا قادرة تمشى ولا تتكلم ولا تقف على رجلها وامها قاعده على الارض على البلاط فى البرد اللى احنا فيه ده بتعيط وتلطم حظها فى بنتها يوم كامل قدام الظابط اللى سنه 25سنه بس الوضع ده طفله مش بتتكلم متبهدله وامها بالعياط بتاعها ده تانى يوم اللى هو اول يوم العيد والاطفال راحوا العيد اللى فى سنها وفاقت البنت شويه وبدأت تتكلم وكانت المصيبه قالت اللى عمل فيها كده ابن عم ابوها ووصف الراجل ده لما اتقبض عليه كالتالى رجل كبير فى السن تخطى الاربعين متزوج من ثلاث سيدات ومعاه فى بيت واحد فى بلد فلاحين قبض عليه الظابط وراح القسم وبصراحه مسكتش على كده علقه فى الكهرباء(ومش عاوزة حد يقولى ليه عمل كده علشان مدلوش بالبوكس فى عنيه) وبعد كده اتعرض على النيابه بس بصراحه بعد ما كان ورم من الكهرباء دخل النيابه الوكلاء ضربوه وبعد كده دخل الحجز والله كل اللى فى الحجز لما عرفه اللى عمله ضربوة وبكل بجاحه يرد على الظابط بتاع المباحث ويقوله اذا كان مضايق سعادتك اللى عملته اتجوزها عادى يعنى وخلصت القصه والراجل عامل اضراب عن الاكل يومين .
تعالوا بقى قولى حط نفسك اوانتى حطى نفسك مكان الظابط ومنظر الطفله هتعملوا ايه تخيلوا دى اختك او بنتك او بنت عمك او اى حاجه هتكون مشاعرك ايه بجد لما تشوف طفله مظهرش عليها اى علامات الانوثه وامها كمان بالانهيار ده هتعملوا ايه
هيردوا عليا بتوع حموم الانسان ويقولوا ليه بس يسيب العدل والقانون(القانون فيه خرم فى المله) يأخد مجراه انا مش بتكلم فى كده فى نفسيه حط نفسك مكان الظابط ووكيل النيابه حتى المحجوزين فى القسم اللى منهم حراميه ومجرمين عملوا ايه
انا بتكلم عن نفسيه ان الظابط ده انسان فى النهايه له مشاعرة مش حجر ولا هو فيكون فضائى نازل علينا من كوكب تانى(ومش عاوزة ضحك) قولوا ليه يا بتوع حقوق الانسان هدافعوا عن مين اللى اغتصبت من راجل متجوز تلاته ولا عنه لانه اضرب وعلى فكرة علشان محدش يقول انا مع التعذيب لا والله بس بقول لكم انه فيه حاجات بتدخل فيها نفسية انسان ومشاعرة بعيد عن وظيفته ابقوا قلولى بقى تعملوا ايه لو انت مكان معاون المباحث ده بجد وسورى انى نكدت عليكم بالحكاية دى بس بجد أتوجعت لما سمعتها الدنيا قامت وقعدت علشان صدام اتعدم اول يوم العيد مع انه كان ظالم وكمان قاتل ناس كتير
طيب والطفله دى اللى اغتيلت برائتها واغتصبت يوم وقفه عيد ومعرفتش تروح تعيد مع اصحابها تانى يوم بدل ما تروح العيد وتلعب والمراجيح راحت الطب الشرعى عاوزين قانون يحفظ كرامة الانسان اى انسان ده اللى هو اصلا مش حافظ كرامته .
حد يعرف يقولى سبب واحد يخلى الراجل ده يغتصب الطفله دى(واوعى حد يقولى كبت جنسى ومخدارت اصل هاااااا اديله مقلب حراميه واخبطه بالقله على دماغه)
سلم لى يا صاحبى على حموم الانسان اللى مش باين لها عمل غير فى مصر بس علشان تشوهه صورتها فوقوا بقى وشوفوا الناس دى بتعمل ايه
ملحوظة اتكسفت اقولها بس منه لله اللى خلانى اقولها:-
(البنت احتمال تطلع حامل بس مش هيبان طبعا الكلام ده دلوقتى)انتم طبعا فاهميين ليه

امبارح بالليل وانا راجعه بعد الشغل والمعاناه طول اليوم(طبعا تمثيل معاناه ايه احنا بطاله مقنعه بنروح الشغل نشرب شاى) المهم وبعد الغدا وانا قاعده ممددة على الشازلونج (ده اختراع بقى زى الكنبه اللى فى دوار العمدة بس مريحه شويه) ومدده كده وبقلب فى الاختراع العبقرى الهلامى اللى اسمه تليفزيون الله يرحم ايام زمان اللى كان عنده راديو يبقى اقطاعى المهم وبقلب وبتنقل بين القنوات الفضائيه بالمركبه الفضائيه بتاعتى القنوات الهلاميه الخزعبليه القشوريه الجمبريه اللى بتجيب اغانى لقيت خير اللهم اجعله خير واحد اسمه(عماد زعرور) الله مين زعرور ده مش عارفه اقول يمكن لوزة تقلت العيار معايا شويه وانا مش شايفه اقول يا بت لا انتى كويسه المهم الزعرور ده بقى طالع بفلنه داخليه وواحده غريبه فى شكلها ولبسها كده قولت لا حول ولا قوة الا بالله اكيد انا مت وروحت النار وبتعذب علشان اللى انا شايفاه ده وبينط من مكان لمكان وصوته يا ساتر يا رب والغريبه انه جايب توم معاه اه والنبى توم من اللى بيتقشر ويتعمل على الاكل (المعلومة دى لربات البيوت)قولت يا خبر ربنا يستر والتوم كمان ميغلاش زى البصل اصل انا مؤخرا اكتشفت ان مش الطماطم لوحدها اللى مجنونه دى انتشرت العدوى دى بين كل الخضار المهم قعدت اعصر فى الطماطم (قصدى دماغى) لغايه لما افتكرت ده زعرور بتاع سوق العبور ....سورى قصدى بتاع اغنيه العنب والخضار والفاكهه يعنى ومنتجات البحر الاحمراللى الاخ المبجل سعد الصغير سرق قفصين عنب ياعينى من عنده فى سوق الخضار
قعدت اتفرج وانا مزبهله من هول الصدمه وتمنيت انى اقوم من النوم بس اتضح فى النهايه انه انا مكنتش نايمه ولا بحلم واتاكدت لما سمعت الصوت الهلامى بتاع زعرور فى الشارع وانا نازله وكان فى الميكروباص
بس انا عاوزة حد يقولى هى دى الثقافه الجديدة اللى هندرسها ولا ايه
ولا البنت التانيه اللى قرفانه من كل حاجه اللى اسمها (يايا) والاغنيه اللى قهرتنى على رأيها اللى اسمها ياى
انا بقيت اتمنى ان الاختراع ده يتنسف او اكون مهيسه مع لوزة صحبتى(لوزة دى الشيشه بتاعتى وهى ساكنه معايا فى البيت علشان عليها حكم وهربانه ومحدش يبلغ عنها انا بقول اهو)

اووووووووف كل يوم الصبح وانا نازله من البيت بعد معاناه انى اصحى بدرى والموبيل يترمى مرة من رنه المنبه ومرة اخده فى حضنى واغطيه علشان يسكت كل ده علشان مصحاش من النوم وفى النهايه بصحى غصب عنى وبنزل من البيت وانا شبه اتوبيس هيئة النقل العام ابو خطين اللى كان بيمشى متر ويقف باقى اليوم مكانه وتبدأ رحله العذاب مع انى ساكنه فى منطقه جميله وهاديه جدا ولسه مدينة جديدة ونظيفه وتبدأ مرحلة الغيظ من الناس بقى نفسى اسال حد هو يعنى مش الحكومة يعنى اللى هى احنا بنشيله ونحطها بالشتيمه اخترعوا الاختراع العبقرى اللى اسمه رصيف علشان الناس تقف عليه تستنى المواصلات هتقولوا ليه طبعا وعندنا عاملين مكان لانتظار الاتوبيس والميكروباص شكله حلو قوى يعنى ممكن اقعد انا وواحده صحبتى فيه ونشرب نسكافيه كمان ........طيب الناس بتسيب كل ده ليه ويوقفوا ليه فى نص الشارع هو فيه دكتور كاتب لهم الوقيفه فى الشارع ولايمكن دى واقفه احتجاجيه على الرصيف وعاوزينه يتنازل عن الوزارة والله يا جماعه الطامه الكبرى مش فى كده دى مفارق يعنى بتبقى لخبطه عربيه من الشمال لليمين ومبكونش شايفه من الناس اللى واقفه مع ان والله لو وقفوا على الرصيف هيركبوا عادى يعنى انما نقول ايه لثقافات الاحتجاج والمظاهرات ما علينا .
وأه يا ويلى يا سواد نهارى لو اديت كلاكس لحد علشان يعدى من الناس دى تلاقى نظرات شذرا(حلوة الكلمه دى بس مش عارفه صح ولا غلط) وبيكونوا عاوزين يضربوك وتسمع احلى كلام والله اصلا انا عربيتى صغيرة كده وعلى قدى بس تقول ايه بقى فبسكت واخد لفه من بعيد بدل ما يعملوا مظاهرة عليه بيكون نفسى الصبح ابوس ايديهم واحد واحد واقولهم والله عمو رصيف ده مش بيعض وكمان بيمنع الحوادث ما هو مش معقول يحتلوا الشارع دى المدينه لسه جديدة وكبيرة
يا رب ارحمنى والاقى ناس تجاوبنى هو الرصيف ده حرام ولما يعنى اخبط حد واعمل حادثه هيجيبوا الغلط عليا ولا على الرصيف اصله مكنش واقف تحت رجليهم واكمل لكم رحلة المعاناه بعدين

بسم الله الرحمن الرحم
التاريخ :12 / 12 / 2007
سعادة المحترم /رئيس لجنة حقوق الانسان


تحيه طيبه وبعد ،

مقدمه لسعادتكم / مصري الجنسيه واحمل بطاقه شخصيه رقم :

( مهندس مدني مستثمر )

ضـــــــــــد

سعادة الشيخ / سلمان حمد سلمان جاسم ال ثاني قطري الجنسيه ت : 4370707 ف : 4370770 جوال : 5555480

أتشرف بعرض الاتي :
اولا :ـ تشرفت بمعرفة المشكو في حقه والذي كان كثير الكلام معي عن امكانية الإستثمار في هذه البلاد الطيب اهلها وخاصة مع فرص الاستثمار العقاري والنهضه العمرانيه غير مسبوقة النظير التي يشهدها هذا البلد الطيب . وعليه تم استقدامي الى دولة قطر بموجب فيزا رجال اعمال عبر شركة المشكو في حقه شركة هبسـون .
( لطفا راجع المستند رقم 1 من حافظة المستندات )
وتم هذا الاستقدام على وعد شخصي منه لي بالمشاركه والاستثمار داخل دولة قطر.

ثانيا :ـ وهنا اود ان الفت عناية سعادتكم انني مهندس مدني منذ عام 1985 م وامتلك مؤسسه تعمل في مجال المقاولات بالمملكه العربيه السعوديه برأس مال إثنين مليون ريال سعودي بنظام الإستثمار الاجنبي وبترخيص من الهيئه العامه للإستثمار.
( لطفا راجع المستند رقم 2 من حافظة المستندات )
كما اني وبفضل الله تعالى امتلك شركه هندسه ومقاولات وتوكيلات تجاريه واستيراد وتصدير بجمهورية مصر العربيه منذ عام 1986 م برأس مال : خمسمـائة الف جنيـه
( لطفا راجع المستند رقم 3 من حافظة المستندات )
وايضا بفضل الله امتلك 50 % من اسهم الشـركه المصريـه للصـناعات الكيمـاويه والدهانات شركه مساهمه مصريه وفقا للقانون 8 لسنة 1997 م وبراس مـال قدره : خمسة ملاين جنيه
( لطفا راجع المستند رقم 4 من حافظة المستندات )
وعلى هذا الاساس كان التقارب والمصالح المشتركه بيني وبين سعادة الشيخ وفي سبيل تحقيق الاستثمار على النحو سالف البيان تم استقدامي بفيزا رجال الاعمال بدعوه من شركته الخاصه السابقة الذكر( هبسون ) .

ثالثا :ـ الا انني فوجئت بسعادة الشيخ يخطرني عن طريق ادارته ان هناك بعض الاجراءات القانونيه التي يجب اتباعها في الدوحه حتى تكون اقامتي شرعيه واتمكن من العمل بشكل رسمي وانه سيتولى انجاز هذه الاجراءات وفق القانون ولا يحتاج مني سوى تسليمه جواز سفري الخاص والتوقيع على بعض الاوراق كناحيه شكليه لتقديمها الى ادارة العمل والجوازات وفي سبيل ذلك تم الاتي :

1 ـ استلم سعادة الشيخ جواز السفر الخاص بي .

2 ـ تم توقيعي على عقد عمل لم احصل على نسخه منه وتسليمه لادارة العمل وذلك مقابل راتب شهري 5000 ر. ق خمسة الاف ريال قطري قيل لي انه مجرد روتين

هذا وكان باكورة النجاح هو استخراج الاقامه الخاصه بي وهي الشئ الاهم لمباشرة عملي كمستثمر ولكن ظل جواز سفري في حوزة الشيخ .
( لطفا راجع المستند رقم 5 من حافظة المستندات )

3:ـ تم الاتفاق على ان يخصص لي راتب شهري قدره : 12000 ر. ق اثنى عشر ألف ريال قطري كمصروفات شخصيه نظير الاشراف على مشاريعه الخاصه ومـا سوف نقوم به من مشاريع وقدم لي سعادته شهاده تنص وتفيد ذلك .
( لطفا راجع المستند رقم 6 من حافظة المستندات )

4:ـ هذا ومن اجل انجاز اوراق السجل الجديد لشركتنا المزعومه طلب مني التوقيع على مخالصه بجميع مستحقاتي لشركة هبسون ملك سعادته والتي قد تم عمل اقامتى عليها حيث انني في حقيقة الامر ساقوم بادارة شركتنا الجديده واستثمار اموالـي بها وانني ساتقاضى راتب شهري 12000 ر. ق من شركتنا الجديده حين الانتهاء مـن اجراءاتها ونقل كفالتي عليها، وعليه فعلا وقعت على المخالصه
( لطفا راجع المستند رقم 7 من حافظة المستندات )

هذا ولم يقوموا بعدها باتخاذ أي اجراء بخصوص الشركه الجديده رغم انني باشرت العمل بالاشراف على مشروعه الخاص ومع ذلك لم استلم أي راتب سوى شهر يناير

رابعا :ـ ظننت في بادئ الامر ان هناك نوع من البيروقراطـيه يعطل انجاز الاجراءات ورغم تاكيد الجميع ممن عرفتهم في هذه البلاد على انتفاء البيروقراطيه وان الحكومه القطريه حكومه اليكترونيه ( كمبيوتر ) ولا توجد ثمة تعقيدات الا انني كنت على ثقه تامه بالشيخ وأيضا ان في تعطيل الاجراءات وعدم انجازها من قبلهم هو ضرر لنا جميعا .

خامسا :ـ هنا جائت الطامه الكبرى بالنسبة لي حيث فوجئت بان الشيخ يمنعني من الذهاب الى السعوديه لكي اوقع على الميزانيه السنويه وايضا كذلك تجديد السجل التجاري الخاص بمؤسستي بالسعوديه والذي ينتهي في :22/8/1428 هـ الموافق 10/9/2007 م وكان منعه لي بامرين :

اولهما : رفضه تسليمي جواز سفري وثانيهما : عدم منحي الخروجيه
وهو الامر الذي عرض مؤسستي وسجلها للضياع وهو الامر الذي لم اجد معه بدا من محاولاتي المستمره للوصول الى حل مع سعادة الشيخ الا ان جميع محاولاتــي باءت بالفشل وازاء هذا لم اجد سوى رفع الدعوى القضائيه رقم : 1305 لسـنة 2007
ضد سعادة الشيخ وشركته .
( لطفا راجع المستند رقم 8 من حافظة المستندات )

سادسا :ـ هذا ولما كانت جميع المستندات الرسميه تثبت صحه كلامي هذا وبالتالي تثبت انني علـى حق وبما انني تعلمت على ايدي سعـادتكم ان للحـق ميزه لدى صاحبـه تجعله في موقف مشروع تتضافر قوى النظام الاجتماعي على رأسها لجنتكم الموقره على حمايته وذلك لانكم بشهادة الجميع تريقون دماء شبابكم سطورا في قرارات تحفظ لافراد هذه الامه ولمجتمعاتنا حقوقها وتصون كرامتها وتقف حجر عثره في وجه من اراد النيل من حرياتها التي لا تزالون تصرخون في وجه أي ظالم ايا كان مركزه بان نيل الحقوق وحفظ الحريات كالخبز حق محتوم لكل مواطن وان الانسان كل انسـان حري بأن تصان كرامته حري بأن يحفظ عليه وقاره فلا يؤخذ في امره بالمظنه ولا يجري حسابه على اساس من العبث، إذ العابث بحقوق الغير يأمل ان ينشأ لذاته او لغيره حقوقا بإغتيال حقوق الغير إغتيالا لحمته الغش وسداه سوء الضمير .
وحيث ان سعادتكم تقفون في وجه من يعمل على هضم الحقوق وحبس الحريات إذ انكم لاتخشون في الحق لومة لائم ... لذلك التمس من سعادتكم عودة حقي المسلوب اقصد ابسط حق وهو حصولي على جواز سفري الخاص بي واصدار توصيتكم بنقل كفالتي . لانني منذ وطأت قدماي هذه الارض المباركه وانا محمول على تضيع مدخراتي وتفويت جميع فرص الاستثمار التي تعمل جميع الدول وعلى رأسها دولة قطر على تنشيطها وتفعيلها حيث انها تعود بالخير على الجميع ولعل يقيني بذلك وما أراه من خير في هذا الوطن الغالي هو ماحملني على المساهمه بشركه قطريه بنسبة 40 % من راس المال.
( لطفا راجع المستند رقم 9 من حافظة المستندات )

سابعا :ـ سيدي ارفع كتابي هذا وانا على يقين تام بانكم القانون الحي وبغيركم يصبح القانون عاجزا لاخير فيه ولذلك فانني وكل افراد الامه نمتلئ احتراما وتقديرا ومحبه وإجلالا لأنه دوما يبزغ فجر العدل والحق من لجنتكم الموقره على الجميع ،

وانني لأرفع اكف الضراعه ان يبزغ علي فجر يوم جديد لأجد جواز سفري بحوزتي وكفالتي على غير هذا الرجل فلست مرهونا وحبيسا بيد رجل لم يعطيني حقي الأدبي ولا حتى الحق المادي الذى اقره بمبلغ اثنى عشر الف ريال شهريا رغم عملي لديه حتى اليوم ولم يوفي بوعوده معي رغم علمه بحجم اعمالي في مصر والسعوديه وانني اطلب ذلك لاني علي يقين بأن شمس الحقيقه لن تحجبها غيوم الباطل ....
وان غدا لناظره قريب ...
سيدي .. إن إقامتي تنتهي في 13 / 12 / 2007 وان طلبي في الحصول علي جواز سفري ونقل كفالتي بموجب قراركم الكريم والعادل ان شاء الله يكون رفع الظلم مستمر ومتواصل على نحو سالف البيان فلترفعوا عني الظلم حتى يقول القضاه كلمتهم ... ويصدر حكمهم ... فقضاة امتنا قضاة حق وعدل .

لـذلــك

لكل ماسبق ولكل ماترونه سعادتكم اعدل واقوم ومبررا ومسوغا قانونيا
لصدور قراركم العـادل بنقل الكفاله على اي كفيل اخر ارجو والتمس من سعادتكم اصدار قراركم الكريم والعادل :ـ
بتسليمي جواز سفري ونقل كفالتي على كفيل اخر ولو بصوره مؤقته حتى استطيع مسرعا ان اجمع ماتبقى لي من اشلاء لحين الفصل في الدعوى القضائيه .

وتفضلوا بقبول فائق الإحترام والتحيه ،


مقدمه لسعادتكم
مستثمر ومهندس مدني مصري
دى رساله وصلتنى من شخص مصرى أعرفه جيدا لو قلت أننى اعرفه اكثر ما أعرف نفسى فيكون هذا قليل انه الانسان الوحيد الذى عرفته فى حياتى وأعلم انه يتميز بطيبه وأخلاق فى زمن ضاعت فيه كل هذه المسميات فهو كلماء والهواء بالنسبه لى وهذه احدى مشاكله وهذا ما تعرض له فى غربة وهذا القليل هناك الكثير عنه فقد خانه صديقه وابن بلده أيضا ولانه لا يحب غير نفسه فهو السبب فيما يحدث الان لهذا الشخص المظلوم والذى اعلم جيدا أن الدنيا ظلمته كثيرا .

فهل سنجد يوما يعود لهذا الشخص حقه أم سيضيع مثل باقى المصريين الذين يتعذبون فى الخارج والداخل مش عارفه بجد امتى هنكون لينا اهميه وسط الشعوب الاخرى على الرغم من لو أننا نظرنا هنلاقى احنا بنعمل للناس دى الكتير قوى وبنساعدهم كتير قوى كل الشعوب العربيه قبل كده اتبهدل المصرين فى الكويت وقبلها السعوديه ودلوقتى قطر طيب نعمل ايه واحنا بنقابل الناس دى فى بلدنا بكل حب واحترام نتحول زيهم ونعاملهم بمعاملتهم ام ستتحرك الحكومة وتحفظ لنا حقوقننا داخل وخارج البلد .

يارب ألاقى الاجابه عند حد ويارب الناس تتحرك

وعلى رأى اللى قال متقولش اديتنا ايه مصر قول هندى ايه لمصربس انا مع الشطر الاول اديتنا ايه مصر احنا بنحاول ندى بس هى مش بتدينا

عندما يخون الصديق صديقه ماذا يبقى لنا فى الدنيا لو بحثنا عن كلمه صديق ماذا سنجد معناها هل من المنطق والعقل والدين ان يسرق الصديق صديقه يسرق مال لا يملكه ل على سبيل الامانه عنده هذا هو الدين والمجتمع اى دين واى قانون يسمح بهذا وفى النهايه يخرج لعدم كفاية الادله اى قانون يمنح هذه الميزة اى انسان فى الدنيا حتى لو لم يكن يرى ويعرف الذى حدث يحكم على هذا الشخص انه الوحيد السارق ولكن فى قانوننا (قانون الكوسه والباميا مع حفظ حق الملكيه لصاحب كلمه باميا) يخرج السارق ويضيع حق صاحب المال .

ما هو هذا الزمن الذى يقف ضباط المباحث عاجزه عن إثبات حق فرد فى مجتمع كل خطئه انه راعى الصداقه بل وكان يقطع من طعامه ليعطى صديقه الذى خانه فيما بعد هل كان خطئة انه تربى جيدا وعلى اخلاق.

متى سيتغير القانون ويستطيع الفرد ان يعيش بسلام ويرجع له حقه بعيدا عن المحسوبيات والاعتبارات الاخرى

أقف عاجزة عن هذه الاجابه فهل من مجيب هل سيتغير القانون ويستطيع حماية الافراد ام سيظل أعمى ولا يستطيع وكيل نيابه او ضابط ارجاع الحق لأصحابه ؟

جائنى كطفل صغير يبحث عن حضن أمه كى يوارى بداخل صدرها حزنه

كان يتمسك بى كطفل تائهه على درب عتمه لا يرى سوى صدرى لكى يرمى به أحزانه وألامه

يخبأ رأسه فى حضنى ولا يتحدث ويستمر طويلا ويغفو كالطفل الحالم الذى لعب وشرب وأكل وراح فى نوم عميق

لا أعلم بما يفكر ولأنها عادته عندما تضيق به الدنيا يهرول الى مسرعا لكى يرمى حزنه داخلى دون أن يردد كلمه واحده غير أنه يتمسك بى و يغفو فى حضنى أفرح عندما أراه هكذا لاننى أيقن تماما أننى لا أزال حبيبته

درب النور الوحيد فى حياته بالرغم من كل ما فيها من أحداث ولكننى ابقى قلبه ونبضه وكل ما يملك فى الدنيا أفرح لاننى انتصرت على كل من حولى وأثبت انه فعلا جميل ان يكون لك صاحب انت قلبه لاننى انا الصاحب وانا القلب فى زمن لم يعد فيه هذا الاحساس فقد اندثر انتصرت على الشكليات والاجتماعيات فرحت لاننى بمسحه من يدى على جبينه ازيل عنه الهم والالم التى لا خرج من بين شفتاه

هذا هو الانتصار الحقيقى

كل سنه وكل الدنيا بخير وانتم بخير
ويبعد عنكم الناس الوحشيين اللى بيعيدوا على الناس الفجر وساعة الصلاة
وكل سنه وانت طيب يا حبيبى
ونصيحه اخويه بلاش لحمه كتير واللى زعلان من حد يصالحه واللى بيحب حد يقوله علشان يبقى عيد بجد

هااااااااى عليكو

انا مكنتش اعرف يعنى ايه تدوين ده خالص كنت جاهله تمام بالموضوع وده عادى لانشغالى (طبعا ده كدب من اولها لان ده جهل للجديد)ما علينا المهم كان بيشدنى قوى اخبار الاعتصمات والحاجات دى وعرفت احمد الجيزاوى مش شخصيا بس قريت عنه وكان فتحت خير عليه عرفت يعنى ايه مدونات فالفضل الاول ليه بجد هو وعبد الرحمن فارس صاحب مدونة لسانى هو القلم
وعموما شكرررررررررررا للاتنين علشان واحد جريت وراه علشان اعرف قصته والتانى فهمنى يعنى ايه مدونه وده اول بوست ليه